འཕགས་པ་འཇིག་རྟེན་དབང་ཕྱུག་ཡི་གེ་དྲུག་པའི་སྒྲུབ་ཐབས།
ཀླུ་སྒྲུབ།
རྒྱ་གར་སྐད་དུ། ཨཱཪྻཱ་བ་ལོ་ཀེ་ཏེ་ཤྭར་ཥ་ཊ་ཀྵ་ར་སཱ་དྷ་ནཾ། བོད་སྐད་དུ། འཕགས་པ་འཇིག་རྟེན་དབང་ཕྱུག་ཡི་གེ་དྲུག་པའི་སྒྲུབ་ཐབས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །གང་ཞིག་དོན་དམ་ཐུགས་ཆུང་སྙིང་རྗེའི་དབང་གིས་ཡེ་ཤེས་སྐུར། །གནས་མཛད་འགྲོ་ལ་བུ་བཞིན་མཉམ་གཟིགས་ནས། །སྡུག་བསྔལ་རྒྱ་མཚོའི་འཇིགས་ལས་སྒྲོལ་མཛད་པའི། །སྐྱོབ་པའི་དབང་པོ་འཇིག་རྟེན་མགོན་ལ་རབ་བཏུད་དེ།། ཡེ་ནས་རྣམ་དག་སེམས་ཉིད་མ་རིག་པའི། །གློ་བུར་དྲི་མས་བསྒྲིབས་པའི་འགྲོ་ལ་ཕན་དོན་དུ། །བསྟན་པ་རྒྱ་མཚོའི་ནང་ནས་ཐེག་མཆོག་རྡོ་རྗེའི་ལམ། །སྒྲིབ་པ་མྱུར་སེལ་བདུད་རྩི་ལྟ་བུ་བྲི་བར་བྱ། །བླ་མ་དཀོན་མཆོག་གསུམ་གུས་ཤིང། །སྙིང་རྗེ་བྱང་ཆུབ་སེམས་སྦྱངས་ཏེ། །དབང་ཐོབ་དམ་ཚིག་ལྡན་པ་ཡི། །སྒྲུབ་ལ་བརྩོན་པའི་རྣལ་འབྱོར་གྱིས། །བཀྲ་ཤིས་ཡིད་འོང་བྱིན་ཆགས་པའི། །དབེན་པའི་གནས་སུ་ཕྱིན་ནས་ནི། །མཆོད་སྦྱིན་ལ་སོགས་སྔོན་སོང་བས། །རྟེན་དང་མཆོད་པ་རིམ་བཞིན་བཤམས། །དེ་ནས་འཚེ་དོགས་ཀུན་སྤངས་ནས། །ཁྲུས་བྱས་བདེ་བའི་སྟན་འདུག་སྟེ། །རང་ཉིད་སྙིང་གར་ཧྲཱིཿ་བལྟས་ལ། །འོད་ཀྱིས་འཕགས་པ་སྤྱན་དྲང་ཞིང༌། །ཕྱག་འཚལ་མཆོད་འབུལ་ལ་སོགས་པས། །བསོད་ནམས་ཚོགས་ནི་བསགས་པར་བྱ། །འགྲོ་ལ་སྙིང་རྗེ་ཆེན་པོ་དང༌། །བྱང་ཆུབ་སེམས་ཀྱང་བསྒོམ་པར་བྱ། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱ་ཏྨ་ཀོཉ྄ཧཾ། དངོས་རྣམས་ཐམས་ཅད་རབ་སྦྱངས་ཏེ། །སྟོང་པ་ཉིད་ཀྱི་ངང་ཉིད་ལས། །རླུང་དང་བདུད་རྩི་རི་རབ་སྟེ། །བྷཱུཾ་ལས་རིན་ཆེན་གཞལ་ཡས་ཁང༌། །གྲུ་བཞི་པ་ལ་སྒོ་བཞི་པ། །རྟ་བབས་ལ་སོགས་རྣམ་པར་མཛེས། །ཕོ་བྲང་ཆུ་སྐྱེས་འདབ་དྲུག་ལ། །སྐུ་གསུང་ཐུགས་ཀྱི་དཀྱིལ་འཁོར་བསྒོམ། །དེ་དབུས་པདྨ་ཟླ་བའི་སྟེང༌། །ཧྲཱིཿ་ལས་འོད་འཕྲོས་དོན་བྱས་ནས། །སླར་འདུས་ཡོངས་སུ་གྱུར་པ་ལས། །འཇིག་རྟེན་དབང་ཕྱུག་སྐུར་བསྐྱེད་དེ། །ཞལ་གཅིག་པ་ལ་ཕྱག་བཞི་པ། །དང་པོ་ཐུགས་ཀར་ཐལ་མོ་སྦྱར། །གཡས་
ན་མུ་ཏིག་ཕྲེང་བ་འཛིན། །གཡོན་པ་པདྨ་དཀར་པོ་བསྣམས། །སྐུ་མདོག་དུང་དང་ཀུན་ད་འམ། །ཁ་བའི་རི་ལྟར་དཀར་བ་ལ། །ཐུགས་རྗེས་ཡིད་ཙམ་དམར་བའི་སྤྱན། །ཞལ་ནི་འཛུམ་པའི་མདངས་དང་ལྡན། །སྐུ་ནི་མི་འགྱུར་དྲང་པོ་སྟེ། །ཞབས་གཉིས་མཉམ་པའི་སྐྱིལ་ཀྲུང་བཞུགས། །དབུ་སྐྲ་མཐོན་མཐིང་ལྕང་ལོ་འཁྱིལ། །ཨ་མི་ཏཱ་བྷས་སྤྱི་གཙུག་བརྒྱན། །མཚན་བཟང་སུམ་ཅུ་རྩ་གཉིས་དང༌། །དཔེ་བྱད་བཟང་པོ་བརྒྱད་ཅུར་ལྡན། །རིན་ཆེན་སྣ་ཚོགས་རྒྱན་གྱིས་སྤྲས། །ལེ་བརྒྱན་དར་གྱི་ན་བཟའ་འཆང༌། །འཇིག་རྟེན་གསུམ་གྱི་མགོན་པོ་ནི། །ཡུམ་དང་སྲས་བཅས་བསྐྱེད་པར་བྱ། །དེ་ནས་གནས་གསུམ་བྱིན་བརླབས་ཏེ། །སྤྱི་བོ་མགྲིན་པ་ཐུགས་ཀ་རུ། །རྡོ་རྗེ་གསུམ་མཆོག་སྙིང་པོ་འདི། །ཁ་དོག་གསུམ་ལྡན་ཡི་གེ་དགོད། །ཕྱོགས་བཅུའི་བདེ་གཤེགས་སྤྱན་དྲངས་ནས། །མཆོད་དེ་གསོལ་བ་བཏབ་པ་ཡིས། །ཡེ་ཤེས་བདུད་རྩིའི་ཆུ་རྒྱུན་གྱིས། །དབང་བསྐུར་རིགས་ཀྱི་བདག་པོས་བརྒྱན། །དེ་ནས་ཐུགས་ཀའི་ས་བོན་ལས། །འོད་ཟེར་སྤྲོས་ཏེ་འོག་མིན་ནས། །ཡེ་ཤེས་སེམས་དཔའ་སྤྱན་དྲངས་ལ། །མཆོད་ཅིང་གཉིས་མེད་བསྲེ་བར་བྱ། །རང་སེམས་རྣམ་དག་ལྷར་གསལ་བ། །སྣང་བ་རང་བཞིན་མེད་པ་ཡི། །ཆུ་ཟླ་མེ་ལོང་གཟུགས་བརྙན་ནམ། །ནམ་མཁའ་ཡི་ནི་འཇའ་ཚོན་ལྟར། །མཐའ་གཉིས་ལས་གྲོལ་ལྷ་ཡི་སྐུ། །སྐུ་བཅས་སྐུ་ནི་མེད་པ་ཡི། །ཟུང་འཇུག་སྒྱུ་མ་ལྟ་བུར་ནི། །རྣལ་འབྱོར་པ་ཡིས་རྟག་ཏུ་བསྒོམ། །དེ་ལྟར་གསལ་བར་གྱུར་པ་དང༌། །དུས་གསུམ་བདེ་གཤེགས་ཐམས་ཅད་ཀྱིས། །བྱིན་གྱིས་བརླབས་པའི་གསང་སྔགས་འདི། །རྒྱུན་མི་འཆད་དུ་བཟླས་པར་བྱ། །ཨོཾ་མ་ཎི་པདྨེ་ཧཱུཾ། འདི་ནི་མཚན་གྱི་རྒྱལ་པོ་སྟེ། མི་མཐུན་དྲི་མ་སྤང་བྱེད་ཅིང༌། །འདོད་པའི་འབྲས་བུ་ཀུན་སྟེར་བས། །ཡིད་བཞིན་ནོར་བུ་ལྟ་བུའོ། །དེ་ནས་ཐུགས་ཀའི་འོད་ཟེར་གྱིས།། སྣོད་བཅུད་སྦྱངས་ཏེ་སྐུ་ལ་བསྡུ། །སྐུ་ཡང་གསུང་ཡིག་རིམ་གྱིས་ནི། །ཐིག་ལེ་མི་དམིགས་གཟུགས་སུ་བསྡུ། །མཚན་མའི་རྟོག་པ་རབ་ཞི་བ། །ཆོས་དབྱིངས་དག་པའི་ངོ་བོ་ཉིད། །རང་བཞིན་ཀུན་ཏུ་འོད་གསལ་བའི། །དེ་བཞིན་ཉིད་ཀྱི་དང་དུ་གཞག །དེ་ལས་ཅུང་ཟད་ལྷ་ཡི་སྐུར། །
ལངས་ཏེ་སྤྱོད་ལམ་རྣམ་བཞི་རུ། །མ་ཡེངས་ཆུ་བོའི་རྒྱུན་ལྟར་བསྒོམ། །སྣང་གྲག་སྐུ་གསུང་ཐུགས་སུ་ཁྱེར། །གཞན་ཡང་བསོད་ནམས་ཚོགས་བསགས་ཕྱིར། །མདུན་གྱི་མཎྜལ་དབུས་ཉིད་དུ། །རྟེན་ལས་དམ་ཚིག་དཀྱིལ་འཁོར་བསྐྱེད། །ཡེ་ཤེས་དཀྱིལ་འཁོར་དབྱིངས་ནས་ནི།། སྤྱན་དྲངས་ཁྲུས་གསོལ་བསྟིམ་བཞུགས་ཤིང༌། །ཕྱག་འཚལ་མཆོད་ཅིང་བསྟོད་བྱ་སྟེ། །ཐུགས་ཉི་པདྨའི་དཀྱིལ་འཁོར་དུ། །གསང་སྔགས་དམིགས་ཤིང་བཟླས་པར་བྱ། །དེ་ནས་བཟོད་གསོལ་ཡེ་ཤེས་གཤེགས། །དམ་ཚིག་དཀྱིལ་འཁོར་རང་ལ་བསྡུ། །རང་ཡང་མི་དམིགས་རྒྱས་བཏབ་སྟེ། །ལྷ་ཡི་རྣམ་པར་ལངས་ཏེ་གནས། །ཐུན་བཞི་ལ་སོགས་ཐུན་བར་དུ། །ཆོས་ཀྱི་སྤྱོད་པ་རྒྱ་ཆེར་བྱ། །དེ་ལས་བྱུང་བའི་བསོད་ནམས་ཀྱང༌། །འགྲོ་དོན་བྱང་ཆུབ་ཆེན་པོར་བསྔོ། །ཟླ་དྲུག་བསྒོམ་པས་འགྲུབ་འགྱུར་གྱི། །མཚན་བཟང་མཐོང་ན་དོན་ཆེན་བརྙེས། །སུམ་བྱེད་དྲུག་འབུམ་ཐོན་ནས་ནི། །སྣ་ཚོགས་ལས་ཀྱི་རིམ་པར་སྦྱར། །ལྔ་བརྒྱའི་ཐ་མར་འཇིག་རྟེན་དུ། །ཐུབ་པའི་བསྟན་པ་རྒྱས་འགྱུར་ཏེ། འཇིག་རྟེན་དབར་ཕྱུག་རྣལ་འབྱོར་གྱི། །མྱུར་དུ་བདག་གཞན་དོན་འགྲུབ་འགྱུར། །ཐུགས་རྗེ་པདྨོ་རྒྱས་པའི་གེ་སར་ལས་བྱུང་བའི། །རྒྱས་བྱེད་བཅུད་ལྡན་སྦྲང་རྩི་ཅུང་ཟད་བདག་གིས་འཐུངས། །འདི་ནི་གཞན་ཕན་བསམ་པས་མན་ངག་ཟུར་ཙམ་བཀོད། །ཉེས་གྱུར་ཐུགས་རྗེའི་དང་དུ་བཟོད་པ་མཛད་པར་རིགས། །འདབ་ཆགས་རྒྱལ་པོས་ཆུ་ལས་འོ་མ་བླངས་པ་ལྟར། །གྲུབ་པའི་རྒྱུད་ལས་སྙིང་པོ་འདི་བསྡུས་དགེ་བ་ཡིས། །མུ་མཐའ་ཡས་པའི་སེམས་ཅན་མ་ལུས་ཐམས་ཅད་ཀུན། །རྣམ་དག་པདྨོའི་ཞིང་དུ་རྒྱལ་བའི་ཞལ་མཐོང་ཤོག །ཐུགས་རྗེ་ཆེན་པོའི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་སློབ་དཔོན་པདྨའི་ཞལ་སྔ་ནས་དང༌། བོད་ཀྱི་ལོ་ཙཱ་བ་བཙུན་པ་རྒྱལ་བ་མཆོག་དབྱངས་ཀྱིས་བསྒྱུར་བའོ།།