འཕགས་པ་ཕྱག་ན་རྡོ་རྗེ་གོས་སྔོན་པོ་ཅན་གྱི་གཟུངས་ཀྱི་འགྲེལ་པབ།
ཀརྨ་བཛྲ།
རྒྱ་གར་སྐད་དུ། ཨཱཪྻ་ནཱི་ལཱ་མཱ་ར་དྷ་ར་བཛྲ་པཱ་ཎི་དྷཱ་ར་ཎཱི་བི་བྲྀ་ཏྟི་ནཱ་མ། བོད་སྐད་དུ། འཕགས་པ་ཕྱག་ན་རྡོ་རྗེ་གོས་སྔོན་ཅན་གྱི་གཟུངས་ཀྱི་འགྲེལ་བ་ཞེས་བྱ་བ། དཔལ་ཞེ་སྡང་རྡོ་རྗེ་ལ་ཕྱག་འཚལ་ལོ། གདུག་
པ་འཇོམས་པར་བྱེད་པའི་མཆོག །ཕྱག་ན་རྡོ་རྗེ་ལ་བཏུད་ནས། །དེ་ཡི་གཟུངས་ཀྱི་འགྲེལ་པ་འདི། །ལས་ཀྱི་རྡོ་རྗེ་བདག་གིས་བརྩམ། །དེ་ལ་རྗོད་པ་དང༌། བརྗོད་པར་བྱ་བ་དང༌། འབྲེལ་བ་དང༌། དགོས་པ་དང༌། དགོས་པའི་དགོས་པ་མོད་ལ་གསུངས་ཏེ། འདིར་བཤད་པར་བྱ་བ་ཡིན་ཏེ། གང་གི་ཕྱིར་བརྗོད་པ་ལ་སོགས་པ་མ་རྟོགས་པར་ཉན་པ་པོ་རྣམས་ནི་འཇུག་པར་མི་འགྱུར་བས། དེའི་ཕྱིར་གོས་སྔོན་པོ་ཞེས་བྱ་བའི་ལག་ན་རྡོ་རྗེའི་གཟུངས་ཞེས་བྱ་བ་ནི་རྗོད་པར་བྱེད་པའོ། །འཕགས་པ་ལག་ན་རྡོ་རྗེའི་གཟུངས་དང་སྟོབས་དང་མཐུ་ལ་སོགས་པ་གཟུངས་ཀྱི་སྒོ་ནས་བསྟན་པ་ནི་བརྗོད་པར་བྱ་བའོ། །དེ་དག་གིས་ཕན་ཚུན་འབྲེལ་བ་ཡིན་ཏེ། རྗོད་པ་དང༌། བརྗོད་པར་བྱ་བའི་ཕྱིར་རོ། །སེམས་ཅན་ཐམས་ཅད་ལ་དུག་དང༌། འཆིང་བ་དང་འབྱུང་པོ་དང༌། མཁའ་འགྲོ་དང༌། མཁའ་འགྲོ་མ་རྣམས་ཀྱིས་རྒྱས་བཏབ་དང༌། གནོད་སྦྱིན་དང༌། བརྗེད་བྱེད་ལ་སོགས་པའི་འཇིགས་པ་ངེས་པར་བཟློག་པ་ནི་དགོས་པའོ། །དེ་དག་ཀྱང་ཚེ་རིང་བ་དང་ནད་མེད་པ་ལ་སོགས་པ་ཐོབ་ན་འཕགས་པ་ཕྱག་ན་རྡོ་རྗེའི་མཐུ་འདི་ཡིན་ནོ་ཞེས་ངེས་པར་འཛིན་པས་བདེ་བར་གཤེགས་པའི་བསྟན་པ་ལ་ཉེ་བར་འཇུག་ཅིང༌། སངས་རྒྱས་ཀྱི་བྱང་ཆུབ་ཐོབ་པར་འགྱུར་ཞིང༌། དགོས་པའི་དགོས་པའོ། །དེ་ཡང་རིགས་པའི་རྗེས་སུ་འབྲང་བ་རྣམས་ལ་བརྟེན་ཏེ་བཤད་པར་བྱའོ། །དད་པའི་རྗེས་སུ་འབྲང་བ་རྣམས་ཀྱིས་གང་གི་ཚེ་འདྲི་བར་གྱུར་ན་འདི་གང་ཟག་གིས་བརྩམས་ཞེས་དེའི་ཚེ་ཆོས་སྟོན་པ་ལ་སོགས་ཕུན་སུམ་ཚོགས་པ་མདོ་སྡེའི་རྗེས་སུ་འབྲངས་ནས་བཤད་པར་བྱའོ། །དེ་ལ་ཛེ་ཏའི་ཚལ་དུ་མགོན་མེད་ཟས་སྦྱིན་གྱི་ཀུན་དགའ་རབ་ན་ཞེས་བྱ་བས་གནས་ཕུན་སུམ་ཚོགས་པ་དང༌། དེ་བཞིན་དུ་བཅོམ་ལྡན་འདས་ཞེས་བྱ་བས་སྟོན་པ་ཕུན་སུམ་ཚོགས་པ་དང༌། དགེ་སློང་གི་དགེ་འདུན་ཆེན་པོ་ཞེས་བྱ་བས་འཁོར་ཕུན་སུམ་ཚོགས་པ། གཟུངས་གསུངས་པ་ནི་བསྟན་པ་ཕུན་སུམ་ཚོགས་པ་དང༌། དུས་གཅིག་ན་ཞེས་པས་དུས་ཕུན་སུམ་ཚོགས་པ་བསྟན་ཏོ། །དེ་ལ་བཅོམ་ལྡན་འདས་ཀྱིས་གནོད་སྦྱིན་གྱི་སྡེ་དཔོན་ཆེན་པོ་ཞེས་བྱ་བས་དྲག་པོ་ཆེན་པོ་འདུལ་བར་
