ལམ་གྱི་མཐའ་བཅོ་བརྒྱད་པའི་མན་ངག།
རྡོ་རྗེ་གོ་ཆ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །ལས་ཀྱི་མཐའ་བཅོ་བརྒྱད་པའི་སྒྲུབ་ཐབས་སིལ་མར་བཤད་པ་ལ་སྤྱི་དོན་བཞིར་ཤེས་པར་བྱ་སྟེ། སྔོན་དུ་བསྙེན་པའི་ཆོ་ག་དང་ལྷ་ལྷག་པར་གནས་པ་སྟ་གོན་གྱི་ཆོ་ག་དང༌། ལས་སུ་བྱ་བ་དཀྱིལ་འཁོར་གྱི་ཆོ་ག་དང༌། མཇུག་བསྡུ་བའི་ཆོ་གའོ། །བསྙེན་པའི་ཆོ་ག་སྤྱིར་མཐུན་ནོ། །ལྷག་པར་གནས་པ་སྟ་གོན་གྱི་ཆོ་ག་ལ་ལྔ་སྟེ། སོ་སོའི་ལིངྒ་བཅའ་བ་དང༌། བདུག་པའི་རྫས། གདབ་པའི་རྫས། བྲབ་པའི་རྫས། བྱུག་པའི་རྫས་སོ། །ལས་ཀྱི་མཐའ་བཅོ་བརྒྱད་ཀྱང་ལས་བཞིར་བསྡུ་ན་ཞི་བ་ལ་ལྕེ་པོག་དཀར་པོ། རྒྱས་པ་ལ་གླ་རྩི་དང་ག་བུར། དབང་ལ་ཙནྡན་དང་གུར་གུམ། དྲག་པོ་ལ་གུ་གུལ་ནག་པོའོ། །ཞི་བ་ལ་འོ་མ་ཅན་གྱི་ཤིང༌། རྒྱས་པ་ལག་གསེར་ཅན་གྱི་ཤིང༌། དབང་ལ་ཁྲག་ཅན་གྱི་ཤིང༌། དར་པོ་ལ་དུག་ཅན་གྱི་ཤིང་ངོ༌། །སོར་བཞི་དང༌། སོར་དྲུག་དང༌། སོར་བརྒྱད་དང༌། སོར་བཅུ་གཉིས་པ་བྱ་ཞིང༌། རྩེ་མཆན་ཟླུམ་པོ་དང༌། གྲུབ་བཞི། ཟླ་གམ། ཟུར་གསུམ་མོ། །དེ་དག་ལྟེ་བ་དང༌། དཔུང་པ་དང༌། གསང་བ་དང༌། སྙིང་གར་སོ་སོར་གདབ་པོ། །གཞན་ཡང༌། ཡུངས་ཀར་ཀུན་གྱི་གཙོར་བྱས་ཏེ། །ཏིལ་དང་སྐེ་ཚེ་ཤང་ཚེ་དང༌། །ཡུངས་ཀར་བྲབ་པའི་ལས་དང་སྦྱར་རོ། །ལུས་སུ་བྱ་བ་དཀྱིལ་འཁོར་ཆེན་པོ་དང་མཐུན་པ་ལས། གྲོ་ག་འམ་རས་སམ་ཤིང་ཤུན་ལས་གང་འདོད་པའི་གཟུགས་དང་མིང་བྲིས་ཏེ། དཀྱིལ་འཁོར་ཆེན་པོའི་དབུས་སུ་གང་ཡང་རུང་བའི་ཕུར་བུས་འཛེར་ཏེ་བཞག །བཟླས་པ་ལ་བབ་པ་དང༌། ཏྲ་ཊ་ནས་སཾ་གྷའི་བར་དུ་ཡང་སྙིང་རྩ་སྔགས་སོ་སོར་སྦྱར་རོ། །གཏོར་མའི་ཆོ་ག་ཡན་ཆད་རྫོགས་ནས་མཇུག་བསྡུ་བའི་ཆོ་ག་ཤེས་པར་བྱ་སྟེ། སེམས་ཅན་གང་ཞིག་སྐྲག་པར་བྱ་བའི་ཆོ་ག་ནི། ཏྲ་ཊ་དང་སྦྱར་ཏེ་རི་མི་བདུན་དུ་བླངས་ཏེ། རྡོ་རྗེ་ཁྲོ་བོའི་སྔགས་བཟླས་ཤིང་ལན་བརྒྱ་རྩ་བརྒྱད་དུ་གུ་གུལ་ནག་པོའི་དུད་པས་བདུག་ཅིང་ཕུར་པ་སྙིང་གར་བཏབ་སྟེ། བྲབས་ནས་ཡུལ་
བཱ་རཱ་ཎ་སཱིའི་སས་བྱུགས་ནས། རི་མི་རླུང་ཆེན་པོ་ལ་ཕྱར་ན་གང་ལ་བྱ་བ་དེ་ཁོ་ན་སྐྲག་པར་འགྱུར་རོ། །དམག་གི་དཔུང་གཞིལ་བ་ནི་ཏྲོ་ཊ་དང་སྦྱར་ཏེ། སྦྱོར་བ་ཐམས་ཅད་གོང་དང་མཐུན་པ་ལས་མཇུག་བསྡུ་བའི་ཆོ་གའི་དུས་སུ་རི་མོ་བདུན་དུ་བླངས་ཏེ་ལྕེ་པོག་དཀར་པོས་བདུག།། ཕུར་པས་བཏབ་སྟེ་བྲབས་ནས་མི་རུས་ཀྱི་ཕྱེ་མས་བྱུགས་ནས་འབི་འབིའི་ནང་དུ་བཅུག་ལ་མཆོད་རྟེན་བྱས་ཏེ་མཆོད་ནས་སྐྲ་མཚམས་སུ་སྤྱི་གཙུག་ཏུ་སྦས་ན། དགྲ་བགེགས་ཀྱི་དཔུང་ཉེ་བར་ཞི་བར་འགྱུར་རོ། །རིགས་སྔགས་ཐམས་ཅད་གཅོད་པ་སྥོ་ཊ་དང་སྦྱར་ཏེ། རི་མོ་ལ་བདུག་པ་དང་བྲལ་བའི་ལས་བྱས་ནས་ཐལ་ཆེན་གྱིས་བྱུགས་ལ། མཚོན་རྣོན་པོས་གཏུབས་ལ་དུག་ཤིང་གི་མེལ་བྱད་ཀྱི་རྫས་གཉིས་དང་མར་ནག་ཏུ་བྱས་པས་སྦྱིན་སྲེག་ཏུ་བྱས་ཏེ། ཐལ་བ་ཆུ་ཆེན་པོར་གཏོར་ན་ངེས་པར་གཞན་གྱི་དམོད་པ་ཞི་བའོ། །རིག་སྔགས་ཐམས་ཅད་གནོན་པ་ནི། །སྥོ་ཊ་དང་སྦྱར་ཏེ། ཐལ་ཆེན་གྱིས་བྱུགས་པ་ཡན་ཆད་མཐུན་པ་ལས་རྫས་དང་བཅས་ཏེ་མཆོད་རྟེན་ཆེན་པོའི་འོག་ཏུ་སྦས་ན། གཞན་གྱི་རིག་སྔགས་ཐམས་ཅད་ཀྱི་མགོ་གནོན་པར་འགྱུར་རོ། །ལས་ཐམས་ཅད་འཇོམས་པ་ནི་གྷཱུརྞྞ་དང་སྦྱར་ཏེ། དེ་ནི་ལྷོ་ཕྱོགས་ཀྱི་རྒྱལ་པོ་སྟོབས་ལྡན་གྱི་རྣམ་སྨིན་མི་བཟད་པ་སྟེ། བྲམ་ཟེ་ཕུར་བུ་རིག་པ་འཛིན་པ་དང༌། མདོ་སྡེ་དང་གཟུངས་སྔགས་ལྟར་བཟླས་པའི་རྗེས་ལ་རྒྱལ་པོའི་ནད་མི་བཟད་པ་དེ་ཐམས་ཅད། སརྦྦ་བི་དྱཱ་གྷུ་རྣྣ་མཱ་ར་ཡ་ཀུ་རུ་ཡེ་སྭཱ་ཧཱ། བྲམ་ཟེ་ཆེན་པོ། བཟླས་པའི་ཡོན་ཏན་དེ་ཙམ་ན། །བསྒྲུབ་པའི་ཡོན་ཏན་བསམས་ལས་འདས། །རིག་སྔགས་རྒྱལ་པོ་དགེ་བར་གསུངས། །ཞེས་པ་དང༌། སྒྲུབ་པའི་དུས་སུ་དཀྱིལ་འཁོར་ཆེན་པོའི་ཆོ་ག་གཞུང་ལྟར་བྱས་ལ་བཟླས་པའི་དུས་སུ་ཡང་སྙིང་དང་རྩ་སྔགས་ལ་སརྦྦ་བིདྱཱ་དང་གྷུརྞྞ་སྦྱར་རོ། །འཇུག་པ་དབང་བ་སྐུར་བ་དང༌། མཇུག་གི་དོན་བྱ་བ་དང༌། བྱབ་པ་དང་བསྲུང་བ་བྱས་ནས་ཏིལ་ནག་པོའི་སྡིག་པ་བྱས་ཏེ་མཚོན་རྣོན་པོས་གཏུབས་ཏེ། ཤིང་གསར་པ་ལ་སྦྱིན་སྲེག་བྱས་པས་ངེས་པ་ཁོ་ནར་སྔོན་གྱི་ལས་བཅོམ་མོ། །གཞན་གྱི་ལས་ཐམས་ཅད་འཇིག་པར་བྱེད་པ་ནི། གྷུ་རྞྞཱ་པ་ཡ་དང་སྦྱར་ཏེ། གཞན་དག་ལས་འགྲན་སེམས་ཅན་གྱི་མིང་གང་ཡིན་པའི་རི་མོ་བྲིས་ལ། དཀྱིལ་འཁོར་ཆེན་པོའི་དབུས་སུ་གཞག་སྟེ། ཆོ་ག་ཡོངས་
སུ་རྫོགས་པར་བྱས་ཏེ། རི་མོ་མདུན་དུ་བླངས་ཏེ་བདུག་པ་དང་བྲབ་པ་བྱས་ཏེ། རོའི་སོལ་བས་བྱུགས་ནས་ཚེར་མ་ཅན་གྱི་མེ་བླངས་ཏེ་སྦྱིན་སྲེག་བྱ་སྟེ། ཐལ་བ་རླུང་ཆེན་པོ་ལ་ཕྱར་ནའོ། །དགྲ་བགེགས་བརླག་པར་བྱེད་ན་ནི། སརྦྦ་སཏྭ་ནི་ལ་སོགས་པ་ནི་གསང་བ་ཐུན་མོང་མ་ཡིན་པའོ། །གདོན་ཐམས་ཅད་ལས་ཐར་བར་བྱེད་པ་ནི་བོ་དྷི་དང་སྦྱར་ཏེ། འདི་ནི་ཐར་པར་བྱེད་པ་ཡིན་གྱི་བརླག་པར་མི་བྱེད་དེ་བཙོན་ར་ནས་ཐར་པ་དང་འདྲ་ཞེས་པའི་ཐ་ཚིག་གོ །ཐར་པར་འདོད་པའི་རི་མོ་དཀྱིལ་འཁོར་ཆེན་པོའི་དབུས་སུ་གཞག་སྟེ། ལས་ཐམས་ཅད་གོང་མ་དང་འདྲ་བ་ལས་ཕུར་པ་དང་བཅས་པ་ལ་ཆས་བྲིལ་བ་ལ། གསེར་དང་གཡུ་རྒོད་དང༌། རྡོ་རྒོད་ཆེ་བ་གཡས་རྡོ་རྗེ་དང་བཅས་པ་ལུས་སམ་མགུལ་དུ་བཏགས་ན། གདོན་ལ་སོགས་པ་ལས་ཐར་བར་འགྱུར་རོ། །འབྱུང་པོ་ཐམས་ཅད་འགུགས་པ་ནི་པ་ཤྱཾ་དབང་དུ་བྱ་བ་དངོས་སོ། །རིགས་སྔགས