རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་མདོའི་འབུམ་འགྲེལ།
ལས་ཀྱི་རྡོ་རྗེ།
རྒྱ་གར་སྐད་དུ། མ་ཧཱ་མ་ཡུ་རི་བིདྱཱ་རཱ་ཛྙཱི་སཱུ་ཏྲ་ཏ་ཊཱི་ཀཱ་ནཱ་མ། བོད་སྐད་དུ། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་མདོའི་འབུམ་འགྲེལ་ཞེས་བྱ་བ། རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལ་ཕྱག་འཚལ་ལོ། །ཐུབ་པའི་སྐུ་ནི་བདེ་ཆེན་པོ། །རྟག་ཏུ་གཞན་གྱི་དོན་མཛད་པ། །དཔལ་ལྡན་ཡེ་ཤེས་རང་བཞིན་ཅན། །ཐུབ་པའི་སྐུ་ལ་ཕྱག་འཚལ་ལོ། །མི་ཤེས་མུན་པ་བསལ་བའི་ཕྱིར། །ང་ཡིས་ཡང་དག་དོན་བསམ་ལ། །རིག་སྔགས་འབུམ་འགྲེལ་བཤད་པར་བྱ། །འདི་སྐད་ཅེས་བྱ་བ་ནི་ཆོས་སྐུ་སྟེ། ཡང་དག་པར་རྫོགས་པའི་སངས་རྒྱས་ཀྱི་བཀའོ། །བཀའ་དེ་ནི་ཕྱིན་ཅི་མ་ལོག་པ་སྟེ། དེ་ཡང་སྐུ་གསུམ་གྱི་རང་བཞིན་ནོ། །ཆོས་སྐུ་ནི་སྟོང་པ་ཉིད་དེ། མི་དམིགས་པའི་ཡེ་ཤེས་སོ། །དེ་ནི་ཆོས་སྐུའོ། །དེའི་རང་བཞིན་གྱི་གྲིབ་མས་མེ་ལོང་ལྟ་བུའི་ཡེ་ཤེས་ཏེ། སྒྱུ་མ་ལྟ་བུའི་སྐུ་ནི་ལོངས་སྤྱོད་རྫོགས་པའི་སྐུའོ།། དེའི་རང་བཞིན་གྱིས་སྟོང་གསུམ་ཁྱབ་པ་སྟེ། སྤྲུལ་པའི་སྐུས་སེམས་ཅན་གྱི་ངོན་མཛད་པའོ། །དེ་ཡང་ཤཱཀྱ་སེང་གེའོ། །འདི་ལྟར་ནི་ཤཱཀྱ་སེང་གེའི་བཀའ་སྟེ། དེ་བས་འདི་སྐད་ཅེས་བྱའོ། །བདག་གིས་ཞེས་བྱ་བ་ནི། ཀུན་རྫོབ་ཀྱི་རང་བཞིན་ཏེ། ཀུན་རྫོབ་ཀྱི་ཆོས་དེ་ནི་ཡང་དག་པར་ལོག་པའོ། །ལོག་པ་ནི་སྒྱུ་མ་དང༌། ཆུ་ཤིང་དང༌། ཆུ་ཟླ་དང༌། སྨིག་རྒྱུ་དང༌། ཆུའི་ཆུ་བུར་དང༌། ཆུའི་དབུ་བ་དང༌། རྨི་ལམ་དང༌། དྲི་ཟའི་གྲོང་ཁྱེར་དང༌། དེ་བརྒྱད་ནི་ལོག་པའི་ཀུན་རྫོབ་ཀྱི་སྒྱུ་མའོ། །ཡང་དག་པའི་ཀུན་རྫོབ་ནི་དོན་བྱེད་ནུས་པ་སྟེ། འབྱུང་བ་བཞིའི་རང་བཞིན་ལ་སོགས་པའོ། །དེའི་རང་བཞིན་ངོ་བོ་ནི་ཀུན་དགའོ། །ཐོས་པ་ཞེས་བྱ་བ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ཐོས་པའོ། །དེ་ཡང་མི་དམིགས་པའི་ཡེ་ཤེས་རང་བཞིན་མེད་པའོ། །ཡང་ན་སེམས་ཅན་གྱི་དོན་མཛད་ཅིང་ཡེ་ཤེས་ལྔ་ཤར་བར་བྱེད་པའོ། །དེ་ལྟ་བུའི་ཡེ་ཤེས་ནི་སུས་ཐོས་ཤེ་ན། ཀུན་དགའ་བོས་ཐོས་པའོ། །དུས་གཅིག་ན་ཞེས་པ་ནི། བྱང་ཆུབ་སེམས་དཔའ་དང༌། ཉན་ཐོས་དང༌། དགེ་སློང་དང༌། དགེ་སློང་མ་དང༌། ལྷ་དང་མི་ལ་སོགས་པ་ཚོགས་པའི་དུས་སོ། །བཅོམ་ལྡན་
འདས་ཞེས་བྱ་བ་ནི། བཞི་བཅོམ་དྲུག་ལྡན་འཁོར་བ་མྱ་ངན་འདས། བཞི་ནི་དང་པོ་འཆི་བདག་གི་བདུད་བཅོམ་སྟེ། དེ་ཞེ་སྡང་བཅོམ་བའོ། །གཉིས་པ་ཕུང་པོའི་བདུད་བཅོམ་སྟེ། འདོད་ཆགས་བཅོམ་པའོ། །གསུམ་པ་ཉོན་མོངས་པའི་བདུད་བཅོམ་སྟེ། གཏི་མུག་བཅོམ་པའོ། །བཞི་པ་ལྷའི་བུའི་བདུད་བཅོམ་སྟེ། ཕྲག་དོག་དང་སེར་སྣ་བཅོམ་པའོ། །ལྡན་པ་ཞེས་བྱ་བ་འདི་ནི་དཔལ་དང་མཚན་ཉིད་དང༌། གནས་དང་འཁོར་དང་གདན་དང་ཡོན་ཏན་དང་དྲུག་གོ །ཡང་ན་ཕ་རོལ་ཏུ་ཕྱིན་པ་དྲུག་དང་ལྡན་པའོ། །འདས་པ་ནི་མྱ་ངན་ལས་འདས་ཏེ། ཉོན་མོངས་པ་ལྔ་ལས་འདས་པའོ། །མཉན་ཡོད་ན་ཞེས་བྱ་བ་ནི་ཡུལ་མ་ག་དྷཱ་ཡིན་ཏེ། འདས་པ་དང་མ་འོངས་པ་དང༌། ད་ལྟར་བྱུང་བའི་གནས་སོ། །ཡང་དག་པའི་གནས་མ་ནོར་བའོ། །མཉན་ཡོད་ཀྱི་གྲོང་ཁྱེར་གྱི་ཆད་ནི་དཔག་ཚད་ལྔ་དང་ལྡན་པ་སྟེ། སྐྱེས་བུ་མང་པོ་བདེ་བར་གནས་པ། ཤཱཀྱ་ཐུབ་པའི་ཆོས་འཛིན་པ་དུས་དུས་སུ་ཆར་འབབ་པའོ། །དེའི་ཁོ་ན་ཁོར་ཡུག་ན་སྐྱེད་མོས་ཚལ་དང་རྫིང་བུ་དང༌། ཤིང་ལྗོན་པ་རིགས་མི་གཅིག་པ་མང་པོ་ཡོད་དེ། རྫིང་བུ་དང་སྐྱེད་མོས་ཚལ་དེ་ལ་ཡང་འདོད་པའི་ཡོན་ཏན་ལྔ་ལ་སྤྱོད་ཅིང་བདེ་བར་གནས་པའོ། །རྫིང་བུ་དེའི་གཞི་ནི་རིན་པོ་ཆེ་སྣ་བདུན་ལས་གྲུབ་པ་སྟེ། གསེར་དང་དངུལ་དང༌། པདྨ་རཱ་ག་དང༌། ཨིནྡྲ་ནཱི་ལ་དང༌། མ་ར་ཀ་ཏ་དང༌། པུཥྤ་རཱ་ག་དང་བདུན་ནོ། །རྫིང་བུ་དེའི་ཆུ་དེ་ཡང་དྲི་ཞིམ་ཞིང་ཙནྡན་གྱི་ཆུ་དང་འདྲ་སྟེ། བལྟ་ན་སྡུག་པ། དང་ལ་ཡང་རྙོག་པ་མེད་པའོ། །ཆུ་དེ་ལས་སྐྱེས་པ་ནི། པུཎྜ་རཱི་ཀ་དང༌། ཨུཏྤ་ལ་དང༌། པདྨ་དང༌། ཨུཏྤལ་དམར་པོ་དང༌། ཀུ་མུ་ཏ་ལ་སོགས་པ་མེ་ཏོག་སྣ་ཚོགས་ཡོད་དེ། ཁ་དོག་དཀར་པོ་དཀར་པོས་མདངས་ཕྱེ་བ། ཁ་དོག་མཐིང་ཁ་མཐིང་ཁས་མ་དངས་ཕྱེ་བ། ཁ་དོག་དམར་པོ་དམར་པོས་མདངས་ཕྱེ་བ། ཁ་དོག་སེར་པོ་སེར་པོས་མདངས་ཕྱེ་བ། ཁ་དོག་ལྗང་གུ། ལྗང་གུས་མདངས་ཕྱེ་བ། ཆུ་དེའི་ནང་ན་བྱ་སྣ་ཚོགས་ཡོད་དེ། ངང་སེར་དང༌། དང་སྐྱ་དང༌། ཀྲུང་ཀྲུང་དང༌། སོ་བྱ་རོག་པོ་ལ་སོགས་པས་སྐད་སྣ་ཚོགས་འབྱིན་ཅིང་སྙན་
པའོ། །སྐྱེད་མོས་ཚལ་དེ་ལ་ཡང་མེ་ཏོག་སྣ་ཚོགས་ཡོད་དེ། མེ་ཏོག་ཀུནད་དང༌། ཛཱ་ཏི་དང༌། ཀ་ཀོ་ལའི་མེ་ཏོག་དང༌། ཙམ་པ་ཀའི་མེ་ཏོག་དང༌། མེ་ཏོག་དམར་པོ་དང༌། སེར་པོ་ལ་སོགས་པ་ཐང་ལས་སྐྱེས་པའོ། །ཡུལ་དེའི་ཁོ་ར་ཁོར་ཡུག་ན། ཤིང་སྣ་ཚོགས་ཡོད་དེ། ཙམ་པ་ཀའི་ཤིང་དང༌། ཀླུའི་ཤིང་དང༌། ཙནྡན་དཀར་པོའི་ཤིང་དང༌། ཙནྡན་དམར་པོའི་ཤིང་དང༌། ཤིང་སཱ་ལ་དང༌། ཤུག་པ་དང༌། རྒྱ་ཤུག་དང༌། ཁ་རྫུ་རལ་སོགས་པའི་ཤིང་སྣ་ཚོགས་པ་དང་ལྡན་པའོ། །ཤིང་དེའི་གྲིབ་མས་སེམས་ཅན་ཐམས་ཅད་བདེ་བར་གནས་པའོ། །རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་ཞེས་བྱ་བ་ནི། མཉན་ཡོད་ཀྱི་རྒྱལ་པོའི་རྒྱལ་བུ་སྟེ། དེའི་སྐྱེད་མོས་ཚལ་ནི་མེ་ཏོག་སྣ་ཚོགས་ཡོད་པ། བལྟ་ན་སྡུག་པ་ཤིན་ཏུ་མཚར་བའོ། །དཔག་ཚད་གཉིས་ཡོད་པ། ཤིང་སྣ་ཚོགས་ཀྱིས་མཛེས་པའོ། །ཡུལ་དེའི་སེམས་ཅན་རྣམས་འདོད་པའི་ཡོན་ཏན་ལྔ་ལ་སྤྱོད་ཅིང་ཚལ་དེ་ལ་རྩེ་བའོ། །དེ་བཞིན་དུ་རྒྱལ་བུ་ཡང་ཡིན་ནོ། །ཚོང་དཔོན་མགོན་མེད་ཀྱིས་བཞེངས་ནས། བཅོམ་ལྡན་འདས་ལ་སྦྱིན་པར་འདོད་པ། བཀྲ་ཤིས་པའི་ས་བཙལ་ཏེ། གཞན་ནས་མ་རྙེད་པས་དེ་ཡང་རྒྱལ་བུ་རྒྱལ་བྱེད་ཀྱི་སྐྱེད་མོས་ཚལ་ན་བཟང་དོ་སེམས་སོ། །དེ་ནས་ཚོང་དཔོན་མགོན་མེད་ཀྱིས་རྒྱལ་པོ་ལ་སྨྲས་པ། ངས་ནི་དགེ་བ་བྱས་པའི་ས་ནི་ཁྱོད་ཀྱི་ཚལ་བཀྲ་ཤིས་པ་ངས་ཉོ་ཡི་ཞེས་པའོ། །རྒྱལ་བུས་སྨྲས་པ། ངའི་ཚལ་འདི་ནི་ཁྱོད་ཀྱིས་ཉོ་ནུས་སམ། གསེར་གྱི་ཕ་གུས་བརྩེགས་ནས་དེ་ཁེངས་པའི་གསེར་འདོད་དེ་ཁྱོད་ཀྱིས་འཇལ་བར་ནུས་སམ། དེའི་ཐོག་ཏུ་ཡང་དའི་མིང་འཇུག་ནུས་སམ་ཞེས་སྨྲས་པའོ། །དེ་ནས་ཚོང་དཔོན་གྱིས་གསེར་གྱི་ཕུང་པོ་བྱས་ནས་གཞལ་ཏེ། རྒྱལ་པོ་གསེར་གྱི་ཕུང་པོ་མ་འདོད་དེ། གསེར་བརྡུངས་ནས་པ་གུ་བྱས་པའོ། །དེ་ནས་ཚོང་དཔོན་གྱིས་ས་གཞི་དེར་གསེར་གྱི་ཕ་གུས་བརྩེགས་ཏེ་རྒྱལ་བུ་ལ་གཞལ་བའོ། །དེའི་སྟེང་ལས་གཞི་དེ་རུ་རིན་པོ་ཆེ་སྣ་བདུན་གྱིས་ཀུན་དགའ་རབ་བྱས་ཏེ། སྒོ་བཞི་སུམ་ཐོག་ཏུ་བྱས་པ། ཕྱོགས་ཕྱོགས་སུ་ཀ་བས་རྣམ་ཟས་སྦྱིན་གྱི་ཀུ་
པར་མཛེས་པ། ཀ་བ་དེ་ཡང་རིན་པོ་ཆེ་སྣ་བཞི་ལས་གྲུབ་པ། གདུང་དང་ཕྱམ་ཡང་གསེར་དང་དངུལ་ལས་བྱས་པས་སུམ་ཐོག་ཀྱང་དེ་བཞིན་ནོ། །གློ་སྐར་ཕྱི་ནང་ཡང་རིན་པོ་ཆེ་སྣ་བདུན་ལས་བྱས་ཤིང་མུ་ཏིག་གི་དྲ་བས་བརྒྱན་པ་སྟེ། ཕྱོགས་གཞན་ཡང་དེ་བཞིན་ནོ། །ཕྱོགས་རེ་རེ་ལ་ཡང་དཔག་ཚད་རེ་རེ་ཡོད་ཅིང༌། ཕྱི་ནང་གཉིས་ཀ་ཡང་རིན་པོ་སྣ་བདུན་ལས་བྱས་པའི་རི་མོས་མཛེས་ཤིང་བལྟ་ན་སྡུག་པའོ། །ཀུན་དགའ་ར་བ་དེ་ལ་ཡང་ཕྱོགས་བཞིན་སྒོ་རེ་རེ་ཡོད་དེ། ད་ཡང་རིན་པོ་ཆེ་སྣ་བཞི་ལས་གྲུབ་པའོ། །སྒོ་རེ་རེ་ལ་ཡང་སེང་གེ་གཉིས་གཉིས་ཡོད་དེ། སེང་གེ་དེ་རྣམས་ཀྱང་རིན་པོ་ཆེ་སྣ་བདུན་ལས་བྱས་པའོ། །དེ་བཞིན་དུ་ཀ་བ་གཉིས་གཉིས་ཀྱིས་མཛེས་ཤིང༌། ཆུ་སྲིན་ཏྭ་ར་ཎ་དང༌། བྱ་ཁྱུང་ག་རུ་ཌ་དང༌། རི་དགས་ཤ་ར་ཎ་དང༌། ཤང་ཤང་ས་ར་ན་ལ་སོགས་པས་མཛེས་ཤིང་རྟ་བབས་བཞིས་ཕྱོགས་བཞི་ནས་མཛེས་པའོ། །རྟ་བབས་དེ་ཡང་རིན་པོ་ཆེ་སྣ་བདུན་ལས་གྲུབ་པའོ། །ཀུན་དགའ་ར་བ་དེའི་ཐོག་ན། རྒྱལ་མཚན་དང༌། བ་དན་དང༌། གདུགས་སྣ་ཚོགས་ཀྱིས་ཕྱོགས་བཞི་ནས་བརྒྱན་པའོ། །མུ་ཏིག་དང༌། རིན་པོ་ཆེ་དང༌། དྲིལ་བུ་གཡེར་ཁ་དང༌། དྲིལ་བུ་ཡང་གསེར་དང། དངུལ་ལས་གྲུབ་པ་སྟེ། དེ་རླུང་གིས་བཏབ་བས་ཡན་ལག་བརྒྱད་དང་ལྡན་པའི་སྒྲའི་རོལ་མོ་མཁན་མཁས་པས་རོལ་མོའི་སྒྲ་སྐད་སྣ་ཚོགས་འབྱིན་པ་བཞིན་ནོ། །ཀུན་དགའ་ར་བའི་ར་བ་རིན་པོ་ཆེ་བཻ་ཌཱུཪྻ་ལས་བྱས་པ་སྟེ། མཚམས་བཞི་བྱི་རུ་ལས་བྱས་པའོ། །དེའི་ཕྱི་ནང་ཡང་དེ་བཞིན་ནོ། །ཀུན་དགའ་ར་བ་དེའི་ཕྱི་ལོགས་ན་སྐྱེད་མོས་ཚལ་བཞི་ཡོད་དེ། དེ་བཞིན་དུ་རྫིང་བུ་དང་བཅས་པའོ། །སྐྱེད་མོས་ཚལ་དང་རྫིང་བུ་ལ་ཡང་མེ་ཏོག་ཆུ་སྐྱེས་ཐང་སྐྱེས་སྣ་ཚོགས་ཡོད་དེ། དྲི་ཞི་མ་ཞིང་བལྟ་ན་སྡུག་པ། དཀར་པོ་དང༌། སེར་པོ་དང༌། དམར་པོ་དང༌། ལྗང་གུ་དང༌། སྔོན་པོ་ལ་སོགས་པས་མཛེས་པའོ། །དེ་བཞིན་དུ་བྱ་རྣམས་ཀྱང་སྐད་སྣ་ཚོགས་འབྱིན་པས་མཛེས་ཤིང༌། ཤིང་ལྗོན་པ་སྣ་ཚོགས་པ་ཡང་དེ་བཞིན་ནོ། ཚོང་དཔོན་མགོན་མེད་ཟས་སྦྱིན་ཞེས་བྱ་བའི་ངེས་ཏིག་ནི། རུས་ལས་བཏགས་པའོ། །ཡང་ན་
དགེ་བའི་རྩ་བ་ཐོགས་པ་མེད་པར་སྦྱིན་པས་ན་ཟས་སྦྱིན་ཞེས་བྱའོ། །རྒྱལ་བུའི་ཚལ་ལས་གྲུབ་པས་རྒྱལ་བྱེད་ཚལ་ཞེས་བྱའོ། །ཚོང་དཔོན་གྱིས་བཅོམ་ལྡན་འདས་ལ་ཕུལ་བས་མགོན་མེད་ཟས་སྦྱིན་ཞེས་བྱའོ། །དེ་བས་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་རབ་ན་ཞེས་པའོ། །བཞུགས་ཏེ་ཞེས་བྱ་བ་ནི་བྱང་ཆུབ་སེམས་དཔའ་དང༌། ཉན་ཐོས་དགྲ་བཅོམ་པ་དང༌། དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་དང༌། ལྷ་དང་མི་ལ་སོགས་པ་དང༌། ཐབས་ཅིག་ཏུ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་བྱེ་བ་བརྒྱད་ཅུ་རྩ་བཞི་ཐམས་ཅད་ཀྱང་སྐྱེ་བ་གཅིག་གིས་ཐོགས་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ད་བཞིན་གཤེགས་པ་ཐམས་ཅད་དང༌། མཐུ་ཆེན་པོ་ཐོབ་པ། རྡོ་རྗེ་ཆེན་པོ་རྣམ་པར་ཐར་པ་དང༌། ཏིང་ངེ་འཛིན་གྱིས་སངས་རྒྱས་ཀྱི་ཞིང་རྣམ་པར་འཕྲུལ་པ་དང༌། ཆོ་འཕྲུལ་ཆེན་པོ་ཀུན་དུ་སྟོན་པ་དང༌། སེམས་ཀྱི་སྐད་ཅིག་ཐང་ཅིག་ཡུད་ཙམ་ཅིག་ལ་སེམས་ཅན་ཐམས་ཅད་ཀྱི་སེམས་དང་སྤྱོད་པའི་རྗེས་སུ་འཇུག་པའི་ཆོས་བསྟན་པ། སྣ་ཚོགས་མཉམ་པ་ཉིད་མཉམ་ཞིང་རྒྱ་ཆེ་ལ་ཟབ་པ་དང༌། སྤོབས་པ་དང༌། ཆོ་འཕྲུལ་དང་ལྡན་པ། སངས་རྒྱས་ཀྱི་ཞིང་དུ་མར་དེ་བཞིན་གཤེགས་པ་ལ་མཆོད་པ་རྒྱ་ཆེན་པོའི་སྤྲིན་གྱིས་མཆོད་པ་དང༌། རྣམ་པར་ཐར་པའི་སྒོ་དང༌། གཟུངས་དང༌། ཏིང་ངེ་འཛིན་དང༌། དབང་དང་མངོན་པར་ཤེས་པ་དང༌། མ་འདྲེས་པ་དང༌། བྱང་ཆུབ་ཀྱི་ཡན་ལག་དང༌། ལམ་དང། ས་དང༌། ཕ་རོལ་ཏུ་ཕྱིན་པ་དང༌། ཐབས་ལ་མཁས་པ་དང༌། བསྡུ་བའི་དངོས་པོ་དང༌། བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་དང༌། བྱམས་པའི་སྟོབས་དང༌། བདེན་པ་དང༌། ཡོངས་སུ་བྱང་བའི་སེམས་ཀྱི་རྒྱུན་དང་ལྡན་པ་ཤ་སྟག་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་དང༌། ནམ་མཁའི་སྙིང་པོ་དང༌། ཕྱག་ན་རྡོ་རྗེ་དང༌། འཇིག་རྟེན་དབང་ཕྱུག་དང༌། སྒྲིབ་པ་ཐམས་ཅད་རྣམ་པར་སེལ་བ་དང༌། ཀུན་དུ་བཟང་པོ་དང༌། ཉི་མ་གྲགས་པ་དང༌། སྙིང་རྗེ་ཆེན་པོ་དང༌། རྡོ་རྗེ་གྲགས་པ་དང༌།
འཇམ་དཔལ་གྲགས་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སོགས་པ་བྱེ་བ་ཁྲག་ཁྲིག་འབུམ་ཕྲག་ཉི་ཤུ་རྩ་བཞི་དང་ཐབས་ཅིག་ཏུ་བཞུགས་སོ། །ཉན་ཐོས་ཆེན་པོ་ཉིས་བརྒྱ་ལྔ་བཅུ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། སྲིད་པར་ཀུན་དུ་སྦྱོར་བ་ཆད་པ། ཡང་དག་པའི་ཡེ་ཤེས་སེམས་ཤིན་ཏུ་རྣམ་པར་གྲོལ་བ་རྫུ་འཕྲུལ་སྟོབས་དང༌། ཆོ་འཕྲུལ་བསམ་གྱིས་མི་ཁྱབ་པས་རྣམ་པར་འཕྲུལ་པའི་མཐུ་ཆེན་པོ་ཐོབ་པས། ལྟ་བ་ཆགས་པ་མེད་པ་ཐམས་ཅད་ཀྱང་དྲི་མ་དང་བྲལ་བ། ཀུན་ནས་ཉོན་མོངས་པའི་བག་ཆགས་ཀྱིས་བོན་བསྲེགས་པ་ཤ་སྟག་འདི་ལྟ་སྟེ། ཚེ་དང་ལྡན་པ་ཤཱ་རིའི་བུ་དང༌། ཚེ་དང་ལྡན་པ་བྱམས་མའི་བུ་གང་པོ་དང༌། ཚེ་དང་ལྡན་པ་ཀ་པི་ན་དང༌། ཚེ་དང་ལྡན་པ་རབ་འབྱོར་དང༌། ཚེ་དང་ལྡན་པ་མཽད་གལ་གྱི་བུ་ཆེན་པོ་དང༌། ཚེ་དང་ལྡན་པ་སྐུལ་བྱེད་དང༌། ཚེ་དང་ལྡན་པ་དགའ་བྱེད་དང༌། ཚེ་དང་ལྡན་པ་འོད་སྲུངས་དང༌། ཚེ་དང་ལྡན་པ་འོད་སྲུངས་ཆེན་པོ་དང༌། ཆེ་དང་ལྡན་པ་ལྟེང་རྒྱས་འོད་སྲུངས་དང༌། དེ་དག་ལ་སོགས་པ་ཉན་ཐོས་རབ་ཏུ་མང་པོ་དང༌། དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་དང༌། ལྷ་དང༌། མི་དང༌། ལྷ་མ་ཡིན་དང་དྲི་ཟལ་སོགས་པ་མང་པོ་འདུས་པའོ། །རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བའི་དབུས་སུ། རིན་པོ་ཆེ་རྡོ་རྗེ་པདྨའི་སྙིང་པོ་སེང་གེའི་ཁྲི་ལ་བཞུགས་ཏེ། སེང་གེའི་ཁྲི་གང་ཞེ་ན། སྔོན་གྱི་སྨོན་ལམ་གྱི་སྟོབས་ཀྱིས། སངས་རྒྱས་བཅོམ་ལྡན་འདས་གང་དུ་གཤེགས་པའི་སར་འབྱུང་བའོ། །རིན་པོ་ཆེ་དང༌། རྡོ་རྗེ་པདྨའི་ཁྲིས་ཀུན་དགའ་རབ་མཛེས་པ་དང༌། རིན་པོ་ཆེ་དང༌། མུ་ཏིག་དང༌། དྲིལ་བུ་གཡེར་ཁའི་དྲ་བ་དུ་མ་སིལ་སྒྲ་འབྱུང༌། རྡོ་རྗེ་དང་རིན་པོ་ཆེ་དུ་མའི་སྟེགས་བུ་ལ་རྩ་བ་ལེགས་པར་བརྟེན་པ། རྡོ་རྗེ་རིན་པོ་ཆེ་དུམ་ཆུ་སྲིན་གྱི་ཁ་ནས་བྱུང་བའི་མུ་ཏིག་དམར་པོའི་ཕྲེང་བ་དང༌། འདམ་པའི་གནམ་རྟེན་བཅུག་པ། རིན་པོ་ཆེ་དུ་མའི་སྙིང་པོ་ཅན། ཆགས་པའི་རིན་པོ་ཆེ་ཀེ་ཀེ་རུ་དང༌། ཀེ་ཀེ་རུ་ཆེན་པོ་དང༌། ཨིནྡྲ་ནཱི་ལ་དང༌། ཨིནྡྲ་ནཱི་ལ་ཆེན་པོ་དང༌། མདུན་ནས་འོད་ཟེར་ཆེན་པོ་བར་
སྣང་ལ་ཁྱབ་པས་ཀུན་ནས་མཛེས་པ་དང༌། རིན་པོ་ཆེ་རྡོ་རྗེ་ཐུར་མས་བརྒྱན་པའི་གདུགས་ཡུ་བས་བསྟོད་པ་བྱེ་བ་ཁྲག་ཁྲིག་འབུམ་ཕྲག་དུ་མའི་གྲིབ་མས་བསྒྲིབས་ཤིང་བསྐྱབས་པ། དཔག་བསམ་གྱི་ཤིང་དུ་མས་བརྒྱན་པས་མཛེས་པ། རྡོ་རྗེ་རིན་པོ་ཆེའི་པདྨའི་ཁྲི་ལ་ཀུན་དགའ་ར་བའི་དབུས་ན་བཞུགས་ཏེ། ཉི་མ་སྟོང་བས་ལྷག་པའི་འོད་ཟེར་གྱིས་དཀྱིལ་འཁོར་གྱི་ཕྱོགས་ནི་རྣམ་པར་བརྒྱན། ཟླ་བ་ཉ་བ་ལྟར་འཇིག་རྟེན་ཐམས་ཅད་ལ་ནི་སྡུག་པར་སྣང༌། དཔག་བསམ་གྱི་ཤིང་ལྗོན་པ་ཆེན་པོ་ལྟར་སངས་རྒྱས་ཀྱི་ཆོས་རྣམས་ནི་ཤིན་ཏུ་རྒྱས་ཤིང་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ། །མ་འདྲེས་པ། ཡོངས་སུ་དག་པ། ཡོངས་སུ་རྫོགས་པ། ཡོངས་སུ་བྱང་བ། ཡང་དག་པར་རབ་ཏུ་སྟོན་ཏོ། སྤྱི་གཙུག་ནི་སེམས་ཅན་ཐམས་ཅད་ཀྱིས་བལྟ་བར་མི་མཐོང༌། བདུད་ཀྱི་ལས་ཐམས་ཅད་ལས་ནི་དེས་པར་རྒྱལ། དེ་ཁོ་ན་ཐམས་ཅད་མཁྱེན་པ་ཉིད་ཐུགས་སུ་ཆུད། ཡེ་ཤེས་ཀྱི་སྤྱན་ལྔ་ནི་མངའ། རྣམ་པ་ཐམས་ཅད་མཁྱེན་པའི་མཆོག་དང་ནི་ལྡན། ཐམས་ཅད་མཁྱེན་པའི་ཡེ་ཤེས་དང་ནི་ལྡན། སངས་རྒྱས་ཀྱི་ཆོས་ཐམས་ཅད་དང་ནི་ལྡན། བདུད་དང་ཕས་ཀྱི་རྒོལ་བའི་ཚོགས་ཐམས་ཅད་ནི་བཅོམ། གྲགས་པ་དང༌། སྒྲ་དང༌། ཚིགས་སུ་བཅད་པ་ནི་འཕགས། ཁྱུ་མཆོག་དང་སེང་གེ་སྒྲ་ནི་སྒྲོགས། མ་རིག་པའི་མུན་པ་ནི་ཀུན་ནས་བསལ། བསྐལ་པ་བྱེ་བ་ཁྲག་ཁྲིག་འབུམ་ཕྲག་གྲངས་མེད་དཔག་ཏུ་མེད་པར་སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་དང༌། ཐབས་དང༌། སྟོབས་དང༌། སྨོན་ལམ་དང༌། ཡེ་ཤེས་ཀྱི་ཕ་རོལ་ཏུ་ཕྱིན་པ་དང༌། དཀའ་བ་སྤྱོད་པས་མངོན་པར་གྲུབ་པའི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་སྐུ་བརྒྱན་པས་མཛེས་ཤིང་རིན་པོ་ཆེ་རྡོ་རྗེ་ཆེན་པོའི་པདྨའི་སྙིང་པོ་སེང་གེའི་ཁྲི་ལ་བཞུགས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་གནས་དང་འཁོར་ཕུན་སུམ་ཚོགས་པའི་གནས་སྐབས་ཏེ་དང་པོའོ།། །།དེའི་ཚེ་ཞེས་བྱ་བ་ནི།
བཅོམ་ལྡན་འདས་ལ་བྱང་ཆུབ་སེམས་དཔའ་དང༌། ཉན་ཐོས་ལ་སོགས་པའི་འཁོར་བཞི་ཚོགས་པའི་ཚེ་ནའོ། །མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་ཞེས་བྱ་བ་ནི། འཛམ་བུའི་དབུས་ཀྱི་གྲོང་ཁྱེར་ཆེན་པོ་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ནི་སྔོན་འདས་པའི་སངས་རྒྱས་རབས་བདུན་གྱི་བཞུགས་གནས་ཡིན་ཏེ། དེ་ཡང་མར་མེ་མཛད་དང༌། སངས་རྒྱས་རྣམ་པར་གཟིགས་དང༌། གཙུག་ཏོར་ཅན་དང༌། ཐམས་ཅད་སྐྱོབ་དང༌། ལོག་པར་དད་སེལ་དང༌། གསེར་ཐུབ་དང་འོད་སྲུངས་དང་བདུན་ལ་སོགས་པ་བྱེ་བ་ཁྲག་ཁྲིག་གངྒཱའི་ཀླུང་གི་བྱེ་མ་སྙེད་ཀྱི་སངས་རྒྱས་ཀྱི་བཞུགས་གནས་སོ། །དེ་བཞིན་དུ་ཉན་ཐོས་དགྲ་བཅོམ་པ་རྣམས་དང༌། དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་རྣམས་གནས་པའོ། །མ་འོངས་པའི་བྱམས་པ་ལ་སོགས་པའི་སངས་རྒྱས་རྣམས་ཀྱང་དེ་བཞིན་ནོ། །ད་ལྟར་ཡང་ཤཱཀྱ་སེང་གེ་བཞུགས་ཤིང་སེམས་ཅན་གྱི་དོན་མཛད་ཅིང་ཆོས་སྟོན་པའོ། །ལྷ་དང་ལྷ་མ་ཡིན་དང་མི་དང་མི་མ་ཡིན་པས་མཆོད་པར་འོས་པའི་གནས་བྱང་ཆུབ་ཀྱི་ཞིང་ཁམས་བླ་ན་མེད་པ་ཡང་དག་པར་རྫོགས་པའི་སངས་རྒྱས་རྣམས་ཀྱང་བྱང་ཆུབ་འགྲུབ་པའི་གནས་སོ། །དགེ་སློང་ས་རི་ཞེས་བྱ་བ་ནི། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་གནས་ཤིང་གསར་དུ་རབ་ཏུ་བྱུང་བའོ། །གཞོན་ནུ་ཐོར་བུ་ལང་ཚོ་ལ་བབ་པ། རབ་ཏུ་བྱུང་ནས་རིང་བོ་མ་ལོན་པ་ཞེས་བྱ་བ་ནི། འདུལ་བའི་ཆོས་མ་མཉན་པས། བཙུན་པའི་སྤྱོད་ལམ་མི་ཤེས་པས་དགེ་སློང་གི་སྤྱོད་ལམ་མི་བྱེད་ཅིང་རྩེ་བ་ལ་དགའ་བའོ། །བསྙེན་པར་རྫོགས་ནས་རིང་པོ་མ་ལོན་པ་ཞེས་བྱ་བ་ནི་རབ་ཏུ་བྱུང་ནས་ཞག་བདུན་ལོན་ཏེ། བསྙེན་པར་རྫོགས་པར་མ་ཤེས་པས་གཞན་དང་སྤྱོད་ལམ་མ་མཐུན་པའོ། །ཆོས་འདུལ་བ་འདིར་འོངས་ནས་རིང་པོར་མ་ལོན་པ་ཞིག་གནས་པ་དེ་ཞེས་བྱ་བ་ནི། རབ་ཏུ་བྱུང་ནས་ཞག་བདུན་ལོན་ཏེ། ལོ་གྲངས་བཅུ་གཉིས་ལོན་པ་དང༌། ལུས་ངག་ཡིད་གསུམ་འདུལ་བའི་བྱ་བ་མི་ཤེས་པས་ཟག་པ་ཟད་པའི་དགེ་
འདུན་གྱི་གནས་སུ་བྱོན་ནས། རང་གི་སྟེན་ལ་མི་འདུག་ཅིང་རང་དགར་གནས་པའོ། །དགེ་འདུན་གྱི་བསྲོ་ཁང་བྱ་བའི་ཕྱིར་ཤིང་གཤེགས་པ་དང་ཞེས་བྱ་བ་ནི། དགེ་སློང་ས་རི་ཞེས་བྱ་བ་དེ་ཅང་མི་ཤེས་པའི་ཕྱིར་ན། དགེ་འདུན་གྱི་བསྲོ་ཁང་ལ་རྩེད་མོ་རྩེར་ཕྱིན་ནོ། །ཤིང་རུལ་པའི་སེར་ཀ་ཞིག་ནས་སྦྲུལ་ནག་པོ་ཆེན་པོ་ཞིག་བྱུང་ནས་ཞེས་བྱ་བ་ནི། འདུལ་ཁྲིམས་ཉམས་པས་དེའི་རྣམ་པར་སྨིན་པས་མཆེ་བའི་དུག་ཅན། ཀླུ་གདོལ་བའི་རིགས་དུག་རྣམ་པ་བཞི་དང་ལྡན་པ། སྦྲུལ་ནག་པོའི་གཟུགས་ཅན། མིག་ན་མཐོང་བའི་དུག་ཡོད་པ། བསམ་པའི་དུག་ཅན་རེག་པའི་དུག་ཡོད་པ་དུག་རྣམ་པ་བཞི་དང༌། རིགས་རྣམ་པ་བཞི་དང༌། གང་གི་དུས་ན་ཞེ་ན། ཉམས་པ་དང་གང་ཟག་གི་བྱ་བའི་བསམ་པ་གཏང་བ་དང༌། ཀླུ་དེའི་རིགས་ཀྱིས་ཀྱང་ཚོར་ཏེ། རིགས་ནི་བྲམ་ཟེ་ཡིན་ཏེ། ལོག་པའི་དུས་ཀྱང་དེའི་དུས་ན་འབྱུང་སྟེ། དུག་ཀྱང་དེའི་དུས་སུ་ཆུད་དོ། །དེ་ལ་བསམ་པའི་དུག་ཅེས་བྱའོ། །མཐོང་བའི་དུག་ནི་ཉམས་པ་དང་གང་ཟག་དང་གང་ཟག་གི་རྫས་རྣམས་མཐོང་སྟེ། དེ་མཐོང་བ་ཙམ་གྱིས་ཁྲོས་ཤིང་མཐོང་བ་ཙམ་གྱིས་ཐལ་བར་བརླག་པའོ། །ལོག་པའི་དུས་ཀྱང་དེ་ཡིན་ཏེ། དེའི་རིགས་ནི་རྒྱལ་རིགས་སོ། །རེག་པའི་དུག་ནི་དེ་མཐོང་བ་ཙམ་གྱིས་རེག་སྟེ། དེ་ནི་མཆེ་བའི་དུག་ཅེས་བྱའོ། །རིགས་ནི་རྗེའུ་རིགས་སོ། །ཁ་རླངས་ཀྱི་དུག་ནི། བསམ་པ་དང་མཐོང་བ་དང་རེག་པའི་སྒོ་ནས་འབྱུང་སྟེ། བསམ་པ་བཏང་བ་ཙམ་གྱིས་ཀྱང་ཁ་རླངས་ཀྱི་དུག་འབྱུང་ཞིང༌། མཐོང་བས་ཀྱང་དེ་བཞིན་ནོ། །རེག་པ་ལྟ་ཅི་སྨོས་ཏེ། ཁ་རླངས་ཀྱི་དུག་ནི་གཞན་དང་མི་འདྲའོ། །མི་སྲུན་ཏེ་གདོལ་བའི་རིགས་ཅན། ཁ་རླངས་ཀྱི་དུག་དེ་ནག་པོའི་དུག་ཅེས་བྱའོ། །དེའི་རིགས་ནི་སྦྲུལ་ནག་པོའོ། །ཤིང་གཤེགས་ནས་བྱུང་ཞིང་འཇིགས་སུ་རུང་བ། དུག་རྣམ་པ་བཞིའི་རང་བཞིན། དགེ་སློང་ས་རིས་མཚོར་བར་བྱུང་ངོ༌། །རྐང་པ་གཡས་པའི་མཐེ་བོང་ལ་ཟིན་པ་དང་ཞེས་བྱ་བ་ནི། མི་སྲུན་པ་སྦྲུལ་ནག་པོས་ཀྱང་དགེ་སློང་ས་རི་བརྟུལ་ཞུགས་ཉམས་པ། མཆེ་བའི་དུག་གིས་ཟིན་པའོ། །དེ་ནི་གློ་བུར་གྱིས་ཉམས་པ་ཡིན་ནོ། །ལུས་སྦྲིད་ནས་སལ་འགྱེལ་ཏེ་ཞེས་བྱ་བ་ནི། དུག་གི་ནུས་པས་མདོག་ཤོར་
ཞིང༌། ལུས་ཐམས་ཅད་སྐྲངས་ཤིང་སེམས་ལ་དྲན་པ་མེད་ཅིང༌། ཁ་ནས་ཀྱང་དབུགས་མཐོན་ནོ། །དགེ་སློང་ས་རི་དེ་ཡང་ནད་ཆེན་པོས་བཏབ་ཅིང་སྡུག་བསྔལ་ཆེན་པོས་ཉེན་པའོ། །དབུ་བར་སྐྱུག་ཅིང་མིག་ཀྱང་བསྐྱུར་ནས་ཉལ་བ་དང་ཞེས་བྱ་བ་ནི་མཆེ་བའི་དུག་གིས་བཏབ་བས། འཆི་བའི་དུས་ལ་བབ་ཅིང་མིག་ཤོར་ཞིང་ལྕེ་ཡང་རྡོག་པོར་སོང་བའོ། །ཚེ་དང་ལྡན་པ་ཀུན་དགའ་བོ་ཞེས་བྱ་བ་ནི་བྱམས་པ་དང་སྙིང་རྗེ་ཆེ་ཞིང་ཐོས་པ་ཆེ་བ། སེམས་ཅན་ཐམས་ཅད་ལ་སྙིང་རྗེ་མཛད་པ། སངས་རྒྱས་ཀྱི་བཀའ་ལས་མི་འདའ་བ། འདུལ་བའི་སྒོ་ནས་དགྲ་བཅོམ་པ་རྣམས་ལ་བསྙེན་བཀུར་མཛད་པ། སྡོམ་པ་ལ་གནས་ཤིང༌། སྙིང་རྗེ་དང་ལྡན་པ་ཀུན་དགའ་བོས་ནི། དགེ་སློང་རི་ནད་ཀྱིས་བཏབ་པ་མཐོང་ངོ༌། །མཐོང་བས་རིངས་པས་བཅོམ་ལྡན་འདས་ག་ལ་དེར་སོང་སྟེ་ཞེས་བྱ་བ་ནི། སྦྲུལ་ནག་པོས་ཟིན་པ་མཐོང་སྟེ། ཐབས་མི་རྙེད་ཅིང་ཐབས་ཀྱི་དོན་ལ་བཅོམ་ལྡན་འདས་ཀྱི་སྤྱན་སྔར་ཕྱིན་ནོ། །བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཞེས་བྱ་བ་ནི། དགེ་སློངས་རི་སྙིང་རྗེ་ཞིང་བཅོམ་ལྡན་འདས་ལ་གུས་པས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་བཅོམ་ལྡན་འདས་ལའོ། །ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཞེས་བྱ་བ་ནི། བཅོམ་ལྡན་འདས་ཀྱི་མདུན་དུ་བྱང་ཆུབ་སེམས་དཔའ་དང༌། ཉན་ཐོས་དང༌། དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་དང༌། ལྷ་དང་མི་ལ་སོགས་པའི་དབུས་སུའོ། །བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ་ཞེས་བྱ་བ་ནི། དགེ་སློང་ས་རིའི་དོན་དུ་བཅོམ་ལྡན་འདས་ལ་ཞུ་བ་ཕུལ་བའོ། །བཙུན་པ་བཅོམ་ལྡན་འདས་ཞེས་བྱ་བ་ནི། རང་བཞིན་གྱིས་བཙུན་པ་སྟེ། དེ་ཡང་སྐུ་གསུང་ཐུགས་ཐུལ་ཞིང༌། མི་དགེ་བ་བཅུ་སྤངས་ཤིང་དགེ་བ་བཅུ་དང་དུ་ལེན་པ་སྟེ། སེམས་ཅན་གྱི་དོན་དུ་རང་བཞིན་གྱིས་རབ་ཏུ་བྱུང་བའོ། །དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ལ་སྙིང་རྗེས་ཁྱབ་པའོ། །བཅོམ་ལྡན་འདས་ནི་གཏི་མུག་
དང། ཞེ་སྡང་དང༌། འདོད་ཆགས་དང༌། སེར་སྣ་དང༌། ཕྲག་དོག་དང༌། དེ་རྣམས་བཅོམ་ཞིང་འཁོར་བ་ལས་ལོག་པའོ། །ཡང་ན་བག་ཆགས་ཀྱི་ཤེས་བྱའི་སྒྲིབ་པ་བཅོམ་པའོ། །ལྡན་པ་ནི་སྐལ་བ་དང་ལྡན་པའོ། །འདས་པ་ནི་འཁོར་བ་དང་མྱ་ངན་ལས་འདས་པའོ། །མཉན་ཡོད་ན་ཞེས་བྱ་བ་ནི། ཡུལ་མ་ག་དྷཱའོ། །རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་འདི་ན་ཞེས་བྱ་བ་ནི། སངས་རྒྱས་དང་བྱང་ཆུབ་སེམས་དཔའ་དང༌། ཉན་ཐོས་དགྲ་བཅོམ་པ་དང༌། དགེ་སློང་དང༌། དགེ་སློང་མ་དང༌། དགེ་བསྙེན་དང་དགེ་བསྙེན་མ་ལ་སོགས་པའི་གནས། ཡང་ན་དངོས་གྲུབ་ཀྱིས་གཅེས་པའོ། །དགེ་སློང་ས་རི་ཞེས་བྱ་བ་ནི་བྲམ་ཟེའི་རིགས་ལས་བོས་པ་སྟེ། དགེ་སློང་ཡང་རབ་ཏུ་བྱུང་བའི་མིང་གྲགས་པའོ། །དེ་གཉིས་འཛོམ་པས་ན་དགེ་སློང་ས་རི་ཞེས་པའོ། །གཞོན་ནུ་ཐོར་བུ་ལང་ཚོ་ལ་བབ་པ་ཞེས་བྱ་བ་ནི། ལོ་བཅུ་གཉིས་ལོན་པ་སྟེ། གཞོན་ནུའི་དུས་སུ་རབ་ཏུ་བྱུང་ཞིང་འདུལ་བ་ནི་མི་ཤེས་པའོ། །རབ་ཏུ་བྱུང་ནས་རིང་པོ་མ་ལོན་པ་ཞེས་བྱ་བ་ནི། རབ་ཏུ་བྱུང་ནས་ཞག་བདུན་ལོན་པ། དགེ་སློང་གི་སྤྱོད་པ་མི་ཤེས་པ། རྩེ་བ་ལ་དགའ་བའོ། །བསྙེན་པར་རྫོགས་ནས་རིང་པོ་མ་ལོན་པ་ཞེས་བྱ་བ་ནི། བསྙེན་པར་རྫོགས་ནས་ཞག་གཅིག་ལོན་པའོ། །ཆོས་འདུལ་བ་འདིར་མཆིས་ནས་རིང་པོ་མ་ལོན་པ་ཞིག་གནས་པ་དེ་ཞེས་བྱ་བ་ནི། ལུས་ངག་ཡིད་གསུམ་འདུལ་བས་ན་འདུལ་བ་སྟེ། ཆོས་ཀྱང་དེ་ནས་གནས་པའོ། །འདིར་མཆིས་ནས་རིང་པོ་མ་ལོན་པ་དགེ་སློང་གི་སྤྱོད་པ་མི་ཤེས་ཤིང༌། གཞོན་ནུའི་སྤྱོད་པ་ལ་གནས་པའོ། །དགེ་འདུན་གྱི་བསྲོ་ཁང་བགྱི་བའི་སླད་དུ་ཤིང་གཤེགས་པ་དང༌། ཤིང་རུལ་པའི་སེར་ཀ་ཞིག་ནས་སྦྲུལ་ནག་པོ་ཆེན་པོ་ཞིག་བྱུང་ནས་ཞེས་བྱ་བ་ནི། བཅོམ་ལྡན་འདས་དགེ་སློང་ས་རི་རྩེད་མོ་ལ་ཕྱིན་པ་སྟེ། ཀླུ་གདོལ་བའི་རིགས་མཆེ་བའི་དུག་ཅན་འཇིགས་སུ་རུང་བ་དུག་རྣམ་པ་བཞིའི་རང་བཞིན་ཅན། ཤིང་རུལ་པ་གཤེགས་པའི་ནང་ནས་བྱུང་བའོ། །རྐང་པ་གཡས་པའི་མཐེ་བོང་ལ་ཟིན་པ་དང་ཞེས་བྱ་བ་ནི་གློ་བུར་གྱི་རྣམ་པར་སྨིན་པས་གཟུང་བས་སོ། །ལུས་སྦྲིད་ནས་དོགས་ལ་འགྱེལ་ཏེ་
ཞེས་བྱ་བ་ནི། ཕྱོགས་རྣམས་མི་ཤེས་ཤིང༌། ལུས་པོ་ཐམས་ཅད་སྐྲངས་ཤིང་འགས་པར་གྱུར་པའོ། །དབུ་བར་སྐྱུག་ཅིང་ལུས་ཀྱང་བསྒྱུར་ནས་ཉལ་ཞིང་མཆིས་ན་ཞེས་བྱ་བ་ནི། མིག་འཛུམས་མི་ཤེས་ཤིང་ལུས་ཀྱང་རེངས་ནས་ཁ་ནས་དབུགས་ཀྱང་མི་ཐོན་པའོ། །བཙུན་པ་བཅོམ་ལྡན་འདས་དེ་ལ་བདག་གིས་ཇི་ལྟར་ནན་ཏན་བགྱི་ཞེས་བྱ་བ་ནི། སྔགས་དང་ཐབས་ཅི་ཡོད་ཅེས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་དགེ་སློངས་རི་སྦྲུལ་ནག་པོས་ཟིན་པའི་གནས་སྐབས་ཏེ་གཉིས་པའོ།། །།དེ་སྐད་ཅེས་གསོལ་པ་དང་ཞེས་བྱ་བ་ནི། དགེ་སློང་ས་རིའི་དོན་ལ་ཚེ་དང་ལྡན་པ་ཀུན་དགའ་བོས་སྨྲས་པའི་རྟིང་ལའོ། །བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ་ཞེས་བྱ་བ་ནི་མཚན་བཟང་པོ་སུམ་ཅུ་རྩ་གཉིས་དང་ལྡན་པ། དཔེ་བྱད་བཟང་པོ་བརྒྱད་ཅུ་དང་ལྡན་པ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་གྱི་དོན་ལ། ཀུན་དགའ་བོའི་དྲུང་དུ་འཁོར་བཞི་དང་ཆས་ཏེ་ཁྱུ་མཆོག་དང་སེང་གེའི་སྒྲ་སྒྲོགས་པའོ། །ཀུན་དགའ་བོ་དེ་བཞིན་གཤེགས་པའི་བཀས་ཁྱོད་སོང་ལ་ཞེས་བྱ་བ་ནི། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱི་དྲུང་དུ་རྗེས་སུ་ཡི་རང་ཞིང་གསུངས་པའོ། །དེ་བཞིན་དུ་ཡང་དག་པར་རྫོགས་པའི་སངས་རྒྱས་གཙུག་ཏོར་ཅན་ལ་སོགས་པའི་སངས་རྒྱས་རྣམས་ཀྱིས་ཀྱང་རྗེས་སུ་ཡི་རང་ཞིང་གསུངས་པ་སྟེ། དེ་བཞིན་དུ་མ་འོངས་པའི་སངས་རྒྱས་རྣམས་ཀྱིས་ཀྱང་རྗེས་སུ་ཡི་རང་ཞིང་གསུངས་པའོ། །ད་ལྟར་ཡང་ངས་ཀྱང་གསུངས་ཏེ། ཁྱོད་ཀྱིས་ཀྱང་དེ་བཞིན་གཤེགས་པའི་བཀའ་ལ་བརྟེན་ལ་མཛོད་ཅིག་ཅེས་པའོ། །དེ་བཞིན་དུ་གཤེགས་པས་ན། དེ་བཞིན་གཤེགས་པ་སྟེ། ཡང་ན་ངོ་བོ་ཉིད་དང་བྲལ་ཞིང་བདེ་བ་ཆེན་པོ་ཐོབ་པ་སྟོང་པ་ཉིད་ཀྱི་རང་བཞིན་ནོ། །མཚན་མ་མེད་པའི་ཏིང་ངེ་འཛིན་དང༌། སྨོན་པ་མེད་པའི་ཏིང་ངེ་འཛིན་གྱི་རང་བཞིན་ཐོབ་པ། དེ་འདྲའི་དེ་བཞིན་གཤེགས་པའི་བཀའ་ལ་ཉོན་ལ་གསུངས་ཤིག་ཅེས་པའོ། །རིག་སྔགས་ཀྱི་རྒྱལ་མོ་རྨ་བྱ་
ཆེན་མོ་འདིས་ཞེས་བྱ་བ་ནི། རིག་སྔགས་ནི་རྣམ་པ་གཉིས་ཏེ། ཕྱིའི་རིག་པ་དང༌། ནང་གི་རིག་པའོ། །ཕྱིའི་རིག་པ་ནི། རིག་པ་རྣམ་པ་ལྔ་མཁྱེན་ཅིང༌། ཡང་དག་པའི་ཡེ་ཤེས་ཀྱི་ལམ་ནས་ཕ་རོལ་ཏུ་ཕྱིན་པ་དྲུག་སྤྱད་ནས་རྫོགས་པར་སངས་རྒྱས་པའོ། །ནང་གི་རིག་པ་ནི་ཡང་དག་པའི་ཡེ་ཤེས་ཏེ། ངོ་བོ་ཉིད་དང་བྲལ་ཞིང་ཤེས་རབ་ཀྱི་རང་བཞིན་མི་དམིགས་པའི་ཡེ་ཤེས་སོ། །རྒྱལ་མོ་ནི་ཐམས་ཅད་ལས་རྒྱལ་ཏེ། དེ་ཡང་བདུད་རྣམས་ཀྱིས་མི་ཚུགས་ཤིང་འཁོར་བ་བཅོམ་པའོ། །ཆེན་མོ་ནི་ནམ་མཁའ་བཞིན་དུ་ཁྱབ་སྟེ། སེམས་ཅན་གྱི་དོན་ལ་ཐུགས་རྗེས་ཁྱབ་པའོ། །རྨ་བྱ་ནི་སྒྱུ་མ་ལྟ་བུ་སྟེ། སྒྱུ་མའི་རང་བཞིན་གྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལ་སོགས་པའི་སེམས་ཅན་ལ་སྙིང་རྗེས་ཁྱབ་ནས་རིག་པའི་ལམ་ནས་འཇུག་པའོ། །ཡང་ན་རྨ་བྱ་ནི་སྐུ་གསུམ་གྱི་རང་བཞིན་ཡིན་ཏེ། ནམ་མཁའ་ལྟ་བུ་ནི་དམིགས་པའི་རང་བཞིན་ཆོས་ཀྱི་སྐུའོ། །དེའི་གྲིབ་མ་ནི་སྒྱུ་མ་ལྟ་བུར་ལོངས་སྤྱོད་རྫོགས་པའི་སྐུའོ། །དེས་སེམས་ཅན་ལ་དོན་བྱེད་ཅིང་ནམ་མཁའ་ལྟ་བུར་ཁྱབ་སྟེ་སྦྲུལ་པའི་སྐུའོ། །ཡང་ན་རྨ་བྱ་ནི་ཡང་དག་པའི་ཡེ་ཤེས་ཀྱིས་ཕྱིའི་དུག་དང་ནང་གི་དུག་བཅོམ་ཞིང་ཟས་སུ་དུག་ཟ་བའོ། །འདིས་ནི་སྡུག་བསྔལ་ཐམས་ཅད་དང་བྲལ་བར་བྱེད་པ་སྟེ། གཟི་བརྗིད་ཆེ་བ་དང༌། མཐུ་ཆེ་བ་དང༌། སྟོབས་དང་ལྡན་ཞིང༌། ངན་སོང་གསུམ་འཇོམས་པ་སྟེ། སེམས་ཅན་བདེ་ལ་འགོད་པའོ། །འདི་ཞེས་པ་རྨ་བྱ་ཆེན་མོའོ། །དགེ་སློང་ས་རི་ལ་སྲུང་བ་གྱིས་ཤིག་ཅེས་བྱ་བ་ནི། གདོན་རིགས་མི་གཅིག་པ་སྟོང་ཕྲག་བརྒྱད་ཅུ་ཞེས་པ་དང༌། དེ་བཞིན་དུ་གདོན་རེ་རེ་ལའང་ཡིན་ཏེ། ནད་རིགས་མི་གཅིག་པ་བཞི་བརྒྱ་རྩ་བཞི། ནད་ཀྱི་རིགས་གཅིག་པ་ལ་ཡང་དེ་བཞིན་ནོ། །དུག་རྣམ་པ་བཞི་སྲུང་ཞིང་ངོ༌། །དགེ་སློང་ས་ར་ལེ་མཆེ་བའི་དུག་བཅོམ་ཞིང་ཉམས་པ་ཐམས་ཅད་སྐོང་བའོ། །དེ་བཞིན་དུ་གཞན་གྱི་དུག་ཀྱང་སྲུང་བར་བྱེད་པའོ། །སྲུང་བགྱིས་ཤིག་ཅེས་པ་ནི་སེམས་ཅན་ཐམས་ཅད་དང་དགེ་སློང་ས་རི་ལའོ། །སྦ་བ་དང་ཞེས་བྱ་བ་ནི་རིག་སྔགས་འདིའི་གཟི་བརྗིད་ཀྱིས། དུག་དང་
འབྱུང་པོ་དང༌། ནད་དང༌། ཉམས་པ་དང༌། སྡིག་པ་དང༌། ངན་སོང་གསུམ་ན་གནས་པ་སྦེད་པའོ། །ཡང་ན་སྔ་བ་ནི། སྡུག་བསྔལ་ཐམས་ཅད་ལས་ཐར་ཞིང་གཞན་རྣམས་ཀྱིས་མི་མཐོང་བར་འགྱུར་རོ། །ཡོངས་སུ་བསྐྱབ་པ་དང་ཞེས་བྱ་བ་ནི། སྡུག་བསྔལ་ལས་བསྐྱབ་པ་སྟེ། ཆད་པ་ཐམས་ཅད་བཅོམ་ཞིང་འཁོར་བའི་སྡུག་བསྔལ་ལས་སྐྱོབ་པའོ། །ཡོངས་སུ་གཟུང་བ་དང་ཞེས་བྱ་བ་ནི་འཇིགས་པ་ཐམས་ཅད་ལས་ཐར་བར་བྱེད་ཅིང༌། འཇིགས་པ་ལ་མ་བཏང་སྟེ། མི་དགེ་བ་བཅོམ་ཞིང༌། དགེ་བ་གཟུང་བའོ། །ཡོངས་སུ་བསྐྱབ་པ་དང་ཞེས་བྱ་བ་ནི་སྡིག་པ་ཐམས་ཅད་བཅོམ་ཞིང་འབྱུང་པོ་ལ་སོགས་པ་ཐམས་ཅད་ལས་བསྲུང་བ་སྟེ། མི་དགེ་བ་བཅོམ་ཞིང་དགེ་བ་ལ་བསྐྱང་བའོ། །ཞི་བ་དང་བདེ་ལེགས་སུ་གྱུར་པ་དང་ཞེས་བྱ་བ་ནི། ནད་དང༌། འབྱུང་པོ་དང༌། མི་དང་མི་མ་ཡིན་པ་ལ་སོགས་པ་ཞི་བར་བྱས་ཤིང༌། སྡིག་པ་ཐམས་ཅད་བཅོམ་ཞིང་འཁོར་བའི་སྡུག་བསྔལ་ལས་ཐར་པའོ། །འདིའི་གཟི་བརྗིད་ཀྱིས་བཀྲ་ཤིས་ཤིང༌། ནད་ཐམས་ཅད་བཅོམ་ཞིང་གང་ནས་གང་དུ་ཡང་བདེ་ལེགས་འབྱུང་བའོ། །ཆད་པ་སྤང་བ་དང་ཞེས་བྱ་བ་ནི། ལྷའི་གདོན་ལ་སོགས་པའམ། རྒྱལ་བོའམ། རྐུན་མ་དང༌། ཆོམ་རྐུན་ནམ། ཆུ་དང་མེའམ། དུས་མ་ཡིན་པར་འཆི་བ་བརྒྱད་དམ། མཁའ་འགྲོའམ། མ་མོའམ་གཤིན་རྗེའམ། དེ་ལ་སོགས་པ་ཐམས་ཅད་སྤངས་ཤིང༌། བདེ་བར་གནས་པའོ། མཚོན་ཆ་སྤང་བ་དང་ཞེས་བྱ་བ་ནི། ཁྲག་ཁྲུག་ཀུན་གྱི་སྡུག་བསྔལ་ཐམས་ཅད་སྤངས་པ་སྟེ། དེ་ལ་སོགས་པ་གློ་བུར་གྱི་མཚོན་ཆ་སྤངས་པའོ། །དུག་གཞི་བ་དང་ཞེས་བྱ་བ་ནི་མཆེ་བའི་དུག་ལ་སོགས་པ་སྤངས་ཏེ། དེ་རྣམས་ཀྱིས་མི་ཚུགས་ཤིང་དུག་བཅོམ་པའོ། །དུག་གསད་པ་དང་ཞེས་བྱ་བ་ནི། ནང་གི་དུག་གསུམ་ཕྱིའི་དུག་གསུམ་སྟེ། ནང་གི་དུག་གསུམ་འདོད་ཆགས་ཞེ་སྡང་གཏི་མུག་གོ །འདུག་པ་དང༌། བྱས་པ་དང༌། འགྲོ་བའི་དུག་གོ །དེ་རྣམས་བསད་ཅིང་ཡེ་ཤེས་རྣམས་ཤར་བར་བྱེད་པས་སོ། །མཚམས་གཅད་པ་དང་ཞེས་བྱ་བ་ནི། ཁོར་ཁོར་ཡུག་ཙམ་མཚམས་གཅད་དེ། འདིའི་
ནུས་པས་ཉེ་བར་མི་ནུས་སོ། །ས་བཅིང་བགྱིས་ཤིག་ཅེས་བྱ་བ་ནི། ཕྱོགས་མཚམས་སྟེང་རྣམས་བཅིངས་ཏེ་གང་གི་ངོས་ནས་ཀྱང་གླགས་ཚོལ་བར་མི་བྱེད་པའོ། །རིག་སྔགས་ཀྱི་རྒྱལ་མོ་འདིས་ལྷའི་གདོན་ལ་སོགས་པ་ཐམས་ཅད་བཅོམ་ཞིང་ནད་ལ་སོགས་པ་ལས་ཐར་བར་བྱེད་པའོ། །ལྷའི་གདོན་དང་ཞེས་བྱ་བ་ནི་བརྒྱ་བྱིན་གྱིས་གཙོ་བོ་བྱས་པ། ལྷའི་གདོན་རིགས་མི་གཅིག་པ་སྟོང་ཕྲག་བརྒྱད་ཅུའོ། །ལྷའི་གདོན་ནི་ཞལ་གཅིག་ཕྱག་གཉིས་པ། སྐུ་མདོག་དཀར་མོ་ཕྱག་ན་རྡོ་རྗེ་འཛིན་ཅིང༌། གླང་པོ་ཆེ་ལ་ཞོན་བའོ། །ཀླུའི་གདོན་དང་ཞེས་བྱ་བ་ནི། ཀླུ་རིགས་མི་གཅིག་པ་སྟོང་ཕྲག་བརྒྱད་ཅུ་སྟེ། དེ་ཡང་བྲམ་ཟེ་དང༌། རྒྱལ་རིགས་དང༌། རྗེའུ་རིགས་དང༌། དམངས་རིགས་དང་ངོ༌། །དེ་བཞིན་དུ་ས་བདག་དང་ས་སྲིན་ལ་སོགས་པ་ཡང་ཡིན་ནོ། །ཀླུའི་གདོན་ནི་སྣ་ཚོགས་ཀྱི་གཟུགས་ཡིན་ཏེ། སྐུ་མདོག་སྣ་ཚོགས་སུ་གནས་ཤིང་ཞལ་གཅིག་ཕྱག་གཉིས་བ། ཕྱག་ན་སྦྲུལ་ཞགས་འཛིན་ཅིང༌། དབུ་ལ་སྦྲུལ་གྱི་གདེངས་ཀ་དང་བཅས་པའོ། །ལྷ་མ་ཡིན་གྱི་གདོན་དང་ཞེས་བྱ་བ་ནི། ལྷ་མ་ཡིན་གྱི་རྒྱལ་པོ་ཐགས་བཟངས་རིས་ཀྱིས་གཙོ་བོ་བྱས་པ་ལྷ་མ་ཡིན་སྟོང་ཕྲག་བརྒྱད་ཅུ་སྟེ། དེའི་སྐུ་མདོག་དང་ཕྱག་མཚན་ནི་སྐུ་མདོག་མཐིད་ག་ཕྱག་ན་དབྱུག་ཏོ་བསྣམས་ཤིང༌། ཀུ་བེར་ལ་ཞོན་པའོ། །ཁྲོ་བོའི་ཚུལ་དུ་གནས་ཤིང་འཁྲུག་པ་ལ་དགའ་བའོ། །རླུང་ལྷའི་གདོན་དང་ཞེས་བྱ་བ་ནི། རླུང་ལྷའི་གདོན་རྣམ་པར་རྒྱལ་བྱེད་ལ་སོགས་པ་སྟེ། རླུང་ལྷའི་གདོན་སྟོང་ཕྲག་བརྒྱད་ཅུ་གཟུགས་མི་གཅིག་པ་གང་ནས་གང་དུ་རྒྱུ་བའོ། །སྐུ་མདོག་སྔོ་སྐྱ། ཕྱག་ན་བ་དན་འཛིན་ཞིང་ཤ་བ་ལ་ཞོན་པའོ། །ནམ་མཁའ་ལྡིང་གི་གདོན་དང་ཞེས་བྱ་བ་ནི། ནམ་མཁའ་ལྡིང་གི་རྒྱལ་པོ་གསེར་མིག་ལ་སོགས་པ་ནམ་མཁའ་ལྡིང་གི་རྒྱལ་པོ་སྟོང་ཕྲག་བརྒྱད་ཅུ་ལ་སོགས་བ། བྱའི་གཟུགས་སྣ་ཚོགས་མི་གཅིག་པའོ། །མིའི་ལུས་ལ་བྱའི་མགོ་གནས་ཤིང་མདོག་སེར་པོའོ། །མིག་དམར་ཞིང་མཆུ་མཐིང་གའོ། །གཤོག་པ་ཡོད་ཅིང་དབུ་ལ་རྭ་གནས་པའོ། །དྲི་ཟའི་གདོན་དང་གཞེས་པ་ནི། དྲི་ཟའི་རྒྱལ་པོ་ཟུར་ཕུད་ལྔ་བ་ལ་སོགས་པ་སྟེ། དྲི་
ཟའི་གདོན་སྟོང་ཕྲག་བརྒྱད་ཅུ། གཟུགས་མི་གཅིག་པ་སྣ་ཚོགས་གནས་ཤིང༌། གླུ་དང་བྲོ་ལ་དགའ་བ་སྟེ། སྐུ་མདོག་སེར་པོ་ཕྱག་ན་པི་ཝང་བསྣམས་པའོ། །མི་འམ་ཅིའི་གདོན་དང་ཞེས་བྱ་བ་ནི། ལྗོན་པ་ལ་སོགས་པ་ཡིན་ཏེ། མིའམ་ཅིའི་གདོན་སྟོང་ཕྲག་བརྒྱད་ཅུ་སྟེ། མགོ་རྟ་མགོར་གནས་ཤིང༌། ལུས་མིའི་ལུས་པོ་ལ། མདོག་ནི་མགོ་དམར་པོ། །ལུས་སེར་པོ་ཕྱག་ན་གླིང་བུ་བསྣམས་པའོ། །གླུ་ལ་དགའ་ཞིང་དབྱངས་བཟང་པོ་དང་ལྡན་པའོ། །ལྟོ་འཕྱེ་ཆེན་པོའི་གདོན་དང་ཞེས་བྱ་བ་ནི། ལྟོ་འཕྱེའི་རྒྱལ་པོ་གསེར་ཅན་ལ་སོགས་པ་ཡིན་ཏེ། ལྟོ་འཕྱེའི་གདོན་སྟོང་ཕྲག་བརྒྱད་ཅུ་གཟུགས་སྣ་ཚོགས་དང་ལྡན་ཞིང༌། མིའི་ལུས་ལ་སྦྲུལ་གྱི་མགོ་ཅན་ནོ། །སྐུ་མདོག་ནི་མཐིང་ག །ལུས་དམར་བ་ལ་ཕྱག་གཉིས་ཆ་ལང་འཛིན་པའོ། །སྒྲའི་ཚོགས་ལ་དགའ་ཞིང༌། གར་ཡང་སྐད་ཅིག་གིས་སྒྱུར་བའོ། །གནོད་སྦྱིན་གྱི་གདོན་དང་ཞེས་བྱ་བ་ནི། གནོད་སྦྱིན་གྱི་རྒྱལ་པོ་སོར་མོ་ལྔ་པ་ཡིན་ཏེ། གནོད་སྦྱིན་གྱི་གདོན་སྟོང་ཕྲག་བརྒྱད་ཅུ་དང༌། གཟུགས་སྣ་ཚོགས་གནས་ཤིང་ཆང་ལ་དགའ་བ། སྐུ་མདོག་སེར་པོ། ཕྱག་ན་རིན་པོ་ཆེའི་དབྱུག་ཏོ་བསྣམས་པའོ། །སྲིན་པོའི་གདོན་དང་ཞེས་བྱ་བ་ནི། བདེན་བྲལ་གྱི་རྒྱལ་པོ་འཇིགས་པ་ལ་སོགས་པ་ཡིན་ཏེ། སྲིན་པོའི་གདོན་སྟོང་ཕྲག་བརྒྱད་ཅུ་དང༌། ལྷོ་ནུབ་ན་གནས་ཤིང་ཕྱིའི་རྒྱ་མཚོའི་འགྲམ་ན་གནས་བ། མདོག་ནག་པོ། ཕྱག་ན་རལ་གྲི་འཛིན་པ། སྲིན་པོའི་གདོན་སྣ་ཚོགས་བསྡུས་པའོ། །ཡི་དགས་ཀྱི་གདོན་དང་ཞེས་བྱ་བ་ནི། ཡི་དགས་ཀྱི་གདོན་གསུས་ཆེན་ལ་སོགས་པ་ཡིན་ཏེ། ཡི་དགས་སྟོང་ཕྲག་བརྒྱད་ཅུ། གཟུགས་མི་གཅིག་པ་གནས་ཤིང༌། མདོག་ནག་པོ་སྐྲ་དང་སེན་མོ་རིང་བ། འཇིགས་སུ་རུང་བ་སྟེ། རུས་པ་ལ་པགས་པས་གཡོགས་པའི་གཟུགས་དང་འདྲ་བས་ཕྱག་ན་ཐོད་པ་བསྣམས་པའོ། །ཤ་ཟའི་གདོན་དང་ཞེས་བྱ་བ་ནི། ཤ་ཟ་སུམ་གྱུར་ལ་སོགས་པ་ཡིན་ཏེ། ཤ་ཟ་སྟོང་ཕྲག་བརྒྱད་ཅུ། ཤ་ཟ་མི་གཅིག་པ་གནས་ཤིང༌། ཕྱི་བའི་གདོང་ཅན་མདོག་སྣ་ཚོགས་གནས་ཤིང༌། ལག་ན་གྲི་གུག་ཐོགས་ཤིང་ནད་སྣ་ཚོགས་གཏོང་བའོ། །འབྱུང་པོའི་གདོན་དང་
ཞེས་བྱ་བ་ནི། འབྱུང་པོའི་འབྲས་བུ་གསུམ་པ་ལ་སོགས་པ་ཡིན་ཏེ། འབྱུང་པོའི་གདོན་སྟོང་ཕྲག་བརྒྱད་ཅུ། གཟུགས་སྣ་ཚོགས་གནས་ཤིང་ཐལ་བའི་མདོག་ཅན། ཐལ་བའི་བུམ་པ་འཛིན་པའོ། །གྲུལ་བུམ་གྱི་གདོན་དང་ཞེས་བྱ་བ་ནི། གྲུལ་བུམ་གྱི་གདོན་མགྲིན་པ་གསུམ་པ་རྣམས་ཡིན་ཏེ། གྲུལ་བུམ་གྱི་གདོན་སྟོང་ཕྲག་བརྒྱད་ཅུ། གསུས་པ་ཆེ་ཞིང་བཞིན་མི་སྡུག་པ། མགོ་བོ་ཆེ་ལ་མིག་གཡོ་བའོ། །མདོག་ལྗང་ནག་ཏུ་རབ་ཏུ་གནས་ཤིང་དབྱུག་པ་འཛིན་པའོ། །སྲུལ་པོའི་གདོན་དང་ཞེས་བྱ་བ་ནི། སྲུལ་པོའི་གདོན་སྟོང་ཕྲག་བརྒྱད་ཅུ། ཕག་པའི་མགོ་ཅན་ཏེ། ལུས་ནི་ཕག་པའི་མདོག་ཅན། བ་སྤུ་ཡང་ཁབ་དང་འདྲ་བ། ཕྱག་ན་མི་མགོ་འཛིན་པའོ། །ལུས་སྲུལ་པོའི་གདོན་དང་ཞེས་བྱ་བ་ནི། ལུས་སྲུལ་པོའི་གདོན་སྟོང་ཕྲག་བརྒྱད་ཅུ། ཕག་མགོ་ལྔ་ལྔ་ཡོད་པ། ཕག་གི་མགོ་བོ་དེ་ཡང་དཀར་པོ་དང༌། དམར་པོ་དང༌། སེར་པོ་དང༌། ནག་པོ་དང༌། ལྗང་གུའོ། །ལུས་ནི་ཐལ་བའི་མདོག་ཅན་ཏེ། ལག་ན་རྡོ་རྗེ་འཛིན་པའོ། །སྐེམ་བྱེད་ཀྱི་གདོན་དང་ཞེས་བྱ་བ་ནི། སྐེམ་བྱེད་ཀྱི་གདོན་དེ་ཡང་སྟོང་ཕྲག་བརྒྱད་ཅུ་སྟེ། སྤྱང་ཀིའི་མགོ་ཅན་ལ་མིའི་ལུས་པོ་ཡོད། སྦྱང་ཀི་བཞིན་དུ་ལུས་ཀྱང་ཁྲ་བོར་གནས་ཏེ། མདའ་གཞུ་འཛིན་ཅིང༌། སེམས་ཅན་རྣམས་འདར་བར་བྱེད་པའོ། །སྨྱོ་བྱེད་ཀྱི་གདོན་དང་ཞེས་བྱ་བ་ནི། སྨྱོ་བྱེད་ཀྱི་གདོན་སྟོང་ཕྲག་བརྒྱད་ཅུ་ཝའི་མགོ་ཅན་ཏེ། མདོག་ཝ་བཞིན་དུ་ཡོད་ཅིང་མིའི་ལུས་པོ་སྟེ། ཕྱག་ན་ཞགས་པ་བསྣམས་པའོ།། གྲིབ་གནོན་གྱི་གདོན་དང་ཞེས་བྱ་བ་ནི། གྲིབ་གནོན་གྱི་གདོན་སྟོང་ཕྲག་བརྒྱད་ཅུ་སྟེ། མིའི་ལུས་ལ་ཁྱིའི་མགོ་ཅན། མདོག་དམར་པོ་ལག་ན་འཁོར་ལོ་འཛིན་པའོ། །བརྗེད་བྱེད་ཀྱི་གདོན་དང་ཞེས་བྱ་བ་ནི། བརྗེད་བྱེད་ཀྱི་གདོན་སྟོང་ཕྲག་བརྒྱད་ཅུ་གནས་ཤིང༌། མིའི་ལུས་པོ་ལ་བྱི་ལའི་མགོ་ཅན། མདོག་ནག་པོ་རལ་གྲི་འཛིན་པའོ། །གནོན་པོའི་གདོན་དང་ཞེས་བྱ་བ་ནི། སྟོང་ཕྲག་བརྒྱད་ཅུ་རྩ་བཞི་ཡོད་དེ། དྲེད་མོའི་མགོ་ཅན་ལ། མདོག་ནི་སེར་མོ་ལག་ན་དགྲ་སྟ་འཛིན་པའོ། །སྐར་མའི་གདོན་དང་ཞེས་བྱ་བ་ནི། དེ་ཡང་རྒྱུ་སྐར་ཉི་ཤུ་
རྩ་བརྒྱད་ཡིན་ཏེ། སྨིན་དྲུག་དང་ནི་སྣར་མ་དང༌། །མགོ་དང་ལག་དང་ནབ་སོ་དང༌། །རྒྱལ་དང་སྐག་ཅེས་བྱ་བའོ། །མཆུ་གྲེ་དབོ་དང་མེ་བཞི་དང༌། །ནག་པས་རི་ས་གའོ། །ལྷ་མཚམས་དང་ནི་སྣྲོན་དང་སྣྲུབས། །ཆུ་སྟོད་དང་ནི་ཆུ་སྨད་དང༌། །གྲོ་ཞུན་བྱི་ཞུན་བདུན་རྣམས་སོ། །མོན་དྲེ་དང་ནི་མོན་གྲུ་དང༌། །ཁྲུམས་སྟོད་དང་ནི་ཁྲུམས་སྨད་དང༌། ནམ་གྲུ་ཐ་སྐར་བྲ་ཉེའོ། །དེའི་སྐུ་མདོག་དཀར་པོ་དང༌། ནག་པོ་དང༌། སེར་པོ་དང༌། དམར་པོ་དང༌། ལྗང་གུའོ། །ཕྱག་མཚན་ནི་འཁོར་ལོ་དང༌། དབྱུག་ཏོ་དང༌། པདྨ་དང་རལ་གྲིའོ། །གཤེད་བྱེད་དང་ཞེས་བྱ་བ་ནི། ལས་ཀྱི་རྣམ་པ་ཡིན་ཏེ། དེ་བྱེད་པ་གང་ཡིན་པར་གཤེད་བྱེད་དོ། །ཡང་ན་གཤེད་བྱེད་ནི། རྣམ་པར་སྨིན་པའི་ལས་སོ། །བསྒྱུར་བའི་ལས་དང་ཞེས་བྱ་བ་ནི། གློ་བུར་དུ་བྱུང་བ་སྟེ། དེའི་ལུས་བཅོམ་ཞིང་རླག་བར་བྱེད་བའོ། །བྱད་དང་ཞེས་བྱ་བ་ནི། རྣམ་པར་སྨིན་པ་དང༌། འཕྲལ་གྱི་ལས་ཡིན་ཏེ། དེ་ལྟ་བུ་ལས་ཀྱང་བཅོམ་ཞིང་སྲུང་བར་བྱེད་པའོ། །གཡེང་བྱེད་དང་ཞེས་བྱ་བ་ནི། བརྗེད་པར་བྱེད་པའི་ལས་ཡིན་ཏེ། དེ་ལྟ་བུའི་ལས་བཅོམ་ཞིང་སྲུང་བར་བྱེད་པའོ། །རོ་ལངས་དང་ཞེས་བྱ་བ་ནི། མི་མ་ཡིན་གྱི་རིགས་རོ་ལས་འབྱུང་སྟེ། དེ་རྣམས་ཀྱི་འཇིགས་བ་སྤོང་བར་བྱེད་ཅིང་ཟློག་པར་བྱེད་པའོ། །སེམས་བསྒྱུར་དང་ཞེས་བྱ་བ་ནི། དགེ་བའི་སེམས་སྡིག་པའི་སེམས་སུ་སྒྱུར་བར་བྱེད་པ་སྟེ། དེ་ནི་སེམས་བསྒྱུར་རོ། །ཡང་ན་སེམས་བསྒྱུར་ནི། མི་དགེ་བའི་སེམས་དང་ལྡན་པར་བསྒྱུར་བ་དེ་སེམས་བསྒྱུར་རོ། །རིག་སྔགས་ཀྱི་གཟི་བརྗིད་ཀྱིས་དའི་སེམས་ཀྱང་ཟློག་པར་བྱེད་པའོ། །སྤོད་གཏོང་དང་ཞེས་བྱ་བ་ནི། འཇིག་རྟེན་གྱི་རིག་པ་ཡིན་ཏེ། དེ་ནི་གཤིན་རྗེ་དང་མ་མོ་དང༌། རྒྱལ་པོ་ལ་སོགས་པར་བད་པའོ། །བཟའ་ཉེས་དང་ཞེས་བྱ་བ་ནི། བདུད་རྩི་དུག་ཏུ་སོང་བ་སྟེ། དེ་ཡང་བྱེ་བྲག་གིས་མ་ཞུ་བ་རྣམ་པ་གཉིས་འབྱུང་བའོ། །མ་ཞུ་བ་རྣམ་པ་གཉིས་ནི། དངས་མ་དང་ཚིགས་མའོ། །ཡང་ན་སྦྲང་རྩི་དང༌། མར་དང༌། དེ་ལ་སོགས་པ་ཉེས་པའོ། །སྐྱུགས་ཉེས་དང་ཞེས་བྱ་བ་ནི། འབྱུང་པོ་རྣམས་ཀྱིས་སྐྱུགས་ཉེས་པར་བྱས་ཏེ། དེ་ཟློག་པར་བྱེད་པ་ནི། རིག་སྔགས་ཀྱི་རྒྱལ་མོའོ། །ཡང་ན་སྐྱུགས་པ་དེ་ནི་སྨན་ལ་
སོགས་པའི་ནུས་པ་སྐྱུགས་ཉེས་པའོ། །གནོད་སྒྲིབ་དང་ཞེས་བྱ་བ་ཡང་གདོན་ཡིན། གདོན་གྱི་རིགས་སྟོང་ཕྲག་བརྒྱད་ཅུ་རྩ་བཞི་སྟེ། དེ་རྣམས་ཀྱིས་བསྒྲིབས་པས་ན་སྒྲིབ་པའོ། །ཡང་ནབ་ག་ཆགས་དང༌། ཤེས་བྱའི་སྒྲིབ་པས་བསྒྲིབས་པ་ནི་སྒྲིབ་པའོ། །གནོད་ལྟས་དང་ཞེས་བྱ་བ་ནི་འབྱུང་པོ་ལ་སོགས་པ་ཐམས་ཅད་ཀྱི་དབང་གིས་གནོད་པའི་ལྟ་བ་སྐྱེས་ཏེ། དེ་ལྟ་བས་ན་གནོད་ལྟས་སོ། །ཡང་ན་གནོད་ལྟས་བྱ་བ་ནི་གནོད་པར་བྱེད་པ་གང་ཡིན་པ་རྒྱལ་པོ་དང༌། རྐུན་མོ་དང༌། དགྲ་བོ་དང༌། དེ་ལ་སོགས་པ་ལྟ་བས་ན་ལྟ་བའོ། །ལྟ་བ་ངན་པ་མུ་སྟེགས་པ་ལ་སོགས་པ་ཆད་པར་ལྟ་བའི་རིགས་སོ། །བྲི་ཉེས་དང་ཞེས་བྱ་བ་ནི། བདེ་བར་གཤེགས་པའི་སྐུ་གཟུགས་རས་རིས་དང༌། བདེ་བར་གཤེགས་པའི་སྐུ་གླེགས་བམ་དང༌། དཀྱིལ་འཁོར་དང༌། དེ་ལ་སོགས་པ་བྲི་ཉེས་པའོ། །ཡང་ན་བྲི་བ་ཉེས་པ་ནི། ལྷག་པ་དང༌། ཆད་པ་སྟེ། སྦོམ་པ་དང༌། ཕྲ་བ་སྟེ། ཚད་དང་མི་ལྡན་པའོ། །སྒོམ་ཉེས་དང་ཞེས་བྱ་བ་ནི། བདེ་བར་གཤེགས་པའི་བཀའ་ནས་བྱུང་བའི་ཡང་དག་པའི་དོན་བསྒོམས་པས་ཏེ། དེ་སྒོམ་ཉེས་ན་སྒོམ་ཉེས་ཏེ། དེ་ཡང་བསྐྱེད་པའི་རིམ་པ་དང༌། རྫོགས་པའི་རིམ་པའོ། །ཡང་ན་སྒོམ་ཉེས་ནི། ཡང་དག་པའི་ཆོས་མི་སྒོམ་ཞིང་ལྟ་བ་ལོག་པར་གནས་པ། ཆོས་མ་ཡིན་པ་ལ་ཡིན་པར་བསྒོམ་པའོ། །སྨད་པ་དང་ཞེས་བྱ་བ་ནི། བླ་མའམ། སངས་རྒྱས་སམ། བྱང་ཆུབ་སེམས་དཔའ་འམ། དགྲ་བཅོམ་པ་དང༌། དགེ་སློང་ལ་སོགས་པ་འམ། དགེ་བཤེས་སམ། སྟོན་པའམ། མཁན་པོའམ། ཕ་མ་ལ་སོགས་པ་རང་ཆེ་བར་འདོད་ཅིང་གཞན་ལ་སྨོད་པར་བྱེད་པའི་ཕྱིར་སྨོད་པའོ། །རིམས་ཉིན་གཅིག་པ་དང་ཞེས་བྱ་བ་ནི། ཡམས་ཀྱི་ནད་ཡིན་ཏེ། དེ་ལ་ཚ་བ་སྐྱེ་ཞིང་འབྱུང་བ་སྟེ། ཉིན་གཅིག་པའོ་ཞེས་པའོ། །ཡང་ན་ཉིན་གཅིག་པ་ནི། ནང་དེ་དྲག་པོར་བྱུང་ཞིང་ཉི་མ་གཅིག་གིས་གློ་བུར་དུ་གསོད་པའོ། །ཉིན་གཉིས་པ་དང་ཞེས་བྱ་བ་ནི། སྔ་མ་བས་དྲག་པ་སྟེ། ཉི་མ་གཉིས་ཀྱིས་འཇོམས་པར་བྱེད་པའི་ཕྱིར་ན་ཉིན་གཉིས་པའོ། །ཉིན་གསུམ་པ་དང་ཞེས་བྱ་བ་ནི། དེ་བཞིན་དུ་ཉིན་གསུམ་པ་ལས་བྱུང་སྟེ། གསུམ་གྱིས་འཇོམས་པར་བྱེད་པས་ན་
གསུམ་པའོ། །ཉིན་བཞི་པ་དང་ཞེས་བྱ་བ་ནི་ཉི་མ་བཞིར་བྱུང་སྟེ། དེའི་ནད་ཀྱིས་སེམས་ཅན་ཐམས་ཅད་ཉོན་མོངས་པར་བྱེད་པས་ན་རིམས་ཏེ། ཞག་བཞིས་གསོད་པར་བྱེད་པས་ན་ཉིན་བཞི་པའོ། །ཉིན་བདུན་པ་དང་ཞེས་བྱ་བ་ནི། ནད་དེ་ཡང་དྲག་པོར་བྱུང་ཞིང་ཞག་ལྔ་དང་དྲུག་པ་ལ་མི་ཤི་སྟེ། དེའི་ནད་ཞག་བདུན་གྱིས་འཇོམས་པར་བྱེད་པས་ན་བདུན་པའོ། །ཟླ་བ་ཕྱེད་པ་དང་ཞེས་བྱ་བ་ནི། ནད་དེ་ཡང་ཟླ་བ་ཕྱེད་ཀྱི་བར་དུ་འབྱུང་སྟེ། བྱུང་བའི་དུས་སུ་བྱུང་བས་ན་ཟླ་བ་ཕྱེད་པའོ། །ཟླ་བ་གཅིག་པ་དང་ཞེས་བྱ་བ་ནི། ཟླ་བ་ཕྱེད་བཞིན་དུ་འཇོམས་པའོ། །ཉིན་མོ་པ་དང་ཞེས་བྱ་བ་ནི། རིམས་དེས་ཉི་མ་གཅིག་གིས་འཇོམས་པས་ན་ཉིན་མོ་པའོ། །ཡང་ན་ཉིན་མོ་པ་ནི་ནམ་ལངས་ནས། ཉི་མ་མ་ནུབ་བར་དུ་འཇོམས་པས་ན་ཉིན་མོ་པའོ། །ཡུད་ཙམ་པ་དང་ཞེས་བྱ་བ་ནི། སྐད་ཅིག་མའི་ནད་ཡིན་ཏེ། ཡུང་ཙམ་གྱིས་སེམས་ཅན་ལ་གནོད་པས་ན་ཡུད་ཙམ་མོ། །ཡང་ན་ནད་དེ་བྱུང་ན་ལོང་ས་མེད་པས་ན་ཡུད་ཙམ་མོ། །རྟག་པའི་རིམས་དང་ཞེས་བྱ་བ་ནི། ནད་དེ་བྲལ་བར་མི་འདོད་ཅིང༌། ཤི་མིན་གསོན་མིན་ཚེ་རིང་ཞིད་ཡུན་རིངས་སུན་བའོ། །ཤི་བའི་དུས་སུ་ཡང་ནད་དེས་ཁྱེར་བས་ན་རྟག་པའོ། །རིམས་ལྡང་དུབ་པ་ཞེས་བྱ་བ་ནི། ཟླ་བ་གཅིག་ཏུ་བྱུང་ཞིང་ན། ཟླ་བ་གཅིག་གིས་སོས་ཏེ། དེ་བཞིན་དུ་ཞག་གཅིག་དང་གཉིས་དང་གསུམ་དང་བཞི་དང་བདུན་ལ་སོགས་པ་ཉི་མ་ཕྱེད་དང༌། ཕྱི་དྲོ་དང་སྐད་ཅིག་མའོ། །འབྱུང་པོའི་རིམས་དང་ཞེས་བྱ་བ་ནི། རིམས་མི་གཅིག་པའི་འབྱུང་པོ་རྣམས་ཀྱིས་ཀྱང་གླགས་ཚོལ་ཞིང༌། ནད་དྲག་པོ་འབྱུང་ཞིང༌། ལུས་ཀྱི་རྩ་རྣམས་ཀྱང་དྲག་པོའོ། །མིའི་རིམས་དང་ཞེས་བྱ་བ་ནི། ཆོམ་རྐུན་ནམ། རྒྱལ་པོའམ། དེ་ལ་སོགས་པས་བསྡིགས་པའི་རྐྱེན་གྱིས་འབྱུང་སྟེ། ན་ཚ་དྲག་པོས་བཏབ་པས་ན་མིའི་རིམས་ཞེས་བྱའོ། །མི་མ་ཡིན་པའི་རིམས་དང་ཞེས་བྱ་བ་ནི། མེ་དང་ཆུ་དང་བྱོལ་སོང་གི་རིགས་སྡེར་མོ་ཅན་དང་མཆེ་བ་ཅན་དང༌། རྭ་ཅན་ལ་སོགས་པ་འཇིགས་པའི་ནད་ནི་མི་མ་ཡིན་པའི་རིམས་སོ། །རླུང་ལས་གྱུར་པ་དང་ཞེས་བྱ་བ་ནི། རླུང་གི་ནད་རིགས་བཞི་བརྒྱ་རྩ་བཞི་ལས་བྱུང་སྟེ་ནད་དེའི་གཙོ་བོར་གྱུར་པ་ནི་རླུང་བཅུའོ། །
བཅུ་ལས་བསྡུས་པ་ལྔའོ། །ལྔ་ལས་བསྡུས་པ་གསུམ། གསུམ་ལས་བསྡུས་པ་གཅིག་སྟེ། སྲོག་རླུང་ཞེས་བྱ་བ་ཡིན་ནོ། །མཁྲིས་པ་ལས་གྱུར་པ་དང་ཞེས་བྱ་བ་ནི། མཁྲིས་པ་ལས་གྱུར་པ་བཞི་བརྒྱ་རྩ་བཞི་ལས་བྱུང་སྟ། དེ་ཡང་གསུམ་ལ་འདུས་པའོ། །གསུམ་གཅིག་ལ་འདུས། ནད་དེ་ཡང་ཚད་པ་ལས་བྱུང་བའོ། །བད་ཀན་ལས་གྱུར་པ་དང་ཞེས་བྱ་བ་ནི། བཞི་བརྒྱ་རྩ་བཞི་སྟེ། དེ་ཡང་གཉིས་ལ་འདུས་སོ། །གཉིས་ནི་གྲང་བ་དང་ཚད་པ་ལས་བྱུང་བའོ། །དེ་གཉིས་ནི་ཆུའི་ཁམས་སོ། །འདུས་པ་ལས་གྱུར་པ་ཞེས་བྱ་བ་ནི། རླུང་མཁྲིས་བད་ཀན་གསུམ་འདུས་པས་འདུས་པའོ། །འདུས་པ་དེ་རླུང་ཤས་ཆེ་བ་ཡང་ཡོད་དེ། དེ་བཞིན་དུ་མཁྲིས་པ་དང་བད་ཀན་ཡང་དེ་བཞིན་ནོ། །ཚད་པ་དྲག་པོ་སྐྱེ་ཞིང༌། བླ་འཆོལ་བྱེད་པ་སྟེ། རླུང་ཤས་ཆེ་བའོ། །ཚ་བར་ཡོད་ཅིང་ལྕེ་ལྐུགས་བ་ནི་མཁྲིས་པ་ཤས་ཆེ་བའོ། །ཚ་ཞིང་སེམས་གསལ་བ་ནི་བད་ཀན་ཤས་ཆེ་བའོ། །དེ་བས་ན་འདུས་པའོ། །གླད་པ་ན་བ་མེད་པར་གྱིས་ཤིག་ཅེས་བྱ་བ་ནི། རླུང་དང་བད་ཀན་གྱིས་ཀྱང་ན་བ་སྟེ། རིག་སྔགས་ཀྱི་རྒྱལ་མོའི་གཟི་བརྗིད་ཀྱིས་གླད་པ་ན་བ་མེད་པར་བྱེད་ཅིང༌། དེ་བཞིན་དུ་ཡན་ལག་ན་བ་ཡང་མེད་པའོ། །རླུང་གིས་ན་བ་ནི་བཟི་བ་བཞིན་དུ་གླེན་བར་སྣང་བའོ། །ཡང་ན་ལྡང་དུབ་བྱུང་སྟེ་དྲག་པོའི་ཚུལ་དུ་ན་བའོ། །ལངས་པའི་དུས་སུ་མགོ་འཐོམ་ཞིང་འགྱེལ་བའོ། །མཁྲིས་པས་ན་བ་ནི་ཁོལ་ལེར་ན་བ་སྟེ། ལྡང་དུབ་བྱེད་ཅིང་ནད་དྲག་པོས་ཐེབས་པས་ལངས་པས་འགྱེལ་བ་ནི་རླུང་ལ་སོགས་པ་བཞིན་དུའོ། །བད་ཀན་གྱིས་ན་བ་ནི་གསལ་ཞིང་ཡང་བ་སྟེ། ན་བ་དྲག་པོ་ནི་གཉིས་པ་བཞིན་དུའོ། །ན་བའི་དུས་ནི་རླུང་ལ་དགོངས་མོའོ། །བད་ཀན་ནི་ཐོ་རངས་ཁའོ། །མཁྲིས་པ་ནི་ཉི་མ་ཕྱེད་ནའོ། །གཞོགས་ཕྱེད་ན་བ་དང་ཞེས་བྱ་བ་ནི། སྔ་མ་བཞིན་དུ་ཡིན་ཏེ། དེ་ཡང་ལངས་པའི་དུས་སུ་འཐོམ་པ་མེད་པའོ། །དེ་བཞིན་དུ་མིག་ན་བ་ལ་སོགས་པ་ནི་རླུང་དང་མཁྲིས་པ་དང་བད་ཀན་ལས་གྱུར་པའོ། །མེད་པར་གྱིས་ཤིག་ཅེས་བྱ་བ་ནི། ཀུན་དགའ་བོས་ཡང་དག་པར་རྫོགས་པའི་སངས་རྒྱས་ཀྱི་བཀའ། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་བདེན་པ་དང༌། ནད་དང༌། འབྱུང་པོ་དང༌།
དུག་རྣམས་གཞོམ་པའོ། །མཚན་མོ་བདེ་ལེགས་ཉིན་བདེ་ལེགས། །ཉི་མའི་གུང་གི་བདེ་ལེགས་དང༌། །ཉིན་མཚན་ཀུན་དུ་བདེ་ལེགས་དག །ཅེས་བྱ་བ་ནི་དགེ་སློང་ས་རི་དང༌། སེམས་ཅན་ཐམས་ཅད་རྨ་བྱ་ཆེན་མོ་འདིའི་རིག་པའི་གསང་སྔགས་ཀྱིས་དུག་རྣམས་ཐམས་ཅད་བཅོམ་ཞིང༌། སྡུག་བསྔལ་ཐམས་ཅད་དང་བྲལ་ཞིང་འདི་གང་ན་བཞུགས་པའི་ས་ན་བདེ་བར་གནས་པའོ། །སངས་རྒྱས་ཀུན་གྱིས་བདག་ལ་སྩོལ། །ཞེས་བྱ་བ་ནི་སྔོན་ཡང་ཡང་དག་པར་རྫོགས་པའི་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་གངྒཱའི་ཀླུང་གི་བྱེ་མ་སྙེད་ཀྱི་དེ་བཞིན་གཤེགས་པའོ། །དེ་བཞིན་དུ་མ་འོངས་པ་རྣམས་ཀྱང་ངོ༌། །ད་ལྟར་བཞུགས་པ་ཡང་ཤཱཀྱ་ཐུབ་པ་སྟེ། དེ་རྣམས་ཀྱིས་བྱིན་གྱིས་བརླབས་ཤིང༌། བདེ་བར་གནས་པའོ། །བདག་ནི་གང་ཟག་སེམས་ཅན་རྣམས་དང༌། དགེ་སློང་ས་རིའོ། །ཡང་ན་ཀུན་དགའ་བོས་གསོལ་བ་གདབ་པའོ། །གསོལ་བ་ནི་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལའོ། །རིག་སྔགས་ཀྱི་ངོ་བོ་ནི་སྟོང་བ་ཉིད་དེ་སྟོང་པ་ཉིད་དེ་ཡང་ཤེས་རབ་བོ། །ཤེས་རབ་ནི་མཚོན་པ་སྟེ། མཉམ་པ་ཉིད་ཀྱི་ཡེ་ཤེས་སོ། །མཚོན་བྱེད་ནི་རིག་སྔགས་ཉིད་དེ། ཐབས་ལྟ་བུའོ། །རིགས་ནི་རིན་པོ་ཆེའི་རིགས་ཚོར་བའི་ཕུང་པོ་ཆུའི་ཁམས་སྣའི་སྐྱེ་མཆེད་དོ། །ཡེ་ཤེས་ལྔ་དང་ལྡན་ཞིང་སངས་རྒྱས་ལྔའི་དབུ་རྒྱན་ཅན། དབུ་ལ་རྡོ་རྗེ་རིན་པོ་ཆེས་བརྒྱན་པ། སྤྱན་གསུམ་པ་ལ་ཞལ་གསུམ་པ། །ཕྱག་དྲུག་པ་ལ་སྐུ་མདོག་སེར། །ཞལ་དང་པོ་ནི་སྒེག་པའི་ཚུལ། །གཡས་ཁྲོ་བ་ལ་གཡོན་འཛུམ་པའོ། །གཡས་མཐིང་བ་ལ་གཡོན་དམར་བའོ། །རྒྱན་རྣམས་ཐམས་ཅད་ཀྱིས་བརྒྱན་པ། །པདྨའི་སྟེང་ན་ཟླ་བའི་གདན། །ཞབས་གཉིས་རྡོ་རྗེ་སྐྱིལ་ཀྲུང་བཞུགས། །ཉི་མའི་འོད་དང་ལྡན་པའོ། །གཡས་པ་ཡི་ནི་ཕྱག་གསུམ་ན། །རལ་གྲི་རྡོ་རྗེ་མདའ་གཞུའོ། །གཡོན་པ་ཡི་ནི་ཕྱག་གསུམ་ན། །བུམ་པའི་སྟེང་ན་རྡོ་རྗེ་དང༌། །རིན་ཆེན་སྟེང་ན་རྡོ་རྗེ་དང༌། །རྨ་བྱའི་སྒྲོ་ནི་བསྣམས་པའོ། །བཅུ་གཉིས་པ་ཡི་ཆ་བྱད་ཅན། །དུག་ནི་རྣམ་པ་གསུམ་བཅོམ་ཞིང༌། །སེམས་ཅན་རྣམས་ལ་ཐུགས་རྗེས་ཁྱབ། །དུག་བཅོམ་པ་ཡི་ཐབས་དག་ནི། །ལྕགས་དང་གསེར་
དད་དངུལ་དང་ནི། །དུག་དང་གླ་རྩི་རྨ་བྱའི་སྒྲོ། །གུ་གུལ་དཀར་ནག་གཉིས་དང་ནི། །མུ་ཟི་རྣམས་ནི་བསྲེས་ཤིང་བདུག །ཡང་ན་བྱུག་པ་བྱས་ཤིང་བསྲུང༌། །རིག་སྔགས་ངོ་བོ་འདི་ལྟ་སྟེ། །རིག་སྔགས་གསང་སྔགས་ཀུན་འདོན་ཞིང༌། །དུག་དང་འབྱུང་པོ་རྣམས་བཟློག་པར་བྱའོ། །དེ་བཞིན་གཤེགས་པ་རྣམས་ཀྱིས་གསུངས་ཤིང་རྗེས་སུ་ཡི་རང་བ་ནི། ཨི་དི་བི་དི་ལ་སོགས་པའི་རིག་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་དུག་བཅོམ་པའི་བརྟག་པ་དང་པོ་རྫོགས་སོ།། །།རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་དགེ་སློང་ས་རི་བསྲུང་བའི་གནས་སྐབས་ཏེ་གསུམ་པའོ།། །།ང་ནི་ཡུལ་འཁོར་སྲུང་ལ་བྱམས། །ས་སྲུང་བུ་ལ་བྱམས་པ་སྟེ། །ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་རྣམས་ཀྱིས་བྱམས་པ་ནི། སེམས་ཅན་ཁྱད་པར་མེད་ཅིང་བྱམས་པའོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་རྣམས་ལ་བུ་གཅིག་པ་ལྟ་བུའི་བྱམས་པས་ཁྱབ་ཅིང༌། ཀླུའི་རྒྱལ་པོ་ཡུལ་འཁོར་སྲུང་དང༌། དེ་བཞིན་དུ་ས་སྲུང་ལ་ཡང་ངོ༌། །ད་ནི་ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་སོ། །ཡང་ན་ཀླུའི་རྒྱལ་པོ་དེ་རྣམས་ཀྱང་བྱང་ཆུབ་སེམས་སྐྱེས་པས་སེམས་ཅན་རྣམས་ལ་བྱམས་པའོ། །ད་ནི་མིག་མི་བཟད་ལ་བྱམས། །གཽ་ཏ་མ་ནི་ནག་མོ་དང༌། །ཞེས་བྱ་བ་ནི་ཀླུའི་རྒྱལ་པོ་མིག་མི་བཟང་དང༌། ཀླུའི་རྒྱལ་པོ་གཽ་ཏ་མ་ནག་མོ་རྣམས་ལ་ཡང་བྱམས་པས་ཁྱབ་ཅིང༌། སེམས་ཅན་རྣམས་ལ་མཉམ་པ་ཉིད་དུ་བསྒོམ་པའོ། །སངས་རྒྱས་ཀྱི་བཀས་དེ་རྣམས་ཀྱི་བྱམས་པས་ཁྱབ་པའོ། །ད་ནི་ཀླུ་རྒྱལ་ནོར་བུ་དང༌། །ད་ནི་ནོར་རྒྱས་བུ་ལ་བྱམས། །ཞེས་བྱ་བ་ནི་མཉམ་པ་ཉིད་ཀྱི་ཡེ་ཤེས་ཀྱིས། ཀླུའི་རྒྱལ་པོ་ནོར་བུ་དང༌། ནོར་རྒྱས་ཀྱི་བུ་ལ་བྱམས་ཏེ། དེ་ཡང་སེམས་ཅན་གྱི་དོན་གྱིས་བྱམས་པའོ། །དབྱུག་པ་རྐང་གི་ཀླུ་དག་དང། །གང་བ་བཟང་ལ་ང་རྟག་ཏུ། །ཞེས་བྱ་བ་ནི་མི་དམིགས་པའི་ཡེ་ཤེས་ཀྱིས་སེམས་ཅན་རྣམས་ལ་ཁྱབ་སྟེ། དེ་བཞིན་དུ་དབྱུག་པ་རྐང་པ་དང༌། གང་བ་བཟང་པོ་རྣམས་ལའོ། །ཀླུ་གང་དགའ་བོ་ཉེར་དགའ་བོ། །ཁ་དོག་ལྡན་ཞིང་གྲགས་དང་ལྡན། །ཞེས་བྱ་བ་ནི་གཟི་
བརྗིད་ཆེ་ཞིང་མཐུ་དང་ལྡན་པ་སྟེ། སྐད་ཅིག་གིས་ཀྱང་ཁམས་གསུམ་རྒྱུ་ནུས་ཤིང༌། སེམས་ཅན་རྣམས་ལ་གནོད་པ་མི་བྱེད་དེ། ཀླུའི་རྒྱལ་པོ་དེ་རྣམས་ལ་ཡང་བྱམས་པས་ཁྱབ་པའོ། །རྫུ་འཕྲུལ་ཆེ་ཞིང་ལྷ་མིན་དང༌། །ལྷ་ཡི་ཡུལ་ཡང་མྱོང་བར་བྱེད། །ཅེས་བྱ་བ་ནི་ཀླུའི་རྒྱལ་པོ་དེ་རྣམས་ཀྱང་རྫུ་འཕྲུལ་ཆེ་ཞིང་གྲགས་དང་ལྡན་ཏེ། སོ་སོའི་ཁ་དོག་དང་ལྡན་ཞིང་ཡུད་ཙམ་གྱིས་ཀྱང་ལྷ་དང་ལྷ་མ་ཡིན་ཡུལ་འཁྲུག་པར་ནུས་པའོ། །མ་དྲོས་པ་དང་ཆུ་ལྷ་དང༌། །འཇམ་པ་ལེན་པ་ལ་ཡང་བྱམས། །ཞེས་བྱ་བ་ནི་འཛམ་བུའི་གླིང་གི་བྱང་ངོས་ན་གནས་ཤིང་མ་དྲོས་པའི་མཚོ་ལ་གནས་ཏེ། ཀླུའི་རྒྱལ་པོ་རྣམས་ཀྱི་གཙོ་བོར་གྱུར་ཅིང༌། སེམས་ཅན་གྱི་ཐུགས་རྗེ་དང་ལྡན་ཞིད་། དེ་དང་དེ་རྣམས་ལ་བྱམས་པས་ཁྱབ་པའོ། །འཇོག་པོ་དང་ནི་མཐའ་ཡས་དང༌། །དེ་བཞིན་ནོར་གྱི་སྒོ་དང་ནི། །ཞེས་བྱ་བ་ནི་མཐོང་པའི་དུག་དང་ལྡན་ཞིང༌། ཀླུའི་རྒྱལ་པོ་དེ་རྣམས་བྱང་ཆུབ་སེམས་དཔའི་རིགས་ཡིན་ཏེ། དེ་རྣམས་ལ་ཡང་བྱམས་པས་ཁྱབ་ཅིང་སེམས་ཅན་གྱི་དོན་བྱེད་པའོ། །གཞན་ལས་རྒྱལ་ལ་ང་བྱམས་ཏེ། །གཅོད་དང་ལྡན་པའི་བུ་ལ་བྱམས། །ཞེས་བྱ་བ་ནི་སེམས་ཅན་ལ་བུ་གཅིག་པ་ལྟ་བུར་བྱམས་པ་སྟེ། ཀླུའི་རྒྱལ་པོ་གཞན་ལས་རྒྱལ་བ་དང༌། བུ་དང་བཅས་པའོ། །རྟག་པར་གཟི་ཅན་ཆེན་པོ་དང༌། །གཟི་ཅན་ལ་ཡང་དེ་བཞིན་ནོ། །ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་སེམས་ཅན་གྱི་དོན་ལ་བདེན་པ་བདར་ཞིང་བྱམས་པས་ཏེ། མཉམ་པ་ཉིད་དུ་བསྒོམ་ཞིང༌། ཀླུའི་རྒྱལ་པོ་རྟག་པར་གཟི་ཅན་དང་གཟི་ཅན་ལ་བྱམས་པའོ། །ཕུབ་མ་མེད་དང་དུས་མཚན་དང༌། །ལོངས་སྤྱོད་ལྡན་དད་དགེ་ཚུལ་དང༌། །ཞེས་བྱ་བ་ནི་ཀླུའི་རྒྱལ་པོ་དེ་རྣམས་ཀྱིས་ཀྱང་ངུས་དུས་སུ་ཆར་འབེབས་ནུས་ཤིང༌། དུས་དུས་སུ་ལོ་ཐོག་སྨིན་པར་བྱེད་པའོ། །སེམས་ཅན་རྣམས་ཀྱི་དོན་བྱེད་ཅིང་ཐུགས་རྗེས་ཁྱབ་སྟེ། དེ་ལྟ་བུ་ལ་བྱམས་པའོ། །ཁ་ནས་ཞོ་ངང་ནོར་བུ་དང༌། །པདྨ་དཀར་པོ་ཕྱོགས་དག་དང༌། །ཞེས་བྱ་བ་ནི་ཀླུ་རྒྱལ་དེ་རྣམས་ཀྱིས་ཀྱང་ཕྱོགས་ཕྱོགས་སུ་སྲུང་སྟེ། ནོར་འཕེལ་བར་བྱེད་ཅིང་ཕྱུགས་ལ་བྱམས་པ། དེ་ལྟ་བུའི་
ཀླུའི་རྒྱལ་པོ་རྣམས་ལ་བྱམས་པས་ཁྱབ་པའོ། །སྟོབས་ཀྱི་རྒྱུ་དང་དུང་སྐྱོང་དང༌། །ལ་བ་དང་ནི་མགྱོགས་མཆོག་དང༌། །ཞེས་བྱ་བ་ནི་གཟུགས་སྣ་ཚོགས་བསྟན་ཅིང་སེམས་ཅན་རྣམས་སྐྱོང་བ་སྟེ། དེ་ལྟ་བུའི་ཀླུའི་རྒྱལ་པོ་རྣམས་ཀྱིས་སེམས་ཅན་རྣམས་ལ་ཟླ་བའི་བདུང་རྩི་བཞིན་དུ། ཕན་ཐོགས་པ་སྟེ། དེ་ལྟ་བུའི་བདུད་རྩིས་ཕན་ཐོགས་པའོ། །དེ་རྣམས་ལ་ཡང་བྱམས་པས་ཁྱབ་པའོ། །ཀླུ་ཡི་རྒྱལ་པོ་དེ་དག་ལ། །ད་ནི་རྟག་ཏུ་བྱམས་པ་ཡིན། །ཞེས་བྱ་བ་ནི་སྦྲུལ་པའི་སྐུས་ཁྱབ་ཅིང་བདེན་པའི་ཚིག་བྱིན་ཏེ། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་སྤྱི་བོའི་གཙུག་ནས་སྤྲུལ་ནས་དུག་རྣམ་པ་བཞི་བཅོམ་པའོ། །ཡང་ན་ཀླུའི་རིགས་རྣམ་པ་བཞི་དང༌། ཀླུའི་རྒྱལ་པོ་རྣམས་ལ་བྱམས་པས་ཁྱབ་པའོ། །གནས་བཅས་ཆུ་སྲིན་ཀུམྦྷི་ར། །དེ་བཞིན་ཁབ་ཀྱི་སྤུ་དག་དང༌། །ཞེས་བྱ་བ་ནི་བདེན་པའི་ཚིག་འདིས་ཀྱང་ཀླུའི་རྒྱལ་པོ་རྣམས་ལ་བྱམས་ཏེ། རིག་སྔགས་ཀྱི་གཟི་བརྗིད་ཀྱིས་ཀྱང༌། བྱོལ་སོང་གི་རིས་ནས་འཐོན་པའོ། །བྲང་འགྲོའི་བདག་པོ་ནག་པོ་དང༌། །དྲང་སྲོང་ལ་ཡང་ད་བྱམས་སོ། །ཞེས་བྱ་བ་ནི་ཐབས་ལ་མཁས་པས་ཤཱཀྱ་ཐུབ་པས་བྱོལ་སོང་གི་རིགས་སུ་སྐྱེས་པའི་ཀླུའི་རྒྱལ་པོ་རྣམས་ལ་བྱམས་པའོ།། དེ་བཞིན་རྣ་བ་ཚོང་བ་དང༌། །ཤིང་རྟའི་བཞིན་ལ་བྱམས་པ་སྟེ། །ཞེས་བྱ་བ་ནི་ཀླུ་དེ་རྣམས་ལ་ཡང་མཉམ་པ་ཉིད་དུ་བུ་གཅིག་པ་ལྟ་བུར་ཁྱབ་སྟེ། དེ་བཞིན་དུ་སེམས་ཅན་རྣམས་ལའོ། །གཟི་ཅན་དང་ནི་རབ་དགའ་དང༌། །པདྨའི་བུ་ལ་ང་རྟག་ཏུ། །ཞེས་བྱ་བ་ནི་ས་དང་ནམ་མཁའ་དངས་འོག་ཏུ་རྟག་ཏུ་རྒྱུ་སྟེ། དེ་རྣམས་ཀྱང་དུག་རྣམ་པ་བཞི་ངང་ལྡན་ཏེ་ས་ལ་གནས་པ་སྟེ། དེ་ལ་ཡང་རྟག་ཏུ་བྱམས་པའོ། །ང་ནི་ཨེ་ལའི་འདབ་ལ་བྱམས། །འཕྱང་བའི་ཚུལ་ལ་འང་དབྱམས་ཏེ། །ཞེས་བྱ་བ་ནི་ཨེ་ལའི་ལོ་མ་བཞིན་དུ་དྲི་ཞིམ་ཞིང༌། སེམས་ཅན་རྣམས་ལ་འཚེ་བར་མི་བྱེད་ཅིང་སྐྱོང་བའོ། །དེ་རྣམས་ལ་ཡང་སངས་རྒྱས་ཀྱི་ཡེ་ཤེས་ཀྱིས་ཁྱབ་པའོ། །མི་མིན་ཀླུ་ནི་གང་དག་དང༌། །དེ་བཞིན་མི་ཡི་བླ་མ་དང༌། །ཞེས་བྱ་བ་ནི་མི་དང་མི་མ་ཡིན་པར་བརྫུ་ཞིང་བྱང་ཆུབ་ཀྱི་སེམས་སྐྱེ་བ་སྟེ། སངས་རྒྱས་ཀྱི་སྔོམ་པ་ལ་གནས་
ཤིང་བསྟན་པ་བསྲུང་བའོ། །དེ་རྣམས་ལ་ཡང་བྱམས་པའོ། །ཀླུ་ཆེན་ཚོལ་བའི་ཚུལ་ཅན་དང༌། །བཏང་བཟུང་ཞེས་ནི་གྲགས་པ་དང༌། །ཞེས་བྱ་བ་ནི་ཀླུའི་རྒྱལ་པོ་སུམ་བརྒྱ་བདུན་ཅུའི་གཙོ་བོ་སྟེ། ཀླུའི་རིགས་བཞི་ལ་བརྒྱད་དུ་གནས་ཤིང་བཞི་ལས་བརྒྱད་དུ་གྱེས་པའོ། །བརྒྱད་ནི་གང་ཞེ་ན། བྲམ་ཟེའི་བྲམ་ཟེའི་རིགས་སོ། །རྒྱལ་རིགས་ཀྱི་རྒྱལ་རིགས་ཏེ། རྗེའུ་རིགས་ཀྱི་རྗེའུ་རིགས་སོ། །དམངས་རིགས་ཀྱི་དམངས་རིགས་ནི་གདོལ་པའི་རིགས་དང་བརྒྱད་དོ། །དུག་ཀྱང་རིམ་པ་བཞིན་དུ་བཞི་སྟེ། བསམ་པའི་དུག་དང་མཐོང་བའི་དུག ། རེག་པའི་དང་ཁ་རླངས་ཀྱིའོ། །བསམ་པ་ལས་གྱེས་པ་ནི་ཚོར་བའི་དུག་གོ །མཐོང་བ་ལས་གྱེས་པ་ནི་རྣ་བས་ཐོས་པ་ཙམ་མོ། །རེག་པ་ནི་མཆེ་བ་སྟེ། ཁ་རླངས་ནི་བཞི་ཀ་ལ་གཏོགས་པའོ། །དེ་ནི་ཀླུའི་དུག་འགྲོ་བ་ཞེས་བྱ་བའོ། །སྦྲུལ་དང༌། སྡིག་པ་དང༌། སྦལ་པ་དང། བྱི་བ་དང༌། སྲེ་མོ་དང༌། བུང་བ་ལ་སོགས་པའི་སེམས་ཅན་རྣམས་ལ་ཡང༌། འགྲོ་བའི་དུག་མཆེ་བ་ལས་བྱུང་བའོ། །དེ་རྣམས་ལ་ཡང་བྱམས་ཤིང༌། སྙིང་རྗེ་དང་བཏང་སྙོམས་ཀྱིས་ཁྱབ་པའོ། །ཀླུ་གང་ས་ལ་རྒྱུ་དག་དང༌། །དེ་བཞིན་ཆུ་ལ་གནས་རྣམས་དང༌། །ཞེས་བྱ་བ་ནི་རྫུ་འཕྲུལ་དང་ལྡན་ཞིང༌། གྲགས་པ་དང་ལྡན་པ་སྟེ། དེ་བཞིན་དུ་ཚེ་སྔ་མའི་དྲན་པ་ཡང་ཕྱིར་སྙེག་ཅིང་ནད་རྣམས་ཐམས་ཅད་བཏང་བའི་བདག་དང༌། སྐད་ཅིག་མས་ཁམས་གསུམ་རྒྱུ་ནུས་པའོ། །གང་དག་བར་སྣང་རྒྱུ་བ་དང༌། །གང་དག་ལྷུན་པོར་གནས་པ་དང༌། །ཞེས་བྱ་བ་ནི་ཀླུའི་རིགས་ལ་ཡང་ནམ་མཁའ་ལ་རྒྱུ་ཞིང༌། རི་རབ་ཀྱི་རྩེ་མོ་ལ་གནས་ཤིང༌། ལྷ་དང་ལྷ་མ་ཡིན་འཁྲུག་པར་ནུས་ཤིང༌། གྲགས་པ་དང༌། ཁ་དོག་དང་རྫུ་འཕྲུལ་གྱི་རྐང་པ་དང་ལྡན་ཞིང༌། གང་ཡང་གང་དག་དང་ལྡན་པའོ། །མགོ་གཅིག་པ་དང་མགོ་གཉིས་པ། །དེ་དག་ལ་ནི་ང་རྟག་བྱམས། །ཞེས་བྱ་བ་ནི་ཀླུའི་རྒྱལ་པོ་རྣམས་ནི་མིའི་གཟུགས་སུ་གནས་ཤིང༌། སྦྲུལ་གྱི་གདེངས་ཀ་བཅས་ཤིང༌། རིགས་བཞི་ལ་བརྒྱད་དུ་གནས་པ་སྟེ། བྲམ་ཟེ་ལ་ནི་སྦྲུལ་མགོ་བཅོ་ལྔ་པ་སྟེ། རྒྱལ་རིགས་ལ་བཅུ་གསུམ་པའོ། །རྗེའུ་རིགས་ལ་
བཅུ་གཅིག་པ་སྟེ། དམངས་རིགས་ལ་བདུན་པའོ། །དེ་བཞིན་དུ་བྲམ་ཟེའི་བྲམ་ཟེའི་རིགས་དང༌། རྒྱལ་པོའི་རྒྱལ་པོའི་རིགས་དང༌། རྗེའུའི་རྗེའུའི་རིགས་དང༌། དམངས་ཀྱི་དམངས་རིགས་ལ་ནི་གདོལ་པའོ། །རིགས་དེ་ལ་ནི་དེ་ཡང་ངེས་པ་མེད་པས་བསམ་གྱིས་མི་ཁྱབ་པའོ། །དེ་བཞིན་དུ་དེ་རྣམས་ཀྱི་སྦྲུལ་མགོ་ཡང་བཅུ་གསུམ་པ་དང་བཅུ་གཅིག་དང་བདུན་དང་གསུམ་དང་ལ་ལ་ཡང་གཉིས་དང་གཅིག་ལ་ངེས་པ་མེད་པའོ། །དེ་རྣམས་ཀྱི་ཁ་དོག་ལ་ཡང་དཀར་པོ་དང་སེར་པོ་དང་དམར་པོ་དང་ལྗང་གུའོ། །དེ་བཞིན་དུ་ཡང་དཀར་པོ་དང༌། སེར་པོ་དང༌། དམར་པོ་དང༌། ལྗང་གུ་དང༌། གཞན་དམངས་རིགས་ཀྱི་ཁ་དོག་ལ་ངེས་པ་མེད་དོ། །རྒྱལ་པོ་ཇི་བཞིན་དུ་འཁོར་རྣམས་ཀྱང་ཡིན་ཏེ། དེ་ཡང་ས་བདག་ས་སྲིན་ས་བླ་མོ་ལ་སོགས་པའི་སེམས་ཅན་སྣ་ཚོགས་ཀྱི་གཟུགས་སུ་སྣང་ཞིང༌། ཀླུའི་གདོན་སྟོང་ཕྲག་བཞི་སྟོང་བརྒྱད་ཅུའོ། །དེ་བཞིན་དུ་དེ་དག་གིས་ཀྱང་བྱམས་པའོ། །རྐང་པ་མེད་ལ་ང་བྱམས་ཏེ། །རྐང་གཉིས་པ་ལ་ང་བྱམས་སོ། །ཞེས་བྱ་བ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྤྲུལ་པའི་སྐུ་ཤཱཀྱ་སེང་གེས་ཁྱབ་ཅིང་བྱམས་པ་དང་སྙིང་རྗེ་དང་དགའ་བ་དང༌། བཏང་སྙོམས་ཀྱིས་ཁྱབ་པའོ། །དེ་བཞིན་དུ་སེམས་ཅན་རྣམས་རྐང་མེད་པ་དང་རྐང་གཉིས་པ་ལ་སོགས་ཏེ་ང་བྱམས་པའོ། །རྐང་བཞི་པ་ལ་ང་བྱམས་ཏེ། །རྐང་མངས་ལ་ཡང་ང་བྱམས་སོ། །ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་རྣམས་ཀྱི་བྱམས་པ་དང་སྙིང་རྗེ་ནི་དམིགས་པ་མེད་པའོ། །གཞན་རྣམས་ལ་ནི་དམིགས་པ་དང་བཅས་ཤིང་རྟོག་པ་ལ་གནས་པའོ། །དེ་བཞིན་རྐང་བཞི་རྐང་མངས་ལ་ཡང་བྱམས་པས་ཁྱབ་པའོ། །རྐང་མེད་ད་ལ་གནོད་མ་བྱེད། །རྐང་གཉིས་ང་ལ་གནོད་མ་བྱེད། །ཅེས་བྱ་བ་ནི་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་བདེན་པའི་ཚིག་དང༌། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་གཟི་བརྗིད་དང༌། སྟོབས་དང་མཐུས་སེམས་ཅན་རྣམས་ལ་གནོད་པར་མི་ནུས་པའོ། །རྐང་བཞི་ང་ལ་གནོད་མ་བྱེད། །རྐང་མངས་ང་ལ་གནོད་མ་བྱེད། །ཅེས་བྱ་བ་ནི་སྔར་བཤད་པ་བཞིན་དུ་
བྱམས་པ་ལ་སོགས་པས་ཁྱབ་ཅིང་རྐང་བཞི་དང་རྐང་མངས་ལ་སོགས་པའི་འབྱུང་པོ་རྣམས་ཀྱིས་གཞན་ཡང་འབྱུང་པོ་རྣམས་ཀྱིས་ཀྱང་སངས་རྒྱས་ཀྱི་བདེན་པའི་ཚིག་དང༌། རིག་སྔགས་ཀྱི་རྒྱལ་མོའི་གཟི་བརྗིད་ཀྱིས་གནོད་པར་མི་ནུས་པའོ། །གང་དག་ཆུ་ལ་གནས་པ་ཡི། །ཀླུ་རྣམས་ཀུན་ལ་ང་བྱམས་སོ། །ཞེས་བྱ་བ་ནི་ཆུ་ལ་གནས་པའི་ཀླུའི་རིགས་རྣམས་ལ་སངས་རྒྱས་ཀྱི་གཟི་བརྗིད་ཀྱིས་ཁྱབ་ཅིང་ཀླུའི་སྡུག་བསྔལ་ཐམས་ཅད་དང་བྲལ་བར་བྱེད་པའོ། །ཀླུའི་སྡུག་བསྔལ་གང་ཞེ་ན། ས་གཡོ་བ་དང༌། མེའི་ཕྱེ་མའི་ཆར་འབབ་པ་དང། གང་གི་མི་གཙང་པའི་རུལ་པའི་འཇིགས་པ་དང༌། རྒྱལ་པོ་དང་བྱ་ཁྱུང་གི་འཇིགས་པ་དང་བྲལ་བའོ། །དཔེར་ན་སྔོན་གྱི་དུས་སུ་བྱ་ཁྱུང་གི་འཇིགས་པ་དང་བྲལ་བར་བྱེད་པ་ནི། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་རིག་པའི་རྒྱལ་པོ་རྣམ་པར་ཤེས་པ་སྦྱིན་པའི་རྒྱལ་བུར་སྐྱེས་ཏེ། ཡུམ་ནི་བཀྲ་ཤིས་སྦྱིན། བཙུན་མོ་ནི་བཀྲ་ཤིས་ལྕམ་ཡུལ་ནི་རིགས་བཟང་དམ་པའོ། །དེའི་ཡུལ་ན་ཆོས་དར་ཞིང་མི་རིགས་པ་ནི་མི་བྱེད་ཅིང༌། བྱང་ཆུབ་སེམས་དང་ལྡན་པའོ། །རྒྱལ་པོ་རྣམ་ཤེས་སྦྱིན་གྱི་སྲས་མཚན་ཡང་རྣམ་ཤེས་གསོན་སྦྱིན་པའོ།། རྒྱལ་བུ་དེ་ཡང་བྱང་ཆུབ་སེམས་དཔའི་སྤྱོད་པ་དང་ལྡན་པ། སེམས་ཅན་ཐམས་ཅད་ལ་ནོར་དང་འབྲུ་དང་གོས་ལ་སོགས་པའི་སྦྱིན་པ་བྱིན་པའོ། །རྒྱལ་བུ་དེ་ཡང་ནམ་ཞིག་ན་སྙིང་དགའ་བཤེས་གཉེན་དང་འགྲོགས་ནས་མ་ལའི་རྩེ་མོར་ཕྱིན་ཏེ། མ་ལའི་རིའི་རྩེ་མོ་ལ་ཀླུའི་ཀེང་རུས་མཐོང་ནས་སྙིང་དགའ་བཤེས་གཉེན་ལ་དྲིས་པའོ། །ཀྱེ་ཧོ་སྙིང་གི་གྲོགས་གཉེན་འདིའི་ཀེང་རུས་ནི་གང་གི་ཀེང་རུས་ཡིན་གསུངས་པའོ། །གྲོགས་གཉེན་གྱིས་སྨྲས་པ། ཀྱེའི་རྒྱལ་བུ་ནམ་མཁའ་ལྡིང་གི་རྒྱལ་པོ་གསེར་མིག་གིས་ནང་མ་རེ་རེ་རྒྱ་མཚོའི་ནང་ནས་འོངས་ནས་ཀླུ་རྣམས་ཀྱི་ཀེང་རུས་ཡིན་ཞེས་སྨྲས་སོ། །དེ་བསྟན་པ་དང༌། རྒྱལ་བུས་ཞལ་རོག་བཞུགས་ཤིང་སྙིང་མི་དགའ་བར་གནས་པའོ། །དུས་གཅིག་ཏུ་གྲོགས་གཞན་དང་མ་འགྲོགས་ཤིང་རྒྱ་མཚོའི་འགྲམ་དུ་ཕྱིན་ནོ། །ཀླུའི་ཇོ་མོ་རྒྱལ་བུ་གཙུག་ཏོར་ཅན་གྱི་ཡུམ་བཤུམས་པ་དང་རྒྱ་མཚོའི་
འགྲམ་དུ་ཕྲད་དོ། །ཀྱི་ཧུད་ཀྱི་ཧུད་དུང་གི་གཙུག་ཏོར་ཅན། །ཀྱི་ཧུད་ཀྱི་ཧུད་ཟླ་བའི་སྤྱན་མངའི་བུ། །ཞེས་ཐོས་པ་དང༌། སྙིང་རྗེ་ལྡན་ཞིང་བྱང་ཆུབ་སེམས་དཔའི་རྩར་ཕྱིན་ནོ། །བྱང་ཆུབ་སེམས་དཔས་ཀླུའི་ཇོ་མོ་ལ་སྨྲས་པ། ཀྱེ་ཧོ་ཇོ་མོ་ཙིའི་དོན་ལ་བཤུམས་ཞེས་སྨྲས་སོ། །ཡུམ་གྱིས་སྨྲས་པ། ངའི་དོན་མི་འགྲུབ་ཅེས་སྨྲས་སོ། །ཡང་རྒྱལ་བུས་སྨྲས་པ། གལ་ཏེ་དོན་འགྲུབ་པར་གྱུར་ན་ཅི་སྟོ་ཞེས་སྨྲས་སོ། །ཡུམ་གྱིས་སྨྲས་པ་བཤུམས་ཤིང་ཁ་ནས་མི་ཐོན་ཡང་སྨྲས་སོ། །ཀྱེ་ཧོ་སྐྱེས་བུ་དམ་པ་ངའི་བུ་དུང་གི་གཙུག་ཏོར་ཅན་སང་ཉི་མ་ཕྱེད་ན་ནམ་མཁའ་ལྡིང་གི་རྒྱལ་པོ་གསེར་མིག་ཅན་གྱིས་ཁྱེར་ནས་ཟ་བའི་དུས་ལ་བབ་པས་ཐབས་འདྲ་བ་མངའ་འམ་ཞེས་སྨྲས་སོ། །བྱང་ཆུབ་སེམས་དཔས་སྨྲས་པ། ངས་རྗེས་ནི་ཇི་ཙུགས་བྱེད་དུ་འོང་སྨྲས་སོ། །དེ་སྐད་ཅེས་སྨྲས་པ་དང༌། རྒྱ་མཚོའི་ནང་དུ་ཁྲིད་དོ། །དེ་ནས་ཀླུའི་རྒྱལ་པོ་དུང་ཅན་གྱི་བུ་དུང་གི་གཙུག་ཏོར་ཅན་ལོ་བརྒྱད་ལོན་པ་བལྟ་ན་སྡུག་པ་ཁ་དོག་དང་ལྡན་པ་དེ་བལྟས་ནས། ཀླུའི་བུ་མོ་ཙམ་འདུས་སོ། །དེའི་རྟིང་ལ་བྱང་ཆུབ་སེམས་དཔའ་སྔར་འོང་བའི་ཁྲི་ལ་དར་དམར་པོ་གྱོན་ནས་གཟིམས་སོ། །དེ་ནས་ཉི་མ་ཕྱེད་ཀྱི་དུས་ལ་ནམ་མཁའ་ལྡིང་གི་རྒྱལ་པོ་གསེར་མིག་ཅན་མཆུ་དེ་ནི་བཻ་ཌཱུ་ཪྻ་དང་འདྲ་བ་མཐོ་བ་རྣོ་བ། མིག་སེར་ཞིང་དམར་བ་ལ་སོགས་པ་རིང་ཞིང་སྔོ་བ། ཡན་ལག་སྡེར་མོ་རིང་ཞིང་རྣོ་བ། བྱ་ཁྱུང་གི་གཟུགས་བཞིན་དུ་འཇིགས་པ། ནམ་མཁའ་ལ་འབྲུག་སྒྲ་དང་འགྲོགས་ཤིང༌། མེའི་གློག་བཞིན་བསྟན་ཞིང། བར་སྣང་ནས་གཤོག་པ་རྒྱ་མཚོའི་ནང་དུ་རྡེབས་པ། གཡས་པའི་གཤོག་པ་བརྡབས་པས་རྒྱ་མཚོའི་ཆུ་མི་སྣང་བར་གྱུར་ཏོ། །གཡོན་པ་བརྡབས་པས་བདུན་བརྒྱའི་སའི་འོག་ཏུ་སླེབས་སོ། །དེ་ནས་བྱང་ཆུབ་སེམས་དཔའ་ཁྲི་ལ་ཉལ་བ་དེ་ཏོག་གིས་བླངས་ནས་ནམ་མཁའ་ལ་ཁྱེར་རོ། །དེའི་རྟིང་བར་སྣང་ལ་ཁྱེར་བ་དེ་བྱང་ཆུབ་སེམས་དཔའི་ཡབ་དང་ཡུམ་དང༌། ཇོ་མོ་རྣམས་ཀྱིས་མཐོང་ནས་ཆོ་ངེས་འདེབས་ཤིང་མྱ་ངན་ལས་འདས་སོ། །དེ་ནས་བྱ་ཁྱུང་དེས་རི་མ་ལ་ཡའི་རྩེ་མོར་ཁྱེར་ནས་ཤ་ཟོས་ཁྲག་འཐུངས་ཏེ། ཤ་གཞོགས་
གཅིག་ཟད་ནས། བྱང་ཆུབ་སེམས་དཔས་གཞོགས་གཅིག་ཏུ་ཟློགས་སོ། །དེ་ནས་བྱ་ཁྱུང་འཇིགས་པའི་སེམས་དང་ལྡན་ཏེ། ཟ་བ་འཕྲོ་བཅད་ནས་ངོ་མཚར་ཆེ་ཞིང་ཀླུ་རྣམས་སྔར་ཇི་ཙམ་ཟོས་པ་ལ་འདི་འདྲ་བ་མ་བྱུང་སྙམ་ནས་འཕྲོ་བཅད་དེ་འདུག་གོ །དེའི་ཚེ་བྱང་ཆུབ་དཔས་སྨྲས་པ། ཀྱེ་རྒྱལ་པོ་ནམ་མཁའ་ལྡིང་ཁྱོད་ཀྱི་གསོས་ཡིན་མོད་ཁྲག་འཐུང་ཤ་ཟོ། །དེ་སྐད་ཅེས་སྨྲས་པ་དང༌། བྱ་ཁྱུང་གིས་ངོ་མཚར་ཆེ་ནས་སྨྲས་པ། ཀྱེ་ཁྱོད་སུ་ཡིན་སྔ་མ་བཞིན་དུ་མ་བྱུང་ངོ༌། །ངས་ཀྱང་སྔར་ཇི་ཙམ་ཟོས་ཏེ་ཁྱོད་བཞིན་ངས་མ་མཐོང་ངོ། །བྱང་ཆུབ་སེམས་དཔའི་ཞལ་ནས་ཁྱོད་ཀྱིས་འདིས་ཅི་སྨོས་ཟོ་ཞིག་འཐུངས་ཤིག་ཅེས་གསུངས་སོ། །དེ་ནས་བྱང་ཆུབ་སེམས་དཔའ་ཡབ་ཡུམ་གྱིས་ཀྱང་སླེབས་ནས་བྱ་ཁྱུང་གི་དྲུང་དུ་ཆོ་ངེས་འདེབས་ཤིང་སྨྲས་སོ། །ཀྱེ་ཧོ་ནམ་མཁའ་ལྡིང་གི་རྒྱལ་པོ། ངའི་བུས་ཉེས་པ་ཅང་ཡོད་དམ་ཁྱོད་ཅི་ཉེས་ཅི་བསམས་ཞེས་གསུངས་སོ། །དེ་སྐད་གསུངས་པ་དང༌། བྱ་ཁྱུང་དེ་ཡང་སྡུག་བསྔལ་གྱིས་ཟིན་ཏོ། །དེ་ནས་བྱ་ཁྱུང་གིས་སྨྲས་པ། ཀྱེ་ཧོ་བྱང་ཆུབ་སེམས་དཔའ་ངས་ངོ་མ་ཤེས་ན། བཟོད་པར་གསོལ། དས་ལྷ་ཡུལ་དུ་ཕྱིན་ནས་བདུད་རྩི་ཁྱེར་ནས་འོངས་ནས་བསྐུས་ཏེ་སོས་པར་བྱའོ་ཞེས་གསུངས་སོ། །དེ་སྐད་ཅེས་སྨྲས་པ་དང་བྱང་ཆུབ་སེམས་དཔས་སྨྲས་པ། ཀྱེ་ཧོ་རྒྱལ་པོ་ཁྱེད་ཀྱི་བྱིན་གྱི་རླབས་ཀྱིས་མི་བྱང་བྱང་ཆུབ་སེམས་དང་ལྡན་ན་ལུས་སྔར་བཞིན་དུ་སོང་ཤིག །དེའི་སེམས་དང་མི་ལྡན་ན་ད་ལྟ་བཞིན་དུ་སོང་ཤིག་ཅེས་སྨྲས་སོ། །དེའི་ཚིག་གི་བདེན་པས་ལུས་སྔར་བཞིན་དུ་གྱུར་ཏོ། །དེ་ནས་བྱང་ཆུབ་སེམས་དཔས་བྱ་ཁྱུང་ལ་སྨྲས་པ། ཁྱོད་ཀྱིས་རྒྱ་མཚོའི་ནང་དུ་སོང་ལ་ཀླུ་རྣམས་བོས་ཤིག །ཅེས་གསུངས་པ་དང༌། བྱ་ཁྱུང་ལངས་ནས་རྒྱ་མཚོའི་ནང་དུ་སོང་ངོ༌། །ཀླུ་རྣམས་བྱ་ཁྱུང་མཐོང་བ་དང༌། འཇིགས་ནས་ད་ཡང་ང་ཅག་རྣམས་ཐམས་ཅད་བོས་ཏེ་གསོད་སྙམ་ནས། དེའི་འཇིགས་པས་ཀླུ་རྣམས་མ་ཁུགས། བྱ་ཁྱུང་ཡར་ལོག་ནས་བྱང་ཆུབ་སེམས་དཔའི་དྲུང་དུ་གནས་སོ། །ཀྱེ་བྱང་ཆུབ་སེམས་དཔའི་ངས་ཀླུ་རྣམས་མ་ཁུགས་སོ་ཞེས་སོ། །བྱང་ཆུབ་
སེམས་དཔས་སྨྲས་པ། ཁྱོད་ཀྱིས་ལྷའི་ཡུལ་ནས་བདུད་རྩི་ཁྱེར་ནས་འོངས་ནས་ཁྱོད་ཀྱིས་ཟོས་པའི་ཀེང་རུས་ཀྱི་ཐོག་ཏུ་བདུད་རྩི་གཏོར་ཅིག་གསུངས་སོ། །དེ་ནས་བྱ་ཁྱུང་གིས་བདུད་རྩི་གཏོར་ནས་སྔར་ཤི་བའི་ཀླུ་རྣམས་སོས་ནས་བྱུང་སྟེ། བྱང་ཆུབ་སེམས་དཔའི་སྤྱན་སྔར་གནས་སོ། །བྱང་ཆུབ་སེམས་དཔའི་ཞལ་ནས། བྱ་ཁྱུང་གིས་ཀླུ་རྣམས་མ་ཁུགས་པས། ཁྱེད་རྣམས་ཀྱིས་ཀླུ་རྣམས་བོས་ལ་ཤོག་ཅིག་ཅེས་གསུངས་སོ། །དེ་སྐད་ཅེས་བཀའ་སྩལ་པ་དང༌། ཀླུ་རྣམས་ཀྱིས་རྒྱ་མཚོའི་ནང་ན་ཡོད་པ་རྣམས་བོས་ནས་འོངས་སོ། །དེའི་ཚེ་བྱང་ཆུབ་སེམས་དཔས་ཀླུ་རྣམས་ལ་སྔོམ་པ་ཕོག་སྟེ་དཀོན་མཆོག་གསུམ་ལ་སྐྱབས་སུ་འགྲོ་བའམ་སེམས་ཅན་ལ་གནོད་པ་མི་བྱེད་པའམ་དེ་སེམས་ཅན་ལ་གནོད་བྱེད་བྱ་ཁྱུང་གིས་འཇིགས་པར་འགྱུར་རོ། །དེ་བཞིན་དུ་བྱ་ཁྱུང་གིས་ཀྱང་སྔོམ་པ་ལ་གནས་ཤིང༌། རིག་སྔགས་ཀྱི་རྒྱལ་མོའི་གཟི་བརྗིད་དང༌། དཀོན་མཆོག་གསུམ་གྱི་བྱིན་རླབས་ཀྱིས་ཀླུ་རྣམས་ལ་ཡང་བྱ་ཁྱུང་གི་འཇིགས་པ་དང་བྲལ་བའོ། །དེ་བཞིན་དུ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་ཀྱང༌། ཀླུ་ལ་སོགས་པའི་སེམས་ཅན་ལ་བྱམས་པའོ། །གད་དག་ས་ལ་གནས་པ་ཡི། །འབྱུང་པོ་ཀུན་ལ་ང་བྱམས་སོ། །ཞེས་བྱ་བ་ནི་འབྱུང་པོ་ལྷ་དང༌། ཀླུ་དང་ལྷ་མ་ཡིན་དང༌། ནམ་མཁའ་ལྡིང་དང༌། རླུང་ལྷ་དང༌། དྲི་ཟ་དང༌། མིའམ་ཅི་དང་ལྟོ་འཕྱེ་ཆེན་པོ་དང༌། གནོད་སྦྱིན་དང༌། སྲིན་པོ་དང༌། གྲུལ་བུམ་དང༌། སྲུལ་པོ་དང༌། ལུས་སྲུལ་པོ་དང༌། ཤ་ཟ་དང༌། གྲིབ་གནོན་དང༌། སྐེམ་བྱེད་དང༌། སྨྱོ་བྱེད་དང༌། གནོན་པོ་དང༌། རྒྱུ་སྐར་ལ་སོགས་པའི་གདོན་རྣམས་ཡིན་ཏེ། འབྱུང་པོ་དེ་རྣམས་ཀྱང་སྟོང་ཕྲག་བརྒྱད་ཅུ་བརྒྱད་ཅུ་གནས་ཏེ། དེ་དག་ས་ལ་རྒྱུ་བ་རྣམས་ཡིན་ཏེ། དེ་བཞིན་དུ་ནམ་མཁའ་དང༌། ས་སྟེངས་སུ་རྒྱུ་བའོ། །དེ་ཀུན་ལ་ཡང་དག་པར་རྫོགས་པའི་སངས་རྒྱས་ཀྱིས་བྱམས་པའོ། །སེམས་ཅན་གང་དག་གནས་པར་བཅས། །སེམས་ཅན་ཀུན་ལ་ང་བྱམས་སོ། །ཞེས་བྱ་བ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ནས་གཞན་ཡང་འཇིག་རྟེན་གྱི་ཁམས་ལ་ཡང་དེ་བཞིན་ཏེ། རིག་སྔགས་ཀྱི་གཟི་བརྗིད་དང༌། བདེན་པའི་ཚིག་དེས།
རྡུལ་ཕྲ་མོ་ལ་གནས་པའི་སེམས་ཅན་རྣམས་ལ་ཡང་བྱམས་སོ། །སེམས་ཅན་ཀུན་དང་སྲོག་ཆགས་ཀུན། །འབྱུང་པོ་དག་ནི་ཐམས་ཅད་ཀྱང༌། །ཞེས་བྱ་བ་ནི་བདེན་པའི་ཚིག་འདིས་དུག་གི་ནད་བསམ་པ་དང༌། ཚོར་བ་དང༌། ཁ་རླངས་རྣམས་ཡིན་ཏེ། དེ་ནི་འགྲོ་བའི་དུག་གོ །བསྡད་པའི་དུག་ནི་རྩ་བ་དང་ལོ་མ་ལ་སོགས་པའོ། །བྱེད་པའི་དུག་ནི་སྦྱོར་བ་ལས་བྱུང་བའོ། །དུག་དེ་དག་ཐམས་ཅད་ཀྱང་སེམས་ཅན་དང་སྲོག་ཆགས་དང་འབྱུང་པོ་རྣམས་ལ་ཡང་བྱམས་པའོ། །ཐམས་ཅད་བདེ་བ་འབའ་ཞིག་ཤོག །ཐམས་ཅད་ནད་ནི་མེད་གྱུར་ཅིག །ཅེས་བྱ་བ་ནི་འཇིག་རྟེན་གྱི་སྡུག་བསྔལ་བརྒྱད་དང༌། རླུང་དང༌། མཁྲིས་པ་དང་བད་ཀན་ལས་གྱུར་པ་དེ་ལ་སོགས་པ་ནད་བཞི་བརྒྱ་རྩ་བཞི་རྣམས་ཡིན་ཏེ། བདེན་པའི་ཚིག་དེས་དེ་རྣམས་ཀྱི་སྡུག་བསྔལ་ཐམས་ཅད་དང་བྲལ་ཞིང་བདེ་བར་གནས་པའོ། །ཀུན་དུ་བཟང་པོ་མཐོང་བར་ཤོག །གང་ཡང་སྡིག་པར་མ་གྱུར་ཅིག །ཅེས་བྱ་བ་ནི་མནར་མེད་པའི་སེམས་ཅན་ནས་ཚངས་པའི་ཡུལ་མན་ཆད་ཀྱི་བདེ་བར་གནས། ལས་ཀྱི་སྒྲིབ་པ་དང༌། ཤེས་བྱའི་སྒྲིབ་པ་དང༌། བག་ཆགས་ཀྱི་སྒྲིབ་པ་དང་བྲལ་བའོ། །ཡང་ན་ཤེས་ནས་བྱས་པ་དང་མི་ཤེས་ནས་བྱས་པ་རྣམས་དང་ཡང་བྲལ་བའོ། །བྱམས་པའི་སེམས་ལ་གནས་ནས་སུ། །དུག་ནི་རབ་ཏུ་གསད་པར་བྱ། །ཞེས་བྱ་བ་ནི་བྱམས་པ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་ལ་གནས་པའི་སེམས་ཅན་ལ་བུ་གཅིག་པོ་ལམ་བྱམས་པ་ལྟ་བུ་སྟེ། དེ་ཉེ་བར་གཞག་པའི་སེམས་ཀྱིས་སྙིང་རྗེ་འབའ་ཞིག་ཏུ་འཁོར་བ་ལ་གནས་པའི་སེམས་ཅན་ལ་སྙིང་རྗེ་བའོ། །དེས་སེམས་ཅན་ཐོན་པའི་སེམས་ཀྱིས་དེས་རབ་ཏུ་དགའ་བའོ། །དེ་མཉམ་པ་ཉིད་དུ་གཞག་པས་བཏང་སྙོམས་སོ། །འདིར་ནི་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས། དགེ་སློང་ས་རིའི་དོན་ལ་སེམས་ཅན་ཐམས་ཅད་ཀྱི་དོན་གྱིས་ནང་གི་དུག་གསུམ་དང་ཕྱིའི་དུག་གསུམ་ཟད་པའོ། །ནང་གི་དུག་གསུམ་ནི་འདོད་ཆགས་ཞེ་སྡང་གཏི་མུག་གསུམ་མོ། །ཕྱིའི་དུག་གསུམ་ནི་དེ་ཉེ་བར་གཞག་པས་བྱུང་བ། འགྲོ་བ་དང་བསྡད་པ་
དང་བྱེད་པའོ། །རིག་སྔགས་ཀྱི་གཟི་བརྗིད་དང༌། སངས་རྒྱས་ཀྱི་བདེན་པས་བྱམས་པས་དུག་ཟད་པའོ། །བསྲུང་དང་ཡོངས་སུ་བཟུང་བ་དང༌། །དེ་བཞིན་ཡོངས་སུ་བསྐྱང་བར་བྱ། །ཞེས་བྱ་བ་ནི་ཚིགས་སུ་བཅད་པའི་བདེན་པ་འདིས་ཏེ། ཡང་དག་པར་རྫོགས་པའི་སངས་རྒྱས་རྣམས་ཀྱི་བཀའོ། །དེ་ཡང་འདས་པའི་སངས་རྒྱས་རྣམ་གཟིགས་དང༌། །གཙུག་ཏོར་ཅན་དང་ཀུན་སྐྱོབ་དང༌། ལོག་དང་སེལ་དང་གསེར་ཐུབ་འོད་སྲུངས་སོ། །དེ་ལ་སོགས་པའི་འདས་པའི་སངས་རྒྱས་བྱེ་བ་ཁྲག་ཁྲིག་གངྒཱའི་ཀླུང་གི་བྱེ་མ་སྙེད་རྣམས་ཀྱིས་གསུངས་པའོ། །མ་འོངས་པ་ནི་དེ་བཞིན་དུ་བྱམས་པ་ལ་སོགས་པའོ། །ད་ལྟར་བ་ནི་ཤཱཀྱ་སེང་གེ་སྟེ། དགེ་སློང་ས་རིའི་དོན་ལ་སེམས་ཅན་རྣམས་ལ་གསུངས་པའོ། །དེ་བཞིན་དེ་དང་དེ་འདྲའི་སྲུང་བ་དམ་བ་ནི། སྲུང་བ་དམ་པ་སྦ་བ་དང་ཡོངས་སུ་བསྐྱབ་པ་དང༌། སྡིག་བ་ཟད་པ་དང༌། མཚམས་སྦྱོར་བ་དང༌། ཆད་པ་གཅོད་པ་དང༌། འདིའི་རིག་པ་གང་འཛིན་པས་སྲུང་ཞིང་ཡོངས་སུ་བསྐྱང་བར་འགྱུར་རོ། །སངས་རྒྱས་ཕྱག་འཚལ་བྱང་ཆུབ་ཕྱག་འཚལ་ལོ། །ཞེས་བྱ་བ་ནི་ངོ་བོ་ཉིད་དང་བྲལ་ཞིང་དམིགས་པ་མེད་པ་སྟེ། འདས་པ་དང་སྲིད་པའི་ངོ་བོ་མེད་ཅིང་ད་ལྟར་བྱུང་བ་ཡང་མེད་པའོ། །དེའི་སྒྲིབ་པས་སྒྱུ་མ་ལྟ་བུ་སྟེ། མེ་ལོང་གི་ལྟོ་བའི་གྲིབ་མ་ལྟ་བུ་སྟེ། དེ་ནི་གཟུགས་སྐུ་དང་པོ་སྟེ། དེ་ཉེ་བར་གཞག་པའི་ངོ་བོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྤྲུལ་པའི་སྐུས་ཁྱབ་སྟེ། དེ་ཡང་གཟུགས་སྐུ་གཉིས་པའོ། །མཚན་སུམ་ཅུ་རྩ་གཉིས་དང་ལྡན་ཞིང་དཔེ་བྱད་བརྒྱད་ཅུས་སྐུ་ལ་བརྒྱན་པ། སེམས་ཅན་གྱི་དོན་བྱེད་པ་ནི་ཐུབ་པའི་སྐུའོ། །དེ་ལྟ་བུའི་སྐུ་གསུམ་ལ་ཕྱག་འཚལ་ལོ། །བྱང་ཆུབ་ནི་ཚད་མེད་པ་བཞིའི་སྒོ་ནས་སེམས་ཅན་རྣམས་ལ་བྱམས་པ་སྟེ། ཕ་རོལ་ཏུ་ཕྱིན་པ་བཅུའི་ཚོགས་ཀྱི་ལམ་སྟེ། ས་བཅུ་ལ་གནས་པའོ། །དེ་ལ་གནས་པའི་བྱང་ཆུབ་སེམས་དཔའ་ནི། བྱམས་པ་དང་འཇམ་དཔལ་ལ་སོགས་པའོ། །དེ་རྣམས་ལ་ཕྱག་འཚལ་ལོ་ཞེས་པའོ། །གྲོལ་གྱུར་ཕྱག་འཚལ་གྲོལ་ལ་ཕྱག་འཚལ་ལོ། །ཞེས་བྱ་བ་ནི་བག་ཆགས་དང་ཤེས་བྱའི་སྒྲིབ་པས་མ་གོས་པ་སྟེ། དེ་ནི་
ཡེ་ཤེས་རྣམ་པར་དག་པའི་རང་བཞིན་ནོ། །དེའི་ངོ་བོ་ནི་བསམ་གྱིས་མི་ཁྱབ་པའོ། །དེ་ལྟ་བུ་ལ་ཕྱག་འཚལ་ཞེས་པའོ། །ཞི་གྱུར་ཕྱག་འཚལ་ཞི་ལ་ཕྱག་འཚལ་ལོ། །ཞེས་བྱ་བ་ནི་ཞི་ནི་ལམ་ཡིན་ཏེ། གྱུར་ནི་འབྲས་བུའོ། །ཕ་རོལ་ཏུ་ཕྱིན་པ་དྲུག་གི་ལམ་ནས་སངས་རྒྱས་པ་དང༌། སྨོན་ལམ་གྱི་སྟོབས་ཀྱིས་སེམས་ཅན་གྱི་དོན་བྱེད་པའོ། །དེ་བས་ན་ཞི་གྱུར་རོ། །འབྲས་བུ་ཡིན་ཏེ་འགྱུར་བ་མེད་པ་རང་བཞིན་དང་བྲལ་བས། ཡེ་ཤེས་རྣམ་པར་གསལ་བ་སྟེ། ཡེ་ཤེས་དེ་ཡང་དམིགས་པ་མེད་པའི་རང་བཞིན་གྱི་འབྲས་བུའོ། །གཞི་ལ་མི་གནས་པའི་ཕྱིར་ཞི་འགྱུར་རོ། །གཞི་དང་གཞི་ལ་མི་གནས་པས་ཕྱག་འཚལ་ཞེས་པའོ། །རྣམ་གྲོལ་ཕྱག་འཚལ་གྲོལ་ལ་ཕྱག་འཚལ་ལོ། །ཞེས་བྱ་བ་ནི། འཁོར་བ་ལས་གྲོལ་བས་ན་གྲོལ་བ་སྟེ། འཁོར་བ་ནི་མ་རིག་པ་དང་འདུ་བྱེད་དང་རྣམ་པར་ཤེས་པ་དང་མིང་དང་གཟུགས་དང་སྐྱེ་མཆེད་དྲུག་དང༌། རེག་པ་དང༌། ཚོར་བ་དང༌། སྲེད་པ་དང༌། ལེན་པ་དང༌། སྲིད་པ་དང༌། སྐྱེ་བ་དང༌། རྒ་ཤི་དང་བཅུ་གཉིས་སོ། །འདུ་བྱེད་ལ་སོགས་པ་བཀག་པའི་ཕྱིར་ན། རྣམ་པར་གྲོལ་བ་སྟེ། དེ་གྲོལ་ན་མ་རིག་པའི་མིང་ཡང་ཅི་སྨོས་ཏེ། དེ་བས་ན་རྣམ་པར་གྲོལ་ལ་ཕྱག་འཚལ་ལོ། །བྲམ་ཟེ་གང་དག་སྡིག་པའི་ཆོས་རྣམས་བསལ་བར་གྱུར་པ་དེ་དག་ལ་ཡང་ཕྱག་འཚལ་ལོ་ཞེས་བྱ་བ་ནི། ཚངས་པར་སྤྱོད་ཅིང་དགྲ་བཅོམ་པའི་རང་བཞིན་ཡིན་ཏེ། དེ་ཡང་ཟག་པ་ཟད་ཅིང་བག་ཆགས་ཀྱི་དྲི་མས་མི་བསྒོ་བའོ། །དེ་ནས་བྲམ་ཟེའི་སྡིག་པས་མི་བསྒོ་བ་ལ་ཕྱག་འཚལ་ལོ། །ཡང་ན་བྲམ་ཟེའི་ཚུལ་དུ་གནས་པས་བྲམ་ཟེའོ། །དེ་དག་གིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། རིག་སྔགས་ཀྱི་རྒྱལ་མོའི་གཟི་བརྗིད་དང་བདེན་པའི་ཚིག་གིས་གང་ཟག་སེམས་ཅན་ཐམས་ཅད་དང་ཀུན་བདེ་བར་གནས་པའོ། །འཇིགས་པ་ཐམས་ཅད་དང་ཞེས་བྱ་བ་ནི། འཇིག་རྟེན་ཕྱིའི་ངན་སོང་གསུམ་གྱི་འཇིགས་པ་དང༌། རྐྱེན་ལས་བྱུང་བའི་ང་ལྟར་བྱུང་བའི་འཇིགས་པའོ། །ཚེ་ཕྱི་མའི་ངན་སོང་འབྱུང་བ་ནི་དང་པོ་དམྱལ་བ་ཡིན་ཏེ། ཚ་བའི་དམྱལ་བ་ལ་བརྒྱད་དོ། །དེ་ཡང་ཡང་
སོས་དང༌། ཐིག་ནག་དང༌། ཚ་བ་དང༌། རབ་ཏུ་ཚ་བ་དང༌། བསྡུས་འཇོམས་དང༌། ངུ་འབོད་དང༌། ངུ་འབོད་ཆེན་པོ་དང༌། མནར་མེད་པ་དང་བརྒྱད་དོ། །ཡང་གྲང་བ་ལ་ཆུ་བུར་ཅན་དང༌། ཆུ་བུར་ཅན་ཆེན་པོ་དང༌། སོ་ཐམས་ཅད་དང༌། ཨ་ཆུ་ཆུ་དང༌། འདར་ཆུག་ཆུག་དང༌། ཨུཏྤ་ལ་ལྟར་གས་པ་དང༌། པདྨ་ལྟར་གས་པ་དང༌། པདྨ་ཆེན་པོ་ལྟར་གྱེས་པ་དང་བརྒྱད་དོ། །དམྱལ་བ་དེ་རྣམས་ཀྱི་འཁོར་ནི་རེ་རེ་ལ་ཡང་བཅུ་དྲུག་བཅུ་དྲུག་གོ །དེའི་མིང་ནི་མཚོན་གྱི་སེན་མོ་དང༌། ཤལ་མ་རི་དང༌། ལྕགས་ཀྱི་ཐུ་ལུམ་དང༌། ཁྱིའི་གླིང་དང༌། ཆུ་བོ་རབ་མེད་དང། འཁྲུལ་པའི་ཐོང་པ་དང༌། འཁོར་ལོ་དང༌། སྦུ་གྲིའི་ལམ་དང༌། བྲག་དཀར་པོ་དང༌། མེ་མ་མུར་དང༌། རྒྱ་འཇིགས་དང༌། ལྕགས་ཀྱི་སོག་ལེ་དང༌། ལྕགས་ཀྱི་ཐུར་མ་དང༌། བུམ་པ་དང༌། ལྕེ་ལ་རྨོ་བ་དང༌། སླ་ངས་བརྔོ་བ་དང་བཅུ་དྲུག་གོ །དེ་ནི་ཚེ་ཕྱི་མའི་དམྱལ་བའི་སྡུག་བསྔལ་དང་འཇིགས་པའོ། །ཡང་གཉིས་པ་དུད་འགྲོའི་འཇིགས་པ་ནི་གང་གིས་གང་ཟ་བའི་འཇིགས་པ་སྟེ། སྲོག་དང་འབྲལ་བའི་རང་བཞིན་གྱིས་དུད་འགྲོའི་སྡུག་བསྔལ་ནི་ཤིན་ཏུ་འཇིགས་པའོ། །གསུམ་པ་ཡི་དགས་ཀྱི་འཇིགས་པ་ནི། འཐུང་བ་དང་ཟ་བ་མེད་ཅིང་གང་གིས་ཡང་མཐོང་བ་ལ་ཡང་ཕྲག་དོག་གིས་འཐབ་རྩོད་བྱེད་ཅིང༌། ཡི་དགས་ཀྱི་སྡུག་བསྔལ་དེ་རྣམས་སོ། །ད་ལྟར་རྐྱན་གྱིས་འཇིགས་པ་ནི། འབྱུང་པོའི་གདོན་མ་རུངས་པའི་འཇིགས་པ་དང༌། གཞན་དགྲ་བོ་དང་ཕྲད་པ་དང༌། དེ་ལ་སོགས་པའི་འཇིགས་པ་བརྒྱད་དང་དེ་ལ་འཇིགས་པས་ན་འཇིགས་པ་དང་ཞེས་པའོ། །གནོད་པ་ཐམས་ཅད་དང་ཞེས་བྱ་བ་ནི་དགེ་བའི་རྩ་བ་ལ་གནོད་པ་སྟེ། བདུད་བཞིའི་རང་བཞིན་གྱིས་བགེགས་ཀྱི་ཚུལ་དུ་བྱས་ནས་མི་དང་མི་མ་ཡིན་པས་གནོད་པ་སྐྱེལ་བའོ། །ནད་འགོ་བ་དང་ཞེས་བྱ་བ་ནི། རིམས་དང༌། ལྷོག་པ་དང༌། འབྲས་དང༌། ཁྲག་རྣག་གཟེར་ཐུང་དང༌། དེ་རྣམས་ནི་ཡུད་ཙམ་ལ་འགོས་པའོ། །ཡང་ན་འབྲུམ་བུའི་ནད་དང་གཞན་གྱིས་མི་ཐུབ་ཅིང༌། སྡིག་པའི་ནང་དུ་གསུངས་པའོ། །འཁྲུག་པ་ཐམས་ཅད་དང་ཞེས་བྱ་བ་ནི། གཞན་གྱི་དཔུང་གིས་འདྲེན་པ་དང༌། རང་ཡུལ་དུ་ཁྲག་ཁྲུག་འབྱུང་བ་དང༌། གཟའ་
འཐབས་ལ་སོགས་པའོ། །རིམས་ཐམས་ཅད་དང་ཞེས་བྱ་བ་ནི། བད་ཀན་དང་མཁྲིས་པ་དང༌། རླུང་ལས་གྱུར་པ་དེ་ནི་འདུས་པ་སྟེ། གཉིས་གཉིས་འགྲོགས་པ་ནི་ལྡན་པའོ། །ནད་དེ་དང་ལྡན་པས་ན་རིམས་སོ། །ནད་ཐམས་ཅད་དང་ཞེས་བྱ་བ་ནི། གཞོགས་ཕྱེད་ན་བ་དང༌། ཡི་ག་འཆུས་པ་དང༌། མིག་ན་བ་དང༌། རྣ་བ་ན་བ་དང༌། ཁ་ན་བ་དང༌། མགུལ་པ་ན་པ་དང༌། སྙིང་ནད་དང༌། ལྐོག་མའི་ལྷ་གོར་ན་བ་དང༌། རྣ་བ་ན་བ་དང༌། སོ་ན་བ་དང༌། སྙིང་ན་བ་དང༌། རྩི་བ་ལོགས་ན་བ་དང༌། རྒྱབ་ན་བ་དང༌། ལྟོ་བ་ན་བ་དང༌། མཁུར་བ་ན་བ་དང༌། ཆུ་སོ་ན་བ་དང༌། སྐྱེ་གནས་ན་བ་དང༌། རབ་ཏུ་སྐྱེ་གནས་ན་བ་དང༌། རྐེད་པ་ན་བ་དང༌། བརླ་ན་བ་དང༌། བྱིན་པ་ན་བ་དང༌། ལག་པ་ན་བ་དང༌། རྐང་པ་ན་བ་དང༌། ཡན་ལག་ན་བ་དང༌། ཉིང་ལག་ན་བ་ལ་སོགས་པ་ནད་བཞི་བརྒྱ་རྩ་བཞིའོ། །གདོན་ཐམས་ཅད་དང་ཞེས་བྱ་བ་ནི། ལྷའི་གདོན་ལ་སོགས་པ་བགེགས་རིགས་མི་གཅིག་པ་སྟོང་ཕྲག་བརྒྱད་ཅུ་ཕྲག་ཉི་ཤུ་རྩ་བཞིའོ། །དུག་ཐམས་ཅད་ལས་སྲུང་བ་གྱིས་ཤིག་ཅེས་བྱ་བ་ནི། རིག་སྔགས་ཀྱི་གཟི་བརྗིད་དང་སངས་རྒྱས་ཀྱི་བདེན་པའི་ཚིག་གིས་འགྲོ་བ་དང༌། བསྡད་པ་དང་བྱེད་པའི་དུག་བཅོམ། སེམས་ཅན་ཐམས་ཅད་བདེ་བར་གནས་པའོ། །ལོ་བརྒྱ་འཚོ་བར་གྱུར་ཅིག །སྟོན་བརྒྱ་མཐོང་བར་ཤོག་ཤིག །ཅེས་བྱ་བ་ནི་འདི་འཆང་བ་དང༌། ཀློག་པ་རྣམས་ནི། ཚེ་རིང་ཞིང་བཀྲ་ཤིས་ཏེ། སྡུག་བསྔལ་ཐམས་ཅད་དང་བྲལ་བའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་བདེན་པའི་ཚིག་གི་གནས་སྐབས་ཏེ་བཞི་པའོ།། །།ཀུན་དགའ་བོ་སྔོན་བྱུང་བ་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ། རྨ་བྱའི་རྒྱལ་མོ་གསེར་དུ་སྣང་བ་ཞེས་བྱ་བ་ཅིག་གནས་ཏེ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་གཙུག་ཏོར་ཅན་གྱི་བསྟན་པ་ལ། དགེ་སློང་ས་རི་བཞིན་མཆེ་བའི་དུག་གིས་བཏབ་པ་ལ། དྲན་པ་ཙམ་གྱིས་སོས་བར་གྱུར་ཏེ། དེ་བཞིན་དུ་གཞན་ཡང་ནད་ཐམས་ཅད་ཀྱིས་མི་ཚུགས་ཤིང༌། གདོན་ཐམས་ཅད་ཀྱང་དེ་བཞིན་ནོ། །བསྒྱུར་བའི་ལས་དང༌། བྱད་དང༌། གཡེང་བྱེད་དང༌། རོ་ལངས་
དང། སེམས་བསྒྱུར་བ་དང༌། སྦོད་གཏོང་དང༌། བཟའ་ཉེས་དང༌། སྐྱུགས་ཉེས་དང༌། གནོད་སྒྲིབ་དང༌། གནོད་བལྟས་དང༌། བྲི་ཉེས་དང༌། སྒོམ་ཉེས་དང༌། སྨད་པ་ལ་སོགས་པའི་རིམས་ཐམས་ཅད་ཀྱིས་མི་ཚུགས་ཤིང༌། དྲན་པ་ཙམ་གྱིས་སོས་པར་འགྱུར་རོ། །གངས་ཀྱི་རི་ནི་ལྷོའི་འཛམ་བུའི་གླིང་གི་རྡོ་རྗེའི་གདན་གྱི་བྱང་ཕྱོགས་ན། རི་བོ་སྤོས་ལྡན་གྱི་རྩ་ན་མཚོ་ཆེན་པོ་མ་དྲོས་པའི་འགྲམ་ན། མཚོ་ཆེན་པོ་དེ་ལ་ཡང་ཆུ་བོ་ཆེན་པོ་འབབ་སྟེ། དེ་ཡང་གངྒཱ་དང༌། པཀྵུ་དང༌། སིནྡྷུ་དང༌། སི་ཏ་དང་བཞིའོ། །ཆུ་བོ་ཆེན་པོ་དེ་ཡང་ཤར་ཕྱོགས་ནས་བབས་ནས་གཡས་སྐོར་དུ་བསྐོར་ནས་ཤར་ཕྱོགས་ས་སུ་འབབ་པོ། །དེ་བཞིན་དུ་བསྐོར་ནས་ལྷོ་དང་ནུབ་དང་བྱང་ཕྱོགས་ལ་ཡང་ཡིན་ནོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་གསེར་དུ་སྣང་བ་ཡང༌། སེམས་ཅན་གྱི་དོན་ལ་གངས་ཀྱི་རི་ལ་གནས་ཤིང༌། ལྷ་དང་ལྷ་མ་ཡིན་དང༌། གནོད་སྦྱིན་དང༌། ཀླུ་དང་མི་མ་ཡིན་ལ་སོགས་པས་མཆོད་ཅིང་རྨ་བྱའི་གཟུགས་སུ་སྣང་བའོ། །བཞིན་ནི་འཛམ་བུའི་གླིང་གི་གསེར་གྱི་མདོག་འདྲ་བ། དེའི་ལུས་ལ་མཆུ་བཻ་ཌཱུཪྻས་བྱས་པ། གཤོག་པ་དང་མཇུག་མ་ནི་རིན་པོ་ཆེ་སྣ་བདུན་གྱིས་བྱས་པ། རིན་པོ་ཆེ་སྣ་བདུན་གྱིས་བྱས་པའི་ཁྲི་ལ་བསྡད་ཅིང༌། དུག་གི་མེ་ཏོག་གིས་བརྒྱན་ཅིང་དུག་ཟ་བའོ། །རིག་སྔགས་ཀྱི་རྒྱལ་མོ་འདི་ནི། འདས་པ་དང༌། མ་འོངས་པ་དང༌། ད་ལྟར་བྱུང་བའི་སངས་རྒྱས་རྣམས་ཀྱིས་རྗེས་སུ་ཡི་རང་ཞིང་བྱིན་གྱིས་བརླབས་པའོ། །སྒྱུ་མའི་རང་བཞིན་དུ་གནས་པས་རྨ་བྱ་སྟེ། ཡང་ན་རྨ་བྱའི་ཕྱག་རྒྱས། སངས་རྒྱས་དང་བྱང་ཆུབ་སེམས་དཔའ་དང༌། རང་སངས་རྒྱས་དང་ཉན་ཐོས་དང་སེམས་ཅན་ཐམས་ཅད་ལ་རིག་སྔགས་ཀྱི་ཕྱག་རྒྱས་བཏབ་པས་ན་རྨ་བྱའོ། །ཆེན་མོ་ནི་བསམ་གྱིས་མི་ཁྱབ་བའོ། །གསེར་དུ་སྣང་བ་ནི་གསེར་བཞིན་དུ་དཀོན་པ་སྟེ། གསེར་གྱིས་སེམས་ཅན་ཐམས་ཅད་ལ་བལྟ་ན་སྡུག་པ་གསེར་དུ་སྣང་བའོ། །ཡང་ན་གསེར་རིན་པོ་ཆེས་དུག་ཐམས་ཅད་ཐུབ་པའོ། །དེ་ནང་པར་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདེ་ལེགས་སུ་འགྱུར་བར་བྱ་སྟེ་ཞེས་བྱ་བ་ནི་རིག་སྔགས་འདིའི་བྱིན་རླབས་ཀྱིས་ཚེ་འདི་ལ་མ་ཤི་བར་དུ་ཉིན་མོ་བདེ་ལེགས་ཤིང༌།
ནུབ་ཀར་ཡང་བདེ་ལེགས་པའོ། །དེ་བཞིན་དུ་ཚེ་ཕྱི་མ་ཡང་སངས་རྒྱས་བཀྲ་ཤིས་པར་འགྱུར་རོ། །མཚན་མོ་བདེ་ལེགས་སུ་གནས་པས་སོ་ཞེས་བྱ་བ་ནི། རྨི་ལམ་ངན་པ་མི་རྨི་ཞིང༌། གདུག་པ་ཅན་གྱི་འབྱུང་པོ་རྣམས་ཀྱིས་ཀྱང་གནོད་པར་མི་བྱད་ཅིང༌། བདེ་བར་གཉིད་ལོག་ཅིང་ནང་པར་ཡང་རིག་སྔགས་ཀྱི་རྒྱལ་མོ་རྗེས་སུ་དྲན་པར་བྱའོ། །སངས་རྒྱས་ལ་ཕྱག་འཚལ་ལོ་ཞེས་བྱ་བ་ནི། སེམས་ཅན་རྣམས་ལ་དོན་བྱེད་པ། སེར་པོ་དང༌། དམར་པོ་དང༌། སྔོན་པོ་དང༌། ནག་པོ་ལ་སོགས་བའོ། །ཚོན་གྱི་མདོག་གིས་མ་གྲུབ་པ། མཚན་ཉིད་དང་བྲལ་ཞིང་དོ་བོ་ཉིད་མེད་པ་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ་ཞེས་བྱ་བ་ནི། རྒྱ་ཆེ་ཞིང་བསམ་གྱིས་མི་ཁྱབ་པ་རིག་པ་མཐར་ཐུག་པ་ཆོས་ལ་ཕྱག་འཚལ་ཞེས་པའོ། །དགེ་འདུན་ལ་ཕྱག་འཚལ་ལོ་ཞེས་བྱ་བ་ནི། དགྲ་བཅོམ་པ་ཟག་པ་ཟང་པ། བྱེ་བྲག་ཏུ་སྨྲ་ཞིང༌། གང་ཟག་གི་ཆོས་ལ་གནས་པ་དེ་བསྟན་བསྲུང་ཞིང༌། དགེ་འདུན་ཚོ་དང་ལྡན་པ་ལ་ཕྱག་འཚལ་ལོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལ་ཕྱག་འཚལ་ལོ་ཞེས་བྱ་བ་ནི། རིག་སྔགས་ཀྱི་རྒྱལ་མོ་ནི་རིག་སྔགས་ཀྱི་ཚད་ཡིན་ཏེ། རིག་སྔགས་ཀྱི་ཚད་ནི་སྟོང་པ་ཉིད་དོ། །སྟོང་པ་ཉིང་དེ་ཡང་ཀུན་གཞི་རྣམ་པར་དག་པ་སྟེ། ཀུན་གཞི་རྣམ་པར་དག་པ་ནི་ཤེས་རབ་ཀྱི་རང་བཞིན་ནོ། །ཤེས་རབ་ཀྱི་རང་བཞིན་དེ་ནི་རིན་པོ་ཆེ་རྡོ་རྗེའི་རིགས་སོ། །དེའི་མཚོན་པ་ནི་མེ་ལོང་ལྟ་བུའི་ཡེ་ཤེས་ཏེ། མཚོན་བྱེད་ནི་རིག་སྔགས་ཀྱི་རྒྱལ་མོ་རྨ་བྱ་ཆེན་མོའོ། །ཞལ་བཞི་ཕྱག་བརྒྱ་ད་སྐུ་མདོག་མཐིང་ག །དབུ་ལ་དི་བཞིན་གཤེགས་པ་ལྔའི་དབུ་རྒྱན་ཅན། སྤྱི་བོའི་གཙུག་ཏུ་རྡོ་རྗེས་མཚན་པ། ཡེ་ཤེས་ལྔའི་རང་བཞིན་ཞལ་དང་པོ་ཁྲོ་བའོ། །སྤྱན་གསུམ་པ། གཡས་ཞི་བ། གཡོན་འཛུམ་པ། རྒྱབ་དྲེགས་ཚུལ་དང་ལྡན་པའོ། །གཡས་དཀར་གཡོན་དམར་རྒྱབ་ལྗང་གུའོ། །རྒྱན་ཐམས་ཅད་དང་སྦྲུལ་གྱིས་བརྒྱན་ཅིང༌། གཡས་བརྐྱང་གཡོན་བསྐུམ་པའི་ཞབས་ན་ཀླུ་དང་གནོད་སྦྱིན་གདུག་པ་ཅན་མནན་པའོ། །ཕྱག་གཡས་པ་རྣམས་ན་རལ་གྲི་དང༌། འཁོར་ལོ་དང༌། རྡོ་རྗེ་དང༌། པདྨ་བསྣམས་པའོ། །ཕྱག་གཡོན་པ་རྣམས་ན་སྡིགས་མཛུབ་དང༌།
