ཨ་ར་པ་ཙ་ནའི་སྒྲུབ་ཐབས།
མི་ཕམ་བཤེས་གཉེན།
རྒྱ་གར་སྐད་དུ། ཨ་ར་པ་ཙ་ན་སཱ་དྷ་ནཾ། བོད་སྐད་དུ། ཨ་ར་པ་ཙ་ནའི་སྒྲུབ་ཐབས། བཅོམ་ལྡན་འདས་འཇམ་པའི་དབྱངས་ལ་ཕྱག་འཚལ་ལོ། །རི་བོང་འཛིན་པ་ལྟར་དཀར་ཕྱག་མཚན་གླེགས་བམ་རལ་གྲི་ཅན། །རབ་མཛེས་ཤིན་གུ་ཞི་བའི་གཞོན་ནུ་ཟུར་ཕུད་ལྔ་དང་ལྡན། །དགའ་བ་རྒྱ་ཆེར་ཐར་མཆོག་སྤྱན་ནི་པདྨའི་འདབ་སྟར་ཡོངས། །བློ་གྲོས་ངན་པ་སྲེག་མཁས་འཇམ་པའི་དབྱངས་ལ་ཕྱག་འཚལ་ནས། །ལོ་ཕྱེད་རྒྱུན་དུ་བསྒོམ་པ་མངོན་སྦྱོར་སྐྱེ་བོ་གང༌། །ངེས་པར་གནས་ཀུན་ཁོང་དུ་ཆུང་འགྱུར་མཆོག་གི་བློ། །ཐོབ་འགྱུར་ཨ་ར་པ་ཙ་ན་ནི་ལེགས་འགྲུབ་ཕྱིར། །འཁོར་ལོ་རིན་ཆེན་ཤིན་ཏུ་བསྡུས་པའི་གདམས་པ་བརྩམ། །མཉམ་ཞིང་གཙང་ལེགས་ཡིད་འོང་དྲི་ཞིམ་མེ་ཏོག་བཀྲམ། །དྲི་ཡི་ཆུས་བཏབ་ས་ཕྱོགས་འགར་ནི་སྔགས་རིག་པས། །ཤིན་ཏུ་ཉམས་དགའ་འཇམ་པའི་སྟན་ལ་ཉེར་འདུག་ནས། །བདེ་བའི་ཡིད་ཀྱིས་མཚན་མེད་བྱང་ཆུབ་སེམས་བསྒོམ་བྱ། །སྭ་བྷཱ་བ་ཤུདྡྷའི་སྔགས་བརྗོད་ཅིང༌། །དངོས་པོ་ཀུན་ནས་མ་ལུས་སྟོང་ཉིད་དུ། །རྣམ་པར་བསྒོམ་བྱ་སླར་ཡང་བདག་གི་ལུས། །སྐད་ཅིག་ཉིད་ལ་འོད་གསལ་ཉིད་དུ་བལྟ། །དེ་ནས་ནམ་མཁར་དབྱངས་ཡིག་དང་པོ་ལས། །ཟླ་བའི་དཀྱིལ་འཁོར་འོད་ཟེར་འཕྲོ་བ་སྒོམ། །དེ་ནས་དེ་ལ་དྷཱིཿ་ཡིག་ཤིན་ཏུ་དཀར། །དེ་ནི་འཇམ་དབྱངས་དྲི་མ་མེད་པར་བསྒོམ། །རྩེ་གཅིག་བསམ་
གཏན་གྱིས་ནི་པད་སྟེང་གནས། །ཆགས་བཅས་ཅུང་ཟད་འཛུམ་ཞིང་ཡིད་དུ་འོང༌། །རི་བོང་གིས་མཚན་བྱེ་བའི་འོད་ཟེར་ཅན། །རྒྱན་ཀུན་གྱིས་བརྒྱན་རབ་གསལ་བསྒོམ་པར་བྱ། །རང་གི་སྙིང་གར་རབ་འཕྲོ་ཨ་ཡིག་མཆོག་བསྒོམ་སྟེ། །འོད་ཀྱི་དྲ་བ་དཔག་མེད་རྩིབས་བརྒྱད་འཁོར་ལོའི་ཚུལ། །དེ་སྟེང་ཟླ་གཟུགས་བསྒོམ་བྱ་དེ་ལས་སྔགས་པ་ཡིས། །རི་བོང་འཛིན་འོད་ལྟར་དཀར་འཇམ་པའི་དབྱངས་དེ་ཉིད། །དེ་གཡས་སྐྲ་ཅན་གཟུགས་མཛེས་ཟུར་མིག་རྒྱས་པ་ཅན། །ཆོས་དེའི་ནུ་མ་ཟུང་ལྡན་རབ་བལྟ་གཡོན་དུ་ནི། །རབ་མཛེས་རོལ་པའི་འགྱིང་ལྡན་ཉེ་བའི་སྐྲ་ཅན་མ། །མཐའ་དག་ཡོན་ཏན་གཏེར་དག་ཙ་དང་ན་ལས་བསྒོམ། །རབ་དཀར་རེ་ཕ་ལས་བྱུང་དྲི་མ་མེད། །དྲ་བ་ཅན་གྱི་འོད་ཉིད་མདུན་དུ་བསྒོམ། །པ་ཡིག་ལས་སྐྱེས་འོད་ཟེར་རང་བཞིན་ཅན། །ཡིད་འཕྲོག་ཟླ་བའི་འོད་དེའི་རྒྱབ་ཏུ་བསྒོམ། །ཡང་ན་འོད་ཟེར་འབར་བའི་ཡི་གེ་རྣམས། །རྒྱ་ཆེར་ནུས་མཐུ་ལྡན་པ་བསྒོམ་པར་བྱ། །དེ་རྣམས་མི་ཤེས་རི་བོ་འཇོམས་བྱེད་ཅིང༌། །རྙོག་པ་མེད་པའི་ཡེ་ཤེས་བཟང་པོ་མཛད། །འོག་ཏུ་འཁོར་ལོ་མྱུར་དུ་འཁོར་བ་ལས། །གཏི་མུག་མུན་པ་ཐམས་ཅད་བཅད་པར་བསམ། །ཟླ་གཟུགས་འོད་ཟེར་ཆེན་པོའི་དྲ་བ་ཅན། །ལྷར་བཅས་གཡོ་བ་མེད་པ་ཉིད་དུ་བལྟ།། རི་བོང་གིས་མཚན་ལས་བྱུང་འོད་ཟེར་གྱི། །སྤྲིན་ཚོགས་དཔག་མེད་ཕྱོགས་བཅུར་རབ་འཕྲོས་ནས། །སེམས་ཅན་དྲི་མེད་བྱས་ནས་དེ་བཞིན་མཐར། །སླར་ལོག་བདག་ལུས་ཟླ་བ་ལ་ཞུགས་བསམ། །ཡིད་བརྟན་སྔགས་ཀྱི་སྒོ་ཅན་མན་ངག་བཞིན་བསྒོམ་ཞིང༌། །སྔགས་ཀྱི་དམ་པ་ཨ་ར་པ་ཙ་ན་བཟླས་ན། །མྱུར་དུ་བློ་ངན་སྐྱོན་བཅོམ་ཡིད་འོང་དྲི་མེད་མཆོག །རྒྱལ་བའི་ས་དང་མཆོག་གི་དབང་ཕྱུག་ཀུན་ཀྱང་ཐོབ། །མཆོག་གི་བླ་མ་དགའ་བའི་རྡོ་རྗེ་དམ་ཆོས་མཆོག་གི་མཛོད་གྱུར་པས། །བདེ་བར་གཤེགས་ཚོགས་མདུན་དུ་གང་ཞིན་ཆོ་ག་ཇི་བཞིན་དབང་བསྐུར་བའི། །བློ་གྲོས་བཞག་པོ་མི་ཕམ་བཤེས་གཉེན་དེ་ཡིས་སྐྱེ་བོ་རྣམས་ཀྱི་ནི། །བློ་གྲོས་འགྲུབ་ཕྱིར་ཨ་ར་པ་ཙ་ན་མཆོག་འཁོར་ལོའི་གཞུང་འདི་བྱས། །འཁོར་ལོའི་ཆོ་ག་མཆོག་ནི་ལེགས་བསྒྲིགས་ལས། །བསོད་ནམས་མཐའ་ཡས་དྲི་མེད་གང་ཐོབ་པ། །དེ་ཡིས་འཇིག་རྟེན་མ་ལུས་སྡིག་སྤངས་ཤིང༌། །འཇམ་དབྱངས་བདེ་བ་
གཅིག་པུར་གནས་གྱུར་ཅིག །ཨ་ར་པ་ཙ་ནའི་སྒྲུབ་ཐབས། །དངོས་གྲུབ་བརྙེས་པའི་སློབ་དཔོན་མི་ཕམ་པའི་བཤེས་གཉེན་གྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་བི་བྷཱུ་ཏི་ཙནྡྲ་དང༌། ཆག་ལོ་ཙཱ་བ་དག་སློང་ཆོས་རྗེ་དཔལ་གྱིས་བསྒྱུར་བའོ།།