དཔལ་འབྱུང་པོ་འདུལ་བྱེད་ཀྱི་དཀྱིལ་འཁོར་གྱི་ཆོ་གབ།
བློ་བཟང་སྐྱོང་།
རྒྱ་གར་སྐད་དུ། ཤྲཱི་བྷཱུ་ཏ་ཌ་མ་ར་མཎྜལ་ལ་བི་དྷི་ནཱ་མ། བོད་སྐད་དུ། དཔལ་འབྱུང་པོ་འདུལ་བྱེད་ཀྱི་དཀྱིལ་འཁོར་གྱི་ཆོ་ག་ཞེས་བྱ་བ། དཔལ་
འབྱུང་པོ་འདུལ་བྱེད་ལ་ཕྱག་འཚལ་ལོ། །ཆོ་གའི་དབྱེ་བའི་རང་བཞིན་དྲི་མེད་གྲུབ་པ་སྟེར་བ་མི་རྣམས་བསྒྲལ་བའི་དོན་དུ་སྟོང་ཉིད་དོན་རྟོགས་བློ་བཟང་སྐྱོང་བ་བདག་གིས་བཤད། འདི་ལྟར་སྔོན་དུ་བསྙེན་པ་བྱས་པས་སམ། རྟག་ཏུ་བཟླས་པའམ། ལོའི་ནང་དུའམ། ཟླ་བ་གཅིག་གི་ནང་དུ་བསྙེན་པ་བྱས་པས་དཀྱིལ་འཁོར་བྲི་བར་བྱའོ། །དེ་ཡང་ཇི་ལྟར་འཆད་པའི་རིམ་པས་སོ། །དེ་ཡང་མིའི་རུས་པ་བཏགས་པས་བགེགས་བསལ་བའི་སྦྱིན་སྲེག་བྱ་སྟེ། སློབ་མའི་དོན་དུ་ཞི་བའི་སྦྱིན་སྲེག་བྱ་བ། ཉེས་པ་འཇོམས་པའི་སྔགས་བརྗོད་ལ། ཕྱོགས་བཅུའི་བགེགས་ལ་ཕུར་པས་བཏབ་སྟེ། གནས་སྲུང་བར་བྱས་ལ། བུས་མོའི་བར་དུ་བརྐོས་ལ། ཡང་ན་བརླའམ་རྐེད་པའི་བར་དུ་བརྐོས་པ་ནི། མཆོག་དང་བར་དང་ཐ་མའི་གྲུབ་པ་སྟེར་རོ། །སྐྲ་ལ་སོགས་པའི་ཉེས་པ་ཐམས་ཅད་བསལ་ལ། དྲི་བཟང་པོའི་ཆུས་གཏོར་ཏེ་དག་པར་བྱའོ། །ཉེས་པ་འཇོམས་པར་བྱེད་པའི་སྔགས་བརྗོད་ཅིང༌། ཡང་ན་ས་གཞན་གྱིས་དགང་བར་བྱའོ། །རིན་པོ་ཆེ་ལྔ་དང༌། སྨན་ལྔ་དང༌། འབྲུ་ལྔ་ཡང་གཞུག་ཅིང་མཉམ་པར་བྱ་ས་ལ། དྲི་ཞིམ་པོའི་ཆུས་བྱུག་གོ །དེ་ལྟར་ས་ལ་བརྟག་པ་ལ་ནི། ཞ་ལ་དང་བཅས་པའི་གཙུག་ལག་ཁང་རྙིང་པ་མཆོག་ཡིན་ལ། བྱེ་མ་དང་ཡུངས་ཀར་དང་ཆུ་དང་བཅས་པ་ལ་ལན་བདུན་བསྔགས་ཏེ་དཀྱིལ་འཁོར་གྱི་ས་གཞི་ལ་གཏོར་བར་བྱའོ། །རིན་པོ་ཆེ་དང༌། བའི་རྣམ་པ་ལྔ་དང༌། སྔོན་གྱི་སྨན་རྣམས་ཀྱིས་ཀྱང་བྱུག་པར་བྱ་སྟེ། ས་དག་པར་བྱ་བའི་ཆོ་གའོ། །དེ་ནས་ཡི་གེ་བཾ་ཡོངས་སུ་རྫོགས་པ་ལས། གཏེར་གྱི་བུམ་པ་ཐོགས་པའི་སའི་ལྷ་མོ་དེ་ཡང་སྐུ་ཕྱེད་ཐོན་པ་ལ་བསྟོད་ཅིང་མཆོད་པ་བྱ་སྟེ། སྐྱོབ་པ་སངས་རྒྱས་ཐམས་ཅད་ཀྱི། །དབང་དུ་གྱུར་པའི་ལྷ་མོ་ཁྱོད། །ས་དང་ཕ་རོལ་ཕྱིན་པ་དང༌། སྤྱོད་པའི་ཚུལ་གྱི་ཁྱད་པར་གྱི། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་ཚེ་ཁྱོད་ནི་དབང་དུ་གྱུར། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ལ་དཀྱིལ་འཁོར་བྲི། །འདིར་ནི་མི་བསྐྱོད་པའི་ཕྱག་རྒྱས་བསྟོད་པ་བྱས་ལ། མེ་ཏོག་ལ་སོགས་ལྔས་མཆོད་དེ། མཆོད་ཡོན་ལ་སོགས་པ་ཡང་བྱིན་ལ། དེའི་
རྗེས་སུ་ལྷ་མོ་ཡང་དཀྱིལ་འཁོར་ལ་ཐིམ་པར་བསམ་ཞིང༌། དེ་ནས་མེ་ཏོག་ལ་སོགས་པ་དང་ལྡན་པའི་དཀྱིལ་འཁོར་ལ་ལག་པ་རེག་ལ། ཧཱུཾ་ཉི་ཤུ་རྩ་གཅིག་བརྗོད་པས་བསྲུང་བར་འགྱུར་རོ། །དེ་ནས་དཀྱིལ་འཁོར་གྱི་དབུས་སུ་སློབ་དཔོན་འདུག་ལ། བདག་ཉིད་དགའ་བ་བསྐྱེད་པར་བྱ་སྟེ། དེང་དུ་བདག་ཚེ་འབྲས་བུ་ཡོང༌། །དེ་རིང་སངས་རྒྱས་རིགས་སུ་སྐྱེས། །བྱང་ཆུབ་སེམས་དང་བདག་ལྡན་ནོ། །བྱང་ཆུབ་སེམས་དཔའི་ཡེ་ཤེས་དང༌། །བདག་ཀྱང་ད་ནི་ལྡན་པར་འགྱུར། །དེ་རིང་རྡོ་རྗེའི་རིགས་སུ་སྐྱེས། །དེ་རིང་བདག་ནི་གཅེས་པའི་མཆོག །མཆོད་སྦྱིན་མཆོག་གི་འབྲས་བུ་བདག །ལུས་ཀྱི་མཆོག་ཏུ་བདག་གྱུར་ཏོ། །དེ་ནས་རང་གི་ལག་ཏུ་སྤོས་ཐོགས་ཏེ། །དེ་བཞིན་གཤེགས་པ་ཐམས་ཅད་ལ་ཕྱག་བྱས་ལ། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་རྗེས་སུ་དགོངས་པར་བསམས་ཏེ། ཕྱོགས་བཅུའི་རྒྱལ་བ་མ་ལུས་པ། །དེང་དུ་བདག་ལ་དགོངས་སུ་གསོལ། །ཆེ་གེ་ཞེས་བྱའི་རྡོར་འཛིན་བདག །དཀྱིལ་འཁོར་ཆེན་པོ་བྲི་བར་འཚལ། །སངས་རྒྱས་ཐམས་ཅད་འདིར་བྱོན་ཅིག །རྫེས་སུ་བརྩེ་བར་ཉེར་དགོངས་ཏེ། །དངོས་གྲུབ་དམ་པ་སྩལ་དུ་གསོལ། །དེ་སྐད་ཅེས་བརྗོད་ལ་དཀྱིལ་འཁོར་གྱི་དབུས་སུ་འདུག་སྟེ། འོད་ཟེར་འཕྲོས་ཅིང་བསྡུས་པ་ལས་བདག་ཉིད་རྡོ་རྗེ་འཛིན་པའི་སྐུར་བལྟ་བར་བྱའོ། །དེ་ནས་ཁྲོ་བོའི་རྒྱལ་པོའི་སྔགས་བརྗོད་ཅིང༌། ཕྱག་རྒྱ་ཆེན་པོ་བསྒོམ་པར་བྱའོ། །དེ་ནས་ལས་ཀྱི་རྡོ་རྗེ་སློབ་དཔོན་ཤར་ཕྱོགས་སུ་འདུག་ལ། ལྷོ་ཕྱོགས་ཀྱིས་དང་པོར་བྱས་པའི་ལན་གསུམ་བསྐོར་ཏེ། མཆོད་པ་རྣམ་པ་ལྔས་མཆོད་ལ། དབང་ཕྱུག་ཆེན་པོའི་གཟུགས་ཀྱིས་ཤར་ཕྱོགས་ནས་དཀྱིལ་འཁོར་ཞུ་བར་བྱའོ། །ཕྱོགས་གཞན་ནས་ཀྱང་དེ་བཞིན་ནོ། །དེ་ནས་སློབ་མ་བྱང་ཆུབ་སེམས་དཔས་བརྗོད་པར་བྱ། འཇིག་རྟེན་གསུམ་གྱིས་ཕྱག་བྱས་པ། །ཆོས་ཀྱི་རྒྱལ་པོ་ཆེན་པོ་ཁྱེད། །འབྱུང་པོ་ཀུན་དང་ཀླུ་རྣམས་དང༌། །གནོད་སྦྱིན་རིག་པ་འཛིན་རྣམས་འཇིགས། །བགེགས་རྣམས་ཐམས་ཅད་འཇོམས་མཛད་པ། །སྡུག་བསྔལ་ཉོན་མོངས་ཐམས་ཅད་འཇོམས། །གཟའ་རྣམས་ཀུན་
དང་རོ་ལོངས་དང༌། །ཡི་དགས་དང་ནི་བདུང་རྣམས་འཇོམས། །གྲུབ་པ་ཐམས་ཅད་སྟེར་མཛད་པའི། །དཀྱིལ་འཁོར་དམ་པ་བཤད་དུ་གསོལ། །དེ་ནས་ལས་ཀྱི་རྡོ་རྗེ་སློབ་དཔོན་ལངས་ལ། དེ་བཞིན་གཤེགས་པ་ཐམས་ཅད་ཀྱིས་ནམ་མཁའི་ཁམས་གང་བར་བསམས་ལ། ཕྱག་བྱས་ལ། བདག་ནི་ལེགས་མཛད་རྡོ་རྗེ་ཆེ། །བདག་ནི་རྡོ་རྗེ་སྟོབས་པོ་ཆེ། བདག་ནི་རྣལ་འབྱོར་དབང་ཕྱུག་རྒྱལ། །ཕྱག་ན་རྡོ་རྗེ་བརྟན་པར་གནས། །བདག་ནི་དམ་ཚིག་རྡོ་རྗེ་སྟེ། །བྱིན་གྱིས་བརླབས་པ་མི་གཏོད་དོ། །དེ་ནས་རྡོ་རྗེ་སློབ་དཔོན་ཚིག་གསུམ་གྱིས་རྙེད་པ་དང་ལྡན་པས། རང་ཉིད་ཀྱི་ཕྱག་རྒྱ་རྡོ་རྗེ་དང་དྲིལ་བུ་བཟུང་ལ། རྡོ་རྗེ་དྲི་ལ་བུ་གཟུང་བར་བྱ། །དཀྱིལ་འཁོར་ལས་རྣམས་ཐམས་ཅད་ལ། །འདི་ཉིད་བཟུང་ནས་བྱ་བ་ཡིན། །བཅོམ་ལྡན་འདས་ཀྱི་ཕྱག་རྒྱའོ། །ཨོཾ་བཛྲ་ཨུ་ཏིཥྛ། དཀྱིལ་འཁོར་ནམ་མཁའ་ལ་བལྟས་ལ། །རང་ཉིད་ལངས་ལ་ཁྲོ་བོའི་ལྟ་བས། ཡི་གེ་ཧི་ལས་སྐྱེས་པའི་མིག་གཉིས་ལྟ་བས་བགེགས་ཐམས་ཅད་བསྲེགས་ཏེ། དེ་ནས་ཁྲོ་བོའི་ཕྱག་རྒྱ་བཅས་ལ། ཕྱོགས་ཐམས་ཅད་དུ་བལྟ་ཞིང་འགྲོ་བར་བྱའོ། །རང་ཉིད་ལྷའི་ང་རྒྱལ་དང་ལྡན་པས། སྔགས་བརྗོད་པར་བྱ་སྟེ། ཡི་གེ་ཨ་ཡོངས་སུ་གྱུར་པ་ལས། སྣ་ཚོགས་རྡོ་རྗེས་བྱིན་གྱིས་བརླབས་པའི་འོད་ཟེར་གྱིས་ས་གཞི་ཐམས་ཅད་ཁེངས་པར་བསམ་ཞིང་རྡོ་རྗེའི་འགྲོས་ཀྱིས་བཅག་པར་བྱའོ། །ཤར་ལ་སོགས་པའི་བགེགས་རྣམས་དང༌། ཕྱོགས་ཀྱི་ཡང་ཕུར་བུས་བཏབ་ལ། །རྡོ་རྗེའི་ར་བ་དང་གུར་བསམས་ཏེ། །དཔལ་རྡོ་རྗེ་སེམས་དཔལ་དང་སྦྱོར་བས། ཀོ་སྐོས་ཨོལ་མདུད་པ་མནན་ལ། །གཡོན་ང་རྒྱལ་དུ་བལྟ་བས་དཔལ། །ཕྱོགས་བརྒྱད་འཁོར་ལོར་གནས་པ་དང༌། །སྟེང་དང་འོག་ཀྱང་བྱིན་གྱིས་བརླབ། །བྷཱུར་བྷཱུ་བ་པ་ཙཾ་བནྡྷ་ཡ་ཏ། །སྔགས་ཀྱི་རྒྱལ་པོ་ཧཱུཾ་བརྗོད་པས། །ཉེས་པ་ཀུན་གྱིས་ཚུགས་མ་ཡིན། །དེ་ནས་ཨོཾ་བཛྲ་མཎྜལ་ཧཱུཾ་ཛ། འདི་ཡིས་རྡོ་རྗེ་ཁུ་ཚུར་གཉིས་བརྐྱང་ལ། གསང་བའི་དཀྱིལ་འཁོར་དགུག་པར་བྱ་སྟེ། ཞལ་བཞི་པ། རྡོ་རྗེ་དབྱིངས་ཀྱི་རང་བཞིན་གྱི་གསལ་བའི་དཀྱིལ་འཁོར་དགུག་པར་བྱའོ། །ཨོཾ་བཛྲ་བཛྲེ་ཨ་
དྷི་ཏིཥྛ་སིདྡྷི་ཧཱུཾ། དེ་ནས་རྡོ་རྗེ་བསྐོར་བའི་ཕྱག་རྒྱ་བྱས་ཏེ་བརྟན་པར་བྱའོ། །དེ་ནས་སེང་ལྡེང་གི་ཕུར་བ་ལ་བཟླས་པ་བྱས་ཏེ། ཀུན་དགའ་བ་དང༌། རྣམ་པར་རྒྱལ་བ་དང༌། སྤྲིན་གྱི་དབང་ཕྱུག་དང༌། གསུས་པོ་ཆེ་དང༌། རྣམ་པར་རྒྱལ་བ་དང༌། ཇི་ལྟ་བའི་རིམ་པས། འཇིག་རྟེན་གསུམ་ལས་རྒྱལ་བ་དང༌། གཤིན་རྗེ་གཤེད་དང༌། སྟོབས་པོ་ཆེ་དང༌། རྟ་མགྲིན་དང༌། བདུད་རྩི་འཁྱིལ་པ་དང༌། དེ་དག་ཀྱང་སྐུ་སྨད་ཕུར་པའི་དཔལ་དང་ལྡན་པ། ཙནྡན་དམར་པོའི་རང་བཞིན་དང༌། སྐུད་པ་དམར་པོ་དཀྲིས་ཏེ། མེ་ཏོག་དམར་པོས་བརྒྱན་ཏེ། དཀྱིལ་འཁོར་གྱི་ཕྱི་རོལ་གྱི་ཟུར་དང༌། ཕྱོགས་རྣམས་སུ་ལག་པ་གཡོན་པས་བཟུང་སྟེ། གཡས་པ་རྡོ་རྗེ་དང་བཅས་པས་བརྟན་པར་བྱའོ། །ལོག་འདྲེན་གྱི་མཚམས་ལ་སོགས་པ་རུ། སྔགས་འདིས་ཕུར་བུ་བརྡེག་པར་བྱའོ། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བནྡྷ་བནྡྷ་ཧཱུཾ་ཕཊ། འདིར་དེ་ནས་རྡོ་རྗེ་རྣལ་འབྱོར་གྱི་ཁུ་ཚུར་གྱིས་གོ་བགོ་སྟེ། བཅིང་བར་བྱས་པས། དཀྱིལ་འཁོར་གྱི་སྒོར་ཉེས་པ་ཐམས་ཅད་འཇོམས་པར་བྱེད་པའི་སྔགས་བརྗོད་ལ། བུམ་པ་ལྷག་པར་གནས་པར་བྱ་སྟེ། དྲི་བཟང་པོ་དང་བཅས་པའི་ཆུ་བླུགས་ཏེ། ལྷ་ཐམས་ཅད་ཀྱི་མིང་དང་བཅས་པ་ནམ་མཁའ་ལ་གནས་པ། སྙིང་པོའི་འོད་ཟེར་གྱིས་བཀུག་སྟེ། ཡང་དག་པར་མཆོད་ནས། གཏོར་མ་ཡང་ཕུལ་ལ། བུམ་པར་གཞུག་པར་བྱའོ། །བུམ་པ་ཡང་ནག་པོ་སྤངས་པ་མགྲིན་པ་རིང་བ། མཆུ་འཕྱང་བ། ལྟོ་བ་རྒྱས་པ། མེ་ཏོག་གི་ཕྲེང་བ་དང་བཅས་པའི་རས་ཟུང་གིས་མགུལ་པ་དཀྲིས། འབྲས་བུ་དང་བཅས་པའི་ཤིང་གིས་བརྒྱན་པ། དཀྱིལ་འཁོར་གྱི་གཙོ་བོ་དང༌། རིགས་ཀྱི་ལྷའི་མཚན་མ་དང་བཅས་པ། རིན་པོ་ཆེ་བདུན་ནམ་རྫ་ལས་བྱས་པའི་རྣམ་པར་རྒྱལ་པའི་བུམ་པའོ། །དེ་ཡང་ནང་དུ་བྱུ་རུ་དང༌། གསེར་དང་དུང་དང་མུ་ཏིག་དང༌། པདྨ་རཱ་གའི་རིན་པོ་ཆེ་རྣམས་ཀྱིས་ནང་དུ་བཅུག་ལ་གཞན་ཡང་སྨན་བྲི་ཧ་ཏི་དང༌། ཀཎྚ་ཀ་རི་དང༌། མ་ཧཱ་དཎྚོ་དང༌། ཨུཏྤལ་དང༌། ཨ་པ་རཱ་ཛི་ཏ་དཀར་པོ་དང༌། འབྲས་མཁར་མ་དང༌། གྲོ་དང༌། སྲན་མ་དང༌། ཏིལ་དང༌། འབྲུ་རྣམས་ཀྱིས་ཀྱང་ངོ༌། །ནང་བརྒྱན་ལ། བཅོམ་ལྡན་འདས་ཀྱི་
