ཨ་ར་པ་ཙ་ནའི་སྒྲུབ་ཐབས།
མི་ཕམ་བཤེས་གཉེན།
རྒྱ་གར་སྐད་དུ། ཨ་ར་པ་ཙ་ན་སཱ་དྷ་ནཾ། །བོད་སྐད་དུ། །ཨ་ར་པ་ཙ་ནའི་སྒྲུབ་ཐབས། །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དཀར་པོ་རི་བོང་འཛིན་པ་དང་འདྲ་གླེགས་བམ་རལ་གྲིས་ཕྱག་མཚན་ཞིང༌། །ལེགས་པར་མཛེས་པའི་གཞོན་ནུ་ཟུར་ཕུད་ལྔ་པ་ཤིན་ཏུ་ཞི་བ་ཅན། །དགའ་བ་རབ་རྒྱས་ཐར་པའི་མཆོག་སྟེར་པདྨའི་འདབ་མ་ཡངས་པའི་སྤྱན། །ངན་པའི་བློ་གྲོས་བསྲེག་པ་ལ་མཁས་འཇམ་པའི་དབྱངས་ལ་ཕྱག་འཚལ་ལོ། །སྐྱེ་བོ་གང་དག་རྣམས་ཀྱིས་ཨ་ར་པ་ཙ་ན་ཡི་དངོས་གྲུབ་ཕྱིར། །ལོ་ཕྱེད་བར་དུ་རྒྱུན་མི་འཆད་པར་སྦྱོར་བ་བསྒོམ་པ་གང་ཡིན་པ། །མཆོག་གི་བློ་དང་ཁྱད་པར་བྱང་ཆུབ་གོ་འཕང་ངེས་པར་འཐོབ་ལྡན་པའི། །འཁོར་ལོ་རིན་པོ་ཆེ་ཡི་མན་ངག་ཤིན་ཏུ་བསྡུས་པ་བགྱི་བ་ལགས། །དྲི་ཞིམ་མེ་ཏོག་གཅལ་དུ་བཀྲམ་ཞིང་དྲི་ཡི་ཆུ་ཡིས་ཆགས་ཆག་བཏབ། །མཉམ་ཞིང་གཙང་མ་སྔགས་རིག་ཡིད་དུ་འོང་བའི་ས་ཡི་ཆ་དག་ཏུ། །ཡིད་འོང་འཇམ་པའི་སྟན་ནི་ཅི་ཡང་རུང་བ་དག་ལ་ཉེར་འདུག་ནས། །བདེ་བར་ཤིན་ཏུ་མཚན་མ་མེད་པའི་བྱང་ཆུབ་སེམས་ནི་བསྒོམ་པར་བྱ། །དངོས་དོན་དོན་དང་བཅས་པ་མ་ལུས་ཀུན་ནས་ནི། །སྟོང་པར་རྣམ་པར་བསྒོམ་བྱ་སླར་ཡང་བདག་གི་ལུས། །དེ་དང་དེ་ནི་འོད་གསལ་ཉིད་དུ་བལྟས་བྱས་ལ། །སྭ་བྷཱ་ཝ་ཤུདྡྷའི་གསང་སྔགས་ཡང་དག་བརྗོད་པར་བྱ། །དེ་ནས་རང་སྙིང་དང་པོའི་དབྱངས་ལས་བར་སྣང་དུ། །ཟླ་བའི་དཀྱིལ་འཁོར་འོད་བཟང་ལྡན་པ་བསྒོམ་པར་བྱ། །དེ་ནས་འདིར་ནི་དྷཱིཿཡིག་དུ་བརྗོད་དཀར་པོ་སྟེ། །དེ་ནི་ལྷག་པར་དྲི་མེད་འཇམ་པའི་དབྱངས་སུ་བསམ། །ཟླ་བ་བྱེ་བ་དག་དང་མཚུངས་པའི་མདངས་འཛིན་ཅིང༌། །ཀུན་ནས་འབར་བའི་རྒྱན་རྣམས་ཀྱིས་ནི་སྤྲས་པ་སྟེ། །ཆགས་དང་བཅས་པར་ཅུང་ཟད་འཛུམ་ཞིང་ཡིད་འཕྲོགས་པ། །པདྨའི་སྟེང་ན་གཅིག་ཏུ་བསམ་གཏན་དེས་པས་བཞུགས། །རང་གི་སྙིང་གར་ཨ་ཡིག་མཆོག་ལས་འཁོར་ལོ་རྩིབས་བརྒྱད་པ་ཡི་གཟུགས། །རྣམ་པར་འཕྲོ་བའི་མཉམ་
མེད་འོད་ཟེར་དྲ་བ་ཅན་ནི་ཡང་དག་བསམ། །དེ་ཡི་སྟེང་དུ་ཟླ་བའི་གཟུགས་བརྙན་དག་ལ་སྔགས་པས་བསྒོམ་བྱ་སྟེ། །དེ་ནི་རི་བོང་འཛིན་པ་ལྟ་བུའི་བླ་མ་འཇམ་དཔལ་དབྱངས་ཉིད་དོ། །གཡས་སུ་མཛེས་པའི་གཟུགས་ལྡན་སྐྲ་ཅན་མ་ནི་རྣམ་པར་འཛུམ་པ་དང༌། །ཤིན་ཏུ་རྒྱས་པའི་ནུ་མ་ཟུང་ལྡན་ཟུར་གྱིས་དེ་ལས་བལྟ་བ་སྟེ། །ཤིན་ཏུ་མཛེས་ཤིང་སྒེག་པའི་ལུས་ལ་ཉེ་བའི་