ཐུགས་རྗེ་ཆེན་པོ་ལ་བསྟོད་ཅིང་བསྐུལ་བ།
ཟླ་བ།
རྒྱ་གར་སྐད་དུ། མ་ཧཱ་ཀཱ་རུ་ཎཱི་ཀ་སྟོ་ཏྲ་ཙོ་ད་ནཾ། བོད་སྐད་དུ། ཐུགས་རྗེ་ཆེན་པོ་ལ་བསྟོད་ཅིང་བསྐུལ་བ། །བཅོམ་ལྡན་འདས་ཐུགས་རྗེ་ཆེན་པོ་ལ་ཕྱག་འཚལ་ལོ། །ཐུགས་རྗེ་ཆགས་པས་རྣམ་གཟིགས་བཅོམ་ལྡན་འདས། །སྤྱན་རས་ཀྱིས་གཟིགས་སྤྱན་ཟུར་བདག་ལ་གཟིགས། །སྤྱན་ཟུར་གཟིགས་པ་ཙམ་གྱིས་འགྲོ་རྣམས་ཀྱི། །སྡུག་བསྔལ་ཉམ་ཐག་ཞི་མཛད་ཁྱོད་ལ་མངའ། །མཐའ་མེད་གཡང་སར་ལྷུང་ནས་ས་འོག་གི །མུན་ནག་ཐིབས་པོར་གཏན་དུ་འཁྱམས་པ་བདག །ཉམ་ཐག་ཕོངས་པས་ཐུགས་རྗེ་མཆོག་སྦྱིན་ཅིང༌། །ཡོངས་སུ་བསྐྱབ་པའི་དུས་ལ་དི་རིང་བབ། །སྡུག་ཕོངས་གང་གིས་ང་ནི་དྲན་བྱས་ན། །དེ་ཡི་ཉམ་ཐག་ང་ཡིས་བསལ་ལོ་ཞེས། །ཁྱོད་ཀྱིས་ཞལ་བཞེས་མངོན་མཛད་དེང་བདག་གི །ཉམ་ཐག་བསལ་ཏེ་འབྲས་བུ་མཆིས་པར་མཛོད། །མཐོང་དང་ཐོས་དང་རེག་དང་དྲན་པ་ཡིས། །ནད་གདོན་ཐམས་ཅད་ངས་བསལ་ཞེས་གསུངས་པས། །ནད་ཀྱིས་གདུངས་པའི་འགྲོ་བ་བདག་ཅག་ལའང༌། །མཆོག་སྦྱིན་ཉིད་ཀྱིས་ཞལ་བཞེས་མ་བསྙེལ་མཛོད། །འགྲོ་རྣམས་གང་དག་སྡུག་བསྔལ་དེ་དག་གི །ཉམ་ཐག་ཀུན་ཏུ་བཅད་པར་བྱའོ་ཞེས། །དགོངས་ནས་མགོན་པོ་གཞན་དུ་རྣམ་རྒྱུ་ན། །བདག་ཅག་སྡུག་བསྔལ་ཁྱོད་ཀྱིས་མ་གཟིགས་སམ། །གང་གིས་ཁྱོད་ཉིད་དྲན་པ་ཙམ་གྱིས་ཀྱང༌། །དེ་མོད་ཉམ་ཐག་མ་བསལ་འགའ་མེད་ལ། །བདག །བདག་ཀྱང་རྟག་ཏུ་ཉམ་ཐག་གཟིར་བཞིན་དུ། །ཁྱོད་ཀྱི་དྲིན་བསྐྱབས་སྐལ་ཆུངས་སོ་མཐུ་ལྡན་ཁྱོད་ཀྱི་ཐུགས་རྗེའི་བློ་གྲོས་ཀྱིས། །ལན་ལ་མི་རེ་བཞིན་དུ་ཕན་འདོགས་ལ། །བདག་ཀྱང་ཁྱོད་ལ་སྐྱབས་སུ་མཆི་བཞིན་དུ། །སྡུག་ཕོངས་འདི་འདྲ་འང་མི་གཟིགས་ཀྱེ་མའོ་བརླག །ཇི་ལྟ་ཇི་ལྟར་ཉོན་མོངས་གྱུར་པ་དང༌། །ཇི་ལྟ་ཇི་ལྟར་བརྟེན་མེད་ཕོངས་གྱུར་པ། །དེ་ལྟ་དེ་ལྟར་ཁྱོད་ཀྱི་ཐུགས་རྗེ་ཡང༌། །དེར་ནི་ཕྱི་ཕྱིར་མངོན་པར་འཕེལ་ལོ་སྐད། །སྡིག་ལྡན་བདག་གི་ཉམ་ཐག་སྡུག་བསྔལ་ཡང༌། །ཤིན་ཏུ་བརྣག་དཀའ་རྟེན་མེད་སྐྱབས་མེད་བཞིན། །དེ་དག་ལས་བདག་ཐུགས་རྗེས་བཀོལ་མཛད་ན། །ཁྱོད་ཀྱི་ཐུགས་རྗེ་ཕྱོགས་གཅིག་ཅི་རུ་རུང༌། །འགྲོ་བ་གང་གིས་
སྐྱེས་མཆོག་ཁྱོད་དྲན་ན། །དོན་མེད་གྱུར་པ་སྔོན་ཆད་འགའ་མ་མཆིས། །སྡུག་བསྔལ་ཤིན་ཏུ་དྲག་པོས་ཉམ་ཐག་འདིས། །བརླག་ལ་ཁད་ཀྱི་མགོན་ཁྱོད་བདག་ལ་དགོངས། །ཐུགས་རྗེའི་གནས་གྱུར་སྡུག་ཕོངས་མ་ལུས་པ། །ཕོངས་པ་ཐུགས་རྗེ་ཆེན་པོས་འཕྲོགས་མཛད་པ། །ཁྱེད་ཀྱིས་གལ་ཏེ་བདག་ལ་མ་གཟིགས་ན། །བདག་གི་རྟེན་གཞན་གང་ལགས་གསུང་དུ་གསོལ། །མགོན་པོ་ཁྱོད་ལ་སྐྱབས་སུ་མཆི་དགུ་ལ། །མོད་ལ་སྡུག་བསྔལ་མ་ཞི་འགའ་མ་མཆིས། །བདག་ཀྱང་སྐྱབས་སུ་མཆི་ཡིས་བརྩེ་བ་ཡིས། །སྡུག་བསྔལ་ཉམ་ཐག་འདི་ལས་བསྐྱབ་ཏུ་གསོལ།། ཁྱོད་ཀྱི་མཚན་ཙམ་གྲག་ལ་བརྟེན་པས་ཀྱང༌། །སྡུག་ཕོངས་མ་ལུས་ཞི་བར་འགྱུར་ལགས་ན། །བདག་གིས་འབད་ཀྱང་འབྲས་བུ་མ་མཆིས་པ། །དེ་འདྲའི་ཐུགས་རྗེ་ཅི་ལས་གྱུར་པ་ལགས། །ཁྱོད་ཀྱིས་གྲུབ་བརྙེས་བཞིན་དུ་སེམས་ཅན་རྣམས། །ཡོངས་སུ་བསྐྱབ་ཕྱིར་སྨོན་ལམ་མཛད་ལགས་ན། །བདག་ཀྱང་སེམས་ཅན་གྲངས་ལས་མ་འདས་པས། །མཆོག་སྦྱིན་བདག་གི་སྡུག་བསྔལ་དབྲོག་ཏུ་གསོལ། །ཉི་མའི་འོད་ཀྱིས་མུན་པའི་ཚོགས་བཅོམ་བཞིན། །ཟླ་གསལ་དྲི་མེད་ཁྱོད་ནི་རབ་བཞུགས་ཀྱང༌། །ད་དུང་བདག་ནི་སྡུག་བསྔལ་གྱིས་ནོན་ཅིང༌། །སྡིག་པའི་མུན་པས་ནོན་བསྐལ་ཆུངས་སོ། །སྐྱེ་བོ་རྣམས་ཀྱིས་གང་ཞུས་སྐྱོང་མཛད་པ། །དེ་ཉིད་བདག་གིས་ཞུས་བཞིན་མི་གནང་བ། །མཚམས་ལས་ཐར་པར་སྐལ་པ་མེད་དམ་ཅི། །ཤིན་ཏུ་ངན་ནམ་ཅིར་ཐལ་ཡི་རེ་མུག །མགོན་པོ་ཁྱོད་ནི་སེམས་ཅན་ཕན་པའི་ཕྱིར། །ཐུགས་རྗེ་ཆེན་པོ་མ་སྤངས་བཞིན་དུ་ཡང༌། །སྡུག་བསྔལ་བརྣག་དཀའི་རང་བཞིན་གསོལ་འདེབས་ལ། །སྐྱོབ་པ་མདུན་ན་གནས་བཞིན་འོ་དོད་འབོད། །འཇིག་རྟེན་སྐྱེ་བོའི་ཕ་མའང་འདི་ལྟར་དུ། །ཁ་མཆུས་བཏབ་པར་གྱུར་ཀྱང་མི་སྐྱོ་བཞིན། །སེམས་ཅན་ཕན་བརྩོན་ཁྱེད་ལའང་འཁོར་བ་ནས། །འཁོར་བའི་ཚེ་ན་བདག་ནི་སྐྱབས་མཆི་ཞིང༌། །ནག་པོའི་ལས་ཀྱིས་ཉིན་དང་མཚན་དུ་ནི། །མངོན་པར་ཟིལ་གྱིས་ནོན་པར་གྱུར་པ་དང༌། །སྡུག་བསྔལ་ཆེར་གདུངས་འདི་ལས་ཐར་བྱའི་ཕྱིར། །ཉིན་རེར་འོ་དོད་འབོད་ཀྱིས་མ་སྐྱོ་སྲུངས། །དེ་ལྟར་བདག་གིས་བོས་ཤིང་སྨྲེ་བ་ཡིས། །ཁྱོད་ཐུགས་ཤིན་ཏུ་ཐུགས་རྗེས་བརླན་གྱུར་པ། །
དེ་ལྟར་སྐྱེ་བོ་སྡུག་བསྔལ་བརྒྱས་གཟིར་བ། །ཀུན་ལའང་སྲིད་བཅོམ་ཁྱོད་ནི་དགོངས་མཛད་ཅིང༌། །ཐུགས་རྗེའི་དབང་གྱུར་ཐུགས་ན་བརྟན་པ་ཡིས། །གཞན་དོན་འབའ་ཞིག་ལྷུར་ལེན་ཡོན་ཏན་ནི། །བླ་མའི་གནས་གྱུར་ཁྱོད་ནི་སྡུག་བསྔལ་ཀུན། །འཕྲོག་པའི་ནུས་མཐུ་ལྡན་པ་དེ་བཞིན་ཤོག །བདག་གི་སྲིད་པ་མཐར་མཛད་སྤྱན་རས་གཟིགས་དབང་ལ། །བསྟོད་བསྐུལ་འདི་བགྱིས་བསོད་ནམས་ཐོབ་པ་གང་ཡིན་དེས། །བཅོས་མིན་རབ་ཞིའི་བདེ་ལྡན་བདེ་བ་ཅན་དུ་ནི། །འགྲོ་ཀུན་སྡུག་བསྔལ་གཟིར་སྤངས་རབ་ཏུ་ཕྱིན་གྱུར་ཅིག །ཐུགས་རྗེ་ཆེན་པོ་ལ་བསྟོད་ཅིང་བསྐུལ་བ་ཉེར་བཞི་པ། དགེ་བསྙེན་ཆེན་པོ་ཟླ་བས་མཛད་པ་རྫོགས་སོ།། །།རྒྱ་གར་གྱི་མཁན་པོ་པར་མེ་ཤྭ་ར་དང༌། བོད་ཀྱི་ལོ་ཙཱ་བ་འགོས་ལྷས་བཙས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།