རྨི་ལམ་གྱི་ལྟ་བ་ངན་པ་རྣམ་པར་བཟློག་པ།
བཅོམ་ལྡན་འདས་སྤྱན་རས་གཟིགས་རས་གྲི་འབར་བ་ལ་ཕྱག་འཚལ་ལོ། །མི་གང་གཉིད་ཀྱིས་ལོག་པ་ན། །མ་འོངས་བཀྲ་ཤིས་མིན་པ་ཡི། །ལྟས་གང་བྱུང་བར་གྱུར་པ་དེ། །དགའ་བའི་ལྟས་བསྟན་མཐོང་བར་འགྱུར། །འདི་ལ་བཙུན་པ་སྤྱན་རས་གཟིགས། །དད་པ་ཐོབ་པ་དཀའ་ཐུབ་ཅན། །བརྩེ་ལྡན་དབང་པོ་དུལ་བ་ཡིས། །བཟློག་པའི་ཆོ་ག་གསུངས་པ་ཡིན། །ཉི་མ་འཆར་ཀའི་འོད་འཕྲོ་ཚེ། །གསོལ་སྦྱོང་ཡན་ལ་གནས་པས། །ཤར་དུ་ཁ་བལྟས་གོས་བཟང་གྱོན། །གདོང་བཀྲུས་མེ་ཏོག་ཕྲེང་བས་བརྒྱན། །གསུམ་ལ་སྐྱབས་སོང་བརྩེ་ཆེན་གྱིས། །སྣ་ཚོགས་མཆོད་རྫས་ལེགས་བཤམས་ལ། །སྤྱན་རས་གཟིགས་ཀྱི་སྐུ་གཟུགས་ཤིག །མདུན་དུ་བདར་ཏེ་སྡིག་པ་བསལ། །སྐད་ཆིག་ཆོ་གས་ལྷ་མཆོག་གི །རྣལ་འབྱོར་བྱས་ལ་དེ་ཡི་སྐུ། །ཞལ་བརྒྱ་ཕྱག་སྤྱན་སྟོང་ལྡན་དང༌།།
འོད་ཕྲེང་དཀར་པོ་ལས་གྲུབ་པའི། །རྡོ་རྗེ་རལ་གྲི་བེ་ཅོན་དང༌། །དགྲ་སྟ་ལྕགས་ཀྱུ་ཁ་ཊྭཱཾ་ག །རྡོ་རྗེ་དབྱིག་པ་རྡོ་རྗེ་ཞགས། །འདི་བརྒྱད་རེ་རེ་ལས་ཀྱང་སྟོང༌། །སྤྲུལ་པས་འཁོར་ཡུག་བསྐོར་བར་བལྟ། །འཁོར་ལོ་རྣམ་གསུམ་བཟླས་པ་ཡིས། །བཅད་དང་གཏུབ་དང་བསྲེག་པ་ནི། །ལྟས་ངན་རྣམ་པར་བཤིག་པར་བྱེད། །སྣ་ཚོགས་མཆོད་པ་སྔོན་འགྲོ་བས། །གཏོར་མ་སྟོང་ནི་རབ་ཏུ་སྦྱིན། །དེ་ལ་སྔགས་ནི་འདི་ཡིན་ཏེ། །ངག་བསྡམས་པ་ཡི་རྒྱུན་ཆགས་སོ། །ཨོཾ་ཨཱཿམ་ཧཱ་ཏ་ཐཱ་ག་ཏ་ཨཥྚ་ས་ཧ་མ་ཧཱ་ལོ་ཀེ་ཤྭ་ར་ས་པ་རི་ཝཱ་ར་བ་ལིཾ་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ཧཱུཾ་ཧཱུཾ་ལན་གསུམ་གསུམ་གྱིས་སོ། །མཐར་ནི་འདིའོ། །མ་མ་ཀུ་ཊེཥྚི་ཀུ་ཀརྨྨ་སརྦ་རྦད་ཏྲ་སརྦ་ཐ་ཤན་ཀ་རཱ་ཕཊ། ཨ་ཀ་རུ་ཡིས་ལེགས་བདུག་ཅིང༌། །ལྷ་མཆོག་མདུན་དུ་རྣམ་བསམས་པས། །མི་འཇིགས་སྦྱིན་པའི་སྒྲ་ཕྱུང་སྟེ། །མཁའ་ལ་གཞའ་ལྟར་ཞི་བར་བསམས། །སྡིག་པ་དང་ནི་བཀྲ་ཤིས་མིན། །དགྲ་དང་གདོན་ཀུན་རབ་འཇིག་པ། །ཆོ་གའི་རྒྱལ་པོ་ཡེ་ཤེས་མཆོག །སྤྱན་རས་གཟིགས་ཀྱི་བརྟག་པའོ། །རྨི་ལམ་གྱི་ལྟ་བ་ངན་པ་རྣམ་པར་བཟློག་པ་རྫོགས་སོ།།