སྔགས་བརྒྱ་རྩ་བརྒྱད་བཟླས་ལ། མཆོད་ཡོན་དང༌། ཞབས་བསིལ་དང་བཅས་མཆོད་ཅིང་བསྟོད་དེ། ཡི་གེ་ཧཱུཾ་བརྗོད་པ་ལས། བཅོམ་ལྡན་འདས་ཡོངས་སུ་རྫོགས་པའི་སྐུར་བལྟས་ལ་རབ་ཏུ་མཆོད་དེ། བགེགས་རྣམས་འཇོམས་པར་བྱེད་པའི་སྔགས་བརྗོད་ཅིང༌། ཕྲེང་པའམ་མ་བརྒྱུས་པའི་མེ་ཏོག་གམ། སྤོས་ཀྱིས་ཀྱང་མཆོད་ལ། དེ་ནས་ཡི་གེ་བཞི་པའི་སྔགས་ཀྱིས་ཡང་དག་པར་བསྲུངས་ལ། ལས་ཐམས་ཅད་བྱ་སྟེ། དེ་ནས་དཀྱིལ་འཁོར་གྱི་བྱ་བ་ལ་འཇུག་པར་བྱ་སྟེ། ཐུན་གསུམ་དུ་ཡང་དག་པར་མཆོད་ཅིང༌། དེ་ནས་བཅོམ་ལྡན་འདས་ཀྱི་དྲུང་དུ་བུམ་པ་གཞག་པར་བྱ་སྟེ། འདི་ནི་བུམ་པ་རབ་ཏུ་གནས་པར་བྱ་བའི་ཆོ་གའོ། །དེ་ནས་བརྒྱ་བྱིན་ལ་སོགས་པ་ཤར་ལ་སོགས་པའི་ཕྱོགས་ནས་རང་རང་གི་སྔགས་དང་ཕྱག་རྒྱས་སྤྱན་དྲངས་ལ། མཆོད་ཡོན་ལ་སོགས་པ་ཕུལ་ཏེ། མེ་ཏོག་དང་བདུག་པ་ལ་སོགས་པས་ཡང་དག་པར་མཆོད་དེ། ཨོཾ་སར་མར་གཙྪ་གཙྪ། དེ་ལ་སོགས་པས་གཤེགས་སུ་གསོལ་ཏེ། སྟེང་ནས་ཀྱང་ཟླ་བ་དང༌། ཉི་མ་དང༌། ཚངས་པ་དང༌། མིག་གྱེན་དུ་བལྟས་ཏེ་གཤེགས། འོག་ཏུ་ཡང་ཨ་སུ་རེ་བྷྱ་སྭཱ་ཧཱ། ནཱ་གེ་བྷྱཿསྭ་ཧཱ། སོ་སོར་ཡང་རྡོ་རྗེའི་སོར་མོ་གྱེན་དུ་ཕྱེ་ནས། རྡོ་རྗེ་འབར་བའི་ཕྱག་རྒྱས་གཏོར་མ་བྱིན་ལ། དེ་ནས་ཡང༌། གཞན་གཏོར་མ་དམར་པོ། །མེ་ཏོག་དང་བདུག་སྤོས་ལ་སོགས་པས་བརྒྱན་པའི་གཏོར་མ་བྱིན་ཞིང་ལྷ་རྣམས་སྤྱན་དྲང་བར་བྱའོ། །དེ་ནས་རས་དཀར་པོས་བུམ་པ་རྣམས་གཡོགས་ཏེ། ལྷ་རྣམས་ཁ་སྦྱོར་དང་ལྡན་པ་འབྱུང་པོ་དང་བཅས་པ་ལ། ཡེ་ཏ་ཡ་ཏེ་མ་ཧཱ་བྷཱ་ཏོ་རོ་ཏྲ་སྠཱ་ན་པྲ་མུཉྩ་ཏུ་སྭཱ་ཧཱ། དེ་ནས་སྔགས་དེ་ཉིད་ཀྱིས་ལྷ་བཤོས་ལ་སོགས་པ་དབུལ་ཏེ། སོ་སོར་འབྱུང་པོ་ཆེན་པོ་རྣམས། རང་རང་གནས་སུ་ཅི་བདེར་གཤེགས་པར་བྱའོ།། དུར་ཁྲོད་ཆེན་པོ་ལྷ་ཡི་གནས་རྣམས་དང༌། །ཤིང་གཅིག་དང་ནི་ཆུ་བོའི་གནས་རྣམས་དང༌། ལམ་གྱི་བཞི་མདོ་ལིངྒ་གཅིག་པ་དང༌། །ལྷའི་གནས་རྣམས་སུ་མྱུར་དུ་གཤེགས་བྱས་ལ། །དམ་ཚིག་གནས་ལ་རབ་ཏུ་གནས་པར་མཛོད། །ཇི་ལྟར་ཁྱེད་ནི་མི་འགྲོ་ན། །ཁྱེད་ཀྱི་
མགོ་ནི་རྡོ་རྗེས་འགེམས། །ཡུད་ཙམ་གྱིས་ནི་ཉམས་པར་འགྱུར། །དམྱལ་པ་ཆེན་པོར་འཇུག་པར་བྱེད། །ཇི་ལྟ་ཇི་ལྟར་ཅི་བདེ་བར། །རང་གི་གནས་སུ་བདེ་བར་སོང༌། །ཡང་མཆོད་ཡོན་ལ་སོགས་བ་བྱིན་ལ། མཆོད་དེ་ཅི་བདེ་བར་གཤེགས་པར་བྱའོ། །དེ་ནས་དུར་ཁྲོད་དང༌། ལྷའི་གནས་དང༌། རིའི་རྩེ་མོ་དང༌། ལམ་གྱི་བཞི་མདོ་དང༌། དེ་དག་ཏུ་མྱུར་དུ་འགྲོ་བར་འགྱུར་ཏེ། གཏོར་མ་བྱིན་པས་སོ། །དམ་ཚིག་ལ་རབ་ཏུ་བརྟན་པར་དམ་ཚིག་རྣམས་རབ་ཏུ་སྐྱོང་ཞིང༌། ཁྲོ་བོ་ཆེན་པོའི་བཀའ་སྩལ་ཇི་ལྟར་མནོས་པས། རང་རང་གི་ལས་རྣམས་བྱེད་པར་འགྱུར་ཏེ། རུ་ཏྲ་སྠཱ་ན་པྲ་མུནྩན་ཏུ་སྭཱ་ཧཱ། དེ་ནས། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱི་ཨཱ་དྱ་ནུ་ཏྤནྣ་ཏྭཱཏ། འདི་ནི་དབྱངས་ཆེན་པོའི་འབྱུང་པོ་ཐམས་ཅད་ལ་གཏོར་མ་སྦྱིན་པར་བྱའོ། །མཆོད་ཡོན་ལ་སོགས་པ་སྦྱིན་པ་འདི་ནི་གཏོར་མའི་ཆོ་གའོ། །ཞི་པའི་རང་བཞིན་ནམ། རྒྱས་པ་ལ་ཉེས་པ་རྣམས་འཇོམས་པར་བྱ་བའི་ཕྱིར། རྣམ་པར་གྲོལ་གདོང་གིས། སྔགས་བརྒྱ་ཕྲག་བརྒྱད་བཟླས་ལ། འཁོར་ལོའི་ལྷ་རྣམས་མཆོད་དེ། མཆོད་ཡོན་ཡང་ཕུལ་ལ། སློབ་མ་ལྷག་པར་གནས་པར་བྱ་སྟེ། དེ་ནས་སློབ་དཔོན་གྱིས་སློབ་མའི་མགོ་ལ་མེ་ཏོག་བཞག་སྟེ། སློབ་མས་ལག་པར་མེ་ཏོག་ཐོགས་ཏེ། འདི་སྐད་ཅེས་བརྗོད་པར་བྱའོ། །བདག་གིས་སྟོན་པ་དགའ་ཆེན་པོ། །མགོན་པོ་ཆེན་པོ་བདག་འཚལ་ལོ། །བྱང་ཆུབ་སེམས་མགོན་བརྟན་པ་པོ། །དམ་ཚིག་དེ་ཉིད་བདག་ལ་སྩོལ། །བདག་ལ་བྱང་ཆུབ་སེམས་ཀྱང་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་འཚལ། །དེ་ནས་དཀྱིལ་འཁོར་གྱི་ཤར་སྒོར་སློབ་མ་བཞག་ལ། སྙིང་གར་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་ཡི་གེ་ཧཱུཾ་ལས་དཾ་ལས་བསྐྱེད་པའི་རྡོ་རྗེ་བསམས་ལ། གཡས་པའི་རྡོ་རྗེ་ཁུ་ཚུར་གྱིས་རྡོ་རྗེ་བཟུང་ལ། སློབ་མའི་སྙིང་གར་དེ་རེག་ཅིང༌། སུ་ར་ཏེ་ས་མ་ཡ་སྟྭཾ་ཧོ། །བཛྲ་སིདྷྱ་ཡ་ཐ་སུ་ཁཾ། ས་འདིར་སློབ་དཔོན་གྱིས་སྡིག་པ་བཤགས་པ་བྱ་བའི་དོན་དུ། ཕྱག་
འཚལ་བདེ་གཤེགས་ཐམས་ཅད་ལ། །ཇི་ལྟར་ཐམས་ཅད་མཁྱེན་པ་པོ། །།འཁོར་བ་ཀུན་གྱི་སྐྱབས་མཛོད་ཅིག །བདག་ནི་ཉེ་བར་སྐྱབས་སུ་མཆི། །གཙོ་བོ་ཀུན་དུ་བསྒོམ་པར་བགྱི། །སྡུག་བསྔལ་གསུམ་ལས་གྲོལ་བའི་ཕྱིར། །འཇིག་རྟེན་སྡུག་བསྔལ་བདག་གིས་མཐོང༌།། ཐམས་ཅད་བྱེད་པར་གནས་པ་ཡི། །སྡུག་བསྔལ་གསུམ་གྱིས་ཐམས་ཅད་གདུང༌། །བདག་ནི་ཁྱེད་ལ་དབུལ་བར་བགྱི། །བདག་ནི་ཁྱེད་ཀྱིས་བཞེས་སུ་གསོལ། །སྡིག་པ་ཐམས་ཅད་བཤགས་པར་བགྱི། །ཕྱིན་ཆད་སྡིག་པ་བདག་མི་བགྱིད། །བསོད་ནམས་ཀུན་ལ་རྗེས་ཡི་རངས།། བྱས་དང་བྱེད་བཅུག་དགེ་བ་ལ། །བདག་ནི་དེ་བཞིན་མངོན་པར་དགའ། །ཆོས་གསུང་མཛད་པའི་སངས་རྒྱས་རྣམས། །མྱ་ངན་མི་འདའ་བཞུགས་སུ་གསོལ། །སེམས་ཅན་ཀུན་གྱི་དོན་གྱི་ཕྱིར། །མཆོག་ཏུ་རྩོལ་པ་ཆེན་པོ་ཡིས། །བདག་ནི་སངས་རྒྱས་འགྱུར་པར་ཤོག། སངས་རྒྱས་དབང་ཕྱུག་གནས་པ་ཡིས། །འཁོར་བ་ཐམས་ཅད་བསྒྲལ་དོན་དུ། །འཁོར་བའི་རྒྱ་མཚོ་མཐར་ཕྱིན་ཏེ། །སངས་རྒྱས་རྒྱུ་ལ་བཀོད་པའི་ཕྱིར། །ཇི་ལྟར་བཟོད་པའི་སྟོབས་རྣམས་ཀྱིས། །སྨོན་ལམ་ཆེན་པོ་གདབ་པར་བགྱི། །དེ་ལྟར་གྱུར་པའི་སྟོབས་ཀྱིས་སུ། །འདི་ལྟར་རིགས་དང་རིགས་སྐྱེས་ཀྱང༌། །ཐབས་ཀྱིས་འགྲོ་བ་བསྒྲལ་བར་གྱི། །ཐམས་ཅད་མཉམ་པའི་གོ་འཕང་བ། །དྲི་མེད་སྟོང་པའི་ཡོན་ཏན་ཅན། །རིགས་ལས་བྱས་པའི་བསོད་ནམས་ཀྱིས། །བྱས་དང་བྱེད་དུ་བཅུག་པ་ཡི། །བདག་གི་བསོད་ནམས་ཅི་མཆིས་པས། །གྲུབ་ཅིང་བདེ་བའི་གནས་ཕྱིན་ཤོག །དེ་ནས་རིན་ཆེན་དཔལ་མོས་ལག་པ་ན་དྲི་ཐོགས་པ། དཔལ་མོས་མེ་ཏོག་དང༌། ཐིག་ལེ་མཆོག་མས་བདུག་སྤོས་དང༌། རི་བོང་འཛིན་མས་མར་མེ་ཐོགས་པ་རྣམས་ཀྱིས་མཆོད་ལ། ཨོཾ་བཛྲ་ཧཱ་སྱེ་ཧཱུཾ། ཞེས་པའི་སྔགས་ཀྱིས། ཨུ་དུམྦཱ་ར་དང༌། བྱང་ཆུབ་ཀྱི་ཤིང་ལས་བྱས་པའི་སོ་ཤིང༌། དྲི་དང་མེ་ཏོག་གི་ཕྲེང་བས་བརྒྱན་པ། སོ་འབྲུད་པའི་ཚུལ་གྱིས་བཟུང་ལ། །དོར་བར་བྱའོ། །རྡོ་རྗེ་ཆོས་ཀྱིས་བཟླས་པའི་དྲི་བཟང་པོའི་མཆོད་ཡོན་གྱིས་ཆུས་ཁ་བཤལ་བྱིན་ལ། ཨོཾ་ཧྲཱིཿབི་ཤུདྡྷ་དྷརྨ་སརྦ་པཱ་པ་ནི་ཤྩ་
