འཕགས་པ་འཇམ་པའི་དབྱངས་ཀྱི་བསྟོད་པ།
ཕྱོགས་ཀྱི་གླང་པོ།
རྒྱ་གར་སྐད་དུ། ཨཱཪྻ་མཉྫུ་གྷོཥ་སྟོ་ཏྲ། བོད་སྐད་དུ། འཕགས་པ་འཇམ་པའི་དབྱངས་ཀྱི་བསྟོད་པ། །འཇམ་དཔལ་གཞོན་ནུ་གྱུར་པ་ལ་ཕྱག་འཚལ་ལོ། །སྡིགས་མཛུབ་གདོང་བསྟན་པ་ཡིས། །རི་རབ་ལྷུན་པོ་དུ་མ་གཡོས། །མ་ལུས་རྒྱ་མཚོ་ཆེན་པོའི་ཆུ།། སེན་མེའི་རྩེ་མོས་གྱེན་དུ་བླངས། །ནམ་མཁའ་མུ་མེད་པ་ཡི་ཁམས། །ཞབས་ཀྱི་གོམ་པ་གཅིག་གིས་མནན། །ཟད་པའི་དུས་ཀྱི་མེ་འབར་བ། །ཞལ་གྱི་དབུགས་ཀྱིས་བཏབ་པས་བཅིལ། །དུས་མཚུངས་སྐུ་ཡི་ཆ་གཅིག་ལ། །ཆུ་དང་མེ་ཡི་ཆར་ཕབ་པ། །ལ་ལར་ཟད་པར་སངས་རྒྱས་སུ། །གྱུར་ནས་ཆོས་ཀྱི་འཁོར་ལོ་བསྐོར། །ལ་ལར་ཉོན་མོངས་མ་ལུས་པ། །ནུབ་པས་ཞི་བའི་དེ་ཉིད་སྟོན། །དལ་བས་དབང་པོ་བདེ་སོགས་ཀྱི། །གདོང་ལ་རྣམ་པར་གཟིགས་པའི་སྤྱན། །ཕྱོགས་ཀྱི་འཁོར་ལོས་བཀབ་པ་ཡིས། །ཕྱག་མཐིལ་དམར་པོ་ཉི་མ་རྨུགས། །ལ་ལར་ལྷ་མ་ཡིན་གྱི་དཔལ། །མཐུ་གྱུར་དམ་པར་གྱུར་པ་འཛིན། །ཁྱིམ་པ་དང་ནི་བརྟུལ་ཞུགས་པ། །ཆངས་སྤྱོད་རྟག་ཏུ་ཡེ་ཤེས་ཅན། །བྱིས་པའི་གཟུགས་ཅན་འགྲོ་བའི་ཡབ། །འཇམ་པའི་དབྱངས་ལ་ཕྱག་འཚལ་ལོ། །མི་འཇིགས་པ་དང་སྟོབས་མངལ་བ། །ཐུབ་པའི་གཟུགས་བརྙན་དང་མཚུངས་པ། །ཕྱེ་མ་མིག་སྨན་དང་མཚུངས་འདི། །ཁྱོད་ལ་སྐྱབས་སུ་རབ་ཏུ་མཆི། །ཉོན་མོངས་བུད་ཤིང་ཡེ་ཤེས་མེ། །དུ་མ་མཚོན་པ་བགྲང་བ་ལྟར། །འཁོར་བ་སྲིད་པའི་སྦྱོར་བ་དང༌། མྱ་ངན་འདས་ལ་ཁྱོད་མི་གནས། །མགོན་པོ་རྟག་ཏུ་དབུ་མ་མཆོག །ཡང་དག་བརྙེས་པ་མ་ལགས་སམ། །ཆུ་དང་བཅས་པའི་སྣོད་རྣམས་སུ། །ཟླ་བའི་གཟུགས་བརྙན་ཤར་བ་ལྟར། །གཅིག་