ཞགས་པ་དང༌། རྨ་བྱའི་སྒྲོ་དང༌། རིན་པོ་ཆེ་དང༌། བུམ་པ་བསྣམས་པའོ། །ཕུང་པོ་ནི་རྣམ་པར་ཤེས་པའི་ཕུང་པོ་ཡིན། ཁམས་ནི་ནམ་མཁའི་ཁམས་སོ། །སྐྱེ་མཆེད་ནི་ཡིད་ཀྱི་སྐྱེ་མཆེད་དོ། །པདྨ་སྣ་ཚོགས་ཀྱི་སྟེང་དུ་ཉི་མའི་གདན་ལ་བཞུགས་ཤིང༌། བསྐལ་པ་མེ་ལྟར་འབར་བའི་འོད་དང་ལྡན་པའོ། །ཡེ་ཤེས་ལྔའི་རང་བཞིན་ཡི་གེ་ཧཱུཾ། དེའི་འོག་ཏུ་ཉི་མའི་དཀྱིལ་འཁོར། དེ་ཡང་རིག་སྔགས་ཀྱི་སྙིང་གར་བསམ་མོ། །སེམས་ཅན་གྱི་དོན་གྱིས་རིན་པོ་ཆེ་རྡོ་རྗེའི་རིགས་ཀྱི་སྙིང་པོའོ། །ཀླུའི་སྲོག་སྙིང་དེ་རིག་སྔགས་ཀྱིས་ཉིད་པོ་འདོན་པ་ཙམ་གྱིས་འབྱུང་པོ་ཐམས་ཅད་རླག་པར་བྱེད་ཅིང༌། དུག་རྣམས་ལྟ་ཅི་སྨོས། ཀླུ་དང་འབྱུང་པོ་རྣམས་འཕོ་བར་འདོད་ན། འབུམ་ཕྲག་ཁྲི་བཟླས་པ་བྱས་ནས་གུ་གུལ་དང་བཙན་དུག་གི་དུ་བ་བཏང་ཞིང་ཡུངས་ཀར་གྱིས་གདུག་པ་ཅན་གྱི་གནས་ལ་བརྡེག །རིན་པོ་ཆེ་རྡོ་རྗེའི་རིགས་ཀྱི་རིག་སྔགས་སུ་བསམས་ལ། གདུག་པ་ཅན་རྣམས་བརླག་པར་བྱའོ། །ནད་པ་གསོ་པར་འདོད་ན། དུག་དང་གུ་གུལ་ནག་པོ་བསྲེས་ནས་ན་སར་བདུག་པར་བྱ་སྟེ། བྱུག་པའི་སྨན་ནི་བཙན་དུག་ནག་པོ་དང༌། མུ་ཟི་ནག་པོ་དང༌། ཟི་ར་ནག་པོ་དང༌། དནད་རོག་པོ་དང༌། རུ་རྟ་དང༌། ལྡོད་རོས་དང༌། ཤུ་དང་ནག་པོ་དང༌། མིའི་ཞུན་གྱིས་སྦྱར་ལ་བྱུག་པ་བྱའོ། །སྔགས་ཀྱིས་བརྡེགས་འདོད་ན་ཡུངས་ཀར་དང་རྨ་བྱའི་སྒྲོས་བརྡེག་གོ །དུག་ཟོས་ན་ཆུ་ལ་གདབ་པོ། །རིག་སྔགས་ཀྱ་རྒྱལ་མོ་རྨ་བྱ་ཆེན་མོ་ཀླུའི་སྲོག་སྙིང་ནི་གང་ཞེ་ན། འདི་ལྟ་སྟེ། ཧུ་ཧུ་ཧུ་ཧུ་ནཱ་ག་ལེ་ལེ་ལེ་ལ་སོགས་པའོ། །དེས་དུས་གཞན་ཞིག་ན་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་སྲུང་བ་དང་ཞེས་བྱ་བ་ནི་སྲུང་བའི་དམ་པའོ། །ཀླུའི་གཉེན་པོ་འདི་ཡང་དག་པར་རྫོགས་པའི་སངས་རྒྱས་འོད་སྲུངས་ཀྱི་བསྟན་པ་ལ་ཡང༌། བྱིན་གྱིས་རློབ་པར་འོང་ཞིང་སེམས་ཅན་གྱི་དོན་ལ་དུག་ནད་ཐམས་ཅད་མི་གནས་པར་བྱ་སྟེ། འབྱུང་པོ་རྣམས་རྐྱང་དེ་བཞིན་ནོ། །བདེ་ལེགས་སུ་འགྱུར་བར་མ་བྱས་ན། འདོད་པ་རྣམས་ལ་ཞེན་ཅིང་ཆགས་ཏེ་ཞེས་བྱ་བ་ནི། སེམས་ཅན་གྱི་དོན་ལ་ཐུགས་རྗེ་ཆེ་ཞིང་གནས་ཏེ། གང་ནས་གང་དུ་གནས་པའི་ས་ནས་ཀྱང་བཀྲ་ཤིས་པར་འགྱུར་ཞིང་འཇིགས་པ་མེད་ཅིང༌། རིམས་འགོ་པའི་ནད་
རྣམས་དང༌། རིམས་དྲག་པོ་དང༌། ནད་དང༌། མཛེ་དང༌། ཕོལ་མིག་དང༌། ཤ་བཀྲ་དང༌། ལྷོག་པ་དང༌། འབྲས་དང༌། གཡན་པ་དང༌། མེ་དབལ་དང༌། འབྱུང་པོ་རྣམས་ཀྱིས་ཀྱང་མི་ཚུགས་སོ། །རྒྱགས་པས་མྱོས་ནས་རབ་ཏུ་རྨོངས་ཤིང་བརྒྱལ་བ་དང་ཞེས་བྱ་བ་ནི། མྱོས་པས་བྱས་ཤིང་འདི་འཆང་བ་ནི། རྒྱལ་བར་འགྱུར་བ་ནི་ཐེ་ཚོམ་མེད་དེ། དེ་བཞིན་དུ་ཕྱོགས་གང་ལ་བལྟས་ནས་ཀྱང་བཀྲ་ཤིས་ཤིང་རྒྱལ་བ་སྟེ། འབྱུང་པོའི་ཚོགས་རྣམས་ཀྱིས་ཀྱང་ཉེ་བར་མི་ནུས་སོ། །རབ་ཏུ་ཞེན་ཏེ་ནགས་ཀྱི་རྨ་བྱ་གཞོན་ནུ་མང་པོ་དང་ལྷན་ཅིག་ཏུ་ཞེས་བྱ་བ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་སྣ་ཚོགས་ཀྱི་གཟུགས་སུ་སྤྲུལ་ཅིང༌། བྱའི་རྒྱལ་པོ་རྨ་བྱའི་གཟུགས་སུ་སྣང་སྟེ། རྨ་བྱའི་ནང་ནས་གསེར་དུ་སྣང་བའི་རིག་སྔགས་སུ་གནས་པའོ། །ཅིའི་ཕྱིར་ཞེ་ན་སེམས་ཅན་གྱི་དོན་གྱིས་སེམས་ཅན་སེམས་མི་གཅིག་པའི་རང་བཞིན་གྱིས་སྣ་ཚོགས་ཀྱི་གཟུགས་སུ་སྤྲུལ་ཞིང༌། བྱའི་རྒྱལ་པོ་རྨ་བྱའི་གཟུགས་སུ་སྣང་སྟེ། རྨ་བྱའི་ནང་ནས་གང་ལ་གང་གི་གཟུགས་སྟོན་ཏེ། སེམས་ཅན་དེ་དག་གི་གཟུགས་སུ་བྱས་ནས་འདུལ་བའོ། །སེམས་ཅན་བྱའི་གཟུགས་སུ་བྱས་ཤིང་འདུལ་བ་སྟེ། དེ་དག་གི་གཟུགས་ཀྱིས་སེམས་ཅན་འདུལ་བའོ། །སེམས་ཅན་ལྷའི་གཟུགས་སུ་བྱས་ནས། དེ་དག་གི་གཟུགས་ཀྱིས་སེམས་ཅན་འདུལ་བའོ། །སེམས་ཅན་འབྱུང་པོའི་གཟུགས་སུ་བྱས་ནས། དེ་དག་འདུལ་བ་སྟེ་དེ་བཞིན་དུ་སེམས་ཅན་ཐམས་ཅད་འདུལ་བའོ། །ཀུན་དགའི་ར་བ་ནས་ཀུན་དགའི་ར་བའི་བར། སྐྱེད་མོས་ཚལ་ནས་སྐྱེད་མོས་ཚལ་དུ། རིའི་ངོས་ནས་རིའི་ངོས་སུ་རྒྱུ་ཞིང་སོང་སོང་བ་ལས་ཞེས་བྱ་བ་ནི་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་གསེར་དུ་སྣང་བ་ལས་བྱའི་གཟུགས་སུ་མང་དུ་སྤྲུལ་ཅིང༌། དེའི་དབུས་སུ་རྨ་བྱ་གསེར་གྱི་མདོག་ཅན་བལྟ་ན་སྡུག་པ། མཆུ་བཻ་ཌཱུཪྻ་ལས་བྱས་པ་འདྲ་བ་རིན་པོ་ཆེ་སྣ་བདུན་གྱིས་སྤྲས་པའི་བ་སྤུ་དང་གཤོག་པ་སྣང་བ་དེ། དེ་བཞིན་དུ་མཇུག་མ་ཡང་བལྟ་ན་སྡུག་པའོ། །སེམས་ཅན་གྱི་དོན་ལ་རྨ་བྱ་རྣམས་ཀྱི་དབུས་སུ་གནས་པའོ། །རི་ཁྲོད་སྡིག་ཅན་གྱི་མི་རྣམས་ཀྱིས་མཐོང་ནས། བལྟ་ན་
སྡུག་པའི་ཕྱིར་བལྟས་སོ། །དེའི་ཕྱིར་ན་ཀུན་དགའ་ར་བ་ནས་ཀུན་དགའ་ར་བར་གནས་སོ། །སྐྱེད་མོས་ཚལ་ནས་སྐྱེད་མོས་ཚལ་དུ་གནས་སོ། །དེ་བཞིན་དུ་རིའི་ངོས་ནས་རིའི་ངོས་སུ་རྒྱུ་བའོ། །དེ་བག་མེད་པར་གྱུར་པས་རིའི་སེར་ཀ་ཞིག་ཏུ་ཆུད་ནས་ཞེས་བྱ་བ་ནི། རིགས་ངན་དེ་རྣམས་ཀྱིས་དེད་པས་རྨ་བྱ་དེ་རྣམས་སེར་ཀ་ལ་ཆུད་དོ། །དེ་དེར་རིགས་ངན་གཞོན་ནུ་ཡུན་རིང་དུ་ཕྱིར་རྒོལ་བ་ཞེས་བྱ་བ་ནི། རིགས་ངན་གྱི་རི་ཁྲོད་པ་སྙིང་རྗེ་མེད་པ་རྣམས་ཀྱིས་སླེབ་པོ། །དགྲར་གྱུར་པ་ཞེས་བྱ་བ་ནི་གསོད་སྙིང་ཆེ་ཞིང་སྡིག་ལ་མི་ལྟ་བའོ། །འཚེ་བར་གྱུར་པས་ཞེས་བྱ་བ་ནི། གཏུམ་མོའི་རིགས་ཅན་སེར་སྣ་ལ་སྲེད་པའོ། །གླགས་ལྟ་བ་རྣམས་ཀྱིས་རྨ་བྱའི་རྙིས་གཟུང་སྟེ་ཞེས་བྱ་བ་ནི། མི་བདུད་ཀྱི་རིགས་ཅན། གླགས་ཚོལ་ཞིང་སེམས་ཅན་ལ་གནོད་པ་སྐྱེལ་བ་དེ་ལྟ་བུའི་སྡིག་ཅན་གྱིས་རིག་སྔགས་ཀྱི་རྒྱལ་མོ་གསེར་དུ་སྣང་བ་བཟུང་ངོ༌། །དེ་མི་མཛའ་བའི་ནང་དུ་སོན་པ་དང་ཞེས་བྱ་བ་ནི། བདུད་ཀྱི་རིགས་ཅན་རིགས་ངན་དེ་ཡང༌། རིག་སྔགས་ཀྱི་རྒྱལ་མོ་རྨ་བྱ་ཆེན་མོ་གསེར་དུ་སྣང་བ་དེའི་བྱིན་རླབས་ཀྱིས་སྙིང་རྗེའི་སྟོབས་རྙེད་པའོ། །དྲན་པ་སླར་རྙེད་ནས་ཞེས་བྱ་བ་ནི་དགེ་བའི་སེམས་དང་ལྡན་ཞིང་མི་དགེ་བ་བོར་ཏེ། ཡང་དག་པར་རྫོགས་པའི་སངས་རྒྱས་ཀྱི་བཀའ་བདེན་པ་དང་རིག་སྔགས་ཀྱི་བྱིན་གྱི་རླབས་ཀྱིས་དྲན་པ་རྙེད་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ཉིད་ཡིད་ལ་བྱས་སོ་ཞེས་བྱ་བ་ནི། དེ་དྲན་པ་ཙམ་གྱིས་སྙིང་རྗེ་རྙེད་ཅིང༌། དཀོན་མཆོག་གསུམ་ལ་སྐྱབས་སུ་འགྲོ་ཞིང་རིག་སྔགས་རྗེས་སུ་དྲན་པའོ། །སངས་རྒྱས་ལ་ཕྱག་འཚལ་ལོ་ཞེས་བྱ་བ་ནི་རྣམ་པར་དག་པ་ངོ་བོ་དང་བྲལ་བའོ། །ཆོས་ལ་ཕྱག་འཚལ་ལོ་ཞེས་བྱ་བ་ནི། རྒྱ་ཆེ་ཞིང་བསམ་གྱིས་མི་ཁྱབ་པ་སྟེ། སེམས་ཅན་རྣམས་ལ་སྐྱོབ་ཅིང་དྲན་པ་ཉེ་བར་གཞག་པའོ། །དགེ་འདུན་ལ་ཕྱག་འཚལ་ལོ་ཞེས་བྱ་བ་ནི། དགྲ་བཅོམ་པ་ཟག་པ་ཟད་པ་ཕྱིར་མི་ལྡོག་པའི་འབྲས་བུ་དང༌། ཡང་དག་པར་རྫོགས་པའི་འབྲས་བུ་ཐོབ་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལ་ཕྱག་འཚལ་ལོ་ཞེས་བྱ་བ་ནི། མིང་དེ་དྲན་པ་དེ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ཀུན་གཞི་རྣམ་པར་
དྲན་ནོ། །ཀུན་གཞི་རྣམ་པར་དག་པ་དེ་ནི་རིན་པོ་ཆེའི་དེ་བཞིན་གཤེགས་པའི་རིགས་སོ། །དེ་མཚོན་པ་ནི་ཆོས་ཀྱི་དབྱིངས་ཀྱི་ཡེ་ཤེས་སོ། །མཚོན་བྱེད་ནི་རིག་སྔགས་ཀྱི་རྒྱལ་མོ་རྨ་བྱ་ཆེན་མོའོ། །དེའི་སྐུ་མདོག་དང་ཕྱག་མཚན་ནི། ཞལ་བཞི་ལ་ཕྱག་བརྒྱད་པ་སྐུ་མདོག་དཀར་བ་དབུ་ལ་སངས་རྒྱས་ལྔས་བརྒྱན་པ། སྤྱི་བོའི་གཙུག་ཏུ་འཁོར་ལོས་མཚན་པ། སྤྱན་གསུམ་པ། ཞལ་དང་པོ་ཞི་བ་གཡས་ཁྲོ་བོ། །གཡོན་དྲེགས་ཚུལ་དང་ལྡན་པ། རྒྱབ་སྒེག་པའོ། །གཡས་མཐིང་གཡོན་དམར་རྒྱབ་སེར་བའོ། །རྒྱན་ཐམས་ཅད་ཀྱིས་བརྒྱན་པ། གཡས་བརྐྱང་གཡོན་བསྐུམ་པའི་ཞབས་ཀྱིས་ཟླ་བའི་དཀྱིལ་འཁོར་ལ་མནན་ཅིང༌། པདྨའི་གདན་ལ་བཞུགས་པའོ། །ཕྱག་གཡས་པ་རྣམས་ན་ནི། རལ་གྲི་དང༌། འཁོར་ལོ་དང༌། རིན་པོ་ཆེ་དང༌། མདའ་བསྣམས་པའོ། །གཡོན་པ་རྣམས་ན་ནི་ལྕགས་ཀྱུ་དང༌། ཐོ་བ་དང༌། རྩེ་གསུམ་པ་དང༌། པདྨ་བསྣམས་པའོ། །གཟུགས་ཀྱི་ཕུང་པོའི་རང་བཞིན་སའི་ཁམས། སྐྱེ་མཆེད་མིག །ཡེ་ཤེས་ལྔའི་རང་བཞིན་ཉི་མའི་འོད་དང་བཅས་པའོ། །དེ་ལྟ་བུའི་རིགས་དང་བཅས་ཤིང༌། ཡིད་ལ་བྱས་ཏེ་བསམ་པ་དང༌། ཚོར་བ་དང༌། རེག་པ་དང༌། ཁ་རླངས་ཀྱི་དུག་བཅོམ་ཞིང༌། སེམས་ཅན་ཐམས་ཅད་ལ་བདེ་བར་གནས་པའི་རིག་སྔགས་སོ། །རིག་སྔགས་ནི་གང་ཞེ་ན། འདི་ལྟ་སྟེ། ཧུ་ཧུ་ཧུ་ཧུ་ཧུ་ཧུ། ནཱ་ག་ལེ་ལེ་ལེ་ལ་སོགས་པའོ། །དེ་ནས་སྡུག་བསྔལ་དེ་ལས་ཐར་ཏེ་ཞེས་བྱ་བ་ནི་མ་རིག་པའི་རང་བཞིན་གྱིས་གཏུམ་པ་དང་སེར་སྣ་དང༌། ཞེ་སྡང་དང་འདོད་ཆགས་དང་གཏི་མུག་དང༌། ཕྲག་དོག་ལ་སོགས་པའི་སྡུག་བསྔལ་དང་བྲལ་བའོ། །དེ་ནས་སྡུག་བསྔལ་དང་བྲལ་བ་ཙམ་གྱིས། དེའི་ཡུལ་ཙམ་ལ་བཀྲ་ཤིས་ཤིང༌། མི་ནད་དང༌། ཕྱུགས་ནད་དང༌། འབྲུམ་བུ་ལ་སོགས་པའི་ནད་དང༌། ཡུལ་དེ་ཡང་བདེ་ལེགས་ཤིང་བཀྲ་ཤིས་ཤིང་ཞི་བར་གནས་པའོ། །དགའ་བ་དང༌། བདེ་བ་དང༌། བདག་གི་ཡུལ་དུ་ཕྱིན་ནས་གསང་སྔགས་ཀྱི་ཚིག་འདི་དག་ཀྱང་བཟླས་སོ་ཞེས་བྱ་བ་ནི། མི་དེས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་གསེར་དུ་སྣང་བའི་གཟི་བརྗིད་དང༌། སྟོབས་དང༌། བྱིན་
གྱི་རླབས་ཀྱིས། རིན་པོ་ཆེའི་རིན་ཆེན་རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་ཚིག་སྨས་པའོ། །ཞི་བ་དང་རྒྱས་པར་འདོད་པར་གྱུར་ན་འདི་གཞུང་བཞིན་དུ་ཞག་ཉི་ཤུ་རྩ་གཅིག་འཁོར་ལོ་བྲིས་ལ་རྒྱལ་མཚན་གྱི་རྩེ་མོ་འམ། མཆོད་རྟེན་གྱི་རྩེ་མོ་འམ་ཡུལ་ལྷའི་རྩི་མོར་བཏགས་ན་དེ་ན་གནས་པའི་ལྷ་འདྲེ་རྣམས་ཞི་བར་འགྱུར་ཞིང༌། མི་ནད་དང་ཕྱུགས་ནད་ཐམས་ཅད་ཞི་བར་འགྱུར་རོ། །ཡང་ན་གང་ཟག་རང་གི་ཉལ་བའི་སའི་སྟེང་ངམ། ཡ་ཐེམ་ལ་བཏགས་ན་བཀྲ་ཤིས་ཤིང་སྡུག་བསྔལ་ཐམས་ཅད་དང་བྲལ་བར་འགྱུར་རོ། །འཆང་བ་དང་ཀློག་པ་བྱས་ན་ཚེ་ད་ལྟའི་སྡུག་བསྔལ་དང་བྲལ་ཏེ། ཚེ་ཕྱི་མ་ཡང་དེ་བཞིན་ནོ། །ཀུན་གཞི་རྣམ་པར་དག་པ་ནི། རིག་སྔགས་ཀྱི་རྒྱལ་མོ་རྨ་བྱ་རིན་པོ་ཆེའི་རིན་ཆེན་རིགས་ཡིན་ཏེ། དེ་མཚོན་པ་ནི་མཉམ་པ་ཉིད་ཀྱི་ཡེ་ཤེས་སོ། །མཚོན་བྱེད་ནི་རིག་སྔགས་ཀྱི་རྒྱལ་མོ་རྨ་བྱ་ཆེན་མོའོ། །ཕུང་པོ་ནི་ཚོར་པའི་ཕུང་པོ་སྟེ། ཆུའི་ཁམས་སོ། །སྐྱེ་མཆེད་ནི་སྣའི་སྐྱེ་མཆེད་དོ། །ཡེ་ཤེས་ལྔའི་རང་བཞིན་ནོ། །དེའི་སྐུ་མདོག་དང་ཕྱག་མཚན་ནི། ཞལ་བཞི་པ་ཕྱག་བརྒྱད་པ་སྐུ་མདོག་སེར་མོའོ། །དབུ་ལ་རིགས་ལྔའི་དབུ་རྒྱན་ཅན། སྤྱི་བོའི་གཙུག་རིན་པོ་ཆེས་བརྒྱན་པ། སྤྱན་གསུམ་པ་རྒྱན་ཐམས་ཅད་ཀྱིས་བརྒྱན་པ། ཞལ་དང་པོ་དྲེགས་ཚུལ་དང་ལྡན་པ། གཡས་ཁྲོ་བོ། །གཡོན་བགད་པ། རྒྱབ་ཞི་བའི་ཚུལ་དང་ལྡན་པའོ། །གཡས་དཀར་བ་གཡོན་དམར་བ་རྒྱབ་མཐིང་བའོ། །ཞབས་གཡས་བརྐྱང་བ་གཡོན་བསྐུམ་པ་པདྨའི་སྟེང་དུ་ཟླ་བའི་གདན་ལ་བཞུགས་པའོ། །ཕྱག་གཡས་དང་པོ་ན་རལ་གྲི་བར་མ་གཉིས་ནི་རིན་པོ་ཆེའི་འཁོར་ལོ། །ཐ་མ་ན་རྨ་བྱའི་སྒྲོ། །གཡོན་དང་པོ་ན་རྡོ་རྗེ། བར་མ་གཉིས་པདྨ་དང་རྡོ་རྗེ་རྒྱ་གྲམ། ཐ་མ་ན་རྨ་བྱའི་སྒྲོ། །ཉི་མའི་འོད་དང་ལྡན་ཞིང་སེམས་ཅན་ཐམས་ཅད་ལ་དོན་བྱེད་པའོ། །རིག་སྔགས་བཀླགས་པ་ཙམ་གྱིས་སེམས་ཅན་ཐམས་ཅད་བདེ་བར་གནས་པའོ། །སངས་རྒྱས་ལ་ཕྱག་འཚལ་ལོ་ཞེས་བྱ་བ་ནི། སྔོན་དུ་མི་གནས། ཕྱིས་མི་གནས། ད་ལྟར་མི་གནས་པ་བསམ་གྱིས་མི་ཁྱབ་པའོ། །ཆོས་ལ་ཕྱག་འཚལ་ལོ་ཞེས་བྱ་བ་ནི། མི་གཟུང་
མི་གནས་རྒྱ་ཆེར་ཁྱབ་པ། རྟོག་པའི་རང་བཞིན་སེམས་ཉིད་ལའོ། །དགེ་འདུན་ལ་ཕྱག་འཚལ་ལོ་ཞེས་བྱ་བ་ནི། དགེ་བ་མང་པོ་དེ་འདུས་པ་དེས་སྡིག་པ་བཤགས་པ་སྟེ། འཕགས་པ་དགྲ་བཅོམ་པ་དག་པའོ། །རྨ་བྱའི་རྒྱལ་མོ་གསེར་དུ་སྣང་བ་ལ་ཕྱག་འཚལ་ལོ་ཞེས་བྱ་བ་ནི། རྨ་ནི་སྒྱུ་མ་ལྟ་བུའི་རང་བཞིན་ཆོས་ཐམས་ཅད་མི་དམིགས་པའོ། །བྱ་ནི་ཡེ་ཤེས་ཀྱི་རང་བཞིན་མ་རིག་མུན་པ་རང་བསལ་གཉུག་མའི་རང་བཞིན་ནོ། །འདི་ནི་གནས་མེད་ཅིང་གང་གིས་མི་འགྲུབ་མི་སྐྱེ་བ་མེད་པའོ། །ཡང་ན་རྨ་བྱ་ནི་དེ་བཞིན་གཤེགས་པ་ཐམས་ཅད་དང༌། བྱང་ཆུབ་སེམས་དཔའ་རྣམས་ཀྱི་ཡུམ་མོ། །གསེར་དུ་སྣང་བ་ནི་གསེར་བཞིན་དུ་ཁ་དོག་གསལ་ཞིང་བལྟ་ན་སྡུག་པའོ། །རྒྱལ་མོ་ནི་བདུད་བཞི་ལས་རྒྱལ་བའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལ་ཕྱག་འཚལ་ལོ་ཞེས་བྱ་བ་ནི། རིག་པ་ནི་སྟོང་པ་ཉིད་དོ། །སྟོང་པ་ཉིད་ནི་ཤེས་རབ་བོ།། ཤེས་རབ་ནི་མི་དམིགས་པའི་རང་བཞིན། རང་བཞིན་གྱིས་འོད་གསལ་བའི་ཡེ་ཤེས་སོ། །སྔགས་ནི་མ་མནདའི་དོན་གྱིས་བསྐྱབ་པ་དང༌། སྐྱོབ་པའི་རང་བཞིན་སྟོང་པ་ཉིད་དུ་གནས་པའོ། །རྒྱལ་མོ་ནི་མ་རིག་པ་ལས་རྒྱལ་བ་སྟེ་མ་རིག་པ་དེ་ནི་འཁོར་བའི་རྒྱུའོ། །འཁོར་བའི་རྒྱུ་དེ་ནི་བདུད་བཞིའོ། །དེ་ལས་རྒྱལ་བསན་རྒྱལ་མོའོ། །ཆེན་མོ་ནི་བསམ་གྱིས་མི་ཁྱབ་ཅིང་ནམ་མཁའ་བཞིན་དུ་འཇིག་རྟེན་གྱི་ཁམས་རྣམས་ལ་ཁྱབ་པའོ། །རིག་སྔགས་ཀྱི་གསང་སྔགས་ཀྱི་ཚིག་གང་ཞེ་ན། འདི་ལྟ་སྟེ། སིདྡྷེ་སུ་སིདྡྷེ་ལ་སོགས་པའོ། །སངས་རྒྱས་ཐམས་ཅད་ལ་ཕྱག་འཚལ་ལོ་ཞེས་བྱ་བ་ནི། རིག་སྔགས་ཀྱི་རྒྱལ་མོ་ཕྱག་རྒྱས་བཏབ་པ། འདས་པ་དང༌། མ་འོངས་པ་དང༌། ད་ལྟར་བྱུང་བའི་སངས་རྒྱས་རྣམས་སོ། །བདག་ལ་དགེ་བ་དང༌། བསྲུང་བ་མཛད་དུ་གསོལ་ཞེས་བྱ་བ་ནི། གང་ཟག་སེམས་ཅན་ཐམས་ཅད་དང་རིག་སྔགས་ཀྱི་རྒྱལ་མོ་རྨ་བྱ་ཆེན་མོས་བསྲུང་བའོ། །ལོ་བརྒྱ་འཚོ་བར་གྱུར་ཅིག་ཅེས་བྱ་བ་ནི། འདི་ལ་འཆང་པ་དང་གུས་པར་བྱེད་པ་ཚེ་རིང་ཞིང་བཀྲ་ཤིས་ཏེ། ནད་ཐམས་ཅད་དང་བྲལ་བའོ། །སྟོན་བརྒྱ་མཐོང་བར་ཤོག་ཅིག་ཅེས་བྱ་བ་ནི། ཇི་སྲིད་མ་ཤིའི་བར་དུ་བདེ་བར་གནས་ཤིང་ཡང་ནས་ཡང་དུ་ཚེ་བསྣན་པར་འགྱུར་རོ། །རིག་སྔགས་ཀྱི་རྒྱལ་
མོ་འདི་ཀུན་གཞི་རྣམ་པར་དག་པས་ཐབས་ཤེས་རབ་གཉིས་སུ་མེད་སྤ་མཚོན་པར་བྱེ་དེ་པ་ནི་སོ་སོར་རྟོག་པའི་ཡེ་ཤེས་ཏེ། མཚོན་བྱེད་ནི་རིག་སྔགས་ཀྱི་རྒྱལ་མོའོ། །རིགས་ནི་རིན་པོ་ཆེ་དང་པདྨའི་རིགས་སོ། །འདུ་ཤེས་ཀྱི་ཕུང་པོ་མེའི་ཁམས་ལྕེའི་སྐྱེ་མཆེད་དོ། །ཡེ་ཤེས་ལྔའི་རང་བཞིན་གསལ་ཞིང༌། ཕྱག་བརྒྱད་སྐུ་མདོག་དམར་མོའོ། །སངས་རྒྱས་ལྔའི་དབུ་རྒྱན་ཅན། དབུ་ལ་པདྨས་བརྒྱན་པ། སྤྱན་གསུམ་པ་རྒྱན་ཐམས་ཅད་ཀྱིས་བརྒྱན་པ། ཞལ་དང་པོ་ཅུང་ཟད་ཁྲོ་བ། གཡས་ཞི་བ་གཡོན་དྲེགས་ཚུལ་དང་ལྡན་པ། རྒྱབ་ཁྲོ་མོར་བསམ་མོ། །གཡས་དཀར་པོ། །གཡོན་མཐིང་ག །རྒྱབ་ལྗང་གུའོ། །ཞབས་གཡས་བརྐྱང་བ། གཡོན་བསྐུམ་པ། པདྨའི་སྟེང་དུ་ཟླ་བའི་གདན་ལ་བཞུགས་པའོ། །ཕྱག་གཡས་པ་རྣམས་ན་རལ་གྲི་དང༌། པདྨ་དང༌། འཁོར་ལོ་དང༌། རིན་པོ་ཆེའོ། །ཕྱག་གཡོན་པ་རྣམས་ན། ཞགས་པ་དང༌། ལྕགས་ཀྱུ་དང༌། རྨ་བྱའི་སྒྲོ་དང༌། དགྲ་སྟ་རྣམས་བསྣམས་པའོ། །འོད་ཉི་མའི་འོད་དང་ལྡན་ཞིང༌། སེམས་ཅན་ཐམས་ཅད་ལ་ཐུགས་རྗེའི་སྤྱན་གྱིས་གཟིགས་པའི་རིག་སྔགས་ཀྱི་གསང་སྔགས་འདིས་ཆར་འབེབས་པའི་ཐབས་ནི་རིག་སྔགས་ཀྱི་གཞུང་དུ་བྱས་ནས། རི་འམ་ཆུ་མིག་གཉེན་པོར། སྔགས་འདི་བྲིས་ནས་མནན་པར་བྱའོ། །དེ་བཞིན་དུ་ཀླུ་གང་གནས་པའི་མིང་བྱང་བྲིས་ལ། གུ་གུལ་ནག་པོའམ། མུ་ཟི་ནག་པོ་འམ། ལྡོང་རོས་སམ། མི་ཞུན་བསྲེས་ལ་སྡོང་བུ་བྱས་ཏེ། དེ་མནན་པ་དང་བསྲེག་པར་བྱའོ། །རིག་སྔགས་ཀྱི་གསང་སྔགས་ནི་འདི་ཡིན་ཏེ། དྲག་པོར་བཟླས་ཤིང༌། ཀླུ་མཐའ་ཡས་ལ་སོས་པ་བསྐུལ་བར་བྱའོ། །འདི་ལྟ་སྟེ། ཏུ་ཙི་གུ་ཙི། །ཧུ་ཙི། མུ་ཙི་སྭཱ་ཧཱ། ཞེས་བྱ་བ་བཟླས་སོ། །དེ་བཞིན་དུ་བྱས་ན་ཐེ་ཚོམ་མེད་ཅིང༌། ཆར་འབེབས་པར་འགྱུར་རོ། །རིན་ཆེན་རིགས་ཀྱི་པདྨའི་རིག་སྔགས་འདིས་དུག་ཟ་བར་གྱུར་ན། ཟས་ལ་བཏབ་ལ་སྤྱིན་ནོ། །འབྱུང་པོ་རྣམས་བྱུང་ན་སྙིང་ག་ལ་བཏབ་པོ། །རིམས་ནད་བྱུང་ན་སྤྱི་བོའི་གཙུག་ཏུ་སྔར་ཤད་པའི་སྨན་དང་སྔགས་གདབ་བོ། །དེ་ལྟར་བྱས་ན་ཐེ་ཚོམ་མེད་དོ། །ཡང་དག་པར་རྫོགས་
པའི་སངས་རྒྱས་རྣམས་ཀྱི་བཀའོ། །ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་སེམས་ཅན་གྱི་དོན་ལ་ཀུན་དགའ་བོ་ལ་བཀའ་སྩལ་པ། དེའི་ཚེ་དེའི་དུས་ན་ཞེས་བྱ་བ་ནི་སྔོན་མི་དེའི་དུས་ན་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་བྱུང་བའི་དུས་སོ། །རྨ་བྱའི་རྒྱལ་མོ་གསེར་དུ་སྣང་བ་ཞེས་བྱ་བ་དེ་ཞེས་བྱ་བ་ནི། འདས་པ་དང༌། མ་འོངས་པ་དང༌། ད་ལྟར་བྱུང་བའི་སངས་རྒྱས་རྣམས་ཀྱིས་གསུང་ཞིང༌། རྗེས་སུ་ཡི་རང་བ་སྡུག་བསྔལ་ཐམས་ཅད་དང་བྲལ་བར་བྱེད་པ། ཕྱིའི་དུག་དང་ནང་གི་དུག་འཇོམས་པའོ། །གཞན་ཡིན་པ་སྙམ་དུ་ཁྱོད་སེམས་ན། དེ་ལྟར་མི་ལྟའོ་ཞེས་བྱ་བ་ནི། སྔོན་ཡང་གངྒཱའི་ཀླུང་གི་བྱེ་མ་སྟོང་ཕྲག་བརྒྱད་ཁྲི་བརྒྱད་ཅུ་རྣམས་དེ་བཞིན་གཤེགས་པས་གསུངས་ཏེ། དེ་ལྟར་ཡང་ངས་གསུངས་པའོ། །དེ་བཞིན་དུ་མ་འོངས་པ་རྣམས་ཀྱིས་ཀྱང་གསུང་བར་འགྱུར་རོ། །དེ་ཅིའི་ཕྱིར་ཞེ་ན་ཞེས་བྱ་བ་ནི། རིག་སྔགས་ཀྱི་རང་བཞིན་བསམ་གྱིས་མི་ཁྱབ་པ་བརྗོད་དུ་མེད་པའོ། །རིག་སྔགས་ཀྱི་རང་བཞིན་སློབ་དཔོན་ལས་ཀྱི་རྡོ་རྗེས་ཚིགས་སུ་བཅད་དེ་གསུངས་པ། སེམས་ནི་སེམས་ཀྱིས་རིག་མ་ཡིན། ཇི་སྲིད་སྒྲོ་བཏགས་ཐམས་ཅད་ནི། །དེ་ཀུན་ཐམས་ཅད་མེད་པས་ན། །རིག་པའི་དོན་ལ་སྒྲོ་བཏགས་མེད། །དེས་ནི་དགག་དང་སྒྲུབ་བ་མེད། །ཤེས་པ་གང་ཞིག་ལྷུན་གྲུབ་པ། དེ་ལ་བསམ་གྱིས་མི་ཁྱབ་བརྗོད། །བསམ་བཞིན་དུ་ནི་མི་ཁྱབ་པ། །དེ་ལ་བསམ་གྱིས་མི་ཁྱབ་བརྗོད། །གང་ཞིག་འགྲོ་བ་མ་སྐྱེས་ཞེས། །བློ་ནི་རྟག་པ་རྟོག་པ་ཉིད། །འགྲོ་བའི་གཉུག་མ་བདེ་བ་ཉིད། །བློ་དང་ལྡན་བས་འབད་པ་མེད། །སྒྲོ་བཏགས་ཀུན་ལས་ངེས་གྲོལ་བ། །བདག་གི་དེ་ཉིད་དུ་ནི་བརྗོད། །སྟོང་པ་ལ་སོགས་མངོན་བརྗོད་པ། །དེ་ལ་སྒྲོ་བཏགས་བརྗོད་པ་ཡིས། །ཞེས་བསྟན་པའོ། །དབུ་མའི་ལམ་ནས་རིག་པའི་དོན་བསྟན་བའོ། །དེ་བས་ན་ཀུན་དགའ་བོ་ཞེས་བརྗོད་པའོ། །ད་ཉིད་དེའི་ཆེ་དེའི་དུས་ན་རྨ་བྱའི་རྒྱལ་མོ་གསེར་དུ་སྣང་བ་ཞེས་བྱ་བར་གྱུར་ཏོ་ཞེས་བྱ་བ་ནི། དེའི་ངོ་བོ་ཉིད་རིག་པའི་རྒྱལ་མོར་སྣང་སྟེ། དེ་ནི་ཀུན་རྫོབ་ཀྱི་རང་བཞིན་གྱིས་སེམས་ཅན་གྱི་དོན་ལ་སྣང་བར་གྱུར་པའོ། །
ཀུན་དགའ་བོ་ཞེས་བྱ་བ་ནི་སེམས་ཅན་གྱི་དོན་ལ་བཀའ་སྩལ་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་སྙིང་པོ་འདི་ཡང་དག་པར་བཟླས་པར་བྱའོ་ཞེས་བྱ་བ་ནི་སེམས་ཅན་གྱི་དོན་གྱི་གླགས་པ་དེ་ཉིད་ཡིན་ཏེ། སྟོང་པ་ཉིད་ཀྱིས་མ་གྲུབ་པས། མ་མནྟྲའི་དོན་དུ་སྐྱབས་དང་སྐྱོབ་པའི་དོན་གྱིས་རིན་ཆེན་རིགས་ཀྱི་ལས་ཀྱི་སྤྲུལ་པའོ། །དེ་ཡང་ཀུན་གཞི་རྣམ་པར་དག་པ་ནི་སྟོང་པ་ཉིད་ཡིན་ཏེ། ཐབས་དང་ཤེས་རབ་བྲལ་བའི་ཡེ་ཤེས་ནི་འཆིང་བའོ། །ཤེས་རབ་དང་ཐབས་དང་འཛོམ་པའི་ཡེ་ཤེས་ནི་གྲོལ་བའོ། །སུས་གསུངས་ཤེ་ན་ཡང་དག་པར་རྫོགས་པའི་སངས་རྒྱས་ཀྱིས། འཕགས་པ་དྲི་མ་མེད་པར་བསྟན་པ་ཞེས་བྱ་བ་ཐེག་པ་ཆེན་པོའི་མདོ་ནས་ཀྱང་གསུངས་སོ། །ཤེས་རབ་བྲལ་བའི་ཐབས་ཀྱང་འཆིང་དོ། །ཐབས་དང་བྲལ་བའི་ཤེས་རབ་ཀྱང་འཆིང་བའོ། །ཤེས་རབ་དང་བཅས་པའི་ཐབས་ནི་ཐར་པའོ། །ཐབས་དང་བཅས་པའི་ཤེས་རབ་ནི་ཐར་པའོ་ཞེས་གསུངས་སོ། །འདི་དག་དེའི་བདག་ཉིད་ནི་བླ་མའི་མན་ངག་ཉིད་ནས་སྒྲོན་མ་དང་སྣང་བ་བཞིན་དུ་ལྷན་ཅིག་སྐྱེས་པ་ལྟར་བསྒྲུབ་པ་བཞིན་དུ་རྟོགས་པར་བྱའོ། །དེ་བས་ན་སྟོང་པ་ཉིད་དང་སྙིང་རྗེ་དབྱེར་མེད་པའོ། །འདིར་ཡང་སྟོང་པ་ཉིད་ནི་ཡེ་ཤེས་ཏེ་མཚོན་པར་བྱེད་པ་དེ་བྱ་བ་ནན་ཏན་གྱི་ཡེ་ཤེས་སོ། །བདག་ཉིད་ལྟ་བུའི་མཚོན་བྱེད་ནི་རིན་ཆེན་ལས་ཀྱི་རིགས་ཀྱི་རྨ་བྱ་ཆེན་མོའོ། །ཞལ་བཞི་སྟོན་པ་ནི། བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ཀྱི་སྒོ་ནས་རྣམ་པར་དག་པའོ། །སྐུ་མདག་ལྗང་གུར་བསྟན་པ་ནི། རིག་སྔགས་འདིས་ལས་ཐམས་ཅད་འགྲུབ་པར་བསྟན་བའོ། །རྣམ་པར་དག་པའོ། །ལྗང་གུ་དང༌། སེར་པོ་དང༌། དཀར་པོ་དང༌། དམར་པོའི་ཞལ་ནི་ཞི་བ་ལ་སོགས་པའི་ལས་རྣམ་བཞི་བསྟན་པའོ། །དེ་བཞིན་གཤེགས་པ་ལྔའི་དབུ་རྒྱན་ཅན་ནི། ཡེ་ཤེས་ལྔའི་རང་བཞིན་བསྟན་པའོ། །དབུ་ལ་སྣ་ཚོགས་ཀྱི་རྡོ་རྗེས་བརྒྱན་པ་ནི། རིགས་མ་ངེས་པ་ལས་ཀྱི་རིགས་ཀྱི་མཚན་ཉིད་དོ། །སྤྱན་གསུམ་པ་ནི། ཏིང་ངེ་འཛིན་ཉེ་བར་བསྟན་པའོ། །ཁྲོ་མོར་སྒོམ་པ་ནི་ཐེག་པ་སྣ་ཚོགས་ཡོད་པས་ཐེག་པ་ཆེན་པོའི་རང་བཞིན་
བསྟན་པའོ། །སྦྲུལ་གྱིས་ཡན་ལག་བརྒྱན་པ་ནི། མ་རུངས་པའི་གདུག་པ་ཅན་ཀླུ་དང་གནོད་སྦྱིན་ལ་སོགས་པ་འདུལ་བའི་ཕྱིར་རོ། །རྒྱན་ཐམས་ཅད་ཀྱིས་བརྒྱན་པ་ནི། ཕ་རོལ་ཏུ་ཕྱིན་པ་དྲུག་གི་རྣམ་པར་དག་པའོ། །ཕྱག་བརྒྱད་དུ་བསྟན་པ་ནི། རྣམ་པར་ཐར་པ་བརྒྱད་དོ། །གཡས་དང་པོ་ན་རལ་གྲི་བསྣམས་པ་ནི། ཤེས་རབ་ཀྱི་རང་བཞིན་ནོ། །དེའི་འོག་མ་ན་རྡོ་རྗེ་འཛིན་པ་ནི་ཡེ་ཤེས་ལྔའི་རང་བཞིན་ཐབས་སོ། །གཡོན་དང་པོ་སྡིགས་མཛུབ་ཞགས་པ་ནི་འགྲོ་བ་མ་ལུས་པའི་སེམས་ཅན་ཐམས་ཅད་བཅིངས་པའོ། །དེའི་འོག་མ་རྩེ་གསུམ་འཛིན་པ་ནི། ངེས་པར་སྲིད་པ་གསུམ་འཇོམས་པའོ། །བར་མ་གཡས་གཡོན་གཉིས་ན་མདའ་གཞུ་འགེངས་པ་ནི་ཐབས་ཤེས་རབ་གཉིས་སུ་མེད་པའི་བརྡ་བསྟན་པའོ། །འོག་མ་གཡས་གཡོན་གཉིས་ན་རྨ་བྱའི་སྒྲོ་བསྣམས་པ་ནི། ནང་གི་དུག་དང་ཕྱིའི་དུག་ངེས་པར་འཇོམས་པའོ།། ཞབས་གཡས་བརྐྱང་པས་ཀླུ་མནན་པ་ནི། སྲིང་པ་འཇོམས་པའོ། །གཡོན་བསྐུམ་པས་གནོད་སྦྱིན་མྱ་ངན་གྱི་ཚུལ་གྱིས་མནན་པའོ། །པདྨ་སྣ་ཚོགས་ཀྱི་གདན་ནི་ཐེག་པ་སྣ་ཚོགས་བསྟན་པའོ། །ཉི་ཟླ་གདན་ལ་བཏིང་བ་ནི་ཐབས་དང་ཤེས་རབ་ཟུང་དུ་འབྲེལ་པའོ། །འོད་ཟེར་སྣ་ཚོགས་དང་ལྡན་པ་ནི་ཁྲོ་བོའི་ཚུལ་གྱིས་གདུག་པ་ཅན་རྣམས་འདུལ་བའོ། །ཡེ་ཤེས་ལྔའི་རང་བཞིན་ནི་རིགས་ལྔ་རྣམ་པར་དག་པའོ། །རིན་ཆེན་རིགས་ཀྱི་རྨ་བྱ་ཆེན་མོ་ནི། ལས་ཐམས་ཅད་གྲུབ་ཅིང་དུག་ཐམས་ཅད་བཅོམ་པའོ། །སེར་བ་སྲུང་བར་འདོད་ན། རིག་སྔགས་བཟླས་ཤིང་གདོང་བཟློག་སྟེ། རིག་སྔགས་ཀྱི་རང་བཞིན་བྱས་ནས་གཡས་ན་ཟོར་བ་འཛིན་པ་གཡོན་ན་ཞགས་པ་འཛིན་པ། རིག་སྔགས་བཟླས་ཤིང་དྲག་བོར་གདོང་བཟློག་པར་བྱའོ། །བདག་ཉིད་བསྲུང་བར་འདོད་ན། གྲོ་བ་འམ་ཤིང་ཤུན་ནམ་རས་ལ་བྲིས་ལ། མགུལ་ལམ་ལག་པ་གཡས་པ་ལ་གདགས་སོ། །ནད་པ་གསོ་བར་འདོད་ན་རིག་སྔགས་ཀྱི་སྙིང་པོ་འདི་བཟླས་པར་བྱའོ། །གུ་གུལ་ནག་པོ་དང༌། ལྡོང་རོས་དང༌། མུ་ཟི་དང༌། ཤུ་དག་དང༌། གླ་རྩི་དང༌། བཙན་དུག་དང༌། བྲག་ཞུན་དང༌། མི་ཤ་དང༌། ཁྱི་ཤ་དང༌། རྟ་ཤ་དང༌། ཡུངས་ཀར་དང༌། ཟི་ར་ནག་པོ་
དང། མིའི་ཞུན་གྱིས་སྦྱར་བར་བྱའོ། །བདུག་པ་དང༌། བྱུག་པ་ཡིན་ཏེ། དེས་བྱས་ན་ནད་རྣམས་མེད་པར་འགྱུར་རོ། །དུག་འཐུངས་ན་ཆུ་ལ་བཏབ་ལ་སྦྱིན་ནོ། །ལས་ཐམས་ཅད་གྲུབ་པའི་རིག་སྔགས་ཀྱི་གསང་སྔགས་གང་ཞེ་ན། འདི་ལྟ་སྟེ། ཨི་ཏི་མི་ཏི་ལ་སོགས་པའོ། །ཡང་ལས་ཀྱི་རྡོ་རྗེས་ཚིགས་སུ་བཅད་དེ་གསུངས་པ། གང་ཞིག་གང་ཟག་འདི་གྲུབ་ན། །དངོས་གྲུབ་ཐམས་ཅད་འདི་ཡིས་འགྲུབ། །རྣམ་པར་ཐར་པ་འདི་ཡིས་འགྲུབ། །དྲི་མ་ཐམས་ཅད་འདིས་བྲལ་ལོ། །སྐད་ཅིག་མས་ནི་བསྒོམ་བྱས་ན། །རིག་སྔགས་འཆང་ནི་འདིར་འགྲུབ་པོ། །རྫོགས་པའི་སངས་རྒྱས་རྣམས་གསུངས་པ། །གཉིས་པའི་སེམས་ནི་འདིར་མེད་དོ། །དེ་སྐད་དུ་གསུངས་པའོ། །ཀུན་དགའ་པོ་ཞེས་བྱ་བ་ནི་དེ་བཞིན་གཤེགས་པའི་ཞལ་ནས་སེམས་ཅན་དོན་དུ་བཀའ་སྩལ་པའོ། །འདི་ནི་རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་སྙིང་པོ་ཡིན་ནོ་ཞེས་བྱ་བ་ནི། བསྲུང་བའི་དམ་པ་ལས་ཀྱི་སྙིང་པོ་གང་དུ་ཡང་དྲན་པར་གྱུར་ན་གྲུབ་པར་འགྱུར་རོ། །ཀུན་དགའ་བོ་ཞེས་བྱ་བ་ནི། ཡང་ནས་ཡང་དུ་སངས་རྒྱས་ཀྱིས་འགྲོ་བ་རིགས་དྲུག་གི་དོན་དུ་གསུངས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་གྲོང་ན་འདུག་ན་ཡང་ཡིད་ལ་བྱའོ་ཞེས་བྱ་བ་ནི། ཡིད་བཞིན་གྱི་ནོར་བུ་འདི་འདུག་པར་གྱུར་ནས་རྗེས་སུ་ཡི་རང་ནས། རྨི་ལམ་ངན་པ་དང་ལྟས་ངན་པ་བཟློག་པར་འགྱུར་རོ། །དགོན་པ་ན་འདུག་གམ་ཞེས་བྱ་བ་ནི་བསྒོམ་པ་ལ་བར་ཆོད་མེད་ཅིང་མྱུར་དུ་བསྒོམ་པ་འགྲུབ་པའོ། །ལམ་ན་འདུག་གམ་ཞེས་བྱ་བ་ནི་འགྲོ་བའི་བསམ་པ་གྲུབ་ཅིང༌། མྱུར་དུ་བཀྲ་ཤིས་པར་སླེབ་པའོ། །ལམ་གོལ་བ་ན་འདུག་གམ་ཞེས་བྱ་བ་ནི་འགྲོ་བའི་དུས་སུ་དགྲ་དང་མི་ཕྲད་ཅིང་འགྲོ་བའི་བསམ་པ་གྲུབ་ཅིང༌། མྱུར་དུ་ཁྱིམ་དུ་སླེབ་པའོ། །རྒྱལ་པོའི་ཕོ་བྲང་འཁོར་ན་འདུག་གམ་ཞེས་བྱ་བ་ནི། རྒྱལ་པོས་ཆད་པས་མི་གཅོད་ཅིང་བྱམས་པའི་གཏམ་ཐོབ་པར་འགྱུར་རོ། །ཆོམ་རྐུན་གྱི་ནང་ན་འདུག་གམ་ཞེས་བྱ་བ་ནི། དེ་རྣམས་ཀྱིས་མི་མཐོང་ཞིང་རང་གི་ཡུལ་དུ་ཉེ་བར་སླེབ་སྟེ། གལ་ཏེ་མཐོང་བར་གྱུར་ན་རིག་སྔགས་ཀྱི་གཟི་བརྗིད་ཀྱིས་འཇོམས་པར་མི་འགྱུར་རོ། །མེའི་ནང་ན་འདུག་གམ་ཞེས་
བྱ་བ་ནི། ཁྱིམ་མམ་ཡུལ་ལམ་ནགས་ཚལ་མེས་ཚིག་པར་གྱུར་ན། དེའི་ནང་དུ་ཆུད་ནས་ཀྱང་མེའི་འཇིགས་པ་དང་བྲལ་བར་འགྱུར་རོ། །ཆུའི་ནང་ན་འདུག་གམ་ཞེས་བྱ་བ་ནི། རྒྱ་མཚོའི་ནང་ན་རྫིང་ཆེན་པོ་ལས་རྒལ་བ་འམ། གྲུའི་ནང་ན་ཆུད་པའམ། རབ་རྒལ་ལ་སོགས་པའི་ཆུའི་ནང་དུ་ཆུད་པས་ཀྱང༌། ཆུ་དེ་རྣམས་ཀྱི་འཇིགས་པ་མེད་ཅིང༌། བཀྲ་ཤིས་པས་རང་གི་ཁྱིམ་དུ་སླེབ་བོ། །དགྲའི་ནང་ན་འདུག་གམ་ཞེས་བྱ་བ་ནི། གཞན་ཡང་གླགས་ཚོལ་ཞིང་དགྲ་བོར་གྱུར་པའམ། དོ་མི་ཤེས་ཤིང་དགྲའི་ཡུལ་དུ་སོང་བ་ལ། རིག་སྔགས་དྲན་པ་ཙམ་གྱིས་དགྲ་བོའི་ནང་ནས་ཡང་ཐར་བར་འགྱུར་རོ། །ཕྱིར་རྒོལ་བ་དང་དགྲ་བོའི་ནང་ན་འདུག་གམ་ཞེས་བྱ་བ་ནི། སྐུངས་ཀྱི་ནང་དུ་ཆུད་པའམ། ཕྱི་རོལ་གྱི་དམག་འདྲེན་པའམ། འདི་ཡིད་ལ་བྱས་པས་ན་དེ་རྣམས་ཀྱི་ནང་དུ་ཆུད་ན་ཡང་གྲོལ་བར་འགྱུར་རོ། །འཁོར་གྱི་ནང་ན་འདུག་གམ་ཞེས་བྱ་བ་ནི། འཁོར་དེ་ཡང་ངན་སེམས་སྐྱེད་པར་འགྱུར་པས་ན། དེའི་སེམས་དེ་བཟློག་པར་འགྱུར་རོ། །དེ་བས་ན་རིག་པ་དེ་ཡང་ཡིད་ལ་བྱའོ། །རྩོད་པའི་ནང་ན་འདུག་གམ་ཞེས་བྱ་བ་ནི། རྩོད་པ་ལ་ཡང་གཉིས་ཏེ། ཕྱི་རིག་པ་ལ་སྦོས་པས་རྩོད་པ་དང༌། ནོར་གྱི་ཁྱིམ་ལ་མི་མཐུན་པས་རྩོད་པའོ། །དེ་ལ་ཡིད་ལ་བྱེད་པར་གྱུར་ན་ཡང་རྒྱལ་བར་འགྱུར་རོ། །སྦྲུལ་གྱིས་ཟིན་ཏམ་ཞེས་བྱ་བ་ནི། གདུག་པ་ཅན་རྣམས་འཆི་བའི་དུག་གིས་ཟིན་པ་རིག་སྔགས་ཀྱི་རྒྱལ་མོ་འདི་ཡིད་ལ་དྲན་པ་ཙམ་གྱིས་ཀྱང་དུག་དེས་ཀྱང་མི་ཚུགས་པར་འགྱུར་རོ། །དུག་འཐུངས་སམ་ཞེས་བྱ་བ་ནི། སྦྱོར་བའི་དུག་དང་བསྡད་པའི་དུག་འཐུང་བར་གྱུར་པ་རྣམས་ཀྱང་རིག་སྔགས་ཀྱི་སྙིང་པོ་འདི་ཚར་བདུན་ནམ། ལན་གྲངས་ཉི་ཤུ་རྩ་གཅིག་གམ་བརྒྱ་རྩ་བརྒྱད་དམ་དེ་ཆུ་ལ་བཏབ་ནས་འཐུངས་ན་ཡང་མི་ཚུགས་སོ། །འཇིགས་པ་ཐམས་ཅད་འདུས་པ་ན་ཡང་ཡིད་ལ་བྱའོ་ཞེས་བྱ་བ་ནི། གཞན་གྱིས་མི་ཐུབ་པའི་རིག་སྔགས་ཀྱི་སྙིང་པོ་ནི་ཡིད་བཞིན་གྱི་ནོར་བུ་བཞིན་དུ་ཤིན་ཏུ་དཀོན་པ་འདི་ཡིད་ལ་བྱས་པར་གྱུར་ན། དུས་མ་ཡིན་པའི་འཆི་བའི་འཇིགས་པ་ཆེན་པོ་བརྒྱད་ལས་ཀྱང་ཐར་བར་འགྱུར་རོ། །གཞན་ཡང་འཇིགས་པ་
ཕྲ་མོ་ལས་ཐར་བར་འགྱུར་ཏེ། རླུང་ལས་གྱུར་པ་དང་ཞེས་བྱ་བ་ནི། རླུང་གི་ནད་བཞི་བརྒྱ་རྩ་བཞི་ཡང་རིག་སྔགས་ཀྱི་གཟི་བརྗིད་ཀྱིས་ཞི་བར་འགྱུར་རོ། །མཁྲིས་པ་ལས་གྱུར་པ་དང་ཞེས་བྱ་བ་ནི། དེ་བཞིན་དུ་མཁྲིས་པའི་ནད་བཞི་བརྒྱ་རྩ་བཞི་ལས་ཀྱང་ཐར་བར་འགྱུར་རོ། །བད་ཀན་ལས་གྱུར་པ་དང་ཞེས་བྱ་བ་ནི། བད་ཀན་ཀྱང་བཞི་བརྒྱ་རྩ་བཞི་ཡིན་ཏེ། རིག་སྔགས་ཀྱི་གཟི་བརྗིད་དང་ཡིད་ལ་བྱས་པར་གྱུར་ན་དེ་རྣམས་ཀྱིས་ཀྱང་མི་ཚུགས་སོ། །འདུས་པ་ལས་གྱུར་པ་དང་ཞེས་བྱ་བ་ནི། རླུང་དང་མཁྲིས་པ་དང༌། བད་ཀན་དང༌། དེ་གསུམ་འདུས་པས་ན་འདུས་པ་ཞེས་བྱ་སྟེ།། ལྡན་པ་ནི་གང་དག་གཉིས་ལྡན་པས་ན་ལྡན་པའོ། །དེ་ལྟ་བུའི་ནད་ལ་ཡང་ཡིད་ལ་བྱེད་པར་གྱུར་ན། ནད་དེ་ཀུན་གྱིས་ཀྱང་མི་ཚུགས་སོ། །ནད་བཞི་བརྒྱ་རྩ་བཞི་ལས་ནད་གང་ཡང་རུང་བས་བཏབ་པར་གྱུར་པ་དང་ཞེས་བྱ་བ་ནི། གཞན་མི་གཅིག་པ་རེ་རེ་ལ་ཡང་མི་གཅིག་པ་བཞི་བརྒྱ་རྩ་བཞི་གནས་ཏེ། ནད་དེ་རྣམས་ཀྱིས་ཀྱང་མི་ཚུགས་སོ། །ཕོངས་པར་གྱུར་ན་ཡང་ཤིན་ཏུ་ཡིད་ལ་བྱའོ་ཞེས་བྱ་བ་ནི། ཕོངས་པ་ལ་རྣམ་པ་གསུམ་སྟེ། མིས་ཕོངས་པ་དང༌། ནོར་གྱིས་ཕོངས་པ་དང༌། རིག་པས་ཕོངས་པའོ། །དེ་ཀུན་གྱིས་ཕོངས་ན་ཡང་རིག་སྔགས་འདི་ཡིད་ལ་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ་ལ་སྨྲས་པའོ། །ཀུན་དགའ་བོ་ཞེས་བྱ་བ་ནི། བཅོམ་ལྡན་འདས་ཀྱིས་ཀུན་དགའ་བོ་ལ་ལན་དུ་གསུངས་པའོ། །གསད་པའི་རིགས་པ་ནི་ཆད་པས་བྲལ་བར་འགྱུར་ཞེས་བྱ་བ་ནི། རྒྱལ་པོའམ་གཞན་ཡང་འབྱུང་པོ་ལ་སོགས་པས་གསད་པའི་སེམས་ཡོད་པ་ལ་དེ་རྣམས་ཀྱིས་ཀྱང་མི་ཚུགས་པར་འགྱུར་རོ། །ཆད་པས་གཅད་པའི་རིགས་པ་ནི་གཞུ་བཙོག་གིས་སོ་ཞེས་བྱ་བ་ནི། སེམས་ངན་ཞིང་ཆད་པ་གཅོད་འདོད་པའི་སེམས་དེ་ལ་ཡང་བྱམས་པའི་སེམས་དང་ལྡན་པའོ། །གཞུ་བཙོག་གི་རིགས་པ་ནི་བརྒྱད་པས་སོ་ཞེས་བྱ་བ་ནི། གཞུ་བཙོག་ཅིང་སྐུར་པ་གདབ་འདོད་པ་དེ་ཡང་བཀག་ཅིང་སྙིང་རྗེའི་སེམས་དང་ལྡན་པར་འགྱུར་རོ། །བརྒྱད་བཀག་པའི་རིགས་པ་ནི་དམ་བཅས་པས་སོ། །བརྒྱད་དེ་བྱེད་པར་འདོད་པའི་སེམས་དང་ལྡན་པར་བྱེད་པ་ཡང་བརྒྱ་ཁྲོལ་ཞིང་མི་སྣང་བར་བྱེད་པའོ། །དམ་བཅས་
པའི་རིགས་པ་ནི་སྤུ་ཟིང་ཞེས་བྱ་བས་སོ་ཞེས་བྱ་བ་ནི། གཏི་མུག་དང༌། འདོད་ཆགས་དང༌། ཞེ་སྡང་དང༌། སེར་སྣ་དང༌། ཕྲག་དོག་གོ །སྤུ་ཟིང་ཞེས་བྱ་བའི་རིགས་པ་ནི། དེ་བཞིན་དུ་ཐར་པར་འགྱུར་ཏེ་ཞེས་བྱ་བ་ནི། དུག་ལྔའི་རང་བཞིན་གྱིས་བཀག་པའི་མུན་པ་ནི། རང་བསལ་ཡེ་ཤེས་ཀྱིས་སྣང་བར་འགྱུར་བའོ། །དེ་ཅིའི་ཕྱིར་ཞེ་ན། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་རིག་པས་སྣང་བའོ། །དེའི་ནད་ཐམས་ཅད་ཀྱང་ལྡོག་པར་འགྱུར་རོ་ཞེས་བྱ་བ་ནི། མ་རིག་པའི་མུན་པས་བཀག་ནས། འཁོར་བའི་སྡུག་བསྔལ་གྱི་ནད་ཡིན་ཏེ། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་གཟི་བརྗིད་ཀྱིས་མེ་མར་གྱིས་ཀྱང་ནད་ཐམས་ཅད་ཀྱང་ཐར་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་རིན་ཆེན་རིགས་ཀྱི་རིགས་ལྔ་ཕྱེ་བའི་གནས་སྐབས་ཏེ་ལྔ་བའོ།། །།ཀུན་དགའ་བོ་ཞེས་བྱ་བ་ནི། སེམས་ཅན་ལ་ཐུགས་རྗེ་ཆེ་བའི་ཕྱིར། ཀུན་དགའ་བོ་ལ་སྨྲས་པའོ། །རིག་སྔགས་དང༌། གསང་སྔགས་ཀྱི་གཞི་འདི་ཡང་ཡིད་ལ་བྱའོ་ཞེས་བྱ་བ་ནི། རིག་སྔགས་ཀྱི་རྒྱལ་མོ་འདི་ཀུན་གཞི་རྣམ་པར་དག་པ། ཐབས་ཤེས་རབ་ཟུང་དུ་འཇུག་པ་རིན་པོ་ཆེའི་རིགས། མཚོན་བྱ་ནི་མཉམ་པ་ཉིད་ཀྱི་ཡེ་ཤེས་སོ། །མཚོན་བྱེད་ནི་རིག་སྔགས་ཀྱི་རྒྱལ་མོ་རྨ་བྱ་ཆེན་མོའོ། །ཚོར་བའི་ཕུང་པོ་ནི་ཆུའི་ཁམས། སྣའི་སྐྱེ་མཆེད་དོ། །སྐུ་མདོག་དང་ཕྱག་མཚན་གསལ་བ་ནི། ཞལ་གཅིག་ཕྱག་གཉིས་པ་སྐུ་མདོག་སེར་མོ། །དབུ་ལ་རིགས་ལྔས་བརྒྱན་པ། སྤྱན་གསུམ་པ་རྒྱན་ཐམས་ཅད་ཀྱིས་བརྒྱན་པ། ལོ་བཅུ་གཉིས་པའི་ཆ་བྱད་ཅན། ཕྱག་གཡས་པ་ན་མཆོད་སྦྱིན་མཛད་པ། གཡོན་པ་ན་རྨ་བྱའི་སྒྲོ་བསྣམས་པའོ། །ཞབས་ཕྱེད་སྐྱིལ་དུ་བཞུགས་པ། པདྨའི་སྟེང་ན་ཟླ་བའི་གདན། ཉི་མའི་འོད་ཟེར་དང་ལྡན་པ། ཡེ་ཤེས་ལྔའི་རང་བཞིན་དེ་ལྟ་བུའི་རིག་སྔགས་ཡིད་ལ་བྱའོ། །འདི་ཡིད་ལ་བྱས་པར་གྱུར་ན་གླགས་ཚོལ་བ་རྣམས་ཀྱིས་ཀྱང་གླགས་མི་རྙེད་དོ། །རིག་སྔགས་ཀྱི་གསང་སྔགས་གང་ཞེ་ན། འདི་ལྟ་སྟེ། ཙི་ལི་མི་ལི་ལ་སོགས་བའོ། །ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་འགྲོ་བ་
རིགས་དྲུག་གི་དོན་དུ་ཀུན་དགའ་བོ་ལ་གསུངས་པའོ། །དེ་བཞིན་གཤེགས་པས་གསུངས་པའི་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་ཞེས་བྱ་བ་ནི། འདས་པའི་དེ་བཞིན་གཤེགས་པ་རྣམས་ཀྱིས་ཀྱང་རྗེས་སུ་ཡི་རང་ཞིང་སྲུང་བ་སྟེ། དེ་བཞིན་དུ་མ་འོངས་པ་རྣམས་ཀྱིས་ཀྱང་སྲུང་བར་འགྱུར་རོ། །ད་ལྟར་ཡོད་པ་རྣམས་ཀྱིས་ཀྱང་སྲུང་བའོ། །དེ་བཞིན་དྲུག་པ་ལ་སོགས་པ་གངྒཱའི་ཀླུང་གི་བྱེ་མ་སྙེད་སྟོང་ཕྲག་བརྒྱད་ཁྲི་རྣམས་ཀྱིས་ཀྱང་སྲུང་སྟེ། དེ་ཡང་རང་རང་གི་གཟི་བརྗིད་ཀྱིས་སྲུང་བའོ། །རང་གི་གཟི་བརྗིད་ནི་གང་ཞེ་ན། སངས་རྒྱས་རྣམས་ཀྱི་གཟི་བརྗིད་དང། །གཙུག་ཏོར་ཅན་གྱི་སྟོབས་རྣམས་དང༌། །ཐམས་ཅད་སྐྱོབ་ཀྱི་བདེན་ཚིག་དང༌། །ལོག་དད་སེལ་གྱི་ཏིང་འཛིན་དང༌། གསེར་ཐུབ་ཀྱི་ནི་ཡེ་ཤེས་དང༌། །འོད་སྲུངས་ཀྱི་ནི་རྫུ་འཕྲུལ་ལོ། །ཤཱཀྱ་སེང་གེའི་བརྩོན་འགྲུས་ཀྱིས། །བྱམས་པ་མགོན་པོས་ཤེས་རབ་བསྟན།། འདས་དང་མ་འོངས་ད་ལྟར་དང༌། །དེ་བཞིན་རིག་སྔགས་རིམ་བཞིན་སྲུངས། །རིག་སྔགས་ཀྱི་རྒྱལ་མོ་འདི་ཡང་མཐུ་ཆེ་ཞིང་སེམས་ཅན་རྣམས་ལ་ཐུགས་རྗེས་ཁྱབ་པའོ། །སྲུང་བ་གྱིས་ཤིག་ཅེས་བྱ་བ་ནི། གང་ཟག་སེམས་ཅན་ཐམས་ཅད་ལའོ། །ཡོངས་སུ་སྦ་བ་དང་ཞེས་བྱ་བ་ནི། རིག་སྔགས་ཀྱི་དོན་གསང་བར་བྱས་བ་སྦ་བའོ། །གར་སྦ་ཞེ་ན། འཇིགས་པ་ཐམས་ཅད་ལས་སྦས་པའོ། །ཡོངས་སུ་བསྐྱབ་པ་ཞེས་བྱ་བ་ནི། འཇིག་རྟེན་འདིའི་སྡུག་བསྔལ་ལས་ཡོངས་སུ་བསྐྱབ་པ་དང༌། ངན་སོང་གསུམ་ལས་ཡོངས་སུ་བསྐྱབ་པ་དང༌། འཁོར་བའི་སྡུག་བསྔལ་གྱི་འཇིགས་པ་ལས་བསྐྱབ་པའོ། །ཡོངས་སུ་གཟུང་བ་དང་ཞེས་བྱ་བ་ནི། མ་རིག་པའི་ཞེན་པས་མི་དགེ་བ་བཅུའི་ལམ་ལ་འཇུག་པ་སྟེ། དེར་འགྲོར་མ་སྟེར་བས་ན་ཡོངས་སུ་གཟུང་བའོ། །ཡང་ན་འཁོར་བར་འགྲོ་འདོད་པ་རམས་གཟུང་བར་བྱ་འོ། །ཡོངས་སུ་བསྐྱང་བ་དང་ཞེས་བྱ་བ་ནི། རིག་སྔགས་ཀྱི་ཡེ་ཤེས་ཀྱིས་མ་རིག་པའི་མུན་པ་བསལ་བ་སྟེ། རང་བཞིན་འོད་གསལ་གྱི་ཡེ་ཤེས་ཀྱིས་བསལ་བའོ། །ཞི་བ་དང་བདེ་ལེགས་སུ་འགྱུར་བ་དང་ཞེས་བྱ་བ་ནི། ནད་རྣམས་ཞི་བ་དང༌། འཇིག་རྟེན་གྱི་སྡུག་བསྔལ་ཞི་བའོ། །ནོར་ཕུན་སུམ་ཚོགས་པ་དང༌། མི་ཕུན་
སུམ་ཚོགས་པ་དང༌། འབྲུ་ཕུན་སུམ་ཚོགས་པའོ། །ནད་ཐམས་ཅད་དང་བྲལ་ཞིང་འབྱུང་བོ་འམ་མིའམ་ཅབ་ཅོབ་ཀྱི་འཇིགས་པ་མི་འབྱུང་ཞིང་ཚེ་ཕྱི་མ་ལ་ཡང་དེ་བཞིན་ནོ། །ཆད་པ་སྤང་བ་དང་ཞེས་བྱ་བ་ནི། རྒྱལ་པོའམ། འབྱུང་པོའམ། གཤིན་རྗེ་ལ་སོགས་པའི་ཆད་པ་སྤང་བའོ། །མཚོན་ཆ་སྤང་པ་དང་ཞེས་བྱ་བ་ནི། དམག་གམ་དགྲ་འཁྲུག་གམ། གཞན་ཡང་ལོང་མེད་པར་འབྱུང་བའམ། དེ་རྣམས་ཐམས་ཅད་སྤང་བར་འགྱུར་རོ། །དུག་གཞིལ་བ་དང་ཞེས་བྱ་བ་ནི། རིག་སྔགས་ཀྱི་རྒྱལ་མོའི་གཟི་བརྗིད་ཀྱིས་འགྲོ་བའི་དུག་དང་བསྡད་པའི་དུག་དང་བྱས་པའི་དུག་དང་གསུམ་ཞི་བར་འགྱུར་རོ། །དུག་གསད་པ་དང་ཞེས་བྱ་བ་ནི། འཇིག་རྟེན་པའི་དུག་གསུམ་སྟེ། དེ་ཡང་ནད་གི་དུག་དང་ཕྱིའི་དུག་གོ །ནང་གི་དུག་ནི་གཏི་མུག་དད། འདོད་ཆགས་དང༌། ཞེ་སྡང་གསུམ་མོ། །ཕྱིའི་དུག་ནི་མཆེ་བ་རྩ་བ་ལ་སྦྱོར་བའོ། །མཚམས་གཅད་པ་དང་ཞེས་བྱ་བ་ནི། ཕྱོགས་མཚམས་བརྒྱད་དང་བཅུ་གཅད་དེ། དེ་ལས་གཅད་པས་ན་མཚམས་གཅད་པའོ། །ས་བཅིང་བ་གྱིས་ཤིག་ཅེས་བྱ་བ་ནི། ས་ལ་རྒྱུ་བའི་འབྱུང་པོ་ལ་སོགས་པ་རྣམས་ལ་ཡང་བཅིང་བའོ། །ལོ་བརྒྱ་འཚོ་བར་གྱུར་ཅིག་ཅེས་བྱ་བ་ནི། སྡུག་བསྔལ་དང་བྲལ་ཞིང་ཕུན་སུམ་ཚོགས་པས་ལོ་བརྒྱར་འཚོ་བར་འགྱུར་བའོ། །སྟོན་བརྒྱ་མཐོང་བར་ཤོག་ཤིག་ཅེས་བྱ་བ་ནི། ནད་མེད་ཅིང་ཚེ་རིང་བ་སྟེ། བཀྲ་ཤིས་ཤིང་ཕོངས་པ་མེད་པ། ཤི་བའི་དུས་སུ་ཡང་རྒས་པ་མ་ཚོར་བར་འཆི་བའོ། །ཀུན་དགའ་བོ་ཞེས་བྱ་བ་ནི། བསྲུང་བའི་དོན་དུ་སེམས་ཅན་གྱི་སྡུག་བསྔལ་ལ་བཅོམ་ལྡན་འདས་ཀྱིས་བཀའ་སྩལ་པའོ། །གང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་སྲུང་བ་བྱས་ཤིང་སྦས་པ་དང་ཞེས་བྱ་བ་ནི། འདི་ལ་གུས་ནས་འཆང་བའི་གང་ཟག་དེ་ཀློག་པ་དང༌། སྒོམ་པ་དང༌། བཤད་པ་དང༌། རྗེས་སུ་ཡི་རང་བ་དང༌། མཆོད་པ་དང༌། སྨོན་ལམ་གདབ་པ་དང༌། བླ་མར་བྱེད་པ་དང༌། དཀྱིལ་འཁོར་བཞེངས་པ་ལ་སོགས་པ་བྱས་ནས་ཡོངས་སུ་སྦ་བ་ལ་སོགས་པ་བྱེད་པར་འགྱུར་རོ། །དེ་ཅིའི་ཕྱིར་ཞེ་ན། ཐུགས་རྗེ་ཆེ་ཞིང་མཐུ་ཆེ་བ་སྟེ།
གཟི་བརྗིད་དང༌། སྟོབས་དང༌། ཁ་དོག་དང༌། གྲགས་པ་དང་ལྡན་ཏེ། ཡང་དག་པར་རྫོགས་པའི་སངས་རྒྱས་རྣམས་ལ་ཕྱག་རྒྱའི་རྒྱས་གདབ་ཅིང་སངས་རྒྱས་རྣམས་ཀྱིས་ཀྱང་རྗེས་སུ་ཡི་རང་ཞིང་གསུངས་པའོ། །འཇིག་རྟེན་འདིའི་ལྷ་རྣམས་དང་ཞེས་བྱ་བ་ནི། དམྱལ་བའི་གནས་ནས་གཟུགས་མེད་པའི་ཁམས་རྣམས་སོ། །དམྱལ་བ་ལ་ཚ་བའི་དམྱལ་བ་དང༌། གྲང་བའི་དམྱལ་བ་དང་གཉིས་གཅིག་ཏུ་བརྩིས་ཏེ་བརྒྱད་དོ། །བྱོལ་སོང་དང་ཡི་དགས་གཉིས་ཏེ་བཅུའོ། །མི་ཡུལ་གླིང་བཞི་ལ་སོ་སོར་བགྲངས་པས་བཞི། ལྷ་ལ་དྲུག་གོ །དེ་ནི་འཇིག་རྟེན་འདོད་པའི་ཁམས་སོ། །བསམ་གཏན་དང་པོ་ནས་བཟུང་ནས། གཙང་མའི་རིས་ཀྱི་ལྷ་མན་ཅན་ནི་གཟུགས་ཁམས་ཀྱི་འཇིག་རྟེན་ནོ། །སྐྱེ་མཆེད་མུ་བཞི་གཟུགས་མེད་པའི་འཇིག་རྟེན་གྱི་ཁམས་སོ། །དེ་བས་ན་འཇིག་རྟེན་འདིའི་ལྷ་རྣམ་དང་ཞེས་པའོ། །བདུད་རྣམས་དང་ཞེས་བྱ་བ་ནི། ག་ར་དབང་ཕྱུག་གི་འཁོར་བདུད་ཀྱི་ལྷ་རིགས་སྟོང་ཕྲག་བརྒྱད་ཅུའོ། །ཚངས་པར་སྤྱོད་པ་ཞེས་བྱ་བ་ནི། མི་མཇེད་ཀྱི་འཇིག་རྟེན་གྱི་ཁམས་བདག་པོ་ཚངས་པ་ནས་གཟུགས་ཁམས་ཀྱི་ལྷ་མན་ཆད་དོ། །དགེ་སློང་དང་ཞེས་བྱ་བ་ནི། རབ་ཏུ་བྱུང་ཞིང་ཚངས་པར་སྤྱོད་པའི་གཟུགས་སྣང་བའོ། །བྲམ་ཟེའི་ལུས་སུ་སྐྱེས་པའམ་ཞེས་བྱ་བ་ནི། མིའི་འཇིག་རྟེན་གྱི་ཁམས་སུ་རིགས་བཟང་པོར་སྐྱེས་ནས་གནས་པ་རྣམས་སོ། །སྐྱེ་དགུའི་བདག་པོ་རྣམས་ཞེས་བྱ་བ་ནི། ལྷ་དང་མིའི་བྱེ་བྲག་ཏུ་སྨྲ་བ་རྣམས་སོ། །ལྷ་དང་མི་དང་ལྷ་མ་ཡིན་རྣམས་སོ་ཞེས་བྱ་བ་ནི། གཞན་ཡང་དེ་རྣམས་ཀྱིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལ་གུས་པར་བྱས་ནས། དེ་རྣམས་ལ་ཡང་བསྲུང་བ་དང༌། སྦ་བ་དང༌། བསྐྱད་བར་བྱ་བར་འགྱུར་རོ། །ས་བཅིང་བ་ལས་རྣམ་པར་འཚེ་བའི་ཕྱིར་འོད་བ་ཞེས་བྱ་བ་ནི། འབྱུང་པོ་དེ་རྣམས་དགེ་བ་ལ་བར་དུ་གཅོད་ཅིང་གླགས་ཚོལ་བ་རྣམས་ཡིན་ཏེ། དེ་ནི་བདུད་ཀྱི་རང་བཞིན་འཁོར་བ་ལ་གནས་པར་བྱེད་པའི་རྒྱུ་ནད་རྣམས་སྣ་ཚོགས་བཏང་བའི་བདག་པོ་དང་སེམས་ཅན་རྣམས་ལ་གནོད་པ་སྐྱེལ་ཞིང་ས་དང་བར་སྣང་ས་འོག་ཆུ་ལ་རྒྱུ་བ་རྣམས་སོ། །དེ་རྣམས་ཀྱི་སྟོབས་ནི་རི་
རབ་ཙམ་སྒུལ་ཞིང་ས་གཡོ་བར་བྱེད་དོ། །དེ་ནི་གཟུགས་ཀྱི་རང་བཞིན་ཅན་ཡིན་ཏེ། ཡིད་ཀྱི་རང་བཞིན་ཅན་ནོ། །དེ་རྣམས་ཀྱིས་སེམས་ཅན་རྣམས་ལ་གླགས་ཚོལ་ཞིང་འཚེ་བར་བྱས་པའོ། །ལྷའམ་ཞེས་བྱ་བ་ནི་ལྷའི་འབྱུང་པོ་སྟོང་ཕྲག་བརྒྱད་ཅུའོ། །ལྷ་མོའམ་ཞེས་བྱ་བ་ནི་ལྷ་མོའི་གཟུགས་སྟོང་ཕྲག་བརྒྱད་ཅུའོ། །ལྷའི་བུའམ་ཞེས་བྱ་བ་ནི་ལྷའི་བུ་སྟོང་ཕྲག་བརྒྱད་ཅུའོ། །ལྷའི་བུ་མོའམ་ཞེས་བྱ་བ་ནི་ལྷའི་བུ་མོའི་གཟུགས་སྟོང་ཕྲག་བརྒྱད་ཅུའོ། །ལྷ་རྒན་པོའམ་ཞེས་བྱ་བ་ནི། ལྷ་རྒན་པོའི་གཟུགས་སྟོང་ཕྲག་བརྒྱད་ཅུའོ། །ལྷ་རྒན་མོ་འམ་ཞེས་བྱ་བ་ནི། ལྷ་རྒན་མོའི་གཟུགས་སྟོང་ཕྲག་བརྒྱད་ཅུའོ། །ལྷའི་འཁོར་ཕོའམ་ཞེས་བྱ་བ་ནི། ལྷའི་འཁོར་ཕོའི་གཟུགས་སྟོང་ཕྲག་བརྒྱད་ཅུའོ། །ལྷའི་འཁོར་མོ་ནས་གནོན་པོའི་འཁོར་མོ་འམ་ཞེས་བྱ་བ་ལ་སོགས་པ་སྟོང་ཕྲག་བརྒྱད་ཅུ་བརྒྱད་ཅུ་རྣམས་སོ། །དེ་རྣམས་ཀྱིས་གླགས་ཚོལ་བ་ནི་ཅིའི་ཕྱིར་ཞེ་ན། འབྱུང་པོ་མ་རུངས་པ་རྣམས་གཟུགས་སྣ་ཚོགས་སུ་སྦྲུལ་ཞིང་གླགས་ཚོལ་བའོ། །དེ་དག་གི་ནི་མདུན་རྒྱུག་པ། །འབྱུང་པོ་གནོད་སྦྱིན་ལུས་པོ་ཆེ། །ལག་པ་བཞི་པ་མ་རུངས་པ། །རྐང་མངས་དང་ནི་རྐང་གཅིག་པ། །རྐང་བཞི་པ་ལ་རྐང་གཉིས་པ། །རྐང་པ་བསྒྲེང་བ་སྤྱིའུ་ཚུགས་དང༌། །ལུས་མང་མགོ་བོ་གཅིག་པ་དང༌། །ལུས་གཅིག་པ་ལ་མགོ་བཞི་པ། །མིག་མང་པོ་ལ་ལུས་གཅིག་དང༌། །མིག་གཅིག་ལྟོ་ནི་བཅུ་གཉིས་དང༌། །བོང་བུ་རྔ་མོ་གླང་ཆེན་མགོ །རྐང་པ་བསྒྲེང་ལ་མགོ་བཏུད་དང༌། །མཚོན་ཆའི་སོ་དང་མཚོན་ཆའི་ལག །མཚོན་ཆའི་རྐང་བའི་སྲིན་པོ་རྣམས། །ཟངས་ཀྱི་སྐྲ་དང་ཟངས་ཀྱི་སོ། །ཟངས་ཀྱི་མིག་དང་ཟངས་ཀྱི་ལག །ཟངས་ཀྱི་ཐོ་བའི་རྐང་པ་དང༌། །ཟངས་ཀྱི་སྣ་དང་ལྕགས་ཀྱི་ཁ། །རྐང་ལག་ཀུན་དུ་འབར་བ་དང༌། །མི་ཡི་ལུས་སུ་གནས་པ་རྣམས། །སྒུར་ཞར་ལྦ་བ་གསུམ་ཡོད་པ། །མིག་མི་སྡུག་ལ་ཁ་གླལ་བ། །ཆུ་སྲིན་སྟག་གི་གཟུགས་དང་ནི། །གཟུགས་མི་སྡུག་དང་ཁ་རལ་བོ། །མཆུ་འཕྱངས་པོ་དང་སོ་ཡོན་པོ། །རབ་ཏུ་གཏུམ་པོ་ཁྲོ་གཉེར་ཅན། །གསུས་པོ་ཆེ་དང་བུམ་སྣའོ། །སྣ་འཕྱངས་པོ་དང་རྣ་བ་མེད། །ལག་རིངས་པོ་དང་
རྣ་བ་རིང༌། །སྣ་ཡི་རྩེ་དང་ལག་རྩེ་རིང༌། །ལུས་སྐམས་ལུས་ནི་རིང་བ་དང༌། །སྐྲ་རིང་རབ་ཏུ་བརྒྱན་པ་དང༌། །རྐང་པ་མིད་པ་ཕྲ་བ་དང༌། །དྲི་ང་བ་དང་བུམ་ལྟོ་བོ། །ཡན་ལག་ཆུ་སྲིན་འདྲ་བ་དང༌། །གཏུན་ཤིང་ཐོ་བ་འདྲ་བའི་ལྟོ། །གནམ་ལྟོ་བོ་ལ་རྣ་བོ་ཆེ། །གྱེན་དུ་སྐྲ་བརྫེས་རབ་ཏུ་དམར།། མགོ་བོ་ཆེ་ལ་གཞུ་མགྲིན་པོ། །སྐེམ་པོ་སྒུར་པོ་བུམ་ལྟོ་བོ། །རི་རབ་རྩེ་མོ་བསྒུལ་ནས་སུ། །མེ་མདག་གི་ནི་ཆར་པ་འབེབས། །ལྗོན་ཤིང་རི་ཡི་རྡོ་བ་དང༌། །སྤྲིན་གྱི་ཚོགས་ཀྱི་མདོག་འདྲ་བ། །དུང་དང་རྔ་ཆེན་རྫ་རྔ་དང༌། །གྲུལ་བུམ་རྔ་ཆེན་རྣམས་ཀྱི་སྒྲ། །འཇིགས་པའི་སྒྲ་ནི་རབ་ཏུ་འབྱིན། མིག་པོ་ཆེ་ལ་བོང་བུའི་སྒྲ། །ནག་པོ་སྔོན་པོ་སེར་པོ་དང༌། །དམར་སེར་མེ་དང་དམར་སེར་དང༌། །ཁབ་འདྲའི་སྤུ་དང་རལ་གྲིའི་སྐྲ། །དམར་པོའི་ཁྲག་གིས་བསྐུས་པ་རྣམས། །མི་རོ་དག་ནི་ཁྱེར་ནས་སུ། །ཟ་བཞིན་དུ་ནི་རྣམ་པར་རྒྱུག །སོ་རྣོན་ལག་པ་དམར་བ་དང༌། །མཆུ་ནི་ཁྲག་གིས་བསྐུས་པ་དང༌། །ལུས་ཕྱེད་དག་ནི་ཟོས་པ་དང༌། །མཁལ་མ་སྙིང་དང་ནང་གྲོལ་གྱིས། །སྙིམ་པ་ཤིན་ཏུ་བཀང་བ་དང༌། །བྱིས་པ་དག་ནི་ཟ་བཞིན་དུ། །མེར་མེར་པོ་དང་སྲོག་ཆགས་ཀྱི། །རྐང་ལག་རྣམས་ཀྱི་སྟོབས་ཀྱང་འཕྲོག །ཀེད་རུས་ཀྱི་ནི་ལུས་ཀྱིས་སུ། །སྐྱེ་བོ་མང་པོ་སྐྲག་པར་བྱེད། །ཁྲག་གིས་རབ་ཏུ་བཀང་བ་ཡི། །མི་ཡི་བགས་པ་ཐོགས་ནས་སུ། །མི་བཟད་དུག་གིས་ཀུན་བསྐུས་ཏེ། །ཕྱོགས་ཕྱོགས་དག་ཏུ་རྣམ་པར་རྒྱུག །གྲོང་ཁྱེར་རྣམས་ཀྱི་སྒོ་དག་དང༌། །ཁྱིམ་ནས་ཁྱིམ་དུ་རྣམ་པར་འཐོར། །རླུང་དང་བད་ཀན་མཁྲིས་པ་རྣམས། །ཕྱོགས་བཞི་དག་ཏུ་འཁྲུག་པར་བྱེད། །དེ་ལྟར་དེ་ནི་རྒྱལ་པོ་ཡི། །གདོན་དང་འཇིགས་པ་ཆེན་པོ་རྣམས། །ལྷགས་བ་དེ་དག་ཐམས་ཅད་ཀྱང༌། །འབྱུང་པོ་དེ་དག་རྣམས་ཀྱིས་ཀྱང༌། །གླགས་ཚོལ་བ་ཡི་དུས་སུ་ཡང༌། །མིའི་འཇིག་རྟེན་འདི་ལ་རྨི་ལམ་དང་རྟགས་བསྟན་པའོ། །ཕྱོགས་བཅུ་དག་ཏུ་འཇིགས་པ་སྐྱེད། །བུད་མེད་དག་དང་སྐྱེས་པ་དང༌། །དེ་བཞིན་ཁྱེའི་བུ་མོ་དང༌། །མངལ་ན་གནས་པའང་འཇིགས་པ་སྐྱེད། །དུད་འགྲོའི་སྐྱེ་གནས་གཏོགས་ལའང་འཚེ། །སྐར་མ་དག་དང་ཉི་ཟླ་དང༌། །གཏུམ་པའི་གཟའ་རྣམས་གནོད་པར་བགྱིད། །
ལོ་ཏོག་ས་བོན་འབྲས་བུ་དང༌། །མེ་ཏོག་སྨན་དང་ཟས་སྐོམ་དང༌། །མི་རྣམས་ཀྱི་ནི་དཔལ་འཕྲོག་ཅིང༌། །མཐོན་པོ་རྣམས་ཀྱང་དམའ་བར་བགྱིད། །འཇིག་རྟེན་དག་ན་ནོངས་པ་རྣམས། །དམག་དང་འཐབ་མོ་ཤ་གཉེར་དང༌། །ཚིག་གམ་ཞིག་གམ་གསད་བྱ་བ། །དེ་ཀུན་འབྱུང་པོའི་རྣམ་པས་གྱུར། །སྦེད་ཅིང་སླར་ཡང་བགྱིད་པ་དང༌། །བཟློག་པར་བགྱིད་ཅིང་དགོད་པར་བགྱིད། །འཇིགས་པར་བགྱིད་ཅིང་ལྟ་བར་བགྱིད། །དགྲར་འགྱུར་བ་ཡང་སྟོན་པར་བགྱིད། །སྡིག་པའི་རྨི་ལམ་མཐོང་བར་བགྱིད། །ཉལ་བ་དག་ལ་གནོད་པར་བགྱིད། །སྒོ་ནས་སེ་གོལ་སྒྲ་འབྱུང་ཞིང༌། །མི་སྙན་བརྗོད་དེ་ཟ་བར་བགྱིད། །མཛའ་བོ་གཉེན་བཤེས་གཟུགས་དག་ཏུ། །གདའ་ཞིང་བཀའ་མཆིད་སྨྲ་བར་བགྱིད། །བུ་མོ་སྡུག་གུའི་གཟུགས་དག་ཏུ། །འདོད་ལ་སྤྱོད་ལ་དགའ་བར་བགྱིད། །ཉི་མ་སྐར་མའི་གཟུགས་དག་དང༌། །ཟླ་བའི་གཟུགས་སུ་གདའ་བར་བགྱིད། །རླུང་དང་སྐར་མདའ་ལྕེ་གཟུགས་སུ། །དེ་ལ་གནོད་པ་དེ་དག་གདའ། །སྐར་མའི་ཚོགས་དང་འདྲ་བ་དག །འཇིགས་པར་བགྱིད་པ་ཝ་དང་ཁྱི། །རྣམ་པར་སྤྲུལ་ནས་ལྗོན་ཤིང་དང༌། །མཆོད་རྟེན་དག་གི་གནས་ན་གདའ། །སྐྱེས་པ་གཞོན་ནུའི་གཟུགས་མཛེས་པས། །འབར་ཞིང་ཤིང་རྟའི་སྒྲ་ཡང་འབྱིན། །གནས་རྣམས་དང་ནི་ཤུལ་དག་ཏུ། །རྣམ་པ་སྣ་ཚོགས་རྗེས་ཀྱང་སྟོན། །གྲོང་ཁྱེར་དག་ན་ཁྱིམ་རྣམས་ཀྱི། །སྒོ་ཡང་གདོན་ཆེན་དེ་དག་འབྱེད། །སྲོག་དང་ལུས་ཀྱང་བླང་བགྱིས་ཤིང༌། །ལམ་ངན་ཀུན་དུ་བསྐོར་བར་བགྱིད། །རྣམ་པ་སྣ་ཚོགས་གཟུགས་དག་དང༌། །རྣམ་པ་སྣ་ཚོགས་སྒྲ་རྣམས་དང༌། །རྣམ་པ་སྣ་ཚོགས་ནད་ཀྱི་རྣམས། །ལུས་ནི་ན་བར་གནས་པར་སྟོན། །ནད་རྣམས་ཀུན་གྱི་མཚན་ཉིད་ཀྱང༌། །ཕྱིན་ཅི་ལོག་ཏུ་སྟོན་པར་བགྱིད། །ཇི་སྙེད་འཇིག་རྟེན་རང་བཞིན་དག །ཐམས་ཅད་ལོག་པར་དེ་དག་སྟོན། །ཡང་ན་འབྱུང་པོ་དེ་རྣམས་མིའི་འཇིག་རྟེན་ལ་གནོད་པར་བྱས་ནས་གླགས་ཚོལ་ཞིང་གྲོང་ངམ་གྲོང་ཁྱེར་དུ་རྒྱུ་ན། མཚན་ཉིད་དེ་བཞིན་དུ་ཡིན་ཏེ། །གྲོང་ཁྱེར་གྲོང་རྔལ་ཡུལ་འཁོར་དང༌། །ཕོ་བྲང་འཁོར་དུ་རྒྱུ་བ་ནི། །གནོད་སྦྱིན་མ་རུངས་མདངས་འཕྲོག་པ། །སྙིང་རྗེ་མེད་ཅིང་ཁྲག་འཐུང་བ། །ལུས་ཆེ་འཇིགས་པ་ཆེན་པོ་སྟེ། །
སྟོབས་པོ་ཆེ་ལ་སྒྲ་ཡང་ཆེ། །མགྲིན་བཅུ་པོ་ལ་མིག་སྟོང་པོ། །གདོན་ཆེན་མིག་ནི་དམར་པོ་རྣམས། །འཁོར་ནི་མང་པོ་རྣམས་བཏང་སྟེ། །ལག་ན་མཚོན་ཐོགས་རབ་ཏུ་འཇིགས། །སྦྲུལ་གྱི་པགས་པ་ཐོགས་པ་དང༌། །ལག་བཞི་ལག་ན་སྒྲོན་མ་ཐོགས། །ལག་ན་མཚོན་དང་དབྱུག་པ་ཐོགས། །རྡོ་རྗེ་མདུང་རྩེ་དབྱུག་པ་ཐོགས། །རབ་ཏུ་དྲག་པའི་དམག་རྒལ་ནས། །ཕྱོགས་ཀུན་དུ་ནི་སྐྲག་པར་བྱེད། །སྡང་བའི་གནས་ན་འཁོད་པ་ཡི། །གསང་བ་པོ་ནི་དད་ཀུན་ཀྱང༌། །མི་ཡི་འཇིག་རྟེན་འདི་དག་ཏུ། །སྐྱེས་པ་བུད་མེད་གཞན་ཡང་འཛིན། །ཤ་ཁྲག་དྲོན་པོར་བཅས་པ་ལ། །རྣམ་པར་འཕྲུལ་ཞིང་འདོད་པའི་གཟུགས། །སེང་གེ་དང་ནི་སྟག་དང་རྟ། །མ་ཧེ་བ་ལང་བོང་བུ་རྔ། །གླང་པོ་ཆེ་ཡི་གཟུགས་འདྲ་དང༌། །དོམ་དང་གཟིག་དང་སྦྱང་ཀི་དང༌། །ཁྱི་དང་ཝ་དང་ར་དག་དང༌། །བྱི་ལ་བྱི་བ་སྦྲེའུ་ཡི་གཟུགས། །བསེ་དང་ཕག་དང་སྲེ་མོ་དང༌། །ཉ་དང་རུས་སྦལ་དག་གི་གཟུགས། །ཁ་ཅིག་དག་ནི་སྲམ་གྱི་གཟུགས། །ཁྭ་དང་འུག་ཕ་ཁུ་བྱུག་དང༌། །བྱ་རྒོད་ཁྲ་དང་ཉ་མིད་བཅས། །རྨ་བྱ་ངང་བ་ཐི་བ་དང༌། །ཁྲུང་ཁྲུང་དང་ནི་བྱ་རྣམས་དང༌། །ཁ་ཅིག་བྱ་གག་གཟུགས་རྣམས་སུ། །གནོད་སྦྱིན་རྣམས་ནི་མི་ཡིས་མཐོང༌། །འདབ་བཟངས་བྱ་ཡི་ཚུལ་གྱིས་ཀྱང༌། །སྐྱེ་བོ་མང་པོ་སྐྲག་པར་བྱེད། །ཁ་ཅིག་མི་ཡི་མགོ་ཅན་ལ། །ལུས་ནི་བྱ་གག་བོང་བུ་འདྲ། །ཁ་ཅིག་མཚོན་གྱིས་རབ་ཏུ་འཚེ། །ལུས་དང་བྲལ་བ་དག་ཏུ་སྣང༌། །རྣམ་པར་འཁྲུགས་ཤིང་འདོད་ལ་མོས། །རྒྱུ་མའི་ཕྲེང་བས་ཀུན་དུ་དཀྲིས། །རྩེ་གསུམ་མདུང་གིས་རབ་འདེབས་ཤིང༌། །སྲོག་ཆགས་རྣམས་ལ་གནོད་པར་བྱེད། །མི་བཟད་པ་ཡི་དབུགས་འབྱིན་ཞིང༌། །སྐྱེ་དགུ་འདི་དག་སྐྲག་པར་བྱེད། །སྲོག་ཆགས་རྒྱུད་ནི་ཇི་སྙེད་པ། །སྣ་ཚོགས་ཀྱི་ནི་གཟུགས་སུ་སྣང༌། །ཁ་ཅིག་དག་ནི་རི་ཡང་ཐོགས། །ལ་ལ་རལ་གྲི་འཁོར་ལོ་ཐོགས། །གྲངས་ནི་བརྒྱ་ཕྲག་སྟོང་གནས་ཏེ། །དབྱུག་པས་བསྡིགས་ཤིང་ཁ་དྲག་པོ། །མིག་ཕྱུང་བ་ལ་བཞིན་མི་སྡུག །སྲིན་པོའི་གཟུགས་ནི་སྔོ་བ་དང༌། །སྣ་དང་རྣ་བ་བཅད་པ་དང༌། །ལྕེ་བཅད་གདོང་ནི་གཉེར་མ་ཅན། །རྐང་ལག་
དག་ནི་གཏུབས་པ་དང༌། །མགོ་བོ་བཅད་པའི་སྲིན་པོ་རྣམས། །སྐབས་ནི་རབ་ཏུ་ཚོལ་བར་བྱེད། །སྡིག་པ་ཅན་རྣམས་གཟི་བརྗིད་འཕྲོག །མི་དག་གི་ནི་ལུས་རྣམས་ལ། །རབ་ཏུ་ཕྲ་བའི་གདོན་དུ་སྣང༌། །སྤུ་ཡི་བར་དང་གནད་རྣམས་དང༌། །དེ་བཞིན་རྨ་ཡི་ཁ་རྣམས་སུ། །ལྷགས་པ་དེ་དག་ཐམས་ཅད་ཀྱང༌། །དེ་བཞིན་དུ་ལྷ་ཕོ་མོ་དང༌། ཀླུ་ཕོ་མོ་དང་གནོད་སྦྱིན་ཕོ་མོ་ལ་སོགས་པས་སྐད་ཅིག་ཐང་ཅིག་ལ། སེམས་ཅན་ལ་འཚེ་བར་བྱེད་པ་ནད་སྣ་ཚོགས་གཏོང་ཞིང་འབྱུང་པོ་རྣམས་ཀྱིས་ཀྱང་གླགས་ཚོལ་བའོ། །གླགས་ཚོལ་བར་འདོད་ཅིང་གླགས་ལྟ་ན་ཡང་གླགས་མི་རྙེད་དེ་ཞེས་བྱ་བ་ནི། ལྷའི་གདོན་དང་བཅས་པའི་འབྱུང་པོ་རྣམས་ཀྱིས་ཀྱང་གནོད་པར་བྱེད་མི་ནུས་ཤིང༌། རྩར་ཡང་འོང་མི་ནུས་ཀྱི། གླགས་ཚོལ་བ་ལྟ་ཅི་སྨོས་སོ། །དེ་ཅིའི་ཕྱིར་ཞེ་ན། རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི། ཡང་དག་པར་རྫོགས་པའི་སངས་རྒྱས་རྣམས་ཀྱིས། རྗེས་སུ་ཡི་རང་ཞིང་གསུངས་པ། །གཟི་བརྗིད་ཆེ་བ་སྟོབས་དང་ལྡན་པ། འབྱུང་པོ་རྣམས་ཀྱི་གཉེན་པོར་གསུངས་པའོ། །དེ་བས་ན་གླགས་ཚོལ་བས་མི་རྙེད་པའོ། །ལྷ་ནི་ལྷ་འདུ་བའི་གནས་སུ་མ་ཡིན་ཞེས་བྱ་བ་ལ་སོགས་པ་ནས། གནོན་པོ་ནི་གནོན་པོ་འདུ་བའི་གནས་སུ་མ་ཡིན་ནོ་ཞེས་བྱ་བ་ནི། རིག་སྔགས་ཀྱི་གཟི་བརྗིད་ཀྱིས་འདུ་བར་མི་ནུས་ཤིང་འབྱུང་པོ་རྣམས་ཀྱང་སོ་སོར་འཁྱམས་ཏེ། གནོད་པར་མི་ནུས་ཤིང༌། རྩར་ཉེ་བར་མི་ནུས་པའོ། །གང་ལ་ལ་ཞིག་རིག་སྔགས་འདི་ལས་འགལ་བར་བྱེད་ན་ཞེས་བྱ་བ་ནི། གལ་ཏེ་གླགས་ཚོལ་བ་རྣམས་རིག་སྔགས་ཀྱི་བཀའ་ལས་འདས་པར་གྱུར་ན། སྡུག་བསྔལ་དཔག་ཏུ་མེད་པ་འཐོབ་སྟེ། དམྱལ་བ་མནར་མེད་དུ་སྐྱེ་བར་འགྱུར་རོ། །དམྱལ་བ་དེ་ལས་ཐོན་ནས་ཡང་ནས་ཡང་དུ་གཞན་དུ་དམྱལ་བར་འཕོའོ། །དེའི་མགོ་བོ་ཨརྫ་ཀའི་དོག་པ་བཞིན་དུ་ཚལ་པ་བདུན་དུ་འགས་སོ་ཞེས་བྱ་བ་ནི། རིག་སྔགས་ཀྱི་དམོད་མོས་མཛེ་འམ་ཕོལ་མིག་གམ། ལྷོག་པའམ་འབྲས་ལ་སོགས་པ་རྣམས་ཀྱིས་བཏབ་ནས། ཤི་བའི་དུས་སུ་ཚོལ་བ་བདུན་དུ་འགས་སོ། །གསང་སྔགས་ཀྱི་གཞི་དག་ཀྱང་ཡིད་ལ་བྱའོ་ཞེས་བྱ་བ་ནི་འབྱུང་པོ་རྣམས་
ཀྱི་གཉེན་པོ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོ་གཞན་གྱིས་མི་ཐུབ་པའི་གསང་སྔགས་ཀྱི་ཐབས་བཤད་པར་བྱའོ། །སློབ་དཔོན་ལས་ཀྱི་རྡོ་རྗེས་ཚིགས་སུ་བཅད་པ་འདི་གསུངས་སོ། །དང་པོར་དགུག་པ། གཉིས་པ་བསྐྲད་པ། གསུམ་པ་མནན་པ། བཞི་བ་བསྲེག་པའོ། །གང་གནོད་པའི་འབྱུང་པོ་རྣམས། རིག་སྔགས་ཀྱི་ང་རྒྱལ་བྱས་ནས། ཕྱག་གཡས་གཡོན་གྱིས་དགུག་པའི་ཕྱག་རྒྱ་བྱ་སྟེ། རྡོ་རྗེ་ཁུ་ཚུར་ཡང་དག་པར་བཅས་ལ། མཛུབ་མོ་གཉིས་ཀྱིས་དགུག་པའི་ཚུལ་དུའོ། །རིག་སྔགས་ཀྱི་གསང་སྔགས་ལ། ཨོཾ་བཛྲ་ཨཾ་ཀུ་ཤ་ཛཿ་ལ་རིག་སྔགས་ཀྱི་གསང་སྔགས་བཏགས་ལ་དགུག་པར་བྱའོ། །མ་རུངས་པའི་འབྱུང་པོ་རྣམས། ཨོཾ་དང་རྡོ་རྗེ་ཧཱུཾ་མཛད་ཀྱི། །རིག་སྔགས་སྨོན་གྱིས་འདུག་མི་ནུས། །རི་རབ་དུར་ཁྲོད་ཕོ་བྲང་དང༌། །རྒྱ་མཚོ་ལུང་སྟོང་ཤིང་གཅིག་དང༌། །ནགས་ཚལ་དག་དང་རྒྱ་གྲམ་དང༌། །རི་ཡི་རྩེ་མོ་མཆོད་རྟེན་རྩ། །ཁྲོན་པ་དག་དང་ཆུ་མིག་དང༌། །མཚོ་ཆེན་དང་ནི་ཚལ་གནས་དང༌། །དེ་བཞིན་གྲོང་ཁྱེར་གྲོང་གནས་དང༌། །གྲོང་རྡལ་དང་ནི་ཕོ་བྲང་དང༌། །རི་ཡི་རྩེ་མོ་ནམ་མཁའ་དང༌། །བར་སྣང་ཆུ་དང་ས་ལ་གནས། །དེ་བཞིན་ས་འོག་ལམ་ལ་གནས། །ཛཿ་ཧཱུཾ་བཾ་ཧོཿ་འི་ཕྱག་རྒྱ་ཡིས། །འབྱུང་པོ་མང་པོ་རིག་སྔགས་དགུག །འབྱུང་པོ་མ་རུངས་པ་རྣམས་རིག་སྔགས་ཀྱི་ཕྱག་རྒྱས་དགུག་པའོ། །ཡང་བསྐྲད་པ་ནི། ཡུངས་ཀར་སྐེ་ཚེ་དང་བསྲེས་ལ། ར་བར་ཚེར་མ་ཅན་གྱི་ཤིང་བུ་སྟེ། མཛོད་དང་ཁྱིམ་གྱི་ཕྱོགས་མཚམས་ཀྱིས་བླངས་ལ་སྐེ་ཚེ་དང་ཡུངས་ཀར་བསྲེས་ལ་ཡང་བདེན་པའི་ཚིགས་བཅད་བཏོན་ལ། བདེ་གཤེགས་རྣམས་ཀྱི་གཟི་བརྗིད་ཀྱིས། །གཙུག་ཏོར་ཅན་གྱི་སྟོབས་རྣམས་དང༌། །ཐམས་ཅད་སྐྱོབ་པའི་བདེན་ཚིག་དང༌། །ལོག་དང་སེལ་གྱི་ཏིང་འཛིན་དང༌། །གསེར་ཐུབ་ཀྱི་ནི་ཡེ་ཤེས་ཀྱིས། །འོད་སྲུངས་ཀྱི་ནི་རྫུ་འཕྲུལ་ལོ། །ཤཱཀྱ་སེང་གེའི་བརྩོན་འགྲུས་སོ། །འབྱུང་པོ་དེ་དག་བརླག་པར་ཤོག །ཨུ་ཙ་ཏ་ཡ་ཕཊ་རྣམས་ཀྱིས། །རིག་སྔགས་སྙིང་པོ་དེ་བཏགས་ལ། །རྔ་བོ་ཆེ་དང་འཁར་རྔ་དང༌། །དེ་ལ་སོགས་པ་སྒྲ་ཡི་ཚོགས། །དེ་བརྡུངས་འབྱུང་པོ་བསྐྲད་པར་བྱ། །མེ་ཏོག་སྣ་ཚོགས་
གཏོར་མ་དང༌། །རྩ་བ་སྣ་ཚོགས་ལོ་མ་དང༌། །འབྲུ་སྣ་ཆུ་དང་བཅས་པ་དང༌། །འོངས་པའི་ཕྱོགས་སུ་བསྐྱལ་བར་བྱ། །དེ་བཞིན་བསྐྲད་ནས་མནན་པར་བྱའོ། །གྲོ་ག་ལ་སོགས་ཤིང་ལོ་ལ། །འབྱུང་པོའི་གཟུགས་དང་འཁོར་ལོ་བཅས། །དེ་ཡི་ནང་དུ་མིང་བྱང་བྲི། །ཡུངས་ཀར་ལན་ཚྭ་སྐེ་ཚེ་དང༌། །ཤང་ཚེ་དུག་རྫས་རོ་ཐང་དང༌། །དེ་རྣམས་བཅུག་ལ་དྲིལ་བར་བྱ། །རབས་ཆད་མཛེ་ཐོད་ནང་དུ་གཞུག །སྔར་བཤད་དགུག་གཞུག་འབྱུང་པོ་ལ། །རིག་སྔགས་ལ་ནི་སྟམྦྷ་ཡ་གདགས། །ལམ་མམ་རྒྱ་གྲམ་མཆོད་རྟེན་འོག །ཕོ་ཁྲོམ་སར་ནི་མནན་པར་བྱ། །དེ་བཞིན་མནན་ལ་བསྲེག་པར་བྱ། །ཙནྡན་ལ་སོགས་དྲི་རྣམས་ཀྱི། །དེ་ཡི་ཆུས་ནི་ལུས་རྣམས་བཀྲུ། །སྨྱུང་བར་བྱས་ནས་གོས་གཙང་གྱོན། །སེང་ལྡེང་ཤིང་ལ་ཞུགས་ཕུལ་ལ། །འབྲུ་དང་རྩ་བ་སྣ་ཚོགས་དང༌། །གནོད་བྱེད་གང་ལ་མིང་བཏགས་ལ། །ཞུགས་ཀྱི་ནང་དུ་གཏོར་བར་བགྱི། །གསང་སྔགས་ལ་ནི་མེ་སྔགས་གདགས། །འབྱུང་པོའི་རྣམ་པ་མ་ལུས་བསྲེག །གཏོར་མ་མེ་ཏོག་ལོ་མ་དང༌། །ཆོས་སྐྱོང་ལ་ནི་སྦྱིན་པར་བྱ། །དེ་ནས་བདེན་པའི་ཚིག་བཤད་འདི། །ཡང་དག་གིས་ནི་བརྗོད་པར་བྱ། །སངས་རྒྱས་ཀུན་གྱི་གཟི་བརྗིད་ཀྱིས། །རང་རྒྱལ་དག་གི་གཟི་བརྗིད་དང༌། །དགྲ་བཅོམ་པ་ཡི་མཐུ་དག་གིས། །གསང་སྔགས་འཛིན་པ་ཐམས་ཅད་དང༌། །ཤཱ་རིའི་བུ་ཡི་ཤེས་རབ་དང༌། །མཽད་གལ་བུ་ཡི་རྫུ་འཕྲུལ་དང༌། །མ་འགགས་པ་ཡི་མིག་དང་ནི། །འོད་སྲུངས་སྦྱངས་པའི་ཡོན་ཏན་དང༌། །ཀཽཎྜི་ནྱའི་སྔར་ཐོས་དང༌། །ཀུན་དགའ་བོ་ཡི་ཐོས་པ་དང། །ཚངས་པ་ཡི་ནི་བྱམས་པ་དང༌། །བརྒྱ་བྱིན་གྱི་ནི་དབང་རྣམས་དང༌། །འཇིག་རྟེན་སྐྱོང་བའི་ཡུལ་རྣམས་ཐོབ། །དབང་ཕྱུག་ཆེན་པོའི་སྟོབས་དག་དང༌། །དེད་དཔོན་རྣམས་ཀྱི་མཐུ་དག་གིས། །འཕྲོག་མའི་གཟི་བརྗིད་རྫུ་འཕྲུལ་ལྡན། །དེ་དག་རྣམས་ཀྱི་མཐུ་དག་གིས། །བདག་གི་གནོད་བྱེད་བསྲེག་པར་ཤོག །འབྱུང་པོ་དུག་དང་དགྲ་བོ་དང༌། །བདག་གི་འཇིགས་པ་ཐམས་ཅད་དང༌། །སངས་རྒྱས་བདེན་པ་དེ་རྣམས་ཀྱིས། །སེམས་ཅན་དག་དང་བདག་རྣམས་དང༌། །སྡིག་པ་ཐམས་ཅད་བསྲེག་པར་ཤོག །གསང་སྔགས་ཚིག་རྣམས་བདེན་
པར་ཤོག །དེ་བཞིན་དུ་ཡང་ནས་ཡང་དུ་གསང་སྔགས་ལ་མེའི་སྔགས་བཏགས་ལ་བསྲེག་པར་བགྱིའོ། །དེ་ནས་རིག་སྔགས་ནི་གང་ཞེ་ན་ཀུན་གཞི་རྣམ་པར་དག་པ་སྟེ། ཐབས་དང་ཤེས་རབ་གཉིས་སུ་མེད་པའོ། །མཚོན་པ་ནི་མེ་ལོང་ལྟ་བུའི་ཡེ་ཤེས་སོ། །མཚོན་བྱེད་ནི་རིག་སྔགས་ཀྱི་རྒྱལ་མོ་རྨ་བྱ་ཆེན་མོའོ། །རྡོ་རྗེའི་རིགས་སོ། །རྣམ་པར་ཤེས་པའི་ཕུང་པོའོ། །ནམ་མཁའི་ཁམས་སོ། །ཡིད་ཀྱི་སྐྱེ་མཆེད་དོ། །ཞེ་སྡང་གི་རང་བཞིན་ནོ། །སངས་རྒྱས་རིགས་ལྔའི་དབུ་རྒྱན་ནོ། །སྤྱན་གསུམ་པ་ཞལ་གཅིག་ཕྱག་བཞི་པ། ཁྲོ་གཉེར་ཅན་ཁ་གདངས་པ། མཆེ་བ་གཙིགས་པ། འཇིགས་སུ་རུང་བ། སྐུ་མདོག་ནག་མོ། །ཡན་ལག་ཐམས་ཅད་རིན་པོ་ཆེ་དང་སྦྲུལ་གྱིས་བརྒྱན་པ། ཤམ་ཐབས་སྟག་གིས་བྱས་པ། གཡས་དང་པོ་ན་རྡོ་རྗེ་རྩེ་ལྔ་གདེངས་པ། དེའི་འོག་མ་ན་ནི་རལ་གྲི་།གཡོན་དང་པོ་ན་སྡིགས་མཛུབ་དང་ཞགས་པ། དེའི་འོག་མ་ན་ལྕགས་ཀྱུ། ཞབས་གཡས་བསྐུམ་པ་གཡོན་བརྐྱང་བ་གཉིས་ན་མ་རུངས་པའི་འབྱུང་པོ་ཐམས་ཅད་མནན་པའོ། །ཉི་མའི་གདན་ལ་མེ་ཡི་འོད། སྐྲ་སེར་བོ་གྱེན་དུའོ། །མེ་ལྟར་འབར་བ་རིགས་ལྔའི་དབུ་རྒྱན་དེ་ནི་ཐོད་པས་བརྒྱན་པའོ། །དབུའི་སྤྱི་བོའི་གཙུག་ན་རྨ་བྱའི་སྒྲོ་ལྔས་བརྒྱན་པ། དེ་ནི་ཡེ་ཤེས་ལྔའི་རང་བཞིན་ནོ། །པདྨའི་གདན་ལ་བཞུགས་ཤིང་ཁྲོ་མོར་བསམ་མོ། །དེ་བཞིན་དུ་རིག་སྔགས་ཀྱི་གསང་སྔགས་ཡིད་ལ་བྱའོ། །རིག་སྔགས་ཀྱི་གསང་སྔགས་ཀྱི་ཚིག་ནི་གང་ཞེ་ན། འདི་ལྟ་སྟེ། ཨི་ལི་མི་ལི་ཀི་ལི་ལ་སོགས་པའོ། །གསང་སྔགས་འདིའི་ཚིག་ལ་འགལ་ན། ཤི་བའི་དུས་སུ་མགོ་བོ་ཚལ་པར་འགས་ཤིང༌། ཤི་མ་ཐག་མནར་མེད་པར་འགྲོ་བའོ། །བདག་ལ་བསྲུང་བ་གྱིས་ཤིག་ཅེས་བྱ་བ་ནི་གང་ཟག་སེམས་ཅན་རྣམས་ལའོ། །སྦ་བ་དང་ཡོངས་སུ་བསྐྱབ་པ་དང་ཞེས་བྱ་བ་ནི། ཁམས་གསུམ་ན་རྒྱུ་བའི་འབྱུང་པོ་ཐམས་ཅད་སྦ་བའོ། །དེ་བཞིན་དུ་བསྐྱབ་པ་ཡང་ཡིན་ནོ། །ཡོངས་སུ་གཟུང་བ་དང་ཞེས་བྱ་བ་ནི། དཔེར་ན་རང་གི་ནོར་གཞན་དུ་མི་སྟེར་བ་བཞིན་ནོ། །འབྱུང་པོ་དེ་རྣམས་ལ་ཡང་མི་སྟེར་བའོ། །ཡོངས་སུ་བསྐྱང་བ་དང་ཞེས་བྱ་བ་ནི། རིག་
སྔགས་ཀྱི་རྒྱལ་མོའི་གཟི་བརྗིད་ཀྱིས། གླང་ཆེན་སྨྱོན་པ་བཞིན་དུ་ཐུབ་པ་མེད་པའོ། །ཞི་བ་དང་ཞེས་བྱ་བ་ནི་འབྱུང་པོ་ཐམས་ཅད་དང་ནད་ཞི་བར་བྱེད་པའོ། །བདེ་ལེགས་སུ་འགྱུར་བ་དང་ཞེས་བྱ་བ་ནི། བཀྲ་ཤིས་ཤིང་ནད་རྣམས་བཅོམ་པའོ། །ཆད་པ་སྤང་བ་དང་ཞེས་བྱ་བ་ནི་འབྱུང་པོ་དེ་རྣམས་ཀྱིས་གླགས་ཚོལ་བར་འདོད་པས་གླགས་མི་རྙེད་པའོ། །མཚོན་ཆ་སྦང་བ་དང་ཞེས་བྱ་བ་ནི། །རིག་སྔགས་ཀྱི་དམོད་མོས་འབྱུང་པོ་དེ་རྣམས་ལ་ནུས་པ་མེད་དེ་གཟི་བརྗིད་འཕྲོག་པའོ། །དུག་གཞིལ་བ་དང་ཞེས་བྱ་བ་ནི། འབྱུང་པོ་རྣམས་ཀྱི་ཁ་རླངས་ཀྱི་དུག་རེག་པ་དང་མཐོང་བ་རྣམས་སོ། །དུག་གསད་པ་དང་ཞེས་བྱ་བ་ནི། དེའི་རང་བཞིན་གྱི་དུག་ཕྱུང་སྟེ། རིག་སྔགས་ཀྱི་དམོད་མོས་དུག་གསད་པའོ། །མཚམས་གཅད་པ་དང་ཞེས་བྱ་བ་ནི་འབྱུང་པོ་དེ་རྣམས་ལ་གཅད་དེ། རིག་སྔགས་འདིའི་གཟི་བརྗིད་ཀྱིས་དཔག་ཚད་གཅིག་གི་བར་དུ་འོང་བར་མི་ནུས་པའོ། །ས་བཅིང་བ་གྱིས་ཤིག་ཅེས་བྱ་བ་ནི། ས་འོག་ཏུ་མནན་ཅིང་དཔག་ཚད་གཅིག་ཏུ་འོང་བར་མི་ནུས་པའོ། །ལོ་བརྒྱ་འཚོ་བར་གྱུར་ཅིག་ཅེས་བྱ་བ་ནི་འབྱུང་པོ་དེ་རྣམས་ཀྱི་སྡུག་བསྔལ་བྲལ་ཞིང༌། དུས་མ་ཡིན་པར་འཆི་བ་མེད་པའོ། །སྟོན་བརྒྱ་མཐོང་བར་ཤོག་ཤིག་ཅེས་བྱ་བ་ནི། ཡང་ནས་ཡང་དུ་ཚེ་བསྣན་ཅིང་ནད་རྣམས་ཀྱིས་མི་ཚུགས་ཏེ། བཀྲ་ཤིས་ཤིང་ཚེ་རིང་བའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་འབྱུང་པོ་རྣམས་གླགས་ཚོལ་འདོད་པ་མ་རྙེད་པའི་སྐབས་ཏེ་དྲུག་པའོ།། །།འདི་ལྟ་སྟེ་ཞེས་བྱ་བ་ནི་འོག་ཏུ་ལྟ་སྟེ་འོག་ཏུ་གང་བལྟས་ཤེ་ན། འདས་པ་དང༌། མ་འོངས་པ་དང་ད་ལྟར་ཡོད་པའི་སངས་རྒྱས་རྣམས་ཀྱིས་རྗེས་སུ་ཡི་རང་ཞིང་བྱིན་གྱིས་བརླབས་པ། དགྲ་བཅོམ་ཉན་ཐོས་རྣམས་ཀྱིས་ཀྱང་རྗེས་སུ་ཡི་རང་བའོ། །འཇིག་རྟེན་གྱི་ལྷ་དང་བཅས་པ་ཡང༌། ཚངས་པ་དང་བརྒྱ་བྱིན་དང༌། གནོད་སྦྱིན་གྱི་སྡེ་དཔོན་ཆེན་པོ་མཐུ་ཆེན་སུམ་ཅུ་རྩ་གཉིས་དང་མཐུ་ཆེན་པོ་ཉི་ཤུ་རྩ་བརྒྱད་དང༌། རྒྱལ་པོ་ཆེན་པོ་བཞི་དང༌། འཇིག་རྟེན་སྐྱོད་བ་བཅུ་དང༌། གནོད་སྦྱིན་གྱི་སྡེ་དཔོན་ཆེན་པོ་སོར་མོ་ལྔ་པ་དང༌། འཕྲོག་མའི་བུ་ལྔ་བརྒྱ་དང་བཅས་པ་ཡང་ལྷའི་གདོན་ལ་སོགས་པ། བགེགས་
དང་འབྱུང་པོའི་རིགས་སུ་གྱུར་པ་སྟོང་ཕྲག་བརྒྱད་ཅུ་ཕྲག་ཉི་ཤུ་རྩ་བཞིའོ། །གཞན་ཡང་དེ་ལྟ་བུ་རྣམས་ཀྱི་རྗེས་སུ་ཡི་རང་ཞིང་གཉེན་པོར་གནས་པའོ། །རིག་སྔགས་ཀྱི་གསང་སྔགས་ཀྱིས་གསོ་བའི་སྨན་དང༌། གསང་སྔགས་ཀྱི་ཚིག་ནི་གང་ཞེ་ན། འདིར་ནི་དུག་གི་རང་བཞིན་གྱིས་ཟས་མ་ལེགས་པ་འབྱུང་བ་སྟེ། ཟས་མ་ལེགས་པ་ནི་རྣམ་པར་རྟོག་པ་ལས་འབྱུང་བའོ། །རྣམ་པར་རྟོག་པ་ནི་དུག་ལྔའོ། །དུག་ལྔ་ནི་གཏི་མུག་ཡིན་ཏེ། གཏི་མུག་གི་རང་བཞིན་གྱིས་ཞེ་སྡང་བྱུང་ངོ༌། །ཞེ་སྡང་ལས་འདོད་ཆགས་བྱུང་ངོ༌། །འདོད་ཆགས་ལས་ང་རྒྱལ་བྱུང་ངོ༌། །ང་རྒྱལ་ལས་ཕྲག་དོག་བྱུང་ངོ༌། །དེ་ལྔ་འདུས་པས་འཇིག་རྟེན་གྱི་དུག་གསུམ་ལ་འདུས་ཏེ། འཇིག་རྟེན་གྱི་དུག་གསུམ་ནི་འདོད་ཆགས་དང་ཞེ་སྡང་དང་གཏི་མུག་དང་གསུམ་མོ། །དེའི་རང་བཞིན་གྱིས་འཁོར་བའི་རྒྱུ་སྟེ། འཁོར་བ་ལ་ཕྱིའི་དུག་གསུམ་བྱུང་ངོ༌། །ཕྱིའི་དུག་གསུམ་ནི་འཇིག་རྟེན་པའི་ལས་ལས་བྱུང་བའོ། །དེ་ཡང་འགྲོ་བ་དང་བསྡད་པ་དང་བྱེད་པའོ། །འགྲོ་བའི་དུག་ནི་བསམ་པ་དང༌། མཐོང་བ་དང་རེག་པ་དང་ཁ་རླངས་སོ། །བསམ་པ་ལ་ཡང་གཉིས་ཏེ། རེག་པས་བསམ་པ་དང༌། མཐོང་ནས་བསམ་པའོ། །རེག་པ་ལ་ཡང་གཉིས་ཏེ། ང་རྒྱལ་གྱིས་རེག་ཏུ་འགྲོ་བ་དང༌། རང་བཞིན་གྱིས་དབང་དུ་མེད་པར་རེག་ཏུ་འཇུག་པའོ། །མཐོང་བ་ལ་ཡང་གཉིས་ཏེ། རང་དད་པས་མཐོང་བ་དང༌། རེག་ནས་མཐོང་བའོ། །ཁ་རླངས་ལ་ཡང་གཉིས་ཏེ། མཆེ་བ་དང༌། དབུགས་རང་བཞིན་གྱིས་དཔག་ཚད་གཉིས་གཉིས་ལ་སླེབས་པའོ། །དེའི་རིམ་པ་བཞིན་དུ་རིགས་ལ་ཡང༌། བྲམ་ཟེ་དང༌། རྒྱལ་རིགས་དང་རྗེའུ་རིགས་དང་དམངས་རིགས་སོ། །དེ་བཞིན་དུ་ཡང་བྲམ་ཟེའི་བྲམ་ཟེ་དང༌། རྒྱལ་པོའི་རྒྱལ་པོ་དང༌། རྗེའུའི་རྗེའུ་དང༌། དམངས་རིགས་ཀྱི་དམངས་རིགས་ནི་གདོལ་བའོ། །དུས་ནི་སྔ་དྲོ་དང༌། ཉི་མ་ཕྱེད་དང། སུམ་ཆ་གཅིག་དང་དགོངས་མོའོ། །སྲོད་དང་ནམ་བྱེད་དང༌། སུམ་ཆ་གཅིག་དང་ཐོ་རངས་སོ། །རིམ་པ་བཞིན་ཀླུ་རྣམས་རྒྱུ་བའོ། །བྲམ་ཟེའི་རིགས་ཀྱིས་སྡང་དྲོ་ཟིན་ན་ནི། །ནད་བདག་ཀན་གྱི་དུས་ཡིན་ཏེ། གཅོང་དང་ཚིགས་རྣམས་ན་ཞིང་མིག་སེར་ཏེ། སྐྱུག་པར་འདོད་ཅིང་དང་
ག་མི་བདེའོ། །རྒྱལ་པོའི་དུས་ནི་ཉི་མ་ཕྱེད་ཡིན་ཏེ། མཁྲིས་པའི་དུས་སོ། །མཆིན་པ་ལ་ནད་བབས་ཤིང་མིག་དམར་བའོ། །རོ་སྟོད་མི་བདེ་ཞིང་མགོ་ན་བ་སྟེ། ལྷོག་པ་དང་འབྲས་དང་ཚད་པ་སྐྱེ་བར་འགྱུར་རོ། །ཉི་མ་སུམ་ཆ་ནི་རྗེའུ་རིགས་ཀྱི་དུས་ཡིན་ཏེ། ནད་ཆུ་སེར་གྱི་དུས་སོ། །གྲང་ཤུམ་བྱེད་ཅིང་ལུས་པོ་ཐམས་ཅད་འདར་བའོ། །སྲོད་ལ་ཕོལ་མིག་དང༌། ཤ་བཀྲ་དང་ཚིགས་ན་ཞིང་མཁལ་མ་སྐྲང་བའོ། །དམངས་རིགས་ཀྱི་དུས་ནི་དགོངས་མོ་སྟེ། མགོ་མཇིད་རེངས་ཤིང་ན་བ་སྟེ། རྐན་འཁལ་ཞིང་སྐད་འགགས་ཏེ་རྣ་བ་འོན་ཞིང་མིག་དམར། ཁ་དོག་སྐྱ་བ། མིག་འགུལ་ཞིང་ལུས་པོ་ཐམས་ཅད་འགུལ་བའོ། །ལུས་པོ་སྐབས་སྐབས་སུ་སྦྲིད་ཅིང་རྐང་ལག་ལྗི་བ་སྟེ། སྙིང་མི་དགའ་ཞིང་ལུས་པོ་གྲང༌། ཤ་རོར་སོང་ཞིང་ཤུ་བ་འབྱུང་སྟེ། སྐྲ་རྣམས་འབྱི་ཞིང་ལུས་པོ་སྐྲངས་བའོ། །རུས་པ་དང་རྐང་ལས་བྱུང་བ་ནི། ཡང་དམངས་རིགས་ཀྱི་ནད་ཡིན་ཏེ། ལུས་པོ་སྐམ་ཞིང་དང་ག་འགགས་པ་སྟེ། སྨེ་བ་འབྱུང་ཞིང་གཡན་པའི་ནད་ཀྱིས་ཐེབས་པའོ། །དེ་བཞིན་དུ་རིགས་གཞན་ལ་ཡང་ཤེས་པར་བྱའོ། །འགྲོ་བའི་དུག་ནི་ཀླུའི་རིགས་ཡིན་ཏེ། མཆེ་བའི་དུག་ཀྱང་ཀླུའི་རིགས་ཤེས་ཏེ། སེམས་ཅན་ལས་ཤེས་པར་བྱའོ། །ཡང་བསྡད་པའི་དུག་ལ་རྩ་བ་དང་ལོ་མ་ལས་བྱུང་བའོ། །རྩ་བ་ལས་བྱུང་བ་ནི་བཙན་དུག་དང༌། བོང་ང་ནག་པོ་དང༌། ར་དུག་དང༌། ཐར་ནུ་དང༌། རེའུ་ལྕག་དང༌། ཐང་ཕྲོམ་དང༌། བོང་དུག་དང༌། རི་ཤོ་མ་དང༌། འཇི་དུག་ལ་སོགས་པའོ། །དེ་ལ་ལོ་མའི་དུག་ནི་དེ་རྣམས་ཀྱི་ལོ་མའོ། །དེ་ཟོས་པའི་ནད་ནི་ཤི་བ་དང༌། གྲང་བ་དང༌། སྨྱོ་བ་དང༌། བརྒྱལ་བ་དང༌། ནར་ནུས་པས་སོ། །དེ་ནི་བསྡད་པའི་དུག་གི་ནུས་པའོ། །ད་བྱེད་པའི་དུག་ནི་རྒྱ་ཚ་ཤིང་ཀུན་དང་སུམས་པའི་ཤའོ། །དེའི་ནད་ཀྱིས་སྙིང་མི་དགའ་སྟེ། སྙིང་ལ་བྱུང་བའོ། །བོད་ཕྲུག་གི་ཤ་དང་འུག་པའི་ཤ་ཤིང་ཀུན་དང་ངོ༌། །དེ་ཡན་ལག་ལ་བབས་ཏེ། གྲང་ཤུམ་བྱེད་ཅིང་ཚ་བ་སྐྱེ་སྟེ། རྟའི་མཆིན་པ་དང༌། ཆུ་བྱའི་ཤ་དང༌། ཐར་ནུ་རྣམས་སོ། །དེ་ལུས་ལ་བབས་ཏེ་རུས་པ་འགགས་པར་འགྱུར་རོ། །ཡང་ན་ཟས་
མི་ལེགས་པ་ཡང་སྦྱོར་པའི་དུག་ཡིན་ཏེ། སྦྲང་རྩི་དང་མར་གཉིས་མཉམ་པོར་བྱས་ནས་འཁར་ཕོར་གྱི་ནང་དུ་ཞག་བདུན་བཞག་སྟེ། དེ་ཡང་བྱེད་པའི་དུག་གོ །མཁྲིས་པ་ལ་ཚ་བ་བཏང་ན་དེ་ཡང་དུག་ཡིན་ཏེ། རླུང་ལ་གྲང་བ་གཏང་བ་ཡང་དུག་གོ །འཇིག་རྟེན་པའི་དུག་འདི་ནི་རང་བཞིན་རང་ལས་འབྱུང་སྟེ། མ་རིག་པའི་རང་བཞིན་གྱིས་རང་ལ་རང་གནོད་པའོ། །སློབ་དཔོན་ལས་ཀྱི་རྡོ་རྗེས་ཚིགས་སུ་བཅད་དེ་གསུངས་པ། གཏི་མུག་དང་ནི་འདོད་ཆགས་དང༌། །ཞེ་སྡང་རང་བཞིན་རང་དུག་སྟེ། །འཇིག་རྟེན་པ་ཡི་དུག་གསུམ་འདི། །ཕྱི་ཡི་དུག་ཀྱང་དེ་ལས་བྱུང༌། །འགྲོ་དང་བསྡད་དང་སྦྱོར་བ་དང༌། །སངས་རྒྱས་ཆོས་དང་དགེ་འདུན་གྱིས། །ཕྱི་ཡི་དུག་ནི་འཇོམས་པར་ནུས། །རིག་སྔགས་གཟི་བརྗིད་དེ་འཇོམས་ནུས། །གཏི་མུག་འདོད་ཆགས་ཞེ་སྡང་དང༌། །རང་གི་སེམས་ཀྱིས་བཅོམ་པ་ལ། །གཞན་གྱིས་དེ་ནི་མི་ཆོམས་སོ། །བདག་གིས་དེ་ནི་བོར་བར་བགྱི། །དེ་སྐད་ཅེས་གསུངས་སོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་དུག་གི་གཉེན་པོ་འདི། དུག་གསུམ་གསོ་བ་ལ་ཡང་དག་པར་ནུས་པའོ། །གསང་སྔགས་དང་སྨན་དང་ཏིང་ངེ་འཛིན་གྱི་བྱེ་བྲག་གིས་གསོ་བར་བྱ་བའོ། །འགྲོ་བའི་དུག་གསོ་བ་ནི། ནད་པ་ལ་རིག་སྔགས་ཀྱི་རྒྱལ་མོའི་ཏིང་ངེ་འཛིན་ལ་ཞུགས་ལ། རིག་སྔགས་ཀྱི་གསང་སྔགས་ལ་འཇུག་པའོ། །ལྟོར་བཏང་བའི་སྨན་ནི། མུ་ཟི་དང༌། འབྲས་བུ་གསུམ་དང༌། རམ་ཉེ་བའི་རྩ་བའི་ཁུ་བ་དང༌། དེ་རྣམས་ལྟོར་བཏོད་བའོ། །གྲང་བ་ཆེན་ཚ་བ་གསུམ་དང༌། ཚ་དང་བསྲེས་པ་སྦྲང་རྩིས་སྦྱར་ལ་བཏང་ངོ༌། །ཆུ་སེར་བབས་ན་ཐལ་ཀ་རྡོ་རྗེ་དང༌། བ་ཀུ་ལ་དང༌། སེ་འབྲུམ་གྱི་ཕྱི་སྐོགས་དང་བསྲེས་ལ་བཏང་ངོ༌། །རིག་སྔགས་ཀྱི་གསང་སྔགས་ཞག་བདུན་བསྒྲུབ་པར་བྱའོ། །ཕོལ་མིག་དང་ལུས་པོ་གས་པར་གྱུར་ན་མུ་ཟི་དང་མར་ནག་བསྐོལ་ལ་དུག་དང་འབྲས་བུ་གསུམ་དང་བསྲེས་ལ་སེར་ཀ་རྣམས་ལ་བྱུག་གོ །བྱབ་པར་འདོད་ན་དང་པོ་ཕྱག་གིས་བགྱི་སྟེ། གཉིས་བ་རྩྭ་དཱུར་བས་བྱའོ། །གསུམ་པ་རྩྭ་ཀུ་ཤས་ཏེ། བཞི་པ་རྨ་བྱའི་སྒྲོའོ། །ལྔ་པ་རང་གི་སོས་དུག་དབྱུང་ངོ༌། །རིག་སྔགས་ཀྱི་རྒྱལ་མོ་རྨ་
བྱ་ཆེན་མོའི་ང་རྒྱལ་གྱིས་བྱས་ལ། ཤུ་བ་དང༌། གཡའ་བ་དང༌། མཛེ་དང༌། ཕོལ་མིག་དང༌། གཡན་པ་དང༌། མེ་དབལ་དང༌། ལྷོག་པ་དང༌། འབྲས་དང༌། ཤ་བཀྲ་དང༌། དམུ་ཆུ་དང༌། འབྲུམ་བུ་དང༌། ཤ་རོ་ལ་སོགས་པའི་མཛེའི་རིགས་ཐམས་ཅད་ལ་དེ་བཞིན་དུ་བྱའོ། །བྱུག་པ་དང༌། བདུག་པ་འདོད་ན། སྔར་བཤད་པའི་ནག་པོའི་སྦྱོར་བ་ལ་བྱའོ། །ཏིང་ངེ་འཛིན་མཉམ་པར་བཟླས་པ་དྲག་པོ་ལ་འཇུག་གོ །དེ་བཞིན་དུ་འགྲོ་བའི་དུག་གསོ་བའི་བྱ་ཐབས་སོ། །བསྡད་པའི་དུག་གསོ་བ་ནི། སྔོ་མ་ཧཱ་ར་ཙ་དང༌། ཆུ་གྲང་མོ་ལ་སྦྱར་ནས། སྔགས་ལན་བདུན་ནམ། ཉི་ཤུ་རྩ་གཅིག་གམ། བརྒྱ་རྩ་བརྒྱད་བཏབ་ལ་འཐུང་དུ་གཞུག་གོ །འདི་ནི་བཙན་དུག་དང་བོང་ང་ནག་པོའི་གཉེན་པོའོ། །ར་དུག་ལ་འབྲས་བུ་གསུམ་དང་ལྕགས་ཕྱེ་བཏབ་ལ། བུ་ཆུང་འོ་མ་འཐུང་བའི་ཆུ་འམ། རང་གི་ཆུ་ལ་བཏབ་ལ་འཐུང་དུ་གཞུག་གོ །དེས་ནི་བཙན་དུག་ཀྱང་ཐུབ་པོ། །སྲིབས་ཤིང་གི་འབྲུ་གུ་ལ་འབྲས་བུ་གསུམ་གྱིས་བྱའོ། །སྨྱོ་བར་གྱུར་ན་སྐྱུར་མོའི་ཆུ་རྩའམ་ཁུ་བ་བླུད་དོ། །དེ་ནི་ཐང་ཕྲོམ་གྱི་གཉེན་པོའོ། །གས་པར་གྱུར་ན་མར་ནག་དང༌། གུ་གུལ་དཀར་པོ་དང་སྦྱར་ལ་བྱུག་གོ །སྐྲངས་པར་གྱུར་ན་ཐང་ཕྲོམ་གྱི་རྩ་བ་དང༌། རི་ཤོ་བའི་རྩ་བ་དང༌། དུག་རང་དང་སྦྱར་ལ་མནན་ནོ། །།གཞན་ཡང་ཐམས་ཅད་ཆུ་གྲང་ལ་བཏབ་ལ་བཏུང་བར་བྱའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་རིག་སྔགས་ཀྱི་གསང་སྔགས་བཏོན་ལ་བྱའོ། །དེ་ནི་བསྡད་པའི་དུག་གསོ་བའི་བཅོས་ཐབས་སོ། །ད་ནི་བྱེད་པའི་དུག་གསོ་བ་སྟེ། བྱེད་པའི་དུག་ནི་སྦྱོར་བའི་དུག་གོ །ཡུངས་ཀར་མ་ཚིག་པར་བརྡོས་ལ། བརྡུང་བ་བྱས་ལ་ལྟོ་སྟོང་ལ་གཏང་ངོ༌། །དེ་བཞིན་དུ་ཞག་གསུམ་བཞི་བཏང་བར་གྱུར་ན། ལོ་གཅིག་བར་དུ་ཐུབ་པའོ། །ཤ་ཚན་གསུམ་དང་སྐྱེར་བ་དང༌། སེ་རྒོད་པའི་བར་ཤུན་དང༌། ཨ་རུར་དང༌། ར་དམར་མོའི་ཁྲག་དང་རི་ལུ་བྱས་ལ་བཏང་ངོ༌། །འདིས་ནི་ལོ་གསུམ་གྱི་བར་དུ་ཐུབ་སྟེ། ལོ་གཅིག་ཐེ་ཚོམ་མི་ཟ་བར་ཐུབ་བོ། །ཤ་དུག་བྱུང་ན་སྒ་ཆུང་
དང་ཚལ་ཆུ་གྲང་མོ་ལ་བཏབ་ལ་བཏུང་ངོ༌། །རིན་པོ་ཆེའི་དུག་བྱུང་ན་ལྕགས་ཕྱེ་དང༌། འབྲས་བུ་གསུམ་དང༌། ལྡུམ་བུ་རེ་རལ་དང༌། སྒོག་གཅིག་མ་དང༌། དྷ་དུ་རས་སྦྱར་ལ་བྱའོ། །འདི་ནི་སྦྱོར་བའི་དུག་གསོ་བའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ནི་འདས་པའི་སངས་རྒྱས་རྣམས་ཀྱིས་གསུངས་པ། མ་འོངས་པ་རྣམས་ཀྱང་དེ་བཞིན་ནོ། །ད་ལྟར་གྱི་ཤཱ་ཀྱ་ཐུབ་པས་གསུངས་ཤིང་རྗེས་སུ་ཡི་རང་བའོ། །ཐབས་ཤེས་རབ་དབྱེར་མེད་པའོ། །ཀུན་གཞི་རྣམ་པར་དག་པའོ། །སྟོང་པ་ཉིད་ཀྱི་རང་བཞིན་ནི་སོ་སོར་རྟོག་པའི་ཡེ་ཤེས་ཏེ། ཐབས་ཀྱི་ངོ་བོ་ནི་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་པདྨའི་རིགས་སོ། །ཕུང་པོ་ནི་འདུ་ཤེས་ཀྱི་ཕུང་པོ་སྟེ། ཁམས་ནི་མེའི་ཁམས་སོ། །སྐྱེ་མཆེད་ནི་ལྕེའི་སྐྱེ་མཆེད་དོ། །རང་བཞིན་ནི་འདོད་ཆགས་ཀྱི་རང་བཞིན་ནོ། །སངས་རྒྱས་ལྔའི་དབུ་རྒྱན་ཅན། སྤྱན་གསུམ་པ། ཞལ་གཅིག་ཕྱག་བཞི་པ། སྐུ་མདོག་དམར་བ། ཅུང་ཟད་ཁྲོ་བ། ཡན་ལག་ཐམས་ཅད་སྦྲུལ་གྱིས་བརྒྱན་པ་དང་པོའི་ཕྱག་གཡས་གཡོན་ན་མཐའ་ཡས་དང་འཇོག་པོའི་ངོ་བོར་སྦྲུལ་བསྣམས་པ། རིག་སྔགས་ཀྱི་རང་བཞིན་རྨ་བྱ་གསེར་དུ་སྣང་བ་གཉིས་ཕྱག་འོག་མ་གཉིས་ན་བསྣམས་པའོ། །ཞབས་གཡས་བསྐུམ་པ་གཡོན་བརྐྱང་པའི་ཞབས་ཀྱིས་པདྨ་དང་ཀ་ར་རུ་ཏྲ་མནན་པའོ། །པདྨའི་སྟེང་ན་ཉི་མའི་གདན་ལ་བཞུགས་པ། ཉི་མའི་འོད་ཟེར་དང་ལྡན་པ། ཡེ་ཤེས་ལྔའི་རང་བཞིན་ནོ། །ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས། ཐུགས་ཀྱི་དཀྱིལ་འཁོར་ལས་སྤྲོས་པས། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི། དུག་གི་གཉེན་པོ་ཀླུའི་རྒྱལ་པོ་རྣམས་ཀྱི་བདག་པོའོ། །དུག་གི་གཉེན་པོའི་སྙིང་པོ་ནི་གང་ཞེ་ན། རིག་སྔགས་ཀྱི་གསང་སྔགས་འདི། གཞན་རྣམས་ཀྱིས་ཀྱང་མི་ཐུབ་ཅིང༌། འབྱུང་པོ་རྣམས་ཀྱི་ཡང་གཉེན་པོའོ། །སྔགས་ཀྱི་ཚིག་འདི་ལྟ་སྟེ། ཙིད་ཏྲེ་ཙིད་ཏྲ་མུ་ལེ་ལ་སོགས་པའོ། །རྒྱལ་བ་རྣམས་གཟིགས་མྱ་ངན་འཚང་ལ་གནས། །ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་དེ་ཡང་འཁྲུངས་པའི་
དུས་སུ་ཡང༌། ཤིང་བྱང་ཆུབ་ཀྱི་ཤིང་མྱ་ངན་འཚང་གི་འོག་ཏུའོ། །སེམས་ཅན་གྱི་དོན་ལ་ཡུལ་མ་ག་དྷཱ་ལ་རྡོ་རྗེ་གདན་ལ་བཞུགས་པའི་དུས་སུ། །བྱང་ཆུབ་ཀྱི་འོག་ཏུའོ། །སྲོད་ལ་བདུད་བཏུལ་ཏེ། ཐོ་རངས་སངས་རྒྱས་པའི་དུས་སུ། རིག་སྔགས་ཀྱི་རྒྱལ་མོ་འདི་དྲན་པར་རྙེད་པའོ། །དེའི་བདེན་པས་འགྲོ་བའི་དུག་དང༌། བསྡད་པའི་དུག་དང༌། བྱེད་པའི་དུག་དང༌། བྱེད་པའི་དུག་ངེས་པར་བཅོམ་མོ། །རྒྱལ་བ་གཙུག་ཏོར་པདྨ་དཀར་པོའི་དྲུང༌། །ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་གཙུག་ཏོར་ཅན་ནི། །བྱང་ཆུབ་ཀྱི་ཤིང་པདྨ་དཀར་པོའི་ཚལ་གྱི་འོག་ཏུ་འཁྲུངས་ཏེ། དེ་བཞིན་དུ་རྡོ་རྗེ་གདན་ལ་བཞུགས་པའི་དུས་སུ། །བྱང་ཆུབ་ཀྱི་ཤིང་པདྨ་དཀར་པོའི་འོག་ཏུ་སྲོད་ལ་བདུད་བཏུལ་ཏེ། ཐོ་རངས་མངོན་པར་རྫོགས་པར་སངས་རྒྱས་སོ། །དེའི་དུས་སུ་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ཡིད་ལ་བྱས་ཏེ། དེའི་བདེན་པས་འགྲོ་བའི་དུག་དང༌། བསྡད་པའི་དུག་དང་བྱེད་པའི་དུག་རྣམས་ངེས་པར་བཅོམ་མོ། །ཐམས་ཅད་སྐྱོབ་པ་སཱ་ལའི་དྲུང་ན་གནས། །ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་ཐམས་ཅད་སྐྱོབ་དེ་ཡང་འཁྲུངས་པའི་དུས་སུ་ཡང་ཤིང་སཱ་ལའི་འོག་ཏུ་འཁྲུངས་ཏེ། སེམས་ཅན་གྱི་དོན་ལ་ཡུལ་མ་ག་དྷཱར། རྡོ་རྗེ་གདན་ལ་བཞུགས་པའི་དུས་སུ་བྱང་ཆུབ་ཀྱི་ཤིང་སཱ་ལའི་འོག་ཏུ་སྲོད་ལ་བདུད་བཏུལ་ཏེ། ཐོ་རངས་མངོན་པར་རྫོགས་པར་སངས་རྒྱས་སོ། །དེའི་ཚེ་དེའི་དུས་ན་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་དྲན་པ་ཉེ་བར་གཞག་ནས། སངས་རྒྱས་ཐམས་ཅད་སྐྱོབ་པས་ཀྱང་རིག་སྔགས་གྱི་རྒྱལ་མོ་རྨ་བྱ་ཆེན་མོ་འདི་ལ་རྗེས་སུ་ཡི་རངས་ཤིང་དེའི་དུས་སུ་འགྲོ་བའི་དུག་དང་བསྡད་པའི་དུག་དང༌། བྱེད་པའི་དུག་ངེས་པར་བཅོམ་མོ། །བྲམ་ཟེ་འཁོར་བ་འཇིག་ནི་ཤིཪྵའི་དྲུང༌། །ཞེས་བྱ་བ་ནི་ཡུལ་མ་གདྷཱའི་ཆུ་བོ་གངྒཱའི་ལྷོ་ཕྱོགས་ཀྱི་འགྲམ་ན་བྲམ་ཟེ་མོ་འཁོར་བ་འཇིག་ཅེས་བྱ་བ་ནི་ཡུམ་ཡིན་ཏེ། དེའི་དུས་སུ་ཡང་དག་པར་རྫོགས་པའི་སངས་རྒྱས་བྱང་ཆུབ་ཀྱི་ཤིང་ཤིཪྵའི་འོག་ཏུ་སྐུ་འཁྲུངས། རྡོ་རྗེའི་གདན་ལ་བཞུགས་པའི་དུས་སུ་ཡང་བྱང་ཆུབ་ཀྱི་ཤིང་ཤིཪྵའི་འོག་ཏུའོ། །སེམས་
ཅན་གྱི་དོན་དུ་སྲོད་ལ་བདུད་བཏུལ་ཏེ། ཐོ་རངས་མངོན་པར་རྫོགས་པར་སངས་རྒྱས་སོ། །དེའི་དུས་སུ་ཡང་སྐད་ཅིག་མས་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལ་རྗེས་སུ་ཡི་རངས་ཏེ། སངས་རྒྱས་འཁོར་བ་འཇིག་སེམས་ཅན་གྱི་དོན་ལ་འགྲོ་བའི་དུག་དང༌། བསྡད་པའི་དུག་དང་བྱེད་པའི་དུག་ངེས་པར་བཅོམ་མོ། །སངས་རྒྱས་གསེར་ཐུབ་ཨུ་དུམྺཱ་རའི་དྲུང༌། །ཞེས་བྱ་བ་ནི་ཡུལ་མ་ག་དྷཱའི་དྲང་སྲོང་གི་རིགས་སུ་སྐྱེས་ནས། བྱང་ཆུབ་ཀྱི་ཤིང་ཨུ་དུ་མྺཱ་རའི་འོག་ཏུ་འཁྲུངས་ཏེ། དེ་བཞིན་དུ་རྡོ་རྗེ་གདན་ལ་བཞུགས་པའི་དུས་སུ་ཡང་སྲོད་ལ་བདུད་བཏུལ་ཞིང་ཐོ་རང་ས་མངོན་པར་རྫོགས་པར་སངས་རྒྱས་སོ། །དེའི་དུས་སུ་ཡང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལ་རྗེས་སུ་ཡི་རངས་ཤིང་བདེན་པའི་ཚིག་གིས་ཀྱང་འགྲོ་བའི་དུག་དང༌། བསྡད་བའི་དུག་དང་བྱེད་པའི་དུག་ངེས་པར་བཅོམ་མོ། །འོད་སྲུངས་ནྱ་གྲོ་དྷ་ཡི་དྲུང་ན་གནས། །ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་འོད་སྲུངས་འཁྲུངས་པའི་དུས་སུ་ནྱ་གྲོ་དྷའི་རྩ་བར་འཁྲུངས་ཏེ། རྡོ་རྗེ་གདན་ལ་བཞུགས་པའི་དུས་སུ་ཡང་དེ་བཞིན་ནོ། །རིག་སྔགས་ཀྱི་རྒྱལ་མོ་འདི་ལ་རྗེས་སུ་ཡི་རངས་ཤིང་རིག་པའི་ནུས་པས་སངས་རྒྱས་འོད་སྲུངས་ཀྱིས་ཀྱང་འགྲོ་བ་དང་བསྡད་པ་དང༌། བྱེད་པའི་དུག་གསུམ་ངེས་པར་བཅོམ་མོ། །ཤཱཀྱ་ཐུབ་མཆོག་ཁྱད་པར་གནས་དྲུང་དུ། །ཞེས་བྱ་བ་ནི་གྲོང་ཁྱེར་སེར་སྐྱའི་ནང་ན་རྒྱལ་པོ་ཟས་གཙང་གི་སྲས་སེམས་ཅན་གྱི་དོན་ལ་དགའ་ལྡན་ནས་ཡུམ་སྒྱུ་མ་ཆེན་མོའི་ལྷུམས་སུ་ཞུགས་ནས་འཁྲུངས་པའི་དུས་སུ་བྱང་ཆུབ་ཀྱི་ཤིང་དྲུང་གི་འོག་ཏུ་འཁྲུངས་ཏེ། འཁྲུངས་མ་ཐག་ཏུ་པདྨ་བདུན་སྐྱེས་སོ། །དེ་ཡང་སེམས་ཅན་གྱི་དོན་ལ་གོམ་པ་བདུན་བོར་ཏེ། ཆུ་བོ་ནཻ་རཉྫ་རའི་དྲུང་དུ་དཀའ་ཐུབ་ལོ་དྲུག་མཛད་པའོ། །གཉིས་པ་རྡོ་རྗེ་གདན་དུ་བྱང་ཆུབ་ཀྱི་ཤིང་གནས་ཀྱི་དྲུང་གི་འོག་ཏུ། རྩྭ་ཀུ་ཤའི་གདན་བཏིང་ནས་སྲོད་ལ་བདུད་བཏུལ་ནས་ཐོ་རངས་མངོན་པར་རྫོགས་པར་སངས་རྒྱས་སོ། །དེའི་ཚེ་དེའི་དུས་སུ་སྔོན་གྱི་དྲན་པ་ཉེ་བར་གཞག་ཅིང་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཉེ་བར་གཞག་ནས་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ལ་རྗེས་སུ་ཡི་རངས་པའོ། །གསུམ་པ་ཝཱ་རཱ་ཎ་སཱིར་བདེན་པ་བཞིའི་ཆོས་ཀྱི་
འཁོར་ལོ་བསྐོར་བའོ། །བཞི་པ་མུ་སྟེགས་རིགས་གཅེར་བུ་དང་རྩོད་པའོ། །ལྔ་པ་ལྷའི་ཡུལ་ནས་འཛམ་བུའི་གླིང་དུ་བྱོན་ནས་ལྷ་རྣམས་དང་སྤྱོད་པ་མཛད་པའོ། །དྲུག་པ་སྤྲེ་འུས་སྦྲང་རྩི་ཕུལ་བའོ། །བདུན་པ་སྐུ་མྱ་ངན་ལས་འདས་པའོ། །དང་པོ་དགའ་ལྡན་ནས་བྱོན་ནས་ཡུམ་སྒྱུ་མ་ལྷ་མཛེས་ཀྱི་ལྷུམས་སུ་ཞུགས་ནས་བཙས་པ་ནི་བརྒྱད་པའོ། །དེ་བས་ན་འཁྲུངས་མ་ཐག་ཏུ་མེ་ཏོག་པདྨ་བརྒྱད་དང་ལྡན་པའོ། །དེའི་བདེན་པ་དང་རིག་སྔགས་ཀྱིར་གྱལ་མོའི་གཟི་བརྗིད་ཀྱིས། འགྲོ་བའི་དུག་དང་བསྡད་པའི་དུག་དང་བྱེད་པའི་དུག་གསུམ་བཅོམ་པའོ། །ཕྱིན་ནས་བྱང་ཆུབ་མཆོག་ཐོབ་འགྱུར། །གཽ་ཏ་མ་ཞེས་བྱ་བ་ནི། དུས་དང་པོ་ན་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་བསྟན་པ་སྟེ། དེའི་དུས་སུ་ས་གཞི་ཤེལ་ལས་བྱས་པ་འཛམ་བུའི་གླིང་པའི་ཚེ་ཚད་ཀྱང་སྟོང་དུ་གནས་སོ། །གཉིས་པ་སངས་རྒྱས་གཙུག་ཏོར་ཅན་གྱི་བསྟན་པ་ལ་ས་གཞི་ནི་གསེར་ལས་བྱས་པའོ། །མིའི་ཚེ་ལོ་ནི་ལྔ་བརྒྱ་ཐུབ་པོ། །དུས་གསུམ་པ་ལ་སངས་རྒྱས་ཐམས་ཅད་སྐྱོབ་པའི་བསྟན་པ་ལ་ས་གཞི་ནི་དངུལ་ལས་བྱས་པ་སྟེ། །མི་ལོ་ནི་ཕྱེད་དང་སུམ་བརྒྱ་ཐུབ་པའོ། །དུས་བཞི་པ་ལ་སངས་རྒྱས་ལོག་པར་དད་སེལ་གྱི་བསྟན་པ་ལ། ས་གཞི་ནི་ཨིནྡྲ་ནཱི་ལ་ལས་བྱས་པའོ། །ཚེ་ལོ་བརྒྱ་ཉི་ཤུ་རྩ་ལྔའོ། །དུས་ལྔ་པ་ལ་སངས་རྒྱས་གསེར་ཐུབ་ཡི་བསྟན་པ་ལ། སྨོན་ལམ་སྟོབས་ཀྱིས་གསེར་གྱི་ས་གཞི། མིའི་ཚེ་ལོ་ཡང་སྟོང་ཚོ་གཅིག་གོ །དུས་དྲུག་པ་ལ་སངས་རྒྱས་འོད་སྲུངས་ཀྱི་བསྟན་པ་སྟེ། རིན་པོ་ཆེ་སྣ་བདུན་གྱིས་གཞི། རིན་པོ་ཆེ་སྣ་བདུན་ལ་ལོངས་སྤྱོད་དོ། །མི་ལོ་ལྔ་བརྒྱའོ། །དུས་བདུན་པ་ནི་ཐ་མའི་དུས་ཡིན་ཏེ། སངས་རྒྱས་ཤཱཀྱ་ཐུབ་པའི་བསྟན་པ་སྟེ། སྔོན་གྱི་དུས་སུ་སངས་རྒྱས་མར་མེ་མཛད་ཀྱི་བསྟན་པ་ལ། སངས་རྒྱས་ཉིད་ལ་དང་པོའི་སྨོན་ལམ་བཏབ་པའོ། །དེའི་ཚེ་དེའི་དུས་སུ་སངས་རྒྱས་མར་མེ་མཛད་ཀྱི་བསྟན་པ་ལ་ལྷ་དང་ལྷ་མ་ཡིན་སྡེ་བརྒྱད་དང་མི་ལ་སོགས་པའི་སེམས་ཅན་གྱི་མཆོད་པའོ། །དེའི་དུས་སུ་ཡང་སངས་རྒྱས་ཤཱཀྱ་ཐུབ་པ་བྲམ་ཟེའི་ལུས་སུ་སྐྱེ་ནས་ནི་
ཉི་མའི་འོད་ཅེས་པའོ། །དེའི་བུ་ཕོ་ཟླ་བའི་འོད་དུ་མཚན་བཏགས་པའོ། །སངས་རྒྱས་མར་མེ་མཛད་ལ་དད་པ་སྐྱེས་ནས་མཆོད་པ་བྱེད་དུ་ཕྱིན་པ་ལྷ་དང་མི་ལ་སོགས་པ་མང་པོས་བཀག་ནས་མ་ཐར་ཏེ་སངས་རྒྱས་ཞལ་ཡང་མཐོང་བར་མ་ཐོབ་པའོ། །སངས་རྒྱས་ཉིད་ཀྱིས་ཏེ་མངོན་པར་ཤེས་ནས་སེམས་ཅན་གྱི་དོན་ལ་ཆར་དྲག་པོ་འབེབས་པའོ། །སེམས་ཅན་ཐམས་ཅད་ཆར་ལ་གབ་ནས་བྲམ་ཟེ་དེས་སངས་རྒྱས་ཀྱི་ཞལ་མཐོང་བར་གྱུར་ཏོ། །དེ་ནས་བྲམ་ཟེའི་ཕྲུ་གུ་ཉི་མའི་འོད་ཀྱིས་སངས་རྒྱས་མར་མེ་མཛད་ནགས་གསེབ་ན་བཞུགས་པ་ལ་དད་པ་སྐྱེས་ནས་མགོ་བོའི་སྟེང་དུ་བཞག་གོ །དེའི་ཚེ་དེའི་དུས་སུ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱིས་བསྐལ་པ་ཐ་མའི་དུས་སུ་ཡང་དག་པར་རྫོགས་པའི་སངས་རྒྱས་ཤཱཀྱ་སེང་གེར་འགྱུར་རོ་ཞེས་ལུང་བསྟན་ཏོ། །དེ་ལྟར་ཡང་ས་གཞི་ནི་སའི་ས་གཞི་སྟེ། སེམས་ཅན་ཡང་བཅོས་དཀའ་བ་མཚོན་སྣ་ལྔའི་དུས། །ཆོས་འདུལ་བ་མངོན་པ་ཐེག་པ་ཆེན་པོའི་དུས། ཕ་རོལ་ཏུ་ཕྱིན་པ་གསང་སྔགས་ཀྱིས་འདུལ་བའི་དུས་སོ། །མིའི་ཚེ་ལོ་ཡང་བརྒྱ་ཉི་ཤུ་ཐམ་པ། གཟུགས་ཀྱང་ཁྲུ་ཕྱེད་དང་བཞི་དང་ལྡན་པའོ། །དེའི་དུས་སུ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་བསྟན་པ་དར་ཞིང༌། རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ལ་སེམས་ཅན་ཐམས་ཅད་རྗེས་སུ་ཡི་རངས་ཤིང་གུས་པར་བྱ་སྟེ། དེའི་ནུས་པས་ཀྱང་དུག་ཐམས་ཅད་བཅོམ་པའོ། །སངས་རྒྱས་རྫུ་འཕྲུལ་ཆེན་པོ་དེ་དག་ལ། །ཞེས་བྱ་བ་ནི་སངས་རྒྱས་རྣམ་པར་གཟིགས་དང༌། གཙུག་ཏོར་ཅན་དང༌། ཐམས་ཅད་སྐྱོབ་དང༌། ལོག་པར་དང་སེལ་དང༌། གསེར་ཐུབ་དང༌། འོད་སྲུངས་དང༌། ཤཱཀྱ་ཐུབ་པ་སྟེ། དེའི་བདེན་པ་དང་སྟོབས་དང་གཟི་བརྗིད་ཀྱིས་སེམས་ཅན་ཐམས་ཅད་ཀྱི་དོན་བྱས་ཤིང་དུག་བཅོམ་མོ། །མངོན་པར་དད་པའི་ལྷ་གང་འཁོད་པ་དག་ཅེས་བྱ་བ་ནི། དེ་དག་གི་ནུས་པས་ཀྱང་ལྷ་རྣམས་ལ་སོགས་པས་ཀྱང་འདི་ལ་དད་པ་བགྱིས་པ་གང་ཡང་ཚེ་རིང་ཞིང་ནད་ཐམས་ཅད་དང་བྲལ་ཏེ། དུག་ཐམས་ཅད་ཀྱི་འཇིགས་པ་ལས་ཐར་བར་འགྱུར་རོ། །ལྷ་རྣམས་དེ་དག་ཡིད་
དགའ་མགུར་གྱུར་ནས་ཞེས་བྱ་བ་ནི། སངས་རྒྱས་རྣམས་ཀྱི་བདེན་པ་དང༌། རིག་སྔགས་ཀྱི་གཟི་བརྗིད་ཀྱིས་ལྷ་དང་མི་དང་ལྷ་མ་ཡིན་ལ་སོགས་པ་བགེགས་རིགས་སྟོང་ཕྲག་བརྒྱད་ཅུ་རྩ་བཞི་པོ་རྣམས་ཀྱང་མགུ་བར་གྱུར་ཅིང༌། སེམས་ཅན་དེ་ལ་གྲོགས་བྱེད་པར་འགྱུར་རོ། །རྟག་ཏུ་དགེ་ཞིང་ཞི་བར་འགྱུར་བར་བྱོས། །ཞེས་བྱ་བ་ནི་ཐོག་མ་ཐ་མ་བར་དུ་དགེ་བར་གྱུར་ཅིག །ད་ལྟར་ཡང་དུག་ཐམས་ཅད་འཇོམས་ཤིང་རིག་སྔགས་འགྲུབ་པར་འགྱུར་རོ། །ཡང་དག་པར་རྫོགས་པའི་སངས་རྒྱས་ཀྱི་ངག་ནས་བྱུང་སྟེ། ཐབས་ཤེས་རབ་གཉིས་སུ་མེད་པ་ཡེ་ཤེས་ལྔ་དང་ལྡན་པ། འདུ་ཤེས་ཀྱི་ཕུང་པོ་མེའི་ཁམས་མཉམ་པ་ཉིད་ཀྱི་ཡེ་ཤེས་ལྕེའི་སྐྱེ་མཆེད་ཞལ་གཅིག་ཕྱག་གཉིས་པ་སྐུ་མདོག་དམར་མོ་སྤྱན་གསུམ་པ། སངས་རྒྱས་ལྔའི་དབུ་རྒྱན་ཅན། རྒྱན་རྣམས་ཐམས་ཅད་སྦྲུལ་གྱིས་བརྒྱན་པ། ན་བཟའ་ལ་དུག་གིས་བརྒྱན་པ། ཀླུ་མཐའ་ཡས་དང་འཇོག་པོ་མནན་པ། དེ་བཞིན་དུ་པདྨ་དང་པདྨ་ཆེན་པོ་ཕྱག་གིས་བཟུང་བ། ཉི་མའི་གདན་དང་འོད་དང་ལྡན་པ། ཅུང་ཟད་ཁྲོ་བའོ། །དུག་བཅོམ་པའི་རིག་སྔགས་གང་ཞེ་ན། སངས་རྒྱས་ཤཱཀྱ་ཐུབ་པའི་ཞལ་ནས་སྤྲོས་པའོ། །འདི་ལྟ་སྟེ། འོག་ཏུ་ལྟ་བའོ།། རིག་སྔགས་ཀྱི་གསང་སྔགས་ནི། ཨི་ལི་མི་ལི་ཀི་ལི་ལ་སོགས་པའོ། །ཀུན་དགའ་བོ་ཞེས་བྱ་བ་ནི་དགེ་སློང་ས་རི་དང་སེམས་ཅན་ཐམས་ཅད་ཀྱི་དོན་དུ་ཚེ་དང་ལྡན་པ་ཀུན་དགའ་བོ་ལ་སྨྲས་པའོ། །རྨ་བྱ་ཆེན་མོ་འདི་དག་མི་མཇེད་ཀྱི་བདག་པོ་ཚངས་པ་དང་ཞེས་བྱ་བ་ནི། ཚངས་པའི་ལྷ་ལ་སོགས་པ་གཟུགས་ཁམས་ཀྱི་ལྷ་རྣམས་སོ། །སྨན་ནི་རིག་སྔགས་ཀྱི་གསང་སྔགས་སོ། །བསམ་གྱིས་མི་ཁྱབ་ཅིང་བརྗོད་དུ་མེད་པའོ། །ལྷ་རྣམས་ཀྱི་དབང་པོ་བརྒྱ་བྱིན་དང་ཞེས་བྱ་བ་ནི་འདོད་པའི་ཁམས་ཀྱི་ལྷ་སུམ་ཅུ་རྩ་གསུམ་དང༌། མཚེ་མ་དང་དགའ་ལྡན་དང༌། འཕྲུལ་དགའ་དང་གཞན་འཕྲུལ་དབང་བྱེད་ཀྱི་ལྷ་རྣམས་ཀྱིས་ཀྱང་རྗེས་སུ་ཡི་རང་ཞིང༌། སྨན་ཆེན་པོར་གསུངས་པའོ། །རྒྱལ་པོ་ཆེན་པོ་བཞི་དང་ཞེས་པ་ནི། རི་བདུན་གྱི་ལྷ་རྣམས་དང་སྨན་ཆེན་པོར་བྱས་པའོ། །གནོད་སྦྱིན་གྱི་དེད་དཔོན་ཉི་ཤུ་རྩ་བརྒྱད་ཀྱིས་བཤད་པ་སྟེ།
ཞེས་བྱ་བ་ནི། གནོད་སྦྱིན་ཆེན་པོ་སེང་གེའི་རལ་པ་ཅན་ལ་སོགས་པ་བགེགས་རིགས་སྟོང་ཕྲག་བརྒྱད་ཅུ་རྣམས་ཀྱིས་ཀྱང་རྗེས་སུ་ཡི་རང་བའོ། །ཀུན་དགའ་བོ་ཞེས་བྱ་བ་ནི། སངས་རྒྱས་ཀྱིས་ཡང་ནས་ཡང་དུ་གསུངས་པའོ། །གང་སྨན་ཆེན་པོ་འདི་དག་གི་མིང་འཛིན་པ་ལ་དགའ་ཞིང། རབ་ཏུ་སྡང་བའི་སེམས་ཀྱིས་འོངས་ན་ཞེས་བྱ་བ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་བཀའ་ལས་འདས་པ། གང་སྡུག་བསྔལ་ཐམས་ཅད་ཐོབ་ཅིང་དམྱལ་བ་མནར་མེད་པར་སྐྱེ་བར་འགྱུར་རོ། །དེའི་མགོ་བོ་ཨརྫ་ཀའི་དོག་པ་བཞིན་དུ་ཚལ་པ་བདུན་དུ་འགས་སོ་ཞེས་བྱ་བ་ནི་དེའི་བཀའ་ལས་འདས་པ་དེའི་ཚེ་འདིའི་མགོ་བོ་འགས་ཏེ། ལུས་ཀྱང་དུམ་བུ་དུམ་བུར་ཞིག་གོ །ཤི་ནས་ཀྱང་སྐྱེས་མ་ཐག་ཏུ་དམྱལ་བ་མནར་མེད་པའི་སྡུག་བསྔལ་ཐོབ་ཅིང༌། དེའི་སྡུག་བསྔལ་ལས་བྲལ་ནས་ཀྱང༌། དམྱལ་བ་པདྨ་ཆེན་པོ་ལྟར་གས་པར་སྐྱེའོ། །རིག་སྔགས་ནི་གང་ཞེ་ན་ཡང་དག་པར་རྫོགས་པའི་སངས་རྒྱས་ཀྱི་སྤྱི་བོའི་གཙུག་ནས་འཕྲོས་པ། སྐུའི་རང་བཞིན་ཆོས་ཀྱི་དབྱིངས་ཀྱི་ཡེ་ཤེས། གཟུགས་ཀྱི་ཕུང་པོ་མེའི་ཁམས། མིག་གི་སྐྱེ་མཆེད་ཡེ་ཤེས་ལྔའི་རང་བཞིན་མཚོན་བྱ་ནི་ཡེ་ཤེས་ཏེ། དེ་ཡང་ཤེས་རབ་ཀྱི་རང་བཞིན་ནོ། །མཚོན་པར་བྱེད་པ་ནི་ཐབས་སོ། །དེ་གཉིས་སུ་མེད་པའི་སྐུ་ནི་ཞལ་གསུམ་ཕྱག་དྲུག་སྐུ་མདོག་དམར་པ། གཡས་མཐིང་ག །གཡོན་ལྗང་གུ། །སྤྱན་གསུམ་པ་རིགས་ལྔའི་དབུ་རྒྱན་ཅན། ལུས་ཐམས་ཅད་སྦྲུལ་གྱིས་བརྒྱན་པ། རྨ་བྱ་ལ་ཞོན་པ། ཕྱག་གཡས་དང་པོ་ན་རྡོ་རྗེ། འོག་མ་ན་རྨ་བྱའི་སྒྲོ་བསྣམས་པའོ། །ཐ་མ་ན་མདའ་བསྣམས་པའོ། །གཡོན་གྱི་དང་པོ་ན་རིན་པོ་ཆེ། བར་མ་ན་ཞགས་པ། ཐ་མ་ན་གཞུ་བསྣམས་པའོ། །དུག་གི་མེ་ཏོག་གི་ན་བཟའ་གསོལ་བ། ཞི་བའི་ཚུལ་དུ་བཞུགས་པའོ། །རིག་སྔགས་ཀྱི་གསང་སྔགས་ནི་འདི་ལྟ་སྟེ། འོག་ཏུ་བལྟའོ། །བཀའ་འདི་ནི་ཀཱི་ར་ཏི་མུ་ལེ་ལ་སོགས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་དུག་བཅོམ་པའི་གནས་སྐབས་ཏེ་བདུན་པའོ།། །།རྐང་གཉིས་ཁྱེད་ཅག་བདེ་ལེགས་ཤོག །ཅེས་བྱ་བ་ནི་འགྲོ་བ་རིགས་དྲུག་ལ་