སྱ་སརྦ་བི་ཀལྤཱན་ཨ་པ་ན་ཡ་ཧཱུཾ། རྡོ་རྗེ་རྣོན་པོ་ཆེན་པོ་འདི། །ཡོངས་སུ་རྫོགས་ཤིང་མ་ཉམས་པ། །གཅིག་ནིམ་གོ་བོག་ཞན་ནི་བསྟན། །ཨོཾ་བཛྲ་རཀྵ་ཧཱུཾ། བཟླས་བ་སྦྱིན་པར་བྱ་སྟེ། སྔགས་དང་སྟན་དུ་བྱིན་ལ། རྡོ་རྗེའི་གོ་བསྐོན་ཏེ། སྐུད་པ་སུམ་སྒྲིལ་རང་གི་སློབ་མའི་དཔུང་པ་གཡོན་པ་ལ་བཅིང་བར་བྱའོ། །དེ་ཡང་ཡི་གེ་དྲུག་པའི་སྔགས་དང་ཕྱག་རྒྱས་སོ། །སྲུང་བ་བྱས་ལ། སློབ་མ་ལ་ཆོས་བཤད་པར་བྱ་སྟེ། དེ་རིང་ཁྱོད་ནི་དགའ་བ་ཡིན། །རྙེད་པ་ཆེན་པོ་ཁྱེད་ཀྱིས་རྙེད། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་པོ་དམ་པ་ཁྱོད། །སངས་རྒྱས་ཀུན་གྱིས་རྗེས་སུ་བཟུང༌། །བདག་ཉིད་ཆེན་པོ་རྒྱལ་བའི་སྲས། །ཁྱོད་ནི་ཐེག་པ་ཆེན་པོ་ལ། །དགའ་བའི་རིགས་ཅན་ཐོབ་པར་འགྱུར། །འདི་ནི་ལམ་གྱི་མཆོག་ཡིན་ཏེ། །དཔལ་དང་ལྡན་པའི་ཐེག་པ་ཆེ། །ལམ་འདི་ལ་ནི་ཁྱོད་ཕྱིན་ན། །དེ་བཞིན་གཤེགས་པར་ཁྱོད་འགྱུར་རོ། །རང་བྱུང་སྐལ་བ་ཆེ་དང་ལྡན། འཇིག་རྟེན་ཀུན་གྱིས་མཆོད་པར་འགྱུར། །ཡོད་དང་མེད་པའི་དེ་ཉིད་སྤངས། །ནམ་མཁའ་ལར་དུ་དྲི་མ་མེད། །ཟབ་མོ་རྟོག་གེའི་ཡུལ་ལས་འདས། །རྟོག་དཔྱོད་ཡུལ་ལས་འདས་པ་པོ། །ཐམས་ཅད་ལྔ་རུ་གནས་པས་ཏེ། །ལྔ་པ་ཀུན་ཀྱང་དེ་བཞིན་ནོ། །ལས་དང་སྤྱོད་པར་གནས་པ་ཀུན། །གཉིས་མེད་བདེན་པའི་དཔལ་དང་ལྡན། །འདི་ནི་ཐེག་པ་ཆེན་པོའི་མཆོག །འདི་འདྲ་ཁྱོད་ཀྱིས་ཐོབ་པར་འགྱུར། །དེ་སྐད་ཅེས་སློབ་མ་ལ་བརྗོད་པར་བྱས་ལ་སློབ་མ་རྣམས་བསྟན་པར་བྱ་སྟེ། རྡོ་རྗེ་སློབ་དཔོན་གྱི་བཀའ་དྲིན་གྱིས་ཁྱེད་ཀྱིས་ནང་པར་གྲོལ་བའི་གྲོང་ཁྱེར་ཆེན་པོ་མཐོང་བར་འགྱུར་རོ། །བདུག་པ་ལ་སོགས་པ་ཅི་འབྱོར་པའི་མཆོད་པ་རྣམས་ཤོམས་ཤིག །བཅོམ་ལྡན་འདས་འཁོར་དང་བཅས་པ། བཅོམ་ལྡན་འདས་ཆེ་གེ་མོ་རེག་པ་འཛིན་པའི་རྒྱལ་པོ་འཁོར་དང་བཅས་པ་ལ་ཕྱག་འཚལ་ཏེ། དཀྱིལ་འཁོར་སྙིང་རྗེ་ཆེན་པོ་བདག །ནང་པར་བདག་ནི་འདྲི་བར་འདོད། །སློབ་མ་རྗེས་སུ་གཟུང་ཕྱིར་དང༌། །ཁྱེད་རྣམས་ཀྱིས་ཀྱང་མཆོད་པའི་ཕྱིར། །འདི་ལྟར་བདག་ནི་གུས་པ་ལ། །བཅོམ་ལྡན་འདས་ཀྱིས་བཀའ་འདྲིན་མཛོད། །བདག་
མིང་འདི་ཞེས་བགྱི་བ་ལ། །ཆེ་གེ་དཀྱིལ་འཁོར་ཅེས་པའི་མཆོག །ནང་པར་སངས་རྒྱས་དཀྱིལ་འཁོར་བྲི། །ཇི་ལར་འབྱོར་པའི་སྟོབས་ཀྱིས་སོ། །རྗེས་སུ་བཟུང་བའི་ཐབས་ཀྱིས་ནི། །བདག་གི་སློབ་མ་གང་ཡིན་ལ། །དཀྱིལ་འཁོར་ལྷ་སོགས་དགོངས་སུ་གསོལ། །དེ་སྐད་ཅེས་ལན་གསུམ་བརྗོད་དོ། །དེ་ནས་དཀྱིལ་འཁོར་ལེགས་པར་མཆོད་ལ། མཆོད་ཡོན་ལ་སོགས་པ་ཡང་ཕུལ་ཏེ། ལས་ཀྱི་རྡོ་རྗེས་སློབ་མ་དཀྱིལ་འཁོར་གྱི་གནས་སུ་ཉལ་ལ་འདུག་པར་བྱའོ། །གཞན་ཉི་མ་ལ་ལྷའི་རྣལ་འབྱོར་བྱས་ལ། །དཀྱིལ་འཁོར་ནམ་མཁའ་ལ་བལྟས་ཏེ། དཀར་པོ་དང༌། དམར་པོ་དང༌། ལྗང་གུ་དང༌། སྔོན་པོ་དང༌། དྲི་བཟང་པོས་བྱུགས་ལ། དོན་གྲུབ་བཏགས་པས་ཀྱང་བྱུག་སྟེ། དེ་ལྟར་སྐུད་པ་ལྔ་རྣམས་སོ་སོར་བཞག་སྟེ། ཨོཾ་ཏྲཱཾ་ཧྲཱིཿ་ཨཿ་ཧཱུཾ། རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་རྣམས་སུ་བསམས་ལ། དེ་དག་ཀྱང་རང་རང་གི་གནས་སུ་བྱིན་གྱིས་བརླབ་ཅིང་ས་བོན་ལས་འོད་ཟེར་འཕྲོས་པ་དང༌། རང་གི་སྙིང་ག་ལས་ཀྱང་འོད་ཟེར་འཕྲོས་ཏེ། དེ་བཞིན་གཤེགས་པ་ལྔའི་བདག་ཉིད་དུ་བྱིན་གྱིས་བརླབ་པར་བྱའོ། །ཨོཾ་དཱཔྟི་དྲྀཥྚི་ཨཾ་ཀུ་ཤ་ཛ། འདི་ནི་མིག་ལྷག་པར་གནས་པའོ། །མིག་ཕྱོགས་ཐམས་ཅད་དུ་བལྟ་བར་བྱའོ། །གཟི་མ་བརྟགས་ཏེ་མིག་རབ་ཏུ་བགྲད་པས། སྲད་བུ་ནམ་མཁའ་ལ་བརྐྱང་བ་ལ་བལྟ་བར་བྱའོ། །ཆོས་རྣམས་ཐམས་ཅད་རྗེས་སུ་གཅིག་པ་ལ། །སྤྲོ་ཞིང་བསྡུས་པས་རྗེས་སུ་བརྟན་པར་བྱས། །ཆོས་རྣམས་ཐམས་ཅད་དེ་ཉིད་གཅིག་པ་ཡིན། །ཧཱུཾ་ཞེས་བརྗོད་ལ་གཅིག་ཏུ་བསྒྲིལ་ལོ། །དེ་ནས་གསེར་ལ་སོགས་པའི་སྣོད་དུ་བཞག་ཅིང་མཆོད་ལ། རྡོ་རྗེ་བསྡམས་པའི་ཕྱག་རྒྱ་བཅས་ལ། །སྔགས་འདི་བརྗོད་པར་བྱའོ། །ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུཾ། འདི་ནི་ལན་བརྒྱ་རྩ་བརྒྱད་དུ་བརྗོད་ལ། །དེ་ནས་དཀྱིལ་འཁོར་གྱིས་གཞི་ལ། ནམ་མཁའ་ལ་གནས་པ་རྣམས་རབ་ཏུ་བརྟན་པ་ལ། མེ་ཏོག་ལ་སོགས་པས་ཡང་དག་པར་མཆོད་དེ། མིག་གཉིས་སུ་ཡི་གེ་ཛཿ་ཡོངས་སུ་གྱུར་པ་ལས། ཟླ་བ་དང་ཉི་མའི་དཀྱིལ་འཁོར་དུ་བལྟས་ལ། བྱང་ཕྱོགས་ཀྱི་སྒྲུབ་པ་པ་བདུད་རྩི་འཁྱིལ་པའི་གཟུགས་ཀྱིས།
གཡོན་པའི་ཁུ་ཚུར་གྱིས་སྐུད་པ་ལྟེ་བར་བཟུང་སྟེ། ཨོཾཿཛཿཛཿཛཿ་དེ་སྐད་ཅེས་བརྗོད་པས། བྱང་ཕྱོགས་ཀྱི་སྒྲུབ་པ་པོས་ཀྱང༌། ཡང༌། ཨོཾཿཛཿཛཿཛཿ་ཞེས་བརྗོད་ཅིང་སློབ་དཔོན་གྱི་ལག་ཏུ་གཏད་དོ། །དེ་ལྟར་སློབ་དཔོན་དང་སློབ་མ་གདོང་ཕྱོགས་པས། ནུབ་དང་ལྷོ་ཡང་སློབ་དཔོན་གྱི་གནས་ཡིན། ཤར་དང་བྱང་ན་སློབ་དཔོན་གྱི་གནས་སོ། །དེ་སྐད་ཅེས་ནམ་མཁའ་ལ་ཐིག་བཏབ་ལ། སེམས་ཀྱིས་ཕྱོགས་དང་མཚམས་ཐམས་ཅད་ཀྱི་ཕྱོགས་མཉམ་པར་བགོས་ཏེ། དེ་ཉིད་ཀྱི་རིམ་པས་ས་གཞི་ལ་ཚངས་པའི་ཐིག་ལ་སོགས་པ་གདབ་སྟེ། ཐིག་སྐུད་སྦོམས་སུ་དཀྱིལ་འཁོར་གྱི་སྒོའི་ཉི་ཤུ་ཆ། དཀྱིལ་འཁོར་ཉིས་འགྱུར་གྱི་ཚད་དོ། །དེ་ཡང་རྡོ་རྗེ་ཁུ་ཚུར་གྱིས་སྐུད་པ་ཤར་ཕྱོགས་སུ་བཟུང་ལ། །ནུབ་ཏུའང་དེ་བཞིན་ནོ། །གནོད་སྦྱིན་དང༌། ཡི་དགས་དང༌། ལྷ་དང༌། ཀླུ་དང༌། དབང་ཕྱུག་དང་བདེན་བྲལ་གྱི་ཕྱོགས་སུ་གདོང་བལྟ་ཞིང། མེ་དང་རླུང་དང་ནི་སློབ་དཔོན་གྱི་གནས་ཡིན་ལ། ཤར་དང་ནུབ་དང་བྱང་དང་ཕྱོགས་བཞིར་མཉམ་པར་ཐིག་བཏབ་ལ། དེ་ཡང་ཆ་བརྒྱད་དུ་མཉམ་པར་བྱ་སྟེ། དེ་ཡང་སྐུད་པའི་སྒྲས་དེ་བཞིན་གཤེགས་པ་ཐམས་ཅད་སྤྱན་དྲངས་ཤིང་དགོངས་པར་བསམ་མོ། །དེ་ཡང་སློབ་དཔོན་སློབ་མའི་གཡས་སུ་སྐོར་ཞིང་འགྲོ་བར་བྱ་སྟེ། མེ་དང་རླུང་ནི་རྟག་ཏུ་སློབ་དཔོན་གྱི་གནས་ཡིན། སྲིན་པོ་དང་དབང་ལྡན་རྣམས་སུ་ཡང་ཟུར་གྱི་ཐིག་རྣམས་གདབ་བོ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་དང་ཡང་དག་ལྡན། །ཆ་རྣམས་བཅུ་དྲུག་དང་ལྡན་ཞིང༌། །རྡོ་རྗེར་བས་ཀུན་ནས་བསྐོར། །དེ་ལྟར་དུ་ནི་བཤད་པ་ཡིན། །ཕྱི་རོལ་གྱི་དཀྱིལ་འཁོར་ལ་གནས་བཞི་སྟེ། སྙིང་པོའི་ལྟེ་བ་དང་རེའུ་མིག་བརྒྱད་དང་ལྡན་པ། ཕྱི་རོལ་ནས་རྡོ་རྗེ་ར་བས་ཀུན་ནས་བསྐོར་བ། །གཉིས་གཉིས་དང་ལྡན་པའི་ཆ་གསུམ་དང༌། །ཐམས་ཅད་ཀྱི་དབུས་སུ་བརྒྱད་ཆའི་སྒོ་ཚད་དང༌། སྒོའི་ཕྱེད་ཀྱིས་སྒོ་ཁྱུད་དང༌། འགྲམ་དང༌། ལོགས་ཀྱང་ངོ༌། །འགྲམ་པའི་ཕྱེད་ཀྱིར་དུལ་ཚོན་གྱི་ས་དང༌། དེ་ནས་འགྲམ་པའི་ཚད་ཀྱིས། །མཆོད་པའི་སྣམ་བུའི་ཚད་ཀྱིས་དྲ་བ་དང་དྲ་བ་ཕྱེད་པའི་སའོ། །རྡོ་རྗེའི་ཀ་བ་བརྒྱད་ཀྱིས་ནི་རྡུལ་ཚོན་གྱིས་ཡིན་ལ། སྒོའི་སུམ་འགྱུར་
གྱིས་རྟ་བབས་སོ། །ཕྱོགས་ཀྱི་གནས་དང་སྙིང་པོའི་གནས་དེ་བཞིན་དུ་ཤེས་པར་བྱའོ། །འཁོར་ལོ་དང༌། ཟུར་ལ་རྒྱལ་མཚན་དང༌། དྲིལ་བུ་དང༌། རྔ་ཡབ་དང༌། དཔག་བསམ་གྱི་ཤིང་དང༌། དེ་ནས་དཀྱིལ་འཁོར་ལྟེ་བར་ཕུར་པ་བཏབ་ལ། ཕྱི་རོལ་ནས་ཀུན་ནས་བསྐོར་བར་བྱ་སྲེ། རྡོ་རྗེའི་ཕྲེང་བ་དང༌། དེ་བཞིན་རི་མོ་གཉིས་ཀྱིས་བསྐོར། གསུམ་ཡང་བསྐོར་ལ། ཁ་དོག་ལྔའི་གཞི་ཡང༌། རིང་པོ་བཞི་པའི་ཡང༌། འཁོར་ལོ་གྲུ་བཞི་མཉམ་པ་ལ་བསྐོར་བ་བྱ། རི་མོ་བཅུ་བདུན། ཆ་བཅུ་དྲུག་དང་ལྡན་པ། གནས་བརྒྱད་ཟླུམ་པོར་བསྐོར་ཏེ། རྡོ་རྗེ་ཕྲེང་བས་ཀུན་ནས་བསྐོར་བ། ཐམས་ཅད་ཀྱང་སྔོན་དུ་བཤད་པའི་མདོག་དང་ལྡན་པའོ། །དེ་ནས་ཡི་གེ་ཧི་ལས། མིག་གཡས་པ་དང༌། གཡོན་པ་གཉིས་ཟླ་བ་དང་ཉི་མའི་དཀྱིལ་འཁོར་དུ་བྱས་ལ། དཀྱིལ་འཁོར་ལ་བལྟས་ལ། ཡེ་ཤེས་ཀྱི་ཐིག་གཤེགས་སུ་གསོལ་ཏེ། དེ་ནས་བཾ་ལཾ་རཾ་ཧཾ་ཛཾ་གི་ས་བོན་ལས། རིམ་པ་བཞིན་ཡོངས་སུ་རྫོགས་པར་བྱས་ལ། སྐུད་པའི་ཁ་དོག་བཞིན་དུ་དཀར་པོ་ལ་སོགས་པ་རྣམས་ཀྱང་བྱིན་གྱིས་བརླབ་པར་བྱ་སྟེ། རིན་པོ་ཆེ་ལྔའམ། ལྕགས་ལྔའམ། བ་བླ་ལ་སོགས་པའི་ཁམས་གཞན་ནམ། འབྲས་མཁར་བ་ལ་སོགས་པའི་འབྲུ་རྣམས་ཀྱིས་ཀྱང་རུང་སྟེ། ཡང་ན་སོ་ཕག་ལ་སོགས་པའི་ས་རྣམས་ཀྱིས་ཀྱང་བྱའོ། །ཨོཾ་ཏྲཿཧྲཱིཿཨཱཿཧཱུཾ། ས་བོན་འདི་དག་ཡོངས་སུ་རྫོགས་པ་ལས། རང་རང་གི་ཁ་དོག་གི་རིགས་བཞིན་དུ་བྱིན་གྱིས་བརླབ་བར་བྱ་སྟེ། ཨོཾ་བཛྲ་ཏི་ཏྲ་ས་མ་ཡ་ཧཱུཾ། དེ་བཞིན་དུ་རྡུལ་ཚོན་རྣམས་ལ། ས་བོན་གྱི་འོད་ཟེར་ལས། དེ་བཞིན་གཤེགས་པ་ཐམས་ཅད་སྤྱན་དྲངས་ཏེ་བསྟིམས་ལ། ཡི་གེ་ཧྲཱིཿལས་གཟི་བརྗིད་དང་ལྡན་ཞིང༌། རྡོ་རྗེ་ཁྲོ་བོ་ཉི་མའི་ལྟ་བས་བ་ལྟས་ལ། ཨོཾ་བརྗོད་དོ། །ཡི་གེ་ཨ་བརྗོད་ཅིང་སྔགས་དང་ཕྱག་རྒྱ་བཅས་ཏེ། རྡུལ་ཚོན་རྣམས་རབ་ཏུ་འབར་བར་བསམ་མོ། །རྡོ་རྗེ་ཁུ་ཚུར་བས་ལ། སྙིང་གའི་ཧཱུཾ་ལས་འོད་ཟེར་དྲི་མ་མེད་པ་འཕྲོས་ཏེ་འབར་བར་བསམ་ཞིང༌། སཱུཪྻ་ཛྭ་ལ་མཎྜལ་ཧཱུཾ་ཕཊ། དེ་ནས་དཀྱིལ་འཁོར་གྱི་ལྟེ་བ་ལ་བཏབ་པའི་ཕུར་པ་ཡི་གེ་ཧཱུཾ་བརྗོད་ཅིང༌། རང་གི་རྡོ་རྗེ་དང་བཅས་
