ལོངས་སྤྱོད་མི་ཟད་པའི་སྒྲུབ་ཐབས།
འཕགས་པ་ཐུགས་རྗེ་ཆེན་པོ་ལོངས་སྤྱོད་མི་ཟད་པ་ལ་ཕྱག་འཚལ་ལོ། །རེ་ཞིག་སྒྲུབ་པ་པོ་འབྱོར་པ་དམན་པ་དང༌། ཕུན་སུམ་ཚོགས་པ་རྒུད་པས་ཟིལ་གྱིས་ནོན་ཏེ་བག་ཞུམ་པ་དང༌། ཡོད་ཀྱང་མྱུར་དུ་འཛད་པས་མ་རུངས་པར་བྱེད་པ་དེ་དག་ཐམས་ཅད། ཆགས་པ་དང་བརྣབ་སེམས་ཀྱིས་རང་དང་གཞན་གྱིས་ཡོངས་སུ་བཟུང་བ་ལ་མངོན་པར་གདུང་བ་སྤངས་ཏེ། འཕགས་པ་སྤྱན་རས་གཟིགས་རྒྱ་མཚོའི་གཏེར་གྱི་བདག་པོ་ལ་སྐྱབས་སུ་དོང་བར་བྱའོ། །ཤེལ་དང་བཻཌཱུཪྻ་དག་དང༌། །ནཱིལ་རིན་ཆེན་ལས་གྲུབ་པའི། །གཞལ་མེད་ཁང་མཆོག་དབུས་སུ་ནི། །མགོན་པོ་ལོངས་སྤྱོད་མི་ཟད་བསྒོམ། །གསེར་གྱི་བུམ་པ་བཟད་བཀང་པ། །ནོར་བུ་ཚོམ་ཚོམ་སྐྱུག་པའི་ཁ། །དཔག་བསམ་ཤིང་ཆེན་རྒྱས་པའི་གསེབ། །སྤྲིན་གྲིབ་ལ་ནི་ཡོངས་སུ་རྩེན། །གཡས་དམར་གཡོན་སྔོ་དབུས་དཀར་ཞལ། །སྣང་མཐའ་རྡོ་རྗེ་ཐིག་ལེས་བརྒྱན། །ནོར་སྦྱིན་བྱིན་རློབ་སྐྱབས་མཛད་དང༌། །གཏེར་དང་ལྕགས་ཀྱུ་པདྨོའི་ཕྱག །སྐྱིལ་ཀྲུང་ཕྱེད་བརྟེན་ཀུན་དའི་མདོག །འདོམ་གང་འོད་གསལ་འཁོར་ལོ་སོགས། །རིན་ཆེན་བདུན་འཛག་མུ་ཏིག་འབྲུའི། །ཆར་འབེབས་གཡོ་བ་མི་མངའ་བའོ། །དེ་ཡི་ཕྱག་རྒྱ་ནོར་སྦྱིན་པར་མཛད་པའི་བདུད་རྩི་ཅན་གྱི་མཐོང་ཐོས་ལས། ནོར་བུ་དང་འབྲུ་དང་སྨན་གྱི་ཆར་དོད་ཚེ་བརྩེགས་པ་ལྟ་བུ་རྒྱུན་མ་ཆད་པར་འོངས་པས་བདག་གི་ལོངས་སྤྱོད་ཐམས་ཅད་ཀྱི་སྦུབས་སུ་འཇུག་པར་བྱའོ། །ཨོཾ་ཨཱཿཧྲཱིཿཤྲཱི་ཨཱཪྻཱ་ཝ་ལོ་ཀི་ཏེ་ཤྭ་ར་མ་མ་སརྦ་སི་བྷོ་ག་རཏྣ་རཏྣེ། མ་ཧཱ་ཙིནྟ་མ་ཎི་དྷ་ར་དྷ་ར་ཨ་ཀྵ་ཡ་ཨ་ཀྵྨཽ་པ་ཏིསྠཏི་ཧཱུཾ། བདག་ཉིད་བཙུན་མོ་པདྨོ་ཅན་
གྱི་ཏིང་ངེ་འཛིན་གྱིས་མེ་ཏོག་དམར་པོ་དང་དཀར་པོ་སིལ་མ་ཐོགས་ལ། པོག་ཕོར་བདུག་ཅིང་ཐལ་མོ་སྦྱར་བའམ། འདུད་པ་སྔོན་དུ་སོང་བས་མཆོད་པར་བྱའོ། །དེ་ནས་ཇི་ཙམ་ལོངས་སྤྱོད་པས་ཟད་པ་དེ་ཙམ་འཕགས་པའི་ཕྱག་ནས་བླང་ངོ༌། །བླ་མ་དང་ལྷ་མཆོད་པ་དང་ཕན་པའི་གནས་དང༌། མགོན་མེད་པ་ལ་སྦྱིན་པའི་རིམ་པ་ལྷག་པའི་བསམ་པ་དང་མ་དྲལ་བ་ནི་དམ་ཚིག་གོ །གྲུབ་པའི་འབྲས་བུས་ལུས་ཅན་ལ། བསྔོ་དང་ང་རྒྱལ་མེད་ཉིད་དང༌། །བྱིན་པས་དབུལ་དང་ཕོངས་འགྱུར་ཞེས། །དོགས་བྲལ་དེ་ཡིས་སྤྱད་མི་བྱ། །ལོངས་སྤྱོད་མི་ཟད་པའི་སྒྲུབ་ཐབས་རྫོགས་སོ།།