དཔལ་རྡོ་རྗེ་རྣམ་པར་འཇོམས་པའི་ལས་ལ་སྦྱར་བ་འགྲུབ་པར་ངེས་པའི་ཆོ་ག།
ཡེ་ཤེས་རྡོ་རྗེ།
བཅོམ་ལྡན་འདས་དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དོན་རྣམས་མ་ལུས་སྒྲུབ་བྱེད་པའི། །དོན་གྲུབ་རྡོ་རྗེ་རྣམ་འཇོམས་ཀྱི། སྒྲུབ་པའི་ཐབས་ནི་བཤད་པར་བྱ། །འབྱུང་པོ་རོ་ལངས་ཤ་ཟ་དང༌། །མཁའ་འགྲོ་མ་དང་བརྗེད་བྱེད་མ། །སྨྱོ་བྱེད་སྲིན་པོ་ལ་སོགས་པའི། །མི་མ་ཡིན་གྱི་སྤྲུལ་པ་ལས། །རྣམ་པར་ཐར་པར་བྱེད་པ་ཡི། །གཟུངས་ཀྱི་ཆོ་ག་ལེགས་པ་ནི། །རྒྱུད་ལ་བརྟེན་ནས་བཤད་པར་བྱ། །འདིར་འཕགས་པ་རྡོ་རྗེ་རྣམ་པར་འཇོམས་པ་ལ་བརྟེན་པའི་རང་རྟགས་ཀྱི་ལས་བདུན་གྱི་ཆོ་ག་དང་པོར་བཤད་པར་བྱའོ། །རྣལ་འབྱོར་པ་དམ་ཚིག་དང་ལྡན་པས་སྔོན་དུ་ཕྱག་ན་རྡོ་རྗེའམ། འདི་ཉིད་ཀྱི་སྙིང་པོ་རྒྱས་བསྡུས་ལ་བསྙེན་པ་ཚད་དུ་ཕྱིན་པས་གནས་ཁང་ཡིད་དང་མཐུན་པར་འབྱུང་ལ་སོགས་པས་ཆག་ཆག་ལེགས་པར་བྱས་ལ་སྲོག་ཆགས་མེད་པའི་མེ་ཏོག་སྔོན་པོའི་གཅལ་ལེགས་པར་བཀྲམ་ལ་རིན་པོ་ཆེའི་མཎྜལ་གྱི་སྟེང་དུ། མཆོད་པ་ལྔ་དབུལ་པར་བྱའོ། །དེ་ནས་རང་གི་བླ་མ་དང་ཡི་དམ་ལ་སོགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་མདུན་གྱི་ནམ་མཁའ་ལ་སྤྱན་དྲངས་ལ། སྐྱབས་འགྲོ་སེམས་བསྐྱེད་དང་བདུན་རྣམ་པར་དག་པ་བྱའོ། །དེ་ནས་བདག་ཉིད་སྟོང་པའི་ང་རྒྱལ་དུ་བྱ་སྟེ། སྲུང་བའི་འཁོར་ལོ་བསྒོམ་པ་དང༌། བགེགས་རྣམས་ལ་བཀའ་སྒོ་བ་ལ་སོགས་པ་བྱ་སྟེ། ཧཱུཾ་ཞེས་མིག་བྱིན་གྱིས་བརླབ་བ་ལ་སོགས་པ་བྱའོ། །དེ་ནས་བསྲུང་བ་ཆེན་པོའི་སྔགས་ལན་བཅུར་བརྗོད་ལ་ཕྱོགས་བཅིང་བ་ལ་སོགས་པ་བྱའོ། །དེའི་རྗེས་ལ་བདག་དང་དངོས་པོ་ཐམས་ཅད་སྟོང་པར་མོས་པར་བྱ། དེ་ནས་སྒྲུབ་པ་པོ་ཁྲུས་སྔོན་དུ་སོང་བས། ཉེ་རེག་དང་འཐོར་འཐུང་ལ་སོགས་པ་བྱས་ལ་ཚད་མེད་པ་བཞི་བསྒོམ། དེ་རྗེས་སྟོང་པའི་དང་ལས་ཧཱུཾ་ལས་བྱུང་བའི་ཉི་མའི་དཀྱིལ་འཁོར། དེའི་སྟེང་དུ་ཧཱུཾ་ལས་བྱུང་བའི་སྣ་ཚོགས་རྡོ་རྗེ། །དེའི་ལྟེ་བ་ལ་བྷྲཱུཾ་ལས་རིན་པོ་ཆེའི་གཞལ་ཡས་ཁང་རབ་ཏུ་རྒྱ་ཆེ་ཞིང་ཁ་དོག་གསལ་བ་རྒྱན་སྣ་ཚོགས་ཀྱིས་བརྒྱན་པ། ཡེ་ཤེས་བཞི་འབར་བར་བྱེད་པའི་ས་གཞི་དང་བཅས་པའོ། །དེའི་དབུས་མ་དང་ཨ་ལས་བྱུང་བའི་ཉི་མ་དང་ཟླ་བའི་དཀྱིལ་འཁོར་དེ་
