དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བ་གདུགས་དཀར་མོ་ཅན་ཞེས་བྱ་བའི་འགྲེལ་པ།
ཤཱུ་རཾ་ག་ཝརྨ་བཛྲ།
རྒྱ་གར་སྐད་དུ། སརྦ་ཏ་ཐཱ་ག་ཏོཥྞཱི་ཥ་བྷཱ་བ་སི་ཏཱ་ཏ་པ་ཏྲེ་ནཱ་མ་དྲྀ་ཏྟི། །བོད་སྐད་དུ། དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བ་གདུགས་དཀར་མོ་ཅན་ཞེས་བྱ་བའི་འབྲེལ་པ། འཕགས་པ་གཞན་གྱིས་མི་ཐུབ་པ་ཕྱིར་ཟློག་པ་ཆེན་མོ་མཆོག་ཏུ་གྲུབ་པ་ལ་ཕྱག་འཚལ་ལོ། །གཞན་གྱིས་མི་ཐུབ་དྲག་ཤུལ་ཆེ། །གཏུམ་མོ་ཆེན་མོ་སྟོབས་ཆེན་མོ། །འབར་བ་ཆེན་མོ་གཟི་བརྗིད་ཆེ། །དཀར་ཆེན་འབར་ཕྲེང་ཞབས་བཏུད་ནས། །རྫོགས་ལྡན་གྱི་ནི་བསྐལ་པ་ལ། །རྒྱལ་བ་འཁོར་འཇིག་དབུ་གཙུག་ལས། །ལེགས་ལྡན་ནག་པོ་འདུལ་མཛད་པའི། །རིག་སྔགས་དཀྱིལ་འཁོར་བཤད་པར་བྱ། །འདིའི་བརྗོད་པར་བྱ་བ་ནི་གང༌། འབྲེལ་པ་ནི་ཅི་ཞིག །དགོས་པ་ནི་གང༌། དགོས་པའི་དགོས་པ་ནི་ཅི་ཞིག་ཡིན་ཞེ་ན། བརྗོད་པར་བྱ་སྟེ། འདུས་མ་བྱས་མཁྱེན་པའི་ཡེ་ཤེས་བཞི་ཆོས་ཀྱི་སྐུ་དང༌། དག་པ་འཇིག་རྟེན་པའི་ཡེ་ཤེས་རིགས་བཞི་ལོངས་སྤྱོད་རྫོགས་པའི་སྐུ་དང༌། དཀྱིལ་འཁོར་བཞིའི་རང་བཞིན་བདུད་བཞི་འདུལ་བའི་སྤྲུལ་པའི་སྐུ་ནི་བརྗོད་པར་བྱ་བ་ཡིན་ལ། གདོན་མི་ཟ་བར་ཁོང་དུ་ཆུད་པ་ནི་དགོས་པ་ཡིན་ནོ། །བརྗོད་བྱ་ལས་འདོད་པ་སྐྱེས་པ་ནི་དེ་ལས་བྱུང་བའི་འབྲེལ་པ་ཡིན་ནོ། །དགོས་པའི་དགོས་པ་ནི་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐོབ་པའོ། །བསྡུས་པའི་དོན་ནི་ཕྱོགས་བཅུ་དང་དུས་གསུམ་དང་གཉིས་སུ་མེད་པའི་སེམས་དང་སེམས་ལས་བྱུང་བ་ནི་དེ་བཞིན་གཤེགས་པ་ཐམས་ཅད་དོ། །དེའི་དབུའི་གཙུག་ཏོར་ནི་ནི་དོན་དམ་པར་ཆོས་ཀྱི་དབྱིངས་ཀྱི་ཡེ་ཤེས་ཡིན་ལ། ཀུན་རྫོབ་ཏུ་ནི་དབུའི་གཙུག་ཏོར་
ནས་བྱུང་བའི་སྔགས་ཀྱི་དོན་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་ཀྱིས་བསྲུང་བ་དང༌། བསྐྱབ་པ་དང་སྦ་བར་མཛད་པའི་གསང་སྔགས་དང་རིག་སྔགས་དང་སྙིང་པོ་དང་ཉེ་བའི་སྙིང་པོའི་དཀྱིལ་འཁོར་གྱི་འཁོར་ལོའི་གཞི་ཕན་ཡོན་ལས་ཚོགས་དང་བཅས་པའོ། །དེ་ལྟར་དགོས་པ་དང་བསྡུས་པའི་དོན་བཤད་ནས། ཡན་ལག་གི་དོན་བརྗོད་པར་བྱ་སྟེ། ལྕང་ལོ་ཅན་གྱི་ཕོ་བྲང་ན་གནས་པ་སྡུད་པར་བྱེད་པ་ལག་ན་རྡོ་རྗེ་ལ་འཁོར་ས་བཅུའི་བྱང་ཆུབ་སེམས་དཔའ་ཀུན་དུ་བཟང་པོ་དང༌། རྡོ་རྗེ་ཆོས་ལ་སོགས་པས་བླ་གོས་ལྔ་བརྒྱ་སྟན་དུ་བཏིང་ནས། །ཆོས་ཀྱི་འཁོར་ལོ་བསྐོར་བའི་མོད། །བདེ་བར་གཤེགས་པས་གང་དུ་གསུངས། །རྡོ་རྗེ་འཆང་བ་ཁྱོད་སྨྲོས་ཤིག །ཤེས་རབ་སྲས་པོ་ཁྱོད་སྨྲོས་ཤིག །ཅེས་གསོལ་བ་བཏབ་པའི་རྗེས་ལ་འདི་སྐད་བདག་གིས་ཐོས་པ་ཞེས་གླེང་སླང་བ་གསུངས་སོ། །ལྕང་ལོ་ཅན་གྱི་བདག་པོ་ས་བཅུའི་དབང་ཕྱུག་གི་བློ་དྲན་པ་ཉམས་པ་མེད་པའི་ཏིང་ངེ་འཛིན་གྱིས་ཚིག་དང་དོན་མ་ལུས་པ་ནི་འདི་སྐད་དོ། །འཁོར་ལས་ཐོས་པ་མ་ཡིན་པ་དང༌། སྤྲུལ་པ་མ་ཡིན་པ་དང༌། བརྒྱུད་པ་ལས་མ་ཡིན་པ་དང༌། ཕྲིན་བཏང་བ་ལས་ཐོས་པ་མ་ཡིན་པས་ན་བདག་གིས་ཐོས་པའོ། །བདག་ཉིད་ཀྱིས་རྩོམས་བ་མ་ཡིན་ཏེ། བདེ་བར་གཤེགས་པ་ལས་ཐོས་པ་དེ་སྟོན་པས་ན་ཐོས་པའོ། །ཁྱོད་ཀྱིས་དུས་ནམ་གྱི་ཚེ་ཐོས། སྟོན་པ་གང་ལས་ཐོས། གནས་གང་དུ་ཐོས། འཁོར་སུ་དང་ལྷན་ཅིག་ཐོས། བཤད་པའི་ཆོས་དེ་གང་ཡིན་སྙམ་པ་ལ། ཀུན་རྫོབ་ཏུ་འདི་དང་ལྷན་ཅིག་དུས་གཅིག་གི་ཚེ་ཐོས་པས་དུས་གཞན་དུ་ཆོས་གཞན་དག་ཀྱང་ཐོས་པས་ཐོས་པ་མང་བ་དང༌། དོན་དམ་པར་སངས་རྒྱས་ཀྱི་བྱིན་གྱིས་བརླབས་པས་དུས་མཐའི་སྐད་ཅིག་མ་གཅིག་ལ་བློ་གྲོས་ཆེན་པོས་རྣམ་པ་ཅིག་ཅར་ངེས་ཏེ། ལྷས་བསྟན་པའི་རྨི་ལམ་དུས་ཐུང་དུ་ལ་དུས་གསུམ་གྱི་བསྐལ་པ་རྣམས་ཀྱང་ཅིག་ཅར་སྣང་བ་བཞིན་ཡིན་པས་དུས་གཅིག་ནའོ། །བདུད་བཞི་བཅོམ་པས་ན་བཅོམ་ལྡན་འདས་སོ། །ཉི་མ་བཅུ་གཉིས་དྲག་པོ་བཅུ་གཅིག་ཕྱོགས་སྐྱོང་བ་བཅུ་སྟེ་སུམ་ཅུ་རྩ་གསུམ་གྱི་བདག་པོ་བརྒྱ་བྱིན་ལྷའི་གནས་ཆོས་བཟང་ཞེས་བྱ་བ་ལྷ་རྣམས་ཀྱང་ཆོས་ཉན་པས་འདུ་བའི་ཕྱིར་འདུན་སའི་གནས་ནའོ། །དེར་རྒྱུན་
ཏུ་ཞུགས་པ་དང༌། ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་དང༌། རང་སངས་རྒྱས་དང༌། ཉོན་མོངས་པ་བཅོམ་པའི་དགེ་སློང་འདོད་ཁམས་དང༌། གཟུགས་ཁམས་ཀྱི་ལྷའི་བུ་རབ་ཏུ་བྱུང་བའི་གཟུགས་ཅན་དེ་རྣམས་བདུད་དང་བདུད་ཀྱི་རིས་ཀྱི་ལྷ་རྣམས་ཀྱིས་མི་ཕྱེད་པས་ན་དགེ་འདུན་ནོ། །བྱེ་བ་ཕྲག་བརྒྱ་སྟོང་གི་གྲངས་ཀྱིས་ཆེ་བ་འམ། དགྲ་བཅོམ་པ་ཟག་པ་ཟད་པ་ལ་སོགས་པའི་ཡོན་ཏན་གྱིས་ཆེ་བས་ན་ཆེན་པོའོ། །ཟག་མེད་སྐྱེ་མེད་ཀྱི་བྱང་ཆུབ་ལ་སེམས་དཔའི་ཡེ་ཤེས་ཕུན་སུམ་ཚོགས་པ་དང༌། ཉོན་མོངས་པ་དང་ཤེས་བྱའི་སྒྲིབ་པ་སྤངས་པས་སྤངས་པ་ཕུན་སུམ་ཚོགས་པ་དང་ལྡན་པའི་དཔའ་པོ་སེམས་ཅན་ལ་དམིགས་པའི་ཡོན་ཏན་ཕུན་སུམ་ཚོགས་པ། བསྐལ་པ་ཆེན་པོ་སྟོང་ཕྲག་བརྒྱད་ཅུ་རྩ་བཞི་མཁྱེན་པའི་མངོན་པར་ཤེས་པ་དྲུག་དང་ལྡན་པས་ཡོན་ཏན་གྱིས་ཆེ་བའམ། རྡོ་རྗེའི་རིགས་ཀྱི་ཕོ་ཉ་དྲུག་ཅུ་རྩ་བཞི་ལ་སོགས་པའི་གྲངས་ཀྱིས་ཆེ་བའི་དགེ་འདུན་འཇིག་རྟེན་ལས་འདས་པའི་འཁོར་དང༌། འཇིག་རྟེན་པའི་འཁོར་ལྷའི་དབང་པོ་བརྒྱ་བྱིན་ལ་སོགས་པས་ཡོངས་སུ་བསྐོར་ཅིང་མདུན་གྱིས་བལྟས་ཏེ་ཆོས་འཆད་ཅིང་བཞུགས་སོ། །ཤུགས་ཀྱིས་ན་ཚད་མེད་ཚངས་པའི་གནས་པས་ལེགས་ལྡན་བྱེད་དྲག་པོ་ལ་སོགས་པ་འདུལ་བ་དང༌། བསམ་གཏན་ལྷའི་གནས་པས་མེ་དང་ཆུ་དང་རླུང་གི་བསྐལ་པའི་བར་དུ་བསྲུང་བ་དང༌། རྣམ་ཐར་འཕགས་པའི་གནས་པས་གདོན་སྟོང་ཕྲག་བརྒྱད་ཅུ་དང༌། ནད་བཞི་བརྒྱ་རྩ་བཞི་རྣམས་དཔག་ཚད་བཅུ་གཉིས་ཀྱི་ནང་ཚུན་ཆད་དུ་བཟློག་པར་མཛད་བས་ཐབས་ཅིག་ཏུ་བཞུགས་པའོ། །གདུལ་བྱ་རྣམས་ཀྱི་བསམ་པའི་དུས་མཁྱེན་པས་དེའི་ཚེ་བཅོམ་ལྡན་འདས་ཏིང་ངེ་འཛིན་ལ་སྙོམས་པར་ཞུགས་སོ། །གདན་བཤམས་བ་ཉིད་ལ་ནི་པདྨའི་སྙིང་པོ་སེང་གེའི་ཁྲི་ཟླ་བའི་དཀྱིལ་འཁོར་དང་ཉི་མའི་འོད་མངའ་བརྒྱ་ཆེར་རོལ་པ་ནས་འབྱུང་བ་བཞིན་དུ་ཐུགས་རྗེ་ཆེན་པོའི་ནམ་མཁའ་ལྡིང་གིས་འཁོར་བའི་ལས་དང་ཉོན་མོངས་པའི་ཆུ་སྲིན་གཟུང་བ་དང༌། སྟོབས་བཅུའི་གླང་པོ་ཆེ་དང༌། མི་འཇིགས་པ་བཞིའི་སེང་གེ་དང༌། སོ་སོ་ཡང་དག་པར་རིག་པ་བཞིའི་ཤང་ཤང་དང༌། སངས་རྒྱས་ཀྱི་ཆོས་མ་འདྲེས་པའི་རྨ་བྱ་དམ་པས་བརྒྱན་ཅིང་བཤམས་པ་ཉིད་ལ་བཞུགས་ནས། བཅོམ་ལྡན་འདས་