ལྷའི་སྡུག་བསྔལ་ལ་སོགས་པ་དེ་ཡང་བདེ་ལེགས་སུ་འགྱུར་ཏེ། དེ་བཞིན་དུ་མི་ལ་སོགས་པའི་སེམས་ཅན། རྐང་བཞི་ཁྱེད་ཅག་བདེ་ལེགས་ཤོག །ཅེས་བྱ་བ་ནི་དུད་འགྲོ་ལ་སོགས་པའི་སེམས་ཅན་རྣམས་དང་སྟེ། སྡུག་བསྔལ་ནི་གཅིག་གིས་གཅིག་ཟ་བའི་སྡུག་བསྔལ་རྣམས་ཏེ། དེ་ཡང་ཞི་བར་བྱས་ཤིང་ཡི་དགས་རྐང་བཞི་པ་རྣམས་ཀྱི་སྡུག་བསྔལ་ཡང་ཞི་བར་བྱས་སོ། །ལམ་དུ་ཞུགས་རྣམས་བདེ་ལེགས་ཤོག །ཅེས་བྱ་བ་ནི་གང་ཟག་འདི་ལ་གུས་པར་བྱེད་པ་གང་དང་གང་དུ་ཕྱིན་པ་དེར་བདེ་ཞིང༌། སླར་ལོག་ཀྱང་བདེ་བའོ། །ཕྱིར་འོང་དག་ཀྱང་བདེ་ལེགས་ཤོག །ཅེས་བྱ་བ་ནི་རང་གི་ཁྱིམ་དུ་སླེབས་ནས་ཀྱང་བདེ་བར་གྱུར་ཅིག །ལུས་ཐམས་ཅད་ཀྱང་ནད་དང་བྲལ་བར་འགྱུར་རོ། །མཚན་མོ་བདེ་ལེགས་ཉིན་བདེ་ལེགས། །ཉི་མའི་གུང་ལ་བདེ་ལེགས་ཤིང༌། །ཁྱེད་ཅག་ཀུན་དུ་བདེ་ལེགས་ཤོག །ཅེས་བྱ་བ་ནི་ཉལ་བའི་དུས་སུ་ཡང་རྨི་ལམ་དགེ་བར་རྨི་ཞིང༌། མི་དགེ་བ་རྣམས་མི་རྨི། དེ་བཞིན་དུ་ཉིན་མོ་ཡང་དགེ་བའི་སེམས་སུ་གནས་ཤིང༌། ཉོན་མོངས་པ་རྣམས་མི་སྐྱེ་བའོ། །དེ་བཞིན་དུ་ཉི་མ་ཕྱེད་ཀྱང་ཡིན་ནོ། །དེ་བཞིན་དུ་ཉིན་མཚན་ཡང་ཡིན་ནོ། །དེ་དག་སྡིག་པར་མ་གྱུར་ཅིག །ཅེས་བྱ་བ་ནི་གང་ཟག་འདི་ལ་གནས་པ་ནི་སྐྱེ་བ་བདུན་དུ་ཚེ་རབས་དྲན་ཞིང༌། འདིའི་ནུས་པས་སྡིག་པས་མི་གོས་པའོ། །ཉི་མ་ཐམས་ཅད་དགེ་བ་ཡིན། །ཞེས་བྱ་བ་ནི་རིག་སྔགས་ཀྱི་ནུས་པས་མི་དགེ་བ་ལས་སྐྱེས་ཀྱང་དགེ་བར་འགྱུར་རོ། །རྒྱུ་སྐར་ཐམས་ཅད་བཟང་པོ་ཡིན། །ཞེས་བྱ་བ་ནི་མི་བཟང་བ་ནི་སྐག་དང་བྲ་ཉེའོ། །འབྲིང་པོའི་མཆུ་དང་སྣུབས་སོ། །དེ་ལས་སྐྱེས་པས་ཀྱང་རིག་སྔགས་ཀྱི་གཟི་བརྗིད་ཀྱིས། རྒྱུ་སྐར་ཐམས་ཅད་བཟང་པོའོ། །སངས་རྒྱས་ཐམས་ཅད་རྫུ་འཕྲུལ་ཆེ། །ཞེས་བྱ་བ་ནི་འདས་པ་དང་མ་འོངས་པ་དེ་ལྟར་ཡོད་པའི་གཟི་བརྗིད་ཀྱི་སྟོབས་ཀྱི་རྫུ་འཕྲུལ་གྱིས་སེམས་ཅན་ཐམས་ཅད་བདེ་བའོ། །ཡང་ན་ནམ་མཁའ་བཞིན་དུ་རྫུ་འཕྲུལ་གྱིས་ཁྱབ་པའོ། །དགྲ་བཅོམ་ཐམས་ཅད་ཟག་པ་ཟད། །ཅེས་བྱ་བ་ནི། བདུད་བཞི་བཅོམ་ཞིང་བག་ཆགས་ཀྱི་སྒྲིབ་
པས་མ་གོས་པ་སྟེ། དེ་བཞིན་དུ་ཉན་ཐོས་ཀྱི་རྫུ་འཕྲུལ་དང་ལྡན་པའོ། །བདེན་པའི་ཚིག་འདིས་ཀུན་དུ་བདེ་ལེགས་སུ་གྱུར་ཅིག་ཅེས་བྱ་བ་ནི། ཡང་དག་པར་རྫོགས་པའི་སངས་རྒྱས་རྣམས་ཀྱི་བཀའ་བདེ་ན་པ་དང༌། རིག་སྔགས་གྱི་གཟི་བརྗིད་ཀྱི་སྟོབས་ཀྱིས། ཀུན་ནས་ཀུན་དུ་བདེ་ལེགས་སུ་འགྱུར་བའོ། །དེ་བཞིན་གཤེགས་པས་གསུངས་པའི་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་ཞེས་བྱ་བ་ནི་རྣམ་པར་གཟིགས་དང༌། གཙུག་ཏོར་ཅན་དང༌། ཐམས་ཅད་སྐྱོབ་དང༌། ལོག་པར་དད་སེལ་དང༌། གསེར་ཐུབ་དང༌། འོད་སྲུངས་ལ་སོགས་པའི་འདས་པའི་སངས་རྒྱས་གངྒཱའི་ཀླུང་གི་བྱེ་མ་སྙེད་བྱེ་བ་བརྒྱད་ཁྲི་བཞི་སྟོང་རྣམས་ཀྱིས་ཀྱང༌། རྗེས་སུ་ཡི་རང་ཞིང་གསུངས་པ། དེ་བཞིན་དུ་མ་འོངས་པ་རྣམས་ཀྱང་བྱམས་པ་ལ་སོགས་པའོ། །ད་ལྟར་ཤཱཀྱ་ཐུབ་པས་གསུངས་ཤིང་རྗེས་སུ་ཡི་རང་བའོ། །དེ་རྣམས་ཀྱི་བཀའ་ནས་གསུངས་ཏེ། གཟི་བརྗིད་ཆེ་ཞིང་འབྱུང་པོ་རྣམས་ཀྱི་གཉེན་པོའོ། །བདག་ལ་སྲུང་བ་གྱིས་ཤིག་ཅེས་བྱ་བ་ནི་གང་ཟག་གུས་པར་བྱེད་པ་སྦ་བ་དང་ཞེས་བྱ་བ་ནི། སྡུག་བསྔལ་ཐམས་ཅད་ལས་གྲོལ་འདོད་པས་སྦ་བའོ། །ཡོངས་སུ་བསྐྱབ་པ་དང་ཞེས་བྱ་བ་ནི། འགྲོ་བ་རིགས་དྲུག་གི་སྡུག་བསྔལ་ལས་སྐྱོབ་པ་དང༌། ཡོངས་སུ་གཟུང་བ་དང་ཞེས་བྱ་བ་ནི། མི་དགེ་བཅུ་བོར་ནས། དགེ་བཅུ་འཛིན་པའོ། །ཡོངས་སུ་བསྐྱད་པ་དང་ཞེས་བྱ་བ་ནི། དགེ་བའི་རྩ་བ་ཅི་བྱས་པ་རྒྱ་ཆེར་འཕེལ་བའོ། །ཞི་བ་དང་ཞེས་བྱ་བ་ནི། བར་ཆད་མེད་ཅིང་དགེ་བའི་རྩ་བ་ཅི་བྱས་པ་གང་ཡང་ཞི་བར་འགྱུར་ཞིང་བསམ་པ་འགྲུབ་པའོ། །བདེ་ལེགས་སུ་འགྱུར་བ་དང་ཞེས་བྱ་བ་ནི། ཚེ་ད་ལྟར་ཡང་བདེ་བས་ཏེ། དེ་བཞིན་དུ་ཕྱི་མ་ཡང་བདེ་བའོ། །ཆད་པ་སྦང་བ་དང་ཞེས་བྱ་བ་ནི། རྒྱལ་པོ་དང༌། འབྱུང་པོ་ཡིན་ཏེ། དེ་ལ་སོགས་པའི་ཆད་པ་ཐམས་ཅད་སྤོང་བ་ཡིན་ནོ། །མཚོན་ཆ་སྦང་བ་དང་ཞེས་བྱ་བ་ནི། དཔེར་ན་གཡུལ་དུ་ཞུགས་པའི་དགྲ་ལས་རྒྱལ་བར་འགྱུར་རོ། །དུག་གཞིལ་བ་དང་ཞེས་བྱ་བ་ནི། དུག་འཐུངས་པ་དང་དུག་ཟོས་པ་དང༌། ཕོལ་མིག་དང་གཡན་པ་དང་མེ་དཔལ་ལ་སོགས་པའི་དུག་
ཐམས་ཅད་འབྱིན་པའོ། །དུག་གསད་པ་དང་ཞེས་བྱ་བ་ནི་འགྲོ་བའི་དུག་དང་བསྡད་པའི་དུག་དང་བྱེད་པའི་དུག་དང་གསུམ་བས་ལ་ནས་ཕྱི་ནས་དུག་ནད་མི་ལྡང་བའོ། །མཚམས་གཅད་པ་དང་ཞེས་བྱ་བ་ནི། རིག་སྔགས་འདིས་ཕྱོགས་མཚམས་སྟེང་འོག་ཐམས་ཅད་རིག་སྔགས་ཀྱི་ནུས་པས་འབྱུང་པོ་རྣམས་འོང་མི་ནུས་པའོ། །ས་བཅིང་བ་གྱིས་ཤིག་ཅེས་བྱ་བ་ནི་ས་གཡོ་བའི་སྡུག་བསྔལ་ཡང་མི་འབྱུང་སྟེ། གཞན་ཡང་རི་དང་ཁང་པ་ལ་སོགས་པ་ཡང་མི་རྡིབ་པའོ། །ལོ་བརྒྱ་འཚོ་བར་གྱུར་ཅིག་ཅེས་བྱ་བ་ནི། ཚེ་ཐུང་བ་རིང་བར་བྱེད་ཅིང་ནད་ཐམས་ཅད་དང་བྲལ་ནས་བདེ་བར་གནས་པའོ། །སྟོན་བརྒྱ་མཐོང་བར་ཤོག་ཤིག་ཅེས་བྱ་བ་ནི། བཟའ་བ་དང་བཏུང་བ་ཕུན་སུམ་ཚོགས་ཤིང༌། མ་ཤིའི་བར་དུ་གཡོག་དང་ལྡན་ཞིང་བུ་ཚ་ཐམས་ཅད་དང་ལྡན་པའོ། །ཀུན་དགའ་བོ་ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་ཀྱིས། སེམས་ཅན་གྱི་དོན་ལ་བཀའ་སྩལ་བའོ། །གནོད་སྦྱིན་གང་དག་རྒྱ་མཚོ་ལ་གནས་པའི་གནོད་སྦྱིན་ཆེན་པོ་དག་དང་ཞེས་བྱ་བ་ནི། བསམ་གྱིས་མི་ཁྱབ་པ་རྒྱ་མཚོ་ལ་གནས་པའི་འབྱུང་པོ་ལ་སོགས་པའོ། །གང་དག་རིའི་རྒྱལ་པོ་རི་རབ་དང་ཞེས་བྱ་བ་ནི་དེ་བཞིན་དུ་རྒྱལ་པོ་བཞི་ལ་སོགས་པ་གནོད་སྦྱིན་གྱི་རྒྱལ་པོ་ཉི་ཤུ་རྩ་བརྒྱད་དང༌། མཐུ་ཆེན་སུམ་ཅུ་རྩ་གཉིས་སོ། །གང་དག་རིའི་རྒྱལ་པོ་གཞན་རྣམས་དང་ཞེས་བྱ་བ་ནི། རིའི་རྒྱལ་པོ་མ་ལ་ཡ་དང༌། དཔལ་གྱི་རི་དང༌། རི་ནག་པོ་ལ་སོགས་པའོ། །ཡང་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རིའི་རྒྱལ་པོ་རི་རབ་དང་བཅས་པའི་གནོད་སྦྱིན་འབྱུང་པོ་རྣམས་སོ། །འབྲོག་རྣམས་དང་ཞེས་བྱ་བ་ནི། དེ་ལ་གནས་པའི་གནོད་སྦྱིན་འབྱུང་པོ་རྣམས་ཏེ། ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྟོང་ལ་གནས་པའོ། །འབྲོག་ཆེན་པོ་དང་ཞེས་བྱ་བ་ནི་དེ་བས་ཀྱང་ཆེ་བས་ན་ཆེན་པོ་སྟེ། འབྱུང་པོ་རྣམས་ཀྱང་དེ་བས་ཀྱང་ཆེ་བའོ། །ཀླུང་རྣམས་དང་ཞེས་བྱ་བ་ནི། གངྒཱ་དང༌། སིནྡྷུ་དང༌། སི་ཏ་དང༌། པཀྵུ་དང༌། ཆུ་བོ་ཆེན་པོ་ནཻ་རཉྫ་ར་ལ་སོགས་པ་དེ་ལྟ་བུའི་ཆུ་ཀླུང་རྣམས་ལ་
ཡོད་པའི་གནོད་སྦྱིན་འབྱུང་པོ་རྣམས་སོ། །ཀླུ་ཆེན་པོ་རྣམས་དང་ཞེས་བྱ་བ་ནི་ཕྱིའི་རྒྱ་མཚོ་ཆེན་པོ་སྟེ། དེ་ལ་གནས་པའི་ཀླུ་དང་གནོད་སྦྱིན་དང་ས་བདག་ལ་སོགས་པའོ། །སྨན་ལྗོངས་རྣམས་དང་ཞེས་བྱ་བ་ནི། རྫིང་བུ་རྣམས་ཡིན་ཏེ་དེ་ལ་གནས་པའི་འབྱུང་པོ་ས་བདག་དང་ས་སྲིན་ལ་སོགས་པ་སྟོང་གསུམ་གྱི་སྟོང་ཆེན་པོ་ལ་གནས་པའི་རྫིང་བུ་རྣམས་སོ། །སྨན་ལྗོངས་ཆེན་པོ་རྣམས་དང་ཞེས་བྱ་བ་ནི། དེ་བས་ཀྱང་ཆེ་བས་ན་ཆེན་པོའོ། །འབབ་ཆུ་རྣམས་དང་ཞེས་བྱ་བ་ནི་བ་ལང་སྤྱོད་དང་དབྱངས་ལྡན་དང༌། སྦྲང་རྩིའི་བློ་གྲོས་ལ་སོགས་པའི་འབབ་ཆུ་ལ་གནས་པའི་གནོད་སྦྱིན་འབྱུང་པོ་རྣམས་སོ། །ལྟེང་ཀ་རྣམས་དང་ཞེས་བྱ་བ་ནི། ཆུའི་ཁྲོན་པ་རྣམས་ཏེ་དེ་ལ་སོགས་པ་ཆུ་མིག་ལ་གནས་པའི་ས་སྲིན་དང་ས་བདག་འབྱུང་པོ་གནོད་སྦྱིན་རྣམས་གནས་པའོ། །ལུ་མ་རྣམས་དང་ཞེས་བྱ་བ་ནི་དེའི་ལྟེང་ཀ་ན་གནས་པའི་མཚོ་ཆེན་པོ་སྟེ། དེ་ཀླུ་ལས་བབ་པས་ན་ལུ་མའོ། །དེ་ལ་གནས་པའི་འབྱུང་པོ་དང༌། ཀླུའི་རྒྱལ་པོ་རྣམས་སོ། །རིའི་ཕུག་རྣམས་དང་ཞེས་བྱ་བ་ནི་སྟོང་བར་དུ་གནས་པའི་རི་རྣམས་ལ་རྒྱུ་བའི་ཡི་དགས་རྣམས་སོ། །ཡང་ན་གདོང་པ་ལྟ་བར་མི་ནུས་པའི་འབྱུང་པོ་རྣམས་སོ། །དུར་ཁྲོད་རྣམས་དང་ཞེས་བྱ་བ་ནི་དུར་ཁྲོད་ནི་ངང་པ་དང༌། རྨ་བྱའི་སྒྲོ་དང༌། གསལ་ཤིང་དང༌། རོ་ལངས་དང༌། མེས་བསྲེགས་པ་ལ་སོགས་པའོ། །དེ་ལ་གནས་པ་ནི་གནོད་སྦྱིན་དང་འབྱུང་པོ་ལ་སོགས་པའོ། །དུར་ཁྲོད་ཆེན་པོ་རྣམས་དང་ཞེས་བྱ་བ་ནི་བསིལ་བའི་ཚལ་དང༌། ཀོ་ལ་ཧ་ར་དང༌། འབྱུང་པོ་རོ་ལངས་ལ་སོགས་པའི་དུར་ཁྲོད་ཆེན་པོ་རྣམས་དང༌། དེ་བས་ཀྱང་ཆེ་ཞིང་འབྱུང་པོ་རྣམས་ཆེ་བའོ། །བཞི་མདོ་རྣམས་དང་ཞེས་བྱ་བ་ནི་ལམ་གྱི་རྒྱ་གྲམ་ན་གནས་པ་སྟེ། དེ་ལ་གནས་པའི་འབྱུང་པོའོ། །གྲོང་རྣམས་དང་ཞེས་བྱ་བ་ནི། དེ་ནི་ཆུ་ལ་གནས་པའི་འབྱུང་པོ་རྣམས་ཏེ། མ་རུངས་པ་ཐམས་ཅད་བྱེད་པ། སེམས་ཅན་ལ་གནོད་ཅིང་གྲོང་ལ་རྒྱུ་བའོ། །གྲོང་ཁྱེར་རྣམས་དང་ཞེས་བྱ་བ་ནི་དེ་བས་ཀྱང་ཆེ་བ་སྟེ། འབྱུང་པོ་ཡང་དེ་བས་ཆེ་བའོ། །ལྷ་རྣམས་དང་ཞེས་བྱ་བ་ནི་འབྲོག་གི་འབྲོག་གནས་ཏེ། དེ་ལ་བ་ལང་གནས་
བའི་གནས་སོ། །དེ་ན་གནས་པའི་གནོད་སྦྱིན་འབྱུང་པོ་རྣམས་སོ། །སྐྱེད་མོས་ཚལ་རྣམས་དང་ཞེས་བྱ་བ་ནི། ཕོ་དང་མོ་རྒྱུ་བའི་གནས། དེ་བཞིན་དུ་འབྱུང་པོ་ཡང་ཕོ་མོ་རྒྱུ་བའི་གཟུགས་སུ་བྱས་ནས་རྒྱུ་བར་བྱེད་པའོ། །ནགས་རྣམས་དང་ཞེས་བྱ་བ་ནི་སྲིན་པོ་ཡི་དགས་རྣམས་རྒྱུ་བ་སྟེ། དེ་ལ་གནས་པའི་མ་རུངས་པ་རྣམས་སོ། །ནགས་ཚལ་རྣམས་དང་ཞེས་བྱ་བ་ནི་ཆུའི་བར་ན་གནས་པ་སྟེ། དེའི་ནང་དུ་རྒྱུ་བའི་འབྱུང་པོ་རྣམས་ཏེ། ཡང་ན་རྒྱ་མཚོའི་བར་ན་གནས་པའི་འབྱུང་པོ་རྣམས་སོ། །ལམ་རྣམས་དང་ཞེས་བྱ་བ་ནི། འགྲོ་འདུག་བྱེད་པ་ལ་འཚེ་བར་བྱེད་ཅིང་མ་རུངས་པའི་འབྱུང་པོ་སྟེ། དེ་བཞིན་དུ་རྟག་ཏུ་རྒྱུ་བའོ། །ལམ་གོལ་བ་དག་ན་གནས་པ་དང་ཞེས་བྱ་བ་ནི། སེམས་ཅན་ལམ་ལོག་པར་འཁྲིད་ཅིང་ལམ་ལོག་པར་སྟོན་པ་རྣམས་སོ། །ཀུན་དགའ་བོ་ཞེས་བྱ་བ་ནི། བཅོམ་ལྡན་འདས་ཀྱིས་ཀུན་དགའ་བོ་ལ་ཡང་ནས་ཡང་དུ་གསུངས་པའོ། །གནོད་སྦྱིན་གང་དག་ལྕང་ལོ་ཅན་གྱི་འཁོར་ན་གནས་པ་དེ་དག་གིས་ཀྱང་ཞེས་བྱ་བ་ནི་གནོད་སྦྱིན་གྱི་དེད་དཔོན་རྣམ་ཐོས་སྲས་ཀྱི་འཁོར་དང་བཅས་པ་དེ་དག །ཕོ་བྲང་དེ་ན་གནས་པའི་གནོད་སྦྱིན་འཁོར་བཅས་རྣམས་སོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི་གང་ཟག་དད་པ་སྐྱེས་པ་རྣམས་དང༌། རིག་སྔགས་འདི་འཆང་བ་དང༌། འཆང་དུ་ཡོད་པ་དང༌། ཀློག་པ་དང༌། རྗེས་སུ་ཡི་རང་བ་དང༌། སྒོམ་པ་དང༌། རྒྱ་ཆེར་སྤེལ་བ་དང༌། དེ་རྣམས་ལ་སོགས་པ་ཡང་དག་པར་སྲུང་བར་བྱེད་པའོ། །ལོ་བརྒྱ་འཚོ་བར་གྱུར་ཅིག་ཅེས་བྱ་བ་ནི། རིག་སྔགས་འདིའི་ནུས་པས་ལོ་བརྒྱ་ལོན་པར་གྱུར་ཀྱང༌། གཞོན་ནུའི་ཚུལ་དུ་བཞུགས་ཤིང་ནད་རྣམས་ཐམས་ཅད་དང་བྲལ་བའོ། །སྟོན་བརྒྱ་མཐོང་བར་ཤོག་ཤིག་ཅེས་བྱ་བ་ནི། དགེ་བའི་དུས་སུ་དགེ་བ་ནུས་ཤིང༌། དེ་བཞིན་དུ་ཟ་བ་དང་འཐུང་བ་ཡང་ནུས་པའོ། །རིག་སྔགས་འདི་ཡང་སེམས་ཅན་ཐམས་ཅད་ལ་ཐུགས་རྗེ་ཆེ་ཞིང་གཟུགས་སྐུར་སྣང་བའོ། །གཟུགས་སྐུ་དེ་ཡང་ཐབས་ཤེས་རབ་གཉིས་སུ་མེད་པ། ཞལ་
གསུམ་ཕྱག་བཞི་པ་སྐུ་མདོག་མཐིང་ནག་ཏུ་བཞུགས་པ། གཡས་དཀར་བ་གཡོན་དམར་བ། ཁྲོ་མོ་དབུ་སྐྲ་སེར་པོ་སྦྲུལ་གྱིས་བཅིངས་པ། རིན་པོ་ཆེའི་དབུ་རྒྱན། སྤྱན་གསུམ་པ། ཡན་ལག་སྦྲུལ་གྱིས་བརྒྱན་པ། ཕྱག་གཡས་ན་རལ་གྲི་དང་རྡོ་རྗེ་འཛིན་པ། གཡོན་སྡིགས་མཛུབ་དང་ཞགས་པ་དྲིལ་བུའོ། །གཡས་བརྐྱང་བ། གཡོན་བསྐུམ་པ། ཞབས་ཀྱིས་གནོད་སྦྱིན་ཕོ་མོ་མནན་པ། པདྨའི་སྟེང་དུ་ཉི་མའི་གདན་ལ་བཞུགས་པ། ཉི་མའི་འོད་དང་ལྡན་པའོ། །རིག་སྔགས་ཀྱི་གསང་སྔགས་འདི་ལྟ་སྟེ། འབྱུང་པོ་རྣམས་ཀྱི་སྙིང་པོ་ནི་ཧ་རེ་ནི་ལ་སོགས་པའོ། །ཀུན་དགའ་བོ་ཞེས་བྱ་བ་ནི་ཤཱཀྱ་ཐུབ་པས་ཡང་ནས་ཡང་དུ་གསུངས་པའོ། །ཤར་ཕྱོགས་ན་དྲི་ཟའི་རྒྱལ་པོ་ཡུལ་འཁོར་སྲུང་དྲི་ཟ་ཐམས་ཅད་ཀྱི་བདག་པོ་ཞེས་བྱ་བ་ནི། རི་རབ་ཀྱི་ལྕོག་ཤར་ཕྱོགས་ན་ཡོད་པ། ཞལ་གཅིག་ཕྱག་གཉིས་པ། སྐུ་མདོག་དཀར་པོ། །ཕྱག་གཡས་ན་འཁོར་ལོ་བསྣམས་པ། གཡོན་པི་ཝང་བསྣམས་པ། རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། པདྨའི་གདན་ལ་བཞུགས་པའོ། །སེམས་ཅན་ཐམས་ཅད་ཀྱི་དོན་བྱེད་པ། འཇིག་རྟེན་གྱི་ཁམས་ཤར་ཕྱོགས་ན་གནས་པའོ། །འཁོར་དྲི་ཟ་སྟོང་ཕྲག་དུ་མ་ཡོད་པ་ཞེས་བྱ་བ་ནི། འཁོར་གྱི་མཚན་མ་ནི། གླུ་ལེན་ཞིང་ནི་བྲོ་བརྡུང་སྟེ། །རྒྱན་རྣམས་ལ་ཡང་དགའ་བར་བགྱིད། །བརྐམ་པ་མ་མཆིས་མང་བར་སྨྲ། དགོད་པར་བགྱིད་ཅིང་ཁྲོ་བར་འགྱུར། །སྐོམ་པར་འགྱུར་ལ་མིག་དམར་ཏེ། །རྟག་ཏུ་རིམས་ཀྱིས་འདེབས་པར་བགྱིད། །མིག་ཀྱང་འབྱེད་པར་མི་བགྱིད་དེ། །རྒྱབ་ཀྱིས་ཕྱོགས་ཤིང་ཉལ་བར་བགྱིད། །འཁོར་འབུམ་ཕྲག་དུ་མ་དེ་དག་ཀྱང་སེམས་ཅན་ལ་དེ་བཞིན་དུ་གནོད་པ་བྱས་ཤིང༌། རང་གི་མཚན་ཉིད་ཀྱང་དེ་བཞིན་ནོ། །དྲི་ཟ་རྣམས་ལ་དབང་བྱེད་དུ་འཇུག་པ་གནས་ཏེ་ཞེས་བྱ་བ་ནི། དེ་དང་ལྡན་པ་དྲི་ཟ་རྣམས་ལ་རྒྱལ་པོ་ཆེན་པོ་ཡུལ་འཁོར་སྲུང་དབང་དུ་འདུས་ཤིང༌། གཞན་སེམས་ཅན་རྣམས་ལ་གནོད་པར་མི་བྱེད་པའོ། །ཤར་ཕྱོགས་ཀྱི་རྒྱལ་པོའམ་གདོན་རྣམས་གནོད་པར་འགྱུར་ན། ཚེས་བཅུ་བཞི་འམ་ཉ་འམ་བརྒྱད་ལ་སོགས་པ་ལ་མེ་ཏོག་གམ་སྤོས་
སམ་མར་མེའམ་དྲིའམ། ལྷ་བཤོས་སམ་མཆོད་པའི་རྩས་རང་གིས་ཅི་རིགས་པ་བསོགས་ལ། རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འམ། ཤར་ཕྱོགས་ཀྱི་རྒྱལ་པོ་ཡུལ་འཁོར་སྲུང་ལ་སོགས་པ། ཤར་ཕྱོགས་ན་གནས་པའི་རྒྱལ་པོ་དང་གདོན་རྣམས་མཆོད་པར་བགྱིའོ། །ཡང་རོལ་མོའི་རྫས་ནི་གདུགས་དང་བ་དན་དང་རྒྱལ་མཚན་ལ་སོགས་པའི་རོལ་མོའི་རྫས་སོ། །གཏོར་མའི་རྫས་ལ་ནི། བུ་རམ་དང་བསྲེས་པའི་ཞོ་དང༌། ཞོ་ཟན་དང༌། འབྲས་ཀྱི་ཆན་དང༌། འབྲས་ལས་བྱས་པའི་ཁུར་བ་དང༌། དེ་ལ་སོགས་པ་ཅི་རིགས་པ་བསོགས་ལ་དྲི་སྣ་ཚོགས་ཞིམ་པོས་མཆོད་ཅིང༌། མེ་ཏོག་དཀར་པོའི་ཕྲེང་བ་དང༌། དོག་ས་ལ་མེ་ཏོག་དཀར་པོ་བཀྲམ་ལ། ཡང་དག་པར་མཆོད་པར་བགྱིའོ། །གང་ཤར་ཕྱོགས་སྲུང་ཞིང་ཡོངས་སུ་སྐྱོབ་པར་བྱེད་པ་དེ་ཡང་ཞེས་བྱ་བ་ནི། ས་དང་པོའི་བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་དོན་བྱེད་པ་དེ་ལྟ་བུའི་ཡུལ་འཁོར་སྲུང་གི་རྒྱལ་པོ། ཤར་ཕྱོགས་ཀྱི་སེམས་ཅན་རྣམས་སྐྱོང་བའོ། །བུ་དང་བཅས་ཞེས་བྱ་བ་ནི། རྒྱལ་པོ་ཆེན་པོ་བཞི་དང་འཁོར་རྣམས་ཀྱིའོ། །ཆ་བོ་དང་བཅས། སྤུན་དང་བཅས། བློན་པོ་དང་བཅས། དེད་དཔོན་དང་བཅས། མངག་པ་དང་བཅས། ཕོ་ཉ་དང་བཅས། གཡོག་དང་བཅས། འཁོར་དང་བཅས་པས་ཞེས་བྱ་བ་ནི། དེ་དག་རྣམས་ཀྱིས་སེམས་ཅན་གྱི་དོན་བྱས་ཤིང་རྒྱལ་པོ་དང༌། འཁོར་རྣམས་ཀྱི་ཚ་བོ་ལ་སོགས་པའི་འབུམ་ཕྲག་དུ་མར་གནས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་ཤིག་ཅེས་བྱ་བ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ནི། ཞལ་གཅིག་ཕྱག་གཉིས་པ། སྐུ་མདོག་དཀར་མོ། ཕྱག་གཡས་ན་རལ་གྲིའོ། །གཡོན་སྡིགས་མཛུབ་དང་རྨ་བྱའི་སྒྲོ་བསྣམས་པའོ། །སངས་རྒྱས་ལྔའི་དབུ་རྒྱན་ཅན། སྤྱན་གསུམ་པ། རྒྱན་ཐམས་ཅད་རིན་པོ་ཆེས་བརྒྱན་པ། ལོ་བཅུ་གཉིས་མའི་ཆ་བྱད་ཅན། ཞི་བར་བཞུགས་ཤིང་པདྨའི་སྟེང་ན་ཟླ་བའི་གང་ན། འོད་ཀྱང་དེ་བཞིན་ཏེ། ཡེ་ཤེས་ལྔའི་རང་བཞིན་ཅན།
མཚོན་བྱེད་ནི་ཤེས་རབ་སྟེ། མཚོན་པ་ནི་རིག་སྔགས་ཀྱི་རྒྱལ་མོ་བདག་ཉིད་དོ། །ཆོས་ཀྱི་དབྱིངས་ཀྱི་ཡེ་ཤེས་ཀྱི་གཟུགས་ཀྱི་ཕུང་པོ་སའི་ཁམས་མིག་གི་སྐྱེ་མཆེད་དོ། །དེ་ལྟ་བུའི་རིག་སྔགས་ཀྱི་རྒྱལ་མོ་གང་ཟག་བདག་གིས་འཆང་བར་འགྱུར་ན། ཡང་དག་པར་སྲུང་ཞིང་སྡུག་བསྔལ་ཐམས་ཅད་དང་བྲལ་བའོ། །སྦ་བ་དང་ཞེས་བྱ་བ་ནི་མ་རུངས་པ་རྣམས་ཀྱིས་གླགས་ཚོལ་བ་ལ་སྦ་བའོ། །ཡོངས་སུ་བསྐྱབ་པ་དང་ཞེས་བྱ་བ་ནི། ནད་ཐམས་ཅད་དང་མ་རུངས་པ་རྣམས་ཀྱིས་བཟུང་བ་ལས་བསྐྱབ་པའོ། །ཡོངས་སུ་གཟུང་བ་དང་ཞེས་བྱ་བ་ནི། མ་རིག་པའི་སེམས་ཅན་རྣམས་ཀྱིས་གཟུང་བར་འདོད་པ། རིག་སྔགས་ཀྱི་གཟི་བརྗིད་ཀྱིས་བཟུང་ནས་གླགས་མི་རྙེད་པའོ། །ཡོངས་སུ་བསྐྱང་བ་དང་ཞེས་བྱ་བ་ནི། རིག་སྔགས་ཀྱི་གཟི་བརྗིད་ཀྱིས་གང་གི་འཇིགས་པ་དང་སྡུག་བསྔལ་ཐམས་ཅད་དང་བྲལ་ཞིང་འཇིགས་པ་ཐམས་ཅད་དང་བྲལ་བ་སྟེ། རྒྱ་ཆེན་བསྐྱང་བས་ན་ཡོངས་སུ་བསྐྱང་བ་དང༌། ཞི་བ་དང་བདེ་ལེགས་སུ་འགྱུར་བ་དང་ཞེས་བྱ་བ་ནི་ཞི་བ་ནི་སྡུག་བསྔལ་ཐམས་ཅད་ཞི་བ་སྟེ། དེ་ཉེ་བར་བཞག་པས་ན་བདེ་བའོ། །བདེ་ལེགས་སུ་འགྱུར་བ་དང་ཞེས་བྱ་བ་ནི་བདེ་བ་ཕུན་སུམ་ཚོགས་ཤིང་སྡུག་བསྔལ་ཐམས་ཅད་དང་བྲལ་ཞིང་ནམ་སྐྱེས་པའི་དུས་སུ་ཡང་བདེ་བའོ། །ཆད་པ་སྤང་བ་དང་ཞེས་བྱ་བ་ནི་མ་རུངས་པའི་གདོན་གྱིས་ཆད་པ་གཅོད་པར་འདོད་པ་ལ། དེའི་གཟི་བརྗིད་ཀྱིས་སྦྲང་བའོ། །མཚོན་ཆ་སྦང་བ་དང་ཞེས་བྱ་བ་ནི། གཞན་རྣམས་ཀྱིས་མཚོན་བཏབ་ནས། མི་བདེ་བ་དང་མི་ཕོག་པའི་ཕྱིར་ན་སྤང་བའོ། །དུག་གཞིལ་བ་དང་ཞེས་བྱ་བ་ནི། མཛེ་དང༌། ཕོལ་མིག་དང༌། གཡན་བ་དང༌། ཝ་བ་དང༌། ཤ་བཀྲ་དང༌། མེ་དབལ་ལ་སོགས་པ་མཛེ་རིགས་བཅོ་བརྒྱད་སེལ་བའོ། །དུག་གསད་པ་དང་ཞེས་བྱ་བ་ནི་དེ་རྣམས་མི་ལྡང་བར་བྱ་བའི་ཕྱིར་ན་གསད་པའོ། །མཚམས་གཅད་པ་དང་ཞེས་བྱ་བ་ནི། གླགས་ཚོལ་བ་རྣམས་ཀྱིས་གླགས་མི་རྙེད་དེ། རིག་སྔགས་ཀྱི་གསང་སྔགས་གར་བཞག་པའི་སར། འབྱུང་པོ་རྣམས་ཀྱིས་འོང་མི་ནུས་པའོ། །ས་བཅིང་བ་གྱིས་ཤིག་ཅེས་བྱ་བ་ནི་རིག་སྔགས་ཀྱིས་ས་
ལ་རེག་ནས་ས་བཅིང་བར་གྱུར་ན་རྡོ་རྗེའི་ས་གཞི་དང་ལྡན་པའོ། །ལོ་བརྒྱ་མཚོ་བར་གྱུར་ཅིག་ཅེས་བྱ་བ་ནི། ནད་ཐམས་ཅད་དང་བྲལ་ཞིང་བདེ་བར་གནས་པའོ། །སྟོན་བརྒྱ་མཐོང་བར་ཤོག་ཤིག་ཅེས་བྱ་བ་ནི། ཕུན་སུམ་ཚོགས་ཤིང་བདེ་བར་གནས་པའོ།། ཏདྱ་ཐཱ་ཞེས་བྱ་བ་ནི་འདི་ལྟ་སྟེ་འོག་ཏུ་བལྟའོ། །དྲི་ཟའི་སྙིང་པོ་རིག་སྔགས་ཀྱི་གསང་སྔགས་ནི། སུ་རུ་སུ་རུ་སུ་རུ་ལ་སོགས་པའོ། །ཀུན་དགའ་བོ་ཞེས་བྱ་བ་ནི་དགེ་སློང་ས་རི་དང་སེམས་ཅན་རྣམས་ལ་བཀའ་སྩལ་པའོ། །ལྷོ་ཕྱོགས་ན་གྲུལ་བུམ་གྱི་རྒྱལ་པོ་འཕགས་སྐྱེས་པོ་ཞེས་བྱ་བ་ནི། རི་རབ་ཀྱི་ལྷོ་ཕྱོགས་ན་གནས་པ་འཇིག་རྟེན་ལྷོ་ཕྱོགས་སྐྱོང་བ། སེམས་ཅན་ཐམས་ཅད་ཀྱི་དོན་བྱེད་པ། ས་དང་པོ་ཐོབ་པ། ཞལ་གཅིག་ཕྱག་གཉིས་སྐུ་མདོག་མཐིང་ག །གཡས་དབྱུག་ཏོ། །གཡོན་རིན་པོ་ཆེ་བསྣམས་པ། རྒྱན་ཐམས་ཅད་ཀྱིས་བརྒྱན་པ། པདྨའི་གདན་ལ་བཞུགས་པ། བཞིན་མི་སྡུག་པ། ཁྲོ་བོར་གནས་པའོ། །གྲུལ་བུམ་ཐམས་ཅད་ཀྱི་བདག་པོ་འཁོར་གྲུལ་བུམ་སྟོང་ཕྲག་དུ་མ་ཡོད་པ་ཞེས་བྱ་བ་ནི། གྲུལ་བུ་མ་ཡི་དགས་ཀྱི་གདོན་རྣམས་ཀྱི་བདག་པོ་སྟེ། དེ་བཞིན་དུ་མ་མོ་རྣམས་ཀྱང་ཡིན་ནོ། །དེ་རྣམས་ཀྱིས་བཏབ་པའི་མཚན་མ་ནི། ཤིན་ཏུ་སྐོམ་གྱིས་འདེབས་པར་འགྱུར། །གཡེང་བས་བཏབ་ཅིང་ལྟ་བར་འགྱུར། །བཞིན་ཡང་དམར་པོར་གདའ་བར་འགྱུར། བསྐུམས་ནས་ས་ལ་ཉལ་བར་འགྱུར། །ཁ་དོག་ངན་ཅིང་ལུས་ཀྱང་སྐེམ། །སྐྲ་དང་སེན་མོ་རིང་བ་སྟེ། །དྲི་མ་ཅན་ལ་དྲི་མི་བདའ། །བརྫུན་དང་ཀྱལ་ཀ་སྨྲ་བར་བགྱིད། །གྲུམ་བུམ་གྱི་གདོན་འབུམ་ཕྲག་དུ་མ་གནས་པ་ནི། སེམས་ཅན་རྣམས་ལ་གནོད་པར་བགྱིད་ཅིང་རྒྱལ་པོའི་འཁོར་དུ་གནས་པའོ། །གྲུལ་བུམ་རྣམས་ལ་དབང་བྱེད་དུ་འཇུག་པའོ་ཞེས་བྱ་བ་ནི། གྲུལ་བུམ་གྱི་གདོན་དེ་རྣམས་དབང་དུ་སྡུད་ཅིང༌། སེམས་ཅན་རྣམས་ལ་འཚེ་བར་མི་བྱེད་པའོ། །དེ་རྣམས་ཀྱི་མཆོད་པའི་རྫས་ནི་གོང་དང་མཐུན་ནོ། །ཚེས་གྲངས་ཡང་གོང་དང་མཐུན་ནོ། །གཏོར་མའི་རྫས་ལ་ཁྲག་གམ་ཆང་ངམ་ཤའམ་ཉའམ་སྒོག་པའམ་ལ་ཕུག་གམ། སྲན་ཆན་ནམ་
ཁུར་བའམ་བུ་རམ་གྱི་ཐུག་པའམ། ཁྲག་གི་གཏོར་མ་མེ་ཏོག་སེར་པོའི་ཕྲེང་བ་དང༌། དོག་ས་ལ་མེ་ཏོག་བཀྲམ་ལ། ལྷོ་ཕྱོགས་ན་གནས་པའི་རྒྱལ་པོ་རྣམས་མཆོད་པར་བྱའོ། །གང་ལྷོ་ཕྱོགས་སྲུང་ཞིང་ཡོངས་སུ་སྐྱོང་བར་བྱེད་ཅིང་ཞེས་བྱ་བ་ནི། གྲུལ་བུམ་གྱི་རྒྱལ་པོ་འཕགས་སྐྱེས་པོ་རི་རབ་ཀྱི་ལྷོ་ཕྱོགས་ཡོངས་སུ་སྲུང་ཞིང༌། འཇིག་རྟེན་ཀྱི་ཁམས་རྣམས་ལ་སྲུང་བར་བྱེད་པའོ། །དེ་ཡང་བུ་དང་བཅས། ཚ་བོ་དང་བཅས། སྤུན་དང་བཅས། བློན་པོ་དང་བཅས། དེད་དཔོན་དང་བཅས། མངག་པ་དང་བཅས། ཕོ་ཉ་དང་བཅས། གཡོག་དང་བཅས། འཁོར་དང་བཅས་པས་ཞེས་བྱ་བ་ནི། རྒྱལ་པོ་ཆེན་པོ་འཕགས་སྐྱེས་པོ་དང༌། འཁོར་འབུམ་ཕྲག་དུ་མ་དང་བཅས། དེ་རྣམས་ཀྱི་བུ་དང་ཚ་བོ་ལ་སོགས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། རིག་སྔགས་ཀྱི་རྒྱལ་མོ་ནི་ཐབས་ཤེས་རབ་གཉིས་སུ་མེད་པའོ། །ཡེ་ཤེས་མཉམ་པ་ཉིད་དང་ལྡན་པ་ཚོར་བའི་ཕུང་པོའོ། །རིན་ཆེན་གྱི་རིགས་ཆུའི་ཁམས་སྣའི་སྐྱེ་མཆེད་ཡེ་ཤེས་ལྔའི་རང་བཞིན་ཞལ་གཅིག་ཕྱག་གཉིས་པ་སྐུ་མདོག་སེར་པོ། ཕྱག་གཡས་ན་རལ་གྲི་།གཡོན་ན་རྨ་བྱའི་སྒྲོ་བསྣམས་པའོ། །སངས་རྒྱས་ལྔའི་དབུ་རྒྱན་ཅན། རྒྱན་ཐམས་ཅད་རིན་པོ་ཆེས་བརྒྱན་པའོ། །སྤྱན་གསུམ་པ་ཞབས་ཕྱེད་ཀྲུང་དུ་བཞུགས་པ། ཉི་མའི་གདན་དང་འོད་དང་ལྡན་པ། དེའི་འོག་ཏུ་པདྨའི་གདན་ལ་ཁྲོ་མོར་བཞུགས་པའོ། །གང་ཟག་གང་ཞིག་འདི་ལ་གུས་པར་གྱུར་ན། རྒྱལ་པོ་བཞི་དང་འཁོར་རྣམས་ཀྱིས་ཀྱང་དེ་ལ་སྲུང་ཞིང་སྐྱོབ་པར་བྱེད་དོ། །སྦ་བ་དང་ཞེས་བྱ་བ་ལ་སོགས་པས་ནི་སྔར་བཤད་པ་བཞིན་དུ་ཤེས་པར་བྱའོ། །ཏ་དྱ་ཐཱ་ཞེས་བྱ་བ་ནི་འདི་ལྟ་སྟེ་འོག་ཏུ་བལྟས་ཏེ། འོག་ཏུ་ལྟ་བ་ནི་གང་ཞེ་ན། གྲུལ་བུམ་གྱི་གདོན་གྱི་སྙིང་པོ་རིག་སྔགས་ཀྱི་གསང་སྔགས་ནི། བེ་ལུ་ཀེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་ཀྱིས་ཀུན་དགའ་བོ་ལ་བཀའ་སྩལ་བའོ། །ནུབ་ཕྱོགས་ན་ཀླུའི་རྒྱལ་པོ་མིག་མི་བཟང་ཞེས་བྱ་བ་ནི། རི་རབ་ཀྱི་རྩེ་མོའི་ནུབ་ཕྱོགས་ཀྱི་ལྕོག་ལ་བཞུགས་ཏེ། ནུབ་ཕྱོགས་ཀྱི་འཇིག་རྟེན་སྐྱོང་བ། ཀླུ་རྣམས་
ཀྱི་བདག་པོ་ས་དང་པོ་ཐོབ་པ། བྱང་ཆུབ་ཀྱི་སེམས་དང་ལྡན་པ་རྣམས་སོ། །ཞལ་གཅིག་ཕྱག་གཉིས་པ། སྐུ་མདོག་དམར་བ། གཡས་ན་སྤྲུལ་གྱི་ཞགས་པ། གཡོན་ན་པདྨ་བསྣམས་པ། རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། པདྨའི་གདན་ལ་བཞུགས་པ། ཅུང་ཟད་ཁྲོ་བོར་བཞུགས་སོ། །ཀླུ་ཐམས་ཅད་ཀྱི་བདག་པོ་འཁོར་འབུམ་ཕྲག་དུ་མ་ཡོད་པ་ཞེས་བྱ་བ་ནི། རྒྱལ་པོ་སྤྱན་མི་བཟང་ཡང་ཀླུ་དངས་སྲིན་ས་བདག་རྣམས་ཡིན་ཏེ། དེ་རྣམས་ཀྱིས་བཏབ་པའི་མཚན་མ་ནི། སྐྱིགས་བུས་བཏབ་ཅིང་དབུགས་ཀྱང་འབྱིན། །དེ་བཞིན་དབུགས་ཀྱང་གྲང་བར་འགྱུར། །རྡུལ་ཞིང་ཁ་ཆུ་དབུ་བར་འབྱུང༌། །ཕྱི་ཕྱིར་གཉིད་ཀྱིས་ལོག་པར་འགྱུར། །ཁ་དོག་ལྡན་ཞིང་དཔའ་བ་སྟེ། དེ་བཞིན་འདར་ཞིང་རྒྱུག་པར་འགྱུར། །སེན་མོ་དག་ཀྱང་སྟོན་པར་འགྱུར། །དོག་སར་མཆིས་ཤིང་དུ་བར་བྱེད། །དེ་བཞིན་དུ་སེམས་ཅན་རྣམས་ལ་མཚན་མ་བཏབ་ནས། རང་གི་མཚན་མ་ཡང་དེ་དང་འདྲ་བའོ། །ཀླུ་རྣམས་ལ་དབང་བྱེད་དུ་འཇུག་པ་གནས་ཏེ། དེ་རྣམས་དབང་དུ་འདུས་ཤིང་འཇིག་རྟེན་ནུབ་ཕྱོགས་སོང་བ་དེ་རྣམས་མཆོད་པའི་རྫས་གོང་དང་མཐུན་ཏེ། ཚེས་གྲངས་ཀྱང་གོང་དང་མཐུན་ནོ། །གཏོར་མའི་རྫས་ནི་མངར་གསུམ་དང་དཀར་གསུམ་འོ་ཐུག་དང་གྲོ་ཆན་དང་གྲོའི་ཁུར་བ་འོ་མ་ལས་བྱས་པའི་གཏོར་མ་མེ་ཏོག་དམར་པོའི་ཕྲེང་བ་མེ་ཏོག་སིལ་མ་དོག་ས་ལ་བཀྲམ་ལ། ཀླུ་སྨན་ལ་སོགས་པས་མཆོད་པར་བྱའོ། །གང་ནུབ་ཕྱོགས་སྐྱོང་ཞིང་ཡོངས་སུ་སྲུང་བར་བྱེད་པ་དེ་ཡང་ཞེས་བྱ་བ་ནི། རྒྱལ་པོ་སྤྱན་མི་བཟང་དེས་ཀྱང་རི་རབ་ཀྱི་ནུབ་ཕྱོགས་ན་ཡོངས་སུ་སྐྱོང་ཞིང་སེམས་ཅན་རྣམས་ལ་འཚེ་བར་མི་བྱེད་པའོ། །བུ་དང་བཅས་པ་ལ་སོགས་པ་ཞེས་བྱ་བ་ནི། རྒྱལ་པོ་ཆེན་པོ་སྤྱན་མི་བཟང་གི་བུ་ལ་སོགས་པ་དང༌། འཁོར་རྣམས་ཀྱི་བུ་ལ་སོགས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ནི་ཞལ་གཅིག་ཕྱག་གཉིས་པ། སྐུ་མདོག་དམར་མོ། ཕྱག་གཡས་ན་རལ་གྲི། །གཡོན་རྨ་བྱའི་སྒྲོ་བསྣམས་པའོ། །སངས་རྒྱས་ལྔའི་དབུ་རྒྱན་ཅན། སྤྱན་གསུམ་
པ། རིན་པོ་ཆེའི་རྒྱན་གྱིས་བརྒྱན་པ། སོ་སོར་རྟོག་པའི་ཡེ་ཤེས། པདྨའི་རིགས་འདུ་ཤེས་ཀྱི་ཕུང་པོ། །མེའི་ཁམས། ལྕེའི་སྐྱེ་མཆེད། ཡེ་ཤེས་ལྔའི་རང་བཞིན། མཚོན་བྱེད་ནི་ཐབས། མཚོན་བྱ་ནི་ཤེས་རབ། དེ་གཉིས་སུ་མེད་པའི་རང་བཞིན་ནོ། །དེ་ལྟ་བུའི་ལྷ་མོ་ལ་གུས་པར་གྱུར་ན། གང་ཟག་དེ་ལ་སྲུང་བར་བྱེད་ཅིང་སྡུག་བསྔལ་ཐམས་ཅད་དང་བྲལ་བར་འགྱུར་རོ། །སྤ་བ་ཞེས་བྱ་བ་ལ་སོགས་པ་ནི། སྔར་བཤད་པ་བཞིན་དུ་ཤེས་པར་བྱའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། འོག་ཏུ་བལྟ་འོ། །གང་བལྟ་ཞེ་ན། ཀླུ་རྣམས་ཀྱི་སྙིང་པོ་རིག་སྔགས་ཀྱི་གསང་སྔགས་ནི། བེ་དུ་རི་བེ་དུ་རི་ཞེས་བྱ་བ་ལ་སོགས་པའོ། །ཀུན་དགའ་བོ་ཞེས་བྱ་བ་ནི། བཅོམ་ལྡན་འདས་ཀྱིས་བཀའ་སྩལ་པའོ། །བྱང་ཕྱོགས་ན་གནོད་སྦྱིན་གྱི་རྒྱལ་པོ་རྣམ་ཐོས་ཀྱི་བུ་ཞེས་བྱ་བ་ནི། བྱང་ཕྱོགས་ཀྱི་རྒྱལ་པོ་ལུས་ངན་པོ་ཡིན་ཏེ། རི་རབ་ཀྱི་རྩེ་མོའི་བྱང་ཕྱོགས་ཀྱི་ལྕོག་ལ་བཞུགས་ཏེ། བྱང་ཕྱོགས་ཀྱི་འཇིག་རྟེན་གྱི་ཁམས་སྐྱོང་བའོ། །ཞལ་གཅིག་ཕྱག་གཉིས་པ་སྐུ་མདོག་ལྗང་གུ་།ཕྱག་གཡས་ན་རལ་གྲི། །གཡོན་ན་ནེའུ་ལེའི་རྐྱལ་པ་བསྣམས་པའོ། །རྒྱན་ཐམས་ཅད་རིན་པོ་ཆེས་བརྒྱན་པ། པདྨའི་གདན་ལ་བཞུགས་པའོ། །གསུས་པ་ཆེ་ཞིང་སྟོང་ཆུང་བ་ཁྲོ་བོར་བཞུགས་པའོ། །གནོད་སྦྱིན་ཐམས་ཅད་ཀྱི་བདག་པོ་འཁོར་གནོད་སྦྱིན་འབུམ་ཕྲག་དུ་མ་ཡོད་པ་ཞེས་བྱ་བ་ནི། རྒྱལ་པོ་ཆེན་པོ་ལུས་ངན་པོ་གནོད་སྦྱིན་ཐམས་ཅད་ཀྱི་དེད་དཔོན་གྱི་འཁོར་རྣམས་སོ། །འཁོར་དེ་དག་གིས་བཏབ་པའི་མཚན་མ་ནི། ཕྱི་ཕྱིར་ལྡོག་ཅིང་འཇིགས་པར་འགྱུར། །སྨྲ་བར་འགྱུར་ཞིང་ཁྲོ་བར་འགྱུར། །དེ་བཞིན་གཉིད་ཀྱང་ལོག་པར་འགྱུར། །ཡང་ན་ཤིན་ཏུ་ཁྲོ་བར་འགྱུར། །རྟག་ཏུ་གྱེན་དུ་ལྟ་བར་འགྱུར། །སྐར་མ་དག་ལ་སྙེགས་པར་བགྱིད། །ནུབ་མོ་ཤིན་ཏུ་དགའ་བར་འགྱུར། །རྟག་ཏུ་འདར་ཞིང་སྒྲ་ཡང་འབྱིན། །གནོད་སྦྱིན་གྱི་རང་བཞིན་ཡང་དེ་བཞིན་ནོ། །གནོད་སྦྱིན་རྣམས་ལ་དབང་བྱེད་དུ་འཇུག་པ་གནས་ཏེ་ཞེས་བྱ་བ་ནི། གནོད་སྦྱིན་འབུམ་ཕྲག་དུ་མ་གནས་པ་རྣམས་ལ་མངའ་མཛད། བྱང་ཕྱོགས་སྐྱོང་བའོ། །གང་བྱང་ཕྱོགས་སྲུང་ཞིང་ཡོངས་སུ་
སྐྱོང་བར་བྱེད་པ་དེ་ཡང་ཞེས་བྱ་བ་ནི། ས་དང་པོ་ཐོབ་པའི་བྱང་ཆུབ་སེམས་དཔའ་འཇིག་རྟེན་གྱི་ཁམས་བྱང་ཕྱོགས་སྐྱོང་བར་བྱེད་པ། སེམས་ཅན་རྣམས་ལ་གནོད་པར་མི་བྱེད་པའོ། །བུ་དང་བཅས་ཞེས་བྱ་བ་ལ་སོགས་པ་ནི་རྒྱལ་པོ་ལུས་ངན་པོ་བུ་ལ་སོགས་པ་དང༌། འཁོར་རྣམས་ཀྱི་བུ་ལ་སོགས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ཡང་ཞལ་གཅིག་ཕྱག་གཉིས་པ། སྐུ་མདོག་ལྗང་གུ་ཕྱག་གཡས་ན་རལ་གྲི་།གཡོན་ན་རྨ་བྱའི་སྒྲོ་བསྣམས་པའོ།། ལས་ཀྱི་རིགས་བྱ་བ་ནན་ཏན་གྱི་ཡེ་ཤེས། འདུ་བྱེད་ཀྱི་ཕུང་པོ་རླུང་གི་ཁམས་ཡིད་ཀྱི་སྐྱེ་མཆེད་ཡེ་ཤེས་ལྔའི་ངོ་བོ་ཉིད། སངས་རྒྱས་ལྔའི་དབུ་རྒྱན་ཅན། སྤྱན་གསུམ་པ་རྒྱན་ཐམས་ཅད་རིན་པོ་ཆེས་བརྒྱན་པ། ཉི་མའི་གདན་དང་ཉི་མའི་འོད་དང་ལྡན་པ། དེའི་འོག་ན་པདྨའོ། །ཞབས་ཕྱེད་ཀྲུང་དུ་བཞུགས་པ། །ཁྲོ་བོར་བཞུགས་པའོ། །གང་ཟག་འདི་ལ་དད་པར་གྱུར་ན། སྲུང་བར་འགྱུར་ཞིང་མ་ཤི་བར་བདེ་བར་གནས་པའོ། །སྦ་བ་ལ་སོགས་པ་ཞེས་བྱ་བ་ནི། སྔར་བཤད་པ་བཞིན་ནོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། གང་ལྟ་ཞེ་ན་འོག་ཏུ་བལྟ་བ་ནི་གནོད་སྦྱིན་གྱི་སྙིང་པོ་རིག་སྔགས་ཀྱི་གསང་སྔགས་ནི། སཽ་རི་སཽ་རི་ལ་སོགས་པའོ། །ཤར་ཕྱོགས་ན་ནི་ཡུལ་འཁོར་སྲུང༌། །ཞེས་བྱ་བ་ནི་འབུམ་ཕྲག་དུ་མ་དྲི་ཟ་དང་བཅས་ཤིང༌། ཤར་ཕྱོགས་སྐྱོང་བའོ། །ལྷོ་ཕྱོགས་ན་ནི་འཕགས་སྐྱེས་པོ། །ཞེས་བྱ་བ་ནི། གྲུལ་བུམ་གྱི་འཁོར་འབུམ་ཕྲག་དུ་མ་དང་བཅས་ཤིང༌། ལྷོ་ཕྱོགས་སྲུང་བའོ། །ནུབ་ཕྱོགས་ན་ནི་མིག་མི་བཟང༌། །ཞེས་བྱ་བ་ནི་ཀླུའི་འབུམ་ཕྲག་དུ་མ་དང་བཅས་ཤིང༌། ནུབ་ཕྱོགས་སྐྱོང་བའོ། །བྱང་ཕྱོགས་ན་ནི་ལུས་ངན་པོ། །ཞེས་བྱ་བ་ནི་གནོད་སྦྱིན་གྱི་འཁོར་འབུམ་ཕྲག་དུ་མ་དང་བཅས་ནས་བྱང་ཕྱོགས་སྲུང་བའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལ་གུས་པར་བྱེད་ཅིང་སྲུང་བ་བཏགས་ན། རྒྱལ་པོ་ཆེན་པོ་བཞི་འཁོར་དང་བཅས་ནས་སྲུང་བ་ད་ང་སྦ་བ་ལ་སོགས་པ་བྱེད་པར་འགྱུར་རོ། །
རྒྱལ་པོ་ཆེན་པོ་འདི་བཞི་དག །ཅེས་བྱ་བ་ནི་འཁོར་རྒྱལ་པོ་ཆེན་པོ་བཞིས་བྱས་ཤིང༌། རིག་སྔགས་རྒྱལ་མོ་གཙོ་བོར་བྱས་པའོ། །དོགས་ས་གཞི་བཟང་པོ་ལ། །མེ་ལོང་དབྱིབས་བཞིན་མཁས་པས་བྱས། །དེ་སྟེང་ཚོན་ལྔས་བྲི་བ་ལ། །མཛེས་པར་བྱས་ནས་ཡང་དག་བྲི། །གྲུ་བཞི་སྒོ་བཞི་ཏྭ་རན་བཞི། །དབུས་སུ་སྣ་ཚོགས་པདྨ་ལ། །རིག་སྔགས་རྒྱལ་མོ་ཡང་དག་བཞུགས། །སྣ་ཚོགས་པདྨ་འདབ་བཞི་ལ། །རྒལ་པོ་བཞི་ཡང་བཞུགས་པའོ། །དེ་བཞིན་གསེར་གྱི་པདྨ་ལ། །མཆོད་པའི་ལྷ་མོ་བཞི་ཡང་དགོད། །སྒོ་བཞི་དང་ནི་ཟུར་རྣམས་ལ། །ཕྱོགས་སྐྱོང་བཅུ་ཡང་དགོད་པར་བྱ། །རྡོ་རྗེ་ར་བའི་ཕྱི་རིམ་ལ། །རྒྱལ་ཆེན་བཞི་ཡི་འཁོར་རྣམས་དགོད། །དེ་བཞིན་འབྱུང་པོ་ལ་སོགས་དང༌། །མཁས་པས་ཡང་དག་བྲི་བར་བྱ། །རྒྱལ་པོ་བཞིའི་དཀྱིལ་འཁོར་གྱི་བྱ་ཐབ་སོ། །དེ་ནས་བུམ་པའི་བྱ་ཐབས་ནི། །མཚན་མ་ལེགས་པ་མགྲིན་པ་རིང༌། །ནག་པོ་ར་རི་སྤངས་པ་དང༌། །མཆུ་འཕྱང་ལྟོ་བ་ཆེ་བ་དང༌། །དར་རམ་རས་སམ་གང་ཡང་རུང༌། །མགྲིན་པ་ཡངས་པར་བཅིང་བར་བྱ། །རིན་ཆེན་ལྔ་དང་འབྲུ་ལྔ་དང༌། །སྨན་ལྔ་དྲི་ལྔ་སྙིང་པོ་ལྔ། །ཆུ་གཙང་གིས་ནི་ལེགས་པར་དགང༌། །གདུགས་དང་བ་དན་རྒྱལ་མཚན་དང༌། །ལོ་མ་ལྔ་དང་ལྡན་པ་དང༌། །བཀྲ་ཤིས་བརྒྱད་དང་ཡང་དག་ལྡན། །དེ་རྣམས་ཀྱིས་ནི་བརྒྱན་ནས་ནི། །དཀྱིལ་འཁོར་དབུས་སུ་ཡང་དག་གཞག །སྙིང་པོའམ་ཉེ་བའི་སྙིང་པོའམ། །དེའི་སྔགས་ཀྱིས་བུམ་པ་ལྷག་པར་བྱེད་པའི་ཆོ་ག་བྱས་ལ། དཀྱིལ་འཁོར་བསྐྱེད་པར་བྱའོ། །དཀྱིལ་འཁོར་བསྐྱེད་པ་མང་ཕྱིས་བཤད་པ་བཞིན་དུ་བྱའོ། །རྒྱལ་པོ་ཆེན་པོ་བཞིའི་འཁོར་གྱིས། ནད་ཀྱིས་བཏབ་པ་དེ་སྔར་བཤད་པའི་སྙིང་པོའི་སྔགས་ཀྱིས་བསྲུང་བར་བྱའོ། །དེ་བཞིན་དུ་སྲུང་བ་བྱས་ན། རྒྱལ་པོ་ཆེན་པོ་བཞིས་ཀྱང་འཇིག་རྟེན་སྐྱོང་ཞིང་ནད་པ་ཡང་སྐྱོང་བར་འགྱུར་རོ། །འཇིག་རྟེན་སྐྱོང་བ་གྲགས་དང་ལྡན། །ཞེས་བྱ་བ་གླིང་བཞིའི་རི་རབ་དང་བཅས་པའི་འཇིག་རྟེན་གྱི་ཁམས་ན་གྲགས་པའོ། །ཕྱོགས་བཞི་དག་ནི་སྐྱོང་བར་བྱེད། །ཅེས་བྱ་བ་ནི་ཡང་དག་པར་རྫོགས་པའི་སངས་རྒྱ་
རྒྱས་རྣམས་ཀྱི་ཆོས་སྐྱོང་བ་བྱང་ཆུབ་སེམས་དཔའི་ས་དང་ཕོ་ཐོབ་ནས་སེམས་ཅན་རྣམས་ཀྱི་དོན་མཛད་པའོ། །སྡེ་བོ་ཆེ་ལ་སྟོབས་བོ་ཆེ། །ཞེས་བྱ་བ་ནི་དྲི་ཟ་དང་གྲུལ་བུམ་དང༌། ཀླུ་དང༌། གནོད་སྦྱིན་དང༌། དེ་རྣམས་ཀྱི་དེད་དཔོན་ཏེ། དེ་རྣམས་ལ་ཆེ་བར་མཛད་ཅིང་འཇིག་རྟེན་ལ་གྲགས་པའི་སྟོབས་དང་ལྡན་པའོ། །ཕ་རོལ་དགྲ་རྣམས་རབ་ཏུ་འཇོམས། །ཞེས་བྱ་བ་ནི་ལྷ་དང་ལྷ་མ་ཡིན་གྱི་ཡུལ་ལ་ཕ་རོལ་འདུལ་བའོ། །གཞན་གྱིས་མི་ཐུབ་ཐུབ་པར་དཀའ། །ཞེས་བྱ་བ་ནི་གཞན་འཇིག་རྟེན་གྱི་ལྷ་རྣམས་ཀྱིས་མི་ཐུབ་པ་སྟོབས་ཆེ་བ་དང་ལྡན་པའོ། །རྫུ་འཕྲུལ་ལྡན་ཞིང་འོད་དང་ལྡན། །ཞེས་བྱ་བ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྐད་ཅིག་མས་ཁྱབ་ཅིང་སེམས་ཅན་རྣམས་ཀྱི་དོན་མཛད་པའོ། །དེ་བཞིན་དུ། ཁ་དོག་ལྡན་ཞིང་གྲགས་དང་ལྡན། །ཞེས་བྱ་བ་ནི་སོ་སོ་རང་གི་ཁ་དོག་དང་ལྡན་ཞིང༌། དེ་བཞིན་གྲགས་པ་ཡང་ཡིན་ནོ། །རྫུ་འཕྲུལ་ཆེ་ཞིང་ལྷ་མིན་དང༌། །ལྷ་ཡི་ཡུལ་ཡང་མྱོང་བར་བྱེད། །ཅེས་བྱ་བ་ནི་ལྷ་དང་ལྷ་མ་ཡིན་གྱི་སྤྱོད་པ་ལ་ཡང་རྩོད་པར་ནུས་ཤིང༌། ཕ་རོལ་གྱི་དགྲ་རྣམས་འདུལ་བའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི་རྒྱལ་པོ་ཆེན་པོ་བཞི་འཁོར་བཅས་དང༌། གང་ཟག་བདག་ལ་སྲུང་བར་བྱེད་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི། མཚོན་བྱ་ནི་ཤེས་རབ་སྟེ་མཚོན་བྱེད་ནི་ཐབས་སོ། །རྒྱལ་མོ་བདག་ཉིད་དོ། །རིན་པོ་ཆེའི་རིགས་མཉམ་པ་ཉིད་ཀྱི་ཡེ་ཤེས། ཚོར་བའི་ཕུང་པོ་ཆུའི་ཁམས། སྣའི་སྐྱེ་མཆེད་ཡེ་ཤེས་ལྔའི་ངོ་བོ་ཉིད། ཞལ་གསུམ་ཕྱག་དྲུག་པ། སྐུ་མདོག་སེར་མོ། གཡས་མཐིང་ག །གཡོན་དམར་བ་ཞལ་དང་པོ་སྒེག་པ། གཡས་ཁྲོ་བ། གཡོན་འཛུམ་པ། ཞལ་རེ་རེ་ལ་སྤྱན་གསུམ་དང་ལྡན་པའོ། །སངས་རྒྱས་ལྔའི་དབུ་རྒྱན། དབུ་ལ་རིན་པོ་ཆེའི་རྡོ་རྗེས་བརྒྱན་པ། རྒྱན་ཐམས་ཅད་རིན་པོ་ཆེས་བརྒྱན་པའོ། །ཕྱག་གཡས་དང་པོ་རལ་གྲི། །འོག་མ་ན་རྡོ་རྗེ་རིན་པོ་ཆེ། གཡོན་དང་པོ་འཁོར་ལོ། འོག་མ་ན་རྨ་བྱའི་སྒྲོ་ཐ་མ་གཉིས་ན་མདའ་གཞུ་འགེངས་པའོ། །ཞབས་རྡོ་རྗེ་སྐྱིལ་ཀྲུང་དུ་བཞུགས་པ། སྣ་ཚོགས་
པདྨའི་སྟེང་དུ་ཟླ་བའི་གདན། ཉི་མ་བདུན་དང་ལྡན་པའི་འོད་མངའ་བ། བཅུ་དྲུག་ལོན་པའི་ཆ་བྱད་ཅན་ཐབས་ཤེས་རབ་གཉིས་སུ་མེད་པ་གང་ཟག་དག་གིས་གུས་པར་བྱེད་པའོ། །སྦ་བ་དང་ཞེས་བྱ་བ་ནི། སྡུག་བསྔལ་ཐམས་ཅད་སྦ་བའོ། །ཡོངས་སུ་བསྐྱབ་པ་དང་ཞེས་བྱ་བ་ནི། འཁོར་བའི་སྡུག་བསྔལ་ལས་བསྐྱབ་པའོ། །ཡོངས་སུ་གཟུང་བ་དང་ཞེས་བྱ་བ་ནི་མི་དགེ་བཅུ་སྤངས་ནས་དགེ་བ་བཅུ་ལ་གཟུད་པའོ། །ཡོངས་སུ་བསྐྱང་བ་དང་ཞེས་བྱ་བ་ནི་མ་རིག་པ་བཅོམ་ནས་ཡོན་ཏན་སྐྱོང་བའོ། །ཞི་བ་དང་བདེ་ལེགས་སུ་འགྱུར་བ་དང་ཞེས་བྱ་བ་ནི། འཁོར་བའི་སྡུག་བསྔལ་ཞི་བར་འགྱུར་ཏེ། ཡང་དག་པའི་དོན་ཐོབ་ནས་མཐོ་རིས་ཀྱི་ངོ་བོ་ཉིད་ཐོབ་པའོ། །ཆད་པ་སྤང་བ་དང་ཞེས་བྱ་བ་ནི་བདུད་བཞི་རྣམས་ཀྱི་ཆད་པ་སྤངས་ནས་ཡེ་ཤེས་ཤར་བའོ། །མཚོན་ཆ་སྤང་བ་དང་ཞེས་བྱ་བ་ནི་དམྱལ་བའི་སྡུག་བསྔལ་མཚོན་ཆ་སྤང་བའོ། །དུག་གཞིལ་བ་དང་ཞེས་བྱ་བ་ནི། དུག་ལྔ་ཤར་བ་ལ་དེས་བསིལ་བར་བྱེད་པའོ། །དུག་གསང་བ་དང་ཞེས་བྱ་བ་ནི་ཡེ་ཤེས་ལྔའི་རང་བཞིན་གྱིས་དུག་ལྔ་གསད་པའོ། །མཚམས་གཅད་པ་དང་ཞེས་བྱ་བ་ནི། མ་རིག་པའི་ངོ་བོ་བསད་ནས། ཡེ་ཤེས་ཀྱི་ངོ་བོ་ལ་འཇུག་པའོ། །ས་བཅིང་བགྱིས་ཤིག་ཅེས་བྱ་བ་ནི། སྡིག་པའི་སེམས་དང་ལྡན་པ་རྣམས་དགེ་བ་ལ་འཇུག་པའོ། །ལོ་བརྒྱ་འཚོ་བར་གྱུར་ཅིག་ཅེས་བྱ་བ་ནི། རིག་སྔགས་འདིའི་གཟི་བརྗིད་ཀྱིས་ནད་མེད་ཅིང་ཤི་བའི་དུས་ཀྱིས་མི་གོས་བའོ། །སྟོན་བརྒྱ་མཐོང་བར་ཤོག་ཤིག་ཅེས་བྱ་བ་ནི། ཡེ་ཤེས་དེས་སེམས་ཅན་ཐམས་ཅད་ཀྱི་དོན་མཛད་པའོ། །ཏདྱ་ཐཱ་ཞེས་བྱ་བ་ནི། འདི་ལྟ་སྟེ་གང་ལྟ་ཞེ་ན་རིག་སྔགས་ཀྱི་གསང་སྔགས་བསམ་གྱིས་མི་ཁྱབ་པ་བལྟའོ། །རིག་སྔགས་ཀྱི་གསང་སྔགས་ནི། ཨེ་ལེ་མེ་ལེ་ལ་སོགས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་རྒྱལ་པོ་བཞིའི་ཆོ་གའི་གནས་སྐབས་ཏེ་བརྒྱད་པའོ།། །།ཀུན་དགའ་པོ་ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་ཀུན་དགའ་བོ་ལ་ཡང་ནས་ཡང་དུ་བཀའ་སྩལ་པའོ། །ཁྱོད་ཀྱིས་གནོད་སྦྱིན་གྱི་སྡེ་དཔོན་ཆེན་པོ་རྣམས་ཀྱི་མང་
ཟུང་ཤིག་ཅེས་བྱ་བ་ནི། ལུས་ངན་པོའི་བུ་བཞི་བོའི་མིང་བརྗོད་ཅིང༌། སེམས་ཅན་རྣམས་ལ་ཡང་དག་པར་བསྲུང་སྟེ། འདིའི་ནུས་པས་གནོད་སྦྱིན་ཆེན་པོ་དེ་རྣམས་ཀྱིས་ཀྱང་གང་དང་གང་དུ་སྲུང་བར་བྱེད་པའོ། །འདི་ལྟ་སྟེ་ཞེས་བྱ་བ་ནི་འོག་ཏུ་བལྟའོ། །འོག་ཏུ་གང་བལྟ་ཞེ་ན། གནོད་སྦྱིན་གྱི་དེད་དཔོན་ཆེན་པོ་ལྔ་པོ་བལྟ་བའོ། །ལུས་ངན་གྱི་ནི་བུ་ཐུ་བོ། །ཞས་བྱ་བ་ནི་རྒྱལ་པོ་ཆེན་པོ་ལུས་ངན་པའི་བུ་ཆེན་པོ་ལྔ་པོ་དེ་དག་སྟེ། གཟི་བརྗིད་ཆེ་ཞིང་སྟོབས་དང་ལྡན། གྲགས་པ་དང་ལྡན་པ། ཁ་དོག་དང་ལྡན་པ། ལྷ་དང་ལྷ་མིན་གྱི་གཡུལ་ཡང་བཀྱེ་བའོ། །ཀུན་དུ་རྒྱལ་བ་མི་ལ་ཞོན། །ཕྲུགས་སུ་ལྡན་ན་གནས་པ་སྟེ། །ལྷ་ཡི་བདེན་པ་གསོལ་བའོ། །ཞེས་བྱ་བ་ནི་དེའི་ཁ་དོག་ནི་དཀར་པོ་དང༌། སེར་པོ་དང༌། དམར་པོ་དང༌། ལྗང་གུ་དང༌། ནག་པོ་དང༌། དེ་རྣམས་ནི་ཞལ་རེ་རེ་ཕྱག་གཉིས་གཉིས་སོ། །ཕྱག་གཡས་རྣམས་ན་འཁོར་ལོ་དང་མདུད་དང་དགྲ་སྟ་དང༌། རྩེ་གཅིག་དང་ལྕགས་ཀྱུ་བསྣམས་པའོ། །ཕྱག་གཡོན་པ་རྣམས་ན་རིན་པོ་ཆེའི་མྱུ་གུ་བསྣམས་པ། གནོད་སྦྱིན་དེ་རྣམས་ནི་སེམས་ཅན་གྱི་དོན་མཛད་ཅིང༌། སྲོག་ཆགས་རྣམས་ལ་གནོད་པ་མི་བྱེད་པའོ། །ཀུན་དུ་རྒྱལ་པ་དང༌། མི་ལ་ཞོན་པ་གཉིས་ནི་ཤར་དང་ལྷོ་སྐྱོང་བའོ། །ཕྲུགས་སུ་ལྡན་ན་གནས་བ་སྟེ། །ལྕང་ལོ་ཅན་གྱི་ཕོ་བྲང་ན་གནས་པ་ལྷའི་དབང་པོ་བརྒྱ་བྱིན་གྱི་བཀའ་ལས་མི་འདའ་བ་ཡང་དག་པར་རྫོགས་པའི་སངས་རྒྱས་རྣམས་ཀྱི་བསྟན་པ་སྲུང་བ། རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི། རྗེས་སུ་དྲན་ཞིང་རིག་སྔགས་ལ་གུས་པར་བྱས་པའོ། །ཀུན་དུ་རྒྱལ་དང་མི་ལ་ཞོན་གཉིས་ཀྱིས་ཀྱང་ནུབ་ཕྱོགས་དང་བྱད་ཕྱོགས་སྐྱོང་བའོ། །སོར་མོ་ལྔ་པས་ནི་ལྷའི་དབང་པོ་བརྒྱ་བྱིན་གྱི་ཕོ་བྲང་སྐྱོང་བའོ། །དེས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བགྱིས་ཤིག་ཅེས་བྱ་བ་ནི། སྲུང་བ་དང༌། རྗེས་སུ་ཡི་རང་བ་དང༌། ཀློག་པ་དང༌། ཁ་དོན་བྱེད་པ་དང༌། རྒྱ་ཆེར་སྤེལ་བ་དང༌། གུས་པར་བྱས་ནས་འཆང་བ་དང༌། བསྒོམ་པ་དང༌། ཆིག་གཅིག་ཀྱང་འདོན་པར་གྱུར་ན། ཚེ་འདིར་ཡང་གནོད་སྦྱིན་དེ་རྣམས་ཀྱིས་སྲུང་བར་འགྱུར་
རོ། །ཚེ་ཕྱི་མ་ལ་ཡང་སྲུང་བར་འགྱུར་རོ། །འདིའི་གཉེན་པོའི་རིག་སྔགས་ནི་ཞལ་གཅིག་ཕྱག་གཉིས་པ། སྐུ་མདོག་ལྗང་གུ་ལས་ཀྱི་རིགས་བྱ་བ་ནན་ཏན་གྱི་ཡེ་ཤེས་འདུ་བྱེད་ཀྱི་ཕུང་པོ་རླུང་གི་ཁམས་ལུས་ཀྱི་སྐྱེ་མཆེད། ཡེ་ཤེས་ལྔའི་ངོ་བོ་ཉིད་སྤྱན་གསུམ་པ་ཅུང་ཟད་ཁྲོ་བ་རིགས་ལྔའི་དབུ་རྒྱན་ཅན་ཡན་ལག་ཐམས་ཅད་སྦྲུལ་གྱིས་བརྒྱན་པ། གཡས་ན་སྣ་ཚོགས་རྡོ་རྗེ་བསྣམས་པ། གཡོན་པ་ན་རྨ་བྱའི་སྒྲོ་བསྣམས་པའོ། །རྨ་བྱ་ལ་ཞོན་པའོ། །དེ་ལྟ་བུའི་རིག་སྔགས་ལ་གང་ཟག་གིས་གུས་པར་བྱས་ན་གནོད་སྦྱིན་དེ་རྣམས་ཀྱིས་ཀྱང་སྐྱོང་བའོ། །སྦ་བ་ལ་སོགས་པ་ཞེས་བྱ་བ་ནི་སྔ་མ་བཞིན་དུ་ཤེས་པར་བྱའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། རིག་སྔགས་ཀྱི་གསང་སྔགས་གནོད་སྦྱིན་གྱི་སྙིང་པོ་ནི། བ་ལེ་ལ་སོགས་པའོ། །སྐྱ་སྣར་བུ་ན་འཁོར་བ་འཛག །ཅེས་བྱ་བ་ནི་གནས་ནི་སྐྱ་སྣར་བུ། གནོད་སྦྱིན་ནི་འཁོར་བ་འཇིག་གོ །དེ་ཡང་འཛམ་བུའི་གླིང་གི་ལྷོ་ཕྱོགས་ན་གནས་སོ། །ཕྱག་གཉིས་པ་སྐུ་མདོག་དཀར་པོ་གཡས་འཁོར་ལོ། གཡོན་སྡིགས་མཛུབ་བོ། གཞན་གྱིས་མི་ཐུབ་དཀའ་བ་ན། །ཞེས་བྱ་བ་ནི་ཡུལ་ནི་རྒྱ་གར་གྱི་ནུབ་ཕྱོགས་ཡིན་ཏེ། གནོད་སྦྱིན་གཞན་གྱིས་མི་ཐུབ་པ་ནི་ཞལ་གཅིག་ཕྱག་གཉིས་པ། སྐུ་མདོག་སེར་པོ། གཡས་རལ་གྲི་གཡོན་ཐོད་པའོ། །གྲོང་ཁྱེར་བཟང་ན་གནོད་སྦྱིན་བྲག །ཅེས་བྱ་བ་ནི་དེ་ནི་གནས་ཡིན་ཏེ། གནོད་སྦྱིན་གྱི་སྐུ་མདོག་ནི་མཐིང་ནག །གཡས་གཡོན་གཉིས་ནི་གྲི་གུག་དང་ཐོད་པ་བསྣམས་པའོ། །ཤེད་ཀྱི་བུ་ནི་བྱང་ཕྱོགས་ན། །ཞེས་བྱ་བ་ནི་རི་རབ་ཀྱི་བྱང་ཕྱོགས་ན་སྒྲ་མི་སྙན་ན་གནས་པ་སྟོབས་དང་ལྡན་པ། གཟི་བརྗིད་ཆེ་བའོ། །དེའི་ཁ་དོག་ནི། གསེར་དང་འདྲ་བ། གཡས་ན་དབྱུག་ཏོ་གཡོན་ན་པདྨ་བསྣམས་པའོ། །ལག་ན་རྡོ་རྗེ་རྒྱལ་པོའི་ཁབ། །ཅེས་བྱ་བ་ནི་རྒྱ་གར་གྱི་ཡུལ་གྲོང་ཁྱེར་དབུས་ན་རྒྱལ་པོའི་ཁབ་ཀྱི་ལྷོ་ཕྱོགས་ན་གནས་པའོ། །སྐུ་མདོག་མཐིང་ག །གཡས་རྡོ་རྗེ་གཡོན་སྡིགས་མཛུབ་བོ། །བྱ་རྒོད་ཕུང་པོར་གནས་བཅས་པ། །ཞེས་བྱ་བ་ནི་གནོད་སྦྱིན་ལག་ན་རྡོ་རྗེ་ནི། ཕོ་བྲང་བྱ་རྒོད་ཕུང་པོར་བྱས་ནས་ཁམས་གསུམ་དུ་སྐད་
ཅིག་མས་རྒྱུ་བའོ། །རྒྱ་མཚོའི་མཐའ་ཡི་བར་གྱི་སར། །ལན་གསུམ་བར་དུ་འགྲོ་བྱེད་པ། །ཞེས་བྱ་བ་ནི་རྒྱ་མཚོ་དང་བྱ་རྒོད་ཕུང་པོ་གཉིས་ལ། ལན་གསུམ་གསུམ་རྒྱུ་བའོ། །སྐད་ཅིག་མས་འཛམ་བུའི་གླིང་བར་ནས་རྒྱུ་བའོ། །སྟོབས་ཆེ་ཞིང་ནི་གཟི་བརྗིད་ཆེ། །དཔག་ཚད་བཅུར་ན་རྣམ་པར་གནོན། །ཞེས་བྱ་བ་ནི་གཞན་གྱི་སྟོབས་དང་འགྲན་པར་མི་ནུས་པ། གཟི་བརྗིད་ཀྱང་དེ་བཞིན་ནོ། །ལུས་ཀྱི་ཚད་ནི་དཔག་ཚད་བཅུར་སྤྲུལ་བའོ། །གནོད་སྦྱིན་མཁའ་ལྡིང་རྒྱས་པ་ན། །ཞེས་བྱ་བ་ནི་རྒྱུ་བ་ནི་ནམ་མཁའ་ལ་རྒྱུ་བ་སྟེ། གནས་པ་ནི་མ་ལ་ཡའི་རྩེ་མོ་ནའོ། །གཟུགས་བྱ་དང་འདྲ་བ་ལུས་སེར་པོ་གཤོག་པ་ནག་པོ། །མཇུག་མ་ཡང་ནག་པོ། །མཆུ་སྔོན་པོ་རིང་བ། ལག་པ་དང་རྐང་པ་སྡེར་མོ་རིང་བ་མིག་སེར་བ། གཡས་པ་གཡོན་གཉིས་ན་སྤྲུལ་ཟ་བའོ། །སྐད་ཅིག་མས་དཔག་ཚད་ལྔ་བརྒྱར་འཕུར་ནུས་པའོ། །སྣ་ཚོགས་སྦེད་པ་གནས་སྒོ་ན། །ཞེས་བྱ་བ་ནི་དེ་ཡང་འཛམ་བུ་གླིང་གི་ལྷོ་ཕྱོགས་ན་གནས་སྒོ་ཞེས་བྱ་བའི་ཡུལ་ནའོ། །གནོད་སྦྱིན་དེའི་སྐུ་མདོག་ནི། ཤིན་ཏུ་དམར་བ། ཁྲོ་བའི་ཚུལ་དུ་ཡོད་པ། ཕྱག་གཡས་གཡོན་གཉིས་ན་དམའ་གཞུ་བསྣམས་པའོ། །གནོད་སྦྱིན་པ་ཀུ་ལའི་རྒྱལ་ཁབ་ན། །ཞེས་བྱ་བ་ནི་གནས་ནི་རྒྱལ་པོའི་ཁབ་ཀྱི་དབུས་ནའོ། །སྐུ་མདོག་ནི་ལྗང་གུའོ། །བཞིན་མི་སྡུག་པ། གཟུགས་ཐུང་བ། ཕྱག་གཡས་གཡོན་གཉིས་ན་ནོར་གྱི་རྐྱལ་བ་འཛིན་པའོ། །སྡེ་བོ་ཆེ་ལ་སྟོབས་པོ་ཆེ། །ཞེས་བྱ་བ་ནི་བ་ཀུ་ལ་ནི་འཁོར་མང་བ་ཡོད་པ། གཟེ་བརྗིད་དང་ལྡན་པ། ཁ་དོག་ལྡན་པའོ། །གནོད་སྦྱིན་ནག་པོ་ཉེ་ནག་པོ། །སེར་སྐྱ་ཡི་ནི་གནས་ན་གནས། །ཞེས་བྱ་བ་ནི་ཆུ་བོ་གངྒའི་འགྲམ་ཤར་ཕྱོགས་ན་གནས་པའོ། །གནོད་སྦྱིན་ནག་པོ་ཉེ་ནག་པོ། །དེ་བས་ཀྱང་ནག་པས་ཉེ་ནག་པོ། །གནོད་སྦྱིན་དེ་གཉིས་ཀྱང་ཕྱག་གཉིས་གཉིས། གཡས་པ་ན་རིན་པོ་ཆེ་འཛིན་པའོ། །གཡོན་ནེའུ་ལེའི་རྐྱང་བ་བསྣམས་པའོ། །ཐུབ་པ་ཆེན་པོ་ཤཱཀྱའི་ཏོག །སངས་རྒྱས་ཐུབ་པ་གར་བལྟམས་པར། །ཞེས་བྱ་བ་ནི་རྒྱ་གར་ཡུལ་གྱི་དབུས་ཆུ་བོ་གངྒའི་ལྷོ་ཕྱོགས་ན། དེར་སངས་རྒྱས་གནས་པའོ། །ཕྱག་གཉིས་
སྐུ་མདོག་གསེར་གྱི་མདོག་ཅན་རབ་ཏུ་བྱུང་བའི་གཟུགས་སུ་བཞུགས་པའོ། །རྐང་བཀྲ་བོ་ནི་དགྲ་ཅན་ལ། །ཞེས་བྱ་བ་ནི་རྒྱ་གར་གྱི་ཡུལ་དབུས། ལྷོ་ནུབ་གྱི་མཚམས་ནའོ། །གནོད་སྦྱིན་དེའི་སྐུ་མདོག་དང་ཕྱག་མཚན་ནི། སྐུ་མདོག་མཐིང་ག །གཡས་གཡོན་གཉིས་རྩེ་གཅེས་དང༌། དུང་བསྣམས་པའོ། །ཙི་ར་ཏ་ན་དབང་ཕྱུག་ཆེ། །ཞེས་བྱ་བ་ནི་འཛམ་བུ་གླིང་གི་ནུབ་ཕྱོགས་ན་གནས་ཏེ། ཞལ་གཅིག་ཕྱག་བཞི་པ། སྐུ་མདོག་སྡོ་སྐྱ་ཕྱག་གཡས་པ་གཉིས་ན་ཕྲེང་བ་དང་བུམ་པ། གཡོན་པ་གཉིས་ན་ཏྲི་ཤཱུ་ལ་དང་ཨ་འབྲས་བསྣམས་པའོ། །སྤྱན་གསུམ་པ་རལ་པའི་ཐོར་ཚུགས་ཅན་ནོ། །མཉན་ཡོད་ན་ནི་ཕུར་བུའོ། །ཞེས་བྱ་བ་ནི་རྒྱ་གར་ཡུལ་གྱི་དབུས་ཀྱི་གྲོང་ཁྱེར་ན། རྒྱལ་བུ་མགོན་མེད་མདུན་ནའོ། །གནོད་སྦྱིན་ཕུར་བུ་ནི། སྐུ་མདོག་དཀར་པོ། །གཡས་གཡོན་གཉིས་ན་མདའ་གཞུ་འཛིན་པའོ། །གནས་བཅས་ན་ནི་རྒྱ་མཚོ་གནས། །ཞེས་བྱ་བ་ནི་གནོད་སྦྱིན་རྒྱ་མཚོ་ནི་ཞལ་གཅིག་ཕྱག་གཉིས་ཏེ། སྐུ་མདོག་དཀར་པོ་སྦྲུལ་གྱི་ཞགས་པའི་འཛིན་པའོ། །ཡངས་པར་ན་ན་རྡོ་རྗེ་མཚོན། །ཞེས་བྱ་བ་ནི་རྒྱ་གར་ཡུལ་གྱི་དབུས་ཀྱི་གྲོང་ཁྱེར་ན་གནས་པའོ། །སྐུ་མདོག་སེར་པོ་རིན་པོ་ཆེའི་ཕྲེང་བ་འཛིན་པའོ། །སྤྲེའུ་ལྟར་དམར་སེར་གྱད་ཡུལ་ན། །ཞེས་བྱ་བ་ནི་རྒྱ་གར་གྱི་ཕྱོགས་ངོས་ན་ཡིན་ཏེ། གནོད་སྦྱིན་དེ་ནི་སྐུ་མདོག་དམར་པོ། ཕྱག་ན་གཏུན་ཤིང་འཛིན་པའོ། །ཝཱ་རཱ་ཎ་སཱིར་ནག་པོ་ཆེ། །ཞེས་བྱ་བ་ནི་དེ་ཡང་འཛམ་བུའི་གླིང་གི་དབུས་ཆུ་བོ་གངྒའི་འགྲམ་ནའོ། །གནོད་སྦྱིན་ནག་པོ་ཆེན་པོ་ནི་ཞལ་གསུམ་ཕྱག་དྲུག་པ། །སྐུ་མདོག་མཐིང་ནག་སྤྱན་གསུམ་པའོ། །གཡས་པ་གསུམ་ན་རལ་གྲི་གྲི་གུག་རྩེ་གསུམ་མོ། །གཡོན་པ་གསུམ་ན་ཙནྡན་གྱི་བེ་ཅོ་ན་དང་ཐོད་པ་ཞགས་པ་བསྣམས་པའོ། །བལྟ་ན་སྡུག་པ་ཙམ་པ་ན་ཞེས་བྱ་བ་ན་ནི། རྒྱ་གར་ཡུལ་ཤར་ཕྱོགས་ན་ཤིན་ཏུ་བྱད་མཚར་བ་གནོད་སྦྱིན་བལྟ་ན་སྡུག་གི་གནས་པོ། །སྐུ་མདོག་དཀར་པོ་ཕྱག་ན་པདྨ་བསྣམས་པའོ། །གནོད་སྦྱིན་ཁྱབ་འཇུག་སྒོ་ཅན་ན། །ཞེས་བྱ་བ་ནི་ཕྱིའི་རྒྱ་མཚོའི་འགྲམ་མོ། །སྐུ་མདོག་ལྗང་ནག་ཕྱག་བཞི་པ་གཡས་པ་གཉིས་ན། འཁོར་ལོ་དང༌། ཨ་འབྲས། གཡོན་པ་
གཉིས་དབྱུག་ཏོ་དང༌། དུང་བསྣམས་པའོ། །འཛིན་པ་པོ་ནི་སྒོ་དྲུང་ན། །ཞེས་བྱ་བ་ནི་དེ་ཡང་རྒྱ་མཚོའི་འགྲམ་ན་ཡིན་ཏེ། སྐུ་མདོག་སེར་པོ་ཕྱག་གཡས་གཡོན་གཉིས་ན། ཨུཏྤ་ལའི་ཕྲེང་བ་འཛིན་པའོ། །འཇིགས་བྱེད་ཟངས་ཀྱི་འདབ་མ་ཅན། །ཞེས་བྱ་བ་ནི་ལྷོ་ནུབ་ཀྱི་མཚམས་རྒྱ་མཚོའི་འགྲམ་ནའོ། །སྐུ་མདོག་དམར་སྐྱ་གཡས་རལ་གྲི་།གཡོན་སྡིགས་མཛུབ་བོ། །ཕྲང་གིས་འགྲོ་ན་འཇོམས་པ་པོ། །ཞེས་བྱ་བ་ཡིན་ཏེ། རྒྱ་གར་གྱི་བྱང་ངོས་ནའོ། །གནོད་སྦྱིན་དམར་སྐྱ་ཕྱག་ན་རྩེ་གསུམ་བསྣམས་པའོ། །འབྲོག་ན་གནོད་སྦྱིན་འབྲོག་གནས་པོ། །ཞེས་བྱ་བ་ནི་འཛམ་བུའི་གླིང་གི་ཐང་སྟོང་རྣམས་ལ་གནས་པ། སྐུ་མདོག་ནག་པོ་ཕྱག་གཡས་ན་རལ་གྲི་།གཡོན་ན་ཞགས་པའོ། །སེར་སྐྱ་བོ་ནི་འབྲུ་མངས་ན། །ཞེས་བྱ་བ་ནི་དེ་ཡང་རྒྱ་གར་ཡུལ་གྱི་དབུས་སུ། གནོད་སྦྱིན་མདོག་སེར་སྐྱ། ཕྱག་ན་དབྱུག་ཏོ་བསྣམས་པའོ། །འཕགས་རྒྱལ་ན་ནི་ནོར་སྲུང་བ། །ཞེས་བྱ་བ་ནི་འཛམ་བུའི་གླིང་གི་དབུས་སུའོ། །གནོད་སྦྱིན་སྐུ་མདོག་སེར་པོ་ཕྱག་དྲུག་པ་གཡས་པ་གསུམ་ནི་ཕྱག་འཚལ་བ་དང༌། ནོར་གྱི་སྙེ་མ་དང༌། མཆོད་སྦྱིན་ནོ། །གཡོན་པ་གསུམ་ན་པོ་ཏི་དང༌། འབྲས་ཀྱི་སྙེ་མ་དང་བུམ་པའོ། །སྲུང་བྱེད་ན་ནི་ནོར་འབྱོར་པ། །ཞེས་བྱ་བ་ནི་ཡུལ་དེའི་ལྷོ་ཕྱོགས་ནའོ། །གནོད་སྦྱིན་སྐུ་མདོག་སེར་པོ་གཡས་ན་རིན་པོ་ཆེའི་བུམ་པ་བསྣམས་པ། །གཡོན་ན་གསེར་གྱི་བུམ་པ་བསྣམས་པའོ། །གསོ་བའི་མཐའ་ན་གསོ་བ་པ། །ཞེས་བྱ་བ་ནི་ནུབ་ཀྱི་ཕྱོགས་ན་གནས་ཏེ། གནོད་སྦྱིན་གསོ་བ་པོ་ནི། སྐུ་མདོག་ལྗང་གུ་ཕྱག་ན་ནེའུ་ལེ་བསྣམས་པའོ། །དགའ་བོ་ཉེ་དགའ་གྲོང་ཁྱེར་གནས། །ཞེས་བྱ་བ་ནི་ཡུལ་དབུས་ནའོ། །དེ་གཉིས་ཀྱང་སྐུ་མདོག་སེར་པོ། སྡུལ་གྱི་ཞགས་པ་བསྣམས་པའོ། །ཕྲེང་བ་འཛིན་པ་ཁྱུ་མཆོག་ན། །ཞེས་བྱ་བ་ནི་དེ་ཡང་འཛམ་བུའི་གླིང་གི་དབུས་ན་གནས་ཏེ། གནོད་སྦྱིན་གྱི་ཁ་དོག་ནི་དམར་པོ་ཕྱག་ན་གསེར་གྱི་ཕྲེང་བ་འཛིན་པའོ། །ཀུན་དགའ་འཆི་མེད་ས་ཞག་ན། །ཞེས་བྱ་བ་ནི་འཛམ་བུའི་གླིང་གི་ཤར་ཕྱོགས་ནའོ། །སྐུ་མདོག་སེར་པོ་ཕྱག་ན་རྡོ་རྗེ་བསྣམས་པའོ། །མཆེ་བ་དཀར་བ་
དངོས་བཟང་ན། །ཞེས་བྱ་བ་ནི་རི་རབ་ཀྱི་ཤར་ཕྱོགས་ན་གནོད་སྦྱིན་མཆེ་བ་ཅན་གནས་ཏེ། སྐུ་མདོག་དཀར་པོ། ཕྱག་གཡས་ན་འཁོར་ལོ་བསྣམས་པའོ། །མེ་བརྟན་པ་ནི་གཟི་ཅན་ན། །ཞེས་བྱ་བ་ནི་རྒྱ་མཚོའི་བར་ན་གནས་པ་སྟེ། གནོད་སྦྱིན་གྱི་ཁ་དོག་ནི་མཐིང་ནག་ཏུ་ཡོད་པ། ཕྱག་ན་ལྕགས་ཀྱུ་བསྣམས་པའོ། །རིན་ཆེན་རི་ལྡན་གྲོང་ཁྱེར་ན། །ཞེས་བྱ་བ་ནི་རི་བོ་ཆེན་པོའི་བར་ན་གྲོང་ཁྱེར་བལྟ་ན་སྡུག་གི་དབུས་ན། རྣམ་པར་རྒྱལ་བའི་གཞལ་ཡས་ཁང་གི་སྲུང་མའོ། །གནོད་སྦྱིན་དེ་ནི་སྟོབས་དང་ལྡན་པ། གཟི་བརྗིད་ཆེ་བའོ། །དེའི་སྐུ་མདོག་དང་ཕྱག་མཚན་ནི་སྐུ་མདོག་ནག་པོ། གཡས་ན་གྲི་གུག་གཡོན་ན་ཐོད་པ་བསྣམས་པའོ། །ནོར་གྱི་བུ་ནི་ཕྱོགས་མཚམས་གནས། །ཞེས་བྱ་བ་ནི་གནོད་སྦྱིན་རྣམ་ཐོས་ཀྱི་བུ་ཡིན་ཏེ་རི་རབ་ཀྱི་ཕྱོགས་མཚམས་ན་གནས་པའོ། །སྐུ་མདོག་སེར་པོ། གཡས་ན་རིན་པོ་ཆེའི་མྱུ་གུ་།གཡོན་ན་བུམ་པ་བསྣམས་པའོ། །སྨིན་དྲུག་བུ་ནི་གཞོན་ནུ་ཞེས། །འཇིག་རྟེན་གྲགས་པ་སྐྱེ་ཡོད་ན། །ཞེས་བྱ་བ་ནི་གནོད་སྦྱིན་དེ་ནི་སྐུ་མདོག་དམར་པོའོ། །གཡས་ན་རྩེ་གཅིག །གཡོན་ཕྲེང་བ་འཛིན་པའོ། །དེའི་འོག་མའི་གནོད་སྦྱིན་ནི་ཐལ་བའི་མདོག་ཅན་ལྕགས་ཀྱུ་འཛིན་པའོ། །འོད་མའི་འགྲམ་ན་ལག་བརྒྱ་པ། །ཞེས་བྱ་བ་ནི་རྡོ་རྗེ་གདན་གྱི་ལྷོ་ཕྱོགས་ནགས་གསེབ་ནའོ། །གནོད་སྦྱིན་ཤིན་ཏུ་འཇིགས་པ་སྐུ་མདོག་དམར་སྐྱ། ཕྱག་ན་དགྲ་སྟ་བ་སྣམས་པའོ། །ཀ་ལིངྐ་ན་ཤིང་རྟ་ཆེ། །ཞེས་བྱ་བ་ནི་རྒྱ་གར་ཡུལ་གྱི་ལྷོ་ཕྱོགས་སོ། །གནོད་སྦྱིན་དེའི་སྐུ་མདོག་ནི་དཀར་པོ་ཕྱག་ན་རྩེ་གསུམ་བསྣམས་པའོ། །ཐུལ་བར་དཀའ་ནི་འགྲོ་འཇོམས་ན། །ཞེས་བྱ་བ་ནི་དེ་ཡང་དབུས་ཀྱི་ནུབ་ཕྱོགས་སུའོ། །ཁ་དོག་སེར་པོ་ཕྱག་ན་བུམ་པ་དང་བིལ་བ་བསྣམས་པའོ། །སྲིད་སྒྲུབ་ནགས་ན་སྲིད་སྒྲུབ་པ། །ཞེས་བྱ་བ་ནི་དུར་ཁྲོད་བསིལ་བའི་ཚལ་གྱི་ནགས་ནའོ། །གནོད་སྦྱིན་དེའི་སྐུ་མདོག་ནི་སྔོ་སྐྱ་ཕྱག་ན་དབྱུག་ཏོ་བསྣམས་པའོ། །གནོད་སྦྱིན་འཇོམས་པ་འདུན་ཁང་ན། །ཞེས་བྱ་བ་ནི་རྒྱ་གར་ཡུལ་གྱི་བྱང་ཤར་མཚམས་ན་གནས་སོ། །གནོད་སྦྱིན་གྱི་སྐུ་མདོག་ནི་སེར་
སྐྱ་སྟེ། གསེར་གྱི་རྒྱལ་བུ་འཛིན་པའོ། །ཕྲེང་བ་སྲུང་ན་རི་བརྩེགས་པ། །ཞེས་བྱ་བ་ནི་གསེར་གྱི་རི་རབ་ཀྱི་སྟེང་གི་བྱང་ཕྱོགས་ན་གནས་པའོ། །གནོད་སྦྱིན་མདོག་སེར་པོ་ལག་ན་ཕྲེད་པ་འཛིན་པའོ། །རྟ་དམར་ན་ནི་བཟང་པོ་པ། །ཞེས་བྱ་བ་ནི་དེ་ཡང་དར་ཅིག་གི་ཡུལ་ཡིན་ཏེ། གནོད་སྦྱིན་སྐུ་མདོག་དམར་པོ་ཕྱག་ན་ལྕགས་ཀྱུ་དང་ཞགས་པ་བསྣམས་པའོ། །མ་རྫོགས་པ་ནི་ཐམས་ཅད་བཟང༌། །ཞེས་བྱ་བ་ནི་ཡུལ་དེ་ཡང་རྒྱ་ནག་པོའི་བྱང་ཕྱོགས་ན་མི་ཉག་ཅེས་བྱའོ། །དེ་ན་གནོད་སྦྱིན་དེ་གནས་ཏེ། །གནོད་སྦྱིན་དེའི་སྐུ་མདོག་ཕྱག་མཚན་ནི་གཡས་ན་འབྲས་ཀྱི་སྙེ་མ་འཛིན་པ། གཡོན་ན་ནོར་གྱི་རྒྱལ་པ་འཛིན་པའོ། །སྙེམས་པ་ཅན་ན་སྐྱོང་བ་པོ། །ཞེས་བྱ་བ་ནི་རྒྱ་ནག་པོའི་ཤར་ཕྱོགས་ན་གནས་ཏེ། དེ་ཡང་ཁྲི་སྟན་གྱི་ཡུལ་ནའོ། །དེ་ན་གནས་པའི་གནོད་སྦྱིན་གྱི་ཕྱག་མཚན་ནི། གཡས་ན་རལ་གྲི་འཛིན་པ། གཡོན་ན་ནོར་གྱི་བུམ་པ་བསྣམས་པའོ། །དེད་དཔོན་ནོར་གྱི་དབང་ཕྱུག་གོ །ཞེས་བྱ་བ་ནི་གནོད་སྦྱིན་གྱི་སྡེ་དཔོན་ནི་རྣམ་ཐོས་སྲས་ཡིན་ཏེ། །ནོར་གྱི་དབང་གིས་རྣམ་ཐོས་ཀྱི་ཡང་དེད་དཔོན་ནོ། །མ་རྒྱལ་རྒྱལ་ན་མཆེ་བ་གཙིགས། །ཞེས་བྱ་བ་ནི་རྒྱ་ནག་པོའི་ཡུལ་ན་གནས་པ་སྟེ། དེ་ནི་རྒྱ་ནག་པོའི་སྲུང་མར་འགྱུར་ཞིང་ཁྲིམས་རྣམས་གནོད་སྦྱིན་དེས་བྱས་པའོ། །དེའི་སྐུ་མདོག་དང་ཕྱག་མཚན་ནི། གཡས་དབྱུག་ཏོ་གཡོན་ན་ཞགས་པའོ། །ཁ་དོག་ནི་དམར་ནག་གོ །གནས་བཅས་ན་ནི་ནོར་བཟང་པོ། །ཞེས་བྱ་བ་ནི་དེ་ཡང་ལྕང་ལོ་ཅན་གྱི་གནས་ན་གནས་ལ། གནོད་སྦྱིན་དེའི་སྐུ་མདོག་དང་ཕྱག་མཚན་ནི། །སྐུ་མདོག་དཀར་པོ་གཡས་ན་རིན་པོ་ཆེའི་སྣོད། གཡོན་ན་གསེར་གྱི་མྱུ་གུའོ། །ཞི་བ་ཞི་བའི་གྲོང་ལེན་ན། །ཞེས་བྱ་བ་ནི་དེ་ནི་བལ་ཡུལ་གྱི་གནས་ཡིན་ནོ། །གནོད་སྦྱིན་ནི་ཞལ་བཞི་པ། ཕྱག་བརྒྱད་པ་སྐུ་མདོག་དཀར་པོ་དང་སྔོ་སྐྱ་དང་ལྗང་གུ་དང་མཐིང་ནག་ཏུ་གནས་པའོ། །ཕྱག་གཡས་གཡོན་གཉིས་ན་ཕྲེང་བ་དང་སྐྱབས་སྦྱིན། ཡང་གཡས་གཡོན་གཉིས་རྣ་རྩེ་གསུམ་དང་ཕྲེང་བ། དེའི་འོག་གཉིས་ན་འཁོར་ལོ་དང་དབྱུག་ཏོའོ། །ཐ་མ་གཉིས་ན་རྩེ་གསུམ་དང་
ཐོད་པའོ། །ཞི་བ་བཟང་པོ་འཇིགས་བྱེད་ན། །ཞེས་བྱ་བ་ནི་མཚོ་མ་དྲོས་ཀྱི་བྱང་ངོས་ནའོ། །གངས་ཀྱི་རི་ན་ཡོད་པ་སྟེ། གནོད་སྦྱིན་དེ་ནི་ཡབ་ཡུམ་དུ་བཅས་པ་སྐུ་མདོག་སེར་པོ། །གཡས་ཀྱི་ཕྱག་ན་ཏྲི་ཤཱུ་ལ། གཡོན་ན་ཕྲེང་བ་བསྣམས་པའོ། །ཡུམ་གྱི་ཕྱག་ན་ཨུཏྤ་ལ་བསྣམས་པའོ། །གནོད་སྦྱིན་དབང་པོ་དབང་གྲོང་ན། །ཞེས་བྱ་བ་ནི་རི་རབ་ཀྱི་རྩེ་མོ་ཕོ་བྲང་བལྟ་ན་སྡུག་པ་ནའོ། །གནོད་སྦྱིན་དེ་ནི་རྡོ་རྗེ་འཛིན་པ། སྐུ་མདོག་སེར་པོའོ། །མེ་ཏོག་ཏོག་ནི་རྡོ་གྲོང་ན། །ཞེས་བྱ་བ་ནི་དེ་ནི་དཔལ་གྱི་རིན་གནས་ཏེ། གནོད་སྦྱིན་དེ་ནི་གཟི་བརྗིད་ཆེ་ཞིང་སྟོབས་དང་ལྡན་པའོ། །ཕྱག་གཡས་ན་ཕྲེང་བ་འཛིན་པ། གཡོན་ན་བུམ་པ་བསྣམས་པའོ། །ཁ་དོག་དཀར་པོའོ། །ཤིང་པ་ཤིང་གི་གྲོང་ཁྱེར་ན། །ཞེས་བྱ་བ་ནི་དེ་ཡང་རིམ་ལ་ཡན་ཡོད་པ་སྟེ། དེ་ནི་ཙནྡན་གྱི་ཤིང་གི་བསུང་བའོ། །གནོད་སྦྱིན་དེའི་སྐུ་མདོག་དང་ཕྱག་མཚན་ནི། མདོག་སྔོ་བསངས་སུ་ཡོད་པ། ཕྱག་གཡས་ན་རལ་གྲི་ཡོད་པ། གཡོན་ན་ཕྲེང་བ་བསྣམས་པའོ། །ཁ་དོག་ཅན་ནི་སེར་སྐྱར་གནས། །ཞེས་བྱ་བ་ནི་ཡུལ་བོད་ཡུལ་ན་བཞུགས་ཏེ། བོད་ཡུལ་དབུས་ནའོ། །གནོད་སྦྱིན་དེ་ནི་གཡས་ན་འཁོར་ལོ། གཡོན་ན་གཤོལ་མདའ་འཛིན་པའོ། །སྐུ་མདོག་ལྗང་གུར་གནས་པའོ། །ནོར་བུ་བཟང་དང་གང་བ་བཟང༌། །ཞེས་བྱ་བ་ནི་རྣམ་ཐོས་སྲས་ཀྱི་འཁོར་ཕོ་བྲང་ལྕང་ལོ་ཅན་ན་གནས་པའོ། །དེ་གཉིས་ཀྱི་སྐུ་མདོག་དང་ཕྱག་མཚན་ནི་ཁ་དོག་གསེར་པོ་དང༌། དཀར་པོའོ། །གཡས་རྣམས་ན་རིན་པོ་ཆེའི་མྱུ་གུ་དང་ནོར་གྱིས་གང་བའི་བུམ་པའོ། །གཡོན་རྣམས་ན་ནོར་གྱི་རྒྱལ་བ་དང་འབྲུ་སྣ་ཚོགས་ཀྱིས་གང་བའི་བུམ་པ་བསྣམས་པའོ། །སྦུ་ན་གཉིས་ཚངས་པ་ལྡན་པའོ། །ཞེས་བྱ་བ་ནི་ནོར་བུ་བཟང་དང་གང་བ་བཟང་གཉིས་ཏེ། གཟི་བརྗིད་ཆེ་ཞིང་ནོར་ཕུན་སུམ་ཚོགས་པའོ། །བ་ལང་འཛིན་ན་འཇོམས་པ་པོ། །ཞེས་བྱ་བ་ནི་གནས་བལ་ཡུལ་གྱི་བྱང་ངོས་ཡིན་ཏེ། གནོད་སྦྱིན་དེ་ནི་ཤིན་ཏུ་ཁྲོ་ཞིང་གདུག་ཕའོ། །ཕྱག་གཡས་གཡོན་གཉིས་ན་ཏྲི་ཤཱུ་ལ་དང་དགྲ་སྟ་འཛིན་པ། ཁ་དོག་ནག་པོའོ། །རབ་ཏུ་འཇོམས་པ་རྡོ་འཇོག་ན། །ཞེས་བྱ་བ་ནི་
དེའི་ལྷོ་ཕྱོགས་ན་ཡོད་དེ། ཤིན་ཏུ་སྟོབས་ཆེ་ཞིང་སེམས་ཅན་རྣམས་ལ་གནོད་པ་བྱེད་པའོ། །དེའི་ཁ་དོག་ནི་ལྗང་གུར་ཡོང་བ། བཞིན་མི་སྡུག་པ། གཡས་རལ་གྲི་གཡོན་ཞགས་པ་བསྣམས་པའོ། །གནོད་སྦྱིན་ཆེན་པོ་བོད་སྲུང་སེལ། །ཞེས་བྱ་བ་ནི་བོད་ཡུལ་དུ་གནས་ཏེ། གནོད་སྦྱིན་དེ་ཡང་སྲུང་མ་ལ་དགའ་ཞིང་གནས་པ་གཡས་ན་དགྲ་སྟ་གཡོན་ན་ཞགས་པ་བསྣམས་པའོ། །ཁ་དོག་ཐལ་བའི་མདོག་ཅན་ནོ། །སྐྱུགས་པ་ཡི་ནི་རི་ལ་གནས། །ཞེས་བྱ་བ་ནི་འཛམ་བུའི་གླིང་གི་ལྷོ་ཕྱོགས་ན་གནས་པ་སྟོབས་པོ་ཆེ་ལ་གཟི་བརྗིད་ལྡན་དེའི་ཁ་དོག་ཕྱག་མཚན་ནི། ཁ་དོག་དམར་པོ་གྲི་གུག་དང་ཐོད་པ་འཛིན་པའོ། །གསུམ་སྦས་འགྲམ་པ་ལྡན་དོགས་ན། །ཞེས་བྱ་བ་ནི་ལངྐའི་ལྷོ་ཕྱོགས་ན་རྒྱ་མཚོའི་འགྲམ་ནའོ། །གནོད་སྦྱིན་དེ་ནི་གདོང་དམར་པོ་སྤྲེའུའི་གཟུགས་སུ་ཡོད་པའོ། །གཡས་པ་ཁུ་ཚུར་གཡོན་སྡིགས་མཛུབ་བོ། །ཧོ་ནུ་ན་ནི་འོད་བྱེད་པ། །ཞེས་བྱ་བ་ནི་ལངྐའི་ནུབ་ཕྱོགས་ན་རྒྱ་མཚོའི་བར་ནའོ། །གནོད་སྦྱིན་མདོག་སེར་པོ། གཡས་ན་ཨ་སོ་ཀའི་ཤིང་ཐོགས་པ། གཡོན་ན་ཞགས་པ་ཐོགས་པའོ། །དགའ་བ་ཅན་དང་འཕེལ་བྱེད་པ། །ཞེས་བྱ་བ་ནི་ཡུལ་མ་ག་དྷའི་ལྷོ་ནུབ་མཚམས་ན་གནས་པའོ། །གནོད་སྦྱིན་དེ་ནི་རྡོ་རྗེ་འཛིན་ཅིང་ཁ་དོག་མཐིང་གར་གནས་པའོ། །དགའ་བ་འཕེལ་བྱེད་གྲོང་ཁྱེར་ན། །ཞེས་བྱ་བ་ནི་དེའི་ཤར་ཕྱོགས་ན་གནོད་སྦྱིན་ཞལ་གཅིག་ཕྱག་གཉིས་པ། གཡས་ན་ནོར་གྱི་རྒྱལ་བུ་བསྣམས་པ་གཡོན་ན་སྦྲུལ་གྱི་ཞགས་པ། ཁ་དོག་ལྗང་གུའོ། །རླུང་གི་ས་ན་རླུང་ལྡན་པ། །ཞེས་བྱ་བ་ནི་འཛམ་བུ་གླིང་གི་ཆུ་ཀླུང་གང་ན་ཡོད་པའི་ས་ན་ཡོད་དེ། སྐད་ཅིག་མས་ཁྱབ་ཅིང་ཆུ་ཀླུང་གང་ན་ཡོད་པར་མངའ་མཛད་པ། དེའི་སྐུ་མདོག་ཕྱག་མཚན་ནི། ཕྱག་གཡས་ན་དབྱུག་ཏོ་འཛིན་པ། གཡོན་སྡིགས་མཛུབ་པོ།། ལ་དོག་ཁྲ་བོར་ཡོད་པ། སྨད་སྦྲུལ་དུ་ཡོད་པའོ། །འཕྱང་བར་གྱུར་ན་འཐབ་དགའ་བ། །ཞེས་བྱ་བ་ནི་དེ་ཡང་རྒྱ་ནག་པོའི་ནུབ་ཕྱོགས་ན་གྲོང་ཁྱེར་རྩོད་ཀ་ནའོ། །གནོད་སྦྱིན་ཞལ་གཅིག་ཕྱག་གཉིས་པ་སྐུ་མདོག་དམར་པོ་གཡས་ན་རལ་གྲི་གཡོན་ཞགས་པ་བསྣམས་
པའོ། །འོག་མ་གཉིས་ན་མདའ་གཞུ་འགེངས་པའོ། །གནོད་སྦྱིན་དེས་སྐད་ཅིག་མས་ཁྱབ་ནས། རྩོད་པའི་སེམས་དང་ལྡན་པར་བྱེད་པའོ། །བཅོམ་བརླག་ན་ནི་བོང་བུ་བ། །ཞེས་བྱ་བ་ནི་ཡུལ་ལངྐ་ནི་རྒྱ་མཚོའི་འགྲམ་ན་ཡོད་པ། ཤིན་ཏུ་འཇིགས་པའི་ཚུལ་ཅན་སེམས་ཅན་ལ་གནོད་ཅིང་ཤ་ཁྲག་ཟ་བ། དེའི་ཁ་དོག་ནི་དམར་ནག་གོ །ཕྱག་ན་སྦྲུལ་གྱི་ཞགས་པ་བསྣམས་པའོ། །ལངྐ་ན་ནི་བུམ་པའི་ལྟོ། །ཞེས་བྱ་བ་ནི་འཛམ་བུ་གླིང་གི་ལྷོ་ནུབ་མཚམས་ཡིན་ཏེ། གཟུགས་ནི་དཔག་ཚད་བཅུ་ཡོད་པ། ཤིན་ཏུ་གནག་ལ་འཇིགས་པ་ལངྐའི་བདག་པོའི་ནུ་བོ། །ཕྱག་བརྒྱད་ཡོད་པ་གཡས་ན་རལ་གྲི་།བར་པ་གཉིས་འཁོར་ལོ་དང་ཤཀྟི་།ཐ་མ་ན་མདའ། གཡོན་དང་པོ་ན་ཞགས་ཕ་འཕང་མདུང་དགྲ་སྟ་རྩེ་གསུམ་མོ། །གནོད་སྦྱིན་དེ་ནི་སྟོབས་ཆེ་བ་རི་རབ་ཙམ་སྒུལ་བའོ། །གནོད་སྦྱིན་ཉི་འོད་རབ་ཉམས་ན། །ཞེས་བྱ་བ་ནི་ནམ་མཁའ་ལ་རྒྱུ་བ་ཉི་མའི་འོད་བཞིན་དུ། འཇིག་རྟེན་གྱི་ཁམས་ཁྱབ་པ་གཟི་བརྗིད་ཆེ་བ། དེའི་ཁ་དོག་ནི་དམར་པོ། ཕྱག་གཡས་གཡོན་ན་དུང་དང་པདྨ་དམར་པོ་བསྣམས་པའོ། །སྐད་ཅིག་མས་འཇིག་རྟེན་གྱི་ཁམས་རྒྱུ་བའོ། །ཀོ་ས་ལ་ནི་རི་མགོ་བོ། །ཞེས་བྱ་བ་ནི་ཡུལ་མ་ག་དྷཱའི་ལྟོ་ཕྱོགས་ན་གནོད་སྦྱིན་སྟོབས་ལྡན་ཡོད་དེ། འོད་ཉི་མ་ཤར་བ་དང་འདྲ་བ། ཤིན་ཏུ་དམར་བའོ། །སངས་རྒྱས་ཀྱི་བསྟན་པ་སྲུང་བའོ། །ཞལ་གཅིག་ཕྱག་གཉིས་པ། གཡས་འཁོར་ལོ་གཡོན་ཞགས་པ་བསྣམས་པའོ། །རྣམ་པར་རྒྱལ་དང་རྣམ་རྒྱལ་ལྡན། །ཞེས་བྱ་བ་ནི་གནོད་སྦྱིན་དེ་ཡང་ཕམ་པར་མི་འགྱུར་ཞིང༌། གཞན་རྣམས་ཀྱི་ས་མི་ཐུབ་པའོ། །དཀར་པོ་བཅོམ་བརླག་ཡུལ་ན་གནས། །ཞེས་བྱ་བ་ནི་གནོད་སྦྱིན་དེ་ནི་སྦུན་ལྔ་གནས་ཏེ། དཔག་ཚད་རིང་དང་འཇིགས་པ་དང་རྣ་བ་ཅན་དང་གཟུགས་ཅན་དང་བུམ་སྣ་ལོ། དེ་རྣམས་ཀྱི་ཁ་དོག་ནི་དཀར་པོ་དང༌། ནག་པོ་དང༌། སེར་པོ་དང༌། དམར་པོ་དང༌། ལྗང་གུའོ། །ཕྱག་མཚན་ནི་འཁོར་ལོ་དང༌། དབྱུག་ཏོ་དང༌། མདའ་གཞུ་དང༌། འཕང་མདུང་དང༌། མདུང་རིངས་རྣམས་སོ། །གནོད་སྦྱིན་གང་བ་མ་ལ་ཡར། །ཞེས་བྱ་བ་ནི་མ་ག་དྷཱའི་
ལྷོ་ཕྱོགས་རྒྱ་མཚོའི་འགྲམ་ན་རི་བོ་མ་ལ་ཡ་ན་དེའི་མངའ་བདག་ཏུ་མཛད་པ་ཁ་དོག་དཀར་པོ། །ཕྱག་ན་ཙནྡན་གྱི་བེ་ཅོན་འཛིན་པའོ། །ཏི་སེ་གངས་ན་མི་འམ་ཅི། །ཞེས་བྱ་བ་ནི་མདའ་སྟོད་ན་གནས་ཏེ་གནོད་སྦྱིན་རྟ་མགོ་ཅན་གནས་པ། ཁ་དོག་དམར་པོ་དབྱུག་ཏོ་འཛིན་པའོ། །སྤྲིན་གྱི་ཕྲེང་ཅན་པོནྟྲ་ན། །ཞེས་བྱ་བ་ནི་ལི་ཡུལ་ན་གནས་པ་སྟེ། གནོད་སྦྱིན་སྤྲིན་གྱི་མགོ་ཅན། ཕྱག་ན་ཉི་མ་དང་ཟླ་བ་བསྣམས་པའོ། །རབ་ཏུ་གནས་ན་དུམ་བུ་པ། །ཞེས་བྱ་བ་ནི་དེ་ཡང་ཨུ་རྒྱན་ན་གནས་པ་སྟེ། གནོད་སྦྱིན་དེའི་ཁ་དོག་ནི་དཀར་པོ་ཕྱག་གཡས་གཡོན་གཉིས་ན་གྲི་གུག་དང་ཐོད་པ་བསྣམས་པའོ། །པི་ཏངྐ་ལྱ་ར་ཡང་དག་བྱེད། །ཅེས་བྱ་བ་ནི་བོད་ཡུལ་དབུས་ཆུ་ཤར་ནས་ནུབ་ཏུ་འབབ་པའི་ས་ན་གནས་ཏེ། གནོད་སྦྱིན་དེ་ནི་ཁ་དོག་དམར་ནག །ལག་པ་གཉིས་ན་ཙནྡན་གྱི་བེ་ཙོན་འཛིན་པའོ། །དེའི་ས་ཕྱོགས་ཀྱི་སྲུང་མར་གྲགས་པའོ།། རླབས་དང་ལྡན་ན་བདེ་བྱེད་པ། །ཞེས་བྱ་བ་ནི་གནོད་སྦྱིན་དེ་སེམས་ཅན་རྣམས་ཀྱིས་བསྒྲུབས་པར་གྱུར་ན། མཐུ་དང་ལྡན་ཞིང་དངོས་གྲུབ་སྟེར་བའོ། །སྣ་ནས་བྱུང་ན་གནོད་སྦྱིན་མཛེས། །ཞེས་བྱ་བ་ནི་བོད་ཡུལ་དབུས་ཆུ་ཤར་ཕྱོགས་སུ་འབབ་པའི་ས། ཆུ་ཀླུང་བྱང་ནས་ལྷོར་འབབ་པ་དེའི་མདོ་ན་གནས་པའོ། །སྐད་ཅིག་མས་འཇིག་རྟེན་ཁམས་རྒྱུ་ནུས་པ། དང་པོ་ཤར་ཕྱོགས་ནས་བྱུང་ནས། །རབ་ཏུ་བྱུང་བའི་ཚུལ་དུ་གནས་པ། དེ་ནི་སེམས་ཅན་རྣམས་ལ་གནོད་པ་དྲག་པོ་བྱེད་པ་སྟེ། གནས་དེའི་སྲུང་མར་གནས་པའོ། །གསོ་བའི་མཐའ་ན་མ་ཆགས་པ། །ཞེས་བྱ་བ་ནི་དེའི་བྱང་ངོས་ན་གནོད་སྦྱིན་ཁ་དོག་དཀར་པོ་ཅན་ཡོད་དེ། དེ་ཡང་ས་བདག་གི་ཚུལ་དུ་ཡོད་པ། དེ་བས་ཀྱང་སྐད་ཅིག་མས་འཇིག་རྟེན་ཁམས་རྒྱུ་ནུས་པ། ཁ་དོག་དཀར་པོ་སྦྲུལ་ཞགས་འཛིན་པའོ། །དགའ་བྱེད་དེ་ནི་ཕ་དགའ་བ། །ཞེས་བྱ་བ་ནི་དེ་ནི་ཁམས་ཀྱི་ཡུལ་ན་གནས་ཏེ། དེ་ཡང་ཕ་སྤད་དུ་ཡོད་པ། སེམས་ཅན་རྣམས་ལ་ཕན་འདོགས་པ། དེ་གྲུབ་པར་གྱུར་ན་ཕྱུག་པོར་འགྱུར་རོ། །དེ་གཉིས་ཀྱི་ཁ་དོག་ནི་ནག་པོ་དང་སེར་པོ་གཉིས་ཀས་ནོར་གྱི་རྐྱལ་པ་བསྣམས་པའོ། །དཔའ་དང་གསེར་གྱི་ལག་པ་དང༌། །ཞེས་བྱ་བ་
ནི་རྒྱ་གར་གྱི་ཡུལ་ལྷོ་ཕྱོགས་ན་གནས་པའོ། །ཤིན་ཏུ་སྟོབས་དང་ལྡན་པ། གཞན་རྣམས་ཀྱིས་མི་ཐུབ། གསེར་གྱི་མདོག་ཅན་གསེར་གྱི་བུམ་པ་གང་བ་བསྣམས་པའོ། །ཀ་ལིངྐ་ན་ལྟོ་འཕྱང་པོ། །ཞེས་བྱ་བ་ནི་དེ་ཡང་རྒྱ་གར་ཡུལ་གྱི་དབུས་ཀྱི་ལྷོ་ཕྱོགས་ན་གནོད་སྦྱིན་ཁ་དོག་ནག་པོ་ཕྱག་ན་འཁོར་ལོ་བསྣམས་པའོ། །ཀོ་ས་ལ་ན་ནག་པོ་ཆེ། །ཞེས་བྱ་བ་ནི་ཡུལ་མ་གདྷཱ་ན་ཡིན་ཏེ། གནོད་སྦྱིན་ནག་པོ་ཆེན་པོ་ཡིན་ཏེ་དེ་ཡང་ཞལ་གཅིག་ཕྱག་གཉིས་པ་སྐུ་མདོག་ནག་པོ་གཡས་གྲི་གུག་གཡོན་ཐོད་པ་བསྣམས་པའོ། །དགེ་བ་དགེ་བའི་ཕོ་བྲང་ན། །ཞེས་བྱ་བ་ནི་དེ་ཡང་རྒྱ་གར་གྱི་དབུས་ནའོ། །གནོད་སྦྱིན་དགེ་བ་ནི་སེམས་ཅན་རྣམས་ལ་གནོད་པ་མི་བྱེད་སྡིག་པ་མི་བྱེད་ཅིང་དགེ་བ་ལ་གནས་པའོ། །དེ་ནི་དགེ་བའི་སེམས་ཀྱིས་མེ་ཏོག་གི་སྣོད་འཛིན་པ་ཁ་དོག་དཀར་པོའོ། །ཝཱ་རཱ་ཎ་སཱི་ར་སྐྱོང་བ་པོ། །ཞེས་བྱ་བ་ནི་རྒྱ་གར་ཡུལ་གྱི་དབུས་ཝཱ་རཱ་ཎ་སཱི་ན་གནོད་སྦྱིན་ཁ་དོག་དམར་པོ་དབྱུག་ཏོ་དང་ཞགས་པ་བསྣམས་པའོ། །འགྲམ་ལྡན་ཕུང་པོར་རྣ་བ་བཟང༌། །ཞེས་བྱ་བ་ནི་བོད་ཡུལ་རྩད་ན་གནས་པ་སྟེ། གནོད་སྦྱིན་དེ་ཡང་རྣ་བ་ཆེ་བ་བུམ་ལྟོ་ཁ་དོག་ནག་པ། གཡས་ན་ནོར་གྱི་བུམ་པ། གཡོན་ན་ནེའུ་ལེའི་རྐྱལ་པ་བསྣམས་པའོ། །གྲོང་ཁྱེར་དྲུག་ན་ནོར་གཞན་པོ། །ཞེས་བྱ་བ་ནི་གྲོང་ཁྱེར་ཡངས་པ་ཅན་དང་ཀ་ལིངྐ་དང༌། རྒྱལ་བོའི་ཁབ་དང༌། མཉན་ཡོད་དང༌། ཝཱ་རཱ་ཎ་སཱི་དང༌། ཙམ་པ་ཀ་དང་དྲུག་ལ་སྐད་ཅིག་མས་རྒྱུ་བའོ། །ཤིན་ཏུ་སྟོབས་དང་ལྡན་ཞིང་ཡུལ་དེའི་སྲུང་མར་གྱུར་པ། ཁ་དོག་གསེར་གྱི་ཁ་དོག་ཅན་གཡས་ན་རིན་པོ་ཆེའི་མྱུ་གུ་།གཡོན་ན་བུམ་པ་བསྣམས་པའོ། །གནོད་སྦྱིན་སྟོབས་ཅན་མཐའ་མ་ན། །ཞེས་བྱ་བ་ནི་དེ་ཡང་བལ་ཡུལ་གྱི་མཐའ་ཁོབ་ན་གནས་ཏེ། །སེམས་ཅན་ལ་གནོད་པ་བྱེད་པ་ཁ་དོག་ནག་པོ་སྦྲུལ་གྱི་ཞགས་པ་འཛིན་པའོ། །སྲུང་བ་ཅན་ན་མཐོང་དགའ་བ། །ཞེས་བྱ་བ་ནི་འབྲོག་གནས་ཐང་སྟོང་རྣམས་ལ་གནས་ཏེ། སེམས་ཅན་ལ་དགའ་བར་བྱེད་པའོ། །ཁ་དོག་སྔོ་བསངས་སུ་ཡོད་པ། །ཕྱག་ན་བུམ་པ་བསྣམས་པའོ། །བ་ལང་འཇོམས་ན་གཙུག་ཕུད་ཅན། །ཞེས་བྱ་བ་ནི་རི་རབ་ཀྱི་ནུབ་ཕྱོགས་ཀྱི་གླིང་ན་གནས་པའོ། །ཁ་དོག་དམར་པོ་པདྨ་དང་ནོར་གྱི་རྒྱལ་པ་འཛིན་པའོ། །ཕྱོགས་མཚམས་ན་ནི་ཐལ་མོ་དགའ།།
ཞེས་བྱ་བ་ནི་གླིང་བར་བཞིན་གནས་པ་སྟེ། གནོད་སྦྱིན་དེ་ཡང་སྐད་ཅིག་མས་རྒྱུ་ཞིང་གླིང་རྣམས་ཁྱབ་པའོ། །དེ་ནི་མདོག་ནག་ཕ་འཁོར་ལོ་མངའ་གཞུ་བསྣམས་པའོ། །གདུགས་འདྲ་ན་ནི་དཀྲིས་པ་པོ། །ཞེས་བྱ་བ་ནི་དེ་ཡང་ཡུལ་དབུས་ནའོ། །གནོད་སྦྱིན་ཁ་དོག་དཀར་པོ་ཕྱག་ན་གདུགས་བསྣམས་པའོ། །གྲོང་ཁྱེར་གསུམ་ན་ཆུ་སྲིན་འདུལ། །ཞེས་བྱ་བ་ནི་ཡངས་པ་ཅན་དང༌། མཉན་ཡོད་དང་རྒྱལ་པོའི་ཁབ་དང་གསུམ་མོ། །དེ་ལ་རེས་རྒྱུ་ཞིང་སྟོབས་དང་ལྡན་པའོ། །ཞལ་གསུམ་ཕྱག་དྲུག་པ་སྐུ་མདོག་ནག་པོ། གཡས་པ་རྣམས་ན་གྲི་གུག་དང་རལ་གྲི་རྩེ་གསུམ་མོ། །གཡོན་རྣམས་ན་ཐོད་པ་ཞགས་པ་དགྲ་སྟའོ། །དེ་གསུམ་ནི་གྲོང་ཁྱེར་གྱི་སྲུང་མའོ། །ཚད་ཚིང་གཅིག་ན་མིག་ཡངས་པ། །ཞེས་བྱ་བ་ནི་བལ་ཡུལ་གྱི་མཐིལ་ན་གནས་པ་སྟེ་གནོད་སྦྱིན་མིག་གཅིག་ཏུ་གནས་པ་ས་བདག་གི་རིགས་ཁ་དོག་ནག་པོ་ཞགས་པ་ནག་པོ་དང་སྦྲུལ་ཞགས་བསྣམས་པའོ། །ཨུ་རུམྺཱ་རར་སྒོ་ངའི་འོད། །ཅེས་བྱ་བ་ནི་རྒྱ་གར་ཤར་ཕྱོགས་ནའོ། །གནོད་སྦྱིན་དེ་ནི་མདོག་དཀར་པོ་མེ་ཏོག་པདྨ་འཛིན་པའོ། །ཀཽ་ཤཱ་མྦཱི་ན་ལྷུན་གྱིས་གྲུབ། །ཅེས་བྱ་བ་ནི་གྲོང་ཁྱེར་ཆེན་པོ་ལྷོ་ཕྱོགས་ན་གནོད་སྦྱིན་ཁ་དོག་སེར་པོ་ཕྱག་གཡས་ན་ཤིང་ཐོག་གཡོན་ནེའུ་ལེ་བསྣམས་པའོ། །རྣམ་པར་སྣང་བྱེད་ཞིང་ལྡན་ན། །ཞེས་བྱ་བ་ནི་ཤར་ཕྱོགས་ཀྱི་གླིང་ན་གནས་པ་གནོད་སྦྱིན་དེ་མདོག་དཀར་པོ་འཁོར་ལོ་འཛིན་པའོ། །སྤྲུལ་གྱི་གདུགས་ན་དགའ་བ་པོ། །ཞེས་བྱ་བ་ནི་རྒྱ་གར་ཡུལ་གྱི་ནུབ་ངོས་ན་སྦྲུལ་ཡུལ་ན་གནོད་སྦྱིན་དེ་ཡང་སྦྲུལ་གྱི་གདོང་པ་ཅན་ཡུལ་དེའི་ཁྲིམས་མཛད་པའོ། །གཡོ་བ་འཛིན་ན་སེར་སྐྱའོ། །ཞེས་བྱ་བ་ནི་ཡུལ་དེའི་ལྷོ་ངོས་ན་གནོད་སྦྱིན་ཁ་དོག་སེར་སྐྱ་གནས་པའོ། །དེའི་ཕྱག་ན་བུམ་པ་དང་སྦྲུལ་ཞགས་བསྣམས་པའོ། །གྱེན་དུ་འགྲོ་ན་བ་ཀུ་ལ།། ཞེས་བྱ་བ་ནི་ཤར་ཕྱོགས་ཀོ་ལ་ཧ་རིའི་དུར་ཁྲོད་ན། གནོད་སྦྱིན་བ་ཀུ་ལ་ནི་སྐུ་མདོག་ཤིན་ཏུ་འཇིགས་པའོ། །གནས་དེར་མཚན་མོ་འགྲོར་མི་བཏུབ། ཕྱག་བཞི་པ་གཡས་གཡོན་གཉིས་ནི་མིའི་པགས་པ་འཕྱར་བའོ། །དེའི་འོག་གཉིས་ན་གྲི་གུག་དང་ཐོད་པ་བསྣམས་
པའོ། །གང་པོ་སྙིང་པོ་ཐོབ་བྱེད་ན། །ཞེས་བྱ་བ་ནི་དུར་ཁྲོད་དེའི་ཕྱོགས་ན་ཀེང་རུས་བྱ་བའི་དུར་ཁྲོད་དོ། །གནོད་སྦྱིན་ཧ་ལ་ཧ་ལ་ཞེས་པ་གནས་སོ། །དེའི་སྐུ་མདོག་མཐིང་ག །བེ་ཅོན་དང་ཐོད་པ་བསྣམས་པའོ། །གྲོང་རྡལ་ཚོལ་བ་རྡ་མོད་ན། །ཞེས་བྱ་བ་ནི་སྟག་གཟིག་གི་ཡུལ་ཡིན་ཏེ། གནོད་སྦྱིན་རྔ་མོའི་མགོ་ཅན། མདོག་ལྗང་གུ་དགྲ་སྟ་དང་ཞགས་པ་བསྣམས་པའོ། །གླང་ཆེན་བརྗོད་པ་འདུལ་བ་མཆོག །ཅེས་བྱ་བ་ནི་རྒྱ་གར་ཡུལ་གྱི་ཤར་ཕྱོགས་བྷང་ག་ལ་ན། གླང་ཆན་གྱི་མགོ་ཅན་གནོད་སྦྱིན་ཁ་དོག་དཀར་པོ། དགྲ་སྟ་དང་ཕྲེང་བ་འཛིན་པའོ། །ཆུ་ལྷའི་ཡུལ་ན་གཞུ་བརྟན་པོ། །ཞེས་བྱ་བ་ནི་རྒྱ་མཚོའི་ནང་ན་གནས་པ་སྟ། གནོད་སྦྱིན་དེ་ནེ་ཁ་དོག་དཀར་ཞིང་དུང་བསྣམས་པའོ། །གཡུལ་འགྱེད་ལྡན་པ་གྲོང་ཁྱེར་རྒྱལ། །ཞེས་བྱ་བ་ནི་མ་ག་དྷཱའི་གྲོད་ཁྱེར་སོ་མཚམས་ན། གནོད་སྦྱིན་དེ་ཡང་གཞན་གྱིས་མི་ཐུབ་པ། སྟོབས་དང་ལྡན་པ། ཁ་དོག་དང་ལྡན་པ། ཕྱག་གཡས་གཡོན་མཚོན་སྣ་ཚོགས་བསྣམས་པའོ། །སྒྲ་ངན་ཞིང་ན་གནོད་སྦྱིན་རྒྱལ། །ཞེས་བྱ་བ་ནི་རྒྱ་གར་གྱི་ཡུལ་ནུབ་ཕྱོགས་ན་གནོད་སྦྱིན་ལེན་པ། དེ་ལ་བྱིན་པར་གྱུར་པ་ན། ཉུང་བར་བྱིན་ཡང་འཕེལ་བར་འགྱུར་རོ། །དེའི་ཁ་དོག་ནི་ཤིན་ཏུ་དཀར་བ་གསེར་གྱི་སྣོད་འཛིན་པའོ། །གཉི་དང་རྒྱལ་ངན་རྒྱལ་གཉི་ན། །ཞེས་བྱ་བ་ནི་དེའི་བྱང་ཕྱོགས་ན་ཡོད་དེ་གནོད་སྦྱིན་གྱི་དེད་དཔོན་དུ་གྲགས་པ། དེའི་ཁ་དོག་ནི་ནག་མོ། གཡས་ན་རིན་པོ་ཆེ་གཡོན་ན་ནོར་གྱི་རྐྱལ་བུའོ། །གནོད་སྦྱིན་མོར་གྲགས་དེ་ཉིད་ན། །ཞེས་བྱ་བ་ནི་དེ་གནོད་སྦྱིན་སྦུན་བཞི་གནས་ཏེ། ཆེན་མོ་ནི་བ་ལ་ཡུལ་ན་གནས་ལ་འབྲིང་མོག་ཉིས་ནི་མང་ཡུལ་དང་འགྲམ་ན་གནས་ཏེ། ཆུད་ཐག་ནི་བོད་ཡུལ་དབུས་ན་གནས་སོ། །དེ་རྣམས་ཀྱི་ཁ་དོག་ནི་ནག་མོ། སེར་མོ་དམར་མོ། །ལྗང་གུའོ། །དེ་རྣམས་ཀྱི་ཕྱག་མཚན་ནི། གྲི་གུག་དང༌། ཐོད་པ་དང༌། དགྲ་སྟ་དང༌། རྩེ་གསུམ་མོ།། གཡོན་པ་རྣམས་ན་ཁ་ཊྭཱ་ག་བསྣམས་པའོ། །གཏུམ་ཆེན་གསེར་གྱི་འོག་པག་ཅན། །ཞེས་བྱ་བ་ནི་སྦུན་དེ་བཞི་ཀ་ཡང་ཁྲོ་མོར་གནས་པ། གསེར་གྱི་འོད་དང་ལྡན་པའོ། །གནོད་པར་བྱེད་དང་དོན་གྲུབ་དང༌། །ཞེས་བྱ་བ་ནི་གཙང་གི་ཡུལ་ན་གནས་ཏེ་དེ་ནི་སྦུན་གཉིས་ཡིན་ཏེ་གནོད་པ་
དང་ཕན་པ་བྱེད་པ་ཁ་དོག་ནི་དཀར་པོ་དང༌། ནག་པོ་ཕྱག་གཡས་ན་གྲི་གུག་དང་ཐོད་པ། གཡོན་དབྱུག་ཏོ་བསྣམས་པའོ། །འབྱུང་བར་བྱེད་པ་ནགས་ན་གནས། །ཞེས་བྱ་བ་ནི་རྒྱ་མཚོའི་འགྲམ་ཟངས་གླིང་གི་ནགས་གསེབ་ནའོ། །ཁ་དོག་ནག་པོ་ཕྱག་གཡས་ན་རལ་གྲི་བསྣམས་པའོ། །འགྲོ་བ་དྲུག་པ་འགྲོ་འཇོམས་ན། །ཞེས་བྱ་བ་ནི་མ་ག་དྷཱའི་ཡུལ་གནོད་སྦྱིན་རྐང་དྲུག་པ་ཡོད་པ། དེའི་ཁ་དོག་ནི་དམར་པོ་གཡས་ན་འཁོར་ལོ་གཡོན་ཞགས་པའོ། །ཀ་བ་ན་ནི་ཀ་བ་ཉིད། །ཅེས་བྱ་བ་ནི་དེའི་བྱང་ཕྱོགས་ན་གཟུགས་ཆེ་ལ་ནག་པ་དགྲ་སྟ་དང་ཐོད་པ་བསྣམས་པའོ། །སེང་གེའི་སྟོབས་ན་གནོད་སྦྱིན་གང༌། །ཞེས་བྱ་བ་ནི་ཕྱིའི་རྒྱ་མཚོའི་ཚལ་ན། སེང་གེའི་ཡུལ་ན་གནོད་སྦྱིན་སེང་གེའི་གདོང་ཅན་གནས་པ། ཕྱག་བཞི་པ་སྐུ་མདོག་དཀར་པོ། གཡས་གཉིས་ན་འཁོར་ལོ་དང་ཨ་འབྲས་འཛིན་པ། གཡོན་གཉིས་དབྱུག་ཏོ་དང་དུང་བསྣམས་པའོ། །སེང་གེ་སྟག་སྟོབས་མེད་བྱེད་གཉིས། །ཞེས་བྱ་བ་ནི་སེང་གེའི་གླིང་དཔག་ཚད་ལྔ་བརྒྱའི་ལྷོ་ཕྱོགས་ན། སྟག་གདོང་ཅན་གྱི་གླིང་ན་གནོད་སྦྱིན་སྟག་ཅེས་བྱ་བ། གནོད་སྦྱིན་ཐམས་ཅད་སྟག་གི་གདོང་བ་ཅན། ཕྱག་བཞི་བཞི། གཡས་པ་རྣམས་ནི་དབྱུག་ཏོ་དང་ལྕགས་ཀྱུ། གཡོན་གཉིས་ན་གྲི་གུག་དང་ཐོད་པ་བསྣམས་པའོ། །བྱེ་བ་འབབ་ན་སྡེ་བོ་ཆེ། །ཞེས་བྱ་བ་ནི་དེའི་བྱང་ཕྱོགས་དཔག་ཚད་ལྔ་བརྒྱ་ན། ཁྱི་ལིང་ཞེས་བྱ་བ་གནོད་སྦྱིན་གྱི་གདོང་ཅན་གནས་པའོ། །དེའི་མདོག་ནག་པ་ཕྱག་ན་དགྲ་སྟ་བསྣམས་པའོ། །དེ་བཞིན་གཞན་གྱི་གྲོང་ལས་རྒྱལ། །ཞེས་བྱ་བ་ནི་འཛམ་བུ་གླིང་ན་འཁོར་ཞིང་རྒྱ་གར་དབུས་སུ་གནས་པ་ཁ་དོག་དམར་པོ་ཕྱག་ན་གཏུན་ཤིང་བསྣམས་པའོ། །མེ་ཏོག་སོ་ནི་ཙམ་པ་ན། །ཞེས་བྱ་བ་ནི་དེ་ཡང་རྒྱ་གར་ཡུལ་གྱི་ཤར་ཕྱོགས་ན། གནོད་སྦྱིན་ཁ་དོག་དཀར་པོ་ཕྱག་ན་དགྲ་སྟ་བསྣམས་པའོ།། མཉམ་དགའ་བ་ནི་རི་མངས་ན། །ཞེས་བྱ་བ་ནི་རི་ནག་པོ་དང་མ་ལ་ཡ་དང་དཔལ་གྱི་རི་དང་བྱ་རྒོད་ཕུང་པོའི་རིལ་སོགས་བ་སྐད་ཅིག་མས་རྒྱུ་ཞིང་རིའི་རྩེ་མོ་རྣམས་ལ་འདུག་པ། སྟོབས་དང་ལྡན་ཞིང་གཟི་བརྗིད་ཆེ་བའོ། །ནམ་མཁའི་མདོག་ཅན་ཕྱག་ན་ཞགས་པ་བསྣམས་པའོ། །
བ་ལང་སྦྱོར་ན་གནོད་སྦྱིན་རི། །ཞེས་བྱ་བ་ནི་ནུབ་ཕྱོགས་བ་ལང་སྤྱོད་ཀྱི་རི་མཚམས་ན། གནོད་སྦྱིན་ཁ་དོག་ནག་པ། ཡུལ་དེའི་སྲུང་མར་གྱུར་པ། གཡས་གཡོན་གཉིས་ན་བུམ་པ་བསྣམས་པའོ། །གྲོང་ཁྱེར་ན་ནི་སྡེ་བཟང་པོ། །ཞེས་བྱ་བ་ནི་མ་ག་དྷཱའི་གྲོང་ཁྱེར་ཡངས་པ་ཅན་ན། འཁོར་གཡོག་མང་པོ་ཡོད་པ། སྟོབས་དང་ལྡན་པ། ཁ་དོག་སེར་བ། གཡས་ན་རིན་པོ་ཆེ་བསྣམས་པ། གཡོན་བུམ་པ་བསྣམས་པའོ། །གནས་དང་བཅས་ན་ལག་པ་དཔའ། །ཞེས་བྱ་བ་ནི་ཆུ་བོ་གངྒཱའི་འགྲམ་ཤར་ཕྱོགས་ན་རི་བོ་ལ་གནས་པ། ཝ་ཀི་མ་ཞེས་བྱ་བར་གྲགས་པའོ། །དེའི་སྲུང་མར་གྱུར་ཅིང་སྟོབས་དང་ལྡན་པ། ཁ་དོག་དམར་པོ་ཕྱག་ན་དབྱུག་ཏོ་བསྣམས་པའོ། །ཁ་ལ་སྦྱིན་ན་བདེ་བྱེད་པ། །ཞེས་བྱ་བ་ནི་ཆུ་བོ་གངྒཱའི་འགྲམ་ན། མོ་འགེ་རི་ཞེས་བྱ་བའི་ཡུལ་ན། གནོད་སྦྱིན་མདོག་ནག་ལ་བེ་ཅོན་འཛིན་པའོ། །ཀཽ་ཤཱམྦཱིན་ཚེགས་མེད་པ། །ཞེས་བྱ་བ་ནི་རྒྱ་གར་ཡུལ་གྱི་སོ་མཚམས་ན། གནོད་སྦྱིན་ཁ་དོག་ལྗང་ནག་གོ །གཡས་ན་ཏྲི་ཤཱུ་ལ་གཡོན་ཁ་ཊྭཱཾ་ག་བསྣམས་པའོ། །བཟང་པོ་ཅན་ན་བཟང་པོ་པ། །ཞེས་བྱ་བ་ནི་རི་རབ་ཀྱི་བྱང་ཕྱོགས་སྒྲ་མི་སྙན་ན། གནོད་སྦྱིན་ཁ་དོག་སེར་པོ་གཡས་རལ་གྲི་གཡོན་བུམ་པ་བསྣམས་པའོ། །སྐྱ་སྣར་ཅན་གྱི་བུ་ན་ནི། །གནོད་སྦྱིན་འབྱུང་པོའི་གདོང་ཞེས་བྱ། །ཞེས་བྱ་བ་ནི་འཛམ་བུ་གླིང་གི་དབུས་ན་མེ་ཏོག་གི་རབ་ན། གནོད་སྦྱིན་མེ་ཏོག་ཅན་ཡོད་པའོ། །སྐུ་མདོག་སེར་པོ་ཕྱག་ན་ཨུཏྤ་ལ་སྔོན་པོ་བསྣམས་པའོ། །མཆིང་བུ་ན་ནི་མྱ་ངན་མེད། །ཅེས་བྱ་བ་ནི་དེའི་ཤར་ཕྱོགས་ན་མེ་ཏོག་ཨ་ཤོ་ཀའི་ར་བ་ལ་གནོད་སྦྱིན་ཁ་དོག་ནག་པོ། ཕྱག་ན་རྡོ་རྗེ་འཛིན་པའོ། །མ་ལ་གནས་ན་ཤ་ཐང་བ། །ཞེས་བྱ་བ་ནི་རིམ་ལ་ཡའི་ལྷོ་ཕྱོགས་ཙནྡན་གྱི་ནགས་གསེབ་ན་སྐུ་མདོག་དམར་སྐྱར་གནས་པ། ཕྱག་ན་རྩེ་གཅིག་པ་བསྣམས་པའོ། །ཚང་ཚིང་གཅིག་ན་དོན་གྲུབ་པ། །ཞེས་བྱ་བ་ནི། བལ་ཡུལ་གྱི་ལྷོ་ཕྱོགས་ཀོ་བ་ཡ་ག་ན། གནོད་སྦྱིན་གླང་པོ་ཆེའི་མགོ་ཅན་ཕྱག་བཞི་པ་སྐུ་མདོག་དཀར་པོ། གཡས་གཉིས་ན་དགྲ་སྟ་དང་ཞགས་པ། གཡོན་གཉིས་ན་ཏྲི་ཤཱུ་ལ་དང་ལྕགས་ཀྱུའོ། །མ་རྒྱལ་རྒྱལ་ན་དམན་པ་པོ། །ཞེས་བྱ་བ་ནི་དུར་
ཁྲོད་དྷེའུ་ཏ་ཀོ་ཏྲ་ན། གནོད་སྦྱིན་སྐུ་མདོག་དམར་པོ་ཤ་ཁྲག་ལ་དགའ་ཞིང་ཐོད་པ་བསྣམས་པ་སྟེ། འཇིག་རྟེན་མཁའ་འགྲོ་རྣམས་ཀྱི་སྲུང་མའོ། །ཆུ་མཆོག་ན་ནི་མུཉྫའི་སྐྲ། །ཞེས་བྱ་བ་ནི་ལངྐའི་ཕྱོགས་ན་སྤྲེའུ་རྣམས་ཀྱི་གྲོང་ཁྱེར་ན་གནོད་སྦྱིན་སྟོབས་ལྡན་གནས་པའོ། །དེའི་སྐུ་མདོག་ཕྱག་མཚན་ནི། ཨ་ཤོ་ཀའི་ཤིང་བསྣམས་པ། ཁ་དོག་དམར་པོའོ། །སེན་ད་པ་ན་ནོར་བུའི་གནས། །ཞེས་བྱ་བ་ནི་རྒྱ་གར་ཡུལ་གྱི་ཨུ་ཏྲཎྜ་པུ་རི་ན། གནོད་སྦྱིན་བཻཌཱུཪྻའི་མདོག་ཅན། ཕྱག་ན་ནོར་བུ་བསྣམས་པའོ། །གནོད་སྦྱིན་མི་བཟད་འགྲོ་ལྡན་དག །ཅེས་བྱ་བ་ནི་རྒྱ་གར་ཡུལ་གྱི་ལྷོ་ནུབ་མཚམས་ན་གནས་ཏེ། གནོད་སྦྱིན་དེ་ཡང་མཆེ་བ་གཙིགས་པ། འཇིགས་སུ་རུང་བ། སྐུ་མདོག་དམར་ནག །གཡས་ན་དབྱུག་ཏོ་གཡོན་ཞགས་པའོ། །སེར་སྐྱ་ཡི་ནི་གནས་ན་གནས། །ཞེས་བྱ་བ་ནི་དེའི་ལྷོ་ཕྱོགས་ཀྱི་གནས་ན་གནོད་སྦྱིན་སེར་སྐྱའི་མདོག་ཅན། གཡས་གཡོན་གཉིས་ན་ནོར་གྱི་རྐྱལ་པ་བསྣམས་པའོ། །བ་ལང་འཛིན་དང་གཞན་བརྙས་དང༌། །ཞེས་བྱ་བ་ནི་གངྒཱའི་ཆུ་འགྲམ་ན། གནོད་སྦྱིན་བ་ལང་མགོ་ཅན། མདོག་ནག་པོ་ཕྱག་གཡས་ན་དགྲ་སྟ། གཡོན་སྡིགས་མཛུབ་བསྣམས་པའོ། །སྒོ་བ་གནས་ཅན་རྟག་པ་དང༌། །ཞེས་བྱ་བ་ནི་ཕྱིའི་རྒྱ་མཚོའི་འགྲམ་ན་ཁྱབ་འཇུག་གི་ཡུལ་ན་གནོད་སྦྱིན་གྱི་དེད་དཔོན་ཁ་དོག་ཐལ་བའི་མདོག་ཅན། གཡས་ན་བེ་ཅོན། གཡོན་འབྲས་ཀྱི་སྙེ་མ་བསྣམས་པའོ། །དབུ་མ་པ་ཡི་གནོད་སྦྱིན་དག །ཅེས་བྱ་བ་ནི་འཛམ་བུ་གླིང་གི་དབུས་ན་གནས་པ། སེམས་ཅན་རྣམས་ལ་གནོད་པ་མི་བྱེད་པ། སངས་རྒྱས་ཀྱི་བསྟན་པ་ལ་དགའ་བ། གནོད་སྦྱིན་བལྟ་ན་སྡུག་པ་ཁ་དོག་གསེར་གྱི་མདོག་ཅན་རྟག་ཏུ་མཆོད་བྱེད་རྣམས་ལའོ། །གྲགས་པ་ཆེན་པོ་བཟང་མཛེས་ན། །ཞེས་བྱ་བ་ནི་རི་བོ་རྩེ་ལྔ་ན་འཇམ་དཔལ་གྱི་སྤྱན་སྔ་ན། གནོད་སྦྱིན་ཉི་མ་གྲགས་པ་དེའི་ཁ་དོག་སེར་པོ། ཕྱག་ན་དབྱུག་ཏོ་མིག་ཅན་འཛིན་པ། འཇམ་དཔལ་གྱི་སྲུང་མའོ། །གྲོང་ཁྱེར་སྙིང་པོར་དགྲས་དོགས་པ། །ཞེས་བྱ་བ་ནི་རྒྱ་གར་ཡུལ་གྱི་ཤར་ཕྱོགས་ན་གནས་ཏེ། གནོད་སྦྱིན་བཻཌཱུཪྻའི་མགོ་ཅན། ཕྱག་གཉིས་ན་མེ་ཏོག་ཀུ་མུ་ཏ་འཛིན་པའོ། །མྱ་ངན་ས་ན་རྨོངས་བྱེད་པ། །
ཞེས་བྱ་བ་ནི་རྒྱ་གར་ཡུལ་གྱི་བ་ལེནྡྲ་ན་གནས་པའོ། །གནོད་སྦྱིན་དེ་ནི་མདོག་སྔོ་སྐྱ་རིན་པོ་ཆེའི་ཕྲེང་བ་འཛིན་པའོ། །ཁྱུས་འགྲོ་ན་ནི་གནོད་སྦྱིན་གྲགས། །ཞེས་བྱ་བ་ནི་འགྲོ་ལ་དགའ་ཞིང་སྐད་ཅིག་མས་ཁྱབ་པའོ། །དེ་བཞིན་དུ་གནོད་སྦྱིན་བསམ་གྱིས་མི་ཁྱབ་པ་གནས་པ། སྐུ་མདོག་སྣ་ཚོགས་ཅན། མཚོན་ཆ་སྣ་ཚོགས་འཛིན་པའོ། །མ་རུངས་པ་ཡང་དེ་བཞིན་ཏེ། །ཞེས་བྱ་བ་ནི་གནོད་སྦྱིན་དེ་ཡང་སྔ་མ་བཤད་པ་བཞིན་ནོ། །ང་རྒྱལ་བྲལ་དང་ལྷ་རྩེ་བ། །ཞེས་བྱ་བ་ནི་འཛམ་བུའི་གླིང་ན་རྒྱུ་ཞིང༌། སེམས་ཅན་རྣམས་ལ་ང་རྒྱལ་བྱེད་པ་དེ་ཉིད་ཀྱི་ཁ་དོག་ནི་སེར་པོ་དང་ལྗང་གུའོ། །ཕྱག་མཚན་ནི་རིན་པོ་ཆེ་དང་རལ་གྲིའོ། །འཇིགས་སྦྱིན་ན་ནི་ཡིད་འཇིགས་པ། །ཞེས་བྱ་བ་ནི་འཛམ་བུའི་གླིང་གི་ཟུར་གྱི་ལྷོ་ཕྱོགས་ན། གནོད་སྦྱིན་ཆེན་པོ་སྟོབས་ལྡན་པ་དེའི་ཁ་དོག་ནི་ནག་པོ་སྟེ། མ་རིག་པའི་དབང་གིས་གནོད་སྦྱིན་གྱི་ཁ་ནི་སྲིད་པ་ཙམ་ཡོད་པ་དེ་ནི་སྲིན་པོ་ལས་ཀྱི་གཤིན་རྗེ་ཞེས་བྱའོ། །ཁ་ཆེའི་ཡུལ་ན་འོད་བྱེད་པ། །ཞེས་བྱ་བ་ནི་དེ་ནི་གནོད་སྦྱིན་དབྱངས་ལྡན་ཏེ། དེའི་སྐུ་མདོག་ནི་གསེར་གྱི་མདོག་འདྲ་བ། སྤྱན་གསུམ་པ་ཕྱག་བཞི་པ། གཡས་པ་གཉིས་ན་པོ་ཏི་དང་མཆོད་སྦྱིན། གཡོན་པ་གཉིས་ན་ཕྲེང་བ་དང་བུམ་པ་སྤྱི་བླུགས་སོ། །བློ་དམན་པ་རྣམས་སྟོད་པར་བྱེད་པའོ། །གཏུམ་པོ་རལ་པ་ཅན་གྲོང་ན། །ཞེས་བྱ་བ་ནི་ཕྱིའི་རྒྱ་མཚོའི་འགྲམ་ན་ལངྐ་མགྲིན་བཅུའི་སྲུང་མ་རལ་པ་ཅན་ཞེས་བྱ་བ། སྐུ་མདོག་མཐིང་ནག །ཞལ་གསུམ་ཕྱག་བརྒྱད་པ་གཡས་རྣམས་ན་རལ་གྲི་གྲི་གུག །དགྲ་སྟ་རྩེ་གསུམ་མོ། །གཡོན་རྣམས་ན་སྡིགས་མཛུབ་ཐོད་པ། ཞགས་པ་ལྕགས་ཀྱུའོ། །སྐད་ཅིག་མས་དཔག་ཚད་ལྔ་བརྒྱ་ཙམ་རྒྱུ་བའོ། །ཁ་ཆེའི་ཡུལ་གྱི་སོ་མཚམས་ན། །ཞེས་བྱ་བ་ནི་མངའ་རིས་དང་ཁ་ཆེའི་ཡུལ་གཉིས་ཀྱི་མཚམས་ནའོ། །གནོད་སྦྱིན་དབང་ཆེན་དབྱངས་ལྡན་པ་དེའི་སྐུ་མདོག་ནི་དམར་སེར། ཕྱག་གཡས་ན་པོ་ཏི། གཡོན་ཕྲེང་བ་བསྣམས་པའོ། །ལྔས་རྩེ་ན་ཞེས་ནི་བྱ་བ་གནས། །ཞེས་བྱ་བ་ནི་འཕྲོག་མ་བུ་ལྔ་བརྒྱ་དང༌། དེའི་ཡབ་ནི་པཉྫི་ཀའོ། །འཕྲོག་མའི་བུ་ལྔ་བརྒྱ་ནི་དགའ་བ་ལ་སོགས་པའོ། །དེ་ལ་བུ་ནི་ལྔ་བརྒྱ་སྟེ། །ཞེས་བྱ་བ་ནི་ཁ་དོག་སྣ་ཚོགས་སུ་གནས་
པ། མཚོན་ཆ་སྣ་ཚོགས་བསྣམས་པའོ། །སྡེ་བོ་ཆེ་ལ་སྟོབས་པོ་ཆེ། །ཞེས་བྱ་བ་ནི་གཞན་གྱིས་མི་ཐུབ་གཟི་བརྗིད་ལྡན། འཁོར་གཡོག་མང་པོ་དང་ལྡན་པའོ། །ལྔས་རྩེན་གྱི་ནི་བུ་ཐུ་བོ། །ཞེས་བྱ་བ་ནི་བུ་ཆེན་པོ་དེ་ནི་རྒྱ་ནག་ན་གནས་པ། རྒྱ་ནག་པོའི་ཕོ་བྲང་ན་གནས་པ། སྲུང་མ་དེར་མཛད་པའོ། །སྐུ་མདོག་སེར་པོ། གཡས་ན་རིན་པོ་ཆེའི་མྱུ་གུ་འཛིན་པ། གཡོན་ན་བུམ་པ་གང་བ་བསྣམས་པའོ། །རྒྱ་ཡུལ་གྱི་ནི་ས་ལ་གནས། །ཞེས་བྱ་བ་ནི་གནོད་སྦྱིན་ཆེན་པོ་དེ་ནི་རྒྱ་ནག་པོའི་ཡུལ་ན་གནས་པའོ། །ཕྲག་པའི་མིག་ཅེས་བྱ་བ་ནི། མཛོད་ལྡན་ན་ནི་སྤུན་དང་བཅས། །ཞེས་བྱ་བ་ནི་རྒྱ་མཚོའི་དབུས་ན་གནས་པ་སྤུན་གཉིས་ས་བདག་གི་ཚུལ་དུ་གནས་པའོ། །དེ་གཉིས་ཁ་དོག་ནི་ནག་པོ་དང་དམར་པོ་སྟེ། དེ་གཉིས་ཀྱི་གཡས་ན་འཁོར་ལོ་དང༌། དབྱུག་ཏོ། གཡོན་ན་སྦྲུལ་ཞགས་བསྣམས་པའོ། །ཀ་ལིངྐ་ན་མཆེ་བ་རྐང༌། །ཞེས་བྱ་བ་ནི་ཕྱིའི་རྒྱ་མཚོའི་འགྲམ་ལྷོ་ཕྱོགས་ན་ཕོ་བྲང་གསེར་ཡུལ་གྱི་དབུས་ན། འཇིགས་སུ་རུང་བའི་གནོད་སྦྱིན་དམར་སྐྱའོ། །གཡས་ན་རལ་གྲི་གཡོན་ན་མི་མགོ་བསྣམས་པའོ། །དཀྱིལ་འཁོར་སྟན་ན་དཀྱིལ་འཁོར་རོ། །ཞེས་བྱ་བ་ནི་འཛམ་བུའི་གླིང་གི་དབུས་ན་གནོད་སྦྱིན་དཀྱིལ་འཁོར་ཅན་གནས་པ། དེ་ཡང་སྐུ་མདོག་དཀར་པོ་གཡས་གཡོན་གཉིས་ན་པདྨ་བསྣམས་པའོ། །ག་བུ་ཤ་ན་ལངྐའི་བདག །ཅེས་བྱ་བ་ནི་འཛམ་བུའི་གླིང་གི་ལྷོ་ནུབ་མཚམས་ན་གནས་པའོ། །གནོད་སྦྱིན་དེ་ནི་མགྲིན་པ་བཅུ་པ། ཞལ་གཅིག་ནི་རྟ་མཆོག་གི་དབུ་ལྟ་བུའོ། །ཕྱག་བརྒྱད་པ་སྐུ་མདོག་མཐིང་ག །གཡས་རྣམས་ན་རལ་གྲི་མདའ་འཁོར་ལོ། གཡོན་ན་ཞགས་པ་གཞུ། ཐ་མ་གཉིས་ན་པི་ཝང་བསྒྱུར་བའོ། །འོད་ཅན་དགའ་བའི་ཚང་ཚིང་ན། །ཞེས་བྱ་བ་ནི་བལ་ཡུལ་གྱི་ལྷོ་ཕྱོགས་ན་ཀོ་རི་ན་ཡ་ཀའི་ཤར་ཕྱོགས་ཀྱི་ནགས་ན་གནོད་སྦྱིན་མ་སྐུ་མདོག་དཀར་མོ། གཡས་ན་ཨུཏྤ་ལ་གཡོན་ན་ནོར་གྱི་རྐྱལ་བུ་བསྣམས་པའོ། །ནམ་མཁའ་སྲུང་ན་ཆོས་སྐྱོང་བ། །ཞེས་བྱ་བ་ནི་རྒྱ་གར་ཡུལ་གྱི་ལྷོ་ཕྱོགས་གསེར་ཡུལ་ན་ཕྱིའི་རྒྱ་མཚོའི་འགྲམ་ན་གནས་པ། གཡས་ན་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི། གཡོན་ན་མེ་ཏོག་པདྨ་
བསྣམས་པའོ། །ལག་པ་ཆེན་པོ་ངན་པ་ན། །ཞེས་བྱ་བ་ནི་དེའི་བྱང་ཕྱོགས་ན་གནོད་སྦྱིན་ཁ་དོག་དམར་པོ་གཡས་པདྨ་དམར་པོ་གཡོན་བུམ་པ་གང་བ་བསྣམས་པའོ། །རྣམ་ཐོས་བུ་ཡི་བུ་དཔལ་ལྡན། །རྒྱལ་བ་ཁྱུ་མཆོག་རྒྱལ་པོའི་བུ། །ཞེས་བྱ་བ་ནི་གཞན་གྱིས་མི་ཐུབ་པ། གནོད་སྦྱིན་རྣམས་ཀྱི་རྒྱལ་པོ་བྱང་ཕྱོགས་ཀྱི་འཇིག་རྟེན་གྱི་ཁམས་སྐྱོང་བ་སེམས་ཅན་རྣམས་ཀྱི་དོན་བྱེད་པ་ཕོ་བྲང་ལྕང་ལོ་ཅན་ལ་མངའ་མཛད་པ། ཕྱག་གཉིས་པ་སྐུ་མདོག་གསེར་གྱི་མདོག་ཅན། གཡས་ན་རིན་པོ་ཆེ་སྣ་བདུན་གྱི་མྱུ་གུ་།གཡོན་ན་བུམ་པ་ནོར་གྱིས་གང་བ། རིན་པོ་ཆེ་སྣ་བདུན་གྱི་ཁྲི་ལ་བཞུགས་པའོ། །གནོད་སྦྱིན་བྱེ་བས་ཡོངས་བསྐོར་ཞིང༌། །ཐོ་གར་གྱི་ནི་ཡུལ་ན་གནས། །ཞེས་བྱ་བ་ནི་ལྕང་ལོ་ཅན་གྱི་ཕོ་བྲང་ན་དཔལ་ལྡན་རྣམ་ཐོས་སྲས་ནི་གནོད་སྦྱིན་གྱི་རིགས་མི་གཅིག་པ་རྣམས་ཀྱིས་ཡོངས་སུ་བསྐོར་ཞིང༌། ནམ་མཁའ་ལ་ཉི་ཟླ་སྐར་མས་བསྐོར་བ་བཞིན་དུའོ། །འགྲོར་བཅས་རི་དང་གངས་ཅན་དག །ཅེས་བྱ་བ་ནི་ཡུལ་ཝཱ་རཱ་ཎ་སཱིའི་ནུབ་ཕྱོགས་ན། ཆུ་བོ་གངྒཱ་དང་སིནྡྷུ་གཉིས་འདུས་པའི་ས་ན་གནོད་སྦྱིན་ཆེན་པོ་དེ་གནས་སོ། །དེའི་ཁ་དོག་ནི་སྔོ་སྐྱ་ཞལ་གཅིག་ཕྱག་དྲུག་པ་གཡས་གཡོན་གཉིས་ཐལ་མོ་སྦྱར་བ། དེའི་འོག་གཉིས་ན་རྩེ་གསུམ་དང་མཆོད་སྦྱིན་གཡོན་གཉིས་ན་ཕྲེང་བ་དང་བུམ་པ་སྤྱི་བླུགས་བསྣམས་པའོ། །སྤྱན་གསུམ་པ་གླང་ལ་ཞོན་པའོ། །སིནྡྷུ་ཡི་ནི་རྒྱ་མཚོར་གནས། །ཞེས་བྱ་བ་ནི་ཤར་ཕྱོགས་ཀྱི་ཕྱིའི་རྒྱ་མཚོའི་ནང་ན་གནས་པ་གནོད་སྦྱིན་དེའི་ཁ་དོག་ནི་དཀར་པོ་སྤྲུལ་གྱི་ཞགས་པ་དང་རིན་པོ་ཆེའི་མྱུ་གུ་བསྣམས་པའོ། །གྲོང་ཁྱེར་གསུམ་ན་རྩེ་གསུམ་ལག །ཅེས་བྱ་བ་ནི་ས་འོག་ས་སྟེང་ས་བླ་གསུམ་ན་གནས་པ་གནོད་སྦྱིན་ལེགས་ལྡན་ཐལ་བའི་མདོག་ཅན་ཕྱག་གཡས་ན་རྩེ་གསུམ་གཡོན་ཕྲེང་བ་བསྣམས་པའོ། །ཀ་ལིངྐ་ན་རབ་འཇོམས་པ། །ཞེས་བྱ་བ་ནི་རྒྱ་གར་དབུས་ན་གནོད་སྦྱིན་ཁ་དོག་ནག་པོ་གྲི་གུག་དང་ཐོད་པ་བསྣམས་པའོ། །ཚིགས་ལྔ་སེར་པོ་འགྲོ་ལྡིང་ན། །ཞེས་བྱ་བ་ནི་རྡོ་རྗེ་གདན་གྱི་ལྷོ་ཕྱོགས་ན་གནོད་སྦྱིན་སྐུ་མདོག་སེར་པོ་ཕྱག་ན་བུམ་པ་གསེར་གྱིས་བཀང་བ་བསྣམས་པའོ། །སིང་ཧ་ལ་ན་ནོར་གྱི་བདག །ཅེས་བྱ་བ་ནི་སིང་གའི་གཤོལ་མདའི་ཡུལ་ཕྱིའི་རྒྱ་མཚོའི་ཚལ་ན་གནོད་སྦྱིན་དེ་གནས་པ་ཁ་དོག་གུར་
གུམ་གྱི་མདོག་ཅན། ཕྱག་གཡས་ན་རིན་པོ་ཆེའི་སྣོད་དང༌། གསེར་གྱི་རྐྱལ་བུ་བསྣམས་པའོ། །ནེ་ཙོའི་བཞིན་ནི་འབྲོག་ན་སྟེ། །ཞེས་བྱ་བ་ནི་རྡོ་རྗེ་གདན་གྱི་ནགས་ཚལ་ཆེན་པོ་ན་གནོད་སྦྱིན་ཁ་དོག་དམར་ནག་ཕྱག་ན་རལ་གྲི་ཞགས་པ་བསྣམས་པའོ། །འགྲོའམ་མ་ཅི་ནི་འོག་ན་གནས། །ཞེས་བྱ་བ་ནི་གནས་ནི་ས་འོག །འགྲོའམ་ཅི་ནི་མིང༌། ཁ་དོག་ནི་སྔོ་བསངས་ཕྱག་གཡས་ན་སྤྲུལ་ཞགས་གཡོན་དུང་བསྣམས་པའོ། །སྨད་སྤྲུལ་ལོ། །པདྨ་དཀར་པོའི་འོད་གསལ་བ། །ཞེས་བྱ་བ་ནི་དེ་ནི་གཟུགས་ཁམས་ན་གནས་པ་སྟེ། དེའི་ཁ་དོག་ནི་དཀར་པོ། གཡས་ན་ཕྲེང་བ། གཡོན་ན་བུམ་པ་སྤྱི་བླུགས་བསྣམས་པའོ། །གྲོང་ཁྱེར་ཆེ་ན་བརྩེ་བ་ཅན། །ཞེས་བྱ་བ་ནི་སུམ་ཅུ་རྩ་གསུམ་གྱི་གནས་ན་གནོད་སྦྱིན་ཆེན་པོ་གནས་པའོ། །ཁ་དོག་སེར་པོ། གཡས་ན་སྐྱབས་སྦྱིན་གཡོན་ན་རྡོ་རྗེ་བསྣམས་པའོ། །འཇིགས་པ་སྦྱིན་ན་རབ་འཇིགས་པ། །ཞེས་བྱ་བ་ནི་ལྷོ་ནུབ་ཀྱི་མཚམས་ཕྱིའི་རྒྱ་མཚོའི་འགྲམ་ལངྐ་པུ་རིན་གནོད་སྦྱིན་ཐལ་བའི་མདོག་ཅན་གཡས་རལ་གྲི་གཡོན་ཞགས་པ་བསྣམས་པའོ། །ཆུ་དང་ལྡན་ན་དམར་སེར་གནས། །ཞེས་བྱ་བ་ནི་མ་དྲོས་ཀྱི་མཚོ་འགྲམ་ན་གནོད་སྦྱིན་ཆེན་པོ་གནས་པ་ནི་སྐུ་མདོག་དཀར་པོ་ཕྱག་ན་སྤྲུལ་གྱི་ཞགས་པ་དང་པདྨ་བསྣམས་པའོ། །བབྦད་བསྐྱེད་བབྦ་ཌ། །ཞེས་བྱ་བ་ནི་བལ་ཡུལ་གྱི་བྱང་ཕྱོགས་ན་ཆུ་དགས་ཀྱི་ནགས་གསེབ་ན་གནོད་སྦྱིན་ཁ་དོག་ལྗང་ནག་ཕྱག་བཞི་པ་གཡས་གཉིས་ན་འཁོར་ལོ་དང་ཨ་འབྲས། གཡོན་གཉིས་ན་དབྱུག་ཏོ་དང་དུང་བསྣམས་པའོ། །འདོད་པ་སྦྱིན་ནམ་དང་ལྡན། །ཞེས་བྱ་བ་ནི་སུམ་ཅུ་རྩ་གསུམ་གྱི་བྱང་ཕྱོགས་ན། གནོད་སྦྱིན་འདོད་པ་ཞེས་བྱ་བ་གནས་ཏེ། འདོད་པའི་ལྷ་མོ་ལྔ་དང་ལྡན་པ། ཕྱག་གཡས་ན་འདོད་པའི་མདའ་ལྔ་བསྣམས་པ། གཡོན་མེ་ཏོག་གི་གཞུ་བསྣམས་པའོ། །ཉའི་རྒྱལ་མཚན་དང༌། ཆུ་སྲིན་གྱི་རྒྱལ་མཚན་དང་ལྡན་པའོ། །བུ་མོ་འཇུག་ན་རབ་སད་པ། །ཞེས་བྱ་བ་ནི་ཝཱ་རཱ་ཎ་སཱིའི་ཤར་ཕྱོགས་ན་སེང་གེ་ལྷའི་ཡུལ་དུ་གནས་པའི་གནོད་སྦྱིན་སེང་གེ་གནས་པའོ། །གཟུགས་ནི་སེང་གའི་གཟུགས་སུ་སྣང་བའོ། །ཀ་པུ་ཤན་ནལ་ཀུ་བར།། ཞེས་བྱ་