པའི་ལག་པར་བཟུང་ངོ༌། །ཕུག་པའི་ཁུང་བུ་ཡང་རྡུལ་ཚོན་ལྔས་དགང་ངོ༌། །རྡོ་རྗེ་དང་དྲིལ་བུ་བཟུང་ལ། རྡོ་རྗེའི་གླུ་བླང་ཞིང༌། དགའ་བ་དང་ལྡན་པས་བྲི་བར་བྱའོ། །འདི་ནི་ཆོས་དབྱིངས་དག་པ་སྟེ། །སེམས་ཅན་ཁམས་ནི་གྲོལ་བར་བྱེད། །བདག་ནི་རྡོ་རྗེ་འཛིན་པའི་རྒྱལ། །རྡུལ་ཚོན་ས་གཞིར་བཀོད་པར་བྱ། །དེ་ནས་རྡོ་རྗེ་ཁུ་ཚུར་གྱིས་ལོག་འདྲེན་གྱི་ཕྱོགས་ནས། ཇི་ལྟར་བདེ་བར་དུལ་ཚོན་དགོད་པར་བྱའོ། །དེ་ཡང་མཉམ་པར་སྲབ་མཐུག་མེད་པར་གཡས་སུ་བསྐོར་ཞིང་དཀར་པོ་དང༌། སེར་པོ་དང༌། དམར་པོ་དང༌། ལྗང་གུ་དང། སྔོན་པོ་རྣམས་རིམ་པས་སྦྱིན་པར་བྱའོ། །གནས་གཉིས་པ་ལ། དཀར་པོ་དང༌། དམར་པོ་དང༌། ནག་པོ་དང༌། ཁ་དོག་གསུམ་སྦྱིན་པར་བྱའོ། །ནང་གི་གནས་གཉིས་ལ། ནག་པོ་འབའ་ཞིག་གིས་བྲི་བར་བྱའོ། །དེ་དག་ཀྱང་སྦོམ་ཕྲ་སྒོའི་ཚད་ཙམ་གྱི་རི་མོ་བཅད་ཅིང་ནས་ཀྱི་ཚད་ཙམ་དུ་སྦོམ་པར་བྱའོ། །དེ་ཡང་ཤར་ཕྱོགས་དཀར་པོ། །གཤིན་རྗེ་སེར་པོ། །ཆུ་ལྷའི་ཕྱོགས་དམར་པོ། །ལུས་ངན་པོའི་ཕྱོགས་ལྗང་གུ། དབུས་ནག་པོ། །དཀྱིལ་འཁོར་བྲི་བའི་དུས་སུ། བགེགས་ཀྱི་མཚན་མ་དང་ལྡན་ན། བགེགས་འཇོམས་པར་བྱེད་པའི་སྔགས་དང་ཕྱག་རྒྱ་བཅས་ལ། བྱང་ཆུབ་ཀྱི་སེམས་དང་ལྡན་པས་བགགས་བསྐྲད་པར་བྱའོ། །དེའི་དུས་སུ། ཡི་གེ་ཧཾ་ལས་གླང་པོ་ཆེའི་གདན་དེའི་སྟེང་དུ་ཡི་གེ་ཨོཾ་ལས་པདྨ་དང་ཉི་མའི་གདན། དེའི་དབུས་སུ་བཅོམ་ལྡན་འདས་རང་གི་བཞུགས་སྟངས་དང་ཁ་དོག་གིས་གནས་པ་ལ། ཛཿཧཱུཾ་བཾ་ཧོཿ་ཞེས་བརྗོད་པས། ཡི་གེ་ཧཱུཾ་བརྗོད་ཅིང་དམ་ཚིག་གི་ཕྱག་རྒྱ་བཅས་ལ་བསྟིམ་པར་བྱའོ། །དེ་ནས་དམ་ཚིག་གི་ཕྱག་རྒྱ་བཅས་ལ། དབང་ཕྱུག་ཆེན་པོ་རང་གི་ཁ་དོག་དང་གདན་དང་བཞུགས་ཐབས་མངོན་རྟོགས་སྒྲུབ་ཐབས་ལས་བཤད་པ་བཞིན་དུ། ཛཿཧཱུཾ་བཾ་ཧོཿ་ཞེས་བརྗོད་ལ། བཅོམ་ལྡན་འདས་ཀྱི་ཤར་ཕྱོགས་སུ་གཞག་པར་བྱའོ། །འཁོར་ལོ་ཐམས་ཅད་དགུག་པ་དང༌། །གཞུག་པ་དང༌། བསྟིམ་ཞིང་ཡི་གེ་ཧཱུཾ་གིས་གཤེགས་སུ་གསོལ་ལོ། །ཇི་ལྟར་གཤེགས་སུ་གསོལ་བའི་ཚེ། །ལག་པ་རྡོ་རྗེ་དང་ལྡན་
པས་ཐིག་རྣམས་སྟེང་དུ་བཏེག་སྟེ། གཤེགས་སུ་གསོལ་ལོ། །དེ་ནས་སྔོན་དུ་བཤད་པའི་བུམ་པ་དྲི་བཟང་པོའི་ཆུས་བཀང་བ་མེ་ཏོག་གིས་བརྒྱན་ཏེ། བརྒྱད་དབང་ལྔ་ལ་སོགས་པ་དཀྱིལ་འཁོར་གྱི་ཕྱོགས་དང་མཚམས་དགོད་པར་བྱའོ། །དེ་ནས་རྡོ་རྗེ་སློབ་དཔོན་ཁྲོ་བོའི་ཏིང་ངེ་འཛིན་དང་ལྡན་པས། གོས་སྔོན་པོ་བགོས་ཏེ་མེ་ཏོག་སྔོན་པོའི་ཕྲེང་བས་བཅིངས་ལ། དྲིལ་བུ་དཀྲོལ་ཞིང་བསྐོར་བ་ལན་གསུམ་བྱ་སྟེ། མེ་ཏོག་སྔོན་པོས་མཆོད་ལ། དཀྱིལ་འཁོར་གྱི་གནས་སུ་སོང་ལ་གར་བྱ་ཞིང༌། མེ་ཏོག་གི་ཕྲེང་བ་བླངས་ལ། གར་བྱ་ཞིང་མཆོད་ཡོན་ཕུལ་ལ། སྔགས་འདི་བརྗོད་པར་བྱའོ། །བརྗོད་གྷ་ཊ་ཡ་ས་མ་ཡ་པྲ་བེ་ཤ་ཡ་ཧཱུཾ། རང་ཉིད་ཁྲོ་བོ་ཆེན་པོའི་ང་རྒྱལ་གྱིས་ཤར་སྒོ་ནས་སོང་སྟེ། ནུབ་ཀྱིས་གོར་གནས་ལ། ལྷོ་དང་བྱང་གི་ཡང་སྒོར་ཕྱིན་ཏེ། དེ་ནས་རོལ་པའི་གར་གྱིས། ཤར་གྱི་སྒོར་བུམ་པའི་ཕྱི་རོལ་ཏུ་ཕྱིན་ལ། མེ་ཏོག་གི་གཅལ་བཀྲམ་སྟེ། སྔོན་དུ་བཟླས་པ་ལ། ཨོཾ་ཏིཥྚྷ་སི་དྡྷི་ཧཱུཾ། སྔགས་འདི་བརྗོད་ཅིང་དམ་ཚིག་གི་ཕྱག་རྒྱ་བཅའོ། །མེ་ཏོག་གི་ཕྲེང་བ་བླངས་ལ། ཡི་གེ་བཞི་པའི་སྔགས་སྟོང་ཕྲག་བརྒྱད་བཟླས་པར་བྱའོ། །དེ་ནས་དཀྱིལ་འཁོར་ལ་ལན་གསུམ་བསྐོར་ཏེ། བསྐོར་བ་གསུམ་བྱས་ལ་དཀྱིལ་འཁོར་གྱི་བདག་པོའི་མདུན་དུ་གཞག་པར་བྱའོ། །ཡང་བུམ་པ་གཉིས་པ་བླངས་ལ། བརྒྱ་ཕྲག་བརྒྱད་བཟླས་པར་བྱའོ། །བུམ་པ་གཉིས་པའི་ཆུས་བདག་ཉིད་དང་སློབ་མའི་མགོ་ལ་གཏོར་བར་བྱའོ། །ཁྲོ་བོ་ཆེན་པོའི་སྔགས་དང་ཕྱག་རྒྱ་བཅིང་ཞིང་བསྟིམས་ལ། དབང་ཕྱུག་ཆེན་པོའི་མཚན་མ་ཅན་གྱི་བུ་པ་ལ་སོགས་པ་བླངས་ཏེ། རང་རང་གི་སྔགས་ཀྱིས་བརྒྱ་ཕྲག་བརྒྱད་བཟླས་ཏེ། དཀྱིལ་འཁོར་གྱི་ཕྱི་རོལ་རང་རང་གི་གནས་སུ་གཞག་པར་བྱའོ། །ཆུ་ཡིས་གང་པོས། །དེ་ནས་རྣམ་པར་རྒྱལ་བའི་བུམ་པ་དང༌། གཞན་ལ་འབྱོར་ན། དབང་ཕྱུར་ཆེན་པོ་དང༌། བརྒྱ་བྱིན་དང༌། ཉི་མ་དང༌། མེ་ལྷ་རྣམས་ལ་བུམ་པ་གཅིག་གོ །པདྨའི་དཔལ་མོ་དང༌། རིན་ཆེན་དཔལ་མོ་དང༌། རིན་ཆེན་དཔལ་མོ་ཆེན་མོ་དང༌། དེའི་རིམ་པས་དཔང་བསྐུར་
བར་འགྱུར་རོ། །བུམ་པ་བཅུ་ལས་ཉུང་བ་ནི་མ་ཡིན་ལ། བུམ་པ་བཅུ་རྣམ་པར་གང་བས་དབང་བསྐུར་བར་འགྱུར་རོ། །དེ་ལྟར་དཀྱིལ་འཁོར་དེ་མངོན་སུམ་དུ་གནས་པ་ལ་མཆོད་ཅིང༌། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་པྲ་ཎ་མེ་ན་བཛྲ་བནད་ནཱཾ་ཀ་རོ་མཱི་ཏི་པྲ་ཎ་མ། སྔོན་དུ་བཤད་པའི་སྐྱབས་དཀོན་མཆོག་གསུམ་ལ་སྐྱབས་སུ་འགྲོ་བ་བྱ་ཞིང་སྡོམ་པ་ཡང་གཟུང་བར་བྱའོ། །བྱང་ཆུབ་སེམས་ནི་བསྐྱེད་བར་བགྱི། །སེམས་ཅན་མ་ལུས་བསྒྲལ་བའི་ཕྱིར། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ།། ཚུལ་ཁྲིམས་སྡོམ་པ་རྣམ་པ་གསུམ། །དགེ་བའི་ཆོས་ནི་སྡུད་པ་དང༌། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་ཀྱང་ནི་བརྟན་པར་གཟུང༌། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །མཆོག་ཏུ་གུས་པས་གཟུང་བར་བགྱི། །སྡོམ་པ་སངས་རྒྱས་རྣལ་འབྱོར་ཅན། །རྡོ་རྗེ་དྲིལ་བུའི་ཕྱག་རྒྱ་ཡང༌། །བདག་གིས་དེ་ཉིད་གཟུང་བར་བགྱི། །རྡོ་རྗེ་ཆེན་པོའི་རིགས་དག་ལ། །སྦྱིན་པ་རྣམ་བཞི་སོ་སོར་སྦྱིན། །ཉིན་རེ་བཞིན་ལའང་དུས་དྲུག་ཏུ། །རིན་ཆེན་ཆེན་པོའི་རིགས་མཆོག་སྦྱོར། །ཏིང་འཛིན་རབ་ཏུ་དགའ་བ་ཡིས། །ཆོས་རྣམས་ཐམས་ཅད་གཟུང་བར་བགྱི། །ཕྱི་ནང་གསང་བའི་ཐེག་པ་གསུམ། །པདྨ་ཆེན་པོའི་རིགས་དག་པ། །བྱང་ཆུབ་ཆེན་པོའི་རིགས་བྱུང་བ། །སྡོམ་པ་ཐམས་ཅད་ལྡན་པར་ནི། །དེ་ཉིད་བདག་གིས་གཟུང་བར་བགྱི། །མཆོད་པའི་ལས་རྣམས་ཅི་འབྱོར་པ། །ལས་ཀྱི་རིགས་ནི་ཆེན་པོ་ལ། །མཆོག་ཏུ་བསྐྱེད་པར་བགྱི་བ་ནི། །བྱང་ཆུབ་སེམས་ནི་རྗེས་བསྒྲལ་བ། །སྡོམ་པ་གཟུང་བར་བགྱི་བ་ནི། །སེམས་ཅན་ཀུན་གྱི་དོན་གྱི་ཕྱིར། །མ་བསྒྲལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་གྲོལ་བར་བགྱི།། དབུགས་མ་ཕྱིན་པ་དབུགས་དབྱུང་ཞིང༌། །སེམས་ཅན་མྱ་ངན་འདས་ལ་འགོད། །དེ་ནས་ཉེས་པ་འཇོམས་པར་བྱེད་པའི་སྔགས་བརྗོད་ཅིང༌། གོ་ཆ་བགོས་ཏེ། ཧཱུཾ་བཟླས་ཤིང་གོས་སྔོན་པོ་གོན་ཏེ། ཕྲག་པ་ཕུད་དེ་གཙུག་ཏོར་དང་ལྡན་པས། མེ་ཏོག་གི་ཕྲེང་བའི་དོ་ཤལ་