རྡོ་རྗེ་སྐྱིལ་མོ་ཀྲུང་དང་མཉམ་པར་གཞག་པ་དང་སྐུ་ལུས་བསྲང་བ་ནི་ཤུགས་ལས་ཤེས་པར་བྱའོ། །དཀྱིལ་འཁོར་གྱི་འཁོར་ལོ་བཞི་བསྐྱེད་པའི་ཕྱིར་གཙུག་ཏོར་རྣམ་པར་བལྟ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་ཞེས་བྱ་བ་ནི་རྗེས་ཐོགས་ལའོ། །བཅོམ་ལྡན་འདས་ཀྱི་མཚན་སུམ་ཅུ་རྩ་གཉིས་ཀྱི་གཙོ་བོ་དབུའི་གཙུག་ཏོར་གྱི་དབུས་ནས་ཆོས་ཀྱི་དབྱིངས་རིག་ཅིང་ཁམས་གསུམ་འཁོར་བ་ལས་སྐྱོབ་པར་བྱེད་པའི་གསང་སྔགས་འདི་གསུངས་ཏེ། གསང་སྔགས་ཀྱི་ཚིག་འདི་དག་ནི་རྗོད་བྱེད་ཡིན་པས་ཞལ་ནས་བྱུང་བའོ། །དེའི་བརྗོད་བྱའི་དོན་འགྲོ་བ་ཐམས་ཅད་ཀྱི་སྐྱབས་སུ་འགྲོ་ཞིང་ཕྱག་འཚལ་བའི་གནས་སངས་རྒྱས་དང༌། ཆོས་དང༌། དགེ་འདུན་གསུམ་གཙུག་ཏོར་ནས་བྱུང་བ་ནི་མདོར་བསྟན་པའོ། །དེ་ལ་སངས་རྒྱས་དཀོན་མཆོག་གི་རྒྱས་བཤད་ནི་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་དང༌། གཙུག་ཏོར་ཅན་དང༌། ཐམས་ཅད་སྐྱོབ་དང༌། འཁོར་བ་འཇིག་དང༌། གསེར་ཐུབ་དང༌། འོད་སྲུངས་དང༌། ཤཱཀྱ་ཐུབ་པ་བྱེ་བ་ཕྲག་བདུན་དང༌། བྱང་ཆུབ་སེམས་དཔའི་དགེ་འདུན་བྱེ་བ་ཕྲག་བདུན་དང༌། ཉན་ཐོས་ཀྱི་དགེ་འདུན་བྱེ་བ་ཕྲག་བདུན་གྱིས་བསྐོར་བ་སྟེ། དེ་ལ་བྱང་ཆུབ་སེམས་དཔའི་དགེ་འདུན་ནི་བྱམས་པ་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་སྟོང་ངོ༌། །ཉན་ཐོས་ཀྱི་དགེ་འདུན་ནི་དགྲ་བཅོམ་པ་དང༌། རྒྱུན་དུ་ཞུགས་པ་མཐོང་ལམ་ཐོབ་པ་དང༌། ལན་ཅིག་ཕྱིར་འོང་བ་ནི་འདོད་པའི་ཁམས་ཀྱི་ཉོན་མོངས་བ་དྲུག་སྤངས་པའོ། །ཕྱིར་མི་འོང་བ་ནི་དགུ་སྤངས་པའོ། །ཡང་དག་པར་སོང་བ་ནི་འབྲས་བུ་བཞི་ལ་གནས་པའོ། །ཡང་དག་པར་ཞུགས་པ་ནི་འདོད་པའི་ཁམས་ཀྱི་ཉོན་མོངས་པ་བཞི་ཚུན་ཆད་སྤངས་པའི་སྐད་ཅིག་མ་བཅོ་ལྔ་ཐོབ་པ་ནི་རྒྱུན་དུ་ཞུགས་པའི་རྒྱུ་དང༌། འདོད་པའི་ཁམས་ཀྱི་ཉོན་མོངས་པ་ལྔ་སྤངས་པ་ནི་ལན་ཅིག་ཕྱིར་འོང་བའི་རྒྱུ་དང༌། བདུན་པ་དང་བརྒྱད་པ་སྤངས་པ་ནི་ཕྱིར་མི་འོང་བའི་རྒྱུ་དང༌། སྲིད་པའི་རྩེ་མོའི་ཆུང་དུའི་འབྲིང་སྤངས་པ་ནི་དགྲ་བཅོམ་པའི་རྒྱུ་ལ་ཞུགས་པའོ། །བསམ་གཏན་བཞི་ཐོབ་པའི་ལྷའི་དྲང་སྲོང་སངས་རྒྱས་རབས་བདུན་གྱི་འཁོར་ཞི་བ་དང་རྒྱས་
པས་ཕན་འདོགས་པ་དང༌། དབང་དང་མངོན་སྤྱོད་ཀྱིས་གནོད་པ་བྱེད་པའི་བསམ་གཏན་གྱི་རིག་སྔགས་ཀྱི་དམོད་པ་འདོར་བ་རྣམས་དང༌། གཟུགས་མེད་པའི་སྙོམས་པར་འཇུག་པ་བཞི་ཐོབ་པའི་རིགས་སྔགས་གྲུབ་པའི་དྲང་སྲོང་ཕྲིན་ལས་རྣམ་བཞིས་ཕན་འདོགས་ནུས་པ་རྣམས་དང༌། འགོག་པའི་སྙོམས་པར་འཇུག་པ་ཐོབ་པ་མངོན་པར་ཤེས་པ་ལྔའི་རིག་སྔགས་འཆང་གྲུབ་པ་རྣམས་དང༌། སྟེང་གི་ཚངས་པ་གཟུགས་ཁམས་གནས་རིས་བཅུ་བདུན་གྱི་ལྷ་དང༌། དབང་པོ་སུམ་ཅུ་རྩ་གསུམ་གྱི་ལྷ་དང༌། ལེགས་ལྡན་དྲག་པོའི་སྲིད་པའི་རྩེ་མོའི་ཏིང་ངེ་འཛིན་གྱི་དཀའ་ཐུབ་བསྒོམ་པ་ལ་ཨུ་མས་དཀའ་ཐུབ་ཟློག་པའི་བདག་པོ་རྩེ་གསུམ་འཆང་བའི་འཁོར་དང་བཅས་པ་དང༌། ལེགས་ལྡན་ལྷ་མ་ཡིན་གྱི་གཡུལ་ལས་རྒྱལ་བ་ཁྱབ་འཇུག་སྲེད་མེད་ཀྱི་བུ་རྒྱལ་ཆེན་རིགས་བཞི་དགའ་རབ་དབང་ཕྱུག་དང་ཕྱག་རྒྱ་ཆེན་པོ་ལྔས་ཕྱག་བྱས་པ་དང༌། སྲིད་པའི་རྩེ་མོའི་ཏིང་ངེ་འཛིན་ཐོབ་པའི་ལེགས་ལྡན་ནག་པོ་ཆེན་པོ་རྒྱལ་པོ་མང་པོས་བཀུར་བའི་གྲོང་ཁྱེར་སུམ་བརྩེགས་འཇིག་པར་བྱེད་པའི་དུར་ཁྲོད་ཆེན་པོ་སོ་ས་ལི་ལ་སོགས་པ་བརྒྱད་དུ་གནས་ནས་ཕྱོགས་སྐྱོང་བ་བརྒྱད་ཀྱི་ཆུང་མ་མ་མོའི་ཚོགས་ཀྱིས་ཕྱག་བྱས་པས་བསྐོར་བའི་དེ་བཞིན་གཤེགས་པའི་དཀྱིལ་འཁོར་བྱུང་སྟེ། དེ་དག་ཐམས་ཅད་ནི་རྗེའུ་རིགས་བདུན་དུ་ངེས་ཏེ། རྣམ་པར་གཟིགས་ནི་དེ་བཞིན་གཤེགས་པའི་རིགས་སོ། །གཙུག་ཏོར་ཅན་ནི་པདྨའི་རིགས་སོ། །ཐམས་ཅད་སྐྱོབ་ནི་རྡོ་རྗེའི་རིགས་སོ། །འཁོར་བ་འཇིག་ནི་ནོར་བུའི་རིགས་སོ། །གསེར་ཐུབ་ནི་དཔལ་གྱི་གླང་པོ་ཆེ་བཞིན་དུ་དཔུང་གི་ཚོགས་འདུལ་བས་ན་གླང་པོའི་རིགས་སོ། །འོད་སྲུངས་ནི་སེམས་ཅན་ཐམས་ཅད་ལ་བྱང་ཆུབ་ཀྱི་སེམས་བསྐྱེད་པས་གཞོན་ནུའི་རིགས་སོ། །ཤཱཀྱ་ཐུབ་པ་ནི་ཀླུའི་རྒྱལ་པོ་རྒྱ་མཚོ་དང་མ་དྲོས་པ་ལ་སོགས་པ་བཏུལ་བས་ཀླུའི་རིགས་སོ། །དེ་ལྟར་སངས་རྒྱས་རབས་བདུན་དང༌། སྟོང་མི་མཇེད་ཀྱི་འོག་མིན་གྱི་ཙནྡན་སྤྲུལ་གྱི་སྙིང་པོའི་ཞིང་ཁམས་ན་ཉོན་མོངས་པ་དང་ཤེས་བྱའི་སྒྲིབ་པ་སྤངས་པས་དཔའ་བརྟན་པའི་སྡེ་ཡེ་ཤེས་ཕུན་སུམ་ཚོགས་པ་མཚོན་ཆའི་རྒྱལ་པོ་དང༌། ཤར་ཕྱོགས་མངོན་པར་དགའ་བའི་མི་བསྐྱོད་པ་
