གཏོར་མའི་ཆོ་ག།
ཙནྡྲགོམིན།
གཏོར་མ་གཏང་བར་འདོད་པས། སྣོད་གཙང་ཞིང་མཛེས་པ་ཡིད་དུ་འོང་བའི་ནང་དུ་ཟན་དང༌། ཁུར་བ་དང༌། ཆན་དང༌། འབྲུའི་ཚོགས་དང༌། ཤིང་ཐོག་དང༌། རིན་པོ་ཆེའི་ཚོགས་དང༌། སྨན་དང་ལྡན་པར་བྱ་སྟེ། དེ་ནས་བདག་ཉིད་ལྷའི་རྣལ་འབྱོར་པས་ཨ་ཀཱ་རོས་སྦྱངས་ཏེ། ནམ་མཁའ་མཛོད་ཀྱིས་སྤེལ་ལ། བདུད་རྩིའི་རྒྱ་མཚོར་བསམས་ཏེ། དེའི་ཕྱོགས་རྣམས་སུ་ཧྲཱིཿལས་པདྨའི་ཚོགས་བསྐྱེད་པ་ལ་ཕྱོགས་སྐྱོང་བ་བཅུ་ལ་སོགས་པ་ཆོས་ཀྱི་སྲུང་མ་དང༌། ཁྱད་པར་དུ་ཚངས་པ་དང༌། དབང་པོ་དང་ལེགས་ལྡན་ལ་སོགས་འཁོར་དང་བཅས་པ་སྤྱན་དྲངས་བར་བྱའོ། །ཡང་འབྱུང་པོའི་གཏོར་མ་གཉིས་པ་ལ་ལྷའི་གདོན་ལ་སོགས་པ་དང༌། ཟས་སུ་མདངས་ཟ་བ་ཀུན་ལ་སྦྱིན་པར་བྱའོ། །དེ་ཡང་ལྕེ་རྡོ་རྗེར་བསམ་ཞིང༌། སྤུ་གུས་བདུད་རྩི་ཐམས་ཅད་ངོམས་ཤིང་ཚིམ་པར་བྱ་བ་དང༌། འདོད་པའི་ཡོན་ཏན་ལྔ་ཆར་བཞིན་དུ་འབྱུང་བར་བསམ་མོ། །དེ་ནས་ཐ་མར་བཟོད་པར་གསོལ་ཏེ། གསོལ་བ་བཏབ་ནས་ཡི་གེ་བརྒྱ་པ་བརྗོད་དོ། །ཐམས་ཅད་གཤེགས་སོ། །དེ་ཡང་འབྱུང་པོའི་གཏོར་མ་ནི་མངལ་དང༌། ཁྲག་དང༌། ཞག་དང༌། ཤ་དང༌། ཚིལ་དང༌། རྐང་དང༌། བཙས་པ་ཟ་བ་ལ་སོགས་པ་ལ་སྦྱིན་ནོ། །དེ་ཡང༌། འབྱུང་པོ་གང་དག་རི་རབ་སྟེང་གནས་དང༌། གཟུངས་ཀྱི་ལྷའི་གདོན་དང༌། བྱ་བ་ནས་ཟས་སུ་མངལ་ཟ་བ་ཀུན་གྱིས་སྦྱིན་ནོ། །གཏོར་མའི་ཆོ་ག་རྫོགས་སོ།། །།པཎྜི་ཏ་མ་ཧཱ་ཛ་ན་ཉིད་ཀྱི་རང་འགྱུར་ཡིན་གསུང༌།།