ལས་ཀྱི་བྱེ་བྲག་བཞི་བཅུ་རྩ་གཉིས་བཀོད་པ་ཡིད་བཞིན་ནོར་བུ་འོད་འབར་བ་ཞེས་བྱ་བ།
ཡེ་ཤེས་རྡོ་རྗེ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །རིག་སྔགས་ཀྱི་ལས་ཐམས་ཅད་བྱེད་དུ་འཇུག་པའི་སྒྲུབ་པ་ལས་ཀྱི་བྱེ་བྲག་སྣ་ཚོགས་པ་བསྒྲུབ་པར་འདོད་པའི་སྒྲུབ་པ་པོ་དམ་ཚིག་དང་ལྡན་པས། གནས་ཁང་ཡིད་དང་མཐུན་པར་རྡོ་རྗེ་རྣམ་པར་འཇོམས་པའི་ལྷ་ལྔའི་དཀྱིལ་འཁོར་བཞེངས་ལ། བུམ་པ་ལྔ་ལ་རྒྱུད་སྟོང་ཕྲག་རེ་བཟླས་ལ། དེ་ནས་ལས་ལ་སྦྱར་བ་ནི། རིག་སྔགས་གཅད་པར་འདོད་ན་མཚོན་རྣོན་པོ་ལ་སྙིང་པོ་རྒྱས་པ་ལན་གཉིས་བརྗོད་པས་རྩྭ་ཀུ་ཤ་བཅད་དོ། །ཡང་ན་ས་བཅད་དོ། །དེས་རིག་སྔགས་བཅད་པར་ངེས་སོ། །ལན་གསུམ་པས་རིག་སྔགས་ཉམས་པ་སྐོངས་སོ། །མར་ངོའི་ཉི་ཤུ་གསུམ་ལ་སྔགས་བརྗོད་ལ་དཀྱིལ་འཁོར་གྱི་མདུན་དུ་མཆོད་པ་བྱས་ན་རྨི་ལམ་དུ་དགེ་བ་དང་མི་དགེ་བ་སྟོན་པར་ངེས་སོ། །ཐལ་བ་འམ་ཆུ་ལ་ལན་བཞི་བཟླས་ཏེ། དུར་ཁྲོད་ཀྱི་སོལ་བ་ལས་གཟུགས་བྱས་ཏེ། མཚོན་གྱིས་གཏུབ་ཅིང་ས་ལ་བརྡབས་ན་གདོན་ལས་གྲོལ་བར་ངེས་སོ། །ཡང་ན་དུར་ཁྲོད་ཀྱི་སོ་ལ་བས་ལག་མཐིལ་གཡོན་དུ་རྡོ་རྗེ་བྲིས་ཏེ། ས་ལ་གཟུགས་བྲིས་ལ་རྡོ་རྗེ་དང་ལྡན་པའི་ལག་པས་མནན་ན་གཞན་གྱི་རིག་སྔགས་ནོན་ཏོ། །སྐུད་པ་ལ་མདུད་པ་བོར་ལ་ལན་ཉེར་གཅིག་བརྗོད་པས་རིག་སྔགས་འཆིང་ངོ༌། །དཀྱིལ་འཁོར་གྱི་ཙནྡན་དམར་པོས་རྡོ་རྗེ་རྩེ་ལྔ་པ་བྲིས་ལ་གུ་གུལ་གྱིས་བདུགས་ལ་མེ་ཏོག་གཏོར་ཞིང་གཞན་གྱི་རྣ་བར་ལན་ཉེར་གཅིག་བཟླས་ན་ཀ་བབས་པར་ངེས་སོ། །ཆུའམ་སོ་ཕག་གི་དུམ་བུའམ་ཐལ་མོ་བརྡབས་པ་ལན་བདུན་བཟླས་ན་ནད་པ་ལ་ཕྲ་མེན་མའི་ཉེ་འབྱེད་ལས་གྲོལ་ལོ། །རྨ་བྱའི་མདོངས་དང་ཆུ་གྲི་དང་མེ་ལོང་ལ་བརྒྱ་བཟླས་མ་སྤྲུལ་གྱིས་ཟིན་པ་ལས་གྲོལ་ལོ། །རྒྱ་སྤོས་དང༌། རྒྱ་མཚོ་སྦུ་བ་དང༌། ལྡོང་རོས་དང༌། རྨ་བྱའི་མཁྲིས་པ་ལ་སྟོང་བཟླས་ཏེ། ཆུ་དང་སྦྱར་ཏེ་ལྟོར་བཏང་ན་དུག་གིས་ཟིན་པ་ལས་གྲོལ་ལོ། །ཆུ་བསྐོལ་བ་ལ་ལན་ལྔ་བཟླས་ཏེ་བཏང་ན་སྲིན་བུ་དང་སྤྲང་བུའི་ནད་སོས། མར་ལ་ལན་བརྒྱ་རྩ་བརྒྱད་བཟླས་བརྗོད་བྱས་ནས་བུད་མེད་སྦྲུམ་མའི་བུ་སྐྱེ་ཁ་མ་ལ་བྱིན་ན་བདེ་བར་བཙའ་བར་འགྱུར་རོ། །བདུག་པ་སྣ་ཚོགས་པ་ལ་སྔགས་ལན་ཉེར་གཅིག་བརྗོད་ནས་བདུགས་ན་བྱིས་པ་གདོན་གྱིས་ཟིན་པ་ལས་གྲོལ་ལོ། །སྦྱིན་སྲེག་གི་ཐལ་བ་དང་ཐལ་བ་གཙང་མ་ལ་ལན་བརྒྱ་རྩ་བརྒྱད་