དང། ལྷོ་ཕྱོགས་རྡུལ་དང་བྲལ་བའི་སྨན་གྱི་བླ་བཻ་ཌཱུཪྻའི་འོད་ཀྱི་རྒྱལ་པོ་དང༌། ནུབ་ཕྱོགས་བདེ་བ་ཅན་གྱི་སཱ་ལའི་དབང་པོའི་མེ་ཏོག་ཀུན་དུ་རྒྱས་པ་དང༌། བྱང་ཕྱོགས་འབྲུག་སྒྲ་བསྒྲགས་པའི་ཤཱཀྱ་ཐུབ་པ་དང༌། བྱང་ཤར་གྱི་མཚམས་ཀྱི་ཏིང་ངེ་འཛིན་དམ་པ་ན་རིན་པོ་ཆེའི་ཏོག་གི་རྒྱལ་པོ་དང༌། ཤར་ལྷོའི་མཚམས་ཀྱི་བྱང་ཆུབ་ཀྱི་རྒྱན་ན་ཀུན་དུ་བཟང་པོ་དང༌། ལྷོ་ནུབ་ཀྱི་མཚམས་ཀྱི་རྡུལ་དང་བྲལ་བ་ན་རྣམ་པར་སྣང་མཛད་དང༌། ནུབ་བྱང་གི་མཚམས་ཀྱི་དབང་དུ་གྱུར་པ་ན་སྤྱན་རྒྱས་པ་ཨུཏྤལའི་དྲིའི་ཏོག་གི་རྒྱལ་པོ་བྱང་ཆུབ་སེམས་དཔའ་དང༌། ཉན་ཐོས་ཀྱི་དགེ་འདུན་དང་འཇིག་རྟེན་པའི་འཁོར་དང་བཅས་པ་དེ་རྣམས་ལ་ཕྱག་འཚལ་ནས་ཞེས་བྱ་བ་ནི། མ་འོངས་པའི་གསང་སྔགས་ཀྱི་སྒོའི་སྤྱད་པ་སྤྱོད་པར་འདོད་པ་རྣམས་ཀྱིས་རང་གི་སྤྱི་གཙུག་ནས་འོད་ཟེར་འཕྲོས་པས་ཚོགས་བ་སོགས་བའི་ལྷ་དེ་རྣམས་སྤྱན་དྲངས་ལ་ཡོན་ཆབ་དང་བཅས་པའི་མཆོད་པ་ལྔས་མཆོད་པ་དང༌། སྡིག་པ་བཤགས་པ་དང༌། རྗེས་སུ་ཡི་རང་བ་དང༌། ཆོས་ཀྱི་འཁོར་ལོ་བསྐོར་བར་བསྐུལ་བ་དང༌། ཡོངས་སུ་མྱ་ངན་ལས་མི་འདའ་བར་གསོལ་བ་གདབ་པ་དང༌། ལུས་དབུལ་ཞིང་དགེ་བའི་རྩ་བ་བསྔོའོ་ཞེས་བྱ་བའི་དོན་ཡིན་ནོ། །དེ་ལྟར་ཚོགས་བསགས་པའི་དཀྱིལ་འཁོར་བཤད་ནས་སྲུང་བའི་འཁོར་ལོ་སྟོན་པ་ནི། བཅོམ་ལྡན་འདས་དེ་བཞིན་གཤེགས་པའི་དབུའི་གཙུག་ཏོར་ནས་བྱུང་བའི་གདུགས་དཀར་མོ་ཅན་གྱི་ལྷ་ཁྲོ་མོ་བཅུ་བདུན་ཕྱུང་བ་ནི། བདུད་དང་བདུད་ཀྱི་རིགས་ཀྱི་ལྷ་གཞན་གྱིས་མི་ཐུབ་པ་བར་དུ་གཅོད་པ་བཅུ་བདུན་ཕྱིར་བཟློག་པ་ཆེན་མོ་འདི་ཞེས་བྱ་བ་ནི། དབུས་ཀྱི་ཁྲོ་མོ་གཞན་གྱིས་མི་ཐུབ་པས་འབྱུང་པོའི་གདོན་ཕྱོགས་སྐྱོང་བཅུའི་རིགས་ཐམས་ཅད་ཚང་གཅོད་པར་བྱེད་དོ། །ཤར་ཕྱོགས་ཀྱི་གཏུམ་པ་ཆེན་མོས་ནི་གཞན་གྱི་རིག་སྔགས་ཐམས་ཅད་གཅོད་པར་བྱེད་དོ། །ལྷོའི་འབར་མ་ཆེན་མོས་ནི་དུས་མ་ཡིན་པར་འཆི་བ་བརྒྱད་པོ་ཐམས་ཅད་བཟློག་གོ །ནུབ་ཕྱོགས་ཀྱི་དཀར་མོ་ཆེན་མོས་ནི་གསོད་པ་དང་བཅིངས་པ་ཐམས་ཅད་ལས་གྲོལ་བར་བྱེད་དོ། །བྱང་ཕྱོགས་ཀྱི་སྒྲོལ་མས་ནི་ངན་སོང་དུ་སྐྱེ་བའི་རྨི་ལམ་ངན་པ་
ཐམས་ཅད་བཟློག་གོ །བྱང་ཤར་གྱི་རྒྱལ་བའི་རྡོ་རྗེ་མས་ནི་གནོད་སྦྱིན་དང༌། སྲིན་པོའི་གདོན་ཐམས་ཅད་འཇིག་གོ །ཤར་ལྷོ་མཚམས་ཀྱི་པདྨའི་མངོན་མཚན་ཅན་གྱིས་ནི་གདོན་སྟོང་ཕྲག་བརྒྱད་ཅུ་འཇིག་གོ །ལྷོ་ནུབ་མཚམས་ཀྱི་གཞན་གྱིས་མི་ཐུབ་མས་ནི་རྒྱུ་སྐར་ཉི་ཤུ་རྩ་བརྒྱད་འདུལ་ལོ། །ནུབ་བྱང་མཚམས་ཀྱི་རྡོ་རྗེ་མཆུས་ནི་གཟའ་ཆེན་པོ་བརྒྱད་འཇིག་གོ །ཕྱི་རོལ་གྱི་མཚམས་ཀྱི་ཞི་བའི་ལྷ་མོས་ནི་དགྲ་ཐམས་ཅད་བཟློག་གོ །མཚམས་གཉིས་པའི་ཞི་བ་གསེར་ཕྲེང་མས་ནི་གཟའ་སྒྲ་གཅན་འཛིན་མ་རུངས་པ་འཇིག་གོ །མཚམས་གསུམ་པའི་དཀར་ཕྲེང་ཆེན་པོ་འབར་བ་མས་ནི་སྡང་བ་གཤིན་རྗེའི་གདོན་འཇིག་གོ །མཚམས་བཞིའི་འཕགས་མ་སྒྲོལ་མས་ནི་འཆི་ལྟས་ཀྱི་རྨི་ལམ་ངན་པ་ཐམས་ཅད་འཇིག་གོ །ཤར་སྒོའི་རྡོ་རྗེ་ལུ་གུ་རྒྱུད་ཀྱིས་ནི་དུག་ཐམས་ཅད་བཟློག་གོ །ལྷོ་སྒོའི་རྡོ་རྗེ་གཞོན་ནུས་ནི་མཚོན་ཐམས་ཅད་བཟློག་གོ །ནུབ་སྒོའི་ལག་ན་རྡོ་རྗེ་མས་ནི་མེ་དང་ཆུ་བཟློག་གོ །བྱང་སྒོའི་རིན་ཆེན་མས་ནི་ངན་སོང་གི་འཇིགས་པ་ཐམས་ཅད་ལས་སྒྲོལ་བ་སྟེ། ཁྲོ་མོ་དེ་རྣམས་ཀྱི་མཚན་དང་སྐུ་མདོག་དང་ཕྱག་མཚན་ཇི་ལྟ་བུ་ཞེ་ན། གཞན་གྱིས་མི་ཐུབ་དྲག་ཤུལ་ཆེ། །ཞེས་བྱ་བ་ལ་སོགས་པ་གསུངས་ཏེ། གཞན་གྱིས་མི་ཐུབ་པ་ནི་མཚན་ནོ། །དྲག་ཤུལ་ཆེན་མོ་ནི་སྐུ་མདོག་ནག་མོ་རྡོ་རྗེ་དང་སྡིགས་མཛུབ་མཛད་པའོ། །ཤར་ཕྱོགས་ཀྱི་གཏུམ་པ་ཆེན་མོ་ནི་མཚན་ནོ། །སྟོབས་ཆེན་མོ་ནི་སྐུ་མདོག་དཀར་མོ་འཁོར་ལོ་དང་སྡིགས་མཛུབ་མཛད་པའོ། །ལྷོ་ཕྱོགས་ཀྱི་འབར་བ་ཆེན་མོ་ནི་མཚན་ནོ། །གཟི་བརྗིད་ཆེ་བ་ནི་སྐུ་མདོག་སེར་མོ་རིན་པོ་ཆེ་དང་སྡིགས་མཛུབ་མཛད་པའོ། །ནུབ་ཕྱོགས་ཀྱི་དཀར་ཆེན་འབར་ཕྲེང་མ་ནི་མཚན་ནོ། །གོས་དཀར་མོ་ནི་སྐུ་མདོག་དམར་མོ་པདྨ་དང་སྡིགས་མཛུབ་མཛད་པའོ། །བྱང་ཕྱོགས་ཀྱི་འཕགས་མ་སྒྲོལ་མ་ནི་མཚན་ནོ། །ཁྲོ་གཉེར་ཅན་ནི་སྐུ་མདོག་ལྗང་གུ་སྣ་ཚོགས་རྡོ་རྗེ་དང་སྡིགས་མཛུབ་མཛད་པའོ། །བྱང་ཤར་མཚམས་ཀྱི་རྒྱལ་པ་རྡོ་རྗེ་མ་ནི་མཚན་ནོ། །ཕྲེང་ཞེས་གྲགས་ཞེས་བྱ་བ་ནི་སྐུ་མདོག་སྔོན་མོ་དབྱིག་པ་དང་སྡིགས་མཛུབ་མཛད་པའོ། །ཤར་ལྷོ་མཚམས་
ཀྱི་པདྨའི་མངོན་མཚན་ནི་མཚན་ནོ། །རྡོ་རྗེས་མཚན་ནི་སྐུ་མདོག་སེར་མོ་རྡོ་རྗེས་མཚན་པའི་ལྕགས་ཀྱུ་དང་སྡིགས་མཛུབ་མཛད་པའོ། །ལྷོ་ནུབ་མཚམས་ཀྱི་གཞན་གྱིས་མི་ཐུབ་པ་ནི་མཚན་ནོ། །ཕྲེང་བ་ཅན་ནི་སྐུ་མདོག་དམར་མོ་རྡོ་རྗེའི་ཕྲེང་བ་དང་སྡིགས་མཛུབ་མཛད་པའོ། །ནུབ་བྱང་མཚམས་ཀྱི་རྡོ་རྗེའི་མཆུ་ཅན་ནི་མཚན་ནོ། །རྣམ་སྒེག་མོ་ནི་སྐུ་མདོག་ལྗང་གུ་རལ་གྲི་དང་སྡིགས་མཛུབ་མཛད་པའོ། །མཚམས་ཀྱི་ལྷ་མོ་མཆོད་པ་བྱེད་པ་བཞི་ནི་ཞི་བའི་ལྷ་རྣམས་ནི་མཚན་ནོ། །མཆོད་མ་ནི་ཉེ་བའི་ལྷ་མོ་སངས་རྒྱས་སྤྱན་ཡིན་པས་སྐུ་མདོག་དཀར་མོ་རྡོ་རྗེས་མཚན་པའི་བདུག་སྤོས་དང་སྡིགས་མཛུབ་མཛད་པའོ། །གཉིས་པའི་མཚན་ནི་ཞི་བ་མའོ། །གསེར་གྱི་ཕྲེང་བ་ཅན་ནི་སྐུ་མདོག་སེར་མོ་གསེར་གྱི་ཕྲེང་བ་དང་སྡིགས་མཛུབ་མཛད་པའོ། །གསུམ་པ་དཀར་ཆེན་འབར་ཕྲེང་མ་ནི་མཚན་ནོ། །གོས་དཀར་མོ་ནི་སྐུ་མདོག་དཀར་དམར་མར་མེ་འབར་བ་དང་སྡིགས་མཛུབ་མཛད་པའོ། །བཞི་པ་འཕགས་མ་སྒྲོལ་མ་ནི་མཚན་ནོ། །སྟོབས་ཆེན་མོ་ནི་སྐུ་མདོག་ལྗང་གུ་དྲིའི་དུང་ཆོས་དང་སྡིགས་མཛུབ་མཛད་པའོ། །ཤར་སྒོར་རྡོ་རྗེ་ལུ་གུ་རྒྱུད་ནི་མཚན་ནོ། །གཞན་ནི་སྐུ་མདོག་སྔོན་མོ་རྡོ་རྗེ་ལུ་གུ་རྒྱུད་དང་སྡིགས་མཛུབ་མཛད་པའོ། །ལྷོ་སྒོའི་རྡོ་རྗེ་གཞོན་ནུ་མ་ནི་མཚན་ནོ། །རིག་འཛིན་མ་ནི་སྐུ་མདོག་སེར་མོ་ཞགས་པ་དང་སྡིགས་མཛུབ་མཛད་པའོ། །ནུབ་སྒོའི་ལག་ན་རྡོ་རྗེའི་རིགས་ནི་མཚན་ནོ། །གསེར་ཕྲེང་ནི་སྐུ་མདོག་དམར་མོ་ལྕགས་ཀྱུ་དང་སྡིགས་མཛུབ་མཛད་པའོ། །བྱང་སྒོའི་རིན་ཆེན་མ་ནི་མཚན་ནོ། །ལེབ་རྒན་རྩི་ནི་སྐུ་མདོག་དམར་ལྗང་དྲིལ་བུ་དང་སྡིགས་མཛུབ་མཛད་པའོ། །ཁྲོ་མོ་བཅུ་བདུན་པོ་དེ་རྣམས་གང་གི་རིགས་ཡིན་ཞེ་ན། རྣམ་པར་སྣང་མཛད་རིགས་ཞེས་གསུངས་སོ། །གང་ནས་སྐྱེས་ཤེ་ན། གཙུག་ཏོར་གྲགས་ཞེས་བྱ་སྟེ། དབུའི་གཙུག་ཏོར་ལས་སྐྱེས་པའོ། །ཁྲོ་མོ་བཅུ་བདུན་པོ་དེ་རྣམས་ཀྱི་ཕྱག་རྒྱའི་དཀྱིལ་འཁོར་དང༌། ཕྱིས་འབྱུང་བའི་གསང་སྔགས་ཀྱི་ཚོགས་བཅུ་གསུམ་པོ་དེ་དག་ཐམས་ཅད་ཀྱིས་རྣལ་འབྱོར་པ་བདག་ཅག་འཁོར་དང་བཅས་པ་དང༌།
