ལེགས་པར་གྲུབ་པར་བྱེད་པའི་སྒྲུབ་པའི་ཐབས་བསྡུས་པ།
བྱང་ཆུབ་མཆོག།
རྒྱ་གར་སྐད་དུ། སུ་སིདྡྷི་ཀ་ར་སཾ་གྲ་ཧ་སཱདྷ་ནཾ། བོད་སྐད་དུ། ལེགས་པར་གྲུབ་པར་བྱེད་པའི་སྒྲུབ་པའི་ཐབས་བསྡུས་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་ནས་སྒྲུབ་པ་པོས་འགྲོ་བ་མཐའ་དག་ལ་ཕན་བ་བསྒྲུབ་པ་དང༌། དངོས་གྲུབ་བླ་ན་མེད་པ་འདོད་པ་རྣམས་ལ་ལེགས་པར་གྲུབ་པར་བྱེད་པ་ཞེས་བྱ་བ། རིགས་གསུམ་སྤྱིའི་སྒྲུབ་པའི་ཆོ་ག་རབ་ཏུ་གསལ་བར་བརྗོད་པར་བྱའོ། །དེ་ལ་རེ་ཞིག་དང་པོ་སློབ་དཔོན་གྱི་ཡོན་ཏན་དང་རྗེས་སུ་མཐུན་པའི་སློབ་དཔོན་གྱིས་སྒྲུབ་པ་པོ་བདག་ཉིད་མངོན་པར་དབང་བསྐུར་ཞིང་རྗེས་སུ་གནང་བ། རྒྱུད་ལས་གསུངས་པའི་སྒྲུབ་པ་པོའི་མཚན་ཉིད་དང་ལྡན་པའི་གསང་སྔགས་ཀྱི་མཚན་ཉིད་ལེགས་པར་ཚོགས་པ། དངོས་གྲུབ་ལས་ཀྱི་བྱེ་བྲག་ལ་མཁས་པ་མཐུན་པའི་དུས་ཀྱི་དབྱེ་བ་ཤེས་པ། མཆོད་པ་རྣམ་པ་ལྔའི་ཆོ་ག་རིག་པ། རང་གི་མཚན་ཉིད་དང་མཐུན་པའི་སྔགས་གཡོག་དང་ལྡན་པས་སྒྲུབ་པའི་ཡན་ལག་གིས་ཡོ་བྱད་ཐམས་ཅད་བསྡུ་བར་བྱའོ། །དེ་ནས་གསང་སྔགས་ཡོངས་སུ་བཟུང་བའི་ཆོ་གས་གང་ལ་མངོན་པར་དད་པའི་གསང་
སྔགས་མནོས་ཏེ། གསང་སྔགས་དང་རྗེས་སུ་མཐུན་པའི་ཡུལ་ཇི་སྐད་བསྟན་པ་དངོས་གྲུབ་དང་འཚམ་པའི་གནས་ཇི་སྐད་གསུངས་པ་དག་ཏུ་ཇི་སྐད་བཤད་པའི་མཚན་ཉིད་དང་ལྡན་པའི་གནས་བྱ་སྟེ། སྔོན་དུ་བསྙེན་པ་བརྩམ་པར་བྱའོ། །དེ་ལ་ཉིན་གཅིག་བཞིན་དུ་དུས་གསུམ་དུ་འདི་ལྟར་བྱ་སྟེ། །ནང་པར་མལ་ནས་ལངས་ཏེ་རིགས་གསུམ་གྱི་དམ་ཚིག་གི་ཕྱག་རྒྱ་བཅིང་བར་བྱའོ། །དེ་ལ་དམ་ཚིག་གསུམ་གྱི་ཕྱག་རྒྱ་ནི་ཐལ་མོ་བཀན་པ་ལས་མཛུབ་མོ་གཉིས་ཅུང་ཟད་ཙམ་བཀུག་སྟེ་མགོ་ལ་བཞག་པ་འདི་ནི་དེ་བཞིན་གཤེགས་པའི་རིགས་ཀྱི་དམ་ཚིག་གི་ཕྱག་རྒྱ་སྟེ། གསང་སྔགས་ལ། ཨོཾ་ཏ་ཐཱ་ག་ཏོཏྦྷ་བཱ་ཡ་སྭཱ་ཧཱ། ཐལ་མོ་སྦྱར་བ་པདྨ་ཁ་ཕྱེ་བའི་ཚུལ་དུ་བྱ་སྟེ། སྙིང་གར་བཞག་པ་འདི་ནི་པདྨའི་རིགས་ཀྱི་དམ་ཚིག་གི་ཕྱག་རྒྱ་སྟེ། གསང་སྔགས་ལ། ཨོཾ་པདྨོ་ཏྦྷ་བཱ་ཡ་སྭཱ་ཧཱ། ལག་པ་ཐལ་མོ་བཟློག་སྟེ་སྦྱར་ལ་མཐེ་བོང་གཉིས་དང་མཐེའུ་ཆུང་གཉིས་སྦྱར་ནས་ལྟེ་བའི་ཐད་ཀར་བཞག་སྟེ་འདི་ནི་རྡོ་རྗེ་རིགས་ཀྱི་དམ་ཚིག་གི་ཕྱག་རྒྱའོ། །གསང་སྔགས་ལ། ཨོཾ་བཛྲོ་ཏྦྷ་བཱ་ཡ་སྭཱ་ཧཱ། དེ་ནས་ཕྱོགས་བཅུ་མཐའ་ཡས་མུ་མེད་པ་ན་བཞུགས་པའི་དེ་བཞིན་གཤེགས་པ་ཐམས་ཅད་མངོན་སུམ་དུ་དམིགས་ལ་གསང་སྔགས་འདིས་ཕྱག་བྱའོ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བཱ་ཀ་ཙིཏྟ་བཛྲ་པྲ་ཎ་མྱ་ན་སརྦ་ཏ་ཐཱ་ག་ཏ་བཛྲ་པཱ་ད་བནད་ནཱཾ་ཀ་རོ་མི། དེ་ནས་དེ་དག་ལ་བདག་ལ་དབུལ་བར་བྱ་སྟེ། ཕྱོགས་བཅུ་མཐའ་ཡས་མུ་མེད་པ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བདག་ཉིད་བྱང་ཆུབ་སྙིང་པོ་ལ་མཆིས་ཀྱི་བར་དུ་དུས་ཐམས་ཅད་དུ་ཡོང་ཡེ་འབུལ་ན། སངས་རྒྱས་དང་བྱང་ཆུབ་སེམས་དཔའ་ཆེན་པོ་རྣམས་ཀྱིས་བདག་བཞེས་སུ་གསོལ། བདག་ལ་དངོས་གྲུབ་བླ་ན་མེད་པ་སྩལ་དུ་གསོལ་ཞེས་བྱའོ། །དེ་ནས་བྱང་ཆུབ་ཏུ་སེམས་བསྐྱེད་པར་བྱ་སྟེ། སངས་རྒྱས་ཆོས་དང་ཚོགས་མཆོག་ལ། བྱང་ཆུབ་བར་དུ་བདག་སྐྱབས་མཆི། །བདག་དང་གཞན་དོན་སྒྲུབ་སླད་དུ། །བདག་གིས་བྱང་ཆུབ་སེམས་བསྐྱེད་དོ། །ཕྱོགས་བཅུ་དག་ན་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་གསོན། །བདག་གིས་རྫོགས་པའི་བྱང་ཆུབ་ཕྱིར། །དེ་ནས་བྱང་ཆུབ་སེམས་བསྐྱེད་དོ། །དེ་ནས་ཁྲོ་བོ་མནོལ་བ་མེད་པའམ། བདུད་རྩི་ཐབ་
སྦྱོར་རམ། ཡང་ན་རྒྱུད་གཞན་ལས་གསུངས་པའི་ཆོགས་བདག་ཉིད་བསྲུང་བར་བྱའོ། །དེ་ལ་མནོལ་བ་མེད་པའི་སྔགས་ནི། ཨོཾ་བཛྲ་ཀྲོ་དྷ་མ་ཧཱ་བ་ལ་ཧ་ན་ད་ཧ་པ་ཙ། བི་དྷྭ་ནྶ་ཡ་ཨུ་ཙུཥྨ་ཀྲོ་དྷ་ཧཱུ༵་ཕཊ། ལག་པ་གཉིས་སོར་མོ་ཕན་ཚུན་བསྣོལ་ཏེ། ཁུ་ཚུར་བཅངས་ལ་མཐེའུ་ཆུང་གཉིས་གཤིབས་ཏེ་བསྒྲེང་མཛུབ་མོ་རྩེ་མོ་སྦྱར་བའི་གློར་མཐེ་བོང་གཉིས་བཙུགས་པ་ནི་ཁྲོ་བོ་མནོལ་བ་མེད་པའི་ཕྱག་རྒྱའོ། །བདུད་རྩི་ཐབ་སྦྱོར་གྱི་སྔགས་དང་ཕྱག་རྒྱ་ནི་འོག་ནས་བཤད་པར་བྱ་སྟེ། །རྒྱུད་གཞན་ལས་གསུངས་པ་ཉིད་ལས་ཁོང་དུ་ཆུད་པར་བྱའོ། །དེ་ནས་སྙིང་གའི་ཟླ་བའི་དཀྱིལ་འཁོར་ལ་རྣམ་པར་སྣང་མཛད་ཀྱི་སྙིང་པོའི་ངོ་བོ་ཨ་ཞེས་བྱ་བ་དང༌། མགོ་བོ་ལ་མི་གཡོ་བའི་ངོ་བོ་ཧ་ཞེས་བྱ་བ་འབར་བའི་ཕྲེང་བ་འཁྲུགས་པར་བསམ་པར་བྱའོ། །དེ་ནས་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་བྱ་བས་རང་བཞིན་གྱིས་དག་པར་མོས་པར་བྱས་ལ། དེ་ནས་ཕྱིར་བྱུང་སྟེ་སོ་ཤིང་བཅའ་བ་ལ་སོགས་པ་བྱ་སྟེ། ལྷའི་ཁང་པ་ལ་སོགས་པ་བསྟར་བར་བྱས་ནས་ཁྲུས་བྱེད་དུ་སོང་ཤིག །གཞན་ཡང་ཕྱི་རོལ་གྱི་སར་བཤང་གཅི་བྱེད་པའི་དུས་དང༌། ཟན་ཟ་བའི་ཚེའང་ཁྲོ་བོ་མནོལ་བ་མེད་པས་བསྲུང་བར་བྱ་སྟེ། དེ་ནས་སྐྱེ་བོ་འདུ་བ་དང་འཇིགས་པ་ལ་སོགས་པ་སྤངས་པའི་འཇུག་ངོགས་སུ་སོང་སྟེ། གནས་གཙང་མ་ནས་ས་བླངས་ལ་ཆ་གསུམ་དུ་བགོས་ཏེ། གནས་གཙང་མར་གཞག་པར་བྱའོ། །ས་བླང་བའི་སྔགས་ནི། ཨོཾ་ནི་ཁ་ན་ཝ་སུ་དྷེ་སྭཱ་ཧཱ། ལག་པ་གཉིས་ཀྱི་སོར་མོ་ཕྱི་རོལ་དུ་བསྣོལ་ཏེ་བཀུག་ནས་མཛུབ་མོ་གཉིས་གཤིབས་ཏེ་བསྒྲེང༌། མཐེ་བོང་གཉིས་དེའི་དྲུང་དུ་གཞག་གོ །འདིའི་གསང་སྔགས་དང་བཅས་པས་ས་ལ་གཏུག་ཅིང་བླང་བར་བྱའོ། །དང་པོར་དམ་ཚིག་གི་ཕྱག་རྒྱ་བཅིངས་ལ་དེ་ནས་བླང་བར་བྱའོ། །རིགས་གསུམ་གྱི་དམ་ཚིག་གི་ཕྱག་རྒྱ་ནི་བསྟན་ཟིན་ཏོ། །དེ་ནས་བདུད་རྩི་ཐབ་སྦྱོར་གྱིས་བདག་ཉིད་བསྲུང་བར་བྱའོ། །དེའི་ཕྱག་རྒྱ་ནི་མཐེ་བོའི་ངོས་ཀྱིས་མཐེ་ཆུང་གི་སེན་མོ་མནན་ལ་སོར་མོ་ལྷག་མ་རྣམས་རྡོ་རྗེའི་མཚན་ཉིད་དུ་བྱ་སྟེ། བསྣོལ་ནས་དཔུང་བར་བཞག་སྟེ། ཡ་སོས་མ་མཆུ་མནན་པ་ཁྲོ་བོའི་ལྟ་བས་བལྟ་ཞིང་གསང་སྔགས་བརྗོད་པར་བྱའོ། །ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷཱ་ཡ། ཏདྱ་ཐཱ།