བརྗོད་ནས་རྐུན་མ་བྱུང་བའི་ཕྱོགས་སུ་གཏོར་ན་རྐུ་མི་ཤེས་པར་འགྱུར་རོ། །གོས་ཀྱི་མཐའ་མར་མདུད་པ་ལན་བདུན་བོར་ནས་སྔགས་ལན་བདུན་བརྗོད་པས་བདག་བསྲུང་བར་ཤེས་སོ། །སྤྱི་གཙུག་གི་སྐྲ་ལ་མདུད་པ་བོར་ནས་ལན་བདུན་བརྗོད་པས་གཞན་བསྲུང་ངོ༌། །ཆུ་ལ་ལན་བརྒྱ་རྩ་བརྒྱད་བརྗོད་ནས་ཕྱོགས་བཞིར་གཏོར་བས་ཆུ་སྲིན་གྱི་འཇིགས་པ་ལས་གྲོལ་ལོ། །ཡུངས་ཀར་ལ་ལན་བདུན་བཟླས་ནས་གཏོར་ན་སྟག་གི་འཇིགས་པ་ལས་ཐར་རོ། །ཕུར་བུ་ལ་ལན་བརྒྱ་རྩ་བརྒྱད་བཟླས་ནས་ཞིང་དཀྱིལ་དུ་བཏབ་ན་ཞིང་སྲུང་བར་བྱེད་དོ།། ཤིང་སོར་བཅུ་གཉིས་པ་མེར་བཏང་ལ་འབྲས་དང་འོ་ཐུག་དང་ཞོ་དང་སྦྲང་རྩི་དང་མར་དང་སྦྱར་ལ་བླུགས་གཟར་དུ་བླུགས་ལ་ཞག་གསུམ་དུ་སྲེག་བླུགས་སྟོང་རྩ་བརྒྱད་བྱས་ན་བདག་དང་གཞན་ཞི་བར་འགྱུར་རོ། །ཞག་བདུན་བྱས་ན་གྲོང་ཁྱེར་ཙམ་ཞི་བར་འགྱུར་རོ། །མངར་གསུམ་གྱི་སྦྱིན་སྲེག་ཞག་བདུན་དུ་བྱས་ན་ཆར་འབེབས་སོ། །དཱུར་བའི་ཉག་མ་ལ་སྦྲང་རྩི་ཞོ་དང་མར་གྱི་ནང་དུ་བསྙུགས་པའི་སྦྱིན་སྲེག་ཉི་མ་གཅིག་ལ་ལན་སྟོང་རྩ་བརྒྱད་བྱས་ན་དེ་ལྟར་ཞག་བཅུའི་བར་ལ་བྱས་ན་དུས་མ་ཡིན་པར་འཆི་བ་རྣམས་ཞིའོ། །རྩྭ་དཱུར་བའི་སྦྱིན་སྲེག་ལན་འབུམ་བྱས་ན་ཚེ་སྟོང་ཕྲག་ལྔ་ཐུབ་བོ། །སློང་མོའི་ཟས་ཟ་ཞིང་སྔགས་འབུམ་ཕྲག་གཅིག་བཟླས་ཏེ། ཟླ་བ་གཟས་ཟིན་པའི་ཚེ་བ་ནག་མོའི་འོ་མ་ལ་ལན་བརྒྱ་རྩ་བརྒྱད་བརྗོད་ནས་བྱུགས་ན་བཅུད་ལེན་དུ་འགྱུར་རོ། །ལོ་ལེགས་པ་དང་བུ་ཚ་འཕེལ་བར་འདོད་ན་ཞོའི་སྦྱིན་སྲེག་བརྒྱ་རྩ་བརྒྱད་བྱས་པས་འགྲུབ་པར་འགྱུར་རོ། །ཕ་རོལ་གྱི་དཔུང་གི་གནོད་པ་ཉམས་པར་བྱེད་ན། ལྕགས་ཕྱེ་ཏིལ་མར་དང་སྦྱར་བའི་སྦྱིན་སྲེག་ལན་གསུམ་བྱས་ཏེ། རྒྱལ་མཚན་དང་དུང་ལ་བརྒྱ་རྩ་བརྒྱད་བརྗོད་པས་འཕྱར་ཞིང་བུས་པས་རྒྱལ་