རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་དཀྱིལ་འཁོར་གྱི་ཆོ་ག་རིན་ཆེན་སྣང་བ།
ས་ཝ་རི་པ།
རྒྱ་གར་སྐད་དུ། བཛྲ་བི་དཱ་ར་ཎ་ན་མ་དྷཱ་ར་ཎི་རཏྣ་དྷྱུ་ཏི་མཎྜལ་བི་དྷི་ནཱ་མ། བོད་སྐད་དུ། རྡོ་རྗེ་རྣམ་པར་འཇོམས་བ་ཞེས་བྱ་བའི་གཟུངས་ཀྱི་དཀྱིལ་འཁོར་གྱི་ཆོ་ག་རིན་ཆེན་སྣང་བ་ཞེས་བྱ་བ། བཅོམ་ལྡན་འདས་འཇམ་པའི་རྡོ་རྗེ་ལ་ཕྱག་འཚལ་ལོ། །མ་རིག་ལོག་པར་ལྟ་བ་འཇོམས་མཛད་པའི། །ཡེ་ཤེས་ཐུགས་རྗེ་ཉི་མ་ལྟ་བུ་ཡིས། །མི་ཤེས་སྒྲིབ་པ་མ་ལུས་སེལ་མཛད་པའི། །རྡོ་རྗེ་རྣམ་པར་འཇོམས་ལ་ཕྱག་འཚལ་ནས། །གཏི་མུག་དྲ་བ་བསལ་བ་དང༌། །འདོད་ཆགས་དྲི་མ་བཀྲུ་བ་དང༌། །ཞེ་སྡང་ཞི་བར་བྱ་བའི་ཕྱིར། །རྒྱུད་ལ་བརྟེན་ནས་འདི་བཤད་དོ། །བྱམས་དང་སྙིང་རྗེར་ལྡན་པ་ཡིས། །ཐེག་ཆེན་དོན་ལ་རབ་ཏུ་ཞུགས། །སྔོན་དུ་བསྙེན་པ་རབ་རྫོགས་ཤིང༌། །བརྟུལ་ཞུགས་ཅན་གྱིས་རབ་ཏུ་བརྩམ། །དད་དང་ལྡན་ཞིང་སྙིང་བརྩེར་བཅས། །རི་བོ་ནགས་ཚལ་ཡིད་འོང་བའི། །དབེན་པའི་གནས་སུ་ཡོངས་སུ་འདུག་སྟེ། །སྔོན་དུ་བསྙེན་པ་བྱ་བ་ནི། །རྩ་བའི་དཀྱིལ་འཁོར་བདུན་བསམས་ཏེ། །རང་ཉིད་གཏུམ་པོའི་སྐུར་གསལ་བས། །རྩ་བའི་སྔགས་ནི་བརྗོད་པར་བྱ། །ཨོཾ་ན་མོ་རཏྣ་ཏ་ཡཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ་ཧཱུཾ་ཧཱུཾ། ཕྱོགས་སྐྱོང་དག་ལ་གཏོར་མ་དག །རྡོ་རྗེ་གླུ་དང་བཅས་པས་དབུལ། །སྡིག་པ་ཆེ་དང་བཅས་པའི་མ་རུངས་པ། །ས་བདག་དག་ལ་བཀའ་བསྒོ་བསྐྲད་བྱས་ནས། །གཟུང་བ་སྦྱང་ཞིང་མཎྜལ་ལེགས་བྱས་ཏེ། །ས་ཡི་ལྷ་མོ་དག་ལ་རབ་ཏུ་མཆོད། །གསེར་དངུལ་ལ་སོགས་བུམ་པར་ནི། །བཀྲ་ཤིས་བརྒྱད་དང་སྙིང་པོ་སོགས། །གཞན་རྣམས་དྲི་ཞིམ་ཆུས་དགང་བའོ། །ཕྱོགས་བཞི་དཀར་དང་མཐིང་དང་དམར། །ལྗང་གུ་གཙང་གོས་གདུ་བུའོ། །ཅོད་པན་ཕུར་བུ་བཅུ་རྣམས་དང༌། །གཏོར་མ་མཆོད་རྫས་བཀྲ་ཤིས་རྫས། །ཡོ་བྱད་རྫས་རྣམས་ཚོགས་པ་དང༌། །ཐིག་དང་ཚོན་གྱི་ལས་བྱས་ཏེ། །བརྟན་པའི་སྔགས་ཀྱིས་ཐིག་བྱིན་བརླབས། །ཐིག་གི་བྱ་བ་རྫོགས་པ་ཡིས། །བསྲུང་བའི་སྔགས་ཚོན་བྱིན་གྱིས་བརླབ། །འདབ་བཞི་འཁོར་ལོ་བཅུར་འདུག་པའི། །སྒོ་བཞི་རྟ་བབས་བཅས་པ་བྲི། །བུམ་པ་པདྨ་དག་ལ་དགོད། །ཕུར་པ་འཁོར་ལོ་རྩིབས་བཅུ་ལའོ། །ལྷ་སྣམ་དག་ལ་
གཏོར་མ་སྟེ། །འདོད་ཡོན་བཀྲ་ཤིས་རྫས་དག་དགོད། །གྲུ་ཆད་མཆོད་པ་རྫོགས་པར་བཤམས། །དེ་ལྟར་རྫས་རྣམས་དགོད་པར་བྱ། །རྒྱན་རྣམས་ཀུན་གྱིས་ལེགས་བགོས་ཏེ། །ཀུ་ཤའི་སྟེང་འདུག་ཤར་དུ་བལྟ། །མཆོད་ཅིང་སྡིག་བཤགས་སོགས་བྱས་ནས། །ཚད་མེད་བཞི་ལྡན་སེམས་བསྐྱེད་དོ། །ཨོཾ་དྷརྨ་དྷཱ་ཏུ་སརྦ་དྷརྨ་ཨཿཧཱུཾ་གི་ས་བོན་ལས་བྱུང་བའི། །གུར་དང་དྲ་བའི་རྣམ་པར་བསྒོམ། །ཆོས་འབྱུང་དཀར་པོའི་ནང་དུ་བྷཱུཾ། །རིན་ཆེན་ཁང་པར་མཛེས་པར་བསྐྱེད། །དབུས་སུ་པད་སྟེང་བུམ་པའི་ནང༌། །ཟླ་སྟེང་ཧཱུཾ་བྱུང་རྡོ་རྗེའི་སྐུ། །མདོག་དཀར་རྡོ་རྗེ་དྲིལ་བུ་ཅན། །ཐུགས་ཀར་ཟླ་སྟེང་རྡོ་རྗེ་ཧཱུཾ། །ཤར་དུ་པང་སྟེང་བུམ་པའི་ནང༌། །ཟླ་སྟེང་དྷཱིཿ་འབྱུང་སངས་རྒྱས་སྤྱན། །མདོག་དཀར་བུམ་པ་རྡོ་རྗེས་མཚན། །ཐུགས་ཀར་ཟླ་སྟེང་དྷཱིཿ་ཡིག་བསམ། །ལྷོ་རུ་པད་སྟེང་བུམ་པའི་ནང༌། །ཏྲཱཾ་བྱུང་ཟླ་སྟེང་མཱ་མ་ཀཱི། །མདོག་མཐིང་བུམ་པ་རིན་ཆེན་ནང༌། །ཐུགས་ཀར་ཟླ་སྟེང་སྣ་ཚོགས་ཏྲཱཾ།། ནུབ་ཏུ་པད་སྟེང་བུམ་པའི་ནང༌། །ཟླ་སྟེང་རཾ་བྱུང་གོས་དཀར་མོ། །མདོག་དཀར་བུམ་པ་པདྨས་མཚན། །ཐུགས་ཀར་ཟླ་སྟེང་རཾ་ཡིག་བསམ། །བྱང་དུ་པད་སྟེང་བུམ་པའི་ནང༌། །ཟླ་སྟེང་ཏཱཾ་བྱུང་སྒྲོལ་མའི་སྐུ། །མདོག་ལྗང་བུམ་པ་སྣ་ཚོགས་མཚན། །ཐུགས་ཀར་ཟླ་སྟེང་ཏཱ་བསམ་མོ། །རྡོ་རྗེ་སྐྱིལ་ཀྲུང་གཙོ་བོ་སྟེ། །རྒྱན་རྣམས་ཀྱིས་ནི་རབ་བརྒྱན་ཏེ། མཆོད་དང་མཆོད་པའི་ཚུལ་གྱིས་ནི། །ཡུམ་རྣམས་རྣམ་པར་བཞེངས་པའོ། །འཁོར་ལོ་དག་ལ་ཉི་མ་བཅུ། །ཧཱུཾ་གི་ས་བོན་ལས་བྱུང་བའི། །རྣམ་རྒྱལ་དཀར་པོ་རྡོ་རྗེ་བསྣམས། །གཤིན་རྗེ་དམར་ནག་བེ་ཅོན་ཏེ། །རྟ་མགྲིན་དམར་པོ་པདྨས་མཚན། །བདུད་རྩི་འཁྱིལ་པ་ལྗང་གུའོ། །དབྱུག་པ་སྔོན་པོ་སྔོན་པོ་སྟེ། །དོན་ཡོད་ཞགས་པ་མཐིང་གའོ། །ཁྲོ་གཉེར་ཅན་ནི་དམར་ནག་སྟེ། །རྡོ་རྗེ་འཁོར་ལོ་ལྗང་གུའོ། །སྟེང་ཕྱོགས་མཐིང་ག་ཆེན་པོ་སྟེ། །འོག་ནི་ནམ་མཁའི་མདོག་ཅན་ནོ། །ཕྱག་ན་ཕུར་བུ་སོ་སོ་སྟེ། །སྟག་དང་སྦྲུལ་དང་མེ་དཔུང་ནང༌། །དེ་ལྟར་དཀྱིལ་འཁོར་རབ་རྫོགས་ནས། །ཡེ་ཤེས་སྤྱན་དྲངས་མཆོད་ནས་བསྟིམ། །སྐུ་གསུང་ཐུགས་བྱིན་བརླབ་པ་ནི། །ཨོཾ་ཨཱཿཧཱུཾ། དེ་ནས་དབང་བསྐུར་ཞིང་བསྒོམ་མོ། །དེའི་རྩི་བའི་སྔགས་ནི། ཨོཾ་སརྦྦ་བི་དྱཱ་བཛྲ་བཛྲ་ཧཱུཾ་ཧཱུཾ། གཙོ་བོའི་སྔགས་སོ།།
སྥོཊ་བཛྲ་བཛྲ། ཀ་ཊ་བཛྲ་བཛྲ། མ་ཊ་བཛྲ་བཛྲ། མ་ཐ་བཛྲ་བཛྲ། ཧཱུཾ་དྷཱིཿཏྲཱཾ་རཱཾ་ཏཱཾ་ཞེས་བྱ་བའོ། །ལན་དང་ལན་གྱི་ཚུལ་དུ་མཆོད། །དེ་ནས་ལས་ཀྱི་སྒྲུབ་པ་ནི། །ཨོཾ་ན་མོ་རཏྣ་ཏ་ཡཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཏདྱ་ཐཱ། ཨོཾ་ཏྲ་ཊ་ཏྲ་ཊ། ཏྲོ་ཊ་ཡ་ཏྲོ་ཊ་ཡ། སྥུ་ཊ་སྥུཊ། སྥོ་ཊ་ཡ་སྥོ་ཊ་ཡ། གྷཱུརྞྞ་གྷུརྞྞ་གྷུརྞྞ་པ་ཡ་གྷུརྞྞ་པ་ཡ། སརྦ་སཏྭཱ་ནི། བོ་དྷ་བོ་དྷ། སཾ་བོ་དྷ་ཡི། སཾ་བོ་དྷ་ཡ། བྷྲ་མ་བྷ་མ། སཾ་བྷ་མ་ཡ། སཾ་བྷྲ་མ་ཡ། སརྦ་བུདྡྷ་ནི། ཀུ་ཊ་ཀུ་ཊ། སཾ་ཀུ་ཊ་ཡ་སཾ་ཀུ་ཊ་ཡ། སརྦ་ཤ་ཏཱུཾ། གྷ་ཊ་གྷ་ཊ། སཾ་གྷ་ཊ་ཡ་སཾ་གྷ་ཊ་ཡ། ཨཊྚ་ཧ་ས་ནཱི་ལ་བཛྲ་སུ་བཛྲ་ཡ་སྭཱ་ཧཱ། ཧཱུཾ་དྷཱིཿཏྲཱཾ་རཱཾ་ཏཱཾ་ཧཱུཾ་ཕཊ་སྭཱ་ཧཱ། སྤྲོ་དང་བསྡུ་བས་གཙོ་བོ་ཞུ། །གཙོ་བོས་འཁོར་དང་དེ་བཞིན་ནོ། །གཙོ་བོའི་བདུད་རྩི་ཆུ་ནང་ནས། །རྣམ་ཤེས་ཤར་དུ་ཉི་སྟེང་ཧཱུཾ། །བདག་ཉིད་གཏུམ་པོར་བསམ་བྱས་ནས། །སྐུ་གསུང་སྐྱེ་མཆེད་བྱིན་བརླབ་བྱ། །མ་ཏིསྠིར་བཛྲ་ཧཱུཾ། །སུ་ཏིསྠི་ར་བཛྲ་ཨོཾ། །པྲ་ཏིསྠི་ར་བཛྲ་ཨཱཿགུང་མོ་ཐལ་སྦྱར་རྡོ་རྗེ་སྟེ། །སེར་མོ་བསྣོལ་བ་འཁོར་ལོའོ། །མཛུབ་མོ་རྩེ་སྦྱར་པདྨ་ཡིས། །ལན་གསུམ་བཅིངས་ནས་གསང་སྔགས་གསུམ། །ཟླ་སྟེང་རྡོ་རྗེ་འཁོར་ལོ་སྟེ། །པདྨ་སྐུ་གསུང་ཐུགས་ལའོ། །སྐྱེ་མཆེད་ཟླ་སྟེང་རྡོ་རྗེ་ནི། །སོ་སོ་དག་ལ་བསམ་པར་བྱའོ། །མ་ཧཱ་བཛྲ། ཨ་པྲ་ཏི་ཧ་ཏ་བཛྲ། ཨ་མོ་གྷ་བཛྲ། ཨེ་ཧི་བཛྲ། ཤཱི་གྷཾ་བཛྲཱ་ཡ་སྭཱཧཱ། དེ་ནས་ཕྱོགས་སྐྱོང་བཅུ་རྣམས་དགུག །ཁྲོ་བོ་བཅུ་ཡི་ཕུར་བུས་གདབ། །ཧེ་ཕུ་ལུ་ནི་རུ་ཕུ་ལུ་གྲྀཧྞ་ཀུ་ལུ་མི་ལི་ཙུ་ལུ་ཀུ་རུ་ཀུ་ལུ་བཛྲ་ཀཱི་ལི་ཀཱི་ལཱ་ཡ་སྭཱཧཱ། ཀ་ཊ་ཀ་ཊ། མ་ཊ་མ་ཊ། ར་ཊ་ར་ཊ། མོ་ཊ་ན་པྲ་མོ་ཊ་ན་ཡེ་ཀཱི་ལི་ཀཱི་ལཱ་ཡ་སྭཱཧཱ། ཙ་ར་ནི་ཙ་ར། ཧ་ར་ཧ་ར། ས་ར་ས་ར། མཱ་ར་ཡ་ཀཱི་ལི་ཀཱི་ལཱ་ཡ་སྭཱཧཱ། ཧ་ན་ཧ་ན། ཙུ་རུ་ཙུ་རུ་མ་ཧཱ་ཀྲོ་དྷ་ཙཎྜ་ཀཱི་ལི་ཀཱི་ལཱ་ཡ་སྭཱཧཱ། ཙྪིནྡ་ཙྪིནྡ། བྷིནྡ་བྷིནྡ། མ་ཧཱ་ཀཱི་ལི་ཀཱི་ལཱ་ཡ་སྭཱཧཱ། བནྡྷ་བནྡྷ་ཀྲོདྷ་ཀྲོདྷ་ཀཱི་ལི་ཀཱི་ལཱ་ཡ་སྭཱཧཱ། ཧ་ར་ཧ་ར་བཛྲ་དྷ་རཱ་ཡ་སྭཱཧཱ། པྲ་ཧ་ར་པྲ་ཧ་ར་བཛྲ་པྲ་བྷཉྫ་ནཱ་ཡ་སྭཱཧཱ། ཏྲཱ་ས་ཡ་ཏྲཱ་ས་ཡ་བཛྲ་ཀཱི་ལི་ཀཱི་ལཱ་ཡ་སྭཱཧཱ། བརྒྱའམ་ཉི་ཤུ་རྩ་གཅིག་གིས། །གོ་རིམས་བཞིན་དུ་ཕྱོགས་རྣམས་བཅིང༌། །སློབ་དཔོན་ཆོས་གོས་ཡོངས་གྱོན་ནས། །རྡོ་རྗེ་དྲིལ་བུ་རབ་ཐོགས་ནས། །གཞན་དག་མཆོད་རྫས་ཐོགས་བྱས་ཏེ། །ཁ་ཟས་དྲི་ཞིམ་སྨན་དང་ནི། །བཀྲ་ཤིས་རྫས་ཐོགས་སློབ་མ་དག །བསྐོར་
ཞིང་གླུ་འདི་བླང་བར་བྱའོ། །ན་མཿས་མནྟ་བཛྲཱ་ཎཱཾ། སརྦ་བ་ལེ་ཨཱ་བརྟ་ཡ། མ་ཧཱ་བ་ལེ་ཀ་ཏ་བེ། ཏ་ཏ་ལེ། ཨ་ཙ་ལེ། མཎྜ་ལ་མཱ་ཡེ་ཨ་ཏི་བཛྲ། མ་ཧཱ་བ་ལེ་བེ་ག་ར་ཎ་ར་ཎ་ཨ་ཛི་ཏེ་ཛྭ་ལ་ཛྭ་ལ། ཏི་ཊི་ཏི་ཊི་པིངྒ་ལེ། ད་ཧ་ད་ཧ། ཏེ་ཛོ་བ་ཏི། ཏི་ལི་ཏི་ལི། བནྡྷ་བནྡྷ་མ་ཧཱ་བ་ལེ། བཛྲ་ཀྲོ་དྷ་ཛྭ་ལཱ་ཡ་སྭཱ་ཧཱ། ཞེས་པས་བླང་ཞིང་བསྐོར་བར་བྱའོ། །གྲུབ་པ་ཆུད་མི་ཟ་བར་བྱ། །བཀྲ་ཤིས་སྟོན་མོ་བཟའ་བར་བྱ། །སློབ་མའི་འདོད་པ་སྒྲུབ་པའི་ཕྱིར། །གཙང་གོས་སེར་པོ་རྒྱན་བཏགས་ནས། །ཀུ་ཤའི་སྟེང་དུ་ལེགས་འདུག་སྟེ། །འཁོར་ལོའི་སྟེང་དུ་གཞག་པར་བྱ། །གང་དག་ཡིད་དགེ་སེམས་དང་བའི།། སྡིག་བཤགས་སེམས་བསྐྱེད་སྡོམ་པ་སྦྱིན། །སྤྱི་བོར་གཙོ་བོ་མགྲིན་པར་བདག །ཐུགས་ཀར་ཡུམ་ནི་བསམ་པར་བྱ། །སངས་རྒྱས་བསྟིམས་ནས་ཁྲུས་གསོལ་བྱ། །བདག་ཉིད་ཁྲོ་བོའི་ཐུགས་ཀ་ནས། །ལྷ་མོའི་གླུ་དང་བཅས་པས་བཀྲུ། །སྤྱི་བོར་བདག་པོ་བསམ་པར་བྱ། །བརྟན་པར་བྱ་ཕྱིར་སྔགས་འདི་བཟླས། །ཨོཾ་མ་ཏིསྠི་ར་བཛྲ། སུ་ཏིསྠི་ར་བཛྲ། པྲ་ཏིསྠིར་བཛྲ། བཛྲ་ཀཱ་ཡ་ཨཱ་བརྟ་ཡ་སྭཱཧཱ། མཆོད་པ་དག་གིས་ཡང་དག་མཆོད། །དེང་ནས་བཟུང་སྟེ་ལྷ་ཡི་སྐུ། །རྟག་ཏུ་བྲལ་བར་མི་བྱའོ། །ལུས་ཀྱི་ལས་དག་བྱ་བ་ནི། །མི་དགེ་བཅུ་དག་མི་བྱའོ། །དེ་ལྟར་རྫོགས་ནས་གཏོར་མ་གང༌། །སྦྱང་སྤེལ་སྦྱར་བ་བྱས་ནས་ནི། །དཀྱིལ་འཁོར་ལྷ་དང་མགྲོན་རྣམས་མཆོད། །ཨོཾ་ན་མཿས་མནྟ་བཛྲཱ་ཎཱཾ། སརྦ་བ་ལེ་ཨཱ་བརྟ་ཡ། མ་ཧཱ་བ་ལེ། ཀ་ཏ་བེ། ཏ་ཏ་ལེ། ཨ་ཙ་ལེ། མཎྜ་ལ་མཱ་ཡེ། སྒྲུབ་པའི་དཀྱིལ་འཁོར་མཆོད་པའོ། །ཨ་ཏི་བཛྲ་མ་ཧཱ་བ་ལེ་བེ་ག་ར་ཎ་ར་ན་ཨ་ཛི་ཏེ་ཛྭ་ལ་ཛྭ་ལ། ཏི་ཊི་ཏི་ཊི་པིངྒ་ལེ། ད་ཧ་ད་ཧ་ཏེ་ཛོ་བ་ཏི། ཏི་ལི་ཏི་ལི། བནྡྷ་བནྡྷ། མ་ཧཱ་བ་ལེ། བཛྲ་ཀྲོ་དྷ་ཛྭ་ལ་ཡེ་སྭཱཧཱ། བར་དུ་གཅོད་པ་སེལ་བའི་ཁྲོ་བོ་བཅུ་མཆོད་པའོ། །ཧ་ར་ཧར་བཛྲཱ་དྷ་རཱ་ཡ་སྭཱཧཱ། ཕྱོགས་སྐྱོང་མཆོད་པའོ། །པྲ་ཧ་ར་པྲ་ཧ་ར་བཛྲ་པྲ་བྷཉྫ་ནཱ་ཡ་སྭཱཧཱ། ཨོཾ་ཨ་ཀཱ་རོ་མུ་ཁཾ་ཞེས་བྱ་བས་འབྱུང་པོ་ཐམས་ཅད་པའི་མཆོད་པའོ། །དེ་ལྟར་མཆོད་ནས་བསྟོད་པ་ནི། བདེ་གཤེགས་དྲི་མེད་ཁྲོ་བོའི་སྐུ། །སྐྱོན་གྱིས་མ་གོས་སྐུ་མདོག་དཀར། །རྡོ་རྗེ་དྲིལ་བུ་མི་གཡོ་བརྟེན། །རྣམ་པར་འཇོམས་ལ་ཕྱག་འཚལ་བསྟོད། །དུས་གསུམ་སངས་རྒྱས་བསྐྱེད་པའི་ཡུམ། །སྐྱོན་གྱིས་མ་གོས་སྐུ་མདོག་དཀར། །སེམས་ཅན་བདེ་ལ་སྦྱར་མཛད་
པའི། །སྤེལ་བའི་རྡོ་རྗེ་མ་ལ་བསྟོད། །ཡོན་ཏན་ཐམས་ཅད་བསྐྱེད་པའི་ཡུམ། །མི་འགྱུར་རིན་ཆེན་བཻ་དཱུར་མདོག །སེམས་ཅན་ཀུན་གྱི་སྐྱབས་མཛད་པའི། །སྐུ་ཡི་རྡོ་རྗེ་མ་ལ་བསྟོད། །དྲི་མ་མེད་ཅིང་འོད་གསལ་བའི། །འདོད་ཆགས་དྲི་མ་སྤངས་པའི་ཡུམ། །སེམས་ཅན་རྣམས་ལ་སྤྲོ་བ་མཛད། །བློ་ལྡན་རྣམས་ལ་ཕྱག་འཚལ་བསྟོད། །བྱ་བ་ཐམས་ཅད་ཡོངས་སུ་བསྒྲུབ། །ཤེས་རབ་སྒྲོལ་མ་ཡུམ་གྱི་མཆོག །ལྗང་གུའི་མདོག་ཅན་འགྱིང་བག་ཅན། །དོན་དང་ལྡན་ལ་ཕྱག་འཚལ་བསྟོད། །ཁྲོ་བོ་ཆེན་པོ་བརྗིད་པའི་སྐུ། །ཞེ་སྡང་རྣམ་དག་བདག་ཉིད་ཅན། །དྲི་ཟ་འདུལ་མཛད་རྡོ་རྗེ་བསྣམས། །རྣམ་པར་རྒྱལ་ལ་ཕྱག་འཚལ་བསྟོད། །ཁྲོ་བོ་ཆེན་པོ་བརྗིད་པའི་སྐུ། །ང་རྒྱལ་རྣམ་དག་བདག་ཉིད་ཅན། །གཤིན་རྗེ་འཇོམས་བྱེད་བེ་ཅོན་བསྣམས། །གཤིན་རྗེ་གཤེད་ལ་ཕྱག་འཚལ་བསྟོད། །ཁྲོ་བོ་ཆེན་པོ་བརྗིད་པའི་སྐུ། །འདོད་ཆགས་རྣམ་དག་བདག་ཉིད་ཅན། །ཆུ་ལྷ་འདུལ་མཛད་པདྨ་བསྣམས། །རྟ་མཆོག་དཔལ་ལ་ཕྱག་འཚལ་བསྟོད། །ཁྲོ་བོ་ཆེན་པོ་བརྗིད་པའི་སྐུ། །ཕྲག་དོག་རྣམ་དག་བདག་ཉིད་ཅན། །གནོད་སྦྱིན་འདུལ་མཛད་འཁོར་ལོ་འཛིན། །གནོད་སྦྱིན་འདུལ་ལ་ཕྱག་འཚལ་བསྟོད། །མེ་དཔུང་འབར་པ་བརྗིད་པའི་སྐུ། །སྔོན་པོའི་མདོག་ཅན་དབྱུག་པ་སྔོ། །མེ་ལྷ་གདུག་པ་འདུལ་མཛད་པའི། །དབྱུག་སྔོན་ཅན་ལ་ཕྱག་འཚལ་བསྟོད། །མེ་དཔུང་འབར་བ་བརྗིད་པའི་སྐུ། །དོན་ཡོད་ཞགས་པ་མཐིང་གའི་མདོག །རླུང་ལྷ་གདུག་པ་འདུལ་མཛད་པའི། །དོན་ཡོད་ཞགས་ལ་ཕྱག་འཆལ་བསྟོད། །མེ་དཔུང་འབར་བ་བརྗིད་པའི་སྐུ། །ཁྲོ་གཉེར་ཅན་ནི་དམར་ནག་སྟེ། །སྲིན་པོའི་གདུག་པ་འདུལ་མཛད་པའི། །ཁྲོ་གཉེར་ཅན་ལ་ཕྱག་འཚལ་བསྟོད། །མེ་དཔུང་འབར་བ་བརྗིད་པའི་སྐུ། །རྡོ་རྗེ་འཁོར་ལོ་ལྗང་གུའི་མདོག །འབྱུང་པོའི་དྲེགས་པ་འཇོམས་མཛད་པའི་རྡོ་རྗེ་འཁོར་ལོ་ཕྱག་འཚལ་བསྟོད། །རྡོ་རྗེ་ཧཱུཾ་སྒྲ་སྒྲོགས་པ་ཆེ། །སྟེང་ཕྱོགས་དྲེགས་པ་འཇོམས་མཛད་པའི། །མཐིང་གའི་མདོག་ཅན་རབ་འཇིགས་པ། །ཧཱུཾ་སྒྲ་སྒྲོགས་ལ་ཕྱག་འཚལ་བསྟོད། །སྟོབས་ཆེན་རབ་ཏུ་གནོན་མཛད་པའི། །འོག་གི་བགེགས་ཆེན་གནོན་པའི་བདག །ནམ་
མཁའི་མདོག་ཅན་འཇིགས་པའི་སྐུ། །སྟོབས་ཆེན་གནོན་ལ་ཕྱག་འཚལ་བསྟོད། །དེ་ལྟར་བསྟོད་ནས་གཤེགས་སུ་གསོལ། །རྡོ་རྗེ་རྣམ་པར་འཇོམས་པའི་སྐུའི་དཀྱིལ་འཁོར་བསྟན་པ་སྟེ་དང་པོ་ལས་ཀྱི་རིམ་པའོ།། །།ཐུགས་ཀྱི་དཀྱིལ་འཁོར་བསྟན་པ་ནི། །བདག་ཉིད་ལྷ་ཡི་སྐུར་བསྒོམས་ལ། །མཎྜལ་མེ་ཏོག་བཅས་པའི་སྟེང༌། །གཙོ་བོའི་བུམ་པ་སྟེང་བཞག་སྟེ། །ཡང་སྙིང་ཉེ་བའི་སྙིང་པོ་བཟླས། །སྙིང་པོ་ཐེམ་ནས་བསྒྲུབ་པ་བརྩམ། །དང་པོས་ཡི་ཆོ་ག་བྱ། །མཎྜལ་མདའ་གང་གྲུ་བཞི་སྟེ། །པདྨ་འདབ་བཞི་འཁོར་ལོ་བཅུ། །སོ་སོར་རིགས་དང་མཐུན་པར་བྲི། །གསེར་དངུལ་ལ་སོགས་བུམ་པར་ནི། །ནོར་བུ་ཡུངས་ཀར་འདུར་བ་དང༌། །ཤེལ་དང་པདྨ་ཙནྡན་དང༌། །གསེར་དང་རིན་ཆེན་ཆུས་དགང་བྱ། །དྲི་ཞིམ་བཀང་བའི་བུམ་པ་བཞི། །འདབ་མ་བཞི་པོར་གཞག་པར་བྱ། །འཁོར་ལོའོ་སྟེང་དུ་དེ་བཞིན་ཏེ། །མཆོད་པའི་རྫས་དང་གཏོར་མ་བཤམས། །དེ་ལྟར་རྫོགས་ནས་ཀུན་ཤའི་སྟེང༌། །རྒྱན་དང་བཅས་པས་ལེགས་འདུག་སྟེ། །མཆོད་ཅིང་སྡིག་བཤགས་ལ་སོགས་བྱ། །ཨོཾ་སརྦ་དྷརྨ་དྷཱ་ཏུ་ཨཱཿདེ་ནས་སྟོང་པའི་ཏིང་འཛིན་ལས། །ཡི་གེ་ཧཱུཾ་དུ་རབ་བསམས་ཏེ། །རྡོ་རྗེའི་ཁང་པ་རབ་ཏུ་བསྐྱེད། །བྷཱུཾ་ལས་རིན་ཆེན་ཁང་པར་ནི། །དག་ཅིང་གསལ་བ་རྒྱན་དང་བཅས། །པཾ་ལས་བྱུང་བའི་པདྨའི་གདན། །སྟེང་དུ་རིན་ཆེན་བུམ་པ་ནི། །ཟླ་སྟེང་རྡོ་རྗེ་མཚན་པའོ། །སརྦ་བིདྱཱ་བཛྲ་བཛྲ། ཀ་ཊ་བཛྲ་བཛྲ། མ་ཊ་བཛྲ་བཛྲ། མ་ཐ་བཛྲ་བཛྲ་ཧཱུཾ། ཡང་སྙིང་ཟླ་སྟེང་ཧཱུཾ་ལ་སྟེ། སྙིང་པོ་ཟླ་སྟེང་རྡོ་རྗེ་ལའོ། །ཧ་ར་ཧ་ར་བཛྲ། མ་ཊ་མ་ཊ་བཛྲ། དྷུ་ན་དྷུ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