ཨོཾ་ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུ༵་ཕཊ། དེ་ནས་ལུས་ལ་བགེགས་བསལ་བའི་ཕྱིར་ཁུ་ཚུར་གཉིས་ནང་དུ་བཅིངས་ཏེ། མཛུབ་མོ་གཉིས་ཕྱུང་ནས་བསྒྲེངས་ནས་མགོ་ནས་རྐང་བ་ལ་ཐུག་གི་བར་དུ་བྲབ་པར་བྱའོ། །གསང་སྔགས་ལ། ཨོཾ་ཧ་ན་ཧ་ན་ཨ་མྲྀ་ཏེ་ཧཱུ༵་ཕཊ། དེ་ནས་རྡོ་རྗེའི་གོ་ཆ་བྱ་སྟེ། ཐལ་མོ་བཀན་པ་ལས་མཐེའུ་ཆུང་གཉིས་བསྣོལ་བའི་བར་དུ་སྲིན་ལག་གཉིས་བཀུག་སྟེ་བཞག །གུང་མོ་གཉིས་གཤིབས་ཏེ་བསྒྲེངས་ལ་དེའི་ཚིགས་གསུམ་པར་མཛུབ་མོ་བཀུག་སྟེ། མཐེ་བོང་སྦྱར་ནས་མཐེ་བོང་གཉིས་དབུས་སུ་གཞག་གོ །གསང་སྔགས་ལ། ཨོཾ་བཛྲ་ཨགྣི་པྲ་དཱི་པ་ཏཱ་ཡེ་སྭཱ་ཧཱ། དེ་ཉིད་ལས་མཛུབ་མོ་གཉིས་བསྐྱེད་ནས་རྡོ་རྗེའི་ཚུལ་དུ་བྱས་པ་ནི་རྡོ་རྗེ་གོ་ཆའི་ཕྱག་རྒྱའོ། །ན་མོ་རཏྣ་ཏྲ་ཡཱ་ཡ། ཨོཾ་ཧཱུ༵་ཁ་ཀཱི་ལི་ཧཱུ༵་ཕཊ། དེ་དག་ལ་སོགས་པའམ་ཡང་ན་སྔགས་དང་ཕྱག་རྒྱ་གཞན་གྱིས་ཀྱང་བདག་ཉིད་ཀྱི་མགོ་བོ་དང། དཔུང་མགོ་གཉིས་དང༌། སྙིང་ག་དང༌། མགྲིན་པ་རྣམས་སུ་གོ་ཆ་བྱའོ། །དེ་ནས་སྔགས་དང་ཕྱག་རྒྱས་སའམ་ཆུ་ལ་གཏུགས་ཏེ་ཐམས་ཅད་དུ་བསལ་བར་བྱའོ། །ལག་པ་གཡོན་པའི་སོར་མོ་དབུས་མ་གཉིས་མཐེ་བོས་མནན་ལ། མཛུབ་མོ་དང་མཐེའུ་ཆུང་གདུ་བུའི་ཚུལ་དུ་བྱ་སྟེ། སོར་མོ་དབུས་མའི་ཚིགས་དབུས་མར་གཟུགས་སོ། །ལག་པ་གཡོན་པའི་སོར་མོ་དབུས་མ་གསུམ་རྡོ་རྗེའི་ཚུལ་དུ་བྱ་སྟེ། སྐེད་པའི་ཕྱོགས་སུ་བཞག་པ་ནི་བསལ་བའི་ཕྱག་རྒྱའོ། །གསང་སྔགས་ལ། ཨོཾ་ཧ་ན་དྷུ་ན་མ་ཐ་བི་དྷྭ་ནྶ་ཡ་ཨུད་ས་ར་ཡ་ཕཊ། དེ་ནས་ཆུ་ལ་གསང་སྔགས་གདབ་བོ། །དཀོན་མཆོག་གསུམ་དང་ཕྱག་ན་རྡོ་རྗེ་ལ་ཕྱག་འཚལ་ལོ། །ཨོཾ་ཧཱུ༵་ཧ་ན་ཧ་ན་བཛྲ་བཛྲེ་ཎ་ཧ། དེ་ནས་ཆུ་ལ་ཀཱི་ལི་ཀཱི་ལའི་སྔགས་དང་ཕྱག་རྒྱས་གཏུགས་ཏེ་ས་ལ་བསང་གཏོར་གཏོར་བར་བྱའོ། །ལག་པ་གཡོན་པའི་མཐེ་བོའི་ངོས་ཀྱིས་མཐེའུ་ཆུང་གི་སོར་མོ་མནན་ལ་སོར་མོ་ལྷག་མ་རྡོ་རྗེའི་མཚན་ཉིད་དུ་བྱས་པ་ནི་ཀཱི་ལི་ཀཱི་ལའི་ཕྱག་རྒྱའོ། །སྔགས་ལ་ཨོཾ་ཀཱི་ལི་ཀཱི་ལ་བཛྲ་ཧཱུ༵་ཕཊ། དེ་ནས་སྔགས་འདིས་ལན་བདུན་སྔགས་སོ། །ཨོཾ་བཛྲ་ཧ་ར་ཧཱུཾ། དེ་ནས་སའི་ཆ་གཅིག་བླངས་ཏེ་ཆུའི་ནང་དུ་ལྟེ་བ་ནུབ་ཙམ་དུ་བཞུགས་ཏེ། ཁྲུས་རས་དང་བཅས་པར་ཁྲུས་བྱའོ། །དེ་ནས་སའི་ཆ་ལྷག་མས་ལག་པ་
བཀྲུས་ཏེ། དབྱངས་ཅན་གྱི་ཕྱག་རྒྱས་ཉེ་རེག་བྱའོ། །ལག་པ་གཡས་པའི་ཐལ་མོ་བཀན་པ་ལས་མཛུབ་མོ་མཐེ་བོའི་དྲུང་དུ་བཞག་སྟེ། མཐེ་བོང་ཡང་མཛུབ་མོའི་ཚིགས་དབུས་མར་བྱས་པ་ནི་དབྱངས་ཅན་མའི་ཕྱག་རྒྱའོ། །གསང་སྔགས་ལ། ཨོཾ་ཤྲུ་ཏི་སྨྲྀ་ཏི་དྷཱ་རི་ཎི་ཧཱུ༵་ཧ། དེ་ནས་སྔགས་འདིས་བསྲུང་བ་བྱ་སྟེ། གཙུག་ཕུད་བཅིང་བར་བྱའོ། །ཨོཾ་སུ་སིདྡྷི་ཀ་རི་སྭཱ་ཧཱ། དེ་ནས་ས་བླངས་ཏེ་གསང་སྔགས་འདིས་བསྔགས་ཤིང་གཡས་ནས་བསྐོར་ཏེ། ཉི་མ་ལ་བསྟན་ནས་ལུས་ལ་བསྐུ་བར་བྱའོ། །ཨོཾ་བྷུ་ཛ་ཧཱུ༵་ཕཊ། དེ་ནས་གསང་སྔགས་འདིས་ཆུ་ལ་དཀྲུག་པར་བྱའོ། །ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷཱ་ཡ། དཾ་ཥྚོཏྐ་ཊ་བྷཻ་ར་བཱ་ཡ། ཏདྱ་ཐཱ། ཨོཾ་ཨ་མྲྀ་ཏ་ཀུཎྜ་ལི་ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། གརྫ་གརྫ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷྣཾ་མ་ཧཱ་ག་ཎ་པ་ཏི། ཛཱི་བི་ཨནྟ་ཀ་རཱ་ཡ་སྭཱ་ཧཱ། ཕྱག་རྒྱ་ནི་ལག་པ་གཡས་པའི་ཐལ་མོ་བཀན་པ་ལས་གུང་མོ་དང་སྲིན་ལག་བཀུག་སྟེ། མཐེ་བོའི་རྩེ་མོས་མནན་ལ་མཛུབ་མོ་དང༌། མཐེའུ་ཆུང་ཅུང་ཟད་བཀུག་པ་ནི་ཆུ་དཀྲུག་པའི་ཕྱག་རྒྱའོ། །དེ་ནས་སྔགས་འདིས་ཆུ་ཁྱོར་བ་གསུམ་དཀོན་མཆོག་གསུམ་ལ་དབུལ་ལོ། །ཨོཾ་ར་ཏེ་ར་ཏེ་བུདྡྷཱ་ཡ་སྭཱ་ཧཱ། དེ་ནས་གསང་སྔགས་འདིས་རང་གི་མགོ་བོར་སྙིམ་པ་གསུམ་བླུགས་སོ། །ཨོཾ་ཨ་མྲྀ་ཏེ་ཧཱུ༵་ཕཊ། དེ་ནས་བདུད་རྩི་ཐབ་སྦྱོར་གྱི་སྔགས་དྲན་བཞིན་དུ་ལྕིབས་ཁྲུས་བྱའོ། །དེ་ནས་ཁྲུས་ཟིན་ནས་ལག་པ་བཀྲུས་ཏེ། གསང་སྔགས་དེ་ཉིད་ཀྱིས་ཆུ་སྙིམ་པ་གསུམ་གྱིས་བདག་ཉིད་དབང་བསྐུར་བར་བྱའོ། །དེ་ནས་རང་གི་ལྷ་ཉིད་ཡིད་ཀྱིས་སྤྱན་དྲངས་ཏེ་པདྨའི་གདན་ལ་བཞུགས་སུ་གསོལ་ནས་གསང་སྔགས་འདིས་སྐུ་བསིལ་ལོ། །ཨོཾ་སརྦ་ཏ་ཐཱ་ག་ཏ་ཨ་མྲྀ་ཏ་སྭཱ་ཧཱ། དེ་ནས་གལ་ཏེ་ལྷ་ཁང་དུ་བཟླས་བརྗོད་བྱེད་ན་ནི། དེའི་ཚེ་ཆུའི་ནང་དུ་བདུན་གསུམ་ཉི་ཤུ་རྩ་གཅིག་ཏུ་གསང་སྔགས་བཟླ་བར་བྱའོ། །ཅི་སྟེ་ཆུའི་ནང་དུ་ཟློས་ན་ནི་དེའི་ཚེ་སྐེ་ནུབ་ཙམ་མམ། བརླ་འམ། བྱིན་པ་ནུབ་ཙམ་དུ་ཆུའི་ནང་དུ་ཞུགས་ལ། མགོ་ནས་བཟླས་བརྗོད་ཀྱི་ཆོ་ག་ཇི་ལྟར་བྱུང་བ་བཞིན་དུ་བསྒྲུབ་པར་བྱའོ། །དངོས་གྲུབ་རབ་དང་འབྲིང་དང༌། ཐ་མ་རྣམས་ཀྱི་ཕྱིར་ལྷའི་གནས་སུ་འགྲོ་བའི་ཚེ་ཆུའི་ནང་ནས་འབྱུང་སྟེ། ཀཱི་ལི་ཀཱི་ལའི་
གསང་སྔགས་སམ། འོག་ནས་འབྱུང་བའི་གསང་སྔགས་ཀྱིས་གོས་ལ་མངོན་པར་བསྔགས་ཏེ་བགོས་ནས། དེ་དག་ཉིད་ཀྱིས་བསྲུང་བ་བྱ་སྟེ། ཡིད་ལྷ་ལ་གཞོལ་བ་དང༌། མི་སྨྲ་བ་དང༌། འདོད་ཆགས་ལ་སོགས་པ་ཉོན་མོངས་པ་ཐམས་ཅད་ཡོངས་སུ་སྤངས་ནས་ལྷའི་གནས་ཀྱི་དྲུང་དུ་ཕྱིན་པ་དང་རྐང་པ་བཀྲུས་ཏེ་ཉེ་རེག་བྱས་ནས་ལྷའི་གནས་སུ་ཞུགས་ཏེ། ལྷ་རྣམས་མངོན་སུམ་དུ་དམིགས་ལ་ཕྱག་བྱས་ནས་དམ་ཚིག་ལ་འཇུག་པ་འདི་བཟླས་པར་བྱའོ། །ཨོཾ་བི་ར་ཛ་བི་ར་ཛ་མ་ཧཱ་བཛྲི། ས་ཏ་ས་ཏ། སཱ་ར་ཏེ་སཱ་ར་ཏེ། ཏྲ་ཡི་ཏྲ་ཡི་བི་དྷ་མ་ནི་སཾ་བྷཉྫ་ནི། ཏ་ར་མ་ཏི་སིདྡྷ་ཨ་གྲེ་ཏཾ་སྭཱ་ཧཱ། དེ་ནས་ལུས་ལ་བགེགས་བསལ་བའི་གསང་སྔགས་དང་ཕྱག་རྒྱ་བསྟན་པ་བཞིན་དུ་བྱ་བའམ། ཡང་ན་ཅི་ཤེས་པས་བདག་ཉིད་བསྲུང་བར་བྱ་སྟེ། དེ་ནས་བསལ་བར་བྱའོ། །སྔར་བསྟན་པའི་སྔགས་དང་ཕྱག་རྒྱའམ་ཡང་ན་རིགས་གསུམ་གྱི་ལས་ཐམས་ཅད་ཀྱི་ཕྱག་རྒྱའམ། བདུད་རྩི་ཐབ་སྦྱོར་གྱིས་སྤོས་ཆུ་ལ་ཡོངས་སུ་བཟླས་ནས་ཐམས་ཅད་དུ་བསང་གཏོར་བྱས་ནས་བསལ་བར་བྱའོ། །དེ་ལ་གསང་སྔགས་ནི་འདི་དག་ཡིན་ཏེ། ཨོཾ་ཥྚོཾ་བནྡྷ་སྭཱ་ཧཱ། དེ་བཞིན་གཤེགས་པའི་རིགས་ཀྱི་ལས་ཐམས་ཅད་པའོ། །ན་མོ་མ་ཧཱ་ཤྲཱི་ཡཱ་ཡཻ། ཨོཾ་ཤ་མ་མེ་ས་མ་ཡེ། སཽ་མེ་སིདྡྷི། སིདྡྷེ་སཱ་དྷ་ཡ། ཤི་བེ་ཤ་བཾ་ཀཱ་རི་ཤཱཾ་ཀཱ་རི། བྷོ་ཧ། སརྦ་ཨརྠ་སཱ་དྷ་ནི་སྭཱ་ཧཱ། པདྨ་རིགས་ཀྱིའོ། །ཨོཾ་ཀཱི་ལི་ཀཱི་ལ་བཛྲ་ཧཱུ༵་ཕཊ། རྡོ་རྗེ་རིགས་ཀྱི་ལས་ཐམས་ཅད་པའོ། །ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷཱ་ཡ། ཏདྱ་ཐཱ། ཨོཾ་ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨོཾ་ཨ་མྲྀ་ཏེ་ཧཱུ༵་ཕཊ། བདུད་རྩི་ཐབ་སྦྱོར་རོ། །དེ་དག་ཉིད་ཀྱིས་མེ་ཏོག་ལ་སོགས་པས་ཡང་བགེགས་བསལ་བར་བྱའོ། །དེ་ནས་དེ་དག་རིགས་ཀྱི་བདག་པོའི་གསང་སྔགས་སམ། རིགས་ཀྱི་སྙིང་པོས་བསང་བར་བྱའོ། །ཡང་ན་ལག་པ་གཡོན་པའི་ཕྱག་རྒྱ་དང་བཅས་པས་ཐམས་ཅད་བསང་བར་བྱའོ། །དེ་ནས་མེ་ཏོག་ལ་སོགས་པ་བྱིན་བསྐྱེད་པར་བྱ་སྟེ། བསལ་བའི་ཕྱག་རྒྱ་ཉིད་ལས་གཡོན་པའི་གུང་མོ་ཉིད་ལག་པའི་རྡོ་རྗེས་གཟུང་བར་བྱ་བ་ནི་བྱིན་བསྐྱེད་པའི་ཕྱག་རྒྱ་སྟེ། དྲི་དང་མེ་ཏོག་ལ་སོགས་པའི་སྟེང་དུ་བྲིམས་ན་བྱིན་བསྐྱེད་པར་འགྱུར་རོ། །
