གུར་ཀུམ་གཞོན་ནུ་ལྟ་བུའི་བསྟོད་པ།
སེང་གེ་མི་གཡོ་བ།
རྒྱ་གར་སྐད་དུ། ན་པ་ཀུཾ་ཀུ་མ་སྟ་བ། བོད་སྐད་དུ། གུར་ཀུམ་གཞོན་ནུ་ལྟ་བུའི་བསྟོད་པ། །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །གུར་གུམ་གཞོན་ནུའི་གེ་སར་མདངས་འདྲའི་སྐུ། །ལྷག་པར་ཆགས་ཤིང་མོས་པ་འཛིན་འདི་ནི། །འགྲོ་བ་རྗེས་སུ་ཆགས་པས་འདུལ་གཟིགས་ནས། །ཐུགས་རྗེ་ཉིད་ཀྱིས་གཞན་གྱི་དབང་དུ་བཟུང༌། །ཆར་སྤྲིན་གཞོན་དང་ཟླ་བ་ལྟ་བུའི་ཞལ། །གཉིས་ཀྱི་བར་ན་གནས་པ་རབ་མཛེས་པ། །འཆར་ཁའི་ཉི་མའི་ཟེར་གྱིས་ཕོག་པ་ཡི། །གསེར་གྱི་པདྨ་ལྟ་བུ་རོལ་པའི་ཞལ། །ཐུབ་པ་ཡན་ལག་དྲི་མེད་རིན་ཆེན་བརྒྱས། །བརྒྱན་ཅིང་ཡིད་འོད་འོད་ཟེར་རབ་འཕྲོ་བ། །ཆར་སྤྲིན་གཞོན་ནུ་གློག་གིས་བསྐོར་འདྲས་ནི། །སྤྲས་པ་ཁྱོད་ཀྱི་ཅོད་པན་སྟེང་ན་འཛིན། །འཆར་ཁའི་ཟེར་གྱིས་པདྨ་དམར་ཕོག་པའི། །
མདངས་འདྲ་དགེ་བའི་མཚན་དང་རྒྱན་གྱི་གཞི། །ཁྱོད་ཀྱི་ཕྱག་ན་རལ་གྲི་མདའ་དག་དང༌། །ཨུཏྤལ་སྔོན་པོ་དང་ནི་གཞུ་དག་འཛིན། །ཁྱོད་ཀྱི་འོད་ཀྱི་ཕུང་པོས་ཕྱོགས་མཚམས་སུ། །ཐུབ་རྣམས་རབ་སྐྱེད་ཡོན་ཏན་རབ་རྒྱས་བྱས། །ཡང་ཡང་རབ་འཕྲོས་ཡང་ཡང་རབ་བསྡུས་པས། །གདུལ་བྱའི་བློ་ཡི་མ་རིག་མུན་པ་འཇོམས། །བཅོམ་ལྡན་སྲིད་པའི་འཇིགས་པ་སེལ་མཛད་ལ། །ཚད་མེད་མཆི་མས་མིག་བརླན་བཀང་བྱས་ནས། །ཐལ་སྦྱར་སྤྱི་བཏུད་པ་སྤུ་ལངས་པ་ཡིས། །ཐུགས་རྗེ་ཅན་ལ་མོས་པས་གུས་ཕྱག་འཚལ། །སྲིད་པའི་སྡུག་བསྔལ་གྱིས་བསྡམས་འགྲོ་གསུམ་པོ། །ཐུགས་རྗེ་ཆེན་པོས་འགྲེལ་བར་མཛད་པ་ལ། །ལུས་དང་བཅས་པས་ཕྱག་འཚལ་དག་དང་ཡང༌། །ཕྱག་འཚལ་ཡིད་ཀྱིས་གུས་པས་ཕྱག་འཚལ་ལོ། །ཁྱོད་འབངས་སྐྱེ་བོ་སྐྱབས་གཞན་མ་མཆིས་པས། །འདི་ནི་ཡང་དང་ཡང་དུ་སློང་ལགས་སོ། །བདག་ནི་སྐྱེ་བ་སྐྱེ་བར་མགོན་ཁྱོད་ལ། །སྐྱབས་སུ་མཆི་ཡིས་སྲིད་པའི་སྡུག་བསྔལ་སོལ། །གུར་གུམ་གཞོན་ནུ་ལྟ་བུའི་བསྟོད་པ། སློབ་དཔོན་སེང་གེ་མི་གཡོ་བས་མཛད་པ་རྫོགས་སོ།། །།རྒྱ་གར་གྱི་མཁན་པོ་དཱི་པཾ་ཀ་ར་ཤྲཱི་ཛྙཱ་ན་དང༌། ཞུ་ཆེན་གྱི་ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།