ཕ་རོལ་དབང་དུ་བྱ་བ།
འཕགས་པ་ཐུགས་རྗེ་ཆེན་པོ་དང་ལྡན་པ་ལ་ཕྱག་འཚལ་ལོ། །ཤིན་ཏུ་སྙིང་རྗེས་ནོན་པའི་ཡིད། །ལུས་ཅན་མྱ་ངན་འདས་པ་ལས། །བསམ་པ་ཐག་པས་མགྲོན་གཉེར་པ། །དེ་ཡིས་ཕ་རོལ་བསྡུ་བར་བཤད། །ནམ་ལངས་མུན་པས་སླེབ་པ་དང༌། །གཉིད་དུ་ཉེ་བས་སད་པའི་དུས། །དགའ་དང་གདུང་བ་སྐྱེས་པ་ནི། །དེ་ནི་ཆོ་ག་སྤྱན་རས་གཟིགས། །བདག་གི་ལུས་གང་ལྷ་ཡིན་ཏེ། །དག་ནི་ཡི་གེ་བཞི་ཉིད་དོ། །རྣམ་པར་རྟོག་དང་མི་རྟོག་སེམས། །སྙིང་རྗེ་ཆེ་དང་སྟོང་པ་ཉིད། །མིག་གཉིས་ཉི་མ་འབར་བ་དང༌། །ལྕེ་སྟེང་ཨཱ་ཀཱའི་ཕྲེང་བས་བརྒྱན། །ལྟེ་བ་མེ་ཐབ་འཁྱིལ་པའི་དབུས། །དཔལ་ལྡན་འདོད་པའི་ལྷ་མོའོ། །མི་གང་དབང་དུ་བྱ་བ་དེའི། །སྨིན་ཕྲག་གཉིས་དང་ལྟེ་བའི་དབུས། །དགའ་དང་དད་དང་གདུང་བ་ཉིད། །ཐིག་ལེ་པདྨོ་ཨ་ཡི་གཟུགས། །བྱམས་པ་ཡིན་ནི་ཨ་ཡི་རྒྱུན། །བདག་གི་སྤྲུལ་པ་ལ་སྐྱེས་རེག །རབ་ཏུ་མི་བཟད་སྙིང་རྗེ་ཅན། །དགའ་བའི་ལྟ་བས་རྣམ་པར་བཞུ། །བཏང་སྙོམས་ཚད་མེད་བློ་གྲོས་ཆེ། །ཡི་གེ་ལྔ་བརྗོད་པདྨོ་འབྱེད། །ཨོཾ་ཨཱཿཧྲཱིཿཛཿཧཱུཾ། འབུམ་ཕྲག་ལྔ་རབ་མ་ཡེངས་དང༌། །ལྷག་བསམ་བར་ཆད་སྤངས་བསྙེན་
བསྒྲུབ། །བདེ་གཤེགས་རིང་བསྲེལ་སྐུ་ཁྲུས་སོགས། །བརྩེ་ལྡན་རྣམས་ཀྱིས་སྔགས་ཆུར་བཅས། །མེ་ཏོག་དམར་ཁུས་གདོང་བཀྲུས་ལ། །ལྕེ་དཀྱིལ་སྤྲང་རྩི་ལྡན་སྔགས་བརྗོད། །ཨོཾ་ཨཱཿཧྲཱིཿཤྲཱི་ལོ་ཀ་ནཱ་ཐ་མ་ཧཱ་ཀཱ་རུ་ཎི་ཀ་ཧོ། །ས་མ་ཡ་ཧཾ། ཆེ་གེ་མོ་ཙིཏྟ་མ་ཧཱ་པཱ་ར་དྷ་ཙ་ལ་ཙ་ལ་པྲ་ཙ་ལ་པྲ་ལ་ཛཿ་ཛཿཛཿ། བློ་གྲོས་བཟང་པོ་སྙིང་རྗེས་མྱོས་གྱུར་པ། །སྐྱེ་བོ་འདི་དག་ཐབས་གང་ཕྲིན་ལས་ཀྱིས། །བདེ་བར་རུང་ན་བདག་ཅིར་འགྱུར་བློའོ་ཞེས། །ཉིན་མཚན་རྟག་ཏུ་ཡིད་བྱེད་མི་འབྲལ་ན། །རྣལ་འབྱོར་རྒྱལ་པོ་བརྟག་པ་འདིས། །ཞག་གསུམ་དྲུག་གམ་དགུ་ཉིད་ན། །ལྕགས་ཀྱུས་བཞུས་པའི་ཡལ་ག་ལྟར། །གདོན་མི་ཟ་བར་དེ་དབང་འགྱུར། །ཕ་རོལ་དབང་དུ་བྱ་བ་རྫོགས་སོ།།