་ཀྱི་ལས་ཐམས་ཅད་བྱེད་དུ་འཇུག་པ་ནི་སམ་བོ་དྷ་དང་སྦྱར་ཏེ། གྲོ་ག་འམ་རས་སམ་ཤོག་བུ་ལ་གང་འདོད་ཀྱི་མིང་བྱང་བྲིས་ཏེ། དཀྱིལ་འཁོར་ཆེན་པོའི་དབུས་སུ་བཞག་སྟེ། ཆོ་ག་རྣམས་ཡོངས་སུ་རྫོགས་པ་དང༌། བདུག་པ་དང་གདབ་པ་དང༌། བྲབ་པའི་སྦྱོར་བ་བྱས་ཏེ་སྦྱར་སྤོས་དང་དྲི་སྣ་ཚོགས་པས་བྱུགས་ཏེ། ཙནྡན་ལ་སོགས་པའི་ཤིང་དྲི་བསུང་ཅན་གྱི་མེ་ལྷ་སྦྱིན་སྲེག་བྱས་ནས་སོལ་བ་དང་དེ་ཉིད་མར་དཀར་དང་བསྲེས་ཏེ། བཟའ་བ་དང་བྱུགས་པ་བྱས་ན་ངེས་པར་འགྲུབ་པོ། །མ་གྲུབ་པ་གྲུབ་པར་བྱེད་པ་ནི་པྲ་མ་དང་སྦྱར་ཏེ། གང་གྲུབ་པར་འདོད་པའི་རི་མོ་བྲིས་ལ། ཆོ་ག་གོང་མ་ཉིད་དང་མཐུན་ནོ། །ཡང་ནི་མིང་མགུལ་ཁུག་དུ་གཞུག་གོ །གྲུབ་པ་ཆུད་མི་ཟ་བར་བྱེད་པ་ནི། སཾ་བྷྲ་མ་དང་སྦྱར་ཏེ། གང་མངོན་དུ་གྱུར་པའི་ནོར་རྫས་ཀྱི་མིང་བྲིས་ཏེ། དཀྱིལ་འཁོར་ཆེན་པོའི་དབུས་སུ་གཞག་ལ་བདུག་པ་དང་གདབ་པ་དང་བྲབ་པ་རྫོགས་པ་དང་ཨ་ཤྭཏྠའི་ཁུ་བས་བྱུགས་ནས་ཟ་མ་ཏོག་ཏུ་བཅུག་ལ་རས་གཙང་མས་དཀྲིས་ནས་ཕུར་པ་དང་བཅས་ཏེ་རྒྱས་བཏབ་ལ། སྐུ་གཟུགས་སམ་མཆོད་རྟེན་གྱིས་མནན་ཏེ། ཤིང་ཏུ་དབེན་པའི་སར་བཞག་ན་ངེས་པར་ཆུད་མི་ཟའོ། །འདོད་པ་ཐམས་ཅད་རབ་ཏུ་སྦྱིན་པ་ནི་ཀུ་ཊ་དང་སྦྱར་ཏེ། དེ་ལ་ལྔ་སྟེ། བུ་སྦྱིན་པ་དང་ནོར་སྦྱིན་པ་དང༌། འབྲུ་སྦྱིན་པ་དང༌། རྐང་མགྱོགས་
སྦྱིན་པ་དང༌། ཚེ་དང་བསོད་ནམས་སྦྱིན་པའོ། །བུ་སྦྱིན་པ་ནི་བུ་འདོད་པའི་མིང་བྱང་བདུག་གདབ་བྲབ་པར་བྱ་སྟེ། ག་བུར་ལ་སོགས་པའི་དྲིས་བྱུགས་ཏེ་ལུང་ཐང་དང་བོ་དེ་ཙེ་དང་བཅས་ཏེ། སེར་པོ་ཤིང་ལ་མེ་གཏང་སྦྱིན་སྲེག་བྱ་སྟེ། སོལ་བ་འབྲུ་མར་དང་སྦྱར་ཏེ་བྱིན་ན་བུ་མེད་པ་བུ་ཡོད་པར་གྱུར་ཏེ། ནོར་དང་འབྲུ་འདོད་པ་ལ་ནོར་དང་