རྡོ་རྗེ་སྐར་མདའི་མན་ངག།
བཅོམ་ལྡན་འདས་འཇིག་རྟེན་མགོན་པོ་ལ་ཕྱག་འཚལ་ལོ། །དཔལ་ལྡན་འཇིག་རྟེན་མགོན་ཞབས་ཀྱི། །ཆོ་ག་ཏིང་འཛིན་རྒྱལ་པོ་ཡི། །ཡོངས་དག་ཞིང་དུ་རྣམ་པར་ཤེས། །འཕྲོ་བ་རྡོ་རྗེའི་སྐར་མདའ་བརྩམ། །ཤིན་ཏུ་ཡིད་དགའ་གྲུབ་པས་བྱིན་བརླབས་སམ། །ལྷ་མཆོག་ལེགས་གནས་ཏིང་འཛིན་གྲུབ་པའི་གཞི། །ཡང་ན་དུར་ཁྲོད་ཆུ་བོ་ཤིང་གཅིག་འགྲམ། །སྐལ་ལྡན་ཆགས་བྲལ་ཐེ་ཚོམ་མེད་པར་ཞུགས། །རྒྱ་ཆེན་མཆོད་སྦྱིན་རེ་བ་མེད་ཡིད་དག་པ་དང༌། །བཅས་ལ་རྒྱལ་བ་ལྷ་ཡི་ཕོ་བྲང་དགའ་ལྡན་དུ། །རྩེ་གཅིག་ཡིད་བྱེད་གང་ལ་ཆགས་པའི་གནས། །མེ་འོབས་དོང་ལྟར་མི་དགའ་སྐྱོ་བ་དྲག་བསྐྱེད་བྱ། །སྐྱིལ་ཀྲུང་རྒྱལ་པོ་རྡོ་རྗེའི་མདུད་པ་བརྟན་པ་ལ་གནས་ལ། །སྤྱི་བོ་སྙིང་ག་ལྟེ་དབུས་ཧཾ་དང་ཧཱུཾ་དང་ཨཾ་རིམ་བཞིན། །དཀར་དང་སྔོ་དང་དམར་པོ་འོད་འཕྲོ་རྩ་ཆེན་སྦུབས་ནང་གཞུག །ཕ་མ་སེམས་དབྱིངས་ལུས་རླུང་སྲོག་བསྡུས་ཡི་གེ་གསུམ་ལ་བསྡུ། །སྐྱེ་མེད་ལས་སྐྱེས་མེ་ཡིས་རབ་བཞུས་རྒྱལ་སྲས་འོད་འཛག་སྤྲུལ་པ་བསྐྱོད། །ལྕགས་ཀྱུ་ཞགས་པ་རྡོ་རྗེ་རླུང་གིས་ཧཾ་ཨཾ་ཧཱུཾ་གསུམ་གཅིག་གྱུར་ཅིང༌། །ཡེ་ཤེས་འོད་ཕྱུང་དྷཱུ་ཏཱིའི་ལམ་བྱུང་ཤིན་ཏུ་དམར་གསལ་དག་བྱས་ལ། །རྗེ་བཙུན་ཕྱག་མཐིལ་པད་དབུས་ཨ་ལས་འོད་སྦུབས་དམར་པོ་ཡང་དྲང་བྱ། །དེ་ལ་རྗེ་བཙུན་སྤྱན་རས་གཟིགས་ཉིད་གདུལ་བྱའི་དོན་ལ་གཅིག་ཏུ་ཐུགས་རྣམ་པར་བརྩེ་བས་བདག་གི་ལྟོས་པ་ཐམས་ཅད་ཉེ་བར་དོར་བ་ཐུགས་བསྐྱོད་པ་ནི། རིགས་ཀྱི་བུ་ཁྱོད་གང་གི་ཚེ་ཚེའི་དུས་བྱེད་པས་ཉིད་མཚམས་སྦྱོར་བའི་འཇིགས་པས་རབ་ཏུ་འཇིགས་པར་གྱུར་པ་དེའི་ཚེ། ཁོ་བོའི་ཐུགས་རྗེ་དང་བྱིན་གྱི་རླབས་ཀྱིས་ཅི་ནས་ཀྱང༌། ཁྱོད་ཇི་ལྟར་འཇིགས་པ་མེད་པ་དེ་ལྟར་ཡང་དག་པར་སྐྱོབ་པར་འགྱུར་གྱིས་ཐམས་ཅད་ཀྱི་ཐམས་ཅད་དུ་རྣམ་པ་ཐམས་ཅད་
འཁོར་བའམ་ངན་སོང་དུ་ཡང་བ་དང་འཇིགས་པར་མ་བྱེད་ཅིག །རིགས་ཀྱི་བུ་ཆེ་གེ་མོ་ཞེས་བྱ་བ་ཁྱོད་རྗེས་སུ་འཛིན་པའི་ལྷ་ནི་ང་ཡིན་ནོ་ཞེས་གསུངས་པས་དབུགས་ཕྱུང་སྟེ། ཇི་སྐད་བརྗོད་པ་དང༌། སྐྱེ་བ་དྲག་པོ་གཉིས་ཀྱིས་གནས་གཉིས་ལ་མངོན་པར་དགའ་བ་དང༌། གདུང་བ་ཉིད་དང་ལྷག་པའི་ལྷ་ལ་གུས་པ་མི་བཟད་པས་སྐྱབས་སུ་གསོལ་བ་ནི་ཐབས་ཡིན་ནོ། །དེ་ནས་སྟོབས་ལྡན་སྤྲུལ་པའི་དབུས། །ལེགས་བཅུག་དྷཱུ་ཏཱིའི་དབུས་ནས་སུ། །སྦུབས་དག་ནས་ནི་སྲན་འབྲུམ་བཞིན། །མཁས་པས་རྣམ་ཤེས་འཕྲོ་བར་བྱ། །ཚངས་དབང་ཟ་དང་འགུལ་དང་འཕྲིག །དམིགས་པ་རང་དབང་གྱུར་ཉིད་དང༌། །གསོལ་བཏབ་ངལ་བསོས་གདོན་མི་ཟ། །བརྟན་པའི་འཕྲོ་བ་གྲུབ་པའི་ལྟས། །རྡོ་རྗེ་སྐར་མདའི་མན་ངག་རྫོགས་སོ།།