གཙུག་ཏོར་ནས་བྱུང་བའི་གདུགས་དཀར་མོ་ཅན་གྱི་ཆོ་ག་ཞེས་བྱ་བ།
རྒྱ་གར་སྐད་དུ། ཨུཥྞཱི་ཥ་བྷ་བ་སི་ཏཱ་ཏ་པ་ཏྲེ་བི་དྷི་ནཱ་མ། བོད་སྐད་དུ། གཙུག་ཏོར་ནས་བྱུང་བའི་གདུགས་དཀར་མོ་ཅན་གྱི་ཆོ་ག་ཞེས་བྱ་བ། རྗེ་བཙུན་ཕྱག་ན་རྡོ་རྗེ་ལ་ཕྱག་འཚལ་ལོ། །རྣམ་སྣང་མཛད་རིགས་གཙུག་ཏོར་གྲགས། །ཕྱག་སྟོང་སྤྱན་སྟོང་ཞབས་བཏུད་ནས། །གཟུངས་ཀྱི་རིམ་པ་ལས་བྱུང་བའི། །དཀྱིལ་འཁོར་ཆོ་ག་བཤད་པར་བྱ། །ཆུ་ཀླུང་ངམ། ནགས་ཚལ་ལམ། ཆུ་བོའི་འགྲམ་མམ། རིའི་སུལ་ལམ། ཕུག་གམ། ཡིད་དང་མཐུན་པའི་ཡུལ་དབེན་པ་བས་མཐའི་དགོན་པར། སློབ་དཔོན་གཙུག་ལག་མཁས་པ་ཆོས་ལ་དགའ་བ་བསླབ་པ་བསྲུང་བ་འགྲོགས་ན་བདེ་བ། སྙིང་རྗེ་ཅན་གྱི་དཀྱིལ་འཁོར་དུ་དབང་བསྐུར་བ་ཐོབ་པ་དཀྱིལ་འཁོར་ལ་སོགས་པའི་ལས་ལ་མཁས་པ་རྨི་ལམ་དུ་རྟགས་དང་མཚན་མ་ཐོབ་པ། སྒྲུབ་པའི་གྲོགས་པོ་རིགས་བཙུན་པ་ཆོས་སྤྱོད་པ་དད་པ་ཅན་སྙིང་སྟོབས་ཆེ་ཞིང་བརྩོན་འགྲུས་ཅན། བསམ་པ་བཟང་ཞིང་མི་སྐྱོ་བ་གཞན་གྱིས་བྲིད་ཀྱང་འཕགས་པའི་ཚུལ་མི་གཏོང་བའི་གྲོགས་དང་ལྷན་ཅིག་ཏུ་སྟན་བདེ་བ་ལ་འདུག་སྟེ། སྒྲུབ་པའི་ཡན་ལག་ནི་རྫས་མེ་ཏོག་དཀར་པོ་དྲི་ཞིམ་པ་དང༌། རྩ་བ་དང་སྡོང་བུ་ལ་སོགས་པ་སྦྱར་བའི་སྤོས་དཀར་པོ་དང༌། ཙནྡན་དཀར་པོའི་དྲི་དང༌། འབྲས་དཀར་གྱི་བཤོས་དང༌། ལུག་ལ་སོགས་པ་དཀར་བ་ལས་བྱུང་བ་མར་གྱི་མར་མེ་དང༌། འབྲས་ཡོས་དང༌། ཙནྡན་དཀར་པོ་དང༌། མེ་ཏོག་དཀར་པོ་དང་ལྡན་པའི་ཨརྒྷཾ་དང༌། གཙུག་ཏོར་དཀར་མོའི་ཉེ་བའི་སྙིང་པོ་བཟླས་པའི་ཁྲུས་བྱས་ལ། སྙིང་པོའི་སྔགས་བཟླས་ཏེ། སྟོད་གཡོགས་དང་སྨད་གཡོགས་དཀར་པོ་བགོས་ནས། གཙུག་ཏོར་ནས་བྱུང་བ་བཞིན་ཚོགས་གསོག་པའི་ལྷ་མདུན་དུ་སྤྱན་དྲངས་ལ། བདུན་རྣམ་དག་བྱས་ཏེ། གཙུག་ཏོར་ནས་བྱུང་བ་བཞིན་དུ་ཁྲོ་མོ་བཅུ་བདུན་བསྒོམས་ལ་སྔགས་བཅུ་གསུམ་བརྗོད་ནས་ཐུགས་ཀའི་འོད་ཟེར་ལས་ར་བ་དང་དྲ་བ་དང༌། བླ་རེ་དང་མེ་འོད་རྣམས་བྱུང་སྟེ་བསྲུང་བར་བསམ་པར་བྱའོ། །དེ་ནས་རང་གི་སྙིང་གར་ཡི་གེ་ཧཱུཾ་བཀོད་ནས་ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་དབྱངས་ཡིག་བཅུ་དྲུག་ལས་ཟླ་བའི་དཀྱིལ་འཁོར་བསྐྱེད་ལ། དེའི་སྟེང་དུ་ཡི་གེ་ཧཱུཾ་བསམ་མོ། །དེ་ཡོངས་སུ་གྱུར་པ་ལས་རྡོ་རྗེ་དཀར་པོ་
རྩེ་དགུ་བ་བསམ་མོ། །དེ་ནས་འོད་ཟེར་སྥ་ར་ཎ་ཧཱུཾ་ཞེས་པས་སྤྲོ་བ་དང༌། སཾ་ཧ་ར་ན་ཧཱུཾ་ཞེས་པས་བསྡུས་ནས། བདག་ཉིད་བཅོམ་ལྡན་འདས་ཕྱག་ན་རྡོ་རྗེ་རྡོ་རྗེ་དང་ཞགས་པ་བསྣམས་པ། བགེགས་ཀྱི་རྒྱལ་པོ་བི་ནཱ་ཡ་ཀ་གདན་དུ་བཏིང་བ། སྐུ་མདོག་སྔོན་པོ་སངས་རྒྱས་ལྔའི་ཅོད་པན་ཅན། རྡོ་རྗེའི་རྒྱན་གྱེས་བརྒྱན་པ་མེའི་ཕུང་པོའི་དབུས་ན་བཞུགས་པར་བསམས་ལ། དེའི་སྙིང་ག་ནས་ཉེ་བའི་སྙིང་པོའི་སྔགས་བརྗོད་པས་ཤར་ལ་སོགས་པ་མེ་འབར་མ་ལ་སོགས་པའི་ཁྲོ་མོ་བརྒྱད་སྦྲུལ་པ་ཧཱུཾ་དྲུཾ་ཧྲཱིཿཥྚོཾ་གྱིས་བདག་དང་ཁྲོ་མོ་བརྒྱད་བྱིན་གྱིས་བརླབས་ལ་སྙིང་པོ་དང་ཉེ་བའི་སྙིང་པོ་བཟླས་ནས། དེའི་མདུན་དུ་གདུག་པ་ཅན་ཐམས་ཅད་ཚར་གཅོད་པའི་དཀྱིལ་འཁོར་དབུ་སྟོང་མངའ་བ། ཕྱག་སྟོང་མངའ་བ། སྤྱན་བྱེ་བ་བརྒྱ་སྟོང་མངའ་བ། མི་བྱེད་འབར་བའི་མཚན་རྟགས་ཅན་འགྲེལ་པ་ནས་འབྱུང་བ་བཞིན་བསྒོམས་ལ། མཆོད་པས་མཆོད་པ་དང༌། གཙུག་ཏོར་དཀར་མོའི་གཟུངས་ཀྱིས་བསྟོད་པ་དང༌། བདག་དང་མཐའ་ཡས་པའི་སེམས་ཅན་ཐམས་ཅད་སྲུང་དུ་གསོལ་ཞེས་ཕྲིན་ལས་བཅོལ་ལ། སྙིང་པོའི་དཀྱིལ་འཁོར་ཕྱོགས་སྐྱོང་བ་བཅུས་བསྐོར་བར་བསམས་ལ། གཏོར་མ་བཅུ་དབུལ་བ་དང༌། གདོན་ཐམས་ཅད་ལ་གཏོར་མ་གསུམ་མཁའ་སྤྱོད་དང༌། ས་སྤྱོད་དང་ས་འོག་ན་སྤྱོད་པའི་དབྱེ་བས་ཕྱེ་བ་ལ་མཆོད་པ་ཕུལ་ནས་གཟུངས་ནས་འབྱུང་བ་བཞིན་དུ་ཕྲིན་ལས་བཅོལ་ལ་གཤེགས་སུ་གསོལ་བར་བསམ་པར་བྱའོ། །དེ་ནས་ཉེ་བའི་སྙིང་པོའི་འཁྲུལ་འཁོར་བྲིས་ལ་རྒྱལ་རིགས་ལ་སོགས་པ་ལ་གདགས་སོ། །ཡང་ན་རྒྱལ་མཚན་གྱི་རྩེ་མོ་ལ་བཏགས་ནས་གྲོང་དམ་གྲོང་ཁྱེར་རམ། གྲོང་རྡལ་གྱི་སྒོར་བཙུགས་ཏེ། ཀློག་པ་བཞི་ཕྱོགས་བཞིར་བཞག་ལ་མཆོད་པ་ཆེན་པོ་བྱས་ལ། བསྐོར་བ་བརྒྱ་རྩ་བརྒྱད་བྱ་བའམ། ཡང་ན་རྒྱལ་མཚན་གྱི་རྩེ་མོ་ལ་བཏགས་ནས་གྲོང་ངམ་གྲོང་ཁྱེར་རམ་གྲོང་རྡལ་ལ། བསྐོར་བ་བྱའོ། །ལས་འདི་ཐམས་ཅད་ལ་སྙིང་བོ་དང་ཉེ་བའི་སྙིང་པོ་འབུམ་སྔོན་དུ་བཟླས་ཏེ། གཟུངས་བརྒྱ་རྩ་བརྒྱད་བཟླས་ལ་ཚོན་དཀར་པོས་དཀྱིལ་འཁོར་བྲིས་ཏེ། མཆོད་ནས་ལས་ཐམས་ཅད་ཤེས་པར་བྱའོ། །གཙུག་ཏོར་ནས་བྱུང་བ་གདུགས་དཀར་མོ་ཅན་གྱི་གཟུངས་འདོན་པའི་ཆོ་ག །སློབ་དཔོན་ཤཱུ་རཾ་ག་བརྨ་བཛྲས་མཛད་པ་རྫོགས་སོ།། །།ཟངས་དཀར་འཕགས་བ་ཤེས་རབ་ཀྱིས་བསྒྱུར་བའོ།།