གཟུངས་ཐམས་ཅད་ཀྱི་སྒྲུབ་ཐབས་རིམ་པ་གཉིས་པ་ཞེས་བྱ་བ།
རྒྱ་གར་སྐད་དུ། དྷཱ་ར་ཎཱི་སརྦ་སཱ་དྷ་ན་ཀྲ་མ་དྭ་ཡ་ནཱ་མ། བོད་སྐད་དུ། གཟུངས་ཐམས་ཅད་ཀྱི་སྒྲུབ་ཐབས་རིམ་པ་གཉིས་པ་ཞེས་བྱ་བ། སྒོ་དྲུག་ཞི་ཁྲོའི་ལྷ་ཚོགས་ལ། །ཀུན་ནས་དང་བས་ཕྱག་འཚལ་ཏེ། །སཉྩ་ལ་སོགས་དོན་དུ་ནི། །དུ་མ་གཟུངས་ཀྱི་སྒྲུབས་ཐབས་ནི། །སྤྱི་དང་བྱེ་བྲག་ལྡན་ཚུལ་གྱིས། །དེ་ནི་ང་ཡིས་བསྟན་ཏེ་བྲི། །ཉམས་དགའ་བདེ་བའི་གནས་སུ་ནི། །སྤྱོད་གཉིས་ལྡན་པའི་རྣལ་འབྱོར་པས། །དཀྱིལ་འཁོར་ཆེན་པོ་བཤམ་པར་བྱ། །རས་རིས་མཆོད་པ་བཤམ་པར་བྱ། །བདེ་བའི་སྟན་ལ་འདུག་བྱས་ཏེ། །སྙིང་གར་ཟླ་དཀྱིལ་ཧཱུཾ་བསམས་ཏེ། །དེ་ཡི་འོད་ཀྱིས་ཕྱོགས་བཅུ་ཡི། །སངས་རྒྱས་འཁོར་བཅས་མདུན་དུ་དགུག །བདུན་པོ་རྣམ་དག་རྫོགས་པར་བྱ། །དེ་རྗེས་སྟོང་པའི་ངང་ལ་གནས། །ཡཾ་དང་བཾ་དང་ལཾ་ལས་ནི། །རླུང་མཚོ་རིན་ཆེན་ས་གཞི་བསམ། །དེ་སྟེང་བྷྲཱུཾ་ཞུ་གཞལ་ཡས་ཁང༌། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་མཛེས་པ། །འཁོར་ལོ་པདྨ་འདབ་བརྒྱད་བསམ། །ཕོ་བྲང་དབུས་ཀྱི་ལྟེ་བ་ལ། །རང་གི་ཡི་དམ་ཨོཾ་དུ་བསམ། །དེ་ལས་འོད་འཕྲོས་ལས་གཉིས་བྱས། །སླར་འདུས་གསེར་གྱི་པུ་སྟིར་བསམ། །ཡང་འཕྲོས་སླར་འདུས་ཐིམ་གྱུར་པས། །གཙོ་ཆེན་ཕ་རོལ་ཕྱིན་མ་དེ། །གསེར་འོད་སྐྱིལ་ཀྲུང་འཁོར་ལོ་དང༌། །མེ་ཏོག་པུསྟི་མཉམ་གཞག་གོ །དེ་ནས་ཞི་བའི་ལྷ་གནས་སུ། །པཾ་ལས་པདྨའི་གདན་དུ་བསམ། །ཁྲོ་བོ་ཡི་ནི་གནས་རྣམས་སུ། །མ་དང་ཨ་དང་པཾ་ལས་ནི། །ཉི་ཟླ་པདྨའི་གདན་དུ་བསམ། །གཙོ་བོའི་ཐུགས་ལས་འོད་ཟེར་འཕྲོས། །ལས་གཉིས་བྱས་ཏེ་ལྷ་གནས་སུ། །ཨཱཿདང་ཨོཾ་དང་ཧྲཱིཿདང་ཨ། །དཀར་སེར་དམར་ལྗང་ཞི་གནས་སུ། །ཧཱུཾ་ནི་མཐིང་ནག་འཕྲོས་ནས་སུ། །དེ་དག་ལ་ཡང་འོད་འཕྲོས་པས། །ལས་གཉིས་བྱས་ཏེ་སླར་འདུས་པས། །སོ་སོའི་མཚན་མར་བསྒོམ་པར་བྱ། །དེ་ལས་ཀྱང་ནི་འོད་འཕྲོས་པས། །སླར་འདུས་དེ་ཉིད་ལ་ཐིམ་པས།། སོ་སོའི་སྐུ་རུ་བསྒོམ་བྱ་སྟེ། །དབུས་ཀྱི་འདབ་མ་རྣམས་ལ་ནི། །ཡེ་ཤེས་དབང་བསྐུར་ལྡན་མ་དང༌། །རྡོ་རྗེ་དབྱིངས་ཀྱི་དབང་ཕྱུག་མ། །རྡོ་རྗེ་མི་ཕམ་སོ་སོར་འབྲང༌། །སྡིག་པ་སྤོང་བ་གདུགས་དཀར་མོ། །བདུད་འཇོམས་སྒོ་མཐའ་སྒྲུབ་པ་སྟེ། །ཀུན་ཀྱང་སྐུ་མདོག་གསེར་འོད་ལ། །
ཞལ་གཅིག་ཕྱག་གཉིས་བདག་ཉིད་ཅན། །གཡས་ན་རལ་གྲི་གཡོན་མེ་ཏོག །ཀུན་ཀྱང་དེ་ཐོགས་ཞི་འཛུམ་ཅན། །རིན་ཆེན་རྒྱན་ཀླུབས་བསམ་པར་བྱ། །ཤར་གྱི་པདྨའི་ལྟེ་བ་ལ། །གསེར་མདོག་ཤཱཀྱ་སེང་གེ་སྟེ། །སྐྱིལ་ཀྲུང་འཁོར་ལོ་བསྣམས་པར་བསམ། །དེ་ཡི་ཕྱོགས་ཀྱི་འདབ་མ་ལ། །སྤྱན་རས་གཟིགས་དང་བྱམས་པ་དང༌། །ནམ་མཁའི་སྙིང་པོ་ཀུན་ཏུ་བཟང༌། །ལག་ན་རྡོ་རྗེ་འཇམ་པའི་དཔལ། །སྒྲིབ་པ་སེལ་དང་ས་ཡི་སྙིང༌། །དཀར་སེར་མཐིང་སེར་ཡང་མཐིང་སེར། །ལྗང་གུ་སྔོན་པོ་མདོག་ཡིན་ནོ། །ཀུན་ཀྱང་རྒྱན་ཀླུབས་མེ་ཏོག་བསྣམས། །འཛུམ་བག་བཞིན་རྒྱས་བསམ་པར་བྱ། །ལྷོ་ཡི་པདྨའི་ལྟེ་བ་ལ། །རིག་པའི་རྒྱལ་མོ་རྨ་བྱ་ཅན། །མཐིང་གཞལ་གསུམ་ཕྱག་དྲུག་མ། །རྨ་བྱའི་མཇུག་སྒོ་མདའ་དང་ནི། །མཆོག་སྦྱིན་རྣམས་ནི་གོ་རིམས་གཡས། །རིན་ཆེན་གཞུ་དང་རྔ་ཡབ་བསྣམས། །གོ་རིམས་བཞིན་དུ་གཡོན་ནའོ།། སྣ་ཚོགས་རྒྱན་དང་གོས་འཆང་བའོ། །དེ་ཡི་ཕྱོགས་ཀྱི་འདབ་མ་ལ། །དང་པོའི་འདབ་མ་སྟོང་ཆེན་མོ། །ཞལ་གཅིག་ཕྱག་དྲུག་དཀར་མོ་སྟེ། །རལ་གྲི་མདའ་དང་མཆོག་སྦྱིན་རྣམས། །གོ་རིམས་བཞིན་དུ་གཡས་ནའོ། །ཞགས་པ་གཞུ་དང་དགྲ་སྟ་བསྣམས། །གོ་རིམས་བཞིན་དུ་གཡོན་ནའོ། །གཉིས་པ་སོ་སོར་འབྲང་མ་སྟེ། །ཞལ་བཞི་མ་ལ་ཕྱག་བརྒྱད་མ། །པདྨ་དང་རྒྱན་རྩེ་གསུམ་དང༌། །འདབ་བརྒྱད་དགྲ་སྟ་བཅས་པ་ལ། །རལ་གྲི་པདྨར་བཅས་པ་དང༌། །པདྨ་དུང་དང་བཅས་པའོ། །དང་པོ་གཉིས་གཡས་ཐ་མ་གཡོན། །གསུམ་པ་བསིལ་ཚལ་མདོག་དམར་པོ། །ཞལ་གཅིག་ཕྱག་བཞིའི་བདག་ཉིད་ཅན། །ཕྲེང་བ་མཆོག་སྦྱིན་གཡས་ནའོ། །རྡོ་རྗེ་ལྕགས་ཀྱུ་གཡོན་ནའོ། །བཞི་པ་གསང་སྔགས་རྗེས་འཛིན་མ། །ལྗང་གུ་ཞལ་གཅིག་ཕྱག་བཞི་མ། །རྡོ་རྗེ་མཆོག་སྦྱིན་གཡས་ནའོ། །དགྲ་སྟ་ཞགས་པ་གཡོན་ནའོ།། ཀུན་ཀྱང་སྣ་ཚོགས་རྒྱན་བརྒྱན་བསམ། །དེ་དག་བར་གྱི་འདབ་མ་ལ། །ཡུལ་འཁོར་སྲུང་དང་འཕགས་སྐྱེས་པོ། །མིག་མི་བཟང་དང་རྣམ་ཐོས་སྲས། །དཔའ་བོ་ཡི་ནི་ཆ་ལུགས་ལ། །པི་ཝང་རལ་གྲི་སྦྲུལ་ཞགས་དང༌། །མཆོད་རྟེན་ཕྱག་ན་བསྣམས་པའོ། །ནུབ་ཀྱི་པདྨའི་ལྟེ་བ་ལ། །
མགོན་པོ་བདེ་གཤེགས་ཚེ་དཔག་མེད། །སྐུ་མདོག་དམར་པོ་ཏིང་འཛིན་རྒྱ། །དེ་ཡི་ཕྱོགས་ཀྱི་འདབ་མ་ལ། །འཁོར་ལོས་སྒྱུར་རྒྱལ་བཟང་པོ་མཆོག །གཟི་བརྗིད་ཅན་དང་ཟླ་བ་དང༌། །སྙན་པ་དྲི་མེད་བཟང་པོ་ཏོག །བཀོད་པ་ཆེན་པོ་སྤྱན་རས་གཟིགས། །མཐུ་ཆེན་ཐོང་སྟེ་དེ་དག་ཀྱང༌། །ཀུན་ཀྱང་དཀར་སེར་མེ་ཏོག་བསྣམས། །ཞི་བ་འཛུམ་བག་བསམ་པར་བྱ། །བྱང་གི་པདྨའི་ལྟེ་པ་ལ། །ཆོས་ཡུམ་དམར་སེར་པུ་སྟི་གསུམ། །མེ་ཏོག་སྟོང་ཐོགས་འཛུམ་བག་ཅན། །རྒྱན་ལྡན་པ་ནི་བསམ་པར་བྱ། །དེ་ཡི་ཕྱོགས་ཀྱི་འདབ་མ་ལ། །གདུགས་དཀར་རྣམ་རྒྱལ་གཙུག་གི་ནོར། །དྲི་མ་མེད་པའི་གཙུག་ཏོར་ཏེ། །དཀར་དང་སྔོ་བསངས་དམར་སེར་མདོག །གདུགས་དང་རྒྱལ་མཚན་རལ་གྲི་དང༌། །རིན་ཆེན་བསྣམས་ཏེ་འཛུམ་བག་ཅན། །དེ་ཡི་བར་གྱི་འདབ་མ་ལ། །འོད་ཟེར་ཅན་དང་པརྞ་དང༌། །རི་ཁྲོད་ལོ་གྱོན་དཔལ་ལུང་བསྟན། །མཐིང་ག་གཅིག་དང་གཞན་རྣམས་སེར། །ཕྱག་བཞི་དཱུཪྺ་ལྟར་སྔོ་གཅིག །དེ་ཡི་ཕྱག་མཚན་གྱུར་པ་ནི། །མཆོག་སྦྱིན་འབྲས་བུ་དགྲ་སྟ་བསྣམས། །ཞགས་པ་དབྱུག་ཏོ་གཡོན་ནའོ། །རི་ཁྲོད་ལོ་གྱོན་དགྲ་སྟའོ། །འོད་ཟེར་མྱ་ངན་མེད་ཤིང་བསྣམས། །མེ་ཏོག་བསྣམས་པ་ཁྲོ་འཛུམ་བསམ། །བྱང་ཤར་པདྨའི་ལྟེ་བ་ལ། །བདེ་གཤེགས་ཙནྡན་ཡན་ལག་སེར། །ཞི་དེས་ཙནྡན་བསྣམས་པར་བསམ། །དེ་ཡི་ཕྱོགས་ཀྱི་འདབ་མ་ལ། །བློ་ཡངས་འབྲུག་སྒྲོགས་སྒྲིབ་པ་སེལ། །ཡོན་ཏན་འབྱུང་གནས་འོད་དཔག་མེད། །ཀུན་ནས་སྤོས་མཆོག་རྒྱལ་མཚན་རྩལ། །ང་རྒྱལ་གནོན་དང་རྒྱ་མཚོ་དབྱངས། །ཀུན་ཀྱང་དམར་སེར་ཞི་ཚུལ་ལ། །ས་གནོན་པ་ཡི་ཕྱག་རྒྱའོ། །ཤར་ལྷོ་པདྨའི་ལྟེ་བ་ལ། །བདེ་བར་གཤེགས་པ་སྒྲོན་མ་མཆོག །ལྗང་གུ་འཛུམ་བག་ས་གནོན་བསམ། །དེ་ཡི་ཕྱོགས་ཀྱི་པདྨ་ལ། །སེམས་དཔའ་འོད་ཆེན་འོད་དཔག་མེད། །མི་ཕམ་པ་དང་འཇམ་དཔལ་དང༌། །དྲི་མ་མེད་དང་རྡོ་རྗེ་སྙིང༌། །རྒྱལ་བ་ཅན་དང་མཚན་མོ་བཟང༌། །ཀུན་ཀྱང་དམར་སེར་མེ་ཏོག་འཛུམ། །ལྷོ་ནུབ་པདྨའི་ལྟེ་བ་ལ། །མཁའ་ལྡིང་གསེར་གྱི་འདབ་མ་ཅན། །རྡོ་རྗེའི་མཆུ་ལ་ལུས་འབར་བ། །ཁྲོ་བོ་འཇིགས་
རུང་རྩལ་ཅན་ལ། །རྒྱན་བརྒྱན་ཀླུ་ལ་སྟན་བྱས་བསམ། །དེ་ཡི་ཕྱོགས་ཀྱི་འདབ་མ་ལ། །སྦས་པ་རྡོ་རྗེ་ཀུན་འབར་གློག །འབར་བའི་གཟི་བརྗིད་གནམ་ལྕགས་མཆུ། །དཀར་དམར་སེར་དང་སྔོན་པོ་སྟེ། །སྦྲུལ་ཟན་བཞི་ནི་བསམ་པར་བྱ། །དེ་ཡི་བར་གྱི་འདབ་མ་ལ། །ཁྱབ་འཇུག་ཚངས་པ་དབང་ཕྱུག་དང༌། །དྲང་སྲོང་རི་བྱི་བསམ་པར་བྱ། །ནུབ་བྱང་པདྨའི་ལྟེ་བ་ལ། །མགོན་པོ་སྤྱན་རས་གཟིགས་ཡུམ་ནི། །དཀར་འཛུམ་མེ་ཏོག་བསྣམས་པ་བསམ། །དེ་ཡི་ཕྱོགས་ཀྱི་འདབ་མ་ལ། །སྤྱན་རས་གཟིགས་དབང་བཅུ་གཅིག་ཞལ། །ཕྱག་དྲུག་ཕྱག་མཚན་བསྣམས་པ་བསམ། །གཞན་གྱིས་མི་ཐུབ་རིན་ཆེན་ཕྲེང༌། །སྟོབས་ཆེན་དང་ནི་མདངས་ཕྱིར་འཕྲོག །ཀུན་ཀྱང་མདོག་དཀར་རིན་ཆེན་ཕྲེང༌། །འཁོར་ལོ་ལྕགས་ཀྱུ་བསྣམས་པའོ། །དེ་ཡི་བར་གྱི་འདབ་མ་ལ། །གསེར་ཅན་དང་ནི་རྣམ་རྒྱལ་ཅན། །འགྲོ་ལྡིང་པ་དང་དབྱིག་དང་ལྡན། །སེར་དང་དཀར་དང་མཐིང་ལྗང་ངོ༌། །ཀུན་ཀྱང་ཁྲོ་འཛུམ་འཁོར་ལོ་བསྣམས། །བཅུ་དྲུག་པ་ཡི་འདབ་མ་ལ། །རྣམ་པར་གཟིགས་དང་ཐམས་ཅད་སྐྱོབ། །ལོག་པར་དད་སེལ་གསེར་ཐུབ་དང༌། །འོད་སྲུངས་དང་ནི་མར་མེ་མཛད། །ཀུན་ཀྱང་ཞི་ཚུལ་ས་གནོན་རྒྱ། །ཡོངས་གྲགས་དཔལ་དང་རིན་ཆེན་ཟླ། །གསེར་བཟངས་དྲི་མེད་མྱ་ངན་མེད། །ཆོས་བསྒྲགས་རྒྱ་མཚོ་ཆོས་རྒྱ་མཚོ། །བཻ་ཌཱུར་འོད་ཀྱི་རྒྱལ་པོ་སྟེ། །ཀུན་ཀྱང་ནམ་མཁའི་མདོག་ལྟ་ལ། །སྨན་མཆོག་ཨ་རུ་བསྣམས་པའོ། །མི་འཁྲུགས་པ་དང་འོད་སྟོང་འབར། །སྣང་བ་མཐའ་ཡས་དེ་བསམ་བྱ། །སེར་སྔོ་དམར་པའི་མདོག་ཡིན་ནོ། །ཀུན་ཀྱང་ཏིང་འཛིན་ཕྱག་རྒྱའོ། །སུམ་ཅུ་རྩ་གཉིས་རྩིབས་ལ་ནི། །ལག་ན་རྡོ་རྗེ་རྣམ་འཇོམས་དང༌། །མེ་ལྟར་རྨོངས་བྱེད་བེ་ཅོན་དང༌། །ཀུན་ཀྱང་མཐིང་ག་ཁྲོ་བོའི་ཆ། །རྡོ་རྗེ་བེ་ཅོན་བསྣམས་པའོ། །གཞོན་ནུ་བསོད་ནམས་རྒྱལ་མཚན་ནི། །ཨེ་ནའི་ལྤགས་གྱོན་སྦྲུལ་གྱིས་བརྒྱན། །དུག་གི་མེ་ཏོག་ཐོགས་པའོ། །ཁྲོ་བོ་མེ་ཡི་ཁ་ལ་ནི། །མཐིང་ག་མེ་དཔུང་ལག་ན་ཐོགས། །ཚོགས་བདག་དཀར་པོ་ལྕགས་ཀྱུ་བསྣམས། །རྣམ་རྒྱལ་དབྱུག་པ་སྔོན་པོ་དང༌། །གཤིན་རྗེ་གཤེད་དང་མི་གཡོ་མགོན། །རྟ་མགྲིན་གཞན་
