སཱཙྪ་ལྔ་གདབ་པའི་ཆོ་ག།
༈། །སཱཙྪ་ལྔ་གདབ་པའི་ཆོ་ག་བཞུགས། དེ་ནས་ཁྲུས་བྱས་གོས་གཙང་བགོས། །སྤོས་ཀྱི་དཀྱིལ་འཁོར་གྲུ་བཞི་བྱ། །མཆོད་རྟེན་ལྔ་གདབ་གྲོ་ག་ལ། །འཁོར་ལོ་བྱ་རུ་རྫོགས་པར་བྱ། །བ་དན་གདུགས་དང་རྒྱལ་མཚན་སོགས། །མེ་ཏོག་ཕྲེང་བས་བརྒྱན་པ་ནི། །དབུས་དང་གྲྭ་ལ་བཞུགས་སུ་གསོལ། །བུམ་པ་གང་བ་བཞི་ལ་ནི། །བྱིན་གྱིས་བརླབས་ལ་ཕྱོགས་བཞིར་གཞག །རྨ་བྱའི་སྒྲོ་ལྔའི་མུ་མེན་དང༌། །སྤོས་ཀྱི་སྡོང་པོ་སྣོད་བཞི་ཡང༌། །གྲ་ལ་ལེགས་པར་གཞག་པར་བྱ། །མཆོད་ཡོན་སྤོས་དང་མེ་ཏོག་ཚོགས། །མར་མེ་དྲི་དང་ལྷ་བཤོས་དང༌། །རོལ་མོ་སྣ་ཚོགས་རེ་ག་བྱས་མཆོད། །ཨ་ལས་བྱུང་བའི་ངོ་མཚར་མཆོག །ཐུགས་ནི་ནམ་མཁའ་སངས་རྒྱས་ཉིད། །གཙུག་ཏོར་དྲི་མེད་སྙིང་པོའི་མཆོག་ཡིད་བཞིན་ནོར་བུ་ཁྱོད་ཕྱག་འཚལ། །ཤེས་རབ་མཆོག་གྱུར་འཇམ་པའི་མགོན། །ཨ་ལ་ལ་ཧོ་ངོ་བོའི་ཆོས། །ཡིད་བཞིན་ནོར་བུའི་མཆོག་འབྱུང་བ། །འཇམ་པའི་མགོན་ལ་ཕྱག་འཚལ་བསྟོད། །དེ་བཞིན་གཤེགས་པ་ཤཱཀྱ་ཐུབ། །ཐུགས་རྗེའི་མཆོག་ཏུ་གྱུར་པ་ནི། །ཡིད་བཞིན་ནོར་བུ་ལྟ་བུར་མཚུངས། །ཤཱཀྱ་ཐུབ་པར་ཕྱག་འཚལ་བསྟོད། །སྙིང་རྗེ་ཆེན་པོའི་མཆོག་གྱུར་པ། །དྲི་མེད་དག་པའི་སྙིང་པོའི་སྐུ། །འོད་ཟེར་འབར་བས་གསུང་དག་བ། །སྤྱན་རས་གཟིགས་ལ་ཕྱག་འཚལ་བསྟོད། །བདུད་རྣམས་འཇོམས་པའི་རྡོ་རྗེ་ཅན། །ཐུགས་ཀྱི་རྡོ་རྗེ་ཡིད་བཞིན་
ཚུལ། །ནད་རྣམས་སེལ་བ་སྨན་པའི་མཆོག །ཕྱག་ན་རྡོ་རྗེར་ཕྱག་འཚལ་བསྟོད། །སྡིག་བཤགས་བསོད་ནམས་རྗེས་ཡི་རང༌། །འཁོར་ལོ་བསྐོར་དང་མྱང་མི་འདའ། །བསྔོ་དང་གསོལ་གདབ་འདོད་དོན་ཞུ། །གང་འདོད་པ་ཡི་ལས་ལ་འཇུག །རྒྱུན་དང་ནར་མར་ཚོགས་བསག་བྱ། དཱི་པཾ་ཀ་ར་ཤྲཱི་ཛྙཱ་ནས་མཛད་པ་རྫོགས་སོ།། །།དང་པོར་སེམས་བསྐྱེད་ལ་གང་ལ་དམིགས་པའི་བསམ་རྒྱུད་དང་བཅས་པར་བྱའོ། །དང་པོར་བླ་མ་སངས་རྒྱས་བྱང་ཆུབ་སེམས་དཔའ་རྣམས་དང༌། གཙུག་ཏོར་དྲི་མ་མེད་པ་ལ་སོགས་པ་མདུན་གྱི་ནམ་མཁའ་ལ་བཞུགས་པར་བསམས་ལ། མཆོད་པ་རྒྱ་ཆེན་པོ་དངོས་སུ་དབུལ་ལོ། །དེ་རྣམས་ཀྱིས་ཀྱང་བདག་དང་བུམ་པ་ནད་པའམ་གང་ལ་སྒྲུབ་པར་བྱེད་པ་དེ་ལ་བྱིན་གྱིས་རློབ་པར་གསོལ་བ་གདབ་པས་བྱིན་གྱིས་རློབ་པར་བསམ་མོ། །བུམ་པ་ཁ་རྒྱན་དང་བཅས་པ་དེ་ལ་རང་ཡང་ཁྲུས་བྱ། གསོ་སྦྱོང་ལ་སོགས་པ་གཙང་མར་བྱས་ལ་གཟུངས་ཚར་བརྒྱ་རྩ་བརྒྱད་བཟླས་སོ། །དེ་ནས་གང་ལ་དམིགས་པ་དེ་ལ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབ་པར་བསམས་ལ་ཁྲུས་བྱའོ། །བསམ་རྒྱུད་དང་བཅས་པས་སོ།།