མཆོད་རྟེན་གདབ་པ་ཤི་བའི་སྡིག་པ་བྱང་བར་བྱེད་པ་རང་བྱུང་འཇིགས་བྲལ་ཞེས་བྱ་བ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །དེ་ལྟར་སྡིག་པ་སྦྱངས་པར་བྱས་ནས། ལྷག་མའི་རུས་པ་ལ་ཚ་ཚ་འདེབས་པར་འདོད་པས། སྒྲུབ་པ་པོ་དམ་ཚིག་དང་ལྡན་པས། དང་པོ་སྟོང་པ་ཉིད་ཀྱི་ངང་ནས་རཾ་ཞེས་ཡོངས་སུ་གྱུར་པ་ལས། སའི་ཉེས་པའི་སྐྱོན་རྣམས་ཡེ་ཤེས་ཀྱི་མེས་སྦྱང༌། དེ་ནས་བཾ་ཡོངས་སུ་གྱུར་པ་ལ་ལས་ཡེ་ཤེས་ཀྱི་ཆུ་རྒྱུན་དབབ། དེ་ནས་ཡཾ་ཞེས་གྱུར་པ་ལས། ཡེ་ཤེས་ཀྱི་རླུང་གིས་བསྐྱོད། སཾ་ཞེས་པ་གྱུར་པ་ལས། ཡེ་ཤེས་བཞི་འདུས་པའི་སར་དམིགས་ལ་སྐབས་དེར་བདུན་རྣམ་པར་དག་པའི་ལས་བྱའོ། །ཚོགས་རྫོགས་པར་བྱས་ལ་འབི་འབི་བྱ་བའི་སྔགས་ནི། ཨོཾ་མ་ཧཱ་བ་ལེ་བེ་ག་ར་ཎ་ཧཱུཾ་ཞེས་བརྗོད་ཅིང༌། ཡེ་ཤེས་ཀྱི་གཞལ་ཡས་ཁང་གི་རྒྱུར་བྱིན་གྱིས་བརླབ་བོ། །དེ་ནས་ཚ་ཚ་གདབ་པ་ནི་སྙིང་པོ་རྒྱས་བསྡུས་གང་ལ་མོས་པ་བཟླས་ཤིང་གདབ་བོ། །དེ་ནི་ས་ལ་འདེབས་པའི་ལུགས་སོ། །དེ་མེ་ལ་འདེབས་ན་རཾ་གྱི་ས་བོན་ལས་བསྐྱེད་ལ། ཆུ་ལ་བཾ། རླུང་ལ་ཡཾ། ནམ་མཁའ་ལ་ཨ་ལས་མཆོད་རྟེན་དུ་བསྐྱེད་དོ། །མཆོད་རྟེན་དེ་དག་ཀྱང་ས་ལ་ཁ་དོག་སེར་པོ། ཆུ་དཀར་པོ། མེ་དམར་པོ། རླུང་ལྗང་གུ། ནམ་མཁའ་མཐིང་གར་དམིགས་སོ། །དེ་ལྟར་བཏབ་ལ་ཡེ་ཤེས་ཀྱི་མཆོད་རྟེན་སྤྱན་དྲངས་ལ་གཉིས་སུ་མེད་པར་བསྟིམ་མོ། །དེ་ནས་བསྐལ་པ་ཇི་སྲིད་གནས་པའི་ཡུན་ལ་རིགས་ལྔའི་མཆོད་རྟེན་དུ་དམིགས་ལ། རབ་ཏུ་གནས་པ་བྱས་ལ་མཆོད་པ་ལྔ་ཕུལ་ལ་བཞུགས་སུ་གསོལ་བའམ། ཡང་ན་ཆུ་བོ་ཆེན་པོ་ལ་བསྐུར་རོ། །མཆོད་རྟེན་གདབ་པ་ཤི་བའི་སྡིག་པ་བྱང་བར་བྱེད་པ། རང་བྱུང་འཇིགས་བྲལ་ཞེས་བྱ་བ། དཔལ་མར་མེ་མཛད་ཀྱིས་མཛད་པ་རྫོགས་སོ།།