དོན་ཡོད་ཞགས་པའི་གཏོར་མའི་ཆོ་ག།
ཤཱཀྱཤྲཱིབྷདྲ།
གཏོར་མ་ནི། རང་ཉིད་ལྷའི་རྣལ་འབྱོར་དང་ལྡན་པས། །སྣོད་གཙང་མར་ཤ་ཁྲག་དང་བྲལ་བའི་གཏོར་མ་ལེགས་པར་བཤམས་ལ། སྟོང་པའི་ངང་ལས་ཡི་གེ་པཾ་ལ་བྱུང་བའི་རིན་པོ་ཆེ་པདྨའི་སྣོད་དུ། གཏོར་མའི་རྫས་རྣམས་ཡི་གེ་ཨ་དཀར་པོ་ལས་ལྷ་རྫས་ཀྱི་བདུད་རྩིར་གྱུར་པར་བསམས་ལ། ཨོཾ་ཨཱཿ་
ཧཱུཾ་ཞེས་བརྗོད་ཅིང་ཇི་ལྟར་འདོད་པར་བྱིན་གྱིས་བརླབ་པར་བྱའོ། །དེ་ནས་རང་གི་སྙིང་གའི་ས་བོན་གྱི་འོད་ཟེར་གྱིས་འཕགས་པ་དོན་ཡོད་ཞགས་པའི་ལྷ་རྣམས་མདུན་གྱི་ནམ་མཁའ་ལ་སྤྱན་དྲངས་ལ། ཕྱག་བཙལ་ཞིང་མཆོད་པ་སྔོན་དུ་འགྲོ་བས། ལྷ་རྣམས་ཀྱི་སྟོང་པའི་རང་བཞིན་ལས་ནི་ཡི་གེ་ཧཱུཾ་ལས་དེ་ཉིད་ཀྱིས་མཚན་པའི་རྡོ་རྗེ་རྩེ་གཅིག་པ་འོད་ཟེར་གྱི་སྦུ་གུ་དང་ལྡན་པས་བདུད་རྩིའི་གཏོར་མ་འདྲེན་པར་བསམ་ཞིང༌། ཨོཾ་ཨ་མོ་གྷ་པཱ་ཤ་ཧྲཱིཿ་ཨི་མཾ་བ་ལིཾ་གྲྀཧྞ་མ་མ་སརྦ་པཱ་པཾ་ཤཱནྟིཾ་ཀུ་རུ་སྭཱཧཱ། ཞེས་ལན་ལྔའི་བར་དུ་བརྗོད་དེ། སེ་གོལ་གྱི་སྒྲ་བྱ་ཞིང་གཏོར་མ་དབུལ་པར་བྱའོ། །དེ་ནས་ཡང་དག་པར་མཆོད་ཅིང་དྲིལ་བུའི་སྒྲ་དང་ལྡན་པས་མཚན་བརྒྱ་རྩ་བརྒྱད་ཀྱིས་བསྟོད་དེ། མངོན་པར་འདོད་པའི་དོན་དུ་གསོལ་བ་གདབ་ལ། ཡི་གེ་བརྒྱ་པའི་སྔགས་བརྗོད་ཅིང་དགེ་བའི་རྩ་བ་ཡོངས་སུ་བསྔོ་སྟེ། ཨོཾ་ཁྱེད་ཀྱིས་ཞེས་བྱ་བ་ལ་སོགས་པའི་ཚིགས་སུ་བཅད་པས་གཤེགས་སུ་གསོལ་བར་བྱའོ། །དོན་ཡོད་ཞགས་པའི་གཏོར་མའི་ཆོ་ག །ཁ་ཆེའི་པཎྜི་ཏ་ཆེན་པོ་ཤཱཀྱ་ཤྲཱི་བྷ་དྲས་མཛད་བ་རྫོགས་སོ།། །།ལོ་ཙཱ་བ་དགེ་སློང་རབ་མཆོག་དཔལ་བཟང་པོས་བསྒྱུར་བའོ།།