། དྷ་ར་དྷ་ར་བཛྲ། དྷ་རཱ་ཡ་དྷ་རཱ་ཡ་བཛྲ། དཱ་རུ་ཎ་དཱ་རུ་ཎ་བཛྲ། ཙྪིནྡ་ཙྪིནྡ་བཛྲ། བྷིནྡ་བྷིནྡ་བཛྲ་ཧཱུཾ་ཧཱུཾ། གཙོ་བོའི་བུམ་པ་དེ་བཞིན་དུ། །ཕྱོགས་བཞིའི་བུམ་པའི་རྡོ་རྗེ་ལ། །ཡང་སྙིང་བཞི་པོ་གོ་རིམས་བཞིན། །དེ་བཞིན་ཁྲོ་བོའི་བུམ་པ་ལ། །ཉི་མ་ཁྲོ་བོའི་རྡོ་རྗེ་ལ། །སྙིང་པོའི་སྔགས་ཀྱིས་སོ་སོ་སྟེ། །གོ་རིམས་བཞིན་དུ་བསྒོམ་པར་བྱའོ། །དེ་ལྟར་རྫོགས་ནས་སངས་རྒྱས་བསྟིམ། །བདག་ཉིད་ཤར་དུ་གནས་པ་ཡིས། །མཆོད་དང་མཆོད་པའི་ཚུལ་དུ་བཟླས། །ཨོཾ་ན་མོ་རཏྣ་
ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཨོཾ་སརྦ་བིདྱཱ་བཛྲ་བཛྲ། སྥོ་ཊ་བཛྲ་བཛྲ། ཀ་ཊ་བཛྲ་བཛྲ། མ་ཊ་བཛྲ་བཛྲ། མ་ཐ་བཛྲ་བཛྲ། ཨཊྚ་ཧ་ས་ནཱི་ལ་བཛྲ་སུ་བཛྲཱ་ཡ་སྭཱཧཱ། སྙིང་པོ་ནི། ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་བཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཧ་ར་ཧ་ར་བཛྲ། མ་ཊ་མ་ཊ་བཛྲ། དྷུ་ན་དྷུ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། དྷེ་རཱ་ཡ་དྷ་རཱ་བཛྲ། དྷ་རཱ་ཡ་དྷ་རཱ་ཡ་བཛྲ། །དཱ་རུ་ཎ་དཱ་རུ་ཎ་བཛྲ། ཙྪིནྡ་ཙྪིནྡ་བཛྲ། བྷིནྡ་བྷིནྡ་བཛྲ་ཨ་མྲྀ་ཏེ་ཧཱུཾ་ཧཱུཾ་ཕཊ། དེ་ནི་གཙོ་བོའི་བཟླས་པ་སྟེ། །ཡང་སྙིང་མཆོད་པའི་བུམ་པ་ལའོ། །སྙིང་པོས་བར་ཆད་སེལ་བའི་ཕྱིར། །ཕྱོགས་སྐྱོང་བཅུ་པོ་བསྡུ་པར་བྱའོ། །དེ་ལྟར་བྱས་ན་བདག་ཉིད་དང༌། །སློབ་མས་བསྒོ་བ་བཀྲ་ཤིས་རྫས། །མཆོད་རྫས་ཐོགས་ནས་བསྐོར་བ་དང༌། །བསྟོད་པའི་སྔགས་ནི་བརྗོད་པ་དང༌། །དེ་ནས་བཀྲ་ཤིས་སྟོན་མོ་བྱ། །བདག་གིས་ད་ནི་ཁྲུས་བྱ་སྟེ། །ལྷ་མོ་དཔག་མེད་སྤྲུལ་ནས་ནི། །སློབ་མ་དག་ལ་ཁྲུས་གསོལ་ཕྱིར། །གསང་སྔགས་བསྟོད་པས་ཁྲུས་གསོལ་བྱའོ། །ན་མཿས་མནྟ་བཛྲཱ་ཎཱཾ། སརྦ་བ་ལེ་ཨཱ་བརྟ་ཡ། མ་ཧཱ་བ་ལེ་ཀ་ཏ་བེ་ཏ་ཏ་ལེ། ཨ་ཙ་ལེ། མཎྜ་ལ་མཱ་ཡེ། ཨ་ཏི་བཛྲ། མ་ཧཱ་བ་ལེ། བེ་ག་ར་ཎ་ར་ཎ་ཨ་ཛི་ཏི་ཛྭ་ལ་ཛྭ་ལ། ཏི་ཊི་ཏི་ཊི་པིངྒ་ལེ། ད་ཧ་ད་ཧ། ཏེ་ཛོ་བ་ཏི། ཏི་ལི་ཏི་ལི། བནྡྷ་བནྡྷ་མ་ཧཱ་བ་ལེ་བཛྲ་ཀྲོ་དྷ་ཛྭ་ལཱ་ཡ་སྭཱཧཱ། མ་ཏི་སྠི་ར་བཛྲ། སུ་ཏི་སྠི་ར་བཛྲ། པྲ་ཏི་སྠི་ར་བཛྲ། མ་ཧཱ་བཛྲ། ཨ་པྲ་ཏི་ཧ་ཏ་བཛྲ། ཨ་མོ་གྷ་བཛྲ། ཨེ་ཧི་བཛྲ། ཤཱི་གྷྲཾ་བཛྲཱ་ཡ་སྭཱཧཱ། དྷར་དྷར། དྷི་རི་དྷི་རི། དྷུ་རུ་དྷུ་རུ། སརྦ་བཛྲ་ཀུ་ལཾ་ཨཱ་བརྟ་ཡེ་སྭཱཧཱ། ཞེས་ཁྲུས་བྱས་ནས། གཏོར་མ་ཕུལ་ཏེ་གཤེགས་སུ་གསོལ། །རྡོ་རྗེ་རྣམ་པར་འཇོམས་པའི་ཐུགས་ཀྱི་དཀྱིལ་འཁོར་བསྟན་པའོ།། །།གསུང་གི་དཀྱིལ་འཁོར་བསྟན་པ་ནི། །བདག་ཉིད་ཁྲོ་བོའི་སྐུར་བསྒོམས་ནས། །མཎྜལ་སྟེང་དུ་གཙོ་བོའི་བུམ། །ས་བོན་ལ་བརྟེན་བསྙེན་པ་བྱ། །དང་པོ་ས་ཡི་ཆོ་ག་བྱ། །མཎྜལ་ཤིན་ཏུ་ལེགས་བྱས་ཏེ། །པདྨ་འདབ་བཞི་བྲི་བར་བྱའོ། །དེ་དེ་ལྟར་དཀྱིལ་འཁོར་རྫོགས་ནས་ནི། །རིན་ཆེན་རྒྱུ་ལས་བྱས་པ་ཡི། །བུམ་པ་ལྔ་པོ་པད་སྟེང་དགྲམ། །ལས་ཀྱི་བུམ་པ་ཤར་དུ་སྟེ། །གཙོ་བོའི་སྙིང་པོ་རྫས་ཀྱིས་དགང༌། །གཞན་དག་དྲི་ཞིམ་ཆུས་དགང་ངོ༌། །མཆོད་དང་གཏོར་མ་ཞལ་ཟས་བཤམ། །ཀུ་ཤའི་སྟེང་དུ་ལེགས་འདུག་སྟེ། །བྱང་ཆུབ་
མཆོག་ཏུ་སེམས་བསྐྱེད་དོ། །དེ་ནས་སྟོང་བའི་ཏིང་འཛིན་ལས། །བདག་ཉིད་ཁྲོ་བོའི་སྐུར་བསྐྱེད་ནས། །སྤྱན་དྲངས་བྱིན་རླབས་རྫོགས་པ་ཡིས། །མདུན་དུ་མཎྜལ་རིན་ཆེན་གནས། །པདྨ་འདབ་བཞིར་བཅས་པ་ཡི། །སྟེང་དུ་བུམ་པ་ལྔ་བསྐྱེད་ནས། །ནང་དུ་ཟླ་སྟེང་ས་བོན་ནི། །ཧཱུཾ་དྷཱིཿཏྲཱཾ་རཱཾ་ཏཾ་ངོ༌། ན་མཤྩ་ཎྜ་བཛྲ་ཀྲོདྷཱ་ཡ་ཧཱུཾ། ཧུ་ལུ་ཧུ་ལུ། ཏི་ཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུཾ་ཕཊ། བུམ་པ་བ་ཞིལ་སོ་སོར་སྟེ། །དེ་ལྟར་བསྐྱེད་ནས་སངས་རྒྱས་བསྟིམ། །བསྒྲུབ་པའི་རིག་སྔགས་འདི་བཟླས་སོ། །ན་མཤྩཎྜ་བཛྲ་ཀྲོ་དྷཱ་ཡ། ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུཾ་ཕཊ། མཆོད་དང་མཆོད་པའི་ཚུལ་གྱིས་ནི། །བདུད་རྩི་ཆུ་ཡི་རང་བཞིན་བསམ། །ལས་ཀྱི་བུམ་པ་བྱིན་གྱིས་བརླབས། །བུམ་ནང་ཟླ་སྟེང་བདུད་རྩི་འཁྱིལ། །སྔོན་པོ་བྲང་དུ་བསྣོལ་བའི་ཕྱག །ཤིན་ཏུ་འཇིགས་པ་བསྐྱེད་པར་བྱ། །ཨོཾ་ན་མཿཙཎྜ་བཛྲ་ཀྲོ་དྷ་ཡ། ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏ་ཀུཎྜ་ལི་ཧཱུཾ་ཕཊ། ཅེས་པས་བགེགས་བསྐྲད་བསྐོར་བར་བྱ། །བཀྲ་ཤིས་གསོལ་ནས་ཁྲུས་བྱའོ། །གཏོར་མའི་ཆོ་ག་རྫོགས་པ་ཡིས། །དམ་ཚིག་བསྡུས་ནས་གཤེགས་སུ་གསོལ། །རིག་པའི་ལས་དག་གཏང་བའི་ཕྱིར། །གང་དག་ཡིད་དགེ་སེམས་དང་པས། །དཀྱིལ་འཁོར་ལ་ནི་འཇུག་པའི་ཕྱིར། །ལུས་ནི་བྱིན་གྱིས་བརླབ་པར་བྱའོ། །མ་ཏི་སྠི་ར་བཛྲ། སུ་ཏི་སྠི་ས་བཛྲ། ཨོཾ་ཨཱཿཧཱུཾ། མ་ཧཱ་བཛྲ། ཨ་པྲ་ཏི་ཧ་ར་བཛྲ། ཨ་མོ་གྷ་བཛྲ། ཨེ་ཧི་བཛྲ། ཤཱི་གྷྲཾ་བཛྲ། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། རྡོ་རྗེ་འཁོར་ལོ་པདྨའི་སྟེང༌། །འདུག་སྟེ་ཕྲེང་བ་དོར་བར་བྱའོ། །དྷ་ར་དྷ་ར། །དྷི་རི། དྷུ་རུ་དྷུ་རུ། ཧཱུཾ་པཱུ་ཛ་ཧོ་ཞེས་བྱ་བས་དོར་བར་བྱའོ། །དེ་ནས་རྡོ་རྗེ་ཕྱག་བྱེད་དུ་བཅུག་ལ། རྡོ་རྗེའི་གླུ་དང་བཅས་པས་བསྐོར་བར་བྱ་སྟེ། གོང་དུ་ཡང་དེ་བཞིན་ནོ། །བླ་མ་རྡོ་རྗེ་འཛིན་པ་ཀྱེ། །གཙོ་བོ་འཁོར་བཅས་དགོངས་སུ་གསོལ། །མི་ཤེས་མུན་གྱིས་བསྒྲིབས་པ་ལ། །དཀྱིལ་འཁོར་དམ་པ་བསྟན་དུ་གསལ། །ལམ་ཆེན་འདི་ནི་བསྟན་པར་བྱ། །ཁྱོད་ནི་ལམ་ཉིད་སྒྲུབ་པར་གྱིས། །ལམ་མཆོག་སྒྲུབ་པར་རབ་ཏུ་དཀའ། །ཉེས་པ་དག་གིས་མ་གོས་པར། །འབྲས་བུ་མྱུར་དུ་འབྱིན་པར་བྱེད། །དམ་ཚིག་འདས་ན་དམྱལ་བར་ལྟུང༌། །ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་ཀྲོ་དྷ་ཡ་ན་ར་