དེ་ལ་འདི་ནི་བྱིན་བསྐྱེད་པའི་གསང་སྔགས་ཏེ། ཨོཾ་ཏེ་ཛཱ། ཏེ་ཛཱཿས་ནི་སིདྡྷི་སཱ་དྷ་ཡ་ཧཱུ༵་ཕཊ། དེ་བཞིན་གཤེགས་པའི་རིགས་ལའོ། །ཨོཾ་དི་པྱ་དི་པྱ་དི་པྱ་ཡ། ཨཱ་བེ་ཤ་མ་ཧཱ་ཤྲི་ཡཱ་ཡ་སྭཱ་ཧཱ། པདྨའི་རིགས་ལའོ། །ཨོཾ་ཛྭ་ལ་ཛྭ་ལ་ཛྭ་ལཱ་ཡ་བནྡྷ་རི་ཧཱུ༵་ཕཊ། རྡོ་རྗེའི་རིགས་ལའོ། །དེ་ལ་བདུད་རྩི་ཐབ་སྦྱོར་གྱིས་བྱིན་གྱིས་བརླབ་པར་བྱའོ། །དེ་ནས་རིགས་ཀྱི་སྙིང་པོ་བཟླས་སོ། །དེ་ནས་ཕུར་བུ་དང༌། རབ་དང༌། དྲ་བ་དང༌། བདུད་རྩི་ཐབ་སྦྱོར་དང༌། ཀཱི་ལི་ཀཱི་ལས་མཚམས་བཅད་པ་ལ་སོགས་པས་གནས་བསྲུང་བར་བྱའོ། །དེ་ལ་སྔགས་དང་ཕྱག་རྒྱ་ནི་འདིའོ། །ཨོཾ་ཀཱི་ལི་ཀཱི་ལི་བཛྲི་བཛྲི་བྷུར་བནྡྷ་བནྡྷ་ཧཱུ༵་ཕཊ། གསང་སྔགས་འདི་ཡིས་སྤོས་ཀྱི་ཆུ་ལ་ལན་བདུན་བཟླས་ཏེ་ཀུན་དུ་བསང་གཏོར་བྱས་ན་སྦྱང་བ་བྱས་པར་འགྱུར་རོ། །དེ་ནས་གསང་སྔགས་འདི་ཕྱག་རྒྱ་དང་བཅས་པས་ཕུར་བུར་བྱའོ། །དེ་ལ་འདི་ནི་ཕྱག་རྒྱ་སྟེ། ལག་པ་གཉིས་ཀྱི་གུང་མོ་དང་སྲིན་ལག་གཉིས་ཕན་ཚུན་གདུ་བུ་ལྟར་བྱས་ཏེ། སོ་སོའི་དྲུང་དུ་རྩེ་མོ་སྦྱར་ཏེ་མཐེའུ་ཆུང་དང་མཛུབ་མོ་གཉིས་གཤིབས་ཏེ་བསྒྲེང་མཐེ་བོ་ཕུར་བུའི་ཚུལ་དུ་བྱ་སྟེ། ས་ལ་བཙུགས་པ་ནི་ཕུར་བུའི་ཕྱག་རྒྱའོ། །དེ་ནས་གསང་སྔགས་བཟླས་པའི་བདུག་པས་བདུགས་ཏེ་བཅིང་བར་བྱའོ། །གསང་སྔགས་འདི་ཡིན་ཏེ། ཨོཾ་སུ་སིདྡྷི་ཀ་ར་ཛྭ་ལི་ཏ། ཨ་མ་ནནྟ་རྨུ་རྟ་ཡེ་ཛྭ་ལ་ཛྭ་ལ་བནྡྷ་བནྡྷ་ཧ་ན་ཧ་ན་ཧཱུ༵་ཕཊ། ཐམས་ཅད་ཀྱི་སྤྱིའིའོ། །ཨོཾ་ཛྭ་ལ་ཧཱུ༵། དེ་བཞིན་གཤེགས་པའི་རིགས་ལའོ། །ཨོཾ་པདྨི་ནི་པདྨི་ནི། བྷ་ག་བ་ཏི། མོ་ཧ་ཡ་མོ་ཧ་ཡ། ཛ་གད་མོ་ཧ་ནི་སྭཱ་ཧཱ། པདྨའི་རིགས་ལའོ། །དེ་ནས་མཁས་པས་ཐམས་ཅད་ལ་ཡང་རིགས་ཀྱི་སྙིང་པོ་ཡོངས་སུ་བཟླས་པའི་སྤོས་ཆུས་ཕྱོགས་བཅིང་བར་བྱའོ། །དེ་ནས་རབ་བྱ་སྟེ་ཕུར་བུའི་ཕྱག་རྒྱ་ཉིད་ལས་མཐེ་བོང་གཉིས་གྱེན་དུ་བསྒྲེང་བ་ནི་ར་བའི་ཕྱག་རྒྱའོ། །གསང་སྔགས་དང་དཀོན་མཆོག་གསུམ་དང་ཕྱག་ན་རྡོ་རྗེ་ལ་ཕྱག་འཚལ་ལོ། །ཨོཾ་ས་ར་ས་ར། བཛྲ་པྲཱ་ཀ་ར་ཧཱུ༵་ཕཊ། དེ་ནས་དྲ་བ་བྱ་སྟེ་ར་བའི་ཕྱག་རྒྱ་ཉིད་ཁ་ཐུར་དུ་བསྟན་པ་བསྐོར་བ་ནི་དྲ་བའི་ཕྱག་རྒྱའོ། །གསང་སྔགས་དང་དཀོན་མཆོག་གསུམ་དང་ཕྱག་ན་རྡོ་རྗེ་ལ་ཕྱག་འཚལ་ལོ། །ཨོཾ་བི་སྥུ་ར་རཀྵ་བཛྲ་པཱ་ཎི་ཧཱུ༵་ཕཊ། བདུད་རྩི་ཐབ་སྦྱོར་དང་ཀཱི་ལི་ཀཱི་ལ་ཞེས་བྱ་བ་སྔར་བསྟན་པ་ཉིད་ཀྱིས་སྦྱར་བར་བྱའོ། །དེ་ནས་
མཚམས་གཅད་པར་བྱ་སྟེ། ཁུ་ཚུར་བཅིངས་ཏེ་མཐེ་བོས་སེན་མོ་རྣམས་མནན་ཏེ་མཛུབ་མོ་ཕྱུང་ནས། གསང་སྔགས་ལན་གསུམ་བརྗོད་ཅིང་དབུས་ནས་བསྐོར་བར་བྱའོ། །མཚམས་བཅད་པ་སྟེ། གསང་སྔགས་ལ། ན་མཿས་མནྟ་བཛྲཱ་ཎཱཾ། ཨོཾ་ཏ་ར་ཏ་ར། ཏུ་རུ་ཏུ་རུ། མ་ཊ་མ་ཊ། བནྡྷ་བནྡྷ། སརྦ་ཏྲ་ཨ་བྲ་ཏི་ཧ་ཏེ། ས་སི་མེ་ས་མ་བནྡྷ། ཀུ་རུ་ཀུ་རུ། ཏ་ར་ཏ་ར། ས་མནྟ་བཛྲེ། ཀུ་རུ་ཨ་མ་ལེ། ཀཱ་རུ་ཎ། མ་ཡེ་ཏུ་ཏ་ཡེ། ཏུ་ཏ་ཡེ། བ་ར་བ་ར། ཀ་ར་ཀ་ར། སུ་མི་མ་ས་མནྟ་བི་དྷྭ་ནྶ་ཡེ་ཛྭ་ལཱ་ཡ་སྭཱ་ཧཱ། དེ་ནས་བགེགས་བསལ་བ་དང༌། འབགས་པའི་སྐྱོན་ཡོངས་སུ་སྤང་བའི་ཕྱིར། སྤྲོས་ཆུ་ལག་མཐིལ་དུ་བླུགས་ལ་རིགས་ཀྱི་སྙིང་པོ་ཡོངས་སུ་བཟླས་པས་རང་གི་སྤྱི་བོར་བསང་གཏོར་བྱའོ། །དེ་ནས་རྩ་བའི་རྒྱུད་ལས་སྟན་གང་ཡང་རུང་བ་ཅིག་བདུད་རྩི་ཐབ་སྦྱོར་གྱིས་བསང་གཏོར་བྱས་ལ་བཀྲ་ཤིས་དང་པདྨ་དང༌། རྡོ་རྗེ་སྐྱིལ་མོ་ཀྲུང་གང་ཡང་རུང་བའི་ཚུལ་དུ་འདུག་གོ །དེ་ནས་མཁས་པས་གསང་སྔགས་འདི་བརྒྱའམ་སྟོང་དུ་མངོན་པར་བསྔགས་པའི་ལས་ཀྱི་རྡོ་རྗེ་རྟག་ཏུ་བཅང་བར་བྱའོ། །ཨོཾ་དྷུ་ན་བཛྲ་ཧཱ། དེ་ལ་རྡོ་རྗེའི་ལས་ནི་རྡོ་རྗེ་བཀྲུས་ཏེ། ཙནྡན་དམར་པོས་བསྐུས་ལ་ལྷ་རྣམས་ལ་མཆོད་པ་བྱ་སྟེ། ལེགས་པར་གྲུབ་པར་བྱེད་པ་སྤྱན་དྲང་ཞིང༌། བདེ་བར་གཤེགས་སོ་ཞེས་བྱ་བ་དང༌། མཆོད་པ་རྣམ་པ་ལྔ་ལ་སོགས་པ་ཕུལ་ཏེ་སྔར་བསྟན་པའི་སྔགས་ཀྱིས་ལན་སྟོང་མངོན་པར་བསྔགས་ལ་འདི་སྐད་ཅེས། བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་བཞུགས་ཏེ། བདག་གི་ལས་ཐམས་ཅད་མཛད་དུ་གསོལ་ཞེས་བརྗོད་ནས། དེ་མཆོད་པ་ལ་སོགས་པ་བྱེད་པ་ན་ལག་པ་གཡོན་པས་གཟུང་བར་བྱའོ། །ཉིན་གཅིག་བཞིན་དུ་མཆོད་ཅིང་རང་གི་སྔགས་ཀྱིས་ལན་བདུན་བསྔགས་པར་བྱའོ། །གདུ་བུའི་ཆོ་ག་འདི་ཡིན་ཏེ། བུ་མོས་བཀལ་བའི་སྐུད་པའི་གྲངས་མི་མཉམ་པར་བསྒྲིལ་ནས་མདུད་པ་ཡང་གྲངས་མི་མཉམ་པར་བོར་ཏེ་དབུས་སུ་བགྲང་ཕྲེང་གི་བྱེ་བྲག་ལས་ནོར་བུ་ཅིག་བཏགས་ཏེ། དེ་ལ་ནི་ལྷ་སྤྱན་མི་དྲང་བར་རིགས་གསུམ་ཆར་ལ་མཱ་མ་ཀཱིའམ་རྒྱལ་བ་དང༌། པདྨའི་རིགས་ལ་སྤྱན་ནམ། གོས་དཀར་ཅན་གྱིས་ཡོངས་སུ་བཟླས་ལ་གདུ་བུ་དེ་ལག་པ་གཡས་པའི་
མཁྲིག་མ་ལ་གདགས་པར་བྱའོ། །ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ནེ་སརྦ་ཨརྠ་སཱ་དྷ་ནི་སྭཱ་ཧཱ། དེ་བཞིན་གཤེགས་པའི་རིགས་ཀྱི་གདུ་བུའི་རིག་སྔགས་ཏེ། རིགས་ཀྱི་ཡུམ་ཡིན་ནོ། །དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །མཐོང་བ་དང་ནི་ཐོས་པ་དང༌། །རེག་པ་དང་ནི་དྲན་པའང་རུང༌། །བདག་ནི་སེམས་ཅན་ཐམས་ཅད་ཀྱི། །ནད་རྣམས་ཀུན་གྱི་གསོས་གྱུར་ཅིག །ཏདྱ་ཐཱ། ཀ་ཊེ་བི་ཀ་ཊེ། ཀཾ་ཀ་ཊེ། ཀ་ཊ་བི་ཀ་ཊ། ཀཾ་ཀ་ཊེ། བྷ་ག་བ་ཏི་བི་ཛ་ཡ་སྭཱ་ཧཱ། པདྨའི་རིགས་ཀྱི་གདུ་བུའི་རིག་སྔགས་ཏེ་ཡུམ་ཡིན་ནོ། །ཨོཾ་ཀུ་ལནྡྷ་རི། བནྡྷ་བནྡྷ་ཧཱུ༵་ཕཊ། རྡོ་རྗེ་རིགས་ཀྱི་གདུ་བུའི་རིགས་སྔགས་ཏེ་ཡུམ་ཡིན་ནོ། །འདི་དག་གིས་ནི་དེ་ལ་ནི། །བགེགས་ཀྱིས་ཟིལ་གྱིས་གནོན་མི་འགྱུར། །དེ་དག་བརྗོད་པས་མྱུར་དུ་ནི། །དངོས་གྲུབ་མཐོང་ཞིང་གཙང་མར་འགྱུར། །རིགས་ཀྱི་སྙིང་པོ་འབྲུ་གསུམ་པས། །སོ་སོར་བཟླས་བརྗོད་བྱས་པ་ཡིས། །ཀུ་ཤ་ཡི་ནི་བསང་བྱེད་ཀྱང༌། །སྲིན་ལག་ལ་ནི་གདགས་པར་བྱ། །ཛི་ན་ཛི་ཀ་ཨཱ་རོ་ལྀ་ཀ་བཛྲ་དྷྲྀ་ཀ །ཟེའུ་ཀ་རས་ལ་ནི་འོག་ནས་བཤད་པའི་གསང་སྔགས་ཀྱིས་ཡོངས་སུ་བཟླས་པར་བྱའོ།། དེ་ལྟར་གདུ་བུ་དང༌། བསང་བྱེད་དང༌། ཟེའུ་ཀ་དག་བྱས་ནས་ལུས་དྲང་པོར་བསྲང་སྟེ་བཞག་ལ་དབང་པོ་ལྔའི་ཡུམ་གྱི་ཁྱད་པར་དག་ལས་བཟློག་སྟེ། མགྲིན་པ་རྨ་བྱ་ལྟར་བྱས་ནས་དབུགས་ཕྱི་ནང་དུ་རྒྱུ་བ་དལ་བུས་དབྱུང་ཞིང་མིག་ཅུང་ཟད་ཙམ་ཕྱེ་སྟེ། སྣའི་རྩེ་མོར་བལྟ་བ། དེ་གཏད་ཅིང་སོས་སོ་མནན་ནས་ལྕེ་རྐན་ལ་སྦྱར་ཏེ། སེམས་ཅན་གྱི་ཚོགས་མ་ལུས་པ་ལ་སྙིང་རྗེ་ཆེན་པོ་བསྐྱེད་ནས་བྱང་ཆུབ་ཀྱི་སེམས་བསྒོམ་པར་བྱའོ། །བྱང་ཆུབ་ཀྱི་སེམས་ལ་གནས་ཤིང་དགེ་བའི་རྩ་བ་གང་དག་སྒྲུབ་པ་དེ་དག་ནི་ཐམས་ཅད་མཁྱེན་པའི་ཡེ་ཤེས་འདྲེན་པར་བྱེད་པས་རྒྱུ་ཡིན་ནོ། །བྱང་ཆུབ་ཀྱི་སེམས་ལ་གནས་པ་ལ་ནི་བསྒྲིམ་མི་དགོས་པ་ཁོ་ནར་འཁོར་བ་ན་ཡང་བདེ་བ་སྐྱེ་བར་བྱེད་དོ། །བྱང་ཆུབ་ཀྱི་སེམས་ཀྱིས་བྱིན་གྱིས་བརླབས་པའི་དགེ་བའི་རྩ་བདག་ནི་འཁོར་བ་དག་ན་ཡང་བདེ་བ་རྣམས་འདྲེན་པར་བྱེད་དེ། དེ་བས་ན་བྱང་ཆུབ་ཀྱི་སེམས་བསྐྱེད་དེ་བསོད་ནམས་ཀྱི་ཚོགས་
བསག་པར་བྱའོ། །དེ་ལ་བྱང་ཆུབ་ཀྱི་སེམས་བསྒོམ་པ་ནི་འདི་ཡིན་ཏེ། ཕུང་པོ་ལ་སོགས་པ་མཐའ་དག་རྡུལ་ཕྲ་རབ་ཏུ་བཤིག་ལ། རྡུལ་ཕྲ་རབ་རྣམས་ཕྱོགས་ཆའི་དབྱེ་བ་ལ་སོགས་པའི་རིམ་གྱིས་དཔྱད་ན་རང་བཞིན་མེད་པ་ལས་མི་འདའ་བ་ཡིན་ན། འདི་ལྟར་དེ་དག་ལ་སོགས་པ་གཟུགས་རགས་པ་ལྟ་སྨོས་ཀྱང་ཅི་དགོས། དེ་བཞིན་དུ་འདི་ལྟར་བདག་གི་ངོ་བོ་ཡང་ཇི་ལྟར་ཇི་ལྟར་དཔྱད་པ་དེ་ལྟར་གཅིག་དང་དུ་མའི་རང་བཞིན་དང་བྲལ་བའི་ཕྱིར་དཔྱད་པའི་ལམ་དུ་འཇུག་མི་བཟོད་པ་ཡིན་ནོ། །དེ་བས་ན་ཐོག་མ་མེད་པའི་དུས་ནས་བསྒྲུབས་པའི་མ་རིག་པས་བསྐྱེད་པ་ཕྱིན་ཅི་ལོག་ཏུ་སྣང་བ་དང་ལྡན་པའི་བག་ཆགས་ཤིན་ཏུ་བརྟན་པའི་སྟོབས་ཀྱིས་ནང་གི་ཤེས་པ་ཉིད། ཕྱིའི་གཟུགས་ཁོ་ན་ལྟར་སྣང་བར་ཟད་ཀྱི་དངོས་པོའི་གཟུགས་ནི་སྐྲའི་རྩེ་མོ་སྟོང་གི་ཆ་ཙམ་ཡང་མེད་དོ། །དེ་བས་ན་འདི་ལྟར་ཁམས་གསུམ་པ་འདི་དག་ནི་རྣམ་པར་ཤེས་པ་ཙམ་མོ་ཞེས་རྣམ་པར་དཔྱད་དེ། མཐའ་དག་ནམ་མཁའ་ལྟ་བུར་བསམས་ནས་རང་གི་སེམས་ཀྱི་རྣམ་པ་ཟླ་བའི་དཀྱིལ་འཁོར་ལྟ་བུར་བལྟ་བ་འདི་ནི་བྱང་ཆུབ་ཀྱི་སེམས་བསྒོམ་བ་ཡིན་ནོ། །བྱང་ཆུབ་ཀྱི་སེམས་འདི་ནི་ཐམས་ཅད་མཁྱེན་པའི་ཡེ་ཤེས་ཀྱི་རྒྱུ་མཚན་འཇིག་རྟེན་དང་འཇིག་རྟེན་ལས་འདས་པའི་དགེ་བའི་རྩ་བ་རྣམས་འདྲེན་པ་བདེ་བ་ཐམས་ཅད་འགྲུབ་པར་འགྱུར་བ་ཡིན་ནོ། །དེ་ལ་བཟླས་པར་བྱ་བའི་སྔགས་རྣམས་གོ་རིམས་བཞིན་དུ་དགོད་པས་དེ་ལས་འོད་ཟེར་སྣ་ཚོགས་རྣམ་པར་འབྱུང་ཞིང་རང་གི་ལྷ་ཉིད་ཀྱི་གཟུགས་ཀྱིས་ནམ་མཁའི་དབྱིངས་མཐའ་དག་ཁྱབ་པར་བྱས་ཏེ། དེ་བཞིན་གཤེགས་པ་ཐམས་ཅད་ལ་མཆོད་པའི་སྤྲིན་ཆེན་པོ་སྤྲུལ་པས་ལེགས་པར་མཆོད་པ་དང༌། སྤྲིན་ཆེན་པོ་སྤྲུལ་པ་ལ་བདུད་རྩིའི་ཆར་གྱི་རྒྱུན་འབབ་པས་དམྱལ་བའི་མེ་རྣམས་ཞི་བ་དང༌། སེམས་ཅན་དམྱལ་བའི་སེམས་ཅན་རྣམས་ཚིམ་པར་བྱས་ནས་ཡང་དེ་བཞིན་གཤེགས་པ་ཐམས་ཅད་ཀྱི་གཟུགས་དང་བཅས་པའི་འོད་ཟེར་སླར་ལོག་ནས། རང་གི་སེམས་ཟླ་བའི་དཀྱིལ་འཁོར་ལ་ཞུགས་པར་བསམ་མོ། །བྱ་བའི་རྒྱུད་ལས་ལྷ་སྒྲུབ་པའི་རྣལ་འབྱོར་གྱི་རིམ་པ་མ་བསྟན་ཏོ་སྙམ་དུ་བསམ་པར་མི་བྱ་སྟེ། བཅོམ་ལྡན་འདས་ཀྱིས་ཕལ་ཆེར་
མ་བསྟན་ཀྱང་ཕྱག་ན་རྡོ་རྗེར་དབང་བསྐུར་བ་དང༌། དེ་ཁོ་ན་ཉིད་བཅུ་ལ་འཇུག་པ་དག་ལས་གཙོ་བོར་བསྟན་ཏོ། །གཅིག་ཏུ་དངོས་གྲུབ་ཐམས་ཅད་ནི་གསང་སྔགས་ཀྱི་ལྷ་དང་དེ་ཁོ་ན་ཉིད་ལ་རག་ལུས་པ་ཡིན་ལ། དེ་དག་རྣམ་པར་ཉམས་ན་ཞི་བ་ལ་སོགས་པའི་ལས་རྣམས་འགྲུབ་པར་མི་འགྱུར་བས། བླ་མས་བཤད་པ་དང་རྒྱུད་ཀྱི་ཁྱད་པར་ཅུང་ཟད་དཔྱད་པ་ལས་ཁོང་དུ་ཆུད་པར་བྱའོ། །དེ་ལྟར་རིམ་པ་འདིས་ལྷ་ཉིད་ཀྱི་སྐུ་བསྐྱེད་པར་བྱའོ། །དེ་ནས་རང་གི་ལྷ་ཉིད་ཀྱི་དམ་ཚིག་གི་ཕྱག་རྒྱ་བཅིངས་ནས་སྙིང་ག་དང༌། སྨིན་མཚམས་དང༌། མགྲིན་པ་དང༌། དཔུང་མགོ་རྣམས་སུ་བྱིན་གྱིས་བརླབ་བོ། །དེ་ནས་རིན་པོ་ཆེ་དུ་མ་ལས་བྱས་པའི་ས་གཞི་གསེར་གྱི་བྱེ་མ་གདལ་བ་བསམས་ནས་གསང་སྔགས་འདིས་བྱིན་གྱིས་བརླབ་པར་བྱའོ། །ཨོཾ་ཙ་ལ་བཱི་ར་ཧཱུ༵་སྭཱ་ཧཱ། དེའི་སྟེང་དུ་འོ་མའི་ཆུས་ཡོངས་སུ་གང་བའི་རྒྱ་མཚོ་ཆེན་པོ་ཉ་ལྕིབས་ལ་སོགས་པའི་སྐྱོན་དང་བྲལ་བ་པདྨ་དང། ཨུཏྤལ་ལ་སོགས་པའི་མེ་ཏོག་གིས་རབ་ཏུ་བརྒྱན་པ་རིན་པོ་ཆེའི་བྱའི་ཚོགས་མང་པོ་ལྡིང་བ་བསམ་པར་བྱའོ། །བྱིན་གྱིས་བརླབས་པའི་གསང་སྔགས་ནི་བི་མ་ལ་དྷ་ཧཱ་ཧཱུ༵། དེའི་དབུས་སུ་དེར་རི་རབ་རིའི་རྒྱལ་པོ་བསམ་པར་བྱ་སྟེ། གྲུ་བཞི་པ་ངོས་བཞི་རིན་པོ་ཆེའི་ཐེམ་སྐས་ཀྱི་ཕྲེང་བས་བརྒྱན་པ། ཐེམ་སྐས་ལ་ལ་ནི་གསེར་ལས་བྱས་པ། ལ་ལ་ནི་དངུལ་ལས་བྱས་པ། ལ་ལ་ནི་ཨིནྡྲ་ནཱི་ལ་ལས་བྱས་པ། ལ་ལ་ནི་སྦུར་ལོང་ལས་བྱས་པ། མཐའ་མ་ཐོག་ཐག་དཔག་བསམ་གྱི་ཤིང་ལེགས་པར་བསྐྲུན་པ་རྣམ་པར་རྒྱལ་བའི་བ་དན་སྟོང་འཕུར་བ་རང་གི་བློ་ཡི་ཁྱད་པར་གྱིས་བརྒྱན་པ་བསམ་པར་བྱའོ། །དེ་ནས་དེའི་སྟེང་དུ་པདྨའི་སྡོང་བུ་རིན་པོ་ཆེ་དུ་མས་བརྒྱན་པའི་རིན་པོ་ཆེ་སྣ་ཚོགས་ཀྱི་འདབ་མ་ཅན། གསེར་གྱི་ཟེ་བ་དང་ལྡན་པ་སྦུར་ལོང་གི་ཟེ་འབྲུ་ཅན་སྙིང་པོའི་ཐོག་ལ་དངུལ་གྱི་རི་མོས་བསྐོར་བ། དཔག་ཚད་དུ་མའི་ཁྱོན་ཙམ་རི་རབ་ཀྱི་དབུས་བརྟོལ་ནས་བྱུང་བར་བསམ་མོ། །དེ་ལས་ཀྱང་པདྨའི་དྲ་བ་གཞན་བརྒྱ་སྟོང་ཁྲི་བྱེ་བ་རྙེད་འབྱུང་བར་བསམ་མོ། །དེ་དག་བྱིན་གྱིས་བརླབས་པའི་གསང་སྔགས་འདི་ཡིན་ཏེ། ན་མཿསརྦ་ཏ་ཐཱ་ག་ཏཱ་ནཱཾ། སརྦ་ཐཱ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱཧཱ། དེ་ལ་ཕྱག་རྒྱ་ནི་ཕྱག་འཚལ་བའི་ཐལ་མོ་