གྱིས་མི་ཐུབ་དང༌། །བདུད་རྩི་འཁྱིལ་དང་ཁམས་གསུམ་རྒྱལ། །ཀུན་ཀྱང་ཁྲོ་བོའི་ཚུལ་ཅན་ལ། །མཐིང་ག་རྡོ་རྗེ་བསྣམས་པ་བསམ། །ཕྱོགས་མཚམས་འཁོར་ལོའི་རྩིབས་ལའོ། །ཧཱུཾ་ཀཱ་ར་དང་སྟོབས་པོ་ཆེ། །ཆ་ལུགས་གོང་དང་མཐུན་ཚུལ་ལ། །འཁོར་ལོ་གཉིས་ཀྱི་རྩིབས་ལ་བསམ། །རྒྱལ་བ་ཁྱུ་མཆོག་འབྲོག་གནས་དང༌། །གངས་གནས་ལྔ་རྩེ་ན་ནོར་བཟངས་དང༌། །གང་བཟངས་དང་ནི་གྲགས་བཟངས་དང༌། །ས་མཛེས་དང་ནི་ཕྲེང་མཛེས་དང༌། །ཀུན་ཀྱང་ཁྲོ་ཚུལ་གནས་སེར་ལ། །ཐམས་ཅད་དབྱུག་ཏོ་བསྣམས་པའོ། །ནག་པོ་ཆེ་དང་ལྷ་མོ་ནག །དབྱུག་ཏོ་ཞགས་པ་ཐོགས་པ་ལ། །ཁྲོ་བོའི་གཟུགས་ཅན་བསམ་པར་བྱ། །རྡོ་རྗེ་འཆང་ནི་གཏུམ་མོ་དང༌། །རྡོ་རྗེ་ཁྲོ་མོ་ཕོ་ཉ་མོ། །ཁྲོ་བོ་རྡོ་རྗེ་ལུ་གུ་རྒྱུད། །རིག་སྔགས་ཁྲོ་བོ་རྒྱལ་བ་ཅན། །ཀུན་ཀྱང་མཐིང་ག་ཁྲོ་ཚུལ་ཅན། །རྡོ་རྗེ་རྡོ་རྗེའི་ལུ་གུ་རྒྱུད། །དེ་དག་ཕྱག་ན་བསྣམས་པར་བསམ། །ཁྲོ་བོ་བར་དུ་གཅོད་སྦྱོང་དང༌། །ཁྲོ་བོ་མི་འཇིགས་སྦྱིན་པ་སྟེ། །དཀར་སེར་ཁྲོ་ཚུལ་རྡོ་རྗེ་བསྣམས། །དེ་ཡི་ཕྱི་ཡི་ཁྱམས་ལ་ནི། །གཟུངས་རྣམས་ཀུན་ནི་ཐམས་ཅད་ནས། །མཚན་བརྗོད་བདེ་གཤེགས་མཐའ་དག་དམིགས། །ལྷ་མོ་སྒོ་བ་རང་བཞིན་དམིགས། །དེ་ནས་ཕྱི་ཡི་རིམ་པ་ནི། །འཁོར་བའི་ལེ་ཙེ་ཁྲ་བོ་ལ། །གཟའ་དགུ་དང་ནི་རྒྱུ་སྐར་ནི། །ཉི་ཤུ་རྩ་བརྒྱད་བསམ་པར་བྱ། །དེ་ཡི་ཕྱི་ཡི་ཁྱམས་ལ་ནི། །དུ་མ་གཟུངས་ནས་བརྗོད་པ་ཡི། །གནོད་སྦྱིན་ཀླུ་ལ་སོགས་པ་ཡི། །མཐུ་ཆེན་ཐམས་ཅད་དམིགས་པར་བྱ། །སྒོ་དེ་རྒལ་བའི་ཕྱི་རྣམས་སུ། །སྣ་ཚོགས་གཟུངས་ནས་བརྗོད་པ་ཡི། །སྙིང་རྗེའི་ཚོགས་རྣམས་ཐམས་ཅད་དམིགས། །གལ་ཏེ་བྱེ་བྲག་སྒྲུབ་བྱེད་ན། །ཚོགས་གཉིས་གདན་དང་ས་བོན་དང༌། །གང་བསྐྱེད་པ་ཡི་སྐུ་དེ་རྣམས། །གོང་དུ་མཐུན་པའི་སྐུ་རུ་བསྐྱེད། །དེ་ལྟར་བསྡུས་ཏེ་བྱེ་བྲག་ལྷ། །གང་འདོད་པ་ནི་བསྐྱེད་པར་བྱ། །དེ་ནས་ཡེ་ཤེས་ལྷ་ཚོགས་ནི། །ནམ་མཁར་བཀུག་སྟེ་མཆོད་ནས་ནི། །ཕྱག་རྒྱ་བཞི་ཡིས་གཉིས་མེད་བྱ། །སྐུ་གསུང་ཐུགས་ཀྱིས་བྱིན་གྱིས་བརླབ། །དེ་ནས་ཕྱོགས་ཀྱི་སངས་རྒྱས་ཀྱིས། །བུམ་པའི་དབང་ནི་བསྐུར་བར་བསམ། །དེ་ལྟར་བུར་ནི་བསྒོམ་པར་བྱ། །དེ་
བསྐྱེད་བཟླས་པ་བྱ་བ་ཡིན། །ཐུན་མཚམས་གཏོར་བཏང་ཡེ་ཤེས་གཤེགས། །སྒྲུབ་པའི་ཐབས་ཀྱི་རིམ་པ་སྟེ་དང་པོའོ།། །།དེ་ནས་སྙིང་པོ་བསྡུས་པའི་རིམ་པ་ནི། དེ་ནི་རྒྱས་པ་བཏུ་བར་བྱ། །སོ་སོའི་གཟུགས་ཀྱི་ནང་ནས་ཏེ། །ཤཱ་ཀ་ཐུབ་ཡུམ་གྱི་སྙིང་པོ་ནི། །ཡི་གེ་ཉུང་ན་མུ་ནེ་ཡིན། །ལྷ་མོ་བརྒྱད་ཀྱི་སྙིང་ནི། །ལྷ་མོ་བརྒྱད་ཀྱི་གཟུང་ནང་ནས། །ཡེ་ཤེས་དབང་བསྐུར་རྡོ་རྗེ་དབྱིངས། །སོ་སོར་འབྲང་གསུམ་སྙིང་པོ་ནི། །སོ་སོའི་གཟུགས་ཀྱི་ནང་ནས་ནི། །ཐ་མའི་སརྦ་མན་ཆད་ཡིན། །གཞན་རྣམས་མི་བཏུ་གཟུངས་ན་བཞིན། །སེམས་དཔའ་འཁོར་བརྒྱད་སྙིང་པོ་ནི། །དཀྱིལ་འཁོར་བརྒྱད་པའི་ནང་བཞིན་ནོ། །ཡང་ན་མཚན་བརྒྱ་རྩ་བརྒྱད་ཀྱི། །ནང་གི་གཟུངས་རྣམས་བཞིན་དུའོ། །རྨ་བྱ་ཡི་ནི་སྙིང་པོ་ནི། །རྨ་བྱའི་སྙིང་པོའི་ནང་ནས་ཀྱང༌། །ན་ར་ཡ་ཡི་སྔགས་ཡིན་ནོ། །སྟོང་ཆེན་གྱི་ནི་སྙིང་པོ་ནི། །གཟུངས་ན་སྔགས་ཀྱི་ཐ་མའོ། །སོ་སོར་འབྲང་མའི་སྙིང་པོ་ནི། །སྙིང་པོ་གསུམ་གྱི་སྔགས་ནང་ནས། །རབ་ཏུ་གསང་བའི་སྙིང་པོའོ། །བསིལ་བའི་ཚལ་གྱི་སྙིང་པོ་ནི། །གཟུངས་སྔགས་གཉིས་པ་ཡིན་པར་འདོད། །གསང་སྔགས་གསུམ་པ་ཡིན་པར་འདོད། །ཚེ་དཔག་མེད་ཀྱི་སྙིང་པོ་ནི། །དེ་མདོའི་སརྦ་སཾ་སྐཱ་རི། །དེ་ཡི་འཁོར་གྱི་སྙིང་པོ་ནི། །འཆི་མེད་རྔ་སྒྲའི་སྔགས་གཞུག་གི །ཨ་མྲྀ་ཏ་ཡི་སྔགས་ཡིན་ནོ། །ཆོས་ཡུམ་གཟུངས་ཀྱི་སྙིང་པོ་ནི། །གཟུངས་སྔགས་དང་པོ་ཡིན་པར་འདོད། །གདུགས་དཀར་སྙིང་པོ་ཨ་ན་ལེ། །ཐ་མའི་སྔགས་གཞུག་ནང་བཞིན་ནོ། །རྣམ་པར་རྒྱལ་མའི་སྙིང་པོ་ནི། །གསང་སྔགས་དེ་ཡི་ཐ་མ་ཡི། སརྦ་ཏ་ཐཱ་མར་བཅད་དོ། །གཙུག་གི་ནོར་བུའི་སྙིང་པོ་ནི། །སྔགས་དེ་ཡི་ནི་ཐ་མ་ཡི། །སརྦ་རྣམས་གཉིས་མར་བཅད་དོ། །གཙུག་ཏོར་དྲི་མེད་སྙིང་པོ་ནི། སྔགས་དེ་ཡི་ནི་ཐ་མ་ཡི། །སརྦ་རྣམ་གཉིས་མར་བཅད་དོ། །འོད་ཟེར་ཅན་གྱི་སྙིང་པོ་ནི། །གཟུང་སྔགས་ཐ་མ་ཡིན་པར་འདོད། །པརྞའི་སྙིང་པོ་དེ་ནང་བཞིན། །རི་ཁྲོད་ལོ་གྱོན་སྙིང་པོ་ནི། །ཏདྱ་ཐཱ་ནས་བཟུང་ནས་ནི། །སྭཱ་ཧཱ་དང་པོ་ཡན་ཆད་དོ། །དཔལ་ལྷ་ལུང་བསྟན་སྙིང་པོ་ནི། །སྔགས་དེ་ཡི་ནི་གཞུང་གི་ནི། །ཐ་མའི་སརྦ་མར་བཅད་དོ། །ཙནྡན་ཡན་ལག་སྙིང་པོ་ནི། །དེ་ཡི་སྔགས་ཀྱི་ནང་ནས་ནི། །སརྦ་བྷཱུ་ཏ་ཨ་ཏི་ཏ། །དེ་ནི་
མར་བཅད་ཡིན་པར་འདོད། །བདེ་གཤེགས་བདུན་གྱི་སྙིང་པོ་ནི། །ཁྱད་པར་ཅན་གྱི་མདོ་ཇི་བཞིན། །ནོར་གྱི་རྒྱུན་གྱི་སྙིང་པོ་ནི། །སྔགས་དེ་ཡི་ནི་ཐ་མ་ཡི། །ཨོཾ་བཞི་པོ་ནི་ཡིན་པར་འདོད། །སྒྲོལ་མ་མཆོག་གི་སྙིང་པོ་ནི། །དེ་ཡི་གཟུངས་ཀྱི་ནང་བཞིན་ནོ། །མི་ཕམ་འཇམ་དཔལ་སྙིང་པོ་ཡང༌། །སྒྲོལ་མ་མཆོག་གི་གཟུངས་ནང་བཞིན། །དྲི་མ་མེད་པའི་སྙིང་པོ་ནི། །དྲི་མེད་གཟུངས་སྔགས་ཐ་མའོ། །རྡོ་རྗེ་སྙིང་པོ་དེ་ནང་བཞིན། །རྒྱལ་བ་ཅན་གྱི་སྙིང་པོ་ནི། །གཟུངས་སྔགས་དང་པོ་ཡིན་པར་འདོད། །མཚན་མོ་བཟང་པོའི་སྙིང་པོ་ནི། །གཟུངས་ནས་སྔགས་ཀྱི་ཐ་མའོ། །མཁའ་ལྡིང་གཙོ་བོའི་སྙིང་པོ་ནི། །ཚངས་པ་ཁང་པར་གཟུངས་མཐུ་ཡིས། །སྔགས་རིངས་དེ་ཡི་མཇུག་གི་ནི། །ཏ་ཐཱ་ག་ཏ་མར་བཅད་དོ། །སྦས་པ་རྡོ་རྗེ་ཀུན་འབར་གློག །མཆུ་ཡི་ནང་ནས་འབྱུང་བཞིན་ནོ། །འབར་བ་གཟི་བརྗིད་སྙིང་པོ་ནི། །མཆུ་ཡི་གཟུངས་སྔགས་ཐ་མ་ཡི། །ཨོཾ་དི་རི་དི་རི་མར་བཅད་ཡིན་པར་འདོད། །གནམ་ལྕགས་མཆུ་ཡི་སྙིང་པོ་ནི། །གནམ་ལྕགས་སྔགས་ཀྱི་ཐ་མ་ཡིན། །ཨོཾ་དི་རི་དི་རི་དེ་ནི་མར་བཅད་ཡིན་པར་འདོད། །རི་བྱིའི་སྔགས་ནི་དེ་ནང་བཞིན། །སྤྱན་རས་གཟིགས་ཡུམ་སྙིང་པོ་ནི། །སརྦ་གཉིས་པོ་མར་བཅད་ཡིན། །བཅུ་གཅིག་ཞལ་གྱི་སྙིང་པོ་ནི། །དེ་ཡི་གཟུངས་ཀྱི་ནང་བཞིན་ནོ། །རིན་ཆེན་ཕྲེང་བའི་སྙིང་པོ་ནི། །གཟུངས་སྔགས་གཉིས་པ་ཡིན་པར་འདོད། །སྟོབས་ཅན་གྱི་ནི་སྙིང་པོ་ནི། །གཟུངས་སྔགས་ཐ་མ་ཡིན་པར་འདོད། །མདངས་ཕྱིར་འཕྲོག་གི་སྙིང་པོ་ནི། །དེ་ཡི་གཟུངས་ཀྱི་ནང་བཞིན་ནོ། །གསེར་ཅན་གྱི་ནི་སྙིང་པོ་ནི། །གཟུངས་སྔགས་ཐ་མ་ཡིན་པར་འདོད། །རྣམ་རྒྱལ་ཅན་གྱི་སྙིང་པོ་ནི། །གཟུངས་སྔགས་དང་པོ་ཡིན་པར་འདོད། །འགྲོ་ལྡིང་པ་ཡི་སྙིང་པོ་ནི། །གཟུངས་སྔགས་དང་པོ་ཡིན་པར་འདོད། །དབྱིག་དང་ལྡན་པའི་སྙིང་པོ་ཡང༌། །དེ་ཡི་གཟུངས་ཀྱི་ནང་བཞིན་ནོ། །བདེ་གཤེགས་རབས་བདུན་སྙིང་པོ་ནི། །སངས་རྒྱས་བདུན་པའི་གཟུངས་ནང་བཞིན། །སྨན་བླ་མཆེད་བདུན་སྙིང་པོ་ནི། །གཟུངས་སྔགས་བར་མ་ཡིན་པར་འདོད། །མི་འཁྲུགས་པ་ཡི་སྙིང་པོ་ནི། །ལས་སྒྲིབ་སྦྱོང་བའི་གཟུངས་ནང་གི །ཀཾ་ཀ་ནི་ནི་ཡིན་
པར་འདོད། །འོད་སྟོང་འབར་གྱི་སྙིང་པོ་ནི། །རྒྱ་ཆེན་ཐོགས་མེད་གཟུངས་ནང་གི །མཇུག་གི་སྔགས་ཐུང་ཡིན་པར་འདོད། །སྣང་མཐའ་ཡས་ཀྱི་སྙིང་པོ་ནི། །དེ་ཡི་གཟུངས་སྔགས་ཐ་མའོ། །ལག་ན་རྡོ་རྗེའི་སྙིང་པོ་ནི། །ཏདྱ་ཐཱ་ནས་ཐ་མའོ། །རྣམ་པར་འཇོམས་པའི་སྙིང་པོ་ནི། །དེ་ཡི་སྔགས་ཀྱི་གཞུག་གི་ནི། །ན་མཤྩཎྜ་མན་ཆད་དོ། །མེ་ལྟར་རྨོངས་བྱེད་སྙིང་པོ་ནི། །སྔགས་དེ་ཡི་ནི་ནང་ནས་ནི། །སརྦ་དེ་བ་ནཱ་ག་མན་ཆད་དོ། །བེ་ཅོན་ཆེན་པོའི་སྙིང་བོ་ནི། །གཟུངས་སྔགས་དང་པོའི་ནང་ནས་ཀྱང༌། །སརྦ་ཨ་ཏ་ས་ཏ་ན། །དེ་ནི་མར་བཅད་ཡིན་པར་འདོད། །དུག་སེལ་གྱི་ནི་སྙིང་པོ་ནི། །དེ་དག་གཟུངས་སྔགས་དང་པོ་ཡིན་པར་འདོད། །མེ་ཁ་ལ་ཡི་སྙིང་པོ་ནི། །གཟུངས་སྔགས་དང་པོའི་ནང་ནས་ཀྱང༌། །ས་མན་ན་ས་རེ། །དེ་ནི་མར་ཆད་ཡིན་པར་འདོད། །ཚོགས་ཀྱི་བདག་པོའི་སྙིང་པོ་ནི། །དེ་ཡི་གཟུངས་ཀྱི་སྔགས་གཞུག་གི ། ཏདྱ་ཐཱ་ནས་ཐ་མའི་བར། །ཁྲོ་བོ་བཅུ་ཡི་སྙིང་པོ་ཡང༌། །རང་རང་གཟུངས་ཀྱི་ནང་བཞིན་ནོ། །ཡང་ན་བསྐོར་བའི་གཟུངས་བཞིན་ནོ། །རྣམ་པར་འཇོམས་པའི་བཛྲ་བཅུ། །ཁྲོ་བཅུའི་སྔགས་སུ་འདོད་པ་ཡིན། །ལག་ན་རྡོ་རྗེ་བཅུ་ཡི་ནི། །སྙིང་པོ་གཟུངས་སྔགས་ཐ་མར་འདོད། །ནག་པོ་ཆེན་པོའི་སྙིང་པོ་ནི། །དེ་ཡི་གཟུངས་ཀྱི་ནང་བཞིན་ནོ། །ལྷ་མོ་ནག་མོའི་སྙིང་པོ་ཡང༌། །དེ་ཡི་གཟུངས་ཀྱི་ནང་བཞིན་ནོ། །རིག་སྔགས་རྒྱལ་བ་ཅན་ནང་ནས། །ཁྲོ་བཞིའི་སྔགས་ནི་བཏུ་བར་བྱ། །གཏུམ་པོ་ཡི་ནི་སྔགས་གཉིས་ལས། །སྔགས་ཚན་འོག་མ་ཡིན་པར་འདོད། །རྡོ་རྗེ་ཁྲོ་བོའི་སྔགས་དེ་ཉིད། །རྡོ་རྗེ་ཕོ་ཉ་མོ་ཡི་སྔགས། །མདུང་རྩེ་གསུམ་པའི་སྔགས་ཡིན་ནོ། །ཁྲོ་བོ་ལུ་གུ་རྒྱུད་སྔགས་ནི། །གཟུངས་ཀྱི་ནང་བཞིན་ཁོ་ནའོ། །རིག་སྔགས་རྒྱལ་བ་ཅན་སྔགས་ནི། །ཛ་ཡ་ཛ་ཡེའི་སྔགས་ཡིན་ནོ། །ཁྲོ་བོ་བར་དུ་གཅོད་སྦྱོང་སྔགས། །གཟུངས་སྔགས་ཐ་མ་ཡིན་པར་འདོད། །ཁྲོ་བོ་མི་འཇིགས་སྦྱིན་སྔགས་ནི། །སྔགས་དེ་ཉིད་ཀྱི་ནང་ནས་ཀྱང༌། །སརྦ་དུར་ཤར་མར་བཅད་དོ། །དེ་དག་ལྷ་མངོན་ནང་ནས་བཏུ། །གཟུངས་ཆེན་པོ་ཡི་སྙིང་པོ་ནི། །གཟུངས་སྔགས་དང་པོ་ཡིན་པར་འདོད། །སངས་རྒྱས་སྙིང་པོའི་སྙིང་པོ་
