ཀླུ་རྣམས་མཉེས་པར་བྱེད་པའི་ཆུ་ལ་བརྟེན་པའི་གཏོར་མ་བདུད་རྩིའི་རྒྱ་མཚོ་ཞེས་བྱ་བ།
མར་མེ་མཛད་བཟང་པོ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །འདོད་པ་ཐམས་ཅད་རབ་ཏུ་སྦྱིན་པ་ལས་ཀླུ་ལ་སོགས་པའི་འགྲོ་བ་རྣམས་ཚིམ་པར་འདོད་པའི་ཆོ་ག་རྫོགས་པར་འདོད་པས། སྣོད་རབ་ཏུ་མཛེས་ཤིང་དྲི་མ་མེད་པའི་ནང་དུ་ཆུ་གཙང་མ་སྲོག་ཆགས་མེད་པ་ལ་འབྲུ་སྣ་ཚོགས་ཀྱི་ཕྱེ་མ་དང་རིན་པོ་ཆེ་ལྔ་དང་སྨན་ལྔ་དང༌། དྲི་ལྔ་དང་མེ་ཏོག་ལྔ་ལ་སོགས་པས་བལྟམས་ལ་བདག་ཉིད་ཁ་བཤལ་ལ། ན་མོ་རྒྱལ་བ་སྲས་དང་བཅས་པ་མ་ལུས་དགོངས་སུ་གསོལ། །བླ་མ་དཀོན་མཆོག་གསུམ་ལ་ཕྱག་འཚལ་ལོ། །བླ་མ་དཀོན་མཆོག་གསུམ་ལ་སྐྱབས་སུ་མཆི། །བླ་མ་དཀོན་མཆོག་གསུམ་ལ་མཆོད་པར་བགྱི། །སྡིག་པ་མི་དགེ་སོ་སོར་བཤགས། །དགེ་བ་བགྱིད་ལ་རྗེས་ཡི་རང༌། །མྱ་ངན་མི་འདའ་གསོལ་བ་འདེབས། །ཆོས་ཀྱི་འཁོར་ལོ་བསྐོར་བར་བསྐུལ། །བསགས་པའི་དགེ་བ་བསྔོ་བར་བགྱི། །ཀུན་ཀྱང་བྱང་ཆུབ་ཐོབ་པར་སྨོན། །བླ་མ་དཀོན་མཆོག་སྤྱན་སྔ་རུ། །བྱང་ཆུབ་སེམས་ནི་བསྐྱེད་པར་བགྱི། །མ་གྲོལ་བ་རྣམས་གྲོལ་བར་བགྱི། །མ་བསྒྲལ་བ་རྣམས་བསྒྲལ་བར་བྱ། །དབུགས་མ་ཕྱུང་བ་དབུགས་དབྱུང་ཞིང༌། །སེམས་ཅན་མྱ་ངན་འདས་ལ་དགོད། །ཅེས་བརྗོད་དོ། །སྒྲུབ་པ་པོ་དམ་ཚིག་དང་ལྡན་པས་སྔོན་དུ་སྟོང་པ་ཉིད་ལ་བློ་གནས་པར་བྱས་ལ། ཚད་མེད་པ་བཞི་རྣམ་པར་བསྒོམ་པར་བྱའོ། །དེའི་འོག་ཏུ་བདག་ཉིད་སྐུ་མདོག་དཀར་པོ་མཆོག་སྦྱིན་གྱི་ཕྱག་རྒྱ་དང་ལྡན་པར་བྱས་ལ། ཨོཾ་སརྦ་ཨ་ཡ་སྭཱ་ཧཱ་ཞེས་ཆོས་ཉིད་དབྱིངས་རྣམ་པར་དག་པའི་རང་སྒྲས་གཏོར་མའི་ཉེས་པའི་སྐྱོན་རྣམས་སྦྱངས་ཏེ། ཡེ་ཤེས་ཀྱི་བདུད་རྩི་རོ་མཆོག་བརྒྱ་དང་ལྡན་པར་དམིགས་སོ། །དེ་ནས་ན་མཿས་མནྟ་བཛྲ་ཎཱཾ་ཞེས་བརྗོད་ཅིང༌།
ལྕགས་ཀྱུའི་ཕྱག་རྒྱ་དང་ལྡན་བས་བླ་མ་དགེ་བའི་བཤེས་གཉེན་དང༌། བུདྡྷ་བོ་དྷི་སཏྭ་དང༌། ཉན་རང་དང་ཁམས་གསུམ་ན་གནས་པའི་འཇིག་རྟེན་སྐྱོང་བའི་སྲུང་མ་དང༌། མགྲོན་བཞི་སྤྱན་དྲངས་ཏེ། རྩོད་པ་ཕྲག་དོག་མེད་པར་བཞུགས་པར་བསམ་མོ། །དེ་ནས་ཨོཾ་ན་མཿསརྦ་ཏ་ཐཱ་ག་ཏ་སརྦ་ཨ་པ་ཛཱ་ཡ་སྭཱ་ཧཱ་ཞེས་བརྗོད་པས་ཇི་ལྟར་འདོད་པ་བཞིན་དུ་ཚིམ་པར་མོས་པ་བྱའོ། །དེ་ནས་ཚིགས་བཅད་འདི་དག་རྣམས་ཀྱང་བརྗོད་དོ། །ཆོས་དང་མི་འཇིགས་ཟང་ཟིང་གིས། །སྲིད་བཞིའི་འཕགས་པ་དཀོན་མཆོག་གསུམ། །ཡབ་ཡུམ་སྲས་དང་བཅས་རྣམས་ལ། །ཞིང་ཁམས་དཔག་ཏུ་མེད་པ་ན། །བཞུགས་ཤིང་སྟོན་པ་འཁོར་དང་བཅས། །རྡུལ་གཅིག་སྟེང་ན་རྡུལ་སྙེད་དང༌། །ཉན་ཐོས་རྣམས་དང་རངས་སངས་རྒྱས། །དགྲ་བཅོམ་དྲི་མ་མེད་རྣམས་ལ། །མཆོད་སྦྱིན་དག་གིས་གཏོར་མ་བསྔོ། །ཡོན་ཏན་མགྲོན་དུ་གྱུར་པ་ནི། །ཚངས་པ་ལ་སོགས་ལྷ་ཆེན་བརྒྱད། །རྒྱལ་ཆེན་བཞི་དང་ཕྱོགས་སྐྱོང་བཅུ། །གཟའ་བརྒྱད་ཀླུ་བརྒྱད་འཕྲོག་མའི་བུ། །མཁའ་འགྲོ་མ་དང་ཆོས་སྐྱོང་རྣམས། །སྟོང་གྲོགས་མགོན་ཚུལ་བྱེད་ལ་བསྔོ། །ལན་ཆགས་མགྲོན་གྱི་རིགས་རྣམས་ལ། །བགེགས་རིགས་སྟོང་ཕྲག་བརྒྱད་ཅུ་དང༌། །ཁྱད་པར་མཆོག་རིགས་བཅོ་ལྔ་དང༌། ཀླུ་དང་ས་བདག་མ་མོ་དང༌། །བདུད་དང་རྒྱལ་པོ་བཙན་རིགས་དང༌། །ས་སྲིན་ཀླུ་སྲིན་བཙན་རིགས་དང༌། །འབྱུང་པོ་མང་པོ་འཁོར་དང་བཅས། །སྔོན་གྱི་ལན་ཆགས་སྙེགས་ལ་བསྔོ། །སྙིང་རྗེའི་མགྲོན་དུ་གྱུར་པ་ནི། །ཁམས་གསུམ་འཁོར་བའི་རིགས་དྲུག་སྟེ། །སྐྱེ་བཞི་ལམ་ལྔས་བསྡུས་པ་ཡི། །སེམས་ཅན་རྣམས་ལ་ཅི་རིགས་པར། །ཐོགས་པ་མེད་པར་འབྱུང་གྱུར་ཅིག །བྱོལ་སོང་གཅིག་ལ་གཅིག་ཟ་བ། །དེ་རྣམས་བདེ་དང་ལྡན་ནས་ཀྱང༌། །ཡི་དགས་རྣམས་ལ་ཟས་སྐོམ་དང༌། །ཇི་ལྟར་འདོད་པ་ཐོབ་གྱུར་ཅིག །སེམས་ཅན་དམྱལ་བའི་སྡུག་བསྔལ་གང༌།། མི་བཟད་རྣམ་པ་སྣ་ཚོགས་པ། །དེ་དག་རྣམས་ལས་ཐར་བར་ཤོག །ཅེས་བསྔོའོ། །གཞན་ཡང་ཇི་ལྟར་རིགས་པར་བསྔོ། །ཀླུ་རྣམས་མཉེས་པར་བྱེད་པའི་ཆུ་ལ་བརྟེན་པའི་གཏོར་མ་བདུད་རྩིའི་རྒྱ་མཚོ་ཞེས་བྱ་བ་དཔལ་མར་མེ་མཛད་བཟང་པོས་མཛད་པ་རྫོགས་སོ།།