ལས་ཕན་ཚུན་བསྣོལ་ཏེ་གཡས་པའི་མཐེ་བོས་གཡོན་པའི་མཐེ་བོ་མནན་ནོ། །ཕྱག་རྒྱ་འདི་བཅིངས་ནས་གསང་སྔགས་ལན་བརྒྱ་བརྗོད་པར་བྱའོ། །དེས་ཐམས་ཅད་ཡང་དག་པར་གནས་བར་འགྱུར་རོ། །དེར་གཞུང་ལས་བྱུང་བའི་རིམ་པས་བླ་རེ་དག་ཀྱང་ཡིད་ཀྱིས་སྐད་ཅིག་ལ་བསམ་པར་བྱའོ། །དེའི་ཕྱིར་དེ་ལ་སྤྲོས་པ་དང་ལྡན་པའི་གཞུང་རྒྱས་པས་འཇིགས་པར་མི་བྱའོ། །དེ་ནས་ལྷ་སྤྱན་དྲང་སྟེ། འདི་ནི་སྤྱན་དྲང་བའི་ཆོ་གའོ། །གསེར་དང་དངུལ་དང་ཟངས་མ་དང་རྡོ་བ་དག་དང་ཤིང་གིའམ་ཞེས་བྱ་བའམ། ཞི་དང་རྒྱས་དང་དྲག་སྤྱོད་དང༌། །རབ་དང་འབྲིང་དང་ཐ་མ་ཡི། །ལས་དང་དངོས་གྲུབ་རྣམས་ལ་ནི། །རིམ་པའི་སྣོད་རྣམས་སྦྱར་བར་བྱ། །ཁ་དོག་ཡོན་ཏན་བཤད་པ་ལས། །གཞན་དང་གཞན་ཡང་ཅི་རིགས་པའི། །སྣོད་རྣམས་ཇི་ལྟར་འདོད་པར་ནི། །མཆོད་ཡོན་ཕྱིར་ཡང་སྦྱར་བར་བྱ། །མཆོད་ཡོན་ཕྱིར་ནི་ཟངས་ཀྱི་སྣོད། །ལས་རྣམས་ཀུན་ལ་རབ་ཏུ་ཤིས། །དེ་དག་ལས་རིགས་དང་ལས་དང་དངོས་གྲུབ་དག་ལ་གང་འདོད་པའི་སྣོད་བླངས་ཏེ། དེ་ནས་རྗེས་སུ་མེ་ཏོག་དང༌། །སྤོས་ཀྱི་ཆུ་ནི་གཙང་བ་ཡིས། །མཆོད་ཡོན་ཆོ་ག་བཞིན་བཤམས་ལ། །བདུག་སྤོས་ཀྱིས་ནི་རབ་ཏུ་བདུག །དེ་ལ་ཞི་བ་དང་དངོས་གྲུབ་རབ་གཉིས་ལ་ནི་ནས་དང་འོ་མའི་མཆོད་ཡོན་དབུལ་བར་བྱའོ། །རྒྱས་པ་དང་དངོས་གྲུབ་འབྲིང་ལ་ནི་ཏིལ་དང་ཞོ་དབུལ་བར་བྱའོ། །དྲག་ཤུལ་སྤྱོད་པ་དང་དངོས་གྲུབ་ཐ་མ་ལ་ནི་བའི་གཅིན་འབྲས་ཀོ་ཏྲ་བ་དང་བཅས་པའམ། ཡང་ན་ཁྲག་དབུལ་བར་བྱའོ། །རབ་དང་འབྲིང་དང་ཐ་མ་ཡི། །ལས་རྣམས་ཀུན་ལ་འབྲས་ཡོས་ཤིས། །སྤོས་དང་མེ་ཏོག་ཀུ་ཤ་ཏིལ། །ཆུ་རྣམས་བྱེ་བྲག་མེད་པར་བཟང༌། །འདི་མ་འབྱོར་གྱིས་བདག་ལ་ནི། །བཟོད་པ་ཅི་འབྱོར་པས་ཀྱང་བྱ། །དེ་ནས་གསང་སྔགས་ཀྱི་ལྷ་སྤྱན་དྲངས་པའི་ཕྱིར་མཆོད་ཡོན་བཤམས་ནས་རང་གི་རིགས་ཀྱི་རིག་པའི་རྒྱལ་པོའམ། ཡང་ན་སྤྱི་ཡི་རིགས་ཀྱི་སྙིང་པོའམ། །དེ་སྤྱན་དྲང་བའི་གསང་སྔགས་སམ། །སོ་སོའི་ལས་ཐམས་ཅད་པས་ཡོངས་སུ་བཟླས་སོ། །རིག་སྔགས་ཀྱི་རྒྱལ་པོ་དང༌། རིག་སྔགས་རང་བཟླས་སོ། །དེ་ལྟར་ཡོངས་སུ་བཟླས་ནས་གསང་སྔགས་ཀྱི་གནས་ཀྱི་ཕྱོགས་གང་ཡིན་པའམ། རི་མོ་ལ་
སོགས་པ་ལ་ལྷའི་གཟུགས་བཞག་པ་དེར་བལྟས་ཏེ། འདི་སྐད་ཅེས། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདིར། །བདག་གི་མཆོད་ཡོན་འདི་བཞེས་ནས། །མཆོད་པས་བདག་ལ་དགྱེས་པར་མཛོད། །ཅེས་བྱ་སྟེ། དེ་ནས་པུས་མོ་གཉིས་ས་ལ་བཙུགས་ཏེ། གསང་སྔགས་མཆོག་རྣམས་མགོ་བོའི་ཐད་ཀ་ནས་མཆོད་ཡོན་དབུལ་ལོ། །འབྲིང་རྣམས་ལ་བྲང་ནས་སོ། །ཕལ་པ་རྣམས་ལ་ནི་ལྟེ་བའི་ཐད་ཀ་ནས་མཆོད་ཡོན་དབུལ་བར་བྱའོ། །ཡང་ན་ཡིད་གཙོ་བོར་གྱུར་པ་ཡིན་པས་བཞི་པོ་གང་ཡང་རུང་བས་སྤྱན་དྲང་བར་བྱའོ། །ཐལ་མོ་སྦྱར་བའམ། མཆོད་ཡོན་ནམ། མེ་ཏོག་བླང་བའམ། ཡང་ན་ཐལ་མོ་སྦྱར་བ་བྱ་སྟེ། ཚུར་གཤེགས་ཞེས་བྱ་བ་ལ་སོགས་པས་ཡིད་ཀྱིས་སྤྱན་དྲངས་ནས་ལས་ཀྱི་བྱེ་བྲག་ལས་ཤར་རམ། བྱང་ངམ། ལྷོའམ། ནུབ་ཏུ་ཁ་བལྟས་ཏེ་ལྷ་མདུན་དུ་བཞུགས་སུ་གསོལ། རྒྱས་པར་ནི་རྒྱུད་ལས་ཤེས་པར་བྱའོ། །སླར་གཤེགས་སུ་གསོལ་བ་ནི་སྤྱན་དྲངས་པའི་ཆོ་ག་བཞིན་དུ་བྱ་བ་ལས་གསང་སྔགས་དང་ཕྱག་རྒྱར་ལྡན་པས་བྱེ་བྲག་ཏུ་བཞུད་ཅིག་ཅེས་བྱའོ། །དེ་ལ་འདི་ནི་ཕྱག་རྒྱ་ཡིན་ཏེ། སོར་མོ་ཕན་ཚུན་གྱི་བར་དུ་བསྣོལ་ནས་ཐལ་མོ་བཀན་ལ་མཛུབ་མོ་གཉིས་གཤིབས་ཏེ་བསྒྲེང་ངོ༌། །མཐེ་བོང་གཉིས་གཡབ་པ་ནི་སྤྱན་དྲངས་པའོ། །ཕྱིར་བསྒྱེལ་བ་ནི་སླར་གཤེགས་སུ་གསོལ་བའོ། །སྤྱན་དྲང་བའི་ཆོ་གའོ། །དེ་ལྟར་ལྷ་རྣམས་སྤྱན་དྲངས་ཏེ། གསང་སྔགས་འཆང་གིས་རྟག་ཏུ་པདྨ་དང༌། རྡོ་རྗེ་དང༌། དཔའ་བོའི་འདུག་སྟངས་བརྗོད་པ་རྣམས་ཀྱིས་སྔ་དྲོ་དང་ཉི་མའི་གུང་དང་ཕྱི་དྲོའི་དུས་སུ་གོ་རིམས་བཞིན་དུ་ཕྱག་རྒྱའི་སྦྱོར་བས་གསང་སྔགས་བཞུགས་སུ་གསོལ་ལོ། །དེ་ལ་པདྨའི་རིགས་ཀྱི་དམ་ཚིག་གི་ཕྱག་རྒྱ་ནི་པདྨའི་འདུག་སྟངས་ཀྱིའོ། །ཕྱག་རྒྱ་དེ་ཉིད་ལས་སོར་མོ་གསུམ་རྡོ་རྗེ་ལྟར་བྱས་པ་ནི་རྡོ་རྗེ་འཇུག་སྟངས་ཀྱིའོ། །ཕྱག་རྒྱ་དེ་ཉིད་ལས་སོར་མོ་དབུས་མ་གཉིས་གཅིག་ཏུ་སྦྱར་བ་ནི་དཔའ་བོའི་འདུག་སྟངས་ཀྱིའོ། །དེ་དག་གི་གསང་སྔགས་ནི། ཨོཾ་ཀཱ་མ་ལཱ་ཡ་སྭཱ་ཧཱ། པདྨའི་འདུག་སྟངས་ཀྱིའོ། །ཨོཾ་བཛྲ་ཨཱ་ས་ནི་ཧཱུ༵་ཕཊ། རྡོ་རྗེའི་འདུག་སྟངས་ཀྱིའོ། །ཨོཾ་བཛྲ་བཱི་ར་ཀ་ཧཱུ༵་ཕཊ། དཔའ་བོའི་འདུག་སྟངས་ཀྱིའོ།།
དེ་ལྟར་ཅི་རིགས་པར་གདན་ཕུལ་ནས་ཀཱི་ལི་ཀཱི་ལ་རྡོ་རྗེ་བསྟན་ནས་དམ་ཚིག་རྡོ་རྗེ་བསྟན་པར་བྱ་སྟེ། དེ་ཡང་ལག་པ་གཡས་པའི་སོར་མོ་གསུམ་གྱིས་བྱའོ། །གསང་སྔགས་ལ་ཤཾ་ཀ་རེ་ས་མ་ཡེ་སྭཱ་ཧཱ། དེ་ནས་རིགས་ཀྱི་ཕྱག་རྒྱ་དང་སྙིང་པོ་བསྟན་པར་བྱའོ། །དེ་ལ་འདི་ནི་སྔགས་ཀྱི་ཕྱག་རྒྱ་དང་སྙིང་པོ་སྟེ། ལག་པ་གཉིས་ཕན་ཚུན་དུ་ཁུ་ཚུར་བཅངས་ནས་མཐེ་བོ་གཉིས་བསྟན་པར་བྱ་བ་ནི། དེ་བཞིན་གཤེགས་པའི་རིགས་ཀྱི་ཕྱག་རྒྱའོ། །གསང་སྔགས་ལ་ཛི་ན་ཛི་ཀ །ཕྱག་རྒྱ་དེ་ཉིད་ལས་གཡོན་པའི་མཐེ་བོང་ནང་དུ་བཅུག་སྟེ། གཡས་པའི་མཐེ་བོང་བསྟན་པ་ནི་པདྨའི་རིགས་ཀྱི་སྙིང་པོའི་ཕྱག་རྒྱའོ། །གསང་སྔགས་ལ། ཨཱ་རོ་ལྀ་ཀ །གཡོན་པའི་མཐེ་བོང་བསྟན་པ་ནི་རྡོ་རྗེའི་རིགས་ཀྱི་སྙིང་པོ་དང་ཕྱག་རྒྱའོ། །གསང་སྔགས་ལ་བཛྲ་དྷྲྀ་ཀ །དེ་ནས་རང་གི་སྙིང་པོའི་ཕྱག་རྒྱ་བསྟན་པར་བྱའོ། །དེ་ནས་རིག་སྔགས་ཀྱི་ཡུམ་རྣམས་ཀྱི་བསྟན་པར་བྱ་སྟེ། ཕྱག་འཚལ་བའི་ཐལ་མོས་མཐེ་བོང་གཉིས་ལག་པའི་ནང་དུ་སྦས་ལ་མཛུབ་མོ་གཉིས་གུང་མོའི་ཚིགས་གསུམ་པར་བཙུགས་པ་འདི་ནི། དེ་བཞིན་གཤེགས་པའི་རིགས་ཀྱི་ཡུམ་གྱི་ཕྱག་རྒྱའོ། །སྔགས་ལ། ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ནི་སརྦ་ཨརྠ་སཱ་དྷ་ནི་སྭཱ་ཧཱ། ཐལ་མོ་སྦྱར་བར་བྱས་པ་ནི་པདྨའི་རིགས་ཀྱི་ཡུམ་མོ། །གསང་སྔགས་ལ། དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །མཐོང་བ་དང་ནི་ཐོས་པ་དང༌། །རེག་པ་དང་ནི་དྲན་ཡང་རུང༌།། བདག་ནི་སེམས་ཅན་ཐམས་ཅད་ཀྱི། །ནད་རྣམས་ཀུན་གྱི་གསོས་གྱུར་ཅིག །ཨོཾ་ཀ་ཊེ་བི་ཀ་ཊེ། ཀཾ་ཀ་ཊེ། ཀ་ཊ་བི་ཀ་ཊ། ཀཾ་ཀ་ཊེ། བྷ་ག་བ་ཏི་ཛ་སྭཱ་ཧཱ། ཕྱག་འཚལ་བའི་ཐལ་མོ་ལས་མཛུབ་མོ་གཉིས་དང༌། སྲིན་ལག་གཉིས་ལག་པའི་ནང་དུ་བཅུག་པ་རྡོ་རྗེ་རིགས་ཀྱི་ཡུམ་མོ། །གསང་སྔགས་ལ། ཨོཾ་ཀུ་ལནྡྷ་རི་བནྡྷ་བནྡྷ་ཧཱུ༵་ཧཱུ༵་ཕཊ་སྭཱ་ཧཱ། དེ་ནས་དམ་ཚིག་ཆེན་པོའི་ཕྱག་རྒྱས་མངོན་པར་བསྐོར་བར་བྱའོ། །སྲིན་ལག་གི་ཚིགས་པར་མཐེ་བོ་གཉིས་མནན་ལ། མཐེ་ཆུང་གུང་མོ་གཉིས་གཤིབས་ཏེ་བསྒྲེང༌། མཛུབ་མོ་གཉིས་གུང་མོའི་ཚིགས་གསུམ་པར་བཅུག་པ་འདི་ནི་དམ་ཚིག་
ཆེན་པོའི་ཕྱག་རྒྱའོ། །གསང་སྔགས་ལ། ཨོཾ་ཤཾ་ཀ་རེ་མ་ཧཱ་ས་མ་ཡེ་སྭཱ་ཧཱ། དེ་ནས་མཆོད་ཡོན་དབུལ་བར་བྱའོ། །དེ་ནས་བསྲུང་བ་ལ་སོགས་པ་མ་བྱས་ཤིང༌། དམ་ཚིག་ཆེན་པོའི་ཕྱག་རྒྱ་མ་བྱས་པར་མཆོད་པ་དབུལ་བ་ལ་སོགས་པ་བྱས་ན་ལྷའི་རྗེས་སུ་འབྲང་བའི་བགེགས་རྣམས་ཀྱིས་ཕུང་བར་བྱེད་ཅིང་གཅིག་ལ་གཅིག་རིགས་ཀྱི་སྟོབས་ཉམས་པར་བྱེད་དོ། །དེ་བས་ན་ཕྱག་རྒྱ་སྔར་ཐལ་མོ་སྦྱར་བ་བྱས་ནས་མཆོད་ཡོན་དབུལ་བར་བྱའོ། །མཆོད་ཡོན་མ་འབྱོར་ན་ཕྱག་རྒྱའི་མཆོད་ཡོན་དབུལ་བར་བྱའོ། །མཐེ་ཆུང་དང་སྲིན་ལག་ནང་དུ་ཕན་ཚུན་བསྣོལ་ཏེ་གུང་མོ་གཉིས་གཤིབས་ཏེ་བསྒྲེངས་པའི་ཚིགས་གསུམ་པར་མཛུབ་མོ་གཟུགས་མཐེ་བོང་གཉིས་ངོས་ལ་སྦྱོར་བ་ནི་མཆོད་ཡོན་གྱི་ཕྱག་རྒྱའོ། །གསང་སྔགས་ནི་བདག་གི་ཡིད་ཀྱིས་བྱའོ། །དེ་ནས་ལྷའི་གཟུགས་སམ་རི་མོ་ལ་བཞུགས་པའི་སྐུ་བསིལ་བར་བྱའོ། །རི་མོའི་སྐུ་གཟུགས་ལ་མེ་ལོང་བསྟན་ཏེ་གཟུགས་བརྙན་སྐུ་བསིལ་བར་བྱའོ། །མ་འབྱོར་ན་གསང་སྔགས་ཕྱག་རྒྱར་ལྡན་པས་སྐུ་བསིལ་བར་བྱའོ། །ཐལ་མོ་བཀན་ནས་མཛུབ་མོའི་རྩེ་མོ་དང༌། མཐེ་བོང་གི་རྩེ་མོ་སྦྱར་བ་འདི་ནི་སྐུ་བསིལ་བར་བྱའོ། །གསང་སྔགས་ལ། ཨོཾ་སརྦ་དེ་བ་ཏཱ་ཨ་ཙིཏྟ་ཨ་མྲྀ་ཏ་སྭཱ་ཧཱ། དེ་ནས་ཕྱག་རྒྱ་བཅིངས་ནས་གསང་སྔགས་བརྗོད་ཅིང་ཡིད་ཀྱིས་གསེར་ལ་སོགས་པ་རིན་པོ་ཆེའི་བུམ་པ་དུ་མ་སྤོས་ཆུ་དྲི་ཞིམ་པོས་ཡོངས་སུ་བཀང་ནས་སྤོས་ཆུའི་སྤྲིན་ཆེན་པོས་སྐུ་བསིལ་བར་བྱའོ། །དེ་ནས་ཡིད་ཀྱིས་ན་བཟའ་དང་རྒྱན་གསོལ་ཏེ། རོལ་མོ་དང་དུང་དང་རྫ་རྡ་དང༌། རྡ་པ་ཊ་ཧ་རྣམས་ཀྱིས་ཀྱང་མཆོད་ཅིང་ཡིད་ཀྱིས་བསྟོད་པའི་གླུ་དབྱངས་བླང་ངོ༌། །དེ་ནས་རྒྱུད་ལས་འབྱུང་བའི་དྲི་ལ་སོགས་པ་ཡང་དབུལ་བར་བྱའོ། །དེ་ལ་དང་པོ་དྲི་དབུལ་བར་བྱའོ། །དེའི་འོག་ཏུ་མེ་ཏོག་དབུལ་བར་བྱའོ། །དེ་ནས་བདུག་སྤོས་དང༌། ལྷ་བཤོས་དང༌། མར་མེ་དབུལ་བར་བྱའོ། །ལེགས་པར་མཉམ་པར་བཞག་ནས་འདི་སྐད་བརྗོད་ཅིང་དབུལ་བར་བྱའོ། །གཙང་ཞིང་གཙང་མ་ལས་བྱུང་བའི། །ལྷ་རྫས་བཟང་པོའི་དྲི་འདི་དག །བདག་ནི་དད་པས་དབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །ཨཱ་ཧ་ར་ཨཱ་ཧ་ར་སརྦ་བིདྱཱ་དྷ་རི་པཱུ་ཛི་ཏེ་སྭཱ་ཧཱ། སྒྲུབ་པས་དང་པོ་སྔགས་འདི་དང༌། །
རང་གི་སྔགས་ཀྱིས་ཡོངས་བཟླས་ནས། །གསལ་བའི་དྲི་རྣམས་ལྷ་དག་ལ། །ཆོ་ག་བཞིན་དུ་དབུལ་བར་བྱའོ། །གཞན་གྱི་དྲི་རྣམས་གཞན་རྣམས་ལ། །གང་ཚེ་མ་འབྱོར་ནས་དབུལ་བ། །དེ་ཚེ་རང་གཞན་གསང་སྔགས་ཀྱིས། །དེ་ལ་ཡང་ནི་མངོན་པར་བསྔགས། །མེ་ཏོག་ལ་སོགས་པ་ཡང་དེ་དང་འདྲ་བར་རིག་པར་བྱའོ། །དྲི་རྣམས་མ་འབྱོར་ན་ཡང་དྲིའི་ཕྱག་རྒྱ་བཅིངས་ནས་ཡིད་ཀྱིས་ཙནྡན་དང་ཨ་ཀ་རུ་དང༌། གུར་ཀུམ་ལ་སོགས་པ་འཇིག་རྟེན་གྱི་ཁམས་ཐམས་ཅད་རྒྱས་པར་ཁེངས་པའི་ཆོ་གས་མཆོད་པར་བྱའོ། །དེ་ལ་འདི་ནི་དྲིའི་ཕྱག་རྒྱ་སྟེ། ལག་པ་གཡས་པ་མི་འཇིགས་པའི་ལག་པར་བྱས་ལ། ལག་པ་གཡོན་པས་མཁྲིག་མ་ནས་བཟུང་བ་ནི་དྲིའི་ཕྱག་རྒྱའོ། །དེ་ནས་མེ་ཏོག་དབུལ་བར་བྱ་སྟེ། མ་ལི་ཀ་དང༌། བ་ཀུ་ལ་དང༌། ཨུནྡྷ་དང༌། མ་ལ་ཏི་དང༌། ན་བ་མ་ལི་ཀ་དང༌། ཙམ་པ་ཀ་དང༌། ཤོ་ཀ་དང༌། པུནྡྷ་དང༌། པྲི་ཡདྐུ་དང༌། པུ་ཏི་ཀོ་ར་ན་ཞེས་བྱ་བ་ལ་སོགས་པ་རྒྱུད་ཀྱི་རྗེས་སུ་འབྲངས་ནས་ཁོང་དུ་ཆུད་པར་བྱའོ། །གཙང་ཞིང་གཙང་མར་སྐྱེས་པ་ཡི། །ལྷ་རྫས་བཟང་པོའི་མེ་ཏོག་འདི། །བདག་ནི་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །ཨཱ་ཧ་ར་ཨཱ་ཧ་ར་སརྦ་བིདྱཱ་དྷ་རི་པཱུ་ཛི་ཏི་སྭཱ་ཧཱ། མེ་ཏོག་མེད་ན་མེ་ཏོག་གི་ཕྱག་རྒྱ་བཅིངས་ཏེ་ཡིད་ཀྱིས་མནྡཱ་ར་བ་དང༌། མཉྫུ་ཤ་ཀ་དང༌། མ་ལི་ཀ་དང༌། ཨུཏྤ་ལ་ལ་སོགས་པ་དང༌། མེ་ཏོག་གི་ཕྲེང་བ་ལ་སོགས་པས་མཆོད་པར་བྱའོ། །དེ་ལ་འདི་ནི་མེ་ཏོག་གི་ཕྱག་རྒྱ་སྟེ། ལག་པ་གཉིས་ཀྱི་སོར་མོ་ཕན་ཚུན་བསྣོལ་ཏེ། ལག་པའི་ནང་དུ་མཛུབ་མོ་གཉིས་རྩེ་མོ་གཅིག་ཏུ་བྱ་སྟེ། གདུ་བུའི་ཚུལ་དུ་བྱས་ནས་མཐེ་བོང་གློར་བཞག་སྟེ། པདྨ་ལྟར་བྱས་པ་ནི་མེ་ཏོག་གི་ཕྱག་རྒྱའོ། །དེ་ནས་བདུག་སྤོས་དབུལ་བར་བྱ་སྟེ། དྲི་དང་ཁ་དོག་མཆོག་གི་རྣམས། །མཆོག་གི་ལས་ལ་སྦྱར་བར་བཤད། །དམན་ཞིང་ཤིན་ཏུ་དམན་པ་དག ། ལྷག་མའི་ལས་ལ་ཤེས་པར་བྱ། །འདི་ལྟར་ཆོ་ག་ལྷག་མ་དག །རྒྱུད་ལས་རྒྱས་པར་རིག་བྱས་ནས། །དྲི་ལ་སོགས་པ་སྦྱར་བར་བྱའོ། །ནགས་ཚལ་བཅུད་ནི་ཡིད་དུ་འོང༌། །དྲི་ཡིས་སྦྱར་བ་ལྷ་ཡི་རྫས། །བདག་ནི་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་
མཛོད། ཨཱ་ཧ་ར་ཨཱ་ཧ་ར། སརྦ་བིདྱཱ་དྷ་རི་པཱུ་ཛི་ཏེ་སྭཱ་ཧཱ། བདུག་སྤོས་མ་འབྱོར་ན། བདུག་སྤོས་ཀྱི་ཕྱག་རྒྱ་བཅིངས་ཏེ། ཡིད་ཀྱིས་འཇིག་རྟེན་གྱི་ཁམས་ཐམས་ཅད་བདུག་སྤོས་ཀྱི་སྤྲིན་རྒྱས་པར་བྱ་སྟེ་བདུག་པར་བྱའོ། །དེ་ལ་འདི་ནི་བདུག་སྤོས་ཀྱི་ཕྱག་རྒྱ་སྟེ། ལག་པ་གཉིས་ཀྱི་མཐེ་ཆུང་དང༌། སྲིན་ལག་དང་གུང་མོ་གཉིས་ཀྱི་སོར་མོ་རྣམས་ཕན་ཚུན་དུ་སྦྱར་ཏེ་སེན་མོའི་དྲུང་དུ་བཀུག་ནས་མཛུབ་མོ་གཉིས་གློར་བཞག་པ་ནི་བདུག་སྤོས་ཀྱི་ཕྱག་རྒྱའོ། །དེ་ནས་ལྷ་བཤོས་ཀྱི་རིགས་དབུལ་བར་བྱ་སྟེ། འོ་ཐུག་དང་ནི་སྦྱར་ཐུག་དང༌། །ཟས་དཀར་ཞོ་དང་བསྲེས་པ་དག །སྦྲང་རྩིར་བཅས་ཤིང་བུ་རམ་བཏབ། །ལེགས་པར་ཡོངས་སུ་བྱས་པ་དག །ཅེས་བྱ་བ་ལ་སོགས་པ་རྒྱས་པར་རྒྱུད་ལས་ཁོང་དུ་ཆུད་པར་བྱའོ། །སྨན་རྣམས་བཅུད་ནི་ཡིད་དུ་འོང༌། །སྔགས་ཀྱི་ཞལ་ཟས་བཤོས་འདི་དག །བདག་ནི་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །ཨཱ་ཧ་ར་ཨཱ་ཧ་ར་སརྦ་བིདྱཱ་དྷ་རི་པཱུ་ཛི་ཏེ་སྭཱ་ཧཱ། ལྷ་བཤོས་མ་འབྱོར་ན་ལྷ་བཤོས་ཀྱི་ཕྱག་རྒྱ་བཅིངས་ཏེ། ཡིད་ཀྱིས་བཟའ་བ་དང་བཅའ་བ་དང་ཁ་ཟས་དང་བཏུང་བ་རྣམ་པ་སྣ་ཚོགས་པ་དབུལ་བར་བྱའོ། །བཟེད་པའི་ཐལ་མོ་ལས་མཛུབ་མོ་ཅུང་ཟད་བཀུག་པ་ནི་ལྷ་བཤོས་ཀྱི་ཕྱག་རྒྱའོ། །དེ་ནས་མར་མེ་ཅི་རིགས་པར་དབུལ་བར་བྱ་སྟེ། ཞི་བ་ལ་ནི་དམར་སེར་རམ། །རྒྱས་པ་ལ་ནི་ཏིལ་མར་ཏེ། །དྲག་ཤུལ་སྤྱོད་པ་དག་ལ་ནི། །ཞེས་བྱ་བ་ལ་སོགས་པ་རྒྱས་པར་རྒྱུད་ལས་ཤེས་པར་བྱའོ། །གདོན་རྣམས་འཇོམས་ཤིང་བཀྲ་ཤིས་པ། །དགེ་ཞིང་མུན་པ་རྣམ་སེལ་འདི། །བདག་གི་དད་པས་འབུལ་ལགས་ཀྱིས། །མར་མེ་འདི་དག་བཞེས་སུ་གསོལ། །ཨཱ་ལོ་ཀ་ཡ་ཨཱ་ལོ་ཀ་ཡ་བིདྱཱ་དྷ་རི་པཱུ་ཛི་ཏེ་སྭཱ་ཧཱ། མར་མེ་མ་འབྱོར་ན་མར་མེའི་ཕྱག་རྒྱ་བཅིངས་ནས་ཡིད་ཀྱིས་རིན་པོ་ཆེའི་སྒྲོན་མེ་བྱེ་བ་དུ་མ་དབུལ་བར་བྱའོ། །དེ་ལ་འདི་ནི་མར་མེའི་ཕྱག་རྒྱ་སྟེ། མཐེ་བོང་དང་གུང་མོ་གཅིག་ཏུ་སྦྱར་ཏེ་བསྒྲེང་བ་ལག་པ་ཁུ་ཚུར་གཅིག་ཏུ་བྱས་པ་འདི་ནི་མར་མེའི་ཕྱག་རྒྱའོ། །འབྱོར་པར་གྱུར་ན་ཡང་སོ་སོའི་ཕྱག་རྒྱས་དབུལ་བར་བྱའོ། །དེ་ནས་གལ་ཏེ་མཆོད་པ་རྣམ་པ་ལྔ་ཡོད་ན་ཡང་འདི་ལྟར་ཡིད་ཀྱིས་མཆོད་པ་སྣ་ཚོགས་ཅི་ནུས་ཀྱིས་བྱའོ། །དེ་ནས་བཅོམ་ལྡན་འདས་ཀྱིས་
