སྒྲུབ་ཐབས་ཐམས་ཅད་ཀྱི་ལས་ཀ་ཞེས་བྱ་བ།
རིན་ཆེན་གྲགས་པ།
རྒྱ་གར་སྐད་དུ། སཱ་དྷ་ནཾ་སརྦ་ཀརྨ་ནཱ་མ། བོད་སྐད་དུ། སྒྲུབ་ཐབས་ཐམས་ཅད་ཀྱི་ལས་ཀ་ཞེས་བྱ་བ། དཀོན་མཆོག་གསུམ་ལ་ཕྱག་འཚལ་ལོ། །དུས་གསུམ་མགོན་པོ་འགྲོ་དོན་མཛད། །སྟོན་པ་དེ་ལ་གུས་བཏུད་དེ། །སྒྲུབ་པོས་ནང་དང་ནུབ་སོགས་སུ། །ཚོགས་ཆེན་དག་ནི་བསགས་པ་དང༌། །སྒྲུབ་ཐབས་ཀུན་ན་མི་གསལ་བའི། །བདུན་པོ་རྣམ་དག་གསལ་བར་བསྟན། །བདེ་གཤེགས་མཐའ་དག་མཁའ་ལ་དམིགས། །དུས་གསུམ་གྱི་ནི་བླ་མ་དང༌། །ཕྱོགས་རྣམས་ཀུན་གྱི་བདེ་གཤེགས་དང༌། །ཕྱག་འོས་ཀུན་ལ་ཕྱག་འཚལ་བསྟོད། །མི་མཇེད་འཇིག་རྟེན་འདི་འམ་ནི། །འཇིག་རྟེན་ཁམས་ནི་ཐམས་ཅད་ན། །མཆོད་པ་བླ་ན་ཡོད་པ་དང༌། །མཆོད་པ་བླ་ན་མེད་པ་ཡིས། །དེ་དག་ལ་ནི་མཆོད་པར་བགྱི། །འཁོར་བ་ཐོག་མ་མེད་པ་ནས། །
ཉོན་མོངས་སྲད་བུས་བཅིངས་གྱུར་པས། །མི་ཤེས་དབང་གིས་བགྱིས་པ་ཡི། །ལྕི་དང་ཡང་བའི་སྡིག་བསགས་པ། །མགོན་པོའི་ཚོགས་ལ་སོ་སོར་བཤགས། །འདས་དུས་སངས་རྒྱས་ཇི་སྙེད་དང༌། །ད་ལྟར་ཕྱོགས་བཅུའི་ཞིང་ན་བཞུགས། །དེ་བཞིན་གང་དག་མ་བྱོན་དང༌། །དུས་གསུམ་སངས་རྒྱས་དེ་དག་གིས། །ཟབ་ཅིང་རྒྱ་ཆེའི་ཆོས་བསྟན་གསོལ། །དུས་གསུམ་སངས་རྒྱས་དེ་དག་གིས། །འཁོར་བར་འཁྱམས་པའི་སེམས་ཅན་རྣམས། །ཐུགས་རྗེའི་དབང་གིས་གཟིགས་མཛོད་ལ། །མྱ་ངན་མི་འདའ་བཞུགས་སུ་གསོལ། །དུས་གསུམ་སངས་རྒྱས་དགེ་བ་དང༌། །བྱང་ཆུབ་སེམས་དཔའི་དགེ་བ་དང༌། །ཉན་ཐོས་རང་རྒྱལ་དགེ་བ་དང༌། །འཇིག་རྟེན་དགེ་བ་ཅི་སྤྱོད་པ། །དེ་དག་ལ་ཡང་ཡི་རང་ངོ༌། །ཟག་བཅས་དགེ་བ་ཅི་བསགས་པ། །དེ་བཞིན་ཟག་མེད་དགེ་བ་གང། །དགེ་བའི་ཚོགས་ནི་ཅི་བསགས་པ། །བྱང་ཆུབ་སེམས་དཔར་བསྔོ་བར་གྱི། །བདུན་པོ་རྣམ་དག་རེ་རེ་ལ། །སེ་གོལ་གྱི་ནི་སྒྲ་ཡང་བསྒྲགས། །དེ་ལྟར་བསོད་ནམས་ཚོགས་བསགས་ནས། །ཡེ་སྒྲ་ཡང་བསྒྲགས། །དེ་ལྟར་བསོད་ནམས་ཚོགས་བསགས་ནས། །ཡེ་ཤེས་ཚོགས་ནི་འདི་ལྟ་སྟེ། །མུ་སྟེགས་སྐྱེ་བ་ཐ་མལ་བཞིན། །སྟོང་པ་ཙམ་གྱིས་བསྒྱུར་ནས་ནི། །ཕྱལ་བར་བྱ་བའི་མ་ཡིན་ཏེ། །དམན་པ་ཡི་ནི་བྱང་ཆུབ་བཞིན། །འགའ་ཞིག་སྟོང་པའི་ཚུལ་ལ་ནི། །འགའ་ཞིག་ཡོད་པ་མ་ཡིན་ཏེ། །ཤེས་རབ་ཕ་