ལ། དྲི་བཟང་པོས་བྱུགས་ཤིང༌། རྒྱན་ཐམས་ཅད་ཀྱིས་བརྒྱན་ཏེ། སྒོ་སྲུང་གི་སྔགས་བཟླས་ཤིང༌། །གོས་སྔོན་པོས་སྟོད་བཅིངས་ལ། ཕྱི་རུལ་དུ་གནས་པ་ལ་བུམ་པའི་ཆུས་གདབ་པར་བྱའོ། །ཁྲོ་བོའི་ཕྱག་རྒྱ་བཅིངས་ལ། སློབ་མ་ལ་གོ་ཆ་བསྐོན་ཅིང་སྲུང་བ་བྱས་ལ། སློབ་དཔོན་གྱིས་འདི་སྐད་ཅེས་བརྗོད་པར་བྱས་ཏེ། སེམས་ཅན་ཀུན་གྱི་དོན་གྱི་ཕྱིར། །དེ་མ་ཐག་ཏུ་དངོས་གྲུབ་ཐོབ། །ཁྲོ་བའི་རྒྱལ་པོ་གྲུབ་པའི་བདག །དམ་ཚིག་ལྷ་རྣམས་བརྟན་པར་བྱེད། །དེ་ནས་ཁྲོ་བོའི་ཕྱག་རྒྱ་བཅིངས་ལ། བཛྲ་ཀྲོ་དྷ་ཧཱུཾ་ཧཱུཾ་ཕཊ་ཕཊ། དེ་སྐད་ཅེས་བརྗོད་ལ། ནང་དུ་གཞུག་ཅིང་བརྗོད་པར་བྱ་བ་ནི། རྡོ་རྗེ་ཁྲོ་བོ་རང་གིས་དབབ་པ་བྱ་སྟེ། ཏིཥྚྷ་བཛྲ། དེ་ལ་སོགས་པའི་སྔགས་ཀྱིས་རྣམ་པར་གྲོལ་བའི་ཕྱག་རྒྱ་བསྟན་པར་བྱས་ཏེ། ཕྲེང་བ་བཞག་ཅིང་གདོད་པ་དཀྲོལ་ལ། དེ་ནས་ཆུའི་དབང་དམ་ཚིག་གསུམ་སྦྱིན་ཞིང༌། བཅོམ་ལྡན་འདས་ཐམས་ཅད་སློབ་དཔོན་གྱི་གཟུགས་ཀྱི་གནས་པར། སྔོན་དུ་བརྗོད་པའི་རིམ་པས་བསམ་པར་བྱའོ། །དེ་ནས་དམ་ཚིག་གསུམ་གྱི་དོན་དུ་དབང་རྫས་སྦྱིན་ཞིང༌། ཚིགས་སུ་བཅད་པ་ལྔས་བསྟོད་ལ། ཡི་གེ་བཞི་པའི་སྔགས་བརྗོད་ཅིང་ཕྱག་རྒྱ་བས་ཏེ། ལུང་བསྟན་པ་བཟུང་ཞིང་ཡང་རྡོ་རྗེའི་མཆོག་སྦྱིན་པར་བྱེད་པ་རྡོ་རྗེ་ཆེ་གེ་མོ་ཞེས་བྱ་བ་ཁྱོད། ཆེ་གེ་མོ་ཞེས་བྱ་བའི་མིང་གིས། དཀྱིལ་འཁོར་བསྒོས་ན་རིམ་པ་འདིས། བཅོམ་ལྡན་འདས་ཀྱི་ཕྱག་རྒྱ་དང་སྔགས་བཟླས་པས། ཨིའི་དབང་ཕྱུག་དེའི་གནས་སུ་ཁྲོ་བོའི་རྡོ་རྗེ་རང་གིས་གཟུང་ཞིང། ཁྲོ་བོའི་ང་རྒྱལ་བྱས་ལ། དེ་ནས་རྡོ་རྗེ་ཆེན་པོ་གཟུང་ངོ༌། །ཁྲོ་བོའི་བདག་པོ་ཆེན་པོའི་ང་རྒྱལ་དུ་གནས་པས། དེ་ནས་སྔོན་ཁྲོ་བོའི་དབང་པོ་འགུགས་པའི་ཕྱག་རྒྱ་བཤད་པ། བཅོམ་ལྡན་འདས་ཀྱི་དཀྱིལ་འཁོར་ལ་རབ་ཏུ་བསྟོད་ཅིང༌། སྔོན་གྱི་ཉེས་པ་འཇོམས་པར་བྱེད་པའི་སྔགས་བཟླས་ཏེ། ཕྱོགས་བཅིང་བ་དང༌། རྩིག་པ་དང༌། ར་བ་དང་གུར་བསམས་ལ། མཆོད་ཡོན་དང་ཞབས་བསིལ་དབུལ་ཞིང༌། དམ་ཚིག་ལ་གནས་པས། ཛཿཧཱུཾ་བཾ་ཧོཿ་ས་མ་ཡ་སྟྭཾ། དེ་སྐད་ཅེས་སྒྲུབ་པ་པོས་བརྗོད་ལ། དེ་ལྷ་ཆེན་པོ་ལ་སོགས་
པ་རྣམས་རང་རང་གི་དམ་ཚིག་ལ་གནས་པའི་ལྷའི་དཀྱིལ་འཁོར་བསྒོམ་པར་བྱའོ། །སྒྲུབ་ཐབས་དང་ཕྱག་རྒྱ་དང་དབང་ཡོངས་སུ་རྫོགས་པར་བྱས་ལ། ཉེས་པ་འཇོམས་པར་བྱེད་པའི་སྔགས་བརྗོད་ཅིང༌། འདུག་པ་ལ་སོགས་པས་ཡང་དག་པར་མཆོད་ཅིང། མཆོད་ཡོན་ཡང་སྦྱིན་ལ། གོས་ལ་སོགས་པས་ཡང་དག་པར་མཆོད་ལ། དཔག་ཏུ་མེད་པའི་བ་ཝང་དང༌། རྒྱལ་མཚན་མང་པོས་མཆོད་ཅིང༌། ཨོཾ་དང་ཧཱུཾ་བརྗོད་ཅིང༌། སྤྲོས་ཅིང་བསྡུས་པས། དེ་ནས་མེ་ཏོག་དང་སྤོས་དང་བདུག་པ་དང་མར་མེ་དང༌། ཞལ་ཟས་རྣམས་ཀྱིས་མཆོད་པར་བྱས་ཏེ། ཨོཾ་བཛྲ་གནྡྷེ་ཧཱུཾ། དྲིའི་ཕྱག་རྒྱ་བཅས་ལ། ཇི་ལྟར་འབྱོར་པའི་དྲིས་མཆོད་པར་བྱའོ། །དེ་བཞིན་དུ། ཨོཾ་བཛྲ་པུཥྤེ་ཧཱུཾ། མེ་ཏོག་གི་ཕྱག་རྒྱའོ། །ཨོཾ་བཛྲ་དྷཱུ་པེ་ཧཱུཾ། འདི་ནི་བདུག་སྤོས་ཀྱི་ཕྱག་རྒྱས་སོ། །ཨོཾ་བཛྲ་ཨཱ་ལོ་ཀེ་ཧཱུཾ། མར་མེའི་ཕྱག་རྒྱས་སོ། །དེ་དག་གིས་དཔག་ཏུ་མེད་པའི་མཚང་པའི་སྤྲིན་རྣམས་སྒྲོས་ཤིང༌། བཟའ་བ་དང༌། བཅའ་བ་དང༌། ལོངས་སྤྱོད་པ་དང༌། བལྡག་པ་དང༌། གཞིབ་བ་དང༌། བཏུང་བ་རྣམས་ཀྱིས་ཀྱང་མཆོད་པར་བྱའོ། །ཨོཾ་ཨ་ཀཱ་རོ་མུ་ཁཾ་སརྦ་དྷ་རྨཱཎཱཾ་ཨཱདྱ་ནུཏྤནྣ་ཊྭཱཊ། འདིས་རྡོ་རྗེ་དྲི་དང༌། རལ་གྲིའི་ཕྱག་རྒྱས་དབུལ་བར་བྱའོ། །རྡོ་རྗེ་ཁྲུ་ཚུར་གྱིས་སོར་མོ་རྣམས་བསྐུལ་ཞིང་རོལ་མོའི་ཕྱག་རྒྱས་ཡི་གེ་ཧཱུཾ་བརྗོད་ཅིང་དབུལ་བར་བྱའོ། །རོལ་མོ་དང༌། གར་དང༌། རྒྱན་དང༌། ལག་གདུབ་དང༌། སོར་གདུབ་དང༌། རྣ་རྒྱན་དང་ཅོད་པན་ལ་སོགས་པ། ཨོཾ་བརྗོད་ཅིང་དབུལ་བར་བྱའོ། །གླང་པོ་ཆེ་དང༌། བ་གླང་དང༌། དེ་བཞིན་རྟ་བབས་དང༌། གོས་བཟང་པོ་དང༌། དྲིལ་བུ་དང༌། རྔ་ཡབ་དབུལ་བར་བྱའོ། །ཨོཾ་སརྦ་བིད་པཱ་ར་ཨཱ་བརྟ་ཨཱ་བརྟ་ཧོ། །དེ་ནས་རྡོ་རྗེ་སོར་མོ་རྣམས་སྤྱི་བོར་བཞག་ལ། སྔོན་གྱི་ཨོཾ་བརྗོད་ཅིང་དབུལ་བར་བྱའོ། །བྱང་ཕྱོགས་སུ་ལས་ཀྱིར་དོ་རྗེ་སློབ་དཔོན་གནས་ནས། དེ་ནས་ཁ་བཤལ་ལ། དཀྱིལ་འཁོར་གྱི་སྔོན་དུ་འདུག་སྟེ། ཡི་གེ་བཞི་པའི་སྔགས་སྟོང་ཕྲག་གཅིག་བཟླས་ཤིང༌། དེ་བཞིན་དུ་དཀྱིལ་འཁོར་གྱི་ལྷ་རྣམས་ཀྱིས་ཀྱང་བཟླས་པར་
བྱའོ། །དཀྱིལ་འཁོར་གྱི་ཤར་ཕྱོགས་སུ་གདོང་ཕྱོགས་ནས། ལས་ཐམས་ཅད་པའི་ཐབ་ཏུ་དཀྱིལ་འཁོར་གྱི་ལྷའི་རྣལ་འབྱོར་དང་ལྡན་པས། མེ་ཏོག་དང་མར་མེ་རྣམས་ཡི་གེ་བཞི་པའི་སྔགས་ཀྱིས་བརྒྱ་རྩ་བརྒྱད་སྦྱིན་སྲེག་བྱ་སྟེ། དབང་ཕྱུག་ཆེན་པོས་གཙོ་བྱས་པའི་དཀྱིལ་འཁོར་གྱི་ལྷ་ཐམས་ཅད་ལ་སྔགས་བདུན་བདུན་གྱིས་དབུལ་ལོ། །དེ་ནས་མེའི་ཐབ་ཏུ། རྡོ་རྗེ་འཛིན་པ་ཆེན་པོས་མེ་ཏོག་དང༌། སྤོས་ལ་སོགས་པ་དཀྱིལ་འཁོར་གྱི་ལྷ་ལ་དབུལ་ཞིང༌། དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ། འདི་སྐད་ཅེས་བརྗོད་པར་བྱའོ། །བདག་ནི་སྡོམ་པ་ཀུན་དང་ལྡན། །དམ་ཚིག་མགོན་པོས་རྗེས་སུ་གཟུང༌། །ཕྱོགས་རྣམས་ཀུན་ན་བཞུགས་པ་རྣམས། །བདག་མིང་འདི་ཞེས་བགྱི་བ་ལ། །དབང་པོར་གནས་པར་མཛད་དུ་གསོལ། །གསང་བའི་དཀྱིལ་འཁོར་ཆེན་པོ་འདིར། །སངས་རྒྱས་གར་མཛད་སྡོམ་པ་ལ། །འཁོར་ལོ་རབ་ཏུ་བསྐོར་བར་མཛད། །རྣམ་པར་གྲོལ་བའི་གྲོང་ཁྱེར་དུ། །མགོན་པོ་བདག་ནི་འཇུག་པར་འཚལ། །སློབ་དཔོན་ཆེན་པོ་ཁྱེད་ཀྱིས་ནི། །གསང་བ་ཆེན་པོའི་དཀྱིལ་འཁོར་དུ། །བདག་ནི་སྐལ་བར་ལྡན་པར་མཛོད། །དབང་བསྐུར་ཆེན་པོ་སྩལ་དུ་གསོལ། །སློབ་དཔོན་བདག་ལ་སྦྱིན་པར་མཛོད། །མཚན་རྣམས་ཀུན་དང་ལྡན་པ་པོ། །དབང་གི་རྗེས་སུ་གཟུང་དུ་གསོལ། །སངས་རྒྱས་སྐུ་བདག་ཡིད་དགའ་བ། །གཏེར་མཛོད་སློབ་དཔོན་ཆེན་པོ་ཁྱོད། །དབང་བསྐུར་ཆེན་པོ་སྩལ་དུ་གསོལ། །སེམས་ཅན་ཀུན་གྱི་དོན་གྱི་ཕྱིར། །བདག་ཀྱང་སློབ་དཔོན་འགྱུར་བར་མཛོད། །དེ་སྐད་དུ་སློབ་དཔོན་ལ་མཎྜལ་ཕུལ་ཏེ་ཞུ་བར་བྱའོ། །བདག་ནི་སློབ་དཔོན་འདི་ཞེས་པས། །བྱང་ཆུབ་སེམས་ཀྱིས་གཟུང་བར་བྱ། །གསང་བའི་དཀྱིལ་འཁོར་འདོད་པ་ལ། །དཀྱིལ་འཁོར་འདིར་ནི་བསྟན་པར་བྱ། །དེ་ནས་སློབ་དཔོན་གྱིས་དྲི་བར་བྱ། སྐྱེས་བུ་ཆེན་པོ་ཁྱོད་འདོད་པ། །གསང་བའི་རིགས་ནི་དག་པས་ཏེ། །དག་པ་བཞད་མཛད་ཟབ་མོ་གཟུང༌། དེ་ནས་འདི་སྐད་ཅེས་བརྗོད་པར་བྱའོ། །སློབ་མ་བདག་ནི་འདོད་དོ་ཞེས་བརྗོད་ལ། །དེ་ནས་དཔོན་དམ་ཚིག་དང་སྡོམ་པ་
དང་ལྡན་པས། ཇི་ལྟར་བཀའ་སྩལ་པ་བཞིན་དུ་བདག་གིས་བགྱིས་ཏེ། དེ་ནས་བྱང་ཆུབ་ཀྱི་སེམས་བསྐྱེད་པ་དང༌། འགྲོ་བ་དང་བསྟན་པ་ཐམས་ཅད་དུ། །ཡང་དབང་བསྐུར་བར་འདོད་ཀྱིས་སྡོམ་པ་མི་བཟུང་ངོ་ཞེ་ན། དེ་ལ་དཀྱིལ་འཁོར་ཀྱང་བསྟན་པར་མི་བྱ་ཞིང་དབབ་པར་མི་བྱའོ། །འགའ་ཞིག་སྡོམ་པ་དང་དམ་ཚིག་གཟུང་བར་འདོད་པ་ལ་ནི། སློབ་དཔོན་གྱིས་རྗེས་སུ་བཟུང་ཞིང༌། །དབང་སྦྱིན་པར་བྱའོ། །དེ་ནས་ཉེས་པ་འཇོམས་པར་བྱེད་པའི་སྔགས་བརྗོད་དེ། ཨོཾ་སརྦ་ཡོ་ག་ཙིཏྟ་ཨུཏ་པཱ་ད་ཡཱ་མི། སྔགས་འདི་བརྗོད་ལ་བྱང་ཆུབ་ཀྱི་སེམས་དང་ལྡན་པར་བྱའོ། །སློབ་མའི་སྙིང་གར་རྡོ་རྗེ་རབ་ཏུ་གནས་པ་བྱས་ལ། ཨོཾ་སུ་ར་ཏ་ས་མ་ཡ་སཏྭཾ་ཧོ། །བཛྲ་སིདྡྷྱ་ཡ་ཐཱ་སུ་ཁཾ། དེ་རིང་ཁྱོད་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབ་པར་འགྱུར་ཏེ། དེ་རིང་ཁྱོད་དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་མཐོང་བར་འགྱུར་གྱིས། ཁྱོད་ཀྱིས་དཀྱིལ་འཁོར་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ། གུས་པ་དང་བྲལ་བ་རྣམས་ལ་ཡང་མ་ཡིན་ནོ། །དེ་ནས་སློབ་མས་ཡོན་ཕུལ་ལ། ཁྲོ་བོའི་རྒྱལ་པོས་བྱིན་གྱིས་བརླབ་པར་བྱའོ། །དེའི་རྗེས་སུ་བརྟེན་པར་གནས་པ་ལ། བུམ་པའི་ནང་ནས་ཆུ་བླངས་པས་གཏོར་ཞིང་མགོ་ཐོག་ཏུ་བཞག་པས་བསྲུང་སྟེ། ཁྲོ་བོའི་རྒྱལ་པོའི་ཕྱག་རྒྱས་གོ་ཆ་བསྐོན་ལ། མེ་ཏོག་སྔོན་པོའི་ཐོད་བཅིང་ཞིང༌། དཀྱིལ་འཁོར་བསྟན་པར་བྱའོ།། ཨོཾ་བཛྲ་དྷ་རེ། དེ་ལས་གསང་བའི་སྔགས་ཀྱིས་དགུག་པར་བྱ་སྟེ། འདི་སྐད་ཅེས་བརྗོད་པར་བྱའོ། །མ་ཧཱ་སུ་ར་ཏ་སུ་དྲི་ཐ་དུ་ཏོ་སྭཱཧཱ། བཛྲ་ས་ཏྭཱ་ཨདྱ་སི་དྱ་མཱཾ། ཡང་འདི་སྐད་ཅེས་བརྗོད་པར་བྱ་སྟེ། །དེ་རིང་སངས་རྒྱས་རིགས་སུ་སྐྱེས། །དེ་རིང་རྡོ་རྗེའི་ཡེ་ཤེས་ཐོབ། །ཡེ་ཤེས་དེ་ཡིས་དེ་རིང་ཁྱོད། །དེ་བཞིན་གཤེགས་པ་ཐམས་ཅད་ཀྱིས། །དངོས་གྲུབ་ཀྱང་ནི་ཐོབ་འགྱུར་ན། །གྲུབ་པ་གཞན་ལྟ་སྨོས་ཅི་དགོས། །དཀྱིལ་འཁོར་དམ་པ་ཁྱེད་ཀྱིས་མཐོང༌། །མ་མཐོང་བ་ལ་སྨྲ་མི་བྱ། །གལ་ཏེ་ཁྱོད་ཀྱིས་འདི་སྨྲས་ན།།
