རྗེ་བཙུན་འཇམ་དཔལ་ཤེས་རབ་འཁོར་ལོའི་སྒྲུབ་ཐབས།
ཙནྡྲཱ་ཀ་ར་གུཔྟ།
རྒྱ་གར་སྐད་དུ། མཉྫུ་ཤྲཱི་བྷཊྚ་རཱ་ཀ་སཱ་དྷ་ནཾ་པྲཛྙཱ་ཙཀྲ། བོད་སྐད་དུ། རྗེ་བཙུན་འཇམ་དཔལ་ཤེས་རབ་འཁོར་ལོའི་སྒྲུབ་ཐབས། འཕགས་པ་འཇམ་པའི་དབྱངས་ལ་ཕྱག་འཚལ་ལོ། །གང་མཐུས་སྙིང་གི་མ་རིག་མུན་སེལ་ཤེས་རབ་
སྣང་བ་ཀུན་བསྐྱེད་མཛད། །སྣ་ཚོགས་བསྟན་བཅོས་རིག་པ་དང་ནི་གསང་སྔགས་ཕན་པ་རྣམས་སྦྱིན་པ། །འདོད་དགུའི་གཏེར་གཅིག་གཞོན་ནུ་ཡིད་འོད་ཟུར་ཕུད་ལྔ་དང་ལྡན་པ་གང༌། །འཇམ་དབྱངས་མགོན་ལ་གུས་པས་བཏུད་དེ་དེ་བསྟེན་མན་ངག་བྲི་བར་བྱ། །སྔགས་པས་རྗེས་སུ་མཐུན་པའི་གནས། །བྱི་དོར་བྱུག་པ་བཟང་བྱས་ལ། །ཁྱད་པར་སྐྱབས་རྟེན་སེམས་བསྐྱེད་ནས། །གཞོན་ནུ་ཤེས་རབ་འཁོར་ལོ་བསྒོམ། །སྙིང་དབུས་བུ་གར་རི་བོང་འཛིན། །ཡེ་ཤེས་ས་བོན་དྷཱིཿ་ཡིག་འོད། །སྐར་མདོག་རྣམ་པར་གསལ་བར་བལྟ། །དེ་ལས་ཚོགས་རྟེན་དཀྱིལ་འཁོར་དགུག ། དངོས་དང་ཡིད་ལས་བྱུང་དང་གཞན། །ཡང་དག་ཡེ་ཤེས་མཆོད་པས་མཆོད། །ཕྱག་འཚལ་བ་དང་སྡིག་སེལ་དང༌། །བསོད་ནམས་ཕུང་པོ་གཞན་ཡང་ངོ༌། །བྱམས་དང་སྙིང་རྗེ་དགའ་བ་དང༌། །བཏང་སྙོམས་ཚངས་པའི་གནས་བཞི་ཡིས། །སྐྱེ་བོ་མ་ལུས་རྗེས་ཆགས་ཤིང༌། །ཆགས་བྲལ་སྡོམ་པ་གཟུང་བར་བྱ། །དེ་རྗེས་གསང་སྔགས་གཉིས་བརྗོད་པས། །ཡུལ་དང་ཡུལ་ཅན་དག་བྱའི་ཕྱིར། །སྤྲིན་མེད་ནམ་མཁའི་དཀྱིལ་ལྟ་བུར། །མཁས་པས་སྟོང་ཉིད་བསྒོམ་པར་བྱ། །ཨོཾ་སྭ་བྷཱ་བ་ཤུདྡྷཿ་སརྦ་དྷརྨྨཱཿ་སྭ་བྷཱ་བ་ཤུདྡྷོཉ྄ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོཉ྄ཧཾ། བ་ཡིག་ཨ་དང་དྷཱིཿ་ཡིག་ལས་གྲུབ་ཆུ་སྐྱེས་དང༌། །ཟླ་རྒྱས་གདན་ལ་ཤེས་རབ་རལ་གྲི་ས་བོན་མཚན། །དཀར་བསིལ་ཟླ་བ་བྱེ་བའི་གཟི་འོད་ལས་ལྷག་པའི། །དཔལ་གྱིས་ས་གསུམ་ཤེས་རབ་སྣང་བ་བསྐྱེད་པར་བསྒོམ། །དུས་གསུམ་གཤེགས་དང་ཕྱོགས་བཅུའི་ཆར་བཞུགས་སངས་རྒྱས་དང༌། །དེ་སྲས་དེ་བཞིན་དྲང་སོང་དང་ནི་རིག་འཛིན་ཚོགས། །མ་ལུས་ཡོན་ཏན་བློ་གྲོས་སྣང་བ་བསྡུས་ནས་ཀྱང༌། །སྐད་ཅིག་རྣམ་པས་འཇིག་རྟེན་གསུམ་མགོན་འཇམ་དབྱངས་འགྱུར། །གཞོན་ནུའི་དང་ཚུལ་རལ་གྲི་པུ་སྟི་འཁོར་ལོ་འཛིན། །རབ་སྒེག་བརྟན་མཛེས་དུལ་བའི་རང་བཞིན་བློ་བཟང་པོ། །སྐྱིལ་ཀྲུང་རབ་གསལ་རིན་ཆེན་དཔག་མེད་འཕྲོ་བ་ཡི། །བློ་ངན་སེལ་མཁས་སངས་རྒྱས་སྲས་ནི་སྒྲུབ་པས་བལྟ། །དེ་སྙིང་ཟླ་སྟེང་དྷཱིཿ་ཡིག་ལས་བྱུང་འོད་ཟེར་གྱིས། །ཡེ་ཤེས་མགོན་བཀུག་ཚོན་གང་གཟུགས་ཀྱི་སྙིང་གར་གནས། །དེ་སྙིང་དབུས་སུ་འང་དྷཱིཿ་ཡིག་འབར་བས་བརྒྱན་བསམས་ཏེ། །དྲི་མེད་
དཀར་གསལ་འོད་ཚོགས་ཕྲེང་བས་བརྒྱན་པར་བསྒོམ། །སེམས་དཔའ་གཉིས་ཀྱི་གདན་གང་ཡིན། །རང་སྙིང་ཟླ་བ་རྩིབས་བརྒྱད་རྣོ། །ཤེས་རབ་རིག་པ་བརྒྱད་ཀྱིས་མཚན། །རྫ་མཁན་འཁོར་ལོ་ལྟ་བུར་འཁོར། །རབ་དཀར་སྣང་བས་མུན་སེལ་བྱེད། །རྣོན་པོས་མི་ཤེས་སྨག་རུམ་འཇིག །ཤུགས་དྲག་ལས་དང་ཉོན་མོངས་གཅོད། །ཕན་ཚུན་བཟློག་པས་འཁྲུལ་པ་འཇོམས། །ཨ་ར་པ་ཙ་ན་དྷཱིཿ་ཧཱུཾ། །ཨོཾ་གྱིས་ཐོག་མར་བརྒྱན་པ་ནི། །རིག་པའི་རྒྱལ་པོ་བརྒྱད་པར་གྲགས། །ལོ་ཕྱེད་འབྲས་བུ་མཐོང་བར་གྱུར། །གཟུགས་བརྙན་བྲག་ཅ་དེ་བཞིན་དུ། །འཇའ་ཚོན་ལྟ་བུར་སྐུ་གསུང་ཐུགས། །མི་རྟོག་གསལ་བར་གང་གིས་དྲན། །མ་ཡེངས་ཡིད་ཅན་དེ་ཡིས་འགྲུབ། །ལྡང་བར་འདོད་ཚེ་འོད་འཕྲོས་པས། །སླར་ཡང་སྲིད་གསུམ་བསྡུ་བའམ། །ཡང་ན་དངོས་གྲུབ་བླངས་ནས་སུ། །བསོད་ནམས་འགྲོ་ལ་སྦྱིན་པར་བྱ། །གང་ཕྱིར་འདི་ན་ལ་ལས་སྔོན་ཆད་དགེ་མ་བསགས། །ལ་ལས་ལམ་འཚོལ་ལ་ལས་ལེགས་སྤྱད་བར་ཆད་བྱ། །གཞན་གྱིས་དེ་བཞིན་ཡུན་རིང་ལྷ་མཆོག་མཉེས་མ་བྱས། །དེ་ཕྱིར་སྐྱེ་བོ་མ་རིག་མུན་འཐོམས་རྣམས་འཁྱམས་སྙམ། །དེ་དག་བརྩེ་བས་རབ་ཏུ་འབད་པའི་ཤུགས་ནི་འདིར་བསྐྱེད་པའི། །མཐུ་ཡིས་མངོན་གྲུབ་མཚན་མ་ཅུང་ཟད་རྙེད་པ་ལ་བརྟེན་ཏེ། །འཁོར་ལོ་དྲི་མེད་རབ་ཏུ་དཀར་རྒྱས་ཟླ་བ་ཉ་འདྲའི་ཚུལ། །བརྗོད་པས་སྐྱེ་བོ་རྣམས་ནི་འཇམ་དབྱངས་ཉིད་མྱུར་མཐོང་གྱུར་ཅིག །རྗེ་བཙུན་འཇམ་པའི་དབྱངས་ཤེས་རབ་འཁོར་ལོའི་སྒྲུབ་ཐབས། སློབ་དཔོན་ཆེན་པོ་ཙནྡྲཱ་ཀ་ར་གུཔྟས་མཛད་པ་རྫོགས་སོ།། །།པཎྜི་ཏ་ཤཱཀྱ་ཤྲཱི་བྷ་དྲ་དང་བྱམས་པ་དཔལ་གྱིས་བསྒྱུར་ཅིང་གཏན་ལ་ཕབ།།