རྡོ་རྗེ་རྣམ་པར་འཇོམས་པ་ཞེས་བྱ་བའི་སྒྲུབ་ཐབས།
གཾ་གཱ་དྷ་ར།
རྒྱ་གར་སྐད་དུ། བཛྲ་བི་དཱ་ར་ཎ་སཱ་དྷ་ནཾ་ནཱ་མ། བོད་སྐད་དུ། རྡོ་རྗེ་རྣམ་པར་འཇོམས་པ་ཞེས་བྱ་བའི་སྒྲུབ་ཐབས། དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །ཆོས་དབྱིངས་ཡེ་ཤེས་རང་བཞིན་གྱིས། །འགྲོ་བའི་གདུག་པ་ཀུན་འདུལ་བའི། །རྡོ་རྗེ་ཅན་ལ་ཕྱག་འཚལ་ཏེ། །དེ་ཡི་སྒྲུབ་ཐབས་བྲི་བར་བྱ། །དཀོན་མཆོག་གསུམ་ལ་སྐྱབས་སོང་ཞིང༌། །བྱང་ཆུབ་སེམས་དང་རབ་ལྡན་པས། །དཀྱིལ་འཁོར་ཞུགས་ཤིང་དབང་བླངས་ཏེ། །རྗེས་སུ་གནང་བ་ཐོབ་པ་དང༌། །རི་བོ་བཟང་ཞིང་འཇུག་ངོགས་སོགས། །རྣམ་པར་དབེན་ཞིང་ཉམས་དགའ་བར། །ཀུན་ནས་གཙང་བའི་ཀུན་སྤྱོད་ཀྱིས། །བདེ་བའི་སྟན་ལ་འདུག་པ་དང༌། །རང་སྙིང་བད་ཟླར་གནས་པ་ཡི། །ཧཱུཾ་ཡིག་མཐིང་ཤུན་མདོག་ལྟ་བུ། །འོད་ཟེར་ཕྲེང་བ་འཁྲིགས་པ་ཡིས། །ཕྱོགས་རྣམས་ཀུན་དུ་ཁྱབ་པ་དང༌། །རྡོ་རྗེ་ཁྲོ་བོ་འཇིགས་ཆེན་པོ། །སངས་རྒྱས་བྱང་ཆུབ་སེམས་དཔར་བཅས། །ནམ་མཁའ་གང་བར་གསལ་དམིགས་ཏེ། །ཕྱག་འཚལ་ལ་སོགས་བཅུ་གཅིག་བྱ། །དེ་རྗེས་ཕུང་པོ་ལ་སོགས་པའི། །ཆོས་ཀུན་རྣམ་པར་དབེན་པ་ཡི། །སྟོང་པའི་རང་བཞིན་ལ་གནས་པས། །གསང་སྔགས་བརྗོད་དེ་བརྟན་པར་བྱ། །ནམ་མཁར་གནས་པའི་པཾ་ཡིག་དང༌། །ཨ་ལས་པདྨ་ཟླ་བར་གནས། །ཧཱུཾ་ཡིག་འོད་ཟེར་ཕྲེང་འཕྲོས་པས། །ར་བ་ས་གཞི་བླ་རེ་གུར། །དྲ་བ་མེ་ཡིས་ཡོངས་སུ་བསྐོར། །དེ་ནས་ཧཱུཾ་ལས་སྤྲོས་བསྡུས་པས།། ཁྲོ་བོ་རྡོ་རྗེ་རྩེ་ལྔ་པ། །དེ་ཡོངས་གྱུར་ལས་རང་ལྷའི་གཟུགས། །ཞལ་གཅིག་ཕྱག་གཉིས་ཆར་སྤྲིན་མདོག །གཡས་དང་གཡོན་གྱི་ཕྱག་གཉིས་ཀྱིས། །རབ་འབར་རྡོ་རྗེ་རྩེ་ལྔ་དང༌། །དྲིལ་བུ་བ་སྒྱིངས་བཅས་སྡིགས་མཛུབ་བཅས། །རྡོ་རྗེ་ཕྲེང་བ་རིན་ཆེན་སྤྲུལ། །སྟག་གི་པགས་པས་
རྣམ་བརྒྱན་པ། །གཡོན་བརྐྱང་པ་ཡི་གོམ་པས་བཞུགས། །ཀུན་ནས་འོད་ཀྱི་ཚོགས་འཕྲོས་པས། །གདུག་པ་མ་ལུས་སྲེག་པར་བསྒོམ། །ལུས་ངག་ཡིད་ཀྱི་གནས་གསུམ་དུ། །པདྨ་ཉི་མ་ཟླ་བ་ལ། །རྡོ་རྗེ་རྩེ་གསུམ་རང་ཡིག་གསུམ། །དཀར་དང་དམར་དང་ནག་པོར་བསྒོམ། །ཧཱུཾ་ཡིག་ལས་འཕྲོས་འོད་ཟེར་གྱིས། །མདུན་དུ་ཡེ་ཤེས་སྤྱན་དྲངས་ཏེ། །མཆོད་དང་བསྟོད་པ་སྔོན་སོང་པས། །དབང་བསྐུར་དེ་ནས་བཟླས་པ་བརྩམ། །ཨོཾ་ན་མཿཙཎྜ་བཛྲ་ཀྲོ་དྷ་ཡ། །ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུཾ་ཕཊ། དམ་ཚིག་ཡེ་ཤེས་སྙིང་གར་གནས། །སྤྲོ་དང་བསྡུ་བའི་བསམ་གཏན་ཅན། །ཁྲོ་བོའི་སྐད་གསང་མཐོན་པོ་ཡིས། །སྔགས་མཆོག་ཡང་དག་བཟླས་པར་བྱ། །བཟླས་པའི་མཐར་ནི་མཆོད་པ་དང༌། །བསྟོད་དང་ཡི་གེ་བརྒྱ་པ་གདོན། །མདུན་དུ་ཡེ་ཤེས་གཤེགས་གསོལ་ལ། །ཁྲོ་བོའི་ངར་འཛིན་བརྟན་པོས་གནས། །བླ་མའི་མན་ངག་ཇི་བཞིན་དུ། །སྒྲུབ་ཐབས་ཡང་དག་བཀོད་པ་ལས། །དགེ་བ་ཐོབ་པ་གང་ཡིན་དེས། །འགྲོ་ཀུན་སངས་རྒྱས་ཐོབ་པར་ཤོག །རྡོ་རྗེ་རྣམ་པར་འཇོམས་པ་ཞེས་བྱ་བའི་སྒྲུབ་ཐབས་དཔལ་གཾ་གཱ་དྷ་རས་མཛད་པ་རྫོགས་སོ།། །།པཎྚི་ཏ་ཆེན་པོ་ཛྙཱ་ན་ཤྲཱི་དང༌། ལོ་ཙཱ་བ་ཅོག་གྲུ་རབ་ཞིས་བསྒྱུར་པའོ།།