བྱེད་པ་བསྟན་པ་ཡིན་ཏེ། གནོད་སྦྱིན་གྱི་སྡེ་དཔོན་ཞེས་བྱ་བ་ནི་ཞེ་སྡང་གི་རང་བཞིན་ཅན་ནོ། །དེ་རྣམས་ཀྱི་ཞེས་བྱ་བ་ནི་གཙོ་བོ་ཞེ་སྡང་གི་རིགས་ལས་འབྱུང་བའི་སྤྲུལ་པའི་སྐུ་ཞལ་རྣམ་པར་འགྱུར་བ་བསྟན་པ་ནི་གདུག་པ་འདུལ་བ་འཛིན་པ་བསྟན་པ་ཡིན་ནོ། །དེ་བས་ན་ཕྱག་ན་རྡོ་རྗེ་ཞེས་སྨོས་པ་ནི་རང་གི་རིགས་དང་མཐུན་པའི་རྡོ་རྗེ་མཚན་མ་འཛིན་པའོ། །གོས་སྔོན་པོ་ཅན་ཞེས་བྱ་བས་སྤྲིན་སྔོ་པོ་དང་འདྲ་བའི་ན་བཟའ་བསྣམས་པས་འདི་ནི་སྔོན་མ་མཐོང་བའི་ཀླུ་ཡིན་ཞེས་ཀླུའི་རྒྱལ་པོ་རྣམས་གྲགས་པ་འཇིག་པའི་དོན་ཏོ། །སངས་རྒྱས་གང་གཱའི་ཀླུང་གི་བྱེ་མ་སྙེད་ཀྱིས་གནང་བ་ཞེས་བྱ་བས་ནི། ཕྱག་ན་རྡོ་རྗེ་ཉིད་ལ་དབང་བསྐུར་བ་ཐོབ་པ་བསྟན་ཏེ། གང་གི་ཕྱིར་དེ་བཞིན་གཤེགས་པ་ཐམས་ཅད་ཡོངས་སུ་མྱ་ངན་ལས་འདས་པ་ན་ཕྱག་ན་རྡོ་རྗེ་ཉིད་ལ་གནང་བ་ཞེས་བྱ་བ་ནི་བསྟན་པ་གཏད་དོ། །མཆེ་བ་གཙིགས་པ་ཞེས་བྱ་བ་ནི་མཆེ་བའི་དུག་ཅན་ཀླུ་རྣམས་རྣམ་པར་འཇོམས་པའི་དམ་ཚིག་བསྟན་ཏོ། །མིག་མེ་མ་དག་གི་ཕུང་པོ་འདྲ་བ་ཞེས་བྱ་བས་ཡང་དག་པའི་ཡེ་ཤེས་ཀྱི་མེ་དཔུང་དང་མཚུངས་པའི་སྤྱན་གྱི་ས་ཁམས་གསུམ་པའི་སེམས་ཅན་རྣམས་ཀྱི་ཕྱིན་ཅི་ལོག་པའི་ལྟ་བ་སྲེག་པར་བྱེད་པའི་སྒོ་ནས་ལྟ་བའི་དུག་ཅན་གྱི་ཀླུ་རྣམས་འཇོམས་པའི་དམ་ཚིག་བསྟན་ཏོ། །དབུགས་མེ་ལྕེ་ལྟར་འབར་བ་ཞེས་བྱ་བས་སྲོག་གི་དབུགས་ཀྱི་ཀླུ་དག་བདག་གི་དབང་དུ་བསྡུ་བའི་ཏིང་ངེ་འཛིན་ལ་བརྟེན་ཏེ། མེའི་ཕུང་པོ་དང་འདྲ་བའི་འོད་ཟེར་རྣམས་ཀྱིས་དབང་དུ་བསྡུ་ཞིང་བཅིངས་ཏེ། རྩོལ་བའི་རླུང་རྣམས་ཀྱིས་ཀྱང་གདུག་པའི་སེམས་ཅན་ཐམས་ཅད་འགུགས་པར་མཛད་ཅེས་བྱ་བའི་དོན་ཏོ། །འཇིགས་པའི་ང་རོ་ཅན་ཞེས་བྱ་བ་ནི་རོ་ལངས་སྐྲག་པར་བྱེད་པའི་དམ་ཚིག་གིས་ཀླུ་རྣམས་ཀྱི་འབྲུག་སྒྲའི་རྗེས་སུ་བྱེད་པའི་དགོངས་པས་འཇིགས་པ་སྐྱེད་པར་མཛད་ཅེས་པའི་དོན་ཏོ། །ལག་པ་དང་རྐང་པ་ཀླུ་ནོར་རྒྱས་ཀྱི་བུས་བརྒྱན་པ་ཞེས་བྱ་བས་ནོར་རྒྱས་ཀྱི་བུ་སྔགས་ཀྱིས་བཀུག་ནས་དུག་ཕྲོགས་ནས་ཕྱག་དང་ཞབས་ཀྱི་རྒྱན་ཉིད་དུ་མཛད་ཅེས་བྱ་བའི་དོན་ཏོ། །ཀླུ་ནག་པོ་སེ་རལ་ཁར་ཐོགས་པ་ཞེས་བྱ་བ་ལ། གྲིབ་མ་འགོམས་པ་ཙམ་གྱིས་
