རྟེན་འབྲེལ་གྱི་སྲུང་བ།
རྟེན་འབྲེལ་གྱི་སྲུང་བ་བཞུགས། །དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་བ། ཀླུ་རིགས་ལྔ་ལ་དུག་ལྔ་སྟེ། །འགྲོ་བ་གཞན་ལ་གནོད་པ་བྱེད། གནོད་པའི་མཚན་ཉིད་འདི་ལྟ་སྟེ། །བྲག་པར་གྲོག་པོ་གཏིང་རིངས་དང༌། །རི་ཕུག་དོག་དང་སྒོ་དོག་མོར། །མི་ཤོང་བཞིན་དུ་འཚང་བ་དང༌། །ལྷ་ཁང་ཁང་ཕྲུལ་ཉམས་མི་དགའ། །ཆུ་དང་འདམ་རྫབ་ཟག་པ་ངན། །གཡག་དང་བ་གླང་ར་ལུག་དང༌། །རི་དགས་གཅན་གཟན་ཁྱི་ཡིས་འཚེ། །གཟར་བའི་རིལ་འཛེག་འབབ་རྨི། །ལུས་དང་ཤེས་པ་ལྕི་བ་དང༌། །གཉིད་ཆེ་སེམས་སྐྱོ་སྣང་གླུ་ལེན། །སྤྲོ་ཐུང་སྙིང་མི་དགའ་བ་འོང༌། །བཅོམ་ལྡན་འདས་ཀྱིས་བཀའ་སྩལ་བ། །དེ་དག་བསྲུང་དང་གསོ་བྱའི་ཕྱིར། །རྫས་ཀྱི་སྦྱོར་བ་བསྟན་པར་བྱ། །ཐུན་མོང་སྦྱོར་བ་བཤད་བྱ་བ། །རི་དགས་ལྟེ་དྲི་འདྲེ་གསོད་ཆུ། །ནགས་ཀྱི་རྩི་དང་རྩི་བོ་ཆེ། །དྲི་ཆེན་ཉ་ཡི་མཁྲིས་པ་དང༌། །བྱི་སྐུ་བདུན་དུ་སྦྱར་བ་ཡིས། །ཀླུ་གཉན་ས་བདག་ནག་མོད་ཀོར། །འབྱུང་པོ་རྣམས་ཀྱིས་མི་ཚུགས་ཤིང༌། །མཛེ་འབྲས་ཤུ་བ་ཟ་ཀོང་དང༌། །བས་ལྡག་གཡན་པ་མེད་པ་ལ་དང༌། །གག་པ་ལྷོག་པ་རྨ་རིམས་དང༌། །ཚད་རིམས་རྒྱུ་གཟེར་འབྱུང་པོའི་ནད། །བཟའ་དང་གདགས་དང་བྱུགས་དང་བདུགས། །ཐམས་ཅད་འཇོམས་པར་བྱེད་པའི་མཆོག །ཁྱད་པར་སྦྱོར་བ་རྣམ་པ་བཞི། །ལྟེ་དྲི་ཤིང་ཀུན་ཨ་རུ་ར། །དྲི་ཆུས་སྦྱངས་ཤིང་ཁོང་དུ་བཏུང༌། །སྐད་སྙན་ཚེ་རིང་ནད་སྐོམས་སྲུང༌། །ལྟེ་དྲི་འདྲེ་གསོད་ཐང་ཆུ་དང༌། །ནགས་ཀྱི་རྩི་དང་རྩི་བོ་ཆེ། །བྱི་སྐུ་ཧ་ལ་ཛཱ་ཏི་དང༌། །ཨ་མྲྀ་ཏ་སྦྱར་བ་བཅང་བའོ། །ལྟེ་དྲི་འདྲེ་གསོད་རུ་རྟ་ནག །བདུད་རྩི་རྒྱ་ཚི་ལས་ཚིལ་དང༌། །བྱི་སྐུ་ཧ་ལ་མི་ཕག་བཅུད། །བྱུག་པའི་རྫས་སུ་བཤད་པ་ཡིན། །རུས་ཆེན་མནན་ལ་བདུག་པ་བྱ། །ཉི་མའི་འོད་ལ་མུན་པ་བཞིན། །ཇོ་བོ་རྗེ་དང༌། རྒྱ་བརྩོན་འགྲུས་སེང་གེའི་འགྱུར། །