སྐྲ་ཅན་གཡོན་ལོགས་སུ། །མཐའ་དག་ཡོན་ཏན་གཏེར་དུ་གྱུར་པ་ཙ་ན་དག་ལས་བསྒོམ་པར་བྱ། །དྲི་མེད་ལེགས་པར་དཀར་བ་དྲ་བ་ཅན་གྱི་འོད། །རེ་ཕ་ལས་བྱུང་མདུན་དུ་ངེས་པར་བསམ་པ་ཉིད། །འོད་ཀྱི་རང་བཞིན་ཡིད་འཕྲོག་ཟླ་བའི་འོད་ཅན་ནི། །པ་ཡི་ཡི་གེ་ལས་སྐྱེས་རྒྱབ་ཏུ་གཞག་པར་བྱ། །ཡང་ན་ཡི་གེ་བཀོད་པའི་འོད་ཟེར་འབར་བ་ཡི། །རྒྱ་ཆེར་རབ་ཏུ་སྣང་བ་ངེས་པས་རྣམ་བསྒོམ་བྱ། །དེས་ནི་མི་ཤེས་རི་བོ་འཇོམས་པར་འགྱུར་བ་དང༌། ཡིད་ནི་རྙོག་པ་མེད་པའི་ཡེ་ཤེས་དམ་པར་བྱེད། །གཏི་མུག་མུན་ནག་ཀུན་ནས་རྣམ་པར་འཇོམས་པ་ཡི། །ཟླ་བའི་གཟུགས་བརྙན་དང་འདྲ་འོད་ཟེར་དྲ་བ་ཅན། །འོག་གི་འཁོར་ལོ་མྱུར་དུ་འཁོར་བར་བསམ་བྱ་ཞིང༌། །ལྷ་དེ་རྣམས་ནི་གཡོ་བ་མེད་པ་ཉིད་དུ་བལྟ། །རི་བོང་ཅན་ལྟའི་འོད་ཟེར་སྤྲིན་ནི་རྒྱ་ཆེན་པོ།། ཕྱུང་ནས་ཕྱོགས་བཅུ་པོ་རྣམས་གསལ་བར་གྱུར་པ་ཡིས། །རང་ལུས་བཞིན་དུ་སེམས་ཅན་རྣམས་ནི་བརྒྱན་བྱས་ཏེ། །སླར་ཡང་འོངས་པ་སྙིང་གའི་ཟླ་བ་ལ་གཞུག་བྱ། །སྔགས་པས་གསང་སྔགས་དམ་པ་ཨ་ར་པ་ཙ་ན་ནི་ལེགས་ཟློས་ཤིང༌། །བརྟན་པའི་བློ་ཡིས་མན་ངག་བསྒོམས་ལས་བློ་ངན་སྡུག་བསྔལ་རབ་བཅོམ་སྟེ། །ཡིད་ཀྱི་ཤེས་པ་དྲི་མེད་དག་དང་ཕ་རོལ་ཕྱིན་པ་རྣམས་དང་ཡང༌། །མཆོག་ཏུ་གྱུར་པའི་ས་རྣམས་དང་ནི་གང་དེས་རྒྱལ་བ་ཐོབ་པར་འགྱུར། །དམ་པའི་ཆོས་ཀྱི་མཛོད་གྱུར་བླ་མ་དམ་པ་དགའ་མཆོག་རྡོ་རྗེ་ཡིས། །བདེ་གཤེགས་ཚོགས་ཀྱི་སྤྱན་སྔར་ཆོ་གས་གང་ཞིག་མངོན་པར་དབང་བསྐུར་བ། །བློ་བཟང་མི་ཕམ་བཤེས་གཉེན་དེས་ནི་སྐྱེ་བོས་བློ་མཆོག་གྲུབ་བྱའི་ཕྱིར། །ཨ་ར་པ་ཙ་ན་ཡི་འཁོར་ལོ་གཞུང་དུ་ཡང་དག་སྦྱར་བ་ཡིན། །འཁོར་ལོའི་ཆོ་ག་བཟང་པོ་གཞུང་མཆོག་ཏུ་སྦྱར་བས། །བསོད་ནམས་རྒྱ་ཆེན་ཀུན་ནས་བདག་གིས་ཐོབ་གྱུར་པ། །གང་ཡིན་དེས་ནི་
འཇིག་རྟེན་ཉོན་མོངས་ལས་རྒྱལ་ཞིང༌། །ངེས་པའི་བདེ་བ་གཅིག་པུ་འཇམ་པའི་དབྱངས་གྱུར་ཅིག །ཨ་ར་པ་ཙ་ནའི་སྒྲུབ་ཐབས་སློབ་དཔོན་ཆེན་པོ་མི་ཕམ་བཤེས་གཉེན་གྱིས་མཛད་པ་རྫོགས་སོ།། །།ལྷག་པའི་ལྷ་འདི་ཉིད་ཀྱིས་མངོན་སུམ་དུ་བྱིན་གྱིས་བརླབས་པའི་པཎྜི་ཏ་ཆེན་པོ་ཤྲཱི་བ་ན་རཏྣའི་ཞལ་སྔ་ནས་ཀྱི་བཀའ་དྲིན་ལས། ལེགས་པར་སྦྱར་བའི་སྐད་གྱི་ཆ་ཤས་རིག་པ་དགེ་སློང་རྒྱ་མཚོའི་སྡེས་འགྱུར་རྙིང་ལས་ཅུང་ཟད་བཅོས་ཤིང༌། །རྒྱ་དཔེའི་རྐང་པ་དང་མཐུན་པར། །དཔལ་གནོད་གནས་ཀྱི་གཙུག་ལག་ཆེན་པོར་བསྒྱུར་བའོ།།