སྒྲ་མཐར་གྱིས་རྣལ་འབྱོར་པའི་ལུས་སེམས་ཀྱི་འབྲེལ་པ་གཅད་པ།
མར་མེ་མཛད་བཟང་པོ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །མཐར་གྱིས་པའི་མན་ངག །སྒྲ་མཐར་གྱིས་པའི་བསམ་གཏན་སྐྱེ་བའི་རིམ་པ་རྫོགས་པའི་རིམ་པ་སྒྲུབ་པ་པོའི་ལུས་སེམས་ཀྱི་འབྲེལ་པ་གཅད་པ་ནི། ལུང་ལྡན་བླ་མའི་མཚན་ཉིད་ལ། སྒྲ་མཐར་མན་ངག་གི་བཅུད་གསལ་བ། སྣོད་ལྡན་དད་ཅན་གྱི་ནང་ཁེངས་ཏེ། རང་གཞན་གཉིས་ཀྱི་དོན་རྫོགས་པས་རྫོགས་པའི་སངས་རྒྱས་ཀྱི་ཐ་སྙད་ཅན། ལུས་སེམས་ཀྱི་འབྲེལ་པ་མི་གནས་སོ། །ཆོས་ཉིད་ཟབ་མོ་སྣང་བ་འདི། སངས་རྒྱས་ཀྱི་སྤྱོད་ཡུལ་དུ་འཁྱེར་བར་འདོད་པས། ལུང་ལས་ཇི་ལྟར་གསུངས་པའི་བླ་མ་མཚན་ཉིད་དང་ལྡན་པ་མཆོག་ཏུ་གཅེས་སོ། །དེ་ལྟ་བུའི་བླ་མ་ལ་སྙིང་པོ་ཟབ་མོའི་མན་ངག་སངས་རྒྱས་ནས་བརྒྱུད་པ་མ་སྟོངས་པ། གནད་དུ་འགྲོ་བའི་ཚེགས་ཆུང་བ་སློབ་མ་སྣོད་དང་ལྡན་པ་སྒྲུབ་པ་ལ་བརྩོན་ཞིང་དད་པ་དང་ལྡན་པས་མཐར་གྱིས་གནས་པའི་བསམ་གཏན་གྱིས། ལུས་སེམས་འབྲེལ་པ་གཅད་པའི་བསམ་གཏན་ལ། བློ་བཀལ་ནས་བསྒྲུབས་ན་རང་དང་
གཞན་གཉིས་ཀའི་དོན་འབྱུང་བ་ནི། ནང་དུ་ཆོས་ཉིད་སྒྲའི་མཐའ་ལས་གྲོལ་བས། རང་དོན་རིམ་གྱིས་རྫོགས་ལ། ཕྱི་ཆོས་ཉིད་སྒྲ་ལ་མཐར་གྱིས་གནས་པ་མ་ཡིན་ཏེ། དོན་དམ་པའི་རང་བཞིན་དུ་གནས་པས་གཞན་དོན་རིམ་གྱིས་རྫོགས་བས་ན། དེ་ལ་སངས་རྒྱས་ཐ་སྙད་ཅེས་བྱའོ། །དེ་ལྟ་བུའི་བསམ་གཏན་གྱི་ཡན་ལག་འཇུག་པའི་མཚན་ཉིད་དང་ལྡན་པ་སྔོན་དུ་བྱས་ནས། ད་ནི་བསམ་གཏན་གྱི་དངོས་གཞི་ལུས་སེམས་འབྲེལ་པ་གཅད་པ་ནི་དགུ་སྟེ། ལུས་འཕོ་བའི་རྟ་ལ་བརྟེན་ནས་ལུས་ཀྱི་རྣལ་འབྱོར་ཇི་ལྟར་བྱ་བའི་རིམ་པ་དང༌། དེ་ནས་རང་སེམས་དོས་བཟུང་ནས་སྐྱོན་དང་ཡོན་ཏན་གྱི་རྣམ་པ་བཙལ་བ་དང༌། དེ་ནས་སེམས་ཀྱི་གནས་པ་བཙལ་བ་དང༌། གནས་པ་རང་ཐོག་ཏུ་གཞག་པ་དང༌། དེ་ལྟར་གནས་ནས་མི་གནས་པའི་ཡེ་ཤེས་སུ་ལ་བཟླ་བ་དང༌། ལ་བཟླ་བ་རང་སེམས་དང་འབྱོར་པའི་དུས་བརྩི་བ་དང༌། སེམས་ཀྱི་རྣལ་འབྱོར་ཇི་ལྟར་བྱ་བའི་རིམ་པ་དང༌། དེ་ཉིད་མཐར་ཐུག་བསམ་གཏན་གྱི་མན་ངག་ཏུ་མ་སོང་ན་ཇི་ལྟར་བཅོས་པའི་རིམ་པ་དང༌། སྒྲའི་མཐའ་མི་ཞེན་པར་ལྟ་བའི་དོན་རྣལ་འབྱོར་པའི་རྒྱུད་ལ་བརྟེན་པ་དང༌། སེམས་ཀྱི་བྱ་བའི་རྣམ་པ་ལས་ཡིད་འབྱུང་བའི་བླ་མས། སྒྲ་མཐར་གྱིས་བསམ་གཏན་དུ་ངེས་པར་སྒྲོལ་བའི་ཚད་བསྟན་པའོ། །དང་པོ་ལུས་འཕོ་བའི་རྟ་ལ་བརྟེན་ནས་ལུས་ཀྱི་རྣལ་འབྱོར་ཇི་ལྟར་བྱ་བའི་རིམ་པ་བསྟན་པ་ནི། ལུས་འབྱུང་བ་རང་རྐྱེན་ལས་འཕོས་པས་ཐུན་མོང་དང་མཆོག་གི་དངོས་གྲུབ་ལོངས་ཅི་དགར་སྤྱོད་པ་དང༌། ལྷའི་སྐུ་མདོག་དང་བཞུགས་ཚུལ་ལ་འཕོས་པས་ཐ་མལ་པའི་བག་ཆགས་ཀྱི་རྒྱུན་གཅད་པ་དང༌། ཆོས་ཉིད་སྒྱུ་མས་ཡེ་ཤེས་སྒྱུ་མར་འཕོས་པས་ལུས་སེམས་ཀྱི་འབྲེལ་པ་རྒྱུན་བཟློག་པའི་གནད་དོ། །འབྱུང་བ་རྐྱེན་ལ་འཕོ་བ་ནི་རྟག་ཏུ་འབྱུང་བ་བཞིའམ་ལྔའི་རྣལ་འབྱོར་དུ་བྱ་སྟེ། སའི་རྣལ་འབྱོར་ནི་ལུས་སྣ་ཚོགས་པའི་ཁྲུས་དང༌། བུམ་བའི་ཆོ་ག་བྱ། དེ་ལྟར་ཆུ་དང་མེ་དང་རླུང་དང་ཁྲུས་བྱ་ཞིང་ལུས་ལ་བུམ་པའི་ཆོ་ག་བྱ་ཞིང༌། ནམ་མཁའི་ཁྲུས་ནི་ལུས་གཅེར་བུར་ཕྱུང་ལ་བདུད་རྩི་ལྔས་ཁྲུས་རྟག་ཏུ་བྱ། དེ་ཡང་སའི་རྣལ་འབྱོར་བྱེད་པའི་དུས་ན། ས་སྣ་ཚོགས་པ་ལ་རིག་སྔགས་བཟླས་པ་བརྒྱ་རྩ་བརྒྱད་བྱས་ན། ཉིན་རེ་ལ་ལུས་ལ་ལན་གསུམ་གསུམ་དུ་བྱུག་ཅིང༌། ལུས་མགོ་མཇུག་ཏུ་བསྐུ་མཉེ་བྱའོ། །ཆུ་ནི་ཁྲུས་ཆོག་དང་མཐུན། མེ་ནི་ཤིང་སྣ་ཚོགས་པའི་
