བསོད་ནམས་འཕེལ་བར་བྱེད་པའི་དཔལ་ཡེ་ཤེས་ཀྱི་ཕྲེང་བ་ཞེས་བྱ་བ།
ཡེ་ཤེས་རྡོ་རྗེ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །བསོད་ནམས་རྒྱ་ཆེན་པོ་འཕེལ་བར་འདོད་པའི་སྒྲུབ་པ་པོ་དམ་ཚིག་དང་ལྡན་པས། གནས་ཁང་ཡིད་དང་མཐུན་པར་འཕགས་པ་རྡོ་རྗེ་རྣམ་པར་འཇོམས་པའི་ལྷ་སུམ་ཅུ་རྩ་ལྔའི་དཀྱིལ་འཁོར་བཞེངས་ལ། བུམ་པ་ཡང་ལྷའི་གྲངས་དང་མཉམ་པ་ལ། སོ་སོའི་མཚན་མས་བཏབ་ལ་དར་སྣ་ཚོགས་པའི་
མགུལ་ཆིངས་ཀྱིས་གདགས་སོ། །དཀྱིལ་འཁོར་གྱི་ཕྱོགས་བཞིར་ཀུན་དུ་ཤུག་པ་དང་སྨྱུག་མ་དང༌། འདམ་བུ་དང་སེང་ལྡེང་གི་ཤིང་གི་ལོ་མ་དང་འབྲས་བུར་བཅས་པ་རིམ་པར་འཁོར་བར་གཟུགས་སོ། །སྟེང་ནས་དར་དམར་པོའི་ཡོལ་བས་དགབ། གནས་ཁང་གི་ལོགས་རྣམས་སུ་ཡང་དེ་བཞིན་གཤེགས་པའི་སྐུ་རིས་སུ་བྲིས་པ་དང༌། འབུར་དུ་བཏོད་པ་དང༌། ལུགས་སུ་བླུགས་པ་ལ་སོགས་པའི་རྟེན་རྣམས་དགྲམ། པུ་སྟི་དང་གླེགས་བམ་ལ་སོགས་པ་ཡང་དགྲམ། དེ་ནས་མཆོད་པའི་བྱེ་བྲག་སྤོས་ཀྱི་རེང་བུ་སྟོང༌། ཡོན་ཆབ་སྟོང༌། མར་མེ་སྟོང༌། བཤོས་གཙང་སྟོང༌། མེ་ཏོག་སྟོང༌། གཏོར་མ་དེ་སྙེད་ཅིག་ཏུ་བཤམ་མོ། །ཤར་དུ་གདུགས་རྒྱ་ཤོག་ལས་བྱས་པ་དཀར་པོ་སྟོང༌། ལྷོར་བ་དན་སེར་པོ་སྟོང༌། ནུབ་ཏུ་རྒྱལ་མཚན་སྟོང༌། བྱང་དུ་འཕེན་ཁ་དོག་སྣ་ཚོགས་སྟོང་བཤམས་ལ་གནས་ཁང་གི་མཐའ་མ་ཐམས་ཅད་དུ་རྩྭ་ཀུ་ཤ་དང་དཱུར་བས་ཁྱབ་པར་དགྲམ་མོ། །སྔགས་པ་དམ་ཚིག་དང་ལྡན་པ་དགུའམ་བཅུ་གཅིག་གོ །གཅིག་གིས་ཤར་ཕྱོགས་སུ་རྒྱུད་སྟོང་ཕྲག་གཅིག་ཀླག །གཅིག་གིས་ལྷོ་ཕྱོགས་སུ་ཆུ་གཏོར་སྟོང་ཕྲག་གཅིག་གཏང༌། གཅིག་གིས་ནུབ་ཏུ་ཆུ་སྦྱིན་སྟོང་ཕྲག་གཅིག་གཏང༌། གཅིག་གིས་བྱང་དུ་མཆོད་རྟེན་སྟོང་གདབ། གཅིག་གིས་ཤར་ལྷོ་ནས་མཆོད་པ་བྱ། གཅིག་གིས་ལྷོ་ནུབ་ནས་བསྟོད། གཅིག་གིས་ནུབ་བྱང་ནས་གཏོར་མ་གཏང༌། གཅིག་གིས་བྱང་ཤར་དུ་ཡི་གེ་བརྒྱ་པ་སྟོང་ཕྲག་གཅིག་བཟླས། བདག་ཉིད་ཀྱིས་སྙིང་པོ་རྒྱས་བསྡུས་ལ་ཅི་རིགས་རྒྱུན་མ་ཆད་པར་བྱའོ། །འབྲུག་གི་ཉི་མ་ལ་གཏད་ལ་ཞག་གསུམ་དུ་དེ་ལྟར་བྱ་སྟེ། བཟའ་བ་དང་བཏུང་བའི་བྱེ་བྲག་སྣ་ཚོགས་པ་ལ་ལོངས་སྤྱད། གནས་ཁང་གི་ཕྱོགས་བཞི་དབུས་དང་ལྔར་འབུམ་ལྔ་ཀླག་པ་ལ་སོགས་པ་དགེ་སྦྱོར་གྲུབ་ཚད་དུ་བྱའོ། །བདག་ཉིད་ཀྱི་དཀྱིལ་འཁོར་གྱི་ལྷ་རྣམས་སྤྱན་དྲངས་ལ་སྡིག་པ་མི་དགེ་བའི་ལས་ཅི་བྱས་པ་རྣམས་བཤགས་སོ། །དེའི་འོག་ཏུ་འདོད་པའི་དོན་ལ་གསོལ་བ་གདབ་བོ། །གྲུབ་ན་གཞན་ལ་སྟོན་མོ་རྒྱ་ཆེ་བ་བྱ། དེ་ནས་འབྲུག་གི་ཉི་མ་ལ་གཏོར་མ་ལ་སོགས་པའི་རྫས་རྣམས་འབབ་ཆུ་ཆེན་པོ་ལ་བསྐྱལ་ལོ། །གྲོང་ཁྱེར་གྱི་ཤར་ཕྱོགས་སུ་དུང་
སྣ་ཚོགས་པའི་སྒྲ་ཆེན་བསྒྲག་ཅིང་གདུགས་དང་རྒྱལ་མཚན་བསྒྲེང༌། ལྷོ་རུ་རྔ་སྣ་ཚོགས་པའི་སྒྲ་བསྒྲག་ཅིང་བ་དན་བསྒྲེང༌། ནུབ་ཏུ་ཆ་ལང་དང༌། གཎྜཱིའི་སྒྲ་དང༌། ཅང་ཏེའུའི་སྒྲ་བསྒྲག་ཅིང༌། རྟ་དང་གླང་པོ་ལ་ཞེན། བྱང་དུ་དྲིལ་བུ་དང་ཕེག་རྡོབ་ཀྱི་སྒྲ་སྒྲོག་ཅིང་དར་སྣ་ཚོགས་པ་ཕྱར་རོ། །དེ་ནས་ཚོགས་ཅི་རིགས་པར་བསག་ཅིང་བཤགས་པ་རྣམས་བྱའོ། །དེ་ལྟ་བུའི་ཆོག་ལན་གསུམ་མམ་བདུན་བྱས་ན། རྣལ་འབྱོར་པ་དེའི་བསོད་ནམས་ཕྱོགས་ཐམས་ཅད་དུ་ཤིང་སྐམ་པོ་ལ་མེ་འབར་བ་བཞིན་དུ་འགྲོ་བར་ངེས་སོ། །བསོད་ནམས་འཕེལ་བར་བྱེད་པའི་དཔལ་ཡེ་ཤེས་ཀྱི་ཕྲེང་བ་ཞེས་བྱ་བ། སློབ་དཔོན་ཡེ་ཤེས་རྡོ་རྗེས་མཛད་པ་རྫོགས་པའོ།