མངོན་སྤྱོད་ཀྱི་སྦྱིན་སྲེག་གི་སྒོ་ནས་ཚར་བཅད་པའི་ལས་དབང་དུ་བྱ་བའི་སྦྱིན་སྲེག་གི་ཆོ་ག།
དཔལ་རྡོ་རྗེ་འཛིན་པ་ལ་ཕྱག་འཚལ་ལོ། །མངོན་སྤྱོད་ཀྱི་སྤྱིན་སྲེག་གི་སྒོ་ནས་ཚར་གཅད་པའི་ལས་བསྒྲུབ་པར་འདོད་པའི་སྒྲུབ་པ་པོ་དམ་ཚིག་དང་ལྡན་པས། མར་གྱི་ངོའི་བརྒྱད་པ་ལ་ཐོབ་ཁུང་ཁྲུ་གང་པ་གྲུ་གསུམ་པ་དཔངས་སུ་ཁྲུ་ཕྱེད་པ་ཁ་རན་སོར་བཞི་རྡོ་རྗེ་གདེངས་པ། འཇིམ་པ་ལ་རྡོ་རྗེ་གདེངས་པ་འབུར་དུ་བཏོད་པ་ནང་དུར་ཁྲོད་ཀྱི་སོལ་བ་ལ་སོགས་པ་ནག་པོས་བྱ། ནང་དུ་མེ་རི་དང༌། དབུས་དང་གྲུ་རྣམས་སུ་མེའི་ས་བོན་བྲི་བར་བྱའོ། །ས་གཞི་རྣམས་ཀྱང་
ནག་པོ་མེ་ཏོག་ནག་པོའི་གཅལ་དགྲ་མ། དུག་ཤིང་ལ་སོགས་པའི་ཡམ་ཤིང་ལ་རོ་རས་ཀྱིས་དཀྲིས། ཏིལ་མར་གྱིས་བྱུགས་ལ་སྲིད་དུ་ཁྲུ་གང་བ། སྦོམ་པ་ནི་ཆང་པ་གསུམ་པ་བྱའོ། །ཡང་ཚེར་མ་ཅན་གྱི་ཤིང་མཐའ་དག་ལ་དགང་གཟར་གྱི་ཚད་ནི་སྔར་དང་འདྲ་བ་ལ་དབྱིབས་གྲུ་གསུམ་པ་རྡོ་རྗེས་མཚན་པ། བླུགས་གཟར་འདྲའི། སྲེག་རྫས་ནི་དུག་དང༌། ཏིལ་ནག་པོ་དང༌། ཡུངས་ནག་དང༌། ཟིར་དང༌། འབྲུ་མར་སྣ་ཚོགས་པས་སྲེག་གོ །དགྲའམ་གང་སྡང་བར་སེམས་པའི་མིང་གྲོ་གལ་ཡེ་དང་ཕཊ་ཀྱི་བར་དུ་བཅུག་ལ་བྲི་བར་བྱའོ། །དེ་ནས་བདག་ཉིད་གོས་ནག་པོ་གོན་ཏེ། ཁ་ལྷོ་ཕྱོགས་སུ་བལྟས་ལ་མེ་ལྷ་སྤྱན་དྲང་བ་དང༌། སྲེག་རྫས་དབུལ་བ་ལ་སོགས་པ་སྔ་མ་བཞིན་བྱས་ལ་བྱམས་པ་དང་སྙིང་རྗེའི་སེམས་སྤངས་ལ། དྲག་ཤུལ་དང་ལྡན་པའི་སེམས་སུ་བལྟས་ཏེ། གསད་པ་དང༌། བསྐྲད་པ་དང༌། བཅིང་བ་དང༌། །བཀར་བ་ལ་སོགས་པའི་ལས་ཅི་རིགས་པར་བྱའོ། །མེ་ནི་བྲམ་ཟེའི་ཁྱིམ་ནས་བླངས་ལ་རླུང་ཡབ་ཀྱིས་མེ་སྤར་ལ་བྱའོ། །སྲེག་རྫས་དབུལ་བའི་སྔགས་ཀྱི་ཐ་མ་ལ་དགྲ་ལ་བྱེད་ན་ཨ་མུ་ཀ་མཱ་ར་ཡ་ཧཱུཾ་ཕཊ་ཅེས་པ་དང་བགེགས་ལ་བྱེད་ན་ཨུ་ཙ་ཏ་ཡ་ཕཊ་ཅེས་པས་བྱའོ། །དེ་ལྟར་ཉི་མ་རེ་ལ་ལན་ཉེར་གཅིག་ཏུ་བྱས་པའི་བརྒྱ་རྩ་བརྒྱད་དུ་བྱས་ན་ཚར་གཅད་པའི་ལས་ངེས་པར་འགྲུབ་བོ།།