ཁྲོ་བོའི་རྒྱལ་པོ་རྡོ་རྗེ་གནམ་ལྕགས་འབར་བ་ཞེས་བྱ་བའི་དཀྱིལ་འཁོར་གྱི་ཆོ་ག།
རྒྱ་གར་སྐད་དུ། ཀྲོ་དྷ་རཱ་ཛ་ཨ་གུ་ཛྭ་ལ་ཨ་ཁ་བི་ར་ཛ་བཛྲ་མཎྜ་ལ་བིདྷི་ནཱ་མ། བོད་སྐད་དུ། ཁྲོ་བོའི་རྒྱལ་པོ་རྡོ་རྗེ་གནམ་ལྕགས་འབར་བ་ཞེས་བྱ་བའི་དཀྱིལ་འཁོར་གྱི་ཆོ་ག །ཁྲོ་བོ་རྡོ་རྗེ་གནམ་ལྕགས་འབར་བ་ལ་ཕྱག་འཚལ་ལོ། །གཏུམ་དྲག་འཇིགས་པའི་སྒྲ་སྐད་འབྲུག་སྒྲ་སྒྲོགས། །རྗེ་བཙུན་དེ་ལ་ཕྱག་འཚལ་ཏེ། དེ་ཡི་དཀྱིལ་འཁོར་ཆོ་ག་བྲི། །དད་པ་དང་ལྡན་པ། དམ་ཚིག་དང་རང་གི་བརྟུལ་ཞུགས་བསྲུང་བ་རྣམ་པར་རྟོག་པ་མེད་ཅིང་རྒྱུད་གཅིག་པ། བླ་མ་དང་རྡོ་རྗེ་གནམ་ལྕགས་འབར་བ་ལ་མཆོག་ཏུ་གུས་པའི་སློབ་མ་ཡོན་ཏན་གང་ལྡན་པས། དང་པོ་མཎྜལ་དང་ཚོགས་ཀྱི་མཆོད་པ་ཆེན་པོ་བྱས་ནས། བླ་མ་ལ་གསོལ་བ་གདབ་པར་བྱའོ། །དེ་ནས་བླ་མ་ཁྲོ་བ་མེད་པ་སྔགས་དང་ཕྱག་རྒྱ་དང་རྒྱུད་ལ་མཁས་པ། ཐོས་པའི་ཕ་རོལ་ཏུ་སོན་པ། རྒྱུད་འདིར་དབང་ཐོབ་པ། དམ་ཚིག་དང༌། སྡོམ་པ་དང་ལྡན་པ་དེས་ཁྲོ་བོ་བསྐྱེད་ལ་བསྙེན་པ་ལ་ཐུག་པར་བྱས་ནས། སུ་པི་ཏྲིའི་སྔགས་འབུམ་བཟླས་པ་བྱ་བ་ནི་སྔོན་དུ་བསྙེན་པ། དེ་ནས་རྒྱུད་གཞན་ནས་གསུངས་པའི་གནས་ཡིད་དུ་འོང་བ། གང་ཡང་རུང་བར་སོང་ནས་བདུད་རྩི་འཁྱིལ་པའི་སྔགས་བཟླས་པའི་ཆུས་གཏོར་ཏེ། དེར་དཀྱིལ་འཁོར་བྱས་ཏེ། མཆོད་པ་དང་གཏོར་མ་བྱས་ཏེ། རང་གི་ཁྲོ་བོ་དང་ལྷ་མོ་མཆོད་ལ། འབྱུང་པོ་ཐམས་ཅད་ལ་གཏོར་མ་བྱིན་ནས། སའི་ལྷ་མོ་ལས་བླང་བ་ནི། སྐྱོབ་པ་སངས་རྒྱས་ཐམས་ཅད་ཀྱི། སྤྱོད་པའི་ཚུལ་དང་ཁྱད་པར་དང༌། ས་དང་ཕ་རོལ་ཕྱིན་པ་ལ། ལྷ་མོ་ཁྱོད་ནི་དབང་དུ་གྱུར། སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་ལྟར་བདག་གིས་བདུད་ཀྱི་སྡེ། བམ་པར་བྱས་ཏེ་དཀྱིལ་འཁོར་བྲི། །ཞེས་བརྗོད་ལ། ཐལ་མོ་ས་ལ་བརྡབས་པ་ལས། སའི་ལྷ་མོ་སྐུ་ཕྱེད་ཙམ་འཐོན་ནས་འདུག་པ་ལས། ངས་སེམས་ཅན་གྱི་དོན་དུ་དཀྱིལ་འཁོར་བྱེད་པས། བདག་ལ་ས་བྱིན་ཅིག་ཅེས་བརྗོད་པ་ལས། ཁྱོད་དཀྱིལ་
འཁོར་གྱི་བདག་པོ་ཡིན་པས། དཀྱིལ་འཁོར་གྱིས་ཞེས་བརྗོད་ནས་ས་ལ་ཐིམ་པར་བསམ་མོ། །ས་བླང་བའི་རིམ་པའོ། །དེ་ནས་བདུད་རྩི་འཁྱིལ་པའི་རྣལ་འབྱོར་དུ་གནས་ཏེ། དེ་ནས་སའི་ལྷ་མོ་ནམ་མཁའ་ལ་གཤེགས་པར་བསྒོམས་ལ། ས་བརྐོ་སྟེ་སའི་རོ་རྣམ་ལྔ་བསལ་ལ། །དེར་རིན་པོ་ཆེ་ལྔ་དང་འབྲུ་ལྔ་དང་ལྡན་པའི་བུམ་པ་གཅིག་ལ་སླར་རང་གིས་ས་དགང་ངོ༌། །དེ་ནས་དཀྱིལ་འཁོར་ཉིས་འགྱུར་དུ་སྤོས་ཆུའི་ཆག་ཆག་དང་བའི་རྣམ་པ་ལྔས་བྱུག་གོ །དེ་ནས་རྡོ་རྗེ་སློབ་དཔོན་གྱིས་དཀྱིལ་འཁོར་གྱིས་དབུས་སུ་གནས་ནས། སྟོང་པ་ཉིད་སྔོན་དུ་འགྲོ་བས་ལྷའི་ང་རྒྱལ་བྱའོ། །ས་གཞི་ཐམས་ཅད་སྟོང་པའི་རང་བཞིན་ལས། ཧཱུ༵་ལས་རྡོ་རྗེའི་ས་གཞིར་བསྒོམས་ནས། དེའི་དབུས་སུ་ང་རྒྱལ་གྱིས་གནས་པར་བྱས་ལ། ལྷའི་ང་རྒྱལ་ཅན་དག་གི་དཀྱིལ་འཁོར་བྲིས་པར་གསོལ་བ་བཏབ་ནས། དཀྱིལ་འཁོར་ནམ་མཁའ་ལ་བཏེག་ལ། རྡོ་རྗེ་སློབ་དཔོན་གྱི་མིག་ཏུ་མ་དང༌། ཨ་ལས་གྲུབ་པའི་ཉི་མ་དང༌། ཟླ་བ་འོད་འབར་བ་དང་བཅས་པར་བསམས་ཏེ། རྐང་པའི་འོག་ཏུ་ཧཱུ༵་ལས་རྡོ་རྗེ་རྒྱ་གྲམ་འོད་འབར་བ་དང་བཅས་པ་བསྒོམས་ནས་ལངས་ཏེ། བྱང་ཤར་གྱི་མཚམས་ནས་བསྐོར་བ་བྱས་ཏེ། རྡོ་རྗེའི་ལྟ་བ་དང༌། །རྡོ་རྗེའི་འགྲོས་དག་གིས་བགེགས་གཞོན་པར་བྱའོ། །དེ་ནས་ཡང་དཀྱིལ་འཁོར་གྱི་དབུས་སུ་འདུག་ནས། རྡོ་རྗེ་འབར་བའི་ང་རྒྱལ་དུ་བྱས་ནས། དེའི་སྙིང་གར་གནས་པའི་ས་བོན་ལས་བྱུང་བའི་ཁྲོ་བོའི་ཕུར་བུ་བསྐྱེད་ནས། བདག་གིས་སྐེ་ནས་བཟུང་ནས་ཕྱོགས་བཅུར་ཕུར་བུ་གདབ་པར་བྱའོ། །ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྚཱ་ན་ཕཊ། ཀཱི་ལ་ཡ་ཀཱི་ལ་ཡ། སརྦ་པཱ་པཾ་ཕཊ། ཧཱུ༵་ཧཱུ༵་ཧཱུ༵་བཛྲ་ཀཱི་ལ་ཡ། །བཛྲ་དྷ་རོ་ད་ཨཛྙཱ་པ་ཡ་ཏི་སརྦ་བིགྷྣཱཾ་ཀཱ་ཡ་བཱ་ཀྩི་ཏྟ་བཛྲ་ཀཱི་ལ་ཡ་ཧཱུ༵་ཕཊ། ཅེས་བདུད་རྩི་འཁྱིལ་པའི་སྔགས་ཀྱིས་གདབ་པར་བྱའོ། །ས་གཟུང་པའི་རིམ་པའོ། །དེ་ནས་དཀྱིལ་འཁོར་གྱི་དབུས་སུ་ཁྲུ་གང་བའི་དཀྱིལ་འཁོར་ཟླུམ་པོར་བྱས་ལ། ལྷའི་གྲངས་དང་མཉམ་པའི་དྲིའི་ཐིག་ལེ་བྱས་ལ། དེར་མེ་ཏོག་གི་ཚོམ་བུ་བཀྲམ་ལ་ས་བོན་ལས་ལྟར་བསྐྱད་ལ། ནམ་མཁའི་ལྷ་བསྟིམས་ལ། ཡེ་ཤེས་ཀྱི་ལྷ་སྤྱན་དྲངས་ལ། ནམ་མཁར་བགེགས་བསྐྲད་ནས་བསྟིམས་ནས། མཆོད་བསྟོད་བདུད་
རྩི་མྱངས་ལ། གསོལ་བ་གདབ་པ་ནི། ཧཱུ༵་བཅོམ་ལྡན་རྡོ་རྗེ་གནམ་ལྕགས་འབར་བ་ནི། །རིག་སྔགས་བདག་པོ་ཕྱག་འཚལ་ལོ། །སྙིང་རྗེའི་ཡིད་ཀྱིས་དཀྱིལ་འཁོར་བྲི་བར་འཚལ། །དེ་ནས་བྱིན་བརླབས་གནང་བ་མཛད་པར་གསོལ། །དགོངས་ཤིག་སངས་རྒྱས་སྡེ་དང་ཚོགས། །ལྷ་རྣམས་བསྟན་ལ་མངོན་དགའ་བ། །དཀྱིལ་འཁོར་བྱིན་བརླབ་དངོས་གྲུབ་མཛོད། །ལེན་གསུམ་བརྗོད་དོ། །ལྷ་ལྷག་པར་གནས་པའོ། །དེ་ནས་གསེར་དང་དངུལ་ལ་སོགས་པའི་བུམ་པ་མཚན་ཉིད་དང་ལྡན་པ་ལ་ལྷའི་གྲངས་དང་མཉམ་པའམ། ཡང་ན་གཉིས་ལ་སྣ་ཚོགས་པདྨའི་སྟེང་དུ་རང་གི་མཚན་ཉིད་བྲི། ལས་ཀྱི་བུམ་པ་ལ་པདྨའི་དབུས་སུ་སྣ་ཚོགས་རྡོ་རྗེ་བྲི་བར་བྱའོ། །གཙོ་བོའི་བུམ་པར་སྨན་ལྔ། འབྲུ་ལྔ། རིན་པོ་ཆེ་ལྔ། དྲི་ཆུ་བདུད་རྩི་ལྔས་བཀང་ལ། བུམ་པ་གཞན་དུ་འང་དེ་བཞིན་ཏེ། མགུལ་ཆིངས་རས་ཟུང་གཅིག་གིས་བཅིང་བར་བྱའོ། །མེ་ཏོག་ཕྲེང་བ་དང་གདུགས་ཀྱིས་བརྒྱན་ཏེ། གདུགས་དཀར་པོ་རེ་རེ་དབུབ་པར་བྱའོ། །ཙུ་ཏ་ལ་སོགས་ཏེ་འབྲས་བུ་དང་བཅས་པའི་ཤིང་གིས་ཁ་བརྒྱན་པར་བྱའོ། །དེ་ནས་གཙོ་བོའི་བུམ་པར་པདྨའི་སྐུ་བསྐྱེད། ཕྱག་རྒྱ་བཞི་དང་ལྡན་པར་བྱས་ལ། ཡེ་ཤེས་སེམས་དཔའ་སྤྱན་དྲངས་བསྟིམས་ལ། མཆོད་བསྟོད་དང་བཟླས་པ་བྱ། དམ་ཚིག་གི་ཁྲོ་བོ་དང༌། ཡེ་ཤེས་ཀྱི་བདུད་རྩི་གཉིས་འདྲེས་པས་ཡེ་ཤེས་ཀྱི་བདུད་རྩིའི་རང་བཞིན་དུ་བྱའོ། །དེ་ནས་བུམ་པ་གཞན་དུ་ཡང་ཤེས་པར་བྱའོ། །ལས་ཀྱི་བུམ་པ་ལ་པདྨའི་སྟེང་དུ་ལས་ཐམས་ཅད་པའི་ཁྲོ་བོ་བསྐྱེད་ལ། ཡེ་ཤེས་བཅུག་ལ་མཆོད་པ་དང་བཟླས་བ་བྱས་ནས། མ་ཞུ་བར་སྐུར་བཞུགས་པར་བསྒོམས་ནས་མ་གྲུབ་བར་དུ་བགེགས་མ་རུངས་པ་བསྲུང་བར་གསོལ་བ་གདབ་བོ། །བུམ་པ་ལྷག་པར་གནས་པའི་ཆོ་གའོ། །དེ་ནས་སློབ་མ་ཤར་ཕྱོགས་སུ་མཎྜལ་ཕུལ་ལ་དེར་འདུག་ལ། རྡོ་རྗེ་སློབ་དཔོན་གྱིས་གཙོ་བོའི་ང་རྒྱལ་བྱས་ལ་གསོལ་བ་གདབ་བོ། །དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། སྐྱབས་
གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་བར་འཚལ། །ཞེས་གསོལ་བ་གདབ་བོ། །དེ་ནས་སློབ་དཔོན་གྱིས་སློབ་མའི་ལག་པ་ནས་བཟུང་ནས། བུ་ཚུར་ཐེག་པ་ཆེན་པོ་ལ། །ཁྱོད་ནི་ཚུལ་ཆེན་སྣོད་ཡིན་ཏེ། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བགྱི། །རྫོགས་པའི་སངས་རྒྱས་གང་འདས་དང༌། །གང་དག་དེ་བཞིན་མ་བྱོན་དང༌། །ད་ལྟར་བྱུང་བའི་རྫོགས་སངས་རྒྱས། །འགྲོ་ལ་ཕན་ཕྱིར་བཞུགས་པ་རྣམས། །དེ་དག་ཀུན་གྱི་ས་གསང་སྔགས་ཀྱི། །ཚོགས་མཆོག་བཟང་པོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུག་དུ། །ཐམས་ཅད་མཁྱེན་པ་ཚད་མེད་བརྙེས། །གསང་སྔགས་སྤྱོད་པ་མཉམ་མེད་པ། །སྐྱོབ་པ་རྡོ་རྗེ་གནམ་ལྕགས་འབར་བ་ཡིས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་འདི་ཡིས་བཅོམ། །དེ་ནས་ཀུན་མཁྱེན་ཐོབ་པའི་ཕྱིར། །བུ་ཡིས་བློ་གྲོས་འདི་གྱིས་ཤིག །དེ་ནས་ཉན་པར་རྣ་བ་གཏོད་པ་དང༌། སྡིག་པ་བཤགས་པ་ལ་སོགས་པ་བྱེད་དུ་བཅུག་སྟེ། དེ་ནས་བྱ་བའི་རྒྱུད་ལ་སོགས་པ་དང་ཐུན་མོང་གི་སྔོམ་པ་དང༌། རྣལ་འབྱོར་བླ་ན་མེད་པའི་ཕས་ཕམ་པ་བཅུ་བཞི་དང༌། སྡོམ་པ་དབོག་པ་ལ་སོགས་པ་དག་ཀྱང་བྱའོ། །དེ་ནས་སློབ་མའི་གནས་གསུམ་དུ་དྲིའི་ཐིག་ལེ་བྱས་ཏེ། རྡོ་རྗེ་དང་འཁོར་ལོ་དང་པདྨ་དག་བསྐྱེད་དེ། དེ་དག་གི་ལྟེ་བར་ས་བོན་གསུམ་བསམ་ཞིང༌། ཨོཾ་ཨཱཿ་ཧཱུ༵་ཞེས་གནས་གསུམ་དུ་རྡོ་རྗེ་གཞག་པར་བྱའོ། །དེ་ནས་མཆོད་དེ་སོ་ཤིང་མེ་ཏོག་གི་ཕྲེང་བས་བརྒྱན་པ། བདུད་རྩི་འཁྱིལ་པའི་སྔགས་ཀྱིས་བཏབ་ལ་སྦྱིན་ནོ། །སློབ་མས་རྩེ་འཆའ་ཞིང་རྩ་བ་བྲུད་ལ་དཀྱིལ་འཁོར་གྱི་དབུས་སུ་དོར་རོ། །ཞི་བ་ལ་སོགས་ཏེ་ལས་དང་དངོས་གྲུབ་ཀྱི་རྟགས་ཤེས་པར་བྱའོ། །སྲུང་སྐུད་ལ་བདུད་རྩི་འཁྱིལ་པའི་མདུད་པ་བོར་ཏེ། དཔུང་པ་གཡོན་པ་ལ་གདགས་པར་བྱའོ། །དེ་ནས་ཀུ་ཤ་ལ་ལས་ཐམས་ཅད་པའི་སྔགས་ཀྱིས་བྱིན་ལ། ཤར་ལྷོ་མཚམས་སུ་མགོ་བསྟན་ལ་ཉལ་ཏེ་རྨི་ལམ་དྲན་པར་བྱའོ། །སློབ་མ་ལྷག་པར་གནས་པའི་རིམ་པའོ། །དེ་ནས་ཡོལ་བའི་ནང་དུ་ལོག་ལ་མཆོད་བསྟོད་དང་བཟླས་པ་བྱའོ། །དེ་ནས་ནང་པར་དཀྱིལ་འཁོར་གྱི་ལྷ་ནམ་མཁར་བཏེག་ལ་ཐིག་གདབ་པར་བྱའོ་
ཚོན་སྣ་ལྔའི་སྐུད་པ་སོ་སོར་སྟོང་པ་ཉིད་ལས་ཡི་གེ་ལྡར་གྱུར་པར་བསམ། དེ་ནས་དེ་དག་གཅིག་ཏུ་བསྒྲིལ་ལ། གསེར་ལ་སོགས་པའི་སྣོད་དུ་བཞག་ལ་བདུད་རྩི་ལྔའམ། སྤོས་ཆུས་བསངས་ཏེ་གཡས་གཡོན་དབུས་དང་གསུམ་དུ་ཨོཾ་ཨཱཿ་ཧཱུ༵་གིས་རིམ་པར་བཀོད་དེ་བཞག། དེ་ནི་དམ་ཚིག་གི་སྐུད་པའི་རིམ་པའོ། །དེ་ནས་མ་དུན་གྱི་ནམ་མཁའ་ལ་བཞུགས་པའི་རིགས་ལྔའི་ཐུགས་ཀ་ནས་ཡེ་ཤེས་ཀྱི་སྐུད་པ་འོད་དུ་གནས་པར་བསམས་ཏེ། རང་གི་མིག་གཉིས་སུ་ཉི་མ་བསམས་ཏེ། དེའི་སྟེང་དུ་ཛཿདྨར་པོ་བསམ། དེ་ནས་མིག་གི་རྫི་མ་འདྲེན་པས། ཡེ་ཤེས་ཀྱི་སྐུད་པ་ཛཿས་དྲངས་ནས་དམ་ཚིག་གི་སྐུད་པ་ལ་གཞུག་གོ །དེ་ནས་མཆོད་པ་ལྔས་མཆོད་དོ། །ཡེ་ཤེས་ཀྱི་སྐུད་པའི་རིམ་པའོ། །དེ་ནས་སློབ་དཔོན་ནུབ་ཏུ་འདུག་ནས། སྐུད་པ་རྡོ་རྗེའི་ཁུ་ཚུར་གཡོན་པས་བཟུང་ལ། གཙོ་བོར་བསྒོམས་ལ། ལྟེ་བར་ཁུ་ཚུར་བཞག་ལ་ཛཿགྶུམ་གྱིས་སློབ་མའི་ལག་ཏུ་གཡས་པས་དྲངས་ཏེ་བྱིན་ལ། ཚངས་པའི་ཐིག་དང་པོ་གདབ་བོ། །ཨོཾ་བཛྲ་ས་མ་ཡ་མཱ་ཏི་ཀྲ་མ་ཧཱུ༵། ཞེས་གྱེན་དུ་བཏབ་པའི་སྒྲས་དེ་བཞིན་གཤེགས་པ་རྣམས་འགྲོ་བའི་དོན་གྱི་དུས་ལ་བབ་པོ་བར་བསྐུལ་ལོ། །དེ་ནས་ཚངས་ཐིག་གཉིས་པ་ཡང་དེ་བཞིན་དུ་གདབ་པར་བྱའོ། །དེ་ནས་ཁ་དོག་གཅིག་པའི་སྐུད་པ་ལས་ཐམས་ཅད་པས་བྱིན་གྱིས་བརླབས་ལ་སའི་ཐིག་བཏབ་ལ། དེའི་སྟེང་དུ་ཡེ་ཤེས་ཀྱི་ཐིག་བཏབ་ལ་སྔ་མའི་ཐིག་བྱིན་གྱིས་བརླབ་པར་བྱའོ། །དེ་ནས་ཡེ་ཤེས་ཀྱི་ཐིག་ལ་མཆོད་པ་བྱས་ལ་སླར་གཤེགས་སུ་གསོལ་ལོ། །དེ་ནས་ཚངས་པའི་ཐིག་དང་པོ་བཏབ་ལ་བྱ་རོག་རྗེས་གཉིས་ལྷོ་བྱང་དུ་བྲིའོ། །དེ་ནས་གཉིས་པ་བཏབ་སྟེ། དེས་ཟུར་བཞིའི་བྱ་རྗེས་བཙལ་ལོ། །དང་པོ་ཤར་གདབ། དེ་ནས་ནུབ་གདབ། དེ་ནས་བྱང༌། དེ་ནས་ལྷོ་གདབ། དེ་ནས་མེ་རླུང་གི་གྲུ་གདབ། སྲིན་པོ་དང་དབང་ལྡན་གདབ། དེ་ནས་ཆ་ཆེན་ཉི་ཤུར་བཏབ་ན་བདེ་བ་ཡིན། དེ་ལ་དབུས་ཀྱི་ཕོ་བྲང་དང་སྒོ་རྟ་བབས་དང་བཅས་པའོ། །རྡོ་རྗེ་རབ་མེ་རི་གཉིས་བཅོ་བརྒྱད་མ་གཏོགས་ཕྱི་ནས་བཙལ་བ་ཐིག་གི་རིམ་པའོ། །དེ་ནས་ཚོན་སྣ་ལྔའི་རིམ་པར་བཞག་སྟེ། སྟོང་པ་ཉིད་ལས་ཡི་གེ་ལྔ་ལས་བསྐྱེད་དེ། དྲི་དང་བདུད་རྩིས་བསངས་ལ། དེ་ནས་སྔ་མ་བཞིན་དུ་ཡེ་ཤེས་ཚོན་འབར་
བའི་ལྟ་བས་སྔ་མ་བཞིན་དུ་བཀུག་ལ་བསྟིམ་ལ། ཨོཾ་བཛྲ་ཙི་ཏྲས་མ་ཡ་སྟྭཾ་ཞེས་བཟླས། དེ་ནས་བྱང་ཤར་མཚམས་ནས་དཀར་པོ་དྲངས་ཏེ། མཛུབ་གང་བླ་མའི་ལག་པ་གཡོན་པས་བྲིའོ། །དེ་ནས། ཆོས་དབྱིངས་འདི་ནི་དག་པ་སྟེ། །སེམས་ཅན་ཁམས་ཀུན་སྒྲོལ་བྱེད་པ། །རྒྱལ་བ་རྡོ་རྗེ་གནམ་ལྕགས་མཆུ་འབར་ཉིད། །དེ་བཞིན་གཤེགས་པ་ཀུན་གྱི་གནས། །ཞེས་བརྗོད་དེ། དེས་མཆོད་ལ་རིན་པོ་ཆེའི་སྣོད་ཀྱིས་བཀབ་ལ་གཞག་གོ །དེ་ནས་དབུས་ནས་བྲི་བར་བྱ་སྟེ། རྡོ་རྗེ་རྩེ་ལྔ་རྒྱ་གྲམ་རྡོ་རྗེ་ར་བར་ལྡན་པ། དེ་ནི་དབུས་ཀྱི་དཀྱིལ་འཁོར་ཡིན། །དེ་ནས་ཕྱི་ཡི་ཟླུམ་པོ་ནི། །འཁོར་ལོ་རྩིབས་བཅུའི་ལྟེ་བ་བྱ། །དེ་ཡི་ཕྱི་རིམ་རྡོ་རྗེའི་རབ་བྱ། །གྲུ་ཆད་སྣམ་བུ་བཞི་དང་ལྡན། །གྲུ་བཞི་པ་ལ་སྒོ་བཞི་པ། །རྟ་བབས་བཞི་དང་ཡང་དག་ལྡན། །དྲིལ་བུ་དང་ནི་འཕན་ལ་སོགས། །མེ་ཏོག་ཕྲེང་བ་རྣམས་ཀྱིས་བརྒྱན། །གྲྭ་རྣམས་དང་ནི་སྒོ་ཁྱུད་དུ། །རྡོ་རྗེ་རིན་ཆེན་སྤྲས་པ་དང༌། །དེ་བཞིན་ཟླ་བ་ཕྱེད་པས་བརྒྱན། །རྡོ་རྗེའི་ཕྲེང་བ་དང་པདྨའི་ཕྲེང་བ་བྱའོ། །མཚན་མ་དགོད་པ་ཡང་རྡོ་རྗེ་རྒྱ་གྲམ་གྱི་ལྟེ་བ་ལ་རྡོ་རྗེ་དྲིལ་བུ་དགོད་པར་བྱ། ཤར་གྱི་རྡོ་རྗེའི་རྩིབས་རྩ་ལ་རལ་གྲི་བྲི། ལྷོའི་རྡོ་རྗེའི་རྩིབས་རྩ་ལ་སེང་ལྡེང་གི་ཕུར་བུ། ནུབ་ཀྱི་རྡོ་རྗེའི་རྩིབས་རྩ་ལ་གནམ་ལྕགས་ཀྱི་ཐོ་བ། བྱད་གི་རྡོ་རྗེའི་རྩིབས་རྩལ་ལྕགས་ཀྱུ་ཞགས་པ་དགོད་དེ། དེ་དག་ནི་ནང་གི་ཕྱག་རྒྱ་དགོད་པའོ། །འཁོར་ལོའི་རྩིབས་བཅུ་དགོད་པ་ནི། ཁྲོ་བོ་བཅུའི་ཕྱག་མཚན་དགོད་དེ་རྒྱུད་གཞན་དང་མཐུན། འཁོར་ལོའི་གྲྭ་བཞིར་ནང་གི་ལྷ་མོ་བཞིའི་ཕྱག་མཚན་དགོད། ལྷ་སྣམ་གྱི་གཞིར་ཕྱི་ཡི་ལྷ་མོ་བཞིའི་ཕྱག་མཚན་དགོད། སྒོ་བཞིར་སྒོ་སྲུང་བཞིའི་ཕྱག་མཚན་དགོད་དེ་རྒྱུད་གཞན་དང་མཐུན། དཀར་པོ་སེར་པོ་དམར་པོ་དང༌། །དེ་བཞིན་དུ་ནི་ལྗང་དང་སྔོ། །སྔོན་པོ་ནང་དུ་ཤེས་བྱ་སྟེ། །འདི་ནི་ཚོན་གྱི་རིམ་པ་ཡིན། །ཤར་ཕྱོགས་སུ་ནི་དཀར་པོ་ཆེ། །ལྷོ་ཕྱོགས་སུ་ནི་སེར་པོ་ཆེ། །བྱང་ནི་ལྗང་གུ་ཡང་དག་ལྡན། །དབུས་ཀྱི་ས་ཡི་ཆ་ཉིད་ནི། །ནག་པོ་མིག་སྨན་བཅག་དང་མཚུངས། །འདི་དག་ནི་དཀྱིལ་འཁོར་བྲི་ཞིང་ཕྱག་རྒྱ་དགོད་པའི་རིམ་པའོ། །དེ་ནས་བུམ་བ་དགོད་དེ། གཙོ་བོའི་བུམ་པ་དབུས་སུ་དགོད། ལས་ཀྱི་བུམ་པ་བྱང་ཤར་མཚམས་སུ་གཞག་སྟེ། ཁྱོད་ཀྱིས་
བགེགས་བསྲུང་བ་གྱིས་ཤིག་ཅེས་བརྗོད་ནས། བིགྷྣཱཾ་ཏ་ཀྲྀ་ཏ་བཟླས། བུམ་པ་གཞན་རྣམས་ནི་དང་པོ་ལྷ་གང་བསྒོམས་པའི་ཕྱོགས་སུ་གཞག་གོ །དེ་ནས་སྦྱིན་སྲེག་གི་ཆོ་ག་ནི། སྒྲུབ་པའི་ཐབས་སུ་རྒྱས་པར་བཤད་པས་འདིར་མ་བྲིས་སོ། །དེ་ནས་མཆོད་པའི་རྫས་ནི། མེ་ཏོག་སྣོད་ནི་བརྒྱ་འམ་སྟོང་ངམ་བཅུའོ། །བདུག་སྤོས་དང་མར་མེ་དང་དྲི་ཆབ་དང༌། ཞལ་ཟས་ཀྱི་སྣོད་བརྒྱ་འམ། སྟོང་ངམ་བཅུ་ལས་ཉུང་དུ་མི་རུང་ངོ༌། །ཨརྒྷཾ་དང་ཞལ་བསིལ་དང་རོལ་མོའི་བྱེ་བྲག་རྣམ་པ་སྣ་ཚོགས་པ་དུང་དང༌། རྫ་རྔ་དང༌། འཁར་རྔ་དང༌། པི་ཝང་དང༌། གླིང་བུ་དང༌། ཌམ་རུ་དང༌། དྲིལ་བུ་གཡེར་ཀ་དང༌། ཕེག་རྡོབ་པ་དང༌། རྔ་རིངས་ལ་སོགས་པ་ཡང་འབྱོར་ཚད་དོ། །གདུགས་དང༌། རྒྱལ་མཚན་དང༌། བ་དན་དང༌། བླ་རེ་དང༌། འཕན་དང༌། སྤྲིན་ཆེན་པོ་ལ་སོགས་པ་ཡང་བྲིའོ། །སློབ་མའི་གྲངས་དང་བསྟུན་པའི་གཏོར་མ་དུ་འབྱོར་བ་དང༌། གཞན་ཡང་ལྷ་རྣམས་ལ་འབུལ་བའི་ཚོགས་ཀྱི་རྫས་དང༌། བདུད་རྩི་ལྔ་དང༌། རས་ཟུང་དང་བཅས་པ་མཆོད་རྫས་འབྱོར་ཚད་པ་ཡང་གཞག་གོ །མཆོད་པའི་རྫས་ཀྱི་རིམ་པའོ། །དེ་ནས་རྡོ་རྗེ་སློབ་དཔོན་གྱིས་དཀྱིལ་འཁོར་ཆ་རྐྱེན་ཐམས་ཅད་ཕུན་སུམ་ཚོགས་པ་ཤེས་ནས་ནི། དེ་ནས་རྒྱན་གྱིས་བརྒྱན་པའི་གུ་རུས་ཁམས་གསུམ་རྣམ་པར་རྒྱལ་བའི་ང་རྒྱལ་བྱས་ཏེ། མེ་ཏོག་གི་ཕྲེང་བ་སྔོན་པོ་བླངས་ཏེ་ཧཱུཾ་བཞིའི་སྔགས་ཟློས་ཤིང་རྡོ་རྗེ་དྲིལ་བུ་དཀྲོལ་ཞིང་དཀྱིལ་འཁོར་ལན་གསུམ་བསྐོར་ཏེ། བལྟས་ལ་ཕྲེང་བ་དེ་བཅོམ་ལྡན་འདས་ལ་ཕུལ་ལ། ཡང་གར་བྱ་བའི་ཚུལ་གྱིས་རང་གི་མགོ་ལ་བཅིངས་ནས་ཕྱག་བྱའོ། །རང་ལྷའི་རྣལ་འབྱོར་དུ་འཇུག་པར་བྱ་སྟེ། དང་པོར་ཁྲོ་བོ་གནོད་མཛེས་ཀྱིས་བགེགས་བསལ་བའི་སྦྱོར་བ་སྔོན་དུ་བྱས་ནས་བླ་མ་མཆོད་པ་དང༌། སྟོང་པ་ཉིད་དང༌། ཡེ་ཤེས་ཀྱི་ཡན་ལག་བསྒོམས་ནས། འབྱུང་བ་རིམ་བརྩེགས་དང༌། གཞལ་ཡས་ཁང་བསྒོམ་པ་དང༌། དམ་ཚིག་བསྐྱེད་ལ་ཡེ་ཤེས་སྤྱན་དྲངས་ཤིང་བསྟིམས་ལ། མཆོད་བསྟོད་བདུད་རྩི་མྱང་བ་ཡན་ཆན་བྱས་ལ། གཏོར་མས་འབྱུང་པོ་ཐམས་ཅད་ཚིམ་པར་བྱས་ལ། དེ་ནས་སྒོམ་པ་སྔོན་དུ་འགྲོ་བས་སློབ་མ་དཀྱིལ་འཁོར་དུ་འཇུག་པའི་དཀྱིལ་འཁོར་སློབ་དཔོན་གྱིས་བསྒོམ་པར་བྱའོ། །ཡེ་ཤེས་ཀྱི་དཀྱིལ་
འཁོར་དང་བསྲེས་ནས་བསང་གཏོར་དང་མཆོད་པ་དང་བདུད་རྩི་མྱང་བ་དང༌། རས་ཟུང་ཐམས་ཅད་དབུལ་བར་བྱའོ། །མཆོད་པའི་རིམ་པའོ། །དེ་ནས་རང་དབང་བླངས་ལ། དཀྱིལ་འཁོར་ལྷ་ལ་དངོས་གྲུབ་ཐམས་ཅད་བསྒྲུབ་པའི་ཕྱིར། སེམས་ཅན་དོན་མཛོད་ཅིག་ཅེས་གསོལ་བ་གདབ་པར་བྱའོ། །ཡང༌། རྡོ་རྗེ་སློབ་དཔོན་དཀའ་ཐུབ་ཆེ། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བགྱི། །ཞེས་རྩེ་མོ་ནས་འབྱུང་བ་བཞིན་དུ་གསོལ་བ་བཏབ་ལ་དཔལ་མཆོག་དང་པོ་ནས་འབྱུང་བའི་གླུས་ཉེ་བར་བསྐུལ་བ་ཞེས་བྱ་སྟེ། ནམ་མཁའ་ལས་བྱུང་མཚན་ལྡན་ཕྱིར།། ཐོག་མ་ཐ་མ་མེད་པའི་མཆོག །སེམས་དཔའི་རྡོ་རྗེ་ཆེ་རང་བཞིན། །རྡོ་རྗེ་འཛིན་པར་བདག་སྒྲུབས་ཤིག །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་སྒྲུབས་ཤིག །ཉེས་པ་མེད་པ་རྟག་པ་སྟེ། །འདོད་ཆགས་ཀུན་གྱི་རྗེས་སུ་ཆགས། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་བདག་སྒྲུབས་ཤིག །ཤིན་ཏུ་དག་པ་ཀུན་གྱི་མཆོག །གདོད་ནས་གྲོལ་བ་དེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །བྱང་ཆུབ་སེམས་སུ་བདག་སྒྲུབས་ཤིག །དངོས་གྲུབ་ཆེན་པོ་མཆོག་གི་མཆོག །དབང་ཕྱུག་ཆེན་པོ་རྒྱལ་བས་རྒྱལ། །གྲུབ་པའི་རྡོ་རྗེ་ཆེ་གསལ་བ། །རྡོ་རྗེ་སྙེམས་པར་བདག་སྒྲུབས་ཤིག །སེམས་ཅན་ཀུན་གྱི་ཡིད་ཁྱབ་པ། །སེམས་ཅན་ཀུན་གྱི་སྙིང་ལ་གནས། །སེམས་ཅན་ཀུན་གྱི་ཡབ་ཉིད་དེ། །འདོད་ཆགས་མཉམ་པའི་དམ་ཚིག་མཆོག ། བདེན་པ་གང་གིས་ཡེ་ཤེས་མཆོག །ཤེས་རབ་ཐབས་ཀྱི་དཀྱིལ་འཁོར་ཡིན། །བདེན་པ་དེ་ཡིས་མགོན་བདག་ལ། །ཁྱེད་ཀྱི་འདོད་བ་རབ་རྫོགས་མཛད། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་བ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་འབྱུང༌། །དེ་བཞིན་ཉིད་ལས་ངེས་པར་སྐྱེས། །བདེན་པ་འདི་ཡིས་དཀྱིལ་འཁོར་དུ། །གཟུགས་བརྙན་གསལ་བར་སློབ་མ་ནི། །ཀུན་གྱིས་དྲི་མ་མེད་མཐོང་ཤོག །དེ་ནས་བདེན་པ་བསྒྲག་པར་བྱ་སྟེ། ཤེས་རབ་ཐབས་དང་དཀྱིལ་འཁོར་གྱི། །བདེན་པའི་བྱིན་རླབས་གང་
