བསམ་གྱིས་མི་ཁྱབ་པའི་མཆོད་པའི་ཆོ་ག།
དཔལ་ཐུགས་རྗེ་ཆེན་པོའི་མཆོད་པའི་སྤྲིན་གྱི་རྒྱལ་མཚན་གྱི་རྩེ་མོ་ལ་ཕྱག་འཚལ་ལོ། །དངོས་གྲུབ་ཀུན་གྱི་རྒྱུར་གྱུར་པ། །སྒྲུབ་པ་པོ་ལ་ཕན་བྱེད་ཐབས། །མཆོད་སྤྲིན་རྒྱལ་མཚན་རྩེ་མོ་ཡིས། །བསམ་མི་ཁྱབ་བྱེད་མཆོད་པ་བྲི། །མེ་ཏོག་བདུག་པ་མར་མེ་དྲི། །ཞལ་ཟས་རོལ་མོ་མཎྜལ་རྫས། །འབྱོར་པའི་ཁྱད་པར་གྱིས་བཀོད་དེ། །ཉིད་ཀྱི་ང་རྒྱལ་གྱིས་བྱིན་བརླབ། །ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་དྷཱུ་པེ་ཨཱཿཧཱུཾ། ཨོཾ་བཛྲ་དཱི་པེ་ཨཱཿཧཱུཾ། ཨོཾ་བཛྲ་གནྡྷེ་ཨཱཿཧཱུཾ། ཨོཾ་བཛྲ་ནཻ་བི་དྱེ་ཨཱཿཧཱུཾ། ཨོཾ་བཛྲ་ཤབད་ཨཱཿཧཱུཾ། ཨོཾ་བཛྲ་མཎྜལ་ལ་ཨཱཿཧཱུཾ། རང་བཞིན་སྟོང་པ་ཉིད་ཅན་གྱི། །སྣ་ཚོགས་མཆོད་
རྫས་བསམ་མི་ཁྱབ། །རྒྱལ་མཚན་རྩེ་མོའི་རིག་པ་ཡིས། །སྤྲུལ་ནས་འཕགས་ཚོགས་མཆོད་པར་བྱ། །ཨོཾ་ན་མོ་བྷ་ག་ཝ་ཏེ། མ་ཧཱ་ཀཱ་རུ་ཎཱི་ཀ་པུཥྤ་པཱུ་ཛ་མེ་གྷ་ས་མུ་དྲ་ཀེ་ཏུ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་པུཥྤེ། པུཥྤེ། པུཥྤེ། པུཥྤ། ཨུདྦྷ་བེ། པུཥྤ། ཨ་ཝ་ཀཱི་ར་ཎེ་སྭཱ་ཧཱ། མེ་ཏོག་དབུལ་བའི་སྔགས་སོ། །དེ་བཞིན་དུ། །དྷཱུ་པ་དང༌། དཱི་པ་དང༌། གནྡྷ་དང༌། ནཻ་བི་དྱེ་དང༌། ཤཔྡ་དང༌། མཎྜལ་ཞེས་བྱ་བ་ལ་སྦྱར་བའི་རིམ་གྱིས་བདུག་པ་དང༌། མར་མེ་དང༌། དྲི་ཆབ་དང༌། ཞལ་ཟས་དང༌། རོལ་མོ་དང༌། མཎྜལ་དབུལ་བར་བྱའོ། །གོས་བཟང་གྱོན་ཞིང་རྒྱན་བཟང་བཏགས། །ཡི་གེ་གསུམ་དང་ལྡན་པ་ཡི། །རྡོ་རྗེའི་གླུ་གར་སྔོན་སོང་བས། །སངས་རྒྱས་ལ་སོགས་མཆོད་པར་བྱ། །བདག་ཉིད་མཆོད་སྤྲིན་རྒྱ་མཚོ་ཡི། །དབུས་བཞུགས་མཆོད་ཀུན་ལ་མངའ་བརྙེས། །མགོན་པོ་འཁོར་ལོས་སྒྱུར་རྒྱལ་ཚུལ། །རྒྱལ་མཚན་རྩེ་མོ་གསེར་མདོག་བསྐྱེད། །ཡེ་ཤེས་སྙིང་པོ་ལས་བྱུང་བའི། སྣ་ཚོགས་ལྷ་མོ་མཛེས་རྣམས་ཀྱིས། །རེ་རེ་ལས་ཀྱང་དཔག་ཏུ་མེད། །སྤྲུལ་པས་རིམ་གྲོ་རྫོགས་པར་བལྟ། །མི་ཕྱེད་གུས་པས་མང་ཡོད་པས། །གཟུངས་འདི་ལན་གསུམ་ཆོ་ག་འདིས། །ཉིན་རེ་དུས་གསུམ་མཆོད་བྱེད་ན། །བྱེ་བ་བསམ་མི་ཁྱབ་མཆོད་འགྱུར། །བསམ་གྱིས་མི་ཁྱབ་པའི་མཆོད་པའི་ཆོ་ག་རྫོགས་སོ།།