བསྒྲུབ་བྱ་ཀླུ་རྣམས་ཀྱི་བྱད་དུ་གཞུག་པའི་ཆོ་ག་སྲོག་གཅོད་ཀྱི་སྤུ་གྲི་ཞེས་བྱ་བ།
མར་མེ་མཛད་བཟང་པོ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །བསྒྲུབ་བྱ་ཀླུ་རྣམས་ཀྱི་བྱང་དུ་གཞུག་བར་འདོད་པའི་སྒྲུབ་བ་པོ་དམ་ཚིག་དང་ལྡན་པས། ཀླུ་གདུག་པ་དང་ལྡན་བའི་ས་གང་ན་གནས་པའི་ས་ནས། ས་དང་རྡོ་དང་ཤིང་དང་ཆུ་ལ་སོགས་པ་བླངས་ལ་སྟེགས་བུ་ཁྲུ་གང་བ་ཅིག་བྱས་ལ། དེ་ལ་སྔ་མ་བཞིན་དུ་ཀླུ་བརྒྱད་ཀྱི་དཀྱིལ་འཁོར་བྲིས་ལ། མཐའ་མ་ཀླུ་ཤིང་སྣ་ཚོགས་བས་བསྐོར་ལ་གཞག་གོ །དེའི་བྱང་དུ་དུར་ཁྲོད་ཀྱི་ས་ལས་གྲུ་གསུམ་ནག་པོ་བྱས་ཏེ། དེའི་སྟེང་དུ་མཛེ་ཐོད་ཀྱི་ནང་དུ་བསྒྲུབ་བྱའི་གོས་དུམ་བུའམ་དྲི་ཆན་དྲི་ཆུ་རྗེས་ས་ལ་སོགས་པ་གང་རྙེད་དང༌། བག་ཟན་བསྲེས་ལ་དེའི་ཁོང་དུ་རའི་ཁྲག་གིས་བསྒྲུབ་བྱའི་མིང་དང་རུས་ངང་ཡུལ་དང་ས་ཁྱིམ་དང༌། ཕ་ཚན་དང་དུར་མིང་བྲིས་ལ་དུར་ཁྲོད་ཀྱི་རས་མ་ལ་སྣ་ཚོགས་རྡོ་རྗེ་དུག་ཁྲག་གིས་བྲིས་པས་དྲིལ་ལ་ཡུགས་ས་
མོའི་སྐྲ་སྐུད་ཕྱིན་ཀ་ལོག་གིས་རྒྱ་གྲམ་བསྒྲིལ་ལ་གཞག་གོ །དེའི་ནང་དུ་སྤྲེའུའི་ཁྲག་དང་མཛེ་ཁྲག་དང་ར་རོག་པོའི་ཁྲག་གཏིག་གོ །ལྕགས་ཕྱེ་དང་དུར་ཁྲོད་ཀྱི་རྡོ་ཕྱེ་དང༌། ཡུངས་ཀར་དང༌། ཡུངས་ནག་དང༌། དུག་སྣ་ཚོགས་ལ་ཀླུ་བརྒྱད་ཀྱི་སྙིང་པོ་འབུམ་ཕྲག་བདུན་བཟླས་ཤིང་གྲུབ། སྐབས་སུ་ཀླུ་རྣམས་ལ་བསྟོད་ཅིང་གཏོར་མ་སྦྱིན། འདོད་པའི་དོན་ལ་གསོལ་བ་གདབ་བོ། །ཀླུའི་སྙིང་པོའི་གཞུག་ལ་ཨ་མུ་ཀཾ་མཱ་ར་ཡ་ཕཊ་ཅེས་གདགས་སོ། །དེ་ནས་རྒྱུད་རྫོགས་པ་བརྒྱ་བཀླགས་ལ། མཆོད་པ་དང་བསྟོད་པ་བྱས་ལ་ཀླུའི་ཕོ་བྲང་དུ་མནན་བ་བྱས་ན་བསྒྲུབ་བྱ་དེ་ཟླ་བ་ལྔ་ནས་གདོན་མི་ཟ་བར་བརླག་པར་ངེས་སོ། །དེ་ཡང་རྒྱལ་རིགས་ལ་གཏད་ན་མཛེ་ཐོད་ཀྱིས་བྱ། རྗེའུ་རིགས་ལ་གླང་དམར་པོའི་རྭ་གཡས་པ། བྲམ་ཟེ་ལ་རབས་ཆད་ཀྱི་ཐོད་པ། དམངས་རིགས་ལ་སྦལ་པའི་ལུས་པོར་བྱ། གདོལ་པ་ལ་ཕག་ནག་པོའི་ཐོད་པར་བྱ། གླུད་དང་ཆུ་གཏོར་ཅི་མང་དུ་གཏོང་ངོ༌། །བསྒྲུབ་བྱ་ཀླུ་རྣམས་ཀྱི་བྱད་དུ་གཞུག་པའི་ཆོ་ག་སྲོག་གཅོད་ཀྱི་སྤུ་གྲི་ཞེས་བྱ་བ། དཔལ་མར་མེ་མཛད་བཟང་པོས་མཛད་པ་རྫོགས་སོ།།