ཏུ་གདུལ་བྱ་གཡོ་བའི་ཡིད། །རྣམ་པ་མང་པོ་འདྲ་བའི་མཚན། །ཉིད་ཀྱི་བག་ཆགས་ཡིད་གཅིག་ཏུ། །ཡེ་ཤེས་གྲུབ་པའི་གསལ་གྱུར་པ། །བཀའ་དྲིན་དོན་གཉེར་ཚུལ་གྱིས་ནི། །ཆགས་པས་ཁྱོད་ཀྱི་ཞབས་དྲུང་ལྷུང༌། །ཁྱོད་ཀྱི་འོད་ཟེར་འཕྲོ་བའི་ཆ། །ཕྱོགས་ཀྱི་ཁོངས་སུ་རྣམ་སྤྲོས་པ། །ཟླ་བའི་འོད་ཟེར་གང་གྱུར་མཉམ། །བྱིས་པའི་གཟུགས་ཅན་མཛེས་པ་འདི། །ཚེས་གཅིག་ཟླ་བ་ལྟ་མཉེས་པ། །ཁྱོད་ཀྱི་སྤྱོད་པ་བཟློག་དཀའ་བས། །བདུད་ཀྱི་མཐུ་རྩལ་འཇོམས་པས་ཅི། །ཁྱོད་ཀྱི་མཚན་ཙམ་དྲན་པས་ནི། །དམྱལ་བ་པ་ཡི་ཁྲག་དང་ཞག །མེད་པར་སྐམས་པས་དམྱལ་བ་ཕའི། །འོད་འཕྲོ་དེ་དག་ཞི་བར་འགྱུར། །ཤེས་རབ་བྲལ་བས་མདུན་དུ་ཁྱོད། །དྲན་པའི་ཡུལ་དུ་གྱུར་པས་ཀྱང༌། །མཁས་པ་རྣམས་ཀྱང་ཐེ་ཚོམ་གྱི། །མདུད་པ་དམ་པོས་འཆིང་བར་བྱེད། །ཐམས་ཅད་ལྟ་ཞིག་སྐད་ཅིག་ཏུ། །ཁྱོད་ཀྱི་སྤྱན་ཟུར་གྱིས་གཟིགས་ནས། །རྔ་ཡབ་གཡོབ་པའི་བཞད་གད་ཀྱིས། །བསྟེན་པའི་དཔལ་ལྡན་ཉིད་བདག་གིས། །གདུལ་བྱ་པདྨོའི་སྣོད་རྣམས་ལ། །འོད་ཟེར་དྲ་བས་ཁ་འབྱེད་པས། །མགོན་པོ་སྔོན་མེད་ཉི་མ་ཡི། །རོལ་པས་ཉིན་མཚན་སྣང་བར་མཛད། །དོན་གསལ་མཛད་པའི་གསུངས་གིས་ནི། །གཟུང་དང་འཛིན་པ་རྣམ་པར་སྤངས། །སྟོང་པ་ཉིད་ནི་མངོན་སུམ་སྟར། །གསུང་གི་དབང་ཕྱུག་སྟོན་པར་མཛད། །རྣམ་པར་རྟོག་ལས་མ་གཏོགས་པ། །འཁོར་བ་ཞེས་བྱ་ཅི་ཡང་མེད། །རྣམ་རྟོག་དེ་དང་བྲལ་བས་ན། །ཁྱོད་ནི་རབ་ཏུ་མྱ་ངན་འདས། །ཁྱོད་ཀྱི་ཡོན་ཏན་ཆ་བརྗོད་ལས། །བྱུང་བས་བསོད་ནམས་འཕེལ་བ་ཡིས། །འགྲོ་བ་རྣམས་ནི་ཁྱོད་བརྗོད་པས། །ཕུན་སུམ་ཚོགས་པ་ལ་གནས་ཤོག །བཅོམ་ལྡན་འདས་འཇམ་པའི་དབྱངས་ཀྱི་བསྟོད་པ། རྟོག་གེ་པ་རྣམས་ཀྱི་གཙུག་གི་ནོར་བུ་སློབ་དཔོན་ཕྱོགས་ཀྱི་གླང་པོས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཤྲདྡྷཱ་ཀ་ར་ཝརྨ་དང༌། ཞུ་ཆེན་གྱི་ཙཱ་བ་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།