འཕགས་པ་རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་གཏོར་མའི་ཆོ་གའི་རིམ་པ།
སངས་རྒྱས་གསང་བ།
རྒྱ་གར་སྐད་དུ། ཨཱཪྻ་བཛྲ་བི་དཱ་ར་ཎ་ནཱ་མ་དྷཱ་ར་ཎི་བ་ལིཾ་བི་དྷི་ཀྲ་མ་ནཱ་མ། བོད་སྐད་དུ། འཕགས་པ་རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་གཏོར་མའི་ཆོ་གའི་རིམ་པ་ཞེས་བྱ་བ། འཕགས་པ་འཇམ་དཔལ་ལ་ཕྱག་འཚལ་ལོ། །དོན་རྣམས་མ་ལུས་རབ་མཛད་པའི། །རྡོ་རྗེ་རྣམ་འཇོམས་ཕྱག་འཚལ་ཏེ། །རྣལ་འབྱོར་ཀུན་ལ་ཕན་བསྐྱེད་པའི། །གཏོར་མའི་ཆོ་ག་མདོར་བསྡུས་བཤད། །བར་ཆད་ཞི་དང་ཚོགས་བསགས་དང༌། །འདོད་པ་ཐམས་ཅད་རབ་བསྒྲུབ་ཕྱིར། །ཟླ་བ་ཞག་དང་ཐུན་མཚམས་ལ། །ཡོ་བྱད་ཅི་འབྱོར་གཏོར་མ་གཏང༌། །གཏོར་མའི་ཆོ་ག་རྒྱས་པ་ནི། །བླང་བྱས་གཡོ་ཡིག་གསུམ་ལྟར་བྱས། །རྣལ་འབྱོར་དོན་ཕྱིར་བསྡུས་པ་འདི། །བདག་བྱས་ཆོ་གས་ཀུན་ལ་འགྲོ། །དེ་བས་སོ་སོའི་ལྷ་ཚོགས་དང༌། །ཞི་སོགས་གང་འདོད་ལྷ་ཚོགས་བསྒྱུར། །མདུན་དུ་མཎྜལ་ལེགས་བྱས་ཏེ། །ཕྱོགས་སྐྱོང་བགེགས་ལ་མེ་ཏོག་དབུལ། །རྒྱལ་ལ་སོགས་པ་དེ་བཞིན་ཏེ། །ཁྲི་སྟེངས་རིན་ཆེན་སྣོད་གཙང་མ། །འབྲས་ཆན་ཁུར་བ་ཤ་སོགས་པའི། །གཏོར་མ་གསུམ་མ་མ་གཅིག་དག་སྟེ། །མཆོད་ཡོན་མཆོད་ལྔ་བཅས་པའོ། །སྔགས་པ་ཁྲུས་བྱས་གོས་གཙང་གྱོན། །ཡི་དམ་ལྷར་གནས་བགེགས་བསལ་ནས། །ཡང་སྙིང་གིས་སམ་ཡིག་གསུམ་གྱིས། །བདུད་རྩིར་བྱིན་རླབས་ནམ་མཁའ་མཛོད། །དེ་ཡི་སྔགས་དང་ཕྱག་རྒྱ་སྤེལ། །དེ་ནས་དགུག་བྱེད་ཕྱག་རྒྱ་དང༌། །ཛཿ་ཞེས་པ་ཡིས་
ཕྱོགས་སྐྱོང་བགེགས། །བཀྲ་ཤིས་ལྷ་མོ་བཅས་ཏེ་དགུག །མེ་ཏོག་སྟན་ལ་རབ་བཞག་ནས། །ཡུམ་གྱི་རྒྱས་གདབ་དམ་ཚིག་བསྟན། །བསང་གཏོར་མཆོད་ཡོན་མཆོད་ལྔ་དབུལ། །དེ་ལས་ལག་གཡས་སྙིང་གར་གཏད། །གཡོན་པ་རྩེ་གསུམ་གཏོར་མར་བསྟན། །སེ་གོལ་བརྡབ་ཅིང་སྔགས་འདིས་དབུལ། །ཨོཾ་བཛྲ་ཨཱཿཧཱུཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱ་ནུཏྤནྣ་ཏྭཱ་ཏ་ད་ཤ་དི་ཀ་ལོ་ཀ་པཱ་ལ་དྷྲྀཀ །སརྦ་བིགྷྣཱཾ། མཾ་ག་ལ་དེ་ཝཱི་ཨཥྚ་ས་པ་རི་བཱ་ར་བ་ལཱིཾ་པཱུ་ཛ་ཁཱ་ཧི། མ་མ་སརྦ་ཀརྨྨཱ་སཱ་དྷ་ཡ་ཧཱུཾ་ཧཱུཾ་ཧཱུཾ། ལན་གསུམ་བརྗོད་ལ་གཏོར་མ་དེ། །བདུད་རྩི་འདོད་ཡོན་ལྔ་ལྡན་པར། །རྡོ་རྗེ་ཞལ་དུ་རང་སྔགས་ཀྱིས། །དྲངས་པས་སྦྱིན་པ་གཉིས་རྫོགས་བསམ། །སྦྱིན་པ་གཉིས་རྫོགས་ཚིགས་བཅད་བརྗོད། །དབང་པོ་རྡོ་རྗེ་འཆང་སོགས་ཀྱིས། །ཕྱོགས་སྐྱོང་དག་ལ་བསྟོད་པ་བྱ། །བགེགས་ལ་བཀའ་བསྒོ་ལྷ་མོ་ལ། །བཀྲ་ཤིས་གསོལ་གདབ་ཀུན་ལ་ཡང༌། །ཞི་བ་ལ་སོགས་གང་འདོད་ཞུ། །མཆོད་པས་མཆོད་དེ་སེ་གོལ་སྒྲ། །ཡི་གེ་བརྒྱ་པ་མུཿ་བཅས་པས། །བཟོད་གསོལ་རང་གནས་གཤེགས་སུ་གསོལ། །གཏོར་མ་ཐག་རིང་གནས་བཅས་བཞག །དྲི་མ་མ་ཡལ་འབྱུང་པོ་མཉེས། །དེ་བས་ཁྱི་བྱ་དག་ལ་མིན།། འདི་ནི་གང་འདོད་ལས་འགྲུབ་སྟེ། །རང་གི་ལས་ཞེས་གསུངས་པས་ན། །འབད་དེ་སྒྲུབ་པ་ཀུན་ཞུགས་པའི། །རྣལ་འབྱོར་བ་ཡིས་གུས་བྱས་ན། །དངོས་གྲུབ་རྣམ་གཉིས་གྲོགས་སུ་འགྱུར། །སངས་རྒྱས་གསང་བ་བདག་གིས་ནི། །འཇམ་དཔལ་གོ་ཆས་གསོལ་བཏབ་ནས། །གཏོར་མའི་རིམ་པ་བསྡུས་པ་ཡིས། །དགེ་བས་ཀུན་ཀྱང་གྲོལ་བར་ཤོག །འཕགས་པ་རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་གཏོར་མའི་ཆོ་གའི་རིམ་པ་སློབ་དཔོན་ཆེན་པོ་སངས་རྒྱས་གསང་བས་མཛད་པ་རྫོགས་སོ།། །།རྒྱ་གར་གྱི་མཁན་པོ་དེ་ཉིད་དང༌། ལོ་ཙཱ་བ་དཔའ་མཉྫུ་ཤྲཱི་ཝརྨས་བསྒྱུར་བའོ།།