བ་ནི་དེའི་ཤར་ཕྱོགས་བལ་ཡུལ་དང༌། རྒྱ་གར་གྱི་སོ་མཚམས་ན་གནོད་སྦྱིན་ཆེན་པོ་ཁྱིའི་གཟུགས་སུ་སྣང་བའོ། །ཕ་རོལ་མཐའ་མེད་རྡུལ་ཆུ་ན། །ཞེས་བྱ་བ་ནི་རྒྱ་ནག་པོའི་ཤར་ཕྱོགས་གཤིན་རྗེའི་འདམ་གསེབ་ན། གནོད་སྦྱིན་ཁ་དོག་དམར་པོ་ཕྱག་ན་མེ་སྒྲོན་དང་ཞགས་པ་བསྣམས་པའོ། །ནུས་པའི་གནས་ན་ཞི་བྱེད་པ། །ཞེས་བྱ་བ་ནི་ཡུལ་མ་ག་དྷཱའི་བྱང་ཕྱོགས་ན་གནོད་སྦྱིན་གདོང་ཞེས་བྱ་བའི་གནས་ནི་གནོད་སྦྱིན་ཆེན་པོ་ཁ་དོག་ནག་པོ་དབྱུག་ཏོ་དང་ཞགས་པ་བསྣམས་པའོ། །པ་ལྷ་བ་ན་ཐགས་བཟངས་རིས། །ཞེས་བྱ་བ་ནི་རི་རབ་ཀྱི་བྱང་ཕྱོགས་ན། གནོད་སྦྱིན་ལྷ་མ་ཡིན་བྱ་བ་གནས་ཏེ་ཁ་དོག་དམར་ནག་ཕྱག་ན་འཁོར་ལོ་དང་དབྱུག་ཏོ་བསྣམས་པའོ། །ཀ་ཏ་ཀ་ན་དམར་སེར་པོ། །ཞེས་བྱ་བ་ནི་སིང་ག་ལའི་ཤར་ཕྱོགས་ན། གནོད་སྦྱིན་ཁ་དོག་གུར་གུམ་འདྲ་བའོ། །ཕྱག་ན་རྩེ་གཅིག་དང་ཞགས་པ་བསྣམས་པའོ། །འཕྲལ་རིས་འཕེལ་ན་བཞིན་རྒྱས་པ། །ཞེས་བྱ་བ་ནི་ནུབ་ཕྱོགས་ཀྱི་རྒྱ་མཚོའི་འགྲམ་ན་གནོད་སྦྱིན་མགོན་པོ་ཞེས་བྱ་བ་གནས་པའོ། །ཞལ་བཅུ་གཅིག་པ་ཐལ་བའི་མདོག་ཅན་ཕྱག་བཅུ་གཉིས་པ། དང་པོ་གཉིས་ན་མདའ་གཞུ། དེ་འོག་གཡས་པ་རྣམས་ན་འཁོར་ལོ་དང་དབྱུག་ཏོ་དང་ཐོད་པ་དང་དགྲ་སྟ་དང་རྩེ་གསུམ་པ། གཡོན་པ་རྣམས་ན་ཞགས་པ་དང་རིན་པོ་ཆེ་དང༌། པདྨ་དང་ཨུཏྤལ་དང་དུང་བསྣམས་པའོ། །ཨུ་རྒྱན་ཡུལ་ན་མ་རུངས་པ། །ཞེས་བྱ་བ་ནི་རྒྱ་གར་གྱི་དབུས་ཀྱི་ནུབ་ཕྱོགས་ན་གནོད་སྦྱིན་ཆེན་པོ་ཁ་དོག་མཐིང་ནག །གྲི་གུག་དང་ཐོད་པ་བསྣམས་པའོ། །ཐོང་གཤོལ་ངན་ན་བུམ་ལྟོ་བོ། །ཞེས་བྱ་བ་ནི་མ་ག་དྷཱའི་ཤར་ཕྱོགས་ན། གནོད་སྦྱིན་བུམ་པའི་ལྟོ་ཅན་བཞིན་མི་སྡུག་པ། དུད་ཀའི་མདོག་ཅན་ཕྱག་ན་ལྕགས་ཀྱུ་དང་ཞགས་པ་བསྣམས་པའོ། །ཆུ་སྲིན་རྒྱལ་མཚན་མྱ་ངན་ན། །ཞེས་བྱ་བ་ནི་མ་ག་དྷཱའི་ས་མཚམས་ན་འདོད་ཆེན་ཞེས་བྱ་བའི་གནོད་སྦྱིན་གནས་ཏེ། སྐུ་མདོག་ཐལ་བའི་མདོག་ཅན། ཕྱག་གཉིས་ན་མདའ་གཞུ་བསྣམས་པའོ། །སྣ་ཚོགས་སྡེ་ནི་པོ་ཀ་ན། །ཞེས་བྱ་བ་ནི་ལྷོ་ནུབ་མཚམས་ན་གནོད་སྦྱིན་ཁ་དོག་ལྗང་གུ་།ཕྱག་གཉིས་ན་འཁོར་ལོ་དང་དབྱུག་ཏོ་བསྣམས་པའོ། །དགའ་དང་ལྡན་ན་སྒྲ་སྒྲོགས་བུ། །ཞེས་བྱ་བ་ནི་རྒྱ་གར་གྱི་ཡུལ་བྱང་ཤར་མཚམས་
ན། གནོད་སྦྱིན་ཐོས་གྲགས་ནི་སྐུ་མདོག་སེར་པོ་ཕྱག་ན་མདའ་གཞུ་བསྣམས་པའོ། །ཕུང་པོའི་བདག་པོར་དམར་སེར་པོ། །ཞེས་བྱ་བ་ནི་ཤར་ཕྱོགས་ཀ་མ་རཱུ་ན་གནས་པ་སྟེ། གནོད་སྦྱིན་ཁ་དོག་དཀར་པོ་ཕྱག་གཡས་ན་ཕྲེང་བ་བསྣམས་པའོ། །གཡོན་ན་བུམ་པ་སྤྱི་བླུགས་བསྣམས་པའོ། །ཆུང་མ་ཅན་ན་མཐོང་དགའ་བོ། །ཞེས་བྱ་བ་ནི་ཡུལ་ཀོ་ཀ་ནའི་ཤར་ཕྱོགས་ན་གནོད་སྦྱིན་སྟོབས་ལྡན་གནས་པ་ནི། ཁ་དོག་དམར་པོ་ཕྱག་ན་འཁོར་ལོ་བསྣམས་པའོ། །གནོད་སྦྱིན་ཆུ་སྲིན་རྒྱལ་པོའི་ཁབ། །ཞེས་བྱ་བ་ནི་རྒྱལ་པོའི་ཁབ་ཀྱི་ལྷོ་ངོས་ན། གནོད་སྦྱིན་ཆུ་སྲིན་གྱི་མགོ་ཅན་གནས་ཏེ། ས་བདག་གི་ཚུལ་དུ་ཡོད་པ། སྦྲུལ་གྱི་ཞགས་པ་དང༌། སྡིགས་མཛུབ་བསྣམས་པའོ། །ཡངས་པ་ན་ནི་གནས་པ་སྟེ། །འབུམ་ཕྲག་དག་ནི་མང་པོ་ཡི། །ཞེས་བྱ་བ་ནི་གནོད་སྦྱིན་འདུ་བ་མང་པོ་གནས་པ་འཇིག་རྟེན་གྱི་ཁམས་རྣམས་ཁྱབ་པའོ།། གནོད་སྦྱིན་རྣམས་ཀྱིས་བསྙེན་བཀུར་བྱས། །ཞེས་བྱ་བ་ནི་རྒྱལ་པོ་ཆེན་པོ་རྣམ་ཐོས་སྲས་ལ་གནོད་སྦྱིན་རྣམས་ཀྱིས་བསྙེན་བཀུར་བྱས་ཏེ། རྒྱལ་པོ་ཆེན་པོའི་བཀའ་ལས་མི་འདའ་བའོ། །བ་ལང་སྐྱོང་བ་སྦྲུལ་གདུག་ཅན། །ཞེས་བྱ་བ་ནི་རྒྱ་གར་གྱི་ནུབ་ངོས་ན་སྦྲུལ་གྱི་ཡུལ་ན་གནས་པ་གནོད་སྦྱིན་བ་ལང་གི་མགོ་ཅན། ཕྱག་ན་དབྱུག་ཏོ་དང་ཞགས་པ་བསྣམས་པའོ། །ལྕང་ལོའི་གྲོང་ན་ལྕང་ལོ་པ། །ཞེས་བྱ་བ་ནི་རྣམ་ཐོས་སྲས་ཀྱི་གྲོང་ན་ལུས་ངན་པོ་གནས་ཏེ། སྐུ་མདོག་ལྗང་གུ་གཡས་ན་རལ་གྲི་གཡོན་ན་བུམ་པ་བསྣམས་པའོ། །དགའ་བའི་གྲོང་ན་དགའ་བ་ཅན།། ཞེས་བྱ་བ་ནི་ལྕང་ལོ་ཅན་གྱི་ཕོ་བྲང་ན་འདོད་པའི་ཡོན་ཏན་ལྔ་ལ་ལོངས་སྤྱོད་པ་ནི་གང་ཞེ་ན། རྒྱལ་པོ་ཆེན་པོ་རྣམ་ཐོས་ཀྱི་བུ་གནོད་སྦྱིན་མ་རྣམས་ཀྱིས་བསྙེན་བཀུར་བྱེད་པའོ། །གྲོང་གི་ལྷས་ནི་སྟོབས་ཅན་གནས། །ཞེས་བྱ་བ་ནི་ལྕང་ལོ་ཅན་གྱི་གནས་ན་ལྷ་ཛམྦྷ་ལ་གནས་པ་སྐུ་མདོག་སེར་པོ་གཡས་ན་བཱི་ཛ་པཱུ་ར། གཡོན་ན་ནེའུ་ལེའི་རྐྱལ་པ་བསྣམས་པའོ། །ལྷ་ལས་བབ་ན་རྣམ་ཐོས་བུ། །རང་གི་སྡེ་ནི་ཡོངས་སུ་སྐྱོང༌། །ཞེས་བྱ་བ་ནི་རང་གི་ཁྱིམ་སྲུང་ཞིང་གནོད་སྦྱིན་གྱི་དེད་དཔོན་དུ་མར་གནས་པ། དེ་རྣམས་སྐྱོང་ཞིང་དབང་མཛད་པའོ། །ལྕང་ལོ་ཅན་ན་གནས་
པ་སྟེ། །གནོད་སྦྱིན་བྱེ་བས་ཀུན་ནས་བསྐོར། །ཞེས་བྱ་བ་ནི་རྒྱལ་པོ་ཆེན་པོ་རྣམ་ཐོས་ཀྱི་བུ་ཡང་གནོད་སྦྱིན་ཐམས་ཅད་ཀྱི་དེད་དཔོན་ཕོ་བྲང་ལྕང་ལོ་ཅན་ལ་གནོད་སྦྱིན་དུ་མ་བྱེ་བ་མང་པོས་བསྐོར་ཏེ། རྒྱལ་པོའི་བཀའ་ལས་མི་འདའ་བ་སྔར་བཤད་པའི་གནོད་སྦྱིན་རྣམས། རྣམ་ཐོས་ཀྱི་བུའི་འཁོར་དུ་གནས་པའོ། །གནོད་སྦྱིན་དེ་དག་རྫུ་འཕྲུལ་ཆེ་བ་ཞེས་བྱ་བ་ནི། ས་འོག་ས་སྟེང་ས་བླ་གསུམ་དུ་སྐད་ཅིག་མས་རྒྱུ་བའོ། །སྡེ་ཆེ་བ་ཞེས་བྱ་བ་ནི། གནོད་སྦྱིན་མི་གཅིག་པ་མང་པོ་འདུས་པས་ཏེ། དེ་རྣམས་ཀྱང་མི་མཐུན་པ་མེད་པའོ། །སྟོབས་ཆེ་བ་ཞེས་བྱ་བ་ནི། རི་རབ་བདུན་ཀྱང་སྒུལ་ནུས་པའོ། །ཕ་རོལ་གྱི་དགྲ་རབ་ཏུ་འཇོམས་པ་ཞེས་བྱ་བ་ནི། སྟོབས་ཆེ་བ་དགྲ་རྣམས་ཀྱིས་མི་ཐུབ་པ། ལྷ་མ་ཡིན་གྱི་གྲོང་ཁྱེར་རླག་པར་བྱེད་པའོ། །ཐུབ་པར་དཀའ་ཞིང་གཞན་གྱིས་མི་ཐུབ་པ་ཞེས་བྱ་བ་ནི། མཐུ་ཆེ་བ་རྫུ་འཕྲུལ་སྣ་ཚོགས་དང་ལྡན་པ་ཆེ་བར་སྤྲུལ་པའི་དུས་སུ་རི་རབ་བས་ཆེ་བར་སྤྲུལ་པ། ཆུང་བ་ནི་རྡུལ་ཕྲ་རབ་ཙམ་དུ་སྤྲུལ་ནུས་པའོ། །རྫུ་འཕྲུལ་དང་ལྡན་པ་ཞེས་བྱ་བ་ནི། དེ་ལྟ་བུའི་རྫུ་འཕྲུལ་དང་ལྡན་ཏེ། སྐད་ཅིག་ཐང་ཅིག་གིས་སྟོང་གསུམ་གྱི་འཇིག་རྟེན་གྱི་ཁམས་ཁྱབ་པ། གནོད་བྱེད་དང་ཕན་བྱེད་བྱས་པའོ། །འོད་དང་ལྡན་པ་ཞེས་བྱ་བ་ནི། སོ་སོའི་ཁ་དོག་གིས་འཇིག་རྟེན་གྱི་ཁམས་སྣང་བའོ། །ཁ་དོག་དང་ལྡན་པ་ཞེས་བྱ་བ་ནི། ནག་པོ་དཀར་པོ་སེར་པོ་དམར་པོ་ལྗང་གུ་ལ་སོགས་པའོ། །རང་རང་གི་རིགས་ཀྱི་ཁ་དོག་སྣང་བའོ། །གྲགས་པ་དང་ལྡན་པ་ཞེས་བྱ་བ་ནི། འཇིག་རྟེན་གྱི་ཁམས་ན་གྲགས་པའོ། །ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་ཞེས་བྱ་བ་ནི། རྫུ་འཕྲུལ་གྱི་སྟོབས་ཀྱིས། ལྷ་དང་ལྷ་མ་ཡིན་གྱི་གཡུལ་འགྱེད་དེ། ལ་ལ་ལྷ་མ་ཡིན་གྱི་ངོས་ནས། ལ་ལ་ལྷ་ཡི་ཕྱོགས་ནས་སོ། །རྫུ་འཕྲུལ་ཆེན་པོ་དག་སྟེ་ཞེས་བྱ་བ་ནི། གཟུགས་སྣ་ཚོགས་སུ་སྤྲུལ་པ། ལྷ་དང་ལྷ་མ་ཡིན་གྱི་ཡུལ་ཅན་རྩོད་པ་བྱེད་པ། མིའི་ཡུལ་ན་ཡང་དེ་བཞིན་ནོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བགྱིས་ཤིག་ཅེས་བྱ་བ་ནི། རིག་སྔགས་འདི་ལ་མོས་པའི་གང་ཟག་ནི། གནོད་སྦྱིན་ཆེན་པོ་དེ་དག་གིས་ཀྱང་བསྲུང་བ་དང་བསྐྱབ་པར་
བྱས་ཤིང༌། ཕྱི་མ་ལ་ཡང་བསྲུང་བར་འགྱུར་རོ། །རིག་སྔགས་ཀྱི་ངོ་བོ་ནི། མཚོན་བྱ་དང་མཚོན་བྱེད་གཉིས་དང་ལྡན་ཞེས་མཚོན་པ་ནི་ཤེས་རབ་སྟེ་མཚོན་བྱེད་ནི་རིག་སྔགས་སོ། །དེ་གཉིས་སུ་མེད་པའི་རིག་པ་ནམ་མཁའ་ལྟ་བུར་གནས་པ་སྟོང་པར་སྣང་བའོ། །སྟོང་པའི་ནང་ན་མེ་ལོང་གི་གཟུགས་བརྙན་ལྟ་བུ། འཇིག་རྟེན་ཁམས་སྒྱུ་མ་ལྟ་བུའོ། །དེའི་ངོ་བོ་ཉིད་ཀྱིས་སྙིང་རྗེ་དང་བྱམས་པས་ཁྱབ་པའོ། །དེའི་རང་བཞིན་རིག་སྔགས་ནི་ཞལ་བཞི་ཕྱག་བཅུ་གཉིས་པ། སྐུ་མདོག་མཐིང་ག་ཞལ་དང་པོ་ཁྲོ་མོ། །གཡས་དཀར་བ་ནི་ཞི་བ། གཡོན་དམར་བ་འཛུམ་པ། རྒྱབ་སེར་པོ་ནི་སྒེག་པའི་ཚུལ་ལོ། །ཞལ་རེ་རེ་ལ་ཐོད་པ་ལྔ་ལྔས་བརྒྱན་པ། སྤྱན་གསུམ་པ། དབུ་སྐྲ་སེར་པོ་གྱེན་དུ་འབར་བ། དབུ་ལ་རྡོ་རྗེས་མཚན་པ། ཡེ་ཤེས་ལྔ་དང་ལྡན་པ། ཕྱག་གཡས་པ་རྣམས་ན། རལ་གྲི་དང༌། རྡོ་རྗེ་དང༌། མདུང་ཤིང༌། ལྕགས་ཀྱུ་དང༌། རྩེ་གསུམ་དང༌། འཁོར་ལོ་བསྣམས་པའོ། །གཡོན་པ་རྣམས་ན། ཞགས་པ། རྨ་བྱའི་སྒྲོ། དགྲ་སྟ། རིན་པོ་ཆེ། པདྨ། སྣ་ཚོགས་རྡོ་རྗེ་བསྣམས་པའོ། །ཞབས་གཡས་པ་བརྐྱང་པ། གཡོན་བསྐུམ་པས་མནན་པ་ནི། གནོད་སྦྱིན་ཕོ་མོ་མནན་པ། པདྨ་དང་ནི་མའི་འོད་དང་ལྡན་པའོ། །སྦ་བ་དང་ཞེས་བྱ་བ་ལ་སོགས་པ་ནི། སྔར་བཤད་པ་བཞིན་ནོ། །ཏདྱ་ཐཱ་ཞེས་བྱ་བ་ནི། རིག་སྔགས་དེའི་སྙིང་གནས། ཧཱུཾ་གི་ཡི་གེས་འོད་ཟེར་འཕྲོས་ཏེ། དེའི་འོད་ཟེར་གྱིས་འཇིག་རྟེན་གྱི་ཁམས་ཁྱབ་པ་སྟོང་སུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་འཁོར་བའི་སྡུག་བསྔལ་ཐམས་ཅད་བཅོམ་ནས། གནོད་བྱེད་རྣམས་གསང་སྔགས་རེ་རེས་འཇོམས་ཏེ། སྔགས་རེ་རེ་དང་འོད་ཟེར་རེ་རེས་ཁྲོ་བོ་བཅུར་སྤྲུལ་པའོ། །ཁྲོ་བོ་བཅུ་ནི་ཧཱུཾ་མཛད་དང་དབྱུག་པ་སྔོན་པོ་དང༌། གཤིན་རྗེ་གཤེད་པོ། གཞན་གྱིས་མི་ཐུབ་པ། རྟ་མགྲིན་དང༌། མི་གཡོ་མགོན་པོ། བདུད་རྩི་འཁྱིལ་པ་དང༌། རྣམ་པར་རྒྱལ་བ་དང་ཁམས་གསུམ་རྣམ་པར་རྒྱལ་བ་དང༌། སྟོབས་པོ་ཆེའོ། །འདི་ལྟ་སྟེ་ནི་འོག་མ་བཞིན་དུའོ། །འོག་མའི་སྔགས་ཀྱིས་ཁྲོ་བོ་དཀར་པོ་དང༌། ནག་པོ་དང༌། དམར་པོ་དང༌། སེར་པོ་དང༌། མཐིང་ནག་དང༌། དམར་པོ་དང༌། སྔོ་སྐྱ་དང༌། ལྗང་
གུ་དང། ལྗང་ནག་དང༌། མཐིང་གར་གནས་པའོ། །དེའི་ཕྱག་མཚན་ནི། གཡས་རྡོ་རྗེ་ཐོ་བ་གཡོན་ཕུར་བུ་བསྣམས་པའོ། །ཞབས་ཕུར་པའི་རང་བཞིན་དུ་ཡོད་པ། དེ་བཞིན་དུ་ནམ་མཁའི་ཁམས་སུ་སྤྲོས་པའོ། །ཤར་ཕྱོགས་ཀྱི་ཁྲོ་བོའི་སྔགས་ནི་ཨ་ཀ་ཊེ་བི་ཀ་ཊེ་ལ་སོགས་པའོ། །བདག་གི་མི་མཛའ་བ་རྣམས་ཞེས་བྱ་བ་ནི། འཁོར་ལོ་བཅུར་བྲིས་ལ། དྲག་པོའི་སྦྱིན་སྲེག་གིས་བསྲེག་པར་བྱའོ། །འཁོར་ལོའི་ནང་དུ་གང་མི་མཛའ་བའི་མིང་རུས་བྲིས་ལ། ཧ་ན་ཧ་ན་བཅུ་པོ་རྩིབས་ལ་བཀོད་ལ། གཞན་གསང་སྔགས་མུ་ཁྱུད་ལ་དགོད་པར་བྱའོ། །འཁོར་ལོ་དེ་དྲིལ་ལ་གཉན་པའི་སར་མནན་ནོ། །དེས་གྲུབ་པར་འགྱུར་རོ། །བདག་ལ་མི་ཕན་པར་འདོད་པ་རྣམས་ཞེས་བྱ་བ་ནི། རས་སམ་ཤིང་ཤུན་ལ། མིང་རུས་བྲིས་ལ་བསྲེག་པར་བྱའོ། །སྔགས་ནི་ད་ཧ་ད་ཧ་ལ་སོགས་པ་གདོན་པར་བྱའོ། །འདི་ནི་ཤར་ཕྱོགས་ཀྱི་ཁྲོ་བོའི་སྔགས་ཡིན་ནོ། །བདག་ལ་ཕྱིར་རྒོལ་བ་རྣམས་ཞེས་བྱ་བ་ནི་འབྱུང་པོའམ་གང་ཡང་རུང་བ་ལ་འཁོར་ལོ་རྩིབས་བཅུ་ཐམ་པ་བྲིས་ལ། རྩིབས་རེ་རེ་ལ་པ་ཙ་པ་ཙ་ཞེས་བྱ་བ་བྲིས་ལ། དབུས་སུ་མིང་རུས་སྟཾ་བྷ་ཡ་བཏགས་ལ་བྲིའོ། །མུ་ཁྱུད་ལ་སྔར་བཤད་པའི་སྔགས་བྲིས་ལ། ལམ་རྒྱ་གྲམ་མ་མ་མཆོད་རྟེན་ཆེན་པོའམ་དུར་ཁྲོད་དུ་མནན་པར་བྱའོ། །སྔགས་ཀྱང་པ་ཙ་པ་ཙ་ལ་སོགས་པའོ། །དེ་ནི་བྱང་ཤར་མཚམས་ཀྱི་ཁྲོ་བོའི་སྔགས་སོ། །གཞན་ཡང་མི་མཐུན་པའམ་འབྱུང་པོ་བསྐྲད་པར་འདོད་ན་སྔ་མ་བཞིན་དུ་འཁོར་ལོ་བྲིས་ནས་སྒོ་རྩར་མནན་ཏེ་འབྱུང་པོའི་སར་རོ། །འཁོར་ལོའི་སྔགས་བསྐྲད་པའི་སྔགས་ནི་ཨུ་ཙ་ཏ་ཡ་དྷུ་དྷུ་ལ་སོགས་པའོ། །ལྷོའི་འོ། །བདག་ལ་མི་ཕན་པར་འདོད་པ་རྣམས་ཞེས་བྱ་བ་ནི་བརྒྱ་རྩ་བརྒྱད་དྲག་པོའི་སྦྱིན་སྲེག་བྱས་ལ། འབྱུང་པོ་དང་དགྲ་བོ་རྣམས་ལ་ཐུན་མོང་གི་རྫས་རྣམས་གཏོར་ལ་བསྲེག་པར་བྱའོ། །སྔགས་ནི་ཧ་ཧ་ཞེས་བྱ་བ་ལ་སོགས་པ་ནི་ལྷོ་ནུབ་ཀྱིའོ། །ཛ་ཊི་ཛ་ཊི་ཞེས་བྱ་བ་ནི་ནུབ་ཀྱི་ཁྲོ་བོའོ། །བདག་གི་དགྲ་བོ་རྣམས་ཞེས་བྱ་བ་ནི་དགྲ་བོ་དང་འབྱུང་པོ་རྣམས་ལིངྒ་བྲིས་ནས་བསྲེག་པའོ། །ནཱ་ཤ་ཡ་ཞེས་བྱ་བ་ནི་དགྲ་བོའི་གཟི་བརྗིད་འཕྲོག་པའོ། །ཙུ་ལུ་ཙུ་ལུ་ཞེས་བྱ་བ་ནི་ནུབ་བྱང་གིའོ། །ཧི་ལི་ཧི་ལི་ཞེས་བྱ་བ་ནི་
བྱང་གིའོ། །མི་ལི་མི་ལི་ལ་སོགས་པ་ནི་བྱང་ཤར་གྱིའོ། །ཕུ་རུ་ཕུ་རུ་ལ་སོགས་པ་ནི་འོག་གིའོ། །ཙི་ཊི་ཙི་ཊི་ལ་སོགས་པས་ནི་སྟེང་བཅིང་བར་བྱའོ། །བདག་གི་དགྲ་བོ་རྣམས་ནཱ་ཤ་ཡ་ཞེས་བྱ་བ་ནི་འབྱུང་པོ་དང་དགྲ་བོ་རྣམས་བསྲེགས་ནས། སྔགས་དེ་རྣམས་ཀྱིས་བསྐྲད་པར་བྱས་ནས་མིང་རུས་བཏགས་ནས་བརྡུངས་པའི་གསང་སྔགས་སོ། །འདིས་ཀྱང་ནད་ཐམས་ཅད་སེལ་བའོ། །ཧི་ཀྐེ་མི་ཀྐེ་ལ་སོགས་པ་ནི། རིག་སྔགས་ཀྱི་སྙིང་པོའོ། །གཞན་ཐམས་ཅད་ལ་བསྲུང་བར་བྱའོ། །བདག་ལ་སྲུང་བ་གྱིས་ཤིག་ཅེས་བྱ་བ་ལ་སོགས་པ་ནི། གང་ཟག་འདི་ལ་གུས་པར་བྱས་ན་རིག་སྔགས་ཀྱི་གཟི་བརྗིད་ཀྱིས་གནོད་སྦྱིན་དེ་རྣམས་ཀྱིས་ཀྱང་སྲུང་བར་བྱེད་དེ། དམ་མ་ཉམས་ན་གྲོགས་ཀྱང་བྱེད་པར་འགྱུར་རོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་གནོད་སྦྱིན་གྱི་གནས་སྐབས་དང་འབྱུང་པོ་རྣམས་འདུལ་བའི་གནས་སྐབས་ཏེ་དགུ་པའོ།། །།ཀུན་དགའ་བོ་ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་སེམས་ཅན་གྱི་དོན་ལ་བཀའ་སྩལ་པའོ། །ཁྱོད་ཀྱིས་གང་དག་ཕྱོགས་བཅུ་སྲུང་ཞིང་ཡོངས་སུ་སྐྱོང་བར་བྱེད་པ་གནོད་སྦྱིན་གྱི་དེད་དཔོན་ཆེན་པོ་ཉི་ཤུ་རྩ་བརྒྱད་པོ་དེ་དག་གི་མིང་ཟུང་ཤིག་ཅེས་བྱ་བ་ནི་སངས་རྒྱས་ཀྱི་བསྟན་པ་བསྲུང་བ་གཟི་བརྗིད་ཆེ་བ་སྟོབས་དང་ལྡན་པ། གྲགས་པ་དང་ཁ་དོག་ཏུ་ལྡན་པ། རྫུ་འཕྲུལ་དང་ལྡན་པ། ལྷ་དང་ལྷ་མ་ཡིན་གྱི་གཡུལ་ཡང་མྱོང་བར་བྱེད་པའོ། །ཀུན་དགའ་བོ་ཞེས་བྱ་བ་ནི་བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པའོ། །ཤར་ཕྱོགས་ན་གནོད་སྦྱིན་གྱི་སྡེ་དཔོན་ཆེན་པོ་གང་དག་ཤར་ཕྱོགས་སྲུང་ཞིང་ཡོངས་སུ་སྐྱོང་བར་བྱེད་པ་བཞི་གནས་ཏེ་ཞེས་བྱ་བ་ནི། གང་ཟག་གང་གིས་གུས་པར་བྱེད་པའམ། ཡི་གེ་གཅིག་ཙམ་ཡོད་པར་གྱུར་ན། ཤར་ཕྱོགས་ཀྱི་གནོད་སྦྱིན་དེ་རྣམས་ཀྱིས་བསྲུང་བར་འགྱུར་རོ། །འདི་ལྟ་སྟེ་ཞེས་བྱ་བ་ནི། གནོད་སྦྱིན་རྣམས་ལྟ་བའོ། །རིང་པོ་དང༌། མིག་མི་བཟང་དང༌། གང་བ་བཟང་པོ་དང༌། སེར་སྐྱའོ་ཞེས་བྱ་བ་ནི། དེ་རྣམས་ཀྱི་ཁ་དོག་དང་ཕྱག་མཚན་ནི་དཀར་པོ་དང༌། ནག་པོ་དང༌། སེར་པོ་དང༌། དམར་པོའོ། །ཕྱག་མཚན་ནི་རྡོ་རྗེ་དང༌། འཁོར་ལོ་དང༌། རིན་པོ་ཆེ་དང༌། པདྨའོ། །
གཡོན་ན་ཡང་རིམ་པ་བཞིན་དུ་མདུང་དང༌། ཞགས་པ་དང༌། དགྲ་སྟ་དང༌། རྩེ་གསུམ་མོ། །གནོད་སྦྱིན་བཞི་པོ་དེ་རྣམས་ནི། ཞི་བའི་ཚུལ་དུ་གནས་པ། གཞན་གྱིས་མི་ཐུབ་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། རྗེས་སུ་ཡི་རང་ཞིང་བཏོན་པ་ཙམ་གྱིས་ཀྱང༌། ནད་ཐམས་ཅད་དང་བྲལ་ཞིང་འཇིགས་པ་ཐམས་ཅད་མེད་པར་འགྱུར་རོ། །སྤ་བ་ལ་སོགས་པ་ཞེས་བྱ་བ་ནི། གོང་བཞིན་དུ་ཤེས་པར་བྱའོ། །ཀུན་དགའ་བོ་ཞེས་བྱ་བ་ནི། སངས་རྒྱས་ཀྱིས་ཀུན་དགའ་བོ་ལ་གསུངས་པའོ། །ལྷོ་ཕྱོགས་ན་གནོད་སྦྱིན་གྱི་དེད་དཔོན་ཆེན་པོ། གང་དག་ལྷོ་ཕྱོགས་སྐྱོང་ཞིང་སྲུང་བར་བྱེད་པ་བཞི་གནས་ཏེ་ཞེས་བྱ་བ་ནི། གནོད་སྦྱིན་ཆེན་པོ་བཞི་པོ་དེ་དག་ཀྱང་གཟི་བརྗིད་ཆེ་བ། སྟོབས་དང་ལྡན་པ། གྲགས་པ་དང་ལྡན་པ། ཁ་དོག་དང་ལྡན་པ། རྫུ་འཕྲུལ་དང་ལྡན་པ། ལྷ་དང་ལྷ་མ་ཡིན་གྱི་གཡུལ་མྱོང་བར་བྱེད་པའོ། །འདི་ལྟ་སྟེ་ཞེས་བྱ་བ་ནི་གནོད་སྦྱིན་བཞི་པོ་བལྟའོ། །སེང་གེ་དང་ཉེ་བའི་སེང་གེ་དང༌། དུང་ཅན་དང༌། དགའ་བོ་ཞེས་བྱ་བ་ནི་གནོད་སྦྱིན་བཞི་པོ་དེ་ནི། མཐུ་ཆེ་བ། རིག་སྔགས་ཀྱི་བཀའ་ལས་མི་འདའ་བ་སྟེ། དེ་རྣམས་ཀྱི་སྐུ་མདོག་དང་ཕྱག་མཚན་ནི། སེར་པོ་དང༌། ནག་པོ་དང༌། དམར་པོ་དང༌། ལྗང་གུའོ། །དེའི་ཕྱག་མཚན་ནི་རིན་པོ་ཆེ་དང༌། རྡོ་རྗེ་དང༌། པདྨ་དང་རལ་གྲིའོ། །གཡོན་རྣམས་ནི། མདའ་གཞུ་དང༌། གཏུན་ཤིང་དང་ལྕགས་ཀྱུ་དང༌། འཁོར་ལོ་བསྣམས་པའོ། །གནོད་སྦྱིན་དེ་དག་ནི་བཞིན་མི་སྡུག་པའི་གཟུགས་སུ་གནས་པ། ཁྲོ་བོར་སྣང་བའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་དག་གིས་རྒྱ་ཆེར་བསྟན་པ་དང༌། འཆང་བ་དང༌། ཡི་གེ་གཅིག་ཙམ་ཀློག་པར་གྱུར་པས་ཀྱང་གནོད་སྦྱིན་བཞི་པོས་ལྷོ་ཕྱོགས་སུ་སྐྱོང་བ་དང༌། སྲུང་བར་འགྱུར་རོ། །སྦ་བ་ལ་སོགས་པ་ཞེས་བྱ་བ་ནི། སྔར་བཤད་པ་བཞིན་དུ་ཤེས་པར་བྱའོ། །ཀུན་དགའ་བོ་ཞེས་བྱ་བ་ནི། དགེ་སློང་ས་རིའི་དོན་དང་སེམས་ཅན་རྣམས་ཀྱི་དོན་ལ་བཀའ་སྩལ་པའོ། །ནུབ་ཕྱོགས་
ན་གནོད་སྦྱིན་གྱི་སྡེ་དཔོན་ཆེན་པོ་གང་དག་ནུབ་ཕྱོགས་སྲུང་ཞིང་ཡོངས་སུ་སྐྱོང་བར་བྱེད་པ་བཞི་གནས་ཏེ་ཞེས་བྱ་བ་ནི། སངས་རྒྱས་ཀྱི་བསྟན་པ་བསྲུང་བ། གཟི་བརྗིད་ཆེ་བ་སྟོབས་དང་ལྡན་པ། གྲགས་པ་དང་ལྡན་པ། ཁ་དོག་དང་ལྡན་པ། རྫུ་འཕྲུལ་དང་ལྡན་པ། ལྷ་དང་ལྷ་མ་ཡིན་གྱི་གཡུལ་མྱོང་བར་བྱེད་པའོ། །འདི་ལྟ་སྟེ་ཞེས་བྱ་བ་ནི། གནོད་སྦྱིན་བཞི་པོ་ནུབ་ཀྱི་ངོས་ཀྱི་བཞི་བལྟའོ། །སེང་གེ་དང༌། སེང་གེའི་རལ་པ་དང༌། བླ་མ་དང༌། སེར་སྐྱེའོ་ཞེས་བྱ་བ་ནི། གནོད་སྦྱིན་བཞི་པོ་དེ་དག་ནི་རིག་སྔགས་ཀྱི་བཀའ་ལས་མི་འདའ་བ་སྟེ། དེ་རྣམས་ཀྱི་སྐུ་མདོག་དང་ཕྱག་མཚན་ནི། དམར་པོ་དང༌། ནག་པོ་དང༌། དཀར་པོ་དང༌། ལྗང་གུའོ། །གཡས་རྣམས་ན། པདྨ་དང༌། རྡོ་རྗེ་དང༌། འཁོར་ལོ་དང༌། རལ་གྲིའོ། །གཡོན་རྣམས་ན་རྩེ་གཅིག་དང༌། ཏོ་མ་ར་དང༌། འཕང་མདུང་དང་མདུང་རིངས་བསྣམས་པའོ། །གནོད་སྦྱིན་དེ་རྣམས་ནི་མཐུ་ཆེ་ཞིང་ཅུང་ཟད་ཁྲོ་བོར་གནས་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་གང་གིས་ལུས་ངག་ཡིད་ཀྱིས་མོས་པར་བྱས་ནས། ས་བདག་གི་ནད་མཛེ་ལ་སོགས་པ་མེད་པར་འགྱུར་རོ། །བསྒོམ་པ་དང༌། ཁ་ཏོན་བྱེད་པ་ལ་སོགས་པ་བྱས་པར་གྱུར་ན། ནད་དེ་ད་ལྟར་ཡང་མི་འབྱུང་སྟེ། ཚེ་ཕྱི་མ་ཡང་དེ་བཞིན་ནོ། །སྦ་བ་ལ་སོགས་པ་ཞེས་བྱ་བ་ནི། གནོད་སྦྱིན་བཞི་པོ་དག་གིས་ཀྱང་སྲུང་བ་དང༌། སྐྱོབ་པར་འགྱུར་རོ། །གཞན་ཡང་བཤད་པ་ནི་གོང་ནས་ཤེས་པའོ། །ཀུན་དགའ་བོ་ཞེས་བྱ་བ་ནི་བཅོམ་ལྡན་འདས་ཀྱིས་སེམས་ཅན་གྱི་དོན་དུ་གསུངས་པའོ། །བྱང་ཕྱོགས་ན་གནོད་སྦྱིན་གྱི་དེད་དཔོན་ཆེན་པོ་གང་དག་བྱང་ཕྱོགས་སྐྱོང་ཞིང་ཡོངས་སུ་སྲུང་བར་བྱེད་པ་བཞི་གནས་ཏེ་ཞེས་བྱ་བ་ནི་བཞི་པོ་དེ་དག་གིས་ཀྱང་སངས་རྒྱས་ཀྱི་བསྟན་པ་སྲུང་ཞིང་གནས་པ། གཟི་བརྗིད་ཆེ་བ། སྟོབས་དང་ལྡན་པ། གྲགས་པ་དང་ལྡན་པ། འོད་ཟེར་དང་ལྡན་པ། ཁ་དོག་དང་ལྡན་པ། རྫུ་འཕྲུལ་དང་ལྡན་པ། ལྷ་དང་ལྷ་མ་ཡིན་གྱི་གཡུལ་ཡང་མྱོང་བར་བྱེད་པའོ། །དེ་དག་དང་ལྡན་པའི་གནོད་སྦྱིན་ཆེན་པོ་རྣམས་ཀྱིས་རིག་སྔགས་ཀྱི་བཀའ་ལས་མི་འདའ་བའོ། །
འདི་ལྟ་སྟེ་ཞེས་བྱ་བ་ནི། གནོད་སྦྱིན་ཆེན་པོ་བཞི་པོ་དག་བྱང་ངོས་ནས་བལྟའོ། །འཛིན་པ་དང༌། འཛིན་དགའ་དང༌། བརྩོན་སྐྱོང་དང༌། ཁྱབ་འཇུག་གོ་ཞེས་བྱ་བ་ནི། གནོད་སྦྱིན་ཆེན་པོ་བཞི་པོ་དེ་དག་ནི། མཐུ་ཆེན་པོ་དང་ལྡན་པ། དེ་དག་གི་སྐུ་མདོག་དང་ཕྱག་མཚན་ནི་ལྗང་ནག་དང། ནག་པོ་དང༌། སེར་པོ་དང༌། དཀར་པོའོ། །གཡས་རྣམས་ན་རལ་གྲི་དང༌། རྡོ་རྗེ་དང༌། རིན་པོ་ཆེ་དང༌། འཁོར་ལོའོ། །གཡོན་པ་རྣམས་ནི་ཞགས་པ་དང༌། དགྲ་སྟ་དང༌། རྩེ་གསུམ་དང༌། མདའ་གཞུ་བསྣམས་པའོ། །གནོད་སྦྱིན་ཆེན་པོ་དེ་དག་ནི་ཁྲོ་བོར་གནས་པ་གསུས་པ་ཆེ་བ་སེམས་ཅན་རྣམས་ཀྱི་དོན་མཛད་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི་གང་ཟག་གིས་གུས་པར་བྱས་ན་སྡུག་བསྔལ་ཐམས་ཅད་དང་བྲལ་བར་འགྱུར་ཏེ། ཡི་གེ་གཅིག་ཙམ་ཀློག་པར་གྱུར་ན་གུས་པ་དང་བཅས་པས་མཚན་ནས་བརྗོད་པར་བྱ་སྟེ། གནོད་སྦྱིན་ཆེན་པོ་དེ་དག་གིས་ཀྱང་ད་ལྟར་ཡང་སྲུང་བར་བྱེད་པ་དང༌། ཚེ་ཕྱི་མ་ལ་ཡང་སྲུང་བར་བྱེད་པའོ། །སྦ་བ་དང་ཞེས་བྱ་བ་ལ་སོགས་པ་ནི་སྔར་བཤད་པ་བཞིན་དུ་ཤེས་པར་བྱའོ། །ཀུན་དགའ་བོ་ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་ཀྱིས་སེམས་ཅན་གྱི་དོན་དུ་བཀའ་སྩལ་བའོ། །གནོད་སྦྱིན་གྱི་དེད་དཔོན་ཆེན་པོ་གང་དག་ཕྱོགས་མཚམས་ན་གནས་ཏེ་ཞེས་བྱ་བ་ནི་ཤར་ལྷོ་དང༌། ལྷོ་ནུབ་དང༌། ནུབ་བྱང་དང༌། བྱང་ཤར་མཚམས་ན་གནས་པའོ། །གང་དག་ཕྱོགས་མཚམས་སྲུང་ཞིང་ཡོངས་སུ་སྐྱོང་བར་བྱེད་པ་བཞི་བོ་འདི་དག་སྟེ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་རྣམས་ཀྱི་བསྟན་པ་སྲུང་བ་སྟེ། སེམས་ཅན་རྣམས་ཀྱི་དོན་བྱེད་པ་སྟེ། གནོད་སྦྱིན་དེ་དག་ནི། རྫུ་འཕྲུལ་ཆེ་བ། སྟོབས་དང་ལྡན་པ། གྲགས་པ་དང་ལྡན་པ། ཁ་དོག་དང་ལྡན་པ། ལྷ་དང་ལྷ་མ་ཡིན་གྱི་གཡུལ་ཡང་མྱོང་བར་བྱེད་པའོ། །འདི་ལྟ་སྟེ་ཞེས་བྱ་བ་ནི། གནོད་སྦྱིན་བཞི་པོ་དེ་དག་ཕྱོགས་མཚམས་ན་བལྟའོ། །ལྔ་སྤྱོད་དང་ཚིགས་ལྔ་སེར་པོ་དང༌། རི་མཉམ་དང༌། གསེར་ཅན་ནོ་ཞེས་བྱ་བ་དང༌། གནོད་སྦྱིན་དེ་དག་གིས་ཀྱང་རིག་སྔགས་ཀྱི་བཀའ་ལས་མི་འདའ་ཞིང༌། མཐུ་
ཆེན་པོ་དང་ལྡན་པ་དེ་དག་གི་སྐུ་མདོག་དང་ཕྱག་མཚན་ནི་དཀར་པོ་དང༌། ནག་པོ་དང༌། དམར་པོ་དང༌། ལྗང་གུའོ། །ཕྱག་གཡས་རྣམས་ན་པདྨ་དཀར་པོ་དང༌། ཨུཏྤ་ལ་སེར་པོ་དང༌། པདྨ་དམར་པོ་དང༌། ཨུཏྤ་ལ་སྔོན་པོའོ། །གཡོན་རྣམས་ན་འཁོར་ལོ་དང༌། རྡོ་རྗེ་དང། དབྱུག་ཏོ་དང༌། རལ་གྲི་རྣམས་སོ། །གནོད་སྦྱིན་བཞི་པོ་དེ་ཡང་རིམ་བཞིན་དུ་ཞི་བའི་ཚུལ་དང་ལྡན་པ། དྲག་པོའི་ཚུལ་དང་ལྡན་པ། དྲེགས་པ་དང་ལྡན་པ། ཁྲོ་བ་དང་ལྡན་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་གང་གིས་འདི་ལ་གུས་པར་བྱེད་ན། རྗེས་སུ་ཡི་རང་བ་ཙམ་དང༌། ལུས་ངག་ཡིད་གྱིས་གུས་པ་ཙམ་ཀྱིས་ཀྱང༌། གནོད་སྦྱིན་གྱི་དེད་དཔོན་དེ་རྣམས་ཀྱིས་ཡང་དག་པར་སྲུང་བ་དང་སྐྱོབ་པར་འགྱུར་རོ། །སྦ་བ་ལ་སོགས་པ་ཞེས་བྱ་བ་ནི། གནོད་སྦྱིན་དེ་རྣམས་ཀྱིས་འཇིགས་པ་ལ་སོགས་པ་སྦེད་པའོ། །དེ་རྣམས་ཀྱིས་བཤད་པ་ནི་སྔ་མ་བཞིན་དུ་ཤེས་པར་བྱའོ། །ཀུན་དགའ་བོ་ཞེས་བྱ་བ་ནི་བཅོམ་ལྡན་འདས་ཀྱིས་བཀའ་སྩལ་པའོ། །གནོད་སྦྱིན་གྱི་དེད་དཔོན་ཆེན་པོ་གང་དག་ས་ལ་གནས་ཏེ། གང་དག་ས་སྲུང་ཞིང་ཡོངས་སུ་སྐྱོབ་པར་བྱེད་པ་བཞི་པོ་འདི་དག་སྟེ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱི་བསྟན་པ་སྲུང་བ། སེམས་ཅན་ཐམས་ཅད་ཀྱི་དོན་བྱེད་པ། གནོད་སྦྱིན་ཆེན་པོ་དེ་དག་ནི་གཟི་བརྗིད་ཆེ་བ། སྟོབས་དང་ལྡན་པ། གྲགས་པ་དང་ལྡན་པ། འོད་ཟེར་དང་ལྡན་པ་དང༌། ཁ་དོག་དང་ལྡན་པ་དང༌། རྫུ་འཕྲུལ་དང་ལྡན་པ། ལྷ་དང་ལྷ་མ་ཡིན་གྱི་གཡུལ་ཡང་མྱོང་བར་བྱེད་པ་དག་གོ །འདི་ལྟ་སྟེ་ཞེས་བྱ་བ་ནི་གནོད་སྦྱིན་བཞི་པོ་ས་ལ་གནས་པ་ལྟར་རོ། །ས་བ་དང༌། ཤིན་ཏུ་ས་པ་དང༌། ནག་པོ་དང༌། ཉེ་ནག་པོའོ་ཞེས་བྱ་བ་ནི་དེ་རྣམས་ཀྱིས་ཀྱང་རིག་སྔགས་ཀྱི་བཀའ་ལས་མི་འདའ་ཞིང་འོག་ནས་སྲུང་བར་བྱེད་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི་སེར་པོ་དང༌། དམར་པོ་དང༌། ནག་པོ་དང༌། དམར་ནག་གི་མདོག་གོ །གཡས་རྣམས་ན་རིན་པོ་ཆེ་དང༌། པདྨ་དང༌། རྡོ་རྗེ་དང༌། རལ་གྲིའོ། །གཡོན་རྣམས་ན་མདུང་དང༌། ཞགས་པ་དང༌། འཁོར་ལོ་དང༌། དགྲ་སྟ་རྣམས་སོ། །བཞི་པོ་འདི་
དག་གིས་ཀྱང་ས་ཡོངས་སུ་སྲུང་ཞིང༌། སེམས་ཅན་རྣམས་ལ་དོན་བྱེད་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་གང་དག་གིས་འདི་མ་མོས་ཤིང་ཆོས་བྱེད་པ་དང༌། སྲུང་བ་བཏགས་པ་དང༌། ཁ་དོན་བྱེད་པ་དང༌། ཡོངས་སུ་གཟུང་བར་གྱུར་ན། ས་གཡོ་བའི་འཇིགས་པ་དང༌། མུ་གེའི་འཇིགས་པ་དང༌། ས་བདག་རྣམས་ཀྱི་འཇིགས་པ་ལ་སོགས་པ་ཡང་དག་པར་སྲུང་ཞིང༌། ད་ལྟར་དང་ཕྱི་མར་ཡང་སྲུང་བར་འགྱུར་རོ། །སྦ་བ་ལ་སོགས་པ་ཞེས་བྱ་བ་ནི། གསང་བ་ལ་སོགས་པའི་ཚུལ་གྱིས་སྲུང་བར་འགྱུར་ཏེ། དེ་རྣམས་ཀྱི་བཤད་པ་ནི་གོང་མ་བཞིན་ནོ། །ཀུན་དགའ་བོ་ཞེས་བྱ་བ་ནི། སེམས་ཅན་གྱི་དོན་ལ་ཐུགས་རྗེ་ཆེན་པོས་བཀའ་སྩལ་པའོ། །གནོད་སྦྱིན་གྱི་དེད་དཔོན་ཆེན་པོ་གང་དག་བར་སྣང་ལ་གནས་ཏེ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་རྣམས་ཀྱི་བསྟན་བ་སྲུང་བ། སྟེང་གི་ངོས་ན་གནས་པའོ། །གང་དག་པར་སྣང་སྲུང་ཞིང་ཡོངས་སུ་སྐྱོང་བར་བྱེད་པ་བཞི་པོ་འདི་དག་སྟེ་ཞེས་བྱ་བ་ནི། གཟི་བརྗིད་ཆེ་བ། གྲགས་པ་དང་ལྡན་པ། འོད་དང་ལྡན་པ། ཁ་དོག་དང་ལྡན་པ། རྫུ་འཕྲུལ་དང་ལྡན་པ། ལྷ་དང་ཧ་མ་ཡིན་གྱི་གཡུལ་ཡང་མྱོང་བར་བྱེད་པའོ།། འདི་ལྟ་སྟེ་ཞེས་བྱ་བ་ནི། གནོད་སྦྱིན་ཆེན་པོ་བཞི་པོ་འདི་དག་ལར་སྣང་ལ་བལྟའོ། །ཉི་མ་དང༌། ཟླ་བ་དང༌། མེ་དང༌། རླུང་ངོ་ཞེས་བྱ་བ་ནི་མཐུ་ཆེ་བ་དང༌། རིག་སྔགས་ཀྱི་བཀའ་ལས་མི་འདའ་བ། དེ་རྣམས་ཀྱི་སྐུ་མདོག་དང་ཕྱག་མཚན་ནི། དམར་པོ་དང༌། དཀར་པོ་དང༌། སྔོན་པོ་དང༌། དམར་ནག་གི་མདོག་གོ །ཕྱག་གཡས་རྣམས་ན་པདྨ་དམར་པོ་པདྨ་དཀར་པོ་བ་དན་དང་མེ་སྦར་བ་བསྣམས་པའོ། །གཡོན་རྣམས་ན་འཁོར་ལོ། །དགྲ་སྟ་རྩེ་གསུམ་པ་རྩེ་གཅིག་པ་བསྣམས་པའོ། །གནོད་སྦྱིན་དེ་དག་བར་སྣང་ཡོངས་སུ་སྲུང་ཞིང༌། སེམས་ཅན་རྣམས་ཀྱི་དོན་བྱེད་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་ཀྱང་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་གིས་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ལ་གུས་པར་བྱས་ན། ལྕེ་འབབ་པའི་འཇིགས་པ་དང༌། སེར་བ་ལ་སོགས་པ་ཡང་ཡུལ་དེར་འབབ་པར་མི་འགྱུར་
ཏེ། འཇིགས་པ་གཞན་ཡང་མི་འབྱུང་བའོ། །སྦ་བ་དང་ཞེས་བྱ་བ་ནི། འཇིགས་པ་དང་ནད་ཐམས་ཅད་ལས་ཐར་བར་བྱས་པའོ། །ཡོངས་སུ་སྐྱོང་བ་དང་ཞེས་བྱ་བ་ནི། མངལ་ནས་བཙས་ཀ་དང༌། བཙས་མ་ཐག་ཏུ་སྐྱེས་ནས་ཀྱང་མ་ཤི་བར་དུ་སྐྱོང་བའོ། །ཡོངས་སུ་བསྐྱབ་པ་དང་ཞེས་བྱ་བ་ནི། མ་རུངས་པའི་འབྱུང་པོ་དང༌། ནད་རྣམས་དང༌། སྡུག་བསྔལ་རྣམས་ལས་བསྐྱབ་པས་སོ། །ཡོངས་སུ་གཟུང་བ་དང་ཞེས་བྱ་བ་ནི་མ་རིག་པའི་མུན་པ་སྤངས་ནས། དགེ་བ་ལ་སྦྱོར་བའོ། །ཞི་བ་དང་ཞེས་བྱ་བ་ནི་དྲག་པོའི་ཚུལ་དུ་གནས་པའི་འབྱུང་པོ་རྣམས་ཀྱང་ཞི་བར་འགྱུར་རོ། །བདེ་ལེགས་སུ་འགྱུར་བ་དང་ཞེས་བྱ་བ་ནི། ལུས་ངག་ཡིད་བདེ་བ་སྟེ། འདིའི་ནུས་པས་ལུས་ངག་ཡིད་བདེ་བར་བྱེད་པའོ། །ཆད་པ་སྤང་བ་དང་ཞེས་བྱ་བ་ནི། རྒྱལ་པོ་དང་འབྱུང་པོ་ལ་སོགས་པས་ཆད་པ་སྤང་བའོ། །མཚོན་ཆ་སྤང་བ་དང་ཞེས་བྱ་བ་ནི། ཡུལ་གྱི་དབུས་སམ། རྐུན་མ་འམ། ཆོམ་རྐུན་ནམ། དེ་རྣམས་ཀྱི་མཚོན་ཆ་སྤང་བའོ། །དུག་གཞིལ་བ་དང་ཞེས་བྱ་བ་ནི། བསྡད་པའི་དུག་དང༌། འགྲོ་བའི་དུག་དང༌། བྱེད་པའི་དུག་གསུམ་གཞིལ་བའོ། །དུག་གསད་པ་དང་ཞེས་བྱ་བ་ནི། དུག་གསུམ་པོ་དེ་དག་ཀྱང་རིག་སྔགས་ཀྱི་གཟི་བརྗིད་ཀྱིས། ལུས་ལ་ཞུགས་པ་ཐམས་ཅད་ཀྱང་འཇོམས་པར་བྱེད་པའོ། །མཚམས་གཅད་པ་དང་ཞེས་བྱ་བ་ནི། གསང་སྔགས་དང་རིག་སྔགས་ཀྱི་གསང་སྔགས་ཀྱིས་བཅིང་བའི་སར། གཞན་རྣམས་ཀྱིས་རྒོལ་བར་མི་ནུས་སོ། །ས་བཅིང་བ་དང་ཞེས་བྱ་བ་ནི། དེས་བཅིང་བའི་སར་ས་གཡོ་བ་དྲག་པོ་བྱུང་ན་ཡང་འགུལ་མི་ནུས་ཏེ་དེ་ན་ཡོད་པའི་འབྱུང་པོ་རྣམས་ཀྱིས་ཀྱང་གནོད་པར་མི་ནུས་སོ། །ལོ་བརྒྱ་ལོན་པ་དང་ཞེས་བྱ་བ་ནི། ནད་ཐམས་ཅད་དང་བྲལ་ཞིང་བཅུད་ལེན་གྱི་རང་བཞིན་དུ་རྒས་པ་མེད་པའོ། །སྟོན་བརྒྱ་མཐོང་བ་དང་ཞེས་བྱ་བ་ནི། ནོར་ཕུན་སུམ་ཚོགས་པ་སྟེ། རིག་སྔགས་ཀྱི་གཟི་བརྗིད་ཀྱིས་ཚེ་རིང་ཞིང་ནད་རྣམས་དང་བྲལ་ཏེ། ཟ་བ་དང་འཐུང་བ་དང་ལྡན་པའོ། །ཀུན་དགའ་བོ་ཞེས་བྱ་བ་ནི། དགེ་སློང་ས་རི་མཆེ་བའི་དུག་གིས་ཟིན་པའི་གནོད་པ་དང༌། སེམས་ཅན་ཐམས་ཅད་མཆེ་བའི་དུག་གིས་ཟིན་པའི་དོན་ལའོ། །ཁྱོད་ཀྱིས་ཞེས་བྱ་
བ་ནི་ཀུན་དགའ་བོ་ལའོ། །རྒྱལ་པོ་རྣམ་ཐོས་ཀྱི་ཆོས་ཀྱི་སྤུན་གནོད་སྦྱིན་གྱི་དེད་དཔོན་སྡེ་བོ་ཆེ་རྣམས་ཞེས་བྱ་བ་ནི། མཐུ་བོ་ཆེ་སུམ་ཅུ་རྩ་གཉིས་སངས་རྒྱས་ཀྱི་བསྟན་པ་བསྲུང་བ་ལ་གཟི་བརྗིད་ཆེ་བ་སྟོབས་ཆེ་བ། གྲགས་པ་དང་ལྡན་པ། ཁ་དོག་དང་ལྡན་པ། འོད་དང་ལྡན་པ། རྫུ་འཕྲུལ་དང་ལྡན་པ། ལྷ་དང་ལྷ་མ་ཡིན་གྱི་གཡུལ་ཡང་མྱོང་བར་བྱེད་པའོ། །གནོད་སྦྱིན་དེ་རྣམས་ཀྱང་བྱེ་བ་འབུམ་ཕྲག་གནོད་སྦྱིན་འཁོར་དུ་མ་དང་ལྡན་པའོ། །གང་དག་སེམས་ཅན་རྣམས་སྲུང་ཞིང་ཡོངས་སུ་སྐྱོང་བར་བྱེད་པ་ཞེས་བྱ་བ་ནི། སེམས་ཅན་ཐམས་ཅད་མཐོང་བ་དང་དགའ་བས་ཏེ། དེ་ལ་གནོད་པར་མི་བྱེད་ཅིང༌། སྙིང་རྗེའི་སེམས་ཀྱིས་ཁྱབ་པའོ། །འཇིག་རྟེན་གྱི་ཡམས་ཀྱི་ནད་དང༌། གནོད་པ་དང་འཁྲུགས་པ་རྣམས་མེད་པར་བྱེད་པ་ཞེས་བྱ་བ་ནི། སྟོང་གསུམ་གྱི་སྟོང་གི་འཇིག་རྟེན་གྱི་ཁམས་སྐད་ཅིག་མས་ཁྱབ་སྟེ། གནོད་སྦྱིན་མཐུ་བོ་ཆེ་རྣམས་ཀྱིས་ཀྱང་ནད་ཐམས་ཅད་བཅོམ་ཞིང་སེམས་ཅན་རྣམས་ལ་བྱམས་པ་དང་སྙིང་རྗེའི་སྟོབས་ཀྱིས་སེམས་ཅན་རྣམས་སྐྱོང་བའོ། །འཇིག་རྟེན་ལ་ཕན་གདགས་པའི་ཕྱིར། འཇིག་རྟེན་ན་རྒྱུ་བ་རྣམས་ཀྱི་མིང་ཟུང་ཤིག་ཅེས་བྱ་བ་ནི། མཐུ་ཆེན་གནོད་སྦྱིན་གྱི་དེད་དཔོན་སུམ་ཅུ་རྩ་གཉིས། འཇིག་རྟེན་གྱི་ཁམས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་སེམས་ཅན་མ་ལུས་པ་ལ་ཕན་པར་མཛད་པ་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ལ་རྗེས་སུ་ཡི་རང་ཞིང་གུས་པར་བྱེད་པའོ། །འདི་ལྟ་སྟེ་ཞེས་བྱ་བ་ནི། གནོད་སྦྱིན་གྱི་དེད་དཔོན་མཐུ་བོ་ཆེ་སུམ་ཅུ་རྩ་གཉིས་བལྟའོ། །དབང་པོ་དང་ཟླ་བ་དང་ཆུ་ལྷ་དན་སྐྱེ་དགུའི་བདག་པོ་དང༌། བ་ར་དྷྭ་ཛ་དང་ཞེས་བྱ་བ་ནི་སྟོབས་ཆེ་ལ་མཐུ་ཆེ་བ། དེ་རྣམས་ཀྱི་སྐུ་མདོག་དང་ཕྱག་མཚན་ནི་སེར་པོ་དང༌། དཀར་པོ་དང༌། དཀར་སེར་དང༌། དམར་པོ་དང༌། ནག་པོའོ། །གཡས་རྣམས་ན་རྡོ་རྗེ་དང༌། རི་བོང་གི་པགས་པ་དང༌། སྤྲུལ་གྱི་ཞགས་པ་དང༌། པདྨ་དང༌། རལ་གྲིའོ། །གཡོན་རྣམས་ན་མདུང་དང༌། ཞགས་པ་དང༌། ལྕགས་ཀྱུ་དང༌། རྩེ་གཅིག་པ་དང༌། དགྲ་སྟ་རྣམས་སོ། །དབང་ལྡན་དང༌། ཙནྡན་དང༌། འདོད་པའི་གཙོ་བོ་དང༌། མགྲིན་ངན་དང༌། མགུལ་ངེས་དང་ཞེས་བྱ་བ་ནི། གནོད་སྦྱིན་གྱི་དེད་དཔོན་མཐུ་ཆེན་དེ་རྣམས་རིག་སྔགས་ཀྱི་བཀའ་ལ་
མི་འདའ་བ་སེམས་ཅན་རྣམས་ཀྱི་དོན་བྱེད་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། ཐལ་བའི་མདོག་དང་མཐིང་ནག་དང༌། སེར་པོ་དང༌། དམར་པོ་དང༌། དཀར་པོའོ། །གཡས་པ་རྣམས་ན་རྩེ་གསུམ་དང་ཙནྡན་གྱི་བེ་ཅོན་དང༌། མདའ་གཞུ་དང༌། དབྱུག་ཏོ་དམིག་ཅན་དང་འཁོར་ལོ་བསྣམས་པའོ། །གཡོན་རྣམས་ན་ཕྲེང་བ་དང༌། བུམ་པ་དང༌། ནེའུ་ལེའི་རྐྱལ་པ་དང༌། རིན་པོ་ཆེ་དང༌། ནོར་གྱི་རྐྱལ་པའོ། །བ་ཌི་དང༌། ནོར་བུ་དང༌། ནོར་བུ་སྤྱོད་པ་དང༌། སྒྲ་རབ་དང༌། ཉེ་ལྔ་པོ་དང་ཞེས་བྱ་བ་ནི། དེ་རྣམས་ཀྱིས་ཀྱང་སངས་རྒྱས་ཀྱི་བསྟན་པ་སྲུང་བ་དང༌། སེམས་ཅན་རྣམས་ཀྱི་དོན་བྱེད་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། ལྗང་གུ་དང༌། སྔོ་སྐྱ་དང༌། དམར་སེར་དང༌། མཐིང་ནག་དང༌། དཀར་པོའོ། །གཡས་རྣམས་ན་འཕང་མདུང་དང༌། ཆུ་གྲི་དང༌། ཏོ་མ་ར་དང༌། རྩེ་གཅིག་དང༌། རལ་གྲིའོ། །གཡོན་རྣམས་ན་མེ་ཏོག་ནཱ་ག་པུཥྤ་དང༌། ཨུཏྤལ་དང༌། པདྨ་དང༌། པུཎྜ་རཱི་ཀ་དང༌། ཀུནད་བསྣམས་པའོ། །རི་མཉམ་དང༌། གསེར་ཅན་དང༌། གང་པོ་དང༌། སེང་ལྡེང་བ་དང༌། གཡོན་ཅན་དང་ཞེས་བྱ་བ་ནི་མཐུ་ཆེན་པོ་དེ་རྣམས་ཀྱིས་ཀྱང་རིག་སྔགས་ཀྱི་བཀའ་ལས་མི་འདའ་བ་སེམས་ཅན་གྱི་དོན་བྱེད་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི་དཀར་པོ་དང༌། སེར་པོ་དང༌། དམར་པོ་དང༌། ནག་པོ་དང༌། ལྗང་གུའོ། །གཡས་རྣམས་ན་རྡོ་རྗེ་དང༌། རིན་པོ་ཆེ་དང༌། པདྨ་དམར་པོ་དང༌། རལ་གྲི་དང༌། རྩེ་གཅིག་བསྣམས་པའོ། །གཡོན་རྣམས་ན་ནོར་གྱི་རྐྱལ་པ་དང༌། བུམ་པ་གང་བ་དང༌། རིན་ཆེན་གྱི་སྣོད་དང༌། འབྲས་ཀྱི་སྙེ་མ་དང༌། རིན་ཆེན་སྙེ་མ་བསྣམས་པའོ། །གནོད་སྦྱིན་བ་ལང་སྐྱོང་དང༌། འབྲོག་གནས་དང༌། མིའི་རྒྱལ་པོ་དང༌། རྒྱལ་བའི་ཁྱུ་མཆོག་དང༌། ཚིགས་ལྔ་སེར་པོ་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། སེམས་ཅན་རྣམས་ལ་མི་འཚེ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། མཐིང་ནག་དང༌། དམར་ནག་དང༌། སྔོ་བསངས་དང༌། ལྗང་ནག་དང༌། དཀར་སེར་རོ། །གཡས་རྣམས་ན་མདའ་གཞུ་དང༌། མདུང་དང༌། ཞགས་པ་དང༌། འཁོར་ལོ་དང༌། དགྲ་སྟ་བསྣམས་པའོ། །
གཡོན་རྣམས་ན་མདུང་དང་ཨ་འབྲས་དང༌། བུམ་པ་སྤྱི་བླུགས་དང༌། བཱི་ཛ་བཱུ་ར་ཀ་དང་མེ་ཏོག་གི་ཕྲེང་བའོ། །བཞིན་བཟངས་དང༌། གནོད་སྦྱིན་རིང་པོ་འཁོར་དང་བཅས་པ་དང༌། དྲི་སྣ་ཚོགས་དང༌། འབྲས་བུ་གསུམ་པ་དང༌། མགུལ་གསུམ་པ་དང་ལྕགས་མདུང་རིང་པོ་དང༌། མི་ལྡན་པ་སྟེ་ཞེས་བྱ་བ་སྟེ། དེ་རྣམས་ཀྱིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་བཀའ་ལས་མི་འདའ་བའོ། །སེམས་ཅན་རྣམས་ཀྱི་དོན་བྱེད་པ། དེ་རྣམས་ཀྱི་སྐུ་མདོག་དང་ཕྱག་མཚན་ནི་དཀར་པོ་དང༌། ནག་པོ་དང༌། སེར་པོ་དང༌། དམར་པོ་དང༌། ལྗང་གུ་དང༌། སྔོ་སྐྱ་དང༌། དམར་ནག་གོ །དེ་རྣམས་ཀྱི་གཡས་ན་མདུང་རིངས་དང༌། རལ་གྲི་དང༌། འཕང་མདུང་དང་རྩེ་གསུམ་དང་རྩེ་གཅིག་དང་གཏུན་ཤིང་དང༌། ཏོ་མ་རའོ། །གཡོན་རྣམས་ན་ནོར་གྱི་རྐྱལ་པ་དང༌། རིན་ཆེན་མྱུ་གུ་དང༌། འབྲས་ཀྱི་སྙེ་མ་དང༌། རིན་ཆེན་སྙེ་མ་དང༌། བུམ་པ་ནོར་གྱིས་གང་བ་དང༌། ནེའུ་ལེའི་རྐྱལ་པ་དང༌། རིན་ཆེན་ཕྲེང་བའོ། །གནོད་སྦྱིན་དེ་དག་ནི་གནོད་སྦྱིན་ཆེན་པོའོ་ཞེས་བྱ་བ་ནི། སེམས་ཅན་ལ་འཚེ་བ་མི་བྱེད་པ་སངས་རྒྱས་ཀྱི་བསྟན་པ་སྲུང་བ་རིག་སྔགས་ཀྱི་བཀའ་ལས་མི་འདའ་བའོ། །སྡེ་རྣམས་ཀྱི་ཡོངས་སུ་འདྲེན་པ་ཞེས་བྱ་བ་ནི། ལྷ་དང་ལྷ་མ་ཡིན་རྣམས་ཀྱིས་རྩོད་པ་ལས། བྱེ་བ་དུང་ཕྱུར་རྣམས་ཀྱི་སྡེ་བོ་ཆེ་གཞན་རྣམས་ཀྱིས་མི་ཐུབ་པ། རྒྱལ་བ་རྣམ་པར་རྒྱལ་བ་གནོད་སྦྱིན་རྣམས་ཀྱི་གཙོ་བོར་འགྱུར་བའོ། །རྫུ་འཕྲུལ་དང་ལྡན་པ་ཞེས་བྱ་བ་ནི། སྟོང་གསུམ་གྱི་སྟོང་གི་འཇིག་རྟེན་གྱི་ཁམས་རི་རབ་དང་བཅས་པ་སྐད་ཅིག་ཐང་ཅིག་ཡུད་ཙམ་གྱིས་འཁོར་བའོ། །འོད་དང་ལྡན་པ་ཞེས་བྱ་བ་ནི། རང་གི་ཁ་དོག་གིས་རང་གསལ་ཏེ། འཇིག་རྟེན་ཁམས་གསལ་བར་བྱེད་པའོ། །ཁ་དོག་དང་ལྡན་པ་ཞེས་བྱ་བ་ནི། རང་གི་ཁ་དོག་དང་ལྡན་པ་ཁ་དོག་དེ་བཀྲག་དང་ལྡན་པའོ། །གྲགས་པ་དང་ལྡན་པ་སྟེ་ཞེས་བྱ་བ་ནི། མཐུ་ཆེན་སུམ་ཅུ་རྩ་གཉིས། རྒྱལ་བ་རྣམས་པར་རྒྱལ་བ་སྟོང་གསུམ་གྱི་སྟོང་གི་འཇིག་རྟེན་གྱི་ཁམས་ཀྱི་སེམས་ཅན་རྣམས་ཀྱི་དོན་བྱེད་པ་རིག་སྔགས་ཀྱི་རྒྱ་མོ་རྨ་བྱ་ཆེན་མོའི་བཀའ་ལས་མི་འདའ་བར་གྲགས་པའོ། །རྒྱལ་པོ་ཆེན་པོ་རྣམ་ཐོས་ཀྱི་བུའི་སྤུན་ཏེ་ཞེས་བྱ་བ་ནི། གནོད་སྦྱིན་དེ་རྣམས་དང༌། རྡོ་རྗེ་སྤུན་དུ་གྲགས་པ།
དེ་གཉིས་སངས་རྒྱས་ཀྱི་བཀའ་ལས་མི་འདའ་བའོ། །རྒྱལ་པོ་ཆེན་པོ་རྣམ་ཐོས་ཀྱི་བུས། གནོད་སྦྱིན་འདི་ནི་ང་ལ་རྣམ་པར་འཚེ་བའོ་ཞེས་བྱ་བ་ནི། གཞན་ཡང་དྲི་ཟའི་གདོན་ནམ། གྲུལ་བུམ་གྱི་གདོན་ནམ། ཀླུའི་གདོན་ནམ། གནོད་སྦྱིན་གྱི་གདོན་ལ་སོགས་པས་གླགས་ཚོལ་བའོ། །གནོད་སྦྱིན་འདི་ནི་མི་གཏོང་ངོ་ཞེས་གང་དག་ལ་གོ་བར་བྱེད་པ་འདི་དག་ནི་ཞེས་བྱ་བ་ནི། གཞན་གནོད་པར་འདོད་པའི་གནོད་སྦྱིན་རྣམས། གནོད་པ་མི་སྟེར་བར་རྟེན་གྱི་གང་ཟག་ལ་སྲུང་བ་གྲོགས་བྱེད་པའོ། །རྒྱལ་པོ་ཆེན་པོ་རྣམ་ཐོས་ཀྱི་བུའི་སྤུན་ཏེ་ཞེས་བྱ་བ་ནི། སེམས་ཅན་ལ་འཚེ་བར་མི་སེམས་པ། མཐུ་ཆེན་སུམ་ཅུ་རྩ་གཉིས། སྡེ་ཆེན་པོ་གནོད་སྦྱིན་གྱི་སྡེ་དཔོན་ཆེན་པོ་རྣམ་ཐོས་སྲས་ཀྱི་རྡོ་རྗེ་སྤུན་ནོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ནས་གང་དུ་རིག་སྔགས་ཀྱི་རྒྱལ་མོ་ལ་གུས་པར་བྱེད་ན། ཁ་དོན་བྱེད་པ་དང༌། ཀློག་པ་དང༌། མཆོད་པ་བྱེད་པ་དང༌། བསྙེན་བཀུར་བྱེད་པ་དང༌། རྒྱ་ཆེར་སྤེལ་བ་དང༌། ཆོ་ག་བྱེད་པ་དང༌། སྲུང་བ་བྱེད་པ་དང༌། འཆང་བ་དང༌། བླ་མར་བྱེད་པ་དང༌། མཆོད་པ་བྱེད་པ་རྣམས་གནོད་སྦྱིན་གྱི་དེད་དཔོན་རྣམས་ཀྱིས་གང་ཟག་དེ་ལ་སྲུང་བར་འགྱུར་རོ། །སྦ་བ་ལ་སོགས་ཞེས་བྱ་བ་ནི། གནོད་སྦྱིན་དེ་རྣམས་ཀྱིས་སྦ་བ་ལ་སོགས་པ་བྱེད་པའོ། །འཐབ་པ་དང༌། རྩོད་པ་དང་ཞེས་བྱ་བ་ནི། དགྲ་བོ་དང་གཡུལ་འགྱེད་པ་དང༌། གཞན་ཡང་སེམས་མི་དེ་བ་དང༌། ཐེ་ཚོམ་མེད་པ་དང༌། ནང་འཐབ་པ་དང༌། དེ་རྣམས་ལ་ཡང་གནོད་སྦྱིན་དེ་རྣམས་ཀྱིས་སྲུང་བ་དང་སྐྱོབ་པར་འགྱུར་རོ། །མཚང་འབྲུ་བ་དང༌། འཐབ་མོ་དང་ཞེས་བྱ་བ་ནི། གཞན་རྣམས་ཀྱིས་སེམས་མི་བདེ་ཞིང་མཚང་འབྲུ་བས་ཏེ། དེ་རྣམས་ཀྱིས་མཚང་འབྲུར་མི་སྟེར་ཏེ་སྲུང་བ་དང་སྐྱོབ་བར་འགྱུར་ཏེ། འཐབ་བ་ལ་ཡང་དེ་བཞིན་དུ་སྲུང་བར་འགྱུར་རོ། །འགྱེད་པ་ལས་ཡོངས་སུ་སྐྱོབས་ཤིག་ཅེས་བྱ་བ་ནི། གློ་བུར་གྱི་བགེགས་རྣམས་དང༌། བདུད་རྣམས་ཀྱིས་འཚེ་བར་བྱེད་པ་ལ་ཡང་སྲུང་བ་དང་སྐྱོབ་པར་བྱེད་པའོ། །མིའི་གདོན་དང་ཞེས་བྱ་བ་ནི། རྒྱལ་པོ་འམ་ཆོམ་རྐུན་ལ་སོགས་པའོ། །མི་མ་ཡིན་པའི་
གདོན་དང་ཞེས་བྱ་བ་ནི། བདུད་རྣམས་གླགས་ཚོལ་བའོ། །ལྷའི་གདོན་དང་ཞེས་བྱ་བ་ནི། ལྷའི་དབང་པོ་བརྒྱ་བྱིན་ལ་སོགས་པ་འདོད་ལྷ་རིགས་དྲུག་གི་ལྷ་རྣམས་སོ། །ཀླུའི་གདོན་དང་ཞེས་བྱ་བ་ནི། ཀླུའི་རྒྱལ་པོ་དགའ་བོ་ལ་སོགས་པ་རིགས་བརྒྱད་ཀྱི་ཀླུ་རྣམས་སོ། །ལྷ་མ་ཡིན་གྱི་གདོན་རྣམས་དང་ཞེས་བྱ་བ་ནི། ལྷ་མ་ཡིན་གྱི་རྒྱལ་པོ་ཐགས་བཟངས་རིས་བྱེ་བ་འབུམ་ཕྲག་དུང་ཕྱུར་ཙམ་ལྷ་མ་ཡིན་རྣམས་སོ། །རླུང་ལྷའི་གདོན་དང་ཞེས་བྱ་བ་ནི། རླུང་ལྷའི་རྒྱལ་པོ་རྣམས་པར་དགའ་བྱེད་ལ་སོགས་པ་རླུང་གི་གདོན་བདུན་དང༌། བྱེ་བ་ཁྲག་ཁྲིག་དུང་ཕྱུར་ཙམ་མོ། །ནམ་མཁའ་ལྡིང་གི་གདོན་དང་ཞེས་བྱ་བ་ནི། ནམ་མཁའ་ལྡིང་གི་རྒྱལ་པོ་གསེར་མིག་ལ་སོགས་པ་བྱ་ཁྱུང་རིགས་ལྔ་དང༌། དེ་ལ་སོགས་པའི་བྱེ་བ་དུང་ཕྱུར་ཙམ་མོ། །དྲི་ཟའི་གདོན་དང་ཞེས་བྱ་བ་ནི། དྲི་ཟའི་རྒྱལ་པོ་ཟུར་ཕུད་ལྔ་པ་ལ་སོགས་པ་དེ་ཡང་བྱེ་བ་དུང་ཕྱུར་ཙམ་མོ། །མིའམ་ཅིའི་གདོན་དང་ཞེས་བྱ་བ་ནི། མིའམ་ཅིའི་རྒྱལ་པོ་ལྗོན་པ་ལ་སོགས་པ་བསམ་གྱིས་མི་ཁྱབ་པའོ། །ལྟོ་འཕྱེ་ཆེན་པོའི་གདོན་དང་ཞེས་བྱ་བ་ནི། ལྟོ་འཕྱེའི་རྒྱལ་པོ་བཟང་པོ་ལ་སོགས་པ་བྱེ་བ་དུང་ཕྱུར་ཙམ་མོ། །གནོད་སྦྱིན་གྱི་གདོན་དང་ཞེས་བྱ་བ་ནི། གནོད་སྦྱིན་ཆེན་པོ་ལྔས་རྩེན་ལ་སོགས་པ་འཕྲོག་མའི་བུ་ལྔ་བརྒྱ་དང་བཅས་པའོ། །སྲིན་པོའི་གདོན་དང་ཞེས་བྱ་བ་ནི། སྲིན་པོའི་རྒྱལ་པོ་འཇིགས་པ་འཁོར་དང་བཅས་པ་བྱེ་བ་དུང་ཕྱུར་ཙམ་གནས་པའོ། །ཡི་དགས་ཀྱི་གདོན་དང་ཞེས་བྱ་བ་ནི། ཡི་དགས་འགུལ་འཇོམས་ལ་སོགས་པ་བསམ་གྱིས་མི་ཁྱབ་པའོ། །ཤ་ཟའི་གདོན་དང་ཞེས་བྱ་བ་ནི། ཤ་ཟ་གང་ལ་སོགས་པ་དུ་མར་གནས་པའོ། །འབྱུང་པོའི་གདོན་དང་ཞེས་བྱ་བ་ནི། འབྱུང་པོ་ལྔ་ལྡན་ལ་སོགས་པ་བསམ་གྱིས་མི་ཁྱབ་པའོ། །གྲུལ་བུམ་གྱི་གདོན་དང་ཞེས་བྱ་བ་ནི། གྲུལ་བུམ་འཛིན་མིག་ལ་སོགས་པ་དུ་མར་གནས་པའོ། །སྲུལ་པོའི་གདོན་དང་ཞེས་བྱ་བ་ནི། སྲུལ་པོ་རབ་བཟངས་ལ་སོགས་པ་བྱེ་བ་ཁྲག་ཁྲིག་ཙམ་གནས་པའོ། །ལུས་སྲུལ་པོའི་གདོན་དང་ཞེས་བྱ་བ་ནི། རབ་བཟངས་ཆེན་པོ་ལ་སོགས་པ་བསམ་གྱིས་མི་ཁྱབ་པའོ། །སྐེམ་བྱེད་ཀྱི་གདོན་དང་ཞེས་བྱ་བ་
ནི། སྐེམ་བྱེད་མཆུ་རིངས་ལ་སོགས་བ་འབུམ་ཕྲག་བདུན་ཅུར་གནས་པའོ། །སྨྱོ་བྱེད་ཀྱི་གདོན་དང་ཞེས་བྱ་བ་ནི། སྨྱོ་བྱེད་ཉི་ཤུ་རྩ་གཉིས་ཏེ། སྦ་བ་སུམ་འགྱུར་ལ་སོགས་པ་བསམ་གྱིས་མི་ཁྱབ་པའོ། །གྲིབ་གནོན་གྱི་གདོན་དང་ཞེས་བྱ་བ་ནི། གྲིབ་གནོན་འབུམ་ལ་སོགས་པ་བརྒྱད་ཁྲི་བཞི་སྟོང་ཙམ་མོ། །བརྗེད་བྱེད་ཀྱི་གདོན་དང་ཞེས་བྱ་བ་ནི། ཉེ་བའི་བུམ་པ་ལ་སོགས་པ་བྱེ་བ་དུ་མར་གནས་པའོ། །གནོན་པོའི་གདོན་དང་ཞེས་བྱ་བ་ནི། གནོན་པོ་མིག་མི་བཟང་ལ་སོགས་པ་བྱེ་བ་དུང་ཕྱུར་ཙམ་མོ། །རྒྱུ་སྐར་གྱི་གདོན་དང་ཞེས་བྱ་བ་ནི། རྒྱུ་སྐར་ཉི་ཤུ་རྩ་བརྒྱད་དེ་སྨིན་དྲུག་ལ་སོགས་པ་བརྗོད་ཀྱིས་མི་ལང་བའོ། །བྱུག་བའི་གདོན་དང་ཞེས་བྱ་བ་ནི། བྱུག་པ་དྲི་ལ་དགའ་བ་སྟེ་གསེར་ཐུབ་ལ་སོགས་པ་བསམ་གྱིས་མི་ཁྱབ་པར་གནས་པའོ། །དེ་ཡང་མི་དང་མི་མ་ཡིན་པ་དང༌། ལྷ་དང་ཀླུ་དང༌། ལྷ་མ་ཡིན་དང༌། རླུང་དང༌། ནམ་མཁའ་ལྡིང་དང༌། དྲི་ཟ་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། གནོད་སྦྱིན་དང་སྲིན་པོ་དང༌། འབྱུང་པོ་དང༌། ཤ་ཟ་དང༌། སྲུལ་པོ་དང༌། ལུས་སྲུལ་པོ་དང༌། བརྗེད་བྱེད་དང༌། སྨྱོ་བྱེད་དང༌། གྲིབ་གནོན་དང༌། སྐེམ་བྱེད་དང༌། གནོན་པོ་དང༌། སྐར་མ་དང༌། བྱུག་པའི་གདོན་ནོ། །དེ་རྣམས་གཙོ་བོར་གྱུར་པ་སྟོང་ཕྲག་བརྒྱད་ཅུར་གནས་ཏེ། ནམ་མཁའ་ལ་རྒྱུ་བའི་དུས་སུ་ནི་དང་པའི་རྒྱལ་པོ་བཞིན་ནོ། །ས་སྟེང་ལ་རྒྱུ་བ་ནི་ཉི་མའི་རྟ་བདུན་བཞིན་དུ་སྐད་ཅིག་མས་གླིང་བཞི་ཁྱབ་པའོ། །ས་འོག་ཏུ་འཛུལ་བ་ནི་བྱི་བ་བཞིན་དུའོ། །དེ་ལྟ་བུའི་གདོན་ས་བདག་ལ་སོགས་པ་རྒྱུ་བའི་དུས་སུ་ས་བདག་བཞིན་ནོ། །དེ་བཞིན་དུ་ལྷའི་གདོན་ལ་སོགས་པ་ཐམས་ཅད་སྣ་ཚོགས་ཀྱི་གཟུགས་སུ་བསྟན་ནས་རྒྱུ་བའོ། །ཡོངས་སུ་སྐྱོབས་ཤིག་ཅེས་བྱ་བ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་གཟི་བརྗིད་ཀྱིས། མཐུ་ཆེན་སུམ་ཅུ་རྩ་གཉིས་ཀྱིས་ཀྱང་ལྷའི་གདོན་ལ་སོགས་པ་སྲུང་བ་དང༌། སྐྱོབ་པར་བྱེད་པའོ། །གཟི་བརྗིད་འཕྲོག་པ་དང་ཞེས་བྱ་བ་ནི། གདོན་དེ་རྣམས་ཀྱིས་གཟི་བརྗིད་འཕྲོག་པ་སྟེ། གདོན་གཞན་ཡང་འོད་འཕྲོག་པ་ལྔ་ལ་སོགས་པ་བསམ་གྱིས་མི་ཁྱབ་བའོ། །ཟས་སུ་མངལ་ལ་ཟ་བ་དང་ཞེས་བྱ་བ་ནི། སེར་སྐྱ་མོ་སྟེ་ཡི་དགས་སོ། །དེ་ཡང་བསམ་གྱིས་མི་
ཁྱབ་པའོ། །ཟས་སུ་ཤ་ཟ་བ་དང་ཞེས་བྱ་བ་ནི། སྲིན་མོ་པདྨ་སྟེ། དེ་ལ་སོགས་པ་བསམ་གྱིས་མི་ཁྱབ་པའོ། །ཟས་སུ་ཁྲག་འཐུང་པ་དང་ཞེས་བྱ་བ་ནི། ཤ་ཟ་མོ་མ་ཧེ་མོ་ལ་སོགས་པ་སྟེ་བསམ་གྱིས་མི་ཁྱབ་པའོ། །ཟས་སུ་ཞག་ཟ་བ་དང་ཞེས་བྱ་བ་ནི། ས་སྲིན་མོ་སྡང་མོ་དུ་མར་གནས་པའོ། །ཟས་སུ་ཚིལ་ཟ་བ་དང་ཞེས་བྱ་བ་ནི། སྲིན་མོ་འཇིགས་ཅན་བྱེ་བ་ཅམ་དུ་གནས་པའོ། །ཟས་སུ་རྐང་ཟ་བ་དང་ཞེས་བྱ་བ་ནི། གནོད་སྦྱིན་མེ་འབར་མ་བསམ་གྱིས་མི་ཁྱབ་པའོ། །ཟས་སུ་བཙས་པ་ཟ་བ་དང་ཞེས་བྱ་བ་ནི། ཤ་ཟ་གཏུམ་མོ་བསམ་གྱིས་མི་ཁྱབ་པའོ། །སྲོག་འཕྲོག་པ་དང་ཞེས་བྱ་བ་ནི། བརྗེད་བྱེད་མ་བུམ་པ་ཅན་ལ་སོགས་པ་བྱེ་བ་དུང་ཕྱུར་གནས་པའོ། །ཟས་སུ་གཏོར་མ་ཟ་བ་དང་ཞེས་བྱ་བ་ནི། གནོད་སྦྱིན་དྲི་མེད་ལ་སོགས་པ་བསམ་གྱིས་མི་ཁྱབ་པའོ། །ཟས་སུ་ཕྲེང་བ་ཟ་བ་དང་ཞེས་བྱ་བ་ནི། ལྷ་མོ་ནག་མོ་བྱེ་བ་དུང་ཕྱུར་ཙམ་མོ། །ཟས་སུ་དྲི་ཟ་པ་དང་ཞེས་བྱ་བ་ནི། དྲི་ཟ་མོ་ནག་མོ་སེང་གེ་ལ་སོགས་པ་བྱེ་བ་འབུམ་ཕྲག་དུ་མ་གནས་པའོ། །ཟས་སུ་བདུག་པ་ཟ་བ་དང་ཞེས་བྱ་བ་ནི། ས་སྲིན་མོ་ནག་མོ་སྣང་ཞེས་བྱ་བ་ལ་སོགས་པ་བསམ་གྱིས་མི་ཁྱབ་པའོ། །ཟས་སུ་མེ་ཏོག་ཟ་བ་དང་ཞེས་བྱ་བ་ནི། ཀླུ་མོ་འོད་ཟེར་ཅན་ཞེས་བྱ་བ་ལ་སོགས་པ་འབུམ་ཕྲག་ཁྲི་ཙམ་གནས་པའོ། །ཟས་སུ་འབྲས་བུ་ཟ་བ་དང་ཞེས་བྱ་བ་ནི། ས་བདག་ཆུ་མོ་ཞེས་བྱ་བ་ལ་སོགས་པ་བསམ་གྱིས་མི་ཁྱབ་པའོ། །ཟས་སུ་ལོ་ཏོག་ཟ་པ་དང་ཞེས་བྱ་བ་ནི། སྲིན་མོ་སྟོབས་ཅན་མོ་ལ་སོགས་པའོ། །ཟས་སུ་བསྲེག་བྱ་ཟ་བ་དང་ཞེས་བྱ་བ་ནི། ཤ་ཟ་ནག་མོ་ལ་སོགས་པ་འབུམ་ཕྲག་ཁྲིར་གནས་པའོ། །ཟས་སུ་རྣག་འཐུང་བ་དང་ཞེས་བྱ་བ་ནི། ས་སྲིན་མོ་གླང་ཆེན་མོ་ལ་སོགས་པ་བརྒྱ་སྟོང་ཙམ་གནས་པའོ། །ཟས་སུ་ཕྱི་ས་ཟ་བ་དང་ཞེས་བྱ་བ་ནི། ས་སྲིན་མོ་སྲ་བ་མོ་ལ་སོགས་པ་སྟེ་བསམ་གྱིས་མི་ཁྱབ་པའོ། །ཟས་སུ་གཅིན་འཐུང་བ་དང་ཞེས་བྱ་བ་ནི། འབྱུང་པོ་མོ་ལ་སོགས་པ་བསམ་གྱིས་མི་ཁྱབ་པའོ། །ཟས་སུ་མཆིལ་མ་འཐུང་བ་དང་ཞེས་བྱ་བ་ནི། རོ་ལངས་མོ་ཏིངྒ་ལ་སོགས་པ་བརྒྱད་ཁྲི་འབུམ་དུ་གནས་པའོ། །ཟས་སུ་ངར་སྣབས་ཟ་བ་དང་ཞེས་བྱ་བ་ནི། རོ་ལངས་ཆེན་
མོ་དམར་སེར་མོ་ལ་སོགས་པ་འབུམ་དུ་གནས་པའོ། །ཟས་སུ་སྣབས་ཟ་བ་དང་ཞེས་བྱ་བ་ནི། གྲུལ་བུམ་མོ་ཚིག་པ་ལ་སོགས་པ་བྱེ་བ་དུང་ཕྱུར་དུ་གནས་པའོ། །ཟས་སུ་སྐྱུགས་པ་ཟ་བ་དང་ཞེས་བྱ་བ་ནི། གནོད་སྦྱིན་མོ་གཏུམ་མོ་ལ་སོགས་པ་བརྒྱད་ཁྲིར་གནས་པའོ།། ཟས་སུ་སྟོར་ཁུང་ནས་འབབ་པ་འཐུང་བ་དང་ཞེས་བྱ་བ་ནི། གནོན་པོ་གྲུལ་བུ་མ་ནག་མོ་ལ་སོགས་པ་བསམ་གྱིས་མི་ཁྱབ་པའོ། །ཟ་བ་དེ་རྣམས་ཀྱང་སྟོང་ཕྲག་བརྒྱད་ཅུར་གནས་པ། ཆུད་བ་ནི་ཡུད་ཙམ་ཆེ་བ་ནི་དཔག་ཚད་ལྔ་བརྒྱར་གཟུགས་སྦྲུལ་པའོ། །དེ་རྣམས་ཀྱང་རྫུ་འཕྲུལ་དང་ལྡན་པ། སེམས་ཅན་རྣམས་ལ་གནོད་པར་བྱེད་པའོ། །སྲུང་བ་གྱིས་ཤིག་ཅེས་བྱ་བ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལ་གུས་པའི་སེམས་དང་ལྡན་པ་རྣམས་མཐུ་ཆེན་སུམ་ཅུ་རྩ་གཉིས་གནོད་སྦྱིན་གྱི་དེད་དཔོན་རྣམས་ཀྱིས་ཀྱང་སྲུང་བ་དང་སྐྱོབ་པར་འགྱུར་རོ། །སྦ་བ་ལ་སོགས་པ་ཞེས་བྱ་བ་ནི། གོང་བཞིན་དུ་ཤེས་པར་བྱའོ། །གཤེད་བྱེད་དང་བསྒྱུར་བའི་ལས་དང་ཞེས་བྱ་བ་ནི། འབྱུང་པོ་རྣམས་ཀྱིས་དབུགས་དང་བྲལ་བར་བྱེད་པ་སྟེ། དེ་གཤེད་འཕྲོག་པའི་འཇིགས་པའོ། །ལུས་ངག་ཡིད་ཀྱི་ལས་སྒྱུར་བ་སྟེ། དེ་ལས་སྒྱུར་བའི་འཇིགས་པ་ལུས་མི་བདེ་བ། ངག་མི་བདེ་བ་ཡིད་མི་བདེ་བའོ། །བྱད་དང་གཡེངས་བྱེད་དང་ཞེས་བྱ་བ་ནི། སྔོན་གྱི་ལས་དང་ད་ལྟར་བྱས་པ་སྟེ། ལས་ཀྱི་དབང་གིས་མ་རིག་པའི་སེམས་ཀྱིས་བྱས་པའི་བྱད་དོ། །དེའི་དབང་གིས་འདར་བར་བྱེད་པའི་ནད་ཀྱང་འབྱུང་པོ་རྣམས་ཀྱིས་གཏང་པའོ་ཞེས་བྱ་བ་ནི་མ་ཚང་བ་དང༌། ལྷག་པ་དང༌། ནོར་པ་དང༌། འཇོམས་པ་དང༌། ཕོ་ཉ་དང་ཞེས་བྱ་བ་ནི། གཞན་རྣམས་ཀྱི་ནུས་པས་གཏང་བའོ། །འཇོམས་པ་ནི་དེ་འཇོམས་པའོ། །རོ་ལངས་དང་སེམས་སྒྱུར་བ་དང་ཞེས་བྱ་བ་ནི། སྔགས་ཀྱི་ནུས་པས་རོ་ལངས་པར་འགྱུར་བ་སྟེ། དེ་མ་ཐུལ་བའོ། །རིག་པའི་སེམས་མ་རིག་པས་བསྒྱུར་བའོ། །སྦོད་གཏོང་དང༌། བཟའ་ཉེས་དང་ཞེས་བྱ་བ་ནི། གཤིན་རྗེའམ། མ་མོ་འམ། འཇིག་རྟེན་གཞན་ཡང་བསྟེན་པར་བྱས་ནས་དམོད་མོ་བྱས་པའོ། །སྐར་མའམ། གཟའ་འམ། ཚེས་གྲངས་སམ། སྐད་ཅིག་མའམ། མ་མཐུན་པ་དང༌། ཆུ་ཚོད་དང༌། དབྱུ་གུ་དང༌།
ཐུན་ཚོད་མ་འཛོམ་པའོ། །གཟའ་རང་ལ་སོགས་པ་སེམས་མི་མཐུན་པའོ། །སྐྱུགས་ཉེས་དང་ཞེས་བྱ་བ་ནི། བད་ཀན་དང་མཁྲིས་པ་དང༌། རླུང་གི་དབང་གིས་མ་ཞུ་བ་དང་མི་མཐུན་པ་སྟེ། དེ་སྐྱུགས་ན་ཉེས་པའོ། །ཡང་ན་འབྱུང་པོའི་དབང་གིས་སྨན་མ་ཞུ་ཞིང་སྐྱུག་པར་བྱེད་པ་སྟེ། སྐྱུག་པ་མ་ཐོན་པ་དང༌། འགགས་ན་སྐྱུགས་ཉེས་པའོ། །གནོད་སྒྲིབ་དང་ཞེས་བྱ་བ་ནི། དེ་ལྟར་མ་རིག་པའི་དབང་གིས་སྒྲིབ་པར་འགྱུར་ཏེ། གྲིབ་མ་དེ་གནོད་པས་གནོད་སྒྲིབ་པོ། །དེའི་སྡིག་མི་མཐོང་བར་བྱེད་པ་སྒྲིབ་པའོ། །གནོད་བལྟས་དང་ཞེས་བྱ་བ་ནི། མ་སྨིན་པ་ལ་སྨིན་པར་བྱས་ནས་བལྟ་བ་སྟེ། གཉན་པ་ལྟ་བ་དེ་གནོད་བལྟས་སོ། །བྲི་ཉེས་དང་ཞེས་བྱ་བ་ནི། དཀྱིལ་འཁོར་ལ་སོགས་པ་སྒྲ་མ་མཐུན་པ་ཉེས་པའོ། །བསྒོམ་ཉེས་དང་ཞེས་བྱ་བ་ནི། ཡེ་ཤེས་བཞག་ནས་མ་རིག་པ་བསྒོམས་ཏེ། ཡང་ན་ལོག་མིན་དུ་གོ་ནས་མ་ཚང་བར་བསྒོམ་པའོ། །སྨད་པ་དང་ཞེས་བྱ་བ་ནི། གཞན་རྣམས་ཀྱིས་ཞེ་སྡང་གི་དབང་གིས་སྨད་པའོ། །སྐྲག་པ་དང་ཞེས་བྱ་བ་ནི། འཇིགས་པས་སེམས་སྒྱུར་བ་སྟེ། དེ་ཡང་གཡེངས་པའོ། །རྒྱལ་པོའི་འཇིགས་བ་དང་ཞེས་བྱ་བ་ནི། རང་དབང་མེད་ཅིང་ནོར་དང་ཞིང་ལ་སོགས་པ་འཕྲོག་པའོ། །ཆོམ་རྐུན་གྱི་འཇིགས་པ་དང༌། གླང་པོ་ཆེའི་འཇིགས་པ་དང་ཞེས་བྱ་བ་ནི། ནོར་དང་གྲོགས་ལ་འཇིགས་པ་སྟེ། དེ་བཞིན་དུ་གླང་པོ་ཆེའི་འཇིགས་པའོ། །མེའི་འཇིགས་པ་དང༌། ཆུའི་འཇིགས་པ་དང་ཞེས་བྱ་བ་ནི། རང་གི་ཁྱིམ་དང༌། གཞན་རྣམས་ཀྱིས་འོངས་པ་སྟེ། གྲུ་ལོག་པ་དང༌། རབ་མ་ཐར་པ་དང༌། དེ་ལ་སོགས་པ་མེ་དང་ཆུའི་འཇིགས་པ་དང་བྲལ་བའོ། །ཕ་རོལ་གྱི་དམག་ཚོགས་ཀྱི་འཇིགས་པ་དང༌། མུ་གེའི་འཇིགས་པ་དང་ཞེས་བྱ་བ་ནི། རྒྱལ་པོའམ་གཞན་ཕ་རོལ་གྱི་དགྲ་བོ་སྟེ། དེ་རྣམས་ཀྱི་འཇིགས་པ་དང༌། དེ་རྣམས་ཀྱི་ལོ་ཏོག་འཇོམས་པ་དང༌། ཆར་མི་འབབ་པ་ཆེ་བར་འབབ་པ་དང༌། བྱི་བ་དང༌། ནེ་ཚེ་དང༌། བུང་བ་དང༌། རི་བོང་དང༌། མཆིལ་བ་དང༌། སེར་བ་དང༌། ལྷགས་པའི་འཇིགས་པ་ལ་སོགས་པའོ། །དུས་མ་ཡིན་པར་འཆི་བའི་འཇིགས་པ་དང་ཞེས་བྱ་བ་ནི། དུས་མ་ཡིན་པར་འཆི་བ་བཅུ་དྲུག་གོ །སེང་གེ་དང༌། གླང་པོ་ཆེ་
དང༌། རྭ་ཅན་ལ་སོགས་པ་དང༌། །མཚོན་དང༌། ཆུ་དང༌། མེ་དང༌། རིམས་དང༌། འབྱུང་པོ་དང༌། ཐོག་མདའ་དང༌། ཐིབས་འོག་དང༌། ཆོམ་རྐུན་དང༌། ཀླུ་དང༌། བཅོན་དང༌། དུག་དང༌། གཟའ་དང༌། གཡེངས་པའོ། །ས་གཡོ་བས་འཇིགས་པ་དང་ཞེས་བྱ་བ་ནི། སྟོང་གསུམ་གྱི་སྟོང་འཇིག་རྟེན་གྱི་ཁམས་ཀྱི་ས་དུས་གཅིག་ཏུ་གཡོ་བ་སྟེ། དེ་འབྱུང་བའི་དབང་གིས་ས་གཡོ་བར་བྱེད་པའོ། །གཅན་གཟན་ཁྲོ་བོའི་འཇིགས་པ་དང་ཞེས་བྱ་བ་ནི། སེང་གེ་དང༌། སྟག་དང༌། དོམ་དང༌། དྲེད་དང༌། ཆུ་སྲིན་ལ་སོགས་པའོ། །མི་མཛའ་བའི་འཇིགས་པ་དང་ཞེས་བྱ་བ་ནི། རོགས་ཤེས་དང༌། གྲོགས་དང༌། ཉེ་བ་ལ་སོགས་པའོ། །འཆི་བའི་འཇིགས་པ་དང་ཞེས་བྱ་བ་ནི། ནད་ཀྱིས་ཐེབས་པ་སྟེ། གཤིན་རྗེའི་ཐག་པས་བཅིངས་པའི་དུས་སུའོ། །འཇིགས་པ་ཐམས་ཅད་ལས་བདག་ལ་སྲུང་བ་གྱིས་ཤིག་ཅེས་བྱ་བ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་གཟི་བརྗིད་ཀྱིས། གནོད་སྦྱིན་གྱི་དེད་དཔོན་དང༌། མཐུ་བོ་ཆེ་སུམ་ཅུ་རྩ་གཉིས་ཀྱིས་སྲུང་བ་དང༌། སྐྱོབ་པར་འགྱུར་རོ། །ཤུ་བ་དང༌། གཡའ་བ་དང༌། མཛེ་དང༌། འབྲུམ་བུ་ཕྲ་མོ་དང༌། མཚན་པར་རྡོལ་བ་དང༌། ཕོལ་མིག་དང༌། གཡན་པ་དང༌། མེ་དཔལ་དང༌། ལྷོག་པ་དང་ཞེས་བྱ་བ་ནི། དེ་ལ་སོགས་པ་མཛེ་རིགས་མི་གཅིག་པ་བཅོ་བརྒྱད་དེ། རླུང་དང་བད་ཀན་དང༌། མཁྲིས་པ་དང༌། ཆུ་སེར་ལས་བྱུང་བའོ། །ཤུ་བ་ནི་ཆུ་སེར་ཤ་དང་པགས་པ་ལས་འབབ་པའོ། །གཡའ་བ་ནི་རླུང་དང་ཆུ་སེར་པགས་པ་ལས་འབབ་པའོ། །མཛེ་ནི་རླུང་དང་མཁྲིས་པ་དང་བད་ཀན་ལ་བབས་པའོ། །འཕྲུམ་བུ་ཕྲ་མོ་ནི་ཚད་པ་ནང་དུ་ཤོར་ནས་མཁྲིས་པ་ལས་བྱུང་བའོ། །མཚན་པར་རྡོལ་བ་ནི་རླུང་དང་ཆུ་སེར་ལས་བྱུང་བའོ། །ཕོལ་མིག་ནི་གྲང་བ་བཞིན་དུ་འབྱུང་སྟེ་རླུང་དང་ཆུ་སེར་མཁྲིས་པ་ལས་བྱུང་བའོ། །གཡན་པ་ནི་བད་ཀན་དང་རླུང་ལས་བྱུང་བའོ། །མེ་དབལ་ནི་མཁྲིས་པ་ལས་བྱུང་བའོ། །ལྷོག་པ་ནི་མཁྲིས་པ་དང་ཆུ་སེར་དང་རླུང་ལས་བྱུང་བའོ། །གཞན་ཡང་འབྲས་དང་དམུ་ཆུ་དང་ཤ་བཀྲ་དང༌། ལྦ་བ་ལ་སོགས་པ་ཡོད་དེ། །མཁྲིས་པ་དང༌། ཆུ་སེར་དང་རླུང་ལས་བྱུང་བའོ། །འཇིགས་པ་ལས་སྲུང་བ་གྱིས་ཤིག་ཅེས་བྱ་བ་ནི། རིག་
སྔགས་ཀྱི་རྒྱལ་མོ་རྨ་བྱ་ཆེན་མོའི་གཟི་བརྗིད་དང་སྟོབས་ཀྱིས། གནོད་སྦྱིན་གྱི་དེད་དཔོན་དེ་རྣམས་ལས་ཀྱང༌། སྲུང་བ་དང་སྐྱོབ་པར་འགྱུར་རོ། །ཀླད་པ་ན་བ་དང་ཞེས་བྱ་བ་ལ་སོགས་པ་ནི། རླུང་བད་ཀན་མཁྲིས་པ་གསུམ་གྱིས་ན་བའོ། །མགོ་ལྗི་ཞིང་ན་བ་ནི་རླུང་ཡིན་ཏེ། ཡང་ཞིང་གཡོ་བ་ནི་བད་ཀན་ཡིན་ནོ། །ཚ་ཞིང་ན་བ་ནི་མཁྲིས་པའོ། །ཡང་ཞིང་སྟོང་སོབ་བ་ནི་རླུང་ངོ༌། །ལྕི་ཞིང་འགྲིབ་པ་ནི་བད་ཀན་ནོ། །ཚ་ཞིང་སྟོ་བ་ནི་མཁྲིས་པའོ། །དེ་བཞིན་དུ་ནད་གཞན་ལ་སོགས་པ་ཡང་ཤེས་པར་བྱའོ། །རིམས་ནད་མེད་པར་གྱིས་ཤིག་ཅེས་བྱ་བ་ནི། ཚད་པ་ལས་བྱུང་བ་སྟེ། ཚད་པ་དེ་ཡང་རླུང་ལས་བྱུང་བ་དང༌། བད་ཀན་ལས་བྱུང་བ་དང༌། མཁྲིས་པ་ལས་བྱུང་བའོ། །ཉིན་གཅིག་པ་དང༌། ཉིན་གཉིས་པ་དང༌། ཉིན་གསུམ་པ་དང༌། ཉིན་བཞི་པ་དང༌། ཉིན་བདུན་པ་དང༌། ཟླ་བ་ཕྱེད་པ་དང༌། ཟླ་བ་གཅིག་པ་དང༌། ཟླ་བ་གཉིས་པས་དང༌། ཡུད་ཙམ་དང་ཞེས་བྱ་བ་ནི། རིག་སྔགས་ཀྱི་རྒྱལ་མོའི་བདེན་པས། རིག་སྔགས་དེ་རྣམས་ཀྱང་མི་སྣང་བར་འགྱུར་ཏེ། དེད་དཔོན་དེ་རྣམས་ཀྱང་སྲུང་བ་དང་སྐྱོབ་པར་འགྱུར་རོ། །རྟག་པའི་རིམས་དང་ཞེས་བྱ་བ་ནི། བད་ཀན་དང་རླུང་འདོམ་པའོ། །རིམས་ལྡང་དུབ་པ་ཞེས་བྱ་བ་ནི། ཚད་པ་དང་རླུང་ཤས་ཆེ་བའོ། །འབྱུང་པོའི་རིམས་དང་ཞེས་བྱ་བ་ནི་ཚད་པ་དྲག་ཕོར་བྱུང་ཞིང་རྩ་རྩུབ་པའོ། །རླུང་ལས་གྱུར་པ་དང༌། བད་ཀན་ལས་གྱུར་བ་དང༌། མཁྲིས་པ་ལས་གྱུར་པ་དང་ཞེས་བྱ་བ་ནི། རླུང་ནི་གཡོ་བར་བྱེད་པའོ། །བད་ཀན་ནི་ལྕི་བར་བྱེད་པའོ། །མཁྲིས་པ་ནི་ཚ་བར་བྱེད་པའོ། །འདུས་པ་ལས་གྱུར་པ་དང་ཞེས་བྱ་བ་ནི། དེ་གསུམ་འདུས་པས་ན་འདུས་པའོ། །ལྡན་པ་ནི་གཉིས་གཉིས་ལྡན་པས་ན་ལྡན་པའོ། །རིམས་ཐམས་ཅད་དང༌། ནད་ཐམས་ཅད་དང་ཞེས་བྱ་བ་ནི། ཚད་པའི་རིགས་མི་གཅིག་པ་བཅུ་གཉིས་སོ། །ནད་ནི་ནད་རིགས་མི་གཅིག་པ་བཞི་བརྒྱ་རྩ་བཞིའོ། །གདོན་ཐམས་ཅད་དང་ཞེས་བྱ་བ་ནི། ལྷའི་གདོན་ལ་སོགས་པ་སྟོང་ཕྲག་བརྒྱད་ཅུའོ། །དུག་ཐམས་ཅད་དང་ཞེས་བྱ་བ་ནི། ནང་གི་དུག་གསུམ་ཕྱིའི་དུག་གསུམ་མོ། །སྡིག་པ་ཐམས་ཅད་དང་ཞེས་བྱ་བ་ནི། ལས་དང་བག་ཆགས་ཤེས་བྱའི་སྒྲིབ་པའོ། །སྡུག་བསྔལ་ཐམས་ཅན་དང་ཞེས་བྱ་བ་ནི། ཉོན་མོངས་
པ་བརྒྱད་ཁྲི་བཞི་སྟོང་དང༌། འཁོར་བའི་སྡུག་བསྔལ་ལ་སོགས་པའོ། །འཇིགས་པ་ཐམས་ཅད་བདག་ལ་མེད་པར་གྱིས་ཤིག་ཅེས་བྱ་བ་ནི། རིག་སྔགས་ཀྱི་རྒྱལ་མོའི་གཟི་བརྗིད་ཀྱིས། གནོད་སྦྱིན་གྱི་དེད་དཔོན་ཉི་ཤུ་རྩ་བརྒྱད་དང༌། མཐུ་བོ་ཆེ་སུམ་ཅུ་རྩ་གཉིས་དང༌། སངས་རྒྱས་ཀྱི་བསྟན་པ་སྲུང་བ། རིག་སྔགས་ཀྱི་བཀའ་ལས་མི་འདའ་བ། སྲུང་བ་སེམས་ཅན་གྱི་དོན་བྱེད་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི། གནོད་སྦྱིན་གྱི་དེད་དཔོན་ཉི་ཤུ་རྩ་བརྒྱད་དང༌། མཐུ་བོ་ཆེ་སུམ་ཅུ་རྩ་གཉིས་ཀྱི་གནས་སྐབས་ཏེ་བཅུ་པའོ།། །། ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་བཀའ་སྩལ་པའོ། །ཤ་ཟ་ཆེན་མོ་བཅུ་གཉིས་པོ་འདི་དག་ནི་ཞེས་བྱ་བ་ནི་འཇིག་རྟེན་གྱི་ཁམས་ལ་དབང་མཛད་ཅིང༌། མཐུ་དང་སྟོབས་དང་ལྡན་པ་སྟེ། ཡང་དག་པར་རྫོགས་པའི་སངས་རྒྱས་ཀྱི་བསྟན་པ་སྲུང་ཞིང་རིག་སྔགས་ཀྱི་བཀའ་ལས་མི་འདའ་བའོ། །གང་དག་བྱང་ཆུབ་སེམས་དཔའ་མའི་རུམ་དུ་ཞུགས་པ་ན་ཡང་སྲུང་ཞེས་བྱ་བ་ནི། རིག་སྔགས་ཀྱི་རྒྱལ་མོ་འདིའི་གཟི་བརྗིད་ཀྱིས། མི་ཆགས་པ་ཆགས་པར་བྱེད་པ་སྟེ། ཆགས་ནས་མེར་མེར་བའི་དུས་སུ་སྲུང་པ། སྐྱེས་མ་ཐག་ཏུ་ཡང་སྲུང་པའོ། །བཙའ་ཁ་དད་བཙས་པ་ན་ཡང་བསྲུང་བ་དག་གོ་ཞེས་བྱ་བ་ནི། མ་སྐྱེས་པའི་གོད་དང་སྐྱེས་མ་ཐག་ཏུ་ཡིན་ཏེ། རིག་སྔགས་ཀྱི་གཟི་བརྗིད་ཀྱིས་ཤ་ཟ་མོ་ཆེན་མོ་བཅུ་གཉིས་ཀྱིས་སྲུང་བར་བྱེད་དོ། །བཅུ་གཉིས་ནི་གང་ཞེ་ན་ཞེས་བྱ་བ་ནི། སྔོན་གྱི་ལས་ཀྱི་འཕྲོས་ཤ་ཟ་མོར་སྐྱེས་ཤིང༌། སངས་རྒྱས་ཀྱི་བསྟན་པ་སྲུང་བའོ། །འདི་ལྟ་སྟེ་ཞེས་བྱ་བ་ནི། ཤ་ཟ་མོ་ཆེན་མོ་བཅུ་གཉིས་བལྟའོ། །ཕྲེང་མ་དང༌། རྣམ་པར་ཕྲེང་མ་དང༌། རབ་ཏུ་ཕྲེང་མ་དང༌། ཀུན་དུ་ཕྲེང་མ་དང༌། འཕྲོག་མ་དང༌། སེང་གེའི་རལ་པ་དང༌། སྤྲེའུ་ལྟར་དམར་སེར་དང༌། ནག་མོ་དང༌། མི་བཟད་མ་དང༌། དུང་མགྲིན་མ་དང༌། བྱ་རོག་མ་དང༌། བུམ་བུའི་ལྟོ་སྟེ་ཞེས་བྱ་བ་ནི། དེ་བཅུ་གཉིས་བོ་ནི། ཤིན་ཏུ་མཐུ་ཆེ་ཞིང་སྟོབས་དང་ལྡན་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། དཀར་མོ་དང༌། ནག་མོ་དང༌། སེར་མོ་དང༌། དམར་མོ་དང༌། ལྗང་གུ་
དང༌། དཀར་སེར་དང༌། དམར་སེར་དང༌། མཐིང་ག་དང༌། དམར་ནག་དང༌། དཀར་མོ་དང༌། སྔོ་བསངས་དང༌། དམར་སེར་མོའོ། །གཡས་རྣམས་ན་འཁོར་ལོ་དང༌། རྡོ་རྗེ་དང༌། རིན་པོ་ཆེ་དང༌། པདྨ་དང༌། རལ་གྲི་དང༌། མེ་ལོང་དང༌། ཨུཏྤ་ལ་སེར་པོ་དང༌། ཨུཏྤ་ལ་དམར་པོ་དང༌། ཨུཏྤ་ལ་སྔོན་པོ་དང༌། དུད་དང༌། ལྷུང་བཟེད་དང༌། བུམ་པ་བསྣམས་པའོ། །གཡོན་རྣམས་ན་ཞགས་པ་དང༌། བ་དན་དང༌། ཐོད་བ་དང༌། དྲིལ་བུ་དང༌། རྩེ་གསུམ་དང༌། དགྲ་སྟ་དང༌། ལྕགས་ཀྱུ་དང༌། ཐོད་པ་དང༌། རལ་གྲི་དང༌། མདའ་གཞུ་དང༌། ཕྲེད་བ་དང༌། དབྱུག་པ་གསུམ་བསྣམས་པའོ། །ཤ་ཟ་ཆེན་མོ་འདི་དག་རྫུ་འཕྲུལ་དང་ལྡན་པ་ཞེས་བྱ་བ་ནི། སྟོབས་ཆེན་མོ་བཅུ་གཉིས་ནི། ས་འོག་ས་སྟེང་ས་བླ་རྣམས་རྒྱུ་བ་ནི། སྐད་ཅིག་མས་རྒྱུ་བའོ། །འོད་དང་ལྡན་པ་ཞེས་བྱ་བ་ནི། རང་གི་འོད་ཀྱིས་རང་གསལ་བའོ། །ཁ་དོག་དང་ལྡན་པ་ཞེས་བྱ་བ་ནི། རང་རང་གི་ཁ་དོག་དཀར་བོ་ལ་སོགས་པས་མཛེས་བར་ལྡན་པའོ། །གྲགས་པ་དང་ལྡན་པ་ཞེས་བྱ་བ་ནི། འཇིག་རྟེན་གྱི་ཁམས་ན་གྲགས་པའོ། །རྫུ་འཕྲུལ་ཆེ་ཞེས་བྱ་བ་ནི། ནམ་མཁའ་ལ་བྱ་བཞིན་དུ་རྒྱུ་སྟེ། ཆུ་ལ་ཉ་བཞིན་ཏེ། ས་ལ་བྱི་བ་བཞིན་དུ་འཛུལ་བའོ། །ལྷ་དང་ལྷ་མ་ཡིན་གྱི་གཡུ་ལ་དག་ཀྱང་མྱོང་བར་བྱེད་བ་དག་གོ་ཞེས་བྱ་བ་ནི། ལྷ་དང་ལྷ་མ་ཡིན་འཐབ་རྩོད་ལ་སྡེ་བོ་ཆེར་གྲགས་ནས། གང་གི་ངོས་ནས་གྲོགས་བྱས་ན་རྒྱལ་པར་འགྱུར་རོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི་གང་ཟག་འདི་ལ་གུས་པར་བྱེད་པ་ཤ་ཟ་ཆེན་མོ་བཅུ་གཉིས་ཀྱིས་ཀྱང་སྲུང་བར་བྱེད་བ་དག་གོ །རིག་སྔགས་ཀྱི་རྒྱལ་མོ་འདི་ནི་ཞལ་གསུམ་ཕྱག་དྲུག་པ། སྐུ་མདོག་དཀར་མོ། གཡས་མཐིང་ག །གཡོན་དམར་བ། སྤྱན་གསུམ་པ། སངས་རྒྱས་ལྔའི་དབུ་རྒྱན་ཅན། དབུ་ལ་འཁོར་ལོས་མཚན་བ། ཕྱག་གཡས་རྣམས་ན་གཤོལ་དང༌། གསེག་ཤང་དང༌། འཁོར་ལོའོ། །གཡོན་རྨ་བྱའི་སྒྲོ་དང༌། ལྷུང་བཟེད་དང༌། ཞགས་པ་བསྣམས་པའོ། །རྡོ་རྗེའི་རིགས་མ། དེ་བཞིན་གཤེགས་པའི་རིགས་མའོ། །ཆོས་ཀྱི་དབྱིངས་ཀྱི་ཡེ་ཤེས་གཟུགས་ཀྱི་ཕུང་པོའོ། །ཞབས་གཡས་བ་རྒྱད་བ། གཡོན་བསྐུམ་པའོ། །ཟླ་བའི་གདན་ལ་ཉི་མའི་
འོད་ཟེར་དང་ལྡན་པ། ཐབས་ཤེས་རབ་གཉིས་སུ་མེད་པའི་ངོ་བོ་ཉིད་ངོ༌། །སྦ་བ་ཞེས་བྱ་བ་ནི། འབྱུང་པོ་རྣམས་ཀྱིས་གླགས་ཚོལ་བ་ལས་སྦ་བའོ། །ཡོངས་སུ་བསྐྱབ་པ་དང་ཞེས་བྱ་བ་ནི་འབྱུང་པོས་འཇིགས་པ་རྣམས་ལས་བསྐྱབ་པའོ། །ཡོངས་སུ་གཟུང་བ་དང་ཞེས་བྱ་བ་ནི། འབྱུང་པོ་རྣམས་ཀྱིས་གཟུང་བར་འདོད་པ་མི་སྣང་བར་མཛད་པའོ། །ཡོངས་སུ་བསྐྱད་བ་དང་ཞེས་བྱ་བ་ནི། རྡོ་རྗེའི་ཕུང་པོ་བཏགས་ནས་གཞན་རྣམས་ཀྱིས་གླགས་མི་རྙེད་པའོ། །ཞི་བ་དང་ཞེས་བྱ་བ་ནི། མ་རུངས་པའི་འབྱུང་པོ་དང༌། ཡི་དགས་རྣམས་ཞི་བས་དབང་དུ་སྡུད་པའོ།། བདེ་ལེགས་སུ་འགྱུར་བ་དང་ཞེས་བྱ་བ་ནི། བཀྲ་ཤིས་ཤིང་ཕུན་སུམ་ཚོགས་པའོ། །ཆད་པ་སྤང་བ་དང་ཞེས་བྱ་བ་ནི་འབྱུང་པོ་རྣམས་ཀྱི་ཆད་པ་སྤང་བའོ། །མཚོན་ཆ་སྤད་བ་དང་ཞེས་བྱ་བ་ནི། མཚོན་སྣ་ཚོགས་ཀྱི་དབུས་ནས་ཀྱང་མི་ཚུགས་པའོ། །དུག་གཞིལ་བ་དང་ཞེས་བྱ་བ་ནི། འོང་དུ་མ་བཅུག་པར་སྔར་ནས་བཀག་པའོ། །དུག་གསད་པ་དང་ཞེས་བྱ་བ་ནི། འཁོར་ན་ཡོད་པ་ནུས་པས་གསད་པའོ། །མཚམས་གཅད་པ་དང་ཞེས་བྱ་བ་ནི། དཔག་ཚད་ལྔ་བརྒྱའི་བར་མན་ཆོད་བཅད་པའོ། །ས་བཅིང་བ་དང་ཞེས་བྱ་བ་ནི་འོག་ཏུ་རླུང་གི་དཀྱིལ་འཁོར་ཡན་ཆད་དོ། །ལོ་བརྒྱ་འཚོ་བར་གྱུར་ཅིག་ཅེས་བྱ་བ་ནི་ན་ཚ་དང་བྲལ་ཞིང་གཞོན་ནུའི་ཚུལ་དུ་གནས་པའོ། །སྟོན་བརྒྱ་མཐོང་བར་ཤོག་ཤིག་ཅེས་བྱ་བ་ནི། འཁོར་དང་བུ་ལ་སོགས་པ་མང་པོ་མཐོང་བའོ། །དེ་ལ་སྔགས་ཀྱི་ཚིག་ནི་འདི་རྣམས་ཡིན་ནོ་ཞེས་བྱ་བ་ནི་ཤ་ཟ་བཅུ་གཉིས་ཀྱི་སྲོག་སྙིང་རིག་སྔགས་ཀྱི་རྒྱལ་མོའི་ལས་ཀྱི་སྙིང་པོའོ། །ཏདྱ་ཐཱ་ཞེས་བྱ་བ་ནི་རིག་སྔགས་ཀྱི་གསང་སྔགས་འོག་ཏུ་བལྟ་སྟེ། སྔགས་ནི། ཧ་རེ། ཁ་རེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི། བྱང་ཆུབ་སེམས་དཔས་བཀའ་སྩལ་བའོ། །ཤ་ཟ་ཆེན་མོ་བརྒྱད་པོ་འདི་དག་ནི་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ་དང༌། སེམས་ཅན་རྣམས་ལ་ཕན་པར་བྱེད་པ། འཇིག་རྟེན་ཁམས་ན་གྲགས་པའོ། །གང་དག་བྱང་ཆུབ་སེམས་དཔའ་མའི་རུམ་དུ་ཞུགས་པ་ན་ཡང་སྲུང་ཞེས་བྱ་བ་ནི། འདིའི་གཞུང་གསེ་སྲུང་བར་བྱེད་ན་ཤ་ཟ་བརྒྱད་པོ་དག་གིས་སྲུང་བར་བྱེད་དོ། །བཙའ་ཁ་དང་བཙས་པ་
ན་ཡང་སྲུང་བ་དག་གོ་ཞེས་བྱ་བ་ནི། གཞན་རྣམས་བྱ་བའི་གདོན་གྱི་དབང་དུ་མི་འགྱུར་བར་རིག་སྔགས་ཀྱི་རྒྱལ་མོའི་གཟི་བརྗིད་ཀྱིས་སྲུང་བར་བྱེད་པའོ། །དེ་དག་ཀྱང་གང་ཞེ་ན་ཞེས་བྱ་བ་ནི། བརྒྱད་པ་དག་སྟོབས་དང་ལྡན་པ། མཐུ་ཆེ་བ་དང་ལྡན་པའོ། །འདི་ལྟ་སྟེ་ཞེས་བྱ་བ་ནི་བརྒྱད་པ་དག་འོག་ཏུ་བལྟའོ། །རྒྱགས་པ་དང་རྒྱགས་བྱེད་མ་དང་རྒྱགས་བྱེད་མའི་ཤས་ཆེན་མ་དང༌། ཉེ་རྒྱགས་མ་དང༌། ཡི་དགས་མོ་དང༌། གཟི་བྱིན་འཕྲོག་མ་དང༌། ཟབ་མོ་དང༌། འཆའ་བ་མོ་སྟེ་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ་ལ་གནས་པ། །རིག་སྔགས་ཀྱི་བཀའ་ལས་མི་འདའོ། །དེའི་སྐུ་མདོག་དང་ཕྱག་མཚན་ནི་སེར་མོ་དང༌། དམར་སེར་དང༌། དཀར་སེར་དང༌། སྔོ་བསངས་དང༌། ལྗང་སེར་དང༌། དཀར་མོ་དང༌། དམར་མོ་དང༌། ནག་མོའོ། །གཡས་རྣམས་ན་མེ་ལོང་དང༌། དྲིའི་ཕོར་པ་དང༌། རིན་པོ་ཆེའི་ཕྲེང་བ་དང༌། པི་ཝང་དང༌། གླིང་བུ་དང༌། རྔ་དང་རྔ་རྐེད་ཉག་དང༌། རྔ་རིངས་སོ། །གཡོན་རྣམས་ན་ལྷུང་བཟེད་བསྣམས་པའོ། །ཤ་ཟ་མོ་བརྒྱད་པོ་འདི་དག་ནི་རྫུ་འཕྲུལ་དང་ལྡན་པ་ཞེས་བྱ་བ་ནི་རྫུ་འཕྲུལ་ཆེ་ཞིང་འཇིག་རྟེན་ཁམས་ན་རྒྱུ་བའོ། །འོད་དང་ལྡན་བ་ཞེས་བྱ་བ་ནི་འོད་ཟེར་གྱིས་སྣང་བ་སྟེ། འོད་དེས་གཞན་ཡང་ཁྱབ་པའོ། །ཁ་དོག་དང་ལྡན་པ་ཞེས་བྱ་བ་ནི། རང་གི་ཁ་དོག་དང་ལྡན་བའོ། །གྲགས་པ་དང་ལྡན་པ་ཞེས་བྱ་བ་ནི། ཁམས་གསུམ་ཙམ་ཡང་གྲགས་པས་ཁྱབ་པའོ། །རྫུ་འཕྲུལ་ཆེ་བ་དང་ལྡན་ཞེས་བྱ་བ་ནི། ས་འོག་ས་སྟེངས་བླ་སྐད་ཅིག་མས་རྒྱུ་བའོ། །ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ་ཞེས་བྱ་བ་ནི་ལྷའི་དབང་པོ་བརྒྱ་བྱིན་དང༌། ལྷ་མ་ཡིན་གྱི་རྒྱལ་པོ་ཐགས་བཟངས་རིས་ཀྱི་འཐབ་རྩོད་དང༌། གྲོགས་བྱེད་པར་སྣང་བའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས། སྲུང་བ་གྱིས་ཤིག་ཅེས་བྱ་བ་ནི་གང་ཟག་དག་གིས་རིག་སྔགས་ཀྱི་རྒྱལ་མོ་འདི་ལ་གུས་པར་བྱས་ཤིང་རྗེས་སུ་ཡི་རང་སྟེ། དེའི་ཡོན་ཏན་གྱིས་ཤ་ཟ་ཆེན་མོ་བརྒྱད་པོ་དག་གིས་ཀྱང་སྲུང་བར་བགྱིད་པའོ། །རིག་སྔགས་ཀྱི་རྒྱལ་མོ་ནི་ཞལ་གསུམ་ཕྱག་དྲུག་བསྐུ་མདོག་སེར་མོ། །གཡས་དཀར་གཡོན་དམར་བའོ། །སངས་རྒྱས་ཀྱི་དབུ་རྒྱན་ཅན་སྤྱན་གསུམ་པ་དབུ་ལ་རིན་པོ་ཆེས་བརྒྱན་པ། རྒྱན་ཐམས་
ཅད་ཀྱིས་བརྒྱན་པའོ། །གཡས་པ་གསུམ་ན་རིན་པོ་ཆེ་དང༌། གཏུན་ཤིང་དང༌། དགྲ་སྟ་བསྣམས་པའོ། །གཡོན་གསུམ་ན། རྨ་བྱའི་སྒྲོ། རྩེ་གསུམ་དང༌། ལྕགས་ཀྱུ་བསྣམས་པའོ། །མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་ཚོར་བའི་ཕུང་པོ་རིན་པོ་ཆེའི་རིགས་ཐབས་ཤེས་རབ་གཉིས་སུ་མེད་པ་གཡས་བརྐྱང་པ་གཡོན་བསྐུམ་པའོ། །ཟླ་བའི་གདན་ལ་ཉི་མའི་འོད་དང་ལྡན་པའོ། །སྦ་བ་ལ་སོགས་པ་ཞེས་བྱ་བ་ནི། གོང་དུ་བཤད་པ་བཞིན་ནོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། ཤ་ཟ་མོ་བརྒྱད་པོའི་སྲོག་སྙིང་དང་རིག་སྔགས་ལས་ཀྱི་སྙིང་པོ་བལྟའོ། །རིག་སྔགས་ཀྱི་གསང་སྔགས་ནི། ཧ་རེ། ཁ་རེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི། ཐུགས་རྗེ་ཆེན་པོས་ཀུན་དགའ་བོ་ལ་བཀའ་སྩལ་བའོ། །ཤ་ཟ་ཆེན་མོ་ཤ་དང་ཁྲག་ཟ་བ་མི་དག་ལ་རྣམ་པར་འཚེ་བ་བདུན་པོ་འདི་དག་ནི་ཞེས་བྱ་བ་ནི་འཇིག་རྟེན་ཁམས་རྒྱུ་ཞིང༌། སྐྱེས་པ་དང་བུད་མེད་ལ་གནོད་པ་སྐྱེལ་བ་སྟེ། འཐབ་རྩོད་ལ་དགའ་བར་བྱེད་པ་སྟེ། ཕོ་མོ་ལྕེབ་པའི་སེམས་སུ་བྱེད་པའམ། བྱིས་པ་རྣམས་ལ་གནོད་པ་སྟེ། དེ་བཞིན་དུ་སེམས་ཅན་རྣམས་ལ་གླགས་ཚོལ་བའོ། །དེ་བཞིན་དུ་གླགས་ཚོལ་ཞིང་ཁྲག་ལ་དགའ་བའོ། །གང་དག་བྱང་ཆུབ་སེམས་དཔའ་མའི་རུམ་དུ་ཞུགས་པ་ན་ཡང་སྲུང་བ་དང་ཞེས་བྱ་བ་ནི། རིག་སྔགས་ཀྱི་རྒྱལ་མོའི་དབང་གིས་འདུས་པ་སྟེ། ཤ་ཟ་བདུན་པོ་དེ་དག་ཀྱང་དེ་དག་གི་རིག་སྔགས་ཀྱི་གཟི་བརྗིད་ཀྱིས་སྲུང་བར་བྱེད་པའོ། །བཙའ་ཁ་དང་བཙས་པ་ན་ཡང་སྲུང་བར་བྱེད་པ་དག་གོ་ཞེས་བྱ་བ་ནི་གཞན་གྱི་དབང་དུ་མི་འགྱུར་བར་ཤ་ཟ་མོ་དེ་རྣམས་ཀྱིས་སྲུང་བའོ། །དེ་དག་ཀྱང་གང་ཞེ་ན་ཞེས་བྱ་བ་ནི་ཤ་ཟ་མོ་བདུན་པོ་མཐུ་ཆེ་ཞིང་སྟོབས་དང་ལྡན་པ། བཞིན་མི་སྡུག་པ་ཁྲོ་མོ་ནད་ཐམས་ཅད་གཏོང་བ། སེམས་ཅན་རྣམས་འཇིགས་པར་བྱེད་པའོ། །འདི་ལྟ་སྟེ་ཞེས་བྱ་བ་ནི་འོག་ཏུ་བལྟའོ། །རབ་འཆར་ལྡན་དང༌། སྲུང་བ་མོ་དང༌། ཤ་ཟ་ཕྲ་མོ་དང༌། གང་བ་བཟང་མོ་དང༌། མེ་སྲུང་མ་དང༌། མཛའ་མོ་ནག་མོ་དང་དྲང་སྲོང་སྲུང་མ་སྟེ་ཞེས་བྱ་བ་ནི་དེ་རྣམས་ཀྱིས་ཀྱང་སངས་རྒྱས་ཀྱི་བསྟན་པ་བསྲུང་བ་དང༌། རིག་སྔགས་ཀྱི་བཀའ་ལས་འདའ་མི་ནུས་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི་དམར་པོ་དང་ལྗང་ནག་དང༌།
སྔོན་མོ་དང༌། དམར་ནག་དང༌། མཐིང་ནག་དང༌། ནག་མོ་དང༌། ཐལ་བའི་མདོག་ཅན་ནོ། །གཡས་རྣམས་ན་གྲི་གུག་དང༌། རྩེ་གསུམ་དང༌། དགྲ་སྟ་དང༌། ཞགས་པ་དང༌། ལྕགས་ཀྱུ་དང༌། སྙིང་དང༌། སྦྲུལ་གྱི་ཞགས་པ་བསྣམས་པ། གཡོན་རྣམས་ན་ཐོད་པ་ཁྲག་གིས་གང་བ་བསྣམས་པའོ། །ཤ་ཟ་ཆེན་མོ་བདུན་པོ་འདི་དག་ནི་རྫུ་འཕྲུལ་དང་ལྡན་པ་ཞེས་བྱ་བ་ནི། གཞན་རྣམས་གནོད་པ་སྐྱེལ་བའི་ཕྱིར་གཟུགས་ཆེ་བར་བསྟན་ཏེ། རི་རབ་ཙམ་བསྟན་ནོ། །ཆུང་བ་ནི་བ་སྤུའི་རྩེ་མོ་ཙམ་བསྟན་ཏེ། དེ་ལྟ་བུའི་རྫུ་འཕྲུལ་དང་ལྡན་པའོ། །འོད་དང་ལྡན་པ་ཞེས་བྱ་བ་ནི། དེའི་འོད་ཀྱིས་སེམས་ཅན་གྱིས་ལྟ་མི་ནུས་པའོ། །ཁ་དོག་དང་ལྡན་པ་ཞེས་བྱ་བ་ནི། ཁ་དོག་དྲག་པོས་ཏེ། མེའི་ཚུལ་དུ་སྣང་བའོ། །གྲགས་པ་དང་ལྡན་བ་ཞེས་བྱ་བ་ནི་གནོད་སྦྱིན་འཇིག་རྟེན་གྱི་ཁམས་སུ་གྲགས་པའོ། །རྫུ་འཕྲུལ་ཆེ་བ་ཞེས་བྱ་བ་ནི། སྐད་ཅིག་མས་ཕྱིའི་རྒྱ་མཚོ་དང༌། རི་རབ་ཀྱི་རྩེ་མོ་ལ་རྒྱུ་བའོ། །ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ་ཞེས་བྱ་བ་ནི། དྲག་པོའི་ཚུལ་གྱིས་ལྷ་དང་ལྷ་མ་ཡིན་ལ་གྲོགས་བྱེད་པ་དག་གོ །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་འདི་ལ་གུས་པ་དང་སྲུང་བར་བྱེད་ན། དེ་རྣམས་ཀྱིས་གནོད་མི་ནུས་ཤིང་གླགས་ཚོལ་བར་མི་ནུས་པའོ། །རིག་སྔགས་ཀྱི་རྒྱལ་མོ་ནི་ཞལ་གསུམ་ཕྱག་དྲུག་པ། སྐུ་མདོག་དམར་མོ་ཅུང་ཟད་ཁྲོ་བ། གཡས་དཀར་གཡོན་མཐིང་ག་དབུ་ལ་རིགས་ལྔའི་དབུ་རྒྱན་ཅན་པདྨས་དབུ་ལ་མཚན་པ། རྒྱན་ཐམས་ཅད་རིན་པོ་ཆེས་བརྒྱན་པ། སོ་སོར་རྟོག་པའི་ཡེ་ཤེས་པདྨའི་རིགས་གཡས་བརྐྱང་གཡོན་བསྐུམ་པ། ཟླ་བའི་གདན་ལ་ཉི་མའི་འོད་དང་ལྡན་པ། ཐབས་ཤེས་རབ་གཉིས་སུ་མེད་པའོ། །སྦ་བ་ལ་སོགས་པ་ཞེས་བྱ་བ་ནི། སྔར་བཤད་པ་བཞིན་དུ་ཤེས་པར་བྱའོ། །ཏདྱ་ཐཱ་ཞེས་བྱ་བ་ནི། འདི་ལྟ་སྟེ། གང་བལྟ་ཞེ་ན། ཤ་ཟ་མོ་རྣམས་ཀྱི་སྲོག་སྙིང་དང༌། རིག་སྔགས་ཀྱི་ལས་ཀྱི་སྙིང་པོའོ། །རིག་སྔགས་ཀྱི་གསང་སྔགས་ནི། ཧ་རེ། ཁ་རེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི། བཅོམ་ལྡན་འདས་ཀྱིས་བཀའ་སྩལ་པའོ། །སྲིན་པོ་ཆེན་པོ་ཤ་དང་ཁྲག་ཟ་བ་མི་དག་ལ་རྣམ་པར་འཚེ་བ་ལྔ་པོ་འདི་དག་ནི་ཞེས་བྱ་བ་ནི།
ཕྱིའི་རྒྱ་མཚོའི་འགྲམ་དུ་གྲོང་ཁྱེར་ལངྐ་ན་སྲིན་པོ་ལྔ་པོ་སྟོབས་དང་ལྡན་པ། མཐུ་ཆེ་བ་སྐད་ཅིག་མས་གླིང་བཞིར་རྒྱུ་བ། སྐྱེས་པ་ཕོ་མོ་ལ་གནོད་པ། ཤ་ཁྲག་ལ་དགའ་བ། སེམས་ཅན་ཐམས་ཅད་ལ་གནོད་པ་བྱེད་པའོ། །གང་དག་བྱང་ཆུབ་སེམས་དཔའ་མའི་རུམ་དུ་ཞུགས་པ་ན་ཡང་སྲུང་ཞེས་བྱ་བ་ནི། རིག་སྔགས་ཀྱི་རྒྱལ་མོའི་གཟི་བརྗིད་དང༌། སྟོབས་དང་མཐུའི་ནུས་པས་སྲིན་པོ་དེ་དག་གིས་ཀྱང་རིག་སྔགས་ཀྱི་བཀའ་ལས་འདའ་བར་མི་ནུས་པ་དེའི་ནུས་པས་དང་པོ་ཡང་སྲུང་བ། བར་དུ་ཡང་སྲུང་བ། ཐ་མར་ཡང་སྲུང་བའོ། །བཙའ་ཁ་དང་བཙས་པ་ན་ཡང་སྲུང་བར་བྱེད་ཅེས་བྱ་བ་ནི། རིག་སྔགས་ཀྱི་བཀའི་ནུས་པས་སྐྱེ་བ་ལ་ཡང་དག་པར་སྲུང་སྟེ། སྐྱེས་ནས་ཀྱང་ཚེ་མ་ཟད་ཀྱི་བར་དུ་སྲུང་བའོ། །ལྔ་པོ་དེ་དག་ཀྱང་གང་ཞེ་ན་ཞེས་བྱ་བ་ནི་གཟུགས་ཆེ་ཞིང་བཞིན་མི་སྡུག་པ་སེམས་ཅན་ལ་འཇིགས་པ་དང༌། སྐྲག་པར་བྱེད་པ་རྨི་ལམ་ན་ཡང་སྡིག་པར་རྨི་བ་དེ་དག་ལྔ་བོའོ།། །འདི་ལྟ་སྟེ་ཞེས་བྱ་བ་ནི་སྲིན་མོ་ལྔ་པོ་བལྟའོ། །གཏུམ་མོ་དང༌། དེས་གཏུམ་མོ་དང༌། དགའ་མོ་དང༌། ཁྱབ་འཇུག་ལེན་དང༌། སེར་སྐྱ་མོ་སྟེ་ཞེས་བྱ་བ་ནི་གསུས་པ་ཆེ་བ། མིག་དམར་བ། སྐྲ་གཟིངས་པ། དེ་རྣམས་ཀྱི་ཁ་དོག་དང༌། ཕྱག་མཚན་ནི་དཀར་པོ་དང༌། ནག་པོ་དང༌། སེར་པོ་དང༌། དམར་མོ་དང༌། ལྗང་གུའོ། །གཡས་རྣམས་ན་སྦྲུལ་གྱི་ཞགས་པ་དང༌། བདུད་གྱི་ཞགས་པ་དང༌། གྲི་ཁྱེའོ་དང༌། ལྕགས་ཀྱུ་དང༌། རལ་གྲི་བསྣམས་པ། གཡོན་རྣམས་ན་ཐོད་པ་དང༌། མི་མགོ་དང༌། ཐལ་བའི་སྣོད་དང༌། སྙིང་དང་མིའི་པགས་པ་བསྣམས་པའོ། །སྲིན་མོ་ལྔ་པོ་འདི་དག་ནི། རྫུ་འཕྲུལ་དང་ལྡན་པ་ཞེས་བྱ་བ་ནི་ཉེ་བའམ་བུའམ་བུ་མོའི་གཟུགས་སུ་བྱས་ནས་གནོད་པ་སྐྱེལ་ཏེ། ལ་ལ་བྱའི་གཟུགས་སམ། ཁྱིའི་གཟུགས་སམ། རྨ་བྱ་དང༌། ཁྲུང་ཁྲུང་གི་གཟུགས་སུ་བྱས་ནས་རྫུ་འཕྲུལ་དུ་སྦྲུལ་པའོ། །འོད་དང་ལྡན་པ་ཞེས་བྱ་བ་ནི། གཞན་གྱིས་ཀྱང་འདི་དྲག་པོ་མཐོང་སྟེ། འོད་དེ་ཡང་མེ་ལྕེ་འབར་བའི་འོད་དང་འདྲ་བའོ། །ཁ་དོག་དང་ལྡན་པ་ཞེས་བྱ་བ་ནི་སོ་སོ་རང་རང་གི་ཁ་དོག་དང་ལྡན་པའོ། །གྲགས་པ་དང་ལྡན་པ་ཞེས་བྱ་བ་ནི། འཇིག་རྟེན་གྱི་ཁམས་སུ་གྲགས་པའོ། །རྫུ་འཕྲུལ་ཆེ་བ་ཞེས་བྱ་བ་ནི། སྐད་ཅིག་མས་
གླིང་ལ་རྒྱུ་ནུས་པའོ། །ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་བ་ཞེས་བྱ་བ་ནི། དྲག་པོའི་ཚུལ་གྱིས་གཡུལ་ལས་བཟློག་ནུས་ཏེ། འཐབ་རྩོད་བྱེད་པ་ལ་རེམ་བའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བ་དག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་གིས་འདི་ལ་གུས་པར་བསྲུང་བ་དང་སྐྱབས་སུ་གསོལ་ན། སྲིན་པོ་དེ་དག་གིས་ཀྱད་མི་ཚུགས་པ། རིག་སྔགས་ཀྱི་ངོ་བོ་ཉིད་ཐོབ་པའོ། །རིག་སྔགས་ཀྱི་ངོ་བོ་གང་ཞེ་ན། ཐབས་དང་ཤེས་རབ་ཀྱི་རང་བཞིན་ཏེ། ཐབས་ཀྱི་ངོ་བོ་ནི། སྐུ་མདོག་དང་ཕྱག་མཚན་བསྟན་པ། ཤེས་རབ་ཀྱི་ངོ་བོ་ནི་བྱ་བ་ནན་ཏན་གྱི་ཡེ་ཤེས་སོ། །ཞལ་གསུམ་པ་ཕྱག་དྲུག་པ། སྐུ་མདོག་ལྗང་གུའོ། །གཡས་དཀར་བ། གཡོན་དམར་བ། སྤྱན་གསུམ་པ། དབུ་ལ་རིགས་ལྔའི་དབུ་རྒྱན་ཅན། སྤྱི་བོའི་གཙུག་ན་སྣ་ཚོགས་རྡོ་རྗེས་བརྒྱན་པ། ལས་ཀྱི་རིགས་འདུ་བྱེད་ཀྱི་ཕུང་པོའོ། །གཡས་རྣམས་ན་རལ་གྲི་དང༌། སྣ་ཚོགས་རྡོ་རྗེ་དང༌། གཏུན་ཤིང་བསྣམས་པ། གཡོན་རྣམས་ན་རྨ་བྱའི་སྒྲོ་དང༌། ཞགས་པ་དང༌། ལྕགས་ཀྱུ་བསྣམས་པའོ། །རྒྱན་ཐམས་ཅད་ཀྱིས་བརྒྱན་པའོ། །གཡས་བརྐྱང་བ་གཡོན་བསྐུམ་བཟླ་བའི་གདན་དང་ཉི་མའི་འོད་ཟེར་དང་ལྡན་པ། ཐབས་ཤེས་རབ་གཉིས་སུ་མེད་པའོ། །སྦ་བ་ལ་སོགས་པ་ཞེས་བྱ་བ་ནི། དེ་ལྟ་བུའི་རིག་སྔགས་ཀྱི་རང་བཞིན་ཏེ། སྲུང་བ་དང་སྐྱོབ་བ་དང་སྐྱོང་བ་ལ་སོགས་པ་བྱེད་པའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ་དེ་རྣམས་ཀྱི་སྲོག་སྙིང་དང་རིག་སྔགས་ཀྱི་ལས་ཀྱི་སྙིང་པོར་བལྟའོ། །རིག་སྔགས་ཀྱི་གསང་སྔགས་ནི། ཧ་རེ། ཁ་རེ་ལ་སོགས་པའོ།། ཀུན་དགའ་བོ་ཞེས་བྱ་བ་ནི། བཅོམ་ལྡན་འདས་ཀྱིས་བཀའ་སྩལ་པའོ། །སྲིན་པོ་ཆེན་པོ་ཤ་དང་ཁྲག་ཟ་བ། མི་རྣམས་ལ་རྣམ་པར་འཚེ་བ་བརྒྱད་པོ་འདི་དག་ནི་ཞེས་བྱ་བ་ནི། འཇིག་རྟེན་གྱི་ཁམས་རྒྱུ་ཞིང་གླགས་ཚོལ་བ་སྟེ། སྨྱོ་བ་དང༌། ལྕེབ་པ་དང༌། ཁྲོ་བ་དང༌། གཏུམ་པ་དང༌། འཐབ་པ་དང༌། རྩོད་པ་དང༌། གཡུལ་དུ་ཞུགས་ཤིང༌། མི་རྣམས་ལ་འཚེ་བར་བྱེད་པ་སྟེ། རིམས་ནང་དང༌། ཁྲག་ནང་གཏོང་བར་བྱེད་པ་དག་གོ །གང་དག་བྱང་ཆུབ་སེམས་དཔའ་མའི་རུམ་དུ་ཞུགས་པ་ན་ཡང་སྲུང་ཞེས་བྱ་བ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་གཟི་བརྗིད་ཀྱིས་འདི་
ལ་གུས་པར་བྱེད་བ་ཙམ་ལ། གནོད་པ་བཅིངས་པ་སྟེ། གང་ཟག་གི་ཐོག་མ་དང༌། ཐ་མ་བར་དུ་བསྲུང་བའོ། །བཙའ་ཁ་དང་བཙས་པ་ན་ཡང་སྲུང་བ་དག་གོ་ཞེས་བྱ་བ་ནི་སྐྱེས་པའི་དུས་ནས་རྒས་པའི་བར་དུ་བསྲུང་སྟེ། གློ་བུར་གྱི་རྐྱེན་ཡང་མི་གཏོང་བའོ། །དེ་དག་ཀྱང་གང་ཞེ་ན་ཞེས་བྱ་བ་ནི་གཟུགས་ཆེ་ཞིང་བཞིན་མི་སྡུག་པ་གསུས་པ་ཆེ་བ། མགོ་ཆེ་བ། མིག་ཀྱང་གློག་དང་འདྲ་བ། སྨིན་མ་ཁྲོ་གཉེར་ཅན་སྐྲ་ཁམ་ནག་གྱེན་དུ་གཟིངས་པ། སྐད་ཆེ་བ་སྦོམ་པ། སེམས་ཅན་རྣམས་ལ་འཇིགས་པ་དང༌། སྐྲག་པར་བྱེད་པའོ། །འདི་ལྟ་སྟེ་ཞེས་བྱ་བ་ནི། འཇིགས་པ་དང་སྐྲག་པར་བྱེད་པ་བརྒྱད་པའོ། །བལྟ་བའོ། །གླེན་མ་དང༌། མཚམས་བཟང་མ་དང༌། ཀུ་ཤ་ལྟ་བུའི་མིག་ཅན་མ་དང༌། སྐྲ་ཅན་དང༌། ཀམ་པོ་ཛི་དང༌། རབ་མཛེས་མ་དང༌། མིག་དམར་མོ་དང༌། མི་བཟད་མ་སྟེ་ཞེས་བྱ་བ་ནི། མཐུ་ཆེ་ཞིང་སྟོབས་དང་ལྡན་པ་སྟེ། མི་རྣམས་ལ་འཚེ་བ་ལ་དགའ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི་ནག་པོ་དང༌། སྔོ་བསངས་དང༌། ལྗང་ནག་དང༌། མཐིང་ནག་དང༌། དམར་ནག་དང༌། ཐལ་བའི་མདོག་ཅན་དང༌། སྔོ་སྐྱ་དང༌། ལྗང་གུའོ། །གཡས་རྣམས་ན་མདུང་དང༌། འཕང་མདུང་དང༌། རྩེ་གཅིག་དང༌། ཏོ་མར་དང༌། གཏུན་ཤིང་དང༌། འཁོར་ལོ་དང༌། མདའ་གཞུ་དང༌། རྩེ་གསུམ་བསྣམས་པའོ། །གཡོན་རྣམས་ན་ཞགས་པ་དང༌། སྦྲུལ་དང་མི་སྙིང་དང༌། མི་མགོ་དང༌། མིའི་པགས་པ་དང༌། རྒྱུ་ཞགས་དང༌། ཐོད་པ་དང༌། མི་རོ་བསྣམས་པའོ། །དྲི་མི་ཞིམ་པ་སྦྲུལ་གྱིས་བརྒྱན་པའོ། །གཅེར་བུར་གནས་པ། མིའི་ཞིང་ལྤགས་གོན་པའོ། །དེ་དག་ནི་ཤ་དང་ཁྲག་ཟ་བཞེས་བྱ་བ་ནི། མཛའ་བ་མི་མཛའ་བར་བྱ་སྟེ། འཐབ་རྩོད་ཀྱི་སེམས་བཅུག་ནས་མཚོན་གྱིས་མཚོན་འགྱེད་པར་བྱེད་པ་ཉེ་བ་དང་མེ་འཁྲུག་པར་བྱེད་པ་ལ་དགའ་བའོ། །སྐྱེས་པ་དང་བུད་མེད་དང༌། ཁྱེའུ་དང༌། བུ་མོ་དག་ཀྱང་འཕྲོག་པ་ཞེས་བྱ་བ་ནི། དེ་རྣམས་དང་ཕྲད་གླགས་མེད་པ། གལ་ཏེ་ཕྲད་པར་གྱུར་ན། སྲོག་འཕྲོག་པ་གྲོང་ངམ། གྲོང་ཁྱེར་རམ། ལྗོངས་སམ། གྲོང་རྡལ་ལམ། ཕོ་བྲང་དག་ལ་རྒྱུ་བ་སེམས་ཅན་རྣམས་ལ་འཚེ་བར་བྱེད་ཅིང༌། སྲོག་འཕྲོག་པ། ཁྱེའུ་བུ་མོ་མངལ་ན་ཡོད་པ་ཡང་འཕྲོག་པ་སྟེ། དེ་ཤ་ཁྲག་
རྣག་ལ་དགའ་བའོ། །གྲོང་དུ་ཞུགས་པའི་ཁྱིམ་བདག་དང༌། ཁང་སྟོང་ལ་བརྟེན་པ་ཞེས་བྱ་བ་ནི། ཤིན་ཏུ་རང་གི་རིགས་སྡང་བ་ལ་སྲུང་བ། སྟོང་པའི་ནང་དུ་གཟུགས་མི་སྣང་བར་འདོད་པ། ཡང་ན་གཟུགས་ཀྱི་རང་བཞིན་མ་ཡིན་ཏེ། ཡིད་ཀྱི་རང་བཞིན་དུ་ཡོད་པ། གཟུགས་མི་སྣང་བའོ། །མུན་བའི་འོད་འགྲོ་བ་རྗེས་སུ་འགྲོ་བ། སྒྲ་འབྱིན་པ་ཞེས་བྱ་བ་ནི། དུར་ཁྲོད་དམ། ལམ་རྒྱ་གྲམ་མམ། སུམ་མདོའམ། ཕོ་བྲང་ངམ་དེ་རྣམས་མུན་པ་ལ་རྒྱུ་ཞིང༌། འཇིགས་པ་དང༌། སྐྲག་པར་བྱེད་པ་སྟེ། དེ་བཞིན་དུ་མི་རྣམས་ལ་གནོད་པ་བྱེད་པའོ། །མི་འདི་རྣམས་ཀྱི་མདངས་འཕྲོག་པར་བྱེད་པ་ཆེ་བའོ་ཞེས་བྱ་བ་ནི། མི་རྣམས་ཀྱི་གཟི་བརྗིད་འཕྲོག་པ། སེམས་ཅན་རྣམས་ལ་འཚེ་བར་གྲགས་པ། ཤུ་བ་དང༌། གཡའ་བ་དང༌། མཛེ་དང༌། ཕོལ་མིག་དང༌། ཤ་བཀྲ་དང༌། འབྲས་དང༌། གཡན་པ་དང༌། དམུ་ཆུ་དང༌། དེ་ལ་སོགས་པའི་ནད་རྣམས་གཏོང་བར་བྱེད་པ་དག་གོ །དེ་དག་ནི་སྙིང་རྗེ་མེད་ཅིང༌། མིའི་སྐྱེ་དགུ་སྐྲག་པར་བྱེད་པ་སྟེ་ཞེས་བྱ་བ་ནི་སྲིན་མོ་བརྒྱད་པོ་དེ་དག་ཀྱང་སེམས་ཅན་རྣམས་ལ་རྟག་ཏུ་འཚེ་བ་སྟེ། ཤན་པ་བཞིན་དུ་སེམས་ཅན་ལ་བྱས་པ་སྟེ། ཤ་ཁྲག་ལ་དེ་བཞིན་དུ་དགའ་བ་སྟེ། སྲིན་མོ་དེ་དག་ནི་འཇིགས་པར་སྣང་ངོ༌། །སྲིན་མོ་ཆེན་པོ་བརྒྱད་པོ་དེ་དག་ནི་རྫུ་འཕྲུལ་དང་ལྡན་པ་ཞེས་བྱ་བ་ནི། ཚན་གཅིག་ལ་འཚེ་བའི་དུས་སུ་གཟུགས་ཆེ་བར་བསྟན་ཏེ། ཚན་གཅིག་བ་སྤུའི་བུ་གནས་བཟུང་ནས་གནོད་པ་བྱེད་པའོ། །འོད་དང་ལྡན་པ་ཞེས་བྱ་བ་ནི། མེ་དཔུང་འབར་བའི་འོད་ཟེར་དང་ལྡན་པ། དེ་དག་གི་འོད་ཟེར་ཁ་དོག་དྲུག་དང་ལྡན་པའོ། །ཁ་དོག་དང་ལྡན་པ་ཞེས་བྱ་བ་ནི། སོ་སོ་རང་རང་གི་ཁ་དོག་དང་ལྡན་པ། དེའི་ཁ་དོག་གིས་མཛེས་པར་སྣང་བའོ། །གྲགས་པ་དང་ལྡན་པ་ཞེས་བྱ་བ་ནི། འཇིག་རྟེན་གྱི་ཁམས་ཀྱི་ནང་ན་གྲགས་པའོ། །རྫུ་འཕྲུལ་ཆེ་བ་ཞེས་བྱ་བ་ནི། སྐད་ཅིག་མས་གླིང་བཞིར་རྒྱུ་བའོ། །ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ་ཞེས་བྱ་བ་ནི། དེ་གཉིས་འཐབ་པའི་དུས་སུ་ཡང་དེ་རྣམས་ཀྱིས་འཐབ་རྩོད་བྱེད་པ་སྟེ། ཤིན་ཏུ་སྟོབས་དང་ལྡན་པ། མཐུ་ཆེ་།བར་གྲགས་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་
བ་གྱིས་ཤིག་ཅེས་བྱ་བ་ནི། གང་ཟག་གིས་འདི་ལ་གུས་པར་བྱེད་པའི་སེམས་ཅན་བརྒྱད་པོ་དེ་དག་གིས་སྲུང་བར་བྱེད་དེ། གནོད་པ་དྲག་པོས་གནོད་པར་མི་ནུས་པ། རིག་སྔགས་ཀྱི་བཀའ་ལས་འདའ་བར་མི་ནུས་པའོ། །རིག་སྔགས་ཀྱི་ངོ་བོ་ནི་མཚོན་བྱ་ནི་མེ་ལོང་ལྟ་བུའི་ཡེ་ཤེས་ཏེ། ཤེས་རབ་ལྟ་བུའོ། །མཚོན་བྱེད་ནི་གཟུགས་བརྙན་ལྟ་བུ་སྟེ། རིག་སྔགས་ཀྱི་རྒྱལ་མོའི་བདག་ཉིད་དོ། །དེ་ཡང་རྡོ་རྗེའི་རིགས་རྣམ་པར་ཤེས་པའི་ཕུད་པོའོ། །ཡེ་ཤེས་ལྔའི་ངོ་བོ་ཉིད་ཞལ་གསུམ་ཕྱག་དྲུག་པ་སྐུ་མདོག་མཐིང་གར་བཞུགས་པའོ། །ཞལ་གསུམ་དུ་སྣང་བ་ནི་སྐུ་གསུང་ཐུགས་ཀྱི་རྣམ་པར་དག་པའོ། །སྐུ་མདོག་མཐིང་གར་སྣང་བ་ནི། བྱམས་པ་ཡོངས་སུ་རྫོགས་པའོ། །སྤྱན་གསུམ་དུ་སྣང་བ་ནི་ཡེ་ཤེས་གསུམ་དུ་རྣམ་པར་དག་པའོ། །ཁྲོ་བོར་སྣང་བ་ནི་མ་ལུས་སེམས་ཅན་ཡོངས་སུ་རྫོགས་པར་བྱེད་པའོ། །ཐོད་པ་ལྔའི་དབུ་རྒྱན་ནི། འདོད་པའི་ཡོན་ཏན་ལྔ་བོར་ནས་ཡེ་ཤེས་ལྔར་ཤར་བའོ། །དབུ་སྐྲ་སེར་པོ་གྱེན་དུ་འབར་བ་ནི་ཐེག་པ་སྣ་ཚོགས་བསྟན་པའོ། །དབུ་ལ་རྡོ་རྗེས་མཚན་པ་ནི་རྡོ་རྗེའི་རིགས་ཀྱི་རྣམ་པར་དག་པའོ། །ཁྲོ་གཉེར་དུ་བསྟན་པ་ནི་ཐེག་པ་གསུམ་དང་ལྡན་པའོ། །མཆེ་བ་གཙིགས་པ་ནི། ཀུན་རྫོབ་དང་དོན་དམ་པའི་རང་བཞིན་བསྟན་པའོ། །སྤྲུལ་གྱིས་ཡན་ལག་བརྒྱན་པ་ནི་ནང་གི་དུག་དང་ཕྱིའི་དུག་བཅོམ་པའོ། །ཕྱག་དྲུག་དང་ལྡན་པ་ནི་ཕ་རོལ་ཏུ་ཕྱིན་པ་དྲུག་དང་ལྡན་པའོ། །གཡས་བརྐྱང་གཡོན་བསྐུམ་པ་ནི་མྱ་ངན་དང་སྲིད་པས་མ་གོས་པའོ། །ཟླ་བའི་གདན་ལ་ཉི་མའི་འོད་དང་ལྡན་པ་ནི་ཐབས་ཤེས་རབ་གཉིས་སུ་མེད་པའི་བརྡ་བསྟན་པའོ། །པདྨ་བརྒྱད་པའི་གདན་ནི་རྣམ་པར་ཐར་པ་བརྒྱད་དོ། །ཕྱག་གཡས་ན་རལ་གྲི་བསྣམས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པའོ། །དེའི་འོག་རྡོ་རྗེ་བསྣམས་པ་ནི། ཡེ་ཤེས་ལྔའི་རང་བཞིན་དག་པའོ། །ཐ་མ་གཏུན་ཤིང་བསྣམས་པ་ནི། ཐེག་པ་དུ་མ་རྣམ་པར་དག་པའོ། གཡོན་རྨ་བྱའི་སྒྲོ་བསྣམས་པ་ནི་དུག་གསུམ་རྣམ་པར་འཇོམས་པའོ། །བར་མ་ན་ཞགས་པ་བསྣམས་པ་ནི། བདུད་བཞི་བཅིང་བའོ། །ཐ་མ་ན་རྩེ་གསུམ་བསྣམས་པ་ནི། སྲིད་གསུམ་རྣམ་པར་འཇོམས་པའོ། །ཡེ་ཤེས་ལྔའི་རང་བཞིན་རྣམ་པར་བསྟན་པ་ནི། རིག་སྔགས་ཀྱི་རང་བཞིན་སྟོང་
པ་ཉིད་དུ་བསྟན་པའོ། །མེ་ལོང་ལྟ་བུའི་ཡེ་ཤེས་ནི་འཇིག་རྟེན་གྱི་ཁམས་མེ་ལོང་ལྟ་བུ་སྟེ། སྒྱུ་མ་ལྟ་བུ་སྣང་བ་རྣམ་པར་དག་པའོ། །དེ་ལྟ་བུའི་རིག་སྔགས་ལ་གང་ཟག་དག་གིས་མོས་པར་གྱུར་ན། བརྒྱད་པོ་དེ་དག་གིས་གནོད་པར་མི་ནུས་ཏེ། དེ་རྣམས་ཀྱིས་ཀྱང་མཆོད་པར་འོས་པའོ། །སྦ་བ་ལ་སོགས་པ་ཞེས་བྱ་བ་ནི། རིག་སྔགས་ཀྱི་རྒྱལ་མོ་དེའི་གཟི་བརྗིད་ཀྱིས་སྤ་པ་ལ་སོགས་པའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། བརྒྱད་པོའི་སྲོག་སྙིང་དང་རིག་སྔགས་ཀྱི་ལས་ཀྱི་སྙིང་པོའོ། །རིག་སྔགས་ཀྱི་གསང་སྔགས་ནི། ཧ་རེ། ཁ་རེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི་གཽ་ཏ་མས་བཀའ་སྩལ་བའོ། །སྲིན་མ་ཆེན་མོ་བཅུ་བོ་འདི་དག་ནི་ཞེས་བྱ་བ་ནི། སངས་རྒྱས་ཀྱི་བསྟན་པ་བསྲུང་ཞིང༌། རིག་སྔགས་ཀྱི་བཀའ་ལས་མི་འདའ་བ། སེམས་ཅན་རྣམས་ཀྱི་དོན་བྱེད་པའོ། །གང་དག་བྱང་ཆུབ་སེམས་དཔའ་མའི་རུམ་དུ་ཞུགས་ན་ཡང་སྲུང་ཞེས་བྱ་བ་ནི། རིག་སྔགས་ཀྱི་བཀའ་ལས་མི་འདའ་བར་བྱང་ཆུབ་སེམས་དཔའི་རྒྱུ་ཅན་སེམས་ཅན་མའི་ས་བོན་སྲུང་བའོ། །བཙའ་ཁ་དང་བཙས་པ་ན་ཡང་བསྲུང་བ་དག་གོ་ཞེས་བྱ་བ་ནི། རྒྱུའི་བྱང་ཆུབ་སེམས་དཔའི་ཕུང་པོ་ལྔའི་རང་བཞིན་རྒྱུའི་སེམས་དཔས་བསྲུང་བའོ། །དེ་དག་ཀྱང་གང་ཞེ་ན་ཞེས་བྱ་བ་ནི། བཅུ་པོ་སྲིན་མོའི་རང་བཞིན་རྣམ་པར་སྨིན་པ་ལས་བྱུང་བ་སེམས་ཅན་གྱི་དོན་མཛད་པའོ། །འདི་ལྟ་སྟེ་ཞེས་བྱ་བ་ནི། སྲིན་མོ་བཅུ་བོར་བལྟའོ། །སྲིན་མོ་འཕྲོག་མ་དང༌། སྲིན་མོ་དགའ་མོ་དང༌། སྲིན་མོ་དམར་སེར་མོ་དང༌། སྲིན་མོ་དུང་ཅན་མ་དང༌། སྲིན་མོ་ལུས་ལས་བྱུང་མ་དང༌། སྲིན་མོ་ལྷ་བཤོས་མ་དང༌། སྲིན་མོ་བུམ་པ་མ་དང༌། སྲིན་མོ་མེ་ཏོག་ཀུནདའི་མཆེ་བ་ཅན་དང༌། སྲིན་མོ་འཕྱང་མ་དང༌། སྲིན་མོ་མེ་སྟེ་ཞེས་བྱ་བ་ནི། དེ་རྣམས་ནི་སྟོབས་ཆེ་ཞིང་མཐུ་ཆེ་བ་སྟེ། སངས་རྒྱས་ཀྱི་བསྟན་པ་བསྲུང་བ་སྟེ། སེམས་ཅན་གྱི་དོན་མཛད་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། སེར་མོ་དང༌། ནག་མོ་དང༌། དམར་སེར་མ་དང༌། དཀར་མོ་དང༌། སྔོ་སྐྱ་དང༌། དམར་མོ་དང༌། ལྗང་གུ་དང༌། དཀར་སེར་དང༌། མཐིང་ག་དང༌། གསེར་གྱི་མདོག་ཅན་མའོ། །གཡས་རྣམས་ན་ཨུཏྤལ་དང༌། པདྨ་དང༌། པདྨ་དམར་པོ་དང༌། དུང་དང་འཁོར་ལོ་དང༌། ཀུནད་དང་མེ་ཏོག་
སུནད་དང་པུཎྜ་རཱི་ཀ་དང༌། ཨུཏྤལ་སེར་པོ་བསྣམས་པའོ། །གཡོན་རྣམས་ན་ལྷུང་བཟེད་བསྣམས་པའོ། །སྲིན་མོ་ཆེན་མོ་བཅུ་གཉིས་པོ་འདི་དག་ནི་རྫུ་འཕྲུལ་དང་ལྡན་པ་ཞེས་བྱ་བ་ནི། གོང་ནས་གོང་དུ་འགྲོ་བ་སྐད་ཅིག་མས་སླེབས་ཏེ། ཆར་དང་མེ་འབར་བར་ནུས་སོ། །འོད་ཟེར་དང་ལྡན་པ་ཞེས་བྱ་བ་ནི། རང་གི་འོད་ཟེར་གྱིས་དཔག་ཚད་ལྔ་བརྒྱ་ཡང་གསལ་ལོ། །དེ་བཞིན་དུ་གཞན་ཡང་གསལ་ལོ། །ཁ་དོག་དང་ལྡན་པ་ཞེས་བྱ་བ་ནི། རང་རང་གི་ཁ་དོག་མཛེས་པ་དང་ལྡན་པའོ། །གྲགས་པ་དང་ལྡན་པ་ཞེས་བྱ་བ་ནི། འཇིག་རྟེན་གྱི་ཁམས་སུ་དགེ་བར་གྲགས་པའོ། །རྫུ་འཕྲུལ་ཆེ་བ་ཞེས་བྱ་བ་ནི། ཁམས་གསུམ་དུ་སྐད་ཅིག་མས་རྒྱུ་བ་སྟེ། སེམས་ཅན་གྱི་དོན་ལ་རྫུ་འཕྲུལ་དང་ལྡན་པའོ། །ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ་ཞེས་བྱ་བ་ནི། ལྷ་དང་ལྷ་མ་ཡིན་གྱི་འཐབ་རྩོད་ལ་སྟོབས་དང་ལྡན་ཞིང་མཐུ་དང་ལྡན་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་གང་གིས་རིག་སྔགས་ཀྱི་རྒྱལ་མོ་ལ་གུས་པར་བྱས་ཏེ། དེའི་གཟི་བརྗིད་ཀྱིས་སྲིན་མོ་བཅུ་གཉིས་པོ་འདི་དག་གིས་སྲུང་བ་དང་སྐྱོབ་པར་བྱེད་པའོ། །རིག་སྔགས་ནི་ཞལ་གཅིག་ཕྱག་བཞི་པ། སྐུ་མདོག་དཀར་མོ་སའི་ཁམས་ཀྱི་རང་བཞིན། དབུ་ལ་འཁོར་ལོས་མཚན་པ། སྤྱན་གསུམ་པ་རིགས་ལྔའི་དབུ་རྒྱན་ཅན། ཡེ་ཤེས་ལྔ་དང་ལྡན་པ་རྒྱན་ཐམས་ཅད་ཀྱིས་བརྒྱན་པ། གཡས་པ་གཉིས་ན་འཁོར་ལོ་དང་མེ་ལོང་བསྣམས་པ། གཡོན་གཉིས་ན་རྨ་བྱའི་སྒྲོ་དང་རིན་པོ་ཆེ་བསྣམས་པའོ། །ཞབས་གཡས་པ་བརྐྱང་པ་གཡོན་པ་བསྐུམ་པ། ཟླ་བའི་གདན་ལ་ཉི་མའི་འོད་དང་ལྡན་པའོ། །སྤ་བ་ལ་སོགས་པ་ཞེས་བྱ་བ་ནི་གོང་བཞིན་དུ་ཤེས་པར་བྱའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ་དེ་རྣམས་ཀྱི་སྲོག་སྙིང་དང་རིག་སྔགས་ཀྱི་སྙིང་པོར་བལྟའོ། །རིག་སྔགས་ཀྱི་གསང་སྔགས་ནི། ཧ་རེ། ཁ་རེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི་ཤཱཀྱ་སེང་གེའི་ཐུགས་རྗེས་དགོངས་ནས་བཀའ་སྩལ་བའོ། །སྲིན་མོ་ཆེན་མོ་བཅུ་གཉིས་པོ་འདི་དག་ནི་ཞེས་བྱ་བ་ནི་དེ་དག་གིས་སངས་རྒྱས་ཀྱི་བསྟན་པ་བསྲུང་བ་སེམས་ཅན་གྱི་དོན་མཛད་པའོ། །
གང་དག་བྱང་ཆུབ་སེམས་དཔའ་མའི་རུམ་དུ་ཞུགས་པ་ན་ཡང་སྲུང་ཞེས་བྱ་བ་ནི་རྒྱུའི་སེམས་དཔའ་མངལ་ན་སྲུང་སྟེ། དེ་ཡང་བར་དུ་སྲུང༌། ཐ་མར་ཡང་སྲུང་བའོ། །བཙའ་ཁ་དང་བཙས་པ་ན་ཡང་སྲུང་བ་དག་གོ་ཞེས་བྱ་བ་ནི་མ་བཙས་པ་ནས་བསྲུང་སྟེ། སྐྱེས་ནས་ལོ་བརྒྱ་བཅུ་གཉིས་བར་དུ་བསྲུང་བའོ། །དེ་དག་ཀྱང་གང་ཞེ་ན་ཞེས་བྱ་བ་ནི་བྱང་ཆུབ་སེམས་དང་ལྡན་པ། སྲིན་མོ་བཅུ་གཉིས་སྟོབས་དང་ལྡན་པ་མཐུ་ཆེ་བ་དག་གོ །འདི་ལྟ་སྟེ་ཞེས་བྱ་བ་ནི་སྲིན་མོ་རྣམས་བལྟའོ། །སྲིན་མོ་མགོན་མེད་མ་དང༌། སྲིན་མོ་རྒྱ་མཚོ་མ་དང༌། སྲིན་མོ་དྲག་མོ་དང༌། སྲིན་མོ་སྲོག་འཕྲོག་མ་དང༌། སྲིན་མོ་རིག་མ་དང༌། སྲིན་མོ་གཞུ་འཛིན་མ་དང༌། སྲིན་མོ་མདའ་འཛིན་མ་དང༌། སྲིན་མོ་རལ་གྲི་འཛིན་མ་དང༌། སྲིན་མོ་གཤོལ་འཛིན་མ་དང༌། སྲིན་མོ་འཁོར་ལོ་འཛིན་མ་དང༌། སྲིན་མོ་ཁོར་ཡུག་དང༌། སྲིན་མོ་འཇིགས་བྱེད་མ་སྟེ་ཞེས་བྱ་བ་ནི། སངས་རྒྱས་ཀྱི་བསྟན་པ་བསྲུང་ཞིང་སེམས་ཅན་གྱི་དོན་བྱེད་པ་བྱང་ཆུབ་སེམས་མའི་རང་བཞིན་ནོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། མཐིང་ག་དང༌། དཀར་མོ་དང༌། སྔོ་བསངས་དང༌། དམར་མོ་དང༌། སེར་མོ་དང༌། སྔོན་མོ་དང༌། ལྗང་གུ་དང༌། དམར་སེར་དང༌། དཀར་སེར་དང༌། དུད་ཀ་དང༌། ལྗང་ནག་དང༌། ནག་མོའོ། །གཡས་རྣམས་ན་བུམ་པ་དང༌། རལ་གྲི་དང༌། བུམ་པའི་སྤྱི་བླུགས་དང༌། ཕྲེང་བ་དང༌། དུང་དང༌། གཞུ་དང༌། མདའ་དང༌། རལ་གྲི་དང༌། གཤོལ་དང༌། འཁོར་ལོ་དང༌། མདུང་རྩེ་གསུམ་དང༌། དགྲ་སྟ་བསྣམས་པའོ། །གཡོན་རྣམས་ན་རིན་པོ་ཆེའི་མྱུ་གུ་བསྣམས་པའོ། །སྲིན་མོ་ཆེན་མོ་བཅུ་གཉིས་པོ་འདི་དག་ནི། རྫུ་འཕྲུལ་དང་ལྡན་པ་ཞེས་བྱ་བ་ནི་གཟུགས་སྣ་ཚོགས་སྤྲུལ་ཞིང༌། རྫུ་འཕྲུལ་སྣ་ཚོགས་བྱེད་པའོ། །འོད་དང་ལྡན་པ་ཞེས་བྱ་བ་ནི་རང་གི་འོད་ཀྱིས་གསལ་བའོ། །ཁ་དོག་དང་ལྡན་པ་ཞེས་བྱ་བ་ནི་རང་གི་ཁ་དོག་དང་མཛེས་པར་ལྡན་པའོ། །གྲགས་པ་དང་ལྡན་པ་ཞེས་བྱ་བ་ནི་འཇིག་རྟེན་གྱི་ཁམས་ན་གྲགས་པའོ། །རྫུ་འཕྲུལ་དང་ལྡན་པ་ཞེས་བྱ་བ་ནི། སྐད་ཅིག་མས་གང་དུ་ཡང་འཁོར་བའོ། །ལྷ་དང་ལྷ་མ་ཡིན་གྱི་གཡུལ་ཡང་མྱོང་བར་བྱེད་པ་དག་གོ་ཞེས་བྱ་བ་ནི་ལྷ་དང་ལྷ་མ་ཡིན་འཐབས་པའི་དུས་སུ་ཡང་རྫུ་འཕྲུལ་སྣང་བའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་