ཁམས་གསུམ་གྱི་སེམས་ཅན་ཐམས་ཅད་བསྲུང་དུ་གསོལ་ཞེས་འཁོར་ལོའི་ལྷ་དང་སྔགས་ལ་གསོལ་བ་འདེབས་པའོ། །དེ་རྣམས་ཀྱི་སྔགས་ནི་ཨོཾ་སརྦ་ཏ་ཐཱ་ག་ཏོཥྞཱི་ཥ་སི་ཏཱ་ཏ་པ་ཏྲེ་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བའི་གདུགས་དཀར་མོ་ཅན་ཞེས་བོད་པའོ། །ཧཱུཾ་དྲཱུཾ་ཧྲཱིཿཥྚོཾ་ཞེས་བྱ་བ་ནི་གཙོ་མོ་གཞན་གྱིས་མི་ཐུབ་མ་ནི་འབྱུང་པོའི་གདོན་ཐམས་ཅད་ཚར་གཅོད་པར་གྱིས་ཤིག་པའོ། །ཤར་ཕྱོགས་ཀྱི་གཏུམ་ཆེན་མོའི་སྔགས་ནི་ཛམྦྷ་ན་ཀཱ་རཱི་ཧཱུཾ་ཧྲཱུཾ་ཧྲཱིཿཥྚོཾ་ཞེས་བྱ་བ་ནི། གཞན་གྱི་རིག་སྔགས་ཐམས་ཅད་ཆོད་ཅིག་ཅེས་པའོ། །ཡི་གེ་ཧཱུཾ་གིས་དགུག་པ་དང༌། དྲཱུཾ་གིས་གཞུག་པ་དང༌། ཧྲཱིཿས་འཆིང་བ་དང༌། ཥྚོཾ་གྱིས་དབང་དུ་བྱེད་པའོ། །དེ་ལྟར་ཡི་གེ་བཞིའི་དོན་ནི་ཐམས་ཅད་ལ་སྦྱར་བར་བྱའོ། །ལྷོ་ཕྱོགས་ཀྱི་འབར་བ་ཆེན་མོའི་སྔགས་ནི་སྟཾ་བྷ་ན་ཀཱ་རཱི་དང༌། ཡི་གེ་བཞིས་དུས་མ་ཡིན་པར་འཆི་བ་བརྒྱད་ཟློགས་ཤིག་པའོ། །ནུབ་ཕྱོགས་ཀྱི་གོས་དཀར་མོའི་སྔགས་ནི་མོ་ཧ་ན་ཀཱ་རཱི་དང༌། ཡི་གེ་བཞིས་རྒྱལ་པོའི་ཆད་པའི་གསོད་པ་དང་འཆིང་བ་ལས་ཁྲོལ་ཅིག་པའོ། །བྱང་ཕྱོགས་ཀྱི་སྒྲོལ་མའི་སྔགས་ནི་སམྦྷཀྵ་ཎ་ཀཱ་རཱི་དང༌། ཡི་གེ་བཞིས་རྨི་ལམ་ངན་པ་ཐམས་ཅད་ཟློགས་ཤིག་པའོ། །བྱང་ཤར་གྱི་རྒྱལ་བའི་རྡོ་རྗེ་མའི་སྔགས་ནི་བནྡྷན་ཀཱ་རཱི་དང༌། ཡི་གེ་བཞིས་གནོད་སྦྱིན་དང་སྲིན་པོའི་གདོན་ཐམས་ཅད་འཇིག་པར་གྱིས་ཤིག་པའོ། །ཤར་ལྷོའི་པདྨའི་མངོན་མཚན་ཅན་མའི་སྔགས་ནི་པ་ར་བི་ཥ་བྷ་ཀྵ་ཎ་ཀཱ་རཱི་དང༌། ཡི་གེ་བཞིས་གདོན་སྟོང་ཕྲག་བརྒྱད་ཅུ་རྩ་བཞི་འཇིག་པར་གྱིས་ཤིག་པའོ། །ལྷོ་ནུབ་ཀྱི་གཞན་གྱིས་མི་ཐུབ་མའི་སྔགས་ནི་སརྦ་དུཥྚཱ་པྲ་དུ་ཥྚཱ་ན་སྟཾ་བྷ་ན་ཀཱ་རཱི་དང༌། ཡི་གེ་བཞིས་རྒྱུ་སྐར་ཉི་ཤུ་རྩ་བརྒྱད་ཞི་བར་གྱིས་ཤིག་པའོ། །ནུབ་བྱང་གི་རྡོ་རྗེ་མཆུའི་སྔགས་ནི་སརྦ་ཡཀྵ་རཱ་ཀྵ་སཾ་གྲ་ཧཱ་ཎཱཾ་བི་དྷཱཾ་ས་ན་ཀཱ་རཱི་དང༌། ཡི་གེ་བཞིས་གཟའ་ཆེན་པོ་བརྒྱད་འཇིག་པར་གྱིས་ཤིག་པའོ། །ཉེ་བའི་ལྷ་མོ་བཞི་ནི་ཞི་བ་ཡིན་པས་སྔགས་སྔ་མ་དང་འདྲ་བར་དགོངས་སོ། །ཤར་ཕྱོགས་ཀྱི་སྒོའི་རྡོ་རྗེ་ལུ་གུ་རྒྱུད་ཀྱི་སྔགས་ནི་སརྦ་པ་ར་བི་དྷྱཱཾ་ཙྪེ་
ད་ན་ཀཱ་རཱི་དང༌། ཡི་གེ་བཞིས་དུག་ཐམས་ཅད་ཟློགས་ཤིག་པའོ། །ལྷོ་ཕྱོགས་ཀྱི་སྒོའི་རྡོ་རྗེ་གཞོན་ནུ་མའི་སྔགས་ནི་ཙ་ཏུ་ཪྴི་ཏི་ནཾ་གྲ་ཧ་སྲཱ་ཎཱཾ་བི་དྷྭཾ་ས་ན་ཀཱ་རཱི་དང༌། ཡི་གེ་བཞིས་མཚོན་ཐམས་ཅད་ཟློགས་ཤིག་པའོ། །ནུབ་ཕྱོགས་ཀྱི་སྒོའི་ལག་ན་རྡོ་རྗེའི་སྔགས་ནི་ཨཥྚ་བིཾ་ཤ་ཏཱི་ནཱཾ་ནཀྵ་ཏྲཱ་ཎཱཾ་པྲ་ས་དྷ་ན་ཀཱ་རཱི་དང༌། ཡི་གེ་བཞིས་མེ་དང་ཆུ་ལས་ཟློགས་ཤིག་པའོ། །བྱང་གི་སྒོའི་རིན་ཆེན་མའི་སྔགས་ནི་ཨཥྚ་ཎཱཾ་མ་ཧཱ་གྲ་ཧ་ཎཱཾ་བི་དྷྭཾ་ས་ན་ཀཱ་རཱི་དང༌། ཡི་གེ་བཞིས་ངན་འགྲོའི་འཇིགས་པ་ཐམས་ཅད་ལས་སྒྲ་ལ་ཅིག་པའོ། །ཡི་གེ་བཞི་པོ་དེ་ཡང་བདུད་བཞི་འཇོམས་པ་དང༌། ཉོན་མོངས་པ་བཞི་སྤོང་བ་དང༌། སྒྲིབ་པ་བཞི་སྦྱོང་བ་དང༌། ཡེ་ཤེས་བཞི་དགུག་གཞུག་གི་ཕྲིན་ལས་བཞི་བྱེད་པར་གསུངས་སོ། །རཀྵ་རཀྵ་མཱཾ་སརྦ་སཏྭཱཾ་ཤྩ་ཞེས་བྱ་བ་ནི་བདག་དང་སེམས་ཅན་ཐམས་ཅད་སྲུངས་ཤིག་སྲུངས་ཤིག་ཅེས་གསོལ་བ་འདེབས་པར་བྱེད་པ་ཡིན་ནོ། །ད་ནི་ཕྱོགས་སྐྱོང་བ་བཅུ་འདུལ་བའི་དཀྱིལ་འཁོར་ཁྲོ་མོ་བཅུ་གཅིག་གི་སྐུའི་དཀྱིལ་འཁོར་བསྒོམས་ཏེ། སྔགས་བཅུ་གཅིག་བཟླས་ནས་བསྙེན་པ་འབུམ་དང་ཉེ་བའི་བསྙེན་པ་ཁྲི་བྱས་ནས། གྲོག་མཁར་གྱི་སའམ་དུར་ཁྲོད་ཀྱི་ས་ལ་གདོན་ལ་སོགས་པ་ཐམས་ཅད་ཀྱི་ལང་ག་བྱས་ལ་དེའི་སྙིང་གར་ཧཱུཾ་དྲཱུཾ་ཧྲཱིཿཥྚོཾ་གྱི་དབུས་སུ་གདོན་ལ་སོགས་པའི་མིང་བྲིས་ལ་ཕྱི་རོལ་ནས་ཏདྱ་ཐཱ། ཨོཾ་ཨ་ན་ལེ་ཨ་ན་ལེ་ཞེས་བྱ་བ་ལ་སོགས་པའི་སྔགས་འཁོར་ལོ་རྩིབས་བརྒྱད་ལ་དགོད། ཕྱག་ན་རྡོ་རྗེའི་འཁྲུལ་འཁོར་གྱི་སྔགས་ལྟེ་བ་ལ་བཀོད་ནས་ལང་གའི་སྙིང་གར་བཅུག་སྟེ་དུམ་བུར་གཏུབས་ནས་མེ་ལ་སྦྱིན་སྲེག་བྱ་བའམ། ཡང་ན་ཕུར་བུས་བཏབ་ནས་མནན་པར་བྱའོ་ཞེས་པ་བཅོམ་ལྡན་འདས་མ་དེ་བཞིན་གཤེགས་པའི་གཙུག་ཏོར་ནས་བྱུང་བའི་གདུགས་དཀར་མོ་ཅན་རྡོ་རྗེ་གཙུག་ཏོར་ཕྱོགས་བཅུའི་གདོན་ཕྱིར་ཟློག་མ་ཆེན་མོ་ཞེས་བྱ་བ་ནི་མཚན་ཡིན་ནོ། །དེའི་སྐུ་མདོག་དང་ཕྱག་མཆན་བཤད་པ་ནི་ཕྱག་སྟོང་མངའ་བ་ཆེན་མོ་ཞེས་བྱ་བ་སྟེ། བསྐལ་པ་བཟང་པོའི་སངས་རྒྱས་སྟོང་གི་སྤྲུལ་པ་རྡོ་རྗེ་བརྒྱ་དང༌། འཁོར་ལོ་བརྒྱ་དང༌། རིན་ཆེན་འབར་བ་བརྒྱ་དང༌། པདྨ་འབར་བ་
བརྒྱ་དང། སྣ་ཚོགས་རྡོ་རྗེ་འབར་བ་བརྒྱ་དང༌། མདའ་དང་གཞུ་འབར་བ་ཉིས་བརྒྱ་དང༌། རལ་གྲི་དང་ཞགས་པ་འབར་བ་ཉིས་བརྒྱ་དང༌། ལྕགས་ཀྱུ་ཉིས་བརྒྱ་ཕྱག་ན་བསྣམས་པའོ། །དབུ་སྟོང་མངའ་བ་ཆེན་མོ་ནི་བསྐལ་པ་བཟང་པོའི་སངས་རྒྱས་སྟོང་གི་ཞལ་སྒེག་པོ་བརྒྱ་དང༌། དཔའ་བ་བརྒྱ་དང༌། འཇིགས་སུ་རུང་བ་བརྒྱ་དང༌། རྒོད་པ་བརྒྱ་དང༌། གཤིབ་བརྒྱ་དང༌། རྔམ་པ་བརྒྱ་དང༌། སྙིང་རྗེ་བརྒྱ་དང༌། ཞི་བ་བརྒྱ་དང༌། ངོ་མཚར་བ་བརྒྱ་དང༌། དྲག་པོ་མི་སྡུག་པ་བརྒྱ་སྟེ་སྟོང་ལ་སྤྱན་གསུམ་གསུམ་མངའ་བས་སྤྱན་བྱེ་བ་བརྒྱ་སྟོང་མངའ་བ་ཞེས་བྱའོ། །དབུ་སྟོང་གི་སྟེང་ན་སངས་རྒྱས་བྱེ་བ་ཕྲག་བདུན་དང༌། སངས་རྒྱས་དཔའ་བརྟན་པའི་སྡེ་མཚོན་ཆ་ལ་སོགས་པ་དགུས་ཅོད་པ་ན་མཛད་པས་ན་མི་ཕྱད་པའོ། །བ་སྤུའི་བུ་གནས་བསྐལ་པ་ཆེན་པོའི་མེའི་འོད་ཟེར་འཕྲོ་བས་ན་འབར་བའི་མཚན་རྟགས་ཅན་ནོ། །ཞབས་སྟོད་རྡོ་རྗེ་ཡངས་པ་ཆེན་མོས་ས་གསུམ་གྱི་དཀྱིལ་འཁོར་ཐམས་ཅད་དུ་བདག་དང་སེམས་ཅན་ཐམས་ཅད་ཀྱི་རྒྱལ་པོའི་འཇིགས་པ་ནས། ཟས་སུ་སྦྱིན་སྲེག་ཟ་བའི་བར་དེ་དག་ཐམས་ཅད་ཞབས་ཀྱིས་མནན་པར་མཛད་པའོ། །དེ་ཕྱིར་བདག་དང་སེམས་ཅན་ཐམས་ཅད་བདེ་ལེགས་སུ་གྱུར་ཅིག་ཅེས་གསོལ་བ་གདབ་བོ། །དེའི་ཤར་ཕྱོགས་ཀྱི་འཁོར་ལོའི་རྩིབས་ལ་རྣམ་པར་བསྒྱིངས་པའི་རྡོ་རྗེ་མ་སྔོན་མོ་རྡོ་རྗེ་དང་ཨུཏྤལ་བསྣམས་པའོ། །ལྷོ་ཕྱོགས་ཀྱི་རྩིབས་ལ་གསེར་འོད་ལྟ་བུའི་སྤྱན་མངའ་མ། སེར་མོ་འཁོར་ལོ་དང༌། པདྨ་དཀར་པོའི་སྟིང་ན་སྤྱན་དང་ལྡན་པའོ། །ནུབ་ཕྱོགས་ཀྱི་རྩིབས་ལ་དཀར་མོ་པདྨའི་རྡོ་རྗེ་དང་པདྨའི་སྡོང་བུ་བསྣམས་པའོ། །བྱང་ཕྱོགས་ཀྱི་རྩིབས་ལ་རྡོ་རྗེ་འགྲོས་ལྗང་གུ་སྣ་ཚོགས་རྡོ་རྗེ་དང་ཨུཏྤལ་བསྣམས་པའོ། །བྱང་ཤར་མཚམས་སུ་པདྨའི་སྤྱན་དམར་མོ་འཁོར་ལོ་དང་པདྨ་བསྣམས་པའོ། །ཤར་ལྷོ་མཚམས་སུ་ཟླ་འོད་དཀར་མོ་རྡོ་རྗེ་དང་ཟླ་བ་ཚེས་པ་བསྣམས་པའོ། །ལྷོ་ནུབ་མཚམས་སུ་སངས་རྒྱས་དཔལ་དམར་མོ་པདྨའི་རྡོ་རྗེ་དང༌། པདྨའི་སྟེང་ན་སྣང་བ་མཐའ་ཡས་བསྣམས་པའོ། །ནུབ་བྱང་གི་མཚམས་སུ་སངས་རྒྱས་སྤྱན་སེར་མོ་སྣ་ཚོགས་རྡོ་རྗེ་དང་ཨུཏྤལའི་སྟེང་ན་
སྤྱན་དང་ལྡན་པའོ། །ཤར་ཕྱོགས་སུ་སྟེང་གི་ལྷ་མོ་རྡོ་རྗེ་ཉི་མ་འོད་ཅེས་བྱ་བ་དམར་མོ་རྡོ་རྗེ་དང་ཉི་མ་བསྣམས་པའོ། །དེ་བཞིན་དུ་ནུབ་ཕྱོགས་སུ་འོག་གི་ལྷ་མོ་ཟླ་བ་རྡོ་རྗེ་འཛིན་ཞེས་བྱ་བ་དཀར་མོ་རྡོ་རྗེ་དང་ཟླ་བ་བསྣམས་པའོ། །དེ་བཅུའི་རིག་པ་ནི་ཧཱུཾ་དྲཱུཾ་བཅུ་ཐམ་པའོ། །ཕྱག་རྒྱ་ནི་སྐུ་མདོག་དང་ཕྱག་མཚན་ཅན་གྱི་ལྷའོ། །གསང་སྔགས་ཀྱི་ཚོགས་ནི་འོག་ནས་འབྱུང་བའི་སྔགས་བཅུའོ། །དེ་དག་ཐམས་ཅད་ཀྱིས་ཞེས་བྱ་བ་ནི་སྐུ་གསུང་ཐུགས་དེ་དག་གིས་སོ། །བདག་དང་སེམས་ཅན་ཐམས་ཅད་ཀུན་ནས་བསྲུང་བར་མཛད་དུ་གསོལ་ཞེས་བྱ་བ་ནི་བདེན་པ་བདར་ནས་གསོལ་བ་འདེབས་པའོ། །དེ་ལ་གཙུག་ཏོར་ཕྱིར་བཟློག་པ་ཆེན་མོའི་སྔགས་ནི་ཨོཾ་རི་ཥྀ་ག་ཎ་ཞེས་བྱ་བ་ནས་ཧཱུཾ་དྲཱུཾ་ཞེས་བྱ་བའི་བར་ཡི་གེ་ཉི་ཤུ་རྩ་གཅིག་པས་སྲུང་བ་ལ་སོགས་པའི་ཕྲིན་ལས་བཞི་བྱད་དོ། །རྣམ་པ་བསྒྱིངས་རྡོ་རྗེ་མའི་ཛམྦྷ་ནཀཱ་རཱི་ཧཱུཾ་དྲཱུཾ་ཞེས་བྱ་བས་འཇིགས་པ་དང༌། གདོན་དང་ཟ་བ་པོ་རྣམས་དང༌། རིག་སྔགས་འཆང་བ་དང་བཞི་ལ་ཧཱུཾ་གིས་རྡོ་རྗེས་གཅོད་པ་དང༌། དྲཱུཾ་གིས་ཕུར་བུས་གདབ་པའོ། །གསེར་འོད་ལྟ་བུའི་སྟཾ་བྷ་ན་ཀཱ་རཱི་ཧཱུཾ་དྲཱུཾ་གིས་ནི་འཇིགས་པ་དང༌། གདོན་དང༌། ཟབ་པོ་རྣམས་དང༌། རིག་སྔགས་འཆང་བ་བཞི་ལ་འཁོར་ལོས་གཅོད་པ་དང་ཕུར་བུས་གདབ་པའོ། །རྡོ་རྗེ་དཀར་མོའི་མ་ཧཱ་བིདྱཱ་སཾ་བྷ་ཀྵ་ཎ་ཀཱ་རཱི་ཧཱུཾ་དྲཱུཾ་གིས་ནི་སྔ་མ་བཞིན་དུ་བཞི་ལ་པདྨའི་རྡོ་རྗེས་གཅོད་ཅིང་ཕུར་བུས་འདེབས་པའོ། །རྡོ་རྗེ་འགྲོས་མའི་པ་ར་བིདྱཱ་སམྦྷ་ཀྵ་ཎ་ཀཱ་རཱི་ཧཱུཾ་དྲཱུཾ་ཞེས་བྱ་བས་སྔ་མ་བཞིན་དུ་བཞི་ལ་སྣ་ཚོགས་རྡོ་རྗེས་གཅོད་ཅིང་ཕུར་བུས་འདེབས་པའོ། །པདྨའི་སྤྱན་གྱིས་སརྦ་དུ་ཥྚཱ་ཎཱཾ་སྟཾ་བྷ་ན་ཀཱ་རཱི་ཧཱུཾ་དྲཱུཾ་ཞེས་བྱ་བས་སྔ་མ་བཞིན་དུ་བཞི་ལ་འཁོར་ལོས་གཅོད་ཅིང་ཕུར་བུས་འདེབས་པའོ། །ཟླ་འོད་ཀྱིས་སརྦ་ཡཀྵ་རཀྵ་སཱཾ་གྲ་ཧཱ་ཎཱཾ་བིདྡྷྭཾ་ས་ན་ཀཱ་རཱི་ཧཱུཾ་དྲཱུཾ་ཞེས་བྱ་བས་སྔ་མ་བཞིན་དུ་བཞི་ལ་རྡོ་རྗེས་གཅོད་ཅིང་ཕུར་བུས་འདེབས་པའོ། །སངས་རྒྱས་དཔལ་གྱིས་ཙ་ཏུ་རཱ་ཤི་ཏཱི་ནཱཾ་གྲ་ཧ་ས་ཧ་སྲ་ཎཱཾ་བིདྷྲཾ་ས་ན་ཀཱ་རཱི་ཧཱུཾ་དྲཱུཾ་ཞེས་བྱ་བས་སྔ་མ་བཞིན་དུ་བཞི་ལ་སྒྲུབ་པའི་པདྨའི་རྡོ་རྗེས་གཅོད་ཅིང་ཕུར་བུས་འདེབས་པའོ། །དེ་བཞིན་སྤྱན་གྱིས་ཨཥྚ་བིཾ་ཤ་ཏཱི་ནཱཾ་ནཀྵ་ཏྲཱ་ཎཱཾ་པྲ་ས་དྷ་ནཀཱ་རཱི་ཧཱུཾ་དྲཱུཾ་ཞེས་བྱ་བས་སྔ་མ་བཞིན་དུ་བཞི་ལ་སྣ་ཚོགས་རྡོ་རྗེས་གཅོད་ཅིང་ཕུར་བུས་
འདེབས་པའོ། །སྟེང་གི་རྡོ་རྗེ་ཉི་མའི་འོད་དང༌། འོག་གི་དེ་བཞིན་ཟླ་བ་རྡོ་རྗེ་འཛིན་མ་དང་གཉིས་ཀྱི་སྔགས་གཅིག་སྟེ། ཨཥྚ་ཎཱཾ་མ་ཧཱ་གྲ་ཧ་ཎཾ་བི་དྷྭཾ་ས་ན་ཀཱ་རཱི་ཧཱུཾ་དྲཱུཾ་ཞེས་བྱ་བས་རྡོ་རྗེས་གཅོད་ཅིང་ཕུར་བུས་འདེབས་པའོ། །དེ་རྣམས་ཀྱི་ཕྲིན་ལས་བསྟན་པ་ནི་བཅོམ་ལྡན་འདས་མ་ཞེས་པ་ནས་རྡོ་རྗེ་ཡངས་པ་ཆེན་མོས་ཞེས་བྱ་བའི་བར་དུ་དཀྱིལ་འཁོར་གྱི་འཁོར་ལོའི་ལྷ་བྱེད་པ་པོ་ཡིན་པར་སྟོན་ཏོ། །གནས་ནི་ས་གསུམ་གྱི་དཀྱིལ་འཁོར་དུ་བསྲུང་བར་བྱ་བ་ནི་བདག་དང་སེམས་ཅན་ཐམས་ཅད་དོ། །མི་མཐུན་པའི་ཕྱོགས་གང་ལས་བསྲུང་ཞེ་ན། རྒྱལ་པོའི་འཇིགས་པ་ནས་གཅན་གཟན་ཁྲོ་བོའི་འཇིགས་པའི་བར་དུ་རཀྵ་རཀྵ་མཱཾ་ཞེས་པས་བདག་ལ་སྲུངས་ཤིག་སྲུངས་ཤིག་ཅེས་པའོ། །ཡང་གཉིས་པ་གང་ལས་བསྲུང་ཞེ་ན། ཕོ་ཉ་ཀིང་ཀ་རའི་གདོན་ལས་ཏེ། ལྷའི་གདོན་ནས་ཚེར་མ་འདོན་པའི་གདོན་གྱི་བར་ལས་རཀྵ་རཀྵ་མཱཾ་ཞེས་པས་བདག་བདེ་ལེགས་སུ་གྱུར་ཅིག་ཅེས་པའོ། །དེ་རྣམས་ཅི་ཞིག་ཟ་སྙམ་པ་ལ། ལྷ་མདངས་ཟ་བ་དང༌། །ཀླུ་མང་ལ་ཟ་བ་དང༌། ལྷ་མ་ཡིན་ཁྲག་འཐུང་བ་དང༌། གནོད་སྦྱིན་ཞག་ཟ་བ་དང༌། སྲིན་པོ་ཤ་ཟ་བ་དང༌། ཡི་དགས་ཚིལ་ཟ་བ་དང༌། ཤ་ཟ་རྐང་ཟ་བ་དང༌། འབྱུང་པོ་བཙས་པ་ཟ་བ་དང༌། གྲུལ་བུམ་སྲོག་འཕྲོག་པ་དང༌། སྲུལ་པོ་སྐྱུགས་པ་ཟ་བ་དང༌། ལུས་སྲུལ་པོ་མཆིལ་མ་ཟ་བ་དང༌། སྐེམ་བྱེད་གཅིན་འཐུང་བ་དང༌། བརྗེད་བྱེད་སྟོར་ཁུང་ནས་འབབ་པ་འཐུང་བ་དང༌། སྨྱོ་བྱེད་ལྷག་མ་ཟ་བ་དང༌། གྲིབ་གནོན་སྣབས་ཟ་བ་དང༌། གནོན་པོ་ངར་སྣབས་ཟ་བ་དང༌། མཁའ་འགྲོ་མ་མི་གཙང་བ་ཟ་བ་དང༌། ནམ་གྲུ་གཏོར་མ་ཟ་བ་དང༌། གཤིན་རྗེ་ཕྲེང་བ་ཟ་བ་དང༌། བྱའི་གདོན་དྲི་ཟ་བ་དང༌། མ་མོ་དགའ་བར་བྱེད་པ་མེ་ཏོག་ཟ་བ་དང༌། ཀུན་དུ་ཕྲེང་བ་འབྲས་དང་ལོ་ཏོག་ཟ་བ་དང༌། ཚེར་མ་འདོན་པས་ཟས་སུ་སྦྱིན་སྲེག་ཟ་བ་སྟེ། གདོན་དེ་དག་ཐམས་ཅད་ཀྱི་འཇིགས་པ་དང༌། རིག་སྔགས་རྣམས་ལེ་ལིང་ག་ལ་མཚོན་གྱིས་གཅོད་དོ། །ལིང་ག་ལ་ཕུར་བུས་བཏབ་ནས་མནན་པར་བྱའོ། །དེ་བཞིན་དུ་གདོན་ཕོ་ཉ་དེ་དག་གཏོང་བར་བྱེད་པ་དང་པོ་མུ་སྟེགས་ཀྱི་ཀུན་དུ་རྒྱུ་དང༌། གཉིས་པ་མཁའ་འགྲོ་མ་རྣམས་དང༌། གསུམ་པ་ཚངས་པ་དང༌། བཞི་པ་དབང་ཕྱུག་ཆེན་པོ་དང༌། ལྔ་པ་ཁྱབ་འཇུག་སྲེད་མེད་ཀྱི་བུ་དང༌།