ཡམ་ཤིང་དང༌། བུམ་པའི་ནང་དུ་བཅུག་སྟེ་སྔགས་གོང་ལྟར་བཟླས་ལ་བུམ་པའི་ནད་དུ་མར་དང་ལྡན་པའི་མེ་བཏང་སྟེ། ཉིན་ལན་གསུམ་མཚན་ལན་གསུམ་དུ་སྐྲ་དང་ཁ་སྤུ་ལ་སོགས་པ་རྣམས་བསྲེག །རླུང་གི་རྣལ་འབྱོར་བུམ་པའི་ནང་དུ་ཕྱོགས་བཞི་ཀའི་རླུང་གིས་བཀང་སྟེ། སྔགས་བཟླས་ལ་གང་ནས་རླུང་བྱུང་བའི་ཕྱོགས་སུ་ཁ་བལྟས་ལ་ཁྲུས་ཀྱི་ལས་བྱའོ། །ནམ་མཁའི་ནི་བདུད་རྩིའི་ཁྲུས་བྱས་ལ། ནམ་མཁའ་ལ་བུམ་པའི་ཁྲིའི་སྟེང་དུ་བཞག་ལ་ཕྱོགས་ཀུན་ནས་རིག་སྔགས་ཀྱི་ལྷའི་སྔགས་ཀྱིས་ཐུན་གྱིས་བྲབ་པོ། །དེ་ལྟར་བྱས་པས་ལུས་ཀྱི་སྡིག་པ་ཏིལ་འབྲུ་ཙ་མ་ཡང་མེད་པར་དག་སྟེ། དེ་ལྟར་ལན་གྲངས་བརྒྱ་རྩ་བརྒྱད་བྱས་ན། ལུས་ལ་གནས་མི་སྲིད་དོ། །དེ་ལྟར་རྒྱུན་དུ་བྱས་ན་ཐུན་མོང་དུ་ལུས་འབྱུང་བ་ལ་དབང་སྒྱུར་ནུས་པ་དང༌། མཆོག་ཏུ་རྡོ་རྗེ་འཛིན་པའི་སྐུ་ཐོབ་པས་རྟགས་དང་ཆོ་འཕྲུལ་སྣ་ཚོགས་ལ་ལོངས་སྤྱོད་པའོ། །ལྷའི་སྐུ་མདོག་དང་བཞུགས་ཚུལ་ལ་འཕོ་བ་ནི་བསྐྱེད་པའི་རིམ་པ་དང་འདྲ་སྟེ། ཐ་མལ་པའི་ལུས་ཀྱི་ཞེན་པ་ལ་སོགས་པས་ཡེ་ཤེས་ལྷའི་སྐུར་བཞེངས་པས་ལུས་ཀྱི་ཞེན་པའི་སྡིག་པ་གནས་མི་སྲིད་དོ། །ཆོས་ཉིད་སྒྱུ་མས་ཡེ་ཤེས་སྒྱུ་མའི་ནང་དུ་འཕོ་བ་ནི། ལུས་ཡོད་མ་མྱོང་བས་སྟོང་པར་གསལ་བས་ཆོས་ཉིད་ལས་འགྲོ་ས་མེད་དོ། །དེ་ཉིད་ལས་རང་བཞིན་མེད་པས་རྒྱུན་ཀུན་བརྟགས་སུ་གྲུབ་མ་མྱོང་བས་ཕུང་པོ་གནས་གྱུར་ཏེ། དེ་ཉིད་མཚན་མ་རྫས་གྲུབ་ཡོད་མི་སྲིད་པས་ཡེ་ཤེས་སྒྱུ་ལུས་སུ་གནས་པའོ། །དེ་ལྟར་གནས་པ་ལུས་སྟོང་པ་རང་བཞིན་མེད་པར་སྣང་ལ། སྡིག་པ་རྒྱུ་མེད་པས་སྟོང་པས་གོས་པ་མེད་དོ། །དེ་ཡང་འགྱུར་བའི་དུས་ན་སའི་རྡོ་རྗེ་སེར་པོ་རྒྱ་ཁྱོན་དཔག་ཏུ་མེད་པར་སྣང་བ་དང་དེ་བཞིན་དུ་ཆུའི་རྡོ་རྗེ་དཀར་པོ་མེའི་དམར་པོ། རླུང་གི་ལྗང་གུའོ། །ནམ་མཁའི་མདོག་མཐིང་ག་རྒྱ་དང་ཁྱོན་དཔག་ཏུ་མེད་པ་ལྡང་བར་བྱའོ། །ལྷའི་སྐུར་ལྡང་བ་ཉིད་དུ་ལྡང་བ་དང༌། གསུམ་ནི་སྐུ་གསུམ་དུ་གྲོལ་བའི་གནད་དོ། །རང་སེམས་ངོས་གཟུང་ལ་ཡོན་ཏན་བཙལ་བ་ནི། དེ་ལྟར་བྱས་པའི་ལུས་གསུམ་གྱི་དུས་ན་སེམས་ཇི་ལྟར་གནས་ན། འབྱུང་བའི་དུས་ན་རྒྱུ་རྐྱེན་ཡ་བྲལ་དུ་གནས་པའོ། །འབྱུང་བ་ལྔས་བཅིངས་པའི་སྐྱོན་མེད་པས་འབྱུང་བ་ལྔའི་རྐྱེན་རྡོ་རྗེ་འཛིན་པའི་སྐུ་ཡོན་ཏན་སྣ་ཚོགས་སུ་ཤར་བའོ། །ལྷའི་དུས་ན་
འགྲོ་བ་རང་རྒྱུད་དུ་འཛིན་པའི་ཞེན་པ་རང་དག་ཏུ་གནས་པས། ཕུང་པོ་ལྔས་བཅིངས་པའི་སྐྱོན་མེད་དེ། ཤ་ཁྲག་རྡོས་པའི་རྐྱེན་རྡོ་རྗེ་འཛིན་པའི་གདུང་གི་ཡོན་ཏན་སྣ་ཚོགས་སུ་ཤར་བའོ། །ཡེ་ཤེས་ཀྱི་དུས་ན་ཆོས་ཉིད་ལ་བདག་ཏུ་རྟོག་པ་མི་གནས་པས། དམིགས་པས་བདག་གི་ཆོས་ཉིད་ལ་ཞེན་པའི་སྤྱོན་མེད་པས་འཕྲལ་རྐྱེན་དྲི་མའི་སྐྱོན་རྣམས་འཇོམས། རྡོ་རྗེ་འཛིན་པའི་ཐུགས་ཀྱི་ཡོན་ཏན་སྣ་ཚོགས་སུ་ཤར་བའོ། །སེམས་ཀྱི་གནས་བཙལ་བ་ནི། ཕྱི་ཡུལ་ལ་བཙལ་བ་དང་ནང་སེམས་ལ་བཙལ་བའོ། །ཕྱི་ཡུལ་ནི་སྒོ་ལྔའི་ཡུལ། དབང་པོ་འཛིན་སྣང་དུ་གང་ཤར་ཀྱང་དེ་ཉིད་ལ་མི་སེམས་མི་རྟོག་པ་ནི་སེམས་ཀྱི་གནས་ཏེ། མདོར་ན་ཡུལ་དུ་སྣང་ཚད་ལ་སེམས་གནས་སོ། །ནང་ལུས་ལ་གནས་པ་བཙལ་པ་ནི། རྐང་མཐིལ་ནས་སྤྱི་གཙུག་ཏུ་ལུས་མགོ་མཇུག་ཏུ་ཁྱབ་པར་གནས་ཀྱང་ཁྱད་པར་ལུས་ཀྱི་འཁོར་ལོ་བཞི་ལ་གནས་ལ། བསམ་གཏན་གྱི་དུས་ན་སྤྱི་བོ་བདེ་བ་ན་གནས་སོ། །ལུང་དུ་མ་བསྟན་པའི་དུས་ན་སྙིང་ག་ན་གནས་སོ། །ཉོན་མོངས་པ་སྤྱོད་པའི་དུས་ན་མགྲིན་པ་ན་གནས་སོ། །གཉིད་ཀྱི་དུས་ན་ལྟེ་བ་ན་གནས་སོ། །གནས་པ་རང་ཐོག་ཏུ་གཞག་པ་ནི་ཐ་མལ་པའི་དུས་ན་རང་སྣང་རང་ཤར་དུ་གཞག །ལྷ་བསྒོམ་པའི་དུས་ན་གསལ་སྟོང་དབྱེར་མེད་དུ་གཞག །བསམ་གཏན་ལ་གནས་པའི་དུས་ན་རྒྱུ་བ་དེ་རྐྱེན་གཞག །ལ་བཟླ་བའི་དུས་ན་གཅེར་བཞག་གཅེར་གྲོལ་དུ་གཞག་གོ །གནས་པ་མི་གནས་པའི་ཡེ་ཤེས་སུ་ལ་བཟླ་བའི་དུས་སུ་ནི། སེམས་དེ་དང་པོ་མི་གནས་པར་བྱ། དེ་ནས་གནས་པ་དེ་ཐུན་སྤོས་ཏེ། སྣང་གྲགས་ཀྱིས་བསྡུས་པའི་ཆོས་ཐམས་ཅད་ལ་བསླབ་པར་བྱའོ། །གཉིས་པ་ཡུལ་དང་ཤེས་པ་རྩ་མེད་དུ་གཏང༌། གསུམ་པ་ངོ་བོ་ངོས་གཟུང་མེད་པ་བདག་ཏུ་འཛིན་པ་རང་འགག་པའོ། །ལ་བཟླ་བ་རང་སེམས་དང་འབྱོར་པའི་དུས་རྩི་བ་སེམས་ཀྱི་རྣལ་འབྱོར་ཇི་ལྟར་བྱ་བ་ནི། མི་གནས་པ་གནས་པར་རང་གི་སེམས་ལ་འབྱོར་པའི་དུས་ནི། དང་པོ་ཡུལ་ནི་བདག་ཉིད་མི་གནས་པའོ། །དེའི་དུས་སུ་སེམས་ནི་ཡང་ནས་ཡང་དུ་དགུག་པ་ལ་མཁས་པའོ། །གཉིས་པ་ཡུལ་ཤེས་ཀྱི་རྩ་བ་འདོར་བའི་དུས་ནི་དྲན་པ་རྒྱུན་འགགས་ནས་རླུང་ཕྱི་ནང་དུ་འགྱུར་པ་མེད་པའོ། །དེའི་དུས་སུ་སེམས་ཡང་ནས་ཡང་དུ་འཕང་བ་ལ་མཁས་པར་བྱའོ། །གསུམ་པ་ངོ་བོ་ངོས་གཟུང་གི་
འཛིན་པ་རང་འགགས་པའི་དུས་ནི་ཆོས་དང་གང་ཟག་ལ་མི་གནས་པར་བསམ་གཏན་ལ་ཆེད་དུ་བྱེད་པ་རྒྱུན་ཆད་བའོ། །དེའི་དུས་སུ་སེམས་ཡང་ནས་ཡང་དུ་སྦྱར་བ་ལ་མཁས་པར་བྱའོ། །མཐར་ཐུག་པ་བསམ་གཏན་གྱི་རྣལ་འབྱོར་དུ་སོང་ན་བཅོས་པ་ནི། ལུས་ལ་ཙནྡན་ལྡེ་གུས་བྱུགས་ལ། ཡན་ལག་ཧཱུ༵་དང་ལྡན་པར་བྱ། སེམས་རླུང་གི་འགྲོ་འོད་ལ་