སྲུང་བ་གྱིས་ཤིག་ཅེས་བྱ་བ་ནི། གང་ཟག་གིས་རིག་སྔགས་འདི་ལ་གུས་པར་བྱས་ན། རིག་སྔགས་ཀྱི་གཟི་བརྗིད་ཀྱིས་དེ་རྣམས་ཀྱིས་སྲུང་བ་དག་གོ །རིག་སྔགས་ནི་ཞལ་གཅིག་ཕྱག་བཞི་པ། སྐུ་མདོག་སེར་མོ་ཆུའི་ཁམས། སངས་རྒྱས་ལྔའི་དབུ་རྒྱན་ཅན། སྤྱན་གསུམ་པ། རྒྱན་ཐམས་ཅད་ཀྱིས་བརྒྱན་པ་དབུ་ལ་རིན་པོ་ཆེས་མཚན་པ། ཡེ་ཤེས་ལྔ་དང་ལྡན་པ། ཕྱག་གཡས་པ་གཉིས་ན། རྡོ་རྗེ་དང་ཨུཏྤལ་སེར་པོ་བསྣམས་པ། གཡོན་པ་གཉིས་ན་རྨ་བྱའི་སྒྲོ་དང་དུང་སེར་པོ་བསྣམས་པའོ། །གཡས་བརྐྱང་གཡོན་བསྐུམ་པ། ཟླ་བའི་གདན་ལ་ཉི་མའི་འོད་དང་ལྡན་པ། ཐབས་ཤེས་རབ་གཉིས་སུ་མེད་པའོ། །སྦ་བ་དང་ཞེས་བྱ་བ་ལ་སོགས་པ་ནི། གོང་བཞིན་དུ་ཤེས་པར་བྱའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། སྲིན་མོ་བཅུ་གཉིས་ཀྱི་སྲོག་སྔགས་དང་རིག་སྔགས་ཀྱི་སྙིང་པོའོ། །རིག་སྔགས་ཀྱི་གསང་སྔགས་ནི། ཧ་རེ། ཁ་རེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི་བཅོམ་ལྡན་འདས་ཀྱིས་བཀའ་སྩལ་པའོ། །མ་མོ་བཅུ་གཉིས་པོ་ཞེས་བྱ་བ་འདི་དག་ནི། ལྷ་དང་ལྷ་མ་ཡིན་གྱི་ཁྲག་ཁྲུག་དུས་སུ་ཕྱུང་ཞིང༌། ལྷ་མ་ཡིན་རྣམས་འདུལ་བར་བྱེད་པ། ད་ལྟར་མིའི་འཇིག་རྟེན་གྱི་ཁམས་གྱི་གནོད་བྱེད་དང་ཕན་བྱེད་པའོ། །གང་དག་བྱང་ཆུབ་སེམས་དཔའ་མའི་རུམ་དུ་ཞུགས་པ་ན་ཡང་སྲུང་ཞེས་བྱ་བ་ནི། འཇིག་རྟེན་གྱི་མར་གྲགས་ཤིང་དབང་ཕྱུག་མར་འགྱུར་ཏེ། དེ་རྣམས་ཀྱིས་ཀྱང་རྒྱུའི་བྱང་ཆུབ་སེམས་དཔའ་སྲུང་བའོ། །བཙའ་ཁ་དང་བཙས་པ་ན་ཡང་སྲུང་ཞིང་ཞེས་བྱ་བ་ནི། དང་པོ་སྐྱེ་ཁར་སྲུང་སྟེ། བར་མ་སྐྱེས་ནས་ཀྱང་སྲུང་ངོ༌། ཐ་མ་རྒས་ཀ་ན་ཡང་སྲུང་བའོ། །གང་དག་སེམས་ཅན་ལ་གནོད་པར་བྱེད་པ་སྐྲག་པར་བྱེད་པ་རྣམ་པར་འཚེ་བ་དག་གོ་ཞེས་བྱ་བ་ནི་ཁམས་གསུམ་ཙམ་ལ་སྐད་ཅིག་མས་རྒྱུ་ཞིང་བཅུ་གཉིས་པོ་དེ་དག་གིས་ཀྱང༌། ཤ་ཁྲག་ལ་དགའ་ཞིང་འཇིག་རྟེན་ཙམ་ལ་གནོད་བྱེད་དང་ཕན་བྱེད་པའོ། །དེ་དག་ཀྱང་གང་ཞེ་ན་ཞེས་བྱ་བ་ནི། འཇིག་རྟེན་གྱི་མ་མོ་བཅུ་གཉིས་མཐུ་དང་སྟོབས་དང་ལྡན་པའོ། །འདི་ལྟ་སྟེ་ཞེས་བྱ་བ་ནི། མ་མོ་བཅུ་གཉིས་པོར་བལྟའོ། །ཚངས་པའི་ཆུང་མ་དང༌། དྲག་པོའི་ཆུང་མ་དང༌། གཞོན་ནུའི་ཆུང་མ་དང༌། ཁྱབ་འཇུག་གི་ཆུང་མ་དང༌། ཕག་གི་ཆུང་མ་དང༌། དབང་པོའི་
ཆུང་མ་དང༌། ལུས་ངན་གྱི་ཆུང་མ་དང༌། རླུང་ལྷའི་ཆུང་མ་དང༌། གཤིན་རྗེའི་ཆུང་མ་དང༌། རླུང་གི་ཆུང་མ་དང༌། མེའི་ཆུང་མ་དང༌། ནག་མོ་ཆེན་མོ་སྟེ་ཞེས་བྱ་བ་ནི། སངས་རྒྱས་ཀྱི་བསྟན་པ་བསྲུང་བ་དང༌། རིག་སྔགས་ཀྱི་བཀའ་ལས་མི་འདའ་བའོ། །དེ་རྣམས་ཀྱི་ཕྱག་མཚན་དང་སྐུ་མདོག་ནི་ཞལ་གཅིག་ཕྱག་བཞི་པའོ། །ཚངས་པ་མོ་ལ་སོགས་པ་རིམ་བཞིན་དུ་གཡས་རྣམས་ན་ཕྱག་འཚལ་བ་དང༌། བུམ་པ་དང༌། རྩེ་གསུམ་དང༌། ཨ་འབྲས་དང༌། རྩེ་གཅིག་དང༌། ཕྲེང་བ་དང༌། འཁོར་ལོ་དང༌། ཨ་འབྲས་ཀྱི་སྙིང་པོའོ། །རྡོ་རྗེ་དང༌། ཐོད་པ་དང༌། ཉ་དང༌། དགྲ་སྟ་དང༌། རིན་པོ་ཆེ་དང༌། ནོར་གྱི་རྐྱལ་པ་དང༌། སྤྲུལ་གྱི་ཞགས་པ་དང༌། དུང་དཀར་པོ་དང༌། བེ་ཅོན་དང༌། གྲི་གུག་དང༌། རླུང་འཁྲིལ་དང༌། རྩེ་གསུམ་དང༌། རྩེ་གཅིག་དང༌། ཕྲེང་བ་དང༌། གྲི་གུག་དང༌། རྩེ་གསུམ་མོ། །གཡོན་རྣམས་ན་རིམ་པ་བཞིན་དུ། དབྱུ་གུ་གསུམ་དང་ཕྲེང་བ་བྲེང་བ་དང༌། ཐོད་པ་དང༌། །ཕྲེང་པ་དང་རྨ་བྱའི་སྒྲོའོ། །དབྱུག་ཏོ་དང་དུང་ངོ༌། །གྲི་གུག་དང་ཐོད་པའི་ནང་ན་སྨན་ཕུད་དོ། །གྲི་གུག་དང་ཐོད་པའོ། །འབྲས་ཀྱི་སྙེ་མ་དང་ནེའུ་ལེའི་རྐྱལ་པའོ། །བུམ་པ་དང་ཞགས་པའོ། །སྡིགས་མཛུབ་དང་མི་མགོའོ། །བ་དན་དང་ཞགས་པའོ། །ཕྲེང་བ་དང་རྩེ་གཅིག་གོ །ཞགས་པ་དང་ཐོད་པའོ། །སྐུ་མདོག་ནི་རིམ་པ་བཞིན་དུ། དཀར་མོ་དང༌། སྔོ་སྐྱ་དང༌། དམར་མོ་དང༌། ལྗང་གུ་དང༌། སེར་མོ་དང༌། དམར་མོ་དང༌། དམར་སེར་དང༌། དཀར་སེར་དང༌། མཐིང་ག་དང༌། དུད་ཀ་དང༌། དམར་ནག་དང༌། ནག་པོའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། འཇིག་རྟེན་དབང་ཕྱུག་མ་བཅུ་གཉིས་ཀྱིས་ཀྱང༌། གང་ཟག་གིས་འདི་ལ་གུས་པར་གྱུར་ན་མ་མོ་བཅུ་གཉིས་ཀྱིས་ཀྱང་སྲུང་བ་དང༌། །སྐྱོབ་པར་བྱེད་པའོ། །སྦ་བ་ལ་སོགས་པ་ཞེས་བྱ་བ་ལ་སོགས་པ་ནི་གོང་བཞིན་ནོ། །མ་མོ་དེ་དག་ནི་རྫུ་འཕྲུལ་དང་ལྡན་ཞིང་ཁ་དོག་དང་ལྡན་པ། གྲགས་པ་དང་ལྡན་པ། རྫུ་འཕྲུལ་དང་ལྡན་པས། ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ །དེ་དག་དང་ལྡན་པའི་མ་མོ་བཅུ་གཉིས་པོ་རིག་སྔགས་ཀྱི་བཀའ་ལས་མི་
འདའ་བའོ། །རིག་སྔགས་ཀྱི་ངོ་བོ་ནི། ཞལ་གཅིག་ཕྱག་བཞི་པ། སྐུ་མདོག་དམར་མོ་མེའི་ཁམས། སངས་རྒྱས་ལྔའི་དབུ་རྒྱན་ཅན། སྤྱན་གསུམ་པ་དབུ་ལ་པདྨས་མཚན་པ། ཡེ་ཤེས་ལྔ་དང་ལྡན་པ། ཕྱག་གཡས་པ་གཉིས་ན་པདྨ་དང་འཁོར་ལོ། གཡོན་པ་གཉིས་ན་རྨ་བྱ་དང་ལྷུང་བཟེད་བསྣམས་པའོ། །རྒྱན་ཐམས་ཅད་ཀྱིས་བརྒྱན་པ། གཡས་བརྐྱང་བ་གཡོན་བསྐུམ་པ། ཟླ་བའི་གདན་ལ་ཉི་མའི་འོད་དང་ལྡན་པ། ཐབས་ཤེས་རབ་གཉིས་སུ་མེད་པའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། མ་མོའི་སྲོག་སྙིང་དང་རིག་སྔགས་ཀྱི་ལས་ཀྱི་སྙིང་པོར་བལྟའོ། །རིག་སྔགས་ཀྱི་གསང་སྔགས་ནི། ཧ་རེ། ཁ་རེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི། སེམས་ཅན་གྱི་དོན་ལ་ཐུགས་རྗེ་ཆེན་པོས་བཀའ་སྩལ་པའོ། །སྲིན་པོའི་ཆུང་མ་ཤ་ཟ་ཆེན་མོ་རལ་པ་གཅིག་མ་ཞེས་བྱ་བ་ནི། སྲིན་པོའི་རྒྱལ་པོ་ལངྐ་མགྲིན་བཅུའི་ཆུང་མ་ཆེན་མོ་སྟེ། དེས་སེམས་ཅན་རྣམས་ལ་གནོད་པ་བྱེད་པའོ། །རྒྱ་མཚོའི་ངོས་ལ་གནས་པ་གང་དག་ཁྲག་གི་དྲི་ཚོར་ན་ཞེས་བྱ་བ་ནི། ལྷོའི་འཛམ་བཅུ་གླིང་གི་ལྷོ་ནུབ་མཚམས་ན། ཕྱིའི་རྒྱ་མཚོའི་ཚལ་ན། ཡུལ་ལངྐྲའི་གྲོང་ཁྱེར་ན་ཤ་ཟ་ཆེན་མོས་ཤ་ཁྲག་གི་དྲི་ཚོར་ན་མི་སྲུན་པའོ། །མཚན་གཅིག་ལ་དཔག་ཚད་བརྒྱད་ཁྲིར་འགྲོ་བ་ཡོད་དེ་ཞེས་བྱ་བ་ནི་ཤ་ཁྲག་གི་དྲིའི་རྣམ་པ་ཚོར་ན་མཚན་གཅིག་ལ་གང་ན་ཡོད་པ་ཡང་ལེན་ནུས་སོ། །དེ་བཞིན་དུ་སེམས་ཅན་རྣམས་ལ་གནོད་པ་བྱེད་པའོ། །དེ་ཡང་བྱང་ཆུབ་སེམས་དཔའ་མའི་རུམ་དུ་ཞུགས་པ་ན་ཡང་སྲུང་ཞེས་བྱ་བ་ནི། དེ་ཡང་རིག་སྔགས་ཀྱི་རྒྱལ་མོའི་གཟི་བརྗིད་ཀྱིས་སྲུང་བར་བྱེད་པའོ། །བཙའ་ཁ་དང་བཙས་པ་ན་ཡང་སྲུང་བའོ་ཞེས་བྱ་བ་ནི། ཐོག་མ་བར་དང་ཐ་མ་གསུམ་སྲུང་སྟེ། གཟི་བརྗིད་ཆེ་བ། གྲགས་པ་དང་ལྡན་པ་འོད་ཟེར་དང་ལྡན་པ། ཁ་དོག་དང་ལྡན་པ། རྫུ་འཕྲུལ་དང་ལྡན་པ། ལྷ་དང་ལྷ་མ་ཡིན་གྱི་གཡུལ་ཡང་མྱོང་བར་བྱེད་པ་དག་གོ །དེའི་ཁ་དོག་དང་ཕྱག་མཚན་ནི་ཞལ་གཅིག་ཕྱག་བཞི་པ། སྐུ་མདོག་ནག་པོའོ། །རལ་པ་གཅིག་ཏུ་ཡོད་པ། བཞིན་མི་སྡུག་པ། གཡས་གཉིས་ན་གྲི་གུག་དང་རྩེ་གསུམ་གཡོན་གཉིས་ན་ཞགས་པ་དང་ཐོད་པ་བསྣམས་པའོ། །དེས་ཀྱང་རིག་སྔགས་ཀྱི་རྒྱལ་མོ་རྨ་བྱ་
ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་གང་གིས་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལ་གུས་པར་བྱས་ན་ཤ་ཟ་ཆེན་མོ་དེས་ཀྱང་སྲུང་བ་དང་སྐྱོབ་པར་བགྱིད་པའོ། །རིག་སྔགས་ནི་ཞལ་གཅིག་ཕྱག་བཞི་པ། སྐུ་མདོག་ལྗང་གུ་རླུང་གི་ཁམ་སྤྱན་གསུམ་པ། རིགས་ལྔའི་དབུ་རྒྱན་གྱིས་བརྒྱན་པ། དབུ་ལ་སྣ་ཚོགས་རྡོ་རྗེས་བརྒྱན་པ། ཡེ་ཤེས་ལྔ་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། གཡས་གཉིས་ན་ཨུཏྤ་ལ་སྔོན་པོ་དང༌། པདྨའོ། །གཡོན་གཉིས་ན་པདྨའི་སྒྲོ་དང་གོས་སྣ་ཚོགས་པའོ། །གཡས་བརྐྱང་བ། གཡོན་བསྐུམ་པའོ། །ཟླ་བའི་གདན་ལ་ཉི་མའི་འོད་དང་ལྡན་པའོ། །ཐབས་ཤེས་རབ་གཉིས་སུ་མེད་པའོ། །སྦ་བ་ལ་སོགས་པ་ཞེས་བྱ་བ་ནི། སྔར་བཤད་པ་བཞིན་དུ་ཤེས་པར་བྱའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། ཤ་ཟ་ཆེན་མོའི་སྲོག་སྙིང་དང༌། རིག་སྔགས་ཀྱི་བཀའ་ལས་ཀྱི་སྙིང་པོའོ། །རིག་སྔགས་ཀྱི་ལས་ཀྱི་སྙིང་པོ་ལྟ་བའོ།། རིག་སྔགས་ཀྱི་གསང་སྔགས་ནི། ཧ་རེ། ཁ་རེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི། ཐམས་ཅད་མཁྱེན་པས་སེམས་ཅན་གྱི་དོན་ལ་ཡང་ནས་ཡང་དུ་བསྲུང་བའོ། །ཁྱོད་ཀྱིས་སྲིན་མོ་རྣམས་ཀྱི་མིང་ཟུང་ཤིག་ཅེས་བྱ་བ་ནི་སྔོན་ཡང་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་དུས་སུ། ཟངས་གླིང་གི་རྒྱལ་ཁམས་ན་སྲིན་མོ་ལྔ་བརྒྱ་ཡོད་དོ། །དེ་ཡང་འཕགས་པ་སྤྱན་རས་གཟིགས་ཀྱི་མདོ་ཟ་མ་ཏོག་གི་མདོ་ལས་ཤེས་པར་བྱའོ། །ད་ལྟར་ཡང་སྲིན་མོ་བདུན་ཅུ་ཐམ་པ་མཐུ་དང་སྟོབས་དང་ལྡན་པ་སངས་རྒྱས་དང་རིག་སྔགས་ཀྱི་བཀའ་ལས་མི་འདའ་བའོ།། འདི་ལྟ་སྟེ་ཞེས་བྱ་བ་ནི། སྲིན་མོ་བདུན་ཅུར་བལྟའོ། །སྲིན་མོ་སེར་སྐྱ་མ་ཞེས་བྱ་བ་དང༌། སྲིན་མོ་པདྨ་ཞེས་བྱ་བ་དང༌། སྲིན་མོ་མ་ཧེ་མོ་ཞེས་བྱ་དང༌། སྲིན་མི་དཀར་མོ་ཞེས་བྱ་བ་དང༌། སྲིན་མོ་སྤུ་གུ་ཅན་ཞེས་བྱ་བ་དང༌། སྲིན་མོ་འབར་མ་ཞེས་བྱ་བ་དང༌། སྲིན་མོ་གདུང་མ་ཞེས་བྱ་བ་དང༌། སྲིན་མོ་བུམ་པ་ཅན་ཞེས་བྱ་དང༌། སྲིན་མོ་དྲི་མེད་ཅེས་བྱ་བ་དང༌། སྲིན་མོ་ས་ཞེས་བྱ་བ་དང་ཞེས་བྱ་བ་ནི་མཐུ་དང་ལྡན་པ། རིག་སྔགས་ཀྱི་བཀའ་ལས་མི་འདའ་བའོ། །དེ་རྣམས་ཀྱི་དཀུ་མདོག་དང་ཕྱག་མཚན་ནི། དམར་སེར་དང༌། ནག་པོ་དང༌། ཐལ་བའི་མདོག་དང༌། དམར་པོ་དང༌། དཀར་
པོ་དང༌། སེར་པོ་དང༌། སྔོ་བསངས་དང༌། དམར་སེར་དང༌། མཐིང་ག་དང༌། ལྗང་གུའོ། །གཡས་རྣམས་ན་འཁོར་ལོ་དང༌། པདྨ་དང༌། རིན་པོ་ཆེ་དང༌། རྡོ་རྗེ་དང༌། རལ་གྲི་དང༌། མདུང་དང༌། ཞགས་པ་དང༌། དགྲ་སྟ་དང༌། རྩེ་གསུམ་དང༌། གཏུན་ཤིང་བསྣམས་པའོ། །གཡོན་རྣམས་ན་ཐོད་པ་ཁྲག་གིས་བཀང་བ་བསྣམས་པའོ། །དེ་རྣམས་ཀྱིས་ཀྱང་སངས་རྒྱས་ཀྱི་བསྟན་པ་སྲུང་བའོ། །སྲིན་མོ་སེང་གེའི་ཟླ་བ་ཞེས་བྱ་བ་དང༌། སྲིན་མོ་སྣར་མ་ཞེས་བྱ་བ་དང༌། སྲིན་མོ་འོད་ཟེར་མ་དང༌། སྲིན་མོ་བསྲེག་བྱ་ཟ་མ་དང༌། སྲིན་མོ་ཆུ་ལྷའི་ཆུང་མ་དང༌། སྲིན་མོ་ནག་མོ་དང༌། སྲིན་མོ་གླང་ཆེན་མོ་དང༌། སྲིན་མོ་སྟོབས་ཅན་མ་དང༌། སྲིན་མོ་ཟ་བ་མོ་དང༌། སྲིན་མོ་ལག་འགྲོ་མ་དང་ཞེས་བྱ་བ་ནི། རིག་སྔགས་ཀྱི་རྒྱལ་མོའི་བཀའ་ལས་མི་འདའ་ཞིང་སེམས་ཅན་རྣམས་ཀྱི་དོན་བྱེད་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། དཀར་མོ་དང༌། དམར་མོ་དང༌། དམར་སེར་མ་དང་དམར་ནག་གི་མདོག་དང༌། དཀར་མོ་དང༌། ནག་མོ་དང༌། སྔོ་སྐྱ་དང༌། ལྗང་གུ་དང༌། སེར་མོ་དན། དམར་སེར་མོའོ། །གཡས་རྣམས་ན་རྡོ་རྗེ་དང༌། རིན་པོ་ཆེ་དང༌། འཁོར་ལོ་དང༌། ཞགས་པ་དང༌། སྤྲུལ་གྱི་ཞགས་པ་དང༌། གྲི་གུག་དང༌། མདུང་དང༌། འཕང་མདུང་དང༌། དགྲ་སྟ་དང༌། རྩེ་གསུམ་མོ། །གཡོན་རྣམས་ན་པདྨ་བསྣམས་པའོ། །སྲིན་མོ་དེ་རྣམས་ཀྱང་སེམས་ཅན་རྣམས་ལ་སྲུང་བ་དང༌། སྐྱོབ་པར་བྱེད་པ། རིག་སྔགས་ཀྱི་བཀའ་ལས་མི་འདའ་བའོ། །སྲིན་མོ་མ་ཏང་གི་དང༌། སྲིན་མོ་དམར་སེར་མོ་དང༌། སྲིན་མོ་ཐིགས་པ་འཛིན་དང༌། སྲིན་མོ་གཏུམ་མོ་མ་དང༌། སྲིན་མོ་རི་འཛིན་མ་དང༌། སྲིན་མོ་གྲུལ་བུམ་མ་དང༌། སྲིན་མོ་ཚོན་ངན་མ་དང༌། སྲིན་མོ་ཟློག་བྱེད་མ་དང༌། སྲིན་མོ་རྒྱགས་མ་དང༌། སྲིན་མོ་མངལ་ཟ་བ་དང་ཞེས་བྱ་བ་ནི། དེ་རྣམས་ཀྱིས་ཀྱང་སངས་རྒྱས་ཀྱི་བསྟན་པ་སྲུང་སྟེ། སེམས་ཅན་རྣམས་ལ་ཕན་པ་མཛད་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། མཐིང་ག་དང༌། དམར་སེར་དང༌། ཁྲ་བོ་དང༌། ནག་མོ་དང༌། དཀར་པོ་དང༌། ལྗང་གུ་དང༌། དམར་པོ་དང༌། སེར་པོ་དང༌། སྔོ་བསངས་དང༌། ལྗང་ནག་གོ །གཡས་རྣམས་ན་མདུང་དང༌། འཕང་མདུང་དང༌། ཏོ་མར་
དང༌། གཏུན་ཤིང་དང༌། ཞགས་པ་དང༌། སྤྲུལ་གྱི་ཞགས་པ་དང༌། བུམ་པ་དང༌། མདའ་གཞུ་དང༌། མདུང་རིངས་དང༌། རྩེ་གཅིག་བསྣམས་པའོ། །གཡོན་རྣམས་ན་ཨུཏྤལ་བསྣམས་པའོ། །དེ་རྣམས་ཀྱིས་རིག་སྔགས་ཀྱི་བཀའ་ལས་མི་འདའ་བར་གང་ཟག་སྲུང་བར་བྱེད་པའོ། །སྲིན་མོ་ཁྲག་ཟ་མ་དང༌། སྲིན་མོ་སོ་སྟོ་མ་དང༌། སྲིན་མོ་དངགས་བྱེད་མ་དང༌། སྲིན་མོ་ཚངས་པ་མ་དང༌། སྲིན་མོ་ལྟེང་ཀ་སྐྱོང་མ་དང༌། སྲིན་མོ་རྡོ་རྗེ་འཛིན་པ་དང༌། སྲིན་མོ་སྐེམ་བྱེད་མ་དང༌། སྲིན་མོ་མུན་པ་དང༌། སྲིན་མོ་ཆག་འབེབས་མ་དང༌། སྲིན་མོ་འབྲུག་སྒྲོགས་མ་དན་ཞེས་བྱ་བ་ནི། སངས་རྒྱས་ཀྱི་བསྟན་བསྲུང་ཞིང་སེམས་ཅན་གྱི་དོན་བྱེད་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། དམར་པོ་དང༌། དཀར་པོ་དང༌། ནག་པོ་དང༌། སེར་མོ་དན། ལྗང་གུ་དང༌། མཐིང་ག་དང༌། དམར་སེར་མ་དང༌། སྔོ་སྐྱ་མ་དང༌། དཀར་སེར་མ་དང༌། དུད་ཀ་མའོ། །དེ་རྣམས་ཀྱི་གཡས་ན་གྲི་གུག་དང༌། རྩེ་གསུམ་དང༌། མི་མགོ་དང༌། བུམ་པ་དང༌། དགྲ་སྟ་དང༌། རྡོ་རྗེ་དང༌། འཁོར་ལོ་དང༌། མདུང་རྩེ་གསུམ་དང༌། རལ་གྲི་དང༌། རྩེ་གཅིག་བསྣམས་པའོ། །གཡོན་རྣམས་ན་ཐོད་པ་ཁྲག་གིས་བཀང་བ་བསྣམས་པའོ། །དེ་རྣམས་ཀྱང་རིག་སྔགས་ཀྱི་བཀའ་ལས་མི་འདའ་ཞིང༌། གང་ཟག་དག་ལ་སྲུང་བར་བྱེད་པའོ། །སྲིན་མོའི་འགེགས་མ་དང༌། སྲིན་མོ་སྣང་བྱེད་མ་དང༌། སྲིན་མོ་འགྲོ་བ་མ་དང༌། སྲིན་མོ་སྒྲོན་མ་ཁ་དང༌། སྲིན་མོ་ནོར་འཛིན་མ་དང༌། སྲིན་མོ་མཚན་མོ་ནག་མོ་དང༌། སྲིན་མོ་གཤིན་རྗེའི་ཕོ་ཉ་མོ་དང༌། སྲིན་མོ་མཆེ་བ་མ་དང༌། སྲིན་མོ་ཡཱ་མ་དང༌། སྲིན་མོ་དྲི་མེད་མ་དང༌། སྲིན་མོ་སྟོབས་བཟང་མ་དང༌། སྲིན་མོ་རལ་པ་འགྲེང་དང་ཞེས་བྱ་བ་ནི་སངས་རྒྱས་ཀྱི་བསྟན་པ་སྲུང་ཞིང༌། སེམས་ཅན་གྱི་དོན་བྱེད་པའོ། །དེ་རྣམས་ཀྱིས་ཀུ་མདོག་དང་ཕྱག་མཚན་ནི། ནམ་མཁའི་མདོག་དང༌། སེར་མོ་དན། ལྗང་གུ་དང༌། དམར་སེར་དང༌། དཀར་སེར་དང༌། ནག་མོ་དང༌། མཐིང་ག་དང༌། དམར་མོ་དང༌། སྔོ་སྐྱ་དང༌། ལྗང་ནག་གོ །གཡས་རྣམས་ན་ནོར་གྱི་རྐྱལ་བུ་དང༌། མེ་སྤར་དང༌། དབྱུག་ཏོ་དང༌། ཐོད་པ་དང༌། རིན་པོ་ཆེའི་སྙིམ་དང༌། གྲི་གུག་དང༌། བེ་ཅོན་དང༌། མདུང་དང༌། དགྲ་སྟ་དང༌། རྩེ་གསུམ་བསྣམས་པའོ། །གཡོན་རྣམས་ན་ཞགས་པ་བསྣམས་
པའོ། །སྲིན་མོ་མགོ་བརྒྱ་མ་དང༌། སྲིན་མོ་ལག་བརྒྱ་མ་དང༌། སྲིན་མོ་མིག་བརྒྱ་མ་དང༌། སྲིན་མོ་གནོད་བྱེད་མ་དང༌། སྲིན་མོ་འཇོམས་མ་དང༌། སྲིན་མོ་བྱི་ལ་མ་དང༌། སྲིན་མོ་ཟླ་བ་མ་དང༌། སྲིན་མོ་མཚན་མོ་རྒྱུ་བ་དང༌། སྲིན་མོ་ཉིན་མོ་རྒྱུ་བའོ། །སྲིན་མོ་ཞགས་པ་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། སེམས་ཅན་རྣམས་ཀྱི་དོན་བྱེད་པའོ། །མགོ་བརྒྱ་དང་ལག་བརྒྱ་མིག་བརྒྱ་གསུམ་པོ་ནི། དེ་བཞིན་དུ་ཡོད་པ་ལུས་ཀྱང་ཁྲ་བོར་གནས་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། ནག་མོ་དང༌། སེར་མོ་དང༌། དཀར་མོ་དང༌། དམར་མོ་དང༌། སྔོ་སྐྱ་མོ་དང༌། དམར་ནག་མོ་དང༌། ལྗང་གུའོ། །དེ་བཞིན་དུ་གསུམ་པོ་རྣམས་ཀྱང་སྣ་ཚོགས་ཀྱི་མཚོན་བསྣམས་པ། སྟོབས་དང་ལྡན་པའོ། །བདུན་པོ་དེ་དག་གི་གཡས་ན་འཁོར་ལོ་དང་མདའ་གཞུ་དང༌། ཞགས་པ་དང༌། བུམ་པ་དང༌། མདུད་རྩེ་གསུམ་པ་དང༌། དགྲ་སྟ་དང༌། རྩེ་གཅིག་པ་བསྣམས་པའོ། །གཡོན་རྣམས་བུམ་པ་བསྣམས་པའོ། །སྲིན་མོ་ཁྲོ་མོ་དང༌། སྲིན་མོ་རྣམ་པར་འཚེ་དང༌། སྲིན་མོ་རལ་གྲི་དང༌། སྲིན་མོ་གཏུན་ཤིང་འཛིན་དང༌། སྲིན་མོ་ལག་ན་རྩེ་གསུམ་དང༌། སྲིན་མོ་སོ་བྲོད་མ་དང༌། སྲིན་མོ་ཡིད་དུ་འོང་མ་དང༌། སྲིན་མོ་དེས་མ་དང༌། སྲིན་མོ་གཏུམ་མོ་དང༌། སྲིན་མོ་སོ་དང༌། སྲིན་མོ་འགྲོ་འཁྲུག་མ་དང༌། སྲིན་མོ་སྔོན་མོ་དང༌། སྲིན་མོ་ཁྲ་མོ་ཞེས་བྱ་བ་ནི་སངས་རྒྱས་ཀྱི་བསྟན་པ་སྲུང་བ། སེམས་ཅན་རྣམས་ཀྱི་དོན་བྱེད་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། ནག་མོ་དང༌། དམར་མོ་དང༌། སྔོ་བསངས་མ་དང༌། དཀར་སེར་དང༌། དམར་སེར་དང༌། མཐིང་ག་དང༌། དཀར་མོ་དང༌། ནག་མོ་དང༌། དཀར་མོ་དང༌། དམར་ནག་གི་མདོག་དང༌། སྔོན་མོ་དང༌། ཁྲ་མོའོ། །གཡས་རྣམས་ན་དགྲ་སྟ་དང༌། རྩེ་གཅིག་རྣམས་དང༌། རྩེ་གསུམ་དང༌། མཆེ་བ་དང༌། ཨུཏྤལ་དང༌། པདྨ་དང༌། གྲི་གུག་དང༌། རལ་གྲི་དང༌། དུང་དང༌། མདུང་རིངས་དང༌། འཁོར་ལོ་བསྣམས་པའོ། །གཡོན་རྣམས་ན་གཏུན་ཤིང་བསྣམས་པའོ། །སྲིན་མོ་ཆེན་མོ་དེ་དག་ནི་རིག་སྔགས་ཀྱི་བཀའ་ལས་མི་འདའ་བ་གང་ཟག་དག་ལ་སྲུང་བར་བྱེད་དོ། །སྲིན་མོ་ཆེན་མོ་བདུན་ཅུ་པོ་འདི་དག་ནི་ཞེས་བྱ་བ་ནི། ཟངས་གླིང་གི་རྒྱལ་ཁམས་ན་འཁྱམས་ཤིང༌། མིའི་འཇིག་
རྟེན་གྱི་ཁམས་ལ་གནོད་པར་བྱེད་པ། བདུན་ཅུ་པོ་དེ་དག་ནི་ལྔ་བརྒྱའི་གཙོ་མོའོ། །ད་ལྟར་ཡང་འཇིག་རྟེན་དབང་ཕྱུག་གིས་སྲིན་མོ་ལྔ་བརྒྱ་བཏུལ་ནས། སངས་རྒྱས་རྣམས་ཀྱི་བསྟན་པ་སྲུང་བ་སྟེ། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་བཀའ་ལས་འདའ་མི་ནུས་སོ། །རྫུ་འཕྲུལ་དང་ལྡན་པ་ཞེས་བྱ་བ་ནི། རྒྱ་མཚོའི་ནང་དུ་མེ་དང་རླུང་ལ་སོགས་པ་གཏོང་བར་ནུས་པ། བུད་མེད་ཀྱི་གཟུགས་སྣ་ཚོགས་སྤྲུལ་ཞིང་སེམས་ཅན་ལ་གནོད་པའོ། །འོད་དང་ལྡན་པ་ཞེས་བྱ་བ་ནི། རང་གི་འོད་ཀྱིས་རང་གསལ་ཞིང༌། གཞན་ཡང་གསལ་བའོ། །ཡང་ན་དེའི་གཟི་བརྗིད་ཀྱིས་གཞན་རྣམས་ཟིལ་གྱིས་གནོན་པའོ། །ཁ་དོག་དང་ལྡན་པ་ཞེས་བྱ་བ་ནི། རང་རང་གི་ཁ་དོག་གིས་བདུན་ཅུ་མཛེས་པར་སྣང་བའོ། །གྲགས་པ་དང་ལྡན་པ་ཞེས་བྱ་བ་ནི། ཟངས་གླིང་གི་སྲིན་མོ་ལྔ་བརྒྱ་འཇིག་རྟེན་དུ་གྲགས་པའོ། །རྫུ་འཕྲུལ་དང་ཞེས་བྱ་བ་ནི་ཟངས་གླིང་གི་རྒྱལ་ཁམས་ན་གླིང་བཞི་རི་རབ་དང་བཅས་པར་རྒྱུ་བའོ། །ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ་ཞེས་བྱ་བ་ནི། ལྷ་དང་ལྷ་མིན་གཉིས་ཀྱི་འཐབ་རྩོད་ལ་གྲོགས་བྱེད་ནུས་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་གིས་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ལ་གུས་པར་བྱས་ན་འཇིགས་པ་ཐམས་ཅད་དང་བྲལ་ཞིང༌། སྲིན་མོ་དེ་རྣམས་ཀྱིས་སྲུང་བར་འགྱུར་རོ། །རིག་སྔགས་ཀྱི་ངོ་བོ་ནི་ཞལ་གཅིག་ཕྱག་བཞི་པ་སྐུ་མདོག་ནག་མོ། ནམ་མཁའི་ཁམས་དང་ལྡན་པ། སྤྱན་གསུམ། རིགས་ལྔའི་དབུ་རྒྱན་ཅན། དབུ་ལ་རྡོ་རྗེས་མཚན་པ། ཡེ་ཤེས་ལྔ་དང་ལྡན་པ། གཡས་གཉིས་ན་རྡོ་རྗེ་དང་མཆོད་རྟེན། གཡོན་གཉིས་ན་རྨ་བྱའི་སྒྲོ་དང་འཁོར་ལོ་བསྣམས་པ། གཡས་བརྐྱང་གཡོན་བསྐུམ་པ། ཟླ་བའི་གདན་ལ་ཉི་མའི་འོད་དང་ལྡན་པ། ཐབས་ཤེས་རབ་གཉིས་སུ་མེད་པའོ། །སྦ་བ་དང་ཞེས་བྱ་བ་ནི་གཤིན་རྗེའི་འཇིགས་པ་ལས་སྦ་བའོ། །ཡོངས་སུ་བསྐྱབ་པ་དང་ཞེས་བྱ་བ་ནི། འཁོར་བའི་སྡུག་བསྔལ་ལས་བསྐྱབ་པའོ། །ཡོངས་སུ་གཟུང་བ་དང་ཞེས་བྱ་བ་ནི། སྡུག་བསྔལ་གྱིས་བཟུང་བ་ལས་ཐར་བའོ། །ཡོངས་སུ་བསྐྱང་བ་དང་ཞེས་བྱ་བ་ནི། སྡུག་བསྔལ་བོར་ནས་དགེ་བ་ལ་བསྐྱང་བའོ། །ཞི་བ་དང་ཞེས་བྱ་བ་ནི། ཉོན་
མོངས་པ་རྣམས་ལས་ཐར་ནས་དགེ་བ་ལ་གནས་པའོ། །བདེ་ལེགས་སུ་འགྱུར་བ་དང་ཞེས་བྱ་བ་ནི། ལུས་ངག་ཡིད་བདེ་བ་སྟེ། སྟོང་པ་ཉིད་ཀྱི་རང་བཞིན་བསྟན་པའོ། །ཆད་པ་སྤང་བ་དང་ཞེས་བྱ་བ་ནི། སྐྱེ་བ་དང་མྱ་ངན་གྱི་ཆད་པ་སྤང་བ་སྟེ། དེ་ལྟར་ཡང་མི་གནས་པའོ། །མཚོན་ཆ་སྦང་བ་དང་ཞེས་བྱ་བ་ནི། དམྱལ་བའི་སྡུག་བསྔལ་ཐམས་ཅད་བཅོམ་པའོ། །དུག་གཞིལ་བ་དང་ཞེས་བྱ་བ་ནི། འཇིག་རྟེན་གྱི་དུག་གསུམ་གྱིས་མི་ཚུགས་པའོ། །དུག་གསང་བ་དང་ཞེས་བྱ་བ་ནི་ཡེ་ཤེས་ཀྱི་རང་བཞིན་གྱིས་དུག་ལྔ་བསད་པའོ། །ལོ་བརྒྱ་འཚོ་བར་གྱུར་ཅིག་ཅེས་བྱ་བ་ནི། ཐ་མ་ཐོག་མ་ད་ལྟར་མེད་པའོ། །སྟོན་བརྒྱ་མཐོང་བར་ཤོག་ཤིག་ཅེས་བྱ་བ་ནི། སེམས་ཅན་རྣམས་བྱང་ཆུབ་ལ་འགོད་པར་བལྟ་བའོ། །ཏདྱ་ཐཱ་ཞེས་བྱ་བ་ནི། འདི་ལྟ་སྟེ། འབྱུང་པོའམ་འཇིག་རྟེན་ཕྱོགས་སྐྱོང་བའམ། རྒྱལ་པོ་ལ་སོགས་པའམ། རིག་སྔགས་ཀྱི་སྙིང་པོ་བལྟ་བའོ། །རིག་སྔགས་ཀྱི་གསང་སྔགས་ནི། ཧི་ལི་ཧི་ལི་ལ་སོགས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་མ་མོ་རྣམས་ཀྱི་གནས་སྐབས་ཏེ་བཅུ་གཅིག་པའོ།། །།སངས་རྒྱས་ཐམས་ཅད་ལ་ཕྱག་འཚལ་ལོ་སྭཱ་ཧཱ་ཞེས་བྱ་བ་ནི། འདས་པའི་སངས་རྒྱས་རབས་བདུན་ལ་སོགས་པ་བསམ་གྱིས་མི་ཁྱབ་པའོ། །མ་འོངས་པའི་སངས་རྒྱས་བྱམས་པ་ལ་སོགས་པ་སྟེ། ད་ལྟར་བཞུགས་པ་ཤཱཀྱ་སེང་གེའོ། །དེ་རྣམས་ལ་ཕྱག་འཚལ་བའོ། །གང་གིས་ཕྱག་འཚལ་ཞེ་ན། རིག་པ་འཛིན་པའི་གང་ཟག་གིས་ཕྱག་འཚལ་བའོ། །སྭཱ་ཧཱ་ནི་གང་གི་རྟེན་ཅིང་འབྲེལ་པའི་དངོས་གྲུབ་ནི། དེ་ལ་སོགས་པ་གསང་སྔགས་བསམ་གྱིས་མི་ཁྱབ་པ་གནས་པའོ། །རིག་སྔགས་ཆེན་མོ་དང་ཞེས་བྱ་བ་ནི་ཕྱིའི་རིག་པ་དང་ནང་གི་རིག་པ་སྟེ། ཕྱིའི་རིག་པ་ནི་རིག་པ་རྣམ་པ་ལྔའོ། །དེ་ནི་ལྷ་བསྙེན་དང༌། དབྱངས་དང༌། སྨན་དང༌། བཟོ་དང༌། སྒྲའོ། །ལྷ་བསྙེན་ནི། རྒྱུད་ལ་སོགས་པའི་བྱེ་བྲག །སྔགས་དང༌། རྒྱུད་དང༌། འཁྲུལ་འཁོར་དང༌། སྦྱིན་སྲེག་དང༌། དཀྱིལ་འཁོར་དང༌། སློབ་མ་ལྷག་པར་གནས་པར་བྱེད་པ་ལ་སོགས་པའོ། །དབྱངས་ནི་རིང་པོ་དང་ཐུང་བ་དང༌། དྲག་པོ་དང༌། མཐུག་པོ་དང༌། སྒྲ་ཆུང་དུ་དང༌། དེ་རྣམས་བྱུང་བ་ནི་རིག་བྱེད་བཞི་ལས་
བྱུང་བའོ། །དེ་ལ་མཁས་པས་ན་དབྱངས་སོ། །སྨན་ནི་ཁ་དོག་བརྟག་པ་དང༌། རྩ་བརྟག་པ་དང༌། འབྱུང་བ་བརྟག་པ་དང༌། དུས་བརྟག་པ་དང༌། ཉི་མ་བརྟག་པ་དང༌། དེའི་བྱེ་བྲག་གིས། སེམས་ཅན་རྣམས་ལ་གསོ་བ་བྱེད་པ་སྟེ། དུས་བཟུང་ནས་སྨན་ལ་བརྟག་པ་སྟེ། དེ་བཞིན་དུ་རླུང་དང༌། བད་ཀན་དང༌། མཁྲིས་པ་ལ་སོགས་པའོ། །ཟས་ཀྱི་བྱེ་བྲག་དང༌། རྩའི་བྱེ་བྲག་དང༌། ཕྱིའི་ཁ་དོག་གི་བྱེ་བྲག་དང༌། ཆུ། དྲི་མ། མིག །དབུགས། ལྕེ་ལ་བརྟག་པའོ། །དེ་ལ་བརྟག་པས་ན་སྨན་ནོ། །བཟོ་ནི་འཇིག་རྟེན་གྱི་བྱ་བ་ཐམས་ཅད་ལ་མཁས་པའོ། །སྒྲ་ནི་ཚད་མའི་རང་བཞིན་གྱི་སྲང་ལ་གཞལ་བ་དང༌། གཅིག་མཐོང་བས་མང་པོ་སྨྲ་བ་དང༌། གཅིག་གིས་གཅིག་སྨྲ་བ་སྟེ། གཅིག་གིས་གཉིས་སྨྲ་བ་དང༌། གཅིག་གིས་གསུམ་སྨྲ་བ་དང༌། གཅིག་གིས་མང་པོ་སྨྲ་བའོ། །དེ་ཡང་མཚན་བརྒྱད་དུ་བྱུང་སྟེ། མཚན་བརྒྱད་པ་དེ་ཡང༌། རིག་པའི་སྒྲ། བྱཱ་ཀ་ར་ཎའི་སྒྲའི་གནས་བརྒྱད་དོ། །དེ་ལ་མཁས་པས་སྒྲའོ། །ནང་གི་རིག་པ་ནི་བརྗོད་དུ་མེད་པ་ཁ་དོག་དང་བྲལ་བ། གཟུགས་དང་བྲལ་བ། མཚན་ཉིད་མེད་པ། གཞི་མེད་ཅིང་ངོ་བོ་ཉིད་དང་བྲལ་བའོ། །སྔགས་ནི་མ་མནྟྲ་སྟེ། སྲུང་བ་དང་སྐྱོབ་པར་བྱེད་པ། སྔགས་དེ་ཡང་སྒྱུ་མ་ལྟ་བུའི་རང་བཞིན། ཕྱོགས་རྣམས་དང་བྲལ་བའོ། །ཆེན་མོ་ནི་ནམ་མཁའ་བཞིན་དུ་འཇིག་རྟེན་གྱི་ཁམས་རྣམས་ཁྱབ་སྟེ། དེ་ཡང་བསམ་གྱིས་མི་ཁྱབ་པའི་རང་བཞིན་ནོ། །གསང་སྔགས་ཆེན་མོ་དང་ཞེས་བྱ་བ་ནི། ཚིག་ཏུ་བརྗོད་པའི་གསང་སྔགས་དང༌། ཏིང་ངེ་འཛིན་གྱི་གསལ་བ་དང༌། ཏིང་ངེ་འཛིན་རང་ཡང་དང་པོའི་རྣལ་འབྱོར་ཚོགས་སོགས་པ། གཉིས་པ་རྣལ་འབྱོར་ཆེན་པོ་སྟེ། དམ་ཚིག་སེམས་དཔའ་དང༌། ཡེ་ཤེས་སེམས་དཔའི་རང་བཞིན་རྟོགས་པའོ། །རྫོགས་པའི་རྣལ་འབྱོར་ཡེ་ཤེས་གཙོ་བོར་བཟུང་ནས་རྟག་ཆད་དང་བྲལ་བ་དེའི་ངོ་བོ་ཉིད་རྟོགས་པས་ན་གསང་བའོ། །སྔགས་ནི་སེམས་ཅན་ཐམས་ཅད་ལ་ཕན་པར་བྱེད་པའོ། །དེ་ཉིད་གཟུང་བས་ན་གཟུངས་སྔགས་སོ། །ཆེན་མོ་ནི་བསམ་གྱིས་མི་ཁྱབ་པའོ། །སོ་སོར་འབྲང་མ་ཆེན་མོ་དང་ཞེས་བྱ་བ་ནི་ཐབས་ཤེས་རབ་གཉིས་སུ་མེད་དེ། འཁོར་བ་དང་མྱ་ངན་ལས་འདས་པ་གཉིས་སུ་མེད་དོ། །སོ་སོ་ནི་འགྲོ་བ་རིགས་
དྲུག །འབྲང་མ་ནི་ཆོས་སྐུ། ཆོས་སྐུ་ལ་ཡང་བརྗོད་བྱའི་རང་བཞིན་དཔེར་ན་མདའ་ལ་སྒྲོ་བཏགས་པ་ལྟ་བུའོ། །མ་ནི་སྒྱུ་མའི་རང་བཞིན་ནོ། །དེ་བས་ན་སོ་སོར་འབྲང་མའོ། །ཆེན་མོ་དེ་ལྟ་བུ་བསམ་གྱིས་མི་ཁྱབ་པའོ། །སྲུང་བ་ཆེན་མོ་འདི་དག་གིས་ཞེས་བྱ་བ་ནི། དེ་བཞིན་གཤེགས་པའི་རིགས་སོ་སོར་འབྲང་མ་དང༌། རྡོ་རྗེའི་རིགས་སྟོང་ཆེན་མོ་རབ་ཏུ་འཇོམས་མ་དང༌། རིན་པོ་ཆེའི་རིགས་རྨ་བྱ་ཆེན་མོ་དང༌། པདྨའི་རིགས་གསང་སྔགས་རྗེས་སུ་འཛིན་མ་དང༌། ལས་ཀྱི་རིགས་བསིལ་བའི་ཚལ་དང་ལྔའོ། །ལྔ་བོ་དེ་ཡང་ཡེ་ཤེས་ལྔའི་རང་བཞིན་ཞལ་གཅིག་ཕྱག་གཉིས་པ་རྣམས་སོ། །སྐུ་མདོག་ཀྱང་དཀར་པོ་དང༌། ནག་པོ་དང༌། སེར་པོ་དང༌། དམར་པོ་དང༌། ལྗང་གུའོ། །ཕྱག་མཚན་ཡང་རིམ་པ་བཞིན་དུ། འཁོར་ལོ་དང༌། རྡོ་རྗེ་དང༌། རིན་པོ་ཆེ་དང༌། པདྨ་དང༌། སྣ་ཚོགས་རྡོ་རྗེའོ། །གཡོན་རྣམས་ན་རིམ་པ་བཞིན་དུ་དུང་དང༌། ཞགས་པ་དང༌། རྨ་བྱའི་སྒྲོ་དང༌། བུམ་པའི་སྟེང་ན་རྡོ་རྗེ་དང༌། སྐྱབས་སྦྱིན་ནོ། །གཟུགས་ཀྱང་ཞི་བ་དང༌། ཁྲོ་བོ་དང༌། རྒྱགས་པ་དང༌། ཅུང་ཟད་ཁྲོ་བ་དང༌། བཞིན་འཛུམ་པ་དང་ངོ༌། །དེ་རྣམས་ལ་ཡང་སངས་རྒྱས་ལྔའི་དབུ་རྒྱན་ཅན་སྤྱན་གསུམ་པ། རྒྱན་ཐམས་ཅད་ཀྱིས་བརྒྱན་པ། འཁོར་ལོ་དང༌། རྡོ་རྗེ་དང༌། རིན་པོ་ཆེ་དང༌། པདྨ་དང༌། སྣ་ཚོགས་རྡོ་རྗེས་རིམ་པ་བཞིན་དུ་དབུ་ལ་བརྒྱན་པའོ། །ཞབས་རྡོ་རྗེའི་སྐྱིལ་ཀྲུང་དུ་བཞུགས་པ། ཟླ་བའི་གདན་དང་ཉི་མའི་འོད་དང་ལྡན་པའོ། །ཆེན་མོ་ནི་ཡེ་ཤེས་ལྔ་བསམ་གྱིས་མི་ཁྱབ་པའོ། །འདི་དག་གིས་ནི་སྲུང་བ་ལྔའི་དམ་ཚིག་གོ །བདག་ལ་སྲུངས་ཤིག་སྭཱ་ཧཱ་ཞེས་བྱ་བ་ནི། རྟེན་གྱི་གང་ཟག་དང༌། སེམས་ཅན་ཐམས་ཅད་དོ། །སྭཱ་ཧཱ་ནི་དེ་གྱུར་ཅིག་ཅེས་པའོ། །གཤེད་བྱེད་རྣམས་བཅོམ་མོ་ཞེས་བྱ་བ་ནི། རིག་སྔགས་ཀྱི་རྒྱལ་མོ་དེ་རྣམས་ཀྱིས་རྣམ་པར་རྟོག་པའི་ལས་བཅོམ་པའོ། །བསྒྱུར་བའི་ལས་རྣམས་དང་ཞེས་བྱ་བ་ནི། ད་ལྟར་རྐྱེན་གྱིས་བསྒྱུར་བའི་ལས་རྣམས་སོ། །བྱད་དང་ཞེས་བྱ་བ་ནི། སྔོན་གྱི་ལས་འཕྲོའོ། །གཡེངས་བྱེད་རྣམས་དང་ཞེས་བྱ་བ་ནི། དྲན་པ་གཡེངས་པ་ལས་བྱུང་སྟེ། དེ་བཞིན་དུ་རྩུབ་པར་བྱེད་པའོ། །རོ་ལངས་རྣམས་དང་ཞེས་བྱ་བ་ནི། སྔགས་ཀྱིས་ལངས་པ་དང༌། ཡི་དགས་ཀྱི་རང་བཞིན་
གྱིས་ལངས་བ་དང༌། སྦོད་གཏོང་གི་ནུས་པས་ལངས་པའོ། །སེམས་བསྒྱུར་བ་རྣམས་དང་ཞེས་བྱ་བ་ནི། རིག་པའི་སེམས་བཞག་ནས་མ་རིག་པའི་སེམས་སུ་བསྒྱུར་བ་རྣམས་སོ། །སྦོད་གཏོང་རྣམས་བཅོམ་མོ་ཞེས་བྱ་བ་ནི་མ་རིག་པའི་སེམས་དང་ལྡན་པ། དམོད་མོའི་རང་བཞིན་བཏང་བ། དྲང་སྲོང་ལ་སོགས་པའོ། །དེ་བཅོམ་པ་ནི་རིག་སྔགས་ཀྱིས་བཅོམ་པའོ། །སྐེམ་བྱེད་རྣམས་དང་ཞེས་བྱ་བ་ནི། སྡངས་ཤིང་འགྱུར་བར་བྱེད་པའོ། །སྨྱོ་བྱེད་དང་ཞེས་བྱ་བ་ནི། མ་རིག་པའི་སེམས་དང་ལྡན་པ། སྔགས་དང༌། སྨན་དང༌། ཡི་དགས་རྣམས་ཀྱིས་སྨྱོ་བར་བྱེད་པའོ། །གྲིབ་གནོན་རྣམས་དང་ཞེས་བྱ་བ་ནི། གྲིབ་མ་ལ་བཟུང་ནས་གཟུགས་ཀྱི་ཕུང་པོ་ལ་གནོད་པར་བྱེད་པའོ། །བརྗེད་བྱེད་རྣམས་བཅོམ་མོ་ཞེས་བྱ་བ་ནི་གློ་བུར་དུ་བྱུང་ཞིང་སེམས་ཅན་རྣམས་ལ་གནོད་པའོ། །དེ་ཡང་རིག་པས་བཅོམ་པའོ། །སྐེམ་བྱེད་རྣམས་དང་ཞེས་བྱ་བ་ནི། གཅོད་གི་ནད་བཞིན་དུ་ཡུན་རིང་པོའོ། །སྐྲག་པ་རྣམས་དང་ཞེས་བྱ་བ་ནི། འཇིགས་པར་བྱེད་ཅིང་སེམས་ཅན་ལ་འཚེ་བར་བྱེད་པའོ། །དབྱིག་དུག་རྣམས་དང་ཞེས་བྱ་བ་ནི། ནོར་བུ་དང་རིན་པོ་ཆེ་ལས་བྱས་པའོ། །དུག་རྣམས་བཅོམ་མོ་ཞེས་བྱ་བ་ནི། རིག་སྔགས་ཀྱི་རྒྱལ་མོའི་གཟི་བརྗིད་ཀྱིས་ཕྱིའི་དུག་དང༌། ནང་གི་དུག་བཅོམ་པའོ། །བཟའ་ཉེས་རྣམས་དང་ཞེས་བྱ་བ་ནི་ཉེ་བ་ལ་སོགས་པའོ། །སྐྱུག་ཉེས་རྣམས་དང་ཞེས་བྱ་བ་ནི། སྨན་དུག་ཏུ་སོང་བའོ། །གནོད་སྒྲིབ་རྣམས་དང་ཞེས་བྱ་བ་ནི། ལྟ་བ་ལོག་པར་བྱེད་པའོ། །གནོད་ལྟས་རྣམས་དང་ཞེས་བྱ་བ་ནི། ལྟ་བ་ལོག་པ་རྣམས་གྱིས་ལྟ་བའོ། །བྲི་ཉེས་རྣམས་དང་ཞེས་བྱ་བ་ནི། ཕྱིན་ཅི་ལོག་ཏུ་བྲིས་པའོ། །བསྒོམ་ཉེས་རྣམས་དང་ཞེས་བྱ་བ་ནི། མ་རིག་པ་བསྒོམ་པའོ། །སྨད་པ་རྣམས་བཅོམ་མོ་ཞེས་བྱ་བ་ནི། མ་རིག་པའི་ཕོ་ཉ་བྱེད་པ་རྣམས་རིག་སྔགས་ཀྱི་གཟི་བརྗིད་ཀྱིས་བཅོམ་པའོ། །རིམས་ཉིན་གཅིག་པ་རྣམས་དང་ཞེས་བྱ་བ་ནི། ཉིན་གཅིག་གིས་རྫོགས་པ་ལོང་མེད་པ་རྣམས་སོ། །ཉིན་གཉིས་པ་རྣམས་དང་ཞེས་བྱ་བ་ནི། དེ་བས་རིང་བ་སྟེ་ཉིན་གཉིས་ཀྱིས་རྫོགས་པ་རྣམས་སོ། །ཉིན་གསུམ་པ་རྣམས་དང་ཞེས་བྱ་བ་ནི། ཉིན་མོ་གསུམ་པར་རྫོགས་པ་རྣམས་ཏེ། དེ་གསོད་བར་བྱེད་པའོ། །ཉིན་བཞི་
པ་རྣམས་དང་ཞེས་བྱ་བ་ནི། ཉིན་བཞི་ལོན་ནས་ཕན་པ་མེད་པའོ། །ཉིན་བདུན་པ་རྣམས་དང་ཞེས་བྱ་བ་ནི། རིམས་ཚད་པ་སྟེ་དྲུག་མ་བཟློག་ན་བདུན་པ་ལ་འཆི་བའོ། །ཟླ་བ་ཕྱེད་པ་རྣམས་དང་ཞེས་བྱ་བ་ནི། གཞན་ཚེས་གྲངས་རྣམས་མ་བཟློག་ན་དུས་དེར་འཆི་བའོ། །ཟླ་བ་གཅིག་པ་རྣམས་དང་ཞེས་བྱ་བ་ནི། རིམས་ནར་མ་སྟེ། དུས་གཞན་ལ་མ་བཟློག་ན། ཟླ་བ་གཅིག་ལོན་ནས་འཆི་བའོ། །ཉིན་མོ་པ་རྣམས་དང་ཞེས་བྱ་བ་ནི། སྔ་དྲོ་ནས་དགོངས་ཀ་ལ་ཕན་མེད་པར་འགྲོ་བའོ། །ཡུད་ཙམ་པ་རྣམས་དང་ཞེས་བྱ་བ་ནི། གློ་བུར་གྱི་ནད་གང་གིས་ཀྱང་ཕན་མེད་པའོ། །རྟག་བའི་རིམས་རྣམས་དང་ཞེས་བྱ་བ་ནི། ལོ་ནས་ལོར་འགོར་བ་སྟེ་གཞི་ཚད་པས་མ་བཏང་པའོ། །རིམས་ལྡང་དུབ་པ་རྣམས་དང་ཞེས་བྱ་བ་ནི། གསོ་བ་དཀའ་བ་རེས་འབྱུང་ཞིང་རེས་དྲག་པའོ། །རླུང་ལས་གྱུར་པ་རྣམས་དང་ཞེས་བྱ་བ་ནི། རླུང་ལས་གྱུར་པ་བཞི་བརྒྱ་རྩ་བཞིའོ། །མཁྲིས་པ་ལས་གྱུར་པ་རྣམས་དང་ཞེས་བྱ་བ་ནི། མཁྲིས་པ་ལ་ནད་མི་གཅིག་པ་བཞི་བརྒྱ་རྩ་བཞིའོ། །བད་ཀན་ལས་གྱུར་པ་རྣམས་དང་ཞེས་བྱ་བ་ནི། བད་ཀན་ལས་གྱུར་པ་བཞི་བརྒྱ་རྩ་བཞིའོ། །འདུས་པ་ལས་གྱུར་པ་རྣམས་དང་ཞེས་བྱ་བ་ནི། དེ་གསུམ་འདུས་པ་སྟེ། འདུས་པའི་ནད་རིགས་མི་གཅིག་པ་ཡང་བཞི་བརྒྱ་རྩ་བཞིར་གནས་སོ། །མིའི་རིགས་རྣམས་དང་ཞེས་བྱ་བ་ནི། རྐུན་མའམ་རྒྱལ་པོའམ་དེ་ལ་འཇིགས་སྐྲག་གི་རྐྱེན་གྱིས་བྱུང་བས་ན་མིའི་རིགས་སོ། །མི་མ་ཡིན་པའི་རིམས་བཅོམ་མོ་ཞེས་བྱ་བ་ནི། མ་རུངས་པའི་འབྱུང་པོ་རྣམས་ཀྱིས་ཀྱང་རླུང་བད་ཀན་དུ་བསྟན། བད་ཀན་རླུང་དུ་བསྟན། མཁྲིས་པ་བད་ཀན་དུ་བསྟན་ཏེ། ཕྱིན་ཅི་ལོག་པར་བསྟན་པ་ནི། མི་མ་ཡིན་པའི་རིམས་སོ། །རིམས་ཐམས་ཅད་བཅོམ་མོ་ཞེས་བྱ་བ་ནི། རིག་སྔགས་ཀྱི་གསང་སྔགས་ཀྱི་ནུས་པས་དེ་དག་གི་རིམས་རྣམས་ནི་འབྱུང་བར་མི་ནུས་པའོ། །ཤུ་བ་དང༌། གཡའ་བ་དང༌། འབྲུམ་བུ་ཕྲ་མོ་དང༌། མཛེ་དང༌། ཕོལ་མིག་དང༌། གཡན་པ་དང༌། མེ་དབལ་དང༌། ལྷོག་པ་རྣམས་བཅོམ་མོ་ཞེས་བྱ་བ་ནི། མ་རུངས་པའི་ནད་དེ་རྣམས་ལ་སོགས་པ་བཅོ་བརྒྱད་དེ། དེ་ཡང་རིག་སྔགས་ཀྱི་གཟི་བརྗིད་ཀྱིས་བཅོམ་པའོ། །ཀླད་པན་བ་དང་ཞེས་བྱ་བ་ལ་སོགས་པ་ནི། རླུང་དང་བད་ཀན་མཁྲིས་པ་
གསུམ་དེ་གསུམ་གྱིས་བསྒྱུར་ནས་ཡན་ལག་ན་བ་ཉི་ཤུ་རྩ་བཞི་སྟེ། དེ་ཡང་དེ་ལ་སོགས་པ་ནད་བཞི་བརྒྱ་རྩ་བཞི་བཅོམ་མོ། །གདོན་ཐམས་ཅད་དང་ཞེས་བྱ་བ་ནི། ལྷའི་གདོན་ལ་སོགས་པ་བགེགས་རིགས་མི་གཅིག་པ་སྟོང་ཕྲག་བརྒྱད་ཅུའོ། །དུག་ཐམས་ཅད་དང་ཞེས་བྱ་བ་ནི། ཕྱིའི་དུག་གསུམ་དང་ནང་གི་དུག་གསུམ་ཕྱིའི་བསྡད་པ་དང་འགྲོ་བ་དང་བྱེད་པའོ། །བསྡད་པ་ནི་བཙན་དུག་ལ་སོགས་པ་རྩྭ་དང་ལོ་མའི་དུག་གོ །འགྲོ་བ་ལ་ཡང་བསམ་པ་རེག་པ་མཐོང་བ་ཁ་རླངས་སོ། །བྱེད་པ་ཡང་དབྱིག་དུག་ལ་སོགས་པ་བསམ་གྱིས་མི་ཁྱབ་པའོ། །ནད་ཐམས་ཅད་དང་ཞེས་བྱ་བ་ནི། ནད་རིགས་མི་གཅིག་པ་བརྒྱ་རྩ་བཞི་རིག་སྔགས་ཀྱི་གསང་སྔགས་ཀྱིས་བཅོམ་པའོ། །བདག་ལ་བདེ་ལེགས་སུ་གྱུར་ཅིག་ཅེས་བྱ་བ་ནི། གང་ཟག་གང་དག་དང་སེམས་ཅན་རྣམས་ལ་བདེ་ལེགས་སུ་འགྱུར་རོ། །མཆན་མོ་བདེ་ལེགས་ཉིན་བདེ་ལེགས། །ཞེས་བྱ་བ་ནི་རིག་སྔགས་ཀྱི་གཟི་བརྗིད་ཀྱིས། ལུས་ངག་ཡིད་མི་བདེ་བའི་རྐྱེན་བྱེད་པ་མཚན་མོ་དང་ཉིན་མོ་བདེ་བར་འགྱུར་རོ། །ཉི་མའི་གུང་གིས་བདེ་ལེགས་དང༌། །ཞེས་བྱ་བ་ནི་ཉི་མ་ཕྱེད་ན་ཡང་མི་བདེ་བར་མི་གནས་པའོ། །ཉིན་མཚན་ཀུན་གྱི་བདེ་ལེགས་དག །ཅེས་བྱ་བ་ནི་ཉིན་མོ་དང་མཚན་མོའི་བར་ནས་རྟག་ཏུ་བདེ་བ་སྟེ། རྒས་ནས་མ་ཤི་བའི་བར་དུ་ཡང་བདེ་བའོ། །སངས་རྒྱས་ཀུན་གྱིས་བདག་ལ་སྩོལ། །ཞེས་བྱ་བ་ནི་གང་ཟག་དག་གིས་འདས་པ་དང་མ་འོངས་པ་དང༌། ད་ལྟར་བ་རྣམས་ལ་ཕྱག་འཚལ་བའོ། །སངས་རྒྱས་ཕྱག་འཚལ་བྱང་ཆུབ་ཕྱག་འཚལ་ལོ། །ཞེས་བྱ་བ་ནི་སངས་རྒྱས་ནི་སྔ་མ་བཞིན་དུ་བཤད་པ་རྣམས་ཏེ། གཞི་མ་གྲུབ་རྐྱེན་གྱིས་མ་གོས་པ་རྣམས་ལ་ཕྱག་འཚལ་བའོ། །བྱང་ཆུབ་ནི་སེམས་ཅན་རྣམས་ཀྱི་དོན་བྱེད་པ། ས་བཅུ་ལ་ནི་འཐོབ་པ་སྟེ། །དེ་རྣམས་ལ་ནི་ཕྱག་འཚལ་ལོ། །གྲོལ་གྱུར་ཕྱག་འཚལ་གྲོལ་ལ་ཕྱག་འཚལ་ལོ། །ཞེས་བྱ་བ་ནི་གྲོལ་གྱུར་ནི་བྱང་ཆུབ་སེམས་དཔའ་རྣམས་ཏེ། གྲོལ་བ་ནི་སངས་རྒྱས་ཀྱི་བདེན་པས་རིག་སྔགས་ཀྱི་བཀའ་ལས་གྲོལ་བའོ། །ཞི་གྱུར་ཕྱག་འཚལ་ཞི་ལ་ཕྱག་འཚལ་ལོ། །ཞེས་བྱ་བ་ནི་ཞི་གྱུར་ནི་ཡང་དག་པའི་དོན་མི་འགྱུར་ཏེ། འཁོར་བའི་སྡུག་བསྔལ་ལས་གྲོལ་ནས་ནམ་མཁའ་ལྟ་བུའོ། །ཞི་ལ་
ནི་སྤྲུལ་པའི་སྐུའི་རང་བཞིན། ཤཱཀྱ་ཐུབ་པ་ལྟ་བུར་སྟོང་གསུམ་གྱི་སྟོང་ཆེན་པོར་སྙིང་རྗེས་ཁྱབ་པའོ། །རྣམ་གྲོལ་ཕྱག་འཚལ་གྲོལ་ལ་ཕྱག་འཚལ་ལོ། ཞེས་བྱ་བ་ནི་རྣམ་གྲོལ་ནི་འགྲོལ་བྱེད་དེ་རྣམ་པར་གྲོལ་བར་བྱེད་པ་ནི་རིག་སྔགས་ཀྱི་རྒྱལ་མོའོ། །འགྲོལ་བ་ནི་འཁོར་བ་ལས་འགྲོལ་བའོ། །བྲམ་ཟེ་གང་དག་སྡིག་པའི་ཆོས་བསལ་བར་གྱུར་པ་དེ་དག་ལ་ཡང་ཕྱག་འཚལ་ལོ་ཞེས་བྱ་བ་ནི། རིག་སྔགས་ཀྱི་རྒྱལ་པོ་བྲམ་ཟེ་དག་ཡིན་ཏེ། དེས་སྡིག་བོར་ནས་དགེ་བ་ལ་གནས་པ་དེ་ལ་སོགས་པ་སྡིག་པ་ཐམས་ཅད་སེལ་བ་རྣམས་ལ་ཕྱག་འཚལ་ལོ། །དེ་དག་གིས་ཀྱང་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་རིག་སྔགས་ལ་གུས་པར་བྱེད་པ་དག་ལ་གང་ཡང་དེ་རྣམས་ཀྱིས་སྲུང་བར་བྱེད་པ་དག་གོ །ཕ་བདེ་ལེགས་སུ་གྱུར་ཅིག་ཅེས་བྱ་བ་ནི། བསྐྱེད་པའི་ས་བོན་གཏོང་བའི་ཕའོ། །མ་བདེ་ལེགས་སུ་གྱུར་ཅིག་ཅེས་བྱ་བ་ནི། སྐྱེས་པའི་མ་ལན་གྱིས་མི་འཁོར་བའོ། །མངལ་བདེ་ལེགས་སུ་གྱུར་ཅིག་ཅེས་བྱ་བ་ནི། མའི་མངལ་ན་ཡོད་པ་ཡང་བདེ་བའོ། །རྐང་གཉིས་པ་རྣམས་བདེ་ལེགས་སུ་གྱུར་ཅིག་ཅེས་བྱ་བ་ནི། སེམས་ཅན་མི་ལ་སོགས་པའོ། །རྐང་བཞི་པ་རྣམས་བདེ་ལེགས་སུ་གྱུར་ཅིག་ཅེས་པ་ནི། སྟག་དང་སེང་གེ་ལ་སོགས་པའོ། །རྐང་མེད་རྣམས་བདེ་ལེགས་སུ་གྱུར་ཅིག་ཅེས་བྱ་བ་ནི། སེམས་ཅན་སྦྲུལ་ལ་སོགས་པའོ། །སྲིད་པ་གསུམ་དུ་གཏོགས་པའི་སེམས་ཅན་ཐམས་ཅད་བདེ་ལེགས་སུ་གྱུར་ཅིག་ཅེས་བྱ་བ་ནི། ས་འོག་ས་སྟེང་ས་བླ་རྣམས་ཀྱི་སེམས་ཅན་ཐམས་ཅད་བདེ་ལེགས་བའོ། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་སྔགས་བཤད་པའི་གནས་སྐབས་ཏེ་བཅུ་གཉིས་པའོ།། །།ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་ཀུན་དགའ་བོ་ལ་བཀའ་སྩལ་པའོ། །ཁྱོད་ཀྱིས་ཀླུའི་རྒྱལ་པོ་རྣམས་ཀྱི་མིང་ཟུང་ཤིག་ཅེས་བྱ་བ་ནི། བྱང་ཆུབ་སེམས་དང་ལྡན་པ་སངས་རྒྱས་ཀྱི་བསྟན་པ་སྲུང་ཞིང་རིགས་ཀྱི་བཀའ་ལས་མི་འདའ་བའོ། །འདི་ལྟ་སྟེ་ཞེས་བྱ་བ་ནི་ཀླུའི་རྒྱལ་པོ་རྣམས་བལྟ་བའོ། །ཀླུའི་རྒྱལ་པོ་དེ་རྣམས་ཀྱང་རིགས་བཞི་དུག་བཞི་དུས་བཞིར་གནས་པ་སྟེ། རིགས་བཞི་ལ་ཡང་བྲམ་ཟེ། རྒྱལ་པོ། རྗེའུ་
རིགས། དམངས་རིགས་སོ། །རིགས་བཞི་ལས་བྱུང་བ་ནི་དེའི་འོག་མ་ནི། བྲམ་ཟེའི་བྲམ་ཟེ། རྒྱལ་པོའི་རྒྱལ་པོ། རྗེའུའི་རྗེའུ། དམངས་རིགས་ཀྱི་དམངས་རིགས། དེ་ནི་བསམ་གྱིས་མི་ཁྱབ་པའོ། །དུག་བཞི་ལ་བསམས་པ་ལས་ཚོར་བ་བྱུང་ངོ༌། །མཐོང་བ་ལ་ཡང་གཉིས་ཏེ། མངོན་ཤེས་ཀྱིས་མཐོང་བ་དང༌། མིག་གིས་མཐོང་བའོ། །རེག་པ་ཡང་གཉིས་ཏེ། རེག་པའི་རང་བཞིན་དང༌། གཟུང་བའོ། །ཁ་རླངས་ལ་གཉིས་ཏེ། ཁ་རླངས་དབུགས་ལས་བྱུང་བ་དང༌། མཆེ་བའི་དུག་གོ །རིགས་ཀྱང་དེ་བཞིན་དུ་ཡིན་ཏེ། འཕྲལ་ཡང་སེམས་ཅན་དུག་བཞི་ཡོད་པའོ།། དུས་བཞི་ལ་ཡང་སྔ་དྲོ་དང༌། ཉི་མ་ཕྱེད་དང༌། ཕྱི་དྲོ་དང༌། དགོངས་མོའོ། །ནུབ་མོ་ལ་སྲོད་དང་ནམ་ཕྱེད་དང༌། ཕྱེད་ཡོལ་དང༌། ཐོ་རངས་སོ། །དེ་བཞིན་དུ་ཀླུ་ཡང་དུས་བཞི་ལ་རྒྱུ་བའོ། །དེ་དང་ལྡན་པའི་ཀླུའི་རྒྱལ་པོ་རྣམས་ལ་ཟུང་ཤིག་གོ །ཀླུའི་རྒྱལ་པོ་སང་རྒྱས་བཅོམ་ལྡན་འདས་དང་ཀླུའི་རྒྱལ་པོ་ཚངས་པ་དང༌། ཀླུའི་རྒྱལ་པོ་ཚངས་ཆེན་དང༌། ཀླུའི་རྒྱལ་པོ་དབང་པོ་དང༌། ཀླུའི་རྒྱལ་པོ་ཉེ་བའི་དབང་པོ་དང་ཞེས་བྱ་བ་ནི་བྱང་ཆུབ་སེམས་དཔའི་རིགས་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་འགྲོ་བའོ། །རིག་སྔགས་ཀྱི་བཀའ་ལས་མི་འདའ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། འཛམ་བུའི་གླིང་གི་གསེར་གྱི་མདོག་དང༌། དཀར་པོ་དང༌། དཀར་སེར་དང༌། དམར་པོ་དང༌། དམར་སེར་རོ། །ཞལ་གཅིག་ཕྱག་གཉིས་པ། བལྟ་ན་སྡུག་པ། ལྷའི་ཆ་བྱད་ཅན། དབུ་ལ་སྦྲུལ་གྱི་གདེངས་ཀ་དང་བཅས་པ། སྦྲུལ་གྱི་མདུད་པའི་སྟེང་ན་བཞུགས་པའོ། །གཡས་རྣམས་ས་གནོན་གྱི་ཕྱག་རྒྱ་མཛད་པ་དང༌། ཕྲེང་བ་དང༌། བུམ་པ་སྤྱི་བླུགས་དང༌། རྡོ་རྗེ་དང༌། འཁོར་ལོ་བསྣམས་པའོ། །གཡོན་རྣམས་ན་སྦྲུལ་གྱི་ཞགས་པ་བསྣམས་པའོ། །དེ་རྣམས་ནི་སེམས་ཅན་ལ་འཚེ་བ་མི་བྱེད་པའོ། །ཀླུའི་རྒྱལ་པོ་རྒྱ་མཚོ་དང༌། ཀླུའི་རྒྱལ་པོ་རྒྱ་མཚོའི་བུ་དང༌། ཀླུའི་རྒྱལ་པོ་དུག་མེད་བཅས་དང༌། ཀླུའི་རྒྱལ་པོ་མཚོ་ཆེན་དང༌། ཀླུའི་རྒྱལ་པོ་མཚོ་ཆེན་བུ་དང་ཞེས་བྱ་བ་ནི། ཀླུའི་རྒྱལ་པོ་དེ་རྣམས་ཀྱང༌། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། སེར་པོ་དང༌། དཀར་
པོ་དང༌། དཀར་སེར་དང༌། དམར་སེར་དང༌། དུང་གི་མདོག་གོ །དེ་རྣམས་ཀྱང་ཞི་བའི་ཚུལ་དུ་གནས་པ། དབུ་ལ་སྦྲུལ་གྱི་གདེངས་ཀ་དང་བཅས་པ། སྦྲུལ་གྱི་མདུད་པའི་གདན་ལ་བཞུགས་པའོ། །གཡས་རྣམས་ན་རིན་པོ་ཆེ་དང༌། བུམ་པ་དང༌། རིན་པོ་ཆེ་མྱུ་གུ་དང༌། རིན་པོ་ཆེའི་ཕྲེང་བ་དང༌། མེ་ཏོག་ཀུ་མུ་ཏའོ། །གཡོན་རྣམས་ན་སྦྲུལ་གྱི་ཞགས་པ་བསྣམས་པའོ། །དེ་རྣམས་སེམས་ཅན་ལ་གནོད་པ་མི་བྱེད་པའོ། །ཀླུའི་རྒྱལ་པོ་ཆུ་སྲིན་དང༌། ཀླུའི་རྒྱལ་པོ་དགའ་བོ་དང༌། ཀླུའི་རྒྱལ་པོ་ཉེ་དགའ་བོ་དང༌། ཀླུའི་རྒྱལ་པོ་མི་ཞུམ་པ་དང༌། ཀླུའི་རྒྱལ་པོ་ཉེ་བར་མི་ཞུམ་པ་དང་ཞེས་བྱ་བ་ནི། ཀླུའི་རྒྱལ་པོ་དེ་རྣམས་ཀྱང༌། སངས་རྒྱས་ཀྱི་བསྟན་པ་སྲུང་བ་དང༌། དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། ནག་པོ་དང༌། སེར་པོ་དང༌། དཀར་པོ་དང༌། ལྗང་གུ་དང༌། དམར་པོའོ། །གཡས་རྣམས་ན། ཤིང་ཐོག་བཱི་ཛ་པཱུ་ར་ཀ་དང༌། ཨུཏྤལ་དང༌། ནཱ་ག་པུཥྤ་དང༌། རིན་ཆེན་ཕྲེང་བ་དང༌། མེ་ཏོག་མནྡཱ་ར་བའོ། །གཡོན་རྣམས་ན་སྦྲུལ་གྱི་ཞགས་པ་དང༌། དབུ་ལ་སྦྲུལ་གྱི་གདེངས་ཀ་ཅན། སྦྲུལ་གྱི་མདུད་པའི་སྟེང་ན་བཞུགས་པའོ། བལྟ་ན་སྡུག་བ་མིའི་ཆ་བྱད་དུ་ཡོད་པ། རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་ལྟ་ན་མཛེས་དང༌། ཀླུའི་རྒྱལ་པོ་ནོར་རྒྱས་ཀྱི་བུ་དང༌། ཀླུའི་རྒྱལ་པོ་འཇོག་པོ་དང༌། ཀླུའི་རྒྱལ་པོ་སྐྱ་རེངས་དང༌། ཀླུའི་རྒྱལ་པོ་ཆུ་ལྷ་དང༌། ཀླུའི་རྒྱལ་པོ་པཎྜ་ཀ་དང༌། ཀླུའི་རྒྱལ་པོ་སོར་མོ་དྲུག་པ་དང༌། ཀླུའི་རྒྱལ་པོ་སྙིང་པོར་འགྲོ་དང་ཞེས་བྱ་བ་ནི། ཀླུའི་རྒྱལ་པོ་དེ་རྣམས་ཀྱིས་ཀྱང་སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བ་དེ་རྣམས་ཀྱི་སྐུ་མདོག་དང་ཕྱག་མཚན་ནི། གསེར་མདོག་དང༌། དཀར་པོ་དང༌། སྔོ་སྐྱ་དང༌། སྣ་ཚོགས་མདོག་ཅན་དང༌། དམར་པོ་དང༌། དཀར་སེར་དང༌། དཀར་པོ་དང༌། ལྗང་གུའོ། །གཡས་རྣམས་ན་མེ་ལོང་དང༌། ཨུཏྤ་ལ་སེར་པོ་དང༌། ཨ་ཤོ་ཀའི་ལོ་མ་དང༌། རིན་པོ་ཆེ་འབར་བ། རིན་པོ་ཆེ་དང༌། མེ་ཏོག་ཨུཏྤ་ལ་སྔོན་པོ་དང༌། པདྨ་དང༌། ཀུ་མུ་ཏའོ། །གཡོན་རྣམས་ན་སྦྲུལ་གྱི་ཞགས་པ་
བསྣམས་པའོ། །རིག་སྔགས་ཀྱི་བཀའ་ལས་མེ་འདའ་བ། སེམས་ཅན་གྱི་དོན་བྱེད་པའོ། །དེ་རྣམས་ནི་ཅུང་ཟད་ཁྲོ་བོར་གནས་པའོ། །དབུ་ལ་སྦྲུལ་གྱི་གདེངས་ཀ་དང་བཅས་པ། སྦྲུལ་གྱི་མདུད་པའི་སྟེང་ན་བཞུགས་པ། གནོད་སྦྱིན་གྱི་ཚུལ་དུ་གནས་པ། བྲམ་ཟེའི་རིགས་བསམ་པའི་དུག་ཅན་སྔ་དྲོའི་དུས་ཅན་ནོ། །ཀླུའི་རྒྱལ་པོ་དེ་རྣམས་ཀྱང་སྦྲུལ་གྱི་གདེངས་ཀ་བཅོ་ལྔ་བཅོ་ལྔ་ཡོད་པ། བྲམ་ཟེ་བྲམ་ཟེའི་རིགས་ལ་ནི། སྦྲུལ་གྱི་གདེངས་ཀ་དང༌། གཡོན་རྣམས་ན་གནས་པའི་སྦྲུལ་གྱི་ཞགས་པ་ནི་དཀར་པོའོ། །ཀླུའི་རྒྱལ་པོ་བྲམ་ཟེ་བྲམ་ཟེའི་རིགས་ཉི་ཤུ་རྩ་གསུམ་པོ་འདི་དག་ནི། གཞན་ཡང་གང་དག་སའི་དཀྱིལ་འཁོར་འདིར་དུས་དུས་སུ་འབྲུག་སྒྲོགས་པ། དུས་དུས་སུ་ལོ་ཏོག་སྨིན་པ། དུས་དུས་སུ་ཆར་འབེབས་པ། དུས་དུས་སུ་ལོ་ཏོག་སྒྲུབ་པ། སངས་རྒྱས་མཐོང་བ། བསླབ་པའི་གཞི་གཟུང་བ། གསུམ་ལ་སྐྱབས་སུ་འགྲོ་བའམ། ནམ་མཁའ་ལྡིང་གི་འཇིགས་པ་མེད་པ། མེ་དང་བྱེ་མའི་འཇིགས་པ་མེད་པ། རྒྱལ་པོའི་ལས་ཀྱི་འཇིགས་པ་ལས་ཐར་གས་འཛིན་པ། རིན་པོ་ཆེའི་གཞལ་མེད་ཁང་ཆེན་པོ་ན་གནས་པ། ཚེ་རིང་བ། བསྐལ་བར་གནས་པ། དབང་ཆེ་བར་གྲགས་པ། ལོངས་སྤྱོད་ཆེ་བ། རྫུ་འཕྲུལ་ཆེ་བ། འཁོར་ཕལ་ཆེ་བ། དགྲ་དཔུང་རབ་ཏུ་འཇོམས་པ། རྫུ་འཕྲུལ་དང་ལྡན་པ། འོད་དང་ལྡན་པ། ཁ་དོག་དང་ལྡན་པ། གྲགས་པ་དང་ལྡན་པ། ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ །ཀླུའི་རྒྱལ་པོ་དེ་དག་ནི་ཆུང་མ་དང་བཅས་པ། བུ་དང་བཅས་པ། ཚ་བོ་དང་བཅས་པ། སྦུན་དང་བཅས་པ། བློན་པོ་དང་བཅས་པ། དེད་དཔོན་དང་བཅས་པ། ཕོ་ཉ་དང་བཅས་པ། མངག་པ་དང་བཅས་པ། གཡོག་དང་བཅས་པ། འཁོར་དང་བཅས་པ་དེ་དག་ནི་ཤར་ཕྱོགས་ན་གནས་པའོ། །ཀླུའི་རྒྱལ་པོ་དཔལ་ལྡན་དང༌། ཀླུའི་རྒྱལ་པོ་དཔལ་མགྲིན་དང༌། ཀླུའི་རྒྱལ་པོ་དཔལ་འཕེལ་དང༌། ཀླུའི་རྒྱལ་པོ་དཔལ་བཟངས་དང༌། ཀླུའི་རྒྱལ་པོ་སྟོབས་བཟངས་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བ། དེ་རྣམས་ཀྱི་སྐུ་མདོག་དང་ཕྱག་མཚན་ནི། སེར་པོ་དང༌། དམར་པོ་དང༌། དཀར་པོ་དང༌།
ལྗང་གུ་དང༌། སྔོན་པོའོ། །གཡས་རྣམས་ན་དཔལ་བེའུ་དང༌། གདུགས་དང༌། འཁོར་ལོ་དང༌། དུང་དང་བུམ་པའོ། །གཡོན་རྣམས་ན་སྦྲུལ་ཞགས་བསྣམས་པའོ། །ཀླུའི་རྒྱལ་པོ་དེ་རྣམས་ཀྱང་ལྷའི་ཆ་བྱད་དུ་བཞུགས་པ། དབུ་ལ་སྦྲུལ་གྱི་གདེངས་ཀ་དང་བཅས་པ། སྦྲུལ་གྱི་མདུད་པའི་སྟེང་ན་བཞུགས་པའོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་ཆུ་སྐྱེས་དང༌། ཀླུའི་རྒྱལ་པོ་སྟག་རེ་དང༌། ཀླུའི་རྒྱལ་པོ་ལག་བཟངས་དང༌། ཀླུའི་རྒྱལ་པོ་རི་རབ་དང༌། ཀླུའི་རྒྱལ་པོ་ཉི་འོད་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བ། དེ་རྣམས་ཀྱི་སྐུ་མདོག་དང་ཕྱག་མཚན་ནི། ནག་པོ་དང༌། སེར་པོ་དང༌། དམར་སེར་དང༌། དམར་པོ་དང༌། མཐིང་གའོ། །གཡས་རྣམས་ན་དགྲ་སྟ་དང༌། ལྕགས་ཀྱུ་དང༌། རལ་གྲི་དང༌། འཁོར་ལོ་དང༌། རྩེ་གསུམ་བསྣམས་པ་གཡོན་རྣམས་ན་སྦྲུལ་གྱི་ཞགས་པ་བསྣམས་པའོ། །ཀླུའི་རྒྱལ་པོ་དེ་རྣམས་ནི་དབུ་ལ་སྦྲུལ་གྱི་གདེངས་ཀ་དང་བཅས་པ། སྦྲུལ་གྱི་མདུད་པའི་སྟེང་ན་བཞུགས་པ། དྲི་ཟའི་ཆ་བྱད་དུ་ཡོད་པ། རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་ཟླ་འོད་དང༌། ཀླུའི་རྒྱལ་པོ་བཟང་སྡུག་དང༌། ཀླུའི་རྒྱལ་པོ་ངར་པ་དང༌། ཀླུའི་རྒྱལ་པོ་འབྲུག་སྒྲོགས་དང༌། ཀླུའི་རྒྱལ་པོ་གློག་འབྱིན་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བ། དེ་རྣམས་ཀྱི་སྐུ་མདོག་དང་ཕྱག་མཚན་ནི། དཀར་པོ་དང༌། སེར་པོ་དང༌། དམར་སེར་དང༌། སྤྲིན་གྱི་མདོག་དང༌། སྔོ་སྐྱའོ། །གཡས་རྣམས་ན་པདྨ་དཀར་པོ་དང༌། བུམ་པ་གང་བ་དང༌། ཙནྡན་གྱི་བེ་ཅོན་དང༌། དབྱུག་ཏོ་དང༌། མེ་ལོང་ངོ༌། །གཡོན་རྣམས་ན་སྦྲུལ་གྱི་ཞགས་པ་བསྣམས་པའོ། །ཀླུའི་རྒྱལ་པོ་དེ་རྣམས་ནི་དབུ་ལ་སྦྲུལ་གྱི་གདེངས་ཀ་དང་བཅས་པ། སྦྲུལ་གྱི་མདུད་པའི་སྟེང་ན་བཞུགས་པ། མིའི་ཆ་བྱད་ཅན་ནོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་རྒྱས་བྱེད་དང༌། ཀླུའི་རྒྱལ་པོ་ཆར་འབེབས་དང༌། ཀླུའི་རྒྱལ་པོ་དྲི་མེད་དང༌། ཀླུའི་རྒྱལ་པོ་སྟོབས་ཅན་མགོ་དང༌།
ཀླུའི་རྒྱལ་པོ་ལྕང་ལོ་ཅན་གྱི་མགོ་དང༌། ཀླུའི་རྒྱལ་པོ་རྟ་མགོ་ཅན་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བ། དེ་རྣམས་ཀྱི་སྐུ་མདོག་དང་ཕྱག་མཚན་ནི། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་དང༌། ལྗང་གུ་དང༌། ནག་པོའོ། །གཡས་རྣམས་ན་འཁོར་ལོ་དང༌། རིན་པོ་ཆེ་དང༌། པུཎྜ་རཱི་ཀ་དང༌། རལ་གྲི་དང༌། རྡོ་རྗེ་དང༌། གོས་སྣ་ཚོགས་པ་བསྣམས་པའོ། །གཡོན་རྣམས་ན་སྦྲུལ་གྱི་ཞགས་པ་བསྣམས་པའོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །མཐོང་བའི་དུག་ཅན། རྒྱལ་པོའི་རྒྱལ་རིགས། དུས་ཉི་མ་ཕྱེད་ན་རྒྱུ་བ། སྦྲུལ་གྱི་གདེངས་ཀ་དང་བཅས་པ། སྦྲུལ་གྱི་སྟེང་ན་བཞུགས་པ། སྦྲུལ་དེ་ཡང་སྦྲུལ་མགོ་བཅུ་གསུམ་བཅུ་གསུམ་དུ་ཡོད་པ། སྦྲུལ་གྱི་ཁ་དོག་སེར་པོར་གནས་པ། གཡོན་གྱི་ཕྱག་ན་བསྣམས་པའི་སྦྲུལ་ཡང་སེར་པོའོ། །ཀླུའི་རྒྱལ་པོ་ཉི་ཤུ་རྩ་གཅིག་ལྷོ་ཕྱོགས་ན་གནས་པའོ། །ཀླུའི་རྒྱལ་པོ་དེ་རྣམས་ཀྱིས་ཀྱང་གཞན་ཡང་གང་དག་སའི་དཀྱིལ་འཁོར་འདིར། དུས་དུས་སུ་འབྲུག་སྒྲ་སྒྲོགས་པ། དུས་དུས་སུ་ལོ་ཏོག་སྨིན་པ། དུས་དུས་སུ་ཆར་འབེབས་པ། དུས་དུས་སུ་ལོ་ཐོག་སྒྲུབ་པ། སངས་རྒྱས་མཐོང་བ། བསླབ་པའི་གཞི་གཟུང་བ། གསུམ་ལ་སྐྱབས་སུ་འགྲོ་བ། ནམ་མཁའ་ལྡིང་གི་འཇིགས་པ་དང༌། མེ་དང་བྱེ་མའི་འཇིགས་པ་དང་བྲལ་བ། རྒྱལ་པོའི་ལས་ཀྱི་འཇིགས་པ་ལས་ཐར་བ། ས་འཛིན་པ། རིན་པོ་ཆེའི་གཞལ་ཡས་ཁང་ཆེན་པོར་གནས་པ། ཚེ་རིང་བ། བསྐལ་པར་གནས་པ། དབང་ཆེ་བར་གྲགས་པ། རྫུ་འཕྲུལ་ཆེ་བ། ལོངས་སྤྱོད་ཆེ་བ། འཁོར་ཕལ་ཆེ་བ། དགྲ་དཔུང་རབ་ཏུ་འཇོམས་པ། རྫུ་འཕྲུལ་དང་ལྡན་པ། འོད་ཟེར་དང་ལྡན་པ། ཁ་དོག་དང་ལྡན་པ། གྲགས་པ་དང་ལྡན་པ། རྫུ་འཕྲུལ་ཆེ་བ། ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ །ཀླུའི་རྒྱལ་པོ་དེ་རྣམས་ཀྱང་ཆུང་མ་དང་བཅས་པ། བུ་དང་བཅས་པ། ཚ་བོ་དང་བཅས་པ། སྤུན་དང་བཅས་པ། བློན་པོ་དང་བཅས་པ། དེད་དཔོན་དང་བཅས་པ། ཕོ་ཉ་དང་བཅས་པ། མངག་པ་དང་བཅས་པ། གཡོག་དང་བཅས་པ། དེ་དག་ནི་ལྷོ་
ཕྱོགས་ན་གནས་པའོ། །ཀླུའི་རྒྱལ་པོ་བ་ལང་མགོ་དང༌། ཀླུའི་རྒྱལ་པོ་རི་དགས་མགོ་དང༌། ཀླུའི་རྒྱལ་པོ་གླང་པོ་ཆེའི་མགོ་དང༌། ཀླུའི་རྒྱལ་པོ་རླན་སྟོབས་ཅན་དང༌། ཀླུའི་རྒྱལ་པོ་སྐྱེ་བོ་འཚེ་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བ། དེ་རྣམས་ཀྱི་སྐུ་མདོག་དང་ཕྱག་མཚན་ནི་དམར་པོ་དང༌། སེར་པོ་དང༌། དམར་སེར་དང༌། དཀར་པོ་དང༌། ལྗང་གུའོ། །གཡས་རྣམས་ན་རྡོ་རྗེ་དབྱུག་ཏོ་དང༌། པདྨའི་དབྱུག་ཏོ་དང༌། རྡོ་རྗེའི་ཐོ་བ་དང༌། རྡོ་རྗེ་ལྕགས་ཀྱུ་དང༌། རྡོ་རྗེའི་དགྲ་སྟའོ། །གཡོན་རྣམས་ན་སྦྲུལ་ཞགས་བསྣམས་པའོ། །ལྷའི་ཆ་བྱད་དུ་བཞུགས་སོ། །དབུ་ལ་སྦྲུལ་གྱི་གདེངས་ཀ་དང་བཅས་པའོ། །སྦྲུལ་གྱི་མདུད་པའི་སྟེང་དུ་བཞུགས་པའོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་རིས་བཀྲ་དང༌། ཀླུའི་རྒྱལ་པོ་མིག་བཀྲ་དང༌། ཀླུའི་རྒྱལ་པོ་སྣ་ཚོགས་སྡེ་དང༌། ཀླུའི་རྒྱལ་པོ་མི་གཏོང་བ་དང༌། ཀླུའི་རྒྱལ་པོ་གཏོང་བ་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བ། དེ་རྣམས་ཀྱི་སྐུ་མདོག་དང་ཕྱག་མཚན་ནི། དམར་སེར་དང༌། ལྗང་གུ་དང༌། ལྗང་ནག་དང༌། དཀར་པོ་དང༌། སེར་པོའོ།། གཡས་རྣམས་ན་པདྨ་དམར་པོ་དང༌། པདྨ་དཀར་པོ་དང༌། ཨུཏྤལ་དཀར་པོ་དང༌། ཨུཏྤ་ལ་སེར་པོ་དང༌། ནཱ་ག་པུཥྤ་བསྣམས་པའོ། །གཡོན་རྣམས་ན་སྦྲུལ་ཞགས་སོ། །དྲི་ཟའི་ཆ་བྱད་དུ་བཞུགས་པ། དབུ་ལ་སྦྲུལ་གྱི་གདེངས་ཀ་དང་བཅས་པ། སྦྲུལ་གྱི་མདུད་པའི་སྟེང་ན་བཞུགས་པའོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། ཀླུའི་རྒྱལ་པོ་བཏང་བཟུང་དང༌། ཀླུའི་རྒྱལ་པོ་སྒྲ་སྒྲོགས་ཀྱི་བུ་དང༌། ཀླུའི་རྒྱལ་པོ་རྟོགས་པའི་བུ་དང༌། ཀླུའི་རྒྱལ་པོ་དཔལ་དང༌། ཀླུའི་རྒྱལ་པོ་དཔལ་ཅན་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བ། དེ་རྣམས་ཀྱི་སྐུ་མདོག་དང་ཕྱག་མཚན་ནི་དམར་པོ་དང༌། སེར་པོ་དང༌། ལྗང་གུ་དང༌། སྔོ་སྐྱ་དང༌། དཀར་པོའོ། །གཡས་རྣམས་ན་པདྨ་དམར་པོ་དང༌། པུཎྜ་རཱི་ཀ་དང༌། རིན་པོ་ཆེ་དང༌། ཨུཏྤ་ལ་དང༌། མེ་ཏོག་ཀུ་མུ་ཏ་བསྣམས་སོ། །གཡོན་རྣམས་
ན་སྦྲུལ་གྱི་ཞགས་པའོ། །མིའི་ཆ་བྱད་དུ་བཞུགས་པ། དབུ་ལ་སྦྲུལ་གྱི་གདེངས་ཀ་དང་བཅས་པ། སྦྲུལ་གྱི་མདུད་པའི་སྟེང་ན་བཞུགས་པ། རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་འཕྱང་བ་དང༌། ཀླུའི་རྒྱལ་པོ་སྲིན་བུ་དང༌། ཀླུའི་རྒྱལ་པོ་མཐའ་ཡས་དང༌། ཀླུའི་རྒྱལ་པོ་གསེར་དང༌། ཀླུའི་རྒྱལ་པོ་གླང་པོའི་རྩ་ལ་དང༌། ཀླུའི་རྒྱལ་པོ་དགའ་གསལ་དང་ཞེས་བྱ་བ་ནི། སངས་རྒྱས་ཀྱི་བསྟན་བསྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། དཀར་པོ་དང༌། དམར་པོ་དང༌། སེར་པོ་དང༌། ནག་པོ་དང༌། ལྗང་གུ་དང༌། དུང་གི་མདོག་གོ །གཡས་རྣམས་ན་ཨུཏྤ་ལ་དང༌། པདྨ་དཀར་པོ་དང༌། ནཱ་ག་པུཥྤ་དང༌། ཨ་སོ་ཀའི་ལོ་མ་དང༌། ཙམ་པ་ཀའི་མེ་ཏོག་དང༌། མེ་ཏོག་ཀུནད་བསྣམས་པའོ། །གཡོན་རྣམས་ན་སྦྲུལ་ཞགས་བསྣམས་པའོ། །གནོད་སྦྱིན་གྱི་ཆ་བྱད་དུ་བཞུགས་པའོ། །དབུ་ལ་སྦྲུལ་གྱི་གདེངས་ཀ་དང་ལྡན་པའོ། །སྦྲུལ་གྱི་མདུད་པའི་ཁྲི་ལ་བཞུགས་པའོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །སྦྲུལ་བཅུ་གཅིག་བཅུ་གཅིག་ཏུ་གནས་པ། སྦྲུལ་དམར་པོར་གནས་པ། གཡོན་ན་བསྣམས་པ་ཡང་དམར་པོའོ། །ཀླུའི་རྒྱལ་པོ་དེ་རྣམས་ནི་རྗེའུ་རིགས་ཀྱི་རྗེའུ་རིགས། རེག་པའི་དུག་ཅན། དུས་ཕྱི་དྲོ་ན་རྒྱུ་བའོ། །ཀླུའི་རྒྱལ་པོ་དེ་རྣམས་ཀྱིས་ཀྱང་གཞན་དག་སའི་དཀྱིལ་འཁོར་འདིར་དུས་དུས་སུ་འབྲུག་སྒྲ་སྒྲོགས་པ། དུས་དུས་སུ་ལོ་ཏོག་སྨིན་པ། དུས་དུས་སུ་ཆར་འབེབས་པ། དུས་དུས་སུ་ལོ་ཏོག་སྒྲུབ་པ། སངས་རྒྱས་མཐོང་བ། བསླབ་པའི་གཞི་གཟུང་བ། གསུམ་ལ་སྐྱབས་སུ་འགྲོ་བ། ནམ་མཁའ་ལྡིང་གི་འཇིགས་པ་དང༌། མེ་དང་བྱེ་མའི་འཇིགས་པ་དང༌། རྒྱལ་པོའི་ལས་ཀྱི་འཇིགས་པ་ལས་ཐར་པའོ། །ས་འཛིན་པ་རིན་པོ་ཆེའི་གཞལ་ཡས་ཁང་ཆེན་པོ་ན་གནས་པ་ཚེ་རིང་བ་བསྐལ་པར་གནས་པ། དབང་ཆེ་བར་གྲགས་པ། རྫུ་འཕྲུལ་ཆེ་བ། ལོངས་སྤྱོད་ཆེ་བ། འཁོར་འཕེལ་བ། དགྲའི་དཔུང་རབ་ཏུ་འཇོམས་པ། རྫུ་འཕྲུལ་དང་ལྡན་པ། འོད་དང་ལྡན་པ། ཁ་དོག་དང་ལྡན་པ། གྲགས་པ་དང་ལྡན་པ། རྫུ་འཕྲུལ་
ཆེ་བ་ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ །ཀླུའི་རྒྱལ་པོ་དེ་རྣམས་ནི་ཆུང་མ་དང་བུ་དང་བཅས་པ། ཚ་བོ་དང་བཅས་པ། སྦུན་དང་བཅས་པ། བློན་པོ་དང་བཅས་པ། དེད་དཔོན་དང་བཅས་པ། ཕོ་ཉ་དང་བཅས་པ། མངག་པ་དང་བཅས་པ། གཡོག་དང་བཅས་པ། འཁོར་དང་བཅས་པ་དེ་དག་ནི་ནུབ་ཕྱོགས་ན་གནས་པའོ། །ཀླུའི་རྒྱལ་པོ་སེར་སྐྱ་དང༌། ཀླུའི་རྒྱལ་པོ་ཨེ་ལའི་འདབ་དང༌། ཀླུའི་རྒྱལ་པོ་དཀར་པོ་དང༌། ཀླུའི་རྒྱལ་པོ་དུད་དང༌། ཀླུའི་རྒྱལ་པོ་སོག་མ་མེད་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི་ལྗང་གུ་དང༌། སེར་པོ་དང༌། མཐིང་ནག་དང༌། དམར་པོ་དང༌། ལྗང་ནག་གོ །གཡས་རྣམས་ན་རལ་གྲི་དང༌། སྣ་ཚོགས་ཀྱི་རྡོ་རྗེ་དང༌། སྣ་ཚོགས་ཀྱི་གོས་དང༌། རིན་པོ་ཆེ་དང༌། འཁོར་ལོ་བསྣམས་པའོ། །གཡོན་རྣམས་ན་སྦྲུལ་ཞགས་སོ། །ལྷའི་ཆ་བྱད་དུ་སྣང་བའོ། །སྦྲུལ་གྱི་གདེངས་ཀ་དང་ལྡན་པ། སྦྲུལ་གྱི་མདུད་པའི་སྟེང་ན་བཞུགས་པ། རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་ནག་པོ་དང༌། ཀླུའི་རྒྱལ་པོ་ཉེ་ནག་པོ་དང༌། ཀླུའི་རྒྱལ་པོ་སྟོབས་ལྷ་དང༌། ཀླུའི་རྒྱལ་པོ་སྲེད་མེད་ཀྱི་བུ་དང༌། ཀླུའི་རྒྱལ་པོ་ལ་བ་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བ་དག་གོ །དེ་རྣམས་ཀྱི་སྐུ་མདོག་དང་ཕྱག་མཚན་ནི་ནག་པོ་དང་མཐིང་ག་དང༌། ལྗང་ནག་དང༌། སྔོ་སྐྱ་དང༌། དམར་ནག་གི་མདོག་དང་ངོ༌། །གཡས་རྣམས་ན་ཕྲེང་བ་དང༌། བུམ་པ་སྤྱི་བླུགས་དང༌། བུམ་པ་གང་བ་དང༌། རིན་པོ་ཆེ་དང༌། དུང་བསྣམས་པ། གཡོན་རྣམས་ན་སྦྲུལ་ཞགས་སོ། །དྲི་ཟའི་ཚུལ་དུ་བཞུགས་པ། དབུ་ལ་སྦྲུལ་གྱི་གདེངས་ཀ་དང་བཅས་པ། སྦྲུལ་གྱི་མདུད་བའི་སྟེང་ན་བཞུགས་པའོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་སྐྲག་བྱེད་དང༌། ཀླུའི་རྒྱལ་པོ་སྲིན་པོ་དང༌། ཀླུའི་རྒྱལ་པོ་བྲག་ལག་དང༌། ཀླུའི་རྒྱལ་པོ་གངྒཱ་དང༌། ཀླུའི་རྒྱལ་པོ་སིནྡྷུ་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ།
དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། དམར་པོ་དང༌། སེར་པོ་དང༌། དམར་ནག་དང༌། ལྗང་ནག་དང༌། མཐིང་ཁའོ། གཡས་རྣམས་དབྱུག་ཏོ་དང༌། བེ་ཅོན་དང༌། དབྱུག་ཏོ་དམིག་ཅན་དང༌། རྡོ་རྗེ་ཐོ་བ་དང༌། རལ་གྲིའོ། །གཡོན་རྣམས་ན་སྦྲུལ་ཞགས་སོ། །མིའི་ཆ་བྱང་དུ་བཞུགས་པ། དབུ་ལ་སྦྲུལ་གྱི་གདེངས་ཀ་དང་བཅས་པ། སྦྲུལ་གྱི་མདུད་པའི་སྟེང་ན་བཞུགས་པ། རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་པཀྵུ་དང༌། ཀླུའི་རྒྱལ་པོ་སཱི་ཏ་དང༌། ཀླུའི་རྒྱལ་པོ་བཀྲ་ཤིས་དང༌། ཀླུའི་རྒྱལ་པོ་མ་དྲོས་པ་དང༌། ཀླུའི་རྒྱལ་པོ་རབ་བརྟན་དང༌། ཀླུའི་རྒྱལ་པོ་ས་སྲུང་གི་བུ་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། སྔོ་སྐྱ་དང༌། དཀར་པོ་དང༌། སེར་པོ་དང༌། དམར་པོ་དང༌། སྔོན་པོ་དང༌། ནག་པོའོ། །གཡས་རྣམས་ན་རིན་པོ་ཆེ་དང༌། བུམ་པ་གང་བ་དང༌། རིན་པོ་ཆེ་འབར་བ་དང༌། ཨུཏྤ་ལ་དང༌། ནཱ་ག་པུཥྤ་དང༌། པདྨ་དཀར་པོ་དང་ངོ༌། །གཡོན་རྣམས་ན་སྦྲུལ་ཞགས་བསྣམས་པའོ། །དེ་རྣམས་གནོད་སྦྱིན་གྱི་ཆ་བྱད་ཅན་ནོ། །དབུ་ལ་སྦྲུལ་གྱི་གདེངས་ཀ་དང་ལྡན་ནོ། །སྦྲུལ་གྱི་མདུད་པའི་སྟེང་ན་བཞུགས་པ། རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །དམངས་རིགས་ཀྱི་དམངས་རིགས། ཁ་རླངས་ཀྱི་དུག །དུས་དགོངས་ཀ་རྒྱུ་བ། སྦྲུལ་གྱི་གདེངས་ཀ་ནི་དགུ་དགུར་གནས་པའོ། །སྦྲུལ་དེ་ཡང་ལྗང་གུར་གནས་པ། གཡོན་གྱི་སྦྲུལ་ཡང་ལྗང་གུའོ། །གཞན་ཡང་གང་དག་སའི་དཀྱིལ་འཁོར་འདིར། དུས་དུས་སུ་འབྲུག་སྒྲ་སྒྲོགས་པ། །དུས་དུས་སུ་ལོ་ཏོག་སྨིན་པ། དུས་དུས་སུ་ཆར་འབེབས་པ། དུས་དུས་སུ་ལོ་ཏོག་སྒྲུབ་པ། བསླབ་པའི་གཞི་བཟུང་བ། སངས་རྒྱས་མཐོང་བ། གསུམ་ལ་སྐྱབས་སུ་འགྲོ་བ། ནམ་མཁའ་ལྡིང་གི་འཇིགས་པ་དང༌། མེ་དང་བྱེ་མའི་འཇིགས་པ་དང༌། རྒྱལ་པོའི་ལས་ཀྱི་འཇིགས་པ་ལས་ཐར་བ། ས་འཛིན་པ་རིན་པོ་ཆེའི་གཞལ་ཡས་ཁང་ཆེན་པོ་ན་གནས་པ། ཚེ་རིང་བ་བསྐལ་པར་གནས་པ། དབང་
ཆེ་བར་གྲགས་པ། རྫུ་འཕྲུལ་ཆེ་བ། ལོངས་སྤྱོད་ཆེ་བ། འཁོར་ཕལ་ཆེ་བ། དགྲའི་དཔུང་རབ་ཏུ་འཇོམས་པ། རྫུ་འཕྲུལ་དང་ལྡན་པ། འོད་དང་ལྡན་པ། ཁ་དོག་དང་ལྡན་པ། གྲགས་པ་དང་ལྡན་པ། ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ །ཀླུའི་རྒྱལ་པོ་དེ་རྣམས་ནི་ཆུང་མ་དང་བཅས་པ། བུ་དང་བཅས་པ། ཚ་བོ་དང་བཅས་པ། སྤུན་དང་བཅས་པ། བློན་པོ་དང་བཅས་པ། དེད་དཔོན་དང་བཅས་པ། ཕོ་ཉ་དང་བཅས་པ། མངག་པ་དང་བཅས་པ། གཡོག་དང་བཅས་པ། འཁོར་དང་བཅས་པ། དེ་དག་ནི་བྱང་ཕྱོགས་ན་གནས་པའོ། །ཀླུའི་རྒྱལ་པོས་འཛིན་དང༌། ཀླུའི་རྒྱལ་པོ་མུ་ཁྱུད་འཛིན་དང༌། ཀླུའི་རྒྱལ་པོ་མདོག་འཛིན་དང༌། ཀླུའི་རྒྱལ་པོ་བཟང་པོ་དང༌། ཀླུའི་རྒྱལ་པོ་རབ་ཏུ་བཟང་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བ། དེ་རྣམས་ཀྱི་སྐུ་མདོག་དང་ཕྱག་མཚན་ནི། སེར་པོ་དང༌། དམར་པོ་དང༌། ནག་པོ་དང༌། དཀར་པོ་དང༌། ལྗང་གུའོ། །གཡས་རྣམས་ན་ཕྲེད་བ་དང༌། བུམ་པ་སྤྱི་བླུགས་དང༌། བུམ་པ་གང་བ་དང༌། རྩེ་གསུམ་དང་ནོར་བུ་རིན་པོ་ཆེའོ། །གཡོན་རྣམས་ན་སྦྲུལ་ཞགས་བསྣམས་པའོ། །གཟུགས་ལྷའི་ཆ་བྱད་དུ་བཞུགས་པ། དབུལ་སྦྲུལ་གྱི་གདེངས་ཀ་དང་ལྡན་པ། སྦྲུལ་གྱི་མདུད་པའི་སྟེང་ན་བཞུགས་པའོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་ནོར་བཟངས་དང༌། ཀླུའི་རྒྱལ་པོ་སྟོབས་བཟངས་དང༌། ཀླུའི་རྒྱལ་པོ་ནོར་བུ་དང༌། ཀླུའི་རྒྱལ་པོ་ནོར་བུ་དང༌། ཀླུའི་རྒྱལ་པོ་ནག་པོ་གཉིས་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བ། དེ་རྣམས་ཀྱི་སྐུ་མདོག་དང་ཕྱག་མཚན་ནི། སེར་པོ་དང༌། དཀར་པོ་དང༌། ལྗང་གུ་དང༌། དམར་པོ་དང༌། ནག་པོའོ། །གཡས་རྣམས་ན་ནོར་བུ་རིན་པོ་ཆེ་དང༌། ཨ་འབྲས་ཀྱི་སྙིང་པོ་དང༌། བུམ་པ་གང་བ་དང༌། རིན་པོ་ཆེའི་སྣོད་དང༌། ནོར་གྱི་རྒྱལ་པ་བསྣམས་པའོ། གཡོན་རྣམས་ན་སྦྲུལ་གྱི་ཞགས་པའོ། །དྲི་ཟའི་ཆ་བྱད་དང༌། སྦྲུལ་གྱི་
གདེངས་ཀ་དང༌། སྦྲུལ་གྱི་མདུད་པའི་སྟེང་ན་བཞུགས་པའོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་སེར་པོ་གཉིས་དང༌། ཀླུའི་རྒྱལ་པོ་དམར་པོ་གཉིས་དང༌། ཀླུའི་རྒྱལ་པོ་དཀར་པོ་གཉིས་དང༌། ཀླུའི་རྒྱལ་པོ་ཕྲེང་ལྡན་དང༌། ཀླུའི་རྒྱལ་པོ་དམར་ཕྲེང་ཅན་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། ནག་པོ་དང་སེར་པོ་དང་དམར་པོ་དང༌། དཀར་པོ་དང༌། མཐིང་ནག་གོ །གཡས་རྣམས་ན་དགྲ་སྟ་དང༌། རྩེ་གཅིག་དང༌། རྩེ་གསུམ་དང༌། འཁོར་ལོ་དག །རིན་པོ་ཆེའི་ཕྲེང་བ་བསྣམས་པའོ། །གཡོན་རྣམས་ན་སྦྲུལ་གྱི་ཞགས་པའོ། །མིའི་ཆ་བྱད་དུ་གནས་པ། དབུ་ལ་སྦྲུལ་གྱི་གདེངས་ཀ་དང་ལྡན་པ། སྦྲུལ་གྱི་མདུད་པའི་སྟེང་ན་བཞུགས་པ། རིག་སྔགས་ཀྱི་བཀའ་ལས་མི་འདའ་བ་སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་བེའུ་དང༌། ཀླུའི་རྒྱལ་པོ་ཁྲུམས་སྟོད་དང༌། ཀླུའི་རྒྱལ་པོ་རྔ་དང༌། ཀླུའི་རྒྱལ་པོ་ཉེ་རྡ་དང༌། ཀླུའི་རྒྱལ་པོ་ཨ་མྲ་མུ་སྟེགས་དང༌། ཀླུའི་རྒྱལ་པོ་ནོར་བུའི་བུ་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། དམར་པོ་དང༌། དམར་སེར་དང༌། སེར་པོ་དང༌། དཀར་པོ་དང༌། ནག་པོ་དང༌། ལྗང་གུའོ། །གཡས་རྣམས་ན་མེ་ཏོག་ཕྲེང་བ་དང༌། ཨུཏྤ་ལ་དམར་པོ་དང༌། རིན་ཆེན་གྱི་སྣོད་དང༌། རྔ་རྐེད་ཉག་དང༌། རྐེ་རིངས་དང༌། མེ་ཏོག་ཙམ་བ་ཀ་བསྣམས་པའོ། །གཡོན་རྣམས་ན་སྦྲུལ་གྱི་ཞགས་པའོ། །གནོད་སྦྱིན་གྱི་ཚུལ་དུ་བཞུགས་པ། དབུལ་སྦྲུལ་གྱི་གདེངས་ཀ་དང་བཅས་པ། སྦྲུལ་གྱི་མདུད་པའི་སྟེང་ན་བཞུགས་པའོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །བྲམ་ཟེའི་རིགས་ཚོར་བའི་དུག་ཅན་སྲོད་ལ་རྒྱུ་བའོ། །སྦྲུལ་གྱི་གདེངས་ཀ་དགུ་དགུར་གནས་པ། མདོག་དམར་པོར་གནས་པ། གཡོན་གྱི་ཞགས་པ་ཡང་དམར་པོའོ། །ཀླུའི་རྒྱལ་པོ་དེ་རྣམས་ཀྱིས། གཞན་ཡང་གང་དག་སའི་དཀྱིལ་འཁོར་འདིར་དུས་དུས་སུ་འབྲུག་སྒྲ་སྒྲོགས་པ། དུས་དུས་སུ་ལོ་ཏོག་སྨིན་པ། དུས་
དུས་སུ་ཆར་འབེབས་པ། དུས་དུས་སུ་ལོ་ཏོག་སྒྲུབ་པ། སངས་རྒྱས་མཐོང་བ། བསླབ་པའི་གཞི་གཟུང་བ། གསུམ་ལ་སྐྱབས་སུ་འགྲོ་བ། ནམ་མཁའ་ལྡིང་གི་འཇིགས་པ་དང༌། མེ་དང་བྱེ་མའི་འཇིགས་པ་དང༌། རྒྱལ་པོའི་ལས་ཀྱི་འཇིགས་པ་ལས་ཐར་བའོ། །ས་འཛིན་པ་རིན་པོ་ཆེའི་གཞལ་ཡས་ཁང་ཆེན་པོ་ན་བཞུགས་པ། ཚེ་རིང་བ་བསྐལ་པར་གནས་པ། དབང་ཆེ་བར་གྲགས་པ། རྫུ་འཕྲུལ་ཆེ་བ། ལོངས་སྤྱོད་ཆེ་བ། འཁོར་ཕལ་ཆེ་བ། དགྲ་དཔུང་རབ་ཏུ་འཇོམས་པ། རྫུ་འཕྲུལ་དང་ལྡན་པ། འོད་དང་ལྡན་པ། ཁ་དོག་དང་ལྡན་པ། གྲགས་པ་དང་ལྡན་པ། ལྷ་དང་ལྷ་མ་ཡིན་གྱི་གཡུལ་ཡང་མྱོང་བར་བྱེད་པ་དག་གོ །ཀླུའི་རྒྱལ་པོ་དེ་རྣམས་ནི་ཆུང་མ་དང་བཅས་པ། བུ་དང་བཅས་པ། ཚ་བོ་དང་བཅས་པ། སྤུན་དང་བཅས་པ། བློན་པོ་དང་བཅས་པ། དེད་དཔོན་དང་བཅས་པ། ཕོ་ཉ་དང་བཅས་པ། མངག་པ་དང་བཅས་པ། གཡོག་དང་བཅས་པ། འཁོར་དང་བཅས་པ། ཀླུའི་རྒྱལ་པོ་དེ་རྣམས་ནི་ཤར་ལྷོ་མཚམས་ན་བཞུགས་པའོ། །ཀླུའི་རྒྱལ་པོ་ཡུལ་འཁོར་སྲུང་དང༌། ཀླུའི་རྒྱལ་པོ་འཕགས་སྐྱེས་པོ་དང༌། ཀླུའི་རྒྱལ་པོ་མིག་མི་བཟང་དང༌། ཀླུའི་རྒྱལ་པོ་རྣམ་ཐོས་ཀྱི་བུ་དང༌། ཀླུའི་རྒྱལ་པོ་ཤིང་རྟའི་བཞིན་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། དཀར་པོ་དང༌། མཐིང་ག་དང༌། དམར་པོ་དང༌། ལྗང་གུ་དང༌། སེར་པོའོ། །གཡས་རྣམས་ན་པི་ཝང་དང༌། དབྱུག་ཏོ་དང༌། དུང་དང༌། བུམ་པ་དང༌། རལ་གྲིའོ། །གཡོན་རྣམས་ན་སྤྲུལ་ཞགས་སོ། །ལྷའི་ཆ་བྱད་དུ་བཞུགས་པ། དབུ་ལ་སྤྲུལ་གྱི་གདེངས་ཀ་དང་བཅས་པ། སྤྲུལ་གྱི་མདུད་པའི་སྟེང་ན་བཞུགས་པ། རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་ཙམ་པར་སྐྱེས་དང༌། ཀླུའི་རྒྱལ་པོ་གཽ་ཏ་མ་དང༌། ཀླུའི་རྒྱལ་པོ་ལྔ་ལེན་དང༌། ཀླུའི་རྒྱལ་པོ་གཙུག་ཕུད་ལྔ་དང༌། ཀླུའི་རྒྱལ་པོ་བདུད་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བ། དེའི་སྐུ་མདོག་དང་ཕྱག་མཚན་ནི། དཀར་སེར་དང༌།
སེར་པོ་དང༌། ཁ་དོག་དྲུག་དང༌། དཀར་པོ་དང༌། དམར་པོ་རྣམས་སོ། །གཡས་རྣམས་ན་ཕྲེང་བ་དང༌། དབྱུག་པ་གསུམ་དང༌། བུམ་པ་དང༌། རིན་པོ་ཆེ་དང༌། ཞགས་པ་རྣམས་སོ། །གཡོན་རྣམས་ན་སྤྲུལ་གྱི་ཞགས་པའོ། །དྲི་ཟའི་ཆ་བྱད་དུ་བཞུགས་པ། དབུ་ལ་སྤྲུལ་གྱི་གདེངས་ཀ་དང་བཅས་པ། སྤྲུལ་གྱི་མདུད་པའི་ཁྲི་ལ་བཞུགས་པའོ། །རིག་སྔགས་གྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་ཐིགས་པ་དང༌། ཀླུའི་རྒྱལ་པོ་ཉེ་བའི་ཐིགས་པ་དང༌། ཀླུའི་རྒྱལ་པོ་བུམ་པ་དང༌། ཀླུའི་རྒྱལ་པོ་དུས་ལས་བྱུང་བ་དང༌། ཀླུའི་རྒྱལ་པོ་སྟོབས་ཅན་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། དཀར་པོ་དང༌། དམར་པོ་དང༌། སེར་པོ་དང༌། ནག་པོ་དང༌། ལྗང་གུའོ། །གཡས་རྣམས་ན་ཨ་འབྲས་དང༌། ནོར་བུ་རིན་པོ་ཆེ་དང༌། པདྨ་དང༌། ཨུཏྤ་ལ་དང༌། ནཱ་ག་པུ་ཥྤའོ། །གཡོན་རྣམས་ན་སྤྲུལ་ཞགས་བསྣམས་པའོ། །མིའི་ཆ་བྱད་དུ་བཞུགས་པའོ། །དབུ་ལ་སྤྲུལ་གྱི་གདེངས་ཀ་དང་བཅས་པ། སྤྲུལ་གྱི་མདུད་པའི་ཁྲི་ལ་བཞུགས་པའོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་ཆུང་ཟད་དང༌། ཀླུའི་རྒྱལ་པོ་ཚིམ་པ་ཀ་དང༌། ཀླུའི་རྒྱལ་པོ་གཽ་ཏམ་ནག་པོ་དང༌། ཀླུའི་རྒྱལ་པོ་ཡིད་བཟང་དང༌། ཀླུའི་རྒྱལ་པོ་མེ་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བ། དེ་རྣམས་ཀྱི་སྐུ་མདོག་དང་ཕྱག་མཚན་ནི། དམར་ནག་དང༌། དུད་ཀ་དང༌། མཐིང་ཁ་དང༌། དཀར་སེར་དང༌། དམར་སེར་དང༌། དམར་པོ་དང་ངོ༌། །གཡས་རྣམས་ན་རལ་གྲི་དང༌། རྡོ་རྗེ་དང༌། འཁོར་ལོ་དང༌། རིན་པོ་ཆེ་དང༌། པདྨ་དང༌། དགྲ་སྟའོ། །གཡོན་རྣམས་ན་སྤྲུལ་གྱི་ཞགས་པ་བསྣམས་པའོ། །གནོད་སྦྱིན་གྱི་ཆ་བྱད་དུ་བཞུགས་པའོ། །དབུ་ལ་སྤྲུལ་གྱི་གདེངས་ཀ་དང་བཅས་པ། སྤྲུལ་གྱི་མདུད་པ་ལ་བཞུགས་པ། རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །འདི་མངོན་པའི་དུས་ཅན། རྒྱལ་རིགས་ནམ་ཕྱེད་ན་རྒྱུ་བའོ། །སྤྲུལ་མགོ་དགུ་པ་དང་
བཅས་པ། སྤྲུལ་གྱི་ཁ་དོག་ཀྱང་དུད་དཀར་གནས་པ། སྤྲུལ་ཞགས་ཀྱང་དུད་ཀའོ། །ཀླུའི་རྒྱལ་པོ་རྣམས་ཀྱིས་གང་དག་སའི་དཀྱིལ་འཁོར་འདིར་དུས་དུས་སུ་འབྲུག་སྒྲ་སྒྲོགས་པ། དུས་དུས་སུ་ལོ་ཏོག་སྨིན་པ། དུས་དུས་སུ་ཆར་འབེབས་པ། དུས་དུས་སུ་ལོ་ཏོག་སྒྲུབ་པ། སངས་རྒྱས་མཐོང་བ། བསླབ་པའི་གཞི་གཟུང་པ། གསུམ་ལ་སྐྱབས་སུ་འགྲོ་བ། ནམ་མཁའ་ལྡིང་གི་འཇིགས་པ་དང༌། མེ་དང་བྱེ་མའི་འཇིགས་པ་དང༌། རྒྱལ་པོ་ལས་ཀྱི་འཇིགས་པ་ལས་ཐར་པ། ས་འཛིན་པ། རིན་པོ་ཆེའི་གཞལ་ཡས་ཁང་ཆེན་པོར་གནས་པ་ཚེ་རིང་བ་བསྐལ་པར་གནས་པ། དབང་ཆེ་བར་གྲགས་པ། རྫུ་འཕྲུལ་ཆེ་བ། ལོངས་སྤྱོད་ཆེ་བ། འཁོར་ཕལ་ཆེ་བ། དགྲའི་དཔུང་རབ་ཏུ་འཇོམས་པ། རྫུ་འཕྲུལ་དང་ལྡན་པ། འོད་དང་ལྡན་པ། ཁ་དོག་དང་ལྡན་པ། གྲགས་པ་དང་ལྡན་པ། ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ །ཀླུའི་རྒྱལ་པོ་དེ་རྣམས་ནི་ཆུང་མ་དང་བཅས་པ། བུ་དང་བཅས་པ། ཚ་བོ་དང་བཅས་པ། སྤུན་དང་བཅས་པ། བློན་པོ་དང་བཅས་པ། དེད་དཔོན་དང་བཅས་པ། ཕོ་ཉ་དང་བཅས་པ། མངག་པ་དང་བཅས་པ། གཡོག་དང་བཅས་པ། འཁོར་དང་བཅས་པའོ། །ཀླུའི་རྒྱལ་པོ་དེ་རྣམས་ནི་ལྷོ་ནུབ་མཚམས་ན་བཞུགས་བའོ། །ཀླུའི་རྒྱལ་པོ་མིའི་རྩ་བ་དང༌། ཀླུའི་རྒྱལ་པོ་མིའི་བླ་མ་དང༌། ཀླུའི་རྒྱལ་པོ་གླང་པོ་ཆེ་དང༌། ཀླུའི་རྒྱལ་པོ་མི་མ་ཡིན་དང༌། ཀླུའི་རྒྱལ་པོ་གཟིངས་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། སྔོན་པོ་དང༌། སྡོ་བསངས་དང༌། སེར་པོ་དང༌། དམར་པོ་དང༌། ལྗང་གུའོ། །གཡས་རྣམས་ན་རྩེ་གསུམ་དང༌། བ་དན་དང༌། རླུང་འཁྲིལ་དང༌། རིན་པོ་ཆེ་དང༌། ཨ་འབྲས་སྙིང་པོའོ། །གཡོན་རྣམས་ན་སྤྲུལ་གྱི་ཞགས་པ་བསྣམས་པའོ། །ལྷའི་ཆ་བྱད་དུ་བཞུགས་པ། དབུ་ལ་སྤྲུལ་གྱི་གདེངས་ཀ་དང་བཅས་པ། སྤྲུལ་གྱི་མདུད་པའི་སྟེང་ན་བཞུགས་པའོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་མཆོག་དང༌། ཀླུའི་རྒྱལ་པོ་བ་ལུ་ཀ་དང༌།
ཀླུའི་རྒྱལ་པོ་ཨ་ལུ་ཀ་དང༌། ཀླུའི་རྒྱལ་པོ་ཧུ་ལུ་ཀ་དང༌། ཀླུའི་རྒྱལ་པོ་ཨེ་ལ་དང་ཞེས་བྱ་བ་ནི། སངས་རྒྱས་གྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི་ནག་པོ་དང༌། དཀར་པོ་དང༌། ལྗང་ནག་དང༌། དཀར་སེར་དང༌། སྔོན་པོའོ། །གཡས་རྣམས་ན་དགྲ་སྟ་དང༌། རལ་གྲི་དང༌། རྩ་གཅིག་དང༌། ཕྲེང་བ་དང༌། བུམ་པ་དང༌། གཡོན་རྣམས་ན་སྤྲུལ་ཞགས་བསྣམས་པ། དྲི་ཟའི་ཆ་བྱད་དུ་བཞུགས་པ། དབུ་ལ་སྤྲུལ་གྱི་གདེངས་ཀ་ཅན། སྤྲུལ་གྱི་མདུད་པའི་ཁྲི་ལ་བཞུགས་པ། རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་ཨེ་ལའི་ལོ་མ་དང༌། ཀླུའི་རྒྱལ་པོ་འགྲོ་སྒྲ་དང༌། ཀླུའི་རྒྱལ་པོ་འཆི་སྒྲ་དང༌། ཀླུའི་རྒྱལ་པོ་གཟི་ཅན་དང༌། ཀླུའི་རྒྱལ་པོ་སྟོབས་ཅན་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། དམར་པོ་དང༌། སྔོན་པོ་དང༌། ལྗང་གུ་དང༌། དམར་སེར་དང༌། དཀར་པོར་གནས་པའོ། །གཡས་རྣམས་ན་རྒྱལ་མཚན་དང༌། བ་དན་དང༌། གདུགས་དང༌། དུང་དང༌། རིན་པོ་ཆེ་བསྣམས་པའོ། །གཡོན་རྣམས་ན་སྤྲུལ་གྱི་ཞགས་པའོ། །མིའི་ཆ་བྱད་དུ་བཞུགས་པ། དབུ་ལ་སྤྲུལ་གྱི་གདེངས་ཀ་དང་ལྡན་པ། སྤྲུལ་གྱི་མདུད་པའི་སྟེང་ན་བཞུགས་པའོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་སེར་སྐྱ་དང༌། ཀླུའི་རྒྱལ་པོ་ཞི་བ་འཛིན་དང༌། ཀླུའི་རྒྱལ་པོ་མེ་ཏོག་ཨུཏྤ་ལ་དང༌། ཀླུའི་རྒྱལ་པོ་སེན་མོ་ཅན་དང༌། ཀླུའི་རྒྱལ་པོ་འཕེལ་བ་དང༌། ཀླུའི་རྒྱལ་པོ་ཐར་པ་དང་ཞེས་བྱ་བ་ནི། སངས་རྒྱས་གྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། ཀླུའི་རྒྱལ་པོ་དེ་རྣམས་ནི་ཁྲ་བོར་གནས་པའོ། །གཡས་རྣམས་ནི་བུམ་པ་དང༌། རྒྱལ་མཚན་དང༌། གདུགས་དང༌། དུང་དང༌། འཁོར་ལོ་དང༌། པདྨ་དང་ངོ༌། །གཡོན་རྣམས་ན་སྤྲུལ་ཞགས་བསྣམས་པའོ། །གནོད་སྦྱིན་གྱི་ཆ་བྱད་དུ་བཞུགས་པའོ། །དབུ་ལ་སྤྲུལ་གྱི་གདེངས་ཀ་དང་བཅས་
པའོ། །སྤྲུལ་གྱི་མདུད་པའི་སྟེང་ན་བཞུགས་པའོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །རྗེའུ་རིགས་འཛིན་པའི་དུག་དུས་ནམ་ཕྱེད་ཡོལ་ན་རྒྱུ་བའོ། །སྤྲུལ་དེ་ཡང་ལྔ་ལྔར་གནས་པ། སྤྲུལ་དེ་ཡང་ཁྲོ་བོར་གནས་པ། གཡོན་ན་གནས་པའི་སྤྲུལ་དེ་ཡང་ཁྲ་བོར་གནས་པའོ། །ཀླུའི་རྒྱལ་པོ་དེ་རྣམས་ཀྱིས་ཀྱང་གཞན་ཡང་གང་དག་སའི་དཀྱིལ་འཁོར་འདིར་དུས་དུས་སུ་འབྲུག་སྒྲ་སྒྲོགས་པ། དུས་དུས་སུ་ལོ་ཏོག་སྨིན་པ། དུས་དུས་སུ་ཆར་འབེབས་པ། དུས་དུས་སུ་ལོ་ཏོག་སྒྲུབ་པ། སངས་རྒྱས་མཐོང་བ། བསླབ་པའི་གཞི་བཟུང་བ། གསུམ་ལ་སྐྱབས་སུ་འགྲོ་བ། ནམ་མཁའི་ལྡིང་གི་འཇིགས་པ་དང༌། མེ་དང་བྱེ་མའི་འཇིགས་པ་དང༌། རྒྱལ་པོའི་ལས་ཀྱི་འཇིགས་པ་ལས་ཐར་པའོ། །ས་འཛིན་པ་རིན་པོ་ཆེའི་གཞལ་ཡས་ཁང་ན་གནས་པ། ཚེ་རིང་བ། བསྐལ་པར་གནས་པ། དབང་ཆེ་བར་གྲགས་པ། རྫུ་འཕྲུལ་ཆེ་བ། ལོངས་སྤྱོད་ཆེ་བ། འཁོར་ཕལ་ཆེ་བ། དགྲའི་དཔུང་རབ་ཏུ་འཇོམས་པ། རྫུ་འཕྲུལ་དང་ལྡན་པ། འོད་དང་ལྡན་པ། ཁ་དོག་དང་ལྡན་པ། གྲགས་པ་དང་ལྡན་པ། ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ །ཀླུའི་རྒྱལ་པོ་དེ་རྣམས་ནི་ཆུང་མ་དང་བཅས་པ། བུ་དང་བཅས་པ། ཚ་བོ་དང་བཅས་པ། སྦུན་དང་བཅས་པ། བློན་པོ་དང་བཅས་པ། དེད་དཔོན་དང་བཅས་པ། ཕོ་ཉ་དང་བཅས་པ། མངག་པ་དང་བཅས་པ། གཡོག་དང་བཅས་པ། འཁོར་དང་བཅས་པ། ཀླུའི་རྒྱལ་པོ་དེ་རྣམས་ནི་ནུབ་བྱང་མཚམས་ན་གནས་པའོ། །ཀླུའི་རྒྱལ་པོ་བློ་ཅན་དང༌། ཀླུའི་རྒྱལ་པོ་རབ་ཐར་དང༌། ཀླུའི་རྒྱལ་པོ་ལ་བ་དང༌། ཀླུའི་རྒྱལ་པོ་མགྱོགས་རབ་དགའ་དང༌། ཀླུའི་རྒྱལ་པོ་ཨེ་ལ་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། སྔོན་པོ་དང༌། དམར་པོ་དང༌། སེར་པོ་དང༌། ལྗང་གུ་དང༌། ནག་པོའོ། །གཡས་རྣམས་ན་ནཱ་ག་པུ་ཥྤ་དང༌། ཕྲེང་བ་དང༌། པདྨ་དང༌། ཀུནད་དང༌། ཨུཏྤ་ལ་སྔོན་པོའོ། །གཡོན་རྣམས་ན་སྤྲུལ་གྱི་ཞགས་པ་བསྣམས་པའོ། །ལྷའི་ཆ་
བྱད་དུ་བཞུགས་པ། དབུ་ལ་སྤྲུལ་གྱི་གདེངས་ཀ་དང་བཅས་པ། སྤྲུལ་གྱི་མདུད་པའི་སྟེང་ན་བཞུགས་པ། རིག་སྔགས་གྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་འདུས་པ་དང༌། ཀླུའི་རྒྱལ་པོ་དགའ་བོ་དང༌། ཀླུའི་རྒྱལ་པོ་ཉེ་དགའ་བོ་དང༌། ཀླུའི་རྒྱལ་པོ་གསལ་བ་ཅན་དང༌། ཀླུའི་རྒྱལ་པོ་ལྟ་མཛེས་ཆེན་པོ་དང་ཞེས་བྱ་བ་ནི། སངས་རྒྱས་གྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། དཀར་པོ་དང༌། སེར་པོ་དང༌། དམར་པོ་དང༌། ནག་པོ་དང༌། ལྗང་གུའོ། །གཡས་རྣམས་ན་དུང་དང༌། པུཎྜ་རཱི་ཀ་དང༌། རིན་པོ་ཆེ་དང༌། ཨ་འབྲས་དང༌། རིན་པོ་ཆེ་འབར་བ་དང་ངོ༌། །གཡོན་རྣམས་ན་སྤྲུལ་ཞགས་བསྣམས་པའོ། །དྲི་ཟའི་ཆ་བྱད་ཅན་དུ་བཞུགས་པ། དབུ་ལ་སྤྲུལ་གྱི་གདེངས་ཀ་དང་བཅས་པ། སྤྲུལ་གྱི་མདུད་པའི་སྟེང་ན་བཞུགས་པའོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་མཆོག་ཅན་དང༌། ཀླུའི་རྒྱལ་པོ་མཆོག་ལྡན་འགྲོ་མ་དང༌། ཀླུའི་རྒྱལ་པོ་བཞིན་བཟངས་དང༌། ཀླུའི་རྒྱལ་པོ་མེ་ལོང་གདོང་དང༌། ཀླུའི་རྒྱལ་པོ་དྲི་འཛིན་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། ནག་པོ་དང༌། སྔོན་པོ་དང༌། ལྗང་ནག་དང༌། དམར་ནག་དང༌། མཐིང་གར་གནས་པའོ། །གཡས་རྣམས་ན་དགྲ་སྟ་དང༌། རྩེ་གཅིག་དང༌། འཁོར་ལོ་དང༌། རྩེ་གསུམ་དང༌། མདུང་བསྣམས་པའོ། །གཡོན་རྣམས་ན་སྤྲུལ་གྱི་ཞགས་པའོ། །མིའི་ཆ་བྱད་དུ་བཞུགས་པ། དབུ་ལ་སྤྲུལ་གྱི་གདེངས་ཀ་དང་བཅས་པ། སྤྲུལ་གྱི་མདུད་པའི་སྟེང་ན་བཞུགས་པའོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །ཀླུའི་རྒྱལ་པོ་སེང་གེ་འཛིན་དང༌། ཀླུའི་རྒྱལ་པོ་འགྲོ་ལྡིང་དང༌། ཀླུའི་རྒྱལ་པོ་ནག་པོ་གཉིས་དང༌། ཀླུའི་རྒྱལ་པོ་དཀར་པོ་གཉིས་དང༌། ཀླུའི་རྒྱལ་པོ་ཉེ་དཀར་གཉིས་དང༌། ཀླུའི་རྒྱལ་པོ་ཉེ་ནག་གཉིས་དང་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་བ། དཀོན་མཆོག་གསུམ་ལ་
སྐྱབས་སུ་འགྲོ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། སེར་པོ་དང༌། དམར་པོ་དང༌། སྔོན་པོ་དང༌། དཀར་པོ་དང༌། དཀར་སེར་དང༌། མཐིང་གའོ། །གཡས་རྣམས་ན་རིན་པོ་ཆེ་དང༌། པདྨ་དཀར་པོ་དང༌། ནཱ་ག་དུཥྤ་དང༌། ཨ་འབྲས་ཀྱི་སྙིང་པོ་དང༌། མེ་ཏོག་ཙམ་པ་ཀ་དང༌། ཨུཏྤ་ལ་སྔོན་པོ་དང༌། གཡོན་རྣམས་ན་སྤྲུལ་ཞགས་བསྣམས་པའོ། །གནོད་སྦྱིན་གྱི་ཆ་བྱད་དུ་གནས་པའོ། །དབུ་ལ་སྤྲུལ་གྱི་གདིངས་ཀ་དང་བཅས་པའོ། །སྤྲུལ་གྱི་མདུད་པའི་སྟེང་ན་བཞུགས་པའོ། །རིག་སྔགས་ཀྱི་བཀའ་ལས་མི་འདའ་བ། སེམས་ཅན་གྱི་དོན་བྱེད་པའོ། །གདོལ་པའི་རིགས་མཆེ་བའི་དུག་དུས་ཐེ་རངས་རྒྱུ་བའོ། །སྤྲུལ་གྱི་གདེངས་ཀ་གསུམ་དང་ལྡན་པ། སྤྲུལ་ནག་པོར་སྣང་བ། ཞགས་པ་ཡང་ནག་པོའོ། །ཀླུའི་རྒྱལ་པོ་དེ་དག་དང༌། གཞན་ཡང་གང་དག་སའི་དཀྱིལ་འཁོར་འདིར་དུས་དུས་སུ་འབྲུག་སྒྲ་སྒྲོགས་པ། དུས་དུས་སུ་གློག་འབྱིན་པ། དུས་དུས་སུ་ཆར་འབེབས་པ། དུས་དུས་སུ་ལོ་ཏོག་སྒྲུབ་པ། སངས་རྒྱས་མཐོང་བ། བསླབ་པའི་གཞི་གཟུང་བ། གསུམ་ལ་སྐྱབས་སུ་འགྲོ་བ། ནམ་མཁའ་ལྡིང་གི་འཇིགས་པ་དང༌། མེ་དང་བྱེ་མའི་འཇིགས་པ་དང༌། རྒྱལ་པོའི་ལས་ཀྱི་འཇིགས་པ་ལས་ཐར་བ། ས་འཛིན་པ་རིན་པོ་ཆེའི་གཞལ་ཡས་ཁང་ཆེན་པོ་ན་གནས་པ། ཚེ་རིང་བ་བསྐལ་པར་གནས་པ། དབང་ཆེ་བར་གྲགས་པ། རྫུ་འཕྲུལ་ཆེ་བ། ལོངས་སྤྱོད་ཆེ་བ། འཁོར་ཕལ་ཆེ་བ། དགྲའི་དཔུང་རབ་ཏུ་འཇོམས་པ། རྫུ་འཕྲུལ་དང་ལྡན་པ། འོད་དང་ལྡན་པ། ཁ་དོག་དང་ལྡན་པ། གྲགས་པ་དང་ལྡན་པ། ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་གོ །ཀླུའི་རྒྱལ་པོ་དེ་རྣམས་ཀྱང་བུ་དང་བཅས་པ། ཆུང་མ་དང་བཅས་པ། ཚ་བོ་དང་བཅས་པ། སྦུན་དང་བཅས་པ། བློན་པོ་དང་བཅས་པ། དེད་དཔོན་དང་བཅས་པ། ཕོ་ཉ་དང་བཅས་པ། མངག་པ་དང་བཅས་པ། གཡོག་དང་བཅས་པ། འཁོར་དང་བཅས་པའོ། །ཀླུའི་རྒྱལ་པོ་དེ་རྣམས་ནི། ཕྱོགས་རེ་རེ་ན་ཡང་རིགས་བཞི་བཞི་དང་ལྡན་པ། དེ་བཞིན་དུ་དུག་དང༌། དུས་རྣམས་ཀྱང་ཡིན་ནོ། །གཞན་ཡང་གང་དག་སའི་དཀྱིལ་འཁོར་འདིར་དུས་དུས་
སུ་འབྲུག་སྒྲ་སྒྲོགས་པ་ཞེས་བྱ་བ་ནི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སམ། འཛམ་བུའི་གླིང་འདིར་ཡང་དུས་དུས་སུ་འབྲུག་སྒྲ་སྒྲོགས་པའོ། །དུས་དུས་སུ་གློག་འབྱིན་པ་ཞེས་བྱ་བ་ནི། ཀླུའི་རྒྱལ་པོ་དེ་རྣམས་ཀྱིས་ཀྱང་ནམ་མཁའ་ལ་གློག་ཡང་དག་པར་འབྱིན་པའོ། །དུས་དུས་སུ་ཆར་འབེབས་པ་ཞེས་བྱ་བ་ནི། དབྱར་དགུན་ཡང་ཆར་འབེབས་པར་བྱེད་པའོ། །དུས་དུས་སུ་ལོ་ཏོག་སྒྲུབ་པ་ཞེས་བྱ་བ་ནི། མ་སྨིན་པ་སྨིན་པར་བྱེད་པ་སྟེ། སེམས་ཅན་གྱི་དོན་ལ་ལོ་ལེགས་པར་བྱེད་པའོ། །སངས་རྒྱས་མཐོང་བ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་སོགས་པའི། །འདས་པའི་སངས་རྒྱས་རྣམས་དང་ཡང་ཞལ་མཇལ་ཏེ། མ་འོངས་པའི་བྱམས་པ་ལ་སོགས་པ་རྣམས་ཀྱང་མཐོང་བར་འགྱུར་རོ། །ད་ལྟར་ཤཱཀྱ་ཐུབ་པ་དང་ཞལ་མཇལ་ནས་སྐྱབས་སུ་འགྲོ་བའོ། །བསླབ་པའི་གཞི་བཟུང་བ་ཞེས་བྱ་བ་ནི། ཚེས་བརྒྱད་དམ། བཅུ་བཞི་འམ། ཉ་ལ་སོགས་པའི་སྔོམ་པ་རྟག་ཏུ་ཡང་དག་པར་བཟུང་བའོ། །གསུམ་ལ་སྐྱབས་སུ་སོང་བ་ཞེས་བྱ་བ་ནི། སངས་རྒྱས་དཀོན་མཆོག་དང༌། ཆོས་དཀོན་མཆོག་དང༌། དགེ་འདུན་དཀོན་མཆོག་དང་གསུམ་ལ་སྐྱབས་སུ་སོང་བའོ། །ནམ་མཁའ་ལྡིང་གི་འཇིགས་པ་དང་ཞེས་བྱ་བ་ནི། གཞན་ཀླུ་རྣམས་ལ་ནམ་མཁའ་ལྡིང་གི་འཇིགས་པ་ཡོད་དེ། ཀླུའི་རྒྱལ་པོ་དེ་རྣམས་ལ་མི་ཚུགས་སོ། །མེ་དང་བྱེ་མའི་འཇིགས་པ་དང་ཞེས་བྱ་བ་ནི། ཀླུ་གཞན་གྱི་ཡུལ་ན་མེ་དང་བྱེ་མའི་འཇིགས་པ་ཡོད་དེ། དེ་རྣམས་ལ་དེས་མི་ཚུགས་པའོ། །རྒྱལ་པོའི་ལས་ཀྱི་འཇིགས་པ་ལས་ཐར་བ་ཞེས་བྱ་བ་ནི། རྒྱལ་པོ་རྣམས་ཀྱིས་ས་རྐོ་བའམ། ཤ་རུལ་པས་འཇིགས་པའམ། ཁྲག་ལ་སོགས་པ་རུལ་བའམ། སྨན་མི་རྙེད་པའམ། དེ་རྣམས་ཀྱི་འཇིགས་པ་ལས་ཐར་བའོ། །ས་འཛིན་པའམ་ཞེས་བྱ་བ་ནི། ཀླུ་དེ་རྣམས་གར་བསྡད་པའི་སར་ལོ་ལེགས་པའམ། ཆར་ཆེ་བའམ། ཆུ་བཟང་བའམ། མུ་གེས་ཚུགས་པར་མི་འགྱུར་ཏེ། སེམས་ཅན་རྣམས་ལ་དཔལ་འཕེལ་བའམ། ཀླུའི་འཇིགས་པས་ཚུགས་པར་མི་འགྱུར་རོ། །རིན་པོ་ཆེའི་གཞལ་མེད་ཁང་ཆེན་པོ་ན་གནས་པ་ཞེས་བྱ་བ་ནི།
ཤར་ཕྱོགས་ན་གནས་པའི་གཞལ་ཡས་ཁང་ནི་གཞི་དངུལ་ལས་བྱས་ནས་རིན་པོ་ཆེ་སྣ་བདུན་ལ་སོགས་པས་བྱས་པའོ། །ལྷོ་ཕྱོགས་ཀྱི་གཞལ་ཡས་ཁང་ནི་གཞི་གསེར་ལས་བྱས་ཏེ། རིན་པོ་ཆེ་སྣ་ཚོགས་ཀྱིས་བརྒྱན་པའོ། །ནུབ་ཕྱོགས་ཀྱི་གཞལ་ཡས་ཁང་ནི་གཞི་པདྨ་རཱ་ག་ལས་བྱས་པ་སྟེ། རིན་པོ་ཆེ་སྣ་བདུན་ལ་སོགས་པས་བརྒྱན་པའོ། །བྱང་ཕྱོགས་ཀྱི་གཞལ་ཡས་ཁང་ནི། གཞི་མ་ར་ཀ་ཏས་བྱས་པ་ལས་རིན་པོ་ཆེ་སྣ་ཚོགས་ཀྱིས་བརྒྱན་པའོ། །མཚམས་བཞི་ཡང་ཕྱོགས་བཞི་དང་མཐུན་པའོ། །བལྟ་ན་སྡུག་པའི་གཞལ་ཡས་ཁང་གི་ནང་ན་བཞུགས་པའོ། །ཚེ་རིང་བ་བསྐལ་བར་གནས་པ་ཞེས་བྱ་བ་ནི། བར་གྱི་བསྐལ་པ་གཅིག་ཏུ་གནས་པའོ། །དབང་ཆེ་བར་གྲགས་པ་ཞེས་བྱ་བ་ནི། གཞན་ཀླུ་རྣམས་ཀྱང་དབང་ཆེ་བ་སྟེ། འཇིག་རྟེན་ཁམས་ན་གྲགས་པའོ། །རྫུ་འཕྲུལ་ཆེ་བ་ཞེས་བྱ་བ་ནི། ས་འོག་ས་སྟེང་ས་བླ་རྣམས་ན་གཟུགས་སྣ་ཚོགས་སྤྲུལ་ཞིང༌། གོང་ནས་གོང་དུ་རྒྱུ་བའོ། །ལོངས་སྤྱོད་ཆེ་བ་ཞེས་བྱ་བ་ནི། ལྷའི་ལོངས་སྤྱོད་ཡོད་པ་ཇི་བཞིན་དུ་དེ་རྣམས་ཀྱང་ལོངས་སྤྱོད་པའོ། །འཁོར་ཕལ་ཆེ་བ་ཞེས་བྱ་བ་ནི། ས་སྲིན་ནམ་ས་བདག་གམ། ཀླུ་བཙན་ནམ། ཀླུ་ལ་སོགས་པའི་འཁོར་བསམ་གྱིས་མི་ཁྱབ་པ་གནས་པའོ། །དགྲའི་དཔུང་རབ་ཏུ་འཇོམས་པ་ཞེས་བྱ་བ་ནི། དེ་རྣམས་ནི་གཞན་གྱིས་མི་ཐུབ་སྟེ། གང་དུ་འགྲོ་བ་ན་ཡང་རྒྱལ་བ་རྣམ་པར་རྒྱལ་བའོ། །རྫུ་འཕྲུལ་དང་ལྡན་པ་ཞེས་བྱ་བ་ནི། སྐད་ཅིག་མས་སྟོང་གསུམ་ཁྱབ་པའོ། །འོད་དང་ལྡན་པ་ཞེས་བྱ་བ་ནི། དེའི་འོད་ཀྱིས་རང་གི་ཡུལ་ཁྱབ་པ་རང་རང་གི་འོད་ཀྱིས་རང་གསལ་བར་བྱེད་པའོ། །ཡང་ན་རིན་པོ་ཆེ་སྣ་བདུན་གྱི་འོད་ཀྱིས་ཁྱབ་པའོ། །ཁ་དོག་དང་ལྡན་པ་ཞེས་བྱ་བ་ནི། རང་རང་གི་ཁ་དོག་བལྟ་ན་སྡུག་པ་མཛེས་པའོ། །གྲགས་པ་དང་ལྡན་པ་ཞེས་བྱ་བ་ནི། ཀླུ་བྱང་ཆུབ་སེམས་དཔའ་སེམས་ཅན་གྱི་དོན་བྱེད་པར་གྲགས་པའོ། །ལྷ་དང་ལྷ་མ་ཡིན་གྱི་གཡུལ་དག་ཀྱང་མྱོང་བར་བྱེད་པ་དག་སྟེ་ཞེས་བྱ་བ་ནི། ཀླུའི་རྒྱལ་པོ་དེ་རྣམས་ཀྱིས་ཀྱང་བལྟ་བར་ནུས་ཤིང༌། ལྷ་དང་ལྷ་མ་ཡིན་གྱི་གཡུལ་བཀྱེ་བའི་རྫུ་འཕྲུལ་དང་ལྡན་པའོ། །ཀླུའི་རྒྱལ་པོ་ཆུང་
མ་དང་བཅས་པ་ཞེས་བྱ་བ་ནི། ཀླུའི་རྒྱལ་པོ་དེ་རྣམས་རེ་རེ་ལ་ཆུང་མ་བརྒྱ་བརྒྱ་དང་ལྡན་པ། འདོད་པའི་ཡོན་ཏན་ལྔ་ལ་ལོངས་སྤྱོད་པའོ། །ཀླུ་མོ་དེ་རྣམས་ཀྱང་སྐྱེ་ལེགས་པ་བལྟ་ན་སྡུག་པ། རིགས་ཇི་བཞིན་དུ་ཀླུ་མོ་རྣམས་ཀྱང་དེ་བཞིན་ནོ། །བུ་དང་བཅས་པ་ཚ་བོ་དང་བཅས་པ་ཞེས་བྱ་བ་ནི། དེ་རྣམས་ལ་བུ་དང་ཚ་བོ་ཡང་བརྒྱ་བརྒྱ་ཡོད་དེ། ལོངས་སྤྱོད་ལ་སོགས་པ་ཡང་དེ་བཞིན་ནོ། །སྤུན་དང་བཅས་པ་ཞེས་བྱ་བ་ནི་།དེ་བཞིན་དུ་སྤུན་བརྒྱ་བརྒྱ་ཡོད་དེ་རྒྱལ་པོ་རྣམས་ཀྱི་གཅུང་པོའོ། །ལོངས་སྤྱོད་ལ་སོགས་པ་ཡང་གོང་བཞིན་ནོ། །བློན་པོ་དང་བཅས་པ་ཞེས་བྱ་བ་ནི། བློན་པོ་ཡང་དེ་བཞིན་ནོ། །དེད་དཔོན་དང་བཅས་པ་ཞེས་བྱ་བ་ནི། འཁྲུག་པའི་དུས་ཡང་དེད་དཔོན་དེ་རྣམས་ཀྱིས་ལག་ཏུ་ལེན་པའོ། །ཕོ་ཉ་དང་བཅས་པ་ཞེས་བྱ་བ་ནི། ཀླུའི་རྒྱལ་པོ་རེ་རེ་ལ་ཕོ་ཉ་རེ་རེ་ཡོད་དེ། ཕོ་ཉའི་དུས་སུ་ཕོ་ཉ་གཏོང་བའོ། །མངག་པ་དང་བཅས་པ་ཞེས་བྱ་བ་ནི། ཀླུའི་རྒྱལ་པོ་དེ་རྣམས་ཀྱི་འཕྲིན་ནོ། །གཡོག་དང་བཅས་པ་ཞེས་བྱ་བ་ནི། དེ་རྣམས་ནི་ནང་ན་ཡོད་པ་སྟེ། གཡོག་བརྒྱ་བརྒྱ་དང་ལྡན་པའོ། །འཁོར་དང་བཅས་པ་ཞེས་བྱ་བ་ནི། ནང་འཁོར་ཕྱི་འཁོར་གཉིས་ཡིན་ཏེ། དེ་ཡང་བསམ་གྱིས་མི་ཁྱབ་པར་གནས་པའོ། །འཁོར་དང་གཡོག་དང་མངག་པ་དང༌། དེ་རྣམས་ནི་མིའི་ཆ་བྱད་ལ་སྨད་སྤྲུལ་དུ་འདུག་པའོ། །སེམས་ཅན་ལ་གནོད་པ་སྐྱེལ་བ་ནད་སྣ་ཚོགས་གཏོང་བའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། ཐབས་ཤེས་རབ་གཉིས་སུ་མེད་པའི་རང་བཞིན་སྒྲོ་འདོགས་མེད་པ་གཉུག་མའི་རང་བཞིན་ངོ་བོ་ཉིད་དང་བྲལ་བ། དེ་ལྟ་བུའི་རིག་སྔགས་ལ་གང་ཟག་གང་དང་གང་གིས་གུས་པར་བྱེད་པར་གྱུར་ན། ཀླུའི་རྒྱལ་པོ་དེ་རྣམས་ཀྱིས་ཀྱང་སྲུང་བ་དང་སྐྱོབ་པར་འགྱུར་རོ། །སྦ་བ་དང་ཞེས་བྱ་བ་ནི། འཇིགས་པ་ལས་སྦ་བའོ། །ཡོངས་སུ་སྐྱོབ་པ་དང་ཞེས་བྱ་བ་ནི། ཀླུའི་འཇིགས་པ་ལས་སྐྱོབ་པའོ། །ཡོངས་སུ་གཟུང་བ་དང་ཞེས་བྱ་བ་ནི། འཇིགས་པ་ལས་ཡོངས་སུ་གཟུང་བའོ། །ཡོངས་སུ་བསྐྱང་བ་དང་ཞེས་བྱ་བ་ནི། འཇིགས་པ་ལས་ཐར་ནས་བསྐྱང་བའོ། །ཞི་བ་དང་ཞེས་བྱ་བ་ནི། ཀླུ་
ནད་ཐམས་ཅད་ཞི་བའོ། །བད་ལེགས་སུ་གྱུར་པ་དང་ཞེས་བྱ་བ་ནི། ཀླུའི་ནད་ཀྱི་སྡུག་བསྔལ་ལས་ཐར་ནས་བདེ་བའོ། །ཆད་པ་སྤང་བ་དང་ཞེས་བྱ་བ་ནི། ཀླུ་རྣམས་ཀྱི་ཆད་པས་མི་ཚུགས་པའོ། །མཚོན་ཆ་སྤང་བ་དང་ཞེས་བྱ་བ་ནི། ཀླུའི་རྒྱལ་པོ་དེ་རྣམས་ཀྱིས་ཀྱང་མཚོན་ཆའི་འཇིགས་པ་སྤོང་བར་བྱེད་པའོ། །དུག་གཞིལ་བ་དང་ཞེས་བྱ་བ་ནི། དུག་བཞི་སྤང་བའོ། །དུག་གསོད་པ་དང་ཞེས་བྱ་བ་ནི། ཀླུའི་དུག་བཞི་རྩ་བ་ནས་མེད་པའོ། །མཚམས་གཅད་པ་དང་ཞེས་བྱ་བ་ནི། དེའི་ནུས་པས་མཚམས་ལས་འགལ་མི་ནུས་པའོ། །ས་བཅིང་བ་དང་ཞེས་བྱ་བ་ནི། ས་དེ་ནི་གནོད་མི་ནུས་པའོ། །ལོ་བརྒྱ་འཚོ་བར་གྱུར་ཅིག་ཅེས་བྱ་བ་ནི། རྒས་པ་མེད་ཅིང་ནད་ཐམས་ཅད་དང་བྲལ་བའོ། །སྟོན་བརྒྱ་མཐོང་བར་ཤོག་ཤིག་ཅེས་བྱ་བ་ནི། བུ་དང་ཚ་བོ་ཐམས་ཅད་མཐོང་བ། ཆེ་རིང་བར་གནས་པའོ། །གཙང་སྦྲ་མ་བྱས་པ་དང༌། གཙང་སྦྲ་བྱས་པ་དང་ཞེས་བྱ་བ་ནི། གཙང་སྦྲ་མ་བྱས་པ་ནི་ཆོས་ཉིད་ཡིན་ཏེ། དེ་ཡང་རིག་པའི་རང་བཞིན་ནོ། །གཙང་སྦྲ་བྱས་པ་ནི་ཀྲྀ་ཡའི་ཚུལ་གྱིས་གནས་པ་སྟེ། དེ་ནི་གཙང་སྦྲ་ལ་བརྟེན་པའི་རིག་པའོ། །མྱོས་པ་དང༌། རབ་ཏུ་མྱོས་པ་དང་ཞེས་བྱ་བ་ནི། དྲན་པ་སྟོར་བ་སྟེ། རབ་ཏུ་མྱོས་པ་ནི་དེ་པས་ཀྱང་དྲན་པ་སྟོར་བའོ། །འགྲོ་བ་དང་འགྲེང་བ་ཞེས་བྱ་བ་ནི། ཐག་རིང་བ་དང༌། ཐུང་བ་དང༌། བསྡད་པའོ། །འགྲེང་བ་ནི་དྲན་པ་མི་རྙེད་ཅིང་འགྲོ་མི་ཤེས་པའོ། །འདུག་པ་དང་ཉལ་བ་དང་ཞེས་བྱ་བ་ནི། ལྡང་བར་མི་ནུས་པར་ནད་ཀྱིས་ཐེབས་པའོ། །ཉལ་བ་ནི་དེ་བཞིན་དུ་ནད་ཀྱིས་ཐེབས་པའོ། །མི་ཉལ་བ་དང་འོངས་པ་དང་ཞེས་བྱ་བ་ནི། འདུག་སྙིང་མི་འདོད་ཅིང༌། མ་རིག་པའི་སེམས་དང་ལྡན་པའོ། །མ་འོངས་པ་དགེ་བར་གྱུར་ཅིག་ཅེས་བྱ་བ་ནི། དེ་ལ་སོགས་པ་རིག་སྔགས་ཀྱི་གཟི་བརྗིད་ཀྱིས་བདེ་བར་གནས་པའོ། །རྒྱལ་པོའི་འཇིགས་པ་དང་ཞེས་བྱ་བ་ནི། སྲོག་དང་ནོར་ཤོར་བ་ལས་ཐར་བའོ། །ཆོམ་རྐུན་གྱི་འཇིགས་པ་དང་ཞེས་བྱ་བ་ནི། ལམ་དུ་ཞུགས་པ་དང༌། ཁྱིམ་དུ་ནོར་སྟོར་བའི་འཇིགས་པའོ། །མེའི་འཇིགས་པ་དང་ཞེས་བྱ་བ་ནི། རང་གི་ཁྱིམ་དུ་གཞན་དུ་འགྲོ་བའི་སར་རི་ལ་སོགས་པ་ཚིག་པའོ། །ཆུའི་འཇིགས་