རོལ་ཕྱིན་པ་བཞིན། །གཟུགས་ལས་སྟོང་པ་གཞན་མི་བཙལ། །འཁྲུལ་ངོར་བསྟན་པའི་གཟུགས་སུ་སྣང༌། །གཟུགས་དང་སྟོང་པ་དབྱེར་མེད་ན། །གཟུགས་ནི་རྣམ་པར་དག་པ་ཡིན། །གཟུགས་ཉིད་སྟོང་པར་ཤས་པར་བྱ། །དཔེར་ན་ཆུ་ཡི་ཟླ་བ་བཞིན། །དེ་ལྟར་ཡེ་ཤེས་ཚོགས་བསགས་བྱ། །ཚོགས་གཉིས་བསགས་པས་སྒྲིབ་གཉིས་བྱང༌། །བསྐྱེད་རིམ་འབྱུང་བའི་དགོས་པ་ཡིན། །དེ་ནས་སོ་སོའི་སྒྲུབ་ཐབས་བཞིན། །བསྐྱེད་ཚུལ་ལྷ་དེ་གསལ་བར་བསྐྱེད། །བསྐྱེད་རིམ་བསྒོམ་པའི་རྣམ་གཉིས་ཏེ། །རྟོགས་པ་ཅན་དང་རྟོགས་པ་དམན། །རྟོགས་པ་ཅན་གྱིས་འདི་ལྟར་བསྒོམ། །
གང་བསྐྱེད་པ་ཡི་ལྷ་དེ་ནི། །ནམ་མཁའ་ཡི་ནི་འཇའ་ཚོན་བཞིན། །གསལ་ལ་རང་བཞིན་མེད་པར་བསྒོམ། །ཆུ་ལ་ཟླ་བ་ཤར་བ་བཞིན། །སྣང་ལ་རང་བཞིན་མེད་པར་བསྒོམ། །རྟོགས་པ་དམན་པས་འདི་ལྟར་བསྒོམ། །ཡོད་པར་རག་པའི་རྣམ་པ་དང། །འབུར་བཏོད་རིས་སུ་བྲིས་བཞིན་དུ། །གོང་ལྟར་གསལ་བའི་རྣམ་པར་བསྒོམ། །དེ་ལྟར་བསྐྱེད་རིམ་བསྒོམས་ནས་ནི། །བཟླས་པའི་ཚུལ་ནི་རྣམ་པ་གཉིས། །དོན་དམ་དང་ནི་ཀུན་རྫོབ་དང༌། །དོན་དམ་བཟླས་པ་འདི་ལྟ་སྟེ། །རྟོགས་པ་ཅན་གྱི་བསྐྱེད་རིམ་བཞིན།། ཡེངས་མེད་གསལ་བར་བསྒོམས་ནས་ནི། །ཡུལ་གཟུང་འཛིན་པ་ཡོངས་སྤངས་ནས། །རྟོགས་པ་ཐམས་ཅད་བཀག་ནས་ནི། །ནམ་མཁའ་སྟོང་ལས་སྒྲ་འབྱུང་ཞིང༌། །སྒྲ་དེ་ཡང་ནི་རང་བཞིན་མེད། །ཆོས་ཉིད་ཀྱི་ནི་རང་སྒྲའོ། །ཀུན་རྫོབ་ཕྲིན་ལས་བཞི་བཟླས་པས། །ཞི་བའི་བཟླས་པ་འདི་ལྟ་སྟེ། །སྔགས་བརྗོད་སྔགས་ཀྱི་འོད་ཟེར་ནི། །ཉི་ཟེར་ལྟ་བུར་ཕྱོགས་བཅུར་འཕྲོ། །མ་ལུས་ཀུན་ལ་ཕོག་པས་ནི། །ཀུན་གྱི་གནོད་སེམས་ཞི་བྱས་ཏེ། །ཕན་སེམས་བྱམས་སེམས་ལྡན་གྱུར་ནས། །སྒྲུབ་པོ་ཉིད་ལ་འདུག་པར་བསམ།། རྒྱས་པའི་བཟླས་པ་འདི་ལྟ་སྟེ། །སྔགས་འོད་ཉི་ཟེར་ལྟ་བུ་ནི། །འདོམ་གང་ཚད་ནས་ཁུགས་པའི་ཚུལ། །རང་གི་ལུས་ལ་ཕོག་པས་ནི། །ལུས་ཀྱི་ཚེ་བསོད་རྒྱས་པར་བསམ། །དབང་གི་བཟླས་པ་འདི་ལྟ་སྟེ། །སྔགས་འོད་ལྕགས་ཀྱུ་ལྟ་བུས་ནི། །ཕྱོགས་བཅུར་འཕྲོས་ཏེ་མ་ལུས་བཀུག །སྒྲུབ་པའི་ལས་ཀ་ཅི་བྱ་ཞེས། །ཕྱག་དང་བཅས་པས་འདུད་པར་བསམ། །དྲག་པོའི་བཟླས་པ་འདི་ལྟ་སྟེ། །སྔགས་འོད་མེ་ལྕེ་ལྟ་བུས་ནི། །ཕྱོགས་བཅུ་ཀུན་དུ་འཕྲོས་པ་སྟེ། །རང་གནོད་བགེགས་རྣམས་ཐམས་ཅད་བསྲེག ། མི་བཟད་སྐད་ངན་ཆེན་པོ་ཡིས། །སྒྲུབ་པ་པོ་ལ་སྐྱབས་གསོལ་བསམ། །དེ་སྐྱེ་ཐུན་མཚམས་འདི་ལྟ་སྟེ། །གཏོར་དབུལ་ཡེ་ཤེས་ནམ་མཁར་དབྱུང༌། །ཡིད་ཀྱིས་ཕར་མཆོད་བྱིན་གྱིས་ཚུར་བརླབས་བསམ། །སེ་གོལ་སྒྲ་དང་བཅས་པ་ཡིས། །ཡེ་ཤེས་མཆོག་
འབྱུང་མགོན་པོ་ཁྱོད་ཀྱིས་ནི། །དངོས་གྲུབ་ཆེན་པོ་སྩལ་དུ་གསོལ། །སླར་གཤེགས་སླར་ཡང་འབྱོན་དུ་གསོལ། །བསྟན་བཅོས་བརྩམ་པ་རྣམ་གཉིས་ཏེ། །སྒྲ་ཚད་དག་ལས་ཕུལ་བྱུང་བས། །ལུང་དང་མི་འགལ་དོན་དེ་གཏན་ལ་འབེབས། །མདོ་རྒྱུད་ལུང་དང་བསྟན་བཅོས་ནས་དྲངས་ཏེ། །དེ་ནས་རྟེན་དང་དེ་དང་མི་འགལ་བ། །དེས་ཀྱང་འགའ་ཞིག་བརྩམ་པར་རིགས་པ་ཡིན། །སྒོ་དྲུག་གིས་ནི་བསྟན་བཅོས་བརྩམ་པ་ནི། །ཡི་དམ་ལྷ་ཡི་ཞལ་མཐོང་དང༌། །དེ་ཡིས་གནང་བ་བྱིན་པ་དང༌། །དངོས་གྲུབ་ཀུན་ལ་དབང་ཐོབ་པས། །མདོ་རྒྱུད་ལུང་དང་བསྟན་བཅོས་ལས་དྲངས་ནས། །དེ་ལ་རྟེན་དང་དེ་དང་མི་འགལ་བས། །དེས་ནི་བརྩམ་པར་རིགས་པ་ཡིན། །བདེ་གཤེགས་རྣམས་ཀྱི་བཀའ་ལས་ཀྱང༌། །བསྐྱེད་རིམ་གསལ་བར་མ་བསྟན་ཏེ། །བསྐྱེད་རིམ་གསལ་བར་མ་གྱུར་ན། །དོན་རྣམས་འགྲུབ་པར་མི་འགྱུར་ཏེ། །དེ་བསྐྱེད་གསལ་བར་བསྟན་གྱུར་ནས། །ཤེས་རབ་འཆལ་བའི་གང་ཟག་གིས། །སློབ་དཔོན་མེད་པར་ཞུགས་གྱུར་ནས། །བདག་ཉིད་ཕུང་བ་ཁོ་ནར་ཟད། །ཡང་ན་དེ་དུས་འཁོར་རྣམས་ཀྱིས། །བདེ་གཤེགས་ཀྱི་ནི་བྱིན་རླབས་ཀྱིས། །དེ་ནི་གསོལ་བ་ཁོ་ན་ཡིན། །བདེ་གཤེགས་མྱ་ངན་འདས་འོག་ཏུ། །བློ་ཆུང་སེམས་ཅན་མང་གྱུར་ཏེ། །མདོ་སྡེ་རྣམས་ལས་ལུང་བསྟན་ཏེ། །ད་ནི་མྱ་ངན་འདས་འོག་ཏུ། །བློ་ཆུང་སེམས་ཅན་མར་གྱུར་ཏེ། །དེ་ལ་དགོངས་ཏེ་བདེ་གཤེགས་ཀྱིས། །ང་དང་འདྲ་བའི་གང་ཟག་གིས། །ང་ཡི་ལུང་རྣམས་འགྲོལ་བར་བྱ། །དེ་སྐད་ལུང་ནས་འབྱུང་བ་སྟེ། །མཚན་ཉིད་ལྡན་གྱིས་བསྟན་བཅོས་བརྩམ། །མཚན་ཉིད་མི་ལྡན་བརྩམས་གྱུར་ནས། །ཀུན་ཀྱང་དགོངས་པར་མ་གྱུར་པས། །དེ་དོན་གཞན་དུ་བསྟན་བྱས་ནས། །སྡུག་བསྔལ་ཆེན་པོ་མྱོང་བར་འགྱུར། །སློབ་དཔོན་ཆེན་པོ་རཏྣ་ཀཱིརྟིས་མཛད་པ་སྒྲུབ་ཐབས་ཐམས་ཅད་ཀྱི་ལས་ཀ་གསལ་བྱེད་ཅེས་བྱ་བ་རྫོགས་སོ།།