ཐུགས་རྗེ་ཆེན་པོ་གཟུགས་བརྙན་ལ་བརྟེན་པའི་སྒྲུབ་ཐབས།
བཅོམ་ལྡན་འདས་ཐུགས་རྗེ་ཆེན་པོ་གཟུགས་བརྙན་གྱི་རྣམ་པར་སྣང་བ་ལ་ཕྱག་འཚལ་ལོ། །ཏིང་འཛིན་གོམས་པའི་གང་ཟག་གིས། །བདེན་རྟོག་མ་ལུས་བཟློག་ཕྱིར་དང༌། །ལྷ་ཡི་དྲི་མ་འང་སྤངས་པའི་ཕྱིར། །གཟུགས་བརྙན་གཟུགས་ཅན་མན་ངག་བྲི། །སྐྱེ་བོས་རབ་དབེན་ཉམས་དགའི་གཞིར། །འདབ་བརྒྱད་པདྨོ་ཕྱེ་བ་ཡིས།། མཎྜལ་ཡིད་འོང་ལེགས་བྲིས་ལ། །དེ་དབུས་འདྲེན་པ་སྣང་བར་བྱ། །ཤར་གྱི་འདབ་མར་ཁྲི་བཙུགས་ལ། །དེ་སྟེང་ཤིན་ཏུ་དྲི་མེད་གཟུགས། །བརྩོན་པའི་ཆ་བྱད་རྒྱན་མང་མངའ། །དཀར་དམར་ལ་སོགས་བདག་ཡིད་ལྟར། །ཆུ་ནང་རབ་དང་ཟླ་བ་དང༌། །གཟུགས་ལྟར་དེ་ཡི་སྤྲུལ་པ་གསལ། །ཤེལ་དང་མེ་ལོང་ལ་སོགས་ངོས། །དཀྱིལ་འཁོར་ལྟེ་བར་མངོན་པར་བཞུགས། །དྲང་སྲོང་གཙོ་བོ་སྒྱུ་མའི་རྣམ་ཐར་ནི། །གདུལ་དཀའ་འདུལ་ཕྱིར་སྣ་ཚོགས་སྐུར་སྟོན་ཡང༌། །དེ་ཚེ་དེ་དོན་དེ་ཉིད་གཟུགས་མི་མངའ། །དེ་ཉིད་འདིར་ནི་སྟོང་ཉིད་གཟུགས་ཞེས་བརྗོད། །མ་དག་ལུས་ཀྱི་དྲི་མ་ཐམས་ཅད་ལས། །ཤིན་ཏུ་རིང་གྱུར་ཕུན་ཚོགས་སྐུར་སྣང་ལ། །དེ་ཉིད་མཁའ་ལྟར་དམིགས་པ་རབ་ཞི་བ། །དུས་གསུམ་རྒྱལ་བའི་ཡེ་ཤེས་སྐུ་ཡིན་ནོ། །བྱིས་པ་རྣམས་ནི་ཁ་དོག་དབྱིབས་དབྱེ་བས། །སྣང་བ་ཇི་བཞིན་དོན་དེ་བཞིན་ཞེས་རྟོགས། །མཁས་རྣམས་ཇི་ལྟར་སྣང་བ་སྣ་ཚོགས་ཉིད། །གང་སྣང་དེ་ལྟར་དེ་ཙམ་ཞི་བར་ཤེས། །ཇི་ལྟར་ལྷ་ཡི་སྦྱོར་བ་འདིར་མཚན་མེད། །དེ་ལྟར་གཟུགས་སོགས་དངོས་ཀུན་ཡང་དབེན་ན། །ཤེས་རབ་ཀྱིས་བརྟགས་བློ་གྲོས་རིམ་གཉིས་ལ། །མཁས་པས་མཚན་མར་མི་བྱ་སྨོས་ཅི་དགོས། །དེ་ལྟར་ལྷ་དང་ལྷའི་རང་བཞིན་དང་ཆོས་ཐམས་ཅད་ཀྱི་དག་པ་རྟོགས་པར་བྱས་ནས་རྟེན་ཅིང་འབྲེལ་བར་འབྱུང་བས་མངོན་པར་སྤྲུལ་པའི་ལྷའི་སྐུ་ཕྱག་རྒྱ་ཆེན་པོ་དམིགས་ཏེ། བདག་ཉིད་རིམ་པ་གཉིས་དང་ལྡན་པའི་སྐུ་གསུང་ཐུགས་མཆན་མ་ཉེ་བར་ཞི་བའི་མཐར་ཐུག་པར་གྱུར་པ་དང་བསྲེ་བར་བྱའོ། །དེ་ནས་ཁྲུས་དང་བྱུག་པ་ལ་སོགས་པ་སྔོན་དུ་སོང་བས། ཕྱག་འཚལ་བ་དང་བསྐོར་བ་ལ་སོགས་པའི་སྒོ་ནས་སྡིག་པ་སྤང་བ་དང་ཚོགས་བསྒྲུབས་ཏེ། དངོས་སུ་འབྱོར་པ་དང་ཡིད་ལས་བྱུང་བའི་ཡོ་བྱད་དཔག་ཏུ་མེད་པས་ཡང་དག་པར་མཆོད་དེ། དྲི་མ་སྦྱང་བའི་ཕྱིར་སྔགས་འདི་བཟླའོ། །ཨོཾ་ཨཱཿཧྲཱིཿམ་ཧཱ་ཀ་པྲ་ཏི་བི་པ་རུ་པ་བི་ཤུདྡྷ་ཏ་ཏཱ་ཛྙཱ་ནཱ་མ་མ་ཙིཏྟཱ་མ་དྱེ་པྲ་ཏི་སྠཱ་ར་ཧཱུཾ། རྣམ་དག་ཡེ་ཤེས་མཆོག་སྤྲུལ་པས། །སྐུ་བསྟན་ཉིད་
ཀྱི་ཐུགས་ཧྲཱིཿཡིག །འོད་མཛད་མེ་ཡིས་འགྲོ་ཀུན་གྱི། །འཛིན་པ་གཉིས་བསྲེགས་གཟུགས་བརྙན་གྱུར། །དྲི་མ་མེད་དང་རྣམ་མི་རྟོག །གདུལ་བྱ་དད་ནི་ཡང་དག་ལ། །སྣང་དང་མི་སྣང་དབྱེར་མེད་གསུངས། །བསྒྲུབ་པ་རྒྱུན་མི་འཆད་པའོ། །ཐུགས་རྗེ་ཆེན་པོ་གཟུགས་བརྙན་ལ་བརྟེན་པའི་སྒྲུབ་ཐབས་རྫོགས་སོ།།