ཉིད་ཀྱི་སྟེང་དུ་ཧཱུཾ་ལས་བྱུང་བའི་རྡོ་རྗེ་སྔོན་པོ། ནས་ཙམ་ཁ་གྱེས་ལ་དེ་ཉིད་འཕྲོས་འདུས་པ་ལས་བཛྲ་ཧཱུཾ་ཞེས་པས་ལན་བདུན་བརྗོད་པས་ཧཱུཾ་ལས་བྱུང་བའི་སྟོབས་པོ་ཆེ་སྐུ་མདོག་མཐིང་ག་ཞལ་གཅིག་ཕྱག་བཞི་པ་དཔལ་རྡོ་རྗེ་རྣམ་པར་འཇོམས་པས་དབུ་བརྒྱན་པ། ཐོ་བ་དང་ཞགས་པ་དང་ཐོད་པ་དང༌། སྡིགས་མཛུབ་མེ་འབར་བ་དང་ལྡན་པའི་ཕྱག་རྒྱ་དང་ལྡན་པ་རྣམ་པར་བསྒོམ་མོ། །དེ་ནས་ཡེ་ཤེས་སེམས་དཔའ་གཞུག་པ་དང་གཉིས་སུ་མེད་པར་བརྟན་པར་བྱ་བ་དང༌། མཆོད་པ་ལྔ་དབུལ། རྡོ་རྗེ་རྣམ་པར་འཇོམས་བ་ལ་བསྟོད་པ། བདག་ཉིད་ཐ་མལ་པའི་ལུས་སུ་སླར་ལངས་ལ། འདོད་པའི་དོན་ཡིད་ལ་བྱས་ཏེ། ཡེ་ཤེས་ཀྱི་འཁོར་ལོ་ལས་བདུད་རྩིའི་ཆུ་རྒྱུན་ཕབ་སྟེ། བདག་ཉིད་ལུས་མགོ་མཇུག་ཏུ་བསྟིམས་པས་ལས་དང་ཉོན་མོངས་པའི་དྲི་མ་རྣམ་པར་དག་པར་བྱས་ལ། དེའི་རྗེས་ལ་བདག་དང་གང་བསྲུང་བའི་ལུས་དང་ཡན་ལག་ཐམས་ཅད་རྡོ་རྗེ་མི་ཆོད་པའི་གོ་ཆ་དང་ལྡན་པར་བྱའོ། །དེ་ནས་མཎྜལ་གྱི་སྟེང་དུ་སྙིང་པོ་ལྔ་དང་ལྡན་པའི་བུམ་པའི་ནང་དུ་ཆུ་གཙང་མ་སྲོག་ཆགས་མེད་པས་བཀང༌། དྲི་དང་འབྲུ་ལ་སོགས་པ་བུམ་པ་ལ་ཤིས་པའི་རྫས་རྣམས་ཀྱིས་ལེགས་པར་བལྟམས་ལ། ཁ་རྒྱན་དང་མགུལ་ཆིངས་ལ་སོགས་པའི་བུམ་པའི་རྒྱན་རྣམས་ཀྱིས་མཛེས་པར་བྱས་ལ་རབ་ཏུ་དྲི་ཞིམ་པ་དང་ལྡན་པའི་སྙིང་པོ་བྲིས་ལ་ཧཱུཾ་ཡོངས་སུ་གྱུར་པ་ལས། སྟོབས་པོ་ཆེར་རྣམ་པར་བལྟའོ། །གཞན་གྱིས་ལོངས་མ་སྤྱད་པའི་ཁམ་ཕོར་ཁ་སྦྱར་ཡུངས་ཀར་གྱིས་བཀང་ལ་བསྒྲུབ་བྱའི་མིང་རུས་གྲོ་ག་ལ་བྲིས་ལ་གི་ཝང་གིས་དྲིལ་ལ་གཞག་གོ །དེ་ནས་བདག་ཉིད་ཀྱི་སྲིན་ལག་གཡོན་བ་ལ་གཟུངས་ཐག་བཏགས་ཏེ། ཁ་བཤལ་ཞིང་ཁྲུས་དང་གཙང་སྦྲ་ལ་གནས་པར་བྱས་ལ། བཟླས་པ་བྱ་སྟེ། སྒྲུབ་པ་པོའི་ལྕེའི་སྟེང་དུ་རྡོ་རྗེ་སྔོན་པོ་ནས་ཙམ་གྱི་སྦུབས་མ་ནས་སྔགས་ཀྱི་རང་སྒྲ་རྫོགས་པར་བྱས་ལ་སྣང་བ་རྣམས་ཀྱང་རྡོ་རྗེ་ལྟ་བུར་གསང་སྔགས་ཀྱི་རང་སྒྲ་དང་ལྡན་པར་དམིགས་ལ་བདག་དང་སྟོབས་པོ་ཆེ་གཉིས་སུ་མེད་པར་བྱས་ལ། ཨོཾ་སརྦ་བདྱཱི་བཛྲ་བཛྲ་ད་ར་ད་ར་བཛྲ་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་བརྒྱ་རྩ་བརྒྱད་མངོན་པར་བསྔགས་ལ། བསྒྲུབ་བྱའི་མིང་རུས་ལ་
