འཕགས་པ་སྤྱན་རས་གཟིགས་དབང་ཕྱུག་ཕྱག་སྟོང་པའི་སྒྲུབ་ཐབས།
ཀླུ་སྒྲུབ།
རྒྱ་གར་སྐད་དུ། ཨཱཪྻཱ་བ་ལོ་ཀེ་ཏེ་ཤྭ་རས་ཧ་སྲ་བྷུ་ཛ་སཱ་དྷ་ནཾ། བོད་སྐད་དུ། འཕགས་པ་སྤྱན་རས་གཟིགས་དབང་ཕྱུག་ཕྱག་སྟོང་པའི་སྒྲུབ་ཐབས། འཇིག་རྟེན་དབང་ཕྱུག་ལ་ཕྱག་འཚལ་ལོ། །སྤྱན་རས་གཟིགས་དབང་འཇིག་རྟེན་གསུམ་གྱི་མགོན། །འདས་པའི་དུས་སུ་མངོན་པར་སངས་རྒྱས་ཀྱང༌། །ཐུགས་རྗེའི་དབང་གིས་ས་བཅུའི་ཚུལ་སྟོན་པ། །ཐབས་ཚུལ་དཔག་མེད་རིག་ལ་ཕྱག་འཚལ་ལོ། །དེ་ལ་དང་པོ་རེ་ཞིག་འཇིག་རྟེན་དབང་ཕྱུག་སྒྲུབ་པར་འདོད་པའི་རྣལ་འབྱོར་པས། འཇིག་རྟེན་གྱི་བྱ་བ་ཐམས་ཅད་སྤངས་ལ་འཇིག་རྟེན་གྱི་ཆོས་བརྒྱད་ཀྱིས་མི་བསྐྱོད་པ་རི་ལྟ་བུའི་རྣལ་འབྱོར་པས་ས་ཕྱོགས་ཤིན་ཏུ་ཉམས་དགའ་བ་མེ་ཏོག་དང༌། འབབ་ཆུ་དང་ལྗོན་ཤིང་དང་འབྲས་བུ་སྣ་ཚོགས་ཡོད་པའི་སར་གནས་ཁང་ཤིན་ཏུ་ཉམས་དགའ་བར་སྐུ་གསུངས་ཐུགས་ཀྱི་རྟེན་ཅི་རིགས་པར་བཀོད་པའི་སར་སྟན་ནང་ཚངས་ཅན་ལ་ཁ་ནུབ་ཕྱོགས་སུ་བལྟས་ནས་ཁྲུས་ཀྱི་རྣལ་འབྱོར་རྣམས་བྱས་ལ། ཨོཾ་ཨཱཿབིགྷྣཱན་ཏ་ཀྲྀཏ་ཧཱུཾ་པཊ། ཅེས་བརྗོད་པས་ཕྱོགས་བཅུའི་བགེགས་རྣམས་བསལ་བར་བྱའོ། །དེ་ནས་རང་གི་དོན་ཡོངས་སུ་དོར་བའི་བསམ་པས་གསུམ་ལ་སྐྱབས་སུ་འགྲོ་བར་བྱའོ། །ཚངས་པའི་གནས་བཞི་བསྒོམ་པར་བྱའོ། །དེ་ལ་སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་འཛིན་པ་ནི་བྱམས་པའོ། །ཀྱེ་མའོ་སེམས་ཅན་འདི་དག་ནི་འཁོར་བའི་རྒྱ་མཚོར་ནུབ་ཅིང་ཡུན་རིང་དུ་སྡུག་བསྔལ་ཉམས་སུ་མྱོང་བར་གྱུར་ཏེ་ཞེས་བསམས་ལ། འདི་ནས་ལག་ཚར་དུ་ང་ཡིས་འཁོར་བ་སྡུག་བསྔལ་གྱི་རྒྱ་མཚོ་ལས་གདོན་པར་བྱའོ་སྙམ་པ་ནི་སྙིང་རྗེ་ཆེན་པོའོ། །སེམས་ཅན་ཐམས་ཅད་
ཟག་པ་མེད་པའི་བདེ་བ་རྒྱུན་མི་འཆད་པ་ལ་འཇོག་པར་འདོད་པ་ནི་དགའ་བའོ། །བདེ་བ་དང༌། སྡུག་བསྔལ་བ་དང༌། གྲགས་པ་དང༌། མ་གྲགས་པ་དང༌། རྙེད་པ་དང༌། མ་རྙེད་པ་དང༌། བསྟོད་པ་དང༌། སྨད་པ་སྟེ། འཇིག་རྟེན་གྱི་ཆོས་བརྒྱད་པོ་དེ་དག་ཐམས་ཅད་མགོ་མཉམ་པར་རྟོགས་པ་ནི་བཏང་སྙོམས་སོ། །དེ་ནས་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་སྤྱན་རས་གཟིགས་ཀྱི་དབང་པོའི་གོ་འཕང་ཐོབ་པར་བྱས་ལ། མངལ་ནས་སྐྱེས་པ་དང༌། སྒོ་ང་ལས་སྐྱེས་པ་དང༌། དྲོད་གཤེར་ལས་སྐྱེས་པ་དང༌། རྫུས་ཏེ་སྐྱེས་པའི་སེམས་ཅན་འདི་དག་ཐམས་ཅད་སངས་རྒྱས་ཀྱི་ས་ལ་གཞག་པར་བྱའོ་ཞེས་པ་བསམ་པ་བརྟན་པོ་བསྐྱེད་ལ། དེ་ནས་རང་གི་སྙིང་གར་ཆོས་ཀྱི་དབྱིངས་སྐྱེ་མེད་སྟོན་པར་བྱེད་པའི་ཡི་གེ་ལས་ཟླ་བའི་དཀྱིལ་འཁོར་བསམས་ལ་དེའི་སྟེང་དུ་ཧྲཱིཿ་དཀར་པོ་ཚག་དྲག་དང་བཅས་པ་ལས་འོད་ཟེར་འཕྲོས་པས་ལུགས་ཁྱབ་སྡིག་སྒྲིབ་སྦྱངས་ནས་འཕགས་པ་སྤྱན་རས་གཟིགས་ཀྱི་དབང་པོ་ཕྱག་སྟོང་པར་བསྐྱེད། །དེའི་སྙིང་ག་ནས་ཧྲཱིཿ་ལས་འོད་ཟེར་འཕྲོས་པས་མདུན་གྱི་ནམ་མཁའ་ལ་འཕགས་པ་སྤྱན་རས་གཟིགས་ཀྱི་དབང་ཕྱུག་ཕྱག་སྟོང་པ་འཁོར་དང་བཅས་པ་བླ་མ་དང་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་བསམས་ལ། དེ་རྣམས་ལ་ཕྱག་འཚལ་བའི་སྔགས། ཨོཾ་སརྦ་ཏ་ཐཱ་ག་ཏ་ཀཱ་ཡ་བཱཀ་ཙིཏྟ་པྲ་ཎ་མེ་ན་བཛྲ་པནད་ནཾ་ཀ་རོ་མི་ཞེས་བརྗོད་དོ། །དེ་ནས་གདན་དབུལ་བའི་སྔགས། ཨོཾ་སརྦ་ཏ་ཐཱ་ག་ཏ་པཱུ་ཛ་སྭ་སྠཱ་ནཱ་ཡ་ཨཱཏྨ་ནཱཾ་ནི་ཪྻཱ་ཏ་ཡཱ་མི། ཞེས་བརྗོད་དོ། །དེ་ནས་ཧྲཱིཿལས་འོད་ཟེར་འཕྲོས་པས་མེ་ཏོག་ཐོགས་པའི་ལྷ་མོ་དཀར་མོ་དཔག་ཏུ་མེད་པས་མཆོད་པར་བསམས་ལ། ཨོཾ་བཛྲ་པུཥྤེ་ཨཱཿཧཱུཾ་སྭཱ་ཧཱ། དེའི་རྗེས་ལ་ཨོཾ་བཛྲ་དྷཱུ་པེ་ཨཱཿཧཱུཾ་སྭཱ་ཧཱ། ཞེས་བརྗོད་པས་བདུག་སྤོས་ཐོགས་པའི་ལྷ་མོ་གཟུགས་དང་ལང་ཚོར་ལྡན་པ་ནམ་མཁའ་ཁེངས་པས་མཆོད་པར་བྱའོ། །དེའི་རྗེས་ལ་ཨོཾ་བཛྲ་དཱི་པེ་ཨཱཿཧཱུཾ་སྭཱ་ཧཱ། ཞེས་བརྗོད་པས་རིན་པོ་ཆེའི་སྒྲོན་མ་ཐོགས་པའི་ལྷ་མོ་དཔག་ཏུ་མེད་པས་མཆོད་པར་བྱའོ། །དེའི་རྗེས་ལ་ཨོཾ་བཛྲ་གནྡྷེ་ཨཱཿཧཱུཾ་སྭཱ་ཧཱ། ཞེས་བརྗོད་པས་དྲི་མཆོག་ཐོགས་པའི་ལྷ་མོ་སེར་མོ་དཔག་ཏུ་མེད་པས་མཆོད་པར་བྱའོ། །དེ་ནས་ཨོཾ་བཛྲ་ནཻ་བི་ཏྱེ་ཨཱཿཧཱུཾ་སྭཱ་ཧཱ། ཞེས་བརྗོད་པས་ཞལ་ཟས་
