མི་བཟད་པའི་ནད་ཞི་བར་བྱེད་པ་གསེར་གྱི་རྒྱ་མཚོ་ཞེས་བྱ་བ།
ཡེ་ཤེས་རྡོ་རྗེ།
དཔལ་རྡོ་རྗེ་ཅན་ལ་ཕྱག་འཚལ་ལོ། །སེམས་ཅན་རྣམས་ཀྱི་ནད་མི་བཟད་པ་དྲག་པོ་ཞི་བར་འདོད་པའི་སྒྲུབ་པ་པོ་དམ་ཚིག་དང་ལྡན་པས། སེང་ལྡེང་གི་ལོ་མ་བརྡུངས་ཏེ། བཙིར་བའི་ཁུ་བ་ལ་བཟླས་པ་སྟོང་ཕྲག་བདུན་བཟླས་ན། འབྲུམ་བུ་མེ་དབལ་ནག་པོ་ཤིན་ཏུ་མི་བཟད་པའི་ནད་ཞི་བར་འགྱུར་རོ། །ཨ་ལ་ཀའི་ལོ་མ་འབྲས་བུ་དང་བཅས་པའི་ཕྱེ་མར་བྱས་ནས་སྔ་མ་བཞིན་དུ་བཟླས་ནས། བླུད་ན་གག་ལྷོག་དང་འབྲས་མི་བཟད་པ་ཞི་བར་ངེས་སོ། །གླ་རྩི་དང་བཙན་དུག་སྔགས་ཀྱིས་ཟིན་པ་ལ་སྔ་མ་ལྟར་བཟླས་ནས་བླུད་ན་མཛེ་ནད་མི་བཟད་པ་རྣམས་ཞི་བར་ངེས་སོ། །སོ་མ་ར་ཛ་དང༌། ཙནྡན་དཀར་པོ་དང༌། ཕག་པའི་མཁྲིས་པ་དང༌། རྨ་བྱའི་སྒོ་ང་སེར་པོ་ལ་སྔ་མ་ལྟར་བཟླས་ནས་བླུད་ན། དུག་ནད་མི་བཟད་བ་ལས་ཐར་བར་ངེས་སོ། །དར་ཡ་ཀ་དམར་པོ་དང༌། སྐྱེར་པའི་ཁཎྜ་ལ་སྔ་མ་ལྟར་བཟླས་ནས་བླུད་ན་མཁྲིས་པ་ཤ་ཡའི་ནད་མི་བཟད་པ་ཞི་བར་འགྱུར་རོ། །འབྲས་བུ་གསུམ་པ་དང་པ་ལ་ཤ་དང༌། ཙི་ཏྲ་ཀའི་ཁུ་བ་ལ་སྔ་མ་ལྟར་བླུད་ན་སྨྱོ་འབོག་གི་ནད་རྣམས་ཞི་བར་འགྱུར་རོ། །ཁྱིའི་རུས་
པ་དང་ག་པུར་གྱི་ཆུ་དང་བཟང་དྲུག་གི་མེ་ཏོག་རྣམས་ལ་སྔ་མ་ལྟར་བཟླས་ནས་བླུད་ན། རིམས་ཀྱི་ནད་མི་བཟད་པ་རྣམས་ཞི་བར་འགྱུར་རོ། །མི་བཟད་པའི་ནད་ཞི་བར་བྱེད་པ་གསེར་གྱི་རྒྱ་མཚོ་ཞེས་བྱ་བ། སློབ་དཔོན་ཡེ་ཤེས་རྡོ་རྗེས་མཛད་པ་རྫོགས་སོ།།