འཁོར་ལོ་འབར་བ།
བཙུན་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །རེ་ཞིག་སྔགས་པ་བློ་གྲོས་དམ་པ་ཕུལ་དུ་སྦྱངས་པ་དག་གིས་ཟླ་བ་རྒྱས་པའི་ཚེ་ཁ་ཤར་དུ་བལྟས་ལ་བཙུན་པ་སྤྱན་རས་གཟིགས་དབང་ཕྱུག་ཡིད་ལ་བྱེད་པ་དང་མི་འབྲལ་བས། ཐོག་མར་སྐྱབས་སུ་འགྲོ་བ་དང་སེམས་བསྐྱེད་པ་ལ་མངོན་པར་བརྩོན་པར་བྱའོ། །དེའི་འོག་ཏུ་ཚངས་པའི་གནས་པདྨ་ལ་ལེགས་པར་གནས་པའི་ཤེས་རབ་ཤིན་ཏུ་སྦྱངས་པ་ཡིད་ལ་བྱའོ། །མེ་ཏོག་ལ་སོགས་པའི་མཆོད་པ་དང༌། འཕགས་པ་དགྱེས་པའི་ཚིགས་སུ་བཅད་པས་བསྟོད་པ་དང༌། །སྔར་བྱས་པ་ལ་འགྱོད་པས་སྡིག་པ་བཤགས་པ་ལ་སོགས་པ་ཇི་སྐད་བཤད་པ་དེ་དག་ཉིད་ཀྱང་ངོ༌། །དེ་ནས་རང་ལུས་རྒྱལ་བ་ཡི། །ཕོ་བྲང་འཁོར་ལོ་དཀར་མཛེས་སུ། །སྐད་ཅིག་ཙམ་གྱིས་མངོན་བལྟས་ལ། །རྣམ་དག་གསུམ་པོ་བསྒོམ་པར་བྱ། དེ་ལ་མགོ་བོ་གཡས་གཡོན་ལག །གསང་བའི་རྡོ་རྗེ་གཡས་གཡོན་རྐང༌། །འདི་དག་རྩིབས་དྲུག་གསལ་བ་སྟེ། །ལྟེ་བ་ལྟེ་བ་ཡིན་པར་བཤད། །ཧཱུཾ་དང་ཨོཾ་དང་ཏྲཱཾ་ཧྲཱིཿཨཿ། །ཕཊ་ཅེས་བྱ་བ་སྔོན་པོ་དང༌། །དཀར་སེར་དམར་ལྗང་དུང་མདོག་རྣམས། །རིམ་བཞིན་མེ་ལོང་གཟུགས་ལྟར་དགོད། །སྒྱུ་མ་སྨོན་ལམ་རྣམ་ཐར་གྱིས། །དོན་དུ་གྲུབ་པ་མེད་པ་ཡང༌། །སྣང་བ་མི་དམིགས་རྒྱུད་དུ་འབྲེལ། །རྟོག་པ་མཐའ་གཉིས་ལས་གྲོལ་བའོ། །དེ་རྗེས་ལྟེ་དབུས་སེམས་ཀྱི་གཞི། །བརྟེན་པའི་ཧྲཱིཿཡིག་དཀར་བསམས་ཏེ། །དེ་སྟེང་བདེ་ཆེན་ཐིག་ལེ་བསྒོམ། །སྦྱོར་བ་གསུམ་པའི་རྣལ་འབྱོར་
གྱིས། །བསྡུ་དང་དབང་དུ་བྱ་བ་དང༌། །ངེས་པར་རྟོགས་པའི་རིམ་གསུམ་གྱི། །མཁས་པས་བདེ་ཆེན་འབར་བ་ཡི། །ཁུ་བ་ཞུ་བ་བསྒོམ་པར་བྱ། །འགྲོ་བའི་དོན་བསྒྲུབ་རྡོ་རྗེ་ཡི། །འཁོར་ལོ་མགལ་མེ་བསྐོར་བ་ཞེས། །བྱ་བ་འདི་ཡང་བླ་མ་ཡི། །མན་ངག་གིས་ནི་དེ་རྗེས་བརྩམ། །བརྩེ་ཆེན་བྱང་ཆུབ་སེམས་བཟང་གི །རླུང་བསྐྱོད་ཡེ་ཤེས་འབྲུ་ལྔ་ཡི། །ཕྲེང་བ་འཁོར་ལོ་བསྐོར་བ་ལས། །ཆོས་ཀྱི་སྒྲ་དབྱངས་སྙན་བསྒྲག་བྱ། །མི་རྟག་སྡུག་བསྔལ་བདག་མེད་སྟོང༌། །མཚན་མེད་སྨོན་པ་ཟད་པ་ཡི། །གསུང་རབ་དྲང་དང་དྲང་བ་མིན། །ཕྱོགས་བཅུར་མཁའ་ཁྱབ་བསྟན་པར་བྱ། །ལྷན་ཅིག་དོན་གཉིས་བྱེད་པ་འདིས། །ཅིག་ཅར་བདག་གཞན་དོན་བསྒྲུབས་ནས། །མཐར་ནི་བརྟན་དང་གཡོ་བ་ཡི། །འཁོར་ལོ་སྤར་བའང་ཤེས་པར་བྱ། །དེ་བཞིན་འགྲོ་དང་འདུག་དང་སྨྲ། །གཉིད་ལོག་ལ་སོགས་དུས་ཀུན་ཏུའང༌། །བརྟན་པ་མི་ཕྱེད་དྲན་ལྡན་པས། །རྟག་ཏུ་སྤྱོད་པ་སྤྱད་པར་བཤད། །འཁོར་ལོ་འབར་བ་རྫོགས་སོ།།