དམ་ཚིག་རྣམ་པར་འགྱུར་བ་ཡིན། །དབབ་པའི་ཕྱག་རྒྱ་བཅས་ལ། །དེ་སྐད་ཅེས་སློབ་མའི་མགོ་ཐོག་ཏུ་རྡོ་རྗེ་བཞག་ལ་སྨྲ་བར་བྱའོ། །འདི་ནི་དམ་ཚིག་རྡོ་རྗེ་སྟེ། །ཁྱོད་ཀྱིས་གལ་ཏེ་འདི་སྨྲས་ན། །ངེས་པར་མགོ་བོ་འགས་པར་འགྱུར། །དེ་ནས་དམ་ཚིག་གི་ཆུ་སྦྱིན་པར་བྱས་ཏེ། སྙིང་པོའི་སྔགས་བཟླས་སོ། །སློབ་མས་འཐུང་བའི་དུས་སུ་འདི་སྐད་བརྗོད་པར་བྱ་སྟེ། དེ་རིང་རྡོ་རྗེ་སེམས་དཔའ་ནི། །ཁྱོད་ཀྱི་སྙིང་ལ་ཡང་དག་གནས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཨོཾ་ཏིཥྛ་སིདྡྷི་ཧཱུཾ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་རླག་པར་བྱེད། དམ་ཚིག་བསྲུངས་ན་གྲུབ་པར་གྱུར། །རྡོ་རྗེ་བདུད་རྩིའི་ཆུ་འཐུང་ཅིག །རྡོ་རྗེ་དྲིལ་བུའི་ཕྱག་རྒྱ་སྤྱི་བོར་བཞག་ལ། གུས་པ་དང་ལྡན་པ་དང་མི་ལྡན་པའི་བསམ་པ་བརྟགས་ལ། སློབ་མ་ལ་འདི་སྐད་ཅེས་བརྗོད་པར་བྱ་སྟེ། དེ་རིང་ཕན་ཆེད་ཁྱོད་ཀྱི་རྡོ་རྗེ་འཛིན་པ་ང་ཡིན་ཏེ། ངས་ཇི་སྐད་ཅེས་པ་དེ་ཁྱོད་ཀྱིས་བྱ་དགོས་སོ། །དེ་ལྟ་མ་ཡིན་ན་ཁྱོད་ཡིད་མི་བདེ་བ་ཆེན་པོ་དང་བཅས་ནས་ཚེའི་དུས་བྱས་ཏེ། དམྱལ་བར་འཇུག་པར་གྱུར་ཏ་རེ། དེ་ནས་རང་གི་སྙིང་གར་ཡི་གེ་ཨ་ལས་འོད་ཟེར་དམར་པོ་འཕྲོས་པས། སྒོ་དབྱེ་བའི་ཕྱག་རྒྱ་བཅས་ཏེ་སློབ་མའི་སྙིང་གའི་རྡོ་རྗེ་ལ་ཞུགས་ནས། ལུས་ཐམས་ཅད་ཁེངས་པར་བསམ་ཞིང༌། དེ་ནས་འདི་སྐད་བརྗོད་པར་བྱ་སྟེ། དེ་བཞིན་གཤེགས་པ་ཐམས་ཀྱིས་བྱིན་གྱི་རླབས་ཀྱིས། རྡོ་རྗེ་ཁྲོ་བོ་བདག་ལ་དབབ་པར་མཛད་དུ་གསོལ། །དེ་ནས་དབབ་པའི་ཕྱག་རྒྱ་སྙིང་གར་བཅས་ལ། འདི་སྐད་ཅེས་བརྗོད་པར་བྱ་སྟེ། །འདི་ལྟར་དམ་ཚིག་རྡོ་རྗེ་འདི། །རྡོ་རྗེ་སེམས་དཔའ་དྲན་པར་བྱ། །ངེས་པར་ཁྱོད་ལ་འབབ་པར་འགྱུར། །རྡོ་རྗེ་ཡེ་ཤེས་རྗེས་སུ་སྒྲོལ། །ཨོཾ་པྲ་བེ་ཤ་བཛྲ་ཀྲོ་དྷ་ཧཱུཾ་ཧཱུཾ་ཧཱུཾ་ཨ། ཇི་ལྟར་ནམ་མཁའ་ལས་ཁྲོ་བོའི་དབང་པོས་འབེབས་པར་བསམ་ཞིང་སྔགས་དེ་བརྗོད་པར་བྱའོ། །དེས་ཀྱང་འབབ་པར་མ་གྱུར་ན། །དེ་ནས་ཁྲོ་བོ་དབབ་པའི་ཕྱག་རྒྱ་བཅས་ལ། སློབ་དཔོན་གཡོན་བརྐྱང་བས་གནས་ལ། རྡོ་རྗེ་འཛིན་རྣམ་པར་སྣང་མཛད་ཀྱི་གཟུགས་སུ་བལྟས་ལ།
སློབ་མའི་སྤྱི་བོར་གནས་པར་བསམས་ལ། འོད་ཟེར་གྱིས་ལུས་གང་བར་བསམ་ཞིང༌། རླུང་གིས་རབ་ཏུ་གཡོས་པ་ལ་དམིགས་པ་གཏད་དེ། ཧཱུཾ་གིས་བྱིན་གྱིས་བརླབ་པར་བྱའོ། །རྡོ་རྗེ་སློབ་དཔོན་རང་ཉིད་མི་བསྐྱོད་པའི་གཟུགས་སུ་གནས་པས། ཧཱུཾ་ཏྲྰཾཿ་ཧྲཱིཿཨཿ། ས་བོན་འདི་རྣམས་འོད་ཟེར་འཕྲོས་པ། སློབ་མའི་ཁར་འཇུག་པར་བསམ་པར་བྱའོ། །ཨོཾ་པྲ་བེ་ཤ་ཀྲོ་དྷ་ཧཱུཾ་ཧཱུཾ་ཧཱུཾ་ཨཿཛྭ་ལཱ་མ་ལ་ཀུ་ལ་བ་ཁ་ན་བཛྲ་ཨ། དེས་ཀྱང་མི་འབབ་ན། སློབ་མ་སྡིག་པ་མང་པོ་བྱས་པས། སྡིག་པ་འདྲལ་བའི་ཕྱག་རྒྱ་བཅས་ལ། །སྡིག་པ་གཞོམ་པར་བྱས་ཏེ། བཅོམ་ལྡན་འདས་རྡོ་རྗེ་འཛིན་པ་སྐུ་མདོག་དམར་པོ། །འོད་ཟེར་དམར་པོ་ཀུན་ནས་འབར་བའི་ཕྲེང་བས་བསྐོར་བ་བསམ་པར་བྱས་ལ། ཧཱུཾ་ཨཱཿསྔགྶ་འདི་མང་དུ་བཟླས་པར་བྱའོ། །དེས་ཀྱང་འབབ་པར་མ་གྱུར་ཀྱང༌། །དབང་བསྐུར་བ་ནི་སྦྱིན་པར་བྱའོ། །དེའི་ཚེ་འབབ་པར་འགྱུར་ན་མངོན་པར་ཤེས་པ་ལྔ་དང་ལྡན་པར་འགྱུར་རོ། །དེའི་བབས་པར་གྱུར་ན། ལྕེ་ལ་རྡོ་རྗེ་བསམས་ལ་འདི་སྐད་ཅེས་བརྗོད་པར་བྱ་སྟེ། འདས་པ་དང༌། མ་འོངས་པ་དང༌། དེ་ལྟར་བྱུང་བ་ཐམས་ཅད་སྨྲོས་ཤིག་ཅེས་བརྗོད་པས་སྨྲ་བར་འགྱུར་རོ། །དེ་ནས་སྙིང་གར་རྣམ་པར་གྲོལ་བའི་ཕྱག་རྒྱ་བཅས་ལ། ཏིཥྛ་བཛྲ་དྲྀ་ཌྷོ་མེ་བྷ་བ་ཤཱ་ཤྭ་ཏོ་མེ་བྷ་བ། ཧྲྀ་ད་ཡ་མེ་ཨ་དྷི་ཏིཥྛ་སརྦ་སིདྡྷི་མྨེ་པྲ་ཡཙྪ་ཧཱུཾ་ཧ་ཧ་ཧ་ཧ་ཧོཿ་འདིས་ཡེ་ཤེས་བརྟན་པར་བྱས་ལ། དེ་ནས་ཡི་གེ་ཏྲཱཾ་གིས་བྱིན་གྱིས་བརླབས་ལ། དཀྱིལ་འཁོར་བསྟན་པར་བྱ་སྟེ། པྲ་ཏཱིཙྪ་བཛྲ་ཧོ། །དེ་ནས་སློབ་མའི་མགོ་བོ་ལ་མེ་ཏོག་ཕྲེང་བ་བཅིངས་ཤིང༌། སེམས་ཅན་སྟོབས་ཆེན་ཁྱོད་ཀྱིས་ནི། །འདི་ཉིད་ཡང་དག་གཟུང་བར་བྱ། །དེ་ནས་གདོང་གཡོགས་བཀྲོལ་ཞིང༌། །དེ་རིང་རྡོ་རྗེ་སེམས་དཔའ་རང༌། །ཁྱོད་ཀྱི་མིག་ནི་འབྱེད་པར་བརྩོན། རྡོ་རྗེའི་མིག་ནི་བླ་ན་མེད། །ཕྱེ་བས་མཆོག་ཏུ་གྱུར་པ་ཡིན། ཧེ་བཛྲ་པ་ཤྱ། དེ་ནས་ཡི་གེ་ཨཾ་དང་ཧཱུཾ་གིས་མིག་གཉིས་བྱིན་གྱིས་བརླབས་ལ། པདྨ་ཝ་ཏིའི་ཏིང་ངེ་འཛིན་གྱིས་དཀྱིལ་འཁོར་གྱི་འཁོར་ལོ་བསྟན་པར་བྱ་སྟེ། དེ་ནས་གསུང་གི་དཀྱིལ་འཁོར་གྱི་ཕྱེད་ཀྱི་ཚད་ཀྱིས་སྙིང་
པོའི་དཀྱིལ་འཁོར་གྲུ་བཞི་བ་སྒོ་རྩིག་པ་ཁ་དོག་ལྔ་དང་ལྡན་པ། ལྟེ་བ་ལ་པདྨ་འདབ་མ་བརྒྱད་པ་འོད་ཟེར་གྱི་ཕྲེང་བས་ཀུན་ནས་བསྐོར་བ། རྩ་བའི་དཀྱིལ་འཁོར་གྱི་ལྟེ་བ་ལ་གླང་པོ་ཆེའི་རྒྱལ་པོའི་སྟེང་དུ་འབྱུང་པོ་གཞན་གྱིས་མི་ཐུབ་པའི་སྟེང་ན་ཉེས་པ་ཐམས་ཅད་འཇོམས་པར་བྱེད་པའི་ཁྲོ་བོའི་རྒྱལ་པོ་ལ་སོགས་པའི་དཀྱིལ་འཁོར་གྱི་ལྷ་བལྟས་ལ། དེ་ནས་སློབ་དཔོན་གྱི་དབང་བསྐུར་བའི་དོན་དུ་སློབ་མ་ལ་བཀྲ་ཤིས་ལ་སོགས་པ་གསུངས་ཏེ། བཀྲ་ཤིས་ལ་སོགས་པ་ཡང་རྡོ་རྗེ་འཛིན་པས་བྱ་སྟེ། །དམ་ཚིག་གི་ཕྱག་རྒྱ་དང༌། སྔགས་ཀྱིས་གནས་དྲུག་ཏུ་ཕྱིན་གྱིས་བརླབས་པར་བྱས་ཏེ། རོལ་བའི་འདུག་སྟངས་ཀྱིས་གནས་པ་ལ། གཞན་གྱིས་མི་ཐུབ་པའི་འབྱུང་པོ་གཞན་རྣམས་ཀྱིས་ཀྱང་ཡི་གེ་ཧཱུཾ་གི་སྒྲ་སྒྲོགས་ཤིང༌། གདུགས་དང་རྒྱལ་མཚན་དཀར་པོ་དང༌། གླིང་བུ་དང༌། ཨོཾ་བཟླས་ཤིང་ཁ་དོག་སྣ་ཚོགས་བའི་རྒྱན་དང༌། རྔ་ཡབ་དང། དེ་དག་ལ་སོགས་པ་དཔག་ཏུ་མེད་པའི་ཚོགས་པ་དང༌། མེ་ཏོག་ལ་སོགས་པས་ཀྱང་མཆོད་དེ། དུང་དང་རྔ་རིངས་དང༌། རྔ་ཟླུམ་དང༌། རྔ་ཆུང་དང༌། དེ་དག་ལ་སོགས་པའི་རོལ་མོ་དཔག་ཏུ་མེད་པ་དང༌། གར་དང༌། གླུ་དང༌། བཀྲ་ཤིས་ཀྱི་ཚིགས་སུ་བཅད་པ་བརྗོད་ཅིང༌། བསྟོད་པའི་ཚོགས་ཀྱིས་ཀྱང་བསྟོད་ལ། སྒོ་སྐྱོང་གི་འགྲམ་ནས་བུམ་པ་བླངས་ལ། བཅོམ་ལྡན་འདས་ཀྱིས་བུམ་པས་སྤྱི་བོར་དབང་བསྐུར་ཞིང༌། ཆུས་ཀྱང་གཏོར་ལ་དབང་བསྐུར་བར་བྱའོ། །ཨོཾ་བྷཱུཿ་ཤྲཱི་སིདྷ་དྷཱ་ཛ་ཤཾ་དྷ་ནི་ནི་ཧྲཱིཿ་བཛྲ་ཨ་བྷི་ཥིཉྩ། དེ་ནས་འགྲོ་བ་ལ། ཧཱུཾ་བཛྲ་ཕཊ། བཛྲ་ཨ་བྷི་ཥིཉྩ་ཨ། བཅོམ་ལྡན་འདས་ཀྱིས་རྣམ་པར་རྒྱལ་བའི་ཆུས་ཀྱང་དབང་བསྐུར་བར་བྱའོ། །ཧཱུཾ་བཛྲ་ཨ་དྷི་པ་ཏི་སྟམ་ཨ་བྷི་ཥིཉྩ་མི་དྲྀ་ཌྷོ་མེ་བྷ་བ་ཛཿཧཱུཾ་བཾ་ཧོཿ་ཧཱུཾ་ཕཊ། འདིར་ཇི་ལྟར་དབང་བསྐུར་བས་ཆུས་དབང་བསྐུར་བར་འགྱུར་རོ། །བུམ་པའི་དབང་བསྐུར་བ་འདི་ནི། དེ་ནས་རིན་པོ་ཆེ་ལ་སོགས་པའི་རྒྱན་གྱིས་བརྒྱན་ལ། ཕྱག་རྒྱ་དང༌། ཅོད་པན་དང༌། དར་དཔྱངས་དང༌། རྡོ་རྗེ་དང༌། ཡི་གེས་དབང་བསྐུར་བ་རྣམས་རྡོ་རྗེ་བདག་པོའི་དབང་བསྐུར་བ་རྣམས་དྲིལ་བུ་ལ་སོགས་པ་རྣམས་མཆོད་པར་བྱ་སྟེ། སློབ་
མས་ཀྱང་སྟོབས་ཀྱིས་འབྱོར་བའི་ཡོན་འབུལ་བ་དང་ཕྱག་བྱས་ལ་དབང་གི་དོན་དུ་མེ་ཏོག་དབུལ་ཞིང༌། དེ་ནས་གྲུབ་པའི་རྡོ་རྗེའི་བཀའ་དྲིན་སྦྱིན་པར་བྱ་སྟེ། ཁྲོ་བོའི་གཟུགས་ཀྱིས་གསང་བའི་གནས་སུ་བསྟན་ཅིང༌། དེ་ནས་དྲག་པོའི་ཉེས་པ་འཇོམས་པར་བྱེད་པའི་ཤེས་རབ་དང་ཐབས་ཀྱིས། རྡོ་རྗེ་དབྱིངས་ཀྱི་དེ་ཉིད་ལས། །རྡོ་རྗེའི་རིགས་ཀྱིས་སེམས་ཅན་ཐམས་ཅད་ཀྱི་དོན་དུ། ཐམས་ཅད་གྲུབ་པ་ལ་དགོད་པའི་ཕྱིར། ཐབས་དང་ཤེས་རབ་ལས་རྫོགས་པའི་ཁྲོ་བོ་ཆེན་པོའི་གཟུགས་སུ་གྱུར་ཏེ། དེ་ནས་གསེར་གྱི་བདག་ཉིད་ཀྱི་ཐུར་མ་ལ་བཟླས་པར་བྱ་སྟེ། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་བསལ་བ་ལྟར། །དེ་བཞིན་དུ་ཁྱོད་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། ཨོཾ་བཛྲ་ནེ་ཏྲ་ཨ་པ་ཧཱ་ར་པ་ཊ་ལཾ་ཧྲཱི། སློབ་མའི་མིག་སྨན་ཐུར་མ་དང་བཅས་པས་བསལ་བར་བྱའོ། །དེ་ནས་མེ་ལོང་བསྟན་ལ། ཨ་བཛྲ་སཏྭ། ཞེས་བྱ་བའི་སྔགས་བརྗོད་ཅིང༌། མེ་ལོང་ནང་གི་གཟུགས་བརྙན་འདི། །རྡོ་རྗེ་སེམས་དཔའི་རང་བཞིན་ཏེ། །བྱང་ཆུབ་སེམས་འདི་དྲི་མ་མེད། །ཁྱོད་ཀྱིས་སྙིང་ལ་བརྟན་པར་གནས། །སངས་རྒྱས་ཀུན་གྱི་རང་བཞིན་ཅན། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་དྲི་མ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ཀུན་དུ་འབྱུང༌། །ཆོས་རྣམས་དེ་ལྟར་ཤེས་པར་གྱིས། །རང་བཞིན་དྲི་མས་མ་གོས་པ། །སེམས་ཅན་དོན་ནི་ཁྱོད་ཀྱིས་གྱིས། །ཞེས་བརྗོད་ལ། དེ་ནས་ཨ་ལས་སྐྱེས་པའི་དྲིལ་བུ་ཆོས་ཀྱི་སྒྲ་དང་ལྡན་པར་དཀྲོལ་ལ། །དེ་ནས། རང་བཞིན་དག་པའི་ངོ་བོ་ཉིད། །ཡོད་དང་མེད་པའི་ངོ་བོ་སྤངས། །རང་བཞིན་དག་པའི་སེམས་དཔའ་ཆེ། །རང་བཞིན་མཆོག་གི་སྤྱོད་པ་ཅན། །དེ་ནས་ཧོ་ཞེས་བརྗོད་ལ་དྲིལ་བུ་སྦྱིན་པར་བྱའོ། །དེའི་རྗེས་སུ་མདའ་དང་གཞུ་བྱིན་ལ། དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པ། ཕྱོགས་བཞིར་འབིགས་པའི་ཚུལ་དུ་བྱའོ། །སྟེང་དང་འོག་ཏུའང་དེ་བཞིན་ནོ། །དེ་ནས་རྡོ་རྗེ་དང༌། ཆོས་ཀྱི་འཁོར་ལོ་རྐང་པའི་འོག་ཏུ་བྱིན་