འབྲུའི་མིང་བྲིས་ལ་བདུག་གདབ་པ་བྱ་སྟེ། ཕྱུག་པོའི་བང་མཛོད་དང༌། རྒྱལ་པོའི་དཀོར་མཛོད་ཆ་ཚང་གི་ནོར་སྣ་ཚོགས་པ་ཚངས་བྱས་ན་འགྲུབ་པོ། །དུད་འགྲོའི་མིང་བྲིས་ཏེ་ལྕགས་ལ་བཟླས་བྱིན་ན་འགྲུབ་པོ། །ཚེ་དང་བསོད་ནམས་སྦྱིན་པར་ནི་བཀྲ་ཤིས་ཀྱི་ཞལ་ཟས་ལ་བརྟེན་ཏེ། ཨཱ་ཡུ་ཝཱ་རྡྷ་ནེ་པུཥྚིཾ་ཀུ་རུ་ཡེ་སྭཱ་ཧཱ་དང་སྦྱར་རོ། །དེ་དག་ཐམས་ཅད་ལ་འཇུག་ཅིང་དབང་བསྐུར་བ་ལ་སོགས་པ་ནི་དཀྱིལ་འཁོར་ཆེན་པོ་དང་མཐུན་ནོ། །སེམས་ཅན་ཐམས་ཅད་བསྲུང་བ་ནི་སཾ་ཀུཊྚ་ཡ་དང་སྦྱར་ཏེ། དེ་ལ་ཡང་ལྔ་སྟེ། རིམས་བསྲུང་བ་དང༌། གདོན་བསྲུང་བ་དང༌། འཁོར་དང་ནོར་ཕྱུགས་བསྲུང་བ་དང༌། ལོ་ཏོག་བསྲུང་བ་དང༌། སྲིའུ་བསྲུང་བའོ། །དེ་དག་ནི་གདམས་ངག་ལས་ཤེས་པར་བྱའོ། །སེར་བ་བསྲུང་བ་ལ་སྤྱིའི་འཁོར་ལོ་ལུས་ལ་བཅིངས་ཏེ་སོ་སོའི་འཁོར་ལོ་ཐོག་ཏུ་གཟུགས་པ་དང༌། ཡང་སྙིང་རྩ་སྔགས་དྲིལ་ཏེ་གདོང་བཟློག་བྱའོ།། རེངས་པར་བྱེད་པ་ནི་གྷ་ཊ་དང་སྦྱར་ཏེ། གང་རེངས་པར་འདོད་པ་དེའི་མིང་བྲིས་ཏེ། བདུག་གདབ་བྲབ་པ་ཡན་ཆད་སོ་སོའི་ལས་ཀྱི་བྱེ་བྲག་སྤྱིར་མཐུན་པ་ལས་ཐལ་ཆེན་བྱུགས་ཏེ་ཤིང་བསྲུང་བའི་སྣ་མའི་ཤིང་དག་ལ་མེ་སྦར་ཏེ་མེ་ཏོག་ཀེར་བཙུགས་དང༌། རླུང་གི་རྟ་མོ་དང༌། རིལ་མ་ལ་སྦྱིན་སྲེག་བྱས་ནས་ཐལ་བ་བྱི་བའི་རླུད་བུར་བླུགས་ཏེ་ཡུངས་ཀར་དང་ཡུངས་ནག་ཏུ་སྦྱར་ནས་གར་གཏོར་བ་དེ་རེངས་པར་བྱེད་དོ། །རྨུགས་པར་བྱེད་པ་ནི་སཾ་གྷ་ཊཱ་ཡ་དང་སྦྱར་ཏེ། གང་རྨུགས་པར་འདོད་པའི་མིང་བྱང་བདུག་གདབ་བྲབ་པ་བྱས་ནས་ལ་ཆས་དྲིལ་ལ། རྐང་འོག་དང་ལྕེ་འོག་ཏུ་བཅུག་ན་ངེས་པ་ཁོ་ནར་རྨུགས་པར་འགྱུར་རོ། །ལས་ཀྱི་མཐའ་བཅོ་བརྒྱད་པའི་མན་ངག་སློབ་དཔོན་རྡོ་རྗེ་གོ་ཆས་མཛད་པ་རྫོགས་སོ།།