ནོར་བུ་གླིང་གི་ཐུགས་རྗེ་ཆེན་པོ་ལྷ་ལྔ་ལ་བསྟོད་པ།
རྟ་དབྱངས།
རྒྱ་གར་སྐད་དུ། མ་ཎི་དྭཱི་པ་མ་ཧཱ་ཀཱ་རུ་ཎི་ཀ་དེ་བ་པཉྩ་སྟོ་ཏྲ། བོད་སྐད་དུ། ནོར་བུ་གླིང་གི་ཐུགས་རྗེ་ཆེན་པོ་ལྷ་ལྔ་ལ་བསྟོད་པ། རྗེ་བཙུན་སྤྱན་རས་གཟིགས་ལ་ཕྱག་འཚལ་ལོ། །ནོར་བུའི་གླིང་དུ་ཐུགས་རྗེའི་སྐུ་འཁྲུངས་དཔལ་ལྡན་པདྨའི་རིགས། །རི་རྒྱལ་པོ་ཏ་ལ་ཡི་རིན་ཆེན་བྲག་ཕུག་ཉམས་དགའ་བར། །པད་ཟླའི་དབུས་ན་ཐུགས་རྗེའི་སྐུ་ནི་འགྱིང་ཞིང་རོལ་པའི་ཉམས། །ཐུགས་རྗེའི་སྨན་གྱིས་བདག་ནད་གསོ་བ་མགོན་པོ་ཐུགས་རྗེ་ཅན། །མ་རིག་ཐིབས་པོ་འགྲོ་བའི་མུན་སེལ་རྗེ་བཙུན་རབ་རིབ་སེལ། །སྐྱེ་རྒ་ན་འཆི་ཐར་དཀའ་ཡང་སྲིད་རྩིབས་དྲུག་འཁོར་ལོར་ཆུད། །སྲིད་པའི་འཁྲུལ་འཁོར་བཟློག་དཀའ་སེམས་ཅན་འཁོར་བའི་རྒྱ་མཚོར་བྱིང༌། །མགོན་པོ་ཆོས་ཀྱི་འཁོར་ལོ་བསྐོར་མཛད་ཐུགས་རྗེའི་སྐུ་ཡིས་སྒྲོལ། །ཟླ་བ་ལྟར་དཀར་ཕྱག་གཉིས་པདྨ་གདུང་བ་སེལ་བའི་ཕྱག །དཔག་མེད་ཅོད་པན་རིན་ཆེན་མཛེས་བརྒྱན་གཞོན་ནུ་ཞི་བའི་སྐུ། །ཐུགས་རྗེ་བདུད་རྩིའི་རྒྱུན་གྱིས་ཟུག་རྔུའི་ནད་དང་སྡུག་བསྔལ་སེལ། །ཐུགས་རྗེ་རི་དྭགས་ལྤགས་འཛིན་སྲིད་པའི་བླ་མ་ཕྱག་འཚལ་ལོ། །ཐུགས་རྗེའི་ཐུགས་གདུངས་སྤྱན་གཡས་ཆབ་ལས་ལྷ་མོ་ཐུགས་རྗེའི་སྐུ། །ཡིད་འོང་སྒྲོལ་མ་ལྗང་སེར་བདེ་མ་རིན་ཆེན་རྒྱན་མཛེས་སྒེག །པདྨོའི་སྐུ་ལ་ཕྱག་མཚན་ཨུཏྤལ་ཁ་འབྱེད་ཕྱག་གཉིས་ཀྱིས། །བཅུད་རྒྱས་ནུ་མས་གསོ་མཛད་འགྲོ་བའི་ཡུམ་ལ་ཕྱག་འཚལ་ལོ། །སེམས་ཅན་སྡུག་བསྔལ་གཟིགས་ནས་སྙིང་རྗེའི་ཆུ་ལས་མཛེས་མ་འཁྲུངས། །ཁྲོ་གཉེར་ཞི་བ་སེར་མོ་རིན་ཆེན་སྐུ་བརྒྱན་ཐུགས་རྗེས་འགྱིང༌། །རྗེ་བཙུན་མགོན་གཟིགས་ཕྱག་མཚན་གུས་པའི་ཕྱག་རྒྱ་དབྱུག་པ་བསྣམས། །མཆོག་སྦྱིན་བུམ་ཆུས་འགྲོ་བའི་རེ་སྐོང་ཡུམ་ལ་ཕྱག་འཚལ་ལོ། །ཐུགས་རྗེས་ཕྲིན་ལས་དྲེགས་པ་ཚར་དབང་མཛད་ཁྲོ་རྒྱལ་སྐུ། །སྤྲུལ་བརྒྱན་འོད་དམར་རྟ་གདོང་ལྗང་གུ་སྤྱི་བོར་རྟ་སྐད་བཞད། །མགོན་པོ་པ་ནེ་ལ་འདུད་པུས་བཙུགས་རྡོ་རྗེ་དབྱུག་པ་བསྣམས། །པདྨའི་རིགས་སྤྲུལ་ཐུགས་རྗེའི་བརླན་གྱིས་སྒེག་ཁྲོ་ཕྱག་འཚལ་ལོ། །ཕྱག་ན་པདྨའི་དྲུང་ན་དམ་ཆོས་
ཉེར་ཞུ་ཚོང་དཔོན་བུ། །ནོར་བཟངས་སྲས་པོ་གསེར་མདོག་སྐལ་ལྡན་ཉིད་བཞུགས་རིན་ཆེན་བརྒྱན། །ཨེ་མ་བླ་མ་ལ་གུས་ཐལ་སྦྱར་པུས་བཙུགས་པུ་སྟི་བསྣམས། །བཞིན་བཟངས་ཁྱེའུ་དད་ལྡན་ནོར་བཟངས་བུ་ལ་ཕྱག་འཚལ་ལོ། །རྗེ་བཙུན་གསུང་གི་དབང་ཕྱུག་ཁརས་པཱ་ཎི་འཁོར་བཅས་ལ། །བདག་གིས་གུས་པར་བསྟོད་བགྱིས་ཟླ་ལྟར་དགེ་བ་དྲི་མེད་དེས། །སྲིད་མཚོ་སྐེམས་ཤིང་ཐུགས་རྗེའི་ཆུ་ཡིས་སྐྱེ་འགྲོ་ཀུན་ངོམས་ནས། །རྒྱལ་བའི་དཀྱིལ་འཁོར་ཉམས་དགའ་པོ་ཊ་ལ་རུ་སྐྱེ་བར་ཤོག །སྡུག་བསྔལ་རྒྱ་མཚོ་རྒྱ་ཆེན་ཕ་རོལ་རབ་ཏུ་རྒལ་གྱུར་པ། །ཐུབ་པ་རྒྱལ་བ་འགྲོ་བའི་གཙོ་ལ་བསྟོད་པ་ཡིས། །བསོད་ནམས་ཅི་མཆིས་དེས་ནི་འདི་ན་འགྲོ་བ་མ་ལུས་ཀུན། །བྱང་ཆུབ་རིན་ཆེན་རབ་མཆོག་ཞི་ཞིང་བདེ་ལ་རེག་པར་ཤོག །ནོར་བུ་གླིང་གི་ཐུགས་རྗེ་ཆེན་པོ་ལྷ་ལྔའི་བསྟོད་པ། །སློབ་དཔོན་རྟ་དབྱངས་ཀྱི་ཞལ་སྔ་ནས་མཛད་པ་རྫོགས་སོ།། །།