པ་དང་ཞེས་བྱ་བ་ནི། གྲུ་དང་གཟིངས་དང་རབ་ཀྱི་དཀྱིལ་ལོ། །མི་མཛའ་བའི་འཇིགས་པ་དང་ཞེས་བྱ་བ་ནི། དགྲ་བོ་དང་ཕྲད་པའོ། །གསོད་པའི་འཇིགས་པ་དང་ཞེས་བྱ་བ་ནི། སྲོག་དང་བྲལ་བར་བྱེད་པའོ། །ཕྱིར་རྒོལ་བ་དང་ཞེས་བྱ་བ་ནི། སྤྲོ་ཐུང་བ་གཤིས་ངན་པ་དང་ཕྲད་པའོ། །དགྲའི་འཇིགས་པ་དང་ཞེས་བྱ་བ་ནི། དེ་ནི་གནོད་པར་བྱེད་པ་འབའ་ཞིག་གོ །འཇོམས་པའི་འཇིགས་པ་དང་ཞེས་བྱ་བ་ནི། རྒྱལ་པོ་དང་གཞན་དབང་ཆེ་བ་རྣམས་ཀྱིས་འཇོམས་པའོ། །ཕ་རོལ་གྱི་དགྲའི་ཚོགས་ཀྱིས་འཇོམས་པ་དང་ཞེས་བྱ་བ་ནི། གཞན་ཡང་དཔུང་གིས་བཅོམ་པའི་འཇིགས་པའོ། །མུ་གེའི་འཇིགས་པ་དང་ཞེས་བྱ་བ་ནི། ཆར་དཀོན་པ་དང་ཆར་ཆེས་པ་དང༌། སེམས་ཅན་རྣམས་ཀྱི་ལོ་འཇོམས་པའོ། །དུས་མ་ཡིན་པའི་འཆི་བའི་འཇིགས་པ་དང་ཞེས་བྱ་བ་ནི། ཆུ་དང༌། མེ་དང༌། མཚོན་དང༌། འབྱུང་པོ་དང༌། རིམས་དང༌། ཐོག་དང༌། ལྷུང་བ་དང༌། རྡིབ་པ་དང༌། ས་གཡོ་བའི་འཇིགས་པ་དང་ཞེས་བྱ་བ་ནི། རྐྱེན་གྱིས་གཡོ་བ་དང༌། རྣམ་པར་སྨིན་པས་གཡོ་བའོ། །གཅན་གཟན་ཁྲོ་པོའི་འཇིགས་པ་ལས་བདག་བདེ་ལེགས་སུ་གྱུར་ཅིག་ཅེས་བྱ་བ་ནི། སྟག་དང་དོམ་ལ་སོགས་པའི་འཇིགས་པ་སྟེ། རིག་སྔགས་ཀྱི་རྒྱལ་མོའི་གཟི་བརྗིད་ཀྱིས། ཀླུའི་རྒྱལ་པོ་དེ་རྣམས་ཀྱིས་སྲུང་བ་དང་སྐྱོབ་པར་བྱེད་དོ། །ལྷའི་འཇིགས་པ་དང་ཞེས་བྱ་བ་ནི། གདོན་རིགས་མི་གཅིག་པ་སྟོང་ཕྲག་བརྒྱད་ཅུ། ལྷའི་གདོན་ལ་སོགས་པ་གདོན་རིགས་སྟོང་ཕྲག་བརྒྱད་ཅུ་རྩ་གཉིས་སོ། །དེ་ལ་སོགས་པ་ངན་སོང་བསམ་ཀྱིས་མི་ཁྱབ་པའོ། །གནོན་པའི་འཇིགས་པ་ལས་བདག་བདེ་ལེགས་སུ་གྱུར་ཅིག་ཅེས་བྱ་བ་ནི། རིག་སྔགས་ཀྱི་གཟི་བརྗིད་ཀྱིས་ཀླུའི་རྒྱལ་པོ་དེ་རྣམས་ཀྱིས་ཀྱང་གདོན་དེ་རྣམས་ཀྱི་འཇིགས་པ་ལ་བསྲུང་བ་དང་སྐྱབ་པར་འགྱུར་རོ། །གཤེད་བྱེད་དང་བསྒྱུར་བའི་ལས་ལ་སོགས་པ་ཞེས་བྱ་བ་ནི། ལས་བཅུ་བཞི་ལས་ཐར་པ་སྟེ། དེའི་ལས་ནི་རྣམ་པར་སྨིན་པ་དང་རྐྱེན་གྱིས་བྱུང་བའོ། །སྨད་པའི་འཇིགས་པ་ལས་བདེ་ལེགས་སུ་གྱུར་ཅིག་ཅེས་བྱ་བ་ནི། རིག་སྔགས་ཀྱི་གཟི་བརྗིད་ཀྱིས་ཀླུའི་རྒྱལ་པོ་དེ་རྣམས་ཀྱིས་ཀྱང་གདོན་དེ་རྣམས་ཀྱི་འཇིགས་པ་ལས་སྲུང་བ་དང་སྐྱོབ་པར་འགྱུར་རོ། །ཤུ་བ་དང་
ཞེས་བྱ་བ་ལ་སོགས་པ། མཛེ་རིགས་མི་མཐུན་པ་བཅོ་བརྒྱད་དོ། །ལྷོག་པའི་འཇིགས་པ་ལས་བདེ་ལེགས་སུ་གྱུར་ཅིག་ཅེས་བྱ་བ་ནི། ཀླུ་ནད་དེ་རྣམས་ནི་རིག་སྔགས་ཀྱི་རྒྱལ་མོའི་གཟི་བརྗིད་ཀྱིས་ཀླུའི་རྒྱལ་པོ་དེ་རྣམས་ཀྱིས་ཀྱང་ནད་དེ་རྣམས་ལས་སྲུང་བ་དང་སྐྱོབ་པར་བྱེད་པའོ། །མཚན་མོ་བདེ་ལེགས་ཉིན་བདེ་ལེགས། །ཉི་མའི་གུང་གི་བདེ་ལེགས་དང༌། །ཞེས་བྱ་བ་ནི་རིག་སྔགས་ཀྱི་གཟི་བརྗིད་ཀྱིས་དུས་དེ་གཉིས་ཀྱང་བདེ་བར་གནས་པ་ནད་ཐམས་ཅད་དང་བྲལ་བའོ། །ཉིན་མཚན་ཀུན་གྱི་བདེ་ལེགས་དག །སངས་རྒྱས་ཀུན་གྱིས་བདག་ལ་སྩོལ། །ཞེས་བྱ་བ་ནི་དུས་ཐོ་རངས་ཀ་དང༌། ཕྱི་དྲོ་དང༌། རིག་སྔགས་ཀྱི་གཟི་བརྗིད་ཀྱིས་དུས་རྟག་ཏུ་བདེ་བའོ། །སངས་རྒྱས་ཕྱག་འཚལ་བྱང་ཆུབ་ཕྱག་འཚལ་ལོ། །ཞེས་བྱ་བ་ནི་རྟེན་གྱི་གང་ཟག་གིས་དེ་ལྟ་བུའི་སངས་རྒྱས་དང་བྱང་ཆུབ་ལ་ཕྱག་འཚལ་བའོ། །གྲོལ་གྱུར་ཕྱག་འཚལ་གྲོལ་ལ་ཕྱག་འཚལ་ལོ། །ཞེས་བྱ་བ་ནི་གཞི་ནས་གྲོལ་བ་སྟེ། གཞི་ནི་འཁོར་བའི་སྡུག་བསྔལ་ལོ། །འཁོར་བའི་སྡུག་བསྔལ་ལས་གྲོལ་ལ་ཕྱག་འཚལ་ལོ། །ཞི་གྱུར་ཕྱག་འཚལ་ཞི་ལ་ཕྱག་འཚལ་ལོ། །ཞེས་བྱ་བ་ནི་གཞི་ནི་ཐུན་མོང་སྟེ། གཞི་མེད་པ་ནི་ཐུན་མོང་མ་ཡིན་པའོ། །དེ་གཉིས་ལ་ཕྱག་འཚལ་ལོ། །རྣམ་གྲོལ་ཕྱག་འཚལ་གྲོལ་ལ་ཕྱག་འཚལ་ལོ། །ཞེས་བྱ་བ་ནི་རྣམ་གྲོལ་ནི་གཟུགས་ལྟ་བུ་སྟེ། གྲོལ་བ་ནི་སྡུག་བསྔལ་ཏེ། སྡུག་བསྔལ་ལས་གྲོལ་བ་རྣམས་ལ་ཕྱག་འཚལ་ལོ། །བྲམ་ཟེ་གང་དག་སྡིག་པའི་ཆོས་རྣམས་བསལ་བར་གྱུར་པ་དེ་དག་ལ་ཡང་ཕྱག་འཚལ་ལོ་ཞེས་བྱ་བ་ནི། སྡིག་པས་མི་གོས་པ་གཙང་བའི་རིགས་རྣམས་ལ་ཕྱག་འཚལ་ལོ། །དེ་དག་གིས་ཀྱང་བདག་ལ་བསྐྱང་བ་དང་སྲུང་བགྱིས་ཤིག་སྭཱ་ཧཱ་ཞེས་བྱ་བ་ནི། གང་ཟག་རིག་སྔགས་ཀྱི་རྒྱལ་མོ་ལ་གུས་པར་བྱས་ནས་རྗེས་སུ་ཡི་རང་ཞིང་ཁ་ཏོན་བྱེད་པར་གྱུར་ན་སྲུང་བ་དང་སྐྱོབ་པ་དང༌། སྡུག་བསྔལ་ཐམས་ཅད་ལས་སྐྱོབ་པར་འགྱུར་རོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་ཀླུའི་རྒྱལ་པོ་བརྒྱ་བདུན་ཅུའི་གནས་སྐབས་ཏེ་བཅུ་གསུམ་པའོ།། །།ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་གསུངས་པའོ། །རིག་སྔགས་ཀྱི་
རྒྱལ་མོ་རྨ་བྱ་ཆེན་མོ་འདི་ནི་ཞེས་བྱ་བ་ནི། རིག་སྔགས་ཀྱི་རྒྱལ་མོ་ཞལ་བཞི་ཕྱག་བརྒྱད་མ་སྐུ་མདོག་སེར་མོ། ཞལ་གཡས་དཀར་བ་གཡོན་དམར་བ། རྒྱབ་མཐིང་གའོ། །སྤྱན་གསུམ་དང་ལྡན་པ། སངས་རྒྱས་ལྔའི་དབུ་རྒྱན་ཅན། ཡེ་ཤེས་ལྔ་དང་ལྡན་པ་ཕྱག་གཡས་རྣམས་ན་རལ་གྲི་དང་འཁོར་ལོ་དང་ཞགས་པ་དང་ངོ༌། །གཡོན་རྣམས་ན་རྨ་བྱའི་སྒྲོ་དང༌། དགྲ་སྟ་དང༌། རྩེ་གསུམ་མོ། །ཐ་མ་གཉིས་ན་མདའ་གཞུ་འགེངས་པའོ། །རྒྱན་ཐམས་ཅད་ཀྱིས་བརྒྱན་པ། དབུ་ལ་རྡོ་རྗེས་མཚན་པ། ཐབས་ཤེས་རབ་གཉིས་སུ་མེད་པ་ཞབས་ཕྱེད་སྐྱིལ་དུ་བཞུགས་པ། པདྨ་སྣ་ཚོགས་ཀྱི་གདན་དང༌། ཟླ་བའི་གདན་ལ་ཉི་མའི་འོད་དང་བཅས་པའོ། །ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་གསུངས་པའོ་ཞེས་བྱ་བ་ནི། ནམ་མཁའི་རང་བཞིན་དང་འདྲ་བ་སྐུ་གསུང་ཐུགས་རྣམ་པར་དག་པ་དེ་ལྟ་བུའི་རིག་སྔགས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་གསུངས་པའོ། །ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ནི་སྐུ་མདོག་གསེར་དང་འདྲ་བ། ཞལ་གཅིག་ཕྱག་གཉིས་པ། གཡས་གཡོན་གཉིས་ཆོས་ཀྱི་འཁོར་ལོའི་ཕྱག་རྒྱ་མཛད་པ་རྡོ་རྗེའི་སྐྱིལ་ཀྲུང་དུ་བཞུགས་པ། ཟླ་བའི་གདན་དང་ཉི་མའི་འོད་དང་ལྡན་པའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། སངས་རྒྱས་རྣམ་པར་གཟིགས་ཀྱིས་གསུངས་པའོ། །རིག་སྔགས་ཀྱི་གསང་སྔགས་བལྟ་བའོ། །རིག་སྔགས་ཀྱི་གསང་སྔགས་ནི་ཨ་ར་ཌེ་ཀ་ར་ཌེ་མ་དེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི། བཅོམ་ལྡན་འདས་ཀྱིས་བཀའ་སྩལ་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ནི་ཞེས་བྱ་བ་ནི། རིག་སྔགས་ཀྱི་རྒྱལ་མོ་ཞལ་བཞི་ཕྱག་བརྒྱད་པ། སྐུ་མདོག་སེར་མོ་གཡས་མཐིང་ག །གཡོན་དམར་བ་རྒྱབ་དཀར་བའོ། །སྤྱན་གསུམ་པ། རིགས་ལྔའི་དབུ་རྒྱན་ཅན། ཡེ་ཤེས་ལྔ་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། གཡས་པ་གསུམ་ན་རལ་གྲི་དང༌། རྡོ་རྗེ་དང༌། འཁོར་ལོ་དང་ངོ༌། །གཡོན་པ་གསུམ་ན་རྨ་བྱའི་སྒྲོ་དང༌། ཞགས་པ་དང༌། དགྲ་སྟ་བསྣམས་པའོ། །ཐ་མ་གཉིས་ན་མདའ་གཞུ་འགེངས་པའོ། །ཞབས་ཕྱེད་སྐྱིལ་དུ་བཞུགས་པ། སྣ་ཚོགས་པདྨ་
དང༌། ཟླ་བའི་གདན་ལ་ཉི་མའི་འོད་དང་བཅས་པའོ། །ཐབས་དང་ཤེས་རབ་གཉིས་སུ་མེད་པ། དབུ་ལ་འཁོར་ལོས་མཚན་པའོ། །ཡང་དག་པར་རྫོགས་པའི་སངས་རྒྱས་གཙུག་ཏོར་ཅན་གྱིས་གསུངས་པའོ་ཞེས་བྱ་བ་ནི། སྟོང་པ་ཉིད་ཀྱི་རང་བཞིན་ནམ་མཁའ་ལྟ་བུ་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད། རིག་སྔགས་ཀྱི་རྒྱལ་མོ་དེ་ལྟ་བུ་གསུངས་སོ། །སངས་རྒྱས་གཙུག་ཏོར་ཅན་ནི་ཞལ་གཅིག་ཕྱག་གཉིས་པ། སྐུ་མདོག་འཛམ་བུའི་གླིང་གི་གསེར་འདྲ་བ། ཕྱག་མཉམ་གཞག་ཏུ་མཛད་པ། ཟླ་བའི་གདན་ལ་ཉི་མའི་འོད་དང་ལྡན་པའོ། །ཏདྱ་ཐཱ་ཞེས་བྱ་བ་ནི། འདི་ལྟ་སྟེ། སངས་རྒྱས་གཙུག་ཏོར་ཅན་གྱིས་གསུངས་པའོ། །རིག་སྔགས་ཀྱི་གསང་སྔགས་བལྟ་བའོ། །རིག་སྔགས་ཀྱི་གསང་སྔགས་ནི། ཨིཊྚེ་མི་ཊྚེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི། བྱང་ཆུབ་ཆེན་པོས་བཀའ་སྩལ་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ནི་ཞེས་བྱ་བ་ནི། ཞལ་བཞི་ཕྱག་བརྒྱད་པ། སྐུ་མདོག་གུར་ཀུམ་གྱི་མདོག་གོ །གཡས་དཀར་བ། གཡོན་ལྗང་གུ་།རྒྱབ་དམར་བ། སངས་རྒྱས་ལྔའི་དབུ་རྒྱན་ཅན། སྤྱན་གསུམ་པ་རྒྱན་ཐམས་ཅད་ཀྱིས་བརྒྱན་པ། ཡེ་ཤེས་ལྔ་དང་ལྡན་པ། གཡས་རྣམས་ན་རལ་གྲི་དང༌། རྡོ་རྗེ་དང༌། རིན་པོ་ཆེའོ། །གཡོན་གསུམ་ན་རྨ་བྱའི་སྒྲོ་དང༌། རྩེ་གསུམ་དང༌། ཞགས་པའོ། །ཐ་མ་གཉིས་ན་མདའ་གཞུ་འགེངས་པའོ། །ཞབས་ཕྱེད་སྐྱིལ་དུ་བཞུགས་པའོ། །ཟླ་བའི་གདན་དང༌། ཉི་མའི་འོད་དང་ལྡན་པའོ། །ཐབས་ཤེས་རབ་གཉིས་སུ་མེད་པའོ།། དབུ་ལ་རིན་པོ་ཆེས་བརྒྱན་པའོ། །ཡང་དག་པར་རྫོགས་པའི་སངས་རྒྱས་ཐམས་ཅད་སྐྱོབ་ཀྱིས་གསུངས་པའོ་ཞེས་བྱ་བ་ནི། ཐབས་ཤེས་རབ་གཉིས་སུ་མེད་པ་མི་དམིགས་པའི་ཡེ་ཤེས་ཀྱི་རང་བཞིན་དེ་དེ་ལྟ་བུའི་རིགས་ཀྱི་རང་བཞིན་ནི་སངས་རྒྱས་ཐམས་ཅད་སྐྱོབ་པས་གསུངས་པའོ། །སངས་རྒྱས་ཐམས་ཅད་སྐྱོབ་པ་ནི་ཞལ་གཅིག་ཕྱག་གཉིས་པ་སྐུ་མདོག་ལྗང་གུ་གཡས་མཆོག་སྦྱིན། གཡོན་མཉམ་གཞག་གོ །ཞབས་རྡོ་རྗེའི་སྐྱིལ་ཀྲུང་དུ་བཞུགས་པ། ཟླ་བའི་གདན་ལ་ཉི་མའི་འོད་དང་ལྡན་པའོ། །ཏདྱ་ཐཱ་ཞེས་བྱ་བ་ནི། འདི་ལྟ་སྟེ། སངས་
རྒྱས་ཐམས་ཅད་སྐྱོབ་པས་གསུངས་པའི་རིག་སྔགས་ཀྱི་གསང་སྔགས་བལྟ་བའོ། །རིག་སྔགས་ཀྱི་གསང་སྔགས་ནི། མོ་རི་མོ་རི་ལ་སོགས་པའོ། །ཀུན་དགའ་བོ་ཞེས་བྱ་བ་ནི། ཐུགས་རྗེ་ཆེན་པོ་གཽ་ཏ་མས་གསུངས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ནི་ཞེས་བྱ་བ་ནི་རིག་སྔགས་ནི་ཞལ་བཞི་ཕྱག་བརྒྱད་པ། སྐུ་མདོག་སེར་པོ་ཞལ་གཡས་དཀར་གཡོན་དམར་རྒྱབ་ལྗང་གུའོ། །སྤྱན་གསུམ་པ། རིགས་ལྔའི་དབུ་རྒྱན་ཅན། གཡས་གསུམ་ན་རལ་གྲི་པདྨ། རྡོ་རྗེའོ། །གཡོན་གསུམ་ན་རྨ་བྱའི་སྒྲོ། ལྕགས་ཀྱུ། དགྲ་སྟའོ། །ཐ་མ་གཉིས་ན་མདའ་གཞུ་འགེངས་པའོ། །ཡེ་ཤེས་ལྔ་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། ཞབས་ཕྱེད་སྐྱིལ་དུ་བཞུགས་པ། སྣ་ཚོགས་པདྨའི་གདན་དང་ཟླ་བའི་གདན་དང༌། ཉི་མའི་འོད་དང་ལྡན་པ། ཐབས་ཤེས་རབ་གཉིས་སུ་མེད་པ། དབུ་ལ་པདྨས་བརྒྱན་པའོ། །ཡང་དག་པར་རྫོགས་པའི་སངས་རྒྱས་འཁོར་བ་འཇིག་གིས་གསུངས་པའོ་ཞེས་བྱ་བ་ནི། ཡང་དག་པའི་ཡེ་ཤེས་ཀྱི་རང་བཞིན་ཐབས་ཤེས་རབ་གཉིས་སུ་མེད་པའི་ངོ་བོ་ཉིད་དང་བྲལ་བ། དེ་ལྟ་བུའི་རིག་སྔགས་སངས་རྒྱས་འཁོར་བ་འཇིག་གིས་གསུངས་པའོ། །སངས་རྒྱས་འཁོར་བ་འཇིག་ནི་ཞལ་གཅིག་ཕྱག་གཉིས་པ་སྐུ་མདོག་དམར་སེར། ཕྱག་གཉིས་ཏིང་ངེ་འཛིན་གྱི་ཕྱག་རྒྱ་མཛད་པ། ཟླ་བའི་གདན་ལ་ཉི་མའི་འོད་དང་ལྡན་པའོ། །ཏདྱ་ཐཱ་ཞེས་བྱ་བ་ནི། འདི་ལྟ་སྟེ། སངས་རྒྱས་འཁོར་བ་འཇིག་གིས་གསུངས་པ། རིག་སྔགས་ཀྱི་གསང་སྔགས་བལྟའོ། །རིག་སྔགས་ཀྱི་གསང་སྔགས་ནི། ཧི་ཌི་མི་ཌི་ལ་སོགས་པའོ། །ཀུན་དགའ་བོ་ཞེས་བྱ་བ་ནི། བཅོམ་ལྡན་འདས་ཀྱིས་བཀའ་སྩལ་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ནི་ཞེས་བྱ་བ་ནི། ཞལ་བཞི་ཕྱག་བརྒྱད་སྐུ་མདོག་དཀར་སེར། གཡས་མཐིང་ག །གཡོན་དམར་བ། རྒྱབ་ལྗང་གུའོ། །སྤྱན་གསུམ་པ། རིགས་ལྔའི་དབུ་རྒྱན་ཅན། ཡེ་ཤེས་ལྔ་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། གཡས་གསུམ་ན་རལ་གྲི་དང༌། སྣ་ཚོགས་རྡོ་རྗེ་དང༌། འཁོར་ལོའོ། །གཡོན་གསུམ་ན་རྨ་བྱའི་སྒྲོ་དང༌། དགྲ་སྟ་དང༌། རྩེ་གསུམ་བསྣམས་པའོ། །ཐ་མ་གཉིས་ན་མདའ་
གཞུ་འགེངས་པའོ། །ཞབས་ཕྱེད་ཀྲུང་དུ་བཞུགས་པའོ། །པདྨ་སྣ་ཚོགས་ཀྱི་སྟེང་དུ་ཟླ་བའི་གདན་ལ་ཉི་མའི་འོད་དང་ལྡན་པའོ། །ཐབས་ཤེས་རབ་གཉིས་སུ་མེད་པའོ། །དབུ་ལ་སྣ་ཚོགས་ཀྱི་རྡོ་རྗེས་མཚན་པའོ། །ཡང་དག་པར་རྫོགས་པའི་སངས་རྒྱས་གསེར་ཐུབ་ཀྱིས་གསུངས་པའོ་ཞེས་བྱ་བ་ནི། ཀུན་རྫོབ་དང་དོན་དམ་པ་གཉིས་ཀྱི་རང་བཞིན་ཡེ་ཤེས་རྣམ་པར་དག་པ། ནམ་མཁའི་ངོ་བོ་དེ་ལྟ་བུའི་རིག་སྔགས་སངས་རྒྱས་གསེར་ཐུབ་ཀྱིས་གསུངས་པའོ། །སངས་རྒྱས་གསེར་ཐུབ་ནི་ཞལ་གཅིག་ཕྱག་གཉིས་པ། སྐུ་མདོག་གསེར་གྱི་མདོག་ཅན། གཡས་པ་སྐྱབས་སྦྱིན། གཡོན་པ་ཏིང་ངེ་འཛིན་གྱི་ཕྱག་རྒྱ་ཟླ་བའི་གདན་ལ་ཉི་མའི་འོད་དང་ལྡན་པའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། སངས་རྒྱས་གསེར་ཐུབ་ཀྱིས་གསུངས་པའི་རིག་སྔགས་ཀྱི་གསང་སྔགས་བལྟ་བའོ། །རིག་སྔགས་ཀྱི་གསང་སྔགས་ནི་འདི་ལྟ་སྟེ། ཏ་ཏ་ལེ་ཏ་ཏ་ལེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི། བྱང་ཆུབ་ཆེན་པོས་བཀའ་སྩལ་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ནི་ཞེས་བྱ་བ་ནི། ཞལ་བཞི་ཕྱག་བརྒྱད་པ་སྐུ་མདོག་སེར་པོ་གཡས་དཀར་གཡོན་དམར། རྒྱབ་མཐིང་ག །རིགས་ལྔའི་དབུ་རྒྱན་སྤྱན་གསུམ་པ། ཡེ་ཤེས་ལྔ་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། གཡས་པ་གསུམ་ན་རལ་གྲི་དང༌། རྡོ་རྗེ་དང་འཁོར་ལོའོ། །གཡོན་གསུམ་ན་རྨ་བྱའི་སྒྲོ་དང༌། དགྲ་སྟ་དང༌། ཞགས་པ་བསྣམས་པ་ཐ་མ་གཉིས་མདའ་གཞུ་འགེངས་པའོ། །ཞབས་ཕྱེད་སྐྱིལ་དུ་བཞུགས་པ། པདྨ་སྣ་ཚོགས་ཀྱི་སྟེང་ན་ཟླ་བའི་གདན་ལ་ཉི་མའི་འོད་དང་ལྡན་པ། ཐབས་ཤེས་རབ་གཉིས་སུ་མེད་པའི་དབུ་ལ་མཆོད་སྦྱིན་གྱིས་བརྒྱན་པའོ། །ཡང་དག་པར་རྫོགས་པའི་སངས་རྒྱས་འོད་སྲུངས་ཀྱིས་གསུངས་པའོ་ཞེས་བྱ་བ་ནི། རིག་པའི་རང་བཞིན་ནམ་མཁའ་ལྟ་བུ་འཇིག་རྟེན་གྱི་ཁམས་ཁྱབ་པ་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་དོ། །དེ་ལྟ་བུའི་རིག་སྔགས་སངས་རྒྱས་འོད་སྲུངས་ཀྱིས་གསུངས་པའོ། །སངས་རྒྱས་འོད་སྲུངས་ནི་ཞལ་གཅིག་ཕྱག་གཉིས་པ་སྐུ་མདོག་སེར་པོ་ཕྱག་གཉིས་ཆོས་ཀྱི་དབྱིངས་ཀྱི་ཕྱག་རྒྱའོ། །
ཟླ་བའི་གདན་ལ་ཉི་མའི་འོད་དང་ལྡན་པའོ། །ཏདྱ་ཐཱ་ཞེས་བྱ་བ་ནི། འདི་ལྟ་སྟེ། སངས་རྒྱས་འོད་སྲུངས་ཀྱིས་གསུངས་པ། རིག་སྔགས་ཀྱི་གསང་སྔགས་བལྟ་བའོ། །རིག་སྔགས་ཀྱི་གསང་སྔགས་ནི་ཨཎྜ་རེ་བཎྜ་རེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི། སངས་རྒྱས་ཤཱཀྱ་ཐུབ་པས་བཀའ་སྩལ་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ནི་ཞེས་བྱ་བ་ནི། མཚོན་པ་མཚོན་བྱེད་དང་ལྡན་པ། མཚོན་པ་ནི་ཡེ་ཤེས་སོ། །ཆོས་ཀྱི་དབྱིངས་ཀྱི་ཡེ་ཤེས་སོ། །མཚོན་བྱེད་ནི་རིག་སྔགས་ཀྱི་རྒྱལ་མོ་བདག་ཉིད་དེ། དེ་ནི་ཐབས་ཀྱི་རང་བཞིན་ནོ། །དེ་ནི་གཉིས་སུ་མེད་པར་བསྟན་པ་ནི་ཀུན་རྫོབ་དང་དོན་དམ་པ་གཉིས་སུ་མེད་པར་རྣམ་པར་དག་པའོ། །ཞལ་བཞིར་བསྟན་བ་ནི་ཚད་མེད་པ་བཞི་རྣམ་པར་དག་པའོ། །ཞལ་རེ་རེ་ལ་སྤྱན་གསུམ་གསུམ་དང་ལྡན་པ་ནི། ཡེ་ཤེས་གསུམ་གྱི་རང་བཞིན་ནོ། །སངས་རྒྱས་ལྔའི་དབུ་རྒྱན་ནི་རིགས་ལྔ་རྣམ་པར་དག་པའོ། །ཡེ་ཤེས་ལྔ་དང་ལྡན་པ་ནི། སྟོང་པ་ཉིད་ཀྱི་རང་བཞིན་བསྟན་པའོ། །ཞལ་སེར་པོ་དང༌། དཀར་པོ་དང༌། དམར་པོ་དང༌། མཐིང་གར་བསྟན་པ་ནི། ལས་བཞི་རྣམ་པར་དག་པའོ། །སྐུ་མདོག་གསེར་དུ་སྣང་བ་ནི་དུག་བཞི་བཅོམ་པའོ། །ཕྱག་བརྒྱད་དུ་སྣང་བ་ནི། རྣམ་པར་ཐར་པ་བརྒྱད་རྣམ་པར་དག་པའོ། །ཕྱག་གཡས་ན་རལ་གྲི་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་རྣམ་པར་དག་པའོ། །དེའི་འོག་རྡོ་རྗེ་བསྣམས་པ་ནི། ཡེ་ཤེས་ལྔའི་རང་བཞིན་རྣམ་པར་དག་པའོ། །དེའི་འོག་འཁོར་ལོ་བསྣམས་པ་ནི། མ་རིག་པའི་རང་བཞིན་འཁོར་བ་རྣམ་པར་འཇོམས་པའོ། །གཡོན་དང་པོ་རྨ་བྱའི་སྒྲོ་བསྣམས་པ་ནི་དུག་བཞི་རྣམ་པར་འཇོམས་པའོ། །དེ་འོག་ཞགས་པ་བསྣམས་པ་ནི་མ་རིག་པའི་བདུད་བཞི་བཅིངས་པའོ། །དེ་འོག་རྩེ་གསུམ་བསྣམས་པ་ནི་སྲིད་པ་གསུམ་རྣམ་པར་འཇོམས་པའོ། །ཐ་མ་གཉིས་ན་མདའ་གཞུ་འགེངས་པ་ནི། ཐབས་ཤེས་རབ་གཉིས་སུ་མེད་པར་རྣམ་པར་དག་པའོ། །རྒྱན་ཐམས་ཅད་ཀྱིས་བརྒྱན་པ་ནི་ཐེག་པ་སྣ་ཚོགས་བསྟན་པའོ། །སྐུ་ལ་ན་བཟའ་གསོལ་བ་ནི། འདོད་པའི་ཡོན་ཏན་ལྔ་སྤོང་བའོ། །ཞབས་ཕྱེད་སྐྱིལ་དུ་བཞུགས་པ་ནི། སེམས་
ཅན་འདུལ་བའི་ངོ་བོར་བསྟན་པའོ། །སྣ་ཚོགས་པདྨ་ཁ་དོག་དྲུག་དང་ལྡན་པ་ནི་ཕ་རོལ་ཏུ་ཕྱིན་པ་དྲུག་དང་ལྡན་པའོ། །ཟླ་བའི་གདན་ལ་ཉི་མའི་འོད་དང་ལྡན་པ་ནི། ཀུན་རྫོབ་དང་དོན་དམ་པར་དག་པའོ། །ཐབས་ཤེས་རབ་གཉིས་སུ་མེད་པ་ནི། ཡེ་ཤེས་ཀྱི་རང་བཞིན་ཆོས་ཀྱི་སྐུའི་ངོ་བོ་རྣམ་པར་དག་པའོ། །དབུ་ལ་རྡོ་རྗེས་མཚན་པ་ནི། ནམ་མཁའི་རང་བཞིན་སྟོང་པ་ཉིད་དུ་དག་པའོ། །ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ནས་ཞེས་བྱ་བ་ནི། ཆོས་སྐུ་ལོངས་སྐུ་སྦྲུལ་པའི་སྐུ་ལ་དེ་གསུམ་ཐ་མི་དད་པའི་རང་བཞིན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁྱབ་པ། ནམ་མཁའ་བཞིན་དུ་རྣམ་པར་དག་པ་སྦྲུལ་པའི་སྐུའི་རང་བཞིན་སེམས་ཅན་གྱི་དོན་བྱེད་པ་སངས་རྒྱས་ཤཱཀྱ་ཐུབ་པ་ནི་ཞལ་གཅིག་ཕྱག་གཉིས་པ། སྐུ་མདོག་འཛམ་བུ་གླིང་གི་གསེར་དང་འདྲ་བ། གཡས་ས་གནོན་གྱི་ཕྱག་རྒྱ་མཛད་པ། གཡོན་མཉམ་བཞག་གོ །མཚན་སུམ་ཅུ་རྩ་གཉིས་དང་ལྡན་པ། དཔེ་བྱད་བཟང་པོ་བརྒྱད་ཅུས་བརྒྱན་པ། དབུ་རེག་གཙུག་ཏོར་དང་ལྡན་པ། ཤམ་ཐབས་དང་ཆོས་གོས་སྐུ་ལ་གསོལ་བ། ཞབས་རྡོ་རྗེ་སྐྱིལ་ཀྲུང་དུ་བཞུགས་པ། སྨིན་མ་མཛོད་སྤུས་བརྒྱན་པ། པདྨའི་གདན་དང་ཟླ་བའི་གདན་དང༌། རྡོ་རྗེ་སེང་གེའི་ཁྲི་ལ་བཞུགས་པ། ཉི་མའི་འོད་དང་ལྡན་པའོ། །སངས་རྒྱས་རྣམ་པར་གཟིགས་ལ་སོགས་པ་ནི་སངས་རྒྱས་ཤཱཀྱ་ཐུབ་པ་ཇི་བཞིན་ནོ། །སེམས་ཅན་ལ་ཕན་པའི་ཕྱིར་ད་ལྟར་བཤད་པའོ་ཞེས་བྱ་བ་ནི། དེ་ལྟ་བུ་དང་ལྡན་པའི་སངས་རྒྱས་ཤཱཀྱ་ཐུབ་པས། དགེ་སློང་ས་རི་དང༌། མཐའ་ཡས་ཀྱི་སེམས་ཅན་གྱི་དོན་ལ་དུག་བཞི་རྣམ་པར་སེལ་བའི་ཕྱིར་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་སེམས་ཅན་རྣམས་ལ་ཐུགས་རྗེ་ཆེ་བ་དུག་དང་བདུད་དང་འབྱུང་པོ་རྣམས་ཀྱི་གཉེན་པོ་ནད་ཐམས་ཅད་སེལ་བ་འབྱུང་པོ་ཐམས་ཅད་འཇོམས་པ། སྐུ་གསུང་ཐུགས་ཀྱི་རང་བཞིན་རྡོ་རྗེ་ལྟ་བུའི་ཏིང་ངེ་འཛིན་གྱི་ངོ་བོ་ཉིད་རིག་སྔགས་ཀྱི་རྒྱལ་མོ་དེ། སངས་རྒྱས་ཤཱཀྱ་སེང་གེས་རིག་སྔགས་གསུངས་པའོ། །ཏྱད་ཐཱ་ཞེས་བྱ་བ་ནི་འདི་ལྟ་སྟེ། རྡོ་རྗེ་ལྟ་བུའི་ཏིང་ངེ་འཛིན་རིག་སྔགས་ཀྱི་གསང་སྔགས་བལྟ་བའོ། །རིག་སྔགས་ཀྱི་གསང་སྔགས་ནི། ཧི་ལི་
མི་ལི་ཀི་ལི་མི་ལི་ཨི་ལི་ལ་སོགས་པའོ། །ཇི་ལྟར་དེ་བཞིན་གཤེགས་པས་བསྟན་ཅིང་རྗེས་སུ་ཡི་རངས་ནས་ཞེས་བྱ་བ་ནི། གཞན་གྱིས་མི་ཐུབ་པ་རྣམ་པར་རྒྱལ་བ་སེམས་ཅན་ཐམས་ཅད་ལ་བཀྲ་ཤིས་པ། རྡོ་རྗེ་ལྟ་བུའི་ཏིང་ངེ་འཛིན་གྱི་ངོ་བོ་ཉིད་དོ། །དེ་ལྟ་བུའི་རིག་སྔགས་ནི་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་ད་ལྟར་གསུངས་པའོ། །དགེ་སློང་ཀུན་དགའ་བོས་དགེ་སློང་ས་རི་ལ་བདེ་ལེགས་སུ་འགྱུར་བར་བྱས་པ་དེ་བཞིན་དུ་བདག་ལ་སྲུང་བ་གྱིས་ཤིག་ཅེས་བྱ་བ་ནི། ཁ་རླངས་མཆེ་བའི་དུག་གིས་ཟིན་པ་སྟེ། ཀླུ་གདོལ་པའི་རིགས་ཀྱི་རང་བཞིན་དེའི་དུག་སེལ་བ་དང༌། སེམས་ཅན་རྣམས་ལ་ཕན་པར་བྱེད་པ་དང༌། དེ་བཞིན་དུ་བདག་གིས་ཀྱང་དེ་ལྟར་གྱིས་ཤིག་ཅེས་གསུངས་པའོ། །དེ་ལྟ་བུའི་རིག་སྔགས་སེམས་ཅན་རྣམས་ལ་ཕན་པར་བྱེད་པ་དུག་གི་ནད་ཐམས་ཅད་བཅོམ་པའོ། །སྦ་བ་དང་ཞེས་བྱ་བ་ནི། དུག་གི་འཇིགས་པ་ལས་སྦ་བའོ། །ཡོངས་སུ་བསྐྱབ་པ་དང་ཞེས་བྱ་བ་ནི། དུག་གསུམ་གྱི་འཇིགས་པ་ལས་བསྐྱབ་པའོ། །ཡོངས་སུ་གཟུང་བ་དང་ཞེས་བྱ་བ་ནི་མི་དགེ་བ་བཅུ་བོར་ནས། དགེ་བ་ལ་གཟུད་པ་སྟེ། ནང་གི་གསུམ་དང༌། ཕྱིའི་དུག་གསུམ་སྤངས་པའོ། །ཡོངས་སུ་བསྐྱང་བ་དང་ཞེས་བྱ་བ་ནི། འཇིགས་པ་ཐམས་ཅད་བཅོམ་ནས། དགེ་བ་ལ་བསྐྱང་བའོ། །ཞི་བ་དང་ཞེས་བྱ་བ་ནི། དུག་ལ་སོགས་པའི་ནད་ཐམས་ཅད་ཞི་བའོ། །བདེ་ལེགས་སུ་འགྱུར་ཞེས་བྱ་བ་ནི། ལུས་ངག་ཡིད་བདེ་བར་བྱེད་པའོ། །ཆད་པ་སྤང་བ་དང་ཞེས་བྱ་བ་ནི། ཀླུ་གདོལ་པའི་རིགས་ཀྱི་ཆད་པ་ཡང་སྤང་བའོ། །མཚོན་ཆ་སྤང་བ་དང་ཞེས་བྱ་བ་ནི། མཚོན་གྱི་རིགས་སུ་གཏོགས་པ་རྣམས་ཡང་དག་པར་སྤང་བའོ། །དུག་གཞིལ་བ་དང་ཞེས་བྱ་བ་ནི། དུག་གི་རིགས་ཀྱང་དཔག་ཚད་བརྒྱད་ཅུའི་བར་ནས་ཞི་བའོ། །དུག་གསད་པ་དང་ཞེས་བྱ་བ་ནི། བསྡད་པ་དང་འགྲོ་བ་དང་བྱེད་པའི་དུག་གསུམ་ཡང་དག་པར་འཇོམས་པའོ། །མཚམས་གཅད་པ་དང་ཞེས་བྱ་བ་ནི། རིག་སྔགས་ཀྱི་བཀའ་ལས་མི་འདའ་བའོ། །ས་བཅིང་བ་གྱིས་ཤིག་ཅེས་བྱ་བ་ནི། རྡོ་རྗེའི་སའི་རང་བཞིན་ནོ། །ལོ་བརྒྱ་འཚོ་བར་གྱུར་ཅིག་ཅེས་བྱ་བ་ནི། དེའི་
ནུས་པས་ནད་མེད་ཚེ་རིང་བའོ། །སྟོན་བརྒྱ་མཐོང་བར་ཤོག་ཅིག་ཅེས་བྱ་བ་ནི། དགེ་བའི་རྩ་བ་ལ་བརྩོན་ཞིང་ཕུན་སུམ་ཡང་དག་པར་རྫོགས་པའོ། །ཀུན་དགའ་བོས་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་ཡང་ནས་ཡང་དུ་གསུངས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ནི་ཞེས་བྱ་བ་ནི། ཞལ་གསུམ་ཕྱག་དྲུག་པ། སྐུ་མདོག་ལྗང་གུ་།གཡས་དཀར། གཡོན་དམར་བ། སྤྱན་གསུམ་པར་ལ་པའི་ཐོར་ཚུགས་ཅན། དབུལ་རྒྱན་དང་བཅས་པ། ཤམ་ཐབས་སྐུ་འགག་དང་བཅས་པ། གཡས་པ་ན་པོ་ཏི་དང༌། ཕྲེང་བ་དང༌། བུམ་པ་བསྣམས་པ། གཡོན་པ་རྣམས་ན་རྨ་བྱའི་སྒྲོ་དང༌། བུམ་པ་སྤྱི་བླུགས་དང༌། སྐྱབས་སྦྱིན་ནོ། །རྒྱན་ཐམས་ཅད་ཀྱིས་བརྒྱན་པ། ཡེ་ཤེས་ལྔ་དང་ལྡན་པ། བཞེངས་ནས་བཞུགས་པ། ཐབས་ཤེས་རབ་གཉིས་སུ་མེད་པ། ཟླ་བའི་གདན་ལ་ཉི་མའི་འོད་དང་ལྡན་པ། དབུ་ལ་མཆོད་རྟེན་གྱིས་མཚན་པའོ། །བྱང་ཆུབ་སེམས་དཔའ་བྱམས་པས་བརྗོད་ཅིང་རྗེས་སུ་ཡི་རང་བའོ་ཞེས་བྱ་བ་ནི། བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ཀྱི་རང་བཞིན་སེམས་ཅན་ཐམས་ཅད་དེ་ལྟ་བུས་ཁྱབ་པའི་རང་བཞིན་ཏེ། དེ་ལྟ་བུའི་རང་བཞིན་རིག་སྔགས་ཀྱི་རྒྱལ་མོ་རྨ་བྱ་ཆེན་མོ། །བྱང་ཆུབ་སེམས་དཔའ་བྱམས་པས་གསུངས་པའོ། །བྱང་ཆུབ་སེམས་དཔའ་བྱམས་པ་ནི་ཞལ་གཅིག་ཕྱག་གཉིས་པ་སྐུ་མདོག་སེར་པོ་རལ་པའི་ཐོར་ཚུགས་ཅན་དབུ་ལ་མཆོད་རྟེན་གྱིས་མཚན་པའོ། །གཡས་མཆོག་སྦྱིན་གཡོན་བུམ་པ་སྤྱི་བླུགས་བསྣམས་པའོ། །ཕྲག་པ་ན་ཀྲྀཥྞ་ས་ལེའི་པགས་པ་ཡོད་པ། ཤམ་ཐབས་དང་སྐུ་ཨངྒ་རག་གིས་སྐུ་ལ་བརྒྱན་པ། མེ་ཏོག་ནཱ་ག་པུཥྤས་ཕྲག་པ་གཉིས་ལ་མཛེས་པར་བརྒྱན་པ། དེ་ལྟ་བུའི་མཛེས་རྒྱུད་ལྡན་པའི་བྱམས་པས་ཀྱང་གསུངས་པའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། བྱང་ཆུབ་སེམས་དཔའ་བྱམས་པས་གསུངས་པ་རྗེས་སུ་ཡི་རང་བ་རིག་སྔགས་ཀྱི་གསང་སྔགས་བལྟ་བའོ། །རིག་སྔགས་ཀྱི་གསང་སྔགས་ནི། ཤི་རི་ཤི་རི་ལ་སོགས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་
མོ་ལས་འདས་པ་དང་མ་འོངས་པ་དང་ད་ལྟར་ཡོད་བ་རྣམས་ཀྱིས་གསུངས་ཤིང་རྗེས་སུ་ཡི་རང་བའི་གནས་སྐབས་ཏེ་བཅུ་བཞི་པའོ།། །།ཀུན་དགའ་བོ་ཞེས་བྱ་བ་ནི། སེམས་ཅན་གྱི་དོན་དུ་ཡང་ནས་ཡང་དུ་གསུངས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ནི་ཞེས་བྱ་བ་ནི། ཞལ་གཅིག་ཕྱག་བཞི་པ་སྐུ་མདོག་དཀར་མོ་སྤྱན་གསུམ་པ་རལ་པའི་ཐོར་ཚུགས་ཅན་རྒྱན་ཐམས་ཅད་ཀྱིས་བརྒྱན་པའོ། །གཡས་གཉིས་ན་ཕྲེང་བ་དང་དུང་བསྣམས་པ། གཡོན་གཉིས་ན་རྨ་བྱའི་སྒྲོ་དང༌། སྦྲུལ་བསྣམས་པའོ། །བཞེངས་ནས་བཞུགས་པ། ཟླ་བའི་གདན་ལ་ཉི་མའི་འོད་དང་ལྡན་པ། ཐབས་ཤེས་རབ་གཉིས་སུ་མེད་པའོ། །མི་མཇེད་ཀྱི་བདག་པོ་ཚངས་པས་སྨྲས་ཤིང་རྗེས་སུ་ཡི་རང་བའོ་ཞེས་བྱ་བ་ནི། ཐབས་ཤེས་རབ་གཉིས་སུ་མེད་པ་ནམ་མཁའི་རང་བཞིན་རིག་པ་མཐར་ཐུག་པ་དེའི་རང་བཞིན་མི་མཇེད་ཀྱི་བདག་པོ་ཚངས་པས་གསུངས་པའོ། །མི་མཇེད་ཀྱི་བདག་པོ་ཚངས་པ་ནི་ཞལ་བཞི་ཕྱག་བརྒྱད་པ་སྐུ་མདོག་དཀར་པོ། སྤྱན་གསུམ་པ། རལ་པའི་ཐོར་ཚུགས་ཅན། ཚངས་པར་སྤྱོད་པའི་རང་བཞིན་ཅན། ཕྱག་གཡས་པ་རྣམས་ན་ཕྱག་འཚལ་བ་དང༌། ཕྲེང་བ་དང༌། བུམ་པ་དང༌། མཆོག་སྦྱིན་དུ་མཛད་པའོ། །གཡོན་རྣམས་ནི་པོ་ཏི་དང༌། དབྱུ་གུ་གསུམ་པ་དང༌། བུམ་པ་སྤྱི་བླུགས་དང༌། མཉམ་གཞག་གོ །ཞབས་པདྨའི་སྐྱིལ་ཀྲུང་དུ་བཞུགས་པ། པདྨའི་གདན་ལ་བཞུགས་པའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། མི་མཇེད་ཀྱི་བདག་པོ་ཚངས་པས་སྨྲས་ཤིང་རྗེས་སུ་ཡི་རང་བའི་རིག་སྔགས་ཀྱི་གསང་སྔགས་བལྟ་བའོ། །རིག་སྔགས་ཀྱི་གསང་སྔགས་ནི་ཧི་ལི་ཧི་ལི་མི་ལི་ལ་སོགས་པའོ། །དུག་བཅོམ་མོ་དུག་ངེས་པར་བཅོམ་མོ་ཞེས་བྱ་བ་ནི། རིག་སྔགས་ཀྱི་གསང་སྔགས་ཀྱི་གཟི་བརྗིད་ཀྱིས་ནང་གི་དུག་གསུམ་དང༌། ཕྱིའི་དུག་གསུམ་བཅོམ་མོ། །ནང་གི་དུག་གསུམ་ནི་གཏི་མུག་ཞེ་སྡང་འདོད་ཆགས་སོ། །ཕྱིའི་དུག་གསུམ་ནི་བསྡད་པ་དང་འགྲོ་བ་དང༌། བྱས་པའི་དུག་གོ །གཏི་མུག་ནི་གློ་བུར་གྱི་རྐྱེན་གྱིས་ཤེས་པ་བཀག་ནས་ཡེ་ཤེས་མི་འཆར་བ་སྟེ། དེས་གཏི་མུག་ཡིན་ནོ། །དེ་ཉེ་བར་གཞག་པས་
གཏི་མུག་གི་རྐྱེན་གྱིས་ཞེ་སྡང་དྲག་པོ་འབྱུང་ངོ༌། །ཞེ་སྡང་གི་རྐྱེན་གྱིས་ཁམས་གསུམ་འདོད་པའི་རང་བཞིན་གྱིས་འདོད་ཆགས་དྲག་པོ་བྱུང་སྟེ། འདོད་ཆགས་དེས་ཡང་ནས་ཡང་དུ་དམྱལ་བ་དང་བྱོལ་སོང་དང་ཡི་དགས་སུ་སྐྱེ་བའོ། །དེ་ནི་ནང་གི་དུག་གསུམ་མོ། །ཕྱིའི་དུག་གསུམ་ནི་བསྡད་པའི་དུག་ཡིན་ཏེ། བཙན་དུག་ལ་སོགས་པའི་དུག་གིས་གསོད་པ་དང༌། བརྒྱལ་བ་དང༌། སྨྱོ་བ་དང༌། འགས་པ་དང༌། ཆུ་བུར་དང༌། ལོང་བ་དང༌། ལྕེ་ལྐུགས་པ་དང༌། འོན་པ་དང༌། རེངས་པ་ལ་སོགས་པའོ། །འགྲོ་བའི་དུག་ནི། བསམས་པ་དང༌། རེག་པ་དང༌། ཁ་རླངས་སོ། །དེས་ནི་རླུང་དང༌། བད་ཀན་དང༌། མཁྲིས་པ་དང༌། ཆུ་སེར་བཞི་གཏོང་བར་ནུས་སོ། །དངོས་པོ་ཡོད་པའི་དུག་ནི་རེག་པ་དང༌། ཁ་རླངས་དང༌། མཆེ་བའི་དུག་གོ །དེས་ཀྱང་ཤི་བ་དང༌། རྒས་པ་དང༌། རེངས་པ་དང༌། ཆུ་བུར་དང༌། ལྕེ་ལྐུགས་པ་དང༌། མིག་མི་མཐོང་བ་དང༌། འོན་པ་དང༌། ལུས་རེངས་པ་དང༌། དེ་ལ་སོགས་པ་གཏོང་ནུས་པའོ། །དངོས་པོ་མེད་པའི་དུག་ནི་བསམ་པ་དང་མཐོང་བའི་དུག་ཡིན་ཏེ། བསམ་པས་གནོད་པ་ནི་སྟོང་ཕྲག་བརྒྱད་ཁྲི་ཙམ་གྱི་བར་ནས་ཀྱང་གནོད་པ་སྐྱེལ་ནུས་པའོ། །མཐོང་བའི་དུག་ནི་དཔག་ཚད་ལྔ་ནས་ཀྱང་མཐོང་ངོ༌། །དེ་གཉིས་ཀྱང་རླུང་བད་ཀན་མཁྲིས་པ་ཆུ་སེར་གྱི་རང་བཞིན་དུ་ཡོད་པ་དེ་ཡངས་བདག་གི་ནད་མཛེ་རིགས་མི་གཅིག་པ་བཅོ་བརྒྱད་གཏོང་ནུས་པའོ། །དེ་རྣམས་ཀྱང་ཤུ་བ་དང༌། གཡའ་བ་དང༌། མཛེ་དང༌། ཕོལ་མིག་དང༌། གཡན་པ་དང༌། མེ་དབལ་དང༌། ལྷོག་པ་དང༌། དམུ་ཆུ་དང༌། ཆུ་བུར་དང༌། འབྲུམ་བུ་དང༌། ཤ་བཀྲ་དང༌། མཛེར་པ་དང༌། སྐྲངས་པ་དང༌། གློ་དང༌། གཅོང་དང༌། ཝ་བ་དང༌། མིག་ཚགས་དང༌། ལིང་ཐོག་དང༌། གག་པ་དང་ངོ༌། །དེ་ཡང་དེ་རྣམས་ཀྱིས་གཏོང་ངོ༌། །གཞན་གྱི་ནད་ཀྱང་ཀླད་པ་ན་བ་ལ་སོགས་པ་ནད་རིགས་མི་གཅིག་པ་ཉི་ཤུ་རྩ་བཞི་གཏོང་ནུས་པའོ། །རིམས་ལ་ཡང་དེ་བཞིན་ནོ། །དུག་དེས་ཀྱང་ཤི་བ་དང༌། གས་པ་དང༌། རེངས་པ་དང༌། ལོང་བ་དང༌། ལྕེ་ལྐུགས་པ་དང༌། འོན་པ་དང༌། རྐང་ལག་ཞ་བ་དང༌། དེ་རྣམས་ལ་སོགས་པ་ལུས་
ཀྱི་ན་ཚ་དྲག་པོ་འབྱུང་བའོ། །བསམ་པའི་དུག་ཅན་དང༌། མཐོང་བའི་དུག་ཅན་གྱིས་ནི་ལོ་བདུན་བར་དུ་ཕྱིར་འཕང་ངོ༌། །དེ་ནི་དངོས་སུ་མེད་པའི་དུག་གོ །དེ་ལ་བྱེད་པའི་དུག་ནི། ཕྱི་དུག་ནག་པོ་དང༌། རིན་པོ་ཆེ་དབྱིག་དུག་དང༌། བདུད་རྩི་ལས་བྱུང་བའི་དུག་ལ་སོགས་པའོ། །སྦྱོར་བའི་དུག་དེ་ནི་བསམ་གྱིས་མི་ཁྱབ་པའོ། །ཕྱི་དུག་ནག་པོ་ནི། དངུལ་ཆུ་དང་སྤུ་དུག་ལས་བྱུང་བའོ། །རིན་པོ་ཆེ་དབྱིག་དུག་ནི་གསེར་དངུལ་ཟངས་ལས་བྱུང་བའོ། །བདུད་རྩི་དུག་ནི་སྦྲང་རྩི་དང༌། མར་དང༌། འཁར་བ་ལས་བྱུང་བའོ། །དེས་ཀྱང་མཛེ་དང་ཕོལ་མིག་ལ་སོགས་པ་གཏོང་ནུས་པ། ཚ་བ་དང༌། གྲང་བ་དང༌། ཚིགས་གཞི་ན་བ་དང༌། ཕྱིན་བ་དང༌། ནང་ན་ན་བ་དང༌། ཤི་བ་དང༌། སྨྱོ་བ་དང༌། རེངས་པ་དང༌། ལོང་བ་དང༌། འོན་པ་དང༌། ལྕེ་ལྐུགས་པ་དང༌། མཁྲིས་པའི་རང་བཞིན་དུ་འདར་བ་དང༌། ཕོ་བ་ལ་སོགས་པ་ན་ནུས་པའོ། །རིག་སྔགས་དེས་ནི་དེ་ལྟ་བུའི་དུག་བཅོམ་མོ། །སངས་རྒྱས་ཀྱི་གཟི་བརྗིད་ཀྱིས་དུག་བཅོམ་མོ་ཞེས་བྱ་བ་ནི། རྒྱུ་མེད་པའི་རང་བཞིན་ངོ་བོ་ཉིད་དང་བྲལ་བ་ནམ་མཁའ་ལྟ་བུའོ། །དེ་ལྟ་བུའི་ངོ་བོ་ཉིད་ཀྱིས་མེ་ལོང་གི་གཟུགས་བརྙན་དང༌། སྨིག་རྒྱུ་དང་ཆུའི་ཟླ་བ་བཞིན་དུ་གནས་སོ། །དེའི་ངང་ལས་འཇིག་རྟེན་ཁམས་སུ་ཁྱབ་པ་ལས་དང་བག་ཆགས་ཞེས་བྱ་བ་བཅོམ་ནས། སེམས་ཅན་རྣམས་ལ་ནམ་མཁའ་བཞིན་དུ་ཁྱབ་པ་སྟེ། ལུས་ངག་ཡིད་གསུམ་སངས་རྒྱས་ནས་བདུད་བཞི་བཅོམ་པའོ། །དེ་ལྟ་བུའི་གཟི་བརྗིད་ཀྱིས་དུག་བཅོམ་མོ།། རང་སངས་རྒྱས་ཀྱི་གཟི་བརྗིད་ཀྱིས་དུག་བཅོམ་མོ་ཞེས་བྱ་བ་ནི། རང་སངས་རྒྱས་ཀྱི་གཟི་བརྗིད་ནི་ལྷག་མཐོང་གཉིས་ཡིན། ལྷག་མ་ནི་སྟོང་པ་ཉིད་དུ་བསྒོམ་པ་མཐོང་བ་ནི་ལུས་ཀྱི་བྱ་བ་བསྟན་ནས་སེམས་ཅན་རྣམས་ལ་བསྟན་པའོ། །དེ་གཉིས་ཀྱི་བདེན་པའི་གཟི་བརྗིད་ཀྱིས་རང་སངས་རྒྱས་ཀྱིས་དུག་བཅོམ་མོ། །དགྲ་བཅོམ་པའི་གཟི་བརྗིད་ཀྱིས་དུག་བཅོམ་མོ་ཞེས་བྱ་བ་ནི། དགྲ་ནི་བདུད་བཞི་སྟེ། བདུད་བཞི་ནི་མ་རིག་པའོ། །མ་རིག་པ་ནི་འཁོར་བའོ། །དེ་ལྟ་བུའི་འཁོར་བའི་དགྲ་བཅོམ་སྟེ། དེའི་གཟི་བརྗིད་ཀྱིས་དུག་བཅོམ་མོ། །ཕྱིར་མི་འོང་བའི་གཟི་
བརྗིད་ཀྱིས་དུག་བཅོམ་མོ་ཞེས་བྱ་བ་ནི་རང་གི་དོན་ལ་གཞན་གྱི་དོན་མི་བྱེད་པ་ནི་ཕྱིར་མི་ལྡོག་པ་རྣམས་སོ། །དེ་རྣམས་ནི་འགོག་པའི་རང་བཞིན། དེའི་གཟི་བརྗིད་ཀྱིས་དུག་བཅོམ་པའོ། །ལན་ཅིག་ཕྱིར་འོང་བའི་གཟི་བརྗིད་ཀྱིས་དུག་བཅོམ་མོ་ཞེས་བྱ་བ་ནི། ཅུང་ཟད་ཙམ་སེམས་ཅན་གྱི་དོན་བྱེད་པ་སྟེ། བག་ཆགས་ཀྱི་སྒྲིབ་པ་བཅོམ་ནས་ཤེས་བྱ་ཙམ་གནས་པའོ། །དེ་ལྟ་བུའི་གཟི་བརྗིད་ཀྱིས་ཀྱང་དུག་བཅོམ་མོ། །རྒྱུན་དུ་ཞུགས་པའི་གཟི་བརྗིད་ཀྱིས་དུག་བཅོམ་མོ་ཞེས་བྱ་བ་ནི། བྱང་ཆུབ་སེམས་དཔའི་རང་བཞིན་སེམས་ཅན་རྣམས་ཀྱི་དོན་བྱེད་པ་མི་དམིགས་པའི་སྙིང་རྗེ་སྐྱེ་བའོ། །དེ་ལྟ་བུའི་གཟི་བརྗིད་ཀྱིས་དུག་བཅོམ་པའོ། །བདེན་པར་སྨྲ་བའི་གཟི་བརྗིད་ཀྱིས་དུག་བཅོམ་མོ་ཞེས་བྱ་བ་ནི། འདས་པའི་སངས་རྒྱས་རྣམས་དང་མ་འོངས་པ་རྣམས་དང༌། ད་ལྟར་བྱུང་བ་རྣམས་ཀྱིས་ཀྱང་བཀའ་བདེན་པར་སྨྲ་བ་གཞན་ཡང་འཇིག་རྟེན་པ་དྲང་སྲོང་རྣམས་ཀྱི་བཀའ་བདེན་པའོ། །དེའི་གཟི་བརྗིད་ཀྱིས་ཀྱང་དུག་བཅོམ་པའོ། །ཚངས་པའི་བེ་ཅོན་གྱི་གཟི་བརྗིད་ཀྱིས་དུག་བཅོམ་མོ་ཞེས་བྱ་བ་ནི། ཚངས་པའི་བེ་ཅོན་ནི་དབྱུ་གུ་གསུམ་ཡིན་ཏེ་དབྱུ་གུ་གཅིག་ནི་སྐུ་བརྟག་པ། གཉིས་པ་གསུང་བརྟག་པ། གསུམ་པ་ནི་ཡིད་བརྟག་པའོ། །དེ་གསུམ་ནི་ཁམས་གསུམ་གྱི་རང་བཞིན་དེ་ལྟ་བུའི་བདེན་པའི་གཟི་བརྗིད་ཀྱིས་དུག་བཅོམ་པའོ། །དབང་པོའི་རྡོ་རྗེའི་གཟི་བརྗིད་ཀྱིས་དུག་བཅོམ་མོ་ཞེས་བྱ་བ་ནི་དབང་པོའི་རྡོ་རྗེ་ནི་གང་ལ་འཕངས་པའི་སར་དགྲ་རྣམས་འདུལ་ཞིང་སླར་རང་གི་ལག་ཏུ་འོང་བའོ། །དེ་ལྟ་བུའི་གཟི་བརྗིད་ཀྱིས་ཀྱང་དུག་བཅོམ་པའོ། །ཁྱབ་འཇུག་གི་འཁོར་ལོས་དུག་བཅོམ་མོ་ཞེས་བྱ་བ་ནི། ས་འོག་ས་སྟེང་ས་བླ་གསུམ་ལ་འཕངས་པ་ཙམ་གྱིས་འཁོར་ལོ་དེས་དབང་མཛད་དེ། འཇིག་རྟེན་གསུམ་གྱི་དབང་ཕྱུག་ཏུ་གྲགས་པའོ། །དེ་ལྟ་བུའི་གཟི་བརྗིད་ཀྱིས་དུག་བཅོམ་པའོ། །མེ་དབལ་གྱི་དུག་བཅོམ་མོ་ཞེས་བྱ་བ་ནི། མེ་ནི་ཚ་བ་དང་སྲེག་པར་ནུས་པ། དེས་ཀྱང་འཇིག་རྟེན་གྱི་ཁམས་སྲེག་པར་ནུས་པ་དེ་ལྟ་བུའི་གཟི་བརྗིད་ཀྱིས་ཀྱང་དུག་བཅོམ་པའོ། །ཆུ་ལྷའི་ཞགས་པས་དུག་བཅོམ་
མོ་ཞེས་བྱ་བ་ནི་ཆུ་ལྷའི་ཞགས་པ་ནི་སྦྲུལ་ཞགས་ཡིན་ཏེ་དེ་ནི་ཀླུ་རིགས་བཞིའི་རང་བཞིན་དུག་བཞིའི་གནས་པ་བཅིང་བར་ནུས་པ་དུག་གིས་དུག་བཅོམ་པའོ། །ལྷ་མ་ཡིན་གྱི་སྒྱུས་དུག་བཅོམ་མོ་ཞེས་བྱ་བ་ནི་ལྷ་མ་ཡིན་རེ་རེས་བྱེ་བ་དུང་ཕྱུར་ཙམ་དུ་སྤྲུལ་ནུས་སོ། །ཇི་ལྟར་སྤྲུལ་ཞེ་ན། གླང་པོ་ཆེ་དང་རྟ་དང་དེ་ལ་སོགས་པ་གཟུགས་སྣ་ཚོགས་སྟོན་ནུས་པ། །འཇིག་རྟེན་ཁམས་ལ་སྒྱུ་མ་བྱས་པའོ། །ཀླུའི་རིག་པས་དུག་བཅོམ་མོ་ཞེས་བྱ་བ་ནི། ཕན་བྱ་དང་གནོད་བྱེད་དོ་ཤེས་པ་ཚེ་ཕྱི་མ་ལ་སྐྱེ་བ་བདུན་དུ་རིག་པ་དྲན་པའོ། །དྲག་པོའི་མདུང་རྩེས་དུག་བཅོམ་མོ་ཞེས་བྱ་བ་ནི་དེ་ཡང་རྩེ་གསུམ་དུ་གནས་པས་ཏེ་དེ་ཁམས་ཀྱི་རང་བཞིན་སྲིད་པའི་ཀླུའི་རིག་པས་དུག་བཅོམ་མོ། །སྐེམ་བྱེད་ཀྱི་མདུང་ཐུང་གིས་དུག་བཅོམ་མོ་ཞེས་བྱ་བ་ནི་དེ་ནི་མདུང་རྩེ་གསུམ་ཡིན་ཏེ། དེ་འཕངས་པ་ཙམ་གྱིས་འཇིག་རྟེན་ཁམས་ཙམ་འཇིག་པར་བྱེད་པའོ། །ངེས་ཀྱང་དུག་ངེས་པར་བཅོམ་མོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོས་དུག་བཅོམ་མོ་ཞེས་བྱ་བ་ནི་ཕྱིའི་རིག་སྔགས་དང༌། ནང་གི་རིག་སྔགས་སོ། །ཕྱིའི་རིག་སྔགས་ནི་ཀུན་རྫོབ་ཀྱི་རང་བཞིན་ཐབས་ལྟ་བུའོ། །ནང་གི་རིག་པ་ནི་ཡེ་ཤེས་ཀྱི་རང་བཞིན་ནམ་མཁའ་ལྟ་བུའོ། །སྔགས་ནི་སེམས་ཅན་རྣམས་ལ་ཕན་པར་བྱེད་ཅིང་སྲུང་བ་དང་སྐྱོབ་པར་བྱེད་པའོ། །དེ་ལྟ་བུ་ཡང་སྒྱུ་མ་ལྟ་བུ་སྟེ། འཇིག་རྟེན་ཁམས་མི་རྟག་པར་གནས་པའོ། །དེ་ནི་དུག་ཐམས་ཅད་ཀྱི་གཉེན་པོ་འབྱུང་པོ་ཐམས་ཅད་ཀྱི་གཙོ་མོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཡུམ་དུ་གནས་པའོ། །དེ་ལྟ་བུའི་གཟི་བརྗིད་ཀྱིས་ཀྱང་དུག་བཅོམ་པའོ། །དུག་ངེས་པར་བཅོམ་མོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་རྣམས་ཀྱི་བདེན་པ་དང༌། རིག་སྔགས་ཀྱི་གསང་སྔགས་ཀྱི་གཟི་བརྗིད་ཀྱིས་དུག་ཀྱང་ངེས་པར་བཅོམ་མོ། །དུག་སའི་ནང་དུ་སོང་ཤིག་ཅེས་བྱ་བ་ནི་ས་ནི་ཡུམ་ལྟ་བུ་སྟེ། དུག་གི་འབྱུང་བ་ནི་ས་ཡིན་ཏེ་ས་དེས་ཀྱང་དུག་སེལ་བ་དུག་གི་ནུས་པ་མེད་པར་བྱེད་པའོ། །བདག་དུག་ཐམས་ཅད་དང་ཞེས་བྱ་བ་ནི་བདག་དང་སེམས་ཅན་ཐམས་ཅད་ལ་གཟི་བརྗིད་དེ་རྣམས་
ཀྱིས་དུག་བཅོམ་མོ། །དུག་ངེས་པར་བཅོམ་མོ། །བེའུ་ལྟ་བུའི་ལྟེ་བའི་དུག་དང་ཞེས་བྱ་བ་ནི་དེ་ལ་གཉིས་ཡོད་དེ་ནག་པོ་མི་སྲུན་པའི་སྡིག་པ་དང༌། རྒྱལ་པོ་ལྟ་བུའི་སྡིག་པའོ། །ནག་པོ་མི་སྲུན་པའི་སྡིག་པ་ནི་མཇུག་མ་དང་ལྟེ་བ་ལ་ཡོད་པའོ། །རྒྱལ་པོ་ལྟ་བུའི་སྡིག་པའི་དུག་ནི་རེག་པའི་དུག་བཞིན་དུ་ལུས་ཐམས་ཅད་དུག་ཏུ་ན་བའོ། །དེ་གཉིས་ཀྱང་ལོ་གཅིག་ལོན་ནས་མདུད་པ་རེ་རེར་སྐྱེ་བའོ། །དེ་གཉིས་ཀྱི་མདོག་ཀྱང་དམར་པོ་དང༌། ནག་པོར་སྣང་བའོ། །ཧ་ལ་ཧ་ལའི་དུག་དང་ཞེས་བྱ་བ་ནི། དེ་ནི་འཇིག་རྟེན་གྱི་ལྷ་རྣམས་ཀྱི་དུག་ཡིན་ཏེ། དེ་ཡང་མཐོང་བའམ་རེག་པ་ཙམ་གྱིས་འཇིག་རྟེན་གྱི་ཁམས་སྲེག་ནུས་པའོ། །ནག་པོ་བརྩེགས་པའི་དུག་དང་ཞེས་བྱ་བ་ནི། དེ་ལ་གཉིས་སུ་ཡོད་དེ། ནང་གི་དུག་གསུམ་བརྩེགས་པ་དང༌། ཕྱིའི་དུག་གསུམ་བརྩེགས་པའོ། །ནང་གི་དུག་བརྩེགས་པ་ནི་གཏི་མུག་དང་འདོད་ཆགས་དང་ཞེ་སྡང་ངོ༌། །དེའི་ངང་ལས་སེར་སྣ་དང༌། ཕྲག་དོག་ཀྱང་བརྩེགས་པའོ། །ཕྱིའི་དུག་ནི་བསྡད་པ་དང༌། འགྲོ་བ་དང༌། བྱེད་པའི་དུག་བརྩེགས་པའོ། །ཡང་ན་ནག་པོ་བརྩེགས་པའི་དུག་ནི་འཇིག་རྟེན་པའི་ལྷ་རྣམས་ཀྱིས་མི་ཐུབ་པ་ལྷ་དང་ལྷ་མ་ཡིན་ལ་སོགས་པ་ལས་བྱུང་བ། ཀླུའི་རྒྱལ་པོ་སྤྱན་མི་བཟང་གི་མིག་ལས་བཏང་བ་མིག་ལོང་བར་གྱུར་ཏེ། དེས་ན་སྤྱན་མི་བཟང་དུ་བཏགས་པའོ། །དབང་ཕྱུག་ཆེན་པོའི་ལྷས་རྣ་རྒྱན་དུ་བཏགས་པའོ། །དེ་བས་ན་ཏྲི་ཀན་ཐ་བཏགས་པའོ། །མཆེ་བའི་དུག་དང་ཞེས་བྱ་བ་ནི། ཀླུའི་ཁ་རླངས་ཀྱི་དུག་སྦྲུལ་ལ་སོགས་པའི་སེམས་ཅན་ལས་བྱུང་བ་སྟེ། དེ་ཡང་རིགས་བཞི་ལ་གཏོགས་པའོ། །རྩ་བའི་དུག་དང་ཞེས་བྱ་བ་ནི་བཙན་དུག་ལ་སོགས་པ་ལས་བྱུང་བ་སྟེ། དེ་ནི་བསྡད་པའི་དུག་གོ །དེ་ཡང་རྩ་བ་ལ་སོགས་པའི་དུག་གོ །ནག་པོ་དང༌། དཀར་པོ་དང་དམར་པོ་ལ་སོགས་པ་བསམ་གྱིས་མི་ཁྱབ་པའོ། །ཕྱི་མའི་དུག་དང་ཞེས་བྱ་བ་ནི་དེ་སྦྱོར་བའི་དུག་ལས་བྱུང་བ་སྟེ། དེ་ཡང་བསམ་གྱིས་མི་ཁྱབ་པའོ། །ལྟ་བའི་དུག་དང་ཞེས་བྱ་བ་ནི་དེ་ནི་དབང་ཕྱུག་ཆེན་པོའམ་ཀླུ་རྣམས་སམ། འབྱུང་པོ་འམ་གཞན་དྲང་སྲོང་ལ་སོགས་པ་སེམས་ཅན་ཕལ་ལ་
ཡོད་པའོ། །གློག་གི་དུག་དང་ཞེས་བྱ་བ་ནི། དེས་ཀྱང་སེམས་ཅན་རྣམས་ལ་འཇིགས་པ་དང་སྐྲག་པར་བྱེད་པ་སྟེ། དེས་ཤི་བ་དང༌། བརྒྱལ་བ་དང༌། སྙིང་ཕྱུང་བ་དང༌། ན་བར་ནུས་པའོ། །སྤྲིན་གྱི་དུག་དང་ཞེས་བྱ་བ་ནི། ལྕེ་འབབ་པ་དང༌། སེར་བ་འབབ་པ་དང༌། ཐོག་འབབ་པ་དང༌། འབྲུག་གིས་འཇིགས་པ་དང༌། དེ་རྣམས་ཀྱིས་སེམས་ཅན་ལ་གནོད་པར་བྱེད་པའོ། །སྦྲུལ་དང་ཞེས་བྱ་བ་ནི་སྦྲུལ་གྱི་རིགས་ཀྱང་རིགས་བཞི་ལས་བྱུང་སྟེ། སྦྲུལ་ནག་པོ་ནི་གདོལ་བའི་རིགས། སྔོན་པོ་དམངས་རིགས་དང༌། དམར་པོ་རྗེའུ་རིགས་ཏེ། དམར་སྐྱེ་རྗེའུ་རིགས་སོ། །སེར་པོ་རྒྱལ་པོའི་རིགས་ཏེ། སེར་སྐྱ་རྒྱལ་རིགས་སོ། །དཀར་པོ་བྲམ་ཟེའི་རིགས་ཏེ། དཀར་སེར་ནི་བྲམ་ཟེའི་རིགས་སོ། །དེ་ཡང་དུག་བཞི་ཚང་བའོ། །བྱི་བ་དང་ཞེས་བྱ་བ་ནི། མཆེ་བའི་དུག་ཡིན་ཏེ། དེ་ཡང་དུག་བཞིར་འཛིན་པ། དུག་བཞིར་གནས་པའོ། །སྲིན་པུ་ཀི་ཏ་དང་ཞེས་བྱ་བ་ནི། སེམས་ཅན་མཆུ་རིང་བ་ཕྲ་མོའི་རིགས་དེ་ཡང་མཆེ་བའི་དུག་ཅན་ནོ། །ལུ་ཏ་དང་ཞེས་བྱ་བ་ནི་སྦྲང་པོ་ཆེ་དེ་ནི་མཇུག་མ་དང་ལྟེ་བའི་དུག་ཅན་རེག་པའི་དུག་ལ་གཏོགས་པའོ། །ཀ་ན་བྷ་བ་དང་ཞེས་བྱ་བ་ནི། དེ་ཡང་ཆུ་ལ་གནས་པ་ཀུམྦྷི་ར་དང༌། ཆུ་སྲིན་ལ་སོགས་པའི་ཁ་རླངས་དང་མཆེ་བའི་དུག་གོ །སྦལ་པ་དང་ཞེས་བྱ་བ་ནི། མཇུག་རིངས་དང༌། སྦལ་པ་སྦྲུལ་མགོ་ཅན་དང༌། སེར་པོ་དང༌། དམར་པོ་དང༌། དཀར་པོ་དང༌། ནག་པོའི་རིགས་ཀྱང་ཡོད་དེ། དེ་ཡང་དུས་བཞི་དུག་བཞི་ལ་གནས་པའོ།། སྦྲང་བུ་དང་ཞེས་བྱ་བ་ནི་ཆུའི་སྦྲང་བུ་དང་སྦྲང་བུ་སེར་པོ་དང་དེ་ཡང་དུས་ཀྱི་ཁྱད་པར་གྱིས་སྦྲང་རྩི་ལས་བྱུང་བའི་དུག་དང༌། སྦྲང་བུའི་མཇུག་མ་ལས་བྱུང་བ་དང༌། དེས་ཀྱང་རེངས་པ་དང༌། ཤི་བ་དང༌། རྒས་པར་ནུས་པའོ། །བུང་བ་ཞེས་བྱ་བ་ནི་བུང་བ་ལས་བྱུང་བའི་སྦྲང་རྒོད་ལ་སོགས་པའོ། །བ་ཏ་རི་དང་ཞེས་བྱ་བ་ནི་བྱང་བ་ནག་པོའོ། །ཏྲེ་མ་བུ་ཀ་དང་ཞེས་བྱ་བ་ནི་དེ་ནི་སེམས་ཅན་སྲེ་མོའོ། །ཏྲཻ་ལ་ཏའི་དུག་དང་ཞེས་བྱ་བ་ནི་མཆེ་བའི་དུག་ཅན་ལ་ཁྱི་དང་སྤྱང་ཀི་དང༌། སྟག་དང་དོམ་ལ་སོགས་པ་ལས་བྱུང་བའོ། །མིའི་དུག་དང་ཞེས་བྱ་བ་
ནི། རིག་པའི་ནུས་པས་སྦོད་གཏོང་དང་མ་མོ་ལ་སོགས་པའི་མཐུས་རེངས་པ་དང་ཤི་བ་དང༌། སྨོད་པ་ལ་སོགས་པའི་ནུས་པའོ། །སྡིག་པའི་དུག་དང་ཞེས་བྱ་བ་ནི་སེམས་ཅན་སྡིག་པ་དང༌། མི་དགེ་བའི་སྡིག་པའོ། །མི་མ་ཡིན་བའི་དུག་དང་ཞེས་བྱ་བ་ནི། མི་མ་ཡིན་པའི་རིགས་དང༌། འབྱུང་པོ་ལ་སོགས་པ་དང༌། བསམ་པ་དང༌། མཐོང་བ་དང༌། རེག་པ་དང༌། ཁ་རླངས་ཀྱི་དུག་ཅན་ནོ། །དོགས་པའི་དུག་དང་ཞེས་བྱ་བ་ནི་དེ་ཡང་རྣམ་པར་རྟོག་པའི་དུག་སྟེ། འཇིགས་པ་དང་འཚེ་བ་དང༌། ཡིད་འཕྲིག་པའོ། །སྨན་པའི་དུག་དང་ཞེས་བྱ་བ་ནི་དྲོད་བཏང་བ་བསིལ་དུ་སོང་སྟེ་བསིལ་བ་དྲོད་དུ་སོང་བའོ། །ཡང་ན་རྩེའུ་ཆུང་ལ་སོགས་པ་རྩ་ལ་ལག་ཉེས་སུ་སོང་བའོ། །རིག་སྔགས་ཀྱི་དུག་ལས་བདེ་ལེགས་སུ་གྱུར་ཅིག་ཅེས་བྱ་བ་ནི། སྔགས་དང་འཁྲུལ་འཁོར་དང༌། གཤིན་རྗེ་དང༌། མ་མོ་ལ་སོགས་པའི་རིག་པའི་དམོད་མོ་ལས་བྱུང་བའོ། །བདེ་ལེགས་ནི་རིག་སྔགས་ཀྱི་རྒྱལ་མོའི་གཟི་བརྗིད་ཀྱིས་བདག་དང་སེམས་ཅན་ཐམས་ཅད་ཀྱི་དུག་ནད་ཐམས་ཅད་བཅོམ་པ། སྡུག་བསྔལ་ཐམས་ཅད་ལས་བདེ་བའོ། །རིག་སྔགས་ཀྱི་རྒྱལ་མོ་འདི་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་རྣམས་ལ་སྨན་པར་གྲགས་པའོ། །དུག་ཐམས་ཅད་ལས་བདག་བདེ་ལེགས་སུ་གྱུར་ཅིག་ཅེས་བྱ་བ་ནི་དུག་རིགས་མི་གཅིག་པ་སུམ་ཅུ་རྩ་གཉིས་ལས་ཐར་པ་དང༌། ཕྱིའི་དུག་དང༌། ནང་གི་དུག་ཐམས་ཅད་ཀྱང་ས་ལས་བྱུང་ཞིང་ས་ལ་སོང་བའོ། །ཀུན་དགའ་བོ་ཞེས་བྱ་བ་ནི། བཅོམ་ལྡན་འདས་ཀྱིས་བཀའ་སྩལ་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ནི་ཞེས་བྱ་བ་ནི་ཞལ་གཅིག་ཕྱག་བཞི་པ་སྐུ་མདོག་ལྗང་གུ་སྤྱན་གསུམ་པ་རིགས་ལྔའི་དབུ་རྒྱན་ཅན། རྒྱན་ཐམས་ཅད་ཀྱིས་བརྒྱན་པ། ཡེ་ཤེས་ལྔ་དང་ལྡན་པ་གཡས་གཉིས་ན་རྡོ་རྗེ་དང་རལ་གྲིའོ། །གཡོན་གཉིས་ན་རྨ་བྱའི་སྒྲོ་དང༌། སྦྲུལ་བསྣམས་པའོ། །ཞབས་རྡོ་རྗེ་སྐྱིལ་ཀྲུང་དུ་བཞུགས་པ། ཟླ་བའི་གདན་ལ་ཉི་མའི་འོད་དང་ལྡན་པའོ། །ཐབས་ཤེས་རབ་གཉིས་སུ་མེད་པ་དབུ་ལ་
རྡོ་རྗེ་རྒྱ་གྲམ་གྱིས་མཚན་པའོ། །ལྷ་རྣམས་ཀྱི་དབང་པོ་བརྒྱ་བྱིན་གྱིས་སྨྲས་ཤིང་རྗེས་སུ་ཡི་རང་བའོ་ཞེས་བྱ་བ་ནི་གཟི་བརྗིད་ཆེ་ཞིང་མཐུ་དང་ལྡན་པའོ། །དུག་ནད་ཐམས་ཅད་བཅོམ་པ་ལས་དང་བག་ཆགས་ཤེས་བྱའི་སྒྲིབ་པ་སེལ་བ། མ་རིག་པ་ཐམས་ཅད་ལས་རྒྱལ་བ་དེ་ལྟ་བུའི་རིག་སྔགས་ནི་ལྷའི་དབང་པོ་བརྒྱ་བྱིན་གྱིས་རྗེས་སུ་ཡི་རང་ཞིང་གུས་པར་བྱས་པའོ། །ལྷའི་དབང་པོ་བརྒྱ་བྱིན་ནི་ཞལ་གཅིག་ཕྱག་བཞི་པ་སྐུ་མདོག་སེར་པོ་སྤྱན་གསུམ་པ། རྒྱན་ཐམས་ཅད་ཀྱིས་བརྒྱན་པ། གཡས་གཉིས་ན་རྡོ་རྗེ་དང་མདུང་རྩེ་གསུམ་པའོ། །གཡོན་གཉིས་ན་གདུགས་དང་ཞགས་པ་བསྣམས་པའོ། །གླང་པོ་ཆེ་ལ་ཞོན་པའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། ལྷའི་དབང་པོ་བརྒྱ་བྱིན་གྱིས་རིག་སྔགས་ཀྱི་གསང་སྔགས་རྗེས་སུ་ཡི་རང་ཞིང་གསུངས་པ་ལ་བལྟའོ། །རིག་སྔགས་ཀྱི་གསང་སྔགས་ནི། ཛ་ལཱ་ཛན་ཏུ་ལེ་ལ་སོགས་པའོ། །ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་གསུངས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ནི་ཞེས་བྱ་པ་ནི། ཞལ་གཅིག་ཕྱག་བཞི་པ་སྐུ་མདོག་དཀར་མོ་སྤྱན་གསུམ་པ་རིགས་ལྔའི་དབུ་རྒྱན་ཅན་ཡེ་ཤེས་ལྔ་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། གཡས་ན་འཁོར་ལོ་གཡོན་ན་རྨ་བྱའི་སྒྲོ་བསྣམས་པའོ། །ཞབས་ཕྱེད་སྐྱིལ་དུ་བཞུགས་སོ། །ཟླ་བའི་གདན་ལ་ཉི་མའི་འོད་དང་ལྡན་པའོ། །ཐབས་ཤེས་རབ་གཉིས་སུ་མེད་པ་དབུ་ལ་འཁོར་ལོས་མཚན་པའོ། །རྒྱལ་པོ་ཆེན་པོ་བཞིས་སྨྲས་ཤིང་རྗེས་སུ་ཡི་རང་བའོ་ཞེས་བྱ་བ་ནི། ནད་རིགས་མི་གཅིག་པ་བཞི་བརྒྱ་རྩ་བཞི་བཅོམ་པ། བགེགས་རིགས་མི་གཅིག་པ་སྟོང་ཕྲག་བརྒྱད་ཅུ། དེའི་གཉེན་པོ་ཐབས་ཤེས་རབ་གཉིས་སུ་མེད་པ་སྟོང་པ་ཉིད་ནམ་མཁའ་ལྟ་བུའོ། །དེ་ལྟ་བུའི་རིག་སྔགས་ནི་རྒྱལ་པོ་ཆེན་པོ་བཞིས་གསུངས་པའོ། །རྒྱལ་པོ་ཆེན་པོ་བཞིའི་སྐུ་མདོག་དང་ཕྱག་མཚན་ནི་ཞལ་གཅིག་ཕྱག་བཞི་བཞིར་གནས་པ་སྐུ་མདོག་ནི་དཀར་པོ་དང༌། སེར་པོ་དང༌། དམར་པོ་དང༌། ལྗང་གུའོ། །ཕྱག་གཡས་པ་རྣམས་ན་གོ་རིམས་བཞིན་དུ་
འཁོར་ལོ་དང༌། མདའ་དང༌། དབྱུག་ཏོ་དང༌། མདའ་དང༌། སྦྲུལ་ཞགས་དང༌། མདའ་དང༌། རལ་གྲི་དང༌། མདའ་དང་གཡོན་རྣམས་ན་པི་ཝང་དང་གཞུ། རིན་པོ་ཆེ་དང་གཞུ། པདྨ་དང་གཞུ། བུམ་པ་དང་གཞུ་བསྣམས་པའོ། །ཤར་ཕྱོགས་ཞི་བར་གནས་པ་ནུབ་ཕྱོགས་ཅུང་ཟད་ཁྲོ་བ་ལྷོ་དང་བྱང་ནི་ཁྲོ་བས་ཏེ་བཞིན་མི་སྡུག་པ་པདྨའི་གདན་ལ་བཞུགས་པའོ། །དེ་རྣམས་ཀྱང་རྒྱན་ཐམས་ཅད་ཀྱིས་བརྒྱན་པའོ། །དབུ་ལ་རིམ་པ་བཞིན་དུ་འཁོར་ལོ་དང་རིན་པོ་ཆེ་དང་པདྨ་དང་སྣ་ཚོགས་རྡོ་རྗེའོ། །ཏདྱ་ཐཱ་ཞེས་བྱ་བ་ནི་འདི་ལྟ་སྟེ། རིག་སྔགས་ཀྱི་གསང་སྔགས་ནི་རྒྱལ་པོ་ཆེན་པོ་བཞིས་གསུངས་པ་བལྟ་བའོ། །རིག་སྔགས་ཀྱི་གསང་སྔགས་ནི་ཛྭ་ལ་ཛྭ་ལ་ན་ལ་སོགས་པའོ། །སྦོད་གཏོང་དང་ཞེས་བྱ་བ་ནི། འཇིག་རྟེན་དང་འཇིག་རྟེན་ལས་འདས་པའི་དམོད་མོའོ། །གཤིན་རྗེའི་ཕོ་ཉ་དང་ཞེས་བྱ་བ་ནི་དུས་མ་ཡིན་པར་འཆི་བའི་གློ་བུར་གྱི་འཇིགས་པའོ། །མཚན་མོ་ནག་མོ་དང་ཞེས་བྱ་བ་ནི་བདུད་ཀྱི་ཞགས་པའི་རང་བཞིན་མ་མོའི་རིགས་སོ། །དུས་ཀྱི་ཞགས་པ་དང་ཞེས་བྱ་བ་ནི་བདུད་ཀྱི་རང་བཞིན་དུས་ལས་འདྲེན་པའོ། །འཆི་བདག་གི་ཆད་པ་དང་ཞེས་བྱ་བ་ནི་འཆི་བདག་གི་བདུད་ནི་དབང་ཕྱུག་ཆེན་པོ་སྟེ་དེའི་ཆད་པའོ། །ཚངས་པའི་ཆད་པ་དང་ཞེས་བྱ་བ་ནི་ཕུང་པོའི་བདུད་ནི་ཚངས་པ་སྟེ་དེའི་ཆད་པའོ། །དབང་པོའི་ཆད་པ་དང་ཞེས་བྱ་བ་ནི་ལྷའི་བུའི་བདུད་དེ་དེའི་ཆད་པའོ། །ཁྱབ་འཇུག་གི་ཆད་པ་དང་ཞེས་བྱ་བ་ནི་ཉོན་མོངས་པའི་བདུད་དེ་དེའི་ཆད་པའོ། །དྲང་སྲོང་གི་ཆད་པ་དང་ཞེས་བྱ་བ་ནི་དྲང་སྲོང་ནི་མངོན་པར་ཤེས་ཤིང་རྫུ་འཕྲུལ་དང་ལྡན་ཏེ་དེའི་དམོད་མོའི་ཆད་པའོ། །ལྷའི་ཆད་པ་ལ་སོགས་པ་ནི་ལྷའི་གདོན་པ་ལ་སོགས་པ་གདོན་རིགས་མི་གཅིག་པ་རྫུ་འཕྲུལ་དང་ལྡན་པ། རྫུ་འཕྲུལ་ཆེ་བ་ནད་རིགས་མི་གཅིག་པ་སྟོང་ཕྲག་བརྒྱད་ཅུ་རྩ་བཞི་ཉི་ཤུ་རྩ་བཞི་ཕྲག་གི་ཆད་པའོ། །རྒྱལ་པོའི་ཆད་པ་དང་ཞེས་བྱ་བ་ནི་རྒྱལ་པོའི་ཆད་པ་ནོར་དང་སྲོག་དང་ཡན་ལག་བཅད་ནས་ཆད་པ་གཅོད་པའི་འཇིགས་པའོ། །ཆོམ་རྐུན་གྱི་ཆད་པ་དང་ཞེས་བྱ་བ་ནི་ནོར་དང་སྲོག་
གི་ཆད་པའོ། །མེའི་ཆད་པ་དང་ཞེས་བྱ་བ་ནི་རང་གི་ཡུལ་དང་གཞན་གྱི་ཡུལ་དུ་འགྲོ་བའི་བར་དུ་མེས་འཇིགས་པའོ། །ཆུའི་ཆད་པ་དང་ཞེས་བྱ་བ་ནི་གཟིངས་དང་རབ་ལ་སོགས་པའོ། །ཆད་པ་ཐམས་ཅད་ལས་བདག་ལ་སྲུང་བགྱིས་ཤིག་ཅེས་བྱ་བ་ནི་ཆད་པ་ལྔ་བཅུ་རྩ་གཉིས་ཀྱི་འཇིགས་པ་ལས་ཐར་བར་གྱིས་ཤིག །རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་གཟི་བརྗིད་ཀྱིས་ཆད་པ་དེ་རྣམས་ཀྱི་འཇིགས་པ་དང་བྲལ་བ། བདག་དང་སེམས་ཅན་རྣམས་སྡུག་བསྔལ་ལས་ཐར་བའོ། །རིག་སྔགས་འདི་ཡི་གཟི་བརྗིད་ཀྱིས། །བསམ་པའི་དུག་དང་མཐོང་བའི་དུག །རེག་པའི་དུག་དང་ཁ་རླངས་དུག །དེ་ནི་དེ་བཞིན་ཀླུ་ཡི་དུག །དེ་ནི་འཇིག་རྟེན་ཕྱི་ཡི་དུག །འགྲོ་བའི་དུག་ཏུ་གྲགས་པའོ། །རྩ་བ་དང་ནི་ལོ་མ་དང༌། །འཇིག་རྟེན་ཕྱི་ཡི་བསྡད་པའི་དུག །སྦྱོར་བ་ཡང་དག་སྨན་སྦྱོར་བ། །འཇིག་རྟེན་ཕྱིན་ཅི་ལོག་པ་སྟེ། །དེ་ནི་སྦྱོར་བའི་དུག་ཏུ་གྲགས། །སངས་རྒྱས་ཆོས་དང་དགེ་འདུན་གསུམ། །རིག་སྔགས་གཟི་བརྗིད་ཡང་དག་གིས། །དུག་ནི་གསུམ་པོ་འཇོམས་བྱེད་པ། །དུག་ནི་ཕ་དང་མ་ཡིན་ནོ། །དུག་ནི་ས་ལ་འགྲོ་བར་འགྱུར། །རིག་སྔགས་རྒྱལ་མོ་རྨ་བྱ་ཆེན་མོ་ལས། རིག་སྔགས་ཀྱི་གཟི་བརྗིད་དང་དུག་གི་མཚན་ཉིད་བཤད་པའི་གནས་སྐབས་ཏེ་བཅོ་ལྔ་པའོ།། །།ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་གསུངས་པའོ། །ཁྱོད་ཀྱིས་ཀླུང་གི་རྒྱལ་པོ་རྣམས་ཀྱི་མིང་ཟུང་ཤིག་ཅེས་བྱ་བ་ནི། ཁམས་གསུམ་ལ་གནས་པ། ཀླུང་གི་རྒྱལ་པོའི་གཙོ་བོ་བཞི་བཅུ་རྩ་གཅིག་ཏུ་གནས་པའོ། །འདི་ལྟ་སྟེ་ཞེས་བྱ་བ་ནི། ཀླུང་གི་རྒྱལ་པོ་རྣམས་ཀྱི་མིང་བལྟ་བའོ། །ཀླུང་གི་རྒྱལ་པོ་གངྒཱ་དང་ཞེས་བྱ་བ་ནི། །ཤར་ཕྱོགས་ནས་གླང་པོ་ཆེའི་ཁ་ནས་འབབ་སྟེ། འདི་ནི་མཚོ་ཆེན་པོའི་ཆུ་ཞེས་བྱ་བ། གཡས་ཕྱོགས་སུ་བསྐོར་ནས། ཀླུང་ལྔ་བརྒྱ་དང་ལྷན་ཅིག་ཏུ་ཤར་ཕྱོགས་ཀྱི་རྒྱལ་མཚོ་ཆེན་པོར་འགྲོའོ། །ཀླུང་གི་རྒྱལ་པོ་སིནྡྷུ་དང་ཞེས་བྱ་བ་ནི། ལྷོ་ཕྱོགས་ཁྱུ་མཆོག་གི་ཁ་ནས་འབབ་སྟེ། དེ་ནི་མཚོ་ཆེན་པོའི་ཆུ་ཞེས་བྱ་བ་གཡས་ཕྱོགས་ནས་བསྐོར་ནས། ཀླུང་ལྔ་བརྒྱ་དང་ལྷན་ཅིག་ཏུ་ལྷོ་ཕྱོགས་ཀྱི་རྒྱ་མཚོ་ཆེན་པོར་
འགྲོའོ། །ཀླུང་གི་རྒྱལ་པོ་པཀྵུ་དང་ཞེས་བྱ་བ་ནི་ནུབ་ཕྱོགས་ནས་རྟའི་ཁ་ནས་འབབ་སྟེ། དེ་ནི་མཚན་ཆུ་ཞེས་བྱ་བ་གཡས་སུ་བསྐོར་ནས། ཀླུང་ལྔ་བརྒྱ་དང་ལྷན་ཅིག་ཏུ་ནུབ་ཕྱོགས་སུ་རྒྱ་མཚོ་ཆེན་པོར་འགྲོའོ། །ཀླུང་གི་རྒྱལ་པོ་སཱི་ཏ་དང་ཞེས་བྱ་བ་ནི། བྱང་ཕྱོགས་ནས་སེང་གེའི་ཁ་ནས་འབབ་པོ། །དེ་ནི་རྒྱ་མཚོ་ཆེན་པོའི་ཆུ་ཞེས་བྱ་བ་ནི། གཡས་ཕྱོགས་སུ་བསྐོར་ནས་ཀླུང་ལྔ་བརྒྱ་དང་ལྷན་ཅིག་ཏུ་བྱང་ཕྱོགས་ཀྱི་རྒྱ་མཚོ་ཆེན་པོར་འགྲོའོ། །བྱང་ཕྱོགས་ཁ་གུར་གྱུར་པ་ཡི། །ཆུ་མཚོ་ཡོད་དེ་གཞན་དག་ཀྱང༌། །དེ་ནི་མཚོ་ཆེན་ཆུ་ཞེས་བྱ། །ཐ་དད་རྒྱུ་རྣམས་བྱུང་ནས་ཡོད། །ཆུ་ཀླུང་གངྒཱ་སིནྡྷུ་པཀྵུ་དང༌། །སཱི་ཏ་དབའ་རླབས་དབུ་བའི་ཕྲེང་བ་ཅན། །འབབ་ཅིང་ཐམས་ཅད་གསལ་བའི་ཆུ་ཡིན་ཏེ། །ཕྱོགས་བཞི་ཁོ་ར་ཁོར་ཡུག་དག་ནས་འབྱུང༌། །ཆུ་ཀླུང་རབ་མཆོག་བཞི་པོ་འདི་དག་ནི། །མཆོག་ཏུ་བཟང་ཞིང་སོ་སོར་འབབ་པ་སྟེ། །རེ་རེ་ཞིང་ཡང་ལྔ་བརྒྱར་ཁྱེར་ནས་ནི། །ཆུ་ཡི་རྒྱུན་རྣམས་རྒྱ་མཚོ་ཆེན་པོར་འགྲོ། །ཞེས་བྱའོ། །ཀླུང་གི་རྒྱལ་པོ་མདའ་འབྱུང་དང༌། ཀླུང་གི་རྒྱལ་པོ་ཁྱིམ་ལྡན་དང༌། ཀླུང་གི་རྒྱལ་པོ་གཤིན་རྗེ་སེལ་དང༌། ཀླུང་གི་རྒྱལ་པོ་གྱ་གྱུ་དང་ཞེས་བྱ་བ་ནི། ལྷོའི་འཛམ་བུའི་གླིང་བཞིན་དུ། ནུབ་ཀྱི་བ་ལང་སྤྱོད་ལ་ཡང་ཆུ་བོ་ཆེན་པོ་བཞི་འབབ་སྟེ། རིམ་པ་བཞིན་དུ་ཤར་དང༌། ལྷོ་དང༌། ནུ་བ་དང༌། བྱང་ཕྱོགས་སོ། །གཡས་སུ་བསྐོར་ནས་ཤར་གྱི་རྒྱ་མཚོར་འབབ་པའོ་དེ་བཞིན་དུ་ལྷོ་ལ་སོགས་པ་ཡང༌། ལྷོའི་རྒྱ་མཚོ་དང༌། ནུབ་ཀྱི་རྒྱ་མཚོར་དང༌། བྱང་གི་རྒྱ་མཚོར་འབབ་པའོ། །འཛམ་བུའི་གླིང་བཞིན་དུ་ཆུ་ཀླུང་ལྔ་བརྒྱ་ལྔ་བརྒྱར་ཁྲིད་པའོ། །ཀླུང་གི་རྒྱལ་པོ་རྒྱས་འབབ་དང༌། །ཀླུང་གི་རྒྱལ་པོ་ཞགས་བྲལ་དང༌། ཀླུང་གི་རྒྱལ་པོ་ཞི་བ་འཛིན་དང༌། ཀླུང་གི་རྒྱལ་པོ་ས་ལྡན་དང་ཞེས་བྱ་བ་ནི། ནུབ་ཀྱི་བ་ལང་སྤྱོད་བཞིན་དུ། བྱང་གི་སྒྲ་མི་སྙན་ལ་ཡང་མཚོ་ཆེན་པོར་ཡོད་དེ། དེ་ལ་ཡང་ཆུ་ཆེན་པོ་ཕྱོགས་བཞིར་འབབ་སྟེ། ཤར་དང་ལྷོ་དང༌། ནུབ་དང༌། བྱང་དུའོ། །དེ་གཡས་ཕྱོགས་སུ་བསྐོར་ནས། རིམ་པ་བཞིན་དུ་ཤར་གྱི་རྒྱ་མཚོ་དང༌། ལྷོའི་རྒྱ་མཚོ་རྒྱ་དང༌། ནུབ་ཀྱི་རྒྱ་མཚོ་དང༌། བྱང་ག་རྒྱ་མཚོའོ། །ཆུ་
ཀླུང་དེ་ཡང་ལྔ་བརྒྱ་ལྔ་བརྒྱ་ཁྲིད་ནས་འབབ་པའོ། །ཀླུང་གི་རྒྱལ་པོ་ཟླ་བའི་ཆ་དང༌། ཀླུང་གི་རྒྱལ་པོ་དབྱངས་ཆེན་དང༌། ཀླུང་གི་རྒྱལ་པོ་རུས་སྦལ་ཅན་དང༌། ཀླུང་གི་རྒྱལ་པོ་ཆུ་དྲོན་ཅན་དང་ཞེས་བྱ་བ་ནི། བྱང་གི་སྒྲ་མི་སྙན་བཞིན་དུ་ཤར་གྱི་ལུས་འཕགས་གླིང་ན་ཡང་མཚོ་ཆེན་པོ་ཡོད་དེ། མཚོ་དེ་ལ་ཡང་ཆུ་ཀླུང་ཆེན་པོ་བཞིར་འབབ་པ། དེ་ཡང་ཤར་དང་ལྷོ་དང་ནུབ་དང་བྱང་གི་ངོས་སུ་འབབ་པའོ། །དེ་ཡང་གཡས་ཕྱོགས་སུ་བསྐོར་ནས་ཤར་གྱི་རྒྱ་མཚོ་དང༌། ལྷོའི་རྒྱ་མཚོ་དང༌། ནུབ་ཀྱི་རྒྱ་མཚོ་དང༌། བྱང་གི་རྒྱ་མཚོའོ། །ཆུ་ཀླུང་ཆེན་པོ་དེ་བཞིས་ཀྱང༌། ཆུ་ཀླུང་ལྔ་བརྒྱ་ལྔ་བརྒྱ་ཁྲིད་ནས་འབབ་པའོ། །ཀླུང་གི་རྒྱལ་པོ་ཆུ་མཆོག་ཅན་དང༌། ཀླུང་གི་རྒྱལ་པོ་ཟངས་འདབ་དང་ཞེས་བྱ་བ་ནི། ལྷོའི་འཛམ་བུའི་གླིང་གི་གཡས་ངོས་ན་ཡོད་པ། གླིང་ཕྲན་རྔ་ཡབ་ཅེས་བྱ་བ་ཡོད་དེ། མཚོ་དེ་ལ་ཡང་ཆུ་ཀླུང་གཉིས་འབབ་སྟེ། ཤར་དང་ནུབ་ནས་བབ་ནས། ཤར་གྱི་རྒྱ་མཚོ་དང༌། ནུབ་ཀྱི་རྒྱ་མཚོར་འབབ་པའོ། །ཀླུང་གི་རྒྱལ་པོ་སྦྲང་རྩི་ཅན་དང༌། ཀླུང་གི་རྒྱལ་པོ་དཔའ་ལྡན་དང་ཞེས་བྱ་བ་དང༌། ལྷོའི་འཛམ་བུའི་གླིང་གི་གཡོན་ན། གླིང་ཕྲན་རྔ་ཡབ་གཞན་ཞེས་བྱ་བ་ནི། སྔ་མ་བཞིན་དུ་མཚོ་ཆེན་པོ་ཡོད་དེ། མཚོ་ཆེན་པོ་དེ་ལ་ཡང་བྱང་དང་ལྷོར་འབབ་སྟེ། དེ་ཡང་ལྷོའི་རྒྱ་མཚོ་དང་བྱང་གི་རྒྱ་མཚོར་འབབ་པའོ། །ཀླུང་གི་རྒྱལ་པོ་བུ་རམ་ཤིང་ལྡན་དང༌། ཀླུང་གི་རྒྱལ་པོ་བ་ལང་ལྡན་དང་ཞེས་བྱ་བ་ནི། བ་ལང་སྤྱོད་ཀྱི་ཤར་ན། གླིང་ཕྲན་གཡོ་ལྡན་གནས་ཏེ། དེ་ལ་ཡང་སྔ་མ་བཞིན་དུ་མཚོ་ཆེན་པོ་གནས་པ། མཚོ་ཆེན་པོའི་ཁ་ནས་ཡང༌། ཆུ་ཀླུང་ཆེན་པོ་ཤར་དང་ནུབ་ནས་འབབ་པོ། །ཆུ་ཀླུང་ཆེན་པོ་དེ་ཡང༌། ཤར་གྱི་རྒྱ་མཚོ་དང༌། ནུབ་ཀྱི་རྒྱ་མཚོར་འབབ་པོ། །ཀླུང་གི་རྒྱལ་པོ་འཕགས་པ་ཅན་དང༌། ཀླུང་གི་རྒྱལ་པོ་རྩེ་འབྱིན་དང་ཞེས་བྱ་བ་ནི། བ་ལང་སྤྱོད་ཀྱི་གཡོན་ན་གླིང་ཕྲན་ཉེ་བའི་གཡོ་ལྡན་ཡོད་དེ། སྔ་མ་བཞིན་དུ་མཚོ་ཆེན་པོ་ཡོད་དེ། མཚོ་ཆེན་པོའི་ཁ་ནས་ཡང་ཆུ་ཀླུང་ཆེན་པོ་གཉིས་འབབ་སྟེ། དེ་ཡང་ལྷོ་དང་བྱང་ཕྱོགས་སུ་འབབ་སྟེ། ལྷོའི་རྒྱ་མཚོ་དང༌། བྱང་གི་རྒྱ་མཚོར་འབབ་པའོ། །ཀླུང་གི་རྒྱལ་པོ་མཛའ་བཟངས་དང༌། ཀླུང་གི་རྒྱལ་པོ་ཀུན་གྱི་བཤེས་དང་ཞེས་བྱ་བ་ནི། བྱང་གི་སྒྲ་མི་སྙན་གྱི་
གཡས་ན། གླིང་ཕྲན་སྒྲ་མི་སྙན་གནས་ཏེ། དེ་ལ་ཡང་སྔ་མ་བཞིན་དུ་མཚོ་ཆེན་པོ་གནས་ཏེ། མཚོ་ཆེན་པོ་དེའི་ཁ་ནས་ཡང་ཆུ་ཀླུང་ཆེན་པོ་ཤར་ནས་ནུབ་ཏུ་འབབ་པའོ། །ཆུ་ཀླུང་ཆེན་པོ་དེ་ཡང་ཤར་གྱི་རྒྱ་མཚོ་དང༌། ནུབ་ཀྱི་རྒྱ་མཚོར་འགྲོ་བའོ། །ཀླུང་གི་རྒྱལ་པོ་འཆི་མེད་དང༌། ཀླུང་གི་རྒྱལ་མོ་མེ་ཏོག་པདྨ་དང་ཞེས་བྱ་བ་ནི། སྒྲ་མི་སྙན་གྱི་གཡོན་ན། གླིང་ཕྲན་སྒྲ་མི་སྙན་གྱི་ཟླ་བ་རྣམས་གནས་ཏེ། དེ་ལ་ཡང་སྔ་མ་བཞིན་དུ་མཚོ་ཆེན་པོ་གནས་པ། །མཚོ་དེའི་ཁ་ནས་ཡང་ཆུ་ཀླུང་ཆེན་པོ་ལྷོ་དང་བྱང་ནས་འབབ་པའོ། །ཆུ་ཀླུང་ཆེན་པོ་དེ་ཡང་ལྷོའི་རྒྱ་མཚོ་དང༌། བྱང་གི་རྒྱ་མཚོར་འགྲོ་བའོ། །ཀླུང་གི་རྒྱལ་པོ་ལྔ་ལེན་དང༌། ཀླུང་གི་རྒྱལ་པོ་ངོས་བཟངས་དང་ཞེས་བྱ་བ་ནི། ལུས་འཕགས་པོའི་གླིང་གཡས་ན། གླིང་ཕྲན་ལུས་དང་བྱ་བ་གནས་ཏེ། དེ་ལ་སྔ་མ་བཞིན་དུ་མཚོ་ཆེན་པོ་གནས་སོ། །མཚོ་ཆེན་པོ་དེ་ལ་ཡང་ཆུ་ཀླུང་ཆེན་པོ་གཉིས་གནས་ཏེ། ཤར་དང་ནུབ་ནས་འབབ་སྟེ། ཤར་གྱི་རྒྱ་མཚོ་དང་ནུབ་ཀྱི་རྒྱ་མཚོར་འགྲོ་བའོ། །ཀླུང་གི་རྒྱལ་པོ་དཀའ་ཐུབ་སྦྱིན་དང༌། ཀླུང་གི་རྒྱལ་པོ་དྲི་བྲལ་དང་ཞེས་བྱ་བ་ནི། ལུས་འཕགས་ཀྱི་གཡོན་ན། གླིང་ཕྲན་ལུས་འཕགས་གནས་ཏེ། དེ་ལ་ཡང་སྔ་མ་བཞིན་དུ་མཚོ་ཆེན་པོ་གནས་ཏེ། མཚོ་དེ་ལ་ཡང་ལྷོ་དང་བྱང་དུ་འབབ་པ། །ཆུ་ཀླུང་ཆེན་པོ་དེ་ཡང་ལྷོའི་རྒྱ་མཚོ་དང་བྱང་གི་རྒྱ་མཚོར་འགྲོའོ། །ཀླུང་གི་རྒྱལ་པོ་སྐྱོན་བྲལ་དང༌། ཀླུང་གི་རྒྱལ་པོ་ཀླུང་ཆེན་དང༌། ཀླུང་གི་རྒྱལ་པོ་གསེར་ལྡན་དང༌། ཀླུང་གི་རྒྱལ་པོ་བ་ལང་སྦྱིན་མཆོག་དང་ཞེས་བྱ་བ་ནི། འོག་ཀླུའི་ཡུལ་ནི་འཛམ་བུའི་གླིང་ཇི་བཞིན་དུ། མཚོ་ཆེན་པོ་ཡོད་དེ། ཀླུ་རྣམས་ལོངས་སྤྱོད་བྱེད་པ། མཚོ་དེའི་ཁ་ནས་ཆུ་ཀླུང་ཆེན་པོ་བཞི་འབབ་པ། དེ་ཡང་ཤར་དང་ལྷོ་དང་ནུབ་དང་བྱང་དུ་འབབ་སྟེ། ཆུ་དེ་ཡང་རིགས་བཞིའི་ཀླུའི་མཚོའི་ནང་དུ་འབབ་པོ། །ཀླུང་གི་རྒྱལ་པོ་གསང་སྲུང་དང༌། ཀླུང་གི་རྒྱལ་པོ་བ་ལང་ཅན་དང༌། ཀླུང་གི་རྒྱལ་པོ་དྲི་མ་མེད་པ་དང༌། ཀླུང་གི་རྒྱལ་པོ་འོད་གསལ་དང་ཞེས་བྱ་བ་ནི་རི་རབ་ཀྱི་སྟེང་ན་སུམ་ཅུ་རྩ་གསུམ་ན་གནས་ཏེ། དེ་ཡང་འཛམ་བུ་གླིང་གི་མ་དྲོས་བཞིན་དུ་མཚོ་ཆེན་པོར་གནས་པ། མཚོ་ཆེན་པོའི་ཁ་ནས་ཆུ་ཀླུང་ཆེན་པོ་འབབ་པ། ཆུ་ཀླུང་དེ་ཡང་གཡས་ཕྱོགས་ནས་བསྐོར་ནས། ཤར་དང་ལྷོ་དང་ནུབ་དང་བྱང་དང༌། རྫིང་བུ་ཆེན་པོར་འགྲོ་བའོ། །ཤར་
ཕྱོགས་ཀྱི་རིམ་པ་བཞིན་དུ་ལྷོ་དང་ནུབ་དང༌། བྱང་ཡང་ཤེས་པར་བྱའོ། །ཀླུང་གི་རྒྱལ་པོ་འདུལ་མེད་དག་ཅེས་བྱ་བ་ནི། ལྷོའི་འཛམ་བུའི་གླིང་ན་རྡོ་རྗེ་གདན་གྱི་ལྷོ་ཕྱོགས་ན་གནས་ཏེ། མཚོ་ཆེན་པོ་དེའི་བྱང་ཕྱོགས་ནས་འབབ་པ། རྡོ་རྗེ་གདན་གྱི་འོག་ནས་བབ་ནས་ཆུ་བོ་གངྒཱ་ལ་འགྲོ་བའོ། །ཆུ་དེ་ཡང་ཁའི་ངོས་ནས་མེད་པ་འོག་ཏུ་འཛུལ་ཏེ། དེས་ན་ཆུ་ཆེན་པོ་ནཻ་ར་ཉྫ་ན་ཞེས་བྱའོ། །མཚོ་ཆེན་པོ་བཅོ་ལྔ་པོ་དེ་ནི་སྲིད་པ་གསུམ་ལ་གནས་པའོ། །རིའི་རྒྱལ་པོ་སྤོས་དང་ལྡན་ནས། དེ་ནས་དཔག་ཚད་བཅུའི་ཚུ་རོལ་ན་མཚོ་ཆེན་ཆུ་ཞེས་བྱ་བ་ཡོད་དེ། མ་དྲོས་པ་ཞེས་ཀྱང་བྱའོ། །མཚོན་ཆེན་དེའི་ཚད་ནི། ཆུར་དཔག་ཚད་ལྔ་བཅུ་ཞེང་དུ་དཔག་ཚད་ལྔ་བཅུ། མཐར་སྐོར་དུ་དཔག་ཚད་ཉིས་བརྒྱ། འཕང་དུ་དཔག་ཚད་ཕྱེད་དང་གཉིས་ཡོད་པ། དབྱིབས་ལེགས་ཤིང་བལྟ་ན་སྡུག་ལ། མཛེས་པ། ཆུ་བསིལ་བ། སྦྲང་རྩི་ལྟ་བུས་གང་བ། མཚོ་དེ་ནང་དུ་མེ་ཏོག་པདྨ་དང༌། པུཎྜ་རཱི་ཀ་དང༌། ཀུ་མུ་ཏ་དང༌། ཨུཏྤ་ལ་སྔོན་པོ་ལ་སོགས་པ། ཆུ་ལ་སྐྱེས་པའི་མེ་ཏོག་སྣ་ཚོགས་ཡོད་པའོ། །ཆུ་དེའི་ནང་དུ་ཡང་བྱ་སྣ་ཚོགས་ཡོད་དེ། ཁྲུང་ཁྲུང་དང༌། ངང་སྐྱ་དང༌། ཆུ་བྱ་ནག་པོ་དང༌། ཆུ་བྱ་རྐེ་རིངས་དང༌། དང་སེར་དང༌། དང་སྐྱ་དང༌། ངང་སྐྱའི་རྒྱལ་པོ་དང༌། དེ་ལ་སོགས་པ་ཆུ་བྱ་སྣ་ཚོགས་པ་གནས་པའོ། །མཚོ་ཆེན་པོ་མ་དྲོས་པ་བཞིན་དུ་གཞན་ཡང་དེ་བཞིན་དུ་གནས་པའོ། །དེ་དག་དང་གཞན་ཡང་གང་དག་སའི་དཀྱིལ་འཁོར་འདིར་འབབ་པའི་ཆུ་ཀླུང་དེ་དག་ཐམས་ཅད་ལ་ཞེས་བྱ་བ་ནི། སྲིད་པ་གསུམ་ན་གནས་པའི་ཆུ་ཀླུང་གི་རྒྱལ་པོ་བཞི་བཅུ་རྩ་གཅིག་ལ་གནས་པའོ། །གང་དག་རྒྱུན་དུ་གནས་པ་ཞེས་བྱ་བ་ནི། ཆུ་ལ་གནས་པ། ལྷ་དང་ལྷ་མ་ཡིན། གནོད་སྦྱིན་འབྱུང་པོ་མ་རུངས་པ་ལ་སོགས་པའོ། །གཟུགས་ཐ་དད་པ་ཞེས་བྱ་བ་ནི། རྐང་མངས་དང༌། རྐང་གཉིས་རྐང་བཞི་རྐང་དྲུག་རྐང་བརྒྱད་ལ་སོགས་པའོ། །གཟུགས་མི་སྡུག་པ་ཞེས་བྱ་བ་ནི་བཞིན་མི་སྡུག་ཅིང༌། སྦྲུལ་དང༌། སྦལ་པ་དང༌། ཉ་དང༌། བྱ་དང༌། ཁྱི་དང༌། ཝ་དང༌། སྤྱང་ཀི་དང༌། ཆུ་སྲིན་དང༌། ཀུམྦྷི་ར་ལ་སོགས་པའི་མགོ་བརྙན་ནོ། །གཟུགས་མང་བ་ཞེས་བྱ་བ་ནི། སེམས་ཅན་ལ་ལ་ཆུ་སྲིན་གྱི་གཟུགས་སུ་ཡོད་པ། རྟའི་གཟུགས་སུ་ཡོད་པ། ཕག་གི་གཟུགས་སུ་ཡོད་པ། གླང་པོ་ཆེའི་གཟུགས་སུ་ཡོད་པ། སྤྲུལ་གྱི་
གཟུགས་ལ་སོགས་པ། སེམས་ཅན་གཟུགས་མི་གཅིག་པ་མང་པོ་ཡོད་པའོ། །གཟུགས་མཐའ་ཡས་པའོ་ཞེས་བྱ་བ་ནི། ཆུང་བ་དང༌། ཆེ་བ་དང༌། བསམ་གྱིས་མི་ཁྱབ་པ་ཡོད་པའོ། །འདོད་དགུར་སྒྱུར་བའི་གཟུགས་ཅན་གཟུགས་སྣ་ཚོགས་པའི་ལྷ་རྣམས་དང་ཞེས་བྱ་བ་ནི། སྲིད་པ་གསུམ་ན་གནས་པའི་ལྷ་ལ་སོགས་པའི་འབྱུང་པོ་སྟོང་ཕྲག་བརྒྱད་ཅུ་རྩ་བཞིའོ། །ཟས་སུ་གཟི་བརྗིད་འཕྲོག་པ་རྣམས་དང་ཞེས་བྱ་བ་ནི། ཟས་སུ་གཟི་བརྗིད་འཕྲོག་པ་ནས། རིགས་མི་གཅིག་པ་སུམ་ཅུ་རྩ་གཅིག །སྲིད་པ་གསུམ་ན་གནས་པའི་ཆུ་ཀླུང་ཆེན་པོ་གནས་པའོ། །དེ་ཡང་གཟུགས་མི་གཅིག་པ་མང་པོར་གནས་པ། སྲིད་གསུམ་སྐད་ཅིག་རྒྱུ་བའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། གང་ཟག་གང་གིས་རིག་སྔགས་ཀྱི་རྒྱལ་མོ་འདི་ལ་གུས་པར་བྱས་པར་གྱུར་ན། ཆུ་ཀླུང་ཆེན་པོ་དེ་རྣམས་ལ་ཡོད་པ་རྣམས་ཀྱིས་ཀྱང་ཡང་དག་པར་སྲུང་བ་དང་སྐྱོབ་པར་འགྱུར་རོ། །སྦྲ་བ་ལ་སོགས་པ་དང་ཞེས་བྱ་བ་ནི། འབྱུང་པོ་དེ་རྣམས་ཀྱིས་ཀྱང་སྔ་མ་བཤད་པ་བཞིན་དུ་བྱས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལས་ཆུ་ཀླུང་བཤད་པའི་གནས་སྐབས་ཏེ་བཅུ་དྲུག་པའོ།། །།ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་གསུངས་པའོ། །ཁྱོད་ཀྱིས་རིའི་རྒྱལ་པོ་རྣམས་ཀྱི་མིང་ཟུང་ཤིག་ཅེས་བྱ་བ་ནི། སྲིད་པ་ཆགས་པའི་དུས་སུ་ཆགས་པ། རི་རབ་ལ་སོགས་པ་རིའི་རྒྱལ་པོ་ཆེན་པོ་ལྔ་བཅུ་རྩ་བཞིའི་མིང་ཟུང་ཤིག་ཅེས་བའོ། །འདི་ལྟ་སྟེ་ཞེས་བྱ་བ་ནི་རིའི་རྒྱལ་པོ་རྣམས་ཀྱི་མིང་བལྟ་བའོ། །རིའི་རྒྱལ་པོ་རི་རབ་དང་ཞེས་བྱ་བ་ནི། དཔག་ཚད་བརྒྱད་ཁྲི་ནི་ཐུར་དུ་གསེར་གྱི་ས་གཞི་ལ་བརྟེན་ཏོ། །དཔག་ཚད་བརྒྱད་ཁྲི་ནི་ཆུ་ལས་གྱེན་དུ་འཕགས་པའོ། །འཕང་དུ་དཔག་ཚད་འབུམ་དྲུག་ཁྲི་ཡོད་དོ། །རྔམས་སུ་དཔགས་ཚད་བརྒྱད་ཁྲི། ཞེད་དུ་དཔག་ཚད་བརྒྱད་ཁྲི་ཡོད་པ། མཐའ་སྐོར་དུ་དཔག་ཚད་སུམ་འབུམ་ཉི་ཁྲིའོ། །དབྱིབས་ལེགས་ཤིང་བལྟ་ན་སྡུག་ལ་མཛེས་པ་རིན་པོ་ཆེ་སྣ་བདུན་ལས་གྲུབ་པ། དེ་ལ་སུམ་ཅུ་རྩ་གསུམ་པའི་ལྷ་རྣམས་གནས་སོ། །རིའི་རྒྱལ་པོ་རི་རབ་ཀྱི་ངོས་བཞི་ནི། ཤར་ཕྱོགས་ནི་ཤེལ་ལས་གྲུབ་པ། ལྷོ་ཕྱོགས་ནི་བཻཌཱུཪྻ་ལས་གྲུབ་པ།
ནུབ་ཕྱོགས་ནི་དངུལ་ལས་གྲུབ་པ། བྱང་ཕྱོགས་ཀྱི་ངོས་ནི་གསེར་ལས་གྲུབ་པའོ། །རིའི་རྒྱལ་པོ་རི་རབ་ལ་རྩེ་མོ་བཞི་ཡོད་དེ། ཤར་ཕྱོགས་ཀྱི་རྩེ་མོ་ནི་ཆུར་དཔག་ཚད་བརྒྱ་ཉི་ཤུ་རྩ་ལྔ། ཞེང་དུ་དཔག་ཚད་བརྒྱ་ཉི་ཤུ་རྩ་ལྔ། མཐའ་སྐོར་དུ་དཔག་ཚད་ལྔ་བརྒྱ་ཡོད་པ། དཔག་ཚད་ཕྱེད་དང་ལྔ་ནི་རིའི་རྒྱལ་པོ་རི་རབ་ལས་གྱེན་དུ་འཕགས་ཏེ། དབྱིབས་ལེགས་ཤིང་བལྟ་ན་སྡུག་ལ། མཛེས་པ་ཤེལ་ལས་གྲུབ་པ། དེ་ན་གནོད་སྦྱིན་ལག་ན་རྡོ་རྗེ་རྣམས་གནས་སོ། །ལྷོ་ཕྱོགས་ཀྱི་རྩེ་མོ་ནི། ཆུར་དཔག་ཚད་བརྒྱ་ཉི་ཤུ་རྩ་ལྔ་ཞེང་དུ་དཔག་ཚད་བརྒྱ་ཉུ་ཤུ་རྩ་ལྔ་མཐའ་སྐོར་དུ་དཔག་ཚད་ལྔ་བརྒྱ་ཡོད་པ། དཔག་ཚད་ཕྱེད་དང་ལྔ་ནི་རིའི་རྒྱལ་པོ་རི་རབ་ལས་འཕགས་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ། བཻཌཱུཪྻ་ལས་གྲུབ་པ། དེ་ན་གནོད་སྦྱིན་ལག་ན་རྡོ་རྗེ་ངས་སོ། །དེ་བཞིན་དུ་གཉིས་པོ་ལ་ཡང་ཤེས་པར་བྱའོ། །དངུལ་ལས་གྲུབ་པ་དང༌། གསེར་ལས་གྲུབ་པའོ། །རིའི་རྒྱལ་པོ་རི་རབ་ནི། བར་རིམ་བཞི་ཡོད་དེ། བང་རིམ་དང་པོ་ནི་ཆུར་ལས་དཔག་ཚད་ཁྲིས་གྱེན་དུ་འཕགས་པ་ལ་རིའི་རྒྱལ་པོ་རི་རབ་ལས་དཔག་ཚད་ཁྲི་དྲུག་སྟོང་ཕྱིར་འཕགས་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ། རིན་པོ་ཆེ་སྣ་བཞི་ལས་གྲུབ་པ། དེ་ནི་ལག་ན་ཡོལ་གོ་ཐོགས་ཀྱི་ལྷ་རྣམས་སོ། །བང་རིམ་གཉིས་པ་ནི། བང་རིམ་དང་པོ་ལས་དཔག་ཚད་ཁྲིས་གྱེན་དུ་འཕགས་པ། རིའི་རྒྱལ་པོ་རི་རབ་ལས་དཔག་ཚད་བརྒྱད་སྟོང་ཕྱིར་འཕགས་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ། རིན་པོ་ཆེ་སྣ་བཞི་ལས་གྲུབ་པ། དེ་ན་ཕྲེང་ཐོགས་ཀྱི་ལྷ་རྣམས་གནས་སོ། །བང་རིམ་གསུམ་པ་ནི། བང་རིམ་གཉིས་པ་ལས། དཔག་ཚད་ཁྲི་གྱེན་དུ་འཕགས་པ། རིའི་རྒྱལ་པོ་རི་རབ་ལས་དཔག་ཚད་བཞི་སྟོང་ཕྱིར་འཕགས་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ། རིན་པོ་ཆེ་སྣ་བཞི་ལས་གྲུབ་པ། དེ་ནི་རྟག་ཏུ་མྱོས་པའི་ལྷ་རྣམས་གནས་སོ། །བང་རིམ་བཞི་པ་ནི། བང་རིམ་གསུམ་པ་ལས། དཔག་ཚད་ཁྲི་གྱེན་དུ་འཕགས་ལ། རིའི་རྒྱལ་པོ་རི་རབ་ལས་དཔག་ཚད་ཉིས་སྟོང་ཕྱིར་འཕགས་ཏེ། དབྱིབས་ལེགས་ཤིང་བལྟ་ན་སྡུག་ལ་མཛེས་ཤིང༌། རིན་པོ་ཆེ་སྣ་བཞི་ལས་གྲུབ་པ། དེའི་ཕྱོགས་བཞིན་རྒྱལ་པོ་བཞི་རྣམས་གནས་སོ། །རིའི་རྒྱལ་པོ་གངས་ཅན་
དང་ཞེས་བྱ་བ་ནི། སྒྲ་མི་སྙན་ནས་རི་ནག་པོ་དགུ་འདས་པའི་བྱང་ཕྱོགས་ན་རིའི་རྒྱལ་པོ་གསང་ཞེས་བྱ་བ་ཡོད་དེ། །རིའི་རྒྱལ་པོ་སྤོས་ཀྱི་ངད་ལྡང་དང་ཞེས་བྱ་བ་ནི། རི་ནག་པོ་དགུ་འདས་པའི་ཕ་རོལ་ན་ཡོད་དོ། །རིའི་རྒྱལ་པོ་རྩེ་བརྒྱ་པ་དང་ཞེས་བྱ་བ་ནི། ཕྱིའི་རྒྱ་མཚོའི་འགྲམ་གྱི་དཔག་ཚད་ལྡན་སྲིན་པོའི་ཡུལ་གྱི་བྱང་ངོས་ན་རྩེ་མོ་བརྒྱ་ཡོད་པ། ཞེང་དུ་དཔག་ཚད་སུམ་བརྒྱ་ཡོད་པ། དཔངས་སུ་དཔག་ཚད་བརྒྱ་ཡོད་པ། རྩེ་མོ་དེ་རྣམས་ཀྱང་དཔག་ཚད་གསུམ་གསུམ་མོ། །རིའི་རྒྱལ་པོ་སེང་ལྡེང་ཅན་ཞེས་བྱ་བ་ནི། གཤོལ་མདའ་འཛིན་ནས་དཔག་ཚད་ཉི་ཁྲི་བོར་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན། དཔག་ཚད་ཁྲི་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲ་སྟེ། དེ་བྱིབས་ལེགས་ཤིང་བལྟ་ན་སྡུག་ལ་མཛེས་པ། གསེར་ལས་གྲུབ་པ། དེ་ན་རྒྱལ་ཆེན་བཞིའི་ལྷ་རྣམས་ཀྱི་གྲོང་དང་གྲོང་ཁྱེར་ལྗོངས་གནས་སོ། །ཅིའི་ཕྱིར་རིའི་རྒྱལ་པོ་སེང་ལྡེང་ཅན་ཞེས་བྱ་ཞེ་ན། རིའི་རྒྱལ་པོ་སེང་ལྡེང་ཅན་གྱི་ཕྱོགས་དེ་དང་དེ་དག་ན། ཇི་ལྟར་གསེར་གྱི་སེང་ལྡེང་ཡོད་པ་བཞིན་དུ་གཞན་ལ་མེད་དེ། དེའི་ཕྱིར་ན་རིའི་རྒྱལ་པོ་སེང་ལྡེང་ཅན་ཞེས་བྱའོ། །རིའི་རྒྱལ་པོ་གསེར་ལོགས་དང་ཞེས་བྱ་བ་ནི། འཛམ་བུའི་གླིང་གི་བྱང་ངོས་ཀྱི་ཆ་ན་རིའི་རྒྱར་དཔག་ཚད་གསུམ། དཔངས་སུ་དཔག་ཚད་གཉིས་པ། འཛམ་བུའི་གླིང་གི་སེམས་ཅན་གྱི་གསེར་དེ་ན་གནས་སོ། །རིའི་རྒྱལ་པོ་འོད་འཛིན་དང་ཞེས་བྱ་བ་ནི། འཛམ་བུའི་གླིང་གི་ལྷོ་ཕྱོགས་ན་དཔལ་གྱི་རི་ཞེས་བྱ་བ་ཡིན་ཏེ། དེ་ལ་མཐའ་སྐོར་དུ་དཔག་ཚད་ལྔ་བརྒྱ་ཡོད་དོ། །དཔངས་སུ་དཔག་ཚད་ཕྱེད་དང་སུམ་བརྒྱ་དེའི་གནས་ན་ཡང་དངོས་གྲུབ་ཅན་ཐམས་ཅད་གནས་པའོ། །རིའི་རྒྱལ་པོ་མུ་ཁྱུད་འཛིན་དང་ཞེས་བྱ་བ་ནི། རིའི་རྒྱལ་པོ་རྣམ་འདུད་ནས་དཔག་ཚད་སྟོང་ཉིས་བརྒྱ་ལྔ་བཅུ་བོར་ཏེ། དཔག་ཚད་བརྒྱད་ཁྲི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་པ། དཔག་ཚད་དྲུག་བརྒྱ་ཉི་ཤུ་རྩ་ལྔ་ནི་ཆུ་ལས་གྱེན་དུ་འཕགས་པའོ། །དཔངས་སུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་ཏེ། གསེར་ལས་གྲུབ་པ། དེ་ན་རྒྱལ་ཆེན་བཞིའི་གྲོང་དང་གྲོད་
ཁྱེར་དང་ལྗོངས་གནས་སོ། །ཅིའི་ཕྱིར་མུ་ཁྱུད་འཛིན་ཞེས་བྱ་ཞེ་ན། རིའི་རྒྱལ་པོ་མུ་ཁྱུད་འཛིན་གྱི་རྩེ་མོ། །དབྱིབས་ལེགས་ཤིང་བལྟ་ན་སྡུག་ལ་མཛེས་པ་ནི། དཔེར་ན་ཤིང་རྟའི་མུ་ཁྱུད་བཞིན་ཏེ། དེ་བས་ན་རིའི་རྒྱལ་པོ་མུ་ཁྱུད་འཛིན་ཞེས་བྱའོ། །རིའི་རྒྱལ་པོ་འཁོར་ཡུག་དང་ཞེས་བྱ་བ་ནི། ཕྱིའི་རྒྱ་མཚོ་བོར་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན། དཔག་ཚད་སུམ་བརྒྱ་རྩ་ཕྱེད་དང་བཅུ་གསུམ་ནི་ཆུ་ལས་གྱེན་དུ་འཕགས་སོ། །རྔམས་སུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ། ལྕགས་ལས་གྲུབ་པ། དེ་ན་གནོད་སྦྱིན་གོས་སྔོན་པོ་ཅན་རྣམས་གནས་སོ། །ཅིའི་ཕྱིར་རིའི་རྒྱལ་པོ་འཁོར་ཡུག་རི་ཞེས་བྱ་ཞེ་ན། རིའི་རྒྱལ་པོ་འཁོར་ཡུག་རི་དེ་དང་དེ་དག་ན། ཇི་ལྟར་གསེར་གྱི་འཁོར་ལོ་ཡོད་པ་བཞིན་དུ། རི་གཞན་དག་ལ་མེད་པ་དང༌། གཞན་ཡང་རིའི་རྒྱལ་པོ་འཁོར་ཡུག་རིས་གླིང་བཞི་བ་འདི་འཁོར་ལོའི་ཚུལ་དུ་བསྐོར་ཏེ། དེའི་ཕྱིར་རིའི་རྒྱལ་པོ་འཁོར་ཡུག་རི་ཞེས་བྱའོ། །རིའི་རྒྱལ་པོ་འཁོར་ཡུག་ཆེན་པོ་དང་ཞེས་བྱ་ནི་སྟོང་གསུམ་གྱི་སྟོང་འཇིག་རྟེན་ཁམས་རྣམས་བསྐོར་བ། འོག་ནི་གསེར་གྱི་ས་གཞི་ཡན་ཆོད་ཡོད་པ། སྟེང་ནི་ཚངས་པའི་འཇིག་རྟེན་མན་ཆད་ཡོད་པའོ། །གཞི་ནི་ལྕགས་ལས་བྱས་པ། དེས་བསྐོར་བ་ནི་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་ཞིང་ཁམས་སུ་ཤེས་པར་བྱའོ། །ཁྱབ་པ་ཆེ་བས་ན་འཁོར་ཡུག་ཆེན་པོར་བཏགས་སོ། །རིའི་རྒྱལ་པོ་དབང་པོའི་བྲག་དང་ཞེས་བྱ་བ་ནི། རི་རབ་ཀྱི་སྟེང་གིས་གཞི་ན་སུམ་ཅུ་རྩ་གསུམ་པའི་གྲོང་ཁྱེར་བལྟ་ན་སྡུག་ཅེས་བྱ་བ། ཆུར་དཔག་ཚད་ཉིས་སྟོང་ལྔ་བརྒྱ། རྒྱར་ཡང་དེ་དང་འདྲ་སྟེ། མཐར་སྐོར་དུ་ཁྲི་ཡོད་པ། གསེར་གྱིར་བས་བསྐོར་བ་སྟེ། ར་བ་དེ་ལ་འཕང་དུ་དཔག་ཚད་ཕྱེད་པ་སྟེ། རིན་པོ་ཆེ་སྣ་བཞི་ལས་གྲུབ་པའི་ལྕོག་བཞི་ཡོད་དེ། ལྷའི་གྲོང་ཁྱེར་དེ་ན་སྒོ་དགུ་བརྒྱ་དགུ་བཅུ་རྩ་དགུ་ཡོད་དོ། །སྒོ་རེ་རེ་ལ་འཕང་དུ་དཔག་ཚད་ཕྱེད་དང་གསུམ་ཞེད་དུ་ཕྱེད་དང་གཉིས་པ། སྒོ་རེ་རེ་ལ་རིན་པོ་ཆེ་སྣ་བཞི་ལས་བྱས་པའི་གཟེར་སྐར་མའི་གཟུགས་སུ་བྱས་པ་བཞི་བཞི་ཡོད་དོ། །སྒོར་རེ་ལ་སུམ་ཅུ་རྩ་གསུམ་པའི་རུང་མགོ་ཆ་གོན་ཞིང་མཚོན་ཆ་ཐོགས་པ་ལྔ་བརྒྱ་ལྔ་བརྒྱ་བཀོད་དོ།།
གྲོང་ཁྱེར་དེའི་དབུས་ན་ལྷའི་དབང་པོ་བརྒྱ་བྱིན་གྱི་ཁང་བཟངས་རྣམ་པར་རྒྱལ་བྱེད་ཅེས་བྱ་བ། ཆུར་དཔག་ཚད་ཉིས་བརྒྱ་ལྔ་བཅུ། རྒྱར་ཡང་དེ་དང་འདྲ་སྟེ། མཐའ་སྐོར་དུ་སྟོང་ཡོད་པ། ལྷའི་གྲོང་ཁྱེར་ལས་དཔག་ཚད་ཕྱེད་དང་ལྔ་གྱེན་དུ་འཕགས་སོ། །རྨང་རྟེན་དུ་ཡང་རིན་པོ་ཆེ་སྣ་བཞི་ལས་བྱས་པ། དེའི་ཕྱིར་དབང་པོའི་བྲག་ཅེས་བྱའོ། །རིའི་རྒྱལ་པོ་ཚངས་པ་ལྡན་དང་ཞེས་བྱ་བ་ནི། དེ་ཡང་བསམ་གཏན་དང་པོ་ལ་གནས་ཏེ། ཚངས་པ་གང་ན་གནས་བ་ན་ཚངས་ལྡན་ནོ། །རིའི་རྒྱལ་པོ་དཔལ་ལྡན་དང་ཞེས་བྱ་བ་ནི། འཛམ་བུའི་གླིང་ན་གནས་ཏེ། དཔལ་གྱི་རིའི་བྱང་ཕྱོགས་ན་རྒྱར་དཔག་ཚད་སུམ་བརྒྱ་ཡོད་དེ། དཔངས་སུ་ཡང་སུམ་བརྒྱའོ། །དེའི་ས་གཞི་ནི་དཔལ་དང་ལྡན་པས་ན་དཔལ་ལྡན་ནོ། །རིའི་རྒྱལ་པོ་བལྟ་ན་སྡུག་དང་ཞེས་བྱ་བ་ནི། རིའི་རྒྱལ་པོ་སེང་ལྡེང་ཅན་ནས་དཔག་ཚད་ཁྲི་བོར་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱིས་གཞི་ཆེན་པོ་ལ་བརྟེན་ཏེ། དཔག་ཚད་ལྔ་སྟོང་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲའོ། །དབྱིབས་ལེགས་ཤིང་བལྟ་ན་སྡུག་ལ་མཛེས་པ། གསེར་ལས་གྲུབ་པ་དེ་ན་རྒྱལ་ཆེན་བཞིའི་གྲོང་དང་གྲོང་ཁྱེར་དང་ལྗོངས་གནས་སོ། །ཅིའི་ཕྱིར་རིའི་རྒྱལ་པོ་བལྟ་ན་སྡུག་ཅེས་བྱ་ཞེ་ན། རིའི་རྒྱལ་པོ་བལྟ་ན་སྡུག་གི་རྩེ་མོ་ཇི་ལྟར་དབྱིབས་ལེགས་ཤིང་བལྟ་ན་སྡུག་ལ་མཛེས་པ་བཞིན་དུ་རི་གཞན་དག་མེད་དེ་དེའི་ཕྱིར་ན་རིའི་རྒྱལ་པོ་བལྟ་ན་སྡུག་ཅེས་བྱའོ། །རིའི་རྒྱལ་པོ་ཤིན་ཏུ་རྒྱས་དང་ཞེས་བྱ་བ་ནི། རྒྱ་གར་ཡུལ་དང་བོད་ཡུལ་བར་ན་རིའི་རྒྱར་དཔག་ཚད་གསུམ་ཡོད་པ། དཔངས་སུ་ཡང་དེ་བཞིན་ཏེ། སའི་རིར་གྲགས་པ། མཐའ་སྐོར་དུ་གླིང་བཞིར་བསྐོར་བའོ། །རིའི་རྒྱལ་པོ་རིན་ཆེན་འབྱུང་གནས་དང་ཞེས་བྱ་བ་ནི། ཟངས་ཀྱི་གླིང་དང་རིན་ཆེན་གླིང་གི་བར་ན་གནས་ཏེ། རིན་པོ་ཆེ་སྣ་ཚོགས་ལས་གྲུབ་པ། རྒྱ་མཚོ་ཆེན་པོའི་དབུས་ན་ཡོད་པ། མཐའ་སྐོར་དུ་དཔག་ཚད་ལྔ་བརྒྱ་ཡོད་པ། དཔངས་སུ་དཔག་ཆད་སུམ་བརྒྱ། རྒྱ་མཚོའི་རིན་པོ་ཆེ་ཐམས་ཅད་ཀྱང་དེ་ནས་བྱུང་ངོ༌། །རིའི་རྒྱལ་པོ་སྲིན་བུ་ཅན་དང་ཞེས་བྱ་བ་ནི། རྒྱ་གར་དང་བལ་ཡུལ་གྱི་བར་ན་ཡོད་དེ། མཐའ་སྐོར་དུ་དཔག་ཚད་སུམ་བརྒྱ། དཔངས་སུ་དཔག་ཚད་ལྔའོ། །སེམས་
ཅན་ཐམས་ཅད་གནས་པའི་ཕྱིར་ན་སྲིན་བུ་ཅན་ཞེས་བཏགས་སོ། །རིའི་རྒྱལ་པོ་ནོར་བུའི་རྫ་དང་ཞེས་བྱ་བ་ནི། བྱང་གི་སྒྲ་མི་སྙན་གྱི་གླིང་གི་བྱང་ངོས་ན་ཡོད་དེ། མཐའ་སྐོར་དུ་དཔག་ཚད་དྲུག་བརྒྱ། དཔངས་སུ་བཞི་བརྒྱའོ། །དེའི་ས་ན་ཡིད་བཞིན་གྱི་ནོར་བུ་བཞིན་དུ་ཡོད་བས་ན་ནོར་བུའི་རྫ་ཞེས་བྱའོ། །རིའི་རྒྱལ་པོ་ཐགས་བཟངས་རིས་དང་ཞེས་བྱ་བ་ནི། རི་རབ་ཀྱི་སྟེང་གི་བྱང་ངོས་ན། ལྷ་མ་ཡིན་གྱི་གནས་ཀྱི་དབུས་ན་ལྷ་མ་ཡིན་གྱི་རྒྱལ་པོ་ཐགས་བཟངས་རིས་ཀྱི་བཞུགས་ས། དེ་བཞུགས་པའི་ཕྱིར་ན་ཐགས་བཟངས་རིས་ཞེས་བྱའོ། །རིའི་རྒྱལ་པོ་རྡོ་རྗེ་འབྱུང་གནས་དང་ཞེས་བྱ་བ་ནི། བལ་ཡུལ་གྱི་ནུབ་ངོས་ན་སྤྲེའུའི་རྒྱལ་པོ་ཧ་ལུ་མ་དྷའི་ལག་གི་བར་ནས་ཤོར་བའི་རི། དེ་ལ་མཐའ་སྐོར་ལ་དཔག་ཚད་ལྔ། འཕང་དུ་དཔག་ཚད་གཉིས། བྲག་རྡོ་རྗེ་ལྟ་བུ་ཡོད་པའི་ཕྱིར་ན། རྡོ་རྗེའི་བྲག་ཅེས་བྱའོ། །རིའི་རྒྱལ་པོ་འགྲམ་ལྡན་དང་ཞེས་བྱ་བ་ནི། བལ་ཡུལ་གྱི་ཤར་ཕྱོགས་ན་སྤྲེའུའི་རྒྱལ་པོ་ཧ་ལུ་མ་དྷས་པོར་བ། མཐའ་སྐོར་ལ་དཔག་ཚད་ལྔ་བཅུ། འཕང་དུ་དཔག་ཚད་དྲུག་གོ །འགྲམ་པ་བཞིན་དུ་སྣང་བའི་ཕྱིར་ན་འགྲམ་ལྡན་ཞེས་བྱའོ། །རིའི་རྒྱལ་པོ་ལྷ་མིན་འབབ་དང་ཞེས་བྱ་བ་ནི། རི་སྤོས་ཀྱི་ངད་ལྡན་དེའི་བྱང་ཕྱོགས་དཔག་ཚད་ཉི་ཤུ་ན། གསེར་གྱི་བྲག་བྱ་སྐྱིབས་ལྷ་མ་ཡིན་གྱི་ངོས་བྱ་སྐྱིབས་ཞེས་བྱ་བ་ཡོད་དེ། ཆུར་དཔག་ཚད་ལྔ་བཅུ། ཞེང་དུ་དཔག་ཚད་ལྔ་བཅུ། མཐའ་སྐོར་དུ་དཔག་ཚད་ཉིས་བརྒྱ། འཕང་དུ་དཔག་ཚད་ཕྱེད་དང་བཞི་ཡོད་པ། དབྱིབས་ལེགས་ཤིང་བལྟ་ན་སྡུག་ལ་མཛེས་བའོ། །རིའི་རྒྱལ་བོ་གློག་འོད་དང་ཞེས་བྱ་བ་ནི། ནུབ་ཕྱོགས་བ་ལང་སྤྱོད་ཀྱི་ཤར་ཕྱོགས་དཔག་ཚད་ལྔ་བརྒྱའི་བར་ན་རི་བོ་ཡོད་དེ། མཐའ་སྐོར་དུ་དཔག་ཚད་སུམ་བརྒྱ། འཕང་དུ་དཔག་ཚད་ཉིས་བརྒྱ། རྒྱུ་གསེར་ལས་བྱས་པ། གློག་གི་འོད་བཞིན་ལྷན་ནེ་ལྷང་ངེ་ཡོད་བས་གློག་ཅེས་བྱའོ། །རིའི་རྒྱལ་པོ་ཁྱབ་གནས་དང་ཞེས་བྱ་བ་ནི། ལྷོའི་འཛམ་བུའི་གླིང་བསྐོར་བ་མཐའ་སྐོར་དུ་འཛམ་བུའི་གླིང་ཙམ་ཡོད་དེ། འཕང་དུ་དཔག་ཚད་ཁྲི་ཡོད་པ། རྒྱ་ཆེ་བས་ཁྱབ་གནས་ཞེས་བྱའོ། །རིའི་རྒྱལ་ཟླ་འོད་དང་ཞེས་བྱ་བ་ནི། ཤར་གྱི་ལུས་འཕགས་ཀྱི་ནུབ།
དཔག་ཚད་ལྔ་བརྒྱ་ན་ཤེལ་ལས་གྲུབ་པའི་རི་ཡོད་དེ། མཐའ་སྐོར་དུ་དཔག་ཚད་ཁྲི་ཡོད་པ། འཕང་དུ་དཔག་ཚད་ལྔ་སྟོང་ངོ༌། །ཟླ་བ་བཞིན་དུ་བསིལ་བས་ན་ཟླ་འོད་ཅེས་བྱའོ། །རིའི་རྒྱལ་པོ་བྲག་བཟངས་དང་ཞེས་བྱ་བ་ནི། རྒྱ་གར་གྱི་ནུབ་བྱང་མཚམས་ན་ཀ་ལིངྒའི་འགྲམ་ན་གནོད་སྦྱིན་ཀུ་བེ་རའི་གནས་ཡིན་ཏེ། རིན་པོ་ཆེ་སྣ་བདུན་ལས་གྲུབ་པའི་མཐའ་སྐོར་དཔག་ཚད་ལྔ་བརྒྱ། འཕང་དུ་སུམ་བརྒྱ། གཞན་པས་བཟང་བའི་ཕྱིར་ན་བྲག་བཟངས་ཞེས་བྱའོ། །རིའི་རྒྱལ་པོ་ཉི་མ་མཛེས་དང་ཞེས་བྱ་བ་ནི། གཉའ་ཤིང་འཛིན་ཡང་ཟེར་རིའི་རྒྱལ་པོ་རི་རབ་ནས་དཔག་ཚད་བརྒྱད་ཁྲི་བོར་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞིལ་བརྟེན་ཏེ། དཔག་ཚད་བཞི་ཁྲི་ནི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དད་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་པ། གསེར་ལས་གྲུབ་པ་སྟེ། དེ་ན་རྒྱལ་ཆེན་བཞིའི་གྲོང་དང་གྲོང་ཁྱེར་དང་ལྗོངས་གནས་སོ། །རིའི་རྒྱལ་པོ་ཐིགས་པ་དང་ཞེས་བྱ་བ་ནི། ཟངས་གླིང་གི་མདུན་ན་རི་བོ་ཆེན་པོ་ཡོད་དེ། སྲིན་མོའམ་སྲིན་པོ་རྒྱུ་བ། མཐའ་སྐོར་དུ་དཔག་ཚད་བརྒྱད་པ། འཕང་དུ་དཔག་ཚད་ལྔ་ཡོད་པ། ཐིགས་པ་བཞིན་དུ་སྣང་བས་ན་ཐིགས་པ་ཞེས་བྱའོ། །རིའི་རྒྱལ་པོ་འབིགས་བྱེད་དང་ཞེས་བྱ་བ་ནི། དེ་ཡང་གསེར་གླིང་ན་ཡོད་དེ་ཕྱིའི་རྒྱ་མཚོའི་འགྲམ་མཐའ་སྐོར་དུ་དཔག་ཚད་ཕྱེད་དང་ཉིས་བརྒྱ་ཡོད་དེ། འཕང་དུ་དཔག་ཚད་བརྒྱའོ། །རི་དེ་ནི་མཚོན་བཞིན་དུ་ཡོད་དེ། དེའི་ཕྱིར་འབིགས་བྱེད་ཅེས་བྱའོ། །རིའི་རྒྱལ་པོ་ཟླ་བའི་བྲག་དང་ཞེས་བྱ་བ་ནི། ཨོ་ཌྱན་གྱི་ཡུལ་གྱི་ཤར་ཕྱོགས་དཔག་ཚད་གསུམ་ན། རི་དེའི་མཐའ་སྐོར་དུ་དཔག་ཚད་དྲུག་ཡོད་དེ། འཕང་དུ་དཔག་ཚད་ཕྱེད་དང་གཉིས་སོ། །དེའི་རྩེ་མོ་ལ་ཟླ་བ་བཞིན་དུ་གནས་པ་ཟླ་བའི་བྲག་ཅེས་བྱའོ། །རིའི་རྒྱལ་པོ་སྣ་ཚོགས་བརྩེགས་དང་ཞེས་བྱ་བ་ནི། རྒྱ་ནག་པོའི་ངོས་ན་རི་བོ་རྩེ་ལྔ་བ་མཐའ་སྐོར་དུ་དཔག་ཚད་ལྔ་བརྒྱ་པ། འཕང་དུ་དཔག་ཚད་ཕྱེད་དང་སུམ་བརྒྱ། དཀར་པོ་དང༌། སེར་པོ་དང༌། དམར་པོ་དང༌། སྔོན་པོ་དང༌། ཁ་དོག་མཛེས་ཤིང་སྣང་བས་ན་སྣ་ཚོགས་མཛེས་ཞེས་བྱའོ། །རིའི་རྒྱལ་པོ་མ་ལ་ཡ་དང་ཞེས་བྱ་བ་ནི། ཟངས་གླིང་གི་ལྷོ་ངོས་ན་ཙནྡན་གྱི་
ནགས་གསེབ་ཡོད་དེ། མཐའ་སྐོར་དུ་དཔག་ཚད་བརྒྱ། འཕང་དུ་དཔག་ཚད་བརྒྱའོ། །དེའི་ལྷོ་ཕྱོགས་ན་བྱ་ཁྱུང་ཡོད་པ་སྟེ། ཤིན་ཏུ་དྲང་བའི་ཕྱིར་ན་མལ་ཡར་བཏགས་སོ། །རིའི་རྒྱལ་པོ་གསེར་གྱི་རྩེ་མོ་དང་ཞེས་བྱ་བ་ནི། གཤོལ་མདའ་འཛིན་ཞེས་བྱ་བའོ། །རིའི་རྒྱལ་པོ་གཉའ་ཤིང་འཛིན་ལས་དཔག་ཚད་བཞི་ཁྲི་བོར་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ལ་བརྟེན། དཔག་ཚད་ཉི་ཁྲི་ཆུ་ལས་གྱེན་དུ་འཕགས་སོ། །ཞེང་དུ་ཡང་དེ་དང་འདྲའོ། །དབྱིབས་ལེགས་ཤིང་བལྟ་ན་སྡུག་ལ་མཛེས་པ། གསེར་ལས་གྲུབ་སྟེ། དེ་ན་རྒྱལ་ཆེན་བཞི་བའི་གྲོང་དང་གྲོང་ཁྱེར་དང་ལྗོངས་གནས་སོ། །ཅིའི་ཕྱིར་རིའི་རྒྱལ་པོ་གཤོལ་མདའ་འཛིན་ཞེས་བྱ་བ་ནི། རིའི་རྒྱལ་པོ་གཤོལ་མདའ་འཛིན་གྱི་རྩེ་མོ་དབྱིབས་ལེགས་ཤིད་བལྟ་ན་སྡུག་ལ་མཛེས་པ། དཔེར་ན་གཤོལ་མདའ་བཞིན་ཏེ། དེའི་ཕྱིར་ན་གཤོལ་མདའ་འཛིན་ཞེས་བྱའོ། །རིའི་རྒྱལ་པོ་ཀུན་ནས་འགྲོ་དང་ཞེས་བྱ་བ་ནི། ཏི་སེ་གངས་ཀྱི་རིའི་བྱང་ངོས་ན། ཐ་མལ་བའི་ཡུལ་གྱི་སོ་མཚམས། མཐའ་སྐོར་དུ་དཔག་ཚད་ལྔ་བརྒྱ། འཕང་དུ་དཔག་ཚད་ལྔའོ། །འཛམ་བུའི་གླིང་དུ་ཁྱབ་བའི་ཕྱིར་ན་ཀུན་ནས་འགྲོ་ཞེས་བྱའོ། །རིའི་རྒྱལ་པོ་ལག་བཟངས་དང་ཞེས་བྱ་བ་ནི། གསེར་གྱི་རི་སྟེ་རྒྱ་མཚོའི་དབུས་ན་གནས་ཏེ། འོག་གསེར་གྱིས་གཞིལ་ཐུག་པ། ཆུ་ལས་འཕགས་པ་ནི་དཔག་ཚད་བརྒྱད་སྟོང་འཕགས་སོ། །ལག་པ་བཞིན་དུ་གནས་པས་ན་ལག་བཟངས་ཞེས་བྱའོ། །རིའི་རྒྱལ་པོ་ནོར་བུ་ལྡན་དང་ཞེས་བྱ་བ་ནི། སྒྲ་མི་སྙན་གྱི་ཤར་ཕྱོགས་ན་ནོར་བུ་རིན་པོ་ཆེ་སྣ་ཚོགས་ཡོད་པ། མཐའ་སྐོར་དུ་དཔག་ཚད་ལྔ་བརྒྱ། འཕང་དུ་དཔག་ཚད་ལྔ་བརྒྱའོ། །ནོར་བུ་རིན་པོ་ཆེ་ཐམས་ཅད་དེ་ལ་ལྡན་ཏེ། དེ་ལྟ་བས་ན་ནོར་བུ་ལྡན་ཞེས་བྱའོ། །རིའི་རྒྱལ་པོ་སྡེ་བཟངས་དང་ཞེས་བྱ་བ་ནི། བ་ལང་སྤྱོད་ཀྱི་ནུབ་ངོས་ན། དཔག་ཚད་ཁྲི་མཐའ་སྐོར་དུ་ཡོད་པ། དཔག་ཚད་ལྔ་སྟོང་འཕང་དུའོ། །ཤིན་ཏུ་དབྱིབས་ལེགས་པ་བལྟ་ན་སྡུག་པའི་ཕྱིར་ན། སྡེ་བཟངས་སུ་བཏགས་པའོ། །རིའི་རྒྱལ་པོ་ཚངས་པའི་མཆུ་དང་ཞེས་བྱ་བ་ནི། ཆུ་གངྒའའི་འགྲམ་ག་ཡ་ཞེས་བྱ་བ་ན། རི་བོ་རྐེད་སུམ་ཉག་ཡོད་དེ། མཐའ་སྐོར་དཔག་ཚད་བརྒྱད་ཡོད་དོ། །རྐེད་ཉག་ལ་དཔག་ཚད་རེ་རེ། འཕང་
དུ་ཡང་ལྔ་བཅུའོ། །དེ་ན་ཚངས་པ་གནས་པའི་ཕྱིར། ཚངས་པའི་མཆུ་ཞེས་བྱའོ། །རིའི་རྒྱལ་པོ་རིག་བྱེད་སྲུང་དང་ཞེས་བྱ་བ་ནི། དེ་ཡང་དེའི་རྩ་ན་ཡོད་དེ། དབྱིབས་དང་རྒྱ་དང་འཕང་ཡང་དེ་བཞིན་ནོ། །དེ་ལ་ཚངས་བ་གནས་ཤིང་རིག་བྱེད་བཞི་གནས་དེ་ནས་བྱུང་བས་ན་རིག་བྱེད་ལྡན་ཞེས་བྱའོ། །རིའི་རྒྱལ་པོ་བ་ལང་སྣ་དང་ཞེས་བྱ་བ་ནི། བལ་ཡུལ་གྱི་བྱང་ངོས་ན་ཁྱབ་འཇུག་གི་ལྷ་གནས་པ། དཔག་ཚད་བཞི་ནི་མཐའ་སྐོར་འཕང་དུ་ནི་གསུམ་མོ། །བ་ལང་གི་སྣ་བཞིན་དུ་རྩེ་མོ་ཡོད་པའི་ཕྱིར་ན་བ་ལང་སྣ་ཞེས་བྱའོ། །རིའི་རྒྱལ་པོ་སྣ་ཚོགས་ཕྲེང་དང་ཞེས་བྱ་བ་ནི། འཛམ་བུ་གླིང་གི་བྱང་ངོས་ན་རྒྱ་ནག་པོའི་བྱང་ཤར་མཚམས་ན་གནས་པ། མཐའ་སྐོར་དུ་དཔག་ཚད་ཁྲི་ཡོད་པ། འཕང་དུ་དཔག་ཚད་ལྔ་སྟོང་ཡོད་པ། རྩེ་མོ་ལ་ཕྲེང་བ་བཞིན་དུ་གནས་པས་ན་སྣ་ཚོགས་ཕྲེང་ཞེས་བྱའོ། །རིའི་རྒྱལ་པོ་མི་འཇིགས་སྣ་ཚོགས་དང་ཞེས་བྱ་བ་ནི། དེ་ནི་ནུབ་ཀྱི་བ་ལང་སྤྱོད་ཀྱི་ནུབ་ངོས་ན་གནས་ཏེ། མཐའ་སྐོར་ནི་དཔག་ཚད་ལྔ་བརྒྱ། འཕང་དུ་དཔག་ཚད་ཕྱེད་དང་སུམ་བརྒྱའོ། །གཞི་ལྕགས་ལས་གྲུབ་པ། དེ་ལ་གནས་པའི་སེམས་ཅན་རྣམས་ལ་འཇིགས་པ་མེད་པས་ན་མི་འཇིགས་སྣ་ཚོགས་ཞེས་བྱའོ། །རིའི་རྒྱལ་པོ་རལ་གྲི་དང་ཞེས་བྱ་བ་ནི། འཛམ་བུའི་གླིང་གི་ལྷོ་ངོས་ན། ཡུལ་སྤྱི་པོ་གཙུག་ན་རི་རལ་གྲིའི་དབྱིབས་སུ་ཡོད་པ། མཐའ་སྐོར་དུ་དཔག་ཚད་བརྒྱ། འཕང་དུ་ཉིས་བརྒྱའོ། །རལ་གྲི་བཞིན་དུ་རྩེ་མོ་རྣོ་བས་ན། རལ་གྲི་ཞེས་བྱའོ། །རིའི་རྒྱལ་པོ་གདུང་བ་དང་ཞེས་བྱ་བ་ནི། འཛམ་བུའི་གླིང་གི་དབུས་ན་ཡོད་དེ། དབྱིབས་ཐོ་བ་དང་འདྲ་བ། མཐའ་སྐོར་དུ་དཔག་ཚད་དྲུག་ཡོད་པ། འཕང་དུ་དཔག་ཚད་བརྒྱད་དོ། །གདུང་བའི་ཚུལ་དུ་ཡོད་པའི་ཕྱིར་ན་གདུང་བ་ཞེས་བྱའོ། །རིའི་རྒྱལ་པོ་མིག་བསྐུ་དང་ཞེས་བྱ་བ་ནི། སྒྲ་མི་སྙན་གྱི་ཤར་ཕྱོགས་ན་རི་ཆེན་པོ་མིག་བསྐུ་ཞེས་བྱ་བར་གྲགས་པ། མཐའ་སྐོར་དུ་དཔག་ཚད་བརྒྱ་པ། འཕང་དུ་དཔག་ཚད་སུམ་བརྒྱའོ། །མི་མི་ཐར་བ། མི་མ་ཡིན་གནས་པའོ། །རིའི་རྒྱལ་པོ་མུཉྫ་དང་ཞེས་བྱ་བ་ནི། མདའ་རིས་ཀྱི་ཤར་ངོས་གངས་ཀྱི་རི་རྩེ་གཅིག་ཏུ་ཡོད་པ། མཐའ་སྐོར་དུ་དཔག་ཚད་ལྔ་བརྒྱ་ཡོད་པ། འཕང་དུ་དཔག་ཚད་སུམ་
བརྒྱ་གནས་པ། རྩེ་མོ་རྣོ་བའོ། །དེ་ན་གནས་པ་ནི་དབང་ཕྱུག་ཆེན་པོའི་བུ་གཞོན་ནུ་གདོང་དྲུག་གནས་སོ། །རིའི་རྒྱལ་པོ་རི་དགས་ཅན་དང་ཞེས་བྱ་བ་ནི། བལ་ཡུལ་གྱི་བྱང་ངོས་ན་གནས་ཏེ། དབྱིབས་རི་དགས་ཤར་ན་བཞིན་དུ་གནས་ཏེ། མཐའ་སྐོར་དུ་དཔག་ཚད་ལྔ་པ། འཕང་དུ་དཔག་ཚད་གསུམ་མོ། །རི་དགས་བཞིན་དུ་ཡོད་པས་ན་རི་དགས་ཅན་ཞེས་བྱའོ། །རིའི་རྒྱལ་པོ་འཇོམས་བྱེད་དང་ཞེས་བྱ་བ་ནི། བལ་ཡུལ་དང་རྒྱ་གར་གྱི་མཚམས་ན། མཐའ་སྐོར་དུ་དཔག་ཚད་བཞི་ཡོད་པ། འཕང་དུ་གཉིས་སོ། །རིའི་རྒྱལ་པོ་ཏི་སེ་དང་ཞེས་བྱ་བ་ནི། གངས་ཀྱི་རི་ཡིན་ཏེ། དེ་ཡང་རྩེ་གསུམ་དུ་ཡོད་པ། ལྷ་མ་ཧཱ་དེ་བ་ཡོད་པ། མཐའ་སྐོར་དཔག་ཚད་ལྔ་བརྒྱ་ཡོད་པ། འཕང་དུ་ཡང་ལྔ་བརྒྱའོ། །རིའི་རྒྱལ་པོ་མི་མཇེད་དང་ཞེས་བྱ་བ་ནི། ཏི་སེའི་བྱང་ངོས་ན་དཔག་ཚད་ལྔ་ཡོད་པའི་བར་ན། མཐའ་སྐོར་དུ་དཔག་ཚད་བརྒྱ། འཕང་དུ་དཔག་ཚད་སུམ་ཅུའོ། །རིའི་རྒྱལ་པོ་ཙནྡན་ཕྲེང་དང་ཞེས་བྱ་བ་ནི། མ་ལ་ཡའི་ཤར་ཕྱོགས་ཀྱི་བར་ན་དཔག་ཚད་ལྔ་ཡོད་དེ། ཙནྡན་གྱི་ནགས་གསེབ་སྦྲུལ་གདུག་པ་ཅན་ཡོད་པ། མཐའ་སྐོར་དུ་དཔག་ཚད་བརྒྱ་ཡོད་པ། འཕང་དུ་ཡང་བརྒྱའོ། །རིའི་རྒྱལ་པོ་སྟོབས་འཛིན་ཁྱམ་དང་ཞེས་བྱ་བ་ནི། རྒྱ་ནག་པོ་ན་གནས་ཏེ། མཐའ་སྐོར་དུ་དཔག་ཚད་ཁྲི་ཡོད་པ། འཕང་དུ་དཔག་ཚད་ལྔ་བརྒྱ་ཡོད་པ། རིའི་རྒྱལ་པོ་དབང་ཆེན་དང་ཞེས་བྱ་བ་ནི། རྒྱ་བོད་ཀྱི་བར་ན་རི་བོ་ཆེན་པོ། མཐའ་སྐོར་དུ་དཔག་ཚད་བརྒྱ། འཕང་དུ་དཔག་ཚད་ལྔ་བཅུའོ། །རིའི་རྒྱལ་པོ་དུས་འབྲི་བྱེད་དང་ཞེས་བྱ་བ་ནི། བལ་ཡུལ་དང་རྒྱ་གར་འཁོར་ནས་ཡོད་པ། མཐའ་སྐོར་དུ་དཔག་ཚད་ཁྲི་ཡོད་པ། འཕང་དུ་ལྔ་བརྒྱའོ། །རིའི་རྒྱལ་པོ་སྐེམ་བྱེད་དང་ཞེས་བྱ་བ་ནི། དུས་འབྲི་བྱེད་ཀྱི་བྱང་ངོས་དཔག་ཚད་གཅིག་ན། མཐའ་སྐོར་ཡང་དེ་བཞིན་ནོ། །འཕང་དུ་དཔག་ཚད་དྲུག་བརྒྱའོ། །རིའི་རྒྱལ་པོ་བ་ལང་སྲུང་ཞེས་བྱ་བ་ནི། བལ་ཡུལ་གྱི་ནུབ་ངོས་ན། དབང་ཕྱུག་ཆེན་པོའི་ལྷ་གནས་པ། དཔག་ཚད་ལྔ་མཐའ་སྐོར་རོ། །འཕང་དུ་དཔག་ཚད་གསུམ་མོ། །རིའི་རྒྱལ་པོ་བྱ་རོག་སྒྲ་ཅན་དང་ཞེས་བྱ་བ་ནི། ཟླུམ་བ་རྒྱ་ཆེ་བ་མཐའ་
སྐོར་དུ་དཔག་ཚད་བཅུ་པ། འཕང་དུ་དཔག་ཚད་བཅུའོ། །སངས་རྒྱས་རྣམས་ཀྱི་ཞིང་ཁམས་སུ་གྲགས་པའོ། །རིའི་རྒྱལ་པོ་བརྟེན་པ་འཛིན་དང་ཞེས་བྱ་བ་ནི། རྒྱ་མཚོའི་ནང་ན་གནས་པ། རྒྱ་ཆེ་བ་གསེར་གྱི་ས་གཞི་ལ་ཐུག་བ། རྒྱུ་ཡང་གསེར་ལས་བྱས་པའོ། །རིའི་རྒྱལ་པོ་རྟ་རྣ་རི་དང་ཞེས་བྱ་བ་ནི། རི་བལྟ་ན་སྡུག་པ་དཔག་ཚད་ལྔ་སྟོང་པོར་ཏེ། དཔག་ཚད་བརྒྱད་ཁྲི་ནི་ཆུའི་འོག་གསེར་གྱི་ས་གཞི་ཆེན་པོ་ལ་བརྟེན་ཏེ། དཔག་ཚད་ཉིས་སྟོང་ལྔ་བརྒྱ་ཆུ་ལས་གྱེན་དུ་འཕགས་ཏེ། ཞེང་དུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་བ། དེ་ན་རྒྱལ་ཆེན་བཞིའི་ལྷ་རྣམས་ཀྱི་གྲོང་དང་གྲོང་ཁྱེར་དང་ལྗོངས་གནས་སོ། །ཅིའི་ཕྱིར་རིའི་རྒྱལ་པོ་རྟ་རྣ་རི་ཞེས་བྱ་ན། རིའི་རྒྱལ་པོ་རྟ་རྨ་རིའི་རྩེ་མོ་དབྱིབས་ལེགས་ཤིང་བལྟ་ན་སྡུག་ལ་མཛེས་པ་ནི། དཔེར་ན་རྟའི་རྣ་བ་བཞིན་ཏེ། དེའི་ཕྱིར་རིའི་རྒྱལ་པོ་རྟ་རྣ་རི་ཞེས་བྱའོ། །རིའི་རྒྱལ་པོ་རྣམ་འདུད་དང་ཞེས་བྱ་བ་ནི། རིའི་རྒྱལ་པོ་རྟ་རྣ་རི་ནས་དཔག་ཚད་ཉིས་སྟོང་ལྔ་བརྒྱ་བོར་ནས། དཔག་ཚད་བརྒྱད་ཁྲི་ཆུའི་འོག་ནས་གསེར་གྱི་ས་གཞི་ཆེན་པོ་ལ་བརྟེན་ཏེ། དཔག་ཚད་སྟོང་ཉིས་བརྒྱ་ལྔ་བཅུ་ནི་ཆུ་ལས་གྱེན་དུ་འཕགས་སོ། །རྔམས་སུ་ཡང་དེ་དང་འདྲ་སྟེ། དབྱིབས་ལེགས་ཤིང་བལྟ་ན་སྡུག་ལ་མཛེས་བ། གསེར་ལས་གྲུབ་པ། དེ་ན་རྒྱལ་ཆེན་བཞི་པའི་ལྷ་རྣམས་ཀྱི་གྲོང་དང་གྲོང་ཁྱེར་དང་ལྗོངས་གནས་སོ། །ཅིའི་ཕྱིར་རིའི་རྒྱལ་པོ་རྣམ་འདུད་ཅེས་བྱ་བ་ཞེ་ན། རིའི་རྒྱལ་པོ་རྣམ་པར་འདུད་ཀྱི་རྩེ་མོ་དམའ་ཞིང་འདུད་པ་ནི། དཔེར་ན་གཉན་རུ་བཞིན་ཏེ། དེའི་ཕྱིར་ན་རིའི་རྒྱལ་པོ་རྣམ་པར་འདུད་ཅེས་བྱའོ། །སའི་དཀྱིལ་འཁོར་འདི་ན། རིའི་རྒྱལ་པོ་འདི་དག་དང་ཞེས་བྱ་བ་ནི། རིའི་རྒྱལ་པོ་དེ་རྣམས་ལ་སོགས་པས་གཙོ་བོ་བྱས་པའོ། །གཞན་དག་ཀྱང་ཡོད་པ་དེ་ལ་ལྷ་རྣམས་དང་ཞེས་བྱ་བ་ནི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལ་གནས་པའི་རིའི་རྒྱལ་པོ་ལ་སོགས་པ་རྣམས་སོ། །ལྷ་ལ་སོགས་པའི་འབྱུང་པོ་སྟོང་ཕྲག་བརྒྱད་ཅུ་རྩ་བཞི། བགེགས་རིགས་མི་གཅིག་བ་རི་དེ་རྣམས་ལ་གནས་སོ། །རིག་སྔགས་འཆང་གྲུབ་བ་དང་ཞེས་བྱ་བ་ནི། རི་དེ་རྣམས་ལ་གནས་པའི་རིག་སྔགས་འཆང་
གི་རྒྱལ་པོ་ལ་སོགས་པ་བསམ་གྱིས་མི་ཁྱབ་པ་གནས་པའོ། །རྒྱལ་པོ་འཁོར་དང་བཅས་པ་གང་དག་རྒྱུན་དུ་གནས་པ་ཞེས་བྱ་བ་ནི། རྒྱལ་པོ་བཞི་ཡང་རི་དེ་རྣམས་ལ་རྒྱུའོ། །གཞན་ཡང་རྒྱལ་པོ་རྣམས་ཀྱང་རི་དེ་ལ་རྒྱུ་སྟེ། དེའི་འཁོར་རྣམས་ཀྱང་དེ་ལ་རྒྱུའོ། །རི་དེ་རྣམས་ལ་ཡང་གཟུགས་སྣ་ཚོགས་པ་དང༌། གཟུགས་ཐ་དང་པ་དང༌། འདོད་པའི་གཟུགས་དང༌། གཟུགས་མངོན་པ་དག་རི་དེ་རྣམས་ལ་གནས་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་བསྲུང་བ་གྱིས་ཤིག་ཅེས་བྱ་བ་ནི། གང་ཟག་གང་ཡང་རུང་བ་འདི་ལ་གུས་པར་བྱས་ན། རིའི་རྒྱལ་པོ་དེ་རྣམས་ལ་ཡོད་པའི་ལྷ་ལ་སོགས་པ་སྲུང་ཞིང་སྐྱོབ་པར་འགྱུར་རོ། །སྦ་བ་ལ་སོགས་པ་ཞེས་བྱ་བ་ནི། སྔ་མ་གོང་དུ་སོང་བ་བཞིན་དུ་ཤེས་པར་བྱའོ། །སྡིག་པ་ཐམས་ཅད་སོལ་ཅིག །དགེ་བ་རྣམས་ལ་སྣང་བར་གྱུར་ཅིག་ཅེས་བྱ་བ་ནི། སྡིག་པ་ནི་མི་དགེ་བ་བཅུ་སྟེ། མི་དགེ་བ་བཅུ་ནི། ལུས་ལ་གསུམ། ངག་ལ་བཞི། ཡིད་ལ་གསུམ་མོ། །ལུས་ལ་གསུམ་ནི་སྲོག་གཅོད་པ། མ་བྱིན་པར་ལེན་པ། མི་ཚངས་པར་སྤྱོད་པའོ། །ངག་གི་བཞི་ནི། བརྫུན་དང༌། ངག་འཁྱལ་དང༌། ཚིག་རྩུབ་མོ་དང༌། འཕྲ་མའོ། །ཡིད་ཀྱི་གསུམ་ནི་བརྣབ་སེམས་དང༌། གནོད་སེམས་དང༌། ལོག་པར་ལྟ་བ་གསུམ་མོ། །གཞན་ཡང་ལས་དང༌། བག་ཆགས་དང་ཞེས་བྱ་བ་ལ་སོགས་པ་སེལ་བའོ། །ཡང་ན་མཚམས་མེད་པ་ལྔ་བྱས་ཀྱང་སེལ་བའོ། །དེ་རྣམས་ལས་ལོག་པས་ན་སྡིག་པ་ཐམས་ཅད་སེལ་བའོ། །མི་དགེ་བ་སོལ་ཅིག །དོན་རྣམས་ལ་སྣང་བར་གྱུར་ཅེས་བྱ་བ་ནི། རིག་སྔགས་ཀྱི་རྒྱལ་མོ་འདིའི་གཟི་བརྗིད་ཀྱིས་སྡིག་པ་དེ་དག་ཐམས་ཀྱི་ན་ཚ་རིམས་ལ་སོགས་པ་འབྱུང་པའོ། །དེ་རྣམས་རིག་སྔགས་དང་ཐུན་མོང་མ་ཡིན་པའི་དངོས་གྲུབ་སྣང་བའོ། །ཐུན་མོང་ཡང་ལས་བཞི་ལ་སོགས་པའམ། གཞན་ཡང་ཚངས་པ་ལ་སོགས་པའི་དངོས་གྲུབ་བོ། །ཡང་ན་སྲིད་པ་གསུམ་ལ་སྦྱོར་བའི་ས་བཅུའི་བྱང་ཆུབ་སེམས་དཔའི་དངོས་གྲུབ་བོ། །ཐུན་མོང་མ་ཡིན་པའི་དངོས་གྲུབ་ནི། རིག་སྔགས་ཀྱི་ངོ་བོ་ཉིད་ནམ་མཁའ་ལྟ་བུ་སྟེ། རྡོ་རྗེ་ལྟ་བུའི་ཏིང་ངེ་འཛིན་ཐོབ་
བའོ། །གནོད་པ་རྣམས་སོལ་ཅིག་ཅེས་བྱ་བ་ནི། མ་རིག་པའི་དབང་གིས། མི་དགེ་བ་བཅུ་ལས་བདུད་བཞི་འབྱུང་ངོ༌། །བདུད་བཞི་ལས་ཀྱང་ལྷའི་གདོན་ལ་སོགས་པ་བགེགས་རྣམས་བྱུང་བ། ལུས་ཀྱི་ན་ཚ་རིམས་ལ་སོགས་པ་འབྱུང་བའོ། །དེ་རྣམས་རིག་སྔགས་ཀྱི་གཟི་བརྗིད་ཀྱིས་སེལ་བའོ། །མཚན་མོ་བདེ་ལེགས་ཉིན་བདེ་ལེགས། །ཞེས་བྱ་བ་ནི། རྡོ་རྗེ་ལྟ་བུའི་ཏིང་ངེ་འཛིན། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཡུམ། དེའི་གཟི་བརྗིད་ཀྱིས་བདེ་བའོ། །ཉི་མའི་གུང་གི་བདེ་ལེགས་དང༌། ཞེས་བྱ་བ་ནི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ལྷ་དང་ལྷ་མ་ཡིན་ལ་སོགས་པ་འབྱུང་པོ་རྣམས་ཀྱི་གཉེན་པོ་རིག་སྔགས་འདིའི་སྟོབས་ཀྱིས་བདེ་པའོ། །ཉིན་མཚན་ཀུན་གྱི་བདེ་ལེགས་དག །ཅེས་བྱ་བ་ནི། རིའི་རྒྱལ་པོ་དེ་རྣམས་ཀྱིས་ཀྱང༌། རིག་སྔགས་འདིའི་སྟོབས་དང་བྱིན་གྱི་རླབས་ཀྱིས་འབྱུང་པོ་ལ་སོགས་བ་དེ་རྣམས་ཀྱིས་ཀྱང་སྲུང་བ་དང་སྐྱོབ་པར་བྱེད་པའོ། །ཡང་ན་བདེ་བར་འགྱུར་བ་ནི་འཁོར་བའི་སྡུག་བསྔལ་སྤངས་ནས་རིག་སྔགས་ཀྱི་ངོ་བོ་ཐོབ་པའོ། །སངས་རྒྱས་ཀུན་གྱིས་བདག་ལ་སྲོལ། །ཞེས་བྱ་བ་ནི། རྣམ་པར་གཟིགས་དང༌། ཐམས་ཅད་སྐྱོབ་དང༌། ལོག་པར་དད་སེལ་དང༌། གསེར་ཐུབ་དང༌། འོད་སྲུངས་ལ་སོགས་པ་འདས་པའི་སངས་རྒྱས་བསམ་གྱིས་མི་ཁྱབ་པའོ། །མ་འོངས་པ་བྱམས་པ་ལ་སོགས་པ་ཡང་བསམ་གྱིས་མི་ཁྱབ་པའོ། །ད་ལྟར་ཤཱཀྱ་ཐུབ་པས་བདེ་ལེགས་བྱིན་པའོ། །སྭཱ་ཧཱ་ཞེས་བྱ་བ་ནི་བདེ་བར་འགྱུར་བའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལས་རིའི་རྒྱལ་པོ་རྣམས་བཤད་པའི་གནས་སྐབས་ཏེ་བཅུ་བདུན་པའོ།། །།ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་གསུངས་པའོ། །ཁྱོད་ཀྱིས་རྒྱུ་སྐར་གང་དག་ནམ་མཁའ་ལ་རྒྱུ་ཞིང་སྣང་བར་བྱེད་པ་རྣམས་ཀྱི་མིང་ཟུང་ཤིག་ཅེས་བྱ་བ་ནི། དགེ་བ་དང་མི་དགེ་བར་བྱེད་པ། བདེ་བ་དང་མི་བདེ་བར་བྱེད་པ། ལོ་ལེགས་པ་དང་ལོ་ཉེས་པར་བྱེད་པ། ཚེ་རིང་བ་དང་ཚེ་ཐུང་བར་བྱེད་པ། སྤྲོ་རེང་བ་དང་སྤྲོ་ཐུང་བར་བྱེད་པ། ཕྱུག་པ་དང་ལྟོགས་པར་བྱེད་པ། ན་བ་དང་མི་ན་བར་བྱེད་པ། བཞིན་སྡུག་པ་དང་མི་སྡུག་པར་བྱེད་པ། གཟུགས་
བཟང་བ་དང་ངན་པར་བྱེད་པ། དེ་རྣམས་ནི་ནམ་མཁའ་ལ་རྒྱུ་ཞིང༌། འཇིག་རྟེན་གྱི་ཁམས་ཙམ་ལ་གནས་པའི་ལྷ་མོ་ཉི་ཤུ་རྩ་བརྒྱད་དོ། །འདི་ལྟ་སྟེ་ཞེས་བྱ་བ་ནི། རྒྱུ་སྐར་ཉི་ཤུ་རྩ་བརྒྱད་བལྟ་བའོ། །རྒྱུ་སྐར་ཉི་ཤུ་རྩ་བརྒྱད་ཀྱི་ལུས་ཀྱི་ཚད་བསྟན་པ། ཆེ་བ་ལ་ནི་རྒྱང་གྲགས་བཅོ་བརྒྱད། ཆུང་བར་རྒྱང་གྲགས་གསུམ་མོ། །ཕལ་ཆེར་ནི་རྒྱང་གྲགས་བཅུ་གཉིས་སོ། །སྨིན་དྲུག་དང་ཞེས་བྱ་བ་ནི། དེ་ལས་སྐྱེས་པའི་མཚན་མ་ནི་འདི་ལགས་སོ། །དེ་ཡི་གདོང་གི་སོར་བཞི་ན། གཡས་ཕྱོགས་ན་ནི་སྨེ་བ་ཡོད། །སྤུ་ཅན་ནག་ལ་མདོག་ཀྱང་དམར། །ལོངས་སྤྱོད་ཆེ་ཞིང་གྲགས་དང་ལྡན། །མཁས་ཤིང་རབ་ཏུ་དཔལ་འབར་ཏེ། །སྨིན་དྲུག་ལ་ནི་སྐྱེས་པའི་མཚན་མ་དེ་ཡིན་ནོ། །སྣར་མ་དང་ཞེས་བྱ་བ་ནི། གང་ཞིག་བརླ་ཡི་སོར་བཞི་ན། སྨེ་བ་འདི་ཉི་གདའ་བ་སྟེ། སྣར་མ་ལས་ནི་སྐྱེས་པ་སྟེ། །ཤེས་ཤིང་རྟག་ཏུ་ཆོས་ལ་དགའ། །མཁའ་ལ་ལོངས་སྤྱོད་ཕུན་སུམ་ཚོགས། །རྣམ་པ་ཀུན་དུ་མཛེས་དང་ལྡན། །དཔའ་ཞིང་རྒྱལ་བ་ཕུན་སུམ་ཚོགས། །དགྲ་རྣམས་རྟག་ཏུ་རབ་ཏུ་འཇོམས། །མགོ་དང་ཞེས་བྱ་བ་ནི། །མགུལ་པ་ཡི་ནི་མཛུབ་ཕྱེད་ན། །གང་ལ་ཚིག་པ་འདྲ་བ་ཡོད། །དེ་ནི་མགོ་ལས་སྐྱེས་པ་སྟེ། །དཔའ་ཞིང་ལོངས་སྤྱོད་ལྡན་བ་སྟེ། །ལག་དང་ཞེས་བྱ་བ་ནི། མཛུབ་ཀྱི་ཕྱེད་པོ་གཉིས་པ་ལ། །གཡོན་ན་སྨེ་བ་གང་ཡོད་པ། །ལག་ལས་སྐྱེས་པ་ཁྲོ་བ་སྟེ། །དེ་ནི་བླུན་ཞིང་ན་བ་སོ་དང༌། །ཞེས་བྱ་བཞི། མཆན་ཁུང་གཡོན་ན་སྨེ་ནག་ཡོད། །ནབ་སོ་ལས་ནི་སྐྱེས་པ་སྟེ། །ནོར་དང་འབྲུ་རྣམས་འབྱོར་བར་འགྱུར། །དེ་ནི་ཤེས་པ་རྒྱ་ཡང་ཆུང༌། །རྒྱལ་ནི་བཀྲ་ཤིས་ཕུན་སུམ་ཚོགས། །ཞེས་བྱ་བ་ནི། མཚན་མཆོག་དག་ནི་རབ་ཏུ་དགའ། །ཕྱག་གི་མཐིལ་ལ་འཁོར་ལོ་ནི། །ཉི་མ་ལྟ་བུར་རབ་ཏུ་མཛེས། །དབུ་སྐྲ་དག་ནི་ཐམས་ཅད་ཀྱང༌། །གྱེན་དུ་གཡས་འཁྱིལ་ལེགས་པར་ཡོད། །སྐུ་ནི་ཆུ་ཞེང་གབ་པ་སྟེ། །འདྲེན་བས་ཁྱོད་ཀྱི་ཉོན་མོངས་ཐུལ། །དེ་ནི་རྒྱལ་ལས་སྐྱེས་པའོ། །དེ་བཞིན་སྐག་སྟེ་བདུན་པ་ཡིན། །ཞེས་བྱ་བ་ནི། ཚིག་འདྲ་གང་གི་སྙིང་གར་མཆིས། །སྐག་ལས་སྐྱེས་ཏེ་འཐབ་ལ་དགའ། །ཚུལ་ཁྲིམས་འཆལ་ཞིང་འགྲོགས་མི་བདེ། །དེ་ནི་
གཡེམ་ལ་དགའ་བའོ། །དེ་ལྟར་རྒྱུ་སྐར་བདུན་པོ་དག་ནི་ཤར་ཕྱོགས་ཀྱི་སྒོ་ན་གནས་པ་དག་སྟེ། སྐར་མ་བདུན་པོ་དེ་དག་ནི་ཆོས་ཀྱི་དབང་དུ་བྱས་ན། །སའི་ཁམས་སུ་གྱུར་པ་སྟེ། །ལྷ་མོའི་གཟུགས་སུ་སྣང་བའོ། །སྨིན་དྲུག་ནི་དམར་མོ་སྟེ། མེའི་དབྱུག་ཏོ་ཐོགས་པ། མེ་ལ་ཞོན་པ། སྣར་མ་སྔོ་སྐྱ། ལུག་ཐོགས་པ་ཉ་ལ་ཞོན་པའོ། །མགོ་ལྗང་གུ་ལག་ན་ཨུཏྤ་ལ་ཐོགས་པ། ཁ་ཤ་ལ་ཞོན་པའོ། །ལག་དཀར་པོ་ལག་ན་སྦྲུལ་ཐོགས་པ། སྤྲུལ་ལ་ཞོན་པའོ། །ནབ་སོ་སེར་མོ་ལག་ན་རྡོ་རྗེ་དྲིལ་བུ་ཐོགས་པ། ལུག་ལ་ཞོན་པའོ། །རྒྱལ་དམར་པོ་ལག་ན་དབྱུག་པ་ཐོགས་པ། གདན་བུམ་པ་ལ་འདུག་པའོ། །སྐག་སྔོན་མོ་ལག་ན་ལྕགས་ཀྱུ་ཐོགས་པ། བྱ་རོག་ལ་ཞོན་པའོ། །རྒྱན་ཐམས་ཅད་ཀྱིས་བརྒྱན་པ། དབྱིབས་ལེགས་ཤིང་བལྟ་ན་སྡུག་པའོ། །གང་དག་ཤར་ཕྱོགས་སྲུང་ཞིང་ཡོངས་སུ་སྐྱོང་བར་བྱེད་པ་དག་གོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱི་བཀའ་ལས་མི་འདའ་ཞིང༌། རིག་སྔགས་ཀྱི་བྱིན་གྱི་རླབས་ཀྱིས་ཁྱབ་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་བསྲུང་བ་གྱིས་ཤིག་ཅེས་བྱ་བ་ནི། གང་ཟག་གང་གིས་དེ་ལ་གུས་པར་བྱེད་པ་དེ་ལ། ཤར་གྱི་སྐར་མ་བདུན་པོ་དག་གིས་ཀྱང་སྲུང་ཞིང་སྐྱོབ་སྟེ། ཤར་ཕྱོགས་ཀྱི་འཇིགས་པ་ཐམས་ཅད་ལས་སྐྱོབ་པར་བྱེད་པའོ། །སྦ་པ་ལ་སོགས་པ་ཞེས་བྱ་བ་ནི། སྔ་མ་བཞིན་དུ་ཤེས་པར་བྱའོ། །མཆུ་ནི་མི་མཛའ་འཇོམས་པ་དང༌། །ཞེས་བྱ་བ་ནི། འོག་གམ་བྲང་ངམ་རྒྱབ་ཅིག་ན། །གང་ལ་བྱི་སྲན་འདྲ་བ་ཡོད། །མཆུ་ལས་སྐྱེས་ཏེ་ནོར་དང་ལྡན། །བཙུན་ཞིང་ཆོས་དང་ལྡན་པའི་མི། །དེ་བཞིན་གྲེ་དང་ཞེས་བྱ་བ་ནི། ལྟེ་བའི་གཡས་གཡོན་གཉིས་ཀ་ན། །གང་ལ་རྨ་འདྲ་ཡོད་པ་དེ། །དེ་ནི་གྲེ་ལས་སྐྱེས་པ་སྟེ། སེར་སྣ་ཆེ་ཞིང་ཚེ་ཡང་ཐུང༌། །དབོ་གཉིས་དང་ཞེས་བྱ་བ་ནི། ལྟེ་བ་མན་ཆད་སོར་བཞིན། །གང་ལ་སྨེ་བ་རབ་ཡོད་པ། །དབོ་ལས་སྐྱེས་ཏེ་ལོངས་སྤྱོད་ཆེ། །ཁྲིམས་ལྡན་ཤི་འཕོས་མཐོ་རིས་འགྲོ་།མེ་བཞི་ཞེས་བྱ་བ་ནི། སྨེ་བ་དམར་པོ་ཆུ་སོ་ན། །རྐུ་ཞིང་གཡོ་ངན་སྒྱུ་མ་སྟེ། །
བསོད་ནམས་ཆུང་ཞིང་ཤེས་པ་ཞན། །མེ་བཞི་ལས་ནི་སྐྱེས་པའོ། །ནག་པ་ཞེས་བྱ་བ་ནི། མཚན་མ་ལ་ནི་སྨེ་བ་ཡོད། །འདའ་བར་གྱུར་པར་ངེས་པ་ཡང༌། །ནག་པ་ལས་ནི་དེ་སྐྱེས་ཏེ། །འདོད་ཆགས་གླུ་གར་རྟག་ཏུ་དགའ། །ས་རི་དང་ཞེས་བྱ་བ་ནི། མཚན་མའི་འོག་གམ་སྟེང་ན་ནི། སྨེ་བ་སེར་པོ་རབ་ཏུ་གདའ། །མི་མཁས་སྐམ་ཞིང་མང་པོ་སྡང༌། །ས་རི་ལས་ནི་སྐྱེས་པའོ། །ས་ག་ལ་སྟེ་བདུན་པ་ཞེས་བྱ་བ་ནི། བརླ་གཉིས་ཀྱི་ནི་མཛུབ་གང་ན། །སྨེ་བ་དམར་པོ་དེ་བཞིན་ཏེ། །ས་ག་ལས་སྐྱེས་ཤར་པ་མཆོག །སྐྱེས་བ་བུད་མེད་རྣམས་ཀྱིས་བསྐོར། །མཁས་ཤིང་དཔའ་ལ་དགྲ་ཡང་ཐུལ།། རྟག་ཏུ་བདེ་ལ་གནས་པ་སྟེ། །ངོ་ཚ་ཤེས་ཤིང་བརྟན་དང་ལྡན། །ཤི་འཕོས་ནས་ནི་མཐོ་རིས་སྐྱེ། །དེ་ལྟར་རྒྱུ་སྐར་བདུན་པོ་འདི་དག་ནི། །ལྷོ་ཕྱོགས་ཀྱི་སྒོ་ན་གནས་པ་དག་སྟེ་ཞེས་བྱ་བ་ནི། སྐར་མ་བདུན་པོ་དེ་དག་ནི་ཆུའི་ཁམས་སུ་གནས་པའོ། །ལྷ་མོའི་ཚུལ་དུ་གནས་པ་སྟེ། །ལྷོ་ངོས་དག་ན་གནས་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། མཆུ་དཀར་པོ་གྲི་གུག་ཐོགས་པ་གླང་ལ་ཞོན་པ། གྲེ་སེར་པོ་པདྨ་ཐོགས་པ་གདན་རྡོ། དབོ་དཀར་མོ་ལག་ན་རྡོ་རྗེ་ཐོགས་པ་གླང་པོ་ཆེ་ལ་ཞོན་པའོ། །མེ་བཞི་སྔོན་མོ་ལག་ན་རྨ་བྱའི་སྒྲོ་ཐོགས་པ་རྨ་བྱ་ལ་ཞོན་པ། ནག་པ་སེར་མོ་ལག་ན་རིན་པོ་ཆེའི་ཕྲེང་བ་འཛིན་པ་བ་ལ་ཞོན་པ། ས་རི་མདོག་དམར་སྐྱ་ལག་ན་འཕང་མདུང་འཛིན་པ་ཐག་བའི་གདན་ལ་ཞུགས་པ། ས་ག་དུད་ཀ་དགྲ་སྟ་ཐོགས་པ་མིའི་གདན་ལ་བཞུགས་པའོ། །གང་དག་ལྷོ་ཕྱོགས་སྲུང་ཞིང་ཡོངས་སུ་སྐྱོང་པར་བྱེད་པ་དག་གོ་ཞེས་བྱ་བ་ནི། སངས་རྒྱས་ཀྱི་བསྟན་པ་སྲུང་ཞིང༌། སེམས་ཅན་རྣམས་ཀྱི་དོན་བྱེད་པའོ། །རིག་སྔགས་ཀྱི་བཀའ་ལས་མི་འདའ་བར། ལྷོ་ཕྱོགས་ཡོངས་སུ་སྐྱོང་བའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་བསྲུང་བ་གྱིས་ཤིག་ཅེས་བྱ་བ་ནི། གང་ཟག་གང་གིས་ཀྱང་རིག་སྔགས་ཀྱི་རྒྱལ་མོ་འདི་ལ་གུས་ཤིང་འཆང་བ་དེ། སྲུང་བ་དང་སྐྱོབ་པར་བྱེད་དོ། །ལྷོ་ཕྱོགས་ཀྱི་འཇིགས་པ་ཐམས་ཅད་ལས་སྐྱོབ་པའོ། །སྦ་བ་ལ་སོགས་པ་ཞེས་བྱ་བ་ནི། སྔ་མ་བཞིན་དུ་ཤེས་པར་བྱའོ། །ལྷ་མཚམས་གཟི་བརྗིད་ཆེན་མོ་དང༌།
ཞེས་བྱ་བ་ནི། བརླ་གཉིས་ཀྱི་ནི་མཛུབ་དོ་ན། །གང་ལ་བྱི་སྲན་འདྲ་བ་ཡོད། །ལྷ་མཚམས་ལས་སྐྱེས་ཚུལ་ཁྲིམས་ཅན། །ཆོས་དང་ལོངས་སྤྱོད་ལྡན་པའོ། །དེ་བཞིན་སྣྲོན་དང་ཞེས་བྱ་བ་ནི། གང་གི་བརླ་འོག་གཉིས་ན་ནི། །སྨེ་བ་ཡོད་པ་སྣྲོན་ལས་སྐྱེས། །མི་སྡུག་ཚེ་ཐུང་ཚུལ་ཁྲིམས་འཆལ། །དབུལ་ཞིང་སྙིང་རྗེ་མ་མཆིས་སོ། །སྣུབས་དང་ཞེས་བྱ་བ་ནི། པུས་མོ་གཉིས་ཀྱི་གོང་ན་ནི། །གང་ལ་སྨེ་ཆུང་ཡོད་པ་སྟེ། །སྣྲུབས་ལས་སྐྱེས་པ་དབང་ཐང་ཅན། །མྱུར་དུ་བདག་ཁྱིམ་འཇིག་པར་བྱེད། །ཆུ་སྟོད་དང་ཞེས་བྱ་བ་ནི། སྨེ་བ་པུས་མོའི་ལྷ་ངན། །སྦྱིན་པ་བགྱིད་ཅིང་ཆོས་ལམ་ཤེས། །ཤི་འཕོས་ནས་ནི་མཐོ་རིས་འགྲོ་།ཆུ་སྟོད་ལས་ནི་སྐྱེས་པའོ། །ཆུ་སྨད་དང་ཞེས་བྱ་བ་ནི། དཀུ་དོ་ལ་ནི་སྨེ་བ་ཡོད། །དེ་ལྟར་འདུག་པ་ཤེས་དང་ལྡན། །ལོངས་སྤྱོད་ལྡན་ཞིང་སེམས་ཅན་བྱམས། །ཆུ་སྨད་ལས་ནི་སྐྱེས་པའོ། །དེ་ལྟར་བྱི་བཞིན་ཞེས་བྱ་བ་ནི། སྲིན་པོ་ལངྐ་མགྲིན་བཅུའི་སྐར་མ་ཡིན་ཏེ། ལྷ་རྣམས་ལ་གནོད་པས་སྦས་ནས་འདིར་མ་བཤད་དོ། །རྩིས་ལས་མ་བཤད། རྒྱུ་སྐར་ལ་བཤད་པའོ། །གྲོ་བཞིན་ནོ་ཞེས་བྱ་བ་ནི། །གྲོ་བཞིན་ལས་སྐྱེས་ལོངས་སྤྱོད་རྟག །དེ་བཞིན་ནད་མེད་སེམས་ཅན་བྱམས། །སྨེ་བ་གཉིས་པོ་ཡོད་པ་ནི། །ཤི་འཕོས་ནས་ནི་མཐོ་རིས་འགྲོ་།དེ་ལྟར་རྒྱུ་སྐར་བདུན་པོ་དེ་དག་ནི། ནུབ་ཕྱོགས་ཀྱི་སྒོ་ན་གནས་པ་དག་ཅེས་བྱ་བ་ནི། རྒྱུ་སྐར་བདུན་པོ་དེ་དག་ནི། །ནུབ་ཕྱོགས་ན་གནས་པ། ལྷ་མོའི་ཚུལ་དུ་སྣང་བ། མེའི་ཁམས་སོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། ལྷ་མཚམས་ཆེན་མོ་མདོག་དཀར་མོ། ལག་ན་ངང་པ་དཀར་པོ་འཛིན་པའོ། །དང་སྐྱ་ལ་ཞོན་པ། །སྣྲོན་དམར་མོ་ལག་ན་ཏྲི་ཤཱུ་ལ་ཐོགས་པ། །རུས་སྦལ་གྱི་གདན་ལ་ཡོད་པ། སྣྲུབས་དཀར་མོ་ལག་ན་ལ་ཕུག་ཐོགས་པ། གདན་ལ་ཕུག་ལ་འདུག་པ། ཆུ་སྟོད་ལྗང་གུ་ལག་ན་མེ་ཏོག་གི་ཕྲེང་བ་ཐོགས་པའོ། །གདན་རྡོ་རྗེ་ལ་འདུག་པ། ཆུ་སྨད་མཐིང་ག །ལག་ན་པདྨ་ཐོགས་པ། གདན་རྡོ་རྗེ་ལས་བྱས་པ། བྱི་བཞིན་ནག་མོ་ལག་ན་ཞགས་པ་ཐོགས་པ། བྱ་ཁྱུང་ལས་གདན་བྱས་པ། གྲོ་བཞིན་སེར་མོ་ལག་ན་རྡོ་རྗེ་ཐོགས་པ། སེང་གེ་ལ་ཞོན་པ་གང་དག་ནུབ་ཕྱོགས་སྲུང་ཞིང་ཡོངས་
སུ་སྐྱོང་བར་བྱེད་པ་དག་གོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་རྣམས་ཀྱི་བསྟན་པ་བསྲུང་བ། རིག་སྔགས་ཀྱི་བཀའ་ལས་མི་འདའ་བར་སེམས་ཅན་གྱི་དོན་བྱེད་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་བསྲུང་བ་གྱིས་ཤིག་ཅེས་བྱ་བ་ནི། གང་ཟག་གང་གིས་ཀྱང་རིག་སྔགས་ཀྱི་རྒྱལ་མོ་འདི་ལ་གུས་པར་བྱས་ན། རྒྱུ་སྐར་ཉི་ཤུ་རྩ་བརྒྱད་པོ་འདི་དག་གིས་ཀྱང༌། ནུབ་ཕྱོགས་ཀྱི་འཇིགས་པ་ཐམས་ཅད་ལས་སྲུང་བ་དང་སྐྱོབ་པར་བྱེད་དོ། །སྦ་བ་ཞེས་བྱ་བ་ལ་སོགས་པ་ནི། སྔར་བཤད་པ་བཞིན་དུ་ཤེས་པར་བྱའོ། །མོན་གྲུ་དང་ཞེས་བྱ་བ་ནི། སྨེ་བ་ནག་པོ་རྗེ་ངར་ལ་ཡོད་པ། མོན་གྲུ་ལས་སྐྱེས་པ་སྟེ། དེ་ནི་ཁྲོ་ཞིང་འདོད་ཆགས་ཆུང༌། །ལོངས་སྤྱོད་མ་མཆིས་ཤེས་རབ་ལྡན། །མོན་གྲེ་དང་ཞེས་བྱ་བ་ནི། རྗེ་ངར་ལ་ནི་མཛུབ་ངོ་ན། །སྨེ་བ་ནག་པོ་ཡོད་པ་སྟེ། །མོན་གྲེ་ལས་སྐྱེས་བླུན་པོ་སྟེ། །དེ་ནི་ཆུ་ཡིས་འཆི་བར་འགྱུར། །དེ་བཞིན་ཁྲུམས་སྟོད་ཅེས་བྱ་བ་ནི། རྗེ་ངར་འོག་གི་མཛུབ་གང་ན། །རྨ་འདྲ་ཡོད་པ་ཁྲུམས་སྟོད་ལ། །བླུན་ཞིང་གཞན་ལ་གནོད་པ་བྱེད། །དེ་ན་དབུལ་ཞིང་རྐུན་མོ་བྱེད། །ཁྲུམས་སྨད་དང་ཞེས་བྱ་བ་ནི། གང་ལ་སྨེ་བ་མཛུབ་གང་ཡོད། ཁྲུམས་སྨད་ལས་ནི་སྐྱེས་པ་སྟེ། །སྦྱིན་དང་ཚུལ་ཁྲིམས་ལྡན་པ་སྟེ། །ཤེས་རབ་འཇིགས་མེད་སྙིང་རྗེ་ཅན། །ནམ་གྲུ་དང་ཞེས་བྱ་བ་ནི། གང་གི་རྐང་བ་གཉིས་ཀ་ལ། །སྨེ་བ་ཕྲ་མོ་ཡོད་པ་ནི། །ནམ་གྲུ་ལས་སྐྱེས་མ་རབས་ཏེ། །འདྲེག་མཁན་དུ་ཡང་འགྱུར་བ་ལགས། །ཐ་སྐར་དང་ཞེས་བྱ་བ་ནི། གང་གི་མཐེ་བོང་བར་ན་ཡང༌། །སྨེ་བ་སྔོན་པོ་ཡོད་པ་ནི། །རྟག་ཏུ་སྟོབས་ལྡན་ནད་མ་མཆིས། །ཐ་སྐར་ལས་ནི་སྐྱེས་པའོ། །བྲ་ཉེ་སྟེ་བདུན་པ་ཡིན་ཞེས་བྱ་བ་ནི། རྐང་མཐིལ་སྨེ་བ་ཡོད་པ་ནི། །བྲ་ཉེ་ལས་སྐྱེས་སྙིང་རྗེ་མེད། །གསོད་བའི་གཤེད་མའི་ངང་ཚུལ་ཅན།། ཤི་འཕོས་ནས་ནི་དམྱལ་བར་འགྲོ་།དེ་ལྟར་རྒྱུ་སྐར་བདུན་པོ་འདི་དག་ནི། བྱང་ཕྱོགས་ཀྱི་སྒོ་ན་གནས་པ་དག་སྟེ། རྒྱུ་སྐར་བདུན་པོ་དེ་དག་ནི་བྱང་ཕྱོགས་ན་གནས་པ། ལྷ་མོའི་ཚུལ་དུ་སྣང་བ། རླུང་གི་ཁམས་སོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། །མོན་གྲུ་སེར་
མོ་འབྲས་ཀྱི་སྙེ་མ་ཐོགས་པ། གདན་བྲེ་ལ་འདུག་པ། མོན་གྲེ་སེར་མོ་ལག་ན་ཏྲི་ཤཱུ་ལ་ཐོགས་པ། གདན་གླང་ལས་བྱས་པ། ཁྲུམས་སྟོད་སེར་མོ། ལག་ན་པདྨ་ཐོགས་པ། པདྨའི་གདན་ལ་འདུག་པ། ཁྲུམས་སྨད་སྔོན་མོ་ལག་ན་ཨུཏྤ་ལ་ཐོགས་པ། གདན་པདྨ་ལ་གཞུགས་པ་ནམ་གྲུ་དཀར་མོ་ལག་ན་འཁོར་ལོ་ཐོགས་པ། གདན་འཁོར་ལོ་ལ་བཞུགས་པ། ཐ་སྐར་ལྗང་གུ་ལག་ན་ཕྲེང་བ་ཐོགས་པ། གདན་རྟ་ལ་བཞུགས་པ། བྲ་ཉེ་དུད་ཀ་ལག་ན་རལ་གྲི་ཐོགས་པ། གདན་རི་དགས་ལས་བྱས་པའོ། །གང་དག་བྱང་ཕྱོགས་སྲུང་ཞིང་ཡོངས་སུ་སྐྱོང་བར་བྱེད་པ་དག་གོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་རྣམས་ཀྱི་བསྟན་པ་བསྲུང་བ། རིག་སྔགས་ཀྱི་བཀའ་ལས་མི་འདའ་བར་སེམས་ཅན་གྱི་དོན་བྱེད་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་བསྲུང་བགྱིས་ཤིག་ཅེས་བྱ་བ་ནི། གང་ཟག་གང་དང་གང་གིས་ཀྱང་རིག་སྔགས་ཀྱི་རྒྱལ་མོ་འདི་ལ་གུས་པར་བྱས་ན། རྒྱུ་སྐར་ཉི་ཤུ་རྩ་བརྒྱད་པོ་འདིས་ཀྱང་སྲུང་ཞིང་སྐྱོབ་པར་བྱེད་དེ། བྱང་ཕྱོགས་ཀྱི་འཇིགས་པ་ཐམས་ཅད་ལས་སྐྱོབ་པར་བྱེད་པའོ། །སྦ་བ་དང་ཞེས་བྱ་བ་ལ་སོགས་པ་ནི་སྔར་བཤད་པ་བཞིན་དུ་ཤེས་པར་བྱའོ། །རྒྱུ་སྐར་རྣམས་ཀྱི་གནས་གང་ཡིན། གང་ཟླ་བ་དང་ཉི་མ་ལ་བརྟེན་ཞིང༌། རྗེས་སུ་རྒྱུ་བའི་རྒྱུ་སྐར་ཉི་ཤུ་རྩ་བརྒྱད་བརྗོད་པ་དེ་དག་གོ །དེ་ལ་མཛུབ་ནི་སོར་བརྒྱད་ཀྱི་ཚད་དོ། །མཛུབ་དེའི་ཚད་ཀྱིས་ལུས་ལ་སྲིད་དུ། མཛུབ་བཅུ་གཉིས་མཆིས་སོ། །གླད་པའི་སྦྱི་བོ་ལ་མཛུབ་གང་དང༌། རྐང་པའི་མཐིལ་དུ་མཛུབ་གང་སྟེ། མཛུབ་བཅུ་བཞི་ནི་སྐར་མ་རྣམས་ཀྱི་གནས་བཤད་པའོ། །དེ་ནས་དཔྱིད་ཟླ་ར་བའི་ཚེས་གཅིག་ལ་ནི། སྐར་མ་བྱི་བཞིན་ནོ། །གཉིས་ལ་གྲོ་བཞིན། གསུམ་ལ་མོན་གྲེ་།བཞིན་ལ་མོན་གྲུའོ། །ལྔ་ལ་ཁྲུམས་སྟོད། དྲུག་ལ་ཁྲུམས་སྨད་དོ། །བདུན་ལ་ནམ་གྲུའོ། །བརྒྱད་ལ་ཐ་སྐར་རོ། །དགུ་ལ་བྲ་ཉེའོ། །བཅུ་ལ་སྨིན་དྲུག །བཅུ་གཅིག་ལ་སྣར་མ། བཅུ་གཉིས་ལ་མགོ །བཅུ་གསུམ་ལ་ལག །བཅུ་བཞི་ལ་ནབ་སོ། །བཅོ་ལྔ་ལ་རྒྱལ་ལོ། །བཅུ་དྲུག་ལ་སྐག །བཅུ་བདུན་ལ་མཆུ། བཅོ་
བརྒྱད་ལ་གྲེ་།བཅུ་དགུ་ལ་དབོ། །ཉི་ཤུ་ལ་མེ་བཞི། ཉི་ཤུ་གཅིག་ལ་ནག་པ། ཉི་ཤུ་གཉིས་ལས་རི། ཉི་ཤུ་གསུམ་ལ་ས་ག །ཉི་ཤུ་བཞི་ལ་ལྷ་མཚམས། །ཉི་ཤུ་ལྔ་ལ་སྣྲོན། །ཉི་ཤུ་དྲུག་ལ་སྣྲུབས། ཉི་ཤུ་བདུན་ལ་ཆུ་སྟོད། །ཉི་ཤུ་བརྒྱད་ལ་ཆུ་སྨད། །ཉི་ཤུ་དགུ་ལ་བྱི་བཞིན། གནམ་སྟོང་ལ་གྲོ་བཞིན་ནོ། །དཔྱིད་ཟླ་འབྲིང་པོའི་ཚེས་གཅིག་ལ་མོན་གྲུ་།གཉིས་ལ་མོན་གྲེ་།གསུམ་ལ་ཁྲུམས་སྟོད། བཞི་ལ་ཁྲུམས་སྨད། ལྔ་ལ་ནམ་གྲུ་།དྲུག་ལ་ཐ་སྐར། བདུན་ལ་བྲ་ཉེ། བརྒྱད་ལ་སྨིན་དྲུག །དགུ་ལ་སྣར་མ། བཅུ་ལ་མགོ །བཅུ་གཅིག་ལ་ལག །བཅུ་གཉིས་ལ་ནབ་སོ། །བཅུ་གསུམ་ལ་རྒྱལ། བཅུ་བཞི་ལ་སྐག །བཅོ་ལྔ་ལ་མཆུ། བཅུ་དྲུག་ལ་གྲེ་།བཅུ་བདུན་ལ་དབོ། །བཅོ་བརྒྱད་ལ་མེ་བཞི། བཅུ་དགུ་ལ་ནག་པ། ཉི་ཤུ་ལས་རི། ཉི་ཤུ་གཅིག་ལས་ག །ཉི་ཤུ་གཉིས་ལ་ལྷ་མཚམས། ཉི་ཤུ་གསུམ་ལ་སྣྲོན། །ཉི་ཤུ་བཞི་ལ་སྣྲུབས། ཉི་ཤུ་ལྔ་ལ་ཆུ་སྟོད། ཉི་ཤུ་དྲུག་ལ་ཆུ་སྨད། ཉི་ཤུ་བདུན་ལ་བྱི་བཞིན། ཉི་ཤུ་བརྒྱད་ལ་གྲོ་བཞིན། ཉི་ཤུ་དགུ་ལ་མོན་གྲུ་།གནམ་སྟོང་ལ་མོན་གྲེའོ། །དཔྱིད་ཟླ་ཐ་ཆུངས་ཀྱི་ཚེས་གཅིག་ལ་ཁྲུམས་སྟོད། གཉིས་ལ་ཁྲུམས་སྨད། གསུམ་ལ་ནམ་གྲུ། བཞི་ལ་དབྱུ་གུ་།ལྔ་ལ་བྲ་ཉེ། དྲུག་ལ་སྨིན་དྲུག །བདུན་ལ་སྣར་མ། བརྒྱད་ལ་མགོ །དགུ་ལ་ལག །བཅུ་ལ་ནབ་སོ། །བཅུ་གཅིག་ལ་རྒྱལ། བཅུ་གཉིས་ལ་སྐག །བཅུ་གསུམ་ལ་མཆུ། བཅུ་བཞི་ལ་གྲེ་།བཅོ་ལྔ་ལ་དབོ། བཅུ་དྲུག་ལ་མེ་བཞི། བཅུ་བདུན་ལ་ནག་པ། བཅོ་བརྒྱད་ལ་ས་རི། བཅུ་དགུ་ལ་ས་ག །ཉི་ཤུ་ལ་ལྷ་མཚམས། ཉི་ཤུ་གཅིག་ལ་སྣྲོན། ཉི་ཤུ་གཉིས་ལ་སྣྲུབས། ཉི་ཤུ་གསུམ་ལ་ཆུ་སྟོད། ཉི་ཤུ་བཞི་ལ་ཆུ་སྨད། ཉི་ཤུ་ལྔ་ལ་གྲོ་བཞིན། ཉི་ཤུ་དྲུག་ལ་བྱི་བཞིན། ཉི་ཤུ་བདུན་ལ་མོན་གྲུ་།ཉི་ཤུ་བརྒྱད་ལ་མོན་གྲུ་།ཉི་ཤུ་དགུ་ལ་ཁྲུམས་སྟོད། གནམ་སྟོང་ལ་ཁྲུམས་སྨད་དོ། །དབྱར་ཟླ་ར་བའི་ཚེས་གཅིག་ལ་ནམ་གྲུ་།ཚེས་གཉིས་ལ་དབྱུ་གུ་།ཚེས་གསུམ་ལ་བྲ་ཉེའོ། །བཞི་ལ་སྨིན་དྲུག །ལྔ་ལ་སྣར་མ། ཚེས་དྲུག་ལ་མགོ །ཚེས་བདུན་ལ་ལག །ཚེས་བརྒྱད་ལ་ནབ་སོ། །ཚེས་དགུ་ལ་རྒྱལ། ཚེས་བཅུ་ལ་སྐག །
ཚེས་བཅུ་གཅིག་ལ་མཆུ། ཆོས་བཅུ་གཉིས་ལ་གྲེ་།ཚེས་བཅུ་གསུམ་ལ་དབོ། །བཅུ་བཞི་ལ་མེ་བཞི། བཅོ་ལྔ་ལ་ནག་པ། བཅུ་དྲུག་ལ་ས་རི། བཅུ་བདུན་ལ་ས་ག །བཅོ་བརྒྱད་ལ་ལྷ་མཚམས། བཅུ་དགུ་ལ་སྣྲོན། ཉི་ཤུ་ལ་སྣུབས། ཉི་ཤུ་གཅིག་ལ་ཆུ་སྟོད། ཉི་ཤུ་གཉིས་ལ་ཆུ་སྨད། ཉི་ཤུ་གསུམ་ལ་བྱི་བཞིན། ཉི་ཤུ་བཞི་ལ་གྲོ་བཞིན། ཉི་ཤུ་ལྔ་ལ་མོན་གྲུ་།ཉི་ཤུ་དྲུག་ལ་མོན་གྲེ་།ཉི་ཤུ་བདུན་ལ་ཁྲུམས་སྟོད། ཉི་ཤུ་བརྒྱད་ལ་ཁྲུམས་སྨད། ཉི་ཤུ་དགུ་ལ་ནམ་གྲུ་།གནམ་སྟོང་ལ་དབྱུ་གུ། །དབྱར་ཟླ་འབྲིང་པོའི་ཚེས་གཅིག་ལ་བྲ་ཉེ། གཉིས་ལ་སྨིན་དྲུག །གསུམ་ལ་བི་རྫི། བཞི་ལ་མགོ །ལྔ་ལ་ལག །དྲུག་ལ་ནབ་སོ། །བདུན་ལ་རྒྱལ། བརྒྱད་ལ་སྐག །དགུ་ལ་མཆུ། བཅུ་ལ་གྲེ་།བཅུ་གཅིག་ལ་དབོ། །བཅུ་གཉིས་ལ་མེ་བཞི། བཅུ་གསུམ་ལ་ནག་པ། བཅུ་བཞི་ལ་ས་རི། བཅོ་ལྔ་ལ་ས་ག །བཅུ་དྲུག་ལ་ལྷ་མཚམས། བཅུ་བདུན་ལ་སྣྲོན། བཅོ་བརྒྱད་ལ་སྣུབས། བཅུ་དགུ་ལ་ཆུ་སྟོད། ཚེས་ཉི་ཤུ་ལ་ཆུ་སྨད། ཉི་ཤུ་གཅིག་ལ་བྱི་བཞིན། ཉི་ཤུ་གཉིས་ལ་གྲོ་བཞིན། ཉི་ཤུ་གསུམ་ལ་མོན་གྲུ་།ཉི་ཤུ་བཞི་ལ་མོན་གྲེ་།ཉི་ཤུ་ལྔ་ལ་ཁྲུམས་སྟོད། ཉི་ཤུ་དྲུག་ལ་ཁྲུམས་སྨད། ཉི་ཤུ་བདུན་ལ་ནམ་གྲུ་།ཉི་ཤུ་བརྒྱད་ལ་ཐ་སྐར། ཉི་ཤུ་དགུ་ལ་བྲ་ཉེ། གནམ་སྟོང་ལ་སྨིན་དྲུག་གོ །དབྱར་ཟླ་ཐ་ཆུངས་ཀྱི་ཚེས་གཅིག་ལ་སྣར་མ། ཚེས་གཉིས་ལ་མགོ །ཚེས་གསུམ་ལ་ལག །ཚེས་བཞི་ལ་ནབ་སོ། །ཆེས་ལྔ་ལ་རྒྱལ། ཚེས་དྲུག་ལ་སྐག །ཚེས་བདུན་ལ་མཆུ། ཚེས་བརྒྱད་ལ་གྲེ་།ཚེས་དགུ་ལ་དབོ། །ཚེས་བཅུ་ལ་མེ་བཞི། ཚེས་བཅུ་གཅིག་ལ་ནག་པ། ཚེས་བཅུ་གཉིས་ལ་ས་རི། ཚེས་བཅུ་གསུམ་ལ་ས་ག །ཚེས་བཅུ་བཞི་ལ་ལྷ་མཚམས། ཚེས་བཅོ་ལྔ་ལ་སྣྲོན། ཚེས་བཅུ་དྲུག་ལ་སྣུབས། ཚེས་བཅུ་བདུན་ལ་ཆུ་སྟོད། །ཚེས་བཅོ་བརྒྱད་ལ་ཆུ་སྨད། ཚེས་བཅུ་དགུ་ལ་བྱི་བཞིན། ཚེས་ཉི་ཤུ་ལ་གྲོ་བཞིན། ཉི་ཤུ་གཅིག་ལ་མོན་གྲུ་།ཉི་ཤུ་གཉིས་ལ་མོན་གྲེ་།ཉི་ཤུ་གསུམ་ལ་ཁྲུམས་སྟོད། ཉི་ཤུ་བཞི་ལ་ཁྲུམས་སྨད། ཉི་ཤུ་ལྔ་ལ་ནམ་གྲུ་།ཉི་ཤུ་དྲུག་ལ་དབྱུ་
གུ་།ཉི་ཤུ་བདུན་ལ་བྲ་ཉེ། ཉི་ཤུ་བརྒྱད་ལ་སྨིན་དྲུག །ཉི་ཤུ་དགུ་ལ་སྣར་མ། གནམ་སྟོང་ལ་མགོའོ། །སྟོན་ཟླ་ར་བའི་ཚེས་གཅིག་ལ་ལག །གཉིས་ལ་ནབ་སོ། །གསུམ་ལ་རྒྱལ། བཞི་ལ་སྐག །ལྔ་ལ་མཆུ། དྲུག་ལ་གྲེ་།བདུན་ལ་དབོ། །བརྒྱད་ལ་མེ་བཞི། དགུ་ལ་ནག་པ། བཅུ་ལ་ས་རི། བཅུ་གཅིག་ལ་ས་ག །བཅུ་གཉིས་ལ་ལྷ་མཚམས། བཅུ་གསུམ་ལ་སྣྲོན། བཅུ་བཞི་ལ་སྣྲུབས། བཅོ་ལྔ་ལ་ཆུ་སྟོད། བཅུ་དྲུག་ལ་ཆུ་སྨད། བཅུ་བདུན་ལ་བྱི་བཞིན། བཅོ་བརྒྱད་ལ་གྲོ་བཞིན། །བཅུ་དགུ་ལ་མོན་གྲུ་།ཉི་ཤུ་ལ་མོན་གྲེ་།ཉི་ཤུ་གཅིག་ལ་ཁྲུམས་སྟོད། ཉི་ཤུ་གཉིས་ལ་ཁྲུམས་སྨད། ཉི་ཤུ་གསུམ་ལ་ནམ་གྲུ་།ཉི་ཤུ་བཞི་ལ་དབྱུ་གུ་།ཉི་ཤུ་ལྔ་ལ་བྲ་ཉེ། ཉི་ཤུ་དྲུག་ལ་སྨིན་དྲུག །ཉི་ཤུ་བདུན་ལ་སྣར་མ། ཉི་ཤུ་བརྒྱད་ལ་མགོ །ཉི་ཤུ་དགུ་ལ་ལག །གནམ་སྟོང་ལ་ནབ་སོ། །སྟོན་ཟླ་འབྲིད་པོའི་ཚེས་གཅིག་ལ་རྒྱལ། གཉིས་ལ་སྐག་གསུམ་ལ་མཆུ། བཞི་ལ་གྲེ་།ལྔ་ལ་དབོ། །དྲུག་ལ་མེ་བཞི། བདུན་ལ་ནག་པ། བརྒྱད་ལ་ས་རི། དགུ་ལ་ས་ག །བཅུ་ལ་ལྷ་མཚམས། བཅུ་གཅིག་ལ་སྨྲོན། བཅུ་གཉིས་ལ་སྣུབས། །བཅུ་གསུམ་ལ་ཆུ་སྟོད། བཅུ་བཞི་ལ་ཆུ་སྨད། བཅོ་ལྔ་ལ་བྱི་བཞིན། བཅུ་དྲུག་ལ་གྲོ་བཞིན། བཅུ་བདུན་ལ་མོན་གྲུ་།བཅོ་བརྒྱད་ལ་མོན་གྲེ་།བཅུ་དགུ་ལ་ཁྲུམས་སྟོད། ཉི་ཤུ་ལ་ཁྲུམས་སྨད། ཉི་ཤུ་གཅིག་ལ་ནམ་གྲུ་།ཉི་ཤུ་གཉིས་ལ་ཐ་སྐར། ཉི་ཤུ་གསུམ་ལ་བྲ་ཉེ། ཉི་ཤུ་བཞི་ལ་སྨིན་དྲག །ཉི་ཤུ་ལྔ་ལ་སྣར་མ། ཉི་ཤུ་དྲུག་ལ་མགོ །ཉི་ཤུ་བདུན་ལ་ལག །ཉི་ཤུ་བརྒྱད་ལ་ནབ་སོ། །ཉི་ཤུ་དགུ་ལ་རྒྱལ། གནམ་སྟོང་ལ་སྐྲག་གོ །སྟོན་ཟླ་ཐ་ཆུངས་ཀྱི་ཚེས་གཅིག་ལ་མཆུ། གཉིས་ལ་གྲེ་།གསུམ་ལ་དབོ། བཞི་ལ་མེ་བཞི། ལྔ་ལ་ནག་པ། དྲུག་ལ་ས་རི། བདུན་ལ་ས་ག །བརྒྱད་ལ་ལྷ་མཚམས། དགུ་ལ་སྣྲོན། བཅུ་ལ་སྣྲུབས། བཅུ་གཅིག་ལ་ཆུ་སྟོད། བཅུ་གཉིས་ལ་ཆུ་སྨད། བཅུ་གསུམ་ལ་བྱི་བཞིན། བཅུ་བཞི་ལ་གྲོ་བཞིན། བཅོ་ལྔ་ལ་མོན་གྲུ་།བཅུ་དྲུག་ལ་མོན་གྲེ་།བཅུ་བདུན་ལ་ཁྲུམས་སྟོད། བཅོ་བརྒྱད་ལ་ཁྲུམས་སྨད། བཅུ་དགུ་ལ་ནམ་གྲུ་།ཉི་ཤུ་ལ་ཐ་སྐར། ཉི་ཤུ་གཅིག་ལ་བྲ་ཉེ། ཉི་ཤུ་གཉིས་ལ་སྨིན་དྲུག །ཉི་ཤུ་གསུམ་ལ་
སྣར་མ། ཉི་ཤུ་བཞི་ལ་མགོ །ཉི་ཤུ་ལྔ་ལ་ལག །ཉི་ཤུ་དྲུག་ལ་ནབ་སོ། །ཉི་ཤུ་བདུན་ལ་རྒྱལ། ཉི་ཤུ་བརྒྱད་ལ་སྐག །ཉི་ཤུ་དགུ་ལ་མཆུ། གནམ་སྟོང་ལ་གྲེ་།དགུན་ཟླ་ར་བའི་ཚེས་གཅིག་ལ་ས་རི། གཉིས་ལ་ས་ག །གསུམ་ལ་ལྷ་མཚམས། བཞི་ལ་སྣྲོན། ལྔ་ལ་སྣྲུབས་དྲུག་ལ་ཆུ་སྟོད། བདུན་ལ་ཆུ་སྨད། བརྒྱད་ལ་བྱི་བཞིན། དགུ་ལ་གྲོ་བཞིན། བཅུ་ལ་མོན་གྲུ་།བཅུ་གཅིག་ལ་མོན་གྲེ་།བཅུ་གཉིས་ལ་ཁྲུམས་སྟོད། བཅུ་གསུམ་ལ་ཁྲུམས་སྨད། བཅུ་བཞི་ལ་ནམ་གྲུ་།བཅོ་ལྔ་ལ་ཐ་སྐར། བཅུ་དྲུག་ལ་བྲ་ཉེ། བཅུ་བདུན་ལ་སྨིན་དྲུག །བཅོ་བརྒྱད་ལ་སྣར་མ། བཅུ་དགུ་ལ་མགོ །ཉི་ཤུ་ལ་ལག །ཉི་ཤུ་གཅིག་ལ་ནབ་སོ། །ཉིས་ཧུ་གཉིས་ལ་རྒྱལ། ཉི་ཤུ་གསུམ་ལ་སྐག །ཉི་ཤུ་བཞི་ལ་མཆུ། ཉི་ཤུ་ལྔ་ལ་གྲེ་།ཉི་ཤུ་དྲུག་ལ་དབོ། །ཉི་ཤུ་བདུན་ལ་མེ་བཞི། ཉི་ཤུ་བརྒྱད་ལ་ནག་པ། ཉིས་ཧུ་དགུ་ལ་ས་རི། གནམ་སྟོང་ལ་ས་གའོ། །དགུན་ཟླ་འབྲིང་བོའི་ཚེས་གཅིག་ལ་ལྷ་མཚམས། གཉིས་ལ་སྣྲོན། གསུམ་ལ་སྣྲུབས། བཞི་ལ་ཆུ་སྟོད། ལྔ་ལ་ཆུ་སྨད། དྲུག་ལ་བྱི་བཞིན། བདུན་ལ་གྲོ་བཞིན། བརྒྱད་ལ་མོན་གྲུ་།དགུ་ལ་མོན་གྲེ་།བཅུ་ལ་ཁྲུམས་སྟོད། བཅུ་གཅིག་ལ་ཁྲུམས་སྨད། བཅུ་གཉིས་ལ་ནམ་གྲུ་།བཅུ་གསུམ་ལ་དབྱུ་གུ་།བཅུ་བཞི་ལ་བྲ་ཉེ། བཅོ་ལྔ་ལ་སྨིན་དྲུག་བཅུ་དྲུག་ལ་སྣར་མ། བཅུ་བདུན་ལ་མགོ །བཅོ་བརྒྱད་ལ་ལག །བཅུ་དགུ་ལ་ནབ་སོ། །ཉི་ཤུ་ལ་རྒྱལ། ཉི་ཤུ་གཅིག་ལ་སྐག །ཉི་ཤུ་གཉིས་ལ་མཆུ། ཉི་ཤུ་གསུམ་ལ་གྲེ་།ཉི་ཤུ་བཞི་ལ་དབོ། །ཉི་ཤུ་ལྔ་ལ་མེ་བཞི། ཉི་ཤུ་དྲུག་ལ་ནག་པ། ཉི་ཤུ་བདུན་ལ་ས་རི། ཉི་ཤུ་བརྒྱད་ལ་ས་ག་ཉི་ཤུ་དགུ་ལ་ལྷ་མཚམས། གནམ་སྟོང་ལ་སྣྲོན། དགུ་ན་ཟླ་ཐ་ཆུངས་ཀྱི་ཚེས་གཅིག་ལ་སྣྲུབས། ཚེས་གཉིས་ལ་ཆུ་སྟོད། ཚེས་གསུམ་ལ་ཆུ་སྨད། ཚེས་བཞི་ལ་བྱི་བཞིན། ལྔ་ལ་གྲོ་བཞིན། དྲུག་ལ་མོན་གྲུ་། བདུན་ལ་མོན་གྲེ་།བརྒྱད་ལ་ཁྲུམས་སྟོད། དགུ་ལ་ཁྲུམས་སྨད། བཅུ་ལ་ནམ་གྲུ་།བཅུ་གཅིག་ལ་དབྱུ་གུ་།བཅུ་གཉིས་ལ་བྲ་ཉེ། བཅུ་གསུམ་ལ་སྨིན་དྲུག །བཅུ་བཞི་ལ་སྣར་མ། བཅོ་ལྔ་ལ་མགོ །བཅུ་དྲུག་ལ་ལག །བཅུ་བདུན་ལ་ནབ་སོ། །བཅོ་བརྒྱད་ལ་རྒྱལ་།བཅུ་དགུ་ལ་སྐག །ཉི་ཤུ་ལ་མཆུ། ཉི་ཤུ་
གཅིག་ལ་གྲེ་།ཉི་ཤུ་གཉིས་ལག་དབོ། ཉི་ཤུ་གསུམ་ལ་མེ་བཞི། ཉི་ཤུ་བཞི་ལ་ནག་པ། ཉི་ཤུ་ལྔ་ལ་ས་རི། ཉི་ཤུ་དྲུག་ལ་ས་ག །ཉི་ཤུ་བདུན་ལ་ལྷ་མཚམས། ཉི་ཤུ་བརྒྱད་ལ་སྣོན། །ཉི་ཤུ་དགུ་ལ་སྣུབས། །གནམ་སྟོང་ལ་ཆུ་སྟོད། ཉིན་མཚན་རེ་རེ་ལ་ཆུ་ཚོད་དྲུག་ཅུ་དྲུག་ཅུ་ཡོད་དོ། །དཔྱིད་ཟླ་རབ་ལ་ཉིན་མོ་ཆུ་ཚོད་ཉི་ཤུ་རྩ་བཞི། མཚན་མོ་སུམ་ཅུ་རྩ་དྲུག་གོ །དཔྱིད་ཟླ་འབྲིང་པོ་ལ་ཉིན་མོ་ཉི་ཤུ་རྩ་དྲུག །མཚན་མོ་སུམ་ཅུ་རྩ་བཞིའོ། །དཔྱིད་ཟླ་ཐ་ཆུངས་ལ་ཉིན་མོ་ཆུ་ཚོད་ཉི་ཤུ་རྩ་བརྒྱད། ནུབ་མོ་སུམ་ཅུ་རྩ་གཉིས་སོ། །དབྱར་ཟླ་ར་བ་ལ་ཉིན་མཚན་གཉིས་ལ་ཆུ་ཚོད་སུམ་ཅུ་སུམ་ཅུ་མཉམ་མོ། །དབྱར་ཟླ་འབྲིང་པོ་ལ་ཉིན་མོ་ཆུ་ཚོད་སུམ་ཅུ་རྩ་གཉིས། ནུབ་མོ་ཉི་ཤུ་རྩ་བརྒྱད་དོ། །དབྱར་ཟླ་ཐ་ཆུངས་ལ་ཉིན་མོ་ཆུ་ཚོད་སུམ་ཅུ་རྩ་བཞི། ནུབ་མོ་ཉི་ཤུ་རྩ་དྲུག་གོ །སྟོན་ཟླ་ར་བ་ལ་ཉིན་མོ་ཆུ་ཚོད་སུམ་ཅུ་རྩ་དྲུག །ནུབ་མོ་ཉི་ཤུ་རྩ་བཞིའོ། །སྟོན་ཟླ་འབྲིང་པོ་ལ་ཉིན་མོ་ཆུ་ཚོད་སུམ་ཅུ་རྩ་བཞིའོ། །ནུབ་མོ་ལ་ཆུ་ཚོད་ཉི་ཤུ་རྩ་དྲུག་གོ །སྟོན་ཟླ་ཐ་ཆུངས་ལ་ཉིན་མོ་ཆུ་ཚོད་སུམ་ཅུ་རྩ་གཉིས། ནུབ་མོ་ཉི་ཤུ་རྩ་བརྒྱད་དོ། །དགུན་ཟླ་ར་བ་ལ་ཉིན་མཚན་གཉིས་ཀ་ལ་ཆུ་ཚོད་སུམ་ཅུ་སུམ་ཅུའོ། །དགུན་ཟླ་འབྲིང་པོ་ལ་ཉིན་མོ་ཆུ་ཚོད་ཉི་ཤུ་རྩ་བརྒྱད། མཚན་མོ་སུམ་ཅུ་རྩ་གཉིས། དགུན་ཟླ་ཐ་ཆུངས་ལ་ཉིན་མོ་ཉི་ཤུ་རྩ་དྲུག །ནུབ་མོ་ཆུ་ཚོད་སུམ་ཅུ་རྩ་བཞིའོ་དེ་བཞིན་དུ་དུས་ཚོད་བཅུ་གཉིས་སོ། །དེ་ཡང་དཔྱིད་ཟླ་ར་བ་ལ་རྒྱལ་མཚན་ནོ། །དཔྱིད་ཟླ་འབྲིང་པོ་ལ་སེང་གེའོ། །དཔྱིད་ཟླ་ཐ་ཆུངས་ལ་ཁྱེའོ། །དབྱར་ཟླ་ར་བ་ལ་གླང༌། །དབྱར་ཟླ་འབྲིང་པོ་ལ་རུས་སྦལ། དབྱར་ཟླ་ཐ་ཆུངས་ལ་བོང་བུའོ། །སྟོན་ཟླ་ར་བལ་ཆུ་སྲིན། སྟོན་ཟླ་འབྲིང་པོ་ལ་དུང༌། སྟོན་ཟླ་ཐ་ཆུངས་ལ་རྔ་མོའོ། །དགུན་ཟླ་ར་བ་ལ་གཞུ། དགུན་ཟླ་འབྲིང་པོ་ལ་མདའ། དགུན་ཟླ་ཐ་ཆུངས་ལ་གླང་པོ་ཆེའོ། །དཔྱིད་ཟླ་རབ་ལ་ཚེས་གཅིག་ནས་གནམ་སྟོང་མན་ཆད་དུ། ཉི་མ་རེ་རེ་ལ་ཆུ་ཚོད་ཉི་ཤུ་རྩ་བཞི། དུས་ཚོད་བཅུ་གཉིས་ལ། ཉི་མ་ཤར་ནས་བཅུ་གཉིས་ཆ་གཅིག་ལ་རྒྱལ་མཚན་གྱི་དུས་སོ། །ཆ་གཉིས་ལ་སེང་གེའི་དུས་སོ། །ཆ་གསུམ་ལ་ཁྱིའི་དུས་སོ། །ཆ་བཞི་པ་གླང་གི་དུས། ཆ་ལྔ་པ་རུས་སྦལ་གྱི་དུས། ཆ་དྲུག་པ་བོང་བུའི་དུས། ཆ་བདུན་པ་ཆུ་སྲིན་གྱི་དུས། ཆ་བརྒྱད་པ་ལ་དུང་གི་
དུས། ཆ་དགུ་པ་རྔ་མོའི་དུས། ཆ་བཅུ་པ་གཞུའི་དུས། ཆ་བཅུ་གཅིག་པ་མདའི་དུས། ཆ་བཅུ་གཉིས་པ་གླང་པོ་ཆེའོ། །ལ་ལ་ལུག་ཟེར་རོ། །ཉི་མ་གཅིག་ལ་ཚུ་ཚོད་ཉི་ཤུ་རྩ་བཞི་ཡོད་པ་ལ། དུས་ཚོད་རེ་རེ་ལ་ཆུ་ཚོད་གཉིས་གཉིས་ཀུན་ལ་ཤེས་པར་བྱའོ། །དཔྱིད་ཟླ་ར་བའི་ཚེས་གཅིག་ཡན་ཆོད་ནས་གནམ་སྟོང་མན་ཆད་ཀྱི་ནུབ་རེ་རེ་ལ། དུས་ཚོད་བཅུ་གཉིས་བཅུ་གཉིས་ཡོད་ལ། རྒྱལ་མཚན་དང་གླང་པོ་ཆེའི་བར་དུ་དུས་ཚོད་ཀྱི་རྒྱུ་ལུགས་ནི་སྔ་མ་བཞིན་ནོ། །དུས་རེ་རེ་ལ་ཆུ་ཚོད་གསུམ་གསུམ་དུ་ཤེས་པར་བྱའོ། །དཔྱིད་ཟླ་འབྲིང་པོའི་ཚེས་གཅིག་ནས་གནམ་སྟོང་མན་ཆད་དུ། ཉི་མ་རེ་རེ་ལ་དུས་ཚོད་བཅུ་གཉིས་བཅུ་གཉིས་ཡོད་པ་ལ། ཉི་མ་གཅིག་གི་བཅུ་གཉིས་ཆ་གཅིག་ལ་སེང་གེ་རྒྱུ་བའི་དུས། ཆ་གཉིས་ལ་ཁྱིའི་དུས། ཆ་གསུམ་པ་གླང་གི་དུས། ཆ་བཞི་བ་རུས་སྦལ་གྱི་དུས། ཆ་ལྔ་པ་ལ་བོང་བུའི་དུས། ཆ་དྲུག་པ་ལ་ཆུ་སྲིན་གྱི་དུས། ཆ་བདུན་པ་ལ་དུང་གི་དུས། ཆ་བརྒྱད་པ་ལ་རྔ་མོའི་དུས། ཆ་དགུ་པ་གཞུའི་དུས། ཆ་བཅུ་པ་མདའི་དུས། ཆ་བཅུ་གཅིག་པ་གླང་པོ་ཆེའི་དུས། ཆ་བཅུ་གཉིས་པ་རྒྱལ་མཚན་གྱི་དུས་སོ། །དེ་ལ་ཆུ་ཚོད་ཉི་ཤུ་རྩ་དྲུག་ཡོད་པ་ལ། དུས་ཚོད་རེ་རེ་ལ་ཆུ་ཚོད་གཉིས་གཉིས་དང༌། སྐད་ཅིག་མ་བརྒྱ་ལྔ་བཅུའོ། །སེང་གེ་ལ་སོགས་པའི་དུས་ཚོད་བཅུ་གཉིས་ནི། ཉིན་མོ་དང་འདྲ། དུས་ཚོད་བཅུ་གཉིས་པོ་དེ་ལ། ཆུ་ཚོད་སུམ་ཅུ་རྩ་བཞི་ཡོད་པ་ལ། དུས་ཚོད་རེ་རེ་ལ་ཆུ་ཚོད་གསུམ་དུ་སྐད་ཅིག་མ་བརྒྱ་ལྔ་བཅུར་མ་ཚང་བར་དུས་བཅུ་གཉིས་པོ་ཀུན་ལ་ཤེས་པར་བྱའོ། །དཔྱིད་ཟླ་ཐ་ཆུངས་ཀྱི་ཚེས་གཅིག་ནས་གནམ་སྟོང་གི་བར་དུ། ཉི་མ་རེ་རེ་ལ་དུས་ཚོད་བཅུ་གཉིས་བཅུ་གཉིས་ཡོད་དེ། ཉི་མ་ཤར་ནས་ཆ་གཅིག་ལ་ཁྱིའི་དུས། ཆ་གཉིས་ལ་གླང༌། ཆ་གསུམ་ལ་རུས་སྦལ། ཆ་བཞི་ལ་བོང་བུའི་དུས། ཆ་ལྔ་ལ་ཆུ་སྲིན་གྱི་དུས། ཆ་དྲུག་ལ་དུང་གི་དུས། ཆ་བདུན་ལ་རྔ་མོའི་དུས། ཆ་བརྒྱད་ལ་གཞུའི་དུས། ཆ་དགུ་ལ་མདའི་དུས། ཆ་བཅུ་པ་ལ་གླང་པོ་ཆེའི་དུས། ཆ་བཅུ་གཅིག་པ་ལ་རྒྱལ་མཚན་གྱི་དུས། ཆ་བཅུ་གཉིས་པ་ལ་སེང་གེའི་དུས་སོ། །ཉི་མ་རེ་རེ་ལ་ཆུ་ཚོད་ཉི་ཤུ་རྩ་བརྒྱད་ཡོད་པ་ལ། དུས་ཚོད་རེ་རེ་ལ་ཆུ་ཚོད་གཉིས་གཉིས་ཡོད་པ་ལ། སྐད་ཅིག་མ་སུམ་
བརྒྱ་སུམ་བརྒྱ་ཡོད་དོ། །དཔྱིད་ཟླ་ཐ་ཆུངས་ཀྱི་ནུབ་མོ་རེ་རེ་ལ་ཁྱི་ལ་སོགས་པ་སེང་གེའི་བར་དུ། དུས་ཚོད་ཀྱི་གྲངས་སྔ་མ་བཞིན་ནོ། །ཆུ་ཚོད་སུམ་ཅུ་རྩ་གཉིས་ཡོད་པ་ལ། དུས་ཚོད་རེ་རེ་ལ་ཆུ་ཚོད་གསུམ་གསུམ་དུ་སྐད་ཅིག་མ་སུམ་བརྒྱ་སུམ་བརྒྱ་མ་ལྡང་ངོ༌། །དབྱར་ཟླ་ར་བའི་ཚེས་གཅིག་ནས་གནམ་སྟོང་གི་བར་དུ་ཉི་མ་རེ་རེ་ལ། དུས་ཚོད་བཅུ་གཉིས་བཅུ་གཉིས་ཡོད་དེ། །ཉི་མ་ཤར་ནས་ཆ་གཅིག་ལ་གླང་གི་དུས། ཆ་གཉིས་ལ་རུས་སྦལ་གྱི་དུས། ཆ་གསུམ་ལ་བོང་བུའི་དུས། ཆ་བཞི་པ་ཆུ་སྲིན་གྱི་དུས། ཆ་ལྔ་བ་དུང་གི་དུས། ཆ་དྲུག་པ་རྔ་མོའི་དུས། ཆ་བདུན་པ་གཞུའི་དུས། ཆ་བརྒྱད་པ་མདའི་དུས། ཆ་དགུ་པ་གླང་པོ་ཆེའི་དུས། ཆ་བཅུ་པ་རྒྱལ་མཚན་གྱི་དུས། ཆ་བཅུ་གཅིག་པ་ལ་སེང་གེའི་དུས། ཆ་བཅུ་གཉིས་པ་ལ་ཁྱིའི་དུས་སོ། །དུས་ཚོད་བཅུ་གཉིས་ལ། ཆུ་ཚོད་སུམ་ཅུ་ཡོད་དོ། །དེ་ལ་དུས་ཚོད་རེ་རེ་ལ་ཆུ་ཚོད་ཕྱེད་དང་གསུམ་གསུམ་ཡོད་དོ། །ནུབ་མོ་ལ་ཡང་གླང་ནས་ཁྱིའི་བར་དུས་ཚོད་བཅུ་གཉིས་ཉིན་མོ་བཞིན་དུ་ཤེས་པར་བྱའོ། །ཆུ་ཚོད་ཀྱང་ཕྱེད་དང་གསུམ་གསུམ་དུ་ཤེས་པར་བྱའོ། །དབྱར་ཟླ་འབྲིང་པོའི་ཚེས་གཅིག་ནས་གནམ་སྟོང་གི་བར་དུ། ཉི་མ་རེ་རེ་ལ་དུས་ཚོད་བཅུ་གཉིས་བཅུ་གཉིས་ཡོད་དེ། ཉི་མ་ཤར་ནས་ཆ་གཅིག་ལ་རུས་སྦལ་གྱི་དུས། ཆ་གཉིས་ལ་བོང་བུའི་དུས། ཆ་གསུམ་ལ་ཆུ་སྲིན་གྱི་དུས། ཆ་བཞི་པ་དུང་གི་དུས། ཆ་ལྔ་པ་རྔ་མོའི་དུས། ཆ་དྲུག་པ་གཞུའི་དུས། ཆ་བདུན་པ་མདའི་དུས། ཆ་བརྒྱད་པ་གླང་པོ་ཆེའི་དུས། ཆ་དགུ་པ་རྒྱལ་མཚན་གྱི་དུས། ཆ་བཅུ་པ་སེང་གེའི་དུས། ཆ་བཅུ་གཅིག་པ་ཁྱིའི་དུས། ཆ་བཅུ་གཉིས་པ་གླང་གི་དུས་སོ། །དུས་བཅུ་གཉིས་ཀྱི་ཉི་མ་རེ་རེ་ལ་ཆུ་ཚོད་སུམ་ཅུ་རྩ་གཉིས་ཡོད་པ་ལ། དུས་ཚོད་རེ་རེ་ལ་ཆུ་ཚོད་ཕྱེད་དང་གསུམ་གསུམ་དང༌། སྐད་ཅིག་མ་བརྒྱ་ལྔ་བཅུ་ལྔ་བཅུ་ཡོད་དོ། །དབྱར་ཟླ་འབྲིང་པོའི་ཚེས་གཅིག་ནས་གནམ་སྟོང་གི་བར་དུ་ནུབ་རེ་རེ་ལ་དུས་ཚོད་བཅུ་གཉིས་བཅུ་གཉིས་ཡོད་དོ། །ཉི་མ་ནུབ་ནས་ཆ་དང་པོ་རུས་སྦལ་གྱི་དུས་ནས། གླང་གི་བར་དུ་བཅུ་གཉིས་པོའི་ཉིན་མོའི་དུས་ཚོད་བཞིན་དུ་ཤེས་པར་བྱའོ། །དེའི་དུས་ཚོད་
རེ་རེ་ལ་ཆུ་ཚོད་གཉིས་གཉིས་དང༌། སྐད་ཅིག་མ་སུམ་བརྒྱ་སུམ་བརྒྱ་ཡོད་དེ། དབྱར་ཟླ་ཐ་ཆུངས་ཀྱི་ཚེས་གཅིག་ནས་གནམ་སྟོང་གི་བར་དུ། ཉི་མ་རེ་རེ་ལ་དུས་ཚོད་བཅུ་གཉིས་བཅུ་གཉིས་ཡོད་པ་ལ། ཉི་མ་ཤར་ནས་ཆ་གཅིག་གི་བར་དུ་བོང་བུའི་དུས། ཆ་གཉིས་པ་ཆུ་སྲིན་གྱི་དུས། ཆ་གསུམ་པ་དུང་གི་དུས། ཆ་བཞི་པ་རྔ་མོའི་དུས། ཆ་ལྔ་པ་གཞུའི་དུས། ཆ་དྲུག་པ་མདའི་དུས། ཆ་བདུན་པ་གླང་པོ་ཆེའི་དུས། ཆ་བརྒྱད་པ་རྒྱལ་མཚན་གྱི་དུས། ཆ་དགུ་པ་སེང་གེའི་དུས། ཆ་བཅུ་པ་ཁྱིའི་དུས། ཆ་བཅུ་གཅིག་པ་གླང་གི་དུས། ཆ་བཅུ་གཉིས་པ་རུས་སྦལ་གྱི་དུས། ཉི་མ་རེ་རེ་ལ་ཆུ་ཚོད་སུམ་ཅུ་རྩ་བཞི་རྩ་བཞི་ཡོད་པ་ལ། དུས་ཚོད་རེ་རེ་ལ་ཆུ་ཚོད་གསུམ་གསུམ་དུ་སྐད་ཅིག་མ་སུམ་བརྒྱ་སུམ་བརྒྱ་མ་ལྡང་ངོ༌། །དབྱར་ཟླ་ཐ་ཆུངས་ཀྱི་ཚེས་གཅིག་ནས་གནམ་སྟོང་གི་བར་དུ། ཉི་མ་ནུབ་ནས་བོང་བུ་ནས་རུས་སྦལ་ཡན་ཆད་ཀྱི་དུས་བཅུ་གཉིས་ཉིན་མོའི་བཞིན་ཤེས་པར་བྱའོ། །ནུབ་རེ་རེ་ལ་ཆུ་ཚོད་ཉི་ཤུ་རྩ་དྲུག་ཡོད་པ་ལ། དུས་ཚོད་རེ་རེ་ཆུ་ཚོད་གཉིས་གཉིས་དང༌། སྐད་ཅིག་མ་བརྒྱ་ལྔ་བཅུ་བརྒྱ་ལྔ་བཅུ་ཡོད་དོ། །སྟོན་ཟླ་ར་བའི་ཚེས་གཅིག་ནས་གནམ་སྟོང་གི་བར་དུ། ཉི་མ་རེ་རེ་ལ་དུས་ཚོད་བཅུ་གཉིས་བཅུ་གཉིས་ཡོད་པ། ཉི་མ་ཤར་ནས་ཆ་གཅིག་པ་ཆུ་སྲིན་གྱི་དུས། ཆ་གཉིས་པ་དུང་གི་དུས། ཆ་གསུམ་པ་རྔ་མོའི་དུས། ཆ་བཞི་པ་གཞུའི་དུས། ཆ་ལྔ་པ་མདའི་དུས། ཆ་དྲུག་པ་གླང་པོའི་དུས། ཆ་བདུན་པ་རྒྱལ་མཚན་གྱི་དུས། ཆ་བརྒྱད་པ་སེང་གེའི་དུས། ཆ་དགུ་པ་ཁྱིའི་དུས། ཆ་བཅུ་པ་གླང་གི་དུས། ཆ་བཅུ་གཅིག་པ་རུས་སྦལ་གྱི་དུས། ཆ་བཅུ་གཉིས་པ་བོང་བུའི་དུས་སོ། །ཉི་མ་རེ་རེ་ལ་ཆུ་ཚོད་བཅུ་གཉིས་བཅུ་གཉིས་ཡོད་པ་ལ། དུས་ཚོད་རེ་རེ་ལ་ཆུ་ཚོད་གསུམ་གསུམ་ཡོད་དོ། །ནུབ་མོ་ལ་ཡང་ཉི་མ་ནུབ་ནས་ཆུ་སྲིན་ནས་བོང་བུའི་བར་དུ་དུས་ཚོད་བཅུ་གཉིས་ཉིན་མོ་བཞིན་ཤེས་པར་བྱའོ། །ནུབ་མོ་ཆུ་ཚོད་ཉི་ཤུ་རྩ་བཞི་ཡོད་པ་ལ། དུས་ཚོད་རེ་རེ་ལ་ཡང་ཆུ་ཚོད་བཅུ་གཉིས་བཅུ་གཉིས་སུ་ཤེས་པར་བྱའོ། །སྟོན་ཟླ་འབྲིང་པོའི་ཚེས་གཅིག་ནས་གནམ་སྟོང་གི་བར་དུ། ཉི་མ་རེ་རེ་ལ་དུས་ཚོད་བཅུ་གཉིས་བཅུ་གཉིས་ཡོད་པ་ལ།།
ཉི་མ་ཤར་ནས་ཆ་གཅིག་ལ་དུང་གི་དུས། ཆ་གཉིས་ལ་རྔ་མོའི་དུས། ཆ་གསུམ་པ་གཞུའི་དུས། ཆ་བཞི་པ་མདའ་དུས། ཆ་ལྔ་པ་གླང་པོ་ཆེའི་དུས། ཆ་དྲུག་པ་རྒྱལ་མཚན་གྱི་དུས། ཆ་བདུན་པ་སེང་གེའི་དུས། ཆ་བརྒྱད་པ་ཁྱིའི་དུས། ཆད་གུ་པ་གླང་གི་དུས། ཆ་བཅུ་པ་རུས་སྦལ་གྱི་དུས། ཆ་བཅུ་གཅིག་པ་བོང་བུའི་དུས། ཆ་བཅུ་གཉིས་པ་ཆུ་སྲིན་གྱི་དུས་སོ། །ཉི་མ་རེ་རེ་ལ་ཡང་དུས་ཚོད་བཅུ་གཉིས་བཅུ་གཉིས་ཡོད་དེ། དུས་ཚོད་རེ་རེ་ལ་ཡང་ཆུ་ཚོད་གསུམ་གསུམ་དུ་སྐད་ཅིག་མ་སུམ་བརྒྱ་སུམ་བརྒྱ་མ་ལྡང་བའོ། །ནུབ་རེ་རེ་ལ་ཡང་དུས་ཚོད་བཅུ་གཉིས་ཡོད་པ་ལ། ཉི་མ་ནུབ་ནས་དུང་ནས་ཆུ་སྲིན་གྱི་བར་དུ། དུས་ཚོད་བཅུ་གཉིས་ཉིན་མོ་བཞིན་དུ་ཤེས་པར་བྱའོ། །ནུབ་རེ་རེ་ལ་ཆུ་ཚོད་ཉི་ཤུ་རྩ་དྲུག་རྩ་དྲུག་ཡོད་པ་ལ། དུས་ཚོད་རེ་རེ་ལ་ཡང་ཆུ་ཚོད་ཕྱེད་དང་གསུམ་གསུམ་ཡོད་པ། སྟོན་ཟླ་ཐ་ཆུངས་ཀྱི་ཚེས་གཅིག་ནས་གནམ་སྟོང་གི་བར་དུ། ཉི་མ་རེ་རེ་ལ་དུས་ཚོད་བཅུ་གཉིས་བཅུ་གཉིས་ཡོད་པ་ལ། ཉི་མ་ཤར་ནས་བཅུ་གཉིས་ཀྱི་ཆ་དང་པོ་རྔ་མོའི་དུས། ཆ་གཉིས་པ་གཞུའི་དུས། ཆ་གསུམ་པ་མདའི་དུས། ཆ་བཞི་པ་གླང་པོ་ཆེའི་དུས། ཆ་ལྔ་པ་རྒྱལ་མཚན་གྱི་དུས། ཆ་དྲུག་པ་སེང་གེའི་དུས། ཆ་བདུན་པ་ཁྱིའི་དུས། ཆ་བརྒྱད་པ་གླང་གི་དུས། ཆ་དགུ་པ་རུས་སྦལ་གྱི་དུས། ཆ་བཅུ་པ་བོང་བུའི་དུས། ཆ་བཅུ་གཅིག་པ་ཆུ་སྲིན་གྱི་དུས། ཆ་བཅུ་གཉིས་པ་དུང་གི་དུས་སོ། །ཉི་མ་རེ་རེ་ལ་ཆུ་ཚོད་སུམ་ཅུ་རྩ་གཉིས་རྩ་གཉིས་ཡོད་པ་ལ། དུས་ཚོད་རེ་རེ་ལ་ཆུ་ཚོད་ཕྱེད་དང་གསུམ་གསུམ་དང༌། སྐད་ཅིག་མ་བརྒྱ་ལྔ་བཅུ་ལྔ་བཅུ་ཡོད་དོ། །ཉི་མ་ནུབ་ནས་རྔ་མོ་ནས་དུང་གི་བར་དུ། དུས་ཚོད་ཉིན་མོ་བཞིན་དུ་ཤེས་པར་བྱའོ། །ཆུ་ཚོད་ཉི་ཤུ་རྩ་བརྒྱད་ཡོད་པ་ལ། དུས་ཚོད་རེ་རེ་ལ་ཆུ་ཚོད་གཉིས་དང༌། སྐད་ཅིག་མ་སུམ་བརྒྱ་སུམ་བརྒྱ་ཡོད་དོ། །དགུན་ཟླར་བའི་ཚེས་གཅིག་ནས་གནམ་སྟོང་གི་བར་དུ། ཉི་མ་རེ་རེ་ལ་དུས་ཚོད་བཅུ་གཉིས་ཡོད་པ་ལ། ཉི་མ་ཤར་ནས་བཅུ་གཉིས་ཀྱི་ཆ་གཅིག་གཞུའི་དུས། ཆ་གཉིས་པ་མདའི་དུས། ཆ་གསུམ་པ་གླང་པོ་ཆེའི་དུས། ཆ་བཞི་པ་རྒྱལ་མཚན་གྱི་དུས། ཆ་ལྔ་པ་སེང་གེའི་དུས། ཆ་དྲུག་པ་ཁྱིའི་དུས། ཆ་
བདུན་པ་གླང་གི་དུས། ཆ་བརྒྱད་པ་རུས་སྦལ་གྱི་དུས། ཆ་དགུ་པ་བོང་བུའི་དུས། ཆ་བཅུ་པ་ཆུ་སྲིན་གྱི་དུས། ཆ་བཅུ་གཅིག་པ་དུང་གི་དུས། ཆ་བཅུ་གཉིས་པ་རྔ་མོའི་དུས་སོ། །ཉི་མ་རེ་རེ་ལ་དུས་ཚོད་བཅུ་གཉིས་བཅུ་གཉིས་ཡོད་པ་ལ། དུས་ཚོད་རེ་རེ་ལ་ཆུ་ཚོད་ཕྱེད་དང་གསུམ་གསུམ་ཡོད་དོ། །དགུན་ཟླ་ར་བའི་ཚེས་གཅིག་ནས་གནམ་སྟོང་གི་བར་དུ། ནུབ་རེ་ལ་དུས་ཚོད་བཅུ་གཉིས་ཡོད་པ་ལ། ཉི་མ་ནུབ་ནས་ཆ་གཅིག་པ་གཞུ་ནས་རྔ་མོའི་བར་དུ། དུས་ཚོད་ནི་ཉིན་མོ་བཞིན་དུ་ཤེས་པར་བྱའོ། །ནུབ་རེ་རེ་ལ་ཆུ་ཚོད་སུམ་ཅུ་སུམ་ཅུ་ཡོད་པ་ལ། དུས་ཚོད་རེ་རེ་ལ་ཆུ་ཚོད་ཕྱེད་དང་གསུམ་གསུམ་ཡོད་དོ། །དགུན་ཟླ་འབྲིང་བོའི་ཚེས་གཅིག་ནས་གནམ་སྟོང་གི་བར་དུ། ཉིན་མོ་རེ་ལ་ཆུ་ཚོད་བཅུ་གཉིས་བཅུ་གཉིས་ཡོད་པ་ལ། ཉི་མ་ཤར་ནས་བཅུ་གཉིས་ཀྱི་ཆ་དང་བོ་མདའི་དུས། ཆ་གཉིས་པ་གླང་པོ་ཆེའི་དུས། ཆ་གསུམ་པ་རྒྱལ་མཚན་གྱི་དུས། ཆ་བཞི་པ་སེང་གེའི་དུས། ཆ་ལྔ་པ་ཁྱིའི་དུས། ཆ་དྲུག་པ་གླང་གི་དུས། ཆ་བདུན་པ་རུས་སྦལ་གྱི་དུས། ཆ་བརྒྱད་པ་བོང་བུའི་དུས། དགུ་པ་ཆུ་སྲིན་གྱི་དུས། བཅུ་པ་དུང་གི་དུས། བཅུ་གཅིག་པ་རྔ་མོའི་དུས། ཆ་བཅུ་གཉིས་པ་གཞུའི་དུས་སོ།། ཉི་མ་རེ་རེ་ལ་དུས་ཚོད་བཅུ་གཉིས་བཅུ་གཉིས་ཡོད་པ་ལ། དུས་ཚོད་རེ་རེ་ལ་ཡང་ཆུ་ཚོད་ཕྱེད་དང་གསུམ་གསུམ་དུ། སྐད་ཅིག་མ་བརྒྱ་ལྔ་བཅུ་ལྔ་བཅུ་མ་ལྡང་བ་ཡོད་དོ། །དགུན་ཟླ་འབྲིང་པོའི་ཚེས་གཅིག་ནས་གནམ་སྟོང་གི་བར་དུ། ཉི་མ་ནུབ་ནས་མདའ་ནས་གཞུའི་བར་དུ། དུས་ཚོད་བཅུ་གཉིས་ནི་ཉིན་མོ་བཞིན་དུ་ཤེས་པར་བྱའོ། །དུས་ཚོད་རེ་རེ་ལ་ཆུ་ཚོད་ཕྱེད་དང་གསུམ་གསུམ་དང༌། སྐད་ཅིག་མ་བརྒྱ་ལྔ་བཅུ་ལྔ་བཅུ་ཡོད་དོ། །དགུན་ཟླ་ཐ་ཆུངས་ཀྱི་ཚེས་གཅིག་ནས་གནམ་སྟོང་གི་བར་དུ། ཉི་མ་རེ་རེ་ལ་དུས་ཚོད་བཅུ་གཉིས་བཅུ་གཉིས་ཡོད་པ་ལ། ཉི་མ་ཤར་ནས་བཅུ་གཉིས་ཆ་དང་པོ་ལ་གླང་པོ་ཆེའི་དུས། ཆ་གཉིས་པ་རྒྱལ་མཚན་གྱི་དུས། ཆ་གསུམ་པ་སེང་གེའི་དུས། ཆ་བཞི་པ་ལ་ཁྱིའི་དུས། ཆ་ལྔ་པ་གླང་གི་དུས། ཆ་དྲུག་པ་རུས་སྦལ་གྱི་དུས། ཆ་བདུན་པ་བོང་བུའི་དུས། ཆ་བརྒྱད་པ་ཆུ་སྲིན་གྱི་དུས། ཆ་དགུ་པ་དུང་གི་དུས།
ཆ་བཅུ་པ་རྔ་མོའི་དུས། ཆ་བཅུ་གཅིག་པ་གཞུའི་དུས། ཆ་བཅུ་གཉིས་པ་མདའི་དུས་སོ། །ཉི་མ་རེ་རེ་ལ་དུས་ཚོད་བཅུ་གཉིས་བཅུ་གཉིས་ཡོད་པ་ལ། དུས་ཚོད་རེ་རེ་ལ་ཆུ་ཚོད་གཉིས་གཉིས་དང་སྐད་ཅིག་མ་བརྒྱ་ལྔ་བཅུ་ལྔ་བཅུ་ཡོད་དོ། །དགུན་ཟླ་ཐ་ཆུངས་ཀྱི་ཚེས་གཅིག་ནས་གནམ་སྟོང་གི་བར་དུ། ཉི་མ་ནུབ་ནས་དུས་ཚོད་བཅུ་གཉིས་ཡོད་པ་ལ། གླང་པོ་ཆེ་ནས་མདའི་བར་དུ། ཆུ་ཚོད་སུམ་ཅུ་རྩ་བཞི་ཡོད་པ་ལ། དུས་ཚོད་རེ་རེ་ལ་ཡང་ཆུ་ཚོད་ཕྱེད་དང་གསུམ་གསུམ་དང༌། སྐད་ཅིག་མ་སུམ་བརྒྱ་སུམ་བརྒྱ་ཡོད་དོ། །དེ་བཞིན་དུ་ལོ་དང་ཟླ་བ་དང༌། དུས་ཚོད་ཀུན་ལ་ཤེས་པར་བྱའོ། །རྒྱལ་མཚན་ནི་འཇིག་རྟེན་གྱི་ཁམས་སུ་ནི་གྲགས་པའོ། །སེང་གེ་ནི་གཅན་གཟན་ཐམས་ཅད་ལ་མི་འཇིགས་པའོ། །ཁྱི་ནི་སྙིང་ཉེ་བའོ། །གླང་ནི་བླུན་པའོ། །རུས་སྦལ་ནི་ཐེག་པ་ཆེ་བའོ། །བོང་བུ་ནི་འཇིག་རྟེན་གྱི་ཁམས་སུ་ངན་པར་གྲགས་པའོ། །ཆུ་སྲིན་ནི་ཉེ་བར་གྲུབ་པའོ། །དུང་ནི་བརྟན་པ་སྟེ་མི་འགྱུར་བའོ། །རྔ་མོ་ནི་ལས་ལ་ངན་པའོ། །གཞུ་ནི་འཁྲུལ་ལ་བཟང་བའོ། །མདའ་ནི་འབིགས་པའོ། །གླང་པོ་ཆེ་ནི་འདོད་ཆགས་ལ་དགའ་བའོ། །དེ་བཞིན་དུ་ས་རི་བཅུ་གཉིས་བརྩི་བར་བྱའོ།། །།ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་གསུངས་པའོ། །ཁྱོད་ཀྱི་གཟའ་གང་དག་རྒྱུ་སྐར་རྣམས་ཀྱི་ཁྲོད་ནས་རྒྱུ་ཞིང་ཞེས་བྱ་བ་ནི། བྱང་ཤར་མཚམས་ན་བྲ་ཉེ་དང་སྨིན་དྲུག་གནས་ཏེ། ཤར་དྲང་པོ་ནི་སྣར་མ་དང་མགོ་དང་ལག་དང་ནབ་སོ་དང་རྒྱལ་གནས་སོ། །ཤར་ལྷོ་མཚམས་ན་སྐག་དང་མཆུ་གནས་སོ། །ལྷོ་ཕྱོགས་ན་བྲེ་དང་མེ་བཞི་དང་དབོ་དང་ནག་པ་དང་ས་རི་གནས་སོ། །ལྷོ་ནུབ་མཚམས་ནས་ག་དང་ལྷ་མཚམས་གནས་སོ། །ནུབ་ཕྱོགས་ན་སྣྲོན་དང་སྣུབས་དང་ཆུ་སྟོད་དང་ཆུ་སྨད་དང་བྱི་བཞིན་གནས་སོ། །ནུབ་བྱང་མཚམས་ན་གྲོ་བཞིན་དང་མོན་གྲུ་གནས་སོ། །བྱང་ཕྱོགས་ན་མོན་གྲེ་དང་ཁྲུམས་སྟོད་དང་ཁྲུམས་སྨད་དང་ནམ་གྲུ་དང་ཐ་སྐར་གནས་སོ། །དེ་བཞིན་དུ་གཟའ་བདུན་པོ་ཡང་གནས་སོ། །དཔྱིད་ཟླ་ར་པའི་ཚེས་གཅིག་ལ་ཉི་མའོ། །ཚེས་གཉིས་ལ་ཟླ་བ། ཚེས་གསུམ་ལ་མིག་དམར། ཚེས་བཞི་ལ་པ་པ་སངས།
ཚེས་ལྔ་ལ་ཕུར་བུ། ཚེས་དྲུག་ལ་སྦེན་པ། ཚེས་བདུན་ལ་གཟའ་ལག་གོ །ཚེས་བརྒྱད་ལ་ཉི་མ། ཚེས་དགུ་ལ་ཟླ་བ། ཚེས་བཅུ་ལ་མིག་དམར། ཚེས་བཅུ་གཅིག་ལ་པ་བ་སངས། ཚེས་བཅུ་གཉིས་ལ་ཕུར་བུའོ། །ཚེས་བཅུ་གསུམ་པ་སྤེན་པ། ཚེས་བཅུ་བཞི་ལ་གཟའ་ལག་གོ །བཅོ་ལྔ་ལ་ཉི་མ། བཅུ་དྲུག་ལ་ཟླ་བ། བཅུ་བདུན་ལ་མིག་དམར། ཚེས་བཅོ་བརྒྱད་ལ་པ་བ་སངས། ཚེས་བཅུ་དགུ་ལ་ཕུར་བུ། ཚེས་ཉི་ཤུ་ལ་སྤེན་པ། ཉི་ཤུ་གཅིག་ལ་ལག་པ། ཉི་ཤུ་གཉིས་ལ་ཉི་མ། ཉི་ཤུ་གསུམ་ལ་ཟླ་བ། ཉི་ཤུ་བཞི་ལ་མིག་དམར། ཉི་ཤུ་ལྔ་ལ་པ་བ་སངས། ཉི་ཤུ་དྲུག་ལ་ཕུར་བུ། ཉི་ཤུ་བདུན་ལ་སྤེན་པ། ཉི་ཤུ་བརྒྱད་ལ་ལག་པ། ཉི་ཤུ་དགུ་ལ་ཉི་མ། གནམ་སྟོང་ལ་ཟླ་བའོ། །དཔྱིད་ཟླ་འབྲིང་པོའི་ཚེས་གཅིག་ལ་མིག་དམར། གཉིས་པ་ལ་པ་བ་སངས། གསུམ་པ་ལ་ཕུར་བུ། བཞི་པ་ལ་སྤེན་པ། ལྔ་བ་ལ་ལག་པ། དྲུག་ལ་ཉི་མ། བདུན་ལ་ཟླ་བ། བརྒྱད་ལ་མིག་དམར། དགུ་ལ་པ་བ་སངས། བཅུ་ལ་ཕུར་བུ། བཅུ་གཅིག་ལ་སྤེན་པ། བཅུ་གཉིས་ལ་ལག་པ། བཅུ་གསུམ་ལ་ཉི་མ། བཅུ་བཞི་ལ་ཟླ་བ། བཅོ་ལྔ་ལ་མིག་དམར། བཅུ་དྲུག་ལ་པ་བ་སངས། བཅུ་བདུན་ལ་ཕུར་བུ། བཅོ་བརྒྱད་ལ་སྦེན་པ། བཅུ་དགུ་ལ་ལག་པ། ཉི་ཤུ་ལ་ཉི་མ། ཉི་ཤུ་གཅིག་ལ་ཟླ་བ། ཉི་ཤུ་གཉིས་ལ་མིག་དམར། ཉི་ཤུ་གསུམ་ལ་པ་བ་སངས། ཉི་ཤུ་བཞི་ལ་ཕུར་བུ། ཉི་ཤུ་ལྔ་ལ་སྤེན་པ། ཉི་ཤུ་དྲུག་ལ་ལག་པ། ཉི་ཤུ་བདུན་ལ་ཉི་མ། ཉི་ཤུ་བརྒྱད་ལ་ཟླ་བ། ཉི་ཤུ་དགུ་ལ་མིག་དམར། གནམ་སྟོང་ལ་བ་བ་སངས་སོ། །དཔྱིད་ཟླ་ཐ་ཆུངས་ཀྱི་ཚེས་གཅིག་ལ་ཕུར་བུ། གཉིས་ལ་སྦེན་པ། གསུམ་ལ་ལག་པ། བཞི་ལ་ཉི་མ། ལྔ་ལ་ཟླ་བ། དྲུག་ལ་མིག་དམར། བདུན་ལ་པ་བ་སངས། བརྒྱད་ལ་ཕུར་བུ། དགུ་ལ་སྤེན་བ། བཅུ་ལ་ལག་པ། བཅུ་གཅིག་ལ་ཉི་མ། བཅུ་གཉིས་ལ་ཟླ་བ། བཅུ་གསུམ་ལ་མིག་དམར། བཅུ་བཞི་ལ་པ་བ་སངས། བཅོ་ལྔ་ལ་ཕུར་བུ། བཅུ་དྲུག་ལ་སྤེན་པ། བཅུ་བདུན་ལ་ལག་པ། བཅོ་བརྒྱད་ལ་ཉི་མ། བཅུ་དགུ་ལ་ཟླ་བ། ཉི་ཤུ་ལ་མིག་དམར། ཉི་ཤུ་གཅིག་ལ་པ་བ་སངས། ཉི་ཤུ་གཉིས་ལ་ཕུར་བུ། ཉི་ཤུ་གསུམ་ལ་སྤེན་པ། ཉི་ཤུ་བཞི་ལ་ལག་པ།
ཉི་ཤུ་ལྔ་ལ་ཉི་མ། ཉི་ཤུ་དྲུག་ལ་ཟླ་བ། ཉིས་ཧུ་བདུན་ལ་མིག་དམར། ཉི་ཤུ་བརྒྱད་ལ་པ་བ་སངས། ཉི་ཤུ་དགུ་ལ་ཕུར་བུ། གནམ་སྟོང་ལ་སྦེན་པའོ། །དབྱར་ཟླ་ར་བའི་ཚེས་གཅིག་ལ་ལག་པ། གཉིས་ལ་ཉི་མ། གསུམ་ལ་ཟླ་བ། བཞི་ལ་མིག་དམར། ལྔ་ལ་པ་བ་སངས། དྲུག་ལ་ཕུར་བུ། བདུན་ལ་སྦེན་པ། བརྒྱད་ལ་ལག་པ། དགུ་ལ་ཉི་མ། བཅུ་ལ་ཟླ་བ། བཅུ་གཅིག་ལ་མིག་དམར། བཅུ་གཉིས་ལ་པ་བ་སངས། བཅུ་གསུམ་ལ་ཕུར་བུ། བཅུ་བཞི་ལ་སྦེན་པ། བཅོ་ལྔ་ལ་ལག་པ། བཅུ་དྲུག་ལ་ཉི་མ། བཅུ་བདུན་ལ་ཟླ་བ། བཅོ་བརྒྱད་ལ་མིག་དམར། བཅུ་དགུ་ལ་པ་བ་སངས། ཉི་ཤུ་ལ་ཕུར་བུ། ཉི་ཤུ་གཅིག་ལ་སྦེན་པ། ཉི་ཤུ་གཉིས་ལ་ལག་པ། ཉི་ཤུ་གསུམ་ལ་ཉི་མ། ཉི་ཤུ་བཞི་ལ་ཟླ་བ། ཉི་ཤུ་ལྔ་ལ་མིག་དམར། ཉི་ཤུ་དྲུག་ལ་པ་བ་སངས། ཉི་ཤུ་བདུན་ལ་ཕུར་བུ། ཉི་ཤུ་བརྒྱད་ལ་སྦེན་པ། ཉི་ཤུ་དགུ་ལ་ལག་པ། གནམ་སྟོང་ལ་ཉི་མའོ། དབྱར་ཟླ་འབྲིང་པོའི་ཚེས་གཅིག་ལ་ཟླ་བ། གཉིས་ལ་མིག་དམར། གསུམ་ལ་པ་བ་སངས། བཞི་ལ་ཕུར་བུ། ལྔ་ལ་སྦེན་པ། དྲུག་ལ་ལག་པ། བདུན་ལ་ཉི་མ། བརྒྱད་ལ་ཟླ་བ། དགུ་ལ་མིག་དམར། བཅུ་ལ་པ་བ་སངས། བཅུ་གཅིག་ལ་ཕུར་བུ། བཅུ་གཉིས་ལ་སྤེན་པ། བཅུ་གསུམ་ལ་ལག་པ། བཅུ་བཞི་ལ་ཉི་མ། བཅོ་ལྔ་ལ་ཟླ་བ། བཅུ་དྲུག་ལ་མིག་དམར། བཅུ་བདུན་ལ་པ་བ་སངས། བཅོ་བརྒྱད་ལ་ཕུར་བུ། བཅུ་དགུ་ལ་སྤེན་པ། ཉི་ཤུ་ལ་ལག་པ། ཉི་ཤུ་གཅིག་ལ་ཉི་མ། ཉི་ཤུ་གཉིས་ལ་ཟླ་བ། ཉི་ཤུ་སུམ་ལ་མིག་དམར། ཉི་ཤུ་བཞི་ལ་པ་བ་སངས། ཉི་ཤུ་ལྔ་ལ་ཕུར་བུ། ཉི་ཤུ་དྲུག་ལ་སྤེན་པ། ཉི་ཤུ་བདུན་ལ་ལག་པ། ཉི་ཤུ་བརྒྱད་ལ་ཉི་མ། ཉི་ཤུ་དགུ་ལ་ཟླ་བ། གནམ་སྟོང་ལ་མིག་དམར་རོ། །དབྱར་ཟླ་ཐ་ཆུངས་ཀྱི་ཚེས་གཅིག་ལ་པ་བ་སངས། གཉིས་ལ་ཕུར་བུ། གསུམ་ལ་སྦེན་པ། བཞི་ལ་ལག་པ། ལྔ་པ་ཉི་མ། དྲུག་ལ་ཟླ་བ། བདུན་ལ་མིག་དམར། བརྒྱད་ལ་པ་བ་སངས། དགུ་ལ་ཕུར་བུ། བཅུ་ལ་སྤེན་པ། བཅུ་གཅིག་ལ་ལག་པ། བཅུ་གཉིས་ལ་ཉི་མ། བཅུ་གསུམ་ལ་ཟླ་བ། བཅུ་བཞི་ལ་མིག་དམར། བཅོ་ལྔ་ལ་པ་བ་སངས། བཅུ་དྲུག་ལ་ཕུར་བུ། བཅུ་བདུན་ལ་སྦེན་པ། བཅོ་བརྒྱད་
ལ་ལག་པ། བཅུ་དགུ་ལ་ཉི་མ། ཉི་ཤུ་ལ་ཟླ་བ། ཉི་ཤུ་གཅིག་ལ་མིག་དམར། ཉི་ཤུ་གཉིས་ལ་པ་བ་སངས། ཉི་ཤུ་གསུམ་ལ་ཕུར་བུ། ཉི་ཤུ་བཞི་ལ་སྦེན་པ། ཉི་ཤུ་ལྔ་ལ་ལག་པ། ཉི་ཤུ་དྲུག་ལ་ཉི་མ། ཉི་ཤུ་བདུན་ལ་ཟླ་བ། ཉི་ཤུ་བརྒྱད་ལ་མིག་དམར། ཉི་ཤུ་དགུ་ལ་པ་བ་སངས། གནམ་སྟོང་ལ་ཕུར་བུའོ། །སྟོན་ཟླར་བའི་ཚེས་གཅིག་ལ་སྦེན་པ། གཉིས་ལ་ལག་པ། གསུམ་ལ་ཉི་མ། བཞི་ལ་ཟླ་བ། ལྔ་ལ་མིག་དམར། དྲུག་ལ་པ་བ་སངས། བདུན་ལ་ཕུར་བུ། བརྒྱད་ལ་སྤེན་པ། དགུ་ལ་ལག་པ། བཅུ་ལ་ཉི་མ། བཅུ་གཅིག་ལ་ཟླ་བ། བཅུ་གཉིས་ལ་མིག་དམར། བཅུག་སུམ་ལ་པ་བ་སངས། བཅུ་བཞི་ལ་ཕུར་བུ། བཅོ་ལྔ་ལ་སྤེན་པ། བཅུ་དྲུག་ལ་ལག་པ། བཅུ་བདུན་ལ་ཉི་མ། བཅོ་བརྒྱད་ལ་ཟླ་བ། བཅུ་དགུ་ལ་མིག་དམར། ཉི་ཤུ་ལ་པ་བ་སངས། ཉི་ཤུ་གཅིག་ལ་ཕུར་བུ། ཉིས་ཧུ་གཉིས་ལ་སྤེན་པ། ཉི་ཤུ་གསུམ་ལ་ལག་པ། ཉི་ཤུ་བཞི་ལ་ཉི་མ། ཉི་ཤུ་ལྔ་ལ་ཟླ་བ། ཉི་ཤུ་དྲུག་ལ་མིག་དམར། ཉི་ཤུ་བདུན་ལ་པ་བ་སངས། ཉི་ཤུ་བརྒྱད་ལ་ཕུར་བུ། ཉི་ཤུ་དགུ་ལ་སྤེན་པ། གནམ་སྟོང་ལ་ལག་པའོ། །སྟོན་ཟླ་འབྲིང་པོའི་ཚེས་གཅིག་ལ་ཉི་མ། ཚེས་གཉིས་ལ་ཟླ་བ། གསུམ་ལ་མིག་དམར། བཞི་ལ་པ་བ་སངས། ལྔ་ལ་ཕུར་བུ། དྲུག་ལ་སྤེན་པ། བདུན་ལ་ལག་པ། བརྒྱད་ལ་ཉི་མ། དགུ་ལ་ཟླ་བ། བཅུ་ལ་མིག་དམར། བཅུ་གཅིག་ལ་པ་བ་སངས། བཅུ་གཉིས་ལ་ཕུར་བུ། བཅུ་གསུམ་ལ་སྦེན་པ། བཅུ་བཞི་ལ་ལག་པ། བཅོ་ལྔ་ལ་ཉི་མ། བཅུ་དྲུག་ལ་ཟླ་བ། བཅུ་བདུན་ལ་མིག་དམར། བཅོ་བརྒྱད་ལ་པ་བ་སངས། བཅུ་དགུ་ལ་ཕུར་བུ། ཉི་ཤུ་ལ་སྦེན་པ། ཉི་ཤུ་གཅིག་ལ་ལག་པ། ཉི་ཤུ་གཉིས་ལ་ཉི་མ། ཉི་ཤུ་གསུམ་ལ་ཟླ་བ། ཉི་ཤུ་བཞི་ལ་མིག་དམར། ཉི་ཤུ་ལྔ་ལ་པ་བ་སངས། ཉི་ཤུ་དྲུག་ལ་ཕུར་བུ། ཉི་ཤུ་བདུན་ལ་སྦེན་པ། ཉི་ཤུ་བརྒྱད་ལ་ལག་པ། ཉི་ཤུ་དགུ་ལ་ཉི་མ། གནམ་སྟོང་ལ་ཟླ་བའོ། །སྟོན་ཟླ་ཐ་ཆུངས་ཀྱི་ཚེས་གཅིག་ལ་མིག་དམར། གཉིས་ལ་པ་བ་སངས། གསུམ་ལ་ཕུར་བུ། བཞི་ལ་
སྤེན་པ། ལྔ་ལ་ལག་པ། དྲུག་ལ་ཉི་མ། བདུན་ལ་ཟླ་བ། བརྒྱད་ལ་མིག་དམར། དགུ་ལ་པ་བ་སངས། བཅུ་ལ་ཕུར་བུ། བཅུ་གཅིག་ལ་སྤེན་པ། བཅུ་གཉིས་ལ་ལག་པ། བཅུ་གསུམ་ལ་ཉི་མ། བཅུ་བཞི་ལ་ཟླ་བ། བཅོ་ལྔ་ལ་མིག་དམར། བཅུ་དྲུག་ལ་པ་བ་སངས། བཅུ་བདུན་ལ་ཕུར་བུ། བཅོ་བརྒྱད་ལ་སྤེན་པ། བཅུ་དགུ་ལ་ལག་པ། ཉི་ཤུ་ལ་ཉི་མ། ཉི་ཤུ་གཅིག་ལ་ཟླ་བ། ཉི་ཤུ་གཉིས་ལ་མིག་དམར། ཉི་ཤུ་གསུམ་ལ་པ་བ་སངས། ཉི་ཤུ་བཞི་ལ་ཕུར་བུ། ཉི་ཤུ་ལྔ་ལ་སྤེན་པ། ཉི་ཤུ་དྲུག་ལ་ལག་པ། ཉི་ཤུ་བདུན་ལ་ཉི་མ། ཉི་ཤུ་བརྒྱད་ལ་ཟླ་བ། ཉི་ཤུ་དགུ་ལ་མིག་དམར། གནམ་སྟོང་ལ་པ་བ་སངས་སོ། །དགུན་ཟླ་ར་བའི་ཚེས་གཅིག་ལ་ཕུར་བུ། གཉིས་ལ་སྤེན་པ། གསུམ་ལ་ལག་པ། བཞི་ལ་ཉི་མ། ལྔ་ལ་ཟླ་བ། དྲུག་ལ་མིག་དམར། བདུན་ལ་པ་བ་སངས། བརྒྱད་ལ་ཕུར་བུ། དགུ་ལ་སྤེན་པ། བཅུ་ལ་ལག་པ། བཅུ་གཅིག་ལ་ཉི་མ། བཅུ་གཉིས་ལ་ཟླ་བ། བཅུ་གསུམ་ལ་མིག་དམར། བཅུ་བཞི་ལ་པ་བ་སངས། བཅོ་ལྔ་ལ་ཕུར་བུ། བཅུ་དྲུག་ལ་སྦེན་པ། བཅུ་བདུན་ལ་ལག་པ། བཅོ་བརྒྱད་ལ་ཉི་མ། བཅུ་དགུ་ལ་ཟླ་བ། ཉི་ཤུ་ལ་མིག་དམར། ཉི་ཤུ་གཅིག་ལ་པ་བ་སངས། ཉི་ཤུ་གཉིས་ལ་ཕུར་བུ། ཉི་ཤུ་གསུམ་ལ་སྦེན་པ། ཉི་ཤུ་བཞི་ལ་ལག་པ། ཉི་ཤུ་ལྔ་ལ་ཉི་མ། ཉི་ཤུ་དྲུག་ལ་ཟླ་བ། ཉི་ཤུ་བདུན་ལ་མིག་དམར། ཉི་ཤུ་བརྒྱད་ལ་པ་བ་སངས། ཉི་ཤུ་དགུ་ལ་ཕུར་བུ། གནམ་སྟོང་ལ་སྦེན་པའོ། །དགུན་ཟླ་འབྲིང་པོའི་ཚེས་གཅིག་ལ་ལག་པ། ཚེས་གཉིས་ལ་ཉི་མ། གསུམ་ལ་ཟླ་བ། བཞི་ལ་མིག་དམར། ལྔ་ལ་བ་བསངས། དྲུག་ལ་ཕུར་བུ། བདུན་ལ་སྤེན་པ། བརྒྱད་ལ་ལག་པ། དགུ་ལ་ཉི་མ། བཅུ་ལ་ཟླ་བ། བཅུ་གཅིག་ལ་མིག་དམར། བཅུ་གཉིས་ལ་པ་བ་སངས། བཅུ་གསུམ་ལ་ཕུར་བུ། བཅུ་བཞི་ལ་སྤེན་པ། བཅོ་ལྔ་ལ་ལག་པ། བཅུ་དྲུག་ལ་ཉི་མ། བཅུ་བདུན་ལ་ཟླ་བ། བཅོ་བརྒྱད་ལ་མིག་དམར། བཅུ་དགུ་ལ་པ་བ་སངས། ཉི་ཤུ་ལ་ཕུར་བུ། ཉི་ཤུ་གཅིག་ལ་སྤེན་པ། ཉི་ཤུ་གཉིས་ལ་ལག་པ། ཉི་ཤུ་གསུམ་ལ་ཉི་མ། ཉི་ཤུ་བཞི་ལ་ཟླ་བ། ཉི་ཤུ་ལྔ་ལ་མིག་དམར། ཉི་ཤུ་ལྔ་ལ་མིག་དམར། ཉི་ཤུ་
དྲུག་ལ་པ་བ་སངས། ཉི་ཤུ་བདུན་ལ་ཕུར་བུ། ཉི་ཤུ་བརྒྱད་ལ་སྦེན་པ། ཉི་ཤུ་དགུ་ལ་ལག་པ། གནམ་སྟོད་ལ་ཉི་མའོ། །དགུན་ཟླ་ཐ་ཆུངས་ཀྱི་ཚེས་གཅིག་ལ་ཟླ་བ། གཉིས་ལ་མིག་དམར། གསུམ་ལ་པ་བ་སངས། བཞི་ལ་ཕུར་བུ། ལྔ་ལ་སྤེ་ན་པ། དྲུག་ལ་ལག་པ། བདུན་ལ་ཉི་མ། བརྒྱད་ལ་ཟླ་བ། དགུ་ལ་མིག་དམར། བཅུ་ལ་པ་བ་སངས། བཅུ་གཅིག་ལ་ཕུར་བུ། བཅུ་གཉིས་ལ་སྤེན་པ། བཅུ་གསུམ་ལ་ལག་པ། བཅུ་བཞི་ལ་ཉི་མ། བཅོ་ལྔ་ལ་ཟླ་བ། བཅུ་དྲུག་ལ་མིག་དམར། བཅུ་བདུན་ལ་པ་བསངས། བཅོ་བརྒྱད་ལ་ཕུར་བུ། བཅུ་དགུ་ལ་སྤེན་པ། ཉི་ཤུ་ལ་ལག་པ། ཉི་ཤུ་གཅིག་ལ་ཉི་མ། ཉི་ཤུ་གཉིས་ལ་ཟླ་བ། ཉི་ཤུ་གསུམ་ལ་མིག་དམར། ཉི་ཤུ་བཞི་ལ་པ་བ་སངས། ཉི་ཤུ་ལྔ་ལ་ཕུར་བུ། ཉི་ཤུ་དྲུག་ལ་སྤེན་པ། ཉི་ཤུ་བདུན་ལ་ལག་པ། ཉི་ཤུ་བརྒྱད་ལ་ཉི་མ། ཉི་ཤུ་དགུ་ལ་ཟླ་བ། གནམ་སྟོང་ལ་མིག་དམར་རོ། །ཆོས་གྲངས་ཀྱིས་ཟླ་བ་མི་ཐུབ་སྟེ། ཟླ་བས་སྐར་མ་མི་ཐུབ། དེ་བཞིན་དུ་གཟའ་རྣམས་ཀྱང་ལྷག་སྟེ། དེ་བས་ན་ལོ་ལྔ་ལྔ་ན་ཟླ་བ་རེ་རེ་བསྣན་པའོ། །དེའི་ཁོངས་སུ་བརྩིས་ན། ཟླ་བ་དང་ཚེས་གྲངས་དང༌། སྐར་མ་དང༌། གཟའ་ཚད་བའོ། །འགྲིབ་བ་དང་ཞེས་བྱ་བ་ནི། གཟའ་དང་སྐར་མ་ཚེས་གྲངས་ལ་རྒྱུ་སྟེ། དེ་གསུམ་གྱི་བྱེ་བྲག་གིས། བཟང་བ་དང་ངན་པས་འགྲིབ་པའོ། །འཕེལ་བ་དང་ཞེས་བྱ་བ་ནི། དེ་བཞིན་དུ་གཟའ་དང་སྐར་མ་གསུམ་གྱིས་བཟང་ངན་གྱིས་འཕེལ་བའོ། །བདེ་བ་དང་ཞེས་བྱ་བ་ནི། དེ་ལ་ཡང་གསུམ་ཀ་འཛོམ་པའི་དུས་སུ། སྐྱེས་པར་གྱུར་ན་བདེ་བ་ཕུན་སུམ་ཚོགས་བའོ། །སྡུག་བསྔལ་བ་དང་ཞེས་བྱ་བ་ནི། སྐྱེས་པའི་ཆོས་གྲངས་ཀྱི་ཁྱད་པར་ཡིན་ཏེ། དེ་ཡང་གཟའ་དང་སྐར་མའི་ཁྱད་པར་རོ། །ལོ་ལེགས་པ་དང་ཞེས་བྱ་བ་ནི། གཟའ་དང་སྐར་མ་ལོ་དང་ཟླ་བ་བཟང་པོའི་ཁྱད་པར་གྱིས་སོ། །ལོ་ཉིས་བ་དང་ཞེས་བྱ་བ་ནི། དེ་བཞིན་དུ་གཟའ་དང་སྐར་མ་ལོ་ཟླ་བ་སྟེ། དེ་ངན་པའི་སྐྱོན་གྱིས་དེ་བས་ལོ་ཉེས་པ་དང༌། ཚེ་ཐུང་བ་དང༌། ལྟོགས་པ་དང༌། ནད་མོད་པ་དང༌། འགྲོ་མི་ཤེས་པ་དང༌། དེ་ལ་སོགས་པ་བྱུང་བའོ། །དེ་བཞིན་དུ་བཟང་བ་ལ་ཡང་ཤེས་པར་བྱའོ།།
དག་ཀྱང་སྟོན་པ་རྣམས་ཀྱི་མིང་ཟུང་ཤིག་ཅེས་བྱ་བ་ནི། གཟའ་ཆེན་པོ་དགུ་དང༌། རྒྱུ་སྐར་ཉི་ཤུ་རྩ་བརྒྱད་དང༌། ལོ་བཅུ་གཉིས་དང༌། ཟླ་བ་བཅུ་གཉིས་དང༌། དུས་དྲུག་དང༌། ར་ཤི་བཅུ་གཉིས་དང༌། དེ་རྣམས་ཀྱི་ཁྱད་པར་གྱིས་ལེགས་ཉེས་སྟོན་པའོ། །འདི་ལྟ་སྟེ་ཞེས་བྱ་བ་ནི། གཟའ་དགུ་པོ་ལྟ་བའོ། །གཟའ་ཉི་མ་དང་ཞེས་བྱ་བ་ནི། མེའི་ཁམས་ཡིན་ཏེ། དེའི་སྐུ་མདོག་དང་ཕྱག་མཚན་ནི། ཞལ་གཅིག་ཕྱག་གཉིས་པ། སྐུ་མདོག་དམར་པོ། གཡས་ན་སྦ་ལྕག །གཡོན་ན་པདྨ་དམར་པོ་ཐོགས་པའོ། །རྟ་ལ་ཞོན་པ་གོ་ཆ་གོན་བའོ། །གཟའ་ཟླ་བ་ཞེས་བྱ་བ་ནི། ཆུའི་ཁམས་ཏེ། ཞལ་གཅིག་ཕྱག་གཉིས་སྐུ་མདོག་དཀར་པོ། །གོ་ཆ་གོན་པ་གཡས་ན་པདྨ་དཀར་པོ། གཡོན་ན་རི་བོང་གི་རྒྱལ་མཚན་འཛིན་པ། ངང་སྐྱ་ལ་ཞོན་པའོ། །གཟའ་མིག་དམར་ཞེས་བྱ་བ་ནི། སྐུ་མདོག་དམར་པོ་ཞལ་གཅིག་ཕྱག་གཉིས་པ། གཡས་ན་དབྱུག་ཏོ་མིག་ཅན། གཡོན་མི་མགོ་དང་སྡིགས་མཛུབ། ར་དམར་པོ་ལ་ཞོན་པ། མེའི་ཁམས་སོ། །གཟའ་པ་བ་སངས་ཞེས་བྱ་བ་ནི། སའི་ཁམས་སྐུ་མདོག་སེར་པོ། ཞལ་གཅིག་ཕྱག་གཉིས་པ། གཡས་ན་བུམ་པ། གཡོན་ན་རིན་པོ་ཆེའི་ཕྲེང་བའོ། །པདྨ་ལ་བཞུགས་པའོ། །གཟའ་ཕུར་བུ་དང་ཞེས་བྱ་བ་ནི། ཤིང་གི་ཁམས་སོ། །སྐུ་མདོག་དཀར་པོ་ཞལ་གཅིག་ཕྱག་གཉིས་པ། གཡས་གཡོན་མདའ་གཞུ་ཐོགས་པ། གླང་པོ་ཆེ་ལ་ཞོན་པའོ། །གཟའ་སྤེན་པ་དང་ཞེས་བྱ་བ་ནི། ཆུའི་ཁམས་སོ། །སྐུ་མདོག་སེར་པོ་ཞལ་གཅིག་ཕྱག་གཉིས་པ། གཡས་ན་པུ་སྟི། གཡོན་ན་བུམ་པ། རྡོའི་གདན་ལ་བཞུགས་པའོ། །གཟའ་ལག་བ་དང་ཞེས་བྱ་བ་ནི། ལྕགས་གྱི་ཁམས་སོ། །སྐུ་མདོག་ལྗང་ནག་ཞལ་གཅིག་ཕྱག་གཉིས་པ། གཡས་རལ་གྲི་།གཡོན་སྡིགས་མཛུབ་རུས་སྦལ་ལ་ཞོན་པའོ། །རཱ་ཧུ་ལ་དང་ཞེས་བྱ་བ་ནི། ཁམས་ལྔ་ཀའོ། །མདོག་ནག་པོ། །སྨད་སྦུལ་དུ་འདུག་པ། དབུ་སྐྲ་སེར་པོ། ཞལ་གཅིག་ཕྱག་གཉིས་པ། ཉི་མ་དང་ཟླ་བ་ཕྱག་གཉིས་ན་བསྣམས་པ། སྤྲིན་གྱི་གདན་ལ་བཞུགས་པའོ། །གཟའ་དུ་བ་མཇུག་རིངས།
དང་ཞེས་བྱ་བ་ནི། མདོག་དུད་ཀ་ཞལ་གཅིག་ཕྱག་གཉིས་བ། ཕྱག་གཡས་ན་རལ་གྲི་བསྣམས་པ། གཡོན་ན་ཞགས་པ་བསྣམས་པའོ། །ཁམས་ལྔ་ཀ་ལ་གནས་པའོ། །གཟའ་དེ་རྣམས་ཀྱི་དུས་སུ་རིག་པ་སློབ་པར་འདོད་ན་བཟང་ངན་གྱི་ཁྱད་པར་བརྟགས་ལ་བྱའོ། །ཆོས་དང་སློབ་མ་འཛིན་པ་བོ། །སློབ་དཔོན་འཛིན་པ་དེ་བཞིན་ནོ། །གཟའ་ཆེན་ཕུར་བུའི་དུས་སུ་ནི། དབུ་འཛུགས་དེ་ནི་བཟང་བ་ཡིན། །དེ་བཞིན་རིག་པ་གཞན་ལ་ཡང༌། །དེ་ཡི་དུས་སུ་བཟང་བར་བཤད། །སྐྲ་མདུད་གོས་ནི་གསར་བའམ། །ཟས་དང་གསར་པ་གང་བྱེད་པ། །དེ་ཡི་དུས་སུ་བཟང་བར་བཤད། །སྐྲ་འཇར་སེན་མོ་འབྲེག་པ་དང༌། །དེ་བཞིན་གོས་བཟོ་བྱེད་པ་དང༌། །རྟ་དང་གླང་པོ་སོགས་པའི་ནོར། །དེ་ཡི་དུས་སུ་ཕྱིར་མི་གཏང༌། །གལ་ཏེ་བཏང་བར་གྱུར་ན་ནི། །ཁར་ཅེ་ལོག་པར་འགྱུར་བའོ། །ཉི་མ་སྤེན་བའི་གཟའ་གཉིས་ལ། །མགོ་འཛུགས་དེ་ནི་འབྲིང་པོར་བཤད། །དམག་དང་འཁྲུག་པ་གང་བྱེད་པ། །དེ་ཡི་དུས་སུ་འདྲེན་པ་ན། །རབ་ཏུ་ཡང་དག་བཤད་པར་བྱ། །སྐྲ་དང་སེན་མོ་གོས་ལ་སོགས། །དེ་ཡི་དུས་སུ་བྱས་ན་ནི། །ནད་དང་རིམས་ལ་སོགས་པ་འབྱུང༌། །ཤི་བའི་དུས་ལ་བབ་པའོ། །ལམ་འགྲོ་དབང་བསྐུར་ལ་སོགས་དང༌། །ཉི་མའི་དུས་སུ་བཟང་བར་བཤད། །སྦེན་པའི་དུས་སུ་དེ་བྱས་ན། །ཤིན་ཏུ་ངན་པར་དེ་བཤད་དོ། །གལ་ཏེ་དེ་དུས་བྱས་ན་ནི། །ནད་འབྱུང་ཁར་ཅེ་ལོག་པར་འགྱུར། །མིག་དམར་དང་ནི་ལག་བ་ལ། །རིག་པ་གང་གི་མགོ་འཛུགས་པ། །སློབ་མ་སློབ་དཔོན་འབྲེལ་བྱེད་པ། །ལམ་འགྲོ་ཉེ་ཚོང་བྱེད་བ་དང༌། །དབང་བསྐུར་ལ་སོགས་གང་བྱེད་པ། །དེ་ནི་འཆི་བདག་ཐེབས་པར་འགྱུར། །ངན་པའི་ལས་ནི་གང་བྱེད་པ། །དེ་ཡི་དུས་སུ་བཟང་བར་འགྱུར། །ཟླ་བ་དང་ནི་བ་བ་སངས། །དེ་དུས་རིག་པ་སློབས་གྱུར་ན། །གོ་བ་མ་རྙེད་གཏི་མུག་ནས། །ལས་ནི་གང་དག་བྱེད་པ་ན། །དེ་ཡི་དུས་སུ་འགྲུབ་མི་འགྱུར། །དེ་ལྟར་གཟའ་བདུན་པོའི་དུས་སུ་ཁྲུས་ལ་སོགས་པ་བྱེད་པ་ནི་གཟའ་ལག་པ་ལ་བྱའོ། །གོས་གསར་བ་འདྲུབ་པ་དང་གཅོད་པ་ནི། ཟླ་བ་དང་བ་བ་སངས་ལ་བྱའོ། །ཆོས་ལ་སོགས་པའི་རིག་པ་
ནི། །གཟའ་ཕུར་བུ་ལ་བྱའོ། །ཁང་པ་བརྩིགས་པའམ། བག་མ་ལེན་པའམ། བཟའ་གསར་པ་བྱེད་པ་ནི། ཉི་མ་དང་སྤེན་པ་ལ་བྱའོ། །ཉི་མ་ལས་སྐྱེས་པའི་བུ་ནི་ཤིན་ཏུ་གྲགས་པ་མིས་མི་ཐུབ་པའོ། །ཟླ་བ་ལས་སྐྱེས་པའི་བུ་ནི་འཇམ་ཞིང་དབང་པོ་ཞེན་པའོ། །མིག་དམར་ལས་སྐྱེས་པའི་བུ་ནི་སྡིག་ལ་དགའ་ཞིང་དྲག་པོར་སྐྱེས་པའོ། །པ་བ་སངས་ལས་སྐྱེས་པ་ནི། སེར་སྣ་ཆེ་ཞིང་འདོད་ཆགས་ལ་དགའ་བའོ། །ཕུར་བུ་ལས་སྐྱེས་པ་ནི་ཤིན་ཏུ་གྲགས་ལ་ཡོན་ཏན་ལྡན་པའོ། །སྤེན་པ་ལས་སྐྱེས་པ་ནི་འབྲིང་དུ་ཤེས་པར་བྱའོ། །གཟའ་ལག་པ་ལས་སྐྱེས་པ་ནི་ལྟོགས་པར་འགྱུར་ཞིང་སྡིག་བ་ལ་དགའ་བའོ། །ནད་ཐམས་ཅད་འབྱུང་བའོ། །དེ་རྣམས་ནི་གཟའ་བརྟག་བའོ། །གཟའི་ལ་ཉེ་བརྟག་པ་ནི། ཉི་མའི་དུས་སུ་ནི་མཛེ་ཕོ་དང་ནད་འགོས་པའི་མི་དང་འཕྲད་བར་འགྱུར་རོ། །ཡང་ན་བཙུན་བ་དང་ཕྲད་དོ། །ཟླ་བའི་དུས་སུ་བུད་མེད་རྒན་མོ་གོས་ནག་པོ་གོན་བ་དང་ཕྲད་དོ། །མིག་དམར་གྱི་དུས་སུ་ནི་སྔགས་པ་གོས་དམར་པོ་གོན་བའམ། བུད་མེད་ཤམ་བུ་དམར་པོ་བཏགས་པ་དང་ཕྲད་དོ། །པ་བ་སངས་ཀྱི་དུས་སུ་ནི། བཙུན་པ་འམ་བུད་མེད་གོས་སེར་པོ་གོན་པ་དང་ཕྲད་དོ། །ཕུར་བུའི་དུས་སུ་ནི། མདའ་ཐོགས་པའི་མི་རལ་བ་ཅན་དང་ཕྲད་དོ། །སྤེན་པའི་དུས་སུ་ནི། ཞར་བ་དང་ཕྲད་དོ། །ལག་པའི་དུས་སུ་རྐང་པ་འཐེད་བའམ། ལག་པ་ཞ་བ་དང་ཕྲད་དོ། །གཟའ་བདུན་གྱི་ལ་ཉེ་བརྟག་པའོ། །གཟའ་རཱ་ཧུ་ལ་དང་དུ་བ་མཇུག་རིངས་ནི། ཁམས་ལྔའི་རང་བཞིན་གཞན་གྱིས་མི་ཐུབ་པ་དྲག་ཤུལ་ཆེ་བའོ། །དཔྱིད་ཟླར་བའི་ཆོས་བཞི་ལ་སྲོད་ལ་ཤར་ནས་ནུབ་ཏུ་རྒྱུ། །ཆོས་བརྒྱད་ལ་སྲོད་ཡོལ་ནས་ལྷོ་ནུབ་མཚམས་ནས་བྱང་ཤར་མཚམས་སུ་རྒྱུ་བའོ། །ཚེས་བཅུ་གཉིས་ལ་བྱང་ནས་ལྷོར་རྒྱུ་བའོ། །བཅུ་དྲུག་ལ་ཉི་མ་ཕྱེད་ན་ཤར་ལྷོ་མཚམས་ནས་བྱང་ཤར་མཚམས་སུ་རྒྱུའོ། །ཉི་ཤུ་ཐམ་པ་ལ་ནུབ་ནས་ཤར་དུ་ནམ་ཕྱེད་ན་རྒྱུའོ། །ཉི་ཤུ་བཞི་ལ་ཐོ་རངས་ཀ་ཤར་ལྷོ་ནས་ནུབ་བྱང་དུ་རྒྱུའོ། །ཉི་ཤུ་བརྒྱད་ལ་ཉི་མ་མདུང་གང་ན་བྱང་ནས་ལྷོར་རྒྱུའོ། །གནམ་སྟོང་ལ་ཉི་མ་ནུབ་
ནས་ལྷོ་ནུབ་མཚམས་ནས་བྱང་ཤར་མཚམས་སུ་རྒྱུའོ། །དཔྱིད་ཟླ་འབྲིང་པའི་ཚེས་བཞི་ལ་སྲོད་ལ་ནུབ་ནས་ཤར་དུ་རྒྱུའོ། །དེ་བཞིན་དུ་ཟླ་བ་ལྷག་མ་བཅུ་པོ་ལ་ཡང་སྤེལ་མར་ཤེས་པར་བྱའོ། །ལས་དང་བྱ་བ་ཅི་བྱེད་ཀྱང་གཟའ་རྒྱུ་བ་དང༌། གདོང་ཐུག་ཏུ་མི་བྱ་བར་ཁོ་དང་འགྲོགས་ལ་བྱའོ། །ཟླ་བ་གང་ཡང་རུང་བ་ལ། ཧལ་ཁྱི་རྒྱུ་བ་ནི། ཟླ་བ་གང་ཡང་རུང་བའི་ཚེས་གཅིག་ལ་ནི་སྔ་དྲོ་ཆུ་ཚོད་ལྔ་ལ་ཁོ་གནས་པའོ། །ཚེས་བདུན་ལ་ཆུ་ཚོད་བཅུ་ཐམ་པ། ཉིན་ཕྱེད་ནས་ཁོའི་དུས་སོ། །ཚེས་བརྒྱད་ལ་ཉི་མ་མདུང་གང་ལ་ཆུ་ཚོད་བཞི་ཁོའི་དུས་སོ། །ཚེས་བཅུ་བཞི་ལ་ཉི་མ་དྲོས་ནས་ཆུ་ཚོད་ཉི་ཤུ་ཁོའི་དུས་སོ། །ཚེས་བཅོ་ལྔ་ལ་ཉི་མ་ཕྱེད་ནས་ཆུ་ཚོད་དྲུག་ཁོའི་དུས་སོ། །ཚེས་བཅུ་དྲུག་ལ་སྲོད་འཁོར་ནས་ཆུ་ཚོད་བདུན་ལ་ཁོའི་དུས་སོ། །ཉི་ཤུ་གཉིས་ལ་ནམ་ཕྱེད་ནས་ཆུ་ཚོད་གསུམ་ཁོའི་དུས་སོ། །ཉི་ཤུ་གསུམ་ལ་ནམ་ཕྱེད་ནས་ཆུ་ཚོད་གསུམ་འདས་ནས་ཆུ་ཚོད་ལྔ་ཁོའི་དུས་སོ། །ཉི་ཤུ་དགུ་ལ་བྱང་དྲང་པོ་ནས་ཆུ་ཚོད་བརྒྱད་ཁོའི་དུས་སོ། །གནམ་སྟོང་ལ་ཉི་མ་ཕྱེད་ནས་ནམ་ཕྱེད་དུ་རྒྱུའོ། །དེའི་དུས་སུ་ལས་དང་བྱ་བ་ཅི་བྱེད་ཀྱང༌། སྡུག་བསྔལ་ཐམས་ཅད་འབྱུང་བས། དེའི་ཕྱིར་ན་ལས་བྱ་བ་ཅི་ཡང་མི་བྱའོ། །ཧལ་ཁྱི་ན་ལྔ་ཡོད་དོ། །ཧལ་ཁྱི་ནག་པོ་དང་དཀར་པོ་དང༌། སེར་པོ་དང༌། དམར་བོ་དང༌། ལྗང་གུ་དང་ལྔ་བོ་དེ་ཟླ་བ་དཀར་པོ་དང་ནག་པོ། སྟོད་སྨད་དུ་སྤེལ་ནས་རྒྱུ་བའོ། །ཁྱིའི་གཟུགས་སུ་ཡོད་པ། མཇུག་ན་ཡང་གདོང་པ་ཡོད་པ། ཁ་ནས་མེ་འབར་བ་དེ་དང་འཕྲད་པར་གྱུར་ན་གང་གིས་ཀྱང་མི་ཐུབ་ཅིང་སྡུག་བསྔལ་ཐམས་ཅད་འབྱུང་བར་འགྱུར་རོ། །རྒྱུ་སྐར་ཉི་ཤུ་རྩ་བརྒྱད་ནི། དེ་ལྟར་ཕྱོགས་ན་བདུན་བདུན་ནོ། །ཞེས་བྱ་བ་ནི། སྨིན་དྲུག་ནི་མེའི་ཁམས། སྣར་མ་ནི་ཆུའི་ཁམས། མགོ་ནི་སའི་ཁམས། ལག་ནི་ཤིང་གི་ཁམས། ནབ་སོ་ལྕགས་ཀྱི་ཁམས་སོ། །རྒྱལ་ཆུའི་ཁམས། །སྐག་མེའི་ཁམས་སོ། །བདུན་བོ་དེ་དག་ནི་ཤར་ཕྱོགས་ན་གནས་སོ། །མཆུ་ནི་སའི་ཁམས། །གྲེ་ནི་ཆུའི་ཁམས། དབོ་ནི་ཤིང་གི་ཁམས། མེ་བཞི་ནི་ལྕགས་ཀྱི་ཁམས། ནག་པ་མེའི་ཁམས། ས་རི་སའི་ཁམས། ས་ག་ཆུའི་ཁམས་སོ། །དེ་དག་བདུན་པོ་ནི་ལྷོ་ན་གནས་སོ། །ལྷ་མཚམས་ཆུའི་ཁམས། སྣྲོན་
མེའི་ཁམས། སྣུ་བས་སའི་ཁམས། ཆུ་སྟོད་ཤིང་གི་ཁམས། ཆུ་སྨད་ལྕགས་ཀྱི་ཁམས། །བྱི་བཞིན་མེའི་ཁམས། གྲོ་བཞིན་སའི་ཁམས་སོ། །བདུན་བོ་དེ་དག་ནི་ནུབ་ཀྱི་ཕྱོགས་ན་གནས་ས། །མོན་གྲུ་ཆུའི་ཁམས། མོན་གྲེ་ལྕགས་ཀྱི་ཁམས། ཁྲུམས་སྟོད་སའི་ཁམས། ཁྲུམས་སྨད་ཤིང་གི་ཁམས། ན་མ་གྲུ་མེའི་ཁམས། ཐ་སྐར་སའི་ཁམས་སོ། །བྲ་ཉེ་ཤིང་གི་ཁམས་སོ། །བདུན་པོ་དེ་དག་ནི་བྱང་གི་ཕྱོགས་ན་གནས་སོ། །སྐར་མ་གཟའ་བདུན་དེ་དག་དེ་བཞིན་ཏེ་ཞེས་བྱ་བ་ནི། གཟའ་དེ་ཡང་བདུན་བཞིར་རྒྱུ་སྟེ། བདུན་བདུན་ཕོ་མོ་འབྲེལ་ནས། བཟང་བ་དང་ངན་པར་སྟོན་པའོ། །རྫུ་འཕྲུལ་ཆེ་ཞིང་དཀའ་ཐུབ་ཆེ། །ཞེས་བྱ་བ་ནི། གླིང་བཞི་རི་རབ་དང་བཅས་པར་བསྐོར་བའོ། །འཇིག་རྟེན་གྱི་མི་རྣམས་ལ་བཟང་བ་དང་ངན་པར་སྟོན་པ་སྟེ། དེའི་དུས་ཚོད་ཤེས་པར་གྱུར་ན། བཟློག་པར་བཏུབ། པའོ། །ཉི་མ་དང་ནི་ཟླ་བ་དང༌། །སུམ་ཅུ་རྩ་གསུམ་ཚང་བདག །ཅེས་བྱ་བ་ནི། ཟླ་བ་རེ་རེ་ལ་གཟའ་དགུ་དང༌། རྒྱུ་སྐར་ཉི་ཤུ་རྩ་བརྒྱད་ཚང་བའོ། །ཉི་མ་དང་ཟླ་བ་མིག་དམར་དང༌། བ་བ་སངས་དང༌། ཕུར་བུ་སྤེན་པ་ལག་པ། རཱ་ཧུ་ལ་དུ་བ་མཇུག་རིངས། ཤར་གྱི་ཕྱོགས་ནས་གོ་རིམས་བཞིན་དུ་རྒྱུ་བའོ། །སྐར་མ་རྣམས་ཀྱང་དེ་བཞིན་ནོ། །རཱ་ཧུ་ལ་དང་དུ་བ་མཇུག་རིངས་ནི། ཚེས་གྲངས་མི་འཛིན་ཏེ། གཞན་གྱི་ཚེས་གྲངས་ལ་གཟའ་གཉིས་པོ་ཐོད་རྒལ་དུ་རྒྱུའོ། །འཆར་བ་དང་ནི་ནུབ་པ་ནི། །ཞེས་བྱ་བ་ནི། ཕྱི་མངོན་པའི་དབང་དུ་བཤད་བ་དང༌། ནང་གས་བསྔགས་ཀྱི་དབང་དུ་བཤད་པ་ནི། ཤར་བ་ནི་འཇིག་རྟེན་ཁམས་ཀྱི་མི་རྣམས། སྐྱེས་པ་ལ་ནི་ཉི་མ་ཤར་བ་ཞེས་བྱའོ། །དཔེར་ན་འཇིག་རྟེན་དུ་ཉི་མ་ཤར་བ་བཞིན་ནོ། །ནུབ་པ་ནི་འཇིག་རྟེན་གྱི་ཁམས་ཀྱི་མི་རྒས་ནས་ཤི་བ་ལ་ནུབ་པ་ཞེས་བྱའོ། འཁོར་ལོ་མཚོན་ཆ་བཞིན་དུ་རྒྱུ། །ཞེས་བྱ་བ་ནི། རྒྱུ་ལུགས་རྣམ་པ་གསུམ་ཡོད་དེ། འཁོར་ལོ་བཞིན་དུ་རྒྱུ་བ་དང༌། མཚོན་ཆ་བཞིན་དུ་རྒྱུ་བ་དང༌། དབྱུ་གུའི་གྲོས་ཀྱིས་རྒྱུ་བ་གསུམ་ཡོད་པ་ལས། འཁོར་ལོ་བཞིན་དུ་རྒྱུ་བ་ནི། འཇིག་རྟེན་གྱི་ཁམས་ཀྱི་རི་རབ་ལ། ཟླ་བ་འཁོར་ལོའི་
འགྲོས་སུ་རྒྱུ་བའོ། །མཚོན་ཆ་བཞིན་དུ་རྒྱུ་བ་ནི། ཉི་མའི་འགྲོས་ཏེ་ཐ་སྐར་རྒྱུ་བའོ། །དབྱུ་གུའི་འགྲོས་ནི་ཆུ་ཚོད་ལ་བརྩིས་ཏེ། གཅིག་པོར་ནས་གཅིག་ལེན་པ་དབྱུ་གུའི་འགྲོས་སོ། །དེ་བཞིན་དུ་གཟའ་རྣམས་ཀྱང་རྒྱུ་བའོ། །ད་ནི་རྣལ་འབྱོར་གྱི་དབང་དུ་བྱས་ན་སྣ་བུག་གཡས་གཡོན་གཉིས་ན་རྒྱུ་བའི་དབུགས་ནི། ཉིན་མོ་དང་ནུབ་མོ་རྒྱུ་བ་ནི་རྒྱུ་སྐར་བཞིན་ནོ། །ཉིན་ཞག་གཅིག་ལ་ཆུ་ཚོད་དྲུག་ཅུ་ཡོད་པ་ལ། དབུགས་ཀྱང་དེ་བཞིན་དུ་རྒྱུ་བའོ། །འཇིག་རྟེན་དུ་ནི་ཟད་འཕེལ་བྱེད། །ཅེས་བྱ་བ་ནི། ཟླ་བ་ནི་ཚེས་སྟོད་ལ་འཕེལ་ཏེ། སྨད་ལ་འགྲིབས་ནས་ཟད་དེ། དབུགས་ཀྱང་ཕྱིར་འགྲོ་བ་ནི་རིང་སྟེ། ནང་དུ་རྔུབ་པ་ནི་ཐུང་སྟེ། དེ་བཞིན་དུ་འཇིག་རྟེན་གྱི་ཁམས་ན་གནས་པའི་སེམས་ཅན་རྣམས་ལ་ཡང་ཟད་པ་དང་འཕེལ་བར་བྱེད་པའོ། །དེ་བས་ན་འཇིག་རྟེན་གྱི་ཁམས་ཀྱི་སེམས་ཅན་རྣམས་ལ་ཡང༌། ཚེའི་འཕེལ་འགྲིབ་འབྱུང་ངོ༌། །ཡང་ན་འཇིག་རྟེན་གྱི་ཁམས་ཀྱི་མི་རྣམས་ནོར་འཕེལ་བ་དང༌། ནོར་འགྲིབ་པ་ཡང་འབྱུང་ངོ༌། །ཟླ་བ་ཇི་བཞིན་དུ་འཇིག་རྟེན་གྱི་ཁམས་ཀྱང་འཕེལ་འགྲིབ་བྱེད་དོ། །གཟི་བརྗིད་རྫུ་འཕྲུལ་ཆེན་པོ་དག །ཅེས་བྱ་བ་ནི། རྫུ་འཕྲུལ་ནི་གླིང་བཞི་དང་རི་རབ་ལ་རྒྱུ་བ་སྟེ། གཞན་རྣམས་ཀྱང་ཟིལ་གྱིས་གནོན་པའོ། །དེ་བཞིན་དུ་འཇིག་རྟེན་གྱི་སྒྱུ་མ་བཞིན་དུ་སྣང་བས་ན། འཇིག་རྟེན་གྱི་ཁམས་ན་གཟི་བརྗིད་ཆེ་ཞིང་རྫུ་འཕྲུལ་ཆེ་བའོ། །རབ་ཏུ་དང་བའི་སེམས་ཀྱིས་སུ། །རིག་སྔགས་རྗེས་སུ་ཡི་རང་བྱོས། །ཞེས་བྱ་བ་ནི། འཇིག་རྟེན་ཁམས་ན་གནས་པའི་གཟའ་དང་རྒྱུ་སྐར་རྣམས་ཀྱིས་ཀྱང༌། རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལ་གུས་པའི་སེམས་ཀྱིས་རྗེས་སུ་ཡི་རང་བས་ཏེ། རིག་སྔགས་ཀྱི་བཀའ་ལས་མི་འདའ་བའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས། བདག་ལ་སྲུང་བ་གྱིས་ཤིག་ཅེས་བྱ་བ་ནི། ནམ་མཁའ་བཞིན་དུ་འཇིག་རྟེན་གྱི་ཁམས་ལ་ཁྱབ་སྟེ། དེ་ཡང་བསམ་གྱིས་མི་ཁྱབ་པ་དག་གིས་བརྗོད་དུ་མི་བཏུབ་པ། རྒྱ་ཆེར་སེམས་ཅན་རྣམས་ཀྱི་དོན་བྱེད་པའོ།།
དེ་ལྟ་བུའི་རིག་སྔགས་གང་ཟག་གང་གིས་ཀྱང་གུས་པར་བྱས་ནས་འཆང་བར་གྱུར་ན། གཟའ་དང་རྒྱུ་སྐར་ངན་བ་ཡང་ཟློགས་ཏེ། དེ་རྣམས་ཀྱིས་སྲུང་པ་དང་སྐྱོབ་པར་བྱེད་དོ། །ཚེ་ཕྱི་མ་ལ་ཡང་གཟའ་དང་རྒྱུ་སྐར་བཟང་པོ་ལས་སྐྱེས་ནས། རིག་སྔགས་འདི་དྲན་པར་འགྱུར་རོ། །སྦ་བ་དང་ཞེས་བྱ་བ་ནི། སྔ་མ་བཞིན་དུ་ཤེས་པར་བྱའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལས། གཟའ་དང་རྒྱུ་སྐར་གྱི་གནས་སྐབས་ཏེ་བཅོ་བརྒྱད་པའོ།། །།ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་བཀའ་སྩལ་པའོ། །གླིང་ཆེན་པོ་བཞིའི་འཇིག་རྟེན་གྱི་ཁམས་ཡན་ཆད། མན་ཆད་ཀྱི་ལྷ་རྣམས་ཀྱི་མིང་ཟུང་ཤིག་ཅེས་བྱ་བ་ནི། གླིང་བཞིན་གནས་པའི་ལྷ་དང༌། འདོད་ལྷ་རིས་དྲུག་དང༌། གཟུགས་མེད་སྐྱེ་མཆེད་མུ་བཞིའི་ལྷའོ། །དེ་རྣམས་ཀྱི་མཆན་ཉིད་ནི་འདི་ལྟ་སྟེ་ཞེས་བྱ་བ་ནི། མིང་དང༌། གཟུགས་དང༌། ཆོ་དང༌། ལོངས་སྤྱོད་དང༌། གནས་སོ། །འདི་ལྟ་སྟེ་ནི་འདི་རྣམས་ལྟ་བའོ། །རྒྱལ་ཆེན་བཞིའི་ལྷ་རྣམས་དང་ཞེས་བྱ་བ་ནི། རྒྱལ་ཆེན་རིགས་བཞིའི་ལྷ་རྣམས་ཀྱི་ལུས་ཚད་ནི། རྒྱང་གྲགས་ཀྱི་བཞི་ཆ་གཅིག་གོ །ཚེ་ཚད་ནི་མི་ལོ་ལྔ་བཅུ་ལ། རྒྱལ་ཆེན་བཞི་པའི་ལྷ་རྣམས་ཀྱི་ཞག་གཅིག །ཉིན་ཞག་གསུམ་ཅུ་ལ་ཟླ་བ་གཅིག །ཟླ་བ་བཅུ་གཉིས་ལ་ལོ་གཅིག །རྒྱལ་ཆེན་བཞི་པའི་ལྷ་རྣམས་ཀྱི་ཚེ་ཚད་མཐའ་ནི། ལོ་དེ་ལྟར་བརྩིས་པའི་ལྷའི་ལོ་ལྔ་བརྒྱ་སྟེ། བར་མདོར་འཆི་བ་ཡོད་དོ། །མི་ལྟར་བརྩིས་ན་ལོ་ས་ཡ་ཕྲག་དགུ་ཡོད་དོ། །ཉོན་མོངས་པ་ནི་དབང་པོ་གཉིས་སྦྱོར་བས་ཚིམ་པའོ། །སུམ་ཅུ་རྩ་གསུམ་པའི་ལྷ་རྣམས་དང་ཞེས་བྱ་བ་ནི། ལུས་ཚད་ནི་རྒྱང་གྲགས་ཕྱེད་དོ། །ཚེ་ཚད་ནི་མི་རྣམས་ཀྱི་ལོ་བརྒྱ་ལ། སུམ་ཅུ་རྩ་གསུམ་པའི་ལྷ་རྣམས་གྱི་ཞག་གཅིག་གོ །དེ་སུམ་ཅུ་ལ་ཟླ་བ་གཅིག་གོ །ཟླ་བ་བཅུ་གཉིས་ལ་ལོ་གཅིག །སུམ་ཅུ་རྩ་གསུམ་པའི་ལྷ་རྣམས་ཀྱི་ཚེ་ཚད་ཀྱི་མཐའ་ནི། ལོ་སྟོང་ཐུབ་བོ། །མི་ལོ་ལྟར་བརྩིས་པའི་བྱེ་བ་ཕྲག་འབུམ་ཕྲག་བཅུ་གཉིས་དང་བྱེ་བ་ཕྲག་དགུ་ཁྲི་དྲུག་སྟོང་ཡོད་དོ། །བར་མ་དོར་འཆི་བ་ནི་ཡོད་དོ། །ཉོན་མོངས་པ་སྤྱི་དང་འདྲའོ། །
འཐབ་བྲལ་གྱི་ལྷ་རྣམས་དང་ཞེས་བྱ་བ་ནི། ལུས་ཚད་ནི་རྒྱང་གྲགས་བཞི་ཆ་གསུམ་མོ། །ཚེ་ཚད་ནི་མི་ལོ་ཉིས་བརྒྱ་ལ་འཐབ་བྲལ་གྱི་ལྷ་རྣམས་ཀྱི་ཞག་གཅིག་གོ །དེ་སུམ་ཅུ་ལ་ཟླ་བ་གཅིག་ཟླ་བ་བཅུ་གཉིས་ལ་ལོ་གཅིག་སྟེ། འཐབ་བྲལ་གྱི་ལྷ་རྣམས་ཀྱི་ཚེ་ཚད་ཀྱི་མཐའ་ནི། ལོ་དེ་ལྟ་བུར་བརྩིས་པའི་ལོ་ཉིས་སྟོང་ཐུབ་པོ། །མི་ལོ་ལྟར་བརྩིས་པའི་བྱེ་བ་ཕྲག་བཅུ་བཞི་དང༌། ས་ཡ་བཞི་ཡོད་དོ། །ཉོན་མོངས་པ་ནི་འཁྱུད་པ་ཙམ་གྱིས་ཞི་བའོ། །དགའ་ལྡན་གྱི་ལྷ་རྣམས་དང་ཞེས་བྱ་བ་ནི། ལུས་ཀྱི་ཚད་ནི་རྒྱང་གྲགས་གཅིག་གོ །ཚེ་ཚད་ནི་མི་ལོ་བཞི་བརྒྱ་ལ། དགའ་ལྡན་གྱི་ལྷ་རྣམས་ཀྱི་ཞག་གཅིག་གོ །དེ་སུམ་ཅུ་ལ་ཟླ་བ་གཅིག་གོ །ཟླ་བ་བཅུ་གཉིས་ལ་ལོ་གཅིག་གོ །དགའ་ལྡན་གྱི་ལྷ་རྣམས་ཀྱི་ཚེ་ཚད་ཀྱི་མཐའ་ནི། དེ་ལྟར་བརྩིས་པའི་ལོ་བཞི་སྟོང་ཐུབ་པོ། །མི་ལོ་ལྟར་བརྩིས་ན་བྱེ་བ་ཕྲག་ལྔ་བཅུ་རྩ་བདུན་དང༌། ལོ་ས་ཡ་ཕྲག་དྲུག་ཡོད་དོ། །ཉོན་མོངས་པ་ནི་ལག་པ་ནས་བཟུང་བ་ཙམ་གྱིས་ཚིམ་མོ། །འཕྲུལ་དགའི་ལྷ་རྣམས་དང་ཞེས་བྱ་བ་ནི། ལུས་ཚད་ནི་རྒྱང་གྲགས་གཅིག་དང༌། དེའི་བཞི་ཆ་གཅིག་གོ །ཚེ་ཚད་ནི་མི་ལོ་བརྒྱད་བརྒྱ་ལ། འཕྲུལ་དགའི་ཉིན་ཞག་གཅིག །ཉིན་ཞག་སུམ་ཅུ་ལ་ཟླ་བ་གཅིག །ཟླ་བ་བཅུ་གཉིས་ལ་ལོ་གཅིག །དེ་ལྟར་བརྩིས་པའི་འཕྲུལ་དགའི་ལྷ་རྣམས་ཀྱི་ཚེ་ཚད་ཀྱི་མཐའ་ནི། ལྷའི་ལོ་བརྒྱ་སྟོང་ཐུབ། མི་ལོ་ལྟར་བརྩིས་ན། བྱེ་བ་ཕྲག་ཉིས་བརྒྱ་སུམ་ཅུ་དང༌། ལོ་ས་ཡ་ཕྲག་བཞི་ཐུབ་བོ། །ཉོན་མོངས་པ་ནི་བགད་པ་ཙམ་གྱིས་ཚིམ་མོ། །གཞན་འཕྲུལ་དབང་བྱེད་ཀྱི་ལྷ་རྣམས་དང་ཞེས་བྱ་བ་ནི། ལུས་ཚད་ནི་རྒྱང་གྲགས་ཕྱེད་དང་གཉིས། །ཚེ་ཚད་ནི་མི་རྣམས་ཀྱི་ལོ་སྟོང་དྲུག་བརྒྱ་ལ། གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ཞག་གཅིག་གོ །ཉིན་ཞག་སུམ་ཅུ་ལ་ཟླ་བ་གཅིག །ཟླ་བ་བཅུ་གཉིས་ལ་ལོ་གཅིག །གཞན་འཕྲུལ་དབང་བྱེད་ཀྱི་ཚེའི་མཐའ་ནི། ལོ་དེ་ལྟར་བརྩིས་པའི་ལྷའི་ལོ་ཁྲི་དྲུག་སྟོང་ཐུབ། ཉོན་མོངས་པ་ན་བི་ལྟས་པ་ཙམ་གྱིས་ཚིམ་མོ། །མི་ལོ་ལྟར་བརྩིས་པ་ན། བྱེ་བ་ཕྲག་
དགུ་བརྒྱ་ཉི་ཤུ་རྩ་གཅིག་དང༌། ལོ་ས་ཡ་ཕྲག་དྲུག་ཡོད་དོ། །ཚངས་རིས་ཀྱི་ལྷ་རྣམས་དང་ཞེས་བྱ་བ་ནི། ལུས་ཀྱི་ཚད་ནི་དཔག་ཚད་ཕྱེད་དོ། ཚེ་ཚད་ནི་བསྐལ་བ་ཕྱེད་དོ། ཚངས་རིས་ནས་འོག་མིན་གྱི་བར་དུ་འདོད་ཆགས་མེད་དོ། །ཚངས་པ་མདུན་ན་འདོན་གྱི་ལྷ་རྣམས་དང་ཞེས་བྱ་བ་ནི། ལུས་ཀྱི་ཚད་ནི་དཔག་ཚད་གཅིག །ཚེའི་ཚད་ནི་བསྐལ་བ་གཅིག་གོ །འདི་ནི་བསམ་གཏན་དང་པོའི་ལྷ་སྟེ། ཚངས་པ་མདུན་ན་འདོན་གྱི་ལྷའི་ངེས་ཚིག་ནི། གོང་མའི་ཚངས་བ་ཆེན་པོའི་སྤྱན་སྔར་འོག་མའི་ལས་དགེ་སྡིག་སྣང་འདོན་པས་ན། ཚངས་པ་མདུན་ན་འདོན་ཞེས་བྱའོ། །ཡང་ན་ཚངས་པ་ཆེན་པོ་ལ་ཕན་འདོགས་པས། ཚངས་པ་ཉེ་ཕན་ཞེས་བྱ། ཡང་ན་ཚངས་པ་ཆེན་པོ་ལ་འཁོར་བས་ཚངས་པ་ཀུན་འཁོར་ཞེས་བྱའོ། །ཚངས་པ་ཆེན་པོའི་ལྷ་རྣམས་དང་ཞེས་བྱ་བ་ནི། ལུས་ཚད་ནི་དཔག་ཚད་གཉིས། ཚེ་ཚད་ནི་བསྐལ་པ་ཕྱེད་དང་གཉིས་ཡོད་དེ། ཚངས་པ་ཆེན་པོའི་ངེས་ཚིག་ནི། འདོད་པའི་ཁམས་ཀྱི་འཁོར་བ་གྱོད་དྲིན་ལས་ཚངས་པས་ཚངས་པ་ཆེན་པོའོ། །འོད་ཆུང་གི་ལྷ་རྣམས་དང་ཞེས་བྱ་བ་ནི། ལུས་ཆད་ནི་དཔག་ཚད་གཉིས་ཡོད་དོ། །ཚེ་ཚད་ནི་བསྐལ་པ་གཉིས་ཐོབ་པོ། །ངེས་ཚིག་ནི་གོང་མ་གཉིས་པས་འོད་ཆུང་བས་སོ། །ཚད་མེད་འོད་ཀྱི་ལྷ་རྣམས་དང་ཞེས་བྱ་བ་ནི། ལུས་ཚད་ནི་དཔག་ཚད་བཞི། ཚེ་ཚད་ནི་བསྐལ་པ་བཞི། ངེས་ཚིག་ནི་འོག་མ་ལྟོས་ནས་ལུས་དང་གཞལ་མེད་ཁང་ཚད་མེད་པའི་ཕྱིར་རོ། །ཚད་ནི་དཔག་ཚད་གཉིས་ཡོད་དོ། །འོད་གསལ་གྱི་ལྷ་རྣམས་དང་ཞེས་བྱ་བ་ནི། ལུས་ཚད་ནི་དཔག་ཚད་བརྒྱད་དོ། །ཚེ་ཚད་ནི་བསྐལ་པ་བརྒྱད་ཐུབ། ངེས་ཚིག་ནི་འོག་མ་གཞན་གྱི་འོད་ཀྱང༌། འདིའི་འོད་ཀྱིས་གསལ་བར་བྱེད་པའོ། །དགེ་ཆུང་གི་ལྷ་རྣམས་དང་ཞེས་བྱ་བ་ནི། ལུས་ཚད་ནི་དཔག་ཚད་བཅུ་དྲུག །ཚེ་ཚད་ཀྱང་བསྐལ་པ་བཅུ་དྲུག་ཐུབ། ངེས་ཚིག་ནི་བསམ་གཏན་དང༌། ཏིང་ངེ་འཛིན་དང༌། དོན་གོང་མ་གཉིས་པས་ཆུང་བས་ན་དགེ་ཆུང་ཞེས་བྱའོ། །ཡང་ན་འདོད་པའི་ཡོན་ཏན་དང་བདེ་བ་གནས་རིས་གོང་མ་
གཉིས་པས་ཆུང་བས་སོ། །ཏིང་ངེ་འཛིན་གྱི་ཟས་ལ་སྤྱོད་དོ། །ཚད་མེད་དགེ་བའི་ལྷ་རྣམས་དང་ཞེས་བྱ་བ་ནི། ལུས་ཚད་དཔག་ཚད་སུམ་ཅུ་རྩ་གཉིས། ཚེ་ཚད་བསྐལ་པ་སུམ་ཅུ་རྩ་གཉིས། ངེས་ཚིག་ནི་འོག་མ་པས་གོང་མའི་རྟགས་ཚད་མི་སྤོབས་པས་ནི་ཚད་མེད་དགེའོ། །དགེ་རྒྱས་ཀྱི་ལྷ་རྣམས་དང་ཞེས་བྱ་བ་ནི། ལུས་ཚད་ནི་དཔག་ཚད་དྲུག་ཅུ་རྩ་བཞི། ཚེ་ཚད་ནི་བསྐལ་པ་དྲུག་ཅུ་རྩ་བཞི། ངེས་ཚིག་ནི་འཇིག་རྟེན་པའི་དགེ་བ་མ་ལུས་པར་རྫོགས་པར་བྱེད་པས་དགེ་རྒྱས་སོ། །འོག་མ་གཉིས་ཀྱི་ཏིང་ངེ་འཛིན་འདིས་གསལ་བར་བྱེད་པའོ། །སྤྲིན་མེད་ཀྱི་ལྷ་རྣམས་དང་ཞེས་བྱ་བ་ནི། ལུས་ཚད་ནི་དཔག་ཚད་དྲུག་ཅུ་རྩ་ལྔ། ཚེ་ཚད་ནི་བསྐལ་པ་ཉི་ཤུ་རྩ་ལྔ། ཡང་ན་བསམ་གཏན་དང་ཏིང་ངེ་འཛིན་གྱི་ཚད་གཟུགས་མེད་པར་འོད་དང༌། བྱིན་རླབས་འབྱུང་བའི་ཕྱིར་རོ། །ངེས་ཚིག་ནི་སྤྲིན་ཡང་མེད་པས་སོ། །ཡང་ན་གནས་ཀྱི་གཞི་སྤྲིན་དང་འདྲ་བས་སོ། །བསོད་ནམས་སྐྱེས་ཀྱི་ལྷ་རྣམས་དང་ཞེས་བྱ་བ་ནི། ལུས་ཚད་ནི་དཔག་ཚད་ཉིས་བརྒྱ་ལྔ་བཅུ། ཚེ་ཚད་ཀྱང་བསྐལ་པ་ཉིས་བརྒྱ་ལྔ་བཅུ། ངེས་ཚིག་ནི་བསམ་གཏན་དང་ཟག་པ་མེད་པ་བསྒོམས་པས། འབྲས་བུ་བསོད་ནམས་ཆེན་པོ་བསྐྱེད་ལ། བསོད་ནམས་སྐྱེས་སོ། །འབྲས་བུ་ཆེ་བའི་ལྷ་རྣམས་དང་ཞེས་བྱ་བ་ནི། བསམ་གཏན་བཞི་པའི་ལྷ། ལུས་ཚད་ནི་དཔག་ཚད་ལྔ་བརྒྱ། ཚེ་ཚད་ཀྱང་བསྐལ་པ་ལྔ་བརྒྱ། ངེས་ཚིག་ནི་བསམ་གཏན་དང༌། ཟག་པ་མེད་པ་སྤེལ་མར་བསྒོམས་པས། འབྲས་བུ་མཐར་ཕྱིན་པའོ། །འདུ་ཤེས་མེད་པའི་ལྷ་རྣམས་དང་ཞེས་བྱ་བ་ནི། ལུས་ཀྱི་ཚད་ནི་གོང་མ་དང་འདྲའོ། །ཚེ་ཚད་ནི་བསྐལ་པ་ལྔ་བརྒྱའོ། །ངེས་ཚིག་ནི་འདུ་ཤེས་དེ་ཤེས་པ་ནད་དུ་འཁྱིལ་བས་ངན་པར་ཤེས་པ་སྐྱེས་ཏེ། ད་དུང་སྐྱེ་བ་མང་པོ་ལེན་པ་མཐོང་བས། ཁོས་ཐར་བ་མྱ་ངན་ལས་འདས་པ་གཏན་མེད་པ་འདྲ་སྙམ་ནས་སྐུར་པ་བཏབ་པས། དམྱལ་བར་ལྟུང་བ་ཡོད་དོ། །ཁ་ཅིག་བློ་རྣོ་བས་འཕར་ཏེ་འགྲོ་བ་ཡང་ཡོད། བསམ་གཏན་བསྒོམས་པ་ནོར་པ་ཡིན་ཟེར་ལུས་འོད་ཆེ་ལ་དྲན་པ་མི་རྒྱུ། མདོར་ན་འདུ་
ཤེས་མེད་པའི་ལྷ། གཟུགས་སུ་རགས་ལ་ཚོར་བ་ཞན་པའོ། །མི་ཆེ་བའི་ལྷ་རྣམས་ཞེས་བྱ་བ་ནི། ལུས་ཚད་ནི་དཔག་ཚད་སྟོང༌། ཚེ་ཚད་ཀྱང་བསྐལ་པ་བཞི་སྟོང་ངོ༌། །ངེས་ཚིག་ནི་རྟོག་པ་གོང་མ་ཙམ་དུ་མི་ཆེའོ། །མི་གདུང་བའི་ལྷ་རྣམས་དང་ཞེས་བྱ་བ་ནི། ལུས་ཚད་ཀྱང་དཔག་ཚད་ཉིས་སྟོང༌། ཚེ་ཚད་ཀྱང་བསྐལ་པ་ཉིས་སྟོང༌། ངེས་ཚིག་ནི་ཁམས་གསུམ་གྱི་གདུང་བ་དང་བྲལ་བའི་ཕྱིར་རོ། །གྱ་ནོམ་སྣང་བའི་ལྷ་རྣམས་དང་ཞེས་བྱ་བ་ནི། ལུས་ཚད་ནི་དཔག་ཚད་བཞི་སྟོང༌། ཚེ་ཚད་ཀྱང་བསྐལ་པ་བཞི་སྟོང་ཐུབ་པོ། །ངེས་ཚིག་ནི་བསམ་གཏན་དང་ཟག་པ་མེད་པ་བསྒོམས་པས། འབྲས་བུ་བདེ་ཞིང་གྱ་ནོམ་པས་གྱ་ནོམ་པ་ཞེས་བྱའོ། །ཤིན་ཏུ་མཐོང་བའི་ལྷ་རྣམས་དང་ཞེས་བྱ་བ་ནི། ལུས་ཚད་ནི་དཔག་ཚད་བརྒྱད་སྟོང་ངོ༌། །ཚེ་ཚད་ཀྱང་བསྐལ་པ་བརྒྱད་སྟོང་ཐུབ་པོ། །ངེས་ཚིག་ནི་གནས་དེ་ན་ཐར་པ་དང༌། བདེ་བ་ཐོབ་པ་ནི་མ་ཡིན། གཏན་དུ་མྱ་ངན་ལས་འདས་པ་བགྲོད་པའི་གནས་སུ་མཐོང་བས་ཤིན་ཏུ་མཐོང་ཞེས་བྱའོ། །འོག་མིན་གྱི་ལྷ་རྣམས་དང་ཞེས་བྱ་བ་ནི། ལུས་ཚད་ནི་དཔག་ཚད་ཁྲི་དྲུག་སྟོང༌། ཚེ་ཚད་བསྐལ་པ་ཁྲི་དྲུག་སྟོང་ཐུབ་པོ། ངེས་ཚིག་ནི་གཟུགས་ཁམས་བཅུ་བདུན་གྱི་བླ་མར་གྱུར་པས། འོག་མིན་ལ་བསམ་གཏན་དང་ཏིང་ངེ་འཛིན་གསལ་བས། འོག་མིན་གསལ་ཞེས་བྱའོ། །ནམ་མཁའ་མཐའ་ཡས་སྐྱེ་མཆེད་ཀྱི་ལྷ་རྣམས་དང་ཞེས་བྱ་བ་ནི། ཚེ་ཚད་ནི་མཐའི་བསྐལ་པ་ཉི་ཁྲི་ཐུབ། ངེས་ཚིག་ནི་ཆོས་ཐམས་ཅད་ནམ་མཁའ་ལྟར་སྟོང་པ་ཡིན་པར་ཤེས་ནས། ནམ་མཁའ་ལ་ཡང་ཀུན་དུ་མཐའ་ཡས་པར་བལྟས་ནས། དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ནས། སྐྱེ་མཆེད་ཉེ་བར་བླང་བའི་ཕྱིར་རོ། །རྣམ་ཤེས་མཐའ་ཡས་སྐྱེ་མཆེད་ཀྱི་ལྷ་རྣམས་དང་ཞེས་བྱ་བ་ནི། ཚེ་ཚད་ནི་བསྐལ་པ་བཞི་ཁྲི་ཐུབ། ངེས་ཚིག་ནི་གཟུགས་ཁམས་ཀྱི་ཏིང་ངེ་འཛིན་ལ་བལྟས་ནས། ཆོས་ཐམས་ཅད་ནམ་མཁའ་ལྟར་མཐའ་ཡས་སོ་སྙམ་པ་ནི། རྣམ་པར་ཤེས་པ་ཡིན་ལ། དེ་ཡང་མ་ཟད་དེ། རྣམ་པར་ཤེས་པ་དེ་དང་
འགྲོགས་པའི་འདུ་ཤེས་ཀྱང༌། ནམ་མཁའ་ལྟར་ཀུན་དུ་མཐའ་ཡས་པར་བརྟགས་ནས། སྐྱེ་མཆེད་ཉེ་བར་བླངས་པའི་ཕྱིར་རོ། །ཡོད་མིན་མེད་མིན་སྐྱེ་མཆེད་ཀྱི་ལྷ་རྣམས་དང་ཞེས་བྱ་བ་ནི། ཚེ་ཚད་བསྐལ་བ་བརྒྱད་ཁྲི་ངེས་ཚིག་ནི་འོག་མ་ལྟར་ཤེས་པ་བཀག་ནས། རྨོངས་པ་ནི་མ་རུང་ངོ་སྙམ་ནས། འདུ་ཤེས་ཡོད་པ་མ་ཡིན་ཏེ། ཤེས་པ་འགགས་ནས་མེད་པ་ཡང་མ་ཡིན་ཏེ། འདི་ནི་འདུ་ཤེས་ཆ་ཕྲ་མོ་ཙམ་ལ་བརྟེན་པའི་ཕྱིར། ཡོད་མིན་མེད་མིན་ཞེས་བྱའོ། །ཅི་ཡང་མེད་པའི་སྐྱེ་མཆེད་ཀྱི་ལྷ་རྣམས་དང་ཞེས་བྱ་བ་ནི། ཚེ་ཚད་བསྐལ་པ་དྲུག་ཁྲི་སྟེ། ངེས་ཚིག་ནི་འོག་མ་ལྟར་ཐོས་པ་ཐམས་ཅད་ཀྱང་ཏིང་ངེ་འཛིན་ལ་དམིགས་པའི་རྣམ་པར་ཤེས་པ་ནམ་མཁའ་ལྟར་མཐའ་ཡས་པའི་འདུ་ཤེས་ནི། ཟུག་རྔུའི་སྐྱེ་མཆེད་ཡིན་པར་རྟོགས་ནས། འདུ་ཤེས་ཇེ་ཕྲ་བཀག་ནས་ནི། འདུ་ཤེས་ཅུང་ཟད་ཀྱང་མི་འགྱུར་བའི་ཕྱིར་ཅི་ཡང་མེད་པའི་སྐྱེ་མཆེད་ཅེས་བྱའོ། །སྐྱེ་མཆེད་མུ་བཞི་པོ་འདི་ལ་སྤགས་པའི་ལུས་ནི་མེད། ནམ་མཁའ་མཐའ་ཡས་དང་རྣམ་ཤེས་མཐའ་ཡས་གཉིས་ལ་སྐྱེ་མཆེད་ཉེ་བར་བླངས་པའི་ཕྱིར་གཟུགས་མེད་པའི་ཁམས་ལ་གཟུགས་ཅུང་ཟད་ཡོད་དོ་ཞེས་བརྗོད་དོ། །དེ་དག་ཐམས་ཅད་ལ་བར་མ་དོར་འཆི་བ་ནི་ཡོད་དོ། །རྒྱལ་ཆེན་རིགས་བཞི་ནས་འོག་མིན་གྱི་བར་དུ་ཐམས་ཅད་ཀྱང་རིན་པོ་ཆེའི་གོས་གོན་ནོ། །ཉི་ཟེར་གྱི་རྡུལ་བཞི་བཅུ་རྩ་དགུའི་ཆ་གཅིག་ནི། རྡུལ་ཕྲ་རབ་ཡིན་ནོ། །རྡུལ་ཕྲ་རབ་བདུན་ལ་རྡུལ་ཕྲ་མོ་གཅིག་ཡིན་ནོ། །རྡུལ་ཕྲ་མོ་བདུན་ལ་ཉི་ཟེར་གྱི་རྡུལ་གཅིག་གོ །ཉི་ཟེར་གྱི་རྡུལ་བདུན་ལ་རི་བོང་གི་རྡུལ་གཅིག་གོ །རི་བོང་གི་རྡུལ་བདུན་ལ། ལུག་རྡུལ་གཅིག་གོ །ལུག་རྡུལ་བདུན་ལ་ནི་གླང་རྡུལ་གཅིག་གོ །གླང་རྡུལ་བདུན་ལ་སྲོ་མ་གཅིག །སྲོ་མ་བདུན་ལ་ཨ་བ་ག་ན་གཅིག །ཨ་བ་ག་ན་བདུན་ལ་བ་ཏི་ཀ་གཅིག །བ་ཏི་ཀ་བདུན་ལ་ནས་གཅིག་ནས་བདུན་ལ་སོར་གཅིག །སོར་ཉི་ཤུ་རྩ་གཉིས་ལ་ཁྲུ་གང༌། འཛམ་བུ་གླིང་པའི་མི་རྣམས་ཁ་ཅིག་ནི། གོས་ཁྲུ་ཚད་འདི་ལྟ་བུ་བརྩིས་པའི་ཁྲུ་བརྒྱད་བ་གོན་
ནོ། །ཁ་ཅིག་ནི་ཁྲུ་བཅུ་པའོ། །ལུས་འཕགས་པོ་རྣམས་ཀྱི་ཁྲུ་ཉི་ཤུའོ། །བ་ལང་སྤྱོད་རྣམས་ཀྱི་ནི་ཁྲུ་བཞི་བཅུ་པ། སྒྲ་མི་སྙན་པ་རྣམས་ཀྱི་ནི་དཔག་བསམ་གྱི་ཤིང་ལས་བྱུང་བའི་གོས་ཁྲུ་བརྒྱད་ཅུ་པ་གོན་ནོ། །རྒྱལ་ཆེན་བཞི་ནས་འོག་མིན་གྱི་བར་དུ་ནི། ལུས་ཅི་རན་པའི་གོས་གོན་ནོ། །འཛམ་བུ་གླིང་པའི་མི་རྣམས་ནས་གཞན་འཕྲུལ་དབང་བྱེད་ཀྱི་བར་དུ་ཕོའི་མཚན་མ་དང་མོའི་མཚན་མ་ཡོད་དོ། །ཚངས་རིས་ནས་འོག་མིན་གྱི་བར་དུ། ཕོའི་དབང་པོ་དང་མོའི་དབང་པོ་མེད་དོ། །འཛམ་བུ་གླིང་དང༌། ལུས་འཕགས་དང༌། བ་ལང་སྤྱོད་གསུམ་ནས་བག་མ་གཏོང་བ་དང་ལེན་པ་ཡོད་དོ། །སྒྲ་མི་སྙན་པ་ལ་ནི་མེད་དོ། །རྒྱལ་ཆེན་བཞི་ནས་གཞན་འཕྲུལ་དབང་བྱེད་རྣམས་ལ་ཡང་ཡོད་དོ། །ཚངས་རིས་ནས་འོག་མིན་གྱི་བར་དུ་གཏོང་བ་དང་ལེན་པ་གཉིས་ཀ་མེད་དོ། །འཛམ་བུ་གླིང་ནས་གླིང་གསུམ་ལ་ཤིན་ཏུ་གྲང་བ་དང༌། ཆ་བ་ཡོད་དོ། །སྒྲ་མི་སྙན་ན་མེད་དོ། །རྒྱལ་ཆེན་བཞི་ནས་འོག་མིན་གྱི་བར་དུ་ཚ་གྲང་གཉིས་ཀ་མེད་དོ། །འཛམ་བུ་གླིང་པ་ལ་དགུན་དང་དཔྱིད་དང་དབྱར་དང་སྟོན་ཡོད་པ་བཞིན་དུ་གླིང་གསུམ་དང་རྒྱལ་ཆེན་བཞི་ནས་གཞན་འཕྲུལ་དབང་བྱེད་ཀྱི་ལྷ་རྣམས་ལ་ཡང་ཡོད་དོ། །ཚངས་རིས་ནས་འོག་མིན་གྱི་བར་དུ་དུས་བཞི་མེད་དོ། །ཇི་ལྟར་འཛམ་བུ་གླིང་ནས་གཞན་འཕྲུལ་དབང་བྱེད་གྱི་བར་དུ། ཉིན་མོ་དང་མཚན་མོ་ཡོད་དོ། །ཚངས་རིས་ནས་འོག་མིན་གྱི་བར་དུ་ཉིན་མོ་དང་མཚན་མོ་མེད་དོ། །འཛམ་བུ་གླིང་ནས་གཞན་འཕྲུལ་དབང་བྱེད་ཀྱི་བར་དུ་ཕ་མ་ཡོད་དོ། །ཚངས་རིས་ནས་འོག་མིན་གྱི་ལྷ་རྣམས་ལ་ཕ་མ་མེད་དོ། །འཛམ་བུ་གླིང་ནས་གཞན་འཕྲུལ་དབང་བྱེད་ཀྱི་ལྷ་རྣམས་ལ་རྗེ་དང་བྲན་ཡོད་དོ། །ཚངས་རིས་ནས་འོག་མིན་གྱི་བར་དུ་རྗེ་དང་བྲན་མེད་དོ། །འཛམ་བུ་གླིང་ནས་གླིང་གསུམ་ན་ནི། འབྲུ་དང་ནོར་ཡོད་དོ། །སྒྲ་མི་སྙན་ན་འབྲུ་ནི་ཡོད་ནོར་ནི་མེད་དོ། །རྒྱལ་ཆེན་བཞི་ནས་གཞན་འཕྲུལ་དབང་བྱེད་ཀྱི་བར་དུ་འབྲུ་ནི་མེད་ནོར་ནི་ཡོད་དོ། །ཚངས་རིས་ནས་འོག་མིན་གྱི་བར་དུ་ནོར་ཡང་མེད་འབྲུ་ཡང་མེད་དོ། །འཛམ་བུ་གླིང་གི་མི་རྣམས་ལ་ཕ་མའམ་བུ་མོའམ་བྲན་བོའམ། རྗེའམ་འབྲུལ་མངོན་པར་ཞེན་པ་
ཡོད་པ་བཞིན་དུ། གླིང་གཉིས་པོ་ལ་ཡང་ཡོད། །སྒྲ་མི་སྙན་པ་རྣམས་ལ་ནི། མངོན་པར་ཞེན་པ་མེད་དོ། །རྒྱལ་ཆེན་བཞི་པ་རྣམས་ལ་ནི། འབྲུ་མ་གཏོགས་པ་རྣམས་ལ་མངོན་པར་ཞེན་པ་ཡོད་པ་བཞིན་དུ། སུམ་ཅུ་རྩ་གསུམ་ནས་གཞན་འཕྲུལ་དབང་བྱེད་ཀྱི་བར་དུ། འབྲུ་མ་གཏོགས་པ་རྣམས་ལ་མངོན་པར་ཞེན་པ་ཡོད་དོ། །ཚངས་རིས་ནས་འོག་མིན་གྱི་བར་དུ་ཅི་ལ་ཡང་ཞེན་པ་མེད་དོ། །གླིང་བཞི་པའི་མི་རྣམས་ལ་བུད་མེད་ཟླ་མཚན་ཅན་དང༌། སྦྲུམ་པ་དང་བུ་བཙའ་བ་ཡོད་དོ། །རྒྱལ་ཆེན་བཞི་པའི་ལྷ་རྣམས་ཀྱི་ནི། འཛམ་བུ་གླིང་གི་མི་རྣམས་ཀྱི་བུ་ཚ་ལོ་ལྔ་ལོན་པ་ཙམ་མམ། ལྷའམ་ལྷའི་བུ་མོའི་ཕྲག་པའམ། པང་བར་རྫུས་ཏེ་སྐྱེ་བའོ། །ལྷའམ་ལྷའི་བུ་མོ་རྣམས་ནི། བདག་གི་བུའམ་བུ་མོ་ཡིན་སྙམ་དུ་སེམས་པའོ། །ཁྱེའུ་དང་བུ་དེ་དག་ནི། འདི་དག་ནི་བདག་ཅག་གི་ཕའོ། །མའོ་སྙམ་དུ་སེམས་སོ། །སུམ་ཅུ་རྩ་གསུམ་པ་རྣམས་ནི། ལོ་དྲུག་ལོན་པ་ཙམ། འཐབ་བྲལ་བ་རྣམས་ཀྱི་ལོ་བདུན་ལོན་བ་ཙམ། དགའ་ལྡན་པ་རྣམས་ཀྱི་ལོ་བརྒྱད་ལོན་པ་ཙམ། འཕྲུལ་དགའ་བ་རྣམས་ཀྱི་ལོ་དགུ་ལོན་པ་ཙམ། གཞན་འཕྲུལ་དབང་བྱེད་པ་རྣམས་ཀྱི་ལོ་བཅུ་ལོན་པ་ཙམ། ལྷའམ་ལྷའི་བུ་མོའི་ཕྲག་པའམ་བང་བར་རྫུས་ཏེ་སྐྱེའོ། །ལྷའམ་ལྷའི་བུ་མོ་དགའ་འདི་ནི་བདག་གི་ལྷའི་བུ་མོ་སྙམ་དུ་སེམས་སོ། །ཁྱེའུ་དང་བུ་མོ་དེ་དག་ཀྱང་བདག་ཅག་གི་ཕའམ་མ་སྙམ་དུ་སེམས་སོ། །ཚངས་རིས་ནས་འོག་མིན་གྱི་བར་དུ། ཐོག་མ་ནས་ལུས་ཀྱི་ཡན་ལག་དང༌། ཉིད་ལག་ཐམས་ཅད་རྫོགས་པར་སྐྱེ་ཞིང༌། འཆི་བ་ན་ཡང་དེ་ཁོ་ན་བཞིན་ནོ། །གཟུགས་མེད་པ་རྣམས་ལ་ནི་ལུས་མེད་དོ། །དེ་བས་དེ་དག་ལ་སྐྱེ་བ་ཡང་མི་མངོན། འཆི་བ་ཡང་མི་མངོན་ནོ། །རྫུ་འཕྲུལ་ཆེ་བ་ཞེས་བྱ་བ་ནི། ལྷ་དེ་རྣམས་ནི་རང་གི་ས་ནས་སྟེང་དུ་འགྲོ་མི་ནུས་པར། དེ་བཞིན་དུ་རྫུ་འཕྲུལ་གྱི་རྐང་པ་ཡང་ཡིན་ནོ། །འོད་དང་ལྡན་པའི་ཞེས་བྱ་བ་ནི། འོད་དེ་ཡང་ཡར་མི་འགྲོ་ཞིང་རང་རང་ཁྱབ་ནས་འོད་དུ་གསལ་བའོ། །བསོད་ནམས་ཆེ་ཞིང་ལོངས་སྤྱོད་ཆེ་བ་ཞེས་བྱ་བ་ནི། ལྷ་དེ་རྣམས་ཀྱི་རང་རང་གི་བསོད་ནམས་ཀྱི་ལོངས་སྤྱོད་ཆེ་ཆུང་དང་ལྡན་པའོ། །དབང་ཆེ་ཞིང་འཁོར་མང་པོ་ཞེས་བྱ་བ་ནི།
ལྷ་དེ་རྣམས་ཀྱང་བསོད་ནམས་ཀྱི་དབང་གིས་འཁོར་ཕུན་སུམ་ཚོགས་པའོ། །དེ་བཞིན་དུ་དབང་ཆེ་བའོ། །ལྷ་དང་ལྷ་མ་ཡིན་རྣམས་གནས་པའོ་ཞེས་བྱ་བ་ནི། ལྷ་མ་ཡིན་ནི་ཞེ་སྡང་དང༌། སེར་སྣའི་དབང་གིས་ལྷ་མ་ཡིན་དུ་གྲགས་ཏེ། དེ་མེད་པ་ནི་ལྷ་ཡིན་ནོ། །དེ་བཞིན་དུ་ཡོན་ཏན་དང་ལྡན་པའི་ལྷ་དང་ལྷ་མ་ཡིན་རྣམས་གནས་པའོ། །དེ་རྣམས་ཀྱིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། ཐུགས་རྗེ་ཆེ་ཞིང་འཇིག་རྟེན་གྱི་ཁམས་ལ་ཁྱབ་པ། མ་ལུས་པར་རྫོགས་པའི་སེམས་ཅན་གྱི་དོན་ལ་སྲུང་བ་དང་སྐྱོབ་པར་བྱེད་དོ། །དེ་ལྟ་བུའི་རིག་སྔགས་ཀྱི་རྒྱལ་མོ་གང་ཟག་གང་གིས་ཀྱང་གུས་ཤིང་རྗེས་སུ་ཡི་རང་ནས། ལྷ་དེ་རྣམས་ཀྱིས་སྲུང་བ་དང་སྐྱོབ་པར་བྱེད་པར་འགྱུར་ཏེ་ཚེ་ཕྱི་མ་ལ་ཡང་སྲུང་བའོ། །སྦ་བ་དང་ཞེས་བྱ་བ་ལ་སོགས་པ་ནི། སྔར་གོར་དུ་བཤད་པ་བཞིན་དུ་ཤེས་པར་བྱའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལས་ལྷ་རྣམས་བཤད་པའི་གནས་སྐབས་ཏེ་བཅུ་དགུ་པའོ།། །།ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཐུགས་རྗེ་ཅན་རྣམས་ཀྱིས་གསུངས་སོ། །དྲང་སྲོང་སྙིང་རྗེ་ཆེན་པོ་རྣམས་ཀྱི་མིང་སྲུང་ཤིག་ཅེས་བྱ་བ་ནི། བརྟུལ་ཞུགས་ཀྱི་དབང་གིས་དྲང་སྲོང་ཉི་མའི་ལྟ་བ་དང༌། ཚངས་པའི་ལྟ་བ་དང་གཉིས་ཡོད་དེ། དྲང་སྲོང་ཆད་པར་ལྟ་བ་ནི་ཉི་མའི་གཞུང་ངོ༌། །དྲང་སྲོང་རྟག་པར་ལྟ་བ་ནི་ཚངས་པའི་གཞུང་ངོ༌། །དེ་གཉིས་རྟག་པ་དང་ཆད་པར་ལྟ་བའི་དྲང་སྲོང་རྣམས་ཀྱི་མིང་ཟུང་ཤིག་ཅེས་བྱའོ། །བརྟུལ་ཞུགས་གྲུབ་པ་ཞེས་བྱ་བ་ནི། དེ་གཉིས་ཀྱང་དགའ་ཐུབ་ཀྱི་དབང་གིས། རང་གི་ལུས་ལ་ཚངས་པར་སྤྱོད་པའི་རང་བཞིན་གྱིས་རང་གིས་དཀའ་ཐུབ་བྱས་པའོ། །རིག་སྔགས་གྲུབ་པ་ཞེས་བྱ་བ་ནི། རང་གི་རིག་པའི་ཡེ་ཤེས་ཀྱིས་ཕྱིའི་རིག་པ་གྲུབ་པ་སྟེ། ཕྱིའི་རིག་པ་དེ་ནི་མངོན་པར་ཤེས་པའོ། །གྲགས་པ་འབར་བ་ཞེས་བྱ་བ་ནི། དྲང་སྲོང་དེ་རྣམས་ལ་འཇིག་རྟེན་གྱི་ཁམས་ལ་གྲགས་པའོ། །ཡང་ན་འབར་བ་ནི། དེའི་དམོད་མོས་བསྲེགས་པ་བཞིན་དུ་ཐལ་བར་གཏོང་བའོ། །ཀླུང་དང་རི་ལ་གནས་པ་ཞེས་བྱ་བ་ནི། མིའི་སེམས་ཅན་རྣམས་ལ་མི་གནས་པའི་སའམ། འབྲས་
བུ་རྩ་བ་ཤིང་གི་སྐོགས་པ་གོན་པའོ། །ཤ་མེད་པ་ཀེང་རུས་འཇིགས་པའི་ཆ་བྱད་ཅན། སྐྲ་རིང་བ་སེན་མོ་རིང་བ་ཕྲེང་བ་དང་རིལ་བ་སྤྱི་བླུགས་ཐོགས་པའོ། །སྨོད་པའི་མཚོན་ཆ་ཅན་ཞེས་བྱ་བ་ནི། རང་མགུ་བའི་དུས་སུ་ལེགས་པར་སྨྲས་ན། བཟང་བར་འགྱུར་ཏེ། ངན་པར་སྨྲས་པས་ངན་པར་འགྱུར་རོ། །དཀའ་ཐུབ་དྲག་བ་ཞེས་བྱ་བ་ནི། སེམས་ཅན་གཞན་མ་བཞིན་དུ་སྲོག་གཅོད་པར་མི་བྱེད་ལ། མ་བྱིན་པར་མི་ལན་པར། འདོད་པ་ལོག་པར་མི་གཡེམ་ཞིང༌། མི་ཚངས་པར་མི་སྤྱོད་པ། བརྫུན་དུ་མི་སྨྲ་ཞིང༌། ཕྲ་མ་དང་ངག་འཁྱལ་མེད་དེ། ཚིག་རྩུབ་མོ་ཡོད་དོ། །རྫུ་འཕྲུལ་དང་ལྡན་པ་ཞེས་བྱ་བ་ནི། ལྷ་དང་མི་དང་ཀླུ་དང་གསུམ་དུས་གཅིག་ཏུ་རྒྱུ་ནུས་བའོ། །མངོན་པར་ཤེས་པ་ལྔ་དང་ལྡན་པ་ཞེས་བྱ་བ་ནི། ལུས་ཀྱི་མངོན་པར་ཤེས་པ། ངག་གི་མངོན་པར་ཤེས་པ། ཡིད་ཀྱི་མངོན་པ་ཤེས་པ། མིག་གི་མངོན་པར་ཤེས་པ། རྣ་བའི་མངོན་པར་ཤེས་པའོ། །ནམ་མཁའ་ལ་འགྲོ་བ་དེ་དག་གི་མིང་བརྗོད་ཀྱིས་ཁྱོད་ཟུང་ཤིག་ཅེས་བྱ་བ་ནི་ངང་བའི་རྒྱལ་པོ་གསེར་ལྟ་བུ་བཞིན་དུ་ནམ་མཁའ་ལ་རྒྱུ་བའོ། །འདི་ལྟ་སྟེ་ཞེས་བྱ་བ་ནི། དྲང་སྲོང་རྣམས་ལ་ལྟ་བའོ། །དྲང་སྲོང་ཆེན་པོ་བརྒྱད་པ་ཞེས་བྱ་བ་དང༌། དྲང་སྲོང་ཆེན་པོ་གཡོན་ཕྱོགས་པ་ཞེས་བྱ་བ་དང༌། དྲང་སྲོང་ཆེན་བོ་གཡོན་ཕྱོགས་ལྷ་ཞེས་བྱ་བ་དང༌། དྲང་སྲོང་ཆེན་པོ་ལྷ་སྐྱབས་ཀྱི་བུ་ཞེས་བྱ་བ་དང༌། དྲང་སྲོང་ཆེན་པོ་འོད་ཟེར་ཅན་ཞེས་བྱ་བ་དང་ཞེས་བྱ་བ་ནི། ལྔ་པོ་དེ་རྣམས་ཀྱང་རྫུ་འཕྲུལ་ཆེ་བ་གཟི་བརྗིད་དང་ལྡན་ཏེ། བསམ་གཏན་བཞི་ལ་གནས་པའོ། །དེ་རྣམས་སྐུ་མདོག་དང༌། ཕྱག་མཚན་ནི། དཀར་པོ་དང༌། སྔོ་སྐྱ་དང༌། དཀར་སེར་དང༌། སྔོན་པོ་དང༌། སེར་པོའོ། །གཡས་རྣམས་ན་དབྱུ་གུ་གསུམ་པ་བསྣམས་པ། གཡོན་རྣམས་ན་ཕྲེང་བ་བསྣམས་པའོ། །དེ་རྣམས་ཀྱིས་ཀྱང་སངས་རྒྱས་ཀྱི་བཀའ་ལས་མི་འདའ་ཞིང༌། རིག་སྔགས་རྗེས་སུ་དྲེན་པའོ། །དྲང་སྲོང་ཆེན་པོ་ཀུན་གྱི་བཤེས་ཞེས་བྱ་བ་དང༌། དྲང་སྲོང་ཆེན་པོ་གནས་ནས་འཇོག་ཅེས་བྱ་བ་དང༌། དྲང་སྲོང་ཆེན་པོ་གྲོག་མཁར་བ་ཞེས་བྱ་བ་དང༌། དྲང་སྲོང་ཆེན་པོ་འདྲོ་བ་སྐྱོང་གི་བུ་ཞེས་བྱ་བ་དང༌། དྲང་སྲོང་ཆེན་པོ་འདྲོ་བ་སྐྱོང་གི་བུ་རྒན་པོ་ཞེས་བྱ་བ་དང་ཞེས་བྱ་བ་ནི།
དྲང་སྲོང་ད་རྣམས་ནི་བསྟན་བཅོས་ལ་མཁས་པ། གཟུགས་ཚད་ལ་མཁས་པ་ལྔའོ། །དེ་རྣམས་ཀྱི་ཁ་དོག་དང་ཕྱག་མཚན་ནི། དམར་སྐྱ་དང༌། ནག་པོ་དང༌། སྔོ་བསངས་དང༌། ལྗང་གུ་དང༌། སེར་པོའོ། །གཡས་རྣམས་ན་པུ་སྟེ། གཡོན་རྣམས་ན་ཕྲེང་བ་བསྣམས་པའོ། །ལྔ་པོ་དེ་རྣམས་ཀྱིས་ཀྱང་རིག་སྔགས་ཀྱི་བཀའ་ལས་མི་འདའ་བར། སྲུང་བ་དང་སྐྱོབ་པར་བྱེད་དོ། །དྲང་སྲོང་ཆེན་པོ་ངན་སྤོང་ཞེས་བྱ་བ་དང༌། དྲང་སྲོང་ཆེན་པོ་ངན་སྤོང་དགའ་ཞེས་བྱ་བ་དང༌། དྲང་སྲོང་ཆེན་པོ་འགྲོ་འཛིན་ཞེས་བྱ་བ་དང༌། དྲང་སྲོང་ཆེན་པོ་འགྲོ་དགའ་ཞེས་བྱ་བ་དང༌། དྲང་སྲོང་ཆེན་པོ་འཇིགས་ཅན་ཞེས་བྱ་བ་དང་ལྔ་པོ་དེ་དག་ཀྱང་འགོག་པ་ལ་སྙོམས་པར་ཞུགས་པ་དང༌། རྣམ་པར་ཤེས་པ་དང༌། ཚོར་བ་དང༌། འདུ་བྱེད་རྣམས་སྤོང་བའོ། །དྲང་སྲོང་དེ་རྣམས་ནི་ཚངས་པའི་གཞུང་གིས་རྟག་པར་ལྟ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། སེར་པོ་དང༌། དམར་པོ་དང༌། ནག་པོ་དང༌། ཐལ་བའི་མདོག་དང༌། སྔོན་པོའོ། །གཡས་གཡོན་གཉིས་སྙོམས་པར་ཞུགས་པའི་ཕྱག་རྒྱའོ། །དེ་རྣམས་ཀྱིས་ཀྱང་རིག་སྔགས་ཀྱི་བཀའ་ལས་མི་འདའ་བར་སྲུང་བ་དང་སྐྱོབ་པར་བྱེད་པའོ། །དྲང་སྲོང་ཆེན་པོ་སྐལ་ལྡན་ཤིང་རྟ་ཞེས་བྱ་བ་དང༌། དྲང་སྲོང་ཆེན་པོ་རྒྱུན་ཤེས་ཀྱི་བུ་ཞེས་བྱ་བ་དང༌། དྲང་སྲོང་ཆེན་པོ་མདུན་དུ་བདར་ཞེས་བྱ་བ་དང༌། དྲང་སྲོང་ཆེན་པོ་མགོ་བོ་ཆེ་ཞེས་བྱ་བ་དང་དྲང་སྲོང་ཆེན་པོ་གཤིན་རྗེའི་མེ་ཞེས་བྱ་བ་དང་ཞེས་བྱ་བ་ནི། རིག་བྱེད་ཀྱི་གཞུང་གིས་རིག་བྱེད་གཙོ་བོར་བྱས་ནས་རྟག་པར་སྨྲ་བ་དང༌། རིག་བྱེད་བཞི་ནི་མཆོད་སྦྱིན་གྱི་རིག་བྱེད་དང༌། སྙན་དངགས་ཀྱི་རིག་བྱེད་དང༌། སྲིད་སྲུང་གི་རིག་བྱེད་དང༌། ཉམས་ཡོད་ཀྱི་རིག་བྱེད་དང༌། དེ་བཞི་ཡང་བཀྲ་ཤིས་ཤིང་ཚེ་རིང་བའོ། །ནད་མེད་པ་དམོད་མོས་འདོད་པའོ། །དེའི་སྒོ་ནས་གྲོལ་བར་འདོད་པའི་ལྟ་བས་སོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། དམར་པོ་དང༌། དཀར་པོ་དང༌། སེར་པོ་དང༌། སྔོན་པོ་དང༌། ནག་པོའོ། །གཡས་རྣམས་ན་བུམ་པ་སྤྱི་བླུགས་འཛིན་ཅིང་གཡོན་རྣམས་ན་དབྱུ་གུ་གསུམ་པ་བསྣོམས་པའོ། །དྲང་སྲོང་དེ་རྣམས་ཀྱིས་ཀྱང་རིག་སྔགས་ཀྱི་བཀའ་ལས་མི་འདའ་བར་སྲུང་བ་དང་སྐྱོབ་པར་བྱེད་པ་
པའོ། །དྲང་སྲོང་ཆེན་པོ་གཉིས་འཐུང་གི་བུ་ཞེས་བྱ་བ་དང༌། དྲང་སྲོང་ཆེན་པོ་གཉིས་འཐུང་ནག་པོའི་བུ་ཞེས་བྱ་བ་དང༌། དྲང་སྲོང་ཆེན་པོ་ལྗང་སྔོའི་བུ་ཞེས་བྱ་བ་དང༌། དྲང་སྲོང་ཆེན་པོ་ལྗང་སྔོའི་ཚ་བོ་ཞེས་བྱ་བ་དང༌། དྲང་སྲོང་ཆེན་པོ་དག་མཉམ་ཞེས་བྱ་བ་དང་ཞེས་བྱ་བ་ནི། ཉི་མའི་གཞུང་གིས་ཆད་པར་ལྟ་བ་སྟེ། རྒྱ་མཚོའི་འགྲམ་ནས་རྐང་པ་གཡས་པ་ཡར་བླངས་ཤིང༌། གཡོན་པ་ས་ལ་བཙུགས་ནས་ཉི་མ་ལ་ལྟ་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། ནག་པོ་དང༌། སེར་པོ་དང༌། དམར་པོ་དང༌། སྔོན་པོ་དང༌། ལྗང་ནག་གོ ། ཕྱག་གཉིས་ཐལ་མོ་སྦྱར་ནས་གནམ་ལ་བལྟ་བའོ། །དྲང་སྲོང་ཆེན་པོ་དེ་རྣམས་ཀྱིས་ཀྱང་སྲུང་བ་དང༌། སྐྱོབ་པ་དང༌། རིག་སྔགས་ཀྱི་བཀའ་ལས་མི་འདའ་བའོ། །དྲང་སྲོང་ཆེན་པོ་འཕགས་པོ་ཞེས་བྱ་བ་དང༌། དྲང་སྲོང་ཆེན་པོ་ཡང་དག་འཕགས་པོ་ཞེས་བྱ་བ་དང༌། དྲང་སྲོང་ཆེན་པོ་བཟོད་པ་སྨྲ་ཞེས་བྱ་བ་དང༌། དྲང་སྲོང་ཆེན་པོ་གྲགས་པ་ཞེས་བྱ་བ་དན། དྲང་སྲོང་ཆེན་པོ་རབ་གྲགས་ཞེས་བྱ་བ་དང་ཞེས་བྱ་བ་ནི། ཚངས་པའི་གཞུང་གིས་རྟག་པར་ལྟ་བ་སྟེ། བུམ་པའི་རང་བཞིན་འགོག་པའི་ཏིང་ངེ་འཛིན་ལ་སྙོམས་པར་ཞུགས་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། ནག་པོ་དང༌། དམར་སྐྱ་དང༌། སེར་པོ་དང༌། དམར་པོ་དང༌། དཀར་པོའོ། །ཕྱག་གཉིས་བུམ་པ་སྤྱི་བླུགས་བསྣམས་པའོ། །རིག་སྔགས་ཀྱི་བཀའ་ལས་མི་འདའ་བར། སྲུང་བ་དན་སྐྱོབ་པར་བྱེད་པའོ། །དྲང་སྲོང་ཆེན་པོ་བླ་མ་ཞེས་བྱ་བ་དང༌། དྲང་སྲོང་ཆེན་པོ་གྲུབ་པ་ཞེས་བྱ་བ་དང༌། དྲང་སྲོང་ཆེན་པོ་གྲུ་འཛིན་ཞེས་བྱ་བ་དང༌། དྲང་སྲོང་ཆེན་པོ་རྟ་བུ་ཞེས་བྱ་བ་དང༌། དྲང་སྲོང་ཆེན་པོ་གང་ཅན་ཞེས་བྱ་བ་དང་ཞེས་བྱ་བ་ནི། འགོག་པའི་རང་བཞིན་གྱིས་འགོག་པའི་ཏིང་ངེ་འཛིན་ལ་སྙོམས་པར་ཞུགས་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། སེར་པོ་དང༌། དམར་པོ་དང༌། ལྗང་ནག་དང༌། སྔོ་སྐྱ་དང༌། དཀར་སེར་རོ། །ཕྱག་གཉིས་ནི་ཏིང་ངེ་འཛིན་ལ་སྙོམས་པར་ཞུགས་པའོ། །དྲང་སྲོང་དེ་རྣམས་རིག་སྔགས་ཀྱི་བཀའ་ལས་མི་འདའ་བར་སེམས་ཅན་གྱི་དོན་བྱེད་པའོ། །དྲང་
སྲོང་ཆེན་པོ་མིག་དམར་ཞེས་བྱ་བ་དང༌། དྲང་སྲོང་ཆེན་པོ་ཆ་བྱད་འཛིན་གྱི་བུ་ཞེས་བྱ་བ་དང༌། དྲང་སྲོང་ཆེན་པོ་གོས་ངན་ཞེས་བྱ་བ་དང༌། དྲང་སྲོང་ཆེན་པོ་མདའ་ལྟར་སྣང་བ་ཞེས་བྱ་བ་དང༌། དྲང་སྲོང་ཆེན་པོ་རྒྱགས་པ་ཞེས་བྱ་བ་དང་ཞེས་བྱ་བ་ནི། དེ་རྣམས་ཀྱང་ཆད་པར་ལྟ་བ་སྟེ། ཆོས་ཐམས་ཅད་འཆལ་པར་རྟོགས་ནས། ངོ་བོ་མི་འཛིན་པའོ། །དེ་རྣམས་ཀྱི་སྐུ་མདོག་དན་ཕྱག་མཚན་ནི། དཀར་པོ་དང༌། དམར་པོ་དང༌། སེར་པོ་དང༌། ནག་པོ་དང༌། ཐལ་བའི་མདོག་གོ །གཡས་རྣམས་ན་རྩེ་གསུམ་དང༌། གཡོན་རྣམས་ན་ཕྲེང་བ་བསྣམས་པའོ། །དྲང་སྲོང་དེ་རྣམས་ནི་རིག་སྔགས་ཀྱི་བཀའ་ལས་མི་འདའ་བར། སྲུང་བ་དང་སྐྱོབ་པར་བྱེད་པའོ། །དྲང་སྲོང་ཆེན་པོ་འོད་ཅེས་བྱ་བ་དང༌། དྲང་སྲོང་ཆེན་པོ་པ་བ་སངས་ཞེས་བྱ་བ་དང༌། དྲང་སྲོང་ཆེན་པོ་ཕུར་བུ་ཞེས་བྱ་བ་དང༌། དྲང་སྲོང་ཆེན་པོ་རྩིབས་ཀྱི་མྱུ་ཁྱུད་ཅེས་བྱ་བ་དང༌། དྲང་སྲོང་ཆེན་པོ་སྤེན་པ་ཞེས་བྱ་བ་དང༌། དྲང་སྲོང་དེ་རྣམས་ཡང་སྐར་མའི་ལྟ་བ་ཅན་ཏེ། ལྟ་བ་ནི་བར་མ་དོར་གནས་ཤིང་སྐྱེ་བ་མི་འདོད་པའོ། །དེ་རྣམས་ཀྱི་སྐུ་མདོག་དན་ཕྱག་མཚན་ནི། སེར་པོ་དན། དཀར་པོ་དང༌། ནག་པོ་དང༌། སྔོ་སྐྱ་དང༌། དམར་པོའོ། །གཡས་རྣམས་ནི་དབྱུག་གུ་གསུམ། གཡོན་རྣམས་ན་བུམ་པ་སྤྱི་བླུགས་བསྣམས་པའོ། །དྲང་སྲོང་རྣམས་ཀྱང་རིག་སྔགས་ཀྱི་བཀའ་ལས་མི་འདའ་བར་སྲུང་བ་དང་སྐྱོབ་པར་བྱེད་པའོ། །དྲང་སྲོང་ཆེན་པོ་གཟའ་ལྷག་ཅེས་བྱ་བ་དང༌། དྲངས་རོང་ཆེན་པོ་དུག་སེལ་ཞེས་བྱ་བ་དང༌། དྲང་སྲོང་ཆེན་པོས་འཛིན་ཞེས་བྱ་བ་དང༌། དྲང་སྲོང་ཆེན་པོ་རྭ་གཅིག་པ་ཞེས་བྱ་བ་དང༌། དྲང་སྲོང་ཆེན་པོ་དྲང་སྲོང་རྭ་ཞེ་བྱ་བ་དང་ཞེས་བྱ་བ་ནི། རིག་བྱེད་ཀྱི་གཞུང་གིས་རྟག་པར་ལྟ་བ་སྟེ། དེ་རྣམས་ཀྱིས་ཀུ་དོག་དང་ཕྱག་མཚན་ནི། ལྗང་ནག་དང༌། སེར་པོ་དང༌། དཀར་སེར་དང༌། དམར་པོ་དང༌། དཀར་པོ་དང༌། ནག་པོའོ། །གཡས་རྣམས་ནི་བུམ་པ་སྤྱི་བླུགས་གཡོན་རྣམས་ན་ཕྲེང་བ་བསྣམས་པའོ། །དྲང་སྲོང་དེ་རྣམས་ཀྱིས་ཀྱང་རིག་སྔགས་ཀྱི་བཀའ་ལས་མི་འདའ་བར་སེམས་ཅན་གྱི་དོན་བྱེད་པའོ། །དྲང་སྲོང་ཆེན་པོ་གྱུར་མིད་ཀྱི་བུ་ཞེས་
བྱ་བ་དང༌། དྲང་སྲོང་ཆེན་པོ་གར་ལྡན་གྱི་བུ་ཞེས་བྱ་བ་དང༌། དྲང་སྲོང་ཆེན་པོ་སྒྲའི་བུ་ཞེས་བྱ་བ་དང༌། དྲང་སྲོང་ཆེན་པོ་འཇིགས་བྱེད་ཅེས་བྱ་བ་དང༌། དྲང་སྲོང་ཆེན་པོ་འཇིགས་བྱེད་གླང་པོ་ཆེ་ཞེས་བྱ་བ་དང་ཞེས་བྱ་བ་ནི། རྟག་པར་ལྟ་བར་གནས་པ་སྟེ། བུམ་པའི་ཏིང་ངེ་འཛིན་གྱིས་ལུས་བེམས་པོར་འདོད་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། སེར་པོ་དང༌། དམར་པོ་དང༌། ཐལ་བའི་མདོག་དང༌། མཐིང་ག་དང༌། ནག་པོའོ། །ཕྱག་གཡས་གཡོན་གཉིས་མཉམ་གཞག་གི་ཕྱག་ལ་སྙོམས་པར་ཞུགས་པའོ། །དེ་རྣམས་ཀྱིས་ཀྱང་རིག་སྔགས་ཀྱི་བཀའ་ལས་མི་འདའ་བར་རྗེས་སུ་ཡི་རང་ཞིང་སྲུང་བ་དང་སྐྱོབ་པར་བྱེད་པའོ། །དྲང་སྲོང་ཆེན་པོ་སེར་སྐྱ་ཞེས་བྱ་བ་དང༌། དྲང་སྲོང་ཆེན་པོ་གཽ་ཏ་མ་ཞེས་བྱ་བ་དང༌། དྲང་སྲོང་ཆེན་པོ་རྟ་དམར་ཞེས་བྱ་བ་དང༌། དྲང་སྲོང་ཆེན་བ་བྱིས་པ་རྩེ་ཞེས་བྱ་བ་དང༌། དྲང་སྲོང་ཆེན་པོ་མིས་སྦྱིན་གྱི་བུ་ཞེས་བྱ་བ་དང༌། དྲང་སྲོང་ཆེན་པོ་རི་བོ་ཞེས་བྱ་བ་དང༌། དྲང་སྲོང་ཆེན་པོ་སྲིན་བུ་འཛིན་ཞེས་བྱ་བ་དང་ཞེས་བྱ་བ་ནི། དྲང་སྲོང་བདུན་པོ་དེ་དག་ནི། ལྷ་དང་ལྷ་མ་ཡིན་གྱི་བར་དུ་བྱས་ཤིང་རྟག་པར་ལྟ་བ་སྟེ། དེ་རྣམས་ཀྱི་སྐུ་མདོག་དང་ཕྱག་མཚན་ནི། དཀར་པོ་དང༌། སེར་པོ་དང༌། དམར་པོ་དང༌། ལྗང་གུ་དང༌། ལྗང་ནག་དང༌། དམར་སྐྱའོ། །གཡས་རྣམས་ན་ཕྲེང་བ་དང༌། དབྱུ་གུ་གསུམ་བསྣམས་ཤིང༌། གཡོན་རྣམས་ན་རིལ་བ་སྤྱི་བླུགས་བསྣམས་པའོ། །དྲང་སྲོང་དེ་རྣམས་ཀྱང་རིག་སྔགས་རྗེས་སུ་དྲན་ཞིང༌། སེམས་ཅན་རྣམས་ཀྱི་དོན་བྱེད་པའོ། །ཀུན་དགའ་བོ་ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་ཀྱིས་ཡང་ནས་ཡང་དུ་གསུངས་པའོ། །དྲང་སྲོང་ཆེན་པོ་རྙིང་པ་འདི་དག་ནི། རིག་བྱེད་རྣམས་བྱེད་པ་ཞེས་བྱ་བ་ནི། དེ་རྣམས་ནི་སྔོན་གྱི་དྲང་སྲོང་ཆེན་པོ་སྟེ། དེ་རྣམས་ཀྱང་རིག་བྱེད་བཞི་འདོན་ཞིང༌། རིག་བྱེད་དེ་རྣམས་ཀྱི་དོན་ནི། བཀྲ་ཤིས་ཚེ་རིང་ཆོས་སྦྱིན་དམོད་མོས་སུ་སྣང་བའོ། །རིག་བྱེད་བཞི་པོ་དེའི་དོན་ལ་འདོན་པའོ། །གསང་སྔགས་རྣམས་བྱེད་བ་ཞེས་བྱ་བ་ནི། དངོས་གྲུབ་ཐོབ་ཅིང་རིག་པའི་གནས་ལྔ་ལ་མཁས་པ། གཞན་སེམས་ཅན་རྣམས་ལ་སྐྱོབ་བར་བྱེད་པའོ།།
དམོད་པ་འདོར་བ་ཞེས་བྱ་བ་ནི་དེའི་དམོད་པ་ནི་གང་ཡང་གྲུབ་པའོ། །བརྟུལ་ཞུགས་གྲུབ་པ་ཞེས་བྱ་བ་ནི། དགེ་སློང་བཞིན་དུ་འདོད་ཆགས་དང༌། བརྫུན་དུ་སྨྲ་བ་དང༌། སྲོག་གཅོད་པ་དང༌། མ་བྱིན་པར་ལེན་པ་དང༌། དེ་རྣམས་སྤངས་ལ་བསྒོམ་པ་ལ་གཙོ་བོར་བྱས་པའོ། །གཟི་བརྗིད་ཆེ་བ་ཞེས་བྱ་བ་ནི། དྲང་སྲོང་དེ་རྣམས་ཀྱི་གཟི་བརྗིད་ཀྱིས་མཐོ་རིས་ཁྱབ་པའོ། །གྲུབ་པ་ཕ་རོལ་གནོན་པ་ཞེས་བྱ་བ་ནི། བུམ་པ་གང་བ་དང༌། སེམས་བེམས་པོར་གྲུབ་ནས། དེ་རྣམས་ཀྱི་གཟི་བརྗིད་ཀྱིས་གནོན་པའོ། །གྲུབ་པ་དག་སྟེ་ཞེས་བྱ་སྟེ། དེ་རྣམས་ཀྱིས་ཀྱང་ཐུན་མོང་གི་དངོས་གྲུབ་ཐོབ་པའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་བསྲུང་བ་གྱིས་ཤིག་ཅེས་བྱ་བ་ནི། རིག་སྔགས་འདི་ནི་ཞལ་གསུམ་ཕྱག་དྲུག་པ། སྐུ་མདོག་སེར་མོ་གཡས་དཀར་གཡོན་དམར་བ་སྤྱན་གསུམ་པ། རལ་པའི་ཐོར་ཚུགས་ཅན། །དབུ་ལ་རིན་པོ་ཆེ་རྡོ་རྗེས་བརྒྱན་པ། ཡེ་ཤེས་ལྔའི་རང་བཞིན། རྒྱན་ཐམས་ཅད་ཀྱིས་བརྒྱན་པ། གཡས་གསུམ་ན་དབྱུ་གུ་གསུམ་དང༌། བུམ་པ་སྤྱི་བླུགས་དང་པུ་སྟིའོ། །གཡོན་གསུམ་ན་རྨ་བྱའི་སྒྲོ་དང་ཕྲེང་བ་དང༌། སྦྲུལ་བསྣམས་བའོ། །བརྟུལ་ཞུགས་ཀྱི་ཆ་བྱད་ཅན། ཟླ་བའི་གདན་ལ་ཉི་མའི་འོད་དང་ལྡན་པའོ། །ཐབས་ཤེས་རབ་གཉིས་སུ་མེད་པའོ། །དེ་ལྟ་བུའི་རིག་སྔགས་གང་ཟག་གིས་གུས་པར་བྱས་ཤིང་འཆང་བར་འགྱུར་ན། དྲང་སྲོང་ཆེན་པོ་དེ་རྣམས་ཀྱིས་ཀྱང་སྲུང་བ་དང་སྐྱོབ་པར་འགྱུར་རོ། །སྦ་བ་དང་ཞེས་བྱ་བ་ལ་སོགས་པ་ནི། སྔར་བཤད་པ་བཞིན་དུ་ཤེས་པར་བྱའོ། །ཏདྱ་ཐཱ་ཞེས་བྱ་བ་ནི། འདི་ལྟ་སྟེ། རིག་སྔགས་ཀྱི་གསང་སྔགས་དྲང་སྲོང་རྣམས་ཀྱི་གཉེན་པོ་ལྟའོ། །རིག་སྔགས་ཀྱི་གསང་སྔགས་ནི། ཧ་རི་ཧ་རི་ལ་སོགས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལས། དྲང་སྲོང་རྣམས་ཀྱི་གནས་སྐབས་ཏེ་ཉི་ཤུ་པའོ།། །།ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་གསུངས་པའོ། །ཁྱོད་ཀྱི་སྐྱེ་དགུའི་བདག་པོ་གང་དག་ཅས་བྱ་བ་ནི། ཁམས་ཀྱི་རིགས་བརྟག་པ། འགྲོ་བ་རིགས་དྲུག་གི་ལས་ཀྱི་མེ་ལོང་འཛིན་པའོ།།
ལྷ་རྣམས་དང་ཞེས་བྱ་བ་ལ་སོགས་པ་ནི། སེམས་ཅན་དམྱལ་བ་ནས། ལྷ་རྣམས་སྐྱེ་བའི་གཙུག་ལག་འཛིན་ཅིང༌། ལས་ཀྱི་རི་མོ་བྲིས་ནས་དེ་ལ་བཏང་བའི་བདག་པོའོ། །འདི་ལྟ་སྟེ་ཞེས་བྱ་བ་ནི། སྐྱེ་དགུའི་བདག་པོ་རྣམས་ཀྱི་མིང་བལྟ་བའོ། །སྐྱེ་དགུའི་བདག་པོ་ཚངས་པ་དང༌། སྐྱེ་དགུའི་བདག་པོ་བུ་ཅན་དང༌། སྐྱེ་དགུའི་བདག་པོ་ཟ་ཚུལ་ཅན་གྱི་བུ་དང༌། སྐྱེ་དགུའི་བདག་པོ་མེ་དང༌། སྐྱེ་དགུའི་བདག་པོ་གསོ་བ་དང་ཞེས་བྱ་བ་ནི། འཇིག་རྟེན་ནས་བླ་ན་མེད་པ་གནས་པ་སྟེ། དེ་ལྔ་པོ་ནི་ལྷའི་ལས་ཀྱི་མེ་ལོང་གི་རི་མོ་འཛིན་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། དཀར་པོ་དང༌། སེར་པོ་དང༌། དམར་པོ་དང༌། ལྗང་གུ་དང༌། ནག་པོར་གནས་པའོ། །དེ་རྣམས་ཀྱི་གཡས་ན་དབྱུ་གུ་རྩེ་གསུམ་དང༌། ཕྲེང་བ་དང༌། བུམ་པ་སྤྱི་བླུགས་དང༌། འཁོར་ལོ་དང༌། ཞགས་པ་བསྣམས་པ། གཡོན་རྣམས་ན་ལས་ཀྱི་མེ་ལོང་རི་མོ་བསྣམས་པའོ། །ཚངས་པའི་བརྟུལ་ཞུགས་སུ་ཞུགས་པ། ཁམས་གསུམ་ཙམ་ལ་དབང་བ། དེ་རྣམས་ཀྱིས་ཀྱང་རིག་སྔགས་ཀྱི་བཀའ་ལས་མི་འདའ་བར། སྲུང་བ་དང་སྐྱོབ་པར་བྱེད་པའོ། །སྐྱེ་དགུའི་བདག་པོ་མདུན་དུ་བ་རང་དང༌། སྐྱེ། དགུའི་བདག་པོ་སྤུ་ཟིང་སེལ་དང༌། སྐྱེ་དགུའི་བདག་པོ་གོ་བྱེད་དང༌། སྐྱེ་དགུའི་བདག་པོ་མཛེས་གནས་དང༌། སྐྱེ་དགུའི་བདག་པོ་ཟིན་པོ་དང་ཞེས་བྱ་བ་ནི། སྐྱེ་དགུའི་བདག་པོ་དེ་རྣམས་ཀྱང་ས་སྟེངས་ཀྱི་ལས་ཀྱི་མེ་ལོང་འཛིན་ཞིང༌། མི་དང་བྱོལ་སོང་རྣམས་ཀྱི་སྐྱེ་བའི་ལས་འཛིན་པའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། སེར་པོ་དང༌། ནག་པོ་དང༌། ལྗང་གུ་དང༌། དམར་པོ་དང༌། དཀར་པོར་སྣང་བའོ། །གཡས་རྣམས་ན་འཁོར་ལོ་དང༌། ཞགས་པ་དང༌། དུང་དང༌། བེ་ཅོན་དང༌། དབྱུག་ཏོའོ། །གཡོན་རྣམས་ན་ལས་ཀྱི་རི་མོའི་མེ་ལོང་བསྣམས་པའོ། །དེ་ལྟ་བུའི་སྐྱེ་དགུའི་བདག་པོས་ཀྱང༌། ས་སྟེང་དུ་དབང་མཛད་ཅིང༌། རིག་སྔགས་ཀྱི་བཀའ་ལས་མི་འདའ་བར། སེམས་ཅན་རྣམས་ཀྱི་དོན་བྱེད་པའོ། །སྐྱེ་དགུའི་བདག་པོ་ལུས་མཛེས་དང༌། སྐྱེ་དགུའི་བདག་པོ་རབ་དགའ་དང༌།
སྐྱེ་དགུའི་བདག་པོ་མཁས་པ་དང༌། སྐྱེ་དགུའི་བདག་པོ་གུས་ཡོད་དེ་ཞེས་བྱ་བ་ནི། སྐྱེ་དགུའི་བདག་པོ་དེ་རྣམས་ཀྱངས་འོག་ན་གནས་པའི་ཡི་དགས་དམྱལ་བའི་ལས་ཀྱི་མེ་ལོང་འཛིན་བའོ། །དེ་རྣམས་ཀྱི་སྐུ་མདོག་དང་ཕྱག་མཚན་ནི། ནག་པོ་དང༌། ལྗང་ནག་དང༌། ཐལ་བའི་མདོག་དང༌། མཐིང་གར་གནས་པའོ། །གཡས་རྣམས་ན་བེ་ཅོན་དང༌། ལྕགས་ཀྱུ་དང༌། དབྱུག་ཏོ་དང༌། ཞགས་པའོ། །གཡོན་རྣམས་ན་ལས་ཀྱི་མེ་ལོང་གི་རི་མོ་བསྣམས་པའོ། །ས་འོག་ལ་དབང་མཛད་ཅིང༌། རིག་སྔགས་ཀྱི་རྒྱལ་མོའི་བཀའ་ལས་མི་འདའ་བར་སེམས་ཅན་གྱི་དོན་མཛད་པའོ། །ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་བཀའ་སྩལ་པའོ། །སྐྱེ་དགུའི་བདག་པོ་བདག་ཉིད་ཆེན་པོ་འདི་དག་ནི་ཞེས་བྱ་བ་ནི། དེ་རྣམས་ཀྱིས་ཀྱང་ཁམས་གསུམ་གྱི་བདག་པོར་གནས་ཤིང༌། སེམས་ཅན་བཟང་ངན་གྱི་ལས་སྨྲ་བའོ། །གནས་པ་དང་འགྲོ་བའི་འབྱུང་པོའི་ཆོགས་བསྲུང་བའི་ཕྱིར་གནས་པ་དག་གོ་ཞེས་བྱ་བ་ནི། འོང་བ་དང་ད་ལྟར་དང་འདས་པ་རྣམས་ཀྱི་མངོན་པར་ཤེས་པ་དང་ལྡན་པ། གཟི་བརྗིད་ཆེ་ཞིང་དབང་ཆེ་བ་རྫུ་འཕྲུལ་དང་ལྡན་པ་དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། རིག་སྔགས་ཀྱི་རྒྱལ་མོའི་ངོ་བོ་ནི། ཞལ་གཅིག་ཕྱག་བཞི་པ། སྐུ་མདོག་ནག་མོ་སྤྱན་གསུམ་པ། དབུ་སྐྲ་སེར་པོ་དབུ་ལ་རྡོ་རྗེས་བརྒྱན་པ། ཡེ་ཤེས་ལྔ་དང་ལྡན་པ། ཡན་ལག་ཐམས་ཅད་སྦྲུལ་གྱིས་བརྒྱན་པ། གཡས་པ་གཉིས་ན་བེ་ཅོན་དང་འཁོར་ལོའོ། །གཡོན་པ་གཉིས་ན་རྨ་བྱའི་སྒྲོ་དང༌། ཞགས་པ་བསྣམས་པའོ། །གཡས་བརྒྱང་བ་གཡོན་བསྐུམ་པ། ཉི་མའི་གདན་དང་འོད་དང་ལྡན་པའོ། །ཐབས་ཤེས་རབ་གཉིས་སུ་མེད་པའོ། །དེ་ལྟ་བུའི་རིག་སྔགས་ལ་གང་ཟག་གང་གིས་གུས་པར་གྱུར་ན། སྐྱེ་དགུའི་བདག་པོ་དེ་རྣམས་ཀྱིས་ཀྱང་སྲུང་བ་དང་སྐྱོབ་པར་འགྱུར་རོ། །སྦ་བ་ལ་སོགས་པ་ཞེས་བྱ་བ་ནི། སྔར་བཤད་པ་བཞིན་དུ་ཤེས་པར་བྱའོ། །ཏདྱ་ཐཱ་ཞེས་བྱ་བ་ནི། འདི་ལྟ་སྟེ། རིག་སྔགས་ཀྱི་གསང་སྔགས་སྐྱེ་དགུའི་བདག་པོའི་གཉེན་པོ་
བལྟ་བར་བྱའོ། །རིག་སྔགས་ཀྱི་གསང་སྔགས་ནི། །ཧི་རི་ཧི་རི་ལ་སོགས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལས་ཁམས་གསུམ་གྱི་མངའ་བདག་སྐྱེ་དགུའི་བདག་པོ་ཆེན་པོ་རྣམས་ཀྱི་གནས་སྐབས་ཏེ་ཉི་ཤུ་གཅིག་བའོ།། །།ཀུན་དགའ་བོ་ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཀྱིས་བཀའ་སྩལ་བའོ། །ཁྱོད་ཀྱིས་དུག་ཆེན་པོ་རྣམས་ཀྱི་མིང་ཟུང་ཤིག་ཅེས་བྱ་བ་ནི། ཕྱིའི་དུག་རྣམ་བ་གསུམ་སྟེ། འཇིག་རྟེན་གྱི་ཁམས་སུ་གྲགས་ཤིང་གཞན་རྣམས་ཀྱིས་མི་ཐུབ་བ། ཐུན་མོང་གི་དུག་ཅེས་བྱ་བ་སེམས་ཅན་རྣམས་ལ་གནོད་པར་བྱེད་པའོ། །འགྲོ་བ་དང༌། གནས་པ་དང༌། སྦྱོར་བ་དང་གསུམ་མོ། །དུག་དེ་གསུམ་ནི། འཇིག་རྟེན་གྱི་ཁམས་ལ་ཁྱབ་སྟེ། སེམས་ཅན་རྣམས་ལ་འཇིགས་པར་བྱེད་པའོ། །ཏདྱ་ཐཱ་ཞེས་བྱ་བ་ནི། འདི་ལྟ་སྟེ། འཇིག་རྟེན་གྱི་དུག་གསུམ་ལྟ་བའོ། །ཨཎྜ་རཱ་ཞེས་བྱ་བ་ནི། སྒོ་ང་ལས་བྱུང་བའི་དུག་ཡིན་ཏེ། སྦྲུལ་ལ་སོགས་པའི་སེམས་ཅན་ལས་བྱུང་བའོ། །ཁ་རླངས་ཀྱི་དུག་དང༌། མཆེ་བའི་དུག་གོ །པ་ཎྜ་རཱ་ནི་ཀླུའི་དུག་བསམ་པའི་དུག་གོ །མཐོང་བ་དང་གཉིས་སོ། །ཀཱ་ར་ཊ་ནི་ཀླུའི་དུག་རེག་པའི་དུག་གོ །འཛིན་པའི་དུག་གོ །ཀེ་ཡཱུ་རཱ་ནི་བུམ་བའི་དུག་ཡིན་ཏེ། དེ་ནི་རེག་པའི་དུག་གོ །བྷཱུ་ཏངྒ་མཱ་ནི་འབྱུང་པོ་རྣམས་ཀྱི་མཐོང་བའི་དུག་ཡིན་ཏེ། དེ་ཡང་དུག་བཞི་གནས་པའོ། །བྷཱུ་ཏཔ་ཏི་ནི་མི་མ་ཡིན་གྱི་དུག་ཡིན་ཏེ། དེ་ཡང་མཐོང་བ་དང༌། རེག་པ་དང༌། བསམ་པ་ལས་བྱུང་བའི་དུག་ཡིན་ཏེ། བིནྡུ་པ་ཏི་ནི་ཐིགས་པའི་དུག་ཡིན་ཏེ། དེ་ཡང་བསམ་པ་དང་མཐོང་བ་ལས་བྱུང་བ། ཀླུའི་དུག་ཕོལ་མིག་གོ །སི་རི་པ་ཏི་ནི་དེ་ཡང་ཀླུའི་དུག་ཡིན་ཏེ། དམུ་ཆུའི་ནང་དོ། །ཏེ་ཇོ་བ་ཏི་ནི་ཀླུའི་དུག་མེ་དབལ་གྱི་ནད་ཡིན་ནོ། །ཡ་ཤོ་བ་ཏི་ནི་དེ་ཡང་ཀླུའི་ནད་ཡིན་ཏེ། མཛེའི་བྱེ་བྲག་གོ །ཡ་ཤོ་གྲཔ་ཏི་ནི་ས་བདག་གི་དུག་ཡིན་ཏེ། འབྲས་ཀྱི་ནད་དོ། །ཨ་ར་ཌཱ་ནི་ས་བདག་གི་རིགས་གཡའ་བའོ། །ཏ་ར་ཌཱ་ནི་ས་བདག་གི་རིགས་
ཤ་བཀྲའི་ནད་དོ། །ཏ་ར་ད་ནི་འབྲུམ་བུའོ། །ཏུ་ཏུ་རཱ་ནི་ལྷོག་པའི་ནད་དོ། །དནྟ་ཧ་རཱ་ནི་མཆེ་བ་ལ་སོགས་པ་ལས་བྱུང་བ་སེམས་ཅན་དུག་གི་སོའི་དུག་གོ །ཧ་ལ་ཧ་ལ་ནི་འཇིག་རྟེན་དྲག་བོའི་དུག་ཡིན་ཏེ། སེམས་ཅན་ནང་གི་དུག་གོ །མེ་ལཱ་ཧ་ལ་གྲ་ནི་སྦྱོར་བའི་དུག་གོ །པཱ་ལ་ནི་འབྲས་བུ་ལས་བྱུང་བའོ། །གུ་ཧ་ནི་གསང་བའི་དུག་གོ །གསང་བའི་དུག་ནི་དམ་ཚིག་ལས་བྱུང་བའོ། །ཙ་རཱི་ནི་བརྟན་པ་སྟེ་མི་འགྱུར་བའོ། །དནྡུ་རཱ་ནི་བཙན་དུག་གོ །ཨི་རི་ཀི་ཙི་ཀཱ་ནི་རྩ་བའི་དུག་གོ །ཀམྦཱ་ནི་བལྟ་བའི་དུག་གོ །ཤ་ཏ་དནྡུ་རཱ་ནི་ལོག་བའི་དུག་གོ །བི་པུ་ལེ་ནི་སྤྲིན་གྱི་དུག་གོ །ན་ཀུ་ལེ་ནི་སྲེ་མོང་ལས་བྱུང་བའོ། །ཀིརཱི་པི་ནི་ཕྱི་བའི་དུག་གོ །ཏ་རངྒཱ་རྀཥྚ་ནི་སྲིན་བུ་ཀི་ཏིའི་དུག་གོ །ཨ་མྲ་མ་ཏི་ནི་སྦྲུལ་ནག་པོའི་དུག་གོ །ཛཱམྦཱུ་མ་ཏི་ནི་ཤ་དུག་གོ །མ་དྷུ་མ་ཏི་ནི་བདུད་རྩི་ལས་བྱུང་བའོ། །ཀ་མ་ལེ་ནི་མཐོང་བའི་དུག་གོ །བི་མ་ལེ་ནི་ཕྱེ་མའི་དུག་གོ །ཀུཎྜ་ལེ་ནི་རྩ་བའི་དུག་གོ །ཨ་ཧ་དུ་ཧི་ནི་སྡིག་པ་མང་པོའི་དུག་གོ །ཨ་ཌི་ན་ཌི་ནི་སྡིག་པ་དམར་པོའི་དུག་གོ །འབུ་གེ་འབུ་གེ་ནི་ས་དུག་གོ །བད་ས་ནཱ་བྷེ་ནི་སྤྲེའུ་དེ་བའི་དུག་གོ །མ་ཧཱ་ག་རེ་ནི་ནག་པོ་བརྩེགས་པའི་དུག་གོ །དུ་ལམྦེ་ནི་རྩ་བ་ནག་པོའི་དུག་གོ །སུ་ལམ་བེ་ནི་ཞེས་བྱ་བ་ནི། རིན་པོ་ཆེའི་དབྱིག་དུག་གོ །སྭཱ་ཧཱ་ནི་དུག་བཅོམ་པའོ། །ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་བཀའ་སྩལ་པའོ། །འདི་དག་ནི་དུག་ཆེན་པོ་དག་སྟེ་ཞེས་བྱ་བ་ནི། འཇིག་རྟེན་ལ་གྲགས་བའི་ཕྱིའི་དུག་ཅེས་བའོ། །དེ་དག་གིས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། ཕྱིའི་དུག་དང༌། ནང་གི་དུག་འཇོམས་ནུས་པའོ། །རིགས་པའི་རང་བཞིན་རིག་སྔགས་ཀྱི་རྒྱལ་མོ་འདི་ལ་གང་ཟག་གང་གིས་ཀྱང་གུས་པར་བྱས་ན། དུག་ནད་ཐམས་ཅད་ཀྱིས་མི་ཚུགས་ཤིང༌། དུག་ནད་དེ་རྣམས་ཀྱིས་ཀྱང་སྲུང་བ་དང་སྐྱོབ་པར་བྱེད་པའོ། །སྦ་བ་དང་ཞེས་བྱ་བ་ནི། དུག་ནད་ཐམས་ཅད་ལས་སྦ་བའོ། །ཡོངས་སུ་བསྐྱབ་པ་དང་ཞེས་བྱ་བ་ནི། དུག་དེ་རྣམས་ལས་བསྐྱབ་པའོ། །ཡོངས་སུ་གཟུང་བ་དང་ཞེས་བྱ་བ་ནི། ནད་དེའི་འཇིགས་པ་ལས་
གཟུང་བའོ། །ཡོངས་སུ་བསྐྱང་བ་དང་ཞེས་བྱ་བ་ནི། དེའི་འཇིགས་པ་ལས་ཐར་བའོ། །ཞི་བ་དང་ཞེས་བྱ་བ་ནི། དུག་ནད་དེ་དག་ཐམས་ཅད་ཞི་བའོ། །བདེ་ལེགས་སུ་འགྱུར་བ་དང་ཞེས་བྱ་བ་ནི། དུག་ནད་བཅོམ་ནས་བདེ་བའོ། །ཆད་བ་སྤང་བ་དང་ཞེས་བྱ་བ་ནི། དུག་ཅན་རྣམས་ཀྱི་ཆད་པ་སྤང་བའོ། །མཚོན་ཆ་སྤང་བ་དང་ཞེས་བྱ་བ་ནི། དེའི་མཐོང་བའི་དུག་གི་མཚོན་ཆ་སྤངས་བའོ། །དུག་གཞིལ་བ་དང་ཞེས་བྱ་བ་ནི། དུག་འོང་བ་རྣམས་སྤང་བའོ། །དུག་གསོད་པ་དང་ཞེས་བྱ་བ་ནི། ཡོད་པ་ཡང་མེད་པར་བྱེད་པའོ། །ལོ་བརྒྱ་འཚོ་བར་གྱུར་ཅིག་ཅེས་བྱ་བ་ནི། ནད་དེས་མི་ཚུགས་ཤིང་ཚེ་རིང་པའོ། །སྟོན་བརྒྱ་མཐོང་བར་ཤོག་ཤིག་ཅེས་བྱ་བ་ནི། ཕུན་སུམ་ཚོགས་ཤིང༌། ནད་རྣམས་དང་བྲལ་བའོ། །རག་སྔགས་ཀྱི་རྒྱལ་མོ་རྨ་བྱ་ཆེན་མོ་ལས། དུག་གི་མིང་བསྟན་པའི་གནས་སྐབས་ཏེ་ཉི་ཤུ་རྩ་གཉིས་པའོ།། །། ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་བཀའ་སྩལ་པའོ། །ཁྱོད་ཀྱིས་ཤིང་ལྗོན་པ་ཆེན་པོ་རྣམས་ཀྱི་མིང་ཟུང་ཤིག་ཅེས་བྱ་བ་ནི། བྱང་ཆུབ་ཀྱི་ཤིང་ལྗོན་པ་ཆེན་པོ་འཛམ་བུའི་གླིང་ན་གནས་པའོ། །འདི་ལྟ་སྟེ་ཞེས་བྱ་བ་ནི། བྱང་ཆུབ་ཀྱི་ཤིང་རྣམས་བལྟ་བའོ། །ཤིང་ལྗོན་པ་ཆེན་པོ་གསེར་ཞེས་བྱ་བ་དང༌། ཤིང་ལྗོན་པ་ཆེན་པོ་སེར་སྐྱ་ཞེས་བྱ་བ་དང༌། ཤིང་ལྗོན་བ་ཆེན་པོ་ཁྱ་བ་གནས་ཞེས་བྱ་བ་དང༌། ཤིང་ལྗོན་པ་ཆེན་པོ་སྦྲེའུ་གནས་ཞེས་བྱ་བ་དང༌། ཤིང་ལྗོན་པ་ཆེན་པོ་པདྨ་དཀར་པོ་ཞེས་བྱ་བ་དང༌། ཤིང་ལྗོན་པོ་ཆེན་པོ་སེར་པོ་ཞེས་བྱ་བ་དང༌། ཤིང་ལྗོན་པ་ཆེན་པོ་མྱ་ངན་འཚང་ཞེས་བྱ་བ་དང༌། ཤིང་ལྗོན་པ་ཆེན་པོ་རྣ་ལྡན་བྱེད་ཅེས་བྱ་བ་ནི་ཤིང་ལྗོན་པ་དེ་ཡང་རིམ་པ་བཞིན་དུ། ཤར་དང་ཤར་ལྷོ་དང་ལྷོ་ནུབ་དང༌། ནུབ་དང་ནུབ་བྱང་དང༌། བྱང་དང་བྱང་ཤར་དང༌། དེ་བཞིན་དུ་ཞིང་སྐྱོང་ལ་ཡང་རིམ་པ་བཞིན་དུ་ཤར་ནས་བསྐོར་ཏེ། གླང་པོ་ཆེའི་གདོང་ཅན་དང༌། རའི་གདོང་ཅན་དང༌། མ་ཧེའི་གདོང་ཅན་དང༌། ཡི་དགས་ཀྱི་གདོང་ཅན་དང༌། ཆུ་སྲིན་གྱི་གདོང་ཅན་དང༌། ཤ་བའི་གདོང་ཅན་དང༌། རྟའི་གདོང་ཅན་དང༌། གླང་གི་གདོང་ཅན་ནོ། །གཡས་རྣམས་ན་རྡོ་རྗེ་དང༌། རྩེ་གཅིག་དང༌། བེ་ཅོན་དང༌། རལ་
གྲི་དང༌། སྦྲུལ་ཞགས་དང༌། བ་དན་དང༌། བུམ་པ་དང༌། རྩེ་གསུམ་མོ། གཡོན་རྣམས་ནི་སྡིགས་མཛུབ་དང་ཞགས་པའོ། །དེ་རྣམས་ཀྱི་ཁ་དོག་ཀྱང༌། དཀར་པོ་དང༌། དམར་པོ་དང༌། ནག་པོ་དང༌། དམར་ནག་དང༌། དཀར་པོ་དང༌། དུད་ཀ་དང༌། སེར་པོ་དང༌། མཐིང་གའོ། །དེ་རྣམས་ཀྱིས་ཀྱང་རིགས་སྔགས་ཀྱི་བཀའ་ལས་མི་འདའ་བར་སྲུང་བ་དང་སྐྱོབ་པར་བྱེད་དོ། །ཤིང་ལྗོན་པ་ཆེན་པོ་རྒྱས་བྱེད་ཅེས་བྱ་བ་དང༌། ཤིང་ལྗོན་པ་ཆེན་པོ་བིལ་བ་ཞེས་བྱ་བ་དང༌། ཤིང་ལྗོན་པ་ཆེན་པོ་ཙུ་ཏ་ཞེས་བྱ་བ་དང༌། ཤིང་ལྗོན་པ་ཆེན་པོ་འཛམ་བུ་ཞེས་བྱ་བ་དང༌། ཤིང་ལྗོན་པ་ཆེན་པོ་ཨ་འབྲས་ཞེས་བྱ་བ་དང༌། ཤིང་ལྗོན་པ་ཆེན་པོ་ཏཱ་ལ་ཞེས་བྱ་བ་དང༌། ཤིང་ལྗོན་པ་ཆེན་པོ་ཙནྡན་ཞེས་བྱ་བ་དང་ཞེས་བྱ་བ་ནི། ཤིང་ལྗོན་བ་ཆེན་པོ་དེ་རྣམས་རྒྱ་མཚོའི་འགྲམ་ན་གནས་ཏེ། དེ་ཡང་རིམ་པ་བཞིན་དུ་གནས་ཏེ། རྒྱ་མཚོའི་ཤར་དང༌། ཤར་ལྷོ་དང༌། ལྷོ་དང༌། ལྷོ་ནུབ་དང༌། ནུབ་དང༌། ནུབ་བྱང་དང༌། བྱང་དང༌། བྱང་ཤར་དང༌། དེ་རྣམས་ལ་གནས་པའི་ཞིང་སྐྱོང་རྣམས་ནི། རིམ་པ་བཞིན་དུ། ཁྭ་གདོང་ཅན་དང༌། ཁྱིའི་གདོང་ཅན་དང༌། འུག་པའི་གདོང་ཅན་དང༌། ཕག་པའི་གདོང་ཅན་དང༌། སེང་གེའི་གདོང་ཅན་དང༌། སྟག་གི་གདོང་ཅན་དང༌། སྤྱང་ཀིའི་གདོང་ཅན་དང༌། བྱའི་གདོང་ཅན་ནོ། །དེ་རྣམས་ཀྱི་ཁ་དོག་ནི། ནག་པོ་དང༌། སེར་པོ་དང༌། དཀར་པོ་དང༌། ལྗང་གུ་དང༌། མཐིང་ག་དང༌། དམར་པོ་དང༌། ཐལ་བའི་མདོག་ཅན་དང༌། མཐིང་གའོ། །དེ་རྣམས་ཀྱི་ཕྱག་མཚན་ནི། གཡས་རྣམས་ན་གྲི་གུག་གཡོན་རྣམས་ན་ཐོད་པ་བསྣམས་པའོ། །ཤིང་དེ་རྣམས་ཀྱང་ཤིན་ཏུ་གཞོན་པ། ཡལ་ག་རྒྱས་པ། དེ་བཞིན་དུ་ལོ་མ་དང་ལྡན་པའོ། །ཤིང་ལྗོན་པ་ཆེན་པོ་དེ་དག་དང༌། གཞན་དག་ལྷ་གང་དག་གནས་པ་དེ་དག་གིས་ཀྱང་ཞེས་བྱ་བ་ནི། ཤིང་དེ་ལ་སོགས་པ་གཞན་ལ་གནས་པ་ལ་ཡང༌། ལྷའི་གདོན་ལ་སོགས་པ་འབྱུང་པོ་སྟོང་ཕྲག་བརྒྱད་ཅུ་རྣམས་གནས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་ལ་སྲུང་བ་གྱིས་ཤིག་ཅེས་བྱ་བ་ནི། ཐབས་ཤེས་རབ་གཉིས་སུ་མེད་པ་ཡེ་ཤེས་ལྔ་དང་ལྡན་པ། སེམས་ཅན་རྣམས་ལ་
ཐུགས་རྗེ་ཆེ་བ་ནི། དེ་དག་དང་ལྡན་པའི་རིག་སྔགས་ལ་གང་ཟག་གང་གིས་གུས་བར་བྱས་ནས་ནི། ཞིང་སྐྱོང་དེ་རྣམས་ཀྱིས་ཀྱང་སྲུང་བ་དང་སྐྱོབ་བར་བྱེད་པའོ། །སྦ་བ་ལ་སོགས་པ་ཞེས་བྱ་བ་ནི། སྔ་མ་བཞིན་དུ་ཤེས་པར་བྱའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལས་ཤིང་ལྗོན་པ་ཆེན་པོ་བཤད་པའི་གནས་སྐབས་ཏེ་ཉི་ཤུ་གསུམ་པའོ།། །།ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་བཀའ་སྩལ་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ནི་ཞེས་བྱ་བ་ནི། འབྱུང་པོ་ཐམས་ཅད་གྱི་གཉེན་པོ། སངས་རྒྱས་རྣམས་ཀྱི་ཕྱག་རྒྱ། ཆོས་རྟགས་ཀྱི་ཕྱག་རྒྱ་གསུམ་ལ་གྲགས་པའོ། །ཡང་དག་པར་རྫོགས་པའི་སངས་རྒྱས་བདུན་གྱིས་གསུངས་ཤིང་རྗེས་སུ་ཡི་རང་བ་སྟེ་ཞེས་བྱ་བ་ནི། འདས་པ་དང་ད་ལྟར་ཡོད་པའི་སངས་རྒྱས་རྣམས་ཀྱིས་གསུངས་པའོ། །འདི་ལྟ་སྟེ་ཞེས་བྱ་བ་ནི། སངས་རྒྱས་རབས་བདུན་རྣམས་ལྟ་པའོ། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་གསུངས་ཤིང་རྗེས་སུ་ཡི་རང་བའོ་ཞེས་བྱ་བ་ནི་བསྐལ་བ་དང་པོའི་དུས་སུ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་ཀྱང་སུ་ཡི་རང་བཞིན་སེམས་ཅན་གྱི་དོན་ལ་གསུངས་ཤིང༌། ཕྱག་རྒྱའི་རྒྱས་བཏབ་པའོ། །ཡང་དག་པར་རྫོགས་པའི་སངས་རྒྱས་གཙུག་ཏོར་ཅན་གྱིས་གསུངས་ཤིང་རྗེས་སུ་ཡི་རང་བའོ་ཞེས་བྱ་བ་ནི་བསྐལ་པ་གཉིས་པའི་དུས་སུ་ཡང་དག་པར་རྫོགས་པའི་སངས་རྒྱས་གཙུག་ཏོར་ཅན་གྱིས་ཀྱང༌། སེམས་ཅན་གྱི་དོན་ལ་རྗེས་སུ་ཡི་རང་ཞིང་གསུངས་པའོ། །རིག་སྔགས་ཀྱི་ཕྱག་རྒྱའི་རྒྱས་བཏབ་པའོ། །ཡང་དག་པར་རྫོགས་པའི་སངས་རྒྱས་ཐམས་ཅད་སྐྱོབ་ཀྱིས་གསུངས་ཤིང་རྗེས་སུ་ཡི་རང་བའོ་ཞེས་བྱ་བ་ནི་བསྐལ་པ་གསུམ་པའི་དུས་སུ། སེམས་ཅན་གྱི་དོན་ལ་ཡང་དག་པར་རྫོགས་པའི་སངས་རྒྱས་ཐམས་ཅད་སྐྱོབ་ཀྱིས་ཀྱང༌། རིག་སྔགས་ཀྱི་ཕྱག་རྒྱའི་རྒྱས་བཏབ་པའོ། །ཡང་དག་པར་རྫོགས་པའི་སངས་རྒྱས་འཁོར་བ་འཇིག་གིས་གསུངས་ཤིང་རྗེས་སུ་ཡི་རང་བའོ་ཞེས་བྱ་བ་ནི། བསྐལ་པ་བཞི་པའི་དུས་སུ་ཡང༌། སེམས་ཅན་གྱི་དོན་ལ་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གིས་ཀྱང༌། རིག་སྔགས་ཀྱི་ཕྱག་རྒྱའི་རྒྱས་
བཏབ་པའོ། །ཡང་དག་པར་རྫོགས་པའི་སངས་རྒྱས་གསེར་ཐུབ་ཀྱིས་ཀྱང་གསུངས་ཤིང་རྗེས་སུ་ཡི་རང་བའོ་ཞེས་བྱ་བ་ནི། བསྐལ་པ་ལྔ་པའི་དུས་སུ་ཡང༌། ཡང་དག་པར་རྫོགས་པའི་སངས་རྒྱས་གསེར་ཐུབ་ཀྱིས་ཀྱང༌། སེམས་ཅན་གྱི་དོན་ལ་རིག་སྔགས་ཀྱི་ཕྱག་རྒྱའི་རྒྱས་བཏབ་པའོ།། ཡང་དག་པར་རྫོགས་པའི་སངས་རྒྱས་འོད་སྲུངས་ཀྱིས་གསུངས་ཤིང་རྗེས་སུ་ཡི་རང་བའོ་ཞེས་བྱ་བ་ནི། བསྐལ་པ་དྲུག་པའི་དུས་སུ་ཡང་དག་པར་རྫོགས་པའི་སངས་རྒྱས་འོད་སྲུངས་ཀྱིས་ཀྱང༌། སེམས་ཅན་གྱི་དོན་ལ་རྗེས་སུ་ཡི་རང་ཞིང་རིག་སྔགས་ཀྱི་ཕྱག་རྒྱའི་རྒྱས་བཏབ་པའོ།། སངས་རྒྱས་དྲུག་པོ་དེ་ནི། ཕ་རོལ་ཏུ་ཕྱིན་པ་དང༌། མངོན་པ་དང་འདུག་བ་ལ་སོགས་པའི་ཆོས་བསྟན་ཞིང༌། སེམས་ཅན་རྣམས་འདུལ་པའོ། །ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ངས་ཀྱང་ད་ལྟར་བཤད་ཅིང་རྗེས་སུ་ཡི་རང་བའོ་ཞེས་བྱ་བ་ནི། དུས་ཐ་མ་འདི་ལ་སེམས་ཅན་གྱི་མཚན་ལྔའི་དུས་སུ། དེ་བཞིན་དུ་ཚེ་ལོ་བརྒྱ་ཉི་ཤུ་ཐམ་པ་ལ། ཡུལ་མཉན་དུ་ཡོད་པ་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་རྡོ་རྗེའི་གདན་ལ། དགེ་སློང་ས་རི་མཆེ་བའི་དུག་གིས་ཟིན་པའི་དོན་དང༌། སེམས་ཅན་ལ་དམིགས་ནས་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི། ཡང་དག་པར་རྫོགས་པའི་སངས་རྒྱས་ཤཱཀྱ་སེང་གེས་རྗེས་སུ་ཡི་རང་བ་རིག་སྔགས་ཀྱི་ཕྱག་རྒྱས་རྒྱས་བཏབ་པ། རིག་སྔགས་འདི་ནི་ཐབས་ཤེས་རབ་གཉིས་སུ་མེད་པ། ཀུན་གཞི་རྣམ་པར་ཤེས་པར་དག་པ། ཆོས་རྟགས་ཀྱི་ཕྱག་རྒྱ་བཞིའི་སྒོ་ནས་བསྟན་པའོ། །ཀུན་དགའ་བོ་ཞེས་བྱ་བ་ནི། མཚན་སུམ་ཅུ་རྩ་གཉིས་དང་ལྡན་པ་དཔེ་བྱད་བཟང་བོ་བརྒྱད་ཅུས་སྐུ་ལ་བརྒྱན་པ། སེམས་ཅན་གྱི་དོན་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་དོན་ལ་ཁྱབ་པའོ། །སེང་གེ་པདྨའི་གདན་ལ་བཞུགས་པ། དགེ་སློང་ས་རིའི་དོན་ལ་བཀའ་སྩལ་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ནི་བྱང་ཆུབ་སེམས་དཔའ་བྱམས་པས་ཀྱང་བཤད་ཅིང་རྗེས་སུ་ཡི་རང་བའོ་ཞེས་བྱ་བ་ནི། མ་འོངས་པའི་སངས་རྒྱས་ཡང་བསྐལ་པ་འདིའི་ཕྱི་མ་ཡང་དུས་བཟང་པོ་ལ། ཚེ་ལོ་སྟོང་སེམས་ཅན་རྣམས་ཀྱིས་ཐུབ་པ། གསེར་གྱིས་གཞིའི་ཡིད་བཞིན་གྱི་ནོར་བུ་ལ་སྤྱོད་པ་
སེམས་ཅན་རྣམས་ལ་ལས་བྱ་མི་དགོས་པ། ཆོས་དང༌། མཚན་ཉིད་དང༌། མདོ་སྡེ་དང༌། འདུལ་བ་མངོན་པ་གསུམ་གྱིས་འདུལ་བའོ། །དེའི་ཚེ་དེའི་དུས་སུ། བྱང་ཆུབ་སེམས་དཔའ་བྱམས་པ་རྗེས་སུ་ཡི་རང་ཞིང་གསུངས་ཏེ། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་ཕྱག་རྒྱའི་རྒྱས་བཏབ་པའོ། །མི་མཇེད་ཀྱི་བདག་པོ་ཚངས་པས་སྨྲས་ཤིང་རྗེས་སུ་ཡི་རང་བའོ་ཞེས་བྱ་བ་ནི། སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ཀྱི་རྒྱལ་པོ། ད་རྣམས་ལ་དབང་སྒྱུར་བ། དེས་ཀྱང་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ལ་མི་མཇེད་ཀྱི་བདག་པོ་ཚངས་པས་ཀྱང་སྤྱི་བོའི་གཙུག་ཏུ་བཞག་ནས། རྗེས་སུ་ཡི་རང་ཞིང་དེའི་ཡོན་ཏན་སྨྲ་བའོ། །ལྷ་རྣམས་ཀྱི་དབང་པོ་བརྒྱ་བྱིན་གྱིས་ཀྱང་སྨྲས་ཤིང་རྗེས་སུ་ཡི་རང་བའོ་ཞེས་བྱ་བ་ནི། འདོད་པའི་ཁམས་ལ་དབང་མཛད་པ། ལྷ་རྣམས་ཀྱི་དབང་པོ་སུམ་ཅུ་རྩ་གསུམ་གྱི་རྒྱལ་པོ་ལྷ་མ་ཡིན་རྣམས་འདུལ་བ། ལྷའི་དབང་པོ་བརྒྱ་བྱིན་གྱིས་ཀྱང་སྤྱི་གཙུག་ཏུ་བཞག་ནས། རྗེས་སུ་ཡི་རང་སྟེ། རིག་སྔགས་ཀྱི་ཡོན་ཏན་སྨྲས་པའོ། །རྒྱལ་པོ་ཆེན་པོ་བཞི་པོ་དག་གིས་ཀྱང་སྨྲས་ཤིང་རྗེས་སུ་ཡི་རང་བའོ་ཞེས་བྱ་བ་ནི། ཕྱོགས་བཞིའི་མིའི་མགོན་མཛད་པའི། ཆོས་ཀྱི་རྒྱལ་ཁྲིམས་མཛད་པ། བཞི་བོ་དེ་དག་གིས་ཀྱང་སྤྱི་བོའི་གཙུག་ཏུ་བཞག་ནས། གུས་པར་རྗེས་སུ་ཡི་རང་ཞིང་སྨྲ་བའོ། །དྲི་ཟའི་རྒྱལ་པོ་ཡུལ་འཁོར་སྐྱོང་གིས་ཀྱང་སྨྲས་ཤིང་རྗེས་སུ་ཡི་རང་བའོ་ཞེས་བྱ་བ་ནི། རི་རབ་ཀྱི་ཤར་ཕྱོགས་ན་མངའ་མཛད་ཅིང༌། དྲི་ཟ་རྣམས་ཀྱི་རྒྱལ་པོ་སྟེ། དེས་ཀྱང་རིག་སྔགས་ལ་རྗེས་སུ་ཡི་རང་བའོ། །གྲུལ་བུམ་གྱི་རྒྱལ་པོ་འཕགས་སྐྱེས་པོས་ཀྱང་སྨྲས་ཤིང་རྗེས་སུ་ཡི་རང་བའོ་ཞེས་བྱ་བ་ནི། རི་རབ་ཀྱི་ལྷོ་ཕྱོགས་ལ་མངའ་མཛད་ཅིང༌། གྲུལ་བུམ་རྣམས་ཀྱི་རྒྱལ་པོ་སྟེ། རྒྱལ་པོ་དེས་ཀྱང་གུས་པར་རྗེས་སུ་ཡི་རང་བའོ། །ཀླུའི་རྒྱལ་པོ་མིག་མི་བཟང་གིས་ཀྱང་སྨྲས་ཤིང་རྗེས་སུ་ཡི་རང་བའོ་ཞེས་བྱ་བ་ནི། རི་རབ་ཀྱི་ནུབ་ངོས་ན་མངའ་མཛད་པ། ཀླུ་རྣམས་ཀྱི་དབང་པོ་ཀླུའི་རྒྱལ་པོ་དེས་ཀྱང་རིག་སྔགས་ལ་གུས་པར་བྱེད་པའོ། །གནོད་སྦྱིན་གྱི་རྒྱལ་པོ་ཆེན་པོ་རྣམ་ཐོས་ཀྱི་བུས་ཀྱང་སྨྲས་ཤིང་རྗེས་སུ་ཡི་རང་བའོ་ཞེས་བྱ་བ་ནི། རི་རབ་ཀྱི་བྱང་ངོས་ན་མངའ་མཛད་པ། གནོད་སྦྱིན་རྣམས་ཀྱི་རྒྱལ་པོ། དེས་ཀྱང་གུས་པར་
བྱས་པའོ། །དྲི་ཟའི་དེད་དཔོན་ཉི་ཤུ་རྩ་བརྒྱད་དག་དང་ཞེས་བྱ་བ་ནི། དྲི་ཟའི་རྒྱལ་པོ་ཡུལ་འཁོར་སྲུང་ལ་ཡང་དེད་དཔོན་ཉི་ཤུ་རྩ་བརྒྱད་ཡོད་དེ། དེ་རྣམས་ཀྱིས་ཀྱང་རིག་སྔགས་ལ་རྗེས་སུ་ཡི་རང་བའོ། །གྲུལ་བུམ་གྱི་དེད་དཔོན་ཉི་ཤུ་རྩ་བརྒྱད་དག་དང་ཞེས་བྱ་བ་ནི། རྒྱལ་པོ་ཆེན་པོ་འཕགས་སྐྱེས་པོ་ལ་ཡང༌། སྡེ་དཔོན་དེ་དག་དང་ལྡན་ཏེ། དེ་རྣམས་ཀྱིས་ཀྱང་རིག་སྔགས་ལ་རྗེས་སུ་ཡི་རང་བའོ། །ཀླུའི་སྡེ་དཔོན་ཉི་ཤུ་རྩ་བརྒྱད་དག་དང་ཞེས་བྱ་བ་ནི། རྒྱལ་པོ་ཆེན་པོ་སྤྱན་མི་བཟང་ལ་ཡང་སྡེ་དཔོན་དེ་དག་དང་ལྡན་ཏེ། དེ་རྣམས་ཀྱིས་ཀྱང་རིག་སྔགས་ལ་རྗེས་སུ་ཡི་རང་བའོ། །གནོད་སྦྱིན་གྱི་སྡེ་དཔོན་ཉི་ཤུ་རྩ་བརྒྱད་དག་དང་ཞེས་བྱ་བ་ནི། རྒྱལ་པོ་ཆེན་པོ་རྣམས་ཐོས་ཀྱི་བུ་དེ་ཡང༌། སྡེ་དཔོན་དེ་དག་དང་ལྡན་ཏེ། དེ་རྣམས་ཀྱིས་ཀྱང་རིག་སྔགས་ལ་རྗེས་སུ་ཡི་རང་བའོ། །གནོད་སྦྱིན་གྱི་སྡེ་དཔོན་ཆེན་པོ་ལྔས་རྩེན་དང༌། འཕྲོག་མའི་བུ་ལྔ་བརྒྱ་དང་བཅས་པ་རྣམས་ཀྱིས་ཀྱང་སྨྲས་ཤིང་རྗེས་སུ་ཡི་རང་པའོ་ཞེས་བྱ་བ་ནི། གནོད་སྦྱིན་གྱི་སྡེ་དཔོན་ཆེན་པོ་ལྡས་རྩེན་དང༌། གནོད་སྦྱིན་མ་འཕྲོག་མ་དང་གཉིས་ཀྱི་བུ་འཕྲོག་མའི་བུ་ལྔ་བརྒྱ་སྟེ། དེ་རྣམས་ཀྱང་གཟི་བརྗིད་དང་སྟོབས་དང་ལྡན་ཏེ། ཁ་དོག་དང་གྲགས་པ་དང་ལྡན་པ་དེ་རྣམས་ཀྱིས་ཀྱང་རིག་སྔགས་ཀྱི་རྒྱལ་མོ་ལ་གུས་པར་བྱས་ཤིང་རྗེས་སུ་ཡི་རང་བའོ། །དེ་རྣམས་ཀྱི་ཁ་དོག་ནི། སེར་པོ་དང༌། གཡས་ན་དབྱུག་ཏོ་དང༌། མེ་ལོང་བསྣམས་པ། གཡོན་ན་ཞགས་པ་དང༌། ཨུཏྤལ་ལ་བསྣམས་པའོ། །དེ་རྣམས་ཀྱིས་ཀྱང་རིག་སྔགས་ལ་གུས་པར་བྱས་ཤིང༌། དེ་སེམས་ཅན་གྱི་དོན་བྱེད་པའོ། །ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་ཡང་ནས་ཡང་དུ་རྗེས་སུ་ཡི་རང་བའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ནི་ཞེས་བྱ་བ་ནི། ལྷའི་གདོན་ལ་སོགས་པ་བགེགས་རིགས་སྟོང་ཕྲག་བརྒྱད་ཅུས་ཀྱང་སྤྱི་བོའི་གཙུག་ཏུ་བཞག་ནས་རྗེས་སུ་ཡི་རང་བའོ། །རིག་སྔགས་ཀྱི་བཀའ་ལས་མི་འདའ་བའོ། །ལྷའི་གདོན་དང༌། ཀླུའི་གདོན་དང༌། རླུང་ལྷའི་གདོན་དང༌། ལྷ་མ་ཡིན་གྱི་གདོན་དང༌། ནམ་མཁའི་ལྡིང་གི་གདོན་དང་ཞེས་བྱ་བ་ནི། དེ་རྣམས་ཀྱིས་ཀྱང་རྒོལ་བར་མི་འགྱུར་ཞིང༌། རིག་སྔགས་ལ་རྗེས་སུ་ཡི་རང་ཞིང་བཀའ་ལས་མི་འདའ་བའོ། །དེ་རྣམས་ཀྱི་ཁ་དོག་ནི་སེར་པོ་དང༌། དཀར་པོ་དང༌། དམར་པོ་དང༌། སྔོན་
པོ་དང༌། སེར་པོའོ། །ཕྱག་རྣམས་ན་རྡོ་རྗེ་དང༌། སྦྲུལ་ཞགས་དང་རལ་གྲི་དང་བ་དན་དང༌། སྤྲུལ་བསྣམས་པའོ། །ཀླུའི་གདོན་ནི་རོ་སྨད་སྦྲུལ་དུ་འདུག་པ། ལྷ་མ་ཡིན་གྱི་གདོན་ནི་ཁྲོ་བོར་གནས་པ། ནམ་མཁའ་ལྡིང་གི་གདོན་ནི་བྱའི་གཟུགས་སོ། །གཞན་མ་ཡང་ལྷའི་ཆ་བྱང་དུ་ཡོད་བའོ། །དྲི་ཟའི་གདོན་དང༌། མི་འམ་ཅིའི་གདོན་དང༌། ལྟོ་འཕྱེ་ཆེན་པོའི་གདོན་དང༌། གནོད་སྦྱིན་གྱི་གདོན་དང༌། སྲིན་པོའི་གདོན་དང༌། ཡི་དགས་ཀྱི་གདོན་དང་ཞེས་བྱ་བ་ནི། དེ་རྣམས་ཀྱིས་ཀྱང་རིག་སྔགས་ལ་རྗེས་སུ་ཡི་རང་སྟེ། དེ་རྣམས་ཀྱི་ཁ་དོག་ནི་དཀར་པོ་དང༌། སེར་པོ་དང༌། སྔོ་སྐྱ་དང༌། ནག་པོ་དང༌། དམར་པོ་དང༌། ཐལ་བའི་མདོག་གོ །དེ་རྣམས་ཀྱི་ཕྱག་མཚན་ནི། པི་ཝང་དང༌། གླིང་བུ་དང༌། ཆ་ལང་དང༌། བུམ་པ་དང༌། རལ་གྲི་དང༌། ཐོད་པ་བསྣམས་པའོ། །མི་འམ་ཅི་དང༌། ལྟོ་འཕྱེ་ནི། རྟའི་མགོ་དང༌། སྤྲུལ་གྱི་མགོ་དང༌། ཡི་དགས་ཀྱི་གདོན་ནི། ཤ་རྣམས་སྐམ་ཞིང་འཇིགས་པའི་ཆ་བྱད་དོ། །གནོད་སྦྱིན་དང་སྲིན་པོ་ནི་ཁྲོ་བོར་གནས་སོ། །དྲི་ཟའི་གདོན་ནི་ལྷའི་ཆ་བྱད་དོ། །ཤ་ཟའི་གདོན་དང་འབྱུང་པོའི་གདོན་དང༌། གྲུལ་བུམ་གྱི་གདོན་དང༌། སྲུལ་པོའི་གདོན་དང༌། ལུས་སྲུལ་པོའི་གདོན་དང་ཞེས་བྱ་བ་ནི། དེ་རྣམས་ཀྱིས་ཀྱང་རིག་སྔགས་ཀྱི་རྒྱལ་མོ་ལ་རྗེས་སུ་ཡི་རང་ཞིང༌། བཀའ་ལས་མི་འདའ་བའོ། །དེ་རྣམས་ཀྱི་ཁ་དོག་ནི། དམར་ནག་གི་མདོག་དང༌། སྔོ་སྐྱ་དང༌། མཐིང་ག་དང༌། དམར་པོ་དང༌། སེར་པོའོ། །ཕྱག་རྣམས་ན། སྦྲུལ་ཞགས་དང༌། ཐོད་པ་དང༌། དབྱུག་ཏོ་དང༌། ཞགས་པ་དང༌། ཕྲེང་བ་བསྣམས་པའོ། །དེ་རྣམས་ཀྱི་གདོང་ནི་ཕྱི་བ་དང༌། བྱི་བ་དང༌། ཕ་ཝང་དང། ཕག་དང༌། ཡང་ཕག་པ་དང་ངོ༌། །སྐེམ་བྱེད་ཀྱི་གདོན་དང༌། སྨྱོ་བྱེད་ཀྱི་གདོན་དང༌། གྲིབ་གནོན་གྱི་གདོན་དང༌། བརྗེད་བྱེད་ཀྱི་གདོན་དང༌། གནོན་པོའི་གདོན་དང་ཞེས་བྱ་བ་ནི། གདོན་དེ་རྣམས་ལ་སོགས་པ། གདོན་རྣམས་ཀྱིས་ཀྱང་རིག་སྔགས་ཀྱི་བཀའ་ལས་མི་འདའ་བའོ། །དེ་རྣམས་ཀྱི་ཁ་དོག་ནི། དམར་པོ་དང༌། སེར་པོ་དང༌། མཐིང་ག་དང༌། ལྗང་གུ་དང༌། ཐལ་བའོ། །དེ་རྣམས་ཀྱི་ཕྱག་ན་རྒྱུ་ཞགས་དང༌། སྙིང་དང༌། ཐོད་པ་དང༌། གྲི་གུག་དང༌། དབྱུག་ཏོ་དང་དོ། །དེ་རྣམས་ཀྱི་གདོང་པ་ནི། ཁྱི་དང་སྤྱང་ཀི་དང༌། ཕོ་རོག་དང༌། རའི་གདོང་ཅན་ནོ། །གདོན་ཐམས་ཅད་ཀྱིས་འགལ་བར་
བྱ་བ་མ་ཡིན་པའོ་ཞེས་བྱ་བ་ནི། གདོན་རིགས་སྟོང་ཕྲག་བརྒྱད་དུ་ཅུ་པོ་དེ་རྣམས་ཀྱིས་ཀྱང་རིག་སྔགས་ཀྱི་བཀའ་ལས་འགལ་བར་མི་ནུས་པའོ། །གཟི་བརྗིད་འཕྲོག་པ་རྣམས་དང༌། ཟས་སུ་མངལ་ཟ་བ་རྣམས་དང༌། ཟས་སུ་སྲོག་འཕྲོག་པ་རྣམས་དང༌། ཟས་སུ་གཏོར་མ་ཟ་བ་རྣམས་དང༌། ཟས་སུ་ཤ་ཟ་བ་རྣམས་དང༌། ཟས་སུ་ཁྲག་འཐུང་བ་རྣམས་དང༌། ཟས་སུ་ཞག་ཟ་བ་རྣམས་དང༌། ཟས་སུ་ཚིལ་ཟ་བ་རྣམས་དང༌། ཟས་སུ་རྐང་ཟ་བ་རྣམས་དང༌། ཟས་སུ་བཙས་པ་ཟ་བ་རྣམས་དང་ཞེས་བྱ་བ་ནི། དེ་ཡང་ཟས་ཀྱི་རིགས་མི་མཐུན་པ་ཟ་བ་མི་སྲུན་པ་རྣམས་ཡིན་ཏེ། དེ་རྣམས་ཀྱིས་ཀྱང་རིག་སྔགས་ཀྱི་རྒྱལ་མོ་ལ་འཆོ་བར་མི་ནུས་པའོ། །དེ་རྣམས་ཀྱི་གཟུགས་ནི་དྲེད་མོའི་གཟུགས་དང༌། ཁྱིའི་གཟུགས་དང༌། སེང་གེའི་གཟུགས་དང༌། སྟག་གི་གཟུགས་དང༌། སྤྱང་ཀིའི་གཟུགས་དང༌། སྲེ་མོའི་གཟུགས་དང༌། བྱི་བའི་གཟུགས་དང༌། བྱི་ལའི་གཟུགས་དང༌། འཕྱི་བའི་གཟུགས་དང༌། རའི་གཟུགས་དང༌། ལུག་གི་གཟུགས་དང་ངོ༌། །ཟས་སུ་དྲི་ཟ་བ་རྣམས་དང༌། ཟས་སུ་མེ་ཏོག་ཟ་བ་རྣམས་དང༌། ཟས་སུ་འབྲས་བུ་ཟ་བ་རྣམས་དང༌། ཟས་སུ་ལོ་ཏོག་ཟ་བ་རྣམས་དང༌། ཟས་སུ་བསྲེག་བྱ་ཟ་བ་རྣམས་དང༌། ཟས་སུ་རྣག་འཐུང་བ་རྣམས་དང༌། ཟས་སུ་ཕྱི་ས་ཟ་བ་རྣམས་དང༌། ཟས་སུ་གཅིན་འཐུང་བ་རྣམས་དང༌། ཟས་སུ་མཆིལ་མ་ཟ་བ་རྣམས་དང༌། ཟས་སུ་ངར་སྣབས་ཟ་བ་རྣམས་དང༌། ཟས་སུ་སྣབས་ཟ་བ་རྣམས་དང༌། ཟས་སུ་ལྷག་མ་ཟ་བ་རྣམས་དང༌། ཟས་སུ་སྐྱུག་པ་ཟ་བ་རྣམས་དང༌། ཟས་སུ་མི་གཙང་བ་ཟ་བ་རྣམས་དང༌། ཟས་སུ་གཏོར་ཁུངས་ནས་འབབ་པ་འཐུང་བ་རྣམས་དང་ཞེས་བྱ་བ་ནི། གདོན་དེ་རྣམས་ཀྱང་སྣ་ཚོགས་ཀྱི་གཟུགས་ཀྱིས་སྣང་ཞིང༌། མི་སྲུན་པ་རྣམས་ཡིན་ཏེ། དེ་རྣམས་ཀྱིས་ཀྱང་རིག་སྔགས་ཀྱི་བཀའ་ལས་འདའ་བར་མི་ནུས་པའོ། །དེ་རྣམས་ཀྱི་གཟུགས་ཀྱང་མ་ཧེ་དང༌། གླང་པོ་ཆེ་དང་གླང་དང་རྔ་མོ་དང༌། ཤ་བ་དང༌། བོང་བུ་དང༌། བྱ་རོག་དང༌། འུག་པ་དང༌། རྨ་བྱ་དང༌། ཁྲུང་ཁྲུང་དང༌། དེ་པོ་དང༌། ཀྱ་ཀ་དང༌། བྱ་རྒོད་དང༌། བྱ་ཀང་ཀའི་གཟུགས་སོ། །དེ་རྣམས་ནི་ཤིན་ཏུ་མི་སྲུན་པ་མགོ་བརྙན་གྱི་གཟུགས་སུ་ཡོད་པ་དང༌། འགལ་བར་བྱ་བ་མ་ཡིན་པ་ཞེས་བྱ་བ་ནི། ཟས་སུ་ཟ་བ་དེ་རྣམས་ཀྱིས་ཀྱང༌། རིག་སྔགས་ཀྱིས་གནོད་པར་
མི་ནུས་ཤིང༌། རིག་སྔགས་ལ་གུས་པར་བྱས་པའོ། །གཤེད་བྱེད་ལ་སོགས་པ་དང་ཞེས་བྱ་བ་ནི། ལས་བཅུ་བཞི་ཡོད་དེ། ཉེས་པ་དེ་རྣམས་ཀྱིས་རིག་སྔགས་ཀྱི་གཟི་བརྗིད་ཀྱིས་ཉེས་པ་མི་ནུས་པའོ། །རིམས་ཉིན་གཅིག་པ་དང་ཞེས་བྱ་བ་ལ་སོགས་པ་ནི། རིམས་ཀྱི་ནད་མི་གཅིག་པ་བཅོ་ལྔ་ཡོད་དེ། རིག་སྔགས་ཀྱི་ནུས་པས། རིམས་དེ་རྣམས་ཀྱིས་ཀྱང་མི་ཚུགས་པའོ། །རླུང་ལས་གྱུར་པ་དང་ཞེས་བྱ་བ་ལ་སོགས་པ་ནི། །རླུང་ལ་ནད་བཞི་བརྒྱ་རྩ་བཞིའོ། །མཁྲིས་པ་ལ་ནད་བཞི་བརྒྱ་རྩ་བཞིའོ། །བད་ཀན་ལས་གྱུར་བ་ནད་བཞི་བརྒྱ་རྩ་བཞི་སྟེ། དེ་གསུམ་འདུས་པས་ན་འདུས་པའི་ནད་དོ། །དེ་གཉིས་གཉིས་དང་ལྡན་པས་ན་ལྡན་པའོ། །དེ་ལྟ་བུའི་ནད་འཇིགས་པ་ཅན་གྱིས་ཀྱང༌། རིག་སྔགས་ཀྱི་གཟི་བརྗིད་ཀྱིས་འོང་བར་མི་ནུས་སོ། །རིམས་ནད་ཐམས་ཅད་ཀྱིས་འགལ་བར་བྱ་བ་མ་ཡིན་པའོ་ཞེས་བྱ་བ་ནི། རིམས་ཀྱི་ནད་དེ་རྣམས་ཀྱིས་ཀྱང༌། རིག་སྔགས་ཀྱི་བཀའ་ལས་མི་འདའ་ཞིང༌། ནད་དེ་རྣམས་ཀྱིས་མི་ཚུགས་པའོ། །གླད་པ་ན་བ་དང་ཞེས་བྱ་བ་ལ་སོགས་པ་ནི། རླུང་དང་མཁྲིས་པ་བད་ཀན་གསུམ་གྱིས་ཡན་ལག་དང་ཉིང་ལག་ཐམས་ཅད་ན་བ་སྟེ། ནད་དེ་ཡང་བཞི་བཅུ་རྩ་བཞི་ཡོད་དེ། ནད་དེ་རྣམས་ཀྱིས་ཀྱང་མི་ཚུགས་ཤིང་བདེ་བར་གནས་པའོ། །ཤུ་བ་དང་ཞེས་བྱ་བ་ལ་སོགས་པ་ནི། ས་བདག་གི་ནད་རིགས་མི་གཅིག་པ་བཅོ་བརྒྱད་ཡིན་ཏེ། ཤུ་བ་ལ་སོགས་པའི་ནད་ཀྱིས་མི་ཚུགས་པའོ། །ནད་ཐམས་ཅད་དང་ཞེས་བྱ་བ་ནི། ནད་རིགས་མི་གཅིག་པ་བཞི་བརྒྱ་རྩ་བཞིས་མི་ཚུགས་པའོ། །དུག་ནད་ཐམས་ཅད་དང་ཞེས་བྱ་བ་ལ་སོགས་པ་ནི། ཕྱིའི་དུག་དང་ནང་གི་དུག་དྲུག་གོ །དུག་དེ་རྣམས་ཀྱིས་མི་ཚུགས་སོ། །སྡང་བ་ཐམས་ཅད་དང་ཞེས་བྱ་བ་ནི། ལས་ཀྱི་རྣམ་པར་སྨིན་པས། སེམས་ཅན་རྣམས་ཀྱི་སྡང་བས་ཏེ། དེའི་འཇིགས་པ་ལས་ཐར་པའོ། །འཇིགས་པ་ཐམས་ཅད་དང་ཞེས་བྱ་བ་ནི། དུས་མ་ཡིན་བར་འཆི་བའི་འཇིགས་པ་བརྒྱད་དོ། །ཡམས་ཀྱི་ནད་ཐམས་ཅད་དང་ཞེས་བྱ་བ་ནི། ཡམས་ནད་དེ་ནི་འོག་བའི་ནད་ཡིན་ཏེ། ནད་དེས་ཀྱང་མི་ཚུགས་པའོ། །འཐབ་པ་དང་རྩོད་པ་དང་ཞེས་བྱ་བ་ནི། གཞན་ཡང་དགྲ་བོ་རྣམས་དང༌། ཉེ་བ་ལ་སོགས་པ་
འཐབ་པ་རྣམས་ཀྱི་འཇིགས་པས་ཀྱང་མི་ཚུགས་པའོ། །གནོད་བ་དང་ཞེས་བྱ་བ་ནི། འབྱུང་པོ་དང༌། རྒྱལ་པོ་ལ་སོགས་པའི་གནོད་པས་མི་ཚུགས་པའོ། །ནད་འོག་བ་དང༌། འཁྲུག་པ་ཐམས་ཅད་ཀྱི་འགལ་བར་བྱ་བ་མ་ཡིན་ནོ་ཞེས་བྱ་བ་ནི། རིག་སྔགས་འདི་ཡི་གཟི་བརྗིད་ཀྱིས། །ནད་དེ་རྐྱེན་དེ་རྣམས་ཀྱིས་མི་ཚུགས་བའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལས། ཕན་ཡོན་བསྟན་པའི་གནས་སྐབས་ཏེ་ཉི་ཤུ་རྩ་བཞི་པའོ།། །།ཀུན་དགའ་བོ་ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་གྱིས་བཀའ་སྩལ་པའོ། །གང་ཞིག་གིས་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་བདག་བསྲུང་བ་བྱས་སམ་ཞེས་བྱ་བ་ནི། འདི་ལ་གུས་པར་བྱས་ནས་འཆང་བ་དང༌། བསྒོམ་པ་དང༌། རྒྱ་ཆེར་སྤེལ་བ་དང༌། རྗེས་སུ་ཡི་རང་བ་དང༌། སྔགས་ཀྱི་ཚིག་གཅིག་གཉིས་བརྗོད་པ་དང༌། དཀྱིལ་འཁོར་རྒྱ་ཆེར་བྲི་བ་དང༌། བསྲུང་བ་བྲིས་ནས་བཏགས་ན། འཇིགས་པ་ཐམས་ཅད་དང་བྲལ་བར་འགྱུར་རོ། །གང་ཞིག་གིས་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ལས་འགལ་བར་བྱས་ན། ལག་ན་རྡོ་རྗེས་དེའི་མགོ་བོ་ཚལ་བ་བདུན་དུ་འགེམས་པར་འགྱུར་རོ། །སངས་རྒྱས་དང་བྱང་ཆུབ་སེམས་དཔའ་དང༌། རང་སངས་རྒྱས་དང༌། ཉན་ཐོས་ཐམས་ཅད་ཀྱི་གཟི་བརྗིད་ཀྱིས། དེའི་སྣང་བ་མ་རུངས་པར་འགྱུར་རོ། །སེམས་མ་རུངས་པར་འགྱུར་རོ། །འཕགས་པའི་གང་ཟག་རྣམས་བསླུས་པར་འགྱུར་རོ། །རྒྱལ་པོ་ཆེན་པོ་བཞི་པོ་དག་གིས་ཀྱང༌། གཤུར་ཞེས་བྱ་བ་ལ་ཐུག་པའི་བར་གྱི་གསང་སྔགས་ཀྱིས་དེ་ལ་སྡུག་བསྔལ་ཆེན་པོ་བྱེད་པར་འགྱུར་རོ། །ལྷ་རྣམས་ཀྱི་དབང་པོ་བརྒྱ་བྱིན་ཡང་སུམ་ཅུ་རྩ་གསུམ་པའི་ཚོགས་ཀྱིས་བསྐོར་ཏེ། རྡོ་རྗེས་དེའི་མགོ་འགེམས་པར་འགྱུར་རོ། །ཚངས་པའི་གཟི་བརྗིད་ཀྱིས་ཀྱང་དེའི་འབྱོར་བ་ཐལ་བར་རློག་པར་འགྱུར་རོ། །དཀྱིལ་འཁོར་དང་སྲུང་བའི་བྱེ་བྲག་གང་ཞེ་ན། འདི་ལྟ་སྟེ། འོག་ཏུ་བལྟ་བའོ། །དང་པོ་ས་ནི་བརྟག་པར་བྱ། །གཉིས་པ་ས་བླང་ཆོ་ག་བཤད། །གསུམ་པ་ས་ནི་ཡོངས་བཟུང་བ། །བཞི་བ་ས་ནི་སྦྱོང་བར་བྱ། །ལྔ་པ་ས་ནི་བྱིན་རླབས་བྱ། །དྲུག་པ་ས་ནི་གདུལ་བར་བྱ། །དེ་དག་ནི་སའི་ཆོ་གའི་བྱེ་བྲག་གོ །དེ་ཡང་རིགས་གྱི་སྙིང་པོ་དང༌། སའི་སྔགས་ཀྱིས་བྱིན་རླ་བས་
བྱའོ། །ས་གཞི་བཟང་པོའི་དཀྱིལ་འཁོར་ལ། །དྲི་དང་རྣམ་ལྔ་བསྲེས་པའི་ཆུས། །དཀྱིལ་འཁོར་ལ་ནི་བྱུག་པར་བྱ། །སྟ་གོན་ལ་སོགས་ཆོ་ག་ནི། །སྔོན་དུ་འགྲོ་བ་གང་ཡིན་པ། །རྡོ་རྗེ་སློབ་དཔོན་བཀའ་དྲིན་གྱིས། །སྔོན་འགྲོ་ཆོ་ག་ཡང་དག་ཤེས། །བཅུ་གསུམ་མམ་ནི་ཡང་ན་དགུ། །ལྔ་དང་གཅིག་ལས་གང་ཡིན་པ། །བུམ་པའི་མཚན་ཉིད་བརྟག་པར་བྱ། །གསེར་རམ་དངུལ་ལམ་ཟངས་ལས་བྱས། །རྫ་ལ་སོགས་པ་གང་ཡོད་ལ། །གསུས་པ་ཆེ་ལ་མགྲིན་པ་རིང༌། །མཆུ་འཕྱང་ནག་པོ་ར་རི་མེད། །དེ་བཞིན་མཚན་དང་ལྡན་པ་ལ། །རིག་པ་མཚན་མ་བྲི་བར་བྱ། །རྨ་བྱའི་སྒྲོ་དང་རིགས་ལྔའི་མཚན། །དེ་རྣམས་ལ་ནི་ཡང་དག་བྲི། །གུ་གུལ་ཨ་ག་རུ་ལ་སོགས། །དུད་པས་ཡང་ནི་བདུག་པར་བྱ། །དྲི་ཆུ་དང་ནི་ཆུ་རྣམས་ཀྱིས། །བུམ་པ་ལ་ནི་ཡང་དག་དགང༌། །མར་རམ་ཞོ་འམ་སྦྲང་རྩིའམ། །བུ་རམ་ཀ་ར་འོ་མ་དང༌། །དེ་རྣམས་ཀྱིས་ནི་དགང་བར་བྱ། །མུ་ཏིག་མུ་མེན་བྱི་རུ་དང༌། །གསེར་དང་དངུལ་ནི་གཞུག་པར་བྱ། །འབྲས་སམ་ཏིལ་ལམ་མ་ཤ་འམ། །གྲོ་འམ་ནས་སམ་ཡང་དག་བླུགས། །མཚན་མ་ལེགས་པའི་བུམ་པ་ལ། །དར་རམ་རས་སམ་མ་ཉམས་པས། །བུམ་པའི་མགུལ་ནི་ཡང་དག་བཅིངས། །ཙནྡན་དང་ནི་གུར་ཀུམ་དང༌། །གླ་རྩི་ཆུ་དང་ག་བུར་དང༌། །ཏུ་རུ་སྐ་ནི་དྲི་དང་ལྡན། །དེས་ནི་བུམ་པ་དགང་བར་བྱ། །བལ་པོ་ཤིང་དང་ཨུ་དུམྺཱར། །བརྟ་དཔལ་ཤིང་ཁ་དའི་ཤིང༌། །བྱང་ཆུབ་ཤིང་ནི་སྣ་ལྔས་ནི། །དེ་ཡི་ལོ་མས་མཛེས་པར་བརྒྱན། །དར་དང་རྒྱལ་མཚན་གདུགས་དང་ནི། །རིན་ཆེན་ཕྲེང་དང་མེ་ཏོག་ཕྲེང༌། །བཀྲ་ཤིས་བརྒྱད་དང་མེ་ལོང་དང༌། །བུམ་པ་ལ་ནི་ཡང་དག་བརྒྱན། །རྡོ་རྗེ་སློབ་དཔོན་ཡང་དག་གིས། །དམ་ཚིག་སེམས་དང་ཡེ་ཤེས་སེམས། །བུམ་པ་ལ་ནི་ཡང་དག་གཞུག །རྡོ་རྗེ་སློབ་དཔོན་མཚན་ཉིད་ནི། །ཤེས་རབ་དང་ནི་སྙིང་རྗེ་ལྡན། །བྲི་བའི་ལས་ལ་མཁས་པ་དང༌། །མི་ཁེངས་གཤིས་ནི་བཟང་བ་དང༌། །དམ་ཚིག་ལ་སོགས་བསྲུང་བ་དང༌། །གུས་པར་སངས་རྒྱས་དཀོན་མཆོག་གསུམ། །སེམས་ཅན་མཉམ་པ་ཉིད་བསྒོམ་པ། །སློབ་མ་དག་ནི་སྐྱོང་བྱེད་པ། །སློབ་དཔོན་ལ་ནི་དེ་དང་ལྡན། །སློབ་དཔོན་དགེ་སློང་ལྟ་བུ་ལ། །ཚུལ་ཁྲིམས་
ཡང་དག་སྲུང་བྱེད་པ། །དེ་བཞིན་བཟོད་པ་བརྩོན་འགྲུས་ལྡན། །ལུས་ནི་ལེགས་པར་ཁྲུས་བྱས་ནས། །ཙནྡན་ལ་སོགས་ཆུ་ལ་བཀྲུ། །དེ་བཞིན་ལུས་དང་ངག་དང་ནི། །ཡིད་ཀྱིས་རྡོ་རྗེ་ཡང་དག་བཀྲུ། །དེ་བཞིན་རྡོ་རྗེ་སློབ་དཔོན་གྱིས། །དང་པོའི་ལས་ལ་ཡང་དག་འཇུག །བུམ་པ་ལྷག་པའི་ཆོ་ག་དང༌། །རྡོ་རྗེ་སློབ་དཔོན་གྱི་མཚན་ཉིད་བརྟག་པའོ། །རས་སམ་དར་རམ་སྐུད་པ་ནི། །རྒྱལ་པོ་བུ་མོ་རྗེའུ་རིགས་ནི། །དེ་བཞིན་བྲམ་ཟེའི་བུ་མོ་ལ། །དེ་ལ་སོགས་པ་གཞན་དག་ཀྱང༌། །ལོ་གྲངས་བརྒྱད་ནི་ལོན་པ་ལ། །ཐིག་སྐུད་ཡང་དག་བསྒྲིལ་བར་བྱ། །ཨོཾ་བཛྲ་སཱུ་ཏྲ་ཧཱུཾ་ཕཊ་ཅེས་བྱ་བར་བྱིན་གྱིས་བརླབ་པར་བྱའོ། །སློབ་དཔོན་ཤར་བལྟ་སློབ་མ་ནུབ། །དེ་བཞིན་སློབ་དཔོན་བྱང་དུ་སྟེ། སློབ་མ་ལྷོ་ཕྱོགས་བལྟ་བ་སྟེ། །རིམ་བཞིན་ཤར་ལྷོ་ནུབ་བྱང་དང༌། །བྱང་ཤར་མཚམས་དང་ལྷོ་ནུབ་དང༌། །ནམ་མཁའི་ཐིག་ནི་གདབ་པར་བྱ། །ཨོཾ་བཛྲ་རེ་ཁེ་ཧཱུཾ་ཕཊ་སྭཱ་ཧཱ། དཀྱིལ་འཁོར་ས་གཞི་བཟང་པོ་ལ། །ཐིག་ནི་ཡང་དག་གདབ་པར་བྱ། །ཐིག་ནི་ཆ་ཆེན་བཅུ་དྲུག་གདབ། །དེ་ཡི་ལོག་པོ་སུམ་ཅུ་གཉིས། །དབུས་ཀྱི་ཆ་ཆེན་དང་པོ་ལ། །པདྨའི་ལྟེ་བར་ཤེས་པར་བྱ། །གཉིས་པའི་ཆ་ནི་པདྨར་གྲགས། །ཕྱི་རིམ་ཆ་ནི་བཞི་ཆ་ལ། །མུ་ཁྱུད་རྡོ་རྗེར་བར་ཤེས། །ལྷག་མའི་ཆ་ནི་སུམ་ཆ་དང༌། །དེ་ཕྱིར་ཕྱེད་དང་ལྡན་པ་ལ། །འཁོར་ལོའི་ཆ་ནི་ཡང་དག་ཡིན། །དེ་ཕྱིར་ཕྱེད་ན་ཆ་ཡོད་པ། །ནང་གི་ལྷ་རྣམས་ཤེས་པར་བྱ། །ཆ་ཆེན་ལྔ་པོ་སྣང་བ་ནི། །ནང་གི་ལྷ་རྣམས་ཡང་དག་ཡིན། །དེ་ཕྱིར་ཆ་གཉིས་ཡོད་པ་ལ། །ནང་གི་སྒོ་ནི་ཡང་དག་ཤེས། །ཕྱི་རིམ་ཆ་ནི་དགུ་སྣང་བ། །བར་གྱི་ལྷ་རྣམས་ཡིན་པ་སྟེ། །བཅུ་དང་བཅུ་གཅིག་སྣང་བ་ནི། །བར་མའི་སྒོར་ནི་ཡང་དག་ཤེས། །བཅུ་གཉིས་སྣང་བའི་ཆ་ཆེན་ལ། །ཕྱི་ཡི་ལྷ་རྣམས་ཡིན་པ་ལ། །དེ་ཕྱིར་ཆ་ཆེན་ཕྱེད་དང་གསུམ། །ཕྱི་ཡི་སྒོར་ནི་ཡང་དག་གྲགས། །དེ་ཕྱིར་ཕྱེད་དང་གཉིས་ཡོད་པ། །རྟ་བབས་སུ་ནི་ཤེས་པར་བྱ། །དེ་ཕྱིར་པདྨ་རྡོ་རྗེ་དང༌། །མེ་རི་མཁས་པས་ཕྱི་ནས་བཙལ། །ཞེས་གསུངས་སོ།། ཆ་ཆེན་གཅིག་སྒོར་ཤེས་པ་ལ། །དེ་ཡི་ལོགས་ནི་སུམ་ཆ་དག །དེ་ཡི་ལོགས་ནི་ཆ་ཆུང་གཅིག །དེ་ཡི་ཕྱི་རིམ་ཆ་ཆེན་ལ། །སུམ་ཆ་གཅིག་ནི་ནང་གི་ཆ། །སུམ་ཆ་གཉིས་ནི་ཀ་བར་ཤེས། །རིན་ཆེན་པཉྫ་ར་ག་དང༌། །ད་རུ་སྐ་དང་གསུམ་པོ་ནི། །ཆ་ཆུང་གསུམ་ནི་མཉམ་པར་བྱ། །འདོད་པའི་
ལྷ་རྣམས་དྲ་བ་དང༌། །དེ་གཉིས་ཆ་ནི་མཉམ་པའོ། །ཆ་ནི་སུམ་ཆ་གཉིས་གཉིས་ཏེ། །ནང་དང་ཕྱི་དང་སྒོ་རུ་ཡང༌། །མཁས་པས་དེ་བཞིན་ཤེས་པར་བྱ། །ཐིག་གི་ཆོ་ག་གསུངས་པའོ། །རིན་ཆེན་དངུལ་དང་བཻརླུཪྻ་། །གསེར་དང་པདྨ་རཱ་ག་དང༌། །དེ་བཞིན་ཨིནྡྲ་ནཱི་ལ་དང༌། །དེ་བཞིན་རིགས་ལྔའི་ངོ་བོ་འདི། །དེ་ནི་རིན་ཆེན་ཕྱེ་མར་གྲགས། །རིག་སྔགས་སྙིང་པོ་རིགས་ལྔའམ། །དེ་ཡི་སྔགས་ཀྱིས་བྱིན་རླབས་བྱ། །ཨོཾ་ཏྲཱཾ་ཧྲིཿ་ཁཾ་ཧཱུཾ། ཨོཾ་མ་ཧཱ་མཱ་ཡཱུ་རཱི་ཡེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དེས་མཚོན་ཆ་རྣམས་བྱིན་གྱིས་བརླབ་པར་བྱའོ། །དབུས་སུ་པདྨའི་ལྟེ་བལ། །ཟླ་བའི་གདན་ནི་ཤེས་པར་བྱ། །དེ་སྟེང་རིན་ཆེན་དེ་བཞིན་རིགས། །རིག་སྔགས་རྨ་བྱ་དེར་གནས་པ། །ཤར་དང་ལྷོ་དང་ནུབ་དང་ནི། །བྱང་གི་ཕྱོགས་དང་རིམ་བཞིན་དུ། །དམར་པོ་སེར་པོ་དཀར་པོ་དང༌། །སེར་པོ་དེ་ནི་བྱང་ན་གནས། །པདྨ་བཞི་པོ་དེ་བཞིན་ཤེས། །ཤར་ལྷོ་དང་ནི་ནུབ་བྱང་དང༌། །མཐིང་གའི་མདོག་ཏུ་ཤེས་པར་བྱ། །ལྷོ་ནུབ་བྱང་ཤར་མཚམས་སུ་ནི། །ལྗང་གུ་ཨིནྡྲ་ནཱི་ལའི་མདོག །རིན་ཆེན་རྡོ་རྗེའི་རིགས་དང་ནི། །དེ་བཞིན་རིན་ཆེན་རིན་ཆེན་རིགས། །རིན་ཆེན་པདྨ་རིགས་དང་ནི། །དེ་བཞིན་རིན་ཆེན་ལས་ཀྱི་རིགས། །ཤར་ཕྱོགས་རིམ་པ་དེ་བཞིན་དུ། །ལྷ་མོ་བཞི་པོ་དགོད་པར་བྱ། །མེ་ཏོག་སྤོས་དང་དྲི་དང་ནི། །མར་མེ་དང་ནི་བཞི་པོ་དང༌། །ཤར་ལྷོ་མཚམས་ན་དགོད་པར་བྱ། །ཕྱི་རིམ་མུ་ཁྱུད་ར་བ་ལ། །རྡོ་རྗེ་ར་བར་ཤེས་པར་བྱ། །དེ་ཕྱིར་འཁོར་ལོ་རྩིབས་བརྒྱད་ལ། །བཞི་པོ་རྩིབས་ནི་ཕྱོགས་དང་མཐུན། །ཟུར་གྱི་འཁོར་ལོའི་རྩིབས་བཞི་ནི། ཕྱོགས་བཞིར་ཕྱེད་ཕྱེད་སྣང་བའོ། །དེ་ཕྱིར་མུ་ཁྱུད་ཟླུམ་པོ་ལ། །རྡོ་རྗེ་ར་བས་བསྐོར་བར་བྱ། །ཉི་མ་ཟླ་བ་གཟའ་ཆེན་དགུ། །ཤར་ལ་སོགས་པའི་གོ་རིམས་བཞིན། །འཁོར་ལོའི་རྩིབས་ལ་དགོད་པར་བྱ། །དེ་ཕྱིར་ལྷ་རྣམས་གྲུབ་བཞི་ནི། །ཁ་དོག་དམར་པོས་རྣམ་པར་བརྒྱན། །ལྷ་རྣམས་ཟུར་བཞིར་གནས་པ་ནི། །པི་ཝང་གླིང་བུ་གར་མཁན་མ། །དེ་བཞིན་གླུ་མ་ཤེས་པར་བྱ། །ཤར་དང་ལྷོ་དང་ནུབ་དང་བྱང་གི་ཕྱོགས། །ལྷ་རྣམས་སྒོ་དང་དེ་བཞིན་དུ། །གསེར་དང་དངུལ་དང་པདྨ་རཱ་ག་དང༌། །དེ་བཞིན་ཨི་ནྡྲ་ནཱི་ལར་ཤེས་པར་བྱ། །ལྷ་རྣམས་སྒོ་དང་བཞི་པོ་ལ། །རྒྱུ་སྐར་རིམ་བཞིན་ཤེས་
བར་བྱ། །གྲུ་བཞི་པ་ལ་སྒོ་བཞི་པ། །ཏྭ་ར་བཞིས་རྣམ་པར་བརྒྱན། །པཉྩ་རཱ་ག་ལྔ་པོ་ལ། །དཀར་དང་ནག་དང་སེར་དང་ནི། །དམར་དང་ལྗང་གུ་ལྔ་སྣང་བ། །དེ་བཞིན་གཤེས་པ་ལྔའི་ངོ་བོ། །འོད་ནི་སྣང་བ་ལྔར་ཤེས་སོ། །འདོད་པའི་རིན་ཆེན་ཕ་གུ་དང༌། །འདོད་ཆགས་དང་ནི་སེར་སྣ་དང༌། ཕྲག་དོག་ད་རུ་ཁར་ནི་རྣམ་པར་གྲགས། །ཏྭ་ར་ན་བཞིས་སྣང་བ་ནི། །མཛེས་མཚོན་དུ་ནི་ཤེས་པར་བྱ། །ཕྱི་དང་ནང་དང་བར་སྒོ་དང༌། །ནང་སྒོ་ཇི་བཞིན་མཁས་པས་ཤེས། །མུ་ཏིག་དྲ་བ་དྲ་ཕྱེད་དང༌། །རྩིག་པའི་ལོགས་ལ་བརྒྱན་པར་བྱ། །ཆོས་ཀྱི་འཁོར་ལོ་རི་དགས་དང༌། །རྟ་བབས་སྟེང་དུ་གནས་པའོ། །གདུགས་དང་བ་དན་རྒྱལ་མཚན་དང༌། །གཞལ་ཡས་ཁང་གི་སྟེང་ན་གནས། །མཛེས་ཤིང་བལྟ་ན་སྡུག་པ་སྟེ། །གཞལ་ཡས་ཁང་དུ་རྣམ་པར་གྲགས། །དཀྱིལ་འཁོར་ལྷ་དགོད་ཅིང་ཚོན་དགྱེ་བའི་རིམ་པའོ།། །།བར་སྒོ་ལ་ནི་གནས་པའི་ལྷ། །ཕྱོགས་སྐྱོང་བཅུ་རུ་ཤེས་པར་བྱ། །སྒོ་བ་བཞི་ལ་གནས་པ་ནི། །རྒྱལ་པོ་བཞིར་ནི་རབ་ཏུ་གྲགས། །ཕྱི་རོལ་ལྷ་རྣམས་སྒོ་དང་ནི། །སྔར་བཤད་ཀླུ་རྒྱལ་རིགས་བརྒྱད་གནས། །རྡོ་རྗེ་སློབ་དཔོན་མཁས་པ་ཡིས། །དཀྱིལ་འཁོར་ལྷ་བཀོད་རིམ་བཞིན་ཤེས། །བཀྲ་ཤིས་མཚན་དང་བཀྲ་ཤིས་རྫས། །བཀྲ་ཤིས་རྟགས་དང་གསུམ་པ་དེས། །ཕྱི་ནང་བར་སྒོ་རིམ་པ་གསུམ། །དེ་ཡི་འགྲམ་ལ་དགོད་པར་བྱ། །བསྲུང་བ་ཡན་ལག་བརྒྱད་དང་ནི། །གཏོར་མའི་རིམ་པ་གཞན་ལས་ཤེས། །དམ་ཚིག་སེམས་དང་ཡེ་ཤེས་སེམས། །རིམ་བཞིན་དཀྱིལ་འཁོར་ལྟ་ལ་ཐིམ། །ཨརྒྷ་ལ་སོགས་པཱུ་ཛ་རྣམས། །རིམ་བཞིན་མཁས་པས་དབུལ་བར་བྱ། །མདོ་དང་བཟླས་པ་སྒོམ་པ་གསུམ། །ཐུན་མཚམས་གཏོར་མ་གཏང་བར་བྱ། །མདོ་ནི་རྒྱན་མི་འཆད་འདོན། །དེ་བཞིན་ཆོ་ག་བྱས་ནས་སུ། །སྡུག་བསྔལ་ཐམས་ཅད་ཟད་པར་འགྱུར། །རིམས་དང་ནད་རྣམས་བྱུང་བ་དང༌། །མཇེ་དང་ཕོལ་མིག་དེ་བཞིན་ཏེ། །གཞན་ཡང་ནད་རྣམས་ཐམས་ཅད་ཀུན། །བསྒྱུར་བའི་ཚུལ་ལ་སོགས་པ་ཀུན། །ལས་དང་ཤེས་བྱ་བག་ཆགས་ཀུན། །འབྱུང་པོ་ལ་སོགས་ན་བ་དང༌། །གང་དག་སྡིག་པ་བྱེད་པ་དང༌། །སྡིག་པ་ཐམས་ཅད་འདིས་འཇོམས་སོ། །གལ་ཏེ་དེ་ལས་འགལ་འགྱུར་ན། །སྔར་བཤད་རྡོ་རྗེ་སྙིང་པོ་སོགས། །དེ་རྣམས་ཀྱིས་ནི་ཆད་པ་གཅོད། །རིད་
སྔགས་འདི་ནི་ཡང་དག་གྲགས། །སྡུག་བསྔལ་ཐམས་ཅད་འཇོམས་བྱེད་པ། །འདི་ཡི་ཡོན་ཏན་ཡིན་པར་གྲགས། །དཀྱིལ་འཁོར་གྱི་བྱ་ཐབས་རིམ་པའོ།། །།སྐུད་བ་བཏགས་ན་ཞེས་བྱ་བ་ནི། བསང་བའི་རིམ་པ་ཡིན་ཏེ། དེ་ཡང་རས་སམ་དར་རམ་དེ་ལ་སོགས་པ་གང་ཡང་རུང༌། མདུད་པ་བརྒྱ་རྩ་བརྒྱད་བོར་ལ་ལུས་རྡོ་རྗེས་བསྲུང་བར་བྱའོ། །ཡང་ན་རས་སམ་དར་རམ་ཤིང་ཤུན་ལ་སོགས་པ་ལ་གུར་ཀུམ་དང་གི་ཝང་གིས་ར་ས་སམ་ཤིང་ཤུན་ལ་བྲི་བའོ། །འཁོར་ལོ་རིམ་པ་བཅུ་གཉིས་བྲིས་ལ། ཆ་གཉིས་ལ་པདྨའི་རབ་དང༌། འཁོར་ལོ་བྲིའོ། །དེའི་ཕྱི་རིམ་ཆ་གཉིས་ལ། རིན་ཆེན་རྡོ་རྗེ་དང་ཕྱག་མཚན་གྱིས་དགོད་པར་བྱའོ། །རིག་སྔགས་ཀྱི་སྙིང་པོ་ལྔ་ལ། འཁོར་ལོ་རིམ་པ་བཞིན་དུ་དགོད་པར་བྱའོ། །འཁོར་ལོ་དེ་བཞིན་དུ་བྲིས་ནས་ལུས་ལ་གདགས་སོ། །དེ་བཞིན་དུ་བཏགས་པར་གྱུར་ན། ནད་དང་སྡུག་བསྔལ་ཐམས་ཅད་དང༌། སྡིག་པ་ཐམས་ཅད་ལས་ཐར་བར་འགྱུར་རོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལས། དཀྱིལ་འཁོར་དང་སྲུང་བ་བྱེད་པའི་གནས་སྐབས་ཏེ་ཉི་ཤུ་རྩ་ལྔ་པའོ།། །།དེ་བསད་པའི་རིགས་པ་ནི་ཆད་པས་བྲལ་བར་འགྱུར་རོ་ཞེས་བྱ་བ་ནི། རིག་སྔགས་འདི་ཡི་བྱིན་རླབས་ཀྱིས། །གསད་པར་འདོད་པའི་སེམས་ཅན་ཡང༌། སྙིང་རྗེ་དང་ལྡན་པར་འགྱུར་ཏེ། ཆད་པ་དེ་ལས་ཐར་པར་འགྱུར་རོ། །ཆད་པས་གཅད་པའི་རིགས་པས་ནི་གཞུ་བཙོག་པས་སོ་ཞེས་བྱ་བ་ནི། ཆད་པས་གཅད་པར་འདོད་པའི་སེམས་ནི། སེམས་དེ་དང་མི་ལྡན་ཏེ། ཆད་པ་ལས་བྲལ་བར་འགྱུར་རོ། །གཞུ་བཙོག་པའི་རིགས་པ་ནི་བརྒྱད་བཀག་པས་སོ་ཞེས་བྱ་བ་ནི། སེམས་ཅན་ཁ་ཅིག་གནོད་པ་སྐྱེལ་བར་འདོད་དེ། གཞན་གྱིས་བཀག་ནས་གནོད་པ་སྐྱེལ་བར་མི་ནུས་སོ། །བརྒྱད་བཀག་པའི་རིགས་པ་ནི་དམ་བཅས་པའི་རིགས་པས་སོ་ཞེས་བྱ་བ་ནི། རིག་སྔགས་འདིའི་ནུས་པས། དེ་ལྟ་བུའི་སྡུག་བསྔལ་དང་བྲལ་ཏེ། གནོད་པར་བྱེད་པ་རྣམས་བཀག་སྟེ། དམ་བཅའ་བའི་རིགས་པས་ནི་སྤུ་ཟིང་ཞེས་བྱེད་པས་སོ་ཞེས་བྱ་བ་ནི། རིག་སྔགས་ཀྱི་ནུས་པ་དེས་ཀྱང་དམ་བཤིག་ནས་སོ་སོར་གནས་སོ། །སྤུ་ཟིང་ཞེས་བྱ་བའི་རིགས་པ་
ནི། དེ་བཞིན་དུ་ཐར་བར་འགྱུར་རོ་ཞེས་བྱ་བ་ནི། སོ་སོར་གནས་པ་དེ་ནི། དངོས་པོར་མི་གནས་ཤིང་ཞིག་པར་འགྱུར་རོ། །དེ་ལ་རྒྱལ་པོའི་འཇིགས་པ་འབྱུང་བར་མི་འགྱུར་རོ་ཞེས་བྱ་བ་ནི། རྒྱལ་པོའི་ཆད་པ་ནོར་དང་སྲོག་ལས་ཐར་རོ། །ཆོམ་རྐུན་གྱི་འཇིགས་པ་མི་འབྱུང་ཞེས་བྱ་བ་ནི་ཆོམ་རྐུན་པ་རྣམས་ཀྱིས་ཀྱང་རྐུ་བའི་སེམས་གཏང་བ་དེ་ཡང༌། སེམས་ལ་མི་འཇོག་ཅིང་འཇིགས་པ་དང་བྲལ་བར་འགྱུར་རོ། །མེའི་འཇིགས་པ་མི་འབྱུང་ངོ་ཞེས་བྱ་བ་ནི། མ་རུངས་པའི་མེའི་འཇིགས་པ་དེ་ཡང་རིག་སྔགས་འདི་འཆད་པར་འགྱུར་ན། འཇིགས་པ་དེ་དང་བྲལ་བར་འགྱུར་རོ། །ཆུས་འཆི་བའི་དུས་བྱེད་པར་མི་འགྱུར་རོ་ཞེས་བྱ་བ་ནི། གློ་བུར་གྱི་ནད་ཆུས་འཇིགས་པར་ཡང་མི་འགྱུར་ཏེ། གྲུ་དང་རབ་ལས་མྱུར་དུ་རྒལ་བའོ། །དེའི་ལུས་ལ་དུག་གིས་མི་ཚུགས་ཏེ་ཞེས་བྱ་བ་ནི། དུག་གསུམ་གྱིས་མི་ཚུགས་ཤིང་རྡོ་རྗེའི་ཕུང་པོ་ལྟ་བུའོ། །མཚོན་གྱིས་མ་ཡིན་ནོ་ཞེས་བྱ་བ་ནི། འཁྲུག་པའི་དབུས་སུ་བསྡད་ན་ཡང་མཚོན་རྣམས་ཀྱིས་མི་ཚུགས་ཏེ། དེ་བཞིན་དུ་གློ་བུར་གྱི་མཚོན་གྱིས་ཀྱང་མི་ཚུགས་སོ། །བདེ་བར་གཉིད་ཀྱིས་ལོག་ཅིང་བདེ་བར་སད་པར་འགྱུར་རོ་ཞེས་བྱ་བ་ནི། རྨི་ལམ་ངན་པ་དང༌། ལྟས་ངན་པ་དང༌། ཆགས་ཆེ་བ་དང༌། མཚན་མ་ངན་པ་རྣམས་ལོག་པ་སྟེ། ཉལ་བ་ན་ཡང་བདེ་བ་ལ་སད་པ་ན་ཡང་བདེ་བའོ། །བདེ་བ་དང༌། གནོད་པ་མེད་པ་དང༌། འཇིགས་པ་མེད་པར་འགྱུར་རོ་ཞེས་བྱ་བ་ནི། ཚེ་ད་ལྟར་དང་ཚེ་ཕྱི་མ་ཡང་དེ་བཞིན་ཏེ་ནམ་སྐྱེས་པའི་དུས་སུ་ཡང༌། འཇིགས་པ་དེ་དང་བྲལ་ཞིང་བདེ་བར་གནས་པའོ། །ཕྱིར་རྒོལ་བ་བཅོམ་པ་དང་ཞེས་བྱ་བ་ནི། སྔགས་དང༌། སྤོད་གཏོང་གཏང་བ་དང༌། སྔགས་དང་གཤིན་རྗེའི་སྔགས་ཀྱི་ནུས་པ་དང༌། མངོན་སྤྱོད་ཀྱི་ལས་ལ་སོགས་པ་བཏང་བ་རྣམས་འཇོམས་པའོ། །དགྲ་ཆོམས་པར་འགྱུར་རོ་ཞེས་བྱ་བ་ནི། དགྲ་བོ་སྡང་བ་རྣམས་འཇོམས་ཏེ། དེའི་འཇིགས་པས་མི་ཚུགས་ཤིང༌། དགྲ་རྣམས་བདེ་བར་འགྱུར་རོ། །རྨས་པ་མེད་པར་འགྱུར་རོ་ཞེས་བྱ་བ་ནི། དེའི་ཡོན་ཏན་གྱི་ནུས་པས། རིག་པའི་གནས་ལྔ་ལ་མཁས་ཤིང༌། དགེ་བའི་བཤེས་གཉེན་ནམ། འཁོར་ལོས་སྒྱུར་བའི་རྒྱལ་པོའམ། ས་བཅུའི་བྱང་ཆུབ་སེམས་དཔའ་ཐོབ་ཅིང༌། སེམས་ཅན་རྣམས་ཀྱི་དོན་
བྱེད་པའོ། །ཡང་ན་འདིའི་ཟིལ་གྱིས་ཐམས་ཅད་གནོན་པའོ། །འཇིགས་པ་ཐམས་ཅད་ལས་ཐར་བར་འགྱུར་རོ་ཞེས་བྱ་བ་ནི། འཁོར་བའི་འཇིགས་པ་དང༌། ད་ལྟར་གྱི་རྐྱེན་གྱི་འཇིགས་པ་དང༌། དེ་ལ་སོགས་པའི་འཇིགས་པ་ཐམས་ཅད་ལས་ཐར་བའོ། །བདེ་བར་ཡུན་དུ་ཡང་འཚོ་བར་འགྱུར་ཏེ་ཞེས་བྱ་བ་ནི། ནད་མེད་པ་ཚེ་རིང་བ་བཟའ་བ་དང་བཏུང་བ་ནུས་ཤིང༌། མྱ་ངན་གྱི་སྡུག་བསྔལ་ལས་ཐར་པར་འགྱུར་རོ། །ཀུན་དགའ་བོ་ཞེས་བྱ་བ་ནི། ཡང་དག་བར་རྫོགས་པའི་སངས་རྒྱས་ཀྱིས་བཀའ་སྩལ་པའོ། །སྔོན་གྱི་ལས་ཀྱི་རྣམ་པར་སྨིན་པ་ནི་མ་གཏོགས་སོ་ཞེས་བྱ་བ་ནི། ཟག་པ་བཞག་པ་སྟེ། ད་ལྟར་བྱས་པ་ད་ལྟར་མ་སྦྱངས་ན་སང་ཕོད་སྨེན་ལྡང་བའོ། །དཔེར་ན་གང་བཞིན་ཞེ་ན། དགྲ་ཐུ་བོའི་བུ་ལས་པ་བཞིན་དུའོ། །དེ་ཡང་ལས་རྣམ་པར་སྨིན་པའི་མདོ་ལས་ཀྱང་གསུངས་པ་ཟག་པ་གཞག་པ་ནི། ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀྱང་མི་ནུས་ཤིང་རང་གི་ལས་ཀྱི་རྣམ་པ་ལས་བྱུང་བའོ། །ལས་རྣམ་པར་འཇོམས་པའི་མདོ་ལས་ཤེས་པར་བྱའོ། །ངས་ཀྱང་སྨྲས་བ། སྐྱེས་མ་ཐག་ཏུ་ལྟོགས་པར་སྣང༌། །སྐྱེས་ནས་ལོ་བཅུ་ལོན་བ་ན། །གཞན་གྱིས་བཟུང་ཞིང་སྡུག་བསྔལ་ཐོབ། །དེ་གྲོལ་རྒྱ་མཚོའི་ནང་ནས་ཤིང༌། །འདི་ནི་ཡང་ན་སྡུག་བསྔལ་ཐོབ། །དེ་བཞིན་ལས་ཀྱི་སྨིན་པ་ནི། །མི་འགྱུར་མི་སྲིད་བརྟན་པའོ། །ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་གསུངས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ནི། ཧ་ཅང་ཆར་ཆེ་བ་འམ། ཆར་དཀོན་པའི་ཚེ་བཀླག་པར་བྱའོ་ཞེས་བྱ་བ་ནི། འདི་ནི་སྔ་མ་བཞིན་དུ་དཀྱིལ་འཁོར་ལ་སོགས་པ་བྱས་ནས། རིའི་རྩེ་མོ་འམ་ཆུ་མིག་གི་འགྲམ་མམ། མཚོའི་འགྲམ་ལ་སོགས་བར་ཀླགས་པར་གྱུར་ན། ཆར་ཆུང་ན་ཆར་འབེབས་ཤིང་ཆར་ཆེས་ན་ཆར་གཅོད་པར་འགྱུར་རོ། །དེས་ན་ཀླུ་ཐམས་ཅད་སྤྲོ་བར་འགྱུར་ཏེ་ཞེས་བྱ་བ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ཀླགས་པ་ཙམ་གྱིས། དེ་ན་གནས་པའི་ཀླུ་རྣམས་དགའ་བ། ཀླུ་དེ་རྣམས་ཀྱང་སྡུག་བསྔལ་དང་བྲལ་བར་འགྱུར་རོ། །ཆར་ཆེ་ན་ནི་གཅོད་པར་བྱེད། ཆར་དཀོན་ན་ནི་འབེབས་སོ་ཞེས་བྱ་བ་ནི། དེ་ན་གནས་
པའི་ཀླུ་རྣམས་ནི་དགའ་བར་འགྱུར་བའི་ཕྱིར་ན། དུས་དུས་སུ་ཆར་འབེབས་ཤིང་དུས་དུས་སུ་ལོ་ཏོག་སྨིན་པ། སའི་དཀྱིལ་འཁོར་དེར་མུ་གེས་མི་ཚུགས་སོ། །དེ་བ་ས་ན་རིགས་ཀྱི་བུ་འམ་རིགས་ཀྱི་བུ་མོ་དེའི་བསམ་པ་ཇི་སྲིད་པར་ཆར་འབེབས་པར་འགྱུར་རོ་ཞེས་བྱ་བ་ནི། རིག་སྔགས་ཀྱི་རྒྱལ་མོ་འདིའི་གཟི་བརྗིད་ཀྱིས། ཆར་ཆེ་བ་ཡང་མི་འབྱུང་ལ། ཧ་ཅང་ཆར་ཆུང་བར་ཡང་མི་འགྱུར་ཏེ། དེ་བས་ན་རིག་སྔགས་ཀྱི་རྒྱལ་མོ་འདི་ལ་གུས་པར་བྱས་པར་གྱུར་ན། དངོས་གྲུབ་གང་ཡང་འགྲུབ་པར་འགྱུར་རོ། །ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་གསུངས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་དྲན་པས་ཀྱང་འཇིགས་པ་དང་དགྲ་ཐམས་ཅད་ཞི་བར་འགྱུར་ན། སུས་དུམ་བུར་མ་གྱུར་ཅིང་རྫོགས་པར་བཅངས་པ་འམ། བདེ་ལེགས་སུ་འགྱུར་བར་བྱས་བལྟ་སྨོས་ཀྱང་ཅི་དགོས་ཞེས་བྱ་བ་ནི། ཆོས་འདི་ལ་ཚར་བརྒྱ་རྩ་བརྒྱད་དམ། ཚར་ལྔ་དྲུག་གམ་གཅིག་གམ། རྒྱུན་མི་འཆད་པར་འདོད་ན། དེ་དང་དེའི་འཇིགས་པ་མི་འབྱུང་སྟེ། དེ་བཞིན་དུ་བསྒོམ་པ་དང་བཟླས་པ་བྱས་པར་གྱུར་ན་ཡང་ཚེ་འདི་ལ་ཡང་བདེ་བར་འགྱུར་ཏེ། ཚེ་ཕྱི་མ་ལ་ཡང་བདེའོ། །དེ་བས་ན་ཆོས་འདི་ལ་མི་འཆད་པ་འམ་འཕྲོ་གཅད་པར་མི་བྱ་སྟེ། ཡི་གེ་གཅིག་ཀྱང་མ་ནོར་བར་བྲི་བ་དང་བཀླག་པར་བྱའོ། །ཀུན་དགའ་བོ་ཁྱོད་ཀྱིས་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་གསུངས་པའོ། །ཁྱོད་ཀྱིས་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ཟུང་ཤིག་ཅེས་བྱ་བ་ནི། ལུས་ངག་ཡིད་ཀྱིས་གུས་པར་གཟུང་ཞིང་གཞན་རྣམས་ལ་རྒྱ་ཆེར་སྤེལ་བའོ། །ཀུན་དགའ་བོས་བཟུང་བའི་རིག་སྔགས་ནི། ཞལ་གཅིག་ཕྱག་གཉིས་པ། སྐུ་མདོག་ལྗང་གུ་ལས་ཀྱི་རིགས་ལ་གཏོགས་པ་སྤྱན་གསུམ་པ། རིགས་ལྔའི་དབུ་རྒྱན་ཅན་དབུ་ལ་རྡོ་རྗེས་མཚན་པ། ཕྱག་གཡས་ན་རལ་གྲི་།གཡོན་ན་རྨ་བྱའི་སྒྲོ་བསྣམས་པའོ། །ཡན་ལག་ཐམས་ཅད་སྦྲུལ་གྱིས་བརྒྱན་པ། གཡས་བརྐྱང་པ། གཡོན་བསྐུམ་པ། ཐབས་ཤེས་རབ་གཉིས་སུ་མེད་པ། ཉི་མའི་གདན་ལ་ཉི་མའི་འོད་དང་ལྡན་པའོ། །འཁོར་བཞི་པོ་ཞེས་བྱ་བ་ལ་སོགས་པ་ནི། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་བསྟན་པ་བསྲུང་བའི་རིག་སྔགས་འདིས་ཀྱང་སྲུང་
བ་དང་སྐྱོབ་པར་འགྱུར་རོ། །ཏ་དྱ་ཐཱ་ཞེས་བྱ་བ་ནི་འདི་ལྟ་སྟེ། རིག་སྔགས་ཀྱི་ལས་ཀྱི་སྙིང་པོ་བལྟ་བའོ། །རིག་སྔགས་ཀྱི་གསང་སྔགས་ནི། ཡ་བནྟི་ལ་སོགས་པའོ། །འདོད་ཆགས་ཞེ་སྡང་གཏི་མུག་རྣམས། །འདི་དག་འཇིག་རྟེན་དུག་གསུམ་སྟེ། ཞེས་བྱ་བ་ནི་འདོད་པའི་དབང་གིས་ཞེ་སྡང་སྐྱེས་སོ། །ཞེ་སྡང་དྲག་པོ་དེས་འཇིག་རྟེན་གྱི་ཁམས་གཏི་མུག་ཏུ་མཐོང་ངོ༌། །དེ་ནི་མ་རིག་པའི་རང་བཞིན་ཏེ། མ་རིག་པ་དེས་འཁོར་བའི་སྡུག་བསྔལ་ལས་མི་ཐར་བའོ། །འཁོར་བ་འཁོར་བའི་སྡུག་བསྔལ་ནི། ཡང་ནས་ཡང་དུ་འཁོར་བར་ལྷུང་སྟེ། བྱོལ་སོང་ཡི་དགས་དམྱལ་བའི་སྡུག་བསྔལ་ལོ། །དེ་གསུམ་ལ་ཡང་ཕྱིའི་དུག་གསུམ་བཅོམ་པའོ། །དེ་བས་ན་འཇིག་རྟེན་གྱི་དུག་གསུམ་བཅོམ་པའོ། །སངས་རྒྱས་བཅོམ་ལྡན་དུག་མེད་པ། །སངས་རྒྱས་བདེན་པས་དུག་བཅོམ་མོ། །ཞེས་བྱ་བ་ནི། གཞན་ཕྱིའི་དུག་གསུམ་ནི། སངས་རྒྱས་ཀྱི་གཟི་བརྗིད་ཀྱིས་དུག་བཅོམ་མོ། །རིག་སྔགས་འདིས་ཀྱང་ངེས་པར་བཅོམ་མོ། །ནང་གི་འཇིག་རྟེན་དུག་གསུམ་ནི་གཞན་གྱིས་འཇོམས་མི་ནུས་སོ། །རང་རང་གི་འོད་གསལ་གྱི་ཡེ་ཤེས་ཀྱིས། རང་རང་ལས་བྱུང་བའི་གཏི་མུག་གི་རང་བཞིན་དུག་གསུམ་བཅོམ་མོ། །འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །ཞེས་བྱ་བ་ནི། འཇིག་རྟེན་ལས་གྲགས་པའི་དུག་ནི། །གསུམ་ཡིན་ཏེ། དུག་གསུམ་པོ་དེས་སྡུག་བསྔལ་དྲག་པོ་མྱོང་བར་བྱེད་པའོ། །བཅོམ་ལྡན་ཆོས་ནི་དུག་མེད་པ། །ཆོས་ཀྱི་བདེན་པས་དུག་བཅོམ་མོ། །ཞེས་བྱ་བ་ནི། ཕྱིའི་དུག་གསུམ་པོ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོས་ཀྱང་བཅོམ་ཏེ། ནང་གི་དུག་གསུམ་ནི་རང་རང་གིས་གཞོམ་པ་མ་ཡིན་པ། གཞན་གྱིས་གཞོམ་མི་ནུས་པ། དེ་བས་ན་ནང་གི་དུག་ཅེས་བྱའོ། །འདོད་ཆགས་ཞེ་སྡང་གཏི་མུག་རྣམས། །འདི་དག་འཇིག་རྟེན་དུག་གསུམ་སྟེ། །ཞེས་བྱ་བ་ནི་ནང་གི་དུག་གསུམ་ནི། བལྟས་ན་མི་སྣང་སྟེ། སྤྱད་ན་འབྲས་བུ་འབྱུང་ཞིང་སྡུག་བསྔལ་གྱི་ཕུད་པོ། འདོད་ཆགས་ཀྱིས་ཞེ་སྡང༌། ཞེ་སྡང་གིས་གཏི་མུག །གཏི་མུག་གིས་སེར་སྣ། སེར་སྣས་ཕྲག་དོག་གོ །དེའི་འབྲས་བུ་ངན་སོང་གསུམ་དུ་ཡང་ནས་ཡང་དུ་འགྲོ་བའོ། །དེ་བས་ན་ནང་གི་དུག་གསུམ་སྤང་བར་བྱའོ། །བཅོམ་
ལྡན་དགེ་འདུན་དུག་མེད་པ། །དགེ་འདུན་བདེན་པས་དུག་བཅོམ་མོ། །ཞེས་བྱ་བ་ནི། ཕྱིའི་དུག་ནི་འགྲོ་བ་དང༌། མི་འགྲོ་བ། སྦྱོར་བ་དང་གསུམ་ཡིན་ཏེ། འགྲོ་བ་ནི་བསམ་པ་མཐོང་བ་རེག་པ་ཁ་རླངས་སོ། །མི་འགྲོ་བ་ནི་བཙན་དུག་བོད་དུག་ར་དུག་ལ་སོགས་པའོ། །བྱེད་པའི་དུག་ནི་སྦྲང་རྩི་དང་མར་ལས་བྱུང་བ་ཞིན་དུ་སྦྱོར་བ་ལས་བྱུང་བའོ། །དུག་དེ་གསུམ་པོ་ནི། འཇིག་རྟེན་ན་ཕྱིའི་དུག་གསུམ་སྟེ། དེའི་དུག་ནི་དགེ་འདུན་གྱི་གཟི་བརྗིད་ཀྱིས་བཅོམ་པའོ། །ནང་གི་དུག་གསུམ་ནི། གཞན་གྱིས་འཇོམས་མི་ནུས་ཤིང༌། རང་རང་གི་ཡེ་ཤེས་ཀྱིས་འཇོམས་པའོ། །ནང་གི་ཡེ་ཤེས་ནི་ཡང་དག་པར་རྫོགས་པའི་སངས་རྒྱས་ཀྱི་ངོ་བོ། བླ་མའི་གདམས་ངག་གིས་བཅོམ་པའོ། །སངས་རྒྱས་ཀུན་གྱི་སྟོབས་གང་དང༌། །དགྲ་བཅོམ་རྣམས་ཀྱི་གྲགས་པ་དང༌། །ཞེས་བྱ་བ་ནི། འདས་པ་དང་མ་འོངས་པ་དང༌། ད་ལྟར་བཞུགས་པའི་སངས་རྒྱས་རྣམས་ཀྱིས་གཟི་བརྗིད་དང་སྟོབས་ཀྱིས་དུག་བཅོམ་མོ། །དེ་བཞིན་དུ་ཤཱ་རིའི་བུ་ལ་སོགས་པའི་སྟོབས་དང་གཟི་བརྗིད་ཀྱིས་དུག་བཅོམ་པའོ། །དེ་བཞིན་གཤེགས་ཀྱི་གཟི་བརྗིད་ཀྱིས། །ཞེས་བྱ་བ་ནི་དེ་བཞིན་གཤེགས་པ་ཡང་འདས་པ་དང་མ་འོངས་པ་དང་ད་ལྟར་ཡོད་པ་སྟེ། བྱེ་བ་ཁྲག་ཁྲིག་བརྒྱ་སྟོང་འབུམ་ཕྲག་གི་དེ་བཞིན་གཤེགས་པ་རྣམས་ཀྱི་གཟི་བརྗིད་ཀྱིས་དུག་བཅོམ་མོ། །ངས་ནི་བདེ་ལེགས་འགྱུར་བར་བྱ། །ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཤཱཀྱ་སེང་གེས་དགེ་སློང་ས་རིའི་དོན་ལ་སྟོང་གསུམ་གྱི་སྟོང་གི་འཇིག་རྟེན་གྱི་ཁམས་ཀྱི་སེམས་ཅན་རྣམས་ཀྱི་དོན་ལ་བདེ་བར་བྱས་པའོ། །ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་བཀའ་སྩལ་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོས་དུག་བཅོམ་མོ་ཞེས་བྱ་བ་ནི། སྔོད་པའི་དུག་དང༌། འགྲོ་བའི་དུག་དང༌། བྱེད་པའི་དུག་གསུམ་བཅོམ་ཞིང་དེ་བཞིན་དུ་ནང་གི་དུག་གསུམ་བཅོམ་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལས། ནང་གི་དུག་གསུམ་བཤད་པའི་གནས་སྐབས་ཏེ་ཉི་ཤུ་རྩ་དྲུག་པའོ།། །།དགེ་སློང་ས་རི་དགེ་བར་གྱུར་ཅིག་ཅེས་བྱ་བ་ནི། སངས་རྒྱས་ཤཱཀྱ་ཐུབ་པའི་བཀས། རིག་སྔགས་ཀྱི་གཟི་བརྗིད་ཀྱིས། དགེ་སློང་ས་རི་མཆེ་བའི་དུག་གིས་ཟིན་པ་བདེ་བའོ། །ཚེ་དང་ལྡན་པ་ཀུན་དགའ་
བོས་བཅོམ་ལྡན་འདས་ལ་ལེགས་སོ་ཞེས་གསོལ་ཏེ་བྱ་བ་ནི། དགེ་སློང་རི་ནི་མཆེ་བའི་དུག་གིས་ཟིན་ཅིང་དྲན་པ་མ་རྙེད་པར་ཡོད་པ། ལུས་ཀྱང་ཁ་དོག་འགྱུར་ཞིང་ཁ་ནས་དབུགས་ཀྱང་མི་ཐོན་པ། ཁ་ནས་དབུ་བ་འཛག་པ། ལུས་རེངས་ཤིང་མིག་དཀར་ལོག་གིས་སོང་བ་མཐོང་ནས། སྙིང་རྗེ་སྐྱེས་ནས་སངས་རྒྱས་ལ་དྲིས་པ་སྟེ། དེའི་ཐབས་བསྲུང་བའི་ཕྱིར་ན། སངས་རྒྱས་ལ་བདེ་ལེགས་ཕུལ་བའོ། །བཅོམ་ལྡན་འདས་ཀྱི་ལྟར་ཉན་ནས་ཞེས་བྱ་བ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་རིག་སྔགས་ཀྱི་གསང་སྔགས། སངས་རྒྱས་ཀྱིས་གསུངས་པ་བཞིན་དུ་ལུས་ངག་ཡིད་ཀྱིས་བཟུང་བའོ། །བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས། དགའ་བའི་སེམས་བྱས་ནས་སངས་རྒྱས་ཀྱི་བཀའ་ལ་ཉན་ནས། དགེ་སློང་ས་རིའི་དོན་དུ་རྐང་པ་ཕྱིར་བོར་ཏེ། དགེ་སློང་ས་རི་ལ་ཁ་བལྟས་པའོ། །དགེ་སློངས་རི་ལ་བ་དེར་སོང་སྟེ། ཕྱིན་པ་དང་ཞེས་བྱ་བ་ནི། ཡུལ་མཉན་ཡོད་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་རབ་ན། དགེ་འདུན་གྱི་བསྲོ་ཁང་བགྱི་བའི་སླད་དུ་ཤིང་གཤེགས་བས་ཤིང་རུལ་བའི་ས་ཁ་ན་དགེ་སློངས་རི་ནད་ཀྱིས་ཐེབས་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས། དགེ་སློང་ས་རི་ལ་ཆད་པ་སྤང་བ་བྱ་སྟེ་ཞེས་བྱ་བ་ནི། ཐོག་མ་དང་ཐ་མ་དང་ད་ལྟར་མེད་པའི་རང་བཞིན། རིག་སྔགས་ཀྱི་གཙོ་མོར་གྱུར་པ། ཐུགས་རྗེ་ཅན་གྱི་རིག་སྔགས་ཀྱི་གསང་སྔགས་ལ། ཀླུའི་ཁ་རླངས་ཀྱི་དུག་ལས་བྱུང་བ་མཆེ་བའི་དུག་གས་ཆད་པ་སྤང་བའོ། །ཡོངས་སུ་བསྐྱབ་པ་དང་ཞེས་བྱ་བ་ནི། དུག་ལས་སྐྱབས་ཏེ། གཞན་བར་ཆད་བྱུང་བ་ལ་ཡང་བསྐྱབ་པའོ། །ཡོངས་སུ་གཟུང་བ་དང་ཞེས་བྱ་བ་ནི། དུག་གི་བཟུང་བ་ལས་ཕྲལ་ཏེ། དུག་དེས་མི་ཚུགས་པའོ། །ཡོངས་སུ་བསྐྱང་བ་དང་ཞེས་བྱ་བ་ནི། དུག་དང་གཞན་གྱི་འཇིགས་པ་རྣམས་དང་ཕྲལ་ཏེ་བསྐྱང་བའོ། །ཞི་བ་དང་བདེ་ལེགས་སུ་འགྱུར་བ་དང་ཞེས་བྱ་བ་ནི། དུག་ནད་དེ་རྣམས་ལས་ཞི་བ་སྟེ། དེའི་ནད་ཀུན་བོར་ནས་ལུས་ཀྱི་ན་ཚ་མེད་པར་བདེ་བའོ། །ཆད་པ་སྤང་བ་དང་ཞེས་བྱ་བ་ནི། དུག་གི་ཆད་པ་སྦང་བའོ། །མཚོན་ཆ་སྤང་བ་དང་ཞེས་བྱ་བ་ནི། འབྱུང་པོ་རྣམས་ཀྱི་
མཚོན་ཆ་སྤང་པའི། །དུག་གཞིལ་བ་དང་ཞེས་བྱ་བ་ནི། མཆེ་བའི་དུག་གཞིལ་བའོ། །དུག་གསད་པ་དང་ཞེས་བྱ་བ་ནི། དུག་བྱུང་བ་གསད་བས་དུག་གཞན་འོང་བར་མི་ནུས་པའོ། །མཚམས་གཅད་པ་དང་ཞེས་བྱ་བ་ནི། རིག་སྔགས་ཀྱིས་གཞན་གྱི་བར་ཆོད་བྱུང་བ་ལས་བསྲུང་བའོ། །ས་བཅིང་བ་བྱས་ཏེ་ཞེས་བྱ་བ་ནི། དེ་བཞིན་དུ་ས་གཞི་ཡང་བསྲུང་བའོ། །ཚེ་དང་ལྡན་པ་ཀུན་དགའ་བོས་བསྲུང་བ་དང་ཞེས་བྱ་བ་ནི། བྱམས་པ་དང་སྙིང་རྗེའི་སྟོབས་ཀྱིས་དགེ་སློང་ས་རི་ལ་སངས་རྒྱས་ཀྱི་བཀའ་བཞིན་དུ་བསྲུང་བའོ། །བདེ་ལེགས་སུ་འགྱུར་བར་བྱས་པས་ཞེས་བྱ་བ་ནི། ཚེ་དང་ལྡན་པ་ཀུན་དགའ་བོས་དགེ་སློང་ས་རི་ལ། དུག་གི་ནད་ལས་བདེ་བར་བྱས་པའོ། །ཚེ་དང་ལྡན་པ་དགེ་སློང་ས་རི་ནད་དེ་ལས་སོས་སོ་ཞེས་བྱ་བ་ནི། ཚེ་དང་ལྡན་པ་དགེ་སློང་ས་རི་ལ་དུག་གི་ནད་ཀྱི་རྐྱེན་བྱུང་སྟེ། སངས་རྒྱས་ཀྱི་བཀའ་དང་རིག་སྔགས་ཀྱི་གཟི་བརྗིད་ཀྱིས་ཀུན་དགའ་བོའི་ལས་ཀྱིས་བདེ་བའོ། །དེ་ནས་ཚེ་དང་ལྡན་པ་ཀུན་དགའ་བོ་དང༌། ཚེ་དང་ལྡན་པ་དགེ་སློང་ས་རི་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་ཞེས་བྱ་བ་ནི། དེ་གཉིས་ནི་ལུས་ངག་ཡིད་བདེ་བ་སངས་རྒྱས་ཀྱི་ཐབས་བསམ་གྱིས་མི་ཁྱབ་ལ། ཡེ་ཤེས་དང་གཟི་བརྗིད་ཀྱང་དེ་བཞིན་ཏེ། ཆོས་དེའི་ནུས་པས་སེམས་ཅན་ཐམས་ཅད་ལ་བདེ་བའོ། །དེའི་ཕྱིན་ས་སངས་རྒྱས་ཀྱི་སྤྱིན་སྔར་ཕྱིན་པའོ། །བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཞེས་བྱ་བ་ནི། གུས་པར་བྱས་ནས་ལན་གསུམ་བསྐོར་བ་བྱས་ཏེ། མགོ་བོས་ཕྱག་འཚལ་བའོ། །ཇི་ལྟར་གྱུར་པ་ཐམས་ཅད་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་གནང་སྟེ། ཕྱོགས་གཅིག་ཏུ་འཁོད་དོ་ཞེས་བྱ་བ་ནི། མཆེ་བའི་དུག་གིས་ཟིན་པའི་ལོ་རྒྱུས་ནི། བཅོམ་ལྡན་འདས་ལ་ཞུ་བ་ཕུལ་ནས། ཀུན་དགའ་བོ་དང་དགེ་སློངས་རི་གཉིས། བཅོམ་ལྡན་འདས་ཀྱི་མདུན་དུ་འཁོད་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལས། དགེ་སློང་ས་རི་སྦྲུལ་ནག་པོས་ཟིན་པའི་གནས་སྐབས་ཞེས་བྱ་བ་སྟེ། ཉི་ཤུ་རྩ་བདུན་པའོ།། །།དེ་ནས་ཞེས་བྱ་བ་ནི། དགེ་སློང་ས་རི་བདེ་བའི་དེ་ནས་སོ། །བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ་ཞེས་བྱ་བ་ནི། སེམས་ཅན་གྱི་དོན་ལ་ཀུན་དགའ་བོ་ལ་ཡང་ནས་ཡང་དུ་བཀའ་སྩལ་བའོ། །ཀུན་དགའ་པོ་ཞེས་བྱ་བ་ནི། འཁོར་བཞི་དང་
སེམས་ཅན་གྱི་དོན་ལ་བཀའ་སྩལ་བའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་པོ་འདིའི་མཐུ་མཐོང་ངམ་ཞེས་བྱ་བ་ནི། སྡེ་སྣོད་བཞིའི་རང་བཞིན། ཀུན་བརྟགས་རྣམ་པར་དག་པ། ཐབས་ཤེས་རབ་གཉིས་སུ་མེད་པ། ན་མན་ཏྲའི་རང་བཞིན་སྒྱུ་མ་ལྟ་བུ་སྟེ། གཟི་བརྗིད་དང་སྟོབས་དང་མཐུ་དང་ལྡན་པ་སྟེ། ནམ་མཁའ་བཞིན་དུ་ཁྱབ་པ། སེམས་ཅན་རྣམས་ལ་གཉིས་སུ་མེད་པར་དོན་བྱེད་པའོ། །ཀུན་དགའ་བོས་བཅོམ་ལྡན་འདས་དེ་བཞིན་གསུངས་པ་དེ་ལ་ཕྱག་འཚལ་ནས་ཞེས་བྱ་བ་ནི། རིག་སྔགས་ཀྱི་མཚན་ཉིད་དེ་གསུངས་པས། མགུ་བའི་སེམས་ཀྱིས་ལུས་ངག་ཡིད་ཀྱིས་སངས་རྒྱས་ལ་མགོ་བོས་ཕྱག་འཚལ་ནས་ལན་གསུམ་བསྐོར་བ་བྱས་ནས། བཅོམ་ལྡན་འདས་ལ་ཞུ་བ་ཕུལ་བའོ། །འདི་སྐད་ཅེས་གསོལ་ཏོ་ཞེས་བྱ་བ་ནི། བཅོམ་ལྡན་འདས་ལ་ཀུན་དགའ་བོས་ཞུ་བ་ཕུལ་བའོ། །བཅོམ་ལྡན་འདས་ཅིའི་སླད་དུ་མ་འཚལ་ཞེས་བྱ་བ་ནི། རིག་སྔགས་ཀྱི་རྒྱལ་མོ་འདིའི་ནུས་པ་གང་ཞིག་ཡོད་ཅེས་པའོ། །བཅོམ་ལྡན་འདས་ཀྱིས་བཀའ་སྩལ་པ་ཞེས་བྱ་བ་ནི། སེམས་ཅན་གྱི་དོན་ལ་བཀའ་སྩལ་པའོ། །ཀུན་དགའ་བོ་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཀྱིས་གསུངས་པའོ། །འདི་ལྟར་རྒྱ་མཚོ་ཆེན་པོ་བཞི་ནི་སྐམ་ཡང་སྲིད་ཅེས་བྱ་བ་ནི། རྒྱ་མཚོ་ནི་ཐར་པ་མེད་ཅིང་རྒྱ་ཆེ་བ་སྟེ། དེ་ཡང་མེ་བདུན་གྱི་དུས་སུ་བསྐམས་ཏེ། དེ་ཡང་རྟག་པ་མེད་པའོ། །ས་ནི་ནམ་མཁའ་ལ་འཕར་ཡང་སྲིད་ཅེས་བྱ་བ་ནི། བསྐལ་པ་ཆེན་པོའི་དུས་སུ་བསྐལ་པའི་མེས་ས་རྣམས་བསྲེག་པའོ། །ཟླ་བ་དང་ཉི་མ་ནི་ས་ལ་ལྷུང་ཡང་སྲིད་ཅེས་བྱ་བ་ནི། ད་ལྟར་ཉི་མ་དང་ཟླ་བ་སྣང་བར་འགྱུར་ཏེ། དེའི་དུས་སུ་ཡང་ཉི་མ་དང་ཟླ་བ་གཉིས་མེས་བསྲེགས་ནས། ཉི་ཟླ་གཉིས་མི་སྣང་བར་འགྱུར་རོ། །ཀླུང་ནི་རྒྱུན་ནས་ལྡོག་ཀྱང་སྲིད་ཀྱི་ཞེས་བྱ་བ་ནི་རྐྱེན་གྱི་རང་བཞིན་གྱིས་ཀླུང་དེ་ཡང་མེད་པར་འགྱུར་ཏེ། དེ་བཞིན་དུ་ས་དང་རླུང་དང་མེ་དང་ཆུ་ལ་སོགས་པ། འཇིག་རྟེན་གྱི་ཁམས་ཀྱི་སྣང་བ་འདི་ཡང་མེད་པ་སྟེ། སྒྱུ་མ་དང་རྨི་ལམ་ལྟ་བུའི་རང་བཞིན་ནོ། །དེ་བཞིན་གཤེགས་པའི་བཀའ་ནི་གཞན་དུ་འགྱུར་མིས་རིད་དོ་ཞེས་བྱ་བ་ནི། འདས་པའི་སངས་རྒྱས་རྣམས་ནི་བསམ་གྱིས་མི་ཁྱབ་པའོ། །མ་འོངས་པ་རྣམས་ཀྱང་དེ་བཞིན་ཏེ། ད་ལྟར་ཤཱཀྱ་སེང་གེས་བསྟན་
བའི་བདེན་པ་འདི་བསྟན་པའོ། །དེ་ནས་ཞེས་བྱ་བ་ནི། བདེན་པའི་ཚིག་གི་དེ་ནས་སོ། །བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ་ཞེས་བྱ་བ་ནི། བཅོམ་ལྡན་འདས་ཀྱིས་ཡང་ནས་ཡང་དུ་གསུངས་པའོ། །ཀུན་དགའ་བོ་དེ་ལྟ་བས་ན་ཞེས་བྱ་བ་ནི། རིག་སྔགས་ཀྱི་རྒྱལ་མོའི་ཡོན་ཏན་ནི། བསམ་གྱིས་མི་ཁྱབ་ཅིང་བརྗོད་དུ་མེད་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ལ་ཞེས་བྱ་བ་ནི། ཐུགས་རྗེ་ཆེ་ཞིང་སེམས་ཅན་རྣམས་ཀྱི་དོན་བྱེད་པའོ། །འཁོར་བཞི་པོ་ཞེས་བྱ་བ་ནི། ཉེ་བའི་འཁོར་དང་ནང་གི་འཁོར་དང་ཕྱིའི་འཁོར་རྣམས་སོ། །ཉེ་བའི་འཁོར་ནི་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་བརྒྱད་ཅུ་རྩ་བཞིའོ། །ནང་གི་འཁོར་ནི་ཉན་ཐོས་དགྲ་བཅོམ་པ་ཉིས་བརྒྱ་ལྔ་བཅུ། དེ་ལ་སོགས་པ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའོ། །ཕྱིའི་འཁོར་ནི་ལྷ་དང་མི་ལ་སོགས་པའོ། །དགེ་སློང་མ་ཞེས་བྱ་བ་ལ་སོགས་པ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདིས་སྲུང་བ་དང་སྐྱོབ་པར་བྱེད་པའོ། །ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་ལེགས་སོ་ཞེས་གསོལ་ཏེ་ཞེས་བྱ་བ་ནི། ཀུན་དགའ་བོ། བཅོམ་ལྡན་འདས་ཀྱིས་བཀའ་སྩལ་པས། མགུ་ནས་ལེགས་སོ་ཞེས་ཞུ་བ་ཕུལ་བའོ། །བཅོམ་ལྡན་འདས་ཀྱི་ལྟར་མཉན་ནས་ཞེས་བྱ་བ་ནི། སྡུད་བ་པོ་ཀུན་དགའ་བོ་འཁོར་བཞི་ལ་བཀའ་སྩལ་པའོ། །འཁོར་བཞི་པོ་ཞེས་བྱ་བ་ནི། བྱང་ཆུབ་སེམས་དཔའ་རྡོ་རྗེ་སྙིང་པོ་ལ་སོགས་པ། བྱེ་བ་ཁྲག་ཁྲིག་འབུམ་ཕྲག་བརྒྱད་ཅུའོ། །ཤཱ་རིའི་བུ་ལ་སོགས་པ་ཉན་ཐོས་ཉིས་བརྒྱ་ལྔ་བཅུའོ། །དགེ་སློང་དང་ཞེས་བྱ་བ་ནི། དགེ་སློང་ས་རི་ལ་སོགས་པ། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བའི་དགེ་སློང་ཙམ་མོ། །དགེ་སློང་མ་དང་ཞེས་བྱ་བ་ནི། སྒྲ་གཅན་འཛིན་གྱི་མ་ཤཱཀྱ་འཛིན་ལ་སོགས་པ་བརྒྱ་བཅོ་བརྒྱད་དང་ངོ༌། །དགེ་བསྙེན་དང་ཞེས་བྱ་བ་ནི། ཚོང་དཔོན་མགོན་མེད་ལ་སོགས་པ་དགེ་བསྙེན་མང་པོའོ། །དགེ་བསྙེན་མ་རྣམས་ཀྱིས་རིག་སྔགས་ཀྱི་རྒྱལ་མོ་རྨ་བྱ་ཆེན་མོ་འདི་ལ་གུས་པར་བྱས་སོ་ཞེས་བྱ་བ་ནི། རྒྱ་ཆེར་སྤེལ་ལོ། །རྗེས་སུ་ཡི་རང་ངོ༌། །ཀློག་པར་བྱས་སོ། །འཆང་དུ་གཞུག་གོ །མཆོད་པར་བྱས་སོ། །བླ་མར་བྱས་སོ། །བསྒོམ་པར་བྱས་སོ། །དེ་བཞིན་དུ་དེའི་ཡོན་ཏན་གྱིས་སེམས་ཅན་ཐམས་ཅད་ནི་སྡུག་བསྔལ་ཐམས་ཅད་བྲལ་ཞིང་བདེ་
བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཞེས་བྱ་བ་ནི། རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་ཆོས་ཀུན་དགའ་བོ་ལ་གཏད་དོ་ཞེ་བྱ་བ་ནི། ཚེ་དང་ལྡན་བ་ཀུན་དགའ་བོ་དང་ཞེས་བྱ་བ་ནི། ཀུན་དགའ་བོ་ལ་སོགས་པ་ཉན་ཐོས་ཉིས་བརྒྱ་ལྔ་བཅུའོ། །ཚེ་དང་ལྡན་པས་རི་དང་ཞེས་བྱ་བ་ནི་དེ་བཞིན་ཉན་ཐོས་ལ་སོགས་པའོ། །ལྷ་དང་ཞེས་བྱ་བ་ནི་ལྷའི་དབང་པོ་ལ་སོགས་པ་གཟུགས་ཁམས་དང་འདོད་པའི་ཁམས་ཀྱི་ལྷ་རྣམས་དུ་མ་འདུས་པའོ། །མི་དང་ཞེས་བྱ་བ་ནི་མིའི་རྒྱལ་པོ་མ་སྐྱེས་དགྲ་ལ་སོགས་པའོ། །དུ་མ་གནས་པའི་ལྷ་མ་ཡིན་དང་ཞེས་བྱ་བ་ནི་ལྷ་མ་ཡིན་གྱི་རྒྱལ་པོ་ཐགས་བཟངས་རིས་ལ་སོགས་པ་གྲངས་མེད་པར་གནས་པའོ། །རླུང་ལྷ་དང་ཞེས་བྱ་བ་ནི་རླུང་ལྷའི་རྒྱལ་པོ་གྲངས་འཛིན་ལ་སོགས་པ་གྲངས་མེད་པ་དུ་མ་གནས་པའོ། །ནམ་མཁའ་ལྡིང་དང་ཞེས་བྱ་བ་ནི་ནམ་མཁའ་ལྡིང་གི་རྒྱལ་པོ་གསེར་མིག་ཅན་ལ་སོགས་པ་ནམ་མཁའ་ལྡིང་གྲངས་མེད་པའོ། །དྲི་ཟ་དང་ཞེས་བྱ་བ་ནི་དྲི་ཟའི་རྒྱལ་པོ་ཟུར་ཕུད་ལྔ་པ་ལ་སོགས་པ་གྲངས་མེད་པའོ། །མི་འམ་ཅི་དང་ཞེས་བྱ་བ་ནི་མི་འམ་ཅིའི་རྒྱལ་པོ་ལྗོན་པ་ལ་སོགས་པ་གྲངས་མེད་པའོ། །ལྟོ་འཕྱེ་ཆེན་པོ་དང་ཞེས་བྱ་བ་ནི་ལྟོ་འཕྱེའི་རྒྱལ་པོ་ཡོན་ཏན་གྲགས་ལ་སོགས་པ་དུ་མར་གནས་པའོ། །གནོད་སྦྱིན་དང་ཞེས་བྱ་བ་ནི་གནོད་སྦྱིན་གྱི་རྒྱལ་པོ་ཀུ་བེ་ར་ལ་སོགས་པ་མང་པོར་གནས་པའོ། །སྲིན་པོ་དང་ཞེས་བྱ་བ་ནི་སྲིན་པོའི་རྒྱལ་པོ་འཇིགས་པ་ལ་སོགས་པ་མང་པོར་གནས་པའོ། །མི་དང་མི་མ་ཡིན་པ་གང་དག་འཁོར་དེར་འདུས་ཏེ་འཁོད་པ་དེ་དག་ཐམས་ཅད་ཡི་རངས་ཏེ་ཞེས་བྱ་བ་ནི་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དེ་དག་ཐམས་ཅད་བཅོམ་ལྡན་འདས་ཀྱི་སྤྱན་སྔར་གནས་ཏེ། རིག་སྔགས་ཀྱི་རྒྱལ་མོ་ལ་གུས་པར་རྗེས་སུ་ཡི་རང་བའོ། །བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ་ཞེས་བྱ་བ་ནི་ཆོས་འདི་བསམ་གྱིས་མི་ཁྱབ་པ་དེ་དག་ཐམས་ཅད་ཀྱི་དྲུང་དུ། བཅོམ་ལྡན་འདས་ཀྱིས་བདེན་པར་བཀའ་སྩལ་པའོ། །རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལས་རྗེས་སུ་ཡི་རང་བའི་གནས་སྐབས་ཏེ་ཉི་ཤུ་རྩ་བརྒྱད་པའོ།། །།རིག་སྔགས་ཀྱི་རྒྱལ་མོ་རྨ་བྱ་ཆེན་མོ་ལས་བརྟག་པ་ལྔ་པ་རྫོགས་སོ།། །།རིག་སྔགས་ཀྱི་རྒྱལ་མོ་རྨ་བྱ་ཆེན་མོའི་འབུམ་འགྲེལ། རྒྱ་གར་གྱི་སློབ་དཔོན་ཆེན་པོ་ལས་ཀྱི་རྡོ་རྗེས་མཛད་པ་རྫོགས་སོ།། །།པཎྜི་ཏ་མཁས་པ་ཆེན་པོ་ཨ་མོ་གྷ་བཛྲས་རང་འགྱུར་དུ་མཛད་པའོ།། །།