ཐོགས་པའི་ལྷ་མོ་སེར་སྐྱ་མ་སྤྲིན་གཏིབས་པ་ཙམ་གྱིས་མཆོད་པར་བྱའོ། །དེ་ནས་ཨོཾ་སརྦ་བི་ཤི་སྠཱ་པཱུ་ཛ་མེ་གྷ་པྲ་ས་ར་ས་མུ་དྲ་ཨཱཿཧཱུཾ། ཞེས་བརྗོད་ཅིང་སྙིང་གའི་ས་བོན་ལས་འོད་ཟེར་འཕྲོས་པའི་གདུགས་དང༌། རྒྱལ་མཚན་དང༌། བ་དན་དང༌། བླ་རེ་དང༌། འཁོར་ལོས་སྒྱུར་བའི་རིན་པོ་ཆེ་སྣ་བདུན་ལ་སོགས་པས་མཆོད་པར་བྱའོ། །དེ་ནས་སྡིག་པ་བཤགས་པར་བྱ་སྟེ། །ཐོག་མེད་འཁོར་བའི་འགྲོ་བར་གཏོགས་པ་ཡིས། །བྱས་པའི་ཉེས་བྱས་མ་ལུས་མི་བཟང་འདི། །གང་ཞིག་ཕྱོགས་བཅུའི་འཇིག་རྟེན་ཁམས་རྣམས་ན། །བཞུགས་པའི་རྒྱལ་བའི་སྤྱན་སྔར་བཤགས་པར་བགྱི། ཨོ་སརྦ་པཱ་པཾ་ཤོ་དྷ་ད་ཧ་ན་བཛྲ་སྭཱ་ཧཱ། སྡིག་པ་བཤགས་པའོ། །སངས་རྒྱས་རྣམས་དང་བྱང་ཆུབ་སེམས་དཔའ་ནི། སྣ་ཚོགས་ཐབས་མཁས་པ་ཡིས་ཕན་མཛད་དད། །ཕྱོགས་བཅུའི་ལོ་ཀ་དག་ལ་གང་དག་གཞན། །བསོད་ནམས་བྱེད་པ་དེ་ལ་ཡི་རང་ངོ༌། །ཨོཾ་སརྦ་ཏ་ཐཱ་ག་ཏ་ཤཱ་ནྱཏཱ་ཛྙཱ་ན་ཨ་ནུ་མོད་ན་པཱུཛ་མེ་གྷས་མུ་དྲ་སྔར་ཎ་སམ་ཡེ་ཧཱུཾ། རྗེས་སུ་ཡི་རང་བའོ། །སངས་རྒྱས་ཀུན་དང་བྱང་ཆུབ་སེམས་དཔའ་ནི། །འགྲོ་བའི་སྐྱབས་གྱུར་པ་ལ་གསོལ་བ་ནི། །ཕྱོགས་བཅུའི་སེམས་ཅན་ཇི་སྙེད་ཐམས་ཅད་ལ། །ཆོས་ཀྱི་སྤྲིན་ལས་ཆར་ཆེན་དབབ་ཏུ་གསོལ། །ཨོཾ་སརྦ་ཏ་ཐཱ་ག་ཏ་ཨ་དྷིཥྛཱ་ན་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུཾ། བསྐུལ་པའོ། །སོ་སོའི་སྐྱེ་བོའིས་དང་ཉེས་བྱས་རྣམས། །མ་ལུས་པར་ནི་མྱུར་དུ་སྤངས་ནས་ནི། །སྐྱོན་མེད་ཆོས་ཀྱི་སྐུ་ནི་རྣམ་དག་པར། །བཤད་པ་མྱུར་དུ་རྟོགས་པ་ཉིད་མཛོད་ཅིག །ཨོཾ་སརྦ་ཏ་ཐཱ་ག་ཏན་ཡ་ངྷེ་ས་མ་ཡེ། སརྦ་ས་ཏྭ་ཧི་དཱrཐ་ཡ་དྷརྨ་དྷཱ་ཏུ་སྠི་ཏིརྦྷ་བ་ཏུ། གསོལ་བ་གདབ་པའོ།། སེམས་ཅན་ཐམས་ཅད་ལ་ཕན་པའི་ཕྱིར། །བདག་གིས་དགེ་བ་གང་དག་ཅི་བསགས་པ། །སྐྱེ་བ་ལ་སོགས་སྡུག་བསྔལ་ཐམས་ཅད་ནི། །ཉེ་བར་ཞི་ཕྱིར་བདག་གིས་བསྔོ་བར་བགྱི། །ཨོ་སརྦ་ཏ་ཐཱ་ག་ཏ་པུ་ཎྱ་ཪྻཱ་ཏ་ན་པཱུ་ཛ་མ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། བསྔོ་བའོ། །སྐྱེ་སོགས་སྡུག་བསྔལ་རྣམས་ཀྱིས་ཉེར་གཙེས་ཤིང༌། མི་ཤེས་ལོག་པས་ཉེར་བཅོམ་བདག་ཉིད་ཅན། །སྲོག་ཆགས་རྣམས་ལ་ཕན་ཕྱིར་བྱང་ཆུབ་སེམས། །རིན་ཆེན་མཆོག་གྱུར་བདག་གིས་བསྐྱེང་པར་བགྱི། །རྟག་ཏུ་སྲོག་ཆགས་རྣམས་ཀྱི་སྐྱབས་དང་ནི། །གནས་དང་དཔུང་གཉེན་སྐྱོབ་པ་ཉིད་གྱུར་ཅིག །ཨོཾ་བོ་
དྷི་ཙིཏྟཾ་ཨུཏྤཱད་ཡཱ་མི། བོདྷི་ཙིཏྟཾ་མུཏྤཱི་ཏ་ཏཾ་ཏ་ཐཱ་ཧ་ས་མ་པི་ཏ་བོ་དྷི་ཙིཏྟ་ཨུཏྤཱ་ད་ཡཱ་མི། བྱང་ཆུབ་མཆོག་ཏུ་སེམས་བསྐྱེད་པའོ། །དེ་ནས་རང་གི་དགོས་པའི་དོན་ཐམས་ཅད་ལ་གསོལ་བ་གདབ་པར་བྱའོ། །དེ་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རིགས་ཀྱི་བུ་ལེགས་སོ་ཞེས་གསུངས་ནས་རང་རང་གི་གནས་སུ་གཤེགས་པར་བསམ་མོ། །དེ་ནས་ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་བི་ཤུདྡྷོཉ྄ཧཾ་ཞེས་བརྗོད་པས་ཆོས་ཐམས་ཅད་རང་བཞིན་དེ་བཞིན་ཉིད་ལས་མི་འདའ་བར་སྟོང་པ་ཉིད་དུ་བསྒོམ་པར་བྱའོ། །དེ་ནས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱ་ཏྨ་ཀོཉ྄ཧཾ་ཞེས་བརྗོད་པས་ཆོས་ཐམས་ཅད་སྤྲོས་བྲལ་ནམ་མཁའི་ངོ་བོ་ལྟ་བུར་བསམ་མོ། །དེ་ནས་སྟོང་པ་ཉིད་དུ་གནས་པས་སེམས་ཅན་ཐམས་ཅད་ཀྱི་དོན་མི་འགྲུབ་པས་སྙིང་རྗེ་ཆེན་པོས་ཀུན་ནས་བསླང་བས་པཾ་ལས་པདྨ་འདབ་མ་བརྒྱད་པ་ཡངས་ཤིང་རྒྱ་ཆེ་བའི་སྟེང་དུ་ཆོས་དབྱིངས་མཐའ་དང་དབུས་མེད་པ་སྟོན་པར་བྱེད་པའི་ཡི་གེ་ཨ་དཀར་པོ་འོད་དུ་ཞུ་བས་ཟླ་བའི་དཀྱིལ་འཁོར་ཡངས་ཤིང་རྒྱ་ཆེ་བ་བསམ། དེའི་སྟེང་དུ་ཧྲཱིཿ་དཀར་པོ་ལས་འོད་ཟེར་འཕྲོས་པས། ཕྱི་སྣོད་ཀྱི་འཇིག་རྟེན་ཐམས་ཅད་འཇའ་ཚོན་ལྟ་བུར་གྱུར། ནང་བཅུད་ཀྱི་སེམས་ཅན་ཐམས་ཅད་སྤྱན་རས་གཟིགས་ཀྱི་དབང་བོར་གྱུར་ནས། ཧྲཱིཿལ་ཐིམ་པས་གསེར་གྱི་པདྨ་འདབ་མ་སྟོང་དང་ལྡན་པ་ཅིག་ཏུ་བསམ། དེ་ལས་འོད་ཟེར་འཕྲོས་པས་སེམས་ཅན་ཐམས་ཅད་འཕགས་པ་སྤྱན་རས་གཟིགས་སུ་བསྒྲུབས་ནས་ཐིམ་པས་བདག་ཉིད་འཕགས་པ་སྤྱན་རས་གཟིགས་ཕྱག་སྟོང་སྐུ་མདོག་དཀར་ལ་འཚེར་བ། རྒྱན་ཐམས་ཅད་ཀྱིས་བརྒྱན་པ་ལྷའི་པཉྩ་ལི་ཀའི་དར་དམར་པོས་ཤམ་ཐབས་བྱས་པ་རི་དགས་ནག་པོའི་པགས་པས་ནུ་མ་གཡོན་པ་བཀབ་པ་རིན་པོ་ཆེའི་རྒྱན་རྣམ་པ་སྣ་ཚོགས་དུ་མས་བརྒྱན་པ་ཁྱད་པར་དུ་ཡང་ལྷའི་རིན་པོ་ཆེ་རྣམ་པ་བདུན་གྱིས་བརྒྱན་པ། རྩ་བའི་ཞལ་ཀུན་ནས་དཀར་བ་སྤྱན་གསུམ་མངའ་བ་གཡས་པ་ལྗང་གུ། གཡོན་པ་དམར་བ། ཞལ་ཐམས་ཅད་ཀུན་ནས་འཛུམ་པའི་ཉམས་ཅན་དེའི་སྟེང་མ་ལྗང་གུ། དེའི་གཡས་དཀར་བ། གཡོན་པ་དམར་བ། དེའི་སྟེང་མ་དམར་པོ། །དེའི་གཡས་ལྗང་གུ། གཡོན་དཀར་པོ། དེའི་སྟེང་ན་ཁྲོ་བོའི་ཞལ་