ཡིན་པའོ། །མགོན་པོ་ཁྱོད་ཀྱི་བདེན་པ་དེས། །བདག་གི་འདོད་པ་སྐོངས་གྱུར་ཅིག །དེ་ནས་སློབ་མ་ཕྱི་རོལ་ན་གནས་པའི་དྲུང་དུ། ལས་ཀྱི་སློབ་དཔོན་གྱིས་མར་མེ་གདོང་གཡོགས་སྤོས་ཆུ་རྣམས་བཤམས་ཏེ། སློབ་མ་རེ་རེ་ནས་བཀུག་ལ་མཎྜལ་ཕུལ་ལག་ན་མེ་ཏོག་ཐོགས་པའི་སློབ་མས་གསོལ་བ་ལན་གསུམ་གདབ་བོ། །སངས་རྒྱས་རྣམས་ཀྱི་རང་བཞིན་སྐུ། །སློབ་དཔོན་ལ་ནི་བདག་སྐྱབས་མཆི། །གཙོ་བོ་ཁྲོ་བོར་བཅས་པ་ཡི། །ལ་སོགས་པ་བརྗོད་ཅིང་བསམས་ལ། །གདོང་གཡོགས་ལ། རྡོ་རྗེ་ནས་བཟུང་སྟེ་ནང་དུ་གཞུག །དེ་ནས་སློབ་དཔོན་གྱིས། དེ་བཞིན་གཤེགས་པ་ཀུན་གྱི་གནས་ཞེས་པ་ལ་སོགས་པས་གསོལ་བ་གདབ་བོ། །ཁྱོད་སུ་ཡིན་ཞེས་ཀྱང་དྲིའོ། །དཀྱིལ་འཁོར་གྱི་ལྷ་ལ་སྒོ་བཞི་ནས་ཕྱག་བྱེད་དུ་བཅུག །དེ་ནས་སློབ་མ་རྣམ་པར་སྣང་མཛད་དུ་བསྐྱེད་ལ། དེ་ནས་ཨཱ་ཁཾ་བཱི་ར་ཧཱུ༵། རྡོ་རྗེར་གྱུར་བའི་ཡིད་ཀྱིས་སུ། །བྱང་ཆུབ་ཚོགས་ནི་རྫོགས་བྱའི་ཕྱིར། །ལག་པ་སྟོང་པས་མི་བྱའོ། །ཞེས་མེ་ཏོག་འཛིན་དུ་བཅུག་ལ། ཤར་སྒོར་སྟན་ལ་ཧཱུ༵་གིས་གཞག་པར་བྱའོ། དེ་ནས་སྡིག་པ་བཤགས་པ་ནས། དགེ་བའི་རྩ་བ་བསྔོ་བའི་བར་དུ་བྱེད་དུ་བཅུག་ལ། དེ་ནས་སྡོམ་པ་སྦྱིན་པར་བྱ་སྟེ། སངས་རྒྱས་ཆོས་དང་དགེ་འདུན་ཏེ། །ཞེས་པ་ནས་མཆོད་པའི་ལས་ཀྱང་ཅི་ནུས་བགྱི་པའི་བར་དང༌། གང་ཕྱིར་རྡོ་རྗེ་འཛིན་པ་ཡིས། །དངོས་གྲུབ་སློབ་དཔོན་རྗེས་འབྲངས་ནས། །སྔགས་པས་འདི་དག་སྤངས་ནས་ནི། དངོས་གྲུབ་ངེས་པར་ཐོབ་པར་འགྱུར་གྱི་བར་དུ་ཕོག་ལ། སློབ་མས་གཙོ་བོ་འདི་ནི་བདག་ལ་གསོན་ནས། སེམས་ཅན་མྱ་ངན་འདས་ལ་དགོད་ཀྱི་བར་དུ་བརྗོད་ཀྱི་བར་དུ་བརྗོད་ལ་ཁས་བླང་ངོ༌། །དེ་ནས་ཨོཾ་ཨཱཿབིགྷྣཱ་ནྟ་ཀྲྀ་ཏ་ཧཱུ༵་གིས་བསངས་ལ། དེ་ནས་སརྦ་ཡོ་ག་ཙི་ཏྟོ་ཏྤཱ་ད་ཡཱ་མི་ཞེས་པས་རྣལ་འབྱོར་དུ་སེམས་བསྐྱེད་ལ། དེའི་སྙིང་གར་ཧཱུ༵་ལས་རྡོ་རྗེ་བསྐྱེད་དེ། སུ་ར་ཏ་སམ་ཡ་སྟྭཾ་ཧོ། བོ་དྷི་ཙིཏྟ་བཛྲ་སིདྷྱ་ཡ་ཐཱ་སུ་ཁཾ་ཞེས་བརྗོད་དེ། སྙིང་གར་རྡོ་རྗེ་གཞག་གོ །དུས་འདིར་ཁྱོད་ཉིད་ནི་སངས་རྒྱས་གྲུབ་པར་གསུངས། གང་ཞིག་འདི་ཉིད་མ་མཐོང་བའི། །མདུན་དུ་སྨྲ་བར་མ་བྱེད་ཅིག །བག་མེད་སྨྲས་ན་ཉམས་པར་འགྱུར། དེ་བས་ནན་ཏན་གནས་པར་བྱའོ། །རྡོ་རྗེ་གནམ་ལྕགས་འབར་
བའི་དེང༌། །ཁྱོད་ཀྱི་སྙིང་ལ་ཡང་དག་ཞུགས་མཛད་དེ། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་བཀས་ཏེ་གཤེགས། དེ་ནས་པདྨའི་སྣོད་ནས་དྲི་དང་བདུང་རྩི་ལྔའི་ཆུ་སྦྱིན་མགོར་རྡོ་རྗེ་བཞག་ལ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེགས་པར་བྱེད། །དམ་ཚིག་བསྲུངས་ན་དངོས་གྲུབ་ཐོབ། །འཐུངས་ཤིག་རྡོ་རྗེ་ཆུ་འཐུངས་ཤིག །ཨོཾ་བཛྲ་ཏྐ་ཋ་ཋ་ཋ་ཋ། དེང་ནས་བཙམས་ཏེ་ཁྱོད་ཀྱིས་རྡོ་རྗེ་གནམ་ལྕགས་འབར་བང་ཡིན་གྱིས། དས་གང་གྱིས་ཤིག་བསྒོ་བ་དེ་ཁྱོད་ཀྱིས་བྱ་དགོས་སོ། །ཁྱོད་ཀྱིས་ང་ལ་བརྙས་པའི་ལས་མ་བྱེད་ཅིག །ཁྱོད་མི་བདེ་བ་མ་སྤངས་པར་ཚེའི་དུས་བྱས་ནས། །སེམས་ཅན་དམྱལ་བར་སྐྱེས་པར་གྱུར་ཏ་རེ། དམ་ཆུ་བླུད་བའི་རིམ་པའོ། །དེ་ནས་སློབ་མ་ཨ་མི་དེ་བར་བསྒོམས་ལ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ལ། རྡོ་རྗེ་སེམས་དཔའ་བདག་ལ་དབབ་པར་གྱུར་ཅིག་ཅེས་བརྗོད་ནས་མན་ངག་ཇི་ལྟ་བ་བཞིན་དུ་ཡེ་ཤེས་དབབ་བོ། །དེ་ནས་མཐོང་བ་དྲི་བར་བྱའོ། །དེ་ནས་མེ་ཏོག་དོར་བ་ནི། ཇི་ལྟར་དེ་བཞིན་བསོད་ནམས་ལྷའི། །རིགས་ཀྱི་བྱེ་བྲག་འདི་ལའོ། །རིགས་ཀྱི་ནང་ན་འདི་བཟང་ངོ༌། །དེ་ཡི་དངོས་གྲུབ་འདི་འབྱུང་བས། །དེ་ཡི་བསོད་ནམས་རྗེས་འབྱུང་བའོ། །དེ་འདྲ་བའི་དཀྱིལ་འཁོར་འདི་ལའོ། །ཞེས་བརྗོད་ནས་མེ་ཏོག་དོར་བར་བྱའོ། །པྲཏཱི་ཙྪ་བཛྲ་ཧོཿཞེས་བརྗོད་པར་བྱའོ། །ལྷ་གང་ལ་འབེབས་པ་དང༌། སྐུའི་སྟོད་སྨད་ལ་སོགས་པའི་བྱེ་བྲག་གིས་དངོས་གྲུབ་བཟང་ངན་དག་འབྱུང་བར་ཤེས་པར་བྱའོ། །མེ་ཏོག་དང་ལྷས་ཀྱི་རིམ་པའོ། །གདོང་གཡོགས་དགྲོལ་བ་ནི། རྡོ་རྗེ་སེམས་དཔའ་དེང་ཁྱོད་ཀྱི། །མིག་འབྱེད་པར་ནི་བཙོན་མཛད་དེ། །རྡོ་རྗེ་མིག་ནི་བླན་མེད། །ཕྱེ་བས་ཐམས་ཅད་མཐོང་བར་འགྱུར། །ཧེ་བཛྲ་པཱ་ཤྱ། ཨོཾ་བཛྲ་ག་ཤ་ན་ཙཀྵུ་ཙཀྵུ་པྲ་བི་ཤ་ཕཊ། ཅེས་པས་གདོང་གཡོགས་དགྲོལ་ལོ། །དེ་ནས། དཀྱིལ་འཁོར་བཟང་པོ་འདི་ལ་ལྟོས། །ང་ནི་དད་པ་རབ་ཏུ་བསྐྱེད། །བྱ་བ་ལ་སོགས་པ་བརྗོད་ལ། ལྷ་ངོ་བསྟན་ཏོ། །དེ་ནས་བུམ་པ་རྣམས་ཀྱི་ཆུ་ལྷན་ཅིག་ཏུ་བསྡུས་ལ། སློབ་མའི་སྤྱི་བོར་དབང་བསྐུར་བ་སྦྱིན་ཏེ། ཨོཾ་ཨ་བྷིཥི་ཉྩ་སྤྱི་བོར་ཆུ་བླུགས་ལ་རིགས་ཀྱི་བདག་པོ་མི་བསྐྱོད་པས་བརྒྱན་པར་བསམ་མོ། །དེ་ནས་དབུ་རྒྱན་སྟོང་པ་ཉིད་ལས་བྲཱུ་ཛྲཱེ་ཨཱ་་ཁ༵་ཧཱུ༵་ལས་རིགས་ལྔར་བསྐྱེད་དོ། །སངས་རྒྱས་
ལྔ་དེར་བཅུག་ལ་སློབ་མའི་མགོ་ལ་བཞག་ལ། ཨོཾ་རཏྣ་ཀུ་ལ་མུ་དྲ་ཨ་བྷི་ཥིཉྩཱ་མི་ཞེས་བརྗོད་དེ་དབུ་རྒྱན་གྱི་དབང་བསྐུར་རོ། །དེ་ནས་རྡོ་རྗེ་སྟོང་པ་ཉིད་ལས་པཾ་ལས་ཨ་མི་དེ་བར་བསྐྱེད། བཀུག་ལ་མཆོད་དེ་གྱུར་པ་ལས་རྡོ་རྗེར་བྱས་ལ་སྦྱིན་ནོ། །ཨོཾ་བཛྲ་ས་མ་ཡ་ཨ་བྷི་ཥིཉྩཱ་མི་ཞེས་བས་ལག་ཏུ་སྦྱིན་ནོ། །དེ་ནས་དྲིལ་བུ་སྟོང་པ་ཉིད་ལས་དོན་ཡོད་གྲུབ་པར་བསྐྱེད་པ་དང༌། བཀུག་ལ་མཆོད་དེ་སླར་དྲིལ་བུར་བྱས་ལ། ལག་པ་གཡོན་པར་དྲིལ་བུ་གཏད་ལ། ཨོཾ་ཨ་དྷི་བ་ཏི་ཨ་བྷི་ཥིཉྩཱ་མི་ཞེས་བདག་པོའི་དབང་སྦྱིན་ནོ། །དེ་ནས་རྡོར་དྲིལ་གཉིས་སློབ་མའི་མགོར་བསྣོལ་ཏེ་བཞག་ནས། མིང་གི་དབང་རྣམ་པར་སྣང་མཛད་ཀྱི་རང་བཞིན་ཆོས་ཀྱི་རྣམ་པར་སྣང་བའི་བདག་ཉིད་སྦྱིན་པར་བྱ་སྟེ། ཨོཾ་བཛྲ་སཏྭ་ཨ་བྷི་ཥིཉྩཱ་མི་བཛྲ་ནཱ་མ་ཨ་བྷི་ཥེ་ཀ་ཏ་ཞེས་བྱིན་ལ་ཀྱེ་དཔལ་ཆེ་གེ་མོ་ཞེས་ལྷ་གང་ལ་མེ་ཏོག་བབས་པའི་ཞབས་ཀྱིས་མཚན་པའི་མིང་གི་དབང་བསྐུར་རོ། །འདི་ནི་རིག་པའི་དབང་ལྔའོ། །རྡོ་རྗེ་སློབ་དཔོན་དུ་དབང་བསྐུར་བ་སྦྱིན་པར་བྱ་སྟེ། བདག་གཞན་དོན་ནི་རྫོགས་བྱེད་པ། །རྡོ་རྗེ་སློབ་དཔོན་དབང་ཡིན་ཏེ། །ཐུགས་རྗེའི་བདག་པོ་སྩལ་དུ་གསོལ། །ཞེས་ཞུས་པས་དེ་ནས་ཧཱུ༵་ལས་རྡོ་རྗེ་སེམས་དཔའ་བསྐྱེད་ལ་མཆོད་དེ་སླར་རྡོ་རྗེར་བསྐྱེད་ལ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་ཉིད་བདག །ཕྱག་ན་རྡོ་རྗེའི་སྐྱེས་བུའོ། །ཞེས་བརྗོད་ནས་རྡོ་རྗེ་སྦྱིན་ནོ། །འདི་ནི་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོར་བཤད།། རྟག་པར་ཁྱོད་ཀྱིས་གཟུང་བ་ཡིན། །རྒྱལ་བའི་བྱང་ཆུབ་མཆོད་པར་གྱིས། །ཞེས་དྲིལ་བུ་གཡོན་པར་སྦྱིན་ནོ། །སྲིད་པ་ངོ་བོ་ཉིད་ལས་དག །བརྗོད་ལ་དཀྲོལ་ལོ། །དེ་ནས་ལྷག་པར་ལྷའི་སྐུ་ཕྱག་རྒྱ་ཆེན་པོ་བསྒོམ་པ་སྦྱིན་ཏེ། སྲིད་པའི་བདེ་བ་ཤིན་ཏུ་ཆུང༌། །སྡུག་བསྔལ་ཆེན་པོ་ཞི་བྱའི་ཕྱིར། །ཤིན་ཏུ་བདེ་བ་དམ་པའི་ཐབས། །དམ་ཚིག་འདི་ནི་རྟག་ཏུ་བསྐྱེད། །ཅེས་བརྗོད་ལ་གཞལ་ཡས་ཁང་དང་ལྷའི་རྣམ་པར་དག་པ་བསྟན་ཏེ། གདམས་ངག་བཞིན་ནོ། །དེ་ནས་རྗེས་གནང་སྦྱིན་པ་ནི། །འཇིག་རྟེན་ཁམས་ནི་མ་ལུས་པ། །སེམས་ཅན་ཀུན་ལ་ཕན་པའི་
ཕྱིར། །ཆོས་ཀྱི་འཁོར་ལོ་རབ་ཏུ་བསྐོར། །དེ་བཞིན་དུ་རྡོ་རྗེའི་འཁོར་ལོ་དང༌། རིན་པོ་ཆེ་དང༌། པདྨ་དང༌། ལས་ཀྱི་བར་དུ་བསྐུར་རོ། དེ་ནས་དངོས་གྲུབ་ཀྱི་བརྟུལ་ཞུགས་སྦྱིན་པར་བྱ་སྟེ། འདི་དེ་སངས་རྒྱས་ཐམས་ཅད་ཀྱི། །ཕྱག་ན་རྡོ་རྗེའི་ལག་ན་འདུག །རྟག་ཏུ་ཁྱོད་ཀྱིས་གཟུང་བར་གྱིས། །ཕྱག་ན་རྡོ་རྗེའི་བརྟུལ་ཞུགས་བརྟན། །དེ་ནས་སློབ་མ་སངས་རྒྱས་ཤཱཀྱ་ཐུབ་པའི་སྐུར་བསྐྱེད་ལ་བླ་གོས་ཀྱི་མཐའ་མ་ལག་པ་གཡོན་པས་བཟུང་བའི་ཁུ་ཚུར་སྙིང་གར་བཟུང་ལ། གཡས་པ་མཆོག་སྦྱིན་དུ་བྱས་ལ། ལུང་བསྟན་པར་བྱ་སྟེ། སངས་རྒྱས་བྱང་ཆུབ་སེམས་དཔའ་དང༌།། འཕགས་པ་རྣམས་ཀྱིས་མགྲིན་གཅིག་ཏུ། །རྡོ་རྗེ་འཛིན་པར་ལུང་བསྟན་གྱིས། །ཤེས་རབ་ཀྱི་ལུང་བསྟན་སྦྱིན་ནོ། །དེ་ནས་གསང་བའི་ཡེ་ཤེས་བསླབ་པ་ནི། །འདོད་ཆགས་བྲལ་བ་ལྟ་བུ་ཡི། །ཁམས་གསུམ་ན་ཡང་སྡིག་མེད་དོ། །དེ་བས་འདོད་ཆགས་བྲལ་བར་བྱ། །ཁྱོད་ནི་ནམ་ཡང་མ་བྱེད་ཅིང༌། །བདེ་ཆེན་ཐེག་པ་འདི་ལ་ནི། །ཕྱིན་ཆད་ཤི་བ་ཡོད་མིན་ཏེ། །སྡུག་བསྔལ་བསྲིས་པས་མྱ་ངན་འདས། །སྲིད་པ་གཏན་དུ་དངོས་གྲུབ་འགྱུར། །རང་བདག་ཡོངས་སུ་བོར་ནས་ནི། །དཀའ་ཐུབ་སྤྱད་པར་མི་བྱ་སྟེ། །ཇི་ལྟར་བདེ་བར་བསྒྲུབས་ནས་ནི། །སངས་རྒྱས་དངོས་གྲུབ་ཐོབ་པར་འགྱུར། །དེ་ལྟར་སློབ་དཔོན་དཀྱིལ་འཁོར་ནི། །སྔགས་དང་རྒྱུད་ཀྱི་ཕྲིན་ལས་ཅན། །སངས་རྒྱས་དང་ནི་བྱང་ཆུབ་སེམས། །སྙིང་རྗེའི་དབང་གིས་སེམས་ཅན་དོན། །ཁྱེད་ཀྱིས་དཀྱིལ་འཁོར་ཆོ་ག་དག །བརྩོན་པར་བྲི་དང་རྒྱུད་ལ་ནི། །ཉན་དང་བསྒྲུབ་པ་དག་ཏུ་གྱིས། །ཞེས་གནང་བ་སྦྱིན་ནོ། །དབང་དག་རྫོགས་ནས་དཀྱིལ་འཁོར་གྱི་ལྷ་དང༌། བླ་མལ་སྒྲ་སྣ་ཚོགས་དང༌། རོལ་མོའི་བྱེ་བྲག་གིས་མཆོད་ནས་བསྐོར་བ་བྱས་ལ། དཀྱིལ་འཁོར་གྱི་ལྷ་རྣམས་རང་གི་སྙིང་གར་བཀོད་ལ། ཚོགས་དང་ནང་གི་སྦྱིན་སྲེག་གིས་ཚིམ་པར་བྱའོ། །དེ་ནས་ཡི་གེ་བརྒྱ་པ་གདོན། །བཟོད་བར་གསོལ། ཨོཾ་ཨཱཿཧཱུ༵་མུཿས་གཤེགས་སུ་གསོལ་ལོ། །དཀྱིལ་འཁོར་ཕྱགས་ལ་དམན་མ་ལ་སོགས་པ་གཏོར་མ་དང་རོལ་མོས་ཆུ་པོ་ཆེན་པོར་དོར་རོ། །བདག་གིས་དཀྱིལ་འཁོར་ཆོ་ག་ལེགས་སྤྱར་བས། །བསྒྱུར་བ་བསོད་ནམས་གང་ཐོབ་པ། །དེ་ཡིས་ཁམས་གསུམ་འགྲོ་བ་
ཀུན། །དཔལ་ལྡན་གནས་སུ་འགྲོ་བར་ཤོག །ནོར་པར་གྱུར་ན་མཁྱེན་པ་རྣམས་ལ་བཟོད་པར་གསོལ། ཁྲོ་བོའི་རྒྱལ་པོ་རྡོ་རྗེ་གནམ་ལྕགས་འབར་བ་ཞེས་བྱ་བའི་དཀྱིལ་འཁོར་གྱི་ཆོ་ག །རྒྱ་གར་གྱི་སློབ་དཔོན་ཆེན་པོ་ལྷོ་ཕྱོགས་དཔལ་གྱི་རི་ལ་བཞུགས་པའི་བླ་མ་མཻ་ཏྲི་པས་མཛད་པ་རྫོགས་སོ།། །།པཎྜི་ཏ་བལ་པོ་དེ་བ་པུརྞ་མ་ཏི་དང༌། བོད་ཀྱི་ལོ་ཙཱ་བ་མགར་ཆོས་ཀྱི་བཟང་པོས་བལ་པོའི་ཡུལ་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ།།