སྦྱར་བར་བྱས་ཏེ། གསལ་བར་ཉམས་སུ་མྱོང་པའི་ཤེས་པ་བདེ་གསལ་རང་ཐོག་ཏུ་ཆོད། དེ་སྟོང་པ་རྗེས་མེད་དུ་གྲོལ། །དེ་ཉིད་མཐའ་གང་དུ་དམིགས་པ་དང་བྲལ་བའི་ཉམས་སུ་མྱོང་བ་རྣལ་འབྱོར་པའི་རྒྱུད་ལ་སྐྱེ་བར་ངེས་སོ། །སྒྲའི་མཐའ་ལ་མི་ཞེན་པའི་ལྟབ་དོན་རྣལ་འབྱོར་པའི་རྒྱུད་ལ་སྐྱེ་བ་ནི། ཕྱི་ནང་གི་དམིགས་པ་ནི་ཆེད་དུ་བྱེད་པ་ལ་བློ་ལོག་པས། ཀུན་རྫོབ་ཏུ་ཆོས་ཅན་ཐུན་མོང་དུ་ལྟ་བའི་དོན་རྒྱུད་ལ་བརྟེན་པ་དམིགས་པ་ཙམ་ལས་རང་རྒྱུད་ལ་ཞེན་པ་མེད་པས་དོན་དམ་པར་ཆོས་ཉིད་ཁྱད་པར་ལྟ་བའི་དོན་རྒྱུད་ལ་བརྟེན་པའོ། །དེ་ལྟར་དམིགས་པ་སྒྲའི་རྣམ་པ་ལ་ཞེན་པ་འཇུག་པ་རང་འགགས་པས་དོན་དམ་དང་ཀུན་རྫོབ་གཉིས་སུ་མེད་པའི་སྒྲ་ཙམ་དུ་ཡང་འཇུག་པ་དེ་བྲལ་བའི་ལྟ་བའི་དོན་རྒྱུད་ལ་བརྟེན་པའོ། །སེམས་ཀྱི་བྱ་བའི་རྣམ་པ་ལས་ཡིད་བྱུང་བའི་དུས་སྒྲ་མཐར་གྱིས་བསམ་གཏན་དུ་ངེས་བར་གྲོས་པའི་ཚང་ནི་བསྐྱེད་རྫོགས་གཉིས་ཀའི་སེམས་ཀྱི་བྱ་བ་རྣམས་རང་དག་སྟེ། འཁོར་བ་འདོད་པའི་བློ་གནས་མི་སྲིད་པའོ། །དེ་ལྟར་མི་གནས་པས་བསམ་གཏན་ཟབ་མོ་འགྲོ་ཉལ་འདུག་པའི་རྣམ་པ་གང་དུ་ཡང་འདུག་ཀྱང༌། དེ་ཉིད་ལས་མ་གཏོགས་པ་གཞན་གྱི་སེམས་མེད་པ་ནི་ཚད་དེ། དེ་ལྟར་གནས་པས་བསམ་པ་ཡིད་དགེ་བ་ཞེས་བྱ་བ། དེ་ཉིད་ལས་མི་འགྱུར་བར་བརྟན་པས་སེམས་ལྡང་བ་སྟེ། དེ་ཉིད་ལས་མ་གཏོ་གས་པར་གཞན་སེམས་མེད་པ་ནི་སངས་རྒྱས་ཀྱི་སྤྱོད་ཡུལ་ཉིད་པས་སེམས་ཅན་གྱི་མིང་མེད་དོ། །སྒྲ་མཐར་གྱིས་རྣལ་འབྱོར་པའི་ལུས་སེམས་ཀྱི་འབྲེལ་བ་གཅད་པ། སློབ་དཔོན་ཆེན་པོ་དཔལ་མར་མེ་མཛད་བཟང་པོས་མཛད་པ་རྫོགས་པའི་རིམ་པ་ཕྱོགས་གཅིག་ཏུ་བསྡེབས་པ་རྫོགས་སོ།།