འཇམ་དཔལ་རྡོ་རྗེ་བློ་གྲོས་འཕེལ་བ།
ཀླུ་སྒྲུབ།
རྒྱ་གར་སྐད་དུ། མཉྫུ་ཤྲཱི་བཛྲ་པྲཛྙཱ་བརྡྷ་ན་ནཱ་མ། བོད་སྐད་དུ། འཇམ་དཔལ་རྡོ་རྗེ་བློ་གྲོས་འཕེལ་བ་ཞེས་བྱ་བ། བཅོམ་ལྡན་འདས་འཇམ་པའི་མགོན་ལ་ཕྱག་འཚལ་ལོ། །ཤེས་རབ་འཕེལ་བར་འདོད་པས་གནས་ཁང་དབེན་ཞིང་ཉམས་དགའ་བར་གཙང་བ་དྲི་ཞིམ་པོའི་ཆུས་ཆག་ཆག་བཏབ་ལ། མཎྜལ་ཁྲུ་གང་བ་ཅིག་བྱས་ཏེ། དེའི་དབུས་སུ་པདྨ་འདབ་མ་བརྒྱད་པ་སེར་པོ་དབུས་དཀར་པོར་བྱས་ལ། དེའི་སྟེང་དུ་ལྷུང་བཟེད་དུ་ཤེས་རབ་འཕེལ་བར་བྱེད་པའི་རྫས། དབང་པོ་ལག་པ། གླ་རྩི། གི་ཝང༌། སྤང་རྒྱན་དཀར་པོ། ཙནྡན་དཀར་པོ་རྣམས་པ་དམར་པོའི་འོ་མས་སྦྲུས་ཏེ། རིལ་བུ་སྲན་མ་ཙམ་བྱའོ། །དེའི་སྟེང་དུ་འཇམ་དཔལ་དང་དབྱངས་ཅན་མ་གཉིས་ཞལ་སྦྱོར་གྱི་ཙ་ཀ་ལི་མེ་ཅིག་བཞུགས་པར་བྱའོ། །དེ་ནས་ཨོཾ་སཱ་བྷཱ་བ་བི་ཤུདྡྡྷཿ་སརྦ་དྷ་རྨཱཿ་སྭ་བྷཱ་བ་བི་ཤུདྡྷོཉ྄ཧཾ་གི་སྔགས་ཀྱིས་ཆོས་ཐམས་ཅད་སྟོང་པ་ཉིད་དུ་བསྒོམ་པར་བྱའོ། །དེའི་དང་ལས་པདྨ་དམར་པོ་འདབ་མ་བརྒྱད་པ་ཅིག་བསམ། དེའི་སྟེང་དུ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་དྷཱིཿ་སེར་པོ་གུར་གུམ་གྱི་མདོག་ཅན་ཅིག་བསམ། དེ་ཡོངས་སུ་གྱུར་པ་ལས་བདག་
ཉིད་འཕགས་པ་འཇམ་དཔལ་སྐུ་མདོག་དམར་པོ་ཕྱག་གཡས་ན་ཤེས་རབ་ཀྱི་རལ་གྲི་གཡོན་ན་ཤེས་རབ་ཀྱི་པུ་སྟི་བསྣམས་བ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། ཞལ་འཛུམ་བག་དང་ལྡན་པ་བསྒོམ་པར་བྱའོ། །མདུན་གྱི་ལྷུང་བཟེད་ཀྱི་ནང་དུ་ཧྲཱིཿ་དཀར་པོ་ཡོངས་སུ་གྱུར་པ་ལས་པདྨ་དང་ཟླ་བའི་སྟེང་དུ། དབྱང་ཅན་མ་དཀར་མོ་གཡས་ན་རལ་གྲི་གཡོན་ན་པུ་སྟི་བསྣམས་པ། རིན་པོ་ཆེའི་རྒྱན་དང་བཅས་པ་ཞལ་འཛུམ་བག་དང་ལྡན་པ་བདག་བསྒོམ་པར་བྱའོ། །དེ་ནས་ས་བོན་གཉིས་ལས་འདོ་འཕྲོས་པས་རང་བཞིན་གྱི་གནས་ནས། ཡེ་ཤེས་སེམས་དཔའ་སྤྱན་དྲངས་ནས་སོ་སོར་བསྟིམ་མོ། །ཡང་འོད་ཟེར་འཕྲོས་པས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཤེས་རབ་དང་མཐུ་དང་ནུས་པ་ཐམས་ཅད་བསྡུས་ནས་རང་དང་རྫས་ལ་བསྟིམ་པར་བྱའོ། །དེ་ནས་བཟླས་པ་བྱ་སྟེ། ན་མོ་མཉྫུ་ཤྲཱི་བཱ་གཱི་ཤྭ་རི་མུཾ། བཱ་གཱི་ཤྭ་རི་ཧོཿ་།ཨུ་པ་དེ་ཤ་པྲ་མོ་ད་ཏ་དྷ་བ་ནི་ཧྲཱིཿསྭཱ་ཧཱ། སྔགས་ཀྱི་འོད་ཟེར་བདག་གི་ཞལ་ནས་ལྷ་མོའི་ཞལ་དུ། ལྷ་མོའི་ཞལ་ནས་བདག་གི་ཐུགས་ཀར་ཐིམ་པར་བསྒོམ། དེ་ལས་འོད་ཟེར་འཕྲོས་པས་སེམས་ཅད་ཐམས་ཅད་ཀྱི་དོན་དུ་ཤེས་རབ་ཀྱི་མི་མཐུན་པའི་ཕྱོགས། གཏི་མུག་ལ་སོགས་པ་ཐམས་ཅད་བསལ་བར་བསྒོམ། འཇིག་རྟེན་དྲག་བྱེད་ཀྱི་པྲཛྙཱ་ཐམས་ཅད་བསྡུས་པར་བསྒོམ། སྨན་གྱི་རི་ལུ་དང་བདག་ལ་ཐིམ་པས་ཇི་ལྟར་འདོད་པའི་མཚན་ཉིད་ལ་སོགས་པའི་དངོས་གྲུབ་ཐམས་ཅད་ཐོབ་པར་བསྒོམ་མོ།། འདིའི་ཕན་ཡོན་ནི་ཉིན་གཅིག་བསྒྲུབས་ན་ཉིན་གཅིག་ཚིགས་སུ་བཅད་པ་སྟོང་ཟིན་པར་འགྱུར་རོ། །ཉི་མ་གཉིས་བསྒྲུབས་ན་བསྟན་བཅོས་ཐམས་ཅད་ལ་མཁས་པར་འགྱུར་རོ། །ཉི་མ་གསུམ་བསྒྲུབས་ན་སྐྱེ་བ་དྲན་པར་འགྱུར་རོ། །ཉི་མ་བཞི་ཡིས་སངས་རྒྱས་དང་པྲ་ཛྙཱ་མཉམ་པར་འགྱུར་རོ། །ལྔ་ཡིས་མ་བསླབས་བའི་ཆོས་ལ་མཁས་པར་འགྱུར་རོ། །དྲུག་གིས་འཇམ་དཔལ་གྱི་ཞལ་མཐོང་བར་འགྱུར་རོ། །བདུན་གྱིས་གཞན་གྱི་སེམས་ཤེས་པར་འགྱུར་རོ། །སྒྲུབ་པའི་ཚད་ཞག་བདུན་དུ་བྱའོ། །རྟགས་ནི་འོད་དང་སྒྲ་ལ་སོགས་པ་འབྱུང་ངོ༌། །ཞག་བརྒྱད་ན་དཀྱིལ་འཁོར་གྱི་ལྷ་རང་དང་རི་ལུ་ལ་བསྟིམ་རིལ་
བུ་དེ་སྒྲུབ་པ་པོས་ཟོས་པས། འཇམ་པའི་དབྱངས་དང་ཤེས་རབ་མཉམ་པར་འགྱུར་རོ། །ཐུན་མོང་ཚེའི་དངོས་གྲུབ་ཀྱང་འཐོབ་སྟེ། དེ་ལྟར་ཡང༌། འདི་ཟོས་ཡོན་ཏན་བསམ་མི་ཁྱབ། །ལོ་བརྒྱ་ཐུབ་པ་བརྒྱད་བརྒྱར་འགྲོ། །དགུ་བཅུ་ལོན་པ་བཅུ་དྲུག་ལྟ་བུ་འགྱུར། །སྐྲ་དཀར་བུད་ནས་ནག་པོར་འགྱུར། །བང་ནི་རྟ་དང་མཉམ་པར་འགྱུར། །སྒྲ་ནི་མེ་ཏོག་པདྨ་འདྲ། །ལུས་ནི་དཀར་ལ་སྦོམ་པར་འགྱུར། །ཉམས་སྟོབས་ལུས་ཟུངས་འཕེལ་བར་འགྱུར། །ལྷ་འདྲེ་རྣམས་ཀྱང་སྟོང་གྲོགས་བྱེད། །ཡོན་ཏན་སྨོན་འཇུག་སེམས་དང་ལྡན། །སེམས་བསྐྱེད་དེ་དང་ལྡན་པ་ཡི། །སྐྱེས་བུ་དེ་ནི་དམ་པ་ཡིན། །ཡོན་ཏན་དེ་དང་ལྡན་ཞེས་སྨྲ། །འཇམ་དཔལ་རྡོ་རྗེ་བློ་གྲོས་འཕེལ་བ་ཞེས་བྱ་བ་ཀུན་གྱི་ཐུན་མོང་མ་ཡིན་པ་སློབ་དཔོན་ཀླུ་སྒྲུབ་ཞབས་ཀྱིས་མཛད་པ་རྫོགས་སོ།།