ཐུགས་རྗེ་ཆེན་པོ་དཀའ་ཐུབ་ཅན་གྱི་སྒྲུབ་ཐབས།
འཕགས་པ་ཐུགས་རྗེ་ཆེན་པོ་དཀའ་ཐུབ་ཅན་ལ་ཕྱག་འཚལ་ལོ། །དེ་ནས། དཀའ་ཐུབ་ཆེན་པོ་དཀའ་ཐུབ་མཉེས། །ཞེས་འབྱུང་བའི་སྒྲུབ་ཐབས་བཤད་པར་བྱའོ། །འདིར་འཕགས་པ་སྤྱན་རས་གཟིགས་དབང་ཕྱུག་ལ་དད་པ་ཐོབ་པའི་སྐྱེ་བོ་སྲན་ཐུབ་པར་ནམས་ཀྱིས། དུས་དང་ཆོ་གའི་ཁྱད་པར་ལ་མ་ལྟོས་པར་ཤིན་ཏུ་མྱུར་དུ་འགྲོ་བ་བསྐྱབ་པར་འདོད་པས། ཞག་གཅིག་གམ་གཉིས་སམ་གསུམ་མམ་བདུན་གྱི་བར་དུ་བཅོམ་ལྡན་འདས་དྲང་
སྲོང་ཆེན་པོ་དཀའ་ཐུབ་ཡིད་ལ་བྱེད་པ་དང་མི་འབྲལ་བས་བསྒྲུབ་པར་བྱའོ། །འཇིག་རྟེན་དབང་ཕྱུག་དྲང་སྲོང་ཆེ། །མྱ་ངན་མེད་པའི་སྡོང་བུའི་འགྲམ། རི་དགས་སྟན་ཅན་དཀའ་ཐུབ་ཚལ། །རྒྱན་སྤངས་ཉིང་རྗེས་གདུངས་པ་བསྒོམ། །མགོན་པོའི་རྟེན་ནི་གང་ཡང་རུང༌། །ཡེ་ཤེས་ལྡན་དེ་དེར་བཅུག་མདུན། །ཕོངས་པ་དག་ནི་མྱ་ངན་གྱི། །ཆ་བྱད་ཀྱིས་སྨད་ཁས་ཕུབ་འདུག །ལག་པ་གཉིས་ནི་འགྲམ་བརྟེན་ཅིང༌། མི་རོ་བཞིན་དུ་རྐང་བརྐྱང་པ། །བཟའ་བཏུང་སྤངས་དང་གོས་བྲལ་དང༌། །མཆིམས་གདོང་ཁེ་བས་སྨྲེ་སྔགས་བརྗོད། །སྤྱོད་ལམ་གཉིས་ཏེ་འགྲོ་ལྡོག་དང༌། །རིང་དུ་ཟག་པ་དོར་པའོ། །དེ་བཞིན་ངག་གཉིས་སྨྲེ་སྔགས་བསྔགས། །སེམས་པ་ཡང་ནི་གཉིས་ཉིད་དེ། །སྙིང་རྗེས་སྐྱེ་བོ་བསྒྲལ་བ་དང༌། །ཐབས་སུ་འཕགས་པ་མཐོང་འདོད་པའོ། །ཇི་སྟེ་སྨྲ་བ་ལ་མངོན་པར་དགའ་བ་ཞིག་ན་སྔགས་ཀྱི་དམ་ཚིག་ཀྱང་བརྗོད་པར་བྱའོ། །ན་མཿ་ཤྲཱི་ལོ་ཀྱ་ནཱ་ཐཱ་ཡ། བོ་དྷི་སཏྭ་མ་ཧཱ་སཏྭ་མ་ཧཱ་ཀཱ་རུ་ཎི་ཀཱ་ཡ། མཱ་མ་ཏ་མུ་ཀེ་མ་ཧཱ་དུཿཁ་ཀླེ་ཤ་སརྦ་ཨཱ་བ་ར་ཎ་ཁ་སེ་ཁ་སེ་མེ་ཁ་སེ་མེ་ཕཊ་ཕཊ། མ་མ་ཤཱི་གྷྲཾ་ཨ་ནུ་གྲ་ཧ་ཨ་ནུ་གྲ་ཧ་ཧཱུཾ་ཧཱུཾ། ཡིད་ལ་བྱེད་པ་གཞན་བཏང་སྟེ། །ལྷ་མཆོག་སེམས་པ་གཅིག་པུ་ཡིས། །སྐྱེ་བོ་ཉོན་མོངས་གཟིར་འདི་དག །ཞི་བར་བྱ་ཕྱིར་སྨྱུང་བར་གནས། །ཡུན་རིང་ཕན་པའི་དོན་མཐོང་ནས། །ཅུང་ཟད་བདེ་བ་ཅི་དགར་རུང༌། །སེམས་ཅན་ཚོགས་མང་དོན་དུ་ནི། །བདག་གིས་དཀའ་ཐུབ་བཟོད་པར་བྱོས། །བག་མེད་ལུས་དང་སེམས་འདི་ནི། །གནོད་པར་བྱེད་ཀྱིས་ཕན་མི་བྱེད། །དེ་རིང་དཀའ་ཐུབ་སྤྱད་པ་ཡིས། །ལུས་ཅན་ཀུན་གྱི་དོན་སྒྲུབ་བོ། །ཇི་ལྟར་དགྲ་བོ་ཁྲོས་པ་ལའང༌། །ཐལ་སྤྱར་སྙིང་རྗེ་སྐྱེ་འགྱུར་ན། །ཐུགས་རྗེ་ཆེ་མངའ་འགྲོ་དོན་སྡོད། །བདག་ལ་ཇི་ལྟར་གཟིགས་མི་འགྱུར། །དེ་ལྟར་བསྟན་པ་བཟོད་ལྡན་པས། །ཉིན་འགའ་སྨྱུང་བར་སྤྱོད་ན་དེ། །དངོས་དང་གཟུགས་བརྙན་རྨི་ལམ་དུ། །འཕགས་པས་ངེས་པར་རྗེས་སུ་འཛིན། །ཐུགས་རྗེ་ཆེན་པོ་དཀའ་ཐུབ་ཅན་གྱི་སྒྲུབ་ཐམས་རྫོགས་སོ།།