འཕགས་པ་འཇམ་དཔལ་ལ་བསྟོད་པ།
རྒྱ་གར་སྐད་དུ། ཨཱཪྻ་མཉྫུ་ཤྲཱི་སྟོ་ཏྲ། བོད་སྐད་དུ། འཕགས་པ་འཇམ་དཔལ་ལ་བསྟོད་པ། འཕགས་པ་འཇམ་དཔལ་ལ་ཕྱག་འཚལ་ལོ། །དཔལ་གྱི་འབྱུང་གནས་འཇམ་དཔལ་ཀུན་གྱི་དཔལ། །མཐའ་དག་བྱམས་པས་ཁྱབ་པས་འཇམ་པའི་དང༌། །འཇམ་དང་དཔལ་དུ་གྲགས་པས་དོན་དང་ལྡན། །འཇམ་དཔལ་ཡང་དག་དཔལ་ལ་ཕྱག་འཚལ་བསྟོད། །གཞོན་ནུའི་སྐུ་མདོག་གསེར་མདངས་འོད་ལམ་འབར། །རིན་ཆེན་མཆོག་གིས་བརྒྱན་པས་ས་ལེ་སྤ། །བྱིན་ཆེན་དང་བའི་ཐུགས་མངའ་འཛུམ་པ་པོ། །གཟི་བརྗིད་མཛེས་དང་ལྡན་ལ་ཕྱག་འཚལ་བསྟོད། །ཡོན་ཏན་གཏེར་གྱི་ཨུཏྤལ་ཕྱག་ན་བསྣམས། །པདྨ་རྒྱས་པའི་སྙིང་པོའི་གདན་ལ་བཞུགས། །ལྷ་ཡི་ཆ་ལུགས་ལྷ་ལས་ཁྱད་པར་འཕགས། །ལྟ་བས་མི་སྐྱོ་ཁྱོད་ལ་ཕྱག་འཚལ་བསྟོད། །གཞོན་ནུ་སྒེག་པའི་ཚུལ་དུ་གདའ་མོད་ཀྱི། །ཡེ་ཤེས་ཐོགས་མེད་མངའ་བས་ཀུན་མཁྱེན་པས། །སེམས་ཅན་དོན་ལ་ནན་ཏན་དོན་དུ་གཉེར། །འགྲོ་བ་མཐའ་དག་སྒྲོལ་ལ་ཕྱག་འཚལ་བསྟོད། །གཞོན་ནུ་སྤྲུལ་པའི་མཚན་དང་དཔེ་བྱད་ལ། །གང་གིས་ཡུད་ཙམ་མཐོང་བས་འདུན་པ་སྐྱེ། །གང་ལ་ཅིས་འདུལ་དེ་ལྟར་སྤྲུལ་མཛད་པ། །ཐབས་ཀྱིས་འདྲེན་པའི་མང་ལ་ཕྱག་འཚལ་བསྟོད། །བསམ་རྟོགས་སྤྲོས་ལ་དབེན་པས་སངས་རྒྱས་བརྙེས། །ཡོད་མེད་རྟག་ཆད་མཐའ་ལ་མི་གནས་ཤིང༌། །གཉིས་མེད་མཉམ་པས་ཆོས་ཀྱི་ཚུལ་ལ་གནས། །ཡང་དག་དོན་གྱི་མཆོག་ལ་ཕྱག་འཚལ་བསྟོད། །ཁྱོད་ནི་ཆོས་དབྱིངས་ཟབ་མོའི་འབྱུང་གནས་ཏེ། །ཡི་གེ་སྨྲ་བས་རྟོགས་པའི་ཡུལ་མེད་ཀྱང༌། །འདུལ་བའི་དབང་གིས་ཆོ་འཕྲུལ་གཟུགས་སྟོན་པ། །དམ་པས་མཐོང་བར་མཛད་ལ་ཕྱག་འཚལ་བསྟོད། །ཚུལ་བཞིན་མ་ཡིན་ཡིད་ལ་བྱེད་པ་སྤངས། །རིགས་པས་དགོན་པར་གྱུར་པའི་ཐབས་ལ་དབེན། །ཡེ་ཤེས་བདུད་རྩིའི་ཆར་གྱིས་བརླན་མཛད་ཅིང༌། །བྱང་ཆུབ་མྱུ་གུ་སྐྱེད་ལ་ཕྱག་འཚལ་བསྟོད། །བྱམས་ཆེན་འགྲན་ཟླ་མེད་པ་དག་གི་དབང༌། །མཚན་མར་སྤྲོས་པའི་རྩོད་པ་ཚར་བཅད་དེ། །ཞི་བ་མི་གཡོ་དབྱིངས་སུ་འཛུད་མཛད་པ། །འཇིག་རྟེན་དེད་དཔོན་མཆོག་ལ་ཕྱག་འཚལ་བསྟོད། །དབང་མཁྱེན་ཆེན་པོ་ཤེས་རབ་རལ་གྲི་ཡིས། །ལྟ་བ་དམན་པས་བསླད་པའི་དྲ་བ་འདྲལ། །བག་ཡངས་མི་རྟོག་དབྱིངས་སུ་ཡུན་དུ་བཞུགས། །སྐྱེ་དགུ་བདེ་བར་འགོད་
ལ་ཕྱག་འཚལ་བསྟོད། །ཁྱོད་ནི་ཆོས་དབྱིངས་ཟབ་མོའི་འབྱུང་གནས་ཏེ། །གསུང་རབ་མདོ་སྡེ་བཅུ་གཉིས་གང་ལ་ཡང༌། །གང་དུ་ཁྱོད་ཀྱིས་གསུངས་པ་ལྷག་པར་ཟབ། །ཆོས་ཉིད་དོན་མཆོག་སྟོན་ལ་ཕྱག་འཚལ་བསྟོད། །དངོས་པོ་མཚན་མར་ཆགས་པའི་དུག་འཐུངས་པས། །སྡུག་བསྔལ་ནད་ཀྱིས་བརྒྱལ་བའི་སེམས་ཅན་རྣམས། །གཉིས་མེད་རང་བཞིན་མྱ་ངན་འདས་སྟོན་པ། །བདུད་རྩི་སྟོབས་པར་མཛད་ལ་ཕྱག་འཚལ་བསྟོད། །མ་རིག་རྨོངས་པས་བསླད་པའི་མུན་རུམ་ནས། །ཐར་བའི་དུས་མེད་མུ་ཅོར་འཁྱམས་པ་ལ། །ཡེ་ཤེས་སྒྲོན་མའི་འོད་ཀྱིས་གསལ་མཛད་ནས། །སྣང་བས་ཐར་པར་མཛད་ལ་ཕྱག་འཚལ་བསྟོད། །ཡོན་ཏན་རྫོགས་ཏེ་བཙལ་བར་བྱ་མེན་པས། །ཐུགས་རྗེས་ཐུགས་དམ་བཙན་པར་གྱུར་པ་ཡང༌། །བརྩོན་འགྲུས་སྐྱོ་བ་མི་མངའ་སྲིད་པ་སེལ། །སེམས་ཅན་མཐའ་དག་སྒྲོལ་ལ་ཕྱག་འཚལ་བསྟོད། །སེམས་ཅན་མཐུན་པར་སྲིད་པ་མི་འདོར་ཞིང༌། །ཇི་ལྟར་ཉེས་པའི་སྐྱོན་གྱིས་མི་གོས་པ། །འདམ་ནས་པདྨ་གསལ་བར་འབྱུང་བ་ལྟར། །སྐྱོན་མེད་དག་པ་ཁྱོད་ལ་ཕྱག་འཚལ་བསྟོད། །སེམས་ཅན་ཟད་པའི་མཐའ་ནི་དཔག་དཀའ་སྟེ། །སྲིད་པ་སྟོངས་པར་ཐུགས་དམ་བཅས་པ་ཡིས། །ཡོན་ཏན་དེས་ན་བྱང་ཆུབ་གཞན་ལས་འཕགས། །ཐུགས་རྗེ་མཐུ་སྟོབས་ཆེ་ལ་ཕྱག་འཚལ་བསྟོད། །འཕགས་པ་འཇམ་དཔལ་ལ་ཁྱེའུ་བཅུ་དྲུག་གིས་བསྟོད་པ་རྫོགས་སོ།།