ལ། རཾ་ཡཾ་ཁཾ་རལ་གྲི་ཡང་ལག་པར་བྱིན་ལ། འདི་སྐད་ཅེས་བརྗོད་པར་བྱའོ། །དེ་རིང་བྱང་ཆུབ་སེམས་བསྐྱེད་ནས། ཆོས་ཀྱི་འཁོར་ལོ་བསྐོར་བར་བྱོས། །ཆོས་ཀྱི་དུང་ནི་རྗེས་སུ་བུས། །དོན་ལ་འཇིགས་པར་མི་བྱ་ཞིང༌། །སེམས་ནི་རྟོག་པ་མེད་པར་བྱོས། །འཇིག་རྟེན་ཐམས་ཅད་བསལ་བའི་ཕྱིར། །སྔགས་ཀྱི་སྤྱོད་པ་རྗེས་སུ་སྤྱོད། །དེ་ལྟར་བྱས་ན་དེ་དག་ཀྱང༌། །སངས་རྒྱས་ཀྱིས་བཀའ་སྩལ་བ་དང་ལྡན་པས་སོ། །དེ་ནས་རྡོ་རྗེ་འཛིན་པས་སྲུང་བ་བྱ། །འདིར་ནི་ཁོ་ན་ཉིད་དེ་བཞིན་གཤེགས་པ་རྡོ་རྗེ་སེམས་དཔའ་ཧཱུཾ་གི་ཡི་གེ་འཇིག་རྟེན་དབང་ཕྱུག་དང༌། ནམ་མཁའི་སྙིང་པོའི་ང་རྒྱལ་དུ་རིམ་པར་བྱ་སྟེ། སྐད་ལྔས་བརྗོད་པར་རྗེས་སུ་བྱིན་ལ། སེམས་ཅན་ཀུན་གྱི་དོན་གྱི་ཕྱིར། །སེམས་ཅན་ཐམས་ཅད་ཀུན་ལ་ཡང༌། །ཇི་ལྟར་རྣམ་པར་རྗེས་སུ་དག །ཆོས་ཀྱི་འཁོར་ལོ་རབ་ཏུ་བསྐོར། །དེ་ནས་འདི་ལྟར་ཁྲོ་བོ་ཡི། །ནོར་བུ་དང་འཁོར་ལོ་འདིར་ཚིགས་སུ་བཅད་པ་བཞིས་བརྗོད་པར་བྱ་ཞིང༌། དེ་ནས་སྙིང་པོའི་སྔགས་བརྗོད་ལ་བྱིན་ཞིང༌། སྒྲུབ་ཐབས་དང༌། ཆོ་ག་ཕྱག་རྒྱ་བཞིའི་ཡེ་ཤེས་སློབ་མ་ལ་བསླབ་ཤིང༌། རྡོ་རྗེ་ལག་པར་སྦྱིན་ཞིང༌། ཕྱག་རྒྱ་བཅས་ལ་སློབ་མ་ལུང་བསྟན་པར་བྱ་སྟེ། འདི་ལྟར་ཁྱོད་ལ་ལུང་བསྟན་པ། །རྡོ་རྗེ་སེམས་དཔའ་དེ་བཞིན་གཤེགས། །ངན་སོང་ལས་ནི་སྒྲོལ་བར་བྱོས། །གྲུབ་པའི་གནས་ལ་ཐམས་ཅད་འཁོད། །ཧེ་བཛྲ་ནཱ་མ་ཏ་ཐཱ་ག་ཏ་སིདྡྷི་ས་མ་ཡ་བྷཱུར་བྷཱུ་སྭཿ་དེ་བཞིན་གཤེགས་པའི་གཟུགས་སུ་བལྟས་ལ། ལག་པ་གཡོན་པས་སྣམ་སྦྱར་རྣ་མཆོག་ལྟར་བྱས་ལ། གཡས་པ་མི་འཇིགས་པ་སྦྱིན་པའི་ཕྱག་རྒྱ་བྱས་ཏེ། དེ་བཞིན་གཤེགས་པ་རིགས་ཀྱི་དམ་ཚིག་ལ་གནས་པས། བལྟ་བ་བསྟན་པ་མཆོག་ཏུ་བཞད་མཛད་དཀྱིལ་འཁོར་འདིར། །སྡིག་པ་ཐམས་ཅད་གྲོལ་ཞིང་དྲི་མ་མེད་པ་ཁྱོད་ནི་བསྒོམ་པ་ཀུན་ལ་བསྟན་པར་མཛོད། །ཁྱོད་ལ་འཆི་མེད་བདེ་ཆེན་ཐེག་པའི་མཆོག །འཇིག་མེད་རྩོད་བྲལ་དགའ་བའི་གྲོང་ཁྱེར་འདི། །སྡུག་བསྔལ་ཀུན་ལས་ངེས་པར་གྲོལ། །རང་བཞིན་གྲུབ་པ་དམ་པ་ནི། །ཁྱོད་ཀྱིས་ངེས་པར་བསྲུང་བར་བྱོས།།
དམ་ཚིག་ལྡན་ན་གྲུབ་པར་འགྱུར། །སངས་རྒྱས་ཀུན་གྱི་དམ་ཚིག་ནི། །ཡེ་ཤེས་བདེན་པའི་དོན་ལ་གནས། །བྱང་ཆུབ་སེམས་ནི་དེ་རིང་བསྐྱེད། །དེ་རིང་རྡོ་རྗེའི་དམ་ཚིག་ནི། །ཇི་ལྟར་བསྐྱེད་པ་དེ་མ་ཐག །འདི་ལྟར་ཐམས་ཅད་སངས་རྒྱས་འགྱུར། ཆོས་ལ་བསྐོར་ཞིང་བཟོད་པ་ཡི། །བཟོད་པ་དང་ནི་མི་ལྡན་ན། །མི་ཤེས་རྨོངས་པའི་རང་བཞིན་འགྱུར། །བརྟགས་ཤིང་དཔྱད་པར་མི་འགྱུར་རོ། །བདག་དང་བྲལ་བར་མ་གྱུར་བར། །ནམ་དུའང་བདེ་བ་མི་རྙེད་དེ། །འཛིན་པའི་བདེ་བ་བདེ་བ་མིན། །ཡང་དག་ཡིད་དུ་འོང་བ་ལ། །རྡོ་རྗེ་དྲིལ་བུའི་ཕྱག་རྒྱ་ཡང༌། །ནམ་དུ་ཡང་ནི་མི་བཏང་ངོ༌། །སློབ་དཔོན་མིང་གིས་རྗེས་བཟུང་བ། །སངས་རྒྱས་ཀུན་དང་མཉམ་པ་ཡིན། །ཇི་ལྟར་རྡོ་རྗེ་སློབ་དཔོན་ནི། །སངས་རྒྱས་ཐམས་ཅད་དམ་ཚིག་བླ། །སངས་རྒྱས་ཀུན་གྱི་ཐུགས་དང་ནི། །སློབ་དཔོན་ལ་ཁྲོས་འགལ་བར་འགྱུར། རིམས་དང་དེ་བཞིན་དུག་དང་ནི། །རིམས་དང་མཁའ་འགྲོ་མ་རྣམས་ཀྱིས། །འཇིགས་པ་ཉེ་བར་སྐྱེ་བ་ཡིན། །དུག་དང་ལོག་པར་འདྲེན་པ་དང༌། །རྟ་ཡི་འཇིགས་པ་ཉེ་བར་བསྐྱེད། །ཤི་ནས་དམྱལ་བར་སྦྱར་བར་འགྱུར། །དེ་ནས་རྩོལ་བ་ཆེན་པོ་ཡིས། །རྡོ་རྗེ་སློབ་དཔོན་བླ་མ་ཆེ། །མཆོག་ཏུ་ཆེས་པས་མཉེས་པར་བྱ། །ནམ་དུའང་ཁྲོ་བར་མི་བྱ་སྟེ། །ཇི་ལྟར་འབྱོར་བའི་སྟོབས་ཀྱིས་སུ། །བླ་མ་མཉེས་ཤིང་མཆོད་པར་བྱ། །ཇི་ལྟར་རྒས་པ་ལ་སོགས་པས། །ཉེས་པ་གང་ཡང་མི་འབྱུང་བར། །དེ་ལྟར་བླ་མ་མཉེས་པར་བྱ། །རྟག་ཏུ་དམ་ཚིག་སློབ་དཔོན་ལ།། གུས་པས་ལུས་ཀྱི་བསྙེན་བཀུར་བྱ། །ཇི་ལྟར་བུ་དང་ཆུང་མ་དང༌། །མ་ལུས་ཕུལ་ནས་མཉེས་བྱ་ན། །ལོངས་སྤྱོད་གཡོ་བ་སྨོས་ཅི་དགོས། །བསྐལ་བ་བྱེ་བས་རྙེད་དཀའ་བའི། །སངས་རྒྱས་སྟེར་བའི་བླ་མ་ལ། །གུས་པས་བསྙེན་བཀུར་བསྒྲུབ་པར་བྱ། །བླ་མ་མཆོག་ལ་ཕུལ་བ་ནི། །སངས་རྒྱས་ཀུན་ལ་ཕུལ་དང་མཉམ། །དེ་ལྟའི་བསོད་ནམས་སྡོམ་པ་ནི། །སྡོམ་པ་བསོད་ནམས་ཀུན་གྱི་མཆོག །རྟག་ཏུ་དམ་ཚིག་ལ་གནས་ཤིང༌། །རྟག་ཏུ་དེ་བཞིན་གཤེགས་པ་མཆོད། །རྟག་ཏུ་བླ་མ་ལ་ཕུལ་ཞིང༌། །སངས་རྒྱས་ཀུན་དང་མཉམ་པ་ཡི། །
འབྲས་བུ་ཚེ་འདིར་སྟེར་བར་འགྱུར། །ཇི་ལྟར་བསྟན་པའི་དམ་ཚིག་ནི། །རྟག་ཏུ་ལྷ་དང་དམ་ཚིག་བསྟན། །དེ་རིང་སངས་རྒྱས་རིགས་སུ་སྐྱེས། །ཚེ་འདིའི་འབྲས་བུ་ཁྱོད་ཀྱིས་ཐོབ། །སངས་རྒྱས་ཀུན་གྱི་རྡོ་རྗེའི་བདག །འཇིག་རྟེན་གསུམ་གྱི་རྒྱལ་པོ་སྟེ། །རྒྱལ་པོ་ཆེན་པོར་འགྱུར་བ་ཡིན། །དེ་རིང་བདུད་རྣམས་ཀུན་ལས་རྒྱལ། །མཆོག་གི་གྲོང་ཁྱེར་ཆེན་པོར་ཞུགས། །སངས་རྒྱས་མཆོག་ཏུ་ཁྱེད་གྱུར་ཏོ། །དེ་ནས་སློབ་མས་བསྐོར་བ་བྱ་སྟེ། །སློབ་མའི་ལག་པ་གཡས་པའི་མཐེ་བོ་སློབ་དཔོན་གྱིས་བཟུང་ལ། གཡོན་པར་ཆུ་བླུགས་ཏེ། མར་གྱི་སྦྱིན་སྲེག་སྦྱིན་ཞིང༌། སྦྲང་རྩི་དང༌། དི་ཏིང་གི་མར་དང༌། ཞོ་དང༌། ཏིལ་དང༌། ཐམས་ཅད་བསྲེས་པའི་སྦྱིན་སྲེག་དབུལ་ཞིང༌། བསྐོར་བ་ཡང་བྱས་ལ། ཕྱག་བཙལ་ཞིང༌། ཤར་སྒོར་ཕྱིན་ལ་འདི་སྐད་ཅེས་བརྗོད་པར་བྱ་སྟེ། བདག་གི་སློབ་མ་འདི་རུ་ནི། །རྒྱུད་རྣམས་ཀྱིས་ནི་འཛིན་པ་བོ། །སངས་རྒྱས་བྱང་ཆུབ་སེམས་དཔའ་རྣམས། །ལྷ་ལ་དམ་ཚིག་ལྡན་པ་ནི། །དེ་ལ་འདི་སྐད་བརྗོད་པ་འདི། །སེམས་ཅན་རྗེས་སུ་གཟུང་བའི་ཕྱིར། །རྩོལ་བས་དཀྱིལ་འཁོར་ཆེན་པོ་འདི། །འབད་པ་དང་བཅས་བྲིས་པ་འདི། །སྒྲུབ་པ་པོ་རྣམས་གྲུབ་དོན་དུ། །དེ་ནས་ཕྱི་རོལ་དུ་གཏོར་མ་བྱིན་ལ། །མཆོད་ཡོན་དང་ཞབས་བསིལ་ཡང་ཕུལ་ཏེ། ཇི་ལྟར་འབྱོར་བའི་སྟོབས་ཀྱིས་མཆོད་པ་རྒྱ་ཆེན་པོ་ཕུལ་ལ། །ཇི་ལྟར་འབྱོར་བའི་བཟའ་རྒྱུ་ལ་ལོངས་སྤྱད་དེ། །ཕུད་ནས་དཀྱིལ་འཁོར་གྱི་ལྷ་རྣམས་ལ་མཆོད་ལ། བཅོམ་ལྡན་འདས་ལ་མཆོད་ཡོན་ཡང་ཕུལ་ལ། སྒྲུབ་ཐབས་ལས་བྱུང་བ་ལྟར་བསྒོམས་ལ། དཀྱིལ་འཁོར་ལ་བསྐོར་བ་ཡང་བྱས་ལ་ཕྱག་འཚལ་ལོ། །ཨོཾ་བཛྲ་སཏྭ་ས་མ་ཡ་མ་ནུ་པཱ་ལ་ཡ་བཛྲ་སཏྭ་ཏྭེ་ནོ་པ་ཏིཥྛ་ཌེ་ཌྷོ་མེ་བྷ་བ་སུ་ཏོ་ཥྱོ་མེ་བྷ་བ། །ཨ་ནུ་རཀྟོ་མེ་བྷ་བ། སུ་པོ་ཤྱོ་མེ་མེ་བྷ་བ། སརྦ་སིདྡྷི་མྨེ་པྲ་ཡཙྪ་སརྦ་ཀརྨ་སུ་ཙ་མེ། ཙིཏྟི་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿ་བྷ་ག་ཝཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲི་བྷ་བ་མ་ཧཱ་ས་མ་ཡས་ཏྭ་ཨཱཿ་།འདི་ལན་གསུམ་བརྗོད་ལ། ཨོཾ་ཧཱུཾ་ཀཱ་ར་ཇི་ལྟར་འདོད་ན་འདི་ཡང་བདེན་པར་བྱའོ། །ཡི་གེ་ཧཱུཾ་བརྗོད་ཅིང་གཤེགས་