འདི་སྐད་དུ། དེ་ཕྱིར་བློ་དང་ལྡན་པ་ཡིས། །ཐེ་ཚོམ་མེད་པའི་སེམས་ཀྱིས་སུ། །རབ་ཏུ་སྒྲིམས་ཏེ་གང་བྱས་པའི། །མཆོད་པ་དེ་འདིར་ཁྱད་པར་ཅན། །དེ་ལྟར་མཆོད་པ་དེ་དག་ཅི་ནུས་པ་བྱས་ཏེ། སྔ་མ་བཞིན་དུ་གསང་སྔགས་ཀྱི་ཡན་ལག་བརྒྱ་རྩ་བརྒྱད་བཟླས་པར་བྱའོ། །གསང་སྔགས་ནི་སྔར་བསྟན་པའོ། །དེ་ནས་རྒྱུད་ལས་འབྱུང་བའི་བསྟོད་པ་བྱས་ནས་བསྟོད་པ་འབྱུང་བའི་གསང་སྔགས་འདི་ལན་བརྒྱ་རྩ་བརྒྱད་དུ་བརྗོད་པར་བྱའོ། །ན་མཿས་མནྟ་བུདྡྷཱ་ནཱཾ། སརྦ་ཏྲཱ་སཾ་ཀུ་རུ་མི་ཏ་ཨ་བི་ཛྙཱ་རཱ་ཤི་ནི་ན་མོ་སྟུ་ཏེ་སྭཱ་ཧཱ། བསྟོད་པ་འབྱུང་བའི་སྔགས་སོ། །དེ་ནས་སྡིག་པ་བཤགས་པ་བྱའོ། །དེ་ནས་གསུམ་ལ་སྐྱབས་སུ་འགྲོ་བའོ། །དེ་ནས་སངས་རྒྱས་བཅོམ་ལྡན་འདས་རྣམས་ལ་ཆོས་ཀྱི་འཁོར་ལོ་བསྐོར་བར་གསོལ་བ་གདབ། དེ་ནས་བཅོམ་ལྡན་འདས་ཡོངས་སུ་མྱ་ངན་ལས་མི་འདའ་བར་གསོལ་བ་གདབ་པར་བྱའོ། །དེ་ནས་སྡུག་བསྔལ་གྱིས་ཉམ་ཐག་པའི་སྐྱེ་དགུ་འདི་དག་ལས་ཀྱི་ཧུད་ཅེས་ཅི་ནུས་པར་སྙིང་རྗེ་བསྐྱེད་དོ། །དེ་ནས་བདེ་བར་གྱུར་ཅིག་ཅེས་བྱམས་པ་ལ་གནས་པར་བྱའོ། །དེ་ནས་སེམས་ཅན་རྣམས་ལ་སངས་རྒྱས་ཀྱི་བདེ་བ་ལེགས་པར་ཚིམ་པར་གྱུར་ཅིག་ཅེས་དགའ་བར་བྱའོ། །དེ་ནས་སངས་རྒྱས་ཀྱི་མྱ་ངན་ལས་འདས་པ་བླ་ན་མེད་པས་ཡོངས་སུ་མྱ་ངན་ལས་འདའ་བར་གྱུར་ཅིག་ཅེས་བཏང་སྙོམས་ལ་གནས་པར་བྱའོ། །དེ་ནས་ཐལ་མོ་མཉམ་སྦྱར་ཏེ། །བླ་མ་ལ་ནི་གུས་ཕྱག་འཚལ། །རིག་སྔགས་རྒྱལ་པོའང་བློས་བསམས་ཏེ། །མཁས་པས་ཆོ་ག་འདི་དག་བྱ། །སྔགས་ཀྱི་ནོར་བུ་བླངས་ནས་སུ། །ལག་པའི་སྙིམ་པར་བཅུག་ནས་སུ། །རིག་སྔགས་རྒྱལ་པོ་ལན་ཅིག་བསམ། །དེ་ནས་གསང་སྔགས་འདི་བཟླས་སོ། །ན་མོ་རཏྣ་ཏྲ་ཡཱ་ཡ། ཨོཾ་ཨད་བྷུ་ཏེ་བི་ཛི་ཡ་སིདྡྷེ་སིདྡྷཱར་རྠེ་སྭཱ་ཧཱ། དེ་བཞིན་གཤེགས་པའི་རིག་སྔགས་ལའོ། །ན་མོ་རཏྣ་ཏྲ་ཡཱ་ཡ། ན་མོ་ཨཱ་ཪྻཱ་ཝ་ལོ་ཀེ་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་ས་ཏྭཱ་ཡ། ཨོཾ་ཨ་མྲྀ་ཏཾ་ག་མེ། ཤྲི་ཡེ་ཤྲཱི་མ་ལི་ན་སྭཱ་ཧཱ། པདྨའི་རིགས་ལའོ། །ཨོཾ་ཀཱི་རི་ཀཱི་རི་རཽ་དྲྀ་ནི་སྭཱ་ཧཱ། རྡོ་རྗེའི་རིགས་ལའོ། །སྔགས་ཀྱི་ནོར་བུ་སྙིམ་པར་བཅུག་ལ། གསང་སྔགས་འདི་ལན་བདུན་བརྗོད་དོ། །དང་པོ་སྔགས་ཀྱི་ནོར་བུ་བཤམ་པར་བྱ་སྟེ། རིགས་དང༌།
མཐུན་པའི་ནོར་བུ་སྟོང་རྩ་བརྒྱད་དམ། བརྒྱ་རྩ་བརྒྱད་དམ། ལྔ་བཅུ་རྩ་བཞིའམ། ཉི་ཤུ་རྩ་གཅིག་བླངས་ལ་ནོར་བུ་ཕུག་ལ་བའི་རྣམ་ལྔས་བཀྲུས་ནས་བུ་མོས་བཀལ་བའི་སྐུད་པ་སུམ་སྒྲིལ་གྱིས་མིག་ནས་མིག་ཏུ་ཕྱུངས་ཏེ་བརྒྱུས་ཏེ་མདུད་པ་པོར་ནས་ལྷ་རྣམས་ལ་མཆོད་པར་བྱ་སྟེ། ཇི་སྐད་བསྟན་པའི་གསང་སྔགས་ཀྱིས་བརྒྱ་རྩ་བརྒྱད་བཟླས་པར་བྱའོ། །དེ་ལ་འདི་ནི་ནོར་བུ་དག་ཡིན་ཏེ། རྒྱལ་བའི་རིགས་ལ་བོ་དེ་ཙེ། །སྔགས་ཀྱི་ནོར་བུར་རབ་ཏུ་བསྒྲགས། །པདྨའི་རིགས་ལ་པདྨའི་སྙིང༌། །རྡོ་རྗེའི་རིགས་ལ་རུ་རཀྴ་།དེ་ནས་ལག་པའི་སྙིམ་པར་སྔགས་ཀྱི་ནོར་བུ་བཅུག་ལ་དངོས་གྲུབ་མངོན་དུ་ཕྱོགས་པར་བྱ་བའི་ཕྱིར་གསང་སྔགས་འདི་ཡོངས་སུ་བཟླས་པར་བྱའོ། །ཨོཾ་བྷ་ག་བ་ཏཱི། སིདྡྷེ་སིདྡྷཱ་ཡ། སིདྡྷཱ་རྠེ་སྭཱ་ཧཱ། དེ་བཞིན་གཤེགས་པའི་རིགས་ལའོ། །ཨོཾ་བ་སུ་བ་ཏི་ཤྲི་ཡེ་སྭཱ་ཧཱ། པདྨའི་རིགས་ལའོ། །ཨོཾ་བཛྲ་ཡ་ཛ་ཏ་ན་ཡེ་སྭཱ་ཧཱ། རྡོ་རྗེའི་རིགས་ལའོ། །དེ་ནས་སྙིང་གར་སྔགས་ཀྱི་ནོར་བུའི་ཕྲེང་བ་བླངས་ལ། གུང་མོ་དང་མཐེ་ཆུང་བརྐྱང་སྟེ། མཛུབ་མོ་རྒྱབ་ཏུ་བཞག་ནས་སྲིན་ལག་དང་མཐེ་བོས་ལས་ཐམས་ཅད་ལ་བགྲང་བར་བྱ་སྟེ། སྔགས་བརྗོད་པའི་མཇུག་ཏུ་ནོར་བུ་རེ་རེ་ལས་བགྲང་བར་བྱའོ། །ལས་དྲག་པོ་རྣམས་ནི་མཛུབ་མོས་བྱའོ། །རང་གི་སྙིང་ག་ན་གནས་པའི་ཟླ་བའི་དཀྱིལ་འཁོར་དང༌། ལྷའི་ཐུགས་ཀའི་ཟླ་བའི་དཀྱིལ་འཁོར་ལ་རང་གིས་བཟླས་པར་བྱའོ། །གསང་སྔགས་ཀྱི་ཡི་གེ་རིམ་པ་བཞིན་དུ་བཀོད་ནས་མངོན་སུམ་དང་འདྲ་བར་བལྟ་སྟེ། རྡོ་རྗེའི་ཚིག་གམ་ཤུབ་བུའི་སྦྱོར་བས་ཧ་ཅང་མི་མྱུར་མི་དལ་བར་གསང་སྔགས་ཀྱི་ཡི་གེ་བརྗོད་ཅིང་བཟླས་པ་བྱའོ། །དེ་ཡང་རྩ་བའི་རྒྱུད་ལས་འདི་སྐད་ཅེས། །ཀླག་པ་སྐྱོན་མེད་བྱས་ནས་སུ། །གསང་སྔགས་ཡི་གེ་དག་པ་ལ། །མཉམ་པར་གཞག་སྟེ་རྩེ་གཅིག་ཏུ། །བཟླས་བརྗོད་དུས་གསུམ་དག་ཏུ་བྱ། །ཞེས་གསུངས་སོ། །དེ་ལ་འདི་ནི་རྡོ་རྗེའི་ཚིག་ཡིན་ཏེ། སོ་དང་མཆུ་ནི་ལེགས་སྦྱར་ཏེ། །ལྕེ་རྩེ་ཧ་ཅང་མི་བསྐྱོད་པ། །སྒྲ་སྤངས་པ་ནི་རྡོ་རྗེའི་ཚིག །ཆོ་ག་ཀུན་ལ་སྦྱར་བར་བྱའོ། །ཤུབ་བུའི་བཟླས་བརྗོད་ནི། །འདི་ལྟར་བདག་ཉིད་གསང་སྔགས་ཀྱི་ཡི་གེ་དག་པ་ལ། དྲུང་ན་འདུག་པ་སུས་ཀྱང་མི་ཐོས་པར་བདག་ཉིད་
ཀྱིས་ཐོས་ཙམ་དུ་བྱའོ། །རྟོག་པ་དན་པ་རྣམས་བསལ་ཏེ། །ཡིད་ཀྱིས་གསང་སྔགས་མཚན་ཉིད་ནི། །ཡང་ནས་ཡང་དུ་མངོན་བསམས་ཏེ། །མཁས་པས་བཟླས་བརྗོད་བྱེད་པ་ཁྲོ་མི་བྱ། །ཡུལ་གྱི་བདག་ཉིད་དགའ་མི་བྱ། །ཞུམ་དང་མི་དགའ་འཇིགས་པ་དང༌། །ཟློས་ཚེ་ཅི་ཡང་མི་སྨྲ་ཞིང༌། །ཡན་ལག་འགྱུར་བར་མི་བྱའོ། །ཀུན་རྟོག་རླུང་གིས་བསྐྱོད་ནས་སུ། །ཅི་ཡང་རུང་བར་མི་བསམ་མོ། །ཟློས་པ་བཟླས་བརྗོད་བྱེད་པའི་ཚེ། །རིག་སྔགས་མཚན་ཉིད་མ་གཏོགས་པ། །བསྒོམ་པ་མཆོག་ཏུ་གྱུར་པ་ཡང༌། །རྣམ་རྟོག་བཟུང་ནས་མི་བསམ་མོ། །གཞན་ཡང་རྣམ་པར་རྟོག་པ་གཉིད་བྲོ་བའམ། གླལ་ལམ། སྦྲིད་པའམ། ལུད་པའམ། བཤང་གཅི་ལ་སོགས་པ་བྱུང་པ་ན། མོད་ཁོ་ན་ལ་སྔགས་ཀྱི་ནོར་བུ་བཞག་སྟེ། བཤགས་པ་ལ་སོགས་པ་བྱས་ནས་ཉེ་རེག་བྱ་སྟེ། །བཟླས་པ་དང་པོ་ནས་བརྩམ་པར་བྱའོ། །སྔགས་ཀྱི་ནོར་བུ་ཐོག་མ་དང༌། །ཐ་མར་རྟག་ཏུ་སྒྲུབ་པ་པོས། །གུས་པར་གསང་སྔགས་མཐའ་དག་ལ། །བློ་དང་ལྡན་པས་ཕྱག་བྱའོ། །སྔགས་ཀྱི་ནོར་བུ་རྫོགས་པའི་ཚེ། །རི་མོའི་གཟུགས་མ་སྐུ་གཟུགས་སམ། །མཆོད་རྟེན་དག་གམ་དེའི་གདན་རྣམས། །མིག་གིས་ཀུན་དུ་བལྟ་བར་བྱ། །བག་མེད་པས་ནི་གང་ཞིག་གིས། །གསང་སྔགས་ལྷ་གཞན་བཟླས་བྱས་ན། །གསོལ་བ་ཡིད་ཀྱིས་བཏབ་ནས་སུ། །བཟླས་བརྗོད་སླར་ཡང་བརྩམ་པར་བྱ། །བཟླས་བརྗོད་གྲངས་བཞིན་བྱས་པའམ། །ཡང་ན་ལྷག་པར་བྱས་ཀྱང་རུང༌། །མགོན་པོས་དངོས་གྲུབ་སྩོལ་ཅིག་ཅེས། །བུམ་པའི་ཕྱག་རྒྱས་དབུལ་པར་བྱ། །དེ་ལ་བུམ་པའི་ཕྱག་རྒྱ་ནི་འདི་ཡིན་ཏེ། ལག་པ་གཡས་པའི་སྲིན་ལག་གི་རྒྱབ་ཏུ་གུང་མོ་བཞག །གཡོན་པའི་སྲིན་ལག་གི་རྒྱབ་ཏུ་གུང་མོ་བཞག་ནས་སྦྱར་ཏེ། ལག་པ་གཡས་པའི་མཛུབ་མོས་ལག་པ་གཡོན་པའི་གུང་མོ་དང་སྲིན་ལག་དཀྲི་ཞིང་ལ་གཡོན་པའི་མཛུབ་མོས་ལག་པ་གཡས་པའི་གུང་མོ་དང་སྲིན་ལག་དཀྲིས་ལ། མཐེ་ཆུང་གཉིས་གཤིབས་ཏེ་བསྒྲེངས་ནས། མཐེ་བོང་གཉིས་མཛུབ་མོའི་ཚིགས་དབུས་མར་བཞག་པ་ནི་བུམ་པའི་ཕྱག་རྒྱའོ། །ཕྱག་རྒྱ་འདིས་བདག་གི་དགེ་བའི་རྩ་བ་འདི་དངོས་གྲུབ་ཆེ་གེ་མོ་ཞིག་གི་རྒྱུར་བཅོམ་