དུག་འཕྲོ་བར་བྱེད་པ་གང་ཡིན་པ་དེ་དག་སྤྲུལ་ནག་པོ་སྟེ་གྲིབ་མ་དུག་ཅན་ནོ། །དེ་སེ་རལ་ཁ་ཞེས་བྱ་བ་ནི་ཚངས་པ་ཉིད་ལ་གནས་པའི་རྟགས་སུ་གྱུར་པ་ཚངས་སྐུད་ཐོགས་ཤིང་བརྒྱན་པས་གྲིབ་མའི་དུག་ཅན་གྱི་ཀླུ་རྣམས་འདུལ་བར་བྱེད་པར་བསྟན་ཏོ། །ཀླུ་དགའ་བོ་དང་ཉེ་དགའ་བོ་འབར་བས་རྣ་ཆ་བྱས་པ་ཞེས་བྱ་བ་ལ། དུག་གི་ཁ་ཕྲུ་འབར་བ་རྣམས་ཀྱིས་སེམས་ཅན་ལ་གནོད་པ་བྱེད་པ་དགའ་བོ་དང་ཉེ་དགའ་བོའི་དབང་དུ་འདུས། སངས་རྒྱས་ལ་དད་ཅིང་ཞི་བར་གྱུར་པ་ཚིག་སྙན་པས་ཕྱག་ན་རྡོ་རྗེ་ལ་བསྟོད་ཅིང་ཐལ་མོ་སྦྱར་ཏེ་སྙན་པར་གྱུར་པས་དེའི་ཕྱིར་འཕགས་པ་ཕྱག་ན་རྡོ་རྗེའི་སྙན་གྱི་རྒྱན་ཉིད་དུ་མཛད་ཅེས་དགོངས་པའོ། །སྦྲུལ་གདུག་པ་འབར་བ་རིན་པོ་ཆེའི་ཅོད་པན་ཐོགས་པ་ཞེས་བྱ་བ་ནི་རང་འབྱུང་དེ་བཞིན་གཤེགས་པའི་རིན་པོ་ཆེའི་དབུ་རྒྱན་ལ་བཅིངས་པའི་གདུག་པས་རབ་ཏུ་འབར་བའི་སྦྲུལ་གྱི་གདེངས་ཀའི་ཕྲེང་བས་ཉེ་བར་མཛེས་པའི་དབུ་རྒྱན་ཐོགས་པར་བསྟན་ཏོ། །སྦྲུལ་གདུག་པ་བར་བ་ཟ་བ་ཞེས་བྱ་བ་ནི་དེ་བཞིན་གཤེགས་པའི་གཉིས་སུ་མེད་པའི་ཏིང་ངེ་འཛིན་ལ་སྙོམས་པར་ཞུགས་པས་གཟུང་བ་དང་འཛིན་པ་ཉིད་དྲན་པའི་དུག་ཅན་གྱི་སྤྲུལ་ཟ་བར་བྱེད་པ་ལྟར་གདུལ་བྱ་རྣམས་ཀྱིས་མཐོང་ཞེས་དགོངས་པའོ། །བཞིན་རྒྱས་པ་ཞེས་བྱ་བས་ནི་ཤིན་ཏུ་རྒྱས་པའི་ཞལ་གྱི་དཀྱིལ་འཁོར་ཡང་དག་པར་བསྟན་པས་སྒྲ་གཅན་འཛིན་ལ་སོགས་པ་ལྷ་མ་ཡིན་གྱི་རྒྱལ་པོ་རྣམས་ཀྱང་འདུལ་བར་མཛད་ཅེས་བྱ་བར་དགོངས་སོ། །སྨིན་མ་དང་དཔྲལ་བ་བསྡུས་པ་ཞེས་བྱ་བས་ནི་སྨིན་མའི་ལྕང་ལོ་འདེགས་པས་དཔྲལ་བ་བསྡུས་པ་ཉིད་ཀྱིས་མ་རུངས་པའི་ང་རོ་དང་ལྡན་ཞིང༌། གནོད་སྦྱིན་དང༌། སྲིན་པོ་དང༌། མཁའ་འགྲོ་དང་མཁའ་འགྲོ་མ་ཐམས་ཅད་བསྡིགས་པར་མཛད་ཅེས་བསྟན་ཏོ། །དེ་བས་ན་ཡ་སོས་མ་མཆུ་མནན་པ་ཞེས་བྱ་བ་སྨོས་ཏེ། སེམས་ཅན་ཐམས་ཅད་ལ་ཐོགས་པ་མེད་པ་ནས་དགྲ་རུ་གྱུར་པའི་ཕུང་པོའི་བདུད་ལ་སོགས་པ་ཚར་གཅོད་པར་དམ་བཅས་པ་ལ་དྲན་པའི་བརྡའི་མཚན་ཉིད་ཀྱི་ཁྲོ་བོའི་བཞིན་གྱི་ཕྱག་རྒྱའི་མཚན་ཉིད་བསྟན་ཏོ། །གཤིན་རྗེའི་ཆ་བྱད་ཅན་ཞེས་བྱ་བ་ནི་སྐུ་
མདོག་གནག་པ། དབྱུག་པ་དང༌། བེ་ཅོན་དང༌། ལྕགས་ཀྱུ་དང་ཞགས་པ་འཛིན་པ། མི་ཡི་རྒྱུ་མའི་ཕྲེང་བ་དོ་ཤལ་དུ་འཕྱང་ཞིང་མ་ཧེ་ལ་ཞོན་པ། ལྷ་མོ་ནག་མོས་མགུལ་པར་འཁྱུད་པ་སྐད་ཅིག་གིས་ཀྱང་སྣང་བར་གྱུར་ཏོ། །ལྕེ་གློག་ལྟར་འགྱུར་བ་ཞེས་བྱ་བ་ལ་གློག་ནི་ཀླུའི་ལྕེའོ། །དེ་བས་ཀྱང་ལྷག་པར་རྣོ་ཞིང་འབར་བའི་ཕྲེང་བས་དཀྲིགས་པ། དེ་བསྐྱོད་པ་ཞེས་བྱ་བ་ནི་ཡང་དང་ཡང་དུ་བསྐུལ་བས་འཇིགས་པར་བྱེད་པའི་ལྕེ་བར་བས་གློག་ཅེས་བྱ་བས་ཀླུའི་ལྕེ་འཇོམས་པས་སེམས་ཅན་ཐམས་ཅད་ལ་ཐོག་ལ་སོགས་པའི་འཇིགས་པ་མེད་པར་བྱེད་དོ། །གསུས་པོ་ཆེ་སྦྲུལ་ཟ་བ་ཞེས་བྱ་བ་ལ། འཕགས་པ་ཕྱག་ན་རྡོ་རྗེའི་སྐུའི་ཆེ་བ་བསྟན་པར་བྱ་བའི་ཕྱིར་དེ་ལ་གསུས་པོ་ཆེ་ཞེས་བྱ་བས་ལོག་འདྲེན་གླང་པོ་ཆེའི་མགོ་ཅན་གསུས་པོ་ཆེས་འདུལ་བར་མཛད་ཅེས་བསྟན་ཏོ། །སྤྲུལ་ཟ་བ་ཞེས་བྱ་བས་ནམ་མཁའ་ལྡིང་གི་རྟོག་པ་རབ་ཏུ་འཇོམས་པ་བསྟན་ཏོ། །ལག་པ་བརྡབས་པའི་སྒྲས་འཇིགས་པར་བྱེད་པ་ཞེས་བྱ་བ་ལ། ཤིན་ཏུ་ཐུགས་རྗེའི་ཁྲོ་བོས་དཀྲུགས་པའི་དབང་གིས་ཕྱག་བརྡབས་པ་ལས་བྱུང་བའི་སྒྲའི་འཇིགས་པས་ཁྱབ་འཇུག་དང༌། མ་ཧཱ་དེ་བ་དང༌། ཚངས་པ་ལ་སོགས་པ་བཅོམ་ལྡན་འདས་གོས་སྔོན་པོ་ཅན་ཕྱག་ན་རྡོ་རྗེ་ལ་སྐྱབས་སུ་སོང་ངོ་ཞེས་བྱ་བའི་དོན་ཏོ། །ཀླུའི་རྒྱལ་པོ་འདབ་བཟངས་སྐེ་རགས་སུ་བཅིངས་པ་ཞེས་བྱ་བ་ལ། སྔོན་གང་གི་ཚེ་ས་འོག་གི་རིམ་པ་བདུན་ལ་བྲིས་པའི་འདབ་བཟངས་ནམ་མཁའི་ལྡིང་གིས་འདྲེན་པ་འཁྱིལ་པ་བདུན་ལས་འཁྲིལ་བ་ཕྱེད་དང་གཉིས་རི་རབ་ཀྱི་རྩེ་མོར་སླེབས་པ་འཁྱིལ་པ་ཕྱེད་དང་དྲུག་སའི་འོག་ཏུ་ལུས་པས་དེའི་ཚེ་ཀླུ་དེ་ནམ་མཁའ་ལྡིང་གིས་ཟ་བར་མ་ནུས་སོ། །དེ་ལྟ་བུར་གྱུར་པའི་འདབ་བཟངས་ཀྱང་འཕགས་པ་ཕྱག་ན་རྡོ་རྗེས་ཐོགས་པ་མེད་པར་རྫུ་འཕྲུལ་གྱི་སྟོབས་ཀྱིས་སྐ་རགས་སུ་བཅིངས་པ་ན་ཁྲིས་གཅིག་ལས་མ་བྱུང་ཞེས་སྐུ་བོང་གི་ཚད་བསྟན་ཏོ། །ཨ་ལ་ལ་ཞེས་སྒྲོགས་པར་བྱེད་པ་ཞེས་བྱ་བ་ལ། ཨ་ལ་ལའི་སྒྲ་ནི་རོ་ལངས་སྒྲོག་པར་བྱེད་པའི་དམ་ཚིག་གོ །ཀྱེ་རོ་ལངས་དང་མཁའ་འགྲོ་མ་དྲག་མོ་རྣམས་བདག་བཞེངས་བར་
གྱུར་ནས་ཁྱེད་ཅག་གིས་ཅི་ཞིག་ནུས་ཞེས་སྒྲོགས་ཤིང་འཇིགས་པ་སྐྱེད་པར་བྱེད་ཅེས་བྱ་བའི་དོན་ཏོ། །རྒྱ་མཚོའི་ཟབས་སུ་དཔག་ཚང་བརྒྱད་ཁྲི་བཞི་སྟོང་ཡོད་པ་རྐང་པའི་བུས་མོར་ཕྱིན་པ་ཞེས་བྱ་བ་འདིས་ས་དང་ས་འོག་དང་ས་བླང་ཁྱབ་པར་བྱེད་པའི་སྐུ་བསྟན་པའོ། དེ་བཞིན་དུ་ཡང་དཔག་ཚད་སྟོང་ཕྲག་བརྒྱད་ཅུས་བུས་མོ་རིང་བའི་ཚད་ཀྱིས་སྐུ་སྟོད་ཀྱི་ཚད་དཔག་ཚད་འབུམ་ཕྲག་གཉིས་སུ་ཤེས་པར་བྱའོ། །དེ་བས་ན་དབང་པོ་དང་ཉི་མ་ཕྲག་པ་ལ་ཁུར་བ་ཞེས་བྱ་བ་སྨོས་ཏེ། རི་རབ་ཀྱི་རྩེ་མོ་ལས་ཀྱང་སྐུ་བོང་སྟེང་དུ་འཕགས་པས་བརྒྱ་བྱིན་ལ་སོགས་པའི་ལྷ་རྣམས་ཀྱིས་ཕྱག་འཚལ་ཞིང་མཆོད་དོ། །ཀླུ་ཐམས་ཅད་འཇོམས་པར་བྱེད་པ་ཞེས་བྱ་བ་ལ་ཀླུ་རྣམས་ཀྱི་མགྲིན་པ་ན་གནས་པའི་གདུག་པ་སྔགས་ཀྱིས་འཕྲོག་པར་མཛད་ནས། དེ་རྣམས་ཀྱི་སེམས་ཀྱི་གདུག་པ་རྣམ་པར་འཇོམས་ཤིང་གསོད་པར་མཛད་ཅེས་དགོངས་སོ། །གད་རྒྱངས་ཆེན་པོ་དགོད་པས་འཁྲུག་པར་བྱེད་པ་ཞེས་བྱ་བ་ལ། ཧ་ཧ་དགོང་པའི་དམ་ཚིག་ལ་གནས་པའི་ཕྱིའི་མཁའ་འགྲོ་རྣམས་ཀྱི་སྙིང་ཀུན་དཀྲུགས་ནས་འདུལ་བར་མཛད་ཅེས་དགོངས་སོ། །གཤིན་རྗེའི་གཟུགས་ཅན་ཁམས་གསུམ་པ་འཇིགས་པར་བྱེད་པ་ཞེས་བྱ་བ་ལ། འཕགས་པ་ཕྱག་ན་རྡོ་རྗེ་གོས་སྔོན་པོ་ཅན་སྙིང་རྡོ་རྗེ་ཆེན་པོའི་རང་བཞིན་ཅན་ཡིན་ཡང་ཁམས་གསུམ་པའི་སེམས་ཅན་རྣམས་ཀྱིས་གཤིན་རྗེའི་གཟུགས་སུ་མཐོང་ནས་ཤིན་ཏུ་འཇིགས་པའི་དོན་གྱིས་སྐྱབས་སུ་སོང་ཞེས་བྱ་བའི་དོན་ཏོ། །དེ་བས་ན་དེ་རྣམས་ཀྱི་ཇི་ལྟར་འདུད་པ་བྱེད་དོ། །ཀླུ་རྣམས་འཆི་བར་བྱེད་པ་ལ་ཕྱག་འཚལ་ལོ་ཞེས་བྱ་བ་ནི། འཆི་བར་བྱེད་པ་ནི་འདུལ་བར་བྱེད་པའི་དོན་ཏོ། །དེ་བས་ན་ལྷ་དང་མི་ཐམས་ཅད་ཀྱིས་བཅོམ་ལྡན་འདས་ཕྱག་ན་རྡོ་རྗེ་ལ་མཆོད་པ་དང༌། བསྟོད་པ་སྔོན་དུ་འགྲོ་བས་ཕྱག་བྱེད་པར་འགྱུར་རོ། །དེ་ལྟར་འཕགས་པ་ཕྱག་ན་རྡོ་རྗེའི་གཟུགས་དང་སྟོབས་དང་ཆེ་བའི་བདག་ཉིད་བསྟན་པའོ། །ད་ནི་སླར་ཡང་ཞེས་བྱ་བ་ནི་ཕྱག་ན་རྡོ་རྗེའི་རིག་སྔགས་ཀྱི་བསྔགས་པ་སྟོན་པར་བྱེད་དེ། སངས་རྒྱས་བཅོམ་ལྡན་འདས་གངྒའི་ཀླུང་གི་བྱེ་མ་སྙེད་ཀྱིས་གསུངས་
པའི་རིག་སྔགས་འདི་བརྗོད་པར་བྱའོ་ཞེས་བྱ་བ་ལ། འདས་པ་དང་མ་འོངས་པ་དང་ད་ལྟར་བྱུང་བའི་སངས་རྒྱས་ཐམས་ཅད་ཀྱིས་གསུངས་པ་དང༌། གསུང་བ་དང༌། གསུང་བར་འགྱུར་བའི་རིག་སྔགས་འདི་ཉིད་མཆོག་ཡིན་པས། ཀྱེ་སྐྱེས་བུ་སྒྲུབ་པ་པོ་རྣམས་ཁྱེད་ཅག་གིས་ཀྱང་འདི་བརྗོད་པར་བྱ་བ་ཡིན་ཞེས་སོ། །སྡུད་པ་པོའི་གདམས་ངག་གི་རིག་སྔགས་དེ་གང་ཞེ་ན། ཏདྱ་ཐཱ་ཞེས་སྨོས་ཏེ། འཆད་པར་འགྱུར་བའི་སྔགས་སྟོན་པར་བྱེད་དོ། །བྷོ་བྷོ་བཱན་ནཱ་ག་ཨ་དྷི་པ་ཏ་ཡེ་ཤེས་བྱ་བ་ལ། ནཱ་ག་ནི་ཀླུའོ། །ཨ་དྷི་པ་ཏ་ཡེ་ཤེས་བྱ་བ་ནི་ལྷག་པར་བདག་པོ་སྟེ་ཀླུ་རྒྱལ་བརྒྱད་དོ། །བྷོ་བྷོ་ཞེས་བྱ་བ་ནི་ཀྱེ་ཀྱེ་སྟེ་དེ་རྣམས་ལ་བོད་པ་སྟེ། ཨི་དན་ཞེས་བྱ་བ་ནི་འདི་སྟེ་འབོད་པར་འགྱུར་རོ། །དེ་གང་ཞེ་ན། ནཱི་ལཱཾ་བ་ར་དྷ་ར་ཤ་རཱི་རཾ་ཞེས་བྱ་བ་སྨོས་ཏེ། གོས་སྔོན་པོ་ཅན་གྱི་སྐུའོ། །གང་གི་ཕྱིར་སྐུ་མ་རྟོགས་པར་སྔགས་འབྱུང་བ་མི་སྲིད་པར་སྔགས་དང་སྐུ་གཉིས་སུ་མེད་པར་བསྟན་པའོ། །བཛྲ་པཱ་ཎི་ཧྲྀ་ད་ཡཾ་ཞེས་བྱ་བ་ལས། ཕྱག་ན་རྡོ་རྗེའི་སྙིང་པོ་སྟེ་གོས་སྔོན་པོ་ཅན་གྱི་ཁོ་ནའོ། །སྙིང་པོ་ཞེས་བྱ་བ་ནི་གདུག་པ་འདུལ་བའི་ཕྱིར་དག་གི་བརྗོད་པ་གསུངས་པ། བསྒྲུབ་བྱ་མངོན་དུ་བྱེད་ནུས་པ་རྒྱུ་དེའི་ཕྱིར་ཡཿས་མཱ་ཏི་ཀྲཱ་མ་ཏི་ཞེས་བྱ་བ་སྨོས་པ་ལ་སྒྲུབ་པ་པོ་གང་གིས་འདོར་ཞིང་འདའ་བར་བྱེད་ན་འདུག་པའི་སེམས་ཅན་དེ་ཨུཚཱ་ད་ནཾ་བྷ་བི་ཤྱ་ནི་ཞེས་བྱ་བ་ནི་ཡུལ་ནས་གཞན་གྱིས་བསྐྲད་པར་འགྱུར་རོ། །སྙིང་པོ་དེ་གང་ཞེ་ན། དཏྱ་ཐཱ་ཞེས་བྱ་བ་སྨོས་ཏེ་འདི་ལྟ་སྟེ་ཞེས་བྱ་བས་སྙིང་པོ་མངོན་པར་བྱེད་དེ་བུདྡྷ་བུདྡྷ་བི་བུདྷ་ཞེས་བྱ་བ་ཕྱག་ན་རྡོ་རྗེ་ལ་བོད་པའོ། །མ་ཧཱི་པྲཔྟ་ཞེས་བྱ་བ་ནི་མ་འགོར་ཅིག་ཅེས་བྱ་བའི་དོན་ཏོ། །གདུག་པ་འཇོམས་པ་ལ་མྱུར་དུ་རེམ་ཞིག་ཅེས་བྱ་བ་ཚིག་ལྷག་མ་དང་སྦྱར་རོ། །ཧ་ར་ཧ་ར་ཞེས་བྱ་བ་ནི་གདུག་པ་རྣམས་ཀྱི་སྟོབས་ལ་སོགས་པ་ཕྲོགས་ཤིང་ཕྲོགས་ཤིང་ཅེས་བྱ་བའི་དོན་ཏོ། །གདུག་པ་དེ་གང་ཞེ་ན། ནཱ་གཱ་ནཱཾ་ཞེས་བྱ་བ་སྨོས་ཏེ་ཀླུ་རྣམས་ཀྱི་ཚིག་གིས་ཚིག་འབྲེལ་པའོ། །པྲ་ཧ་ར་པྲ་ཧ་ར་ཞེས་བྱ་བ་ནི་འོང་ཟེར་ལས་བྱུང་བ་ཁྲོ་བོ་རྣམས་ཀྱིས་རྒྱོབ་ཤིག་རྒྱོབ་ཤིག་པའོ། །གང་ལ་བརྡེག་ཅེ་ན། ནཱ་གཱ་ནཱཾ་ཞེས་བྱ་བ་སྨོས་ཏེ་ཀླུ་རྣམས་ཀྱི་སྟོབས་དང༌། བརྩོན་འགྲུས་ལ་སོགས་
པ་བརླག་པར་གྱིས་ཤིག་ཅེས་བྱ་བར་དགོངས་སོ། །ཙྪིནྡ་ཙྪིནྡ་ཞེས་བྱ་བ་ནི་རལ་གྲིས་ཆོད་ཅིག་ཆོད་ཅིག་པའོ། །གཅད་པར་བྱ་བ་གང་ཞེ་ན། ནཱ་ག་ཧྲྀ་ད་ཡཱ་ནི་ཞེས་བྱ་བ་སྨོས་ཏེ། ཀླུའི་སྙིང་རྣམས་སོ། །བྷིནྡ་བྷིནྡ་ཞེས་བྱ་བ་ནི་ཆོམས་ཤིག་ཆོམས་ཤིག་པའོ།། གང་གཞོམ་ཞེ་ན། ནཱ་ག་ད་མ་ནི་ཞེས་བྱ་བ་ནི་ཀླུ་དང་ཀླུ་མོ་བཅིངས་པའི་ཚོགས་ཀྱིས་འཁྱིལ་པ་རྣམས་ཤིག་ཅིག་ཤིག་ཅིག་པའོ། །ནཱ་ག་ད་མ་ནི་ཞེས་བྱ་བ་ལ། ཀླུའི་ཁྱིམ་རྣམས་འཇོམས་པའོ། །བི་སི་མ་ད་ནཱ་ག་ཤ་རཱི་རཾ་ཞེས་བྱ་བ་ནི་དུག་གིས་མྱོས་པའི་ཀླུའི་ལུས་པོ་དེ་བཞིན་དུ་ཆོམས་ཤིག་པའོ། །གཞན་ཡང་བི་སྥོཊ་ཡ་ཞེས་བྱ་བ་ནི་གཟི་བརྗིད་ཀྱིས་འཇོམས་པར་མཛོད་ཅིག་ཅེས་བསྐུལ་བའི་ཚིག་གོ །འཇོམས་པར་བྱ་བ་དེ་གང་ཞེ་ན། ནཱ་ག་ནཱ་ཡ་ནཱ་ནི་ཞེས་བྱ་བ་སྨོས་ཏེ་ཀླུའི་མིག་རྣམས་སོ། །སྔགས་ཀྱི་མཐུ་གཞན་ཡང་བསྟན་པའི་ཕྱིར། ཏདྱ་ཐཱ་ཞེས་བྱ་བ་སྨོས་ཏེ། འཆད་པར་འགྱུར་བའི་སྔགས་ཀྱི་སྐུ་ཕྱག་ན་རྡོ་རྗེ་ལ་བསྐུལ་བ་བསྟན་ཏེ། ཧཱུཾ་ཕཊ་ཅེས་སྨོས་ཏེ་ཕྱག་ན་རྡོ་རྗེ་གོས་སྔོན་པོ་ཅན་གྱི་ཐུགས་བསྐུལ་བའོ། །དེ་ཡང་གང་ཞེ་ན། ནཱ་ག་བི་དཱ་ར་ནཱ་ཡ་ཧཱུཾ་ཕཊ་ཅེས་བྱ་བ་སྨོས་ཏེ། ཀྱེ་ཀླུ་རྣམས་འཇོམས་པར་བྱེད་པ། ཀླུ་རྣམས་རླག་པར་བྱེད་པ་ཁྱོད་ལ་ཕྱག་འཚལ་ལོ་ཞེས་ཚིག་སྦྱར་རོ། །ཧཱུཾ་གི་སྒྲ་ནི་ཐུགས་བསྐུལ་བའོ། །ཕཊ་ཅེས་བྱ་བས་གདུག་པ་ཉམས་པར་གྱིས་ཞེས་བྱ་བའི