སུ་གསོལ་ཏེ། རྡུལ་ཚོན་དྲི་མ་མེད་པ་ཆུ་བོའི་གཞུང་དུ་དོར་བར་བྱ་ཞིང༌། ཡི་གེ་ཧཱུཾ་བརྗོད་ཅིང་ཕུར་པ་ཡང་བསྡུ་བར་བྱ་ཞིང་འོ་མ་དང་དྲི་བཟང་པོ་དང་ལྡན་པའི་ཆུས་བཀྲུ་བར་བྱའོ། །ཕུར་བའི་ཁུང་བུ་ཡང་དྲི་བཟང་པོ་དང་འོ་མས་བཀང་ལ། །སློབ་མ་དང་ས་སྐྱོང་བའི་དོན་དུ་ཞི་བའི་སྦྱིན་སྲེག་བྱའོ། །ལྷ་མཉེས་པར་བྱ་བའི་དོན་དུ་སྦྱིན་སྲེག་གི་ཐབ་ཟླུམ་པོ་ཁྲུ་གང་བ། ཐུར་དུ་ཡང་སོར་ཉི་ཤུ་བརྐོས་ཏེ། ལྟེ་བ་ལ་སོར་མོ་བརྒྱད་ལ་རྡོ་རྗེ་རྩེ་མོ་ལྔ་བས་མཚན་པ། ཐབ་ཀྱི་ཕྱི་རོལ་དུ་སོར་མོ་བཞི་དོར་བའི་དེ་དང་མཉམ་པའི་ཁ་ཁྱེར་སོར་བཞི་པ་ལས་བཞིན་དུ་བྱུགས་ཏེ། མེ་ཏོག་སིལ་མ་དང་ཕྲེང་བས་ཀྱང་གཏོར་ལ། དགང་བླུགས་གསེར་རམ་ཟངས་ལས་ཀྱང་རུང་སྟེ། གཞན་ནིམ་པའི་ཤིང་ངམ། མཆོད་སྦྱིན་གྱི་ཤིང་ལས་ཀྱང་རུང་སྟེ། དབྱུག་བ་སོར་བཅུ་པ་དེའི་སྔོན་དུ། གྲུ་བཞི་པ་དམའ་བ་སོར་གཉིས་པ་རྡོ་རྗེ་རྩེ་ལྔ་པས་མཚན་པ། བཅུད་འཛག་པའི་ལམ་མཐེའུ་ཆུང་གི་ཚད་ཙམ། རྡོར་ཇེ་རྩེ་མོ་གསུམ་པ་སོར་བཞིའི་ཚད་ཙམ་མོ། །བླུགས་གཟར་པདྨའི་འདབ་མ་དང་ལྡན་པ་རྒྱར་སོར་གཉིས་པ། ཞབས་སུ་སོར་མོ་གཅིག་པ། རྡོ་རྗེ་རྩེ་མོ་གསུམ་པས་མཚན་པ། ཐབས་ཀྱི་རང་བཞིན་རྡོ་རྗེ་ཁུ་ཚུར་གྱིས་མཚན་པའི་ཡུ་བ་དང་བཅས་པ་དབྱུག་བའི་རྩེ་མོར་སོར་དྲུག་པའི་རྡོ་རྗེའམ་རིན་པོ་ཆེ་ཁྲུ་གང་གིས་དགང་གཟར་དང་བླུགས་གཟར་གྱི་ཚད་དོ། །དེ་ཡང་ཤིང་པ་ལཱ་ཤའམ། སེང་ལྡེང་ངམ། ཤིང་ཨརྒའམ། ཤིང་ནྱ་གྲོ་དྷའམ། ཤིང་བྷི་ཀ་ཏའམ། ཤིང་ཨ་མྲའམ། ཤིང་ས་མིའམ། ཤིང་གོད་སྲུང་ངམ། ཤིང་ཨ་པ་མརྒའམ། བྱང་ཆུབ་ཀྱི་ཤིང་ངམ། །ཤིང་ཨུ་དུ་མ་ཝཱ་ར་བའམ། དེ་དག་སོ་སོར་བྱས་ལ། གསར་པ་དང༌། འདབ་མ་དང་ལྡན་པ་སྔོན་བླངས་ལ། སོར་བཅུ་གཉིས་པ། རྩེ་མོ་གཉིས་ལ་དྲི་ཞིམ་པོའི་ཆུས་བསངས་ལ། ལས་ཐམས་ཅད་པའི་དོན་དུའོ། །ཇི་ལྟར་ཞི་བ་དང་རྒྱས་པའི་དོན་དུ་དབུལ་བར་བྱའོ། །ཇི་ལྟར་རང་གི་འབྱོར་བའི་ལོངས་སྤྱོད་ཐམས་ཅད་ཀྱང་དབུལ་ཞིང༌། སྭཱཧཱའི་སྔགས་ཀྱི་མཐའ་དང་བཅས་པས། རྟག་ཏུ་མར་དང༌། གུ་གུལ་དང་འབྲས་མཁར་མ་དང་བཅས་པ་སྔགས་ཀྱིས་དབུལ་བར་བྱའོ། །དྲི་དང་མ་རྟོགས་ལ་སོགས་པ་ཅི་འབྱོར་པ་ཇི་ལྟར་སྔགས་བཟླས་པ་བཞིན་དུ།
མཆོད་སྦྱིན་གྱི་ཤིང་ལ་སོགས་པ་འབུས་མ་ཟོས་ཅིང་དྲི་མ་མེད་ཅིང་གཙང་བས་སོ། །ཇི་ལྟར་བུད་ཤིང་མ་འབྱོར་ན་ནགས་ཀྱི་དགོན་པའི་ལྕི་བ་ལ་བྱའོ། །བ་གླང་གི་ལྕི་བ་མ་གཏོགས་པ་ཐམས་ཅད་ནི་རྒྱས་པའི་ལས་ལ་རུང་ངོ༌། །རོ་ཚ་བ་དང༌། ཚེར་མ་ཅན་དང༌། དྲི་མི་ཞིམ་པ་དང༌། དུར་ཁྲོད་དུ་སྐྱེས་པའི་ནིམ་པའི་ཤིང་དང༌། བོང་བུ་དང་རྔ་མོའོ་རྟུག་པ་དང༌། དེ་དག་གི་བུད་ཤིང་ནི་གསད་པ་དང༌། བསྐྲད་པ་ལའོ། །ནིམ་པ་དང༌། ཨ་བྷཱའི་མེ་ཏོག་དང་གཞན་མེ་ཏོག་ནི་ལས་ཐམས་ཅད་པའི་དོན་དུའོ། །དེ་ནས་ཁྲུས་བྱས་ལ་ལས་དང་མཐུན་པའི་རྒྱན་གྱིས་བརྒྱན་ཏེ། ལས་དང་མཐུན་པའི་ལྷའི་ང་རྒྱལ་བྱས་ལ། པདྨ་ལ་སོགས་པའི་འདུག་སྟངས་ཀྱིས་འདུག་སྟེ། སྔོན་དུ་བརྗོད་པའི་སྔགས་སྭཱཧཱ་ལ་སོགས་པའི་མཐའ་དང་ལྡན་པས་ཞི་བ་ལ་སོགས་པ་ལ་བརྗོད་དོ། །ཉེས་པ་འཇོམས་པར་བྱེད་པའི་སྔགས་བརྗོད་ཅིང་ལས་གང་ཡང་རུང་བའི་སྔགས་བཟླས་པར་བྱ་སྟེ། མཆོད་ཡོན་གྱི་སྔགས་གཡོན་དུ་གཞག་པར་བྱའོ། །སྦྱིན་སྲེག་གི་རྫས་ཐམས་ཅད་སྔགས་བདུན་གྱིས་བྱིན་གྱིས་བརླབས་ཏེ་གཡས་སུ་གཞག་པར་བྱའོ། །དྲག་པོའི་ལས་ལ་གོ་བཟློག་པས་སོ། །དེ་ཡང་འོ་མ་ཅན་གྱི་ཤིང་ལ་རྩུབ་མ་བཏོན་པས་སྤང་བར་བྱ་སྟེ། ཞི་པའི་དོན་དུའོ། །གཞན་ཡང་བྲམ་ཟེའི་ཁྱིམ་ནས་བླངས་པའི་མེ་ལས་ཀྱང་རུང་ངོ༌། །གཞན་དགེ་འདུན་ལས་ཀྱང་རུང་ངོ༌། །རྒྱལ་པོ་དང༌། །རྗེའུ་རིགས་དང༌། ནགས་ཀྱི་མེའམ། དགེ་འདུན་གྱི་མེས་ནི་རྒྱས་པའོ། །དུར་ཁྲོད་ཀྱི་མིའི་རུས་པའམ། རོ་བསྲེགས་པའི་མེའམ། གདོལ་བའི་ཁྱིམ་གྱི་མེས་ནི་དྲག་པོའི་ལས་ལའོ། །སྨད་འཚོང་མའི་ཁྱིམ་ནས་བླངས་བའི་མེས་ནི་དགུག་པའོ། །གར་མཁན་དང༌། སློང་མོ་བའི་མེས་ནི་དེ་བཞིན་དགུག་པའོ། །དེ་ནས་ཉེས་པ་འཇོམས་པར་བྱེད་པའི་སྔགས་ལན་གསུམ་བརྗོད་དེ། ཀུ་ཤའི་ཆུས་ལན་གསུམ་བསངས་ལ། ཤིང་སྐམ་པོ་སྨེ་སྦར་བར་བྱའོ། །རླུང་གཡབ་ཀྱིས་གཡོ་བར་བྱའི་ཁའི་དབུགས་ཀྱིས་ནི་མ་ཡིན་ནོ། །ཨོཾ་ཛྭ་ལ་ཛྭ་ལ་ཧཱུཾ་ཧཱུཾ་ལན་བདུན་བཟླས་ཏེ། མར་དབུལ་བར་བྱའོ། །ཨོཾ་བཛྲ་ཏྭ་ཨཱཿཞེས་བརྗོད་ལ། ཀུ་ཤ་ཕྱོགས་ཐམས་ཅད་དུ་དགྲམ་པར་བྱའོ། །རྩ་བ་གཙང་བ་དྲི་མ་མེད་
པ། མ་གྲུགས་པ། མ་གས་པ། རློན་པ། རིང་ཐུང་སྙོམས་པ། ཐམས་ཅད་རྩེ་མོ་ཤར་དུ་བསྟན་ལ་དགྲམ་པར་བྱའོ། །ཐབ་ཀྱི་མཐའ་ཡོངས་སུ་རྫོགས་པར་བཀང་ལ། དེ་ནས་ཐབས་ཀྱི་དབུས་སུ་མེའི་ལྷ་ཡོངས་སུ་རྫོགས་པར་བསྒོམས་ལ། རྡོ་རྗེ་འཛིན་པས་སྔགས་དང་ཕྱག་རྒྱ་བཅས་ལ། བགེགས་བསྐྲད་ཅིང་གོ་བསྐོན་ཞིང་ཕྱོགས་བཅིང་བར་བྱའོ། །ཡེ་ཤེས་པ་སྤྱན་དྲང་ཞིང་དགུག་པ་དང༌། གཞུག་པ་དང་བཅིང་བ་དང༌། དབང་དུ་བྱས་ལ། མཆོད་ཡོན་དང༌། ཞལ་བསིལ་དང༌། ཞབས་བསིལ་ཕུལ་ལ། མེའི་ལྷ་དམ་ཚིག་ལ་གནས་པར་བྱ་སྟེ། ཛཿཧཱུཾ་བཾ་ཧོཿ་ས་མ་ཡ་སཏྭཾ། ས་མ་ཡ་སཏྭཾ། ཞེས་བརྗོད་ལ། ཨོཾ་ཨགྣ་ཡེ་སྭཱཧཱ། ལན་གསུམ་བརྗོད་པར་བྱའོ། །སྔོན་གྱི་དམ་ཚིག་གི་ཕྱག་རྒྱ་བྱས་ལ། གོ་ཆ་བགོ་ཞིང་གོ་ཆའི་ཕྱག་རྒྱ་བྱའོ། །བདག་གིས་ཇི་ལྟར་འདོད་པའི་ལས་རྣམས་མཛོད་ཅིག་ཅེས་བརྗོད་ལ། ལས་དང་རྗེས་སུ་མཐུན་པའི་གཟུགས་སུ་བསྒོམ་པར་བྱའོ། །ཨུ་མ་ལ་སོགས་པའི་ལྷ་མོ་བཞིས་ཡང་དག་པར་མཆོད་ཅིང༌། ཉེས་པ་འཇོམས་པར་བྱེད་པའི་སྔགས་བརྗོད་ཅིང་བསྐོར་བ་གསུམ་བྱ་སྟེ། གཡས་པའི་མཐེ་བོའི་ཁུ་ཚུར་གྱིས་འཇིགས་པར་བྱས་ཏེ། མེ་ལྷའི་ལྕེ་ལ་ཧཱུཾ་བཀོད་པ་ལ། པུས་མོ་གཉིས་ཀྱི་སྟེང་ནས་དགང་བླུགས་ཀྱིས་མར་གསུམ་སྦྱིན་པར་བྱའོ། །དྲག་པོའི་ལས་ཁང་པར་ཏའི་སྦྱིན་པར་བྱའོ། །མེ་འབར་བའི་མཚན་མ་བརྟགས་ལ། མེ་བསྐོར་ཞིང་དགང་བླུགས་སྦྱིན་པར་བྱའོ། །ཡང་བགེགས་ཀྱི་མཚན་མ་དང་ལྡན་ན། བསྐྲད་ཅིང་མར་གྱི་དགང་བླུགས་གསུམ་སྦྱིན་ཞིང༌། གཞན་ཡང་གཅིག་ནས་བདུན་གྱི་པར་གང་ཡང་རུང་བས་སོ། །དེ་ནས་མར་གྱི་རྗེས་སུ་ཏིལ་དབུལ་ཞིང༌། དེ་ནས་འབྲུ་གཞན་རྣམས་ཀྱང་རིམ་གྱི་དབུལ་བར་བྱའོ། །དྲག་པོའི་ལས་ལ་ནི་མིའི་རུས་པ་བཏགས་པའི་ཕྱེ་མ་དང་ལྡན་པའི་མར་དབུལ་ཞིང༌། ཞོ་ལ་སོགས་པའི་རྫས་རྣམས་ནི་ཞལ་དུའོ། །མཆོད་ཡོན་ནི་ཕྱག་དུའོ། །དྲི་ནི་ཐུགས་ཀར་རོ། །མེ་ཏོག་ནི་དབུ་ལའོ། །བདུག་སྤོས་ནི་ཤངས་ལའོ། །ཞབས་བསིལ་ནི་ཞབས་ལའོ། །
མཆོད་ཡོན་དང་མར་མེ་ནི་མདུན་དུའོ། །ཞལ་བསིལ་ནི་ཞལ་དུའོ། །ཡམ་ཤིང་ནི་འོད་ཀྱི་དཀྱིལ་འཁོར་ལའོ། །དེ་ནས་ལས་དང་རྗེས་སུ་མཐུན་པའི་རིམ་པས་བྱ་སྟེ། དེ་ནས་སྔགས་དྲུག་དང༌། བྷ་ཁ་ཏྲ་བྷོ་ལ་ཏྲ་ཧཱུཾ་ཧོ་ཛ། ཞི་བ་དང༌། རྒྱས་པ་དང༌། དགུག་པ་དང༌། དབང་དུ་བྱ་བ་ལ་དྲི་དང་མར་མེ་ལ་སོགས་པ། ཞི་བ་ལག་པའི་གཟུགས་ཀྱིས་ཨུ་མ་ལག་པའི་ལྷ་མོ་རྣམས་ཀྱིས་མེ་ཏོག་ལ་སོགས་པའི་མཆོད་པ་རྣམས་ཀྱིས་ཡང་དག་པར་མཆོད་དེ། ལྕེ་རྡོ་རྗེའི་སྤུ་གུ་ཅན་ཡི་གེ་ཧཱུཾ་གིས་མཚན་བས་ཡང་དག་པར་མཆོད་དེ་བསྲེག་རྫས་ཐམས་ཅད་ཀྱང་སྔགས་གསུམ་གསུམ་གྱིས་དབུལ་བར་བྱའོ། རྡོ་རྗེ་ཁུ་ཚུར་གྱིས་དགང་བླུགས་བཟུང་ལ། ཆེ་གེ་མོ་ཞི་བའི་དོན་དུ་ཞེས་བྱ་བ་ལ་སོགས་པ་མཐའ་བསྒྱུར་གྱི་སྔགས་དང་ལྡན་པའོ། །དེའང་རྒྱུད་གཞན་གྱི་ཆོ་གའི་རྗེས་སུ་འཇུག་པར་བྱའོ། །དེ་ནས་ཡི་གེ་ཧཱུཾ་བརྗོད་ཅིང༌། དེ་ནས་དགང་བླུགས་ལ་སོགས་པ་ཡང་བྱིན་ལ། མཆོད་ཡོན་དང་ཞབས་བསིལ་ལ་སོགས་པ་ཕུལ་ཏེ། ཡང་དག་པར་བསྟོད་ནས། དེ་ནས་དངོས་གྲུབ་ཀྱི་དོན་དུ་མེ་ལ་གསོལ་བ་གདབ་པར་བྱ་སྟེ། ཡང་མཆོད་ཡོན་དང་ཞབས་བསིལ་ཕུལ་ལ། དེ་ལྟར་ལན་གསུམ་མམ་བཞི་ལག་པས་དབུལ་ཞིང་སྔགས་བཟླས་པར་བྱའོ། །ཇི་ལྟར་སེམས་ཅན་ཀུན་གྱི་དོན། །སངས་རྒྱས་ཀུན་གྱིས་གསལ་བར་གསུངས། །སྦྱིན་སྲེག་ལ་སོགས་པ་རྣམས་དང༌། །སྔགས་ཀྱི་བཟླས་པ་དག་པ་རྣམས། །ཇི་ལྟར་སེམས་ཅན་ཀུན་དོན་ལ། །ཇི་ལྟར་བྲིས་པའི་བསོད་ནམས་ཀྱིས། །སེམས་ཅན་ཀུན་གྱི་དོན་གྱི་ཕྱིར། །མྱུར་དུ་མྱ་ངན་འདས་མཆོག་ཤོག །དཔལ་འབྱུང་པོ་འདུལ་བྱེད་ཀྱི་དཀྱིལ་འཁོར་གྱི་ཆོ་ག་རྫོགས་སོ།། །།སློབ་དཔོན་ཆེན་པོ་བློ་བཟངས་སྐྱོང་གིས་མཛད་པའོ། །འདིའི་ཤློ་ཀའི་གྲངས་ནི་ཚིགས་སུ་བཅད་པ་བདུན་བརྒྱའོ། །རྒྱ་གར་གྱི་པཎྜི་ཏ་སྒྲ་པཱ་ཎཱི་ནི་ཡོངས་སུ་རྫོགས་པའི་སྙན་དངགས་དང་ཚིག་གི་སྡེབས་ལ་མཁས་པ་ནོན་ནི་པཎྜི་ཏ་དང༌། བོད་ཀྱི་ལོ་ཙཱ་བ་ཨུ་རྒྱན་པ་རིན་ཆེན་དཔལ་གྱིས་རི་བོ་ཆེན་པོ་སྦུ་ཏྲའི་མགུལ་དུ་བསྒྱུར་བའོ།། །།