གུ་གུལ་གྱི་ཆུས་བཀྲུ་ཞིང་ངེས་པར་བློས་བྱས་པས། ཇི་ལྟར་འདོད་པ་བཞིན་དུ་འགྲུབ་པར་འགྱུར་ཏེ། སྔགས་ཀྱི་རྗེས་ལ་བདག་ལ་ནད་དང་དུག་དང་མཚོན་ལ་སོགས་པ་རྣམས་ཀྱིས་མི་ཆོད་པར་མཛད་དུ་གསོལ་ཞེས་གྲོ་ག་ལ་འཁོར་ལོ་བྲིས་ཏེ་མགུལ་དུ་ཡུངས་ཀར་དང་བཏགས་ན་མཚོན་ལ་སོགས་པ་རྣམས་ལས་རྣམ་པར་རྒྱལ་བར་འགྱུར་རོ། །སྡིག་པ་དག་པར་འདོད་ན་ཆུ་གཙང་མ་ལ་བསྔགས་ཏེ་ལྟོར་བཏང་ན་བསྐལ་བ་བདུན་གྱི་སྡིག་བ་མ་ལུས་པ་ཟད་པར་བྱེད་དོ། །དེ་ལྟར་འདིར་བྱུང་བའི་ཆོ་ག་ལས་ལན་གསུམ་གསུམ་གྱིས་ཉི་མ་རེ་རེ་ལ་རྫོགས་པར་བྱས་ནས། སྡིག་པ་མི་དགེ་བ་ཐམས་ཅད་ལས་ཐར་བར་ངེས་སོ། །དེ་བཞིན་དུ་སྦྲུལ་གྱིས་ཟིན་བ་དང་རྨ་དང་འབྲས་ལ་སོགས་བ་ལ་བ་སེར་མོའི་འོ་མས་སྦྲུས་པའི་འཇིམ་པ་ལ་ཉིན་མཚན་གསུམ་དུ་བཟླས་ཏེ་ཕྱུགས་ན་དེ་ཉིད་ལས་གྲོལ་བར་འགྱུར་རོ། །དེ་ལྟར་ན་རླུང་དང་ཆུ་ཆེན་པོ་དང་སེར་བ་དྲག་པོ་འབབ་ཅིང་གཞན་གྱིས་ཆོད་པར་དཀའ་བ་རྣམས་ལ་ཡུངས་ཀར་ལ་བསྔགས་ནས་གཏོར་ན་གཞན་གྱིས་མི་ཆོད་པ་རྣམས་ཀྱང་ཆོད་པར་འགྱུར་རོ། །གཞན་ཡང་བདག་ཉིད་ཀྱི་རིག་སྔགས་ཀྱི་ལས་མ་གྲུབ་པ་རྣམས་ཀྱང་འདི་ཉིད་ཀྱི་ཆོ་ག་ཞག་བདུན་འབད་ན་གཞན་གྱིས་སྤྱད་པར་དཀའ་བའི་ལས་འགྲུབ་པར་ངེས་སོ། །སྤྱིར་གཞན་ལ་གནོད་པར་བྱེད་པའི་གསང་སྔགས་དང་རིག་སྔགས་ཐམས་ཅད་ལས་གཟུངས་སྔགས་ཀྱི་ལས་ཐམས་ཅད་ལ་འདི་ཉིད་ལ་སྔོན་དུ་རྫོགས་པར་བྱས་ནས་རང་གི་ལས་ལ་སྦྱར་བ་གང་ཡིན་པ་སྦྱར་ན་འགྲུབ་པར་འགྱུར་བ་ལ་ཐེ་ཚོམ་མེད་པར་གཞན་གྱིས་སྤྱད་པར་དཀའ་བའི་ལས་འགྲུབ་པར་ངེས་སོ། །སྒྲུབ་པ་པོའི་ལུས་དང་ངག་དང་སེམས་ཡོངས་སུ་དག་པར་བྱ་བ་ནི་རབ་ཏུ་གཙོ་བའོ། །མི་ཆོད་བ་ཞེས་བྱ་བའི་རྒྱུད་ཀྱི་ཚིག་སྒྲུབ་ཐབས་སུ་ཕྱུང་བ་སློབ་དཔོན་ཡེ་ཤེས་རྡོ་རྗེས་མཛད་པ་དཔལ་རྡོ་རྗེ་རྣམ་པར་འཇོམས་པའི་ལས་ལ་སྦྱར་བ་འགྲུབ་པར་ངེས་པའི་ཆོ་ག་རྫོགས་སོ།།