དཔལ་ཐུགས་རྗེ་ཆེན་པོ་རྟག་ཏུ་བྱ་བའི་རྣལ་འབྱོར།
འཕགས་པ་སྤྱན་རས་གཟིགས་རྟག་པའི་རྣལ་འབྱོར་ལ་ཕྱག་འཚལ་ལོ། །དེ་ནས། སྤྱི་གཙུག་ཅོད་པན་རྟག་ཏུ་འཛིན། །ཞེས་
འབྱུང་བའི་སྒྲུབ་ཐམས་བཤད་པར་བྱའོ། །འཇིག་རྟེན་མགོན་པོ་འཇིག་རྟེན་གྱི། །རྩ་ལག་གཅིག་པུ་ལ་བཏུད་དེ། །དེ་སྙིང་ཅོད་པན་གཙུག་ཏོར་གྱི། །རྣལ་འབྱོར་ཆོ་ག་བདག་གིས་བཤད། །དབེན་པའི་གནས་འདུག་འཁོར་བའི་མེ་འོབས་འབར་བ་དང༌། །བདེ་བའི་རྐྱེན་ཚོགས་ཡིད་སྐྱོ་མངོན་དགའ་དྲག་པོ་ཡིས། །ཐར་པའི་གྲོང་ཁྱེར་རྡུལ་བྲལ་སྐྱེད་མོས་ཚལ་བཟངས་སུ། །ཞུགས་ནས་རྗེས་འཇུག་དང་བ་དམ་པས་སེམས་དུལ་བྱ། །དེ་ནས་རྣལ་འབྱོར་ཞི་བ་འདིས། །བློ་ལྡན་རྒྱུད་རབ་བརླན་གྱུར་པ། །དེ་ཉིད་རྗེས་ཐོགས་དཔལ་གསུམ་གྱི། །ཆོ་ག་དམ་པ་བསྒོམ་པར་བྱ། །ཨེ་མའོ་སྤྱི་གཙུག་རིན་ཆེན་ཁང༌། །བཀྲ་ཤིས་མཆོད་རྟེན་དྲི་མ་མེད། །ཐུབ་པ་སྟོང་གིས་སྤྲས་པའི་སྒོ། །མགོན་པོ་ཉིད་ཀྱིས་དབུས་མཛེས་པའོ། །འདམ་སྐྱེས་དམར་འདབ་སྟོང་གི་སྙིང༌། །ཨ་སྟོང་དེ་དབུས་སེམས་ཡིག་ཧཱུཾ། །འོད་གསལ་དཀར་འཁྱིལ་རྣམ་པར་འཕྲོ། །བུམ་པའི་མར་མེ་འབར་བ་བཞིན། །དེ་བཞིན་ལྟེ་བའི་དཀྱིལ་འཁོར་དབུས། །ཉི་མའམ་ཟླ་བ་ལ་གནས་པའི། །རླུང་གི་རྒྱལ་པོ་མེ་ཡི་དབུས། །བདེ་བའི་ཆུས་བརླན་མཁྲེགས་པའི་ས། །རྣམ་དག་རྣམ་པར་འཕྲུལ་པའི་རྒྱུད། །འབྱུང་བཞིའི་རང་བཞིན་རཾ་ཡིག་བསམ། །དེ་ལས་འོད་འཕྲོས་ཚ་རེག་འདིས། །རྩ་མཆོག་འདིས་བརྒྱུད་སྐྱོབ་པ་ཡིས། །ཐུགས་རེག་ཐུགས་བསྐུལ་ཐུགས་བྱུང་བའི། །བྱིན་བརླབས་ཞི་བྱེད་དག་བྱེད་དང༌། །དྲི་མ་མེད་བྱེད་འོང་འཕྲོ་བྱེད། །རྣམ་བཞི་བདུད་རྩིའི་རྒྱུན་དབབ་བྱ། །གང་ཚེ་ཡེ་ཤེས་མཆོག་འདི་བབས་གྱུར་པ། །དེ་ཚེ་མི་གཡོ་འོད་གསལ་རྣམ་པར་དག །ཀུན་འབྱུང་མཚོ་ཆེན་ཉི་འདོད་སྒྲོན་མཆོག་དང༌། །ནམ་མཁའི་ཡིད་བཞིན་ནོར་བུ་ཇི་བཞིན་ནོ། །བདེ་ཆེན་གཉིས་སུ་མེད་ཉེད་ལ། །ཇི་སྲིད་བཟོད་པར་ནུས་རེ་སྲིད། །མཉམ་པར་གཞག་བྱ་མི་གནས་ན། །དེ་ཚེ་དགེ་ཚོགས་དཔག་མེད་བསྒྲུབ། །དཔལ་ཐུགས་རྗེ་ཆེན་པོ་རྟག་ཏུ་བྱ་བའི་རྣལ་འབྱོར་རྫོགས་སོ།།