ལྡན་འདས་ལ་དབུལ་ལོ་ཞེས་བྱའོ། །དེ་ནས་བསྟོད་པ་དང༌། མཆོད་པ་ལ་སོགས་པ་བྱས་ནས་སྤྱན་དྲང་བའི་ཆོ་ག་དེ་ཉིད་དུ་བཞུད་ཅིག་ཅེས་བྱ་སྟེ། གཞལ་མེད་ཁང་དང་བཅས་པར་སླར་གཤེགས་སུ་གསོལ་ལོ། །དེ་ནས་ར་བ་ལ་སོགས་པས་ཕྱོགས་བཅིང་བ་དགྲོལ་བའི་ཕྱིར་མི་མཉམ་པའི་ཡན་ལག་ཅན་གྱི་ཕྱག་རྒྱ་བཅིངས་ནས་གཡོན་ཕྱོགས་ནས་བསྐོར་བར་བྱའོ། །ལག་པ་གཡོན་པ་བཀན་པའི་སྟེང་དུ་གཡས་པའི་ཐལ་མོ་བཞག་སྟེ། སོར་མོ་བསྣོལ་བའི་རྩེ་མོ་དྲུད་པར་སྦྱར་ཏེ། ཐད་ཀར་བཞག་པ་ནི་མི་མཉམ་པའི་ཡན་ལག་གི་ཕྱག་རྒྱའོ། །དེ་ནས་དམ་ཚིག་གི་ཕྱག་རྒྱ་བཅིངས་ཏེ། ཨོཾ་ཧུ་ལུ་ཧུ་ལུ། ཙཎྜ་ལི་མ་ཏཾ་གི་བི་སྭཱ་ཧཱ། ཞེས་བྱ་བའི་གསང་སྔགས་འདི་བརྗོད་པར་བྱའོ། །བུ་མོས་བཀལ་བའི་སྐུད་པ་དམ་པོ་ལེ་བརྒན་རྩིའམ། གུར་གུམ་གྱིས་བཙོས་པ་ལ་མདུད་པ་བདུན་པོར་ཏེ། བསྡུ་བའི་ཆོ་ག་བཞིན་ལན་སྟོང་བཟླས་བརྗོད་བྱས་ཏེ། སྲོད་ཀྱི་དུས་སུ་རྐེད་པ་ལ་བཅིང་བར་བྱའོ། །སྔགས་ལ། ཨོཾ་ཧ་ར་ཧ་ར། བནད་ནི་ཤུ་ཀྲ་དྷ་ར་ཎི་སིདྡྷཱརྠེ་སྭཱ་ཧཱ། ཁུ་བ་དགག་པའོ། །བཟླས་བརྗོད་སྦྱིན་སྲེག་མཆོད་སོགས་ལ། །རྟག་ཏུ་བླ་གོས་བགོ་བར་བྱའོ། །ཉལ་དང་འཕྲེས་ལས་ཉེས་པ་མེད། །དེ་ཡང་མངོན་པར་བསྔགས་པར་བྱའོ། །ཨོཾ་རཀྵ་རཀྵ་མཾ། སརྦ་བུདྡྷ་ཨ་དྷིཥྛཱ་ན་ཨཱཏྨ་ཙི་བ་ར་སྭཱ་ཧཱ། དུས་གསུམ་དག་ཏུ་བསྔགས་པ་ཡི། །གོས་ནི་རྣམ་པ་གསུམ་པོ་དག །བཀྲུ་འམ་ཡང་ན་བདུག་པ་དག །ཡང་ན་བསང་གཏོར་དག་ཀྱང་བྱ། །ཉལ་དང་ཁྲུས་བྱེད་མ་གཏོགས་པར། །སྔགས་པས་མཐོང་གོས་མི་སྤང་ཞིང༌། །དཀར་ལ་ཤིན་ཏུ་འཇམ་པ་དེ། །ཉིན་གཅིག་བཞིན་དུ་བསང་བར་བྱ། མཐང་གོས་མ་བཀྲུས་ན་རྡུལ་ལ་སོགས་པའི་ཟག་བྱེད་རྣམས་དང༌། རྡུལ་གྱིས་བླ་གོས་གོས་པར་འགྱུར་རོ། །དེ་བས་གང་གིས་རྡུལ་ལ་སོགས་པས་བླ་གོས་གོས་པར་མི་འགྱུར་བ་དེ་ལྟར་བྱའོ། །གང་ཡང་བཅོམ་ལྡན་འདས་ཀྱིས་མདོམས་དཀྲིས་འཁྲུ་ཞིང་མཐང་གོས་སུ་བྱའོ། །ལྷ་ལ་བགོས་པའི་སྣོད་རྣམས་ཀྱང༌། །ཉིན་གཅིག་བཞིན་དུ་བཀྲུ་བར་བྱའོ། །མེ་ཏོག་རྙིང་པ་དུས་གསུམ་དུ། །རྟག་པར་ཡང་ནི་ཕྱགས་པར་བྱ། །ཤེས་རབ་ཕ་རོལ་ཕྱིན་སོགས་ཀྱི། །གླེགས་བམ་མཇུག་ཏུ་བཀླག་པར་བྱ། །མཆོད་པ་དག་དང་དཀྱིལ་འཁོར་ཡང༌། །
དུས་གསུམ་དག་ཏུ་དེ་བཞིན་བྱ། །རྗེས་སུ་དྲན་པ་དྲུག་རྣམས་ཀྱང༌། །སྣ་ཚོགས་ཚུལ་གྱིས་བསྒོམ་པར་བྱ། །རྗེས་སུ་དྲན་པ་དྲུག་གང་ཞེ་ན། སངས་རྒྱས་དང་ནི་ཆོས་དང་དགེ་འདུན་ལ། །བཟོད་པ་དང་ནི་ཚུལ་ཁྲིམས་ལྷ་རྣམས་ཏེ། །རྒྱལ་བས་རྗེས་སུ་དྲན་པ་དྲུག་གསུངས་པའོ། །སོ་སོའི་ཡོན་ཏན་ཚོགས་ཀྱང་རྗེས་དྲན་བྱ། །ཟློས་པ་ཟླ་བ་ཕྱེད་ཕྱེད་ཅིང༌། །ཉིན་གཅིག་བཞིན་དུ་སྨྱུང་བྱས་ནས། །ཟླ་ཕྱེད་མཚམས་སུ་བ་ཡི་ལྔ། །བརྒྱ་རྩ་བརྒྱད་དུ་བཟླས་པ་བཏུང༌། །དེས་ནི་གསང་སྔགས་ཟློས་པ་པོ། །ཟླ་བ་ཕྱེད་དུ་དག་འགྱུར་ཞིང༌། །བཟའ་མིན་ལ་སོགས་གང་ཟོས་པ། །དེ་དག་ཐམས་ཅད་རྣམ་པར་འབྱེད། །ན་མོ་བྷ་ག་བ་ཏེ། ཨུཥྞཱི་ཥཱ་ཡ། ཨོཾ་བི་ཤུདྡྷ་བི་ར་ཛེ། ཤི་བེ་ཤཱནྟི་ཀ་རི་སྭཱ་ཧཱ། དེ་བཞིན་གཤེགས་པའི་རིགས་ལའོ། །ཨོཾ་ཡ་ཤོ་ཛེ་སྭཱ་ཧཱ། པདྨའི་རིགས་ལའོ། །ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཨོཾ་ཤི་ཁི་ཤི་ཁི་ནི་རྨ་ལེ་པྲ་བྷེ་པྲ་བྷེ་སྭ་རེ། ཏེ་ཛོ་ཏེ་ཛོ་བ་ཏི་སྭཱ་ཧཱ། རྡོ་རྗེའི་རིགས་ལའོ། །དམར་སེར་བ་ཡི་འོ་མ་དང༌། །བ་ཡི་ཞོ་དང་བ་ཡི་མར། །བ་ཡི་གཅིན་དང་ལྕི་བ་རྣམས། །སོ་སོར་མཐོང་དང་བསྔགས་པ་དང༌། །ཀུ་ཤ་ལན་བརྒྱར་བསྔགས་པ་ཡི། །ཀུ་ཤའི་ཆུ་དང་ལྡན་བྱས་ཏེ། །ཤར་དུ་མི་སྨྲ་ཙོག་ཙོག་པོར། །འདུག་སྟེ་འབྲིང་ལ་སྲང་གསུམ་ཙམ། །པ་ལ་ཤ་ཡི་ལོ་མར་བཏུང༌། །ཡང་ན་མཆོད་ཡོན་སྣོད་བཤད་པ། །གང་ཡང་རུང་བ་ཅིག་ཏུ་བཏུང༌། །འདི་ནི་དེ་ཡི་ཆོ་གར་བསྟན། །བཟླས་བརྗོད་ཀྱི་ཆོ་ག་འདི་དུས་མཚམས་སུ་བྱའི་དུས་མ་ཡིན་པར་མི་བྱའོ། །དེ་ལ་དུས་མཚམས་བསྟན་པ་ནི། ཉི་མའི་དཀྱིལ་འཁོར་ཕྱེད་ཤར་བ་ནས་སྐྱེས་བུ་གཅིག་གི་གྲིབ་མའི་བར་འདི་ནི་སྔ་དྲོའི་དུས་མཚམས་ཡིན་ནོ། །ཉི་མའི་གུང་ལ་ཆུ་ཚོད་བརྒྱད་དམ། །དགུའི་དུས་མཚམས་ཡིན་ནོ། །ཕྱི་དྲོ་སྐྱེས་བུ་གཅིག་གི་གྲིབ་མ་ལུས་པ་ནས་ཉི་མའི་དཀྱིལ་འཁོར་ཕྱེད་ནུབ་པའི་བར་དུ་ནི་ཕྱི་དྲོའི་དུས་མཚམས་ཡིན་ཏེ། འདི་དག་ནི་ཉིན་པར་གྱི་དུས་མཚམས་རྣམས་ཡིན་ནོ། །མཚན་མའི་དུས་བསྟན་པ་ནི། ཉི་མའི་དཀྱིལ་འཁོར་ཕྱེད་ནུབ་པ་ནས་སྲོད་ཕྱེད་ཀྱི་བར་དུ་ནི། སྲོད་ལ་བརྩམ་པའི་དུས་མཚམས་སོ། །ཐོ་རངས་ཀྱི་དུས་ཕྱེད་ནས་ནི། ཉི་མའི་དཀྱིལ་
འཁོར་ཕྱེད་ཤར་གྱི་བར་འདི་ནི་དུས་མཚམས་གཉིས་པ་ཡིན་ནོ། །ནམ་ཕྱེད་ནས་ནི་ཞི་བ་ལ་སོགས་མ་ཡིན་པར། །དྲག་ཤུལ་སྤྱོད་པའི་ལས་ཀུན་དང༌། །མི་སྣང་བ་ལ་སོགས་པ་དང༌། །དུར་ཁྲོད་ཀྱི་ནི་ལས་རྣམས་ལ། །རྟག་ཏུ་མཚན་མོ་བཟླས་པར་ཤིས། །ཞེས་བྱ་བ་ཕྱག་ན་རྡོ་རྗེས་གསུངས་སོ། །དེ་ལས་བཟློག་པ་ཉིད་ཀྱི་དུས་མཚམས་སུ། །བདག་ཉིད་ཞི་བ་ལ་སོགས་པའི་བཟླས་བརྗོད་བྱའོ། །ཟློས་པས་བཟླས་བརྗོད་ཟིན་པ་དང༌། །རིགས་ཀྱི་ཡུམ་དང་བདག་པོ་ལ། །ཉི་ཤུ་རྩ་གཅིག་བཟླས་བརྗོད་ནི། །བྱས་པས་རྟག་ཏུ་བསྲུང་བར་བྱ། །མདོར་ན་ཟློས་པ་པོ་དག་གིས། །བཟླས་བརྗོད་ཆོ་ག་གང་གསུངས་པའི། །ཆོ་ག་དེ་དག་ཉིད་ཀྱིས་ནི། །རིག་སྔགས་བརྟེན་ན་འགྲུབ་པར་འགྱུར། །ལེགས་པར་གྲུབ་པར་བྱེད་པའི་སྒྲུབ་པའི་ཐབས་བསྡུས་པ། བདེ་བར་གཤེགས་པའི་སྲས་པོ་སློབ་དཔོན་བྱང་ཆུབ་མཆོག་གིས་མཛད་པ་རྫོགས་སོ།། །།