ཏིང་ངེ་འཛིན་མྱུར་དུ་བསྐྱེད་པའི་གདམས་ངག།
འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །རབ་ཏུ་སྔ་བར་ལངས་ནས་ནི། །དྲི་ཞིམ་ཆུ་ཡིས་བཀང་བ་ཡི། །བུམ་པར་བརྩོན་མཛད་སྤྱན་རས་གཟིགས། །བཞུ་བའི་རྒྱུན་གྱིས་ལུས་བཀྲུ་བྱ། །དགེ་བའི་ཁང་བུ་དམ་པར་ནི། །བརྩེ་ལྡན་སྐྱེས་བུ་ཆེ་རྣམས་ཀྱིས། །དུལ་བའི་བློ་གྲོས་དྲན་པ་དང༌། བག་ཡོད་དབང་པོ་རབ་བསྡམས་པས། །ཞུགས་ལ་སྣ་ཚོགས་མཆོད་པ་ཡི། །རྫས་རྣམས་ཆལ་པར་བཀྲམ་བྱ་ཞིང༌། །དྲི་བསུང་བདུག་བ་མཆོག་གིས་བདུགས། ཁྲོ་བོའི་རྒྱལ་པོའི་སྔགས་བཟླས་བྱ། །ཨོཾཿ་ཨ་བི་གྷནན་སརྦ་ཏོ་ཥ་པྲ་ཧན་ཧཱུཾ་ཕཊ། དེ་ནས་ལྷ་ཡི་རྣལ་འབྱོར་གྱིས། །ཇི་བཞིན་བསྐྱེད་དང་རྫོགས་པ་ཡི། །མཆོག་རིམ་པས་སྔོན་བཏང་ལ། །ཕ་ཊི་ཀ་ཡི་སྦྱོར་བ་བརྩམ། །རྡོ་རྗེ་ལྕགས་ཀྱུའི་ཕྱག་རྒྱ་དང༌། །སྨིན་མཚམས་འཕྲོ་བའོ་འོད་ཟེར་གྱིས། །བརྩོན་པའི་འཇིག་རྟེན་གསུམ་དབང་པོ། །སྐད་ཅིག་ཙམ་གྱིས་
མདུན་དུ་དྲང༌། །ཤེལ་ལྟར་དྲི་མེད་ཡངས་པ་ཡི། །ཕོ་བྲང་རིན་ཆེན་སྒྲོན་མ་ཅན། །རབ་ཏུ་ཉམས་དགའ་ལྷ་མ་མེ་བ། །རྒྱན་རྣམས་ཀུན་གྱིས་ཕུན་ཚོགས་ལྷ། །རླུང་གིས་བསྐྱོད་པའི་གཡེར་ཁ་རབ་སྙན་བདེ་བར་གཤེགས་པའི་གསུང་རབ་ལས། །བསྟན་པ་གང་དག་ཤིན་ཏུ་རྣམ་ངེས་རྟག་དང་བདེ་དང་གཙང་བ་དང༌། །བདག་ཏུ་ཆགས་པའི་ལྟ་བའི་ཀུན་སེལ་མི་རྟག་སྡུག་བསྔལ་མི་གཙང་དང༌། །བདག་མེད་ཆོས་སྟོན་ནམ་མཁའི་མཐར་ཐུག་སྐྱེ་དགུའི་སྙིང་རབ་སིམ་བྱེད་བསམ། །དགུ་བརྒྱ་དགུ་བཅུ་རྩ་དགུ་ཡི། །གཞལ་མེད་ཁང་བརྩེགས་དམ་པ་དང༌། །ཀུན་ཏུ་འོད་འཚེར་རྒྱལ་བ་ཡི།། སྐུ་མཛེས་མང་པོས་རབ་བརྒྱན་པའོ། །ཁང་བཟངས་རེ་ཡང་མཆོད་པ་ཡིན། །ལྷ་མོ་བཅུ་དྲུག་བཅུ་དྲུག་གིས། །མངོན་པར་རོལ་བྱས་རྟག་ཏུ་རྩེན། །ཐམས་ཅད་ཏིང་འཛིན་བསྐྱེད་བརྩོན་པའོ། །དེ་ཡི་ཕྱི་རོལ་ཉེ་འཁོར་དུ། །ཕྱོགས་སྐྱོང་བཅུ་ཡི་བུ་རྣམས་ཀྱིས། །བརྩོན་བྱས་མཆོད་པའི་སྤྲིན་ཕུང་ལས། །ལུས་ཕྱེད་མངོན་ཕྱུང་བཏུང་པའོ། །ཕྱོགས་བཅུའི་རྒྱལ་བ་ཐམས་ཅད་ཀྱི། །སྨིན་མཚམས་མཛོད་སྤུར་བྱུང་བ་ཡི། །སྐར་མདའ་ལྟར་དཀར་འོད་འཕྲོས་པས། །ཁང་བཟངས་རྒྱལ་བའི་ཐུགས་བསྐུལ་བྱ། །འདི་ལྟར་རྣམ་པར་གཡེངས་ཀུན་གྱི། །རྩ་བ་འཛིན་པ་ཡིན་པའི་ཕྱིར། །མཁས་པ་ཏིང་འཛིན་མྱུར་འདོད་པས། །འཛིན་པ་མཐའ་དག་སྤང་བར་བྱ། །དེ་འཛིན་པ་ནི་རྣམ་བཞི་སྟེ། །ལོངས་སྤྱོད་བཤེས་དང་ལུས་ཉིད་དང༌། །དགེ་པའི་ཚོགས་ལ་མངོན་ཞེན་པའོ། །འདི་དག་གཞན་གྱི་དོན་དུ་བསྔོ། །དེ་ནས་མེ་ལོང་ཟླ་རྒྱས་དང༌། །དབང་པོའི་གཞུ་དང་འོད་ཀྱི་ཁྱིམ། །སྟོན་གྱི་ནམ་མཁའི་གུང་རྣམས་ཀྱིས། །སྦྱོར་བ་བརྟན་པས་རྣམ་པར་བསྒོམ། །འཇིག་རྟེན་མགོན་པོའི་ཏིང་ངེ་འཛིན། །ཐོགས་མེད་འོད་དཔག་མེད་ཉིད་ཀྱིས། །དབུ་བརྒྱན་ཧྲཱིཿ་ཡིག་སྙིང་པོ་ཅན། །སྨིན་མཚམས་ཉི་མས་མཚན་གྱུར་བལྟ། ཨོཾ་ཨཱཿ་ཧྲཱིཿ་མ་མ་ཙི་ཏྲ་ས་མ་ཡ་དྷི་བཛྲ་མུ་ཏྲ་པྲ་ཏྱུད་ཏ་ཕེཾ་ཕེཾ་ཕེཾ་ཛྭ་ལ་ཛྭ་ལ་ཛྭ་ཧཱུཾ་ཧཱུཾ་ཧཱུཾ། སྔགས་འདི་རྒྱལ་བའི་སྐུ་གསུང་ཐུགས། །ཏིང་འཛིན་དབབ་པའི་ཕྱག་རྒྱས་ཏེ། །རང་བཞིན་པདྨོ་འདབ་སྟོང་དབུས། །ཐིག་ལེ་དཀར་འཚེར་རྡོ་རྗེའི་རྒྱུ། །ཉི་མའི་ཟེར་གྱིས་པདྨོ་དབྱེ། །ཐིག་ལེ་ལས་ནི་འོད་ཚོགས་སྤྲོ། །དེ་ཡིས་མུན་པ་ཀུན་བསྲེགས་པས། །ཐོགས་མེད་བསམ་གཏན་རང་བྱུང་འགྱུར། །ཏིང་ངེ་འཛིན་མྱུར་དུ་བསྐྱེད་པའི་གདམས་ངག་རྫོགས་སོ།།