མཐིང་ནག་མཆི་བ་གཙིགས་པ། དབུ་སྐྲ་སེར་པོ་ཞལ་བཅུ་པོ་ནི་ཕ་རོལ་ཏུ་ཕྱིན་པ་བཅུའོ། །དེའི་སྟེང་མ་བནྡུཀའི་མེ་ཏོག་ལྟར་དམར་བ་མགྲིན་པ་ཡན་ཆོད་འཐོན་པ་ཚངས་པར་སྤྱོད་པའི་ཆ་ལུགས་རྒྱན་སྤངས་པ་དབུའི་ཐོར་ཚུགས་དང་ལྡན་པའོ། །དེ་ནི་སྐྱེ་བ་རྣམ་པ་བཞིས་སངས་རྒྱས་སྒྲུབ་པར་བྱེད་པའོ། །རྩ་བའི་ཕྱག་གཉིས་ཐུགས་ཀར་ཐལ་མོ་སྦྱར་བ། དེའི་འོག་མ་གཡོན་པས་གསེར་གྱི་པདྨ་རྩ་བ་དང་བཅས་པ་འཛིན་པ། གཡས་ཀྱི་འོག་མས་བགྲང་ཕྲེང་འཛིན་པ། གཡོན་གྱི་གསུམ་པ་ན་རིལ་བ་སྤྱི་བླུགས་འཛིན་པ། གཡས་ཀྱི་གསུམ་པ་ན་ཡི་དགས་བཀྲེས་སྐོམ་གྱི་གདུང་བ་སེལ་བའི་མཆོག་སྦྱིན་པ། གཡས་ཀྱི་བཞི་བ་ན་འཁོར་ལོ་འཛིན་པ། གཡོན་གྱི་བཞི་པ་ན་མདའ་གཞུ་འཛིན་པའོ། །དེ་ནས་གཡས་ཀྱི་ཕྱག་རྣམས་སུ་གོ་རིམས་ཇི་ལྟ་བ་བཞིན་དུ་ཡིད་བཞིན་གྱི་ནོར་བུ་རིན་པོ་ཆེ་དང༌། སྤྲུལ་པའི་སྐུ་རྒྱལ་བ་ཤཱཀྱ་ཐུབ་པ་དང༌། མེ་ལོང་དང༌། ཤེལ་གྱི་གདུ་བུ་དང། དགྲ་སྟ་དང༌། ཕུབ་དང༌། རིལ་བ་བྷྲྀངྒ་ར་དང༌། རྔ་ཡབ་དཀར་པོ་དང༌། རིན་པོ་ཆེ་མེ་ཤེལ་དང༌། རིན་པོ་ཆེ་ཆུ་ཤེལ་དང༌། སྐྱབས་སྦྱིན་པ་དང༌། རིན་པོ་ཆེའི་ཁ་ཊྭཱཾ་ག་དང༌། རྡོ་རྗེ་དང༌། རིལ་གྲི་དང༌། ལྷུང་བཟེད་དང༌། རྡོ་རྗེའི་ཞགས་པ་དང༌། རིན་པོ་ཆེ་བསྣམས་པའོ།། གཡོན་པའི་ཕྱག་རྣམས་སུ་གོ་རིམས་ཇི་ལྟ་བ་བཞིན་དུ་རྒྱུན་འབྲུམ་གྱི་སྣོད་ཐོགས་པའི་ཕྱག་དང༌། པདྨོའི་སྟེང་དུ་འོད་དཔག་ཏུ་མེད་པ་དང༌། རིན་པོ་ཆེའི་ཟ་མ་ཏོག་དང༌། རིན་པོ་ཆེའི་ཤིང་དང༌། རིན་པོ་ཆེའི་གཞལ་མེད་ཁང་དང༌། རིན་པོ་ཆེའི་དུང་གཡས་སུ་འཁྱིལ་པ་དང༌། ཁར་གསིལ་དང༌། རིན་པོ་ཆེའི་མདའ་དང༌། རིན་པོ་ཆེའི་དྲིལ་བུ་དང༌། ཐོད་པའི་ཁར་བ་དང༌། རིན་པོ་ཆེའི་ལྕགས་ཀྱུ་དང༌། རིན་པོ་ཆེའི་མདུང་དང༌། པདྨ་ལེ་བརྒན་དང༌། སྤྲིན་རྣམ་པ་ལྔ་དང༌། རིན་པོ་ཆེའི་ཕྱག་རྒྱ་དང༌། རིན་པོ་ཆེའི་གླེགས་བམ་དང༌། པདྨ་སྔོན་པོ་བསྣམས་པའོ། །ཕྱག་སྟོང་གིས་ཉེ་བར་མཛེས་པ་དེ་ལས་གཞན་པའི་ཕྱག་ཐམས་ཅད་མཆོག་སྦྱིན་པ་ཕྱག་གི་མཐིལ་ན་སྤྱན་རེ་རེ་མངའ་བའོ། །འཇིགས་པ་ཐམས་ཅད་སྐྱོབ་པའི་སྤྱན་རས་གཟིགས་དཔག་ཏུ་མེད་པ་འཕྲོས་པས་གཡས་སུ་དོན་ཡོད་ཞགས་པ་དང༌། ཚོང་དཔོན་གྱི་བུ་ནོར་བཟངས་འདུད་པའོ། །གཡོན་དུ་རྟ་མགྲིན་
དང་སྒྲོལ་མ་འདུད་པའོ། །ཕྱོགས་བཞིར་རྒྱལ་པོ་ཆེན་པོ་བཞི་རང་རང་གི་འཁོར་དཔག་ཏུ་མེད་པ་དང་བཅས་པའོ། །སྟེང་གི་ཕྱོགས་སུ་ལྷའི་བུ་དང་དྲང་སྲོང་མཆོད་པ་ཐོགས་པ་དཔག་ཏུ་མེད་པ་ལྷགས་པའོ། །དེ་ནས་ཐུགས་ཀའི་ཧྲཱིཿལས་འོད་ཟེར་འཕྲོས་པས་ཡེ་ཤེས་པ་སྤྱན་དྲངས་ལ་ཕྱག་དང་མཆོད་པས་མཉེས་པར་བྱས་ལ། ཛཿ་ཧཱུཾ་བཾ་ཧོཿཞེས་བརྗོད་པས། དགུག་པ་དང༌། གཞུག་པ་དང༌། བཅིང་བ་དང་མཉེས་པར་བྱའོ། །དེ་ནས་ཐལ་མོ་སྦྱར་ལ་པདྨ་ཁ་ཕྱེ་བའི་ཚུལ་དུ་བྱས་ཏེ་སྙིང་གར་བཞག་པ་འདི་ནི་པདྨ་རིགས་ཀྱི་དམ་ཚིག་གི་ཕྱག་རྒྱའོ། །ཨོཾ་པདྨོ་བྷ་བཱ་ཡ་སྭཱ་ཧཱ། དེ་ནས་ཧྲཱིཿལས་འོད་ཟེར་འཕྲོས་པས། རིགས་ལྔ་སྤྱན་དྲངས་ལ་སྔ་མ་བཞིན་དུ་མཆོད་དེ། བྱང་ཆུབ་རྡོ་རྗེས་སངས་རྒྱས་ལ། །ཇི་ལྟར་མཆོད་ཆེན་སྩོལ་མཛད་པ། །བདག་ཀྱང་རབ་ཏུ་བསྐྱབ་པའི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་བརྗོད་པས་དེ་བཞིན་གཤེགས་པ་ལྔ་ཡུམ་དང་བཅས་པས་དབང་བསྐུར་བར་བསམ་ཞིང་ཚིག་ཏུ། དབང་བསྐུར་བ་ནི་རྡོ་རྗེ་ཆེ། །གསང་བ་གསུམ་གྱི་གནས་ལས་བྱུང༌། །ཁམས་གསུམ་པོ་ཡིས་ཕྱག་བྱས་པ། དི་རིང་ཁྱོད་ལ་སྦྱིན་པར་བྱ། །ཨོཾ་སརྦ་ཏ་ཐཱ་ག་ཏ་ས་བྷི་ཥིཉྩནྟུ་མཱཾ་ཞེས་བརྗོད་པས། དེ་བཞིན་གཤེགས་པ་འོད་དཔག་ཏུ་མེད་པ་སྤྱི་བོའི་སྟེང་དུ་གསལ། དེ་ནས་ང་རྒྱལ་བརྟན་པར་བྱ་བའི་ཆེད་དུ། ཨོཾ་ཡོ་ག་དྷརྨ་དྷཱ་ཏུ་སྭ་བྷཱ་བ་སརྦྦ་ཨཱཏྨ་ཀོ་ཉ྄ ཧཾ། ཞེས་བརྗོད་པས། ང་རྒྱལ་བརྟན་པར་བྱའོ། །དེ་ནས་སེམས་ཅན་ཐམས་ཅད་ལ་སྙིང་རྗེ་ཆེན་པོ་བསྐྱེད་ནས་བསང་སྔགས་འདི་འབུམ་ཕྲག་གཅིག་བཟླས་པར་བྱའོ། །ན་མོ་རཏྣ་ཏྲ་ཡཱ་ཡ། ན་མཿཨཱཪྻཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་ཡ། སརྦྦ་བནྡྷ་ན་ཙྪེ་ད་ན་ཀ་རཱ་ཡ། སརྦ་བྷ་བ་ས་མུདྲོ་ཙྪ་ཥ་ཎ་ཡ་ཀ་རཱ་ཡ། སརྦྦ་བྱཱ་དྷི་པྲ་ཤཱ་མ་ན་ཀ་རཱ་ཡ། སརྦྦེ་ཏྱུ་པ་དྲ་བ་བི་ནཱ་ཤ་ཀ་རཱ་ཡ། སརྦྦ་བྷ་ཡེ་ཥྱ་ཏྲ་ཎཱ་ཡ། ཏ་སྱ་ན་མཿཀྲྀ་ཏྭཾ་ཨི་མཾ། ཨཱཪྻ་བ་ལོ་ཀཾ་ཏེ་ཤྭ་ར་ཏ་བ་ནཱི་ལ་ཀཎྛ་ནཱ་མ་ཧཱ་ཧྲྀ་ད་ཡཾ་ཨ་བརྟ་ཡི་ཥྱཱ་མི། སརྦྦ་ཨརྠ་སཱ་དྷ་ནཾ། ཤུ་བྷ་ཙེ་ཎཱ་ནཱཾ། སརྦྦ་སཏྭཱ་ནཱཾ། པཱ་པ་མཱ་རྒ་བི་ཤོ་དྷ་ཀཾ །ཏདྱ་ཐཱ། ཨ་པ་ལོ་ཀེ །ལོ་ཀ་མ་ཏི། ལོ་ཀ་ག་ཏི། ཨཱ་ཏི་བ་ཏི་ལོ་ཀཱ་ཏི་ཀྲ་ནྟེ། ཨེ་ཧྱེ་ཧཾ། མ་ཧཱ་བོ་དྷི་སཏྭ། ཧེ་བོ་དྷི་སཏྭ། ཧེ་མ་ཧཱ་བོ་དྷི་སཏྭ། ཧེ་པྲཱི་ཡ་པོ་དྷི་སཏྭ། ཧེ་