ཀན་ཧཱུཾ། མི་ཤེས་མུན་གྱིས་བསྒྲིབས་པ་ལ། །དཀྱིལ་འཁོར་འདི་ནི་བསྟན་པར་བྱ། །མཎྜལ་ལ་ཕཊ། བཀྲ་ཤིས་རྫས་ཀྱིས་མཆོད་པར་བྱ། །དེ་ནས་ལྷ་མོས་ཁྲུས་གསོལ་ནས། །འཁོར་ལོའི་སྟེང་དུ་བཞག་ནས་ནི། །སློབ་མ་ལྷ་ཡི་སྐུར་བསྐྱེད་ལ། །མཆོད་པ་དག་གིས་ཡང་དག་མཆོད། །དུས་གསུམ་གཤེགས་པའི་སྐུ་ཡི་མཆོག །སྐུ་དང་ཡོངས་སུ་རྒྱས་པའི་སྐུ། །སྐུ་མཆོག་འདི་ནི་ཁྱོད་ཀྱིས་ཟུང༌། །ལུས་ཀྱི་མི་དགེ་སྤང་བར་བྱའོ། །སརྦ་ཏ་ཐཱ་ག་ཏ་སུ་ཏི་སྠིར་བཛྲ་ཨོཾ། །དེ་ནས་མཆོད་པ་དབུལ་བར་བྱའོ། །དུས་གསུམ་གཤེགས་པ་ཐུགས་ཀྱི་མཆོག །ཐུགས་དང་ཕྲིན་ལས་ལྡན་པའི་ཐུགས། །ཡེ་ཤེས་འདི་ནི་ཁྱོད་ཀྱིས་ཟུང༌། །ཡིད་ཀྱི་ལས་དག་མི་བྱའོ། །ཨོཾ་སརྦ་ཏ་ཐཱ་ག་ཏ་ཏི་སྠི་ར་བཛྲ་ཧཱུཾ། མི་འབྲལ་གཟུངས་ཀྱི་བདག་ཉིད་ཆེ། །མུ་ཏིག་རིན་ཆེན་ཕྲེང་བ་འདི། །སྐུ་དང་ཡེ་ཤེས་མི་འབྲལ་བའི། །ངག་གི་ཉེས་སྤོང་ཕྲེང་བ་གཟུང༌། །ཨོཾ་སརྦྦ་ཏ་ཐཱ་ག་ཏ་པྲ་ཏི་སྠི་ར་བཛྲ་ཨཱཿ་དེ་ནས་བཀྲ་ཤིས་བརྒྱད་དང་རྒྱལ་མཚན་དང༌། གདུགས་ཀྱིས་ཀྱང་དབང་བསྐུར་བར་བྱའོ། །དེའི་རྗེས་ལ། ཚིགས་སུ་བཅད་པ་འདི་ལན་གསུམ་བརྗོད་པར་བྱའོ། །ཡོན་ཏན་རྒྱས་པ་སྐུ་མདོག་གསེར་དང་མཚུངས། །ཤེས་རབ་རྟགས་སུ་པུ་སྟི་རལ་གྲི་བསྣམས། །འཕགས་པ་འཇམ་དཔལ་བཀྲ་ཤིས་གང་ཡིན་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ཐུགས་རྗེའི་རྟགས་སུ་སྐུ་མདོག་ཟླ་བའི་འོད། །མ་ཆགས་སྐྱོན་གྱིས་མ་གོས་ཕྱག་ན་པདྨ་བསྣམས། །འཕགས་པ་སྤྱན་རས་གཟིགས་ཀྱི་བཀྲ་ཤིས་གང་ཡིན་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ཆོས་ཉིད་མི་འགྱུར་རྟགས་སུ་སྐུ་མདོག་མཐིང་ནག་སྟེ། །ཐབས་དང་ཤེས་རབ་དབྱེར་མེད་རྟགས་སུ་རྡོ་རྗེ་འཛིན། །དཔལ་ལྡན་ཕྱག་ན་རྡོ་རྗེའི་བཀྲ་ཤིས་གང་ཡིན་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །དེ་ནས་གཏོར་མ་བཏང་ནས་ཡེ་ཤེས་སེམས་དཔའི་མདུན་དུ་ཡི་གེ་བརྒྱ་པ་བརྗོད་དེ་གཤེགས་སུ་གསོལ། དད་པས་བླ་མ་བཟང་བཙལ་དེས། །དམ་པའི་དྲིན་གྱིས་ཡང་དག་ཐོབ། །དགེ་བ་གང་གིས་ཡེ་ཤེས་འདི། །འདིར་བཞུགས་རྣམས་ཀྱིས་ཐོབ་པར་ཤོག །རྡོ་རྗེ་རྣམ་པར་
འཇོམས་པའི་དཀྱིལ་འཁོར་གྱི་ཆོ་ག་རིན་ཆེན་སྣང་བ་ཞེས་བྱ་བ་སློབ་དཔོན་ཆེན་པོ་ས་ཝ་རི་པས་མཛད་པ་རྫོགས་སོ།། །།བལ་པོའི་བླ་མ་དེ་བ་པུརྞ་མ་ཏི་དང༌། ལོ་ཙཱ་བ་དགེ་སློང་ཆོས་ཀྱི་བཟང་པོས་བསྒྱུར་བའོ།།