ཡེ་ཤེས་སྦར་བའི་གདམས་པ།
བཅོམ་ལྡན་འདས་ཡེ་ཤེས་འབར་བ་ལ་ཕྱག་འཚལ་ལོ། །ཐེག་པ་མཆོག་ཞུགས་དེ་ཉིད་ཡེ་ཤེས་མ་མཐོང་དང༌། །མཐོང་བ་ཇི་སྲིད་རྣལ་དུ་མི་གནས་རེས་འགའ་ཉིད། །དེ་བཞིན་རྣམ་གཡེངས་ཐིབས་པོར་གྱུར་དང་མཐར་མི་འགྲོ། །བློ་གྲོས་ལམ་ལྟོས་དེ་དག་ལས་འཕགས་འདིར་བཤད་བྱ། །བདག་ལུས་སྤྱི་གཙུག་ཅོད་པན་ལ། །དཔལ་ལྡན་བླ་མ་བརྒྱུད་པའི་རིམ། །ཡེ་ཤེས་ཤིང་རྟའི་རྩ་མཆོག་ལམ། །དྲང་དང་བར་མ་ཆད་དང་དངས། །དེ་མཐའ་སློབ་དཔོན་རྡོ་རྗེ་རྩེ། །བདག་གི་ཚངས་གནས་ནམ་མཁའི་སྒོར། །ཨཱིཿ་ཧཱུཾ་གཉིས་མཚན་རེག་བསྒོམས་ལ། །སྟེང་རིམ་ནས་ནི་གསོལ་བ་གདབ། །མ་ལུས་ཡེ་ཤེས་ཅན་རྣམས་ཀྱིས། །ཡང་དག་རིམ་མཛད་ས་བོན་ཧཱུཾ། །པདྨ་ལ་ནི་གེ་སར་བཞིན། །མཁས་བས་རབ་དད་ཐུགས་ཀར་བསྒོམས། །ཟླ་བ་ལ་ཡང་སྐར་མ་ལྟར། །རྡོ་རྗེ་འཆང་ཆེན་འོད་མཐར་ནི། །བཅུ་དང་གཉིས་བཅས་ཨ་ཕྲེང་གིས། །བསྐོར་བལྟས་གསང་སྔགས་བཟླས་པར་བྱ། །ཨོཾ་རཏྣ་གུ་རུ་ཤྲཱི་ཨ་བ་ལོ་ཀེ་ཏེ་ཤྭ་ར་སརྦ་ཨིཥྚ་དེ་བཏེ་མ་ཧཱ་ཏིཥྛ་ནེ་མ་མ་ཙི་ཏ་ཏ་ཏ་ཏ་ཛྙཱ་ན་ཛྭ་ལ་ཛྭ་ལ། པྲ་ཏི་ཛྭ་ལ་པྲ་ཏི་ཛྭ་ལ། པྲ་ཏྱུད་པནྣ་ཧྲྀ་ད་ཡཛྭ་ལ་ཛྭ་ལ་སྤ་ར་ཎ་ས་ཧཱུཾ་ཧཱུཾ་ཧཱུཾ། གསང་སྔགས་རྒྱལ་པོ་རིག་པ་ཆེ། །རྡོ་རྗེ་འབེབས་པ་གདོན་མི་ཟ། །རྣལ་འབྱོར་ཕྱག་རྒྱ་ངེས་པ་འདིས། །ཐུགས་བསྐུལ་ཡེ་ཤེས་འབབ་པར་འགྱུར། །རྡོ་རྗེ་དབང་ཕྱུག་ས་བཅུའི་སྙིང༌། །བུམ་པ་ལས་ནི་རྒྱུན་བཞིན་དུ། །རིམ་གྱིས་བདག་སྙིང་ས་བོན་ལ། །བབ་གྱུར་དེ་ཡི་གཟི་བརྗིད་བསྐྱེད། །འཆར་ཀའི་འོད་ལྟར་དམར་བ་དང༌། །ཟླ་རྒྱས་དཀྱིལ་འཁོར་ལྟར་དཀར་ཉིད། །དབང་པོའི་གཞུ་མདོག་ལྟ་བུ་ཡི། །འོད་ཀྱིས་བདག་ལུས་གང་བར་བྱ། །གང་ཕྱིར་བསྐལ་པ་བྱེ་བར་ཡང༌། །འབད་བྱས་དལ་བས་ཡང་མིན་ལ།།
བདེ་ཆེན་འོད་གསལ་རྣམ་མི་རྟོག །བླ་མའི་དྲིན་ཐོབ་ཐོབ་པར་འགྱུར། །ཆུ་གཏེར་ཆེ་ལས་བརླན་པའི་རླངས་བསྐྱོད་དྲི་མེད་མཁའ་ལ་མི་ཟད་སྤྲིན་འཁྲིགས་དཀའ་བ་མེད། །རྟ་བདུན་ཤར་ཚེ་ཐིབས་པོས་མ་རུངས་གླིང་རྣམས་མི་གསལ་སྣང་བར་བྱས་ལ་དཀའ་བ་མེད། །ནམ་མཁའི་ངོས་ལ་ཤུགས་དྲག་དྲག་འཁྲུགས་གློ་བུར་སྤྲིན་བསྒྲིབས་དངས་པར་བྱས་ལ་དཀའ་བ་མེད། །དེ་བཞིན་བདག་གི་ཆོས་ཀྱི་རྗེར་གྱུར་དམ་པའི་མཐུས་ཀྱང་ཡེ་ཤེས་འབར་བར་དཀའ་བ་མེད། །ཡེ་ཤེས་སྦར་བའི་གདམས་པ་རྫོགས་སོ།།