དྲུག་པ་ནམ་མཁའ་ལྡིང་དང༌། བདུན་པ་ནག་པོ་ཆེན་པོ་དང༌། བརྒྱད་པ་གཤིན་རྗེའི་ཆུང་མ་མ་མོའི་ཚོགས་དང༌། །དགུ་པ་མུ་སྟེགས་ཀྱི་བརྟུལ་ཞུགས་མིའི་ཐོད་པ་ཅན་དང༌། བཅུ་པ་རྒྱལ་བར་བྱེད་པ་ལ་སོགས་པ་མིང་པོ་གསུམ་དང༌། བཅུ་གཅིག་པ་སྲིང་མོ་བཞི་དང༌། བཅུ་གཉིས་པ་བྷྲྀང་གི་རི་ཏི་དང༌། དགའ་བྱེད་དབང་ཕྱུག་དང༌། ཚོགས་ཀྱི་བདག་པོ་སྤུན་གསུམ་དང༌། བཅུ་གསུམ་པ་དགེ་སྦྱོང་གཅེར་བུ་དང༌། བཅུ་བཞི་པ་དགེ་སྦྱོང་མགོ་རེག་དང༌། བཅོ་ལྔ་པ་དགྲ་བཅོམ་པ་དང༌། བཅུ་དྲུག་པ་རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བ་དང༌། ཕྱིར་མི་འོང་པ་སྟེ། འདོད་ཆགས་དང་བྲལ་བ་དང༌། བཅུ་བདུན་པ་རྒྱལ་ཚབ་ཏུ་དབང་བསྐུར་བ་འཇིག་རྟེན་དབང་ཕྱུག་ཆེན་པོ་འཁོར་དང་བཅས་པ་དང༌། བཅོ་བརྒྱད་པ་ལག་ན་རྡོ་རྗེ་འཁོར་དང་བཅས་པ་ཐམས་ཅད་དང༌། བཅུ་དགུ་པ་ཕོ་ཉ་ཕྱོགས་སྐྱོང་བ་བཅུ་དང༌། ཕོ་ཉ་མོ་དེ་རྣམས་ཀྱེ་ཆུང་མ་བཅུ་དང༌། བྲན་མོས་འོག་གི་ཕག་དང༌། གཤིན་རྗེ་དང༌། ལོག་འདྲེན་དང༌། ཀླུ་བཞི་དང༌། དེའི་ཆུང་མ་བཞི་བྲན་མོས་བྱས་པ་དང༌། ཉི་ཤུབ་དྲང་སྲོང་གི་ཚོགས་དང༌། ཉེར་གཅིག་པ་ལྷའི་ཚོགས་དང༌། ཉེར་གཉིས་པ་མི་འཕྲོད་པ་ཟ་བའི་ཚོགས་ཀྱི་ལིང་ག་དུམ་བུར་བཅད་ནས་སྦྱིན་སྲེག་བྱ་བ་དང༌། ཕུར་བུས་བཏབ་ནས་མནན་པ་བྱ་བ་ནི་སྔ་མ་བཞིན་དུ་ཤེས་པར་བྱའོ། །དེ་ལྟར་ཚོགས་བསགས་པའི་དཀྱིལ་འཁོར་དང༌། བསྲུང་བས་ཕྱིར་བཟློག་པའི་དཀྱིལ་འཁོར་དང༌། གདུག་པ་ཐམས་ཅད་ཚར་གཅོད་པའི་དཀྱིལ་འཁོར་གསུམ་བཤད་ནས། ད་ནི་གཙུག་ཏོར་གདུགས་དཀར་མོ་ཅན་བདག་ཉིད་བསྒོམ་པའི་དཀྱིལ་འཁོར་བཤད་པར་བྱ་སྟེ། དང་པོ་སྟོང་པའི་བྱང་ཆུབ་དང༌། གཉིས་པ་ཟླ་བའི་དཀྱིལ་འཁོར་དང༌། གསུམ་པ་ཡིག་འབྲུ་དང༌། བཞི་པ་རྡོ་རྗེ་དཀར་མོ་རྩེ་དགུ་པ་དང༌། ལྔ་པ་སྐུ་ཡོངས་སུ་རྫོགས་པ་དང༌། དྲུག་པ་ལུས་ལ་ལྷ་ཡོངས་སུ་དགོད་པ་སྟེ་ཆོ་ག་དེ་རྣམས་ཀྱིས་རང་ཉིད་ལྷར་བསྐྱེད་ལ་དཔག་ཚད་བཅུ་གཉིས་ཀྱི་ནང་ཚུན་ཆད་དུ་ནད་བཞི་བརྒྱ་རྩ་བཞི་དང། གདོན་གྱི་རིགས་སྟོང་ཕྲག་བརྒྱད་ཅུ་ཚར་གཅོད་པར་བྱ་བའི་ཕྱིར་བདག་ཉིད་གཙུག་ཏོར་དཀར་མོ་ཞལ་ལྔ་པ་ཕྱག་བརྒྱད་པར་བསྒོམས་ཏེ། ཞལ་བཞི་དཀར་པོ་སྟེང་མ་སྔོན་པོའོ། །ཕྱག་དང་པོ་ན་རྡོ་རྗེ་འབར་བ། གཉིས་པ་ན་རལ་གྲི། །
གསུམ་པ་ན་གཏུན་ཤིང༌། བཞི་པ་ན་འཁོར་ལོ། །གཡོན་གྱི་དང་པོ་ན་ལྕགས་ཀྱུ། གཉིས་པ་ན་དགྲ་སྟ། གསུམ་པ་ན་མདུང༌། བཞི་པ་ན་ཞགས་པ་བསྣམས་པ། ཉི་མའི་འོད་མངའ་མ། མེ་དཔུང་འབར་བའི་དབུས་ན་བཞུགས་པ། དེ་དང་ཐ་མི་དད་ཀྱི་ཡེ་ཤེས་སེམས་དཔའ་དང་གཅིག་ཏུ་གྱུར་པ་བསམས་ལ། བཅོམ་ལྡན་འདས་མ་ཞེས་བྱ་བ་ནས་བདག་ལ་བསྲུང་དུ་གསོལ་བསྲུང་དུ་གསོལ་ཞེས་བྱ་བའི་བར་གྱིས་ཕྱག་འཚལ་ཞིང་གསོལ་བ་བཏབ་ནས་སྙིང་པོ་བཟླ་བར་བྱ་སྟེ། ཨོཾ་ཨ་སི་ཏ་ཨ་ན་ལཱརྐ་པྲ་བྷཱ་སྥུ་ཏ་ཏེ་ཞེས་བྱ་བའི་ཡི་གེའི་དོན་ནི་མི་ཐུབ་པ་ཉི་མའི་མེའི་འོད་ཟེར་འཕྲོ་བའོ། །བི་ཀ་སི་ཏ་ཏཱ་པ་ཏྲི་ནི་གཙུག་ཏོར་གདུགས་དཀར་མོ་ཡངས་པའོ། །ཨོཾ་ཛྭ་ལ་ཛྭ་ལ་ནི་གཡས་པའི་རྡོ་རྗེ་འབར་བའོ། །ཁ་ད་ཁ་ད་ནི་རལ་གྲིས་གཅོད་ཅིང་ཟ་བའོ། །ཧ་ན་ཧ་ན་ནི་གཏུན་ཤིང་གིས་བསྣུན་པའོ། །དྷ་ར་བྷ་ར་ནི་འཁོར་ལོ་འཆང་པའོ། །བི་དྷ་ར་བི་དྷ་ར་ནི་ལྕགས་ཀྱུས་འཛིན་པའོ། །ཙྪིན་ད་ཙྪིན་ད་ནི་དགྲ་སྟས་གཅོད་པའོ། །བྷིནྡ་བྷིན་ད་ནི་མདུང་གིས་འབིགས་པའོ། །བྷ་ནྡྷ་བྷ་ནྡྷ་ནི་ཞགས་པས་འཆིང་བའོ། །ཧཱུཾ་ཧཱུཾ་ནི་ཐབས་དང་ཤེས་རབ་བོ། །ཕཊ་ཕཊ་ནི་གདུག་པ་འདུལ་བའོ། །སྭཱ་ཧཱ་ནི་ཞི་བའོ། །དེ་ནི་སྙིང་པོའོ། །ཧེ་ཧེ་ཕཊ་ཅེས་པས་མགོ་བོ་ལ་རྣམ་བསྒྱིངས་རྡོ་རྗེ་མ་སྔ་མ་བཞིན་དུ་བསམ་མོ། །ཧོ་ཧོ་ཕཊ་ཅེས་པས་ལྐོག་མར་གསེར་འོད་ལྟ་བུའི་སྤྱན་མདའ་མ་བསམ་མོ། །ཨ་མོ་གྷཱ་ཡ་ཕཊ་ཅེས་བྱ་བ་སྙིང་གར་རྡོ་རྗེ་འགྲོས་བསམ་མོ། །ཨ་པྲ་ཏི་ཧ་ཏ་ཡ་ཕཊ་ཅེས་པས་ལྟེ་བར་དཀར་མོ་བསམ་མོ། །བ་ར་དཱ་ཡ་ཕཊ་ཅེས་པས་དཔུང་པ་གཡས་པ་ལ་པདྨའི་སྤྱན་བསམ་མོ། །པ་ར་པྲ་དཱ་ཡ་ཕཊ་ཅེས་པས་དཔུང་པ་གཡོན་པ་ལ་ཟླ་འོད་བསམ་མོ། །ཨ་སུ་ར་བི་དྲཱ་པ་ཎ་ཀ་རཱ་ཡ་ཕཊ་ཅེས་པས་བྲལ་གཡས་པ་ལ་སངས་རྒྱས་དཔལ་བསམ་མོ། །བ་ར་བི་དྲཱ་པ་ཎ་ཀ་རཱ་ཡ་ཕཊ་ཅེས་པས་བརླ་གཡོན་པ་ལ་དེ་བཞིན་སྤྱན་བསམ་མོ། །མིག་གཡས་པ་ལ་རྡོ་རྗེ་ཉི་མའི་འོད་བསམ་མོ། །མིག་གཡོན་པ་ལ་དེ་བཞིན་དུ་ཟླ་བ་རྡོ་རྗེ་འཛིན་བསམ་མོ། །དེ་ལྟར་བསྐྱེད་ནས་ཤར་ཕྱོགས་སུ་ཨིནྡྲ་ཡེ་ཕཊ་ཅེས་པས་བརྒྱ་བྱིན་དང༌། ཤར་ལྷོར་ཨགྣ་ཡེ་ཕཊ་ཅེས་པས་མེ་ལྷ་དང༌། ལྷོར་ཡ་མ་ཡེ་ཕཊ་ཅེས་པས་གཤིན་རྗེ་