ནི། །གཟུངས་སྔགས་དང་བོ་ཡིན་པར་འདོད། །དབང་ཕྱུག་ཆེན་པོ་དཀའ་ཐུབ་བཟང༌། །དེ་ལ་བཅོམ་ལྡན་བཀའ་སྩལ་པའི། །སངས་རྒྱས་སྙིང་པོའི་གཟུངས་སྔགས་གཞུག །སརྦ་ཨ་ཀ་རྣམ་གསུམ་ཡིན། །དབང་བསྐུར་གཟུངས་ཀྱི་སྙིང་པོ་ནི། །དེ་ཡི་གཟུངས་ཀྱི་ནང་བཞིན་ནོ། །ཀུན་བཟང་གཟུངས་ཀྱི་སྙིང་པོ་ནི། །གཟུངས་སྔགས་ཐ་མ་ཡིན་པར་འདོད། །རྟེན་འབྲེལ་གཟུངས་སྔགས་ཡེ་དྷརྨཱ། །མེ་ཏོག་བརྩེགས་གཟུངས་སྙིང་པོ་ནི། །སྔགས་དེ་ཉིད་ཀྱི་ནང་ནས་ཀྱང༌། །ཨ་མྲྀ་ཏ་ནི་མར་བཅད་དོ། །ས་དབང་གཟུངས་ཀྱི་སྙིང་པོ་ནི། །སྔགས་དེ་ཡི་ནི་གཞུག་གི་ནི། །ས་མྱ་ཀ་སཾ་བུད་མར་བཅད་དོ། །ཡི་གེ་དྲུག་པའི་སྙིང་པོ་ནི། །གཟུངས་སྔགས་ཐ་མ་ཡིན་པར་འདོད། །ཤེས་རབ་ཉི་ཤུ་རྩ་ལྔའི་སྒོ། །སྙིང་པོ་ཨོཾ་དུ་འདོད་པ་ཡིན། །མིག་སྦྱོང་གཟུངས་ཀྱི་སྙིང་པོ་ནི། །དེ་ཡི་གཟུངས་ཀྱི་ནང་བཞིན་ནོ། །གཟི་ཅན་ཞུས་པ་དེ་ནང་བཞིན། །སངས་རྒྱས་ཡན་ལག་སྙིང་པོ་ནི། །གཟུངས་སྔགས་དང་པོ་ཡིན་པར་འདོད། །གཞང་འབྲུམ་སེལ་བའི་སྙིང་པོ་ནི། །གཟུངས་སྔགས་ཐ་མ་ཡིན་པར་འདོད། །སྒོ་དྲུག་སྙིང་པོ་དེ་ནང་བཞིན། །བུ་མང་བཏོན་པའི་སྙིང་པོ་ནི། །དེ་ཡི་གཟུངས་ཀྱི་ནང་བཞིན་ནོ། །རིམས་ནད་ཞི་གཟུངས་དེ་ནང་བཞིན། །ཆོས་ཀྱི་རྒྱ་མཚོའི་སྙིང་པོ་ནི། །གཟུངས་སྔགས་ཐ་མ་ཡིན་པར་འདོད། །སྒོ་མཐའ་ཡས་ཀྱི་སྙིང་པོ་ནི། །སྔགས་དེ་ཡི་ནི་མཇུག་གི་ནི། །སརྦ་མན་ཆད་ཡིན་པར་འདོད། །ལུས་དབྱིབས་མཛེས་གཟུངས་སྙིང་པོ་ནི། །སྔགས་དེ་རང་གི་མཇུག་གི་ནི། །མ་ཧཱ་བོ་དྷི་ས་ཏྭ་དང༌། །དེ་ནི་མར་བཅད་ཡིན་པར་འདོད། །དབུགས་ཆེན་གཟུངས་ཀྱི་སྙིང་པོ་ནི། །གཟུངས་སྔགས་ཐ་མ་ཡིན་པར་འདོད། །གཟའ་རྣམས་ཡུམ་གྱི་སྙིང་པོ་ནི། །གཟའ་ཡུམ་སྔགས་ཀྱི་གཞུག་གི་ནི། །སརྦ་རྣམ་གཉིས་ཡིན་པར་འདོད། །རི་རབ་ཁང་བརྩེགས་སྙིང་པོ་ནི། །གཟུངས་སྔགས་ཐ་མ་ཡིན་པར་འདོད། །མཚན་བརྒྱ་རྩ་བརྒྱད་སྙིང་པོ་ནི། །དེ་རང་མཚན་གྱི་ནང་བཞིན་ནོ། །ཡངས་པའི་གྲོང་ཁྱེར་འཇུག་གཟུངས་ཀྱི། །གསར་སྔགས་དང་པོ་བི་ས་ར། །དེ་ཡི་སྙིང་པོ་ཡིན་པར་འདོད། །སངས་རྒྱས་བཅུ་གཉིས་སྙིང་པོ་ནི། །མི་བཏུ་དེ་ཡི་རང་བཞིན་ནོ། །སྒོ་བཟངས་གཟུངས་ཀྱི་
སྙིང་པོ་ནི། །གཟུངས་སྔགས་དང་པོ་ཡིན་པར་འདོད། །ནད་རྣམས་ཞི་གཟུངས་སྙིང་པོ་ནི། །མི་བཏུ་དེ་ཡི་རང་བཞིན་ནོ། །བྱང་ཆུབ་རྒྱན་འབུམ་སྙིང་པོ་ནི། །སྔགས་གཞུག་སརྦ་མན་ཆད་ཡིན། །ནཱི་ལ་ཀཎྛའི་སྙིང་པོ་ནི། །སྔགས་དེ་ཡི་ནི་མཇུག་གི་ནི། །ཨཱཪྻཱ་བ་ལོ་ཀི་ཏེ། །དེ་ནི་མན་ཆད་ཡིན་པར་འདོད། །ལག་ན་རྡོ་རྗེ་གསང་བའི་བདག །མིང་བརྒྱད་གསང་སྔགས་བསྐོར་བ་ཡིས། །དེ་ཡི་སྙིང་པོ་དེ་ནང་བཞིན། །མདོ་སྡོང་བརྒྱན་པའི་སྙིང་པོ་ནི། །གཟུངས་སྔགས་གསུམ་པོ་ཡིན་པར་འདོད། །མཆོད་པའི་སྤྲིན་གྱི་སྙིང་པོ་ནི། །མི་བཏུ་དེ་ཡི་རང་བཞིན་ནོ། །ཟ་མ་ཏོག་གི་ཕྱག་རྒྱ་ཡི། །དེ་ཡི་གཟུངས་ཀྱི་སྔགས་གཞུག་གི །སརྦ་མན་ཆད་ཡིན་པར་འདོད། །དྲ་བྱི་རིག་པའི་རྒྱལ་མོའི་སྔགས། །གཟུངས་སྔགས་དང་པོ་ཡིན་པར་འདོད། །སྤྲིན་གྱི་གཟུངས་ཀྱི་སྙིང་པོ་ནི། །བདེ་སྦྱིན་སྔགས་ནི་ཡིན་པར་འདོད། །རླུང་གི་དཀྱིལ་འཁོར་སྙིང་པོ་ནི། །གཟུངས་སྔགས་ཐ་མའི་ནང་ནས་ཀྱང༌། །ན་མོ་རཏྣ་ཏྲ་ཡཱ་ཡ། །དེ་ནི་མར་བཅད་ཡིན་པར་འདོད། །ཨུཥྞཱི་ཥ་ལ་སོགས་པའི་གཟུངས། །སྙིང་པོ་རང་གཞུང་གསལ་བ་ཡང༌། །དེ་ཡི་གཟུངས་ཀྱང་འགའ་ཞིག་མཆིས། །དེ་དག་མ་བཏུས་དེ་ནང་བཞིན། །དེ་ལྟར་སྣ་ཚོགས་གཟུངས་ནང་ནས། །མཁས་པས་དེ་ལྟར་བཏུ་བར་བྱ། །སྙིང་པོ་བཏུ་བའི་རིམ་པ་སྟེ་གཉིས་པའོ།། །།ད་ནི་རིམ་གཉིས་མཇུག་བསྡུས་ཏེ། །གོང་བཞིན་སྒྲུབ་པའི་ཐབས་བསྒོམས་ནས། །སྙིང་པོ་བཏུ་རིམ་བཞིན་དུ་ནི། །གཙོ་བོ་ནས་ནི་འཁོར་གྱི་བར། །རྒྱས་དང་འབྲིང་དང་བསྡུས་པ་ཡིས། །བསྙེན་པ་ཚད་དུ་བསྐྱལ་བར་བྱ། །དེ་ནས་ལས་ལ་སྦྱོར་བ་ནི། །དབང་བསྐུར་དུས་སུ་རིག་སྔགས་བཞིན། །ཁྲུས་ཀྱི་ཆོ་གའི་དུས་སུ་ནི། །ཀུན་ཁྱབ་གཟུངས་ཀྱི་ཆོ་ག་བཞིན། །གཟུངས་བརྗོད་མཇུག་གི་ཆོ་གའི་དུས། །རང་གི་ཆོ་གའི་གཞུང་བཞིན་ནོ། །དེ་བཞིན་ལས་ལ་སྦྱར་བར་བྱ། །བྱེ་བྲག་ཏུ་ནི་སྒྲུབ་བྱེད་ན། །བྱེ་བྲག་སྒྲུབ་པའི་ཐབས་བསྒོམས་ནས། །བྱེ་བྲག་སྙིང་པོ་བཟླས་པར་བྱ། །དེ་ནས་ལས་ལ་སྦྱར་བ་ནི། །ཞི་བ་རིམ་དྲུག་གདོན་དགྲོལ་སོགས། །ཞི་བའི་ལས་ལ་སྦྱར་བར་བྱ། །དྲག་པོའི་རིམ་དྲུག་གདོན་དགྲོལ་སོགས། །དྲག་པོའི་ལས་ལ་སྦྱར་བར་བྱ། །ཀུན་
ཁྱབ་ལས་སྦྱོར་ཐམས་ཅད་ཀྱིས། །ལས་རྣམས་ཐམས་ཅད་མཐར་འབྱུང་བའོ། །གཞན་ལས་སོགས་པའི་གཟུངས་རྣམས་ལ། །རྟེན་གྱི་གང་ཟག་མོས་བྱུང་ན། །དེ་ཡི་གཞུང་ན་ལྷ་གསལ་ན། །དེ་གཞུང་བཞིན་དུ་ལྷར་བསྐྱེད་དེ། །དེ་གཞུང་གསལ་བར་མ་གྱུར་ན། །ཞི་ལ་བསྟན་བདག་དྲག་པོ་ལ། །ཁྲོ་བོ་ཕྱག་ན་རྡོ་རྗེ་ལ། །བསྐྱེད་ཚུལ་སྒྲུབ་པའི་ཐབས་བཞིན་ནོ། །ལས་སྦྱོར་སྙིང་པོ་གོང་བཞིན་ནོ། །དེ་ལྟར་སྒྲུབ་པའི་ཐབས་སྦྱངས་ནས། །ཀླུ་དང་གནོད་སྦྱིན་ལ་སོགས་པའི། །གདོན་རྣམས་ཐམས་ཅད་སེལ་བར་ངེས། །མཛེ་དང་ཕོལ་མིག་རིམས་ལ་སོགས། །ནད་རྣམས་ཐམས་ཅད་སེལ་བར་ངེས། །ཚེ་འདིའི་འདོད་དགུ་ཐམས་ཅད་འགྲུབ། །སྡིག་པ་ཐམས་ཅད་ཟད་པར་བྱེད། །དྲི་མ་ཐམས་ཅད་འཁྲུད་པར་བྱེད། །སྡིག་པ་སྦྱོང་བའི་མཆོག་ཡིན་ནོ། །ཕྱི་མར་མཐོ་རིས་ཐར་པའི་རྒྱུ། །སྒྲུབ་པ་ཡི་ནི་མཆོག་ཡིན་ནོ། །དེ་ཡི་ཕན་ཡོན་མང་པོ་ནི། །སོ་སོའི་སྣ་ཚོགས་གཟུངས་ནང་ནས། །རྒྱས་ཤིང་གསལ་བར་བསྟན་པ་སྟེ། །དེ་དག་དེ་རུ་བལྟས་ཏེ་སྒྲུབ། །ཕན་ཡོན་དེ་དག་བདེན་པ་སྟེ། །སངས་རྒྱས་བཀའ་ནི་མི་སླུ་སྟེ། །ཕན་ཡོན་དེ་དག་ཐམས་ཅད་ནི། །དོན་ཚིག་ལྡན་ལ་གཞུང་བཞིན་འབྱུང༌། །ཚིག་ལྡན་པ་ལ་དེ་ཡི་ཆ། །མཁས་པས་དེ་ལྟར་ཤེས་པར་གྱིས། །རྨོངས་པས་དེ་ལྟར་མ་ཤེས་པས། །ལོག་པའི་ཐེ་ཚོམ་ཟ་བ་ཡིན། །དེ་བས་སྒྲུབ་པའི་ཐབས་འདི་ལ། །སྒྲུབ་ཐབས་གྲངས་ནི་དཔག་མེད་ལྡན། །སྣ་ཚོགས་རྒྱུད་ལ་བརྟེན་བྱས་ནས། །ནོར་བུ་སྒྲུབ་ཐབས་རིམ་གཉིས་འདི། །རིན་ཆེན་གྲགས་པས་བསྟན་པ་ཡིན། །དེ་ལས་དགེ་བ་ཅི་ཐོབ་པ། །ཀུན་གྱིས་གཟུངས་ཀྱི་དོན་རྟོགས་ཤོག །བདག་གི་བསྟན་བཅོས་རྒྱས་གྱུར་ཅིག །སློབ་དཔོན་མཁས་པ་རིན་ཆེན་གྲགས་པས་མཛད་པ་གཟུངས་འདུས་སྤྱིའི་སྒྲུབ་ཐབས་ཞེས་བྱ་བ་རྫོགས་སོ།། །།བལ་པོ་མ་ཧཱ་པཱ་ནས་བསྒྱུར་བའོ།། །།