མཚན་མཐོང་ཞིང་དུར་གི་སྒྲ་ཐོས་པས་ཕ་རོལ་གྱི་དམག་དཔུང་གིས་མི་ཚུགས་སོ། །གཞན་དུ་ལོངས་མ་སྤྱད་པའི་བུམ་པ་འབྲུ་དང་སྨན་དང་རིན་པོ་ཆེས་བཀང་ལ་ལན་བརྒྱ་རྩ་བརྒྱད་བཟླས་ནས་ཁྲུས་བྱས་ན་བགེགས་ཀྱིས་ཟིན་པ་ལས་ཐར་རོ། །བྱིས་པ་བཀྲུས་ན་གདོན་གནོད་དོ་ཅོག་གིས་ཟིན་པ་ལས་ཐར་བར་འགྱུར་རོ། །
རྨ་བྱའི་མཇུག་མ་ལ་ལན་སྟོང་རྩ་བརྒྱད་བརྗོད་ན་དུག་གོ་ཅོག་ཞི་བའོ། །སྐུད་པ་ལ་མདུད་པ་བདུན་བོར་ནས་ལན་བརྒྱ་རྩ་བརྒྱད་བརྗོད་ནས་མགུལ་དུ་བཏགས་ན་རིམས་ནད་བསྲུང་ངོ༌། །ལམ་དུ་ཞུགས་པའི་ཚེ་རྡོ་རྗེ་ཅན་ལ་དམིགས་ཏེ་ལན་གསུམ་བརྗོད་ནས་སོང་ན་ཆོམ་རྐུན་གྱི་འཇིགས་པ་མི་འབྱུང་ངོ༌། །གྲུ་རྒལ་བའི་ཚེ་ཆུ་ལ་ལན་བདུན་བརྗོད་ནས་ཆུའི་ནང་དུ་གཏོར་ནས་ཆུ་རྒལ་ན་བདེ་བར་ངོགས་སུ་ཕྱིན་ནོ། །ཡུངས་ཀར་ལ་སྟོང་རྩ་བརྒྱད་བཟླས་ནས་བདག་གི་དམག་འཁོད་པའི་ས་ལ་དང༌། མགོ་ལ་གཏོར་ན་དམག་ལས་རྒྱལ་བར་ངེས་སོ། །མདའ་སྔོན་པོ་ལ་སྟོང་རྩ་བརྒྱད་བརྗོད་ནས་ཕ་རོལ་གྱི་དམག་གི་ཁྱིམ་དུ་འཕངས་ན་ཕ་རོལ་གྱི་མཚོན་གྱི་ནུས་པ་ཉམས་པར་འགྱུར་རོ། །ཡིད་ལ་བཟླས་བརྗོད་བརྒྱ་རྩ་བརྒྱད་བྱས་ན་ཆོམ་རྐུན་གྱི་ནུས་པ་མེད་པའོ། །ལྕགས་ཀྱི་ཕུར་པ་ལན་སྟོང་བཟླས་ནས་དུར་ཁྲོད་དུ་བཙུགས་ན། མི་མ་ཡིན་པ་ཐམས་ཅད་ཀྱི་གནོད་པ་དང་བྲལ་ཞིང་བཅིང་བར་འགྱུར་རོ། །དེ་ཉིད་ཕྱུང་ན་མཐོང་བར་ངེས་སོ། །མཚམས་གཅད་པར་འདོད་ན་ཡུངས་ཀར་རམ་དུར་ཐལ་ལམ་ཆུས་བྱའོ། །ནད་པ་ལ་གདོན་དབབ་པ་ནི་གུ་གུལ་ལ་ལན་ཉེར་གཅིག་བཟླས་ཏེ་བདུག་གོ །ཆར་དབབ་པར་དཀའ་ན་མངར་གསུམ་ཁྲག་དང་སྦྱར་བའི་སྦྱིན་སྲེག་སྟོང་རྩ་བརྒྱད་བྱས་པས་དབབ་བོ། །མངར་གསུམ་དཀར་དང་བཅས་པའི་སྦྱིན་སྲེག་བྱས་ན་ཆར་པ་འཆད་དོ། །སེར་བ་བཅང་པར་འདོད་ན་ཡུངས་ཀར་དང་ཏིལ་ནག་པོ་ལ་བཟླས་སོ། །སྤྲིན་བསྡུ་བར་འདོད་ན་སྲིན་བལ་གྱི་མདུད་པ་ལ་བཟླས་སོ། །དེ་ལྟར་རིག་སྔགས་ཀྱི་ལས་ཐམས་ཅད་བྱེད་དུ་འཇུག་པའི་ལས་ཀྱི་བྱེ་བྲག་བཞི་བཅུ་རྩ་གཉིས་བཀོད་པ་ཡིད་བཞིན་ནོར་བུ་འོད་འབར་བ་ཞེས་བྱ་བ། སློབ་དཔོན་ཡ་ཤེས་རྡོ་རྗེས་མཛད་པ་རྫོགས་སོ།།