དང། ལྷོ་ནུབ་ཏུ་ནཻརྲཾ་ཏ་ཡེ་ཕཊ་ཅེས་པས་བདེན་བྲལ་དང༌། ནུབ་ཏུ་བ་རུ་ཎ་ཡེ་ཕཊ་ཅེས་པས་ཆུ་ལྷ་དང༌། ནུབ་བྱང་དུ་མཱ་རུ་ཏི་ཡེ་ཕཊ་ཅེས་པས་རླུང་ལྷ་དང༌། བྱང་དུ་སཽ་མ་ཡེ་ཕཊ་ཅེས་པས་གནོད་སྦྱིན་དང༌། བྱང་ཤར་དུ་ཨཱི་ཤྭ་ན་ཡེ་ཕཊ་ཅེས་པས་དབང་ལྡན་དང༌། ཤར་སྒོར་ཀཱ་ལ་དཎྜི་ཡེ་ཕཊ་ཅེས་པས་དབྱུག་པ་ནག་མོ་དང༌། ལྷོ་སྒོར་ཀཱ་ལ་རཱ་ཏྲི་ཡེ་ཕཊ་ཅེས་པས་དུས་མཚན་ནག་མོ་དང༌། ནུབ་སྒོར་ཡ་མ་དཎྜི་ཡེ་ཕཊ་ཅེས་པས་གཤིན་རྗེ་དབྱིག་པ་མ་དང༌། བྱང་སྒོར་ཡ་མ་རཱ་ཏྲཱི་ཡེ་ཕཊ་ཅེས་པས་གཤིན་རྗེ་དུས་མཚན་མ་དང༌། དུར་ཁྲོད་བརྒྱད་ཀྱི་གནས་སུ་ཀ་པཱ་ལཱི་ཡེ་ཕཊ་ཅེས་པས་ཞིང་སྐྱོང་རྣམས་དང༌། དུར་ཁྲོད་རྣམས་སུ་ཨ་དྷི་མུཀྟི་ཤྨ་ཤཱ་ན་བ་སི་ནཱི་ཡེ་ཕཊ་ཅེས་པས་མ་མོ་བརྒྱད་དགོད་དོ། །ཨོཾ་ཥྚོཾ་བནྡྷ་བནྡྷ་རཀྵ་རཀྵ་མཱཾ་སྭཱ་ཧཱ་ཞེས་བྱ་བས་ནི་ལྷའི་གདོན་ལ་སོགས་པ་ནས་ཚེར་མ་འདོན་པའི་གདོན་གྱི་བར་དུ་ཞགས་པས་ཆིངས་ལ་བདག་ལ་སྲུངས་ཤིག་པའོ། །དེ་ནས་གཏོར་མ་བྱིན་ལ་སྔགས་ཀྱི་ཕྲིན་ལས་བཅོལ་བ་ནི་སརྦ་དེ་བཱི་བྷྱཿ་ཕཊ་ནི་ལྷ་མོ་རྣམས་ལའོ། །ནཱ་ག་ནི་ཀླུའོ། །ཡཀྵ་གནོད་སྦྱིན་ནོ། །རཀྵ་སཱ་ནི་སྲིན་པོའོ། །བྷཱུ་ཏ་ནི་འབྱུང་པོའོ། །པྲེ་ཏ་ནི་ཡི་དགས་སོ། །པི་ཤཱ་ཙི་ནི་ཤ་ཟའོ། །ཀུམྦྷཎྜ་ནི་གྲུལ་བུམ་མོ། །པཱུ་ཏ་ན་ནི་སྲུལ་པོའོ། །ཀ་ཊ་པཱུ་ཏ་ན་ནི་ལུས་སྲུལ་པོའོ། །སྐནྡྷེ་ནི་སྐེམ་བྱེད་དོ། །ཨུནྨཱ་ད་ནི་སྨྱོ་བྱེད་དོ། །ཙྪེ་ཡཱེ་ནི་གྲིབ་གནོན་ནོ། །ཨ་པ་སྨཱ་ར་ནི་བརྗེད་བྱེད་དོ། །ཨོ་སྟ་ར་ཀཱ་ནི་གནོན་པོའོ། །ཌཱ་ཀི་ནི་མཁའ་འགྲོ་མའོ། །རེ་བ་ཏི་ནི་ནམ་གྲུའི་གདོན་ནོ། །ཡ་མ་ཀེ་ནི་གཤིན་རྗེའི་གདོན་ནོ། །ཤ་ཀུ་ན་ནི་བྱའི་གདོན་ནོ། །མཱ་ཏྲི་ག་ཎ་ནི་མ་མོ་དགའ་བར་བྱེད་པའི་གདོན་ནོ། །ཀཽ་མ་རཱི་ཀུན་དུ་འགྲོ་བའི་གདོན་ནོ། །ཨ་བ་ལམྦ་ག་ནི་རེ་ལྡེའི་གདོན་ནོ། །ཀ་ཊ་ཌ་ནི་ཀུན་དུ་འགྲོ་བའི་གདོན་ནོ། །ཀཎྜི་ནི་ཚེར་མ་འདོན་པའི་གདོན་ནོ། །གནྡྷ་རྦ་ནི་དྲི་ཟའི་གདོན་ནོ། །ཨ་སུ་ར་ནི་ལྷ་མ་ཡིན་གྱི་གདོན་ནོ། །ཀི་ཎ་ར་ནི་མིའམ་ཅིའི་གདོན་ནོ། །ག་རུ་ཌ་ནི་ནམ་མཁའ་ལྡིང་ངོ༌། །མ་ཧོ་ར་ག་ནི་ལྟོ་འཕྱེ་ཆེན་པོའོ། །དུར་ལང་གི་ནི་བསྒོམ་ཉེས་སོ། །དུཿ་པྲེཀྵི་ཏི་ནི་བལྟ་ཉེས་སོ། །ཛྭཱ་ར་ནི་རིམས་སོ། །བྷ་ཡེ་ནི་འཇིགས་པའོ། །ཨུ་པ་དྲ་བ་ནི་ཉེ་བར་འཚེ་བའོ། །ཨུ་པས་རྒ་ནི་ཉེ་བར་གནོད་པའོ། །ཤྲ་མ་ཎ་ནི་དགེ་སྦྱོང་མགོ་རེག་
གོ །ཏིརྠི་ཀ་ནི་དགེ་སྦྱོང་གཅེར་བུའོ། །པཱ་ཏ་ཀ་ནི་རྒྱལ་མཚན་འཆང་བའོ། །བིདྱཱ་དྷར་ར་ནི་རིག་པ་འཛིན་པའོ། །ཛ་ཡ་ཀར་ནི་རྒྱལ་བར་བྱེད་པའོ། །མ་དྷུ་ཀ་ར་ནི་སྦྲང་རྩིར་བྱེད་པའོ། །སརྦ་ཨརྠ་སཱ་དྷཱ་ཀ་ནི་དོན་ཀུན་གྲུབ་པ་སྟེ་མིང་པོ་གསུམ་མོ། །ཙ་ཏུར་བྷྱོ་བྷ་གི་ན་ནི་སྲང་མོ་བཞིའོ། །བཛྲ་ཀུ་མཱ་ར་བཛྲ་ཀུ་ལནྡྷ་ར་ནི་རྡོ་རྗེ་གཞོན་ནུ་མ་རྡོ་རྗེ་རིག་འཛིན་ནོ། །མ་ཧཱ་པྲ་ཏྱཱཾ་གི་ར་ནི་གཤེད་བྱེད་དོ། །བཛྲ་ཤྲཱིཾ་ཁ་ལ་ཡ་པྲ་ཏྱཱཾ་གི་ར་རཱ་ཛ་ནི་རྡོ་རྗེ་ལྕགས་སྒྲོག་གཤེད་བྱེད་ཀྱི་རྒྱལ་བའོ། །མ་ཧཱ་ཀཱ་ལཱ་ཡ་མཱ་ཏྲི་ག་ཎ་ན་མཿ་ཀྲྀ་ཏ་ཡ་ནི་ནག་པོ་ཆེན་པོ་མ་མོའི་ཚོགས་ཀྱིས་ཕྱག་བྱས་པའོ། །བྲཏྨཱ་ཎི་ནི་ཚངས་མའོ། །བྲིཥྞུ་བི་ནི་ཁྱབ་འཇུག་མའོ། །མ་ཧེ་ཤྭ་རི་ནི་དབང་ཕྱུག་ཆེན་མོའོ། །རུ་དྲི་ནི་དྲག་མོའོ། །མ་ཧཱ་ཀཱ་ལི་ནི་ནག་མོ་ཆེན་མོའོ། །ཙ་མུཎྜི་ནི་གཤིན་རྗེའི་ཆུང་མའོ། །ཀུམཱ་རི་ནི་གཞོན་ནུ་མའོ། །བཱརཱ་ཧཱི་ནི་ཕག་མོའོ། །དེ་རྣམས་ལ་གཏོར་མ་བྱིན་ལ་སྔགས་དེ་རྣམས་ཀྱིས་བསྔོས་ཏེ་སྨོན་ལམ་གདབ་པར་བྱའོ། །སེམས་ཅན་གང་སུ་དག་བདག་ལ་གདུག་པ་དང་གདུག་པའི་སེམས་དང་ལྡན་པ་ཞེས་བྱ་བ་ནས་སྟོན་བརྒྱ་མཐོང་བར་གྱུར་ཅིག་ཅེས་བྱ་བའི་བར་དུ་སྨོན་ལམ་གདབ་པར་བྱའོ། །གནོད་སྦྱིན་དང་གདོན་དག་སུ་དག་ཟས་སུ་མདངས་ཟ་བ་དང་ཞེས་བྱ་བ་ནས་ཟས་སུ་གཏོར་ཁུང་ནས་འབབ་པ་འཐུང་བ་རྣམས་དང་ཞེས་བྱ་བའི་བར་ནི་སྔར་བཤད་ཟིན་པའི་ཆོ་འབྲང་བརྗོད་པས་འཚང་བྲུས་ནས་གཏོར་མ་ལེན་པའོ། །སྡིག་པའི་སེམས་དང་ལྡན་ཞེས་བྱ་བ་ནས་སྟོན་བརྒྱ་མཐོང་བར་གྱུར་ཅིག་ཅེས་བྱ་བའི་བར་དུ་གདོན་དེ་རྣམས་ལས་བདག་ལ་བསྲུང་བར་མཛད་དུ་གསོལ་ཞེས་ཕྲིན་ལས་བཅོལ་བའོ། །གདོན་ལས་བསྲུང་བ་བསྟན་ནས། ནད་ལས་བསྲུང་བའི་ཕྲིན་ལས་བཅོལ་བ་ནི་རིམས་ཉིན་གཅིག་པ་ཞེས་བྱ་བ་ནས་ཉིད་ལག་ན་བ་བསལ་དུ་གསོལ་ཞེས་བྱ་བའི་བར་གྱིས་ནད་མེད་པའི་ཕྲིན་ལས་བཅོལ་བའོ། །གདུགས་དཀར་མོ་ཅན་ཞེས་བྱ་བ་ནས་ཆུ་སྲིན་ལ་སོགས་པའི་སྲོག་ཆགས་རྣམས་བསལ་དུ་གསོལ་ཞེས་བྱ་བའི་བར་གྱིས་འབྱུང་པོ་དང་རོ་ལངས་དང་མཁའ་འགྲོ་མ་དང་གནོད་སྦྱིན་དང་སྲིན་པོས་བྱས་པའི་ནད་དང་སྲོག་ཆགས་ཀྱི་གློ་བུར་གྱི་གནོད་པ་རྣམས་བསལ་དུ་གསོལ་ཞེས་བྱ་བས་ཕྲིན་ལས་གསུམ་བཅོལ་བའོ། །དེ་དག་ཐམས་ཅད་ཀྱི་ལིང་ག་བྱས་ལ་སྙིང་གར་མིང་ཡིག་བཅུག་
ནས་རིག་སྔགས་དང་གཟི་བརྗིད་བཅིང་པའི་མནན་པ་བྱ་བ་དང༌། དགྲ་བོ་གཞན་ཐམས་ཅད་ཀྱི་རིག་སྔགས་བཅིང་བའི་མནན་པ་བྱ་བ་དང༌། དཔག་ཚད་བཅུ་གཉིས་ཀྱི་ནང་ཚུན་ཆད་དུ་མཚམས་བཅིང་བ་དང་ཕུར་བུས་གདབ་པར་བྱའོ། །སྙིང་པོའི་དཀྱིལ་འཁོར་གྱི་ཆོ་ག་སྟེ་བཞི་པའོ།། །། དེ་ནས་ཉེ་བའི་སྙིང་པོ་བཤད་པ་ནི། ཏདྱ་ཐཱ་ཞེས་པ་ནས་བི་ནཱ་ཡ་ཀཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་པའི་བར་གྱིས་ཉེ་བའི་སྙིང་པོའོ། །སུས་ཞེས་བྱ་བ་ནི་ཁྱིམ་པའམ་རབ་ཏུ་བྱུང་བའམ་ཁྱེའུའམ་བུ་མོ་གང་ལ་ལ་ཞེས་བྱ་བའི་དོན་ནོ། །དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བ་གདུགས་དཀར་མོ་ཅན་གཞན་གྱིས་མི་ཐུབ་པ་ཞེས་བྱ་བས་ནི་རས་ལ་བྲི་བའི་ཆོ་ག་བསྟན་ཏེ། ཕྱིར་བཟློག་པའི་རིག་སྔགས་ཀྱི་རྒྱལ་མོ་འདི་ཞེས་བྱ་བ་ནི་སྔགས་ཀྱི་དོན། གཞན་གྱིས་མི་ཐུབ་དྲག་ཤུལ་ཆེ། །ཞེས་བྱ་བ་ནི་འཁོར་ལོའི་ལྟེ་བ་ལ་སྐུ་མདོག་ནག་མོ་རྡོ་རྗེ་དང་སྡིགས་མཛུབ་མཛད་པའོ། །དེའི་ཤར་གྱི་རྩིབས་ལ། གཏུམ་པ་ཆེན་མོ་སྟོབས་ཆེན་མོ། །ཞེས་བྱ་བ་སྐུ་མདོག་དཀར་མོ་འཁོར་ལོ་དང་སྡིགས་མཛུབ་མཛད་པའོ། །ལྷོའི་རྩིབས་ལ། འབར་བ་ཆེན་མོ་གཟི་བརྗིད་ཆེ། །ཞེས་བྱ་བ་སྐུ་མདོག་སེར་མོ་རིན་པོ་ཆེ་རྡོ་རྗེས་མཚན་པ་དང་སྡིགས་མཛུབ་མཛད་པའོ། །ནུབ་ཀྱི་འཁོར་ལོའི་རྩིབས་ལ། དཀར་ཆེན་འབར་ཕྲེང་གོས་དཀར་མོ། །ཞེས་བྱ་བ་སྐུ་མདོག་དམར་མོ་རྡོ་རྗེ་པདྨ་དང་སྡིགས་མཛུབ་མཛད་པའོ། །བྱང་གི་རྩིབས་ལ། འཕགས་མ་སྒྲོལ་མ་ཁྲོ་གཉེར་ཅན། །ཞེས་བྱ་བ་སྐུ་མདོག་ལྗང་གུ་སྣ་ཚོགས་རྡོ་རྗེ་དང་སྡིགས་མཛུབ་མཛད་པའོ། །བྱང་ཤར་གྱི་རྩིབས་ལ། རྒྱལ་བའི་རྡོ་རྗེ་ཕྲེང་ཞེས་གྲགས། །ཞེས་བྱ་བ་སྐུ་མདོག་སྔོན་མོ་དབྱིག་པ་དང་སྡིགས་མཛུ་མ་མཛད་པའོ། །ཤར་ལྷོའི་རྩིབས་ལ་པདྨའི་མངོན་མཚན་ཞེས་བྱ་བ་སྐུ་མདོག་སེར་མོ་ལྕགས་ཀྱུ་དང་སྡིགས་མཛུབ་མཛད་པའོ། །ལྷོ་ནུབ་ཀྱི་རྩིབས་ལ། གཞན་གྱིས་མི་ཐུབ་ཕྲེང་བ་ཅན། །ཞེས་བྱ་བ་སྐུ་མདོག་དམར་མོ་རྡོ་རྗེ་ཕྲེང་བ་དང་སྡིགས་མཛུབ་མཛད་པའོ། །ནུབ་བྱང་གེ་རྩིབས་ལ། རྡོ་རྗེའི་མཆུ་ཅན་རྣམ་སྒེག་མོ། །ཞེས་བྱ་བ་སྐུ་མདོག་ལྗང་གུ་རལ་གྲི་དང་སྡིགས་མཛུབ་མཛད་པའོ། །དེ་རྣམས་ཀྱི་སྔགས་ནི་དེ་བི་བཛྲ་དྷཱ་རི་བནྡྷ་བནྡྷ་ནི་བཛྲ་པཱ་ཎི་ཕཊ་ཨོཾ་ཧཱུཾ་དྲཱུཾ་ཧྲཱིཿ་ཥྚོཾ་ཕཊ་སྭཱ་ཧཱ་ཞེས་པ་སྟེ། ལྷ་མོ་རྡོ་རྗེ་འཆང་མ་ཞེས་པ་མཚན་གཉིས་པ་ཡིན་ནོ། །ཤར་དུ་ཨོཾ་
ཨ་ན་ལེ་ཨ་ན་ལེ་ཞེས་པ་མཚན་གཉིས་པ་མེ་འབར་མའོ། །ལྷོ་ཕྱོགས་སུ་ཁ་ས་མེ་ཁ་ས་མེ་ཞེས་པ་མཚན་གཉིས་པ་མཁའ་སྤྱོད་མའོ། །ནུབ་ཏུ་བྷཻ་ར་བྷཻ་ར་ཞེས་པ་མིང་ནི་འཇིགས་མའོ། །བྱང་དུ་སཽ་མེ་སཽ་མེ་ཞེས་པ་མིང་ནི་ཟླ་བ་མའོ། །བྱང་ཤར་དུ་ཤཱནྟེ་ཤཱནྟེ་ཞེས་པ་མིང་ནི་ཞི་བ་མའོ། །ཤར་ལྷོར་དཎྜེ་དཎྜེ་ཞེས་པ་མིང་ནི་དབྱིག་པ་མའོ། །ལྷོ་ནུབ་ཏུ་བི་ཤ་དེ་བི་ཤ་དེ་ཞེས་པ་མིང་ནི་འཇོམས་པ་མའོ། །ནུབ་བྱང་དུ་བཱི་རེ་བཱི་རེ་ཞེས་པ་མིང་ནི་དཔའ་མོའོ། །ཡང་ན་དེ་རྣམས་ཀྱི་དབུས་སུ་བཅོམ་ལྡན་འདས་ཕྱག་ན་རྡོ་རྗེ་རྡོ་རྗེ་དང་ཞགས་པ་བསྣམས་པ་བགེགས་ཀྱི་རྒྱལ་པོ་ལོག་འདྲེན་མནན་པ་བྲིས་ལ་སྙིང་པོ་ནི་ཨོཾ་བཛྲ་པཱ་ཎི་བནྡྷ་བནྡྷ་བཛྲ་པཱ་ཤེ་ན་མཱ་མ་སརྦ་དུཥྚཱན་བིགྷྣཾ་བི་ནཱ་ཡ་ཀཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་བྱ་བ་ཉེ་བའི་སྙིང་པོའོ། །ལྷའི་འཁོར་ལོ་འདི་གྲོ་གའམ་རས་སམ་ཤིང་ཤུན་ལ་བྲིས་ཏེ་ལུས་སམ་མགུལ་དུ་བཏགས་ནས་ཀློག་ཅིང་ཟློས་པར་བྱེད་ན་དེ་ལ་ཇི་སྲིད་འཚོའི་བར་དུ་དུག་གིས་མི་ཚུགས་ཞེས་བྱ་བ་ནས་ལོག་འདྲེན་ཐམས་ཅད་ཀྱང་དགའ་བར་འགྱུར་རོ་ཞེས་བྱ་བའི་བར་ནི་ཕན་ཡོན་ནོ། །དེ་ལྟར་ཉེ་བའི་སྙིང་པོའི་ལྷའི་འཁོར་ལོའི་བསྙེན་པ་དང་དཀྱིལ་འཁོར་བྱེད་པ་ལ་རྡོ་རྗེའི་རིགས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་རྣམས་དང༌། གྲུབ་པའི་ལྷ་མོ་སྔ་མ་རྣམས་ཀྱིས་ཀྱང་ལས་དང་པོ་པའི་རྣལ་འབྱོར་པ་དེ་ལ་རྟག་ཏུ་མཐུན་པར་ནང་གི་ནད་བཞི་བརྒྱ་རྩ་བཞི་ལས་བསྲུང་བ་དང༌། ཕྱི་རོལ་གྱི་བགེགས་སྟོང་ཕྲག་བརྒྱད་ཅུ་རྩ་བཞི་ལས་སྐྱོབ་པ་དང༌། གཉིས་ཀ་ལས་སྦེད་པར་བྱེད་པ་དང༌། དེ་རྣམས་ཀྱི་ཡིད་དུ་འོང་བ་དང་དགའ་བར་བྱེད་པར་ཡང་འགྱུར་རོ། །བསྙེན་པ་དང་དཀྱིལ་འཁོར་ལ་མཚན་མ་ཐོབ་པ་ནི་བསྐལ་པ་ཆེན་པོ་སྟོང་ཕྲག་བརྒྱད་ཅུ་རྩ་བཞིར་སྐྱེ་བ་དྲན་པར་འགྱུར་རོ་ཞེས་པ་ནས། མི་དབུལ་པོར་མི་འགྱུར་རོ་ཞེས་པའི་བར་ནི་ཕན་ཡོན་ཡིན་ནོ། །བསྙེན་པ་དང་དཀྱིལ་འཁོར་གྱི་མཚན་མ་ཐོབ་པའི་རྣལ་འབྱོར་པ་ལ་སངས་རྒྱས་བཅོམ་ལྡན་འདས་གྲངས་མེད་དཔག་ཏུ་མེད་པ་ཞེས་བྱ་བ་ནས་དགྱེས་པར་ཡང་འགྱུར་རོ་ཞེས་བྱ་བའི་བར་ནི་ཕན་ཡོན་ཡིན་ནོ། །བསྙེན་པ་དང་དཀྱིལ་འཁོར་ལ་སྟོང་པ་ཉིད་བསྒོམ་པའི་རྣལ་འབྱོར་པ་དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་ནས་བྱུང་བ་ཞེས་བྱ་བ་ནས་སྔོན་གྱི་ལས་ཀྱི་སྒྲིབ་པ་མ་ལུས་
པར་བྱང་བར་འགྱུར་རོ་ཞེས་བྱ་བའི་བར་དུ་ཕན་ཡོན་བསྟན་ཏོ། །གཞན་ཡང་གཙུག་ཏོར་གདུགས་དཀར་མོ་འདི་ཡི་གེར་འབྲི་བ་དང་མཆོད་པ་དང་སྦྱིན་པ་དང་ཉན་པ་དང་ཀློག་པ་དང་ལེན་པ་དང་འཆང་བ་དང་ཁ་ཏོན་བྱེད་པ་དང་དེ་སེམས་པ་དང་བསྒོམ་པའི་རིགས་ཀྱི་བུའམ། རིགས་ཀྱ་བུ་མོ་བུ་འདོད་པ་གང་ལ་ལ་ཞེས་བྱ་བ་ནས་བདེ་བ་ཅན་དུ་སྐྱེ་བར་འགྱུར་རོ་ཞེས་བྱ་བའི་བར་ནི་ཕན་ཡོན་ཡིན་ནོ། །རིག་སྔགས་ཀྱི་རྒྱལ་མོ་འདི་བྲིས་ནས་རྒྱལ་མཚན་གྱི་རྩེ་མོ་ལ་བཏགས་ཏེ་སྟ་གོན་གྱི་རིམ་གྲོ་ཆེར་བྱས་ཏེ་མཆོད་པ་ཆེན་པོ་བྱས་ལ་སྤྱན་ཕྱེ་ནས། གྲོང་ངམ་གྲོང་རྡལ་ལ་སོགས་པར་བཙུགས་ན་མི་ནད་དང༌། ཕྱུགས་ནད་དང༌། ཡམས་ཀྱི་ནད་དང་ཞེས་བྱ་བ་ནས་འབྲུག་གི་སྒྲ་སྒྲོགས་པར་འགྱུར་རོ་ཞེས་བྱ་བའི་བར་དུ་ཕན་ཡོན་ཡིན་ནོ། །ཉེ་བར་འཚེ་བ་དུས་མ་ཡིན་པར་འཆི་བ་བརྒྱད་དང༌། འཇིགས་པ་བརྒྱད་དང༌། སྡུག་བསྔལ་བརྒྱད་བྱུང་བ་དེའི་ཚེ་སྔར་བསྟན་པའི་ཚོགས་བསགས་པའི་སངས་རྒྱས་ཀྱི་རྣལ་འབྱོར་བྱས་ནས་ལན་གསུམ་བཟླས་ན་དེ་ཐམས་ཅད་ཉེ་བར་ཞི་བར་འགྱུར་རོ། །ཉེ་བའི་སྙིང་པོའི་འཁོར་ལོ་རས་ལ་བྲིས་ནས་སྔགས་ལན་གསུམ་བཟླས་ན་ཡང་ཉེ་བར་ཞི་བར་འགྱུར་རོ། །གཞུང་གི་དོན་བཤད་ཟིན་ཏོ། །རྗེས་སུ་ཡི་རང་ཞིང་བསྟོད་པ་ནི་སངས་རྒྱས་དང་བྱང་ཆུབ་སེམས་དཔའ་ལ་སོགས་པ་འཇིག་རྟེན་ལས་འདས་པའི་འཁོར་རྣམས་དང༌། ལྷ་དང༌། མི་དང༌། ལྷ་མ་ཡིན་དང༌། དྲི་ཟར་བཅས་པའི་འཇིག་རྟེན་པའི་འཁོར་གྱིས་རྗེས་སུ་ཡི་རང་ཞིང་བསྟོད་པའོ། །གཙུག་ཏོར་གདུགས་དཀར་མཆོག་གྲུབ་གཟུངས། །སངས་རྒྱས་ཀྱིས་ནི་གསུངས་པ་ལ། །ལག་ན་རྡོ་རྗེས་རབ་བསྡུས་པ། །བརྒྱུད་པའི་རིམ་པ་བླ་མས་བཤད། །ཐོས་ནས་གདམས་ངག་བྲིས་པ་ལས། །བདག་གིས་དགེ་བ་ཅི་བསགས་པ། །དེ་ཡིས་སེམས་ཅན་ཐམས་ཅད་ནི། །རྣམ་སྣང་མཛད་ཆེན་གྲགས་ཆེན་ཤོད། འཕགས་མ་དེ་བཞིན་གཤེགས་པའི་གཙུག་ཏོར་ནས་བྱུང་བ་གདུགས་དཀར་མོ་ཅན་གཞན་གྱིས་མི་ཐུབ་པ་ཕྱིར་བཟློག་པ་ཆེན་མོ་ཞེས་བྱ་བའི་འགྲེལ་པ་སློབ་དཔོན་ཤཱུ་རཾ་ག་ཝརྨ་བཛྲས་མཛད་པ་རྫོགས་སོ།། །།ཟངས་དཀར་འཕགས་པ་ཤེས་རབ་ཀྱིས་བསྒྱུར།། །།