ལྕེའི་དབང་པོ་ཉམས་པ་གསོ་བའི་ཆོ་ག་པདྨ་རྒྱས་པ་ཞེས་བྱ་བ།
ཡེ་ཤེས་རྡོ་རྗེ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལ། །ལྕེའི་དབང་པོ་ཉམས་ཤིང་ན་བ་གསོ་བར་འདོད་པའི་སྒྲུབ་པ་པོ་དམ་ཚིག་དང་ལྡན་པས། གོས་གསར་པ་གོན་ཏེ་སྨྱུང་བར་གནས་པར་བྱས་ལ་ཁྲུས་ཀྱི་ཆོ་ག་ལན་ཉི་ཤུ་རྩ་གཅིག་བྱས་ཏེ། དེ་ནས་རང་ཉིད་ལྷའི་རྣལ་འབྱོར་དུ་བྱས་ཏེ། སྙིང་གའི་ས་བོན་ལས་འོད་སྔ་མ་ལྟར་ལན་གསུམ་དུ་འཕགས་པ་མཆོད་པ་དང༌། སེམས་ཅན་གྱི་དོན་བྱས་པའི་གཞུག་ལ་རོའི་ལྷ་མོ་འཇིག་རྟེན་དང་འཇིག་རྟེན་ལས་འདས་པའི་རོ་སྣ་ཚོགས་འཛིན་པ་རྣམས་བདག་ཉིད་ཀྱི་ལྕེ་ལ་ཐིམ་པས་སངས་རྒྱས་ཐམས་ཅད་ཀྱི་ལྗགས་རིང་ཞིང་ཡངས་པ་ཡེ་ཤེས་འདུས་པ་ལས་བྱུང་བ། མཁྱེན་པ་མ་འགགས་པར་གསལ་བར་དམིགས་ཤིང་སྙིང་པོ་རྒྱས་བསྡུས་ཅི་རིགས་པར་བཟླས་པ་བྱའོ། །དེ་ལྟར་ཡང་སྐྲངས་པ་རྣམས་ལ་རྒྱ་ཚལ་བཟླས་པ་བྱ་སྟེ་བྱུག་གོ །བརྡ་མི་ཤེས་པ་རྣམས་ལ་ཤིང་ཀུན་ལ་བཟླས་སོ།།
ཚ་ཞིང་ཟུག་དང་ལྡན་པ་རྣམས་ལ་འབྲས་བུ་གསུམ་གྱི་ཁུ་བ་དང་ག་པུར་གྱི་ཆུ་ལ་བཟླས་སོ། །གྲང་ཞིང་སེར་ཀ་དང་ལྡན་པ་རྣམས་ལ་ཚ་བ་གསུམ་དང་ཙནྡན་གྱི་ཆུ་ལ་བཟླས་སོ། །ལྕེའི་དབང་པོ་ཉམས་པ་གསོ་བའི་ཆོ་ག་པདྨ་རྒྱས་བ་ཞེས་བྱ་བ། སློབ་དཔོན་ཡེ་ཤེས་རྡོ་རྗེས་མཛད་པ་རྫོགས་སོ།།