འཇིག་རྟེན་མགོན་པོའི་བསྟོད་པ་ཡིད་འཕྲོག་སྡིག་འཇོམས།
ཙནྡྲགོམིན།
རྒྱ་གར་སྐད་དུ། པཱ་པ་བི་དཱ་ར་ཎ་མན་ཧ་ར་ནཱ་མ་ལོ་ཀ་ནཱ་ཐ་སྟོ་ཏྲ། བོད་སྐད་དུ། །འཇིག་རྟེན་མགོན་པོའི་བསྟོད་པ་ཡིད་འཕྲོག་སྡིག་འཇོམས་ཞེས་བྱ་བ། ཐུགས་རྗེ་ཆེན་པོ་ལ་ཕྱག་འཚལ་ལོ། །ལྷ་དང་ལྷ་མིན་མི་ཡིས་ཞབས་ལ་ཕྱག་བྱས་ཤིང༌། །སྐྱེ་རྒ་ན་འཆི་མ་ལུས་རབ་ཏུ་འཇོམས་པའི་སྐུ། །འཇིག་རྟེན་དབང་ཕྱུག་ཐུགས་རྗེ་ལྡན་པ་ཁྱོད་ཀྱིས་ནི། །མགོན་མེད་བདག་ལ་བསྲུང་མཛད་ཐུགས་རྗེ་མཛད་དུ་གསོལ། །འཁོར་བའི་རྒྱ་མཚོའི་ཀློང་དཀྱིལ་དུ་ནི་ནུབ་གྱིར་ཏེ། །ཉོན་མོངས་དབའ་རླབས་ཀྱིས་ནི་ཡང་དག་ཉམས་ཉེས་ཤིང༌། །ཚོ་ངེས་འདེབས་པ་བདག་ལ་བཏང་སྙོམས་མ་མཛད་པར། །ཁྱོད་ལ་བསྟོད་བགྱིད་ཐུགས་རྗེ་ཆེན་པོས་བསྲུང་དུ་གསོལ། །སྲིད་པའི་རབ་རིབ་ཀྱིས་ནི་བློ་མིག་ཉེར་གཙེས་ཤིང༌། །འཆི་བའི་འཇིགས་པ་ཡིས་ནི་ལུས་སེམས་གཡེངས་གྱུར་པ། །ཇི་སྲིད་མི་བཟད་མནར་མེད་གནས་སུམ་ལྷུང་བ། །བཅོམ་ལྡན་སྤྱན་རས་གཟིགས་ཀྱིས་བདག་ལ་བསྐྱབ་ཏུ་གསོལ། །རྨོངས་པས་རྒྱུན་དུ་གཞན་གྱི་བུད་མེད་བསྟེན་བགྱིས་དང༌། །སྲོག་ཆགས་སྟོང་ཕྲག་སྲོག་དང་བྲལ་བ་ལ་སོགས་པ། །མགོན་པོ་བདག་གིས་སྡུག་བསྔལ་རྒྱུ་ནི་ཚང་བར་བགྱིས། །ལུས་ཀྱི་ཉེས་པ་དེ་དག་ཡང་དག་སྦྱང་དུ་གསོལ། །གང་ཞིག་བཀུར་སྟིའི་ཆེད་དང་འཚོ་བའི་ཆེད་དུ་ནི། །འཇིག་རྟེན་མི་བདེན་བརྫུན་ཚིག་བརླང་པོ་ལ་སོགས་པ། །འཇིག་རྟེན་དབང་ཕྱུག་ངག་གི་ཉེས་པའི་ཀུན་སྦྱོར་ཡང༌། །དམྱལ་བའི་རྒྱུ་དེ་ཡུན་རིངས་མ་ལུས་གོམས་པར་བགྱིས། །སེམས་ཅན་རྣམས་ལ་རང་གིས་གནོད་པ་གང་བགྱིས་དང༌། །གཞན་གྱིས་བགྱིས་པ་ལ་ནི་རྗེས་སུ་ཡི་རང་བའི། །བདག་གིས་ཡིད་ཀྱི་སྡིག་དེ་དག་ནི་སྨྲེ་སྔགས་སུ། །འདོན་ཞིང་མཆིས་པས་བསལ་དུ་གསོལ་དང་མགོན་པོ་ཀྱེ། །ལྷ་དང་མི་དང་ལྷ་མིན་སྐྱེ་བ་རྣམས་དང་ནི། །དུད་འགྲོ་དང་ནི་དམྱལ་བ་ཡི་དགས་རྣམས་སུ་ཡང༌། །སྡུག་བསྔལ་དང་བཅས་འགྲོ་བ་གང་གནས་དེ་དག་ལ།། བསྲུང་བ་མཛད་ཅེས་ཁྱོད་ཀྱི་ལོ་རྒྱུས་བདག་ལ་ཁུམས། །དེས་ན་བདག་ལ་
ཐུགས་རྗེ་ཡང་དག་མཛད་དུ་གསོལ། །གཡར་ལུས་དར་ལ་བབ་པ་ཡལ་བར་ཉམས་ལ་ཁད། །དེ་ཕྱིར་ཇི་སྲིད་དམྱལ་བའི་གནས་སུ་མ་ཞུགས་པར། །བཅོམ་ལྡན་ཁྱོད་ནི་བདག་གིས་ཞུ་བ་གསན་པར་མཛོད། །གཞན་ཡང་གཞན་དོན་ལ་ནི་རང་ཉིད་གཤེགས་མཛད་ན། །བསོད་ནམས་མ་བསགས་བདག་ནི་སྤྱན་སྡར་མཆིས་ཀྱང་སྤོང༌། །ཁྱོད་ཀྱི་ཐུགས་རྗེ་བསོད་ནམས་དག་ལ་ལྟོས་སམ་ཅི། །སྡུག་བསྔལ་མེད་ལ་སྙིང་རྗེ་བྱ་བར་སུ་ལགས་ན། །དྲན་པ་ཙམ་གྱིས་ཁྱོད་ནི་ཡོངས་སུ་མཉེས་ནས་སུ། །སྡིག་ཟད་མཛད་ཅེས་བདག་གིས་མ་ཁུམས་ལགས་སམ་ཅི།། དེ་ཕྱིར་བཅོམ་ལྡན་གཞན་ཕན་མཛད་ལ་ཕུལ་དུ་བྱུང༌། །བདག་འདིར་མ་དོར་བསྲུང་དང་བསྐྱབ་པ་མཛད་དུ་གསོལ། །གླང་ཆེན་དག་དང་ནོར་བུ་སྲས་བཅས་བཙུན་མོ་དང༌། །གནོད་མེད་རྒྱལ་སྲིད་ཁང་བཟངས་རྣམ་པར་བཀྲ་བ་དང༌། །ཤ་དང་རུས་པ་དབུ་ནི་སྐུ་མཚལ་མཐར་ཐུག་བཏང༌། །གྲུབ་པའི་མིག་སྨན་རྐང་པ་བྱུག་པ་དག་དང་ནི། །གྲུབ་པའི་གནོད་སྦྱིན་དང་ནི་གནོད་སྦྱིན་མོ་དག་ཀྱང༌། །འཇིག་རྟེན་མངའ་བདག་ཁྱོད་ནི་མཉེས་པར་གང་སུ་དག །དོན་གཉེར་རྣམས་ལ་མཐར་ཐུག་མ་མཆིས་སྦྱིན་པར་མཛད། །གང་དག་རྐང་པ་ལག་པ་མིག་དང་བྲལ་རྣམས་དང༌། །སྣ་ཚོགས་བྲོ་འཚལ་གྱིས་ནི་འཇིགས་པ་དང་བཅས་རྣམས། །ཡོན་ཏན་ཟབ་མོ་ཁྱོད་མཉེས་པ་ཡིས་དེ་དག་གི །ཡན་ལག་སོབས་འགྱུར་བྲོ་འཚལ་དག་ཀྱང་ཞི་བར་འགྱུར། །མཁའ་ལྡིང་སྤྲུལ་གདུག་གནོད་དང་མཁའ་འགྲོ་མ་དང་ནི། །རྣལ་འབྱོར་མ་ཡི་གནོད་ཀུན་རྟག་ཏུ་ཞི་མཛད་ཅིང༌། །རྒྱལ་བ་ཁྱོད་ཀྱིས་གང་ལ་དགོངས་པ་དེ་ལ་ནི།། གཤིན་རྗེའི་ཕོ་ཉ་རྨི་ལམ་དུ་ཡང་མཐོང་མི་འགྱུར། །མགོན་པོ་བདག་ནི་འཇིགས་པས་རྣམ་པར་གཡེངས་པ་ཡིས། །ཉིན་དང་མཚན་དུ་ལག་པ་གྱེན་དུ་བརྐྱང་སྟེ་དུ། །འཇིག་རྟེན་དབང་ཕྱུག་དེས་ན་བདག་ནི་འགུམས་པ་དང༌། །ཉེ་བ་ལགས་ན་བཅོམ་ལྡན་སྐྱབས་མེད་འབོར་རམ་ཅི། །ཡུལ་དང་དབང་པོ་གདུལ་དཀའ་སེམས་ཀྱང་གཡོ་བ་དང༌། །མཉམ་པར་མ་བཞག་ལུས་ཀྱིས་སྡིག་པ་མང་པོ་བགྱིས། །ཉམས་པ་བདག་གི་འཁོར་བཞིན་དུ་ནི་སྐྱེ་བ་འདིར། །ཐམས་ཅད་ཀྱིས་ནི་སྡིག་པ་འབའ་ཞིག་བསྒྲུབས་པར་ཟད། །དེ་ཕྱིར་ད་ལྟར་ཁྱོད་ལ་ཐལ་མོ་སྦྱར་ནས་ནི། །འཇིག་རྟེན་དབང་ཕྱུག་གང་གིས་
ངན་སོང་སྡུག་བསྔལ་དག །མྱོང་མི་འགྱུར་བར་ཁྱོད་ཀྱི་སྤྱན་སྔར་བདེ་འགྲོར་ནི། །མཆི་བར་བདག་ཞུ་འདི་ནི་གནང་བར་མཛད་དུ་གསོལ། །ཁྱོད་ནི་འདོད་ཆགས་ཞེ་སྡང་རྣམ་པར་འཇོམས་པའི་སྐུ། །ཁྱོད་ནི་འཁོར་བའི་མཚོ་ཆེན་གྱི་ནི་ཆུ་ལོན་ལགས། །ཁྱོད་ནི་ལྟུང་བས་སྐྲག་པ་འདྲེན་པའི་ལག་པ་སྟེ།། ཁྱོད་ནི་བརྗེད་བཅས་མི་དགེ་འཛིན་པའི་སྒྲ་གཅན་ལགས། །ཁྱོད་ནི་བདེ་གཤེགས་བླ་མེད་དེ་ཉིད་སྟོན་པ་པོ། །ཁྱོད་ནི་སྡུག་བསྔལ་མང་ལྡན་འགྲོ་བའི་སྐྱོབ་བྱེད་ཡིན། །ཁྱོད་ནི་ཡིད་འཇོམས་གདུལ་དཀའི་བདུད་ལས་ངེས་བརྒལ་བ། །ཁྱོད་ནི་སྲིད་པའི་རྒྱ་མཚོའི་ཕ་རོལ་བརྒལ་བ་ལགས། །ཁྱོད་ནི་ནད་པ་མ་ལུས་ནད་ནི་རྒྱུན་གཅོད་སྐུ། །ཁྱོད་ཀྱི་སྐུ་ནི་འགྲོ་བའི་ནང་ན་མཆོག་ཏུ་མཛེས། །ཁྱོད་ནི་དཔེ་མེད་ཐུགས་རྗེའི་རྒྱ་མཚོ་ཆེན་པོ་སྟེ། །ཁྱོད་ནི་རྒྱུ་མེད་གཉེན་དུ་འགྲོ་བ་རྣམས་ཀྱིས་རྟོགས། །ཁྱོད་ཀྱིས་གཡོ་བའི་དབང་པོ་འབད་ཕ་མེད་པར་བཏུལ། །ཁྱོད་ནི་ཡུལ་ལ་ཆགས་པ་ཡོངས་སུ་བཅོམ་པ་ལགས། །ཁྱོད་ཀྱི་ཐུགས་ནི་བསམ་གཏན་མཆོག་ལ་མཉམ་པར་བཞག །ཁྱོད་ཀྱི་ཐུགས་ནི་སོང་བ་ཀུན་ལ་སྙོམས་པར་མཛད། །ཐུགས་རྗེ་ལྡན་པ་གཞན་ལ་ཕན་པར་མཛད་ཀྱང་ནི། །མི་རིག་སྦྲུལ་ཆེན་རྒྱབ་ཏུ་ཞོན་ནས་ཡུལ་རྣམས་ཀྱི། །འདོད་པས་དགེ་བ་ཉམས་པར་གྱུར་པ་བདག་ལ་འདིར། །ཁྱོད་ནི་གང་གིས་ཡོངས་སུ་དགྱེས་པར་མི་མཛད་ལགས། །ཁྱོད་ཀྱི་སྤྱན་སྔར་གཡར་ཆབ་འབྱིན་ཅིང་སྨྲེ་བ་ཡི། །སྡིག་ལྡན་བདག་ལ་གང་གིས་བསྲུང་བ་མི་མཛད་ན། །མགོན་པོ་འགྲོ་བ་ཀུན་རྟེན་ཐུགས་རྗེ་གང་ལགས་པ། དེ་ཅི་ཁྱོད་ཀྱིས་ཉི་ཚེ་བ་རུ་བསྐྱེད་ལགས་སམ། །མགོན་པོ་ཁྱོད་ཀྱི་ཐུགས་རྗེས་ནམ་མཁའ་ཁྱབ་པ་ཡི། །སྤྲིན་བྱུང་ཆར་པའི་རྒྱུན་ནི་ཆུ་དང་སྐམ་དག་དང༌། །མཐོ་ན་དམན་ཡུལ་ནི་ཀུན་འབབ་ཅིང་སེམས་ཅན་གྱི། །དོན་དུ་ཀུན་ལ་ཉིན་མཚན་རྒྱུན་མི་འཆད་དུ་འཇུག །དེ་ལྟར་བཅོམ་ལྡན་དྲན་པའི་བདག་གི་བསོད་ནམས་གང༌། །དེས་ནི་འགྲོ་བའི་སྡུག་བསྔལ་མང་ལྡན་དེ་དག་གིས། །འགྲོ་ནང་མཛེས་པ་རྣམ་མང་རྣམ་པར་རོལ་པ་ཡི། །པོ་ཏ་ལ་ཡི་རི་རྩེར་གནས་པ་ཐོབ་པར་ཤོག །འཇིག་རྟེན་དབང་ཕྱུག་གི་བསྟོད་པ་ཡིད་འཕྲོག་སྡིག་འཇོམས་ཞེས་བྱ་བ། ཤར་ཕྱོགས་བ་རེན་ཌའི་སློབ་དཔོན་མཁས་པ་ཆེན་པོ་ཙནྡྲ་གོ་མིས་མཛད་པ་རྫོགས་སོ།། །།རྒྱ་གར་ཤར་ཕྱོགས་བ་རེན་ཌའི་ཛཱ་ག་ལའི་པཎྜི་ཏ་ཆེན་པོ་དཱ་ན་ཤཱི་ལས་བསྒྱུར་བ།།