་དོན་ཏོ། །ནཱ་གོཏྶཱད་ནཱ་ཡ་ཕཊ་ཅེས་བྱ་བ་ནི་ཤིན་ཏུ་གདུག་པ་ཉིད་ཀྱི་ཕྱིར། གལ་ཏེ་དུག་གིས་ཟིན་པ་མི་གཏོང་ན་དེའི་ཚེ་བསྐྲད་པར་མཛད་ནས་ཡི་གེ་ཕཊ་ཀྱིས་རེངས་པར་མཛོད་ཅིག་ཅེས་བསྐུལ་བའོ། །ནཱི་ལཱམྦ་ས་ན་ཡ་ཕཊ་ཅེས་བྱ་བས་ནི་མངོན་སྤྱོད་ཀྱི་ལས་དང་རྗེས་སུ་མཐུན་པའི་གོས་སྔོན་པོ་གནས་པ་ཁྱོད་ཡིན་པས། དེ་དང་རྗེས་སུ་མཐུན་པའི་ལས་མཛོད་ཅིག་པའོ་ཞེས་བསྐུལ་བའོ། །ལས་དེ་ཇི་ལྟ་བུ་ཞེ་ན། ཕཊ་ཅེས་བྱ་བ་སྨོས་པ་ལ་དུ་མ་བུ་དུམ་བུར་གྱིས་ཤིག་པའོ། །ཨ་པྲ་ཏི་ཧ་ཏ་བ་ལབ་རཱ་ཀྲ་མ་ཡ་ཕཊ་ཅེས་བྱ་བ་ནི་གང་གི་ཕྱིར་ཁྱོད་ཀྱི་སྟོབས་དང་མཐུ་ལ་གཞན་གྱིས་མི་ཐུབ་པས་དེའི་ཕྱིར་ཕཊ་ཅེས་བྱ་བ་ནི་ཁྱོད་ཀྱིས་དགྲ་ཉམས་པར་གྱིས་ཤིག་ཅེས་བྱ་བའི་དོན་ཏོ། །ཀྲྀཏཱནྟ་
ཡ་ཕཊ་ཅེས་བྱ་བ་ལ། བགེགས་མཐར་བྱེད་པའི་གཟུགས་ཅན་ཕྱག་ན་རྡོ་རྗེ་ཁྱོད་ལ་ཕྱག་འཚལ་ནས། ཕཊ་ཀྱི་སྔགས་ཀྱིས་བགེགས་གདུག་བ་ཉམས་པར་གྱིས་ཤིག་ཅེས་བསྐུལ་བའོ། །ཀྲྀཏཱནྟ་རཱུ་པཱ་ཡ་ཕཊ་ཅེས་པ་ནི་གཤིན་རྗེའི་གཟུགས་ཅན་ཁྱོད་ལ་ཕྱག་འཚལ་ལོ། །ཕཊ་ཅེས་བྱ་བ་ནི་མངོན་སྤྱོད་ལས་ལ་སྦྱོར་བའོ། །རོ་ཥ་ཎཱ་ཡ་ཕཊ་ཅེས་བྱ་བ་ལ། ཁྲོ་བོའི་ཆ་ལུགས་ཅན་ཡིན་གྱི་ཁྲོ་བོའི་རང་བཞིན་མ་ཡིན་པ་ཁྱོད་ལ་ཕྱག་འཚལ་ལོ་ཞེས་དགོངས་པའོ། །ཏཱ་ས་ནཱ་ཡ་ཕཊ་ཅེས་བྱ་བ་ལ། མཐོང་བ་ཙམ་གྱིས་གདུག་པ་སྐྲག་པར་བྱེད་པ་ཁྱོད་ལ་ཡིན་ཞེས་བསྟན་པའོ། །ཕྱག་ཐམས་ཅད་དུ་དབྱེ་བའི་ཚིག་བཞི་པ་ཤེས་པར་བྱའོ། །ན་མཿསྭསྟི་སྭ་ཧཱ་སཱ་དྷ་ཨ་ལ་མཱ་ཥཊ་ཡོ་གེ་ཙ་ཏྭེ་རྠི་ཞེས་སྒྲའི་མདོ་ལས་འབྱུང་བས་སོ། །ཀུསྨ་ཎྚོ་ཚཱ་ད་ནཱ་ཡ་ཕཊ་ཅེས་བྱ་བ་ནི་ཀུསྨཎྚ་ནི་ཡི་དགས་ཀྱི་ཁྱད་པར་ཏེ། དམུ་ཆུ་དང་དྲིའུ་སྐྱེད་པར་བྱེད་པའོ། །དེ་རྣམས་སྐྲག་པར་བྱེད་པ་ཁྱོད་ལ་ཕྱག་འཚལ་ལོ་ཞེས་བྱ་བའི་དོན་ཏོ། །ཕཊ་ཅེས་བྱ་བ་ནི། དེས་བྱས་པའི་སྐྱོན་ཕྲོལ་ཅིག་པའོ། །པྲེ་ཏ་པི་ཤཱ་ཙ་བི་ནཱ་ཤ་ཀ་རཱ་ཡ་ཕཊ་ཅེས་བྱ་བ་ནི་རྫུ་འཕྲུལ་དང་མཐུ་ཡོད་པའི་ཡི་དགས་གང་ཡིན་པ་དང༌། དེ་བཞིན་དུ་ཤ་ཟ་ནི་མིའི་ཤ་ལ་དགའ་བའོ། །དེ་རྣམས་ཉམས་པར་བྱེད་ཅིང་རྫུ་འཕྲུལ་དང་སྟོབས་དང་བརྩོན་འགྲུས་འཇོམས་པར་བྱེད་པ་ཕྱག་ན་རྡོ་རྗེ་ཁྱོད་ལ་ཕྱག་འཚལ་ལོ་ཞེས་ཚིག་ལྷག་མ་སྦྱར་པའོ། །ཕཊ་ཅེས་བྱ་བ་ནི་སྔ་མ་བཞིན་ནོ། །ཡཀྵ་ཨ་པསྨཱ་ར་བི་ནཱ་ཤ་ཀཱ་རཱ་ཡ་ཕཊ་ཞེས་བྱ་བ་ལ་འདྲེས་བྱས་པའི་སྐྱོན་གྱི་རྟགས་ནི་མི་གཙང་བ་ཟ་བ་དང༌། ཁ་ཟས་ལྷག་པར་ཟ་བ་དང༌། ཁ་བཙོག་སྨྲ་བ་དང༌། ཐལ་ལྕག་དང་དབྱུག་པ་དང༌། རྐང་པ་གཞན་ལ་བརྡེགས་པ་དང༌། ང་རོ་འཇིགས་པ་སྒྲོགས་པ་དང༌། དེ་ལ་སོགས་པའི་མཚན་ཉིད་ཀྱི་འགྱུར་བ་རྣམས་ཀྱིས་གནོད་སྦྱིན་གྱི་རྟགས་སུ་ཤེས་པར་བྱའོ། །དེ་བཞིན་དུ་ཡང་བརྗེད་བྱེད་ཀྱི་རྟགས་སུ་དྲན་པ་ཉམས་པ་དང༌། རྐང་ལག་སྤྲུག་པ་དང༌། མི་སྨྲ་བ་དང༌། ཁ་ཆུ་འཛག་པ་དང༌། མེ་དང་ཆུ་དང་གཡང་ལ་མཆོད་པ་དང༌། གཉིད་མང་བ་ལ་སོགས་པའི་མཚན་ཉིད་ཤེས་པར་བྱའོ། །སྐྱོན་དེ་རྣམས་དྲན་པ་ཙམ་གྱིས་འཇོམས་པར་བྱེད་པ་
ཁྱོད་ལ་ཕྱག་འཚལ་ལོ་ཞེས་ཚིག་ལྷག་མ་དང་སྦྱར་རོ། །ཕཊ་ཅེས་བྱ་བ་ནི་ཐར་བར་གྱིས་ཤིག་ཅེས་བྱ་བའི་དོན་ཏོ། །ཧ་ས་ཧ་ས་ཞེས་བྱ་བ་ནི་བཞད་པ་ཙམ་གྱིས་སོ། །དྷ་ར་དྷ་ར་ཞེས་བྱ་བ་ནི་དྲན་པ་ཙམ་གྱིས་སོ། །མཱ་ར་ཡ་མཱ་ར་ཡ་ཞེས་བྱ་བ་ནི་གདུག་པའི་སེམས་ཅན་གྱི་བསམ་པ་གདུག་པ་མེད་པར་གྱིས་ཤིག་ཅེས་དགོངས་པའོ། །ནཱ་ཤ་ཡ་ནཱ་ཤ་ཡ་ཞེས་བྱ་བ་ནི་ལྟས་ངན་ལ་སོགས་པའི་འཇིགས་པ་བཟློག་པར་གྱིས་ཤིག་ཅེས་དགོངས་པའོ། །སརྦ་བིགྷྣན་བི་ནཱ་ཤ་ཀ་རཱ་ཡ་ཧཱུཾ་ཕཊ་ཅེས་བྱ་བ་ནི་ཆོས་དང་ནོར་འདོད་པའི་བར་ཆད་བྱེད་པའི་བགེགས་སོ། །ཁྱོད་ཀྱི་གཟུགས་སྔགས་བཀླགས་པ་ཙམ་གྱིས་དེ་རྣམས་འཇོམས་པར་བྱེད་པ་ཁྱོད་ལ་ཕྱག་འཚལ་ལོ་ཞེས་སྔ་མ་བཞིན་ནོ། །ཕཊ་ཅེས་བྱ་བ་ནི་སྔ་མ་བཞིན་དུ་བསྐུལ་པའོ། །སརྦ་ཤ་ཏྲཱུཾ་སཾ་གྷ་བི་ནཱ་ཤ་ཀ་རཱ་ཡ་ཕཊ་ཅེས་བྱ་བ་ལ། ཕ་རོལ་པོ་མུ་སྟེགས་དང་སོ་སོའི་སྐྱེ་བོ་དང། དཀོན་མཆོག་གསུམ་ལ་གནོད་པར་བྱེད་པ་ནི་བགེགས་ཀྱི་ཚོགས་སོ། །དེ་རྣམས་ཀྱིས་བྱས་པའི་འཁྲུལ་འཁོར་དང༌། ངན་སྔགས་ཀྱི་སྦྱོར་བ་ཐམས་ཅད་ཁྱོད་ཀྱི་གཟུངས་སྔགས་བརྗོད་པ་ཙམ་གྱིས་རྣམ་པར་འཇིག་པར་འགྱུར་བ་དེ་བས་ཁྱོད་ལ་ཕྱག་འཚལ་ལོ་ཞེས་ཚིག་ལྷག་མ་དང་སྦྱར་རོ། །ཕཊ་ཅེས་སྔ་མ་བཞིན་བསྐུལ་ལོ། །ནཱི་ལཱབྨ་ར་དྷ་ར་བཛྲ་པཱ་ནི་རཱ་ཛྙཱ་པ་ཡ་ཏི་སྭཱ་ཧཱ། ཞེས་བྱ་བ་ནི་སྒྲུབ་པ་པོས་ཕྱག་ན་རྡོ་རྗེ་གོས་སྔོན་པོ་ཅན་ལ། བདེ་བར་གཤེགས་པའི་བཀའ་བསྒོ་བར་བྱའོ་ཞེས་དགོངས་སོ། །སྭཱ་ཧཱ་ཞེས་པ་ནི་གསང་སྔགས་ཀྱི་སྐུ་དེ་ཉེ་བར་སྡུད་པ་བསྟན་ཏོ། །གཟུངས་སྔགས་ཀྱི་སྦྱོར་བའི་ནུས་པ་ནི་གོ་སླ་བས་མ་བཤད་དོ། །གོས་སྔོན་ཕྱག་ན་རྡོ་རྗེ་ཡི། །གཟུངས་ཀྱི་འགྲེལ་པ་འདི་བརྩམས་པས། །དགེ་བ་ཅུང་ཟད་གང་ཐོབ་པ། །དེ་ཡིས་འགྲོ་ཀུན་ནད་མེད་ཤོག །དཔལ་ཕྱག་ན་རྡོ་རྗེ་གོས་སྔོན་པོ་ཅན་གྱི་གཟུངས་ཀྱི་འགྲེལ་པ། རིག་པའི་གནས་ཐམས་ཅད་ལ་མཁས་པའི་པཎྜི་ཏ་ཆེན་པོ་ཀརྨ་བཛྲས་མཛད་པ་རྫོགས་སོ།།