མ་ཧཱ་ཀཱ་རུ་ཎཱི་ཀ་སྨ་རྀ་ཧྲ་ད་ཡ། ཨེ་ཧྱེ་ཧི། ཨཱཪྻཱ་བ་ལོ་ཀི་ཏེ་ཤྭ་ར། པ་ར་མ་མཻ་ཏྲཱི་ཙིཏྟ་ཀཱ་རུ་ཎཱི་ཀཱ་ཡ། ཀུ་རུ་ཀུ་རུ་ཀརྨ། སཱ་དྷ་ཡ་བིཁྱཾ། དེ་ཧི་དེ་ཧི་མེ་ཝ་རཾ་ཀཱ་མ་གཱ་མ། བི་ཧཾ་གཱ་མ། སིདྡྷ་སིདྡྷ་ཡོ་གཱི་ཤྭ་ར། དྷུ་ཧུ་དྷུ་ཧུ་བཱིཪྻནྟེ། མ་ཧཱ་བཱིཪྻ་ནྟེ། དྷ་ར་དྷ་ར་དྷ་རེནྡྲ་ཤྭ་ར། ཛྭ་ལ་ཛྭ་ལ་བི་མ་ལཱ་མཱུ་རྟེ་ཨཱཪྻཱ་བ་ལོ་ཀི་ཏེ་ཤྭ་ར། ཀྲྀཥྞཱ་ཛི་ན་ཛ་ཊཱ་མུ་ཀ་ཊཱ་ལཾ་བ། ཨ་ལཾ་ཀྲྀ་ཏ་ཤཱ་རཱི་ར་ལ་མྦ་པྲ་ལཾ་བ་བི་ལཾ་བ། མ་ཧཱ་སིདྡྷ། ཤུདྡྷེ་དྷ་ར། བི་དྱཱཾ་དྷར་བ་ལ་བ་ལ། མ་ཧཱ་བ་ལ། མ་ལ་མ་ལ་མ་ཧཱ་མ་ལ། ཙ་ལ་ཙ་ལ། མ་ཧཱ་ཙ་ལ། ཀྲྀཥྞ་བརྞྞ་ཀྲྀཥྞ་པཱ་ཤ་ནི་རྒྷཱ་ཏ་ན། ཧེ་པདྨ་ཧ་སྟ། ཙ་ར་ཙ་ར་ནི་ཤཱ་ཙ་རེ་ཤྭ་ར། ཀྲྀཥྞ་སརྦྦ་ཀྲྀ་ཏ་ཡ་ཛྙོ་པ་བཱི་ཏ། ཨེ་ཧྱེ་ཧི་བཱ་རཱ་ཧཱ་མུ་ཁ། ཏྲི་པུ་ར་ད་ཧ་ནེ་ཤྭ་ར། ནཱ་རཱ་ཡ་ནཱ། བ་ལ་རུ་པ་བེ་ཥ་རཱི། ཧེ་ནཱི་ལ་ཀཎྠ། ཧེ་མ་ཧཱ་ཧ་ལ་ཧ་ལ་བི་ཥ་ནི་ར་ཛི་ཏཱ། ལོ་ཀ་སྱ་རཱ་བ་བི་ཥ་ཎཱ་ཤ་ནཾ། དྭེ་ཥ་བི་ཥ་ནཱ་ཤ་ན། མོ་ཧ་བི་ཥ་ནིར་མོ་ཀྵ་ནཾ་ཧུ་ལུ་ཧུ་ལུ་མ་ལ། ཕ་ལ་ཕ་ལ་ཧ་རེ། མ་ཧཱ་པདྨ་ནཱ་ཁ། ས་ར་སར། སི་རི་སི་རི། སུ་རུ་སུ་རུ། བུདྡྷྱ་བུདྡྷྱ། བོ་དྷྱ་བོ་དྷྱ། བོ་དྷ་ཡཱ་མི། མི་ཏི་ནཱི་ལ་ཀཎྠ་ཨེ་ཧྱེ་ཧི། བཱ་མ་སྠི་ཏི། སིཾ་ཧ་མུ་ཁ་ཧ་ས་ཧ་ས། མུཉྩ་མུཉྩ་མ་ཧཱཊྚ་ཊྚ་ཧཱ་ཧེ་ཧི་རྣཱ་དི་ནི། ཨེ་ཧྱེ་ཧི་བྷོཿབྷོཿམ་ཧཱ་སིདྡྷ་ཡོ་གཱི་ཤྭ་ར། བནྡྷ་བནྡྷ། བ་ཙཾ། སཱ་དྷ་ཡ་སཱ་དྷ་ཡ། བི་དྱཱཾ། སྨ་ར་སྨ་ར་ཏྭཾ། བྷ་ག་བཱ་ནྟི། ལོ་ཀ་བི་ལོ་ཀི་ཏྭཾ། ཏ་ཐཱ་ག་ཏ། ད་དཱ་ཧི་མེ་ད་ཪྴ་ནཾ། ཀ་མ་སྱ་དཪྴ་ནཾ། པྲཧླཱ་ད་ཡ་མ་ན་སྭཱ་ཧཱ། སིདྡྷཱ་ཡ་སྭཱ་ཧཱ། མ་ཧཱ་སིདྡྷཱ་ཡ་སྭཱ་ཧཱ། སིདྡྷི་ཡོ་གཱི་ཤྭ་རཱ་ཡ་སྭཱ་ཧཱ། ནི་ལ་ཀཎྛཱ་ཡ་སྭཱ་ཧཱ། བཱ་རཱ་ཧཱ་མུ་ཁཱ་ཡ་སྭཱ་ཧཱ། སིཾ་ཧ་མུ་ཁཱ་ཡ་སྭཱ་ཧཱ། མ་ཧཱ་ནཱ་རི་སིཾ་ཧ་མུ་ཁཱ་ཡ་སྭཱ་ཧཱ། སིདྡྷ་བི་དྱཱ་དྷ་རཱ་ཡ་སྭཱ་ཧཱ། པདྨ་ཧ་སྟཱ་ཡ་སྭཱ་ཧཱ། མ་ཧཱ་པདྨ་ཧསྟཱ་ཡ་སྭཱ་ཧཱ། བཛྲ་ཧ་སྟཱ་ཡ་སྭཱ་ཧཱ། ཀྲྀ་ཥྞ་སརྦྦ་ཀྲི་ཏ་ཡ་ཛྙོ་པ་བཱི་ཏཱ་ཡ་སྭཱ་ཧཱ། མ་ཧཱ་ཀཱ་ལ་མུ་ཀུ་ཊ་དྷ་རཱ་ཡ་སྭཱ་ཧཱ། ཙཀྲ་ཨ་ཡུ་དྷ་དྷ་རཱ་ཡ་སྭཱ་ཧཱ། ཤཾ་ཁ་ཤབད་ནིརྣཱ་ད་ན་ཀ་རཱ་ཡ་སྭཱ་ཧཱ། ནི་བོ་དྷ་ན་ཀ་རཱ་ཡ་སྭཱ་ཧཱ། བཱ་མ་སྐ་ནྡྷ་དེ་ཤ་སྠི་ཏ་ཀྲྀཥྞ་ཛ་ནཱ་ཡ་སྭཱ་ཧཱ། བཱ་མ་ཧ་སྟ་བྱཱ་གྷྲ་ཙརྨ་ནི་བ་ས་ནཱ་ཡ་སྭཱ་ཧཱ། ལོ་ཀེ་ཤྭ་རཱ་ཡ་སྭཱ་ཧཱ། མ་ཧཱ་ལོ་ཀ་ཤྭ་རཱ་ཡ་སྭཱ་ཧཱ། སརྦ་སིདྡྷེ་ཤྭ་རཱ་ཡ་སྭཱ་ཧཱ། ན་མོ་བྷ་ག་བ་ཏེ། ཨཱཪྻཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། སིདྡྷྱ་ནྟུ་མེ་མནྟ་པ་དཻཿསྭཱ་ཧཱ། བཱ་ཨོཾ་ཧྲཱིཿཏྲཻ་ལོ་ཀྱ་བི་ཙ་མ་ཨ་མོ་གྷ་
པཱ་ཤེ་ཨ་པྲ་ཏི་ཧ་ཏ་ཧྲཱིཿཧ་ཧཱུཾ་ཕཊ་སྭཱ་ཧཱ། ཨོཾ་པདྨོ་ཥྞཱི་ཥ་བི་མ་ལེ་ཧཱུཾ་སྭཱ་ཧཱ། ཨོཾ་ཏཱ་རེ་ཏུ་ཏྟཱ་རེ་ཏུ་རེ་སྭཱ་ཧཱ། གཟུངས་འདི་ལན་ཅིག་བརྗོད་པས་རྩ་བའི་ལྟུང་བ་བཞིན་བྱུང་བ་ཡང་མ་ལུས་པར་འབྱང་བར་འགྱུར་རོ། །འདི་འཛིན་པའི་གང་ཟག་དེ་ལ་འཕགས་བ་སྤྱན་རས་གཟིགས་ཀྱི་དབང་པོ་རྒྱུན་མི་འཆད་པར་མིག་སྟོང་དང་ལྡན་པའི་ཐུགས་རྗེས་གཟིགས་པར་འགྱུར་རོ། །ཕྱག་སྟོང་གིས་སྐྱོབ་པར་འགྱུར་རོ། །མཚམས་མེད་པ་ལྔ་དང༌། དེ་དང་ཉེ་བ་ལྔ་དང་དགེ་འདུན་གྱི་དཀོར་རྐུ་འཕྲོག་བྱས་པ་རྣམས་ཀྱང་ལན་ཅིག་བརྗོད་བས་མ་ལུས་པར་ཟད་པར་འགྱུར་རོ། །ཐེ་ཚོམ་ཟ་བ་ནི་མ་གཏོགས་སོ། །གཤིས་ངན་དུ་འཆི་བའི་འཆི་ལྟས་བཅོ་ལྔ་འབྱུང་བར་མི་འགྱུར་རོ། །སྐྱེ་བ་བཟང་པོ་བཅོ་ལྔ་ཡོངས་སུ་འཛིན་པར་འགྱུར་རོ། །སུས་སྙིང་པོ་འདིའི་མིང་ཐོས་པ་དེ་ནི་བསྐལ་པ་དུ་མའི་སྐྱེ་བ་དང་འཆི་བའི་བསགས་པའི་ལས་ལྕི་བ་རྣམས་ཀྱང་བྱང་བར་འགྱུར་ན་བརྗོད་ཅིང་འཛིན་པ་ལྟ་ཅི་སྨོས། རྒྱུན་མི་འཆད་པར་བཟུང་ན་ས་བཅུའི་འབྲས་བུ་ཐོབ་པ་ལ་དཀའ་བ་མེད་ན། འཇིག་རྟེན་པའི་བསོད་རྣམས་ཀྱི་འབྲས་བུ་ཐོབ་པ་ལྟ་ཅི་སྨོས། ཡུལ་གང་དུ་ཡམས་ཀྱི་ནད་བྱུང་ལ་ཡུལ་དེར་རྒྱལ་པོས་ཆོས་ཀྱི་ཡུལ་སྲུང་ཞིང་རྒྱ་ཆེ་བ་དང་གཙང་མར་བྱ། སེམས་ཅན་ཐམས་ཅད་གཏམས་ལས་མི་བཅད་དོ། །ཉེས་པ་བྱུང་བ་རྣམས་ལ་བཟོད་པར་བྱའོ། །ཞག་བདུན་སྙིང་རྗེ་ཆེན་པོའི་རང་བཞིན་གྱི་སྙིང་པོ་འདི་བཟླས་བརྗོད་བྱས་ན་ཡུལ་དེར་ཡམས་ཀྱི་ནད་ཐམས་ཅད་ཞི་བར་འགྱུར་རོ། །ཡུལ་དེར་གནས་པའི་མི་མ་ཡིན་པ་རྣམས་ལ་གཏོར་མ་བྱིན་ལ། འཕགས་པ་སྤྱན་རས་གཟིགས་དབང་ཕྱུག་ལག་པ་སྟོང་དང་ལྡན་པའི་སྐུ་གཟུགས་ལ་མཆོད་པ་རྒྱ་ཆེན་པོ་བྱས་ལ། རིག་པ་ལན་ཉི་ཤུ་རྩ་གཅིག་བརྗོད་ནས་རོལ་མོ་སྣ་ཚོགས་ཀྱིས་ལན་གསུམ་དུ་བསྐོར་བ་བྱས་ན་རིམས་ནད་ཐམས་ཅད་ཞི་བར་འགྱུར་རོ། །ཚོན་སྐུད་སྣ་ལྔ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ལ་མགུལ་དུ་བཏགས་སོ། །གལ་ཏེ་ས་རིས་སོ་སོར་དགྲ་རྒྱུན་ཏུ་འོང་ཞིང་ཡུལ་དུ་གནས་པའི་སེམས་ཅན་རྣམས་ལ་གནོད་པར་བྱེད་པ་དང་ཡུལ་དེར་ནད་བྱུང་བ་དད། ཆར་ཆུ་དུས་སུ་མི་འབབ་པ་དང༌། ཟླ་བ་དང་ཉི་མ་དྲང་པོར་མི་འགྲོ་བ་དང༌། ལྟས་ངན་པ་དེ་སྙེད་བྱུང་
ན་རྒྱལ་པོ་དེས་སྤྱན་རས་གཟིགས་དབང་ཕྱུག་ལག་པ་སྟོང་དང་ལྡན་པའི་གཟུགས་བྱས་ལ་གང་དུ་ཡམས་ཀྱི་ནད་བྱུང་བ་དེའི་ངོས་སུ་བཞིན་བསྟན་ལ་གཞག་གོ །ཤིན་ཏུ་དུད་པ་བདུག་པ་དང་མེ་ཏོག་དང་གདུགས་དང༌། རྒྱལ་མཚན་ལ་སོགས་པ་ཅི་འབྱོར་པས་མཆོད་པར་བྱའོ།། དེ་ནས་སྒྲུབ་པ་པོས་ཞག་བདུན་དུ་བརྩོན་འགྲུས་བརྟན་པོར་བྱས་ནས་རིས་སོ་སོའི་དགྲ་ཐམས་ཅད་ཕྱག་འཚལ་བར་འགྱུར་རོ། །སེམས་མཐུན་པར་འགྱུར། ཕན་ཚུན་གྲོགས་པོར་འགྱུར་རོ། །སྐྱེ་བོ་ཡོངས་དང་རྒྱལ་བུ་རྣམས་ཀྱང་བྱས་བ་གཟོ་ཞིང་ལེགས་པ་བྱེད་པར་འགྱུར་རོ། །རྒྱལ་པོའི་བཙུན་མོའི་འཁོར་རྣམས་ཀྱང་དེ་ལ་དགའ་བ་བསྐྱེད་པར་འགྱུར་རོ། །ནད་དང་གནོད་པ་གང་བྱུང་ཡང་འཕགས་པ་སྤྱན་རས་གཟིགས་དབང་ཕྱུག་ལག་པ་སྟོང་དང་མིག་སྟོང་དང་ལྡན་པའི་མདུན་དུ་མཆོད་པ་བྱས་ལ་གཟུངས་སྔགས་སྟོང་རྩ་བརྒྱད་བཟླས་བརྗོད་བྱས་ན་སྡུག་བསྔལ་ཐམས་ཅད་ཞི་བར་འགྱུར་རོ། །སུ་ཞིག་ཧ་ལ་ཧ་ལའི་དུག་ཟོས་ན་དེ་གུ་གུལ་གྱི་བདུག་པ་དང༌། ག་པུར་ཆ་བསྙམས་ཏེ། ཁྲོན་པ་ཆུ་ལྷག་མར་མ་གྱུར་པ་བསྐོལ་ལ་ཁྱོར་གང་ལུས་པ་དང༌། བྱང་ཆུབ་སེམས་དཔའ་མིག་སྟོང་ལྡན་གྱི་མདུན་དུ་བརྒྱ་རྩ་བརྒྱད་བཟླས་བརྗོད་བྱས་ཏེ་འཐུངས་ན་དུག་ཞི་བར་འགྱུར་རོ། །སུ་ཞིག་མིག་ཉམས་ཏེ་ལོང་བར་གྱུར་པ་དང༌། མིག་གི་འབྲས་བུའི་སྟེང་དུ་ལིང་ཏོག་བྱུང་བ་དང༌། མིག་ཏུ་རུ་སྐྱེས་ཏེ་མི་མཐོང་བར་གྱུར་པ་དེས་ཨ་རུ་ར་དང༌། བ་རུ་ར་གཅིག་དང༌། སྐྱུ་རུ་ར་གཅིག་ཞིབ་ཏུ་བཏགས་ལ་སྦྲང་རྩི་དཀར་པོ་དང༌། ཁྱེའུའི་ནུ་མའི་འོ་མ་དང་སྦྱར་བར་བྱ་སྟེ། སྦྱོར་པའི་ཚེ་སངས་རྒྱས་ཀྱི་མཚན་ནས་བརྗོད་ཅིང་བྱིས་པ་གསར་པ་བཙས་པའི་བུད་མེད་དང༌། ཁྱི་དང་ཕག་གིས་མི་མཐོང་བར་རིལ་བུ་བྱས་ཏེ། བྱང་ཆུབ་སེམས་དཔའ་མིག་སྟོང་ལྡན་གྱི་མདུན་དུ་ལན་སྟོང་རྩ་བརྒྱད་བཟླས་བརྗོད་བྱས་ལ། དབེན་པ་རླུང་མི་འོང་བར་འདུག་སྟེ། ཉི་མ་བདུན་གྱི་བར་དུ་སྨན་འདི་མིའི་འོ་མ་དང་སྦྲང་རྩི་དཀར་པོ་དང་སྦྱར་ཏེ་མིག་གི་ནང་དུ་བླུགས་ན་མིག་གི་འབྲས་བུ་སྐྱེ་བར་འགྱུར་རོ། །ལིང་ཐོག་མེད་ཅིང་ལེགས་པར་མཐོང་བར་འགྱུར་རོ། །སུ་ཞིག་འབྱུང་པོའི་གདོན་ནས་མི་མ་ཡིན་པའི་ནད་ཀྱིས་བཏབ་པར་
གྱུར་ན་གུ་གུལ་གྱི་དུད་པ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ལ་སྣར་བདུག་གོ །ཡང་ན་རི་བོང་གི་རྟུག་པ་ཙམ་གྱི་རིལ་བུ་བྱས་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ལ་བཟའོ། །ཤ་དང་ཆང་དང་སྒོག་པ་དང་འཐབ་མོ་སྦང་ངོ༌། །འོན་ཀྱང་སོ་ས་པར་འགྱུར་རོ། །ཤུ་དག་དཀར་པོ་ལ་ལན་བརྒྱ་རྩ་བརྒྱད་བཟླས་བརྗོད་བྱས་ཏེ། དཔུང་པ་གཡས་པར་བཏགས་ན་འཐབ་མོ་ལས་རྒྱལ་བར་འགྱུར་རོ། །བ་ལང་དཀར་པོའི་གི་ཝང་ལག་མཐིལ་དུ་བཅུག་ལ་བྱང་ཆུབ་སེམས་དཔའི་དྲུང་དུ་ལན་སྟོང་རྩ་བརྒྱད་བཟླས་བརྗོད་བྱས་ཏེ་ཡན་ལག་རྣམས་ལ་བསྐུས་ཏེ་དཔྲལ་པར་ཐིག་ལེ་བྱས་ན། ལྷ་དང་ཀླུ་དང་འབྱུང་པོ་དང༌། མི་ཐམས་ཅད་དགའ་བར་འགྱུར་རོ། །ཁྱོ་ཤུག་མེ་དང་ཆུ་ལྟར་མི་མཐུན་པར་གྱུར་ན་བྱང་ཆུབ་སེམས་དཔའི་མདུན་དུ་དུར་པའི་མཇུག་སྒྲོལ་ལན་སྟོང་རྩ་བརྒྱད་བཟླས་བརྗོད་བྱས་ནས་ལུས་ལ་བཏགས་ན་མཛའ་བར་འགྱུར་རོ། །རིན་པོ་ཆེ་སྣ་ཚོགས་ཕུན་སུམ་ཚོགས་ཤིང་ཕྱུག་པར་འདོད་ན་ཡིད་བཞིན་གྱི་ནོར་བུ་རིན་པོ་ཆེ་ཐོགས་པའི་ཕྱག་ལ་མཆོད་པར་བྱའོ། །མི་བདེ་བ་རྣམ་པ་སྣ་ཚོགས་ཀྱིས་གཙེས་པར་འགྱུར་ན་ཞགས་པ་ཐོགས་པའི་ཕྱག་ལ་མཆོད་དོ། །ཁོང་པར་ནང་རྣམས་ཡོད་པར་གྱུར་ན་རིན་པོ་ཆེའི་ལྷུང་བཟེད་ཐོགས་པའི་ཕྱག་ལ་མཆོད་དོ། །འདྲེ་གདོན་ཐམས་ཅད་གདུལ་བར་འདོད་ན་རིན་པོ་ཆེའི་རལ་གྲི་ཐོགས་པའི་ཕྱག་ལ་མཆོད་དོ། །ལྷའི་བུའི་བདུད་ཐམས་ཅད་གདུལ་བར་འདོད་ན་རྡོ་རྗེ་ཐོགས་པའི་ཕྱག་ལ་མཆོད་དོ། །ཕས་ཀྱི་རྒོལ་བའི་དགྲ་གཞོམ་པར་འདོད་ན་རྡོ་རྗེའི་ཐོ་བ་ཐོགས་པའི་ཕྱག་ལ་མཆོད་དོ།། འཇིགས་ཤིང་བག་ཚ་བའི་གནས་ཐམས་ཅད་ལ་ཐར་བར་འདོད་ན་འཇིགས་པ་མེད་པའི་སྦྱིན་པའི་ཕྱག་ལ་ཆོད་དོ། །མིག་མི་གསལ་ཏེ་འོད་དང་མི་ལྡན་པར་གྱུར་ན་མེ་ཤེལ་གྱི་ནོར་བུ་ཐོགས་པའི་ཕྱག་ལ་མཆོད་དོ། །ཚ་བའི་རིམས་ཀྱིས་ཐེབས་ཏེ་བསིལ་བར་འདོད་ན་ཆུ་ཤེལ་གྱི་ནོར་བུ་ཐོགས་པའི་ཕྱག་ལ་མཆོད་དོ། །བློན་ཐབས་མཐོན་པོར་འདོད་ན་རིན་པོ་ཆེའི་གཞུ་ཐོགས་པའི་ཕྱག་ལ་མཆོད་དོ། །གྲོགས་པོ་མཛའ་བཤེས་དང་མྱུར་དུ་ཕྲད་པར་འདོད་ན་རིན་པོ་ཆེའི་མདའ་ཐོགས་པའི་ཕྱག་ལ་མཆོད་དོ། །ལུས་ལ་ནད་སྣ་ཚོགས་ཀྱིས་ཐེབས་པར་གྱུར་ན་ལྕུག་མ་ཐོགས་པའི་ཕྱག་
ལ་མཆོད་དོ། །ལུས་ཀྱི་བགེགས་མ་ལུས་པ་བསལ་བར་འདོད་ན་རྔ་ཡབ་དཀར་པོ་ཐོགས་པའི་ཕྱག་ལ་མཆོད་དོ། །ཐམས་ཅད་མཐུན་པའི་འཁོར་དུ་འགྱུར་བར་འདོད་ན་བུམ་པ་ཐོགས་པའི་ཕྱག་ལ་མཆོད་དོ། །སྟག་དང་འཕར་སྤྱང་དང་དོམ་དྲེད་དང་གཅན་གཟན་མ་རུངས་པ་ཐམས་ཅད་སྤོང་བར་འདོད་ན་ཕུབ་ཐོགས་པའི་ཕྱག་ལ་མཆོད་དོ། །གནས་དང་དུས་ཐམས་ཅད་དུ་རྒྱལ་པོའི་བགེགས་ལས་ཐར་བར་འདོད་ན་དགྲ་སྟ་ཐོགས་པའི་ཕྱག་ལ་མཆོད་དོ། །བུ་དང་བུ་མོ་དང་གཡོག་འཁོར་གྱི་ཕྱིར་ཤེལ་གྱི་གདུབ་འཁོར་ཐོགས་པའི་ཕྱག་ལ་མཆོད་དོ། །ཡོན་ཏན་རྣམ་པ་སྣ་ཚོགས་ཀྱི་ཕྱིར་ནི་པདྨ་དཀར་པོ་ཐོགས་པའི་ཕྱག་ལ་མཆོད་དོ། །ཕྱོགས་བཅུའི་ཞིང་ཡོངས་སུ་དག་པར་འདོད་ན། པདྨ་སྔོན་པོ་ཐོགས་པའི་ཕྱག་ལ་མཆོད་དོ། །ཤེས་རབ་ཆེན་པོ་དང་ལྡན་པར་འདོད་ན་རིན་པོ་ཆེའི་མེ་ལོང་ཐོགས་པའི་ཕྱག་ལམ་ཆོད་དོ། །ཕྱོགས་བཅུའི་དེ་བཞིན་གཤེགས་པ་རྣམས་མངོན་སུམ་དུ་མཐོང་བར་འདོད་ན། པདྨ་ཐོགས་པའི་ཕྱག་ལ་མཆོད་དོ། །སའི་གཏེར་འབྱིན་པར་འདོད་ན་རིན་པོ་ཆེའི་ཟ་མ་ཏོག་ཐོགས་པའི་ཕྱག་ལ་མཆོད་དོ། །དྲང་སྲོང་གི་ལམ་མངོན་པར་བསྒྲུབ་པར་འདོད་ན་སྤྲིན་རྣམ་པ་ལྔ་ཐོགས་པའི་ཕྱག་ལ་མཆོད་དོ། །ཚངས་པར་སྐྱེས་བར་འདོད་ན་རིལ་བ་ཐོགས་པའི་ཕྱག་ལ་མཆོད་དོ། །ལྷའི་གཞལ་མེད་ཁང་དུ་སྐྱེ་བར་འདོད་ན། པདྨ་ལེ་བརྒན་ཐོགས་པའི་ཕྱག་ལ་མཆོད་དོ། །ཕྱོགས་གཞན་གྱི་ཕྱིར་རྒོལ་བ་བསལ་བར་འདོད་ན། རལ་གྲི་དང་མདུང་ཐོགས་པའི་ཕྱག་ལ་མཆོད་དོ། །དགེ་བའི་ལྷ་འདྲེ་ཐམས་ཅད་དགུག་པར་འདོད་ན་རིན་པོ་ཆེའི་དུང་ཐོགས་པའི་ཕྱག་ལ་མཆོད་དོ། །ལྷ་འདྲེ་ཐམས་ཅད་འཁོལ་བར་འདོད་ན་ཐོད་པའི་ཁར་བ་ཐོགས་པའི་ཕྱག་ལ་མཆོད་དོ། །ཕྱོགས་བཅུའི་སངས་རྒྱས་མྱུར་དུ་གཤེགས་ནས་ཕྱག་གིས་བྱུག་པར་འདོད་ན་བགྲང་ཕྲེང་འཛིན་པའི་ཕྱག་ལ་མཆོད་དོ། །ཚངས་པའི་སྒྲ་དབྱངས་མཆོད་ཐམས་ཅད་མངོན་པར་འགྲུབ་པར་འདོད་ན་རིན་པོ་ཆེའི་དྲིལ་བུ་ཐོགས་པའི་ཕྱག་ལ་མཆོད་དོ། །ཚིག་གི་སྤོབས་པ་གྱ་ནོམ་པ་དང་ལྡན་པར་འདོད་ན་རིན་པོ་ཆེའི་ཕྱག་རྒྱ་ཐོགས་པའི་ཕྱག་ལ་མཆོད་དོ། །དགེ་བའི་ལྷ་རྣམས་དང་ཀླུ་རྣམས་རྟག་པར་འོངས་ཏེ་བསྲུང་
ཞིང་ཡོངས་སུ་སྐྱོབ་པར་འདོད་ན་ལྕགས་ཀྱུ་ཐོགས་པའི་ཕྱག་ལ་མཆོད་དོ། །བྱམས་དང་སྙིང་རྗེས་སེམས་ཅན་ཐམས་ཅད་སྐྱོབ་པར་འདོད་ན་འཁོར་གསིལ་ཐོགས་པའི་ཕྱག་ལ་མཆོད་དོ། །སེམས་ཅན་ཐམས་ཅད་ཀྱིས་རྟགས་པར་ཕན་ཚུན་གུས་པའི་བསྙེན་བཀུར་བརྩེ་བར་སེམས་པར་འདོད་ན་ཐལ་མོ་སྦྱོར་བའི་ཕྱག་ལ་མཆོད་དོ། །སྐྱེ་བའི་སྐྱེ་གནས་ཐམས་ཅད་དུ་དེ་བཞིན་གཤེགས་པ་རྣམས་དང་མི་འབྲལ་བར་འདོད་ན་སྤྲུལ་བའི་སངས་རྒྱས་ཐོགས་པའི་ཕྱག་མཆོད་དོ། །སྐྱེ་བའི་ཚེ་རབས་ཐམས་ཅད་དུ་རྟག་པར་ངེ་བཞིན་གཤེགས་པའི་ཕོ་བྲད་དུ་གནས་ནས་མངལ་གྱི་སྙིང་པོར་སྐྱེ་བར་མི་འདོད་པར་གྱུར་ན་གཞལ་མེད་ཁང་ཐོགས་པའི་ཕྱག་ལ་མཆོད་དོ། །མང་དུ་ཐོས་པའི་ཤེས་རབ་རྒྱ་ཆེན་པོ་དང་ལྡན་པར་འདོད་ན་རིན་པོ་ཆེའི་མདོ་སྡེའི་གླེགས་བམ་ཐོགས་པའི་ཕྱག་ལ་མཆོད་དོ། །ད་ལྟར་གྱི་ལུས་འདི་ནས་སངས་རྒྱས་ཀྱི་སྐུ་ལ་ཐུག་པའི་བར་དུ་རྟག་ཏུ་བྱང་ཆུབ་ཀྱི་སེམས་ལས་ལྡོག་པར་མི་འགྱུར་བར་འདོད་ན་ཕྱིར་མི་ལྡོག་པའི་གསེར་གྱི་འཁོར་ལོ་ཐོགས་པའི་ཕྱག་ལ་མཆོད་དོ། །མི་འཇིགས་པ་ལ་སོགས་པའི་སྦྱིན་པ་རྣམ་པ་བཞིས་འགྲོ་བ་ཚིམས་པར་འདོད་ན་མཆོག་སྦྱིན་པའི་ཕྱག་ལ་མཆོད་དོ། །ཕྱོགས་བཅུའི་དེ་བཞིན་གཤེགས་པ་རྣམས་མྱུར་དུ་གཤེགས་ནས་སྤྱི་བོ་ནས་ཕྱག་གིས་བྱུགས་ཏེ་ལུང་བསྟན་པར་འདོད་ན་སྤྱི་བོ་ན་སྤྲུལ་པའི་སངས་རྒྱས་ཐོགས་པའི་ཕྱག་ལ་མཆོད་དོ། །ཤིང་ཏོག་དང་འབྲས་བུ་རྣམས་འགྲུབ་པར་འདོད་ན་རྒྱུན་འབྲུམ་ཐོགས་པའི་ཕྱག་ལ་མཆོད་དོ། །དེ་ལྟར་མངོན་པར་སྒྲུབ་པའི་མཆོག་རྣམས་སྟོང་ཡོད་ཀྱང༌། དེ་མདོར་བསྡུས་ནས་བསྟན་པ་ཡིན་ནོ། །ལུས་དྲང་པོར་བསྲང་སྟེ་སྙིང་གར་ཐལ་མོ་སྦྱར་ནས་སོར་མོ་ཐམས་ཅད་ཕན་ཚུན་ཐད་ཀར་བསྣོལ་ལ་གཡོན་པའི་སོར་མོ་རྣམས་ཀྱིས་གཡས་པའི་སོར་མོ་རྣམས་ལ་འཁྱུད་དེ་མཛུབ་མོ་གྱེན་དུ་བསྒྲེ་ངས་ལ་རྩེ་མོ་གཉིས་སྤྲད་དོ། །མཐེ་བོ་གཉིས་མཛུ་བ་མོ་གཉིས་ཀྱི་ཚིགས་དང་པོར་རག་པར་བགྱི། ལག་མཐིལ་ལ་མ་འབྱར་བར་བགྱིའོ། །འདི་ནི་གཟུངས་སྔགས་ཐམས་ཅད་ཀྱི་ཕྱག་རྒྱ་ཡིན་ནོ། །བསྐལ་པ་དུ་མར་ཚེ་རབས་སུ་བསགས་པའི་ལས་ཀྱི་སྒྲིབ་པ་མི་དགེ་བ་རྣམས་བྱང་བར་འགྱུར་
རོ། །ཚེ་ཕྱི་མ་ལ་སངས་རྒྱས་ཀྱི་ཞིང་རྣམས་སུ་སྐྱེ་བར་འགྱུར་རོ། །སངས་རྒྱས་བཅོམ་ལྡན་འདས་ཤཱཀྱ་ཐུབ་པས་བྱང་ཆུབ་བརྙེས་པར་མཛད་པའི་ཚེ་བདུད་ཐམས་ཅད་ཀྱིས་མཐོ་བཙམས་པ་ན་ཕྱག་རྒྱ་འདིས་བཏུལ་ཏེ། དེའི་ཚེ་ཞི་བ་དང་བདེ་བ་དང་བསམ་གཏན་དང་སྙོམས་པར་འཇུག་པ་ཡང་བརྙེས་པར་གྱུར་ཏོ། །དེའི་གསངས་སྔགས་ནི་འདི་ཡིན་ནོ། །ཏདྱ་ཐཱ། སརྦ་དྷརྨཱ་མཎྜ་ལཱ་ཡེ་ཨེ་ཧྱེ་ཧི་སརྦ་ཤུདྡྷ་སཏྭཱ་ཡ་སྭཱ་ཧཱ། འཕྱགས་པ་སྤྱན་རས་གཟིགས་ཕྱག་སྟོང་པའི་དཀྱིལ་འཁོར་གྱི་ཆོ་ག་བརྗོད་པར་བྱ་སྟེ། ཐོག་མར་རི་རྣམས་དང་ཉེ་བར་མ་གཞི་ས་གཙང་ཞིང་བཀྲ་ཤིས་པའི་ས་ཕྱོགས་བཙལ་བར་བགྱིའོ། །དེར་ས་བརྐོས་ཏེ་གསེག་མ་དང་གྱོ་མོ་དང་རུས་པ་དང་མི་གཙང་བ་རྣམས་བསལ་ལ་དྲི་ཞིམ་པོ་དག་དང་བའི་ལྕི་བ་དང་འཇིམ་པ་བསྲེས་ཏེ་བྱུག་པར་བྱ། དཀྱིལ་འཁོར་དཔངས་མཐོ་གང་གི་ཚད་དུ་སྒོ་བཞི་གདོད་དོ། །རིན་པོ་ཆེ་དུ་མས་སྤྲས་པའི་རྟ་བབས་དང་སྒོ་ཁྱུད་དང་བཅས་པ་ཚང་བར་གྱིའོ། །ཤར་གྱི་སྒོར་ནི་ཡུལ་འཁོར་སྲུང༌། ལྷོའི་སྒོར་ནི་འཕགས་སྐྱེས་པོ། ནུབ་ཀྱི་སྒོར་ནི་སྤྱན་མི་བཟང༌། བྱང་གི་སྒོར་ནི་རྣམ་ཐོས་སྲས། དེ་དག་གི་གཡས་གཡོན་དུ་རང་རང་གི་འཁོར་ཐམས་ཅད་བྲིའོ། །དཀྱིལ་འཁོར་གྱི་དབུས་སུ་འཕགས་པ་སྤྱན་རས་གཟིགས་དབང་ཕྱུག་ཕྱག་སྟོང་པ་གཞག་པར་བགྱིའོ། །དེའི་མདུན་དུ་སྒྲོ་ལམ་དང་ཁྲིའུ་གཞག་སྟེ་ཁྲིའུའི་སྟེང་དུ་གཟུགས་སྔགས་འདི་གཞག་པར་བགྱིའོ། །གཡས་ཕྱོགས་སུ་ནི་དོན་ཡོད་པའི་ཞགས་པའོ། །རྒྱབ་ཏུ་ནི་ནོར་བཟངས་སོ། །གཡོན་དུ་ནི་རྟ་མགྲིན་ནོ། །མཚམས་བཞིར་གོ་རིམས་ཇི་ལྟ་བ་བཞིན་དུ་གཟུངས་ཀྱི་དབང་ཕྱག་རྒྱལ་པོ་དང། བྱམས་པ་དང། འཇམ་དཔལ་དང། ཕྱག་ན་རྡོ་རྗེའོ། །དཀྱིལ་འཁོར་དེ་ལ་བདུག་པ་སྣ་ཚོགས་ཀྱིས་བདུག་གོ །མེ་ཏོག་སྣ་ཚོགས་དགྲམ། མཆོད་པ་རྣམ་པ་སྣ་ཚོགས་གཞག་པར་བྱའོ། །སྒོག་པ་རྣམ་དགུ་དང་ཤ་ཆང་མི་དབང་ངོ༌། །ཞག་ཉི་ཤུ་རྩ་གཅིག་ཏུ་རྒྱུན་མི་འཆད་པར་མཆོད་པ་གསར་པ་རྣམས་བརྗེའོ། །བསྟོད་པའི་དབྱངས་དང་རོལ་མོ་སྣ་ཚོགས་ཀྱིས་མཆོད་པར་བྱའོ། །དཀྱིལ་འཁོར་གྱི་མཐའ་མར་ནི་མཆོད་རྟེན་བདུན་བདུན་ལ་ཚོན་སྣ་ལྔའི་བ་དན་བཙུགས་ལ་གཞག་
པར་བྱའོ། །དེའི་ཚེ་རྩ་བའི་སྔགས་སྟོང་བརྒྱ་རྩ་བརྒྱད་བཟླས་བརྗོད་བགྱིའོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་གི་གཟུགས་དང་ཀུན་དགའ་བོའི་གཟུགས་ཀྱིས་དེར་འོངས་ནས་སྒྲུབ་པ་པོ་དེ་ལ་ཅི་འདོད་ཅེས་གཏམ་སྨྲ་བར་འགྱུར་རོ། །སྒྲུབ་པ་པོ་དེས་མཆོད་པ་སྣ་ཚོགས་ཀྱིས་མཆོད་ལ་ལན་གདབ་པར་བགྱི་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་དོན་དུ་གཟུགས་སྔགས་ཀྱི་རང་བཞིན་འཚལ་ལོ་ཞེས་བརྗོད་པར་བགྱིའོ། །ཡང་འདི་སྐད་དུ་འདི་ནི་ལུང་བསྟན་པའི་དུས་ལགས་པ་སྙམ་བགྱིད་ན་ཐུགས་རྗེ་དང་ལྡན་པས་བདག་ལ་ངེས་པར་ཐུགས་རྗེ་ཆེན་པོ་བསྐྱེད་དུ་གསོལ། བདག་ནི་རྙེད་པ་དང་བཀུར་སྟི་དང་གྲགས་པ་མི་འཚལ་གྱི་ནམ་ཞིག་ན་སེམས་ཅན་ཐམས་ཅད་ལ་བུ་གཅིག་པ་བཞིན་དུ་ལྟ་བ་དང་ཡོངས་སུ་སྐྱོབ་པར་འགྱུར་སྙམ་དུ་སེམས་སོ། །ཡང་འབྱུང་པོ་གཉུག་མར་གནས་པ་ཐམས་ཅད་བདག་གིས་བསྒོ་བ་བཞིན་དུ་གནས་པར་གྱུར་ཅིག་སྙམ་དུ་སེམས་སོ་ཞེས་བརྗོད་པར་བགྱིའོ། །གལ་ཏེ་ཡིད་ལ་བསམས་པ་འདི་ཐོབ་ཅིང་དངོས་གྲུབ་དེ་ཐོབ་ན་གཞན་ལ་མ་བརྗོད་པར་བདག་ཉིད་ཀྱིས་འཚལ་བར་བགྱིའོ། །གལ་ཏེ་ཆོས་འདི་གྲུབ་ན་བཟླས་པར་བགྱི་གཅིག་ཏུ་གཟུང་བར་བགྱིའོ། །འདི་ནི་བསླབ་པ་གཅིག་ཏུ་གསང་བའོ། །སུ་ཞིག་སྣ་ཚོགས་འཚལ་བ་དེས་ཨ་ཀ་རུ་ནག་པོའི་ཆབ་ཀྱིས་དཀྱིལ་འཁོར་གྲུ་བཞི་པ་བགྱིས་ལ་རྩ་བའི་སྔགས་ལན་བརྒྱ་རྩ་བརྒྱད་བཟླས་བརྗོད་བགྱིའོ། །ཡིད་ལ་བསམ་པ་ཡོངས་སུ་རྫོགས་པར་བགྱིད་པ་ཕྱག་རྒྱ་བཅིང་བར་བགྱིའོ། །འོན་ཀྱང་འཚལ་བ་ཡོངས་སུ་རྫོགས་པ་རྙེད་པར་འགྱུར་རོ། །དེའི་ཚེ་གླེགས་བམ་འདི་བཞིན་དུ་སེམས་ཤིང་སུ་ཞིག་འདི་བཞིན་དུ་མཆོད་པར་བགྱིས་ན་གཞན་དུ་མི་འགྱུར་རོ། །འཕགས་པ་སྤྱན་རས་གཟིགས་ཀྱི་དབང་པོས་སངས་རྒྱས་རྣམ་པར་གཟིགས་འཇིག་རྟེན་དུ་བྱོན་པའི་ཚེ་འཕགས་པ་སྤྱན་རས་གཟིགས་ཀྱིས་བདུད་བཏུལ་བའི་ཚེ་ལུས་ལས་མིག་སྟོང་སྤྲུལ་ཏེ་མིག་རེ་རེ་ལས་སངས་རྒྱས་རེ་རེ་སྤྲུལ་ཏེ། དེ་དག་ལས་བསྐལ་པ་བཟད་པོའི་སངས་རྒྱས་སྟོང་འབྱུང་ངོ༌། །ལག་པ་སྟོང་ལས་ལག་པ་རེ་རེ་ལས་འཁོར་ལོས་སྒྱུར་བའི་རྒྱལ་པོ་རེ་རེ་སྤྲུལ་ཏེ་དེ་དག་ལ་ནི་འཁོར་ལོས་
སྒྱུར་བའི་རྒྱལ་པོ་སྟོང་འབྱུང་ངོ༌། །བདུད་བཏུལ་བའི་ནང་ན་བྱང་ཆུབ་སེམས་དཔའི་ལུས་ནི་མཆོག་གོ །དེ་ནས་རྫོགས་པའི་རིམ་པ་བསྒོམ་པར་བྱ་སྟེ། ཟབ་པ་དང་ཕྲ་བའི་རྫོགས་རིམ་ནི་བླ་མའི་མན་ངག་ལས་ཤེས་པར་བྱའོ། །དེ་ནས་ཛ་ཧི་ཞེས་བརྗོད་པས་མདུན་གྱི་ནམ་མཁའ་ལ་གཤེགས་ལ་བསྟོད་པ་དང་མཆོད་པས་མཆོད་ལ། མགོན་པོ་ཐུགས་རྗེ་ཆེན་པོ་དང་ལྡན་པ་འཁོར་དང་བཅས་པ་དགོངས་སུ་གསོལ། བདག་ཉིད་གཅིག་པུ་སྡུག་བསྔལ་ལས་ཐར་ནས་བདེ་བ་ལ་གནས་པར་འདོད་པ་མ་ལགས་ཀྱིས་ཕྱོགས་བཅུའི་སེམས་ཅན་ཐམས་ཅད་ཕྱག་རྒྱ་ཆེན་པོའི་དངོས་གྲུབ་ཐོབ་པའི་ཆེད་དུ་འཕགས་པ་སྒྲུབ་པ་ལ་སྐུ་གསུང་ཐུགས་ཀྱི་དངོས་གྲུབ་ཐམས་ཅད་ཐོབ་པར་བྱིན་གྱིས་བརླབ་པ་དམ་པ་མཛད་དུ་གསོལ་ཞེས་བརྗོད་ལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །ཞེས་བརྗོད་ལ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཅིཏྟཾ་ཤྲེ་ཡཿ་ཀུ་རུ་ཧཱུཾ། ཧ་ཧ་ཧ་ཧ་ཧ་ཧོཿ་བྷག་བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿ། ཞེས་པ་ལན་བདུན་བརྗོད་ལ་གཤེགས་སུ་གསོལ། གཞན་ཡང་དམ་པའི་ཆོས་པདྨ་དཀར་པོ་ནས་གསུངས་པ། སྤྱན་རས་གཟིགས་ཀྱི་དབང་པོ་དྲན་ན་ནི། །ངན་སོང་སྡུག་བསྔལ་དབུལ་བའི་སྡུག་བསྔལ་དང༌། །ན་བའི་སྡུག་བསྔལ་འཚེ་བའི་སྡུག་བསྔལ་བ། །ཀུན་ནས་ཐར་བར་སྤྱན་རས་གཟིགས་ཀྱིས་གསུངས། །གལ་ཏེ་གསོད་པས་མེ་ཡིད་དོང་དུ་ཡང༌། གསད་པར་བྱ་བའི་ཕྱིར་ནི་བོར་བ་ཡིས། །སྤྱན་རས་གཟིགས་ཀྱི་དབང་པོ་དྲན་ན་ནི། །ཆུ་བཏབ་བཞིན་དུ་མེད་གཞི་བར་འགྱུར། །རྒྱ་མཚོ་དང་ནི་མྱ་ངན་རྒལ་ན་ཡང༌། །སྤྱན་རས་གཟིགས་ཀྱི་དབང་པོ་དྲན་ན་ནི། །ཆུ་ཡི་ནང་དུ་ནམ་ཡང་མི་འཆིའོ། །རབ་ཏུ་སྡང་བའི་ཡིད་ཀྱིས་གསད་པའི་ཕྱིར། །རི་རབ་ལྷུན་པོའི་རྩེ་ནས་བོར་ན་ཡང༌། །སྤྱན་རས་གཟིགས་ཀྱི་དབང་པོ་དྲན་ན་ནི། །ཉི་མ་ལྟ་བུར་བར་སྣང་གནས་པར་འགྱུར།
གལ་ཏེ་རྡོ་རྗེ་ཡི་ནི་རི་དགས་དག །བསད་པའི་ཕྱིར་ནི་སྤྱི་བོར་འོངས་ན་ཡང༌། །སྤྱན་རས་གཟིགས་ཀྱི་དབང་པོ་དྲན་ན་ནི། །བ་སྤུའི་ཁུང་ཙམ་གཙེས་པར་མི་ནུས་སོ། །གསད་པའི་སེམས་ཀྱིས་ལག་ན་མཚོན་ཐོགས་ཏེ། །དགྲ་ཚོགས་མང་པོས་རབ་ཏུ་བསྐོར་ན་ཡང༌། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་མ་ཐག་ཏུ་བྱམས་པའི་སེམས་སུ་འགྱུར། །གལ་ཏེ་གསོད་པ་ཉེ་བར་འོངས་ནས་སུ། །གཤེད་མའི་མི་ཡི་དབང་དུ་གྱུར་ན་ཡང༌། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་ཡི་མཚོན་ཆ་དུམ་བུ་དུམ་བུར་འགྱུར། །སྔགས་དང་སྟོབས་དང་སྨན་དང་རིག་སྔགས་དང༌། །རོ་ལངས་པ་དང་འབྱུང་པོ་ལུས་འཇིགས་པ། །སྤྱན་རས་གཟིགས་ཀྱི་དབང་པོ་དྲན་ན་ནི། །གང་ནས་རབ་ཏུ་བཏང་བ་དེ་སླར་འགྲོ། །དྲི་མ་མེད་པ་དྲི་བྲལ་བ་ཡི་འོང༌། །འོད་དཔག་མེད་པ་ཡེ་ཤེས་ཉི་མའི་འོད། །སྤྲིན་གྱིས་ཆོད་པ་མེད་པར་གྱུར་པའི་འོད། །འཇིག་རྟེན་དག་ན་ལྷང་ངེ་ལྷག་གེར་མཛེས། །འཕགས་པ་ལྷ་ཡིས་གསོལ་བ་ལེགས་བཏབ་ནས། །འཕགས་པ་འཇིག་རྟེན་མགོན་པོའི་སྒྲུབ་ཐབས་བྱས། །མི་དབང་རྒྱལ་པོ་བདེ་སྤྱོད་འཁོར་བཅས་རྣམས། །ཚེ་འདིར་འཇིག་རྟེན་མགོན་པོ་མཐོང་བར་ཤོག །སློབ་དཔོན་འཕགས་པ་ཀླུ་སྒྲུབ་བདག་ཉིང་ཆེན་པོ་མི་འཕྲོགས་པའི་མཁྱེན་རབ་དང་ཐུགས་རྗེར་ལྡན་པ་ས་དྲུག་པའི་བྱང་ཆུབ་སེམས་དཔའ་ཡིན་ཡང་ས་དང་པོའི་བྱང་ཆུབ་སེམས་དཔར་བྱིན་གྱིས་བརླབས་པ། དཔེར་ན་ངའི་ཉེ་གནས་ཀུན་དགའ་བོ་ས་བཅུའི་བྱང་ཆུབ་སེམས་དཔའ་ཡིན་ཡང་སོ་སོའི་སྐྱེ་བོར་བྱིན་གྱིས་བརླབས་པ་ལྟ་བུའོ་ཞེས་བཅོམ་ལྡན་འདས་ཀྱིས་གསུངས་པ་ལ་འཇིག་རྟེན་གྱི་ཁམས་བདེ་བ་ཅན་དུ་གཤེགས་ཏེ། ས་བརྒྱད་པ་ལ་གནས་ནས་ལུས་གཉིས་སུ་བྱས་ཏེ། གཅིག་ནི་དེ་བཞིན་གཤེགས་པ་འོད་དཔག་ཏུ་མེད་པ་ལ་མཆོད་པ་བྱེད། གཅིག་ནི་དགའ་ལྡན་དུ་བྱམས་པ་ལ་མདོ་འདི་ཉིད་ཀྱི་དོན་འདྲིའོ་ཞེས་གསུངས་པ། འཇིག་རྟེན་གྱི་ཁམས་དང་བའི་འོད་ཅེས་བྱ་བར་དེ་བཞིན་གཤེགས་པ་ཡེ་ཤེས་འབྱུང་གནས་འོང་ཅེས་བྱ་བར་ལུང་བསྟན་པས་མཛད་པ་རྫོགས་སོ།། །།རྒྱ་གར་གྱི་མཁན་པོ་པཎྜིཏ་ཆེན་པོ་དཱི་པཾ་ཀ་ར་ཤྲཱི